ردت هديل " شبيج غير بنته مريضه "
ردت اسراء " اي صح بس مو عوايدة اشهر يبقى گلنا شهر شهرين مو هالگد "

سألت هديل " شتقصدين ؟"
ردت اسراء " لاهيج مااقصد "
باوعت الماما " خاله شوفيها حتى هي غيرنها عليه وصارت تطلع سوالف عليه "
حجت ماما " اسراء كافي وانت روحي البنتج "
فعلا ملاحظة اسراء هالفترة متغيرة على هديل ..
صعدت اسراء مااتحملت صعدت وراها ..
" اكلج اسراء شعندج وي هديل "
ردت ببرود :
" ماعندي شي وياها لاتتدخلين "
رديت " بس لاحظت نظراتج الها وكلامج "
ردت " گلتلج لاتتدخلين شغله بيني وبينها معليج اذا اكو شي ماانتظر احد اني اتصرف "
رغم ما اقتنعت بكلامها بس تركتها ونزلت ..
بوسط الدرج حسيت بدوخة مو طبيعية ..
لزمت بالدرج ..
غمضت عيني الى ان راحت الدوخة ..
شافتني بيداء " شبيج ؟"
رديت " ماادري بس دخت "
ردت " خاف فقر دم ؟ وج حتى ضعفانه حيل شنو مسويه دايت خاف "
رديت " لا وين .. اصلا اكل مااهتم "
ردت " لعد اني اروح البيتي سويت كليجات المهيمن وشغلات ياخذهن وياه للقسم "
سألتها " شوكت اجه اشو صاير مينشاف "
ردت " اجه الصبح ونام وهسا طلع وي جماعته "
رديت " تدرين هالجامعة عقلته حتى من يحجي رزن بحجايته "
ابتسمت " گد مااصلي وادعي الله يهديه .. خفت ابني يطلع من الطريق بسبب عمة "
سألتها " شعجب مايتواصلون بعد "
ردت " وين يتواصلون العجوز مريضه خطية وصايرة تنسى.. وقاسم تزوج "
انصدمت " تحجين صدگ ؟ ومرته شسوت "
ردت " شتسوي قابل عندها بنات وين تروح سمعت من اخته اني متزوج وحدة من هذا المكان الجان اليروحله تگول حباها واخذها "
رديت " عاااا قصدج من مكان فوفه وصاحباتها لعد شتتوقعين هو هذا مستوى قاسم "
اتنهدت " اقارن بينه وبين اخوه الله يرحمة والله مثل النسمة وابد ماشال عينه ع الحرام حتى عمتي دوم تحجي وتگول اخذ الزين وخلالي قاسم حتى مايسأل عليها من تزوج لسا "
رديت " خطية والله ليش ماترحولها تجيبيها بين فترة وفترة يمج "
ردت " والله بودي بس اعرف قاسم مايخليها .. گلت باجر اخذ الجهال واروحلهم مادام اخته گالت ماهو يم مرته ذيج مگابلها "
راحت بيداء والتهيت بالعشا .. جانت هنا والجهال مونسيني ..
شذر :
مرت ايام واسابيع واشهر .. ونسر يجيني ساعتين ويروح .. ابد مااعترضت ولا عاتبت مراعية ظروفه ووضعه ..
جانت زمن تجي تلهيني دايما ..
طول ذيج الفترة حزينة على عمتها هي الربتها بعد امها
خطية متأثرة حيل ومكسورة ..

توصفلي احساسها نفس احساسي من توفت عمة خديجة..
تگول " شذر بالگوة سحبوني من تابوتها .. موتنها المايخافن من الله نفسهن القتلن ماما قتلنها ..
سالتها " شمدريج ؟"
ردت " مبينه عمتي متواصله ويانا من يوم الانهزمنا بي ابد لاشكت ولاكالت مريضة .. "
ليش فجاة خابروا بابا گالولة اختك توفت. .
بابا ماراد ياخذني خاف علينا .. بس اني اصريت جان متت لو ماشفتها ..
جانت ملفوفه بقماش ابيض .. ردت افتحها واشوف ملامحها اشتاقيتلها بس ماخلوني گالوا حرام "
وهي تحجي حسيت بقشعريرة بجسمي وكلبي انقبض مااعرف ليش صرت اخاف من سيرة الموت..
جانت تشكيلي مثل العادة حياتها واني اسمع
مرة اواسيها ومرة ابقى محتارة بأمرها ..
بعد ماطلعت خابرتني خالة ..
" وج شذر دريتي " وصارت تضحك
" شكو خاله اول مرة تخابريني تضحكين "
ردت " مادريتي غير اجوني خطابة "
رديت " ع الخير لعد ليش تضحكين هذا حقج "
ردت " ياااا شنو بعد ماشاب ودوه للكتاب "
رديت " شبيج خاله بعدج مو جبيرة "
ردت " لا عيني هو من عمي راد ينطيني العامر رفضت وغيره هواي وماقبلت "
رديت " ياااا همزين مااخذتي عمار ما احبه "
ردت " هو عمار عصبي من يومه "
رديت " لسا اتذكر شلون ضربني وبسببة سقطت ابني لو من گالي بنت حرام شلون اذاني بكلامه .. ولسا ماجاوبتيني على هذا السؤال "
ردت " شذكرج بيها اصلا احنة شمعرفنا هذا يحجي وحدة بعدين ماسالتي منو الخطبني "
سألت " منو ؟"
ردت " صديق سعد ارمل وعندة بنات "
رديت " انت اعرف اذا تشوفين نفسج مستعدة تزوجي احسن مما باقية وحيدة كنت باقية علمود بيبي هسا بعد ماكو داعي تبقين هيج .."
ردت " مو بس بيبيتج اني جانت نفسي كارهة كل رجال ماعندي ثقه باحد . وكل اليجي يخطب يسمع بسالفه امج ينهزم .. والا سعد جان يريد يجبرني على اي احد ومن غير محافظة لو ماامي واكفه بوجهة "
رديت " زين شيگول عليه هذا الرجال زين "
ردت " هو سيد يشتغل وي سعد بالتجارة وحالته زينة .. مرت سعد تگول جنت اروحلهم من مرته عايشة كلش حبابين ويحبها وبناته اكبر وحدة بالمتوسطة "
سألتها " وشلون ماتت "
ردت " يگولون كلاتها وكفن جانت تغسلهن وتعبت حيل بس هو علمود بناته يريد يتزوج عنده اثنين وحدة متوسطة ووحدة ابتدائية "
رديت " اذا حباب وافقي وهم اكسبي ثواب ببناته خطية ماراح يلگن وحدة احن عليهن مثلج "
اتنهدت " واذا عانيت خايفه اخطي هيج خطوة .. خايفه مايحبني وتبقى اعاني وخاصه هو يحب مرته كلش .. وخايفه مااثق بي وتنزرع فجوة بينا "

رديت " العمر يركض خاله .. لاتصيرين مثلي بقى الخوف محاطني لمن العمر يركض .. وهاي اني دخلت بعمر 27 سنه وماعندي طفل .. عيشي حياتج وربي ذني الايتام بلكي الله يباوعلج ويرزقج بطفل يكون سندج بعد عمر طويل "
ردت " والله يا امي مااعرف انت منا .. ومرت سعد هم نفس كلامج .. حتى عمي وعمتي نفس الشي "
رديت " بعد انت بكيفج بس فكري للبعيد اذا كبرتي منو الج كلها تكبر وتتزوج وتشوف حياتها وانت بعدج محتكرج خالو سعد ببيته وميخليج تطلعين الاي مكان"
ضحكت " هاي منو التحجي وكت صارت شذر تنصح وج مو الساني انشل واني اعلم بيج الا من سنه يلة تحركتي… "
رديت " من الانسان يوعى على حاله يتندم على كل الفاته ولان عايشة هيج شعور مااريدج مثلي تتندمين اذا الرجال شاريج وافقي او اكعدي وياه وشوفي كلامه"
ردت " يااا عاد لگيتي سعد بسرعه يفرغلنا الاستقبال ويگلنا سولفوا "
ضحكت على سوالفها الى ان خلص رصيدها . متعودين اثنينا من نحجي ننسى نفسنا ياهي يا اني ينتهي رصيدنا يلة نرتاح ..
صرت ادعيلها الله يهنيها ويسعدها واذا كانت خوش قسمة تصير ان شاء الله..
بعد فترة خابرتني خاله ..
" شذر امي ماگلتلج الا تصير .. اجن اخواته خطبن ومثل ماگلتي .. خليت سعد امام الامر الواقع وكلتلهن هو قابل يتزوج بعد مرته ؟؟
ردن " اي قابل واذا تحبين نخليج تسمعين منه "
رديت " الاحسن اسمع منه ومن بناته مااريد انصدم بعدين "
وجان الرجال يحجي وي سعد وكايله اريد احجي وياها ونتفاهم احنة اثنينا كبار وواعين ..
عاد حجيتها وتورطت هو اجه سعد وگالي الرجال يريد يحجي وياج . صار جسمي يرعش كله وگلتله ما اريد
بطلت.
عاط بيه " هو لعب مو اجن النسوان واتفقتن البسي عباتج وتعاي "
لفيت روحي لف بالعباية ودخلت مدنگة ..
سلم عادي وگال ..
" گالولي رايدة تسمعين رأي .. اني مااغشج واگلج نسيتها لو راح انساها .. بس بناتي كسرن ظهري تبهذلن من ماتت امهن لسا وهاي صارلها سنه .. اذا تقبلين الخاطر هالايتام .. اشيلج على راسي .. ومااقصر وياج واذا لا احترم قرارج،"
سألته " وليش اني ؟"
رد " لان اعرفج شنو والمنطقه كلها تحلف بأسمج وبأخلاقج .. حتى خطوبتج قبل ادري بيها "
هنا صرت ارجف گلت حاله حال القبلة راح يمشي بس يعرف بسالفتنا ..
كمل كلامه " والماضي انت مامسؤولة عنه .. ومايصير تتحملين ذنب غيرج وانت مالج ذنب "
من گال هيج كبر بعيني واحترمته رغم ماخليت عيني بعينه .. رجعت الموافقة بسرعه السعد وحلفت اخلي بناته بين عيوني .. ابد ماحسيت بثقه مثل هسا. حتى اخوي خلص عمرة يعايرني بأختي .. واليجي من يعرف بيها ينهزم ماتشوفين جنت رافضه الزواج نهائي .."

اتنهدت " يمكن هاي جزات الله الج .. ربي يهنيج ويسعدج ان شاء الله "
ضحكت .. شوفي يراد اجيج كم يوم .. لمن يجيب النيشان واجي بحجة تخيطيلي ونحجي ..
رديت " احلى خياط العروستنا "
ضحكت " عزااا لاتحجين هيج فشله والله اصلا هوسة منسوي امي صارلها سنه ومرته هم .. بس لازم اخيط واشتري "
اجة نسر حجيتله فرح حيل من سمع ..
" تستاهل خالتج والله گلبها طيب ماكو مثلها بس نسخة ثانية وهي انت "
ابتسمت " اشتاقيتلك تدري ؟"
ضحك واخذني الحضنه " تعبان شذر اريد انام "
رديت " ليش شبيك حتى وجهك متغير "
رد" مابيه بس نعسان "
اخذتة للغرفه .. نومته سحب ايدي خليج يمي اريد اشبع منج .
نمت بحضنة لمن نام .. بسرعة نام ..
بقيت نايمة يمه الى ان اذن المغرب گمت صليت وسويت عشا ..
اجيت اريد اگعده مايگعد .. انهبطت ..
صرت اتقرب منه واتحسس نفسه .. جان يتنفس ارتاحيت مااعرف ليش خفت من شفته هيج نايم ..
الظاهر تعبان .. صارلة اربع اشهر ماشايف النوم وي ملوكة..
ويخاف عليها لان انشمرت كم مرة.
صار بالليل يبات يمهم خاف كلشي يصير..
وبالنهار يروح للشغل والظهر يمنا ..
وبيوم الدوام يوصي مشتاق بس يخابروه يروح او هذال وهنا يرحون يباتون يمهم ..
جنت من صغري مااحب الاشهر الفردية وفعلا كانت سنة 2011 سنة مزعجة..
بديناها بمرض ملوكة…
ونهايتها كانت صدمة غير متوقعه ابدا ..
خالة بدت بالتجهيزات ..
خيطتلها گلبيات وملابس للبيت..
اخذناها للامام نزعت الاسود.. وبعدها رحت وياها للصالون .
حفت وجهها ورتبت شعرها…
واني هم سويت حواجبي من زواج هنا ممسويتهن يمكن صارلها ست اشهر ..
جنت وياها خطوة خطوة ماقبلت اتركها لدرجة حسيت اني خالتها مو هي خالتي ..
متعلقه بيه حيل .. وكل شوية تكلي شسوي ..
خالو لاول مرة مايعترض على وجودي يمها لان هي طالبه منه اجي يمها او تبطل .. خوش مهددته ..
نسر سمحلي ابات يمهم .. ودنو اخذها وياه البيت اهله
بليلتها سهرنا للفجر ..
رتبنا غراضها كلهن بالجنط ..
سوينالها حنة بسيطة بيناتنا .. وخلينالها حنة .
هي ماعزمت احد لان ماسوت حفله ..
بس بالليل اجت بيبي وجدو باركولها من شافتني فرحت ..
ثاني يوم الصبح ..
رحنا اني ومرت خالو سعد حبابه كلش .
رتبناها ملابسها بالبيت مالتها ..
غرفتها حلوة .. اجن بناته يمنا وجانن اخواته موجودات .

بناته اسمهن زينب الكبيرة ومروة الصغيرة .
الصغيرة فرحانة وتگول وين العروسة ..
بس الكبيرة مبينه راح تعب خاله هواي ..
عاطت باختها لان حجت ..
حقها كبيرة وتفتهم مو صغيرة وتعرف انه اكو انسانه تجي بمكان امها وماتعرفها شنو بعدهي ..
بس كنت مطمأنه خاله راح تكون گد هاي المسؤولية
رتبناهن ورجعنا العلويات گالن نجي ع الساعه خمسة ناخذها ..
استغربت " ليش العريس مايجي "
ردت " لا احنة نجيبها .. مختار هنا ينتظرنا "
باوعت المرت خالو سكتت ..
من طعنا كالت " جائز هم هيج عادتهم "
ماعلقت وسكتت بس خاله شراح نگلها..
رجعنا البيت خالو.
تغدينا وكملنا .. دخلت سبحت شسورت شعرها ورتبته الها .. لبست قفطان وخلت مكياج . طلعت تخبل هي اصلا حلوة ..
اخذنالها صور .. من شافت نفسها بالمراية بس تضحك
" ولجن شسويتن بيه احس روحي مراهقه "
ضحكنا " اصلا انت شباب بس كنتي ظالمة نفسج "
تقى ردت " اي والله تخبل .. دائما اكول الماما ليش ماانت وتتنسين بينا تباعين العمة وعيونها "
باوعتلي مرت خالو وحجت " عيني سماهر الجماعه گالوا ع الخمسه يجون .. هم عادتهم النسوان تجي مو الرجال "
باوعتلي رديت بسرعه " اي صح هي عادت السادة تجي نسوان تاخذ المرة للعريس "
سكتت ماحجت بس تغيرت ملامحها .
اجو الناس بالخمسة اخذوها مااتحملت حضنتها وابجي
جانت مو بس ام الي وانما اخت وصديقه سنين وهي حاملتني وحاملة همومي .. ماشفت مثل طيبة گلبها من بعد عمة خديجة ."
گامت تحجي عليه " كافي بجيتيني .. لج وين رايحة قابل هو احنة بنفس بغداد .. وبس تكولين النسر مايكول يجيبج بسرعه وهسا الوضع اختلف مو مثل قبل شوكت متردين تجيني "
ودعتها وراحت ..
محد راح وياها .. العلويات گالن حتى البنات راح ناخذهم ويانا حتى يبقون براحتهم بالبيت ..
اباوع التقى وعلا مثل حالتي بس يبجون ليش هو العندة عمة لو خاله مثلها شلون مايحبها "
كملت ردت اخابر نسر يجي ياخذني ..
ردت مرت خالو ..
" ابقي يمنا والله تعودنا عليج "
رديت " لا مناك بيتي وزوجي وبنتي مااگدر "
ردن البنات " شوية بس ابقي يمنا وروحي "
بقيت گاعدة يمهن بالاستقبال خالو بعد ماراحت خاله طلع ..
جابولي البنات كيك وعصير اكلت شوية وطلعت موبايلي اريد اخابر ..
باوعت اكو رقم غريب متصل مرتين عليه وماادري التهينا بخالة ..
توقعت وحدة من البنات مغيرة خطها .
رجعت اتصلت عليه ..
ردت وحدة تبجي " انتي شذر موووو "
رديت وگلبي صار يرجف " اي منو انتي ؟ "
عاطت بسرعه " لج شذر بابا مات بابا مات "
هي گالت هيج احس الدنيا كلها افترت بيه .. ورجعت بالسنين لورة الى ماقبل 17 سنة…


يتبع .…

///// البارت السابع والستــون /////
ج2


من سمعت صوت سمر وهي تگلي بابا مات ..
مرن عليه ايام الماضي كلها ..
ابد ماجنت مصدگة ولا ردت اصدگ الا اذا شفته بعيني

التمن عليه البنات ..
" شبيج شذر صاير شي ؟"

رديت ببرود " ابوية مات "
شهگت مرت خالو " عادل مااات شوكت وشلون "

مارديت بسرعه طلعت الموبايل خابرت نسر ..
" وينك نسر بسرعه تعال "

رد " شكو سوولج شي "

رديت " بابا مااات "

ردت اكوم دخت رجعت گعدت صافنه ومصدومة ..
علا جابتلي مي .
شربتني وغسلت وجهي صارت تحجي ..
" لاتصفنين شذر ابجي عيطي مو زين تبقين هيج "

" شلون ابجي وشلون اعيط .. على الجراح التركها بداخلي لو شيناته السواهن وياي .. " احجي بداخلي

اااااه يازمن مو نسيت ليش رجعت ذكرتني وقلبت المواجع عليه ..

اجه نسر طلعت ..
سمعت خاله تخابر بخالو وتحجيله ..

طلعت بسرعه تلگاني للباب " شذر شعرفج ؟"

رديت " ماادري ماادري يمكن سمر خابرتني وگالتلي هاك شوف مخابرتني موووو اي هذا رقم غريب "

رجع اتصل بي ماكو محد يرد ..
صعدني للسيارة وهو استمر يتصل ويحاول..

المشكله مااعرف احساسي حزن لو شنو .. مااحس بشي مصدگة او لا. .
باوعتله " اريد اروح الهم "
رد " اي اخذج بس غير ترد اختج "

رن موبايله ..
باوعله " هذا جدج معناها وصله الخبر "
بسرعه لزمت ايده " لا ترد لاتكلهم العنوان خاف يأذون اخواتي "

رد " لازم نگلهم هذا حقهم وابنهم… لازم يدفنوه بيدهم مهما سوة وياهم راح يبقى ابنهم "

سكتت مارديت ..
فتح خط " هااا حجي .. اي صحيح الخبر .. احنة رايحين ترحون ويانا ؟؟"

سد الموبايل " خلي اوصلج تبدلين ونروح .. جدج وعمامج راح يرحون ويانا "

رحت للبيت بدلت وطلعت ..
طلعت صاروا گبالي سيارات اثنين بيها جدي وعمامي
جدي حيل متأثر .. بس مابين ..

صعدت وي نسر وطلعنا وهم ورانا ..
خفت يكولون الخاله ..
دزيت رساله العلا حتى مايگلولها ..

طول الطريق صافنه ع الشارع .. اتذكر طفولتي وياه شلون كانت..

نسر مستمر يتصل عليها… بالاخير ردت ..
حجة وياها ..
انت سمر
اي اني ..
ابوج متوفي صدگ لو جذب
ردت وهي تبجي " اي صدگ والله انگلبت بي السيارة هو وجماعته ومات قبل ساعه خابرونا وماما وسحر راحوا يشوفوه "

اقشعر بدني واني اسمع كلامها .
سألها " بعدكم ببيتكم القديم "
ردت " لا انتقلنا الغير شارع "
رد " اكتبيلي العنوان ودزيه الي "

سده منها باوعلي " عرفت ساعتها راح يغير عنوانه من اجينه "

بقينا نمشي وهم يمشون ورانا صار الليل يلة وصلنا النفس العنوان الدزته سمر ..

اول ماوصلنا نزل نسر يسأل الجيران دلونا ..
نزلت الباب مفتوح ..
نزل جدي . " بوية شوفيلنا بيا مستشفى خلي نروح "
دخلت واحس ثگل برجلي مااگدر امشي ..
دخلت متفاجأة مستحيل يكون مات… لكيت نسوان مااعرفهن وجنان هم شفتها ..
عيني تدور بالوجوه وهن صافنااات بيه ..

صارت عيني على سمر شافتني اجت تركض حضنتني وتبجي ..
طبطبت على ظهرها..
" اشششش لاتبجين كافي وين امي وسحر "

ردت " لسا مارجعن لان هم بطريق كربلاء صاير الحادث وعلى مايجيبوهم لهنا ؟؟

سألتها "" ووين راحن هسا؟"

ردت " للمستشفى "

طلعت حجيتلهم .
گال نسر هم ياخذوهم الاقرب مستشفى هم منو الخابرهم حتى نفتهم ..

اشرت النسر " مااثق بيهم اذا شفت ماما وسحر لتخلي احد يمسهم"

هز راسه بس شوفي اختج وتعالي ..
رحت السمر سألتها " مااعرف هذا الموبايل الخابروا عليه ماما من الهبطة نسته "

اخذت الموبايل ونطيته النسر ..
رجعت بقيت يم سمر گاعدة ..
النسوان بس يباعن مستغرباتني ..

كلها تسأل منووو .
اباوع للبيت .. يمكن هذا ثالث بيت ينتقل اله واخرها انتقل البيته الدائمي ..

همست جنان " شجابج انت مو رحتي شذكرج بيهم "
رديت " هالشي يخصنا وحدنا "

خابرني نسر گال ..
" امج واختج رجعتهن بسرعه واحنة رايحين للمستشفى النقلوهم الها ..،"

رجعت ماما وسحر… شافني انصدمن سحر انهارت وبودها تموتني " شجابج لهنا ..

سكتت عنها وعي تعيط وتبجي " ادري بيج تتشمتين بي جايه .. "
صاحت بيها ماما " سحر كافي "
باوعتلي " انت شلون عرفتي وليش اجيتي كل الراح يصير بعد اليوم ذنب برگبتج "

عرفتها تقصد جدي وعمامي ..
بقيت ساكته وعيني ع الباب ..
ماادري ليش احسه ماميت .. وكل شوية اباوع واتخيله يدخل ويهجم عليه .. احس هاجس الخوف بدا يتجدد عندي "

جانت سمر تعبانه اخذتها الحضني نامت على كتفي ..
ماما تبجي وعينها عليه ..
كلما اشيل عيني تباوع .. مااعرف نظرات لوم او حقد
بعد ماواسن النسوان امي وطلعن ..

هنا بدأ الحساب ماكو يمنا بس جنان ..
عاطت ماما وهي تبجي " باعي ولج وروح عادل اذا صار شي بيه وببناتي ماارحمج .. الظاهر انت لعنه بحياتنا ومانخلص منج الا تموتينا كلنا "

نزلن دموعي بسبب كلامها " اني لعنه لعد السويتوه بيه شنووو ؟ حاسبتيه بيوم مثل ماحاسبتيني .. انبتي ضميرج قبل لتلوميني ..

اصلا انتو اللعنه بحياتي صرت حتى مااعرف اضوج لو افرح ابجي لو اضحك خليتوني بلا ضمير ورحمة اجذب لو گلت ضجت عليه بس ضجت ع الايام العيشني بيها برعب "

عاطت سحر " اطلعي منا ولي المن اجيتي انت عار عار يرافقنا طول عمرنا "

باوعت الماما " انت گلتيلهن شصار ؟؟ وليش انهزمت لو تهمتوني بتهمة حتى تبرأون نفسكم . گلتيلهن ابوهن شجان يسوي بيه .. گلتيلهن اني ليش مااكدر انزل دمعه عليه… ."

قاطعتني وهي تباوع الجنان " انجبي ولج كافي .. كافي حرام عليج متشوفين حالتي اريد اموت عساني متت ولا جبتج… ."

گامت جنان سحبتني واشرت السمر "
" تعاي اخذي اختج وروحن للغرفه .. كافي مو وكت عتب وعرك عندج ميت وفاتحة اقرن قران صلن اله راح يدفنوه .. وبعدين عود تصافن "

اخذتني سمر ودخلت للغرفه وسدت الباب ..
كعدت ع الجرباية وخابرت نسر ..
گال هسا هم بالمستشفى .. بس تكمل الاجرائات يدفنوه ..
رديت عليه " عليك الله نسر اذا رحت وياهم اريدك تاخذني "

سأل " شتسوين رايحة اصلا بس زلم تروح لاتضوجين نفسج وابقي لمن نرجع "

رديت " لاتخليني اتوسل تعال اخذني مااتحمل اذا مااشوفه اندفن واحجي اخر كلام بينا ماارتاح "

رد " ان شاء الله اخابرج عود "

سديته منه سألتني سمر " عود هو بابا شجان يسويلج؟"

صفنت بوجهها .. مااعرف شنو ارد ..
كملت " من يلمسج هم جنتي تضوجين .. هم تخافين .. هم گدرتي تنسين "

تخبلت من سمعت كلامها نزلن دموعي " انت شتحجين ؟ شيسويلج جان احجي "

دمعت عيونها ..
هو من كبرت بطل مايسوي شي .. بس من حجيتي تذكرت .. جان ينزعني ويبوس بيه . جان يسوي بيه مثل مايسوي وي ماما جنت اشوفهم "

عطت " شنو يسويلج مثل ماما شيسون؟ لطمت على وجهي تخبلت .. خليتها كبالي . تعاي فهميني شلون يسويلج اذاج ؟
" لا بس يضوجني .. هالحجي من زمان صح كبرت بس مانسيت .. اتذكر شغلات .. "

رديت " وليش ماحجيتي ماگلتيلي من سألتج وكت اجيت ليش .. "

ردت " خفت گال اذبحج اذا حجيتي وخاصه الامج .. وبعد بطل يسوي لان گمت اخاف منه وابجي .. ومن كبرت بديت افهم واعرف شنو جان يسوي .. بس ماگدرت اواجهة واحجي وياه .. نسيت وعشت حياتي طبيعي وياه . رغم يحب سحر اكثر مني .. جان يشيلها ينومها برة باليل يخاف عليها واني لا ..

عطت بيها كافي اسكتي… معناها مالامسها مادام تدافع عنه وتحبه .
" شگد عمرج جان "
" بالرابع ابتدائي "

شهگت " مثل ماسوة وياي وبنفس العمر بس اني استمر لحد ماكبرت وانتي خاف يتكرر الماضي وياه تركج قبل لتكبرين وتفهمين بس عباله هالاشياء تنسي وماتنذكر "

ردت " شلون گدرتي تنهزمين ماخفتي "
رديت " منو گال ماخفت ؟ اصلا جنت ميته خوف احس روحي رايحة للموت . كان انتحار بالنسبة الي بس خوفي منه هو الجبرني على هالشي "

اتنهدت " من كبرت صار يحاول ينسيني او يعوضني شنو اريد يجيبلي دللني وخاصه من انجح .. وفعلا نسيت وعشت حياتي الئ اليوم لأجيتي بي وذكرتيني من سألتيني ..
گلتلج لا بس رجعتلي الذكريات كلها بلحظة ..
حتى رقمج حفظته صم ع گد ماقريته .. وجازفت مرة وخابرتج بس كان مغلق وبعدها حسيت هاي اشارة انه اتراجع لان مااعرفج زين وخفت "

مااتحملت السمعته ..
فتحت الباب وطلعت ..
جانت جنان بعدهي موجودة .. سحر مخليه قران تقرا وماما تبجي ..

رحت الها سحبتها من ايدها " گومي وياي گومي "
عاطت " وين تردين بيه عوفيني شيلي ايدج مني "

تركت القران سحر وباوعتلي ..
" انت شبيج اجيتينا حاميه .. ترى المفروض هسا اطردج بالشوارع لو ماليل .. ولو انت متعودة ع الشارع ..
مااهتميت الكلامها ..
سحبتها حيل واخذتها للغرفه ..
قفلت الباب بسرعه وسحر تدگ بيها هي وجنان التگلي " عيب تسوين هيج مهما يكون امج "

باوعتلها وعطت. . " بحياتي ماشفت ام مهملة مثلج انت شنووو؟؟ خلي اني هملتيني وخلتيه ينهش بيه .. من انهزمت ماعرفتي تحافظين على بناتج .. ماخفتي يصير بيهن الصارلي لو عندج عادي "

ردت " انت شتحجين "
رديت " احجي على هاااي .. واشرت على سمر .. والسواه ابوي وياي نفسه سواه وياها .. وين جنتي عنها خلي اني اجذب هي هم جذابه "

ردت بعصبيه " اي جذابه انت القريتي براسها وخلتيها تحجي هيج .. ماتستحين ابوج ميت وتطلعين عليه شغلات ماصايرة .."

جريت سمر " احجيلها انت بلكي تصدگ "
ردت ماما " احجي شقرت براسج .. دوم اگول تشبهين شذر وماخاب ظني "

ردت سمر وهي تبجي " كافي اسكتن كافي .. وانت شذر الحجيته الج منا وانهيه بابا مات ماكو فايده بعد المن ارجع احاسب حاليا ماتجوز عليه الا الرحمة "

عطت بيها " وهو ليش مارحمج ورحمني ليش ماخاف الله بينا وج شلون راح يقابل ربه اليوم وشيگله "

عاطت ماما " كافي كافي شوكت تنسين شوكت .. عساني متت وارتاحيت .. راح عادل وتركني اواجه مصيري وياجن ووي اهلي الوحدي .."

تخربطت حرنا بيها .. سمر حلفتني مااحجي بهذا الموضع بعد وتنسى ..

سحر تعيط وتحجي علينا وتلومنا لان ماما تخربطت ..
خابرني نسر .. من غير حجي اخذت جنطتي ورحت .

لگيته منتظرني بالباب ..
صعدت للسيارة ..

رد " طلعوا قبلنا هم خلي نلحگ بيهم "

طول الطريق جنت ساكته ماحجيت شي بس كلام سمر يرن بدماغي ..

وصلنا النجف غسلوه واخذوه يدفنوه… العرفته من نسر هم جانوا اربعة بالسيارة .. جاية سيارة حمل كبيرة گبالهم .. صديقه يسوق وهو بصفه انضربوا .. هو واليسوق توفوا واصدقائهم بالورة مصابين ..

وصلنا لهناك بقيت بالسيارة مانزلت دفنوه وكملوا ..
جدوا يمسح بدموعه ..

خليتهم يصعدون .. نزلت اله ..
گعدت ع حافه القبر .. وصرت اتباوع للتراب ..
" هسا شلونك ارتاحيت !! ..
شلون نطاك گلبك تروح من غير ماتبرا ذمتك ..
من طلعت روحك هم ذكرتني ..
هم ذكرت سمر ..
لو گلت ذني بناتي وشسوي بيهن عادي !!
شلون راح تلاگي ربك شلون .. رحت وانهزمت من حساب الدنيا بس حزام الاخرة شلون ..

صرت اعيط وابجي على قبره
سحبني بالگوة واخذني ..

حركنا بالسيارة وعيني ع قبرة .. تركته هنا وبهاي الظلمة وتركت وياه كل كوابيسي ..

رجعنا البيت اهلي…
العرفته جان ايجار ..
شفت جدي وعمامي داخلين ..

نزلت ورحت ركض للبيت " نسر بس لايسوولهن شي "
دخلنا .. ماما تعيط ونسر وسمر وراها ..

باوعتلي تفت عليه " رحتي جبتيهم عليه. وج حرام تتسمين بنتي حرام "

عاط بيها عمو عامر " المفروض كتلج حلال هنا .. اذا هو مات وارتاح . فأنتي باقيه ولازم تتعاقبين .."

عطت بي " وانت منو وتعاقب .. اكو الله موجود يحاسب .."

باوعت الجدو " ماتحجي جدو هالحجي مو وكته .."

حجة نسر " راعوا عندكم وفاة .. راح اخذهن وياي ومحد يتعرضلهن .. شتگول حجي ؟"

هز راسه جدو " گومن حضرن غراضجن وروحن وي اختجن البغداد بعد مالجن مكان هنا .. ابوجن راح بس احنة موجودين مانخلي لحمنا بعيد عنا .. وانت ياسماح
لاتزوديها لان ذنوبج واخطائج كثرن "

ردت عليه " اذا جاي تاخذني وتريد تسلمني بيدك السعد فكتلني هسا وريحني "

وگفت بوجههم سحر " يكتلون منووو. هي الدنيا تايهة ابوي دمة بعده مانشف وانتو اتوليتونا .. هسا عرفت ليش عافكم وانهزم "

ضحك عامر " بعدج طفلة والظاهر امج ماحجتلج عملتهم "

صاح نسر " مو وكت هالحجي كافي .. " اشرلي يلة شذر اخذيهن للسيارة ..

راحن لمن غراضهن ..
امي استسلمت للامر الواقع رغم شفت الخوف بعيونها عمو عامر التهى يتعارك وي نسر ويگله انت غريب لاتتدخل بينا ..
لان بكل مرة يهجم على ماما يريد يضربها ونسر يلزمة ويمنعه حتى جدو عاط بي وماقبل ..
" عامر اخذ الولد وارجعوا اني ارجع وي علاء "

طلعن بجنطهن وعينهن عليه ..
اخذ نسر الجنط منهن وطلعن ..

ردت ماما " ع الاقل خلي اسلم البيت للمؤجر واشيل الغراض "
رد نسر " غير مرة نجي عود "

باوعت الجدو وبجت " حتى حرمتني احزن واسوي اله فاتحة "

اتنهد " فاتحتكم نصبناها من زمان .. من يوم الطلعتوا من بغداد "

رجعنا البغداد وجه الصبح الدنيا كشفت ..
سيارة خالو وجدو ورانا ..

طول الطريق ساكتين…
اباوعلهن نايمات على كتف ماما .. هالكتف التمنيت انام عليه عمري كله ..
فتحت عيونها همست وشافتني " اذا صار شي عليه اخواتج بأمانتج .. اما انت ابد لاتوكفين على گبري مثل ماوگفتي ع گبر ابوج .. حتى لو جانت وگفتج شماته"

سكتت ماحجيت .. بس اسم بجيها وحزنها على بابا ..
معقوله الهاي الدرجة تحبه رغم كل الاذيه السببها النا ..
لو خايفه من مصيرها لمن تواجه الكل ومنهم خالو وخاله وشراح يكون موقفها ..

اخذتلي غفة بالطريق ..
گعدت ونسر يحجي وياي " وصلنا "

باوعت دخلنا البغداد .. هالمرة مااجيت وحدي .. اجيت ووياي حمل وعبئ مااعرف شلون اتحمله راح اگدر احميهن منهم لو راح ينظلمن ويتعاقبن بسببي على ذنب مو ذنبهن ..

وصلنا البيتنا .. اشر نسر ننزل وهو ينزل الغراض ..
فتحت الباب دخلت البنات ..
رغم نظرات سحر تريد تاكلني ..
جانت سيارة عمو عامر واگفه من بعيد ..

نزل جدو " ابقن هنا مؤقتا وابد لاتحاولين تسوين شي ياسماح هالمرة محد يشفعلج ونلگيج لو وين ماترحين عادل راح وخلاج تواجهين مصيرج ومصيرة وياج "

نزلت دموعها " ماعاد يفرق شي بعد موته .. اصلا احنة ميتين بالنسبة الكم شتريد منا بعد .. اتركنا اني وبناتي نعيش شتريد منا "

رد " انت مالي دخل بيج بس بنات عادل مستحيل اخليهن عندج ولاتنسين بعدهن قصر .. وبالقانون اگدر اسحبهن يمي .. بس منطيج اخر فرصه ابقي يمهن ولاتحاولين تقرين براسهن .. "

سكتت ودخلت وراهن . دخلت اني هم وخليت نسر يحجي وياهم ..

يتبع ..

///// #تكملة البارت السابع والستــون /////
ج2


دخلنا للبيت وبقى نسر يحجي وياهم ..
هن دخلن جوة ..
واسمع ماما تحجي ع سمر .. وسمر تبجي ..
" كله منج من اگول تشبيهها بكلشي ماجذبت .. "

رحت جبت فراشات فرشتلهن بالاستقبال ..
" تعالن ارتاحن"

ردت عليه بعصبيه " انت من كل عقلج لج المات ابوج ابوج شلون ينطيج گلبج هيج تتصرفين دمعه مانزلت من عينج ولو المثلج شأتوقع منها ؟"

ضحكت " ابوي ؟؟ ابوي الكسرني حطم حياتي لو من اشكيلج وتضربيني وتجويني .."

شلت ملابسي " هاي الاثار تتذكريها تتذكريها لو لا "

ردت بعصبية " انت مريضه مو صاحيه "

حجت سحر " ليش جوتيها هيج ماما "

ردت " لان طلعت من الطريق .. اكبر ندم جبتج الهاي الدنيا ؟؟"

عطت " اصلا لو ماجايبتني احسن . بعد كافي مااتحمل لومج الي تعرفين شلون عشت 11 سنة تعرفين شنو شفت بحياتي ؟"

ردت " من ايدج محد گالج انهزمي "

رديت " لا انهزمت بطر مووووو انهزمت لان حبيت خطيب اختي مووووو .. لو انهزمت لان اكو شخص نهش جسمي وانتهك طفولتي .. ولو ماميت حرام اسميه ع البشر اصلا "

سألت سحر " انتي شتحجين شسوالج ابوي وليش هيج تكرهيه "

باوعت الماما " ردي ردي ليش .. خلي اني جذابه سمر ليش ؟"

ردت سمر وعيونها تجري " زرع عدم الثقه بداخلي بطفولتي .. جان يگلي وجهج مشوه مو مثل سحر حلوة محد يحبج بس اني .. بس اني اشوفج حلو ووجهج مابي سواد .. قربني اله حتى يحقق اليريده "

ضحكت " شوفي واسمعي اني اجذب هاي الربتيها على ايدج هم تجذب؟"

ردت " احنة بحياتنا ماراح نرتاح يمج .. خلينا نمشي منا الطريق بينا مسدود انت عقلج تسمم خلص صرتي تشبيههم .. وخالتج عرفت شلون تغسل دماغج .. رغم هي جانت انانية وتريد كلشي الها ولمن استرجعت حقي منها .. اخذتج مني بالمقابل "

عاطت سحر " فهموني شكو اشو مثل الاطرش بالزفه "

اتنهدت " لاتعرفين احسن لان تتدمرين او يمكن مثل امي تسدين اذانج وعيونج عن الحقيقه وماتشوفين "

طلعت من يمهن ..
شفت نسر بالمطبخ يسمع حجينا.
باوعتله بحزن .
فتحلي ايديه .. رحت ارتميت بحضنة وابجي ..

هداني " لاتخافين يمكن هيج احسن الى متى الهروب من الواقع .. لابد يجي يوم النفوس تهدأ وتتغير "

اتنهدت " خايفه يسوولها شي"
رد " لاتخافين اخذت تعهد من جدج .. اريدج تعرفين اني مساندج الاخر لحظة "

رديت " مااعرف لو ماانت موجود شراح يصير ؟"

رد " اني رايح اتسوگ شنو تحتاجين اكتبيلي "

رديت " زين هسا اكتبلك .. بس اريدك تخلي دنو هناك متجيبها فترة مؤقته مااريدها تتأثر بالوضع "

هز راسه " هو هم هيج .. يلة اني رايح اي شي تحتاجيه خابري ولاتفتحين الباب ابد لان خالج مايتأمن لايسويله سالفه هنا "

طلع .. گمت سويت ريوگ وحضرته ..
رحت شفتهن امي متمددة ع القنفه ومغمضه عينها ..
سحر تقرأ قرآن ..

شافتني سمر اجت يمي " شذر شلون هسا شراح يصير بينا ومدارسنا شلون"

اتنهدت " الله كريم كلشي ينحل خلي تخلص هالفترة ع خير حتى لو نسويلكم نقل لهنا ؟"

سألت " ماما شمسوية هي وبابا وهيج مهزومين .. ومنو ذولة الاخذونا .. ماما گلت ماعندنا احد كلها متوفيه منين طلعوا ذوله "

خليتها يمي وسولفتلها .. اصلا هن كبرن ولازم يعرفن كلشي .. بعمرهن اني فتحت عيني ع الدنيا ..

حجيتلها كلشي بس ماگلتلها بابا غدر خاله هو وماما وتزوجوا .. بس كلتلها اهلها جانوا معارضين زواجهم وانهزموا حتى يتزوجون من غير علمهم ..

اجت سحر " مو كافي تسممين عقلها بكذبج كلنا نعرف ليش نهزمتي وهسا تحاولين تشوهين صورة اهلنا بعينا
وج بابا جان صديق النا مو بس ابو مو هيج سمر ؟"

سمر سكتت ..
ردت عليها " ماتحجين لج ليش ساكته ؟"

اتنهدت سمر " شحجي .. هو جان يحبج لان تصرفاتج ذكوريه وتتعاركين وتدافعين عن نفسج وتاخذين حقج بيدج .. جان يكول الله مانطاني ولد وسحر اعتبرها ابني مو بنتي ..
اما اني جان دايما يذكرني بهاي الوحمة الملت وجهي وشوهته ودايما يقارني بيج وبجمالج وشخصيتج ..
اعرف شخصيتي ضعيفه بس منو السواها غير ابوي "

ضحكت سحر " انتن مو معقولات ابد مااعرف ماما شلون ولدتجن .. "

رديت عليها " تعاي واني افهمج كلشي "
عاطت " مااريد اسمعج ومااحتاج .. احنة عايشين حياتنا ليش اجيتي وخربتيها .. وانت متزوجة وعايشة ببغداد ومستقرة وي الانهزمتي وياه ليش بعد تحجين على اهلي لان انهزموا .. واعتقد هي ماانهزمت وي غريب هو ابن عمها والصوج بأهلهم الماقدروا حبهم .. بس انت من انهزمتي وي واحد غريب ماخفتي ماگلتي اهلي اخواتي مطلعة نفسج مظلومة وانت الظالمة اصلا"

اتنهدت " مستحيل راح تفهميني اذا ماتسمعيني واذا بقيتي هيج ماراح تحصلين شي .."

خابرت خاله ..
تركتهن وكمت ..
رحت للغرفه .. رديت
" شلونج خاله يارب تتهنين وتملين البيت اولاد "

سألتني بسرعة ..
" صدگ عادل مات ؟؟ وامج واخواتجن اجن لهنا ؟؟"

غمضت عيني " اوووف منكم عود نبهت البنات لحد يگلها " حجيت بداخلي

سألتها " منو گالج"

ردت " مو مهم منو الكالي صحيح لو لا .. "
رديت " اي صحيح ✔ البارحة دفنوه .. نسر اصر يگول الجدو على مكانهم .. يكول يبقون اهلة وواجب يدفنوه هم "

اتنهدت " مااعرف شأگول الله يغفرلة .. وامج وين ؟"

رديت " جبناها البيتنا .. نسر خلاها هنا بين ماجدو يسيطر ع الموقف لان عمو عامر مايطمن الحد مااجينا هو مراقبنا"

ردت " خلي بالج عليهم ولاتخافين عمي بعد مامات عادل مستحيل يحمل امج الذنب الوحدها ننتظر ونشوف شيقرر "

سماهر :
من نخطبت گلت راح ابدي حياة جديدة… بس بالاول لازم اتخلص من بقايا الماضي .
عادل وسماح كانوا مثل الهاجس بحياتي ..
تأذيت منهم حيل لدرجة حتى بأحلامي اشوفهم ..
بمرور السنين ومن تعرفت على شذر بديت انسى تدريجيا بس مو معناها سامحتهم ..
شكرت الله الاخذ مني سماح ورزقني بشذر ..
جانت بنت وصديقه واخت الي رغم صغر سنها ..

وبعدها الله رزقني بمختار وبناته وگلت الله يمكن يريد يعوضني بيهم ..

بيوم زواجي ..
اجن العلويات اخذني من البيت ..
لبست قفطان وشال وفوگاهن عبايه ..

وصلنا لهناك دخلني للبيت .. وبعدها اخذن البنات وراحن ..
صارت عيني على مروة صغيرة وسمينه وجهها بشوش وحلوة .. اتقربت مني دنگت عليها بستها ..

سحبتها اختها مني ..
باوعتلها " انت زينب موووو "

ماردت اخذت اختها وراحن وي عماتهن ..
بقيت لابسه عباتي وگاعدة بالصاله ..
انفتحت باب الاستقبال نصيت راسي بسرعه من المستحة ..
اول مرة ينقفل علينا باب واحد اني ورجال ..
اتقرب وگعد يمي ..
وحالته مثل حالتي..
همس " السلام عليكم "
رديت " وعليكم السلام ورحمة الله وبركاته "

بقينا اثنينا ساكتين بعدها رد :
" اعتبري البيت بيتج .. العلويات قبل ليطلعن حضرن العشا كله ع الطباخ."

وغرفتج ذيج يم الدرج .. بدلي وارتاحي ..
گمت من مكاني من غير مااحجي ..
رحت للغرفه ..
فتحتها جانت مرتبة ومفروشة ..
دخلت نزعت العبايه ..
طلعت گلبيه لبستها وبقيت بالحجاب ..

رحت للمطبخ كان ماله حس بالبيت .. البيت مو كلش جبير بس حلو ومرتب الالوان والاثاث كلش منسق تنسيق الواضح زوجته كانت نازكة كلش..

دخلت المطبخ انبهرت .. كلشي بي ابيض واسود الكاونتر طاولة الطعام الطبخ الفرن الثلاجة كلشي نفس الالوان ..

مرت سعد گالتلي هو من زمن النظام تاجر ويطلع للدول بس مااتوقعت هيج ..

باوعت للطاولة الاكل والمقبلات كلها مرتبة بمواعين ومسلفنه بنايلون ..
حتى ممبقياتلي شي اسويه ..

طلعت الاكل للطاوله البرة كله خليته ..
بقيت افتر شلون ادخل ..
دگيت الباب اريد احجي وياه سمعته يرتل بالقران ..

استغربت اعرف ليلة جمعه بس احنة المفروض عرسان حسيت بشي غريب بداخلي ..

رحت اني هم صليت وطلعت ..
بقيت كاعدة بالصاله ما تحركت..

طلع من الاستقبال ..
صار بوجهي ..
شافني انصدم ..
حجيت " تقبل الله "
همس " صل على محمد وال محمد "

حسيته انصدم من شافني واني هم اول مرة انتبه عليه
عنده لحية وشوارب بيهن شقار خفيف .. طويل وضخم شوية .. اول مرة اشوف هيج شخصيه ..

باوع للطاولة رد :
" ياليت تخليلنا سفرة بالگاع مااحب اكل ع الطاولة "

دورت بالكاونتر مااندل ..
اجة وراي فتح المجر طلعها ..
ابتعدت عنه طخ ظهري بصدره .. ارتبكت كلش تركته وطلعت جاب السفرة وراي فرشها وصار ينقل الاكل
گعدنا ناكل وهم ماحجينا ساكتين هو يستحي واني هم

لميت الاكل والسفره بعد ماخلصت .. صار يلم وياي الماعين للمطبخ ..
غسلتهم وكملت ..
باوعت ماهو ..
دخلت للغرفه .. سويت مثل ماكالتلي مرت سعد لبست ثوب نوم وفتحت شعري ..
وبقيت انتظره الى ان نعست ونمت ..

صحيت على الموبايل يدگ ..
فزيت من نومي ..
جان سعد فتحته " دريتي باختج العار جابها عمي لهنا لو ادري يجيبوها جان رحت وشربت من دمها .. لو ذاك الثاني مات ومااخذ جزاته .. بس اريد الله لايرحمة ولا يغفرله "

احس رجلي ماتشيلني بعد " منووو المات؟"
رد " عادل مات ماتدرين ؟"

رديت " لا شوكت وشلون "
سكت ورجع رد " عبالي تدرين سدي الموضوع المهم الله اخذ حقج وحقنا منهم "

سد الموبايل واني گعدت مصدومة ممصدكة ماحسيت بشي لاانقهرت ولا تأثرت بس انصدمت مااتوقعت يموت بهيج عمر وسماح شلون اجت وشلون وصلولها ؟"

مااتحملت خابرت شذر وافتهمت منها .. اتمنيت اواجهة واعرف ردة فعلها او شكلها شلونه تغيرت لو نفسها ..

گمت ردت اسوي ريوگ شفته مسوي جاي مهيل وريوك .. جان يسقي بالحديقه ..
شافني صبح عليه واعتذر " اخذتني النومة. البارحة اعتذر "

رديت " ماصار شي "
دخلت للبيت اجة وراي .. اني تريگت متعود من الصبح راح ابدل واطلع تحتاجين شي ..
رديت " سلامتك "

بقى يومين الوضع نفسه .. هو يستحي او بعده عايش الذكراها مااعرف بس ماحبيت احسسه بشي .. اريد من يجي الي يكون بقناعته ورضاه ومن رغبة نابعه من داخله ..

اجن العلويات بعد يومين جابن البنات ..
باركن الي وجايبات هدايا ..

حيل طيبات وحبابات ..
الجبيرة اسمها ام علي .. تصير اكبر من مختار تگلي اعتبزيني اختج الجبيرة واي شي تحتاجيه لاتستحين

تركن البنات وراحن ..

دخلن الغرفتهن ..
رحت وراهن .. طلعت زينب كتبها وگعدت . شافتني
صاحت مروة " سدي الباب اريد اقرأ مااريد هوسة "

سالتهن " جوعانات اسويلجن شي تاكلنه"
ردت زينب " لا مانريد "
ردت مروة " لانريد جوعانة اني "

باوعتلها " مو بابا وماما گلولج موزين الاكل هواي يسويج سمينة ويضحكون عليج الاولاد "

رديت " اذا اكلت دهون اكيد تسمن .. اني راح اسويلج اكل صحي وطيب يعني مايمرض "

ردت زينب " شكرا ماتريد ماما من تجوع تنطيها فواكه خارج الوجبات ماتنطيها اكل "

تركتهن وطلعت .. اعرف التعامل مع زينب صعب بس ان شاء الله تتغير وتتحسن ..

شذر :
نسر كان يتسوك ويجي يشوف احتياجاتنا ويروح مايبات يمنا ..

ماما وسحر بالاستقبال .. ابد ميطلعن بس للحمام وحتى ماتقبل ماما تاكل عناد ..
خفت تتمرض لو يصير بيها شي ..

اما سمر احسها شريكتي بالقدر .. كانت تبات يمي ..
واحجيلها عن اول يوم انهزمت بي .. وشنو عانيت وشلون وصلت لهنا.

احجي وي مستغربة وممصدكة ..
حجيتلها عن البنات وعن دنو .. اصرت تشوفها عبالها بنتي .. بعدين كلتلها بنت نسر واني ربيتها.

باوعتلي " شذر انت كل هذا شايفته شلون اتحملتي وصبرتي شلون ماخفتي ؟"

رديت " مااعرف الله جان يدليني ع الطريق رغم خوفي وضعفي بس گدرت اواجه الدنيا والقدر والناس وحتئ عمامي "

سألت " احجيلي عنهم كم عم عندي وكم خال "
ابتسمت. " عندنا اثنين عمام واثنين عمات وخال .. بس كلهم ماعندي حنية وطيبة خاله.
خاله سماهر تشبه ماما بس هي اكبر .. والاهم حبها وطيبتها "

اتنهدت " لعد شعجب ماما ما التقت بيها كل هاي السنين ولااجتنا .. هسا مو انتي رغم كل الصارلج اجيتي وشفتينا "

رديت " مو بيدها خالو صعب .. اذا شفتيه تتخبلين .. وهم كانت حايرة وي بيبي هسا يلة تزوجت صارلها يومين بوفاة ابوي "

بقيت كل يوم احجيلها وي تسمع ومرات تسأل وتحب تستفسر ومن سمعت عندنا بيبية فرحت تگول احب النسوان الكبار بيبية صديقتي تجي توصلها للمدرسة وتاخذها ماعندها احد يوصلها ابوها شهيد وتخاف عليها
تخبل سوالفها ..

بعد مامرن هاليومين ..
اني وسمر بالمطبخ صارت تتجنب تكعد وي ماما وسحر
اندكت الباب توقعت نسر ..
هو يجي بهيج وقت .. فتحت الباب سمر سمعت عياط
" وينها العار اليوم الا اذبحها . سنين واني دمي يغلي بسببها "

صرت گباله " خالو لا .. بابا مات مايحقلك تعاقبها الها وتحملها الذنب وحدها "

عاط " ذاك العار ياخذ جزاته يم ربه عليه بهاي السـ…...
الطاوعته وخانتنا .. "

طلعت ماما وكفت بوجهة " سوي التريده مايفرق عندي بعد اكتلني وخلصني ع اساس انتو معصومين .. اني ماسويت شي غلط كلشي بالحلال جاي بعد 27 تحاسبني ؟؟ معقولة هالحقد ماخف بعد كل هاي السنين "

اتقرب منها ضربها وسحلها لبرة ..
صرنا نعيط وندفع بي .. وسحر هجمت عليه خرمشته تخرمش بس خالو ضخم .. ماكدرنا ..
ضرب سحر ودفعنا واخذها ..
طلعت وراه للبرة الجيران طلعت تباوع ..
خلاها بالسيارة واخذها وجان وياه عمو عامر يسوق ..
عرفت هو الكاله وحرضه ..

سحر صارت تعيط وتغلط عليه..
" انت الگلتيلهم ياخذوها هاي خطتج مووو تحرمينا منها "

مارديت عليها خابرت نسر بسرعه ..
حجيتله گال " سديه راح اخابر جدج واقفلي الباب لاتخلين اخواتج يطلعن "

بقينا ننتظر وخايفين..
مااتحملت خابرت خاله وحجيتلها ..
ردت " هسا اخابر مرت سعد واشوف اوووف ياسعد اووووف سنين وهالنار ماطفت بكلبه "

بقيت اروح وارجع من القلق .. عذورة تتصل ماارد من اجن اخواتي لليوم ماخابرت البنات مشغولة وياهن ..

سحر ماتسكت بس تدعي وتحجي ..
" وحق الله اذا مارجعت امي للظهر الا اشتكي عليكم انتي وزوجج وبيت جدج كلكم "

ردت سمر " وهي شعليها ؟"
ردت " انت سكتي البگعة صرتي مثلها وقشمرتج بسوالفها "

رديت " شنو بگعه كافي زودتيها لاتقبلين تسمعين ولا تفتهمين من اجيتي لسا ماخذتنا بصوتج .. "

عاطت " وج ابويه صارله كم يوم جوة التراب وانقلبت حياتنا بسببج وامي اخذها خالج النگس شبقى بعد بحياتنا شبقى "

سكتت عنها. .
راحت بدلت واجت
" وين تردين " گلتلها
عاطت بيه " مالج دخل اروح ادور امي "

رديت " وين تدوريها ليش هنا منطقتج الصغيرة ؟؟ اذا تطلعين تتهين هاي بغداد بغداد مو المحافظة الجنتي گاعدة بيها "

ردت " لعد اروح اشتكي وهم يلگون امي .."

عطت بيها " كافي تعبتيني انت طفله .. خابرت وهسا يتصرفون "

ضحكت " الخابرتيهم لو هذا نسرج مدري صقرج مااشتريهم بزبانة "

عطت بيها " احترمي نفسج هو هذا حب ابوي الخابصتنا بي وتربيتج .. لاتحترمين ولاتسكتين الظاهر بس دلال بدون تربية "

ردت " شوف منو تعلميني بالتربية روحي بابا شوفي نفسج .. لمن انهزمتي وشبعتي…… بالشوارع هسا جايه تعلميني انتي "

انصدمت بيها .. اباوع السمر واباوعلها . شتان بين الاثنين ..
خابر نسر ..
تركتها ورديت ..
" الو هاا نسر بشر "
" جدج گال اني اتصرف راح اخابر سعد وعامر واطيح حظهم "

ماكدرت اطمان ..
خاله هم ماگدرت تعرف اي شي عنها وكل شوية تخابرني تسأل ..

تعبت اعصابي لليل مااتحملت . اذا قتلوها فعلا مااسامح نفسي. .
ااااه نسر ااااه اكبر غلط طاوعتك وخابرناهم ..

لليل اندك الباب تطافرنا ..
صحت منو .. سمعت صوت نسر فتحت ..
سألته " ماكو خبر "
رد " لا ماكو بس منا للصبح اذا جدج مالگاهم اني اتصرف "

اجت سحر تعيط " اسمع لك وحق الله اذا مارجعتوا ماما افضحكم "

عاط بيها " صوتج لج .. ولسانج "
ردت " ايباااه وشتسوي تاخذوني مثل مااخذتو امي "

همست " اتركها مالك علاقه بيها تعال ادخل "
دخل لجوة وهالمرة بات يمنا ..
سويتله عشا واخذتة للغرفه..
سمر بغرفه دنو .. وسحر بالاستقبال

دخلت جان متمدد .. شافني گام ..

باوعت لونه شاحب وضعفان. .
" شنو متاكل ليش هيج ضعفان "
رد " لا ماتشوفين صاير عندي كرش "

اكل شوية وبطل .. رجعت الصينية البنات ماقبلوا يتعشون..
اجيت يمه نمت ..
"شلونها ملوكة "
اتنهد " بقت يم الله "

باوعلي " الله يساعدج على اختج "
رديت " حقها غاسلين دماغها "
رد " الله يرحمة مانگدر نحجي .. بعدها سألني ..
" شحسيتي من توفى "

رديت " مااعرف گلبي متاذي لا راح ومااتحاسب .. وعقلي يگلي عقابه عند الله لاتقهرين نفسج "

حضي وباس راسي " ادفني وياه كل الصارلج والماضي وبعد لاتفكرين ابد "

رديت " والاحنة بي هسا شلون ماافكر بي .. امي اخواتي مااعرف شلون اتصرف "

رد " كلشي ينحل لاتخافين "

نام واني گمت شفت البنات جانن نايمات ..
وجه سحر احمر مبين جانت تبجي ..
رغم تحاول تبين قوتها وجرأتها بس داخلها يختلف

للصبح سويت ريوك الهن بعد مانسر طلع ..
بس سمر گعدت سحر ماقبلت ..

اندگت الباب خفت افتحها ..
گلت منو…. بس سمعت صوت جدو ..
" افتحي لاتخافين اني جدج "

فتحت جان هو وارشد جايين ..
دخلوا ..
" امي وين لگيتوها "
رد " سعد مايقبل يحجي وعامر يحلف مايعرف مكانها"

مااتحملت عطت " تحجون صدك امي وين صوجي امنت بيك وگلتلك .. لو مانسر اصلا ماادليكم بمكانهم عبالي تحميهن وتحتويهن حتى لو بابا خطأ بس اخواتي مالهن ذنب اصلا مايعرفن شنو السالفه "

رد ارشد " خوية كولي يالله .. جدي ماله ذنب .. عمي عامر وعمي سعد تصرفوا من وراه "

رديت " شلون من وراه معقوله مو وعدنا وگال مايصير شي "

رد جدي " لاتخافين مايسويلها شي حجيت وياه "

اجت سحر طلعت " وين امي وين اخذتوها احجي "

رد جدي " لاتخافن ترجع .. وانتن حظرن غراضجن خلنا نروح "

رديت " وين يرحن "
رد جدي " عندنا بالبيت مايجوز يبقن هنا يبقى بيت رجال غريب عنهن "

رديت " تحجي صدك جدي هناك منو يرحمهن "

ردت سحر .. " وهو منو يروح وياهم اصلا اذا ماتجي امي مااتحرك"

سمر جانت واگفه بالباب وتباوع ..
رد ارشد " ترجع ان شاء الله وانتي خوية شذر لاتخافين البنات بأمانتي اذا مو اني جدي وبيبيتي من سمعت راح يجن فرحت الله شاهد "

باوعتلهن ويعز عليه اتركهن بس جدي مصر ياخذهن يمكن هناك احسن الهن وامن من هنا ومن خالي ..
بس ما اعتقد راح يسكتن ومايضايقنهن ..

رديت " وشنو اليضمن محد يقهرهن لو يعايرهن اني رحت ساعه اشكال الحجي سمعت شلون هن يبقن هناك "
رد جدي " التحجي وياهن اني اعلمها .. يلة بوية جيبن غراضجن وتعالن… اخيتجن تجي تشوفجن وامجن ترجع لاتخافن.. بس ها جدتجن مااريدها تعرف ابوجن مات بالجديد هي تدري بي ميت من زمان "

تعصبت سحر " وهم ضاحكين ع المرة وحارميها بأبنها كل هذا لان حب امي وتزوجها ليش هي مو بنت اخوك ليش ماخليتوهم يتزوجون بعلمكم "

باوعلي ارشد " اشرتله ماتعرف "

رد عليها " اكو اشياء ماتعرفيها بعدج صغيرة اضطرينا نكلها هيج لان مريضه وعينها ع الباب بلكي يرجع وتتخربط "

ردت عليه " شنو بعدني صغيرة هاز كاروكي انت "

عاط بها " السانج لج لاتشوفيني ماتحمل وساكت مو هاي اخواتج يحترمن شبي السانج باذر "

صاح جدي " يلة بسرعه جيبن غراضجن وتعالن "
لزمت سمر بيدي " اخاف اروح "
رديت " لاتخافين هناك بيبي راح تشوفيها تخبل .. وجدو وحتى ارشد زين .. واني هم مااتركجن اجي اشوفجن "

اتقربت مني سحر " ابد لاتجين مانريد نشوفج عليه اتحمل دنائتهم ولااتحمل اكابلج "

لمن غراضهن واخذت غراض ماما وياهن وراحن..
صحت ورى ارشد كم مرة اوصي بي عليهن وهو يطمني

سمر :
وحمة شوهت ملامحي ..
من طفولتي واني اعاني من هاي الوحمة.. كانت تكبر كلما اكبر واخذت مساحة كبيرة من جانب وجهي الايمن
خلقت عندي ضعف وعدم ثقه ..
كل اليباوعلي اخفي وجهي بشالي او ادنگ ..
وزاد هالضعف كلام ابوي الي .. واستهزاء سحر بيه دايما ..

من اجه جدو وارشد… ترددت اروح كنت احس براحة يم شذر .. راحة ماحسيتها من طفولتي لسا ..

اخذنا جدو ورحنا ..
وصلنا البيتهم دخل السيارة لجوة…
نزلنا حديقة كبيرة كانت والبيت حلو ..
بقيت واكفه اباوع ..
اجه ارشد يمي .. يلة خوية ادخلي ..

مشيت گدامة وورانا سحر ..
اول مادخلت كانوا اكو بنات واكفات ..
صاحهم جدو ..
تعالن سلمن ع بنات عمجن .. گعد يعرفنا هاي مرت عمجن علاء وهاي مرت عمجن عامر ..
وهاي هاجر وهاي هند وهاي رونق .. والصغيرة الق

سلمن بثكل علينا.

سحر اصلا ماسلمت دخلت كبل للبيت ..
جانت اكو عجوز مقعدنه شافتنا بقت تون وتبجي ..
فتحت اديها النا ..
" تعالن اشمجن تعالن افرغ همي يمجن .. "

تذكرت شذر من حجتلي عنها ..
حضنتها صدگ حسيت بالامان يمها ..

سحر كالعادة ماتسلم بس من شافت بيبي سلمت عليها عادي من غير متحضنها ..

گعدت كلها گابلتنا ..
وجدي يوصي بيهم علينا ..
صاح فرغلهن غرفه البنات عمجن ..
اشرتلي مرت عمي علاء " گومن امي خلن غراضجن هنا "

دخلنا الغراض للغرفه اجت بيبي ورانا .. وفرحانة بينا وكل شوية تسالنا على بابا ..
وسحر كل شوية تريد تكلها صارله كم يوم من مات واشرلها ..

طلعت بيبي ..
طبگت الباب سحر وگعدت انهارت بالبجي ..
باوعتلي " كله منج رحتي خابرتي وهدمتي حياتنا وج جان محد النا بس عايشين بوسط بابا وماما .. تالي بابا عافني وراح وماما مااعرف طريقها.. بحياتي ماراح اسامحج انت وشذر . لان ذليتنا وخليتن هيج بشر يتحكم بحياتنا منا وجاي ..
حتى دوام ميخلونا نداوم بعد وكولي كالتها سحر "

جنت اسمع واسكت .. مااعرف حقها لو لا ..
هي كانت عندها حياة عايشتها وتبجي عليها اما اني مااتذكر جانت حياتي حلوة واحسها متشابهة وي هسا

شذر :
راحن البنات وخلن فراغ بحياتي .. صح كم يوم صارلهن من اجن بس تعودت عليهن ..

رجعت دنو للبيت بعد ماخبرت نسر البنات راحن .. صار يجي للبيت يخلص الظهر يمنا .. بس جان يشكي من راسه .. ومعدته ..
احس حتى بطنه كبرانة قبل ماعندة كرش ابد ..

قلقتني حالته " نسر لاتسكت عن نفسك هيج روح الطبيب "

هز راسه " العصر احجز واشوف "

نام مثل عادته بعد مااخذ حب مسكن ..
الظاهر المسكنات هي الي تخليه ينام هواي ..

خابرت عذورة وبلغتها بحالة نسر ردت ..
" بالاول عاش من سمع صوتج "

رديت " ماگلتلج اخواتي هنا عندي وملتهيه بيهن "
ردت " صدگ شجابهن وابوج شلون خلاهن "
رديت " ابوية توفى "
ردت " لا حول ولا قوة إلا بالله.. الله يغفرله احجيلي شصار وشلون ؟؟"

حجيتلها كلشي ..
ونسيت اسألها عن نسر ..

حدد موعد الحجز وراح .. الدكتور سواله مفراز للراس وناظور للمعدة .. گاله ماكو شي بس احتمال التهاب بالمعدة او قالون هيج منتفخة بطنك ..

يوم عن يوم وشهر عن شهر ..
الى ان زادت حالته صار حتى المسكن مايهدأه
وبطنه كبرت اكثر رغم جسمه ضعف كلش .. اخذ اجازة من الدوام وماخله طبيب ماراحله ومحد وگع ع علته
وفوگ كل هذا عذورة هم تمرضت وحرنا بيها ..

بعد مااتحملت ابقى هنا وزوجي هناك .. رغم يجيني بس بعد ماانتكست حالته ماگدر يجي ..
وهاي كانت نهاية 🔚 سنة 2011 .. دخلت للاستقبال تخبلت من شفته ..
البارحة يمي مو هيج .. شافني وعبالك شاف امه ..
" شذر راح اموت تعاليلي "
بجيت " لاتگول هيج اسم الله "

طلعت منه مااتحملت وگعت بالكاع من البجي هذال وهنا موجودين والبنات ..
باوعتلهم،" شمنتظرين خلونا نطلعه لازم نشوف شبي "
خاله تبجي " شدخل عليه .. بنفس السنة ملوكة تمرضت ومافرحنا بيها .. ونسر تخربط بسرعه بسرعه خلال شهرين ووگع فد وگعه وهسا ختمتها عذراء دومها مسخنة ومريضه .. ماتگلولي شطب البيتي. .

رد هذال " المشكله ولادكتور وگع على علته .. خلونا نشوف دكتور زين ونطلعه "

للعصر اجه عمة ومرت عمة ..
من شافوه گالوا " هاي حالته مو مال طبيب اصلا ماكو مرض هيج بشهرين يصير وماكو احد عرفه شنو "

باوعت مرت عمهم الخاله " دادة بس لا معمولة عمل "
ردت خاله " لا عيني مااصدگ بهيج شغلات بعدين منو عندنا يسويله ؟"

يتبع…… .

///// #البارت الثامن والستــون /////
ج2


لامكان محدد للألـم .. عندمــا تؤلمـك روحـك !!

باوعت مرت عمهم الخاله " دادة بس لا معمولة عمل "
ردت خاله " لا عيني مااصدگ بهيج شغلات بعدين منو عندنا يسويله ؟"

طفرت اسراء من مكانها وراحت الغرفه هديل ..
شوية وسمعنا عياط ..
اشرتلنا خاله نشوف شكو ..

گمنا اني وبيداء للغرفه ..
صاحت بيهن " شبيجن زعاطيط تتعاركن ..هذا منو النايم وواصل الموت .. مو اخوج ؟؟ مو زوجج انت "

عاطت هديل " اني شكو هي اجت تتعارك متشوفيني مخليه بنتي وكاعدة "

ردت اسراء بعصبيه " فقيرة ياعيني .. لعد شگد انغشيت بيج .. من اول يوم اجيتي لهنا جنتي مخططة الكلشي .. والقاهرني استخدمتيني اني الألاعيبج .. تغاضيت عن ضحكج عليه . وتغاضيت عن دور المسكينه العايشة بي .. بس توصلين النسر لا .. وحق الله اموتج بيدي اذا صارله شي "

انخطف لون هديل " نسر رجلي وابو بنتي شلون اذيه احبه اكثر من روحي الظاهر انت تخبلتي مايلامن اخواتج من يكولن معقدة "

مااتحملت اسراء رادت تضربها .. لزمتها بيداء ..
" احجي شكو شمسويه هديل ونسر شدخله "

باوعتلنا اثنينة.. " خلي يطلعون بيت عمي وتعرفن كلشي .. جنت شاكة رغم مااومن بهيج شغلات بس من حجت مرت عمي اتأكدت "

طلعت اسراء الغرفتها .. واحنة طلعنا يمهم..
عمة گال " باجر اشوف سادة واخذة.. لو نزوره مالازم نتفرج عليه .. الدكاترة ماتسوي شي "

ردت خاله " هذال گال اطلعه للخارج "
رد " وين ماتردون اني حاضر .. صح بالفترة الاخيرة صارت هواي اشياء بينا وتخاربنا بس يبقى نسر ابني وواحد من الولدي من يوم ماراح المرحوم "

بعد ما طلعوا ..
خالة سألت " شكو ليش اصواتجن طالعه احنة بيا حال منا الولد متمدد ومنا خطار "

ردت بيداء " الحجي يم اسراء وهديل .. صيحيهن وخلينا نفهم شصاير ؟"

صاحت خالة اسراء نزلت .. وبعدها صاحت هديل "

طلعت هديل شايله بنتها ..
اخذتها بيداء منها .. انطيني البنية واگعدي ..

حجت خاله " فهمني شكو "
بجت هديل " خاله اسراء بعدها تتهمني .. من يوم الشافت الماي زمزم الجابته اختي الي علمود ملاك لسا "

ضحكت اسراء " وعبالج صدگت سالفه ماي زمزم .. بس ماحجيت لان اولا ماامن بهيج اشياء وثانيا لان حلفتي رغم سمعت اختج من تكلج خليه بالماي لو اللبن .. وگلتي جذب .. بس بعد الصار النسر مااسكت ماخلينا دكتور مااخذناه وكلها ماتعرف شبيه .. احجي ماما احجي شنو السبب نسر ديموت ابنج ديموت ومانعرف شبي .. "

عاطت هديل " واني شعليه .. بحال هالسوالف بنتي مريضه ليش متكولن اكو غيري ضاجت لان عايفها وتريد ترجعه الها "

باوعتلها :
" قصدج اني مووووو .. خليها ببالج لو مو يتركني لو يطلگني مااذيه لان اليحب مايأذي "

ردت اسراء " لا انت ومتأكدة .. شگد جنت مااطيق شذر واحجي بوجهها بس ما حفرت من وراج . وانت من يوم الاجيتي تحرضيني عليها .. وانت الخليتي الشك براسي وگلتي اشوفها تتختل وي مهيمن .. وانت الكعدتيني بذيج الليله وگلتي مهيمن راح الغرفه شذر .. وانت الگلتي المريم على الصار… . هم انكري وگولي جذب "

بجت " اي جذب جذب اني شكيت صح بس لو مامصدكة انت ماجان مشيتي بكلامي .. اما مريم ماعندي اي علاقه بيها لاتشمرين تهايم عليه "

ردت " جذب موووو ؟ انطيني موبايلج وينه "

ردت هديل " شتردين منه مالج حق تفتحيه "

ردت اسراء " اذا ماكو شي خايفه منه انطيني خلي اشوف "

راحت جابته بكل ثقة واجت ..
واني صافنه عليها معقوله كل هذا يطلع منها..

فتحته اسراء فتشت بي كلشي مالگت ..
حجت هديل " ارتاحيتي ؟"

باوعت اسراء الخالة :
" وين موبايلج اريدة "

طلعته خاله نطتهيا ..
باوعت بي وصارت تنقل رقم من جهاز امها الجهاز هديل ..
اتصلت عليه . مسجل بأسم مرة راوتنياه انصدمنا ..
فتحت خط مريم ..
" الو هديل شلونج بنتج شلون صارت ؟"

بسرعة غلقته اسراء " شگلتلكم هااا ماما صدگتي لو هم تبجي وتگلج هذا مي زمزم وتصدگين .. ابنج يموت بسبب هاااي وانت ساكته احجي "

گامت خاله " شحجي .. فهمني شحجي اسمع ومامصدگة معقولة كل هذا يطلع منج هديل . ولج خطبتج بيدي وجبتج البيتي وفضلتج على بناتي وجنتي وتالي هيج تسوين .. "

ردت بيداء " هذا الگدرج الله عليه .. خليها تحجي شسوت النسر .. ومريم شتحرضها.. خربت بيتنا وتهمت ابني ولو ماالله ستر وبساعه غضب جان كاتلهم نسر بسببها .. "

عاطت هديل " كافي اخذتني وليه .. وانت خاله ماجبرتج تخطبيني .. انت الاجيتي وتوسلتي بأبوي ومن خابرتي امي وگلتيلها مريم خانته وطلگها وشذر تزوجها لان يتيمة عقد عليها ومايريدها بس فترة ويطلكها واريدلة مرة .. يعني مو بيه السبب بيج انت عشمتيني وتوقعت راح اكون الاولى بحياته وتالي بس اجيت اخذته مني من اول ليلة وبقت تسحبه مني الى ان ماشفته بعد "

ردت خاله " وانت گلتي اسويله سحر واسحبه الي "
ردت بيداء " السبب كله منج معناها . حطمتي حياة ابنج..

رغم نبه نسر هالسالفه ماتطلع وطلعتيها .. وخلتيه امام الامر الواقع وجبتيها وتدرين نسر من رفضوا گالج الحمد لله جنت ماهاويها ولا مقتنع بس كله منج وهسا حليها .. شلون تعالجين ابنج .. لو شلون ترجعين حق ابني وحقي .. لو حق هاي اليتيمة الظلمتيها انت قبل ماتظلمها هديل "

ردت هديل " اني ماسويت شي .. احبه ومن حقي يحبني ويدللني مثلها .. واذا حجيت شكوكي فأسراء ماعدها عقل وصدگت ؟؟
لو هم الكره عمى عينها ولگتها فرصه .. عاد لاتسون نفسجن ملائكة.. وشمدرينا مامريم هم مظلومة وانتو تهمتوها .. وهسا اجه الدور الي "

باوعت الهديل " كل السويتيه مو حب .. هذا مرض .. شنو السويته الج .. انتي الاجيتي عليه وانطيتج الحق حتى من غاب هاي الاشهر يمج گلت حقه بنته مريضه ولازم يبقى يمهم .. انطيني شغله سويتها الج مو زينة "

عاطت " انت خبيثة . رغم كلها تگول ماتريدة بس بعد الزواج حلى بعينج واخذتيه مني .. غريتيه بجمالج وخبلتيه وانتي الجنتي مممتنعه عنه .. مو هذا حجيج اسراء "

باوعتلي اسراء " اي اعترف اني حجيتلها واني الفتحتلها المجال بس عبالي تحبه صدگ ماادري بيها راح تدمره وتدمرنا كلنا "

عاطت خاله " كافي ولجن راح اتخبل كافي .. كل هذا يطلع من بيتي واني مثل العميه .. صارت تلطم وتبجي"

باوعت الهديل " احجي وريحيني شسويتي الابني احجي "

ردت هديل وهي تبجي " ماسويت شي والله ماسويت صح خبثت وصح مريم تخابرني بس نسر مااذيه لو اموت شلون اذيه واني احبه "

اخذت الموبايل خالة وخابرت الاهلها ..
" هلا دادة شلونج .. لا والله على حطة ايدج .. وين ابو هيام اريده .. شغله وياه "

شويه وحجت وي ابوها " خوية رايدتك بطلبه .. اريدك تجي لهنا ضروري .. تجي وافهمك بالتلفون ماينفع "

گالها باجر الصبح يمكم حتى هم نشوف نسر "

گامت بيداء .. " تعاي اسراء وياي .. "

راحن الغرفه هديل هي واسراء يفتشن وهي تطرد بيهن
" اطلع عوانس حاقدات اريد الله ياخذلي حقي منجن "

صارت تعيط ..
سمعت نسر يعيط . طفرت بسرعه اله "

فتحت الباب بهدوء سألني :" شكو شصاير شنو هالعياط وصار ساعه ماسمعتن صوتي"

رديت " هاااا ماكو شي البنات يسولفن "

رد " هيج يسولفن شكو فهميني "

اتقربت منه بقيت اتلمس بوجهة " معليك بأي شي البنات بيناتهن الاهم عندنا تطيب وترجع مثل قبل لاتضوج نفسك "

اتنهد " ااااه شذر ااااه .. تعبان حيل .. خايف اموت وبالي يم ملوكة . لان دنو مطمأن عليها… بناتي بأمانتج .. مهما يصير لاتتركيهن .. واخواتي وامي ارجعي يمهن .. ع الاقل يواسنج وتواسيهن .. والاهم لاتنسيني ابد خليني دوم بين عيونج وببالج "

مااتحملت اكثر صرت ابجي " كافي كافي تحجي هيج انت راح تطيب وترجع احسن من قبل .. اذا سمعت هالحجي بعد ماااسامحك ابد "

حضنته وصرت ابوس بوجهة الشاحب والذبلان ..
اسمع عياطهن .. خليته نام ..
طلعت ..
اتجهت الغرفه هديل " كافي كافي مو وكتجن حسن بي ديسمعجن ويسأل ومايگدر يگوم .. صار يوصيني عليجن فهمتن گام يوصي ارتاحن هسا .. تعاركن وانت هديل احقدي وتالي كلنا نخسر .. كلنا نخسر حضن جان النا بيت وسند "

عفتهن وطلعت…
اجن وراي ويستفسرن شحجى نسر ..
گمت احجيلهن وابجي وخاله والبنات يبجن وراي ..

خالة تبجي وتحجي " اني السبب ورطته هالورطة لو مخليته بلا جهال وطيب ومگابلني ولا هسا هم عاف البيت وهم مريض . ولجن راح اموت نسر لو صارله شي اموت اموت ماابقى "

بيومها البيت انقلب رأسا على عقب .. حتى اكل مااكلوا كلنا مكابلين نسر وكاعدين ..
بيداء مخابرة هنا وحاجيتلها كلشي ..

اجت هنا بوجهها الغرفه هديل .. ركضنا وراها ..
باوعتلنا هديل صاحت " وحق الله التتقربلي احرگ روحي وابليكم "

عاطت بيها هنا " احرگي روحج موتي بس اطلعي من حياتنا .. ولج اخوي ديموت وطلعت انت سبب المشاكل كلها .. احجي شسويتيله ..
بسرعة شالت بنتها خلتها بحضنها " ماسويت شي شبيجن ولجن هذا رجلي شلون اذيه .. صح ردت ابعد شذر عنه بس هو لا مستحيل اذيه "

سحبتها بيداء " اتركيها هنا مايفيد الحجي .. مريم وهي لاعباتها صح .. يجي ابوها ياخذها باجر ونرتاح المهم عندنا نسر كافي لاتخلنه يسمع .. اذا عرف يموت والله "

اخذت هنا طلعتها ورحنا الغرفه خاله ..
" وج شذر جنت حاسه هي ورى البلاوي كلها وهاي عذراء واسأليها بس ااااخ ماما ااااخ هي السبب كلما نحجي تسكتنا .. "

گامت عذراء جانت نايمة " شكو شصاير ؟"
رديت " ماكو شي حبيبتي .. شلون صرتي "
ردت " سمعت عياطجن قبل شوية شكو "

حجتلها هنا گامت من مكانها " ولسا مبقياتها بالبيت "
رديت " وين نوديها شبيجن .. هسا ليل خاله خابرت ابوها باجر يجي ونشوف شيصير "

بقينا كلنا بغرفه البنات لان هذال وخاله يم نسر گاعدين
حتى اسراء يمنا بس مانطقت بكلمة بس ساكته احنة هم غلقنا الموضوع والتهينا وي الجهال ..

بس رغم هدوئي احس نار تغلي بداخلي ومااعرف اتصرف .. يمكن اني مشتركة وي خاله بهذا الذنب ..
اني وافقت يتزوج .. كنت بلا عقل يوم الگلتلها اخطبيله

بس بوكتها ماقصدت هي لان گلبي نغزني منها من اول يوم شفتها بي ..

سوينا عشا تعشوا .. هنا وهذال راحوا..
فرشت يم نسر ..
سمعته يون بالليل طفرت .. لگيتها عرگان رغم احنة بالشتا وباردة ..
" شبيك حبيبي شتحس "

جاوبني بأنين " نار نار تسعر بمعدتي شذر نار "
ارتبكت مااعرف شسوي وكلها نايمة..
صاح " جيبيلي ماي ثلج اريد اشرب ماي ثلج "

ركضت للبراد جبتله ماي بارد واجيت ..
شربته منه ..
رد " هم بعدني شسوي گليلي شسوي .. "
بقى يون واني مگابلته وابجي مابيدي شي اسويله نطيته مسكن وحب معدة ..

شوية هدأ وانام .. اباوع الطوله ووجهة .. وين كان ووين صار ..
بطنه اليشوفها يگول بالون منفوخ مو بطن ..

ثاني يوم گعدت خاله والبنات من الصبح عندهم دوامات ..
گلتلها " خاله خلينا ناخذة الاي مكان سووله حل نسر راح يروح من عندنا "
ردت " وشعرفني وين اخذه لج امي اني حدي للامام وارجع مااعرف هالسوالف .. "
رديت " لعد خلي ناخذة نزوره .. عسا وان هناك يرتاح"

اتنهدت اسراء " اني رايحة اخذ اجازة واجي .. ناخذة الكل مكان مانخليه بس اصبرن عليه .. وانت يمة اذا اجة ابوها الهاي خل ياخذها ولو ان شاء الله الحگ بيهم"

طلعت عذراء مبدله باوعتلها خاله " وانت امي شلون ترحين صرتي احسن "

ردت " خليني اداوم اذا ابقى نايمة اتمرض اكثر "

طلعت كلها ودنو للمدرسه .. اجت بيداء مثل عادتها بعد مايرحون اولادها للمدرسه تجي ..

خاله اشرتلي " روحي انت گابليه واگعدي معليج بأي شي احنة هنا "

رحت يمة فتح عينه ..
" اجيبلك ريوگ "
" مااريد "
" زين احميلك الحمام تسبح "
" بدون ماتحميه هيج اريد "

گومته للحمام .. نزعته ملابس دفيتله الماي رغم هو طلب مي بارد يسبح بس خفت عليه يتمرض اكثر ..

سبحته وهو بالگوة گاعد مخليتله كرسي .. طلعته للغرفه صارت بوجهي هديل طلعت ..
باوعلها .. جيبيلي ملوكة اشوفها ..

ردت " صار عيني هسا اجيبها الك "
رجعت المكانة بدلتلة .. نام وغطيته ..
شاف ملوكة ابتسم .. خلاها بحضنه ويبوس بيها ..
وهديل يمة تضحك وتسولف ..
شلون هيج تگدر تمثل ماادري .. رغم احنة مامتأكدين هي مسويتله شي بس افعالها الذكرتهن يكفن حتى يبين البداخلها شنو ..

من اول يوم دخلت وهي ماطايقتني وعبالك اني الاخذت نسر منها ..
سارحة افكر واتذكر تخطيطاتها وشلون دخلت الشك براس اسراء .
اندگت الباب ..

اجت بيداء " اجة عمي ابو هيام افتحيلهم باب الاستقبال .."

فتحت باب الاستقبال ..
دخل الرجال باوعلي ابتسم " هلا بنيتي بشري نسر شلونه "
رديت " على الله عمي تفضل ادخل "

شافه انصدم ..
اتقرب منه سلم عليه .. اخذت هديل ملوكة من ابوها .
سلمت على امها ووجهة تغير توترت ..

ابوها صار يگلب بنسر ويتلمس ببطنه ..
باوعلنا " هذا مو مرض بطنه مگربنه "

اتنهدت خاله " وهذا السبب الجبتك عليه "
رد " احجي خوية محتاجين شي اني حاضر "
ردت " ماتقصر خوية ادري بيك .. بس هسا نسويلكم ريوگ وتريگوا وارتاحوا وبعدها نحجي ."

اشرتلنا گمنا . سوينا صينيه ريوگ وجاي اخذناها الهم تريگوا وكملوا .. شربوا جاي ..

هديل اصلا ماگعدت يمهم ..
احنة گاعدين بالصاله .. شفنا خاله جابتهم واجت للصاله ..
سدت باب الاستقبال واجت ..
الرجال خطية لونه مخطوف ومايتفسر .. وام هديل كل شوية تگلها دادة اريد احجي وياج بشغله ..

ردت خاله " الحجي ينحجي هنا گدام ابوها ام هيام معناها عرفتي الشغله تخص هديل "

ردت " اذا شغله تافهة وعرك نسوان عيب تتوصل للزلم"

ردت خاله " لو شغله نسوان جان ماوصلتها واني حليتها بس هالشغله يرادلها حكم حتى اطلع من خطيتها "

دخلت بهاي اللحظة اسراء سلمت وگعدت ..
صاحت خاله هديل واجت تفرك بديها ..
وبدأت تحجي كلشي سوته ووياها اسراء .. الطلعت موبايل هديل من جنطتها لان اخذته منها ومارجعته
وراوته مكالماتها وي مريم المسجلتها مروة ..

حجت خاله " مو انت تدري من اجينا تخطب ورفضت وگلتلكم مريم شنو وشسوت .. بعد شلون تخابرها وتحجي وياها وذيج تدفع بيها .."

رد " هي ماتدري انت گلتي بس الي والامها .. وحتى گلتي مرت نسر الثانية طفله ويتيمة عقد عليها حتى يأمن عليها ومن تكبر يفسخ العقد .. ومن اجيت وشفتها استغربت جبيرة ومعدله "

ارتبكت خاله " هااا اي بس الظاهر هديل تعرف ويمكن ام هيام ماضمت السالفه عن بنتها لان طلعت تعرف وسوت نفس السالفه حتى توگع بشذر وتخلي نسر يطلگها "

فتح عيونه على وسعهن " هالحجي صدگ ولج "
قاطعته خاله " اني ماجبتك على هاي بس .. جبتك اريد بنتك تحجي واخلص ابني الجاي يموت .. "

سأل " نسر شسوتله "
ردت خاله " بيوم عرس هنا اجت بنتك الجبيرة وانطت بطل الهديل سمعتهن اسراء تكلها خلي بالماي لو باللبن .
وتعاركت وياهن واجت گالتلي .. وهن نكرن وحلفن بكل امام الماي هو ماي زمزم جابته البنتها تشربها منها للشفاء .. ولان ماامن بهيج سوالف صدگتها وسكتت بنتي . بس يوم عن يوم ابني يتمرض وهاي حالته تشوفها وكل اليشوفه مثل يگول .. نسر مو مال مرض اكو بي شي ..

گام بسرعه وسحلها من شعرها " ولج تالي عمري تنزلين راسي وشيباتي .. طلعت كل هاي المصايب منج ."

گامت امها تحاميلها دفعها ووكعها ..
" وخري انت خلي اربيها .. صوجي اني النطيتج وگلت خلي تشوف حياتها .. اجيتي وثبرتي بيت كامل "

صار يضرب بيها بلا وعي وهي تعيط .. احس الرجال اتهستر .. وهي تبجي وتصيح " جذب بوية والله جذب يردن يخلصن مني جذابات "

بس هو ابد مايسمع صار يدفر بيها لمن وجهها انترس دم ..
" احجي شسويتي للولد شنو هذا الشربتيه انت واختج هذي حسابها بعدين "

عاطت والله احجي احجي بس عوفني ..
عافها " يله احجي ؟"
ماقبل احد يتدخل ويحاميها ..
باوعتلنا " كله منها هي الاخذته مني تريده بس الها ..
والله مااعرف بسوالف السحر والله. . بس مريم گالتلي سويله حتى يحبج ومايشوف غيرج .. نسر عندي روحي شلون اذيه "

رجع ضربها " احجي شسويتيله ؟"
ردت وهي تعيط وتزحف من ابوها " محبة والله محبة مو سحر محبة حتى يحبني "

هو سمع هيج .. سحب حزامه وصار يضرب بي وهي تعيط .. مااتحملت المنظر ..

دخلت بسرعه يم نسر .. رغم كل هذا العياط نايم احسه فاقد ..
حركته تحرك .. خفت عليه.. حضنته وصرت ابجي ..
" وج اي حب هذا اي حب .. تأذين التحبيه وتموتيه اي حب "

ردت اسد اذاني ومااسمعهم ..
صاح ابوها " لمي غراضج يلة وامشي وياي بعد انسي عندج بيت ورجل وانت اصلا اذا صحى رجلج مايخليج بييته .. "

حجة وي خاله وصار يتعذر " خويه اعذريني طلعت مااعرف اربي .. راح اشوفلج سيد يعالجه .. ومن يصير زين خلي يجي ويطلگها "

عاطت " مااطلگ مااطلگ "
عاط بيها " بسرعه ولج لا اذبحج هنا واخلص منج "

لمت ملابسها وراحت .. خاله ماقبلت تاخذ ملاك .. بس هي صارت تبجي وتعيط " وحق الله احرگ روحي اذا اخذتوا بنتي مني "

ردت اسراء " خلي تاخذها ماما يصير نسر بخير وهو يتصرف "

للظهر يلة هدأ البيت .. بعد مااخذوها وطلعوا ..
خاله گالت ماانتظر احد العصر ناخذة للامام .
گمت اقرأ ايات ع المي وانطيهيا بلكي يهدأ شوية ..

خابرت خاله رديت ..
سألتني عن حالي وحال نسر .
" شحجي خاله نسر مو زين نسر فد مرة حالته "

حجيتلها الصار گالت اشوف مختار بلكي يعرف واحد ناخذة اله ..
رديت " اي والله خاله بلكي الله "

سماهر :
مر شهرين على زواجي من مختار ..
عانيت هواي وي زينب بس كنت صبورة كلش .. كلما اجيبلها شغله ترفضها وماتقبل ..
بس كانت تراقب تصرفاتي وي مروة .. مروة من اول يوم حبتني .. لدرجة وين مااروح وراي .. حتى دراستها تجيني ادرسها اني ..

مختار جان طيب كلشي ..
بالاول مااتقرب ابد . مجرد يجي يتغدا ويتعشا ويطلع او يروح للبصرة يبقى كم يوم علمود البضاعه ويجي
البنات يبقون بأمانتي ..

حسيته مأمن عليهم يمي .. العلويات يجن دائما بس ابد مايتدخلن بحياتنا ..
بس من يشوفن تصرفات زينب .. يوصني " اصبري عليها بمرور الوقت تعرفج "

جنت ابتسم وارد عليهن " ابد ماضايجة منها لاتفكرن بينا رغم ماتحجي وياي بس ماتأذي تبقى بغرفتها تدرس "

بكل هاي الفترة بالي يم سماح . افكر شسوالها سعد ..
كلما احجي وياه يكلي معليج ولتتدخلين ..

تعبت واني احجي .. بعدها حلفته بامي وابوية .. يكلي عايشة لو ميته ..

رد " عايشة لاتخافين "
رديت " اريد اشوفها "

رد " شلج بيها اتركيها "

طلعت حجة " اريد اطلع قهر السنين بيها .. لاتنسى هي جرحتني اكثر منكم "

رد " هالجرح المفروض ماتفكرين بي بعد ماتتزوجتي اغاته العادل "

رديت " وان يكن عادل مايهمني.. بس اختي اريد اعرف ليش طعنتني "

بأصراري عليه وافق يخليني اشوفها بس شرط محد يعرف بمكانها ..
كلت المختار راح يجي سعد ياخذني البيته ..
رد " اي روحي من تزوجنا لسا ماطلعتي .. البنات اني يمهن روحي تونسي "

رديت " رحم الله والديك "

باوعلي وابتسم " رحم الله اهلج على هالتربيه يمكن الله كرمني للمرة الثانية بدرة من درره "

ابتسمت " اول مرة اسمع منه هيج كلام "

اجه سعد اخذني ورحنا .. استغربت من شفته اخذنا المنطقتنا القديمة .. البيت اهلي !!

سألته " انت مخليها هنا "

رد " اي هنا .. خليها تعيش بالبيت الهدمته بيدها بلكي تتعذب "

فتح الباب جان مقفول بقفل .. المشكله احنة بيتنا من البيوت القديمة مابي لا حديقه ولا شبابيك هواي..
هو كم شباك ع الشارع وذني كلهن حديد وسيم امي الله يرحمها خلتلهن سيم حتى من تفتحهن ماتدخل حشرات .."

فتح القفل والباب واشرلي ادخل.
رجلي ماتشيلني .. اول مرة اقابلها بعد 27 سنه ..

سمعت الباب انفتحت .. طلعت من الغرفه .. صارت عيني بعينها..
وجهها ازرك من الضرب ..
شافتني ابتسمت " اجيتي تتشمتين بيه موووو؟"

اتنهدت " اجيت اريد اطلع قهر 27 سنه .. بس من شفتج ماحسيت اكو مشاعر اتجاهج لاحقد ولاحب "

ضحكت " اخذ اختك واطلعوا.. مو دفنتوني هنا بعد شكو جاي كل يوم تحفرون بگبري .. اني ميته اصلا من يوم المات عادل واخذتوا بناتي مني .. اكتلني المن مخليني.. والى متى ؟"

رد سعد " 27 سنه تبقين هنا والوحدج حتى تعرفين غلطجن لوين وصلج "

ردت بيأس " لعد اقتلني احسن .. لو خليني اطلع منا وماتشوفون وجهي بعد "

اشرلي سعد " يلة امشي كافي "

عاطت " سماهر طلعيني منا .. ماكفاج اخذتي بنتي مني وهسا بناتي الاثنين وحياتي. . هاي اخذتي ثارج وانقلبت حياتي .. ارحموني لو تقتلوني "

دمعت عيني بس سيطرت على نفسي " بنتج مااخذتها اني هي الاجتني .. اجتني تطلب الامان والحنان المالگته عندكم "

يلة سعد اني طالعه .. طلعت واني افكر بيها ..
قفل الباب سعد وراه ..
حجيت " سعد تحجي صدگ شنو تحبسها هنا 27 سنه قابل هي بسجن .. حتى حرام عليك "

رد " هي مو حرام السوته بينا .. عوفي الحلال والحرام ع جهة .. يلة تعاي اوصلج البيتج "

رديت " لا اخذني البيت عمي اشوف البنات "

رد " شعليج بيهن هن بعد عند اهلهن بطلي حنيتج المالها داعي "

رديت " تاخذني لو اخذ تكسي .. عو لاتبقى انت اني اخلي ارشد لو واحد من الولد يوصلني "

اخذني البيت عمي على عيونه ..
دخلت شفت مرت علاء ومرت عامر بالمطبخ يشتغلن.
سلمت ودخلت ..
جانت عمتي بالصاله گاعدة مثل عادتها.. شافتني ابتسمت. .
" ياهلا بعروستنا "

ضحكت " يااا عمة تحجين صدگ العرس صارله هواي وبعدين كبرنا ع هاي السوالف "

اتنهدت " الله شاهد جنت اتمناج الواحد من ولدي بس ماصارت .. المهم الله رزقج بقسمة زينة شلونه وياج زين "

رديت " وردة وحباب .. "
ردت " الحمد لله .. كالولج بنات عويدل اجني لهنا '

هزيت راسي اي گالتلي شذر.
ردت " هالشذر مااجت ابد شو وشافت اخياتها "

رديت " زوجها مريض كلش ومگابلته ماتطلع ابد "

ردت " ياااا عيني مايستاهل الولد يگول عمج خوش ولد ونشمي "

رديت " اي صدگ مايستاهل "

احجي وعيني ع الغرف بلكي يطلعن ..
ماطلعن لمن صاحتهن عمتي ..

طلعت اول وحدة منهن جانت مغطيه وجهها بشال والثاني مابيها شي ..عيونهن وساع وحلوة بس مايشبهن سماح يشبهن عادل…

گالتلهن عمتي " هاي خالتجن اخت امجن تعالن سلمن "

اجت سمر عرفتها لان شذر حاجيتلي عنها .. سلمت وابتسمت " تشبهين ماما .. شذر هواي حجتلي عنج تحبج هواي "

سألت سحر " عود ليش ماشفناج فد يوم… خلي هالناس كلها تكره امي انت ليش ؟؟ مو اختها كلكم تخليتوا عنها ليش واخوج وين اخذها "

رديت " مادام سماح ماحاجيه الجن معناها لاتفتحين الموضوع احسن .. "

ردت عمتي " يمة خالتجن مظلومة .. امجن الله يهديها…… "

باوعت العمة " مو وكتها عمه بس يكبرن يفهمن "

اجت هاجر جايبه بنتها صايرة تخبل ماشاء الله ..
واجن البنات نرجس وبتول .. اول مرة اجي من بعد زواجي.. اجو كلهم لهناك باركولي وجابو هدايا بس ماشفتهم بعد ..

سحر ماعجبها الوضع گامت بقت بس سمر .. نظراتها الي مثل نظرات شذر ..

نرجس وبتول يتصرفن ببرود مثل ماتصرفن وي شذر ..
وصيت سمر تجيبلي ماي ..
گامت هاجر " اني اجيبلج عمة "
رديت " لا اني اريد من سمورة "

ابتسمت وركضت تجيب .. من گامت ..
حجيت وياهن بسرعه .. " كافي حقد البنات هسا مالهن احد بس الله وانتن لشوكت تبقن معتبراتهن غريبات "

ردت عمتي " والله فنها التحاجيهن الا عتبت الباب مااخليها تعتبها وانتن هم اشوفجن مبتعدات عن بنات عمجن مايجوز امي ذني يتيمات ومكسورات خاطر."

تقصد على بنات عامر .. اعرفهن مايسكتن لان ابوهم مايحبهن ..

بقيت شوية وطلعت وصيت احمد يرجعني ..
طلعت سمر وراي " خاله هم تجين بعد "
رديت " ان شاء الله حبيبتي .. شوفي هنا اهلج وبيبيتج تحبجن معليجن باليحجي "

سألتها " هم تعرفين ماما وين .. وشذر هم مااجتنا بعد"
رديت " امجن بخير لاتخافن .. وشذر زوجها مريض احجي وياها واخليها تجي "

وصلني احمد للبيت..
دخلت .. مالهم صوت ..
دخلت للمطبخ شفتهم بالمطبخ يسوون عشا ..

بسرعه بدلت واجيت . " اني جايه اسوي "
رد مختار " ماكو فرق اصلا اني متعود وي بنات نسوي اكل مووو بابا "

ضحكت مروة " اي بابا .. ماما مريضه وبابا يگول خلوها نايمة خلي نسويلها اكل ونجي نطبخ هنا "

ابتسم وبينت ملامح الحزن بعيونة..
زينب شافتني طلعت..

رديت " روح ارتاح اني اكمل .. "

رد " ماعندي شي كملت بس الزلاطة بقت سويها "

سويت الزلاطة هو مسوي شوربه وكباب ومعكرونه للبنات يحبوها ..

كلما التفت اشوفه يباوع ..
ادنگ من المستحة ..

كملنا عشا ..
گمت اغسل ماعين .. اجاني للمطبخ ..
اريد احجي وياج بموضوع ..

رديت " مابقى شي واكمل "
رد " زين منتظرج بالغرفه "

استغربت اول مرة يدخل الغرفه من يوم التزوجنا ..
كملت ورحت للغرفه لگيته گاعد ومدنگ ..
شافني عدل كعدته ..

اشرلي اجي يمه ..
گعدت
جان يحجي بس ماخلة عينه بعيني..

" اني بالبدايه اختاريتج البناتي وبس ..وصارحتج من البدايه .. بس بعدها حسيت اني جاي اظلمج وياي ..
كل مرة تحتاج رجال يكون كلشي الها .. يمكن غفلت عني هيج شغله بالبداية .. بس هسا مااكدر اظلمج واخالف حكم الله. .
انت مرتي بشرع الله ولازم حقوقج كلها توصلج ..
ماادري شلون احجيها.
بس اذا تردين من اليوم انطيج حقج وهالغرفة تكون النا اثنينا ..

رديت رغم ضجت من كلامه " اذا خايف من الله بحقوقي فاني مسامحتك .. من اول ليلة اجيت بيها لهنا گلت انطيه فرصه وحقه مرته ويحبها.
بس اني هم مرتك .. وكت مااريدك تجي واطالبك بحقوقي اريد گلبك يجيبك الي مو مخافة الله ..

گمت عنه وطلعت ..
هو دخل للاستقبال مثل عادته…
واني دخلت سبحت وبدلت .. صح سنين واني غالقه گلبي .. بس من شفته لليوم تفتحت الزهور واجه الربيع بحياتي .. حبيت كلشي بي كلامه رزانته مساعدته الي من غير مايگول اني الرجال وانت المرة ..

بس ساعتها من گالي اريد انطيج حقج مخافة من الله جرحني .. مستعدة اصبر سنين بس كون يجيني برغبته الي مو غير شي ..

عدلت نفسي اله وتوقعت يجي ..
بس خذلني ومااجه ..
كل ليلة تمر تبقى عيني ع الباب الى ان اغفى ..
بعد كم يوم كملت صلاتي ..
دگ الباب ودخل ..
باوعلي وابتسم " يتقبل الله "
رديت " اتقبل الله اعمالك "
رد " اذا الله انطاني هيج نعمة وجمال شلون اگدر ارفس هالنعمه واتبطر .. اذا تردين تسمعيها مني .. راح اسمعج .. يابنت الناس اني رايدج من اول يوم اجت عيني بعينج .. من اول يوم رجف گلبي الج .. بس خفت من هواي امور صدتني عنج .. مشية رجلج بالكاع جنها تمشي على گلبي .. جنت احب المرحومة كلش وتوقعت ماكو مرة تگدر تسحرني مثلها .. بس بهاي الشهرين العشتهن وياج .. جذبني الج "

جنت اسمع ومامصدگة ..
طلع وعافني بحيرة .. لليل بدلت ورتبت نفسي وهالمرة متأكدة راح يجيني وهو رايدني من صدگ ..

دخل شافني صار يصلي ع النبي ..
اتقرب مني .. وخله عينه بعيني ..
الماسويته بليلة عرسنا لازم نسوي هسا ..
فرش سجادة الي واله ..
ووصاني البس ملف الصلاة ..
صلينا .. وبعدها طلع القران .. صار يرتل واني اسمع لدرجة اقشعر بدني من صوته ..
حسيت بحنين وحب من ريحة الجنة ..
بعز الشتا اجتني نسمة هوى باردة وعطرة..

كمل القران…
لم السجادات ..
واتقرب مني .. سحب ملف الصلاة مني .. وفتح شعري
ماحسيت روحي ام الاربعين سنه… وعبالك عمري عشرين واني بين اديه ..

باسني بگصتي .. غمضت عيني ورجف گلبي ..
همس .. اعاهدج بالله راح اصونج وادللج الاخر لحظة بحياتي .. بس بالمقبال اريدج الانسانة المؤمنة الداعية القارية القران ..
جنت اسمع ودموعي تنزل ..
رحمتك ربي .. انقهرت وتمرضت لان عادل تركني وخذلني…
بس طلع ضاملي هالنعمه الراح تعوضني عن كل الم عشته ..

اليوم اكملت فيك نص ديني يانعمة الله الي ..
هو حلاة الحب حلاله في يسار اليد دلاله ..

من اول ليلة بينا ملك روحي وحياتي كلها .. صرت اشوف بي الجنة الرزقني الله بيها بالدنيا ..

شذر :
طول ذيج الفترة مگابلة نسر ماتركته ابد .. جنت اقراله على الماي وانطيهيا يخفف المه ..

حاجتني خاله بعد كم يوم ..
گالتلي اكو واحد سيد يعرفه مختار يعالجه بالقران والاعشاب ..

فرحت " هيج وصدگ يصير زين ماانسى فضلكم "
ردت " يافضل امي الفضل لله .. مختار يكول اذا يردون اني اخذهم بسيارتي "

ركضت للبنات وخاله گلتلهم فرحت خاله " هيج ويطيب الا انذر طلي واذبحة الوجه الله "

باوعت العذراء وگلتلها " خلي ناخذ عذراء ويانا هم نشوفها ليش هيج ضعفانه "

ثاني يوم اجت خاله وعمو مختار ..
جان انسان حباب كلش مبين ..

كال سويلي طريق بوية ادخل اشوفه ..
دخلوا البنات .. دخل شافه ودنگ ع حلگة اشتمه .
هز راسه . " هذا مشرب . الله لاينطي اليأذي بني ادم بهيج شغلات "

ردت خاله ام نسر " اي والله خوية الله لاينطيها دمرت بيتي وابني "

اشرلنا " لبسيه دشداشة اذا عنده اريح اله واخذي وياج خاوليات وبطل مي "

جبتله دشداشه .. بدلتله ..
وتكاه عمو مختار واخذة للسيارة ..

رحت العذورة " يلة گومي "
ردت " يمعودة مابيه شي شبيج هي افلاونزا "

رديت ميخالف روحي ويانا ..
اخذناها والطريق جان طويل .. سألت خاله .
وين احنة هسا هواي مشينا ..
" ردت هاي طويريج دخلناها "

وگف السيارة بسرعه .. " جيبي المي خلي نغسله تعب وعرگ "

نزلت بسرعه غسلتله ومسحته بالخاولي… گالي خليه يمي الخاولي امسح بي ..
كل هذا الطريق هو ساعه يفقد وساعه يصحى ..
وين ذاك نسر الي يهد الگاع بمشيته ..

وصلنا للرجال الاخذنا اله عمو مختار ..
طلع يعرفه من العشيرة هم سيد ..
شاف نسر تخبل ..
گال وين جنتوا عنه هذا جسمه متشبع كله .. وبطنه اذا بقت هيج يموت مايبقى ولو هو زين منه وعايش لسا

اخذ مي واوراق شجر وورق سدر وبعد غيرهن مااعرف شنو بس حديقته جبيرة ومن كل شي اخذ ورقه ..

گال العمو مختار " ساعدني حتى اسبحه واشربه المي وانت ادخلن بوية يم العلويات "

دخلنا واني بالي يمة..
سمعت صوته يعيط ويبجي " ااااخ بوية اخذني وريحني بووويه "

سمعت هيج اتهسرت… وخاله ام نسر تلطم وتصيح ابني مات ابني مات ..
ردت اطلع لزمتني خاله " وين رايحة خليه يرتاح "

كملوا .. گال بوجهكم للعباس ابو فاضل .. الله يخلصه منه بضريح العباس ..

سألته خاله " سيد ماتشوف بنيتي هم خاف مثله شو تسخن وماتاكل مدري شبيها "

باوعلها " بنتي اني مااخذ خيرة بس اعرف البشر من عينه ..