من تجي خاله او رسميه يخابروني افتحلهم ..
زمن من عرفت بيه ببيت عمة .. صارت تجيني ..
اتعجب عليها شلون تطلع وتمشي وشعجب اهلها يقبلون ..
جاي نسوي دولمة اني وياها .. سالتها .
شعجب اهلج يخلوج تطلعين ..
اتنهدت .. لان معتمدين عليه بالمصرف .. ابوي يادوب الي يحصله ينطيهيا الها المرت ابوي اخواني كلهم مسؤولين مني ومن اخوي الجبير خطية يشتغل بمحل وي واحد وينطيه الي يگدرله ..
اني همزين الله الي عرفني عليج وعرفتيني على خالة رسمية انطتني نص معاميلها وخلتني اشتغل وهسا الحمد لله ..
اتنهدت " بعدج صغيرة على هذا الشغل "

اتنهدت " يمكن صغيرة بعمري بس الدنيا كبرتني "
زمن :
اصلي مو من بغداد .. انهزمنا من ريفنا بعد السقوط واجينا لهنا استقرينا ..
حنا كاعدين بمنطقة زراعية .. عندي خمس اخوان .. بنية وولد اكبر مني والبقية كلهم صغار..
جدي الله يرحمة جان متزوج وحدة قبل جدتي ..
عندها ولد واحد .. بس هي جانت مجبورة عليه .
وماتسمع كلامه تطلع وتمشي براحتها . وجدي يضرب بيها مايفيد .. بيوم طلعته عن طوره راد يضربها.. اجه ابنها يدافعلها مايدري بي جدي ضربه طاح بالشط ومات
گامت تهوس وتصيت كتل ابني كتل ابني لين طلگها
بعد تزوج جدتي ام ابوي ..
جانت تحبل توام توام بس مايعيشون .. الى ان ..بيوم مرة گالتلها ..
من تجيبين اخذي قطعه من اذنه خليها بتمرة واكليها ويعيشون ..
صدگ جدتي سوت الي گالتلها عليه المرة .. وصاروا جهالها يعيشون ..
الى ان صاروا عمامي ستة .. ابوي اصغرهم ..
وعيت الدنيا امي ميتة من كبرت عرفت ماتت مقتولة شلون ماادري ..
ابو تزوج واحنة صغار ..
مرت ابونا ماتعرف لاحق ولا باطل. زوجت اختي الجبيرة بعمر 12 سنة الواحد يشرب خمر ومخدرات وكل مساوئ الدنيا بي ..
وخلتني اتحمل مسؤولية البقية بنفسي .. من غير مسؤولية البيت المصرف ..
من عمري ثمان سنين واني تعرضت التحرش ..
شذر :
تخربطت احوالي من سمعت هالكلمة .. ماعرفت شحجي .. بسرعه سألتها من منووو. ؟
ردت " ابن عمي اكبر مني بهواي واستغل طفولتي وماافهم شي… جان ياخذني بين الزرع "
لعبت نفسي من سمعت ردت اتقيأ .. گمت غسلت وجهي ..
اجت يمي " هاي سمعتي كلمتين لعبت روحج لو عايشة الي عشته شسويتي "
باوعتلها " ااااخ زمن لو تدرين المر عليه .. بس كلمن همة شكل .. وشلون گدرتي تتجاوزين الي صار "
نفضت عباتها وگامت ..
" غير يوم احجيلج سالفتي .. هسا خليني اروح الم ديوني .. تحتاجين شي اجيبه ؟"
هزيت راسي " لا مااريد بس لاتگطعين بيه اني وحدي هنا تدرين "
غسلت اديها وكالت ان شاء الله..
طلعت وسدت الباب وراها .. واني الاگول ماكو وحده مثلي طلعت اكو مثلي واسوء وعايشات حياتهن ..
يمكن صار الوكت الي لازم اكون بي قوية واگوف على رجلي ومااخلي الماضي يلعب بيه ..
هاي مر اسبوعين وماشايفه احد منهم وماسامعه اخبارهم ..
خليت السيم كارت وخابرت عذروة مشتاقة الدنو ..
اول ما اتصلت ردت بسرعة ..
گلتلها مااريد احد يمج ..
ردت " وحدي والله بالاستقبال .. ليش هيج تسوين وياي .. اريد اموت البيت مابي طعم بلاج "
سألتها " دنو شلونها اشتاقيتلها "
ردت " دنو مو زينة لاتاكل ولاتشرب حالتها حالة .. "
اتنهدت " انطيني احجي وياها . "
حاجتني " ماما ليش عفتيني ارجعي "
رديت " حبيبتي ماما اريدج تاكلين وتصيرين حبابه حتى اخذج يمي . "
فرحت " اي ماما اخذيني مااريد ابقى هنا "
سديت الموبايل .. بسرعه دگ عليه وعبالك كلبه حس فتحت الخط ..
نطيته رفض.. دز رساله " انتي دمرتيني خلتيني اكره حياتي كلها مسلمج بيد الله لان هيج سويتي بيه "
رديت " واذا طلعت مظلومة .. بيد منو اسلمك اني .. راح تتحمل دعوة المظلوم وكسرته "
قفلت الجهاز وبجيت .. حرامات على گلبي السلمته الك
حسيت روحي تعبانه ونحلانه .
خليت گدر اادولمة بالمجمدة .. ورحت نمت ..
خابرت خاله تطمأن .
گالت العصر اجيج .. مااكدر اعوف امي وحدها فد مرة حالتها..
راح تجي مرت سعد يمها بحجة اطلع للسوگ واجيج ..
نمت للعصر گعدت ..
باوعت الساعه خمسة .. هواي صايرة انام .. ولو حياتي صايرة بس نوم حتى مكينتي مو يمي والتهي بيها ..
خابرتني خاله گال اجيت راح اوصل ..
فتحت الباب ..
سلمت عليها ودخلت ..
گلتلها خاله اليوم عندي مراجعه للدكتورة شتگولين اروح لو لا ..
ردت " اي بدلي وخلينا نمشي بسرعه ونجي .. انتي ماعاجبتني وجهج اصفر ونفسيتج تعبانه العلاج النفسي ذيج الفترة شلون ريحج .. '"
گمت اريد ابدل ..
دگ موبايلها عبالي نسر .. باوعت خالو سعد ..
اشرتلي اسكت .
ردت " الو هلا خوية . هااا اي رحت عندي غراض محتاجتهن اجيبهن وارجع .. مااتأخر .. "
كملت صار وجههة اصفر ..
سدته ووكفت
" شكو "سألتها
سعد يگلي اني واكف بباب البيت الي دخلتيلة افتحي الباب ..

يتبع ..

///// #تكملة بارت احدى وخمســــون /////
ج2


لطمت خالة على وجهها " عزاااا وج شأگله .. هذا مايتفاهم "

رديت " فتحيه خاله بعد ماتفرق عندي "

تقدمت للباب فتحته بسرعه هجم عليها " المن هذا البيت احجي من هيج كلما اجي ماالگاج بالبيت عايفة امي وحدها شتصخمين هنا احجي احجي لااذبحج"

طلعت من باب المطبخ شافني انصدم " منو هاي ؟؟"

خاله ترجف من الخوف ومااعرف ليش ..
اشرتلي " روحي انت ادخلي اني اتفاهم وياه "

باوعلها" ولج احجي المن هذا البيت وهاي منووو؟"
ردت " هاي بنت سماح… ."

بعدها ماكملت عاط " ياسماح لج بس لا اختج العار .. وبنتها شتسوي هنا وانتي شنو علاقتج بيها…

جان يسأل ونار طلع من عيونه وعبالك شاف امي بيه ..
هجم عليه تراجعت ..
" وين امج ولج احجي وين امج " .. تراجعت لورة من خوفي ..
سحبته خاله ..
" هي مالها دخل امها الي اذتنا هي شذنبها ؟"
ردت :
" هي اصلا عايفه اهلها وصار شگد هنا عايشة "

ضحك " ليش عايفتهم اكيد لازم تطلع مثل امها .. شوفي نفسها حتى العيون ماتفرق عنها شلون ولج انطاج گلبج تحجين وياها وبسببهم ابوي مات واجانا العار .. انتي مثل اختج .. تردين… ..

قاطعته بعياط " كافي كافي گلبك الاسود شوكت ينظف ترى سماح وعادل اكثر وحدة اذوها اني .. اني الي طعنوني بظهري واذوني انيييي .. وهاي الشايفه انطعنت منهم اكثر مني .. لو ماادري بيها بريئة مااباوع بوجهة "

جانت تفرفح وتعيط بحرگة گلب .. حسيت بالوجعة الكاتمتها بگلبها كل هاي السنين ..

جنت بس اباوع ودموعي تنزل . اهلي شمسوين بيهم هيج لدرجة خالي وحاقد عليه بسببهم .. احسه من يباوع بوجهي يريد يموتني ..

بالگوة سحبته خاله وطلعت .. اشرتلي اقفلي الباب زين ولاتفتحيها مااعرف جانت خايفه من شنو ؟؟

بعد شنو يصيبج ياشذر اكثر من هيج .. ومنين بعد اخاف ..
اذا حتى خالي من شافني عبالك يريد ياخذ ثار امي مني .. وخاله خايفه معقولة لو عرفوا عمامي يأذوني . معقولة يحاسبوني على ذنب مو ذنبي ..

قفلت الباب ونمت مر يومين وخالة مااجتني .. بس تدز رسائل تطمأن عليه ..
ماردت اسألها ليش ماتجي واحرجها…
حتى السند الوحيد الي بقالي بهاي الدنيا يردون يبعدوها عني ..

طگ گلبي على دنو ..
خليت السيم كارت وخابرت عذراء ..
ردت بسرعه " ها شذورة شلونج مشتاقتلج يول البيت ماينطاق بدونج"
اتنهدت " تتعودون ذاك البيت انتهى بالنسبة الي ومستحيل ادخله بعد .. شگد حاولت اكون منكم واسوي كلشي حتى ارضيكم تالي بلحظة نسيتوا كلشي وتهمتوني بتهمة لو اموت مااسويها .. وج اني زوجي وحلالي ممتنعه عنه سنين مو دور طفل واصغر مني "

ردت " وج عيني والله حوبتج بينت بينا .. البيت صار مثل ساحة حرب واحد ياكل الثاني .. بيداء راحت وتركت البيت وانتي هم .. نسر ابد مايجي بس بالليل ينام بالاستقبال لايصعد فوگ ولا يمها تاركها .. وهي اصلا مسوية عمليه ونايمة ..
حتى مايحجي وي احد ..

اتنهدت " وشنو الفايدة هو الي اختار يصير هيج . مسح كل تعب السنين بلحظة.. وج سنين هو الي اكبر سند وبلحظة رجعني النقطه الصفر .. هو بالنسبة الي مثل اول يوم اجيت لهنا .. وهم ذاك اليوم احس شوية ع الاقل مااكرهة "

ردت " الله ينتقم من الي سواها.. ويطلع حقج "
رديت " عوفينا من هذا الحجي .. دنو وين مشتاقتلها "

ردت " دنو مريضه .. لا اكل ولاشرب .. اخذتها امي للطبيب يگلها مابيها شي بس حاله نفسيه خاف واحد مضوجها لو ضاربها "

اتنهدت " سودة عليه امي .. وج مشتهية احضنها واشمها .. شلون اشوفها ؟"

ردت " هنا العصر تاخذها للطبيب لان جود هم مريض اگلها اذا قبلت تجيبها الج بس شلون خاف مشتاق يگول النسر ؟"

رديت " لاتجيبها بس گليلي اي دكتور راحوا اله حتى اروحلها اني لهناك "

ردت " زين لعد اشوفها وادزلج برسالة لاتغلقين جهازج"

بقيت منتظرة شوية ودزتلي العنوان ..
اني مااندل ببغداد ..
خابرت رسمية تاخذني ..
وصلت لهناك بقيت گاعدة.. رسمية تحوس ..
اخر شي گالت اروح اشتري كم حاجة انتي ابقي هنا

عيني ع الباب جانت .. بس لمحتهن اجن كلبي فرفح عليها ..
شافتني شهگت واجت تركض..
حضنتني وتبجي واني ابجي.. كل الي بالعيادة يباوعولنا ..

جانت تحجي وتبجي " ليش عفتيني اني اريدج انتي مااريد ابقى يم بابا "

مرة يمنا سألت " شلون ينطيج گلبج تتركيها وتزعلين اذا مو گد المسؤولية المن تتزوجن وتحبلن وتجيبن "

سكتت عنها .. لو بيدي مستحيل اتركها ولو بيدي اخذها منهم ومااخليها هناك بس مو بيدي ولا بيدها انه انخلقنا بهيج دنيا ومن هيج اهل ..

باوعت الهنا ابتسمت " منتظرة دوري شوكت تشوفيني"

گمت سلمت عليها .. صارت تتعذر وضايجة ومقهورة وتحجيلي عن وضع البيت ونسر ..
تگول .. مانشوفه يطلع من الصبح لليل يدور على مهيمن ماخلة مكان مادورها وماهو ..

اتنهدت " وليش يدور .. يريد يحاسبه لو يدور ع الحقيقه ولو هو اصدر الحكم بسرعه معناها يريد يحاسبه مثل ماحاسبني "

ردت " الي صار سوء تفاهم وتدمرنا كلنا من وراه .."

همست " لا مو سوء تفاهم لاتبررين الاخوج هنا الي صار قلة ثقه وشك .. اخوج مريض لسا من خيانه مريم يتوقع كل النسوان مثلها ..
بس الي قاهرني اني عشت بوسطكم سنين معقولة مايعرف شنو شذر وشنو اخلاقها ..

اتنهدت " ساعه شيطانية الله اعلم حالته شنو هسا "
رديت " سدي الموضوع هنا اني اجيت علمود دنو "

بقيت ابوس بيها واشمها .. دخلنا للدكتور فحصها مابين شي… بس كتبلها علاج ومشهي لان ماتاكل..

اخذتها بيدي بين ماتطلع هنا من الدكتور بقت علمود ابنها . اشتريتلها لفة كص وعصير ..
وگلتلها " اذا تحبيني اكليهن "
ردت " وماتعوفيني بعد "
رديت " اكليها هسا وبعدين نحجي اني وياج "

گعدنا گامت تاكل بالگوة كملت نصها وشربت العصير
اخذتلها كيك وحلويات من الي تحبهن.
بعدها وصيتها " باعي حبيبتي هالفترة رام نلتقي هيج من غير مايدري ابوج او اي احد بالبيت .. وبعدين بلكي اجيبج يمي "

بالگوة قنعتها رغم اعرف جذبت عليها وماادري شلون اوفي بكلامي .. مستحيل نسر يسلمها الي او يخليني اشوفها..

اخذتها واني عيني عليها ..
اجت رسميه محملة علاليگ .. صعدنا تكسي ورجعنا ..
راحت البيتها " لليل اعشي العيال واجيج "

رجعت للبيت سويت عشا ..
خابرت خاله .. گالت بيبيتج مريضه مااگدر اجيج ..
مااعرف صدگ او تتعذر بسبب خالي ..

ايامي صارت مثل السنين تمشي على كيف مرات تجي يمي زمن الصبح شويه وتروح ..
ذكرتني برسمية من تجي يم عمة. من الصبح ..

وبالليل تبات يمي رسميه نفرش بالاستقبال وننام الغرفه ابد مادخلتها بعد من اخر مرة احنة اجينا .. لان الي ذكريات حلوة بيها وهالذكريات تهيج اوجاعي ..

بيوم گاعدة اندگت الباب .. مافتحتها ..
زمن او رسميه او خاله يخابروني او يرمشولي من يجون يدرون بيه ماافتح الباب ..

خفت لايكون هو… ولو بس اول مرة من اجه وبعدها مااجة.. او يمكن يجي وماادري ..

هالمرة طولت الدگة حيل ..
طلعت باوعت من جوة الباب رجل مرة مو رجال ..
صحت منو ..
ردت " اني بيداء "

استغربت بيداء شعندها ..
فتحت الباب سلمت عليها ودخلتها ووياها اولادها ..

كعدنا بالمطبخ ..
صارت تبجي " مااعرف بيا وجه جاييتج .. بس مستحية منج .. وماعندي احد اشكيله .. اهلي وبطلت اروحلهـم.. خابرت العذراء كالت انتي هنا ببيت عمتي "

اتنهدت " گالتلي عذراء انتي طلعتي من البيت "
ردت " اي طلعت . اشكال صار بيه وتحملت بس يشمرن تهمة على ابني مااتحملت حتى عليج والله مارضيت بس شسوي الله ع الظالم ان شاء الله "

رديت " لسا مامستوعبة مهيمن شعندة اجه الغرفتي .. وليش خنگني .. بيداء مهيمن خنگني خنگة موت .. مو تزعلين بس بسببه اني انظلمت "

اتنهدت " ماالومج .. طلعت مااعرف ابني .. الحجي بينا كله من عمة .. عمة هو الي ياخذه وياه وين مايروح والله اعلم وين ياخذه .. واني شاكة يعرف مكانه ومايگللنا .. راح اتخبل اريد اعرف ابني شعنده صعدلج وليش .. ؟؟

رديت " مهيمن مو غايته اني .. لان بالاول فتح الكنتور البي الفلوس .. وبعدها من گعدت خنگني .. احتمال راد ياخذهن .. مو تزعلين بس هذا الشي الوحيد الي ممكن اتوقعه . "

ردت " وهو هذا الي مخبلني لو فرضنا صعد ع الفلوس ليش والمن يريدهن من القشمره ومنو كاله اصلا عندج فلوس ؟"

رديت " هالجواب هذا عندة بس .. ولو بعد مايهمني اي جواب "

گامت حضنتني وباست راسي وتتعذر ..
ابتسمت الها " لاتعتذرين شنو ذنبج انتي .. اليوم ابقوا يمي نتغدا سوة "

ردت " لا اروح مااضوجج "
رديت " لا ابد .. عندي دولمة بالمجمدة اطبخها وناكل سوة "

هزت راسها .. وباوعت للبيت .. " صاير يخبل البيت ومرتب "
اتنهدت " هاي نسر سواه وفاجأني .. حتى الاستقبال مغير اثاثه .."

گامت شافته انبهرت بي " امانة الله هو يموت عليج وعيونة ماتشوف غيرج "

ضحكت " صح لدرجة اول مگالتلة اسراء صدگ ونسى الحب والوعد والثقة كلها "
ردت " مو ادافع اله بس نسر مريض بالشك .. الي شافه من مريم خلاه مايثق بأي احد… هسا تكولين وين الحب .. مريم جان يموت على تراب رجلها . يعشقها من صغرها.. وبعمرة مااتوقع تخونه وخانته . فشي طبيعي يصدگ لان مريم خلت عنده هذا المرض.. اخوي مظلوم مثلج ومثل ابني .. بس الصوج بسوسة البلة "

اتنهدت " من يومها ماحبتني اسراء ليش ماادري "
ردت " ترى اسراء ماتحب بس نفسها اني اختها واگلج .. حتى نسر صح تحبه بس ماتعرف شلون تعبر تريد تمتلكة ولان وجودج شغله عنها كرهتج اكثر "

سكتت لان ماكو اي مبرر الافعالها ..
جهزت الغدا وتغدت يمنا .. بقت للعصر يلة راحت…
گلتلها تجيب الجهال وتبقى يمي ماعندي احد ..
ماقبلت خاف مهيمن يرجع ومايلگاها ..

بالها يمه وخاصه الدوامات قربت وهو اول جامعه وشلون راح يداوم ؟"

بعد ماراحت نظفت البيت . حسيت بلعبان نفس رحت استفرغت…
مااعرف شبيه احس روحي باهتة… اشتميت ريحة سمج ولعبت نفسي ..

يوم عن يوم تأذيت اكثر .. نايمة دائما مالي خلگ الاي شي ..
كل الاكلة استفرغه .. وكمت اسخن وجسمي مكسر ..
خابرت خاله ..
جاوبتها وارجف…
خاله اريد اموت مااعرف شبيه ..

ردت " ياامي شبيج شتحسين "
رديت " جسمي مكسر من السخونة ومعدتني مأذيتني واحس بنحول مو طبيعي خاف شو شبيه "

ردت " العصر اجي اخذج للدكتورة "
رديت " اذا متگدرين اخذ رسميه واروح "

ردت " لا اجيج اني گلبي ماينطيني ادزج وي رسميه "

للعصر اجت .. بدلت ورحنا ..
دخلت للدكتورة شرحتلها وضعي حولتني ع التحليل ..
سوينا التحليل..
راحت خاله تجيبه .. اجت مصدومة ..
باوعتلها " شبيه خاله لاتخوفيني بس لامرض مو زين "
ردت " وج يامرض انتي حامل "

صفنت بوجهة " حامل شنو ومنين "
ردت " شنو منين غير من المگموع الاخذج "

نزلت دموعي " تحجين صدگ خاله مااريده"
ردت " شنو ماترديه هذا رزق ربج لاتكفرين "

عفتها وكمت حتى مارجعت للدكتورة عود گالت ارجعولي ..

خالة تركض وراي " وج خلي نشوف الدكتورة شتكلج "
رديت " مااريد تكلي كلشي مااريد هذا الطفل راح يذكرني بكلشي سواه الي نسر مااريدة "

ردت " لاتصيرين مثل امج استغفري ربج .. امنيتي جان يصير عندي اطفال ويصيحولي ماما . وانتي اجيتي وعوضتيني اشو ابد ماكرهتج ولاگلت تذكريني بيهم وبخيانتهم "

لزمتني من ايدي التوجعني .. سكتت ..
اخذت التحليل مني وراحت للدكتورة هي .
كتبتلي علاج جابته واجت…
تعلمني عليه واني مغلسة ..

اخذتلي نفر گص ومقبلات وصمون ..
" هذا عشاج لاتعبين نفسج واكلي فواكه واتقوي .. "
هي تحجي واني صافنه على حكمة الله .. ابد ماكنت مصدكة بيوم يصير عندي طفل .. وبطريقة مشمئزة مثل هاي "

رجعت للبيت فتحت الباب ..
دخلت وراي . صار بوجهي ..
گاعد بالحديقه .. " شفته شهگت "

گام " وين جنتي لو هاي فرصه محد يحاسبج "
عطت بي " شعندك هنا وشعندك اجيت اني مو خاينه مو حالي حال مريم .. طلگني شمنتظر .. "

گرصتني خاله وسكتتني .. وردت عليه ..
" نسر مو وكتها روح منا .. الي سويته ماينغفر وانت اصلا شعندك هنا جاي تكمل الي بديته "

رد " مادامها على ذمتي ترجع غصب عنها البيتها وتبقى بگبرها فوگ ماتنزل منه "

ضحكت بأستهزاء " تحلم ارجع . تريد طلگني .. اصلا من البداية زواجنا غلط وهسا صار غلط نستمر بي "

قبض ايده " يعني شتردين تعيشين وحدج هنا… ذاك اليوم البيت نباگ .. يعني عاجبج يدخلون عليج عصابه لو حراميه "

رديت " وليش مستغرب مااني ببيتك وبحمايتك ومارحمتني .. ف ع الاقل الغريب يحرم احسن منك .. وبعدين اني ماابات وحدي "

رد " هذا اخر حجي عندج "
رديت " اي .. وبعد مااريد اشوفك هنا مرة ثانية .. "
رد " وانت تحلمين اطلكج اكبر عقاب الج اخليج معلگة هيج .. ودنو ماتشوفيها ابد "

سكتت عنه .. فتحت الباب ودخلت ..
بقت خاله يمه خفت تگله ع الطفل ..
حجت وياه " كل يوم اشكر الله عليك لان سترتها وحميتها بس طلعت ماتستاهلها .. والدليل انت عرفت بيها بعدهي بنية ومابرئتها ولا اعتذرت منها بالعكس زدت بكلامك وتجريحك الها .. شذر مستحيل ترجعلك انت خسرتها وتخسرها نهائي لو بقيت هيج .. وراح تخسر هواي اشياء وياها "

عاط " شخسر مثلا .. صبرت سنين عليها وتحملت وهي تتعزز وتتمنع عني بحجة الخوف .. وتالي من تعالجت خانتني الخيانة مو الا…… .. ..

مااتحمل يكمل .. طلع وسد الباب حيل ..
طلعت الخاله ..
باوعتلي " لازم يعرف "
رديت " ابد واذا گلتيله تخسريني .. ماشفتيه شلون يحجي لسا مصر اني خاينته حتى بالجذب اكو بعيونة ندم او اعتذار "

ردت خاله " وتالي شلون .. لو قبل اگول حقج بس هذا الطفل… .

قاطعتها " هالطفل گلتلج مااريدة مااريدة "
ردت " استغفري ربج وصلي ترى اذا تسوين هيج يغضب عليج .. شنو ذنبه هالطفل اذا ابوه خبل وامه اكثر منه "

كعدتني كبالها وتوكلني مثل الطفل بعدها نطتني علاجي وراحت ..

قررت اضم خبر حملي ومحد يعرف بي بس خاله ..
بقيت اتلمس ببطني .. اتمنيت لو جايه بغير هاي الطريقه ..
تذكرت دنو وخفت .. اكيد نسر اذا عرف راح ياخذة مني مثل ماسوه بمريم .
لا مستحيل يسوي هيج .. وليش مستحيل مو هو صدگ اني خاينه وظلمني .. بس ليش ماطلگني وهي بسرعه طلگها !!

اندگت الباب .. عبالي خالة رجعت..
فتحتها شفت خالو سعد ..

استغربت . عاط بيه .. وينها سماهر .. شگد نبهتها ومافاد الظاهر يراد اسوي بيها الماسويتة الامج ال……

خفت منه ردت اسد الباب دفره فزيت وركضت للمطبخ سديت الباب..
بهاي اللحظة دخل وراه نسر بسرعه . من شفته فرحت رغم مقهورة منه حيل وكارهته بس فرحت من شفته ..
مااعرف شرجعه بس المهم اجه ..
ضحكت بداخلي . صرت اطلب الحماية من الي امنته روحي وعذبها .. من الي جنت احس بالامان يمه وخذلني !!


يتبع… .

///// #البارت اثنين وخمســــون /////
ج2


دخل نسر بسرعة لزمة من ايده ودفعه عن المطبخ..
" شعندك هنا وشرايد منها ؟"
رد خالو" انت منو وشعليك "
رد نسر " اني زوجها نسيتني لازم .. مو گلت ماعندنا بنت اخت واختنا ماتت من زمان شعندك هنا ؟"
رد خالو " ماجاي عليها .. جاي على اختي الضحكت عليها مرتك وقشمرتها .. "
اشرله نسر للباب " اختك طلعت .. وبعدين هي خالتها انت شكو تتدخل .. منو بيكم عرفها لو سأل عليها صارلها سنين هنا غير خالتها "
تعصب خالو " يعني سنين صارلهن يلتقن ؟؟ اسمع لك اذا ماتبتعدون عنها وهاي مرتك تسمع والله حتى من بغداد كلها اشيلكم خلي ترجع مين مااجت "
صار بينه وبين نسر عياط .. وعلى صوتهم . خالو مثل ماگالت خاله عصبي ومايتحمل ..
تعبت واني كل يوم واحد يهدد بيه .. فتح الباب وطلعت ..
" كافي كافي فضحتونا .. وانت خالو حرام عليك شنو شفت مني وتحرمني من خاله ماعندي لااهل ولااحد بس هي الي .. "
عاط بيه " واحنة مانتشرف بوحدة مثلج واصلا متبرين منج ومن اهلج " .. تقدم الي رجعت لورة عبالي يريد يضربني عثرت بالدنگة مال مطبخ .. لان اكو نزلة بين الطارمة والمطبخ .. "
وگعت على مقعدي وظهري ..
صحت بصوت عالي .. تأذيت حيل ..
دفعة نسر وطردة من البيت ..
اجة الي " شبيج تأذيتي ؟"
گمت بالگوة بدون حجي . مااعرف ليش خفت على ابني .. الوگعة جانت قوية گعدت حيل بالكاع بحيث عمودي الفقري حسيته اهتز من الوگعة ..
الم بظهري وبطني صار .. هو صافن عليه واني دموعي لااراديا ينزلن ..
اتقرب مني .. عطت بي . " انت شتريد مني شعندك هنا روح روح.. "
عاط " الصوج بيه لو ماباقي وشايفه جان الله العالم شيسويلج "
حسيت بشي ينزل عليه.. واستحي احجي .. بس بقيت ابجي واعيط مثل الطفل من يوگع وينتظر امه تجي
تگومة .. بس اني لا ام عندي ولا احد يگومني…
هو يحجي ومستمر يلوم بيه .. واني بس ابجي واعيط من الالم .. باوعتله وقاطعته . " ابني راح يوگع "
قطع كلامه بلحظة وصفن بوجهي مصدومة تعابير وجهة تغيرت كلها من عصبية الدهشة وخوف ..
" ابنج شنو ؟"
رديت " اگلك ابني راح يوگع مااعرف شبيه "
طلع موبايله " راح اخابر خالتج "
رديت " لا لاتخابرها جيب رسميه "
رد " انت شوكت صرتي حامل وليش ماگلتي "
باوعتله " شبيك لازم مامصدگ هم گول منين "
سكت ماحجة ..
قفلت البيبان وانتظرته بالباب ..
راح بسرعه جاب رسميه واجه ..
رسمية تسأل " شتحسين وشلون وكعتي وبس لاانت ضربتها "

خزرها " ماتشوفيها تبجي وتصيح شوفي شبيها بدل ماتسأليني "
همستلي " تحملي هسا نوصل شو ماگلتيلي حامل من شوكت .. "
جان يباوع من المراية ..
وصلنا للمستشفى.. دخلنا للطوارئ .. حولتني ع صالة الولادة علمود تشوف نبض الطفل ..
سوولي سونار مامبين ونبض الطفل ماكو ..
كالوا سوو تحليل لان نبض ماكو احتمال بعدة ممكمل شهر بعده ومايبين ..
طلعنا سوينا تحليل .. جان اكو حامل ..
رجعنا للدكتورة .. دخلتني للطوارئ لان صار عندي نزف قليل ..
گالت الطفل احتمال مهدد بالاسقاط ..
راح انطيها ابر مثبت وعلاج تلتزم بي ولازم تنام وترتاح هي هم واكعه ..
رد " اي وكعت على مقعدها "
ردت " الظاهر الوگعه قوية وهي ببداية حملها ماتحملت المهم انتو ديروا بالكم لان اذا بقى الالم او النزف مااعتقد الطفل يبقى "
راح جاب علاج وابر . وبقى برة . اشوفه يشرب جكارة ورة جكارة .. اذا يعرف بيه خاينه ليش جابني وليش اهتم بيه .. ليش يسوي هيج وياي رغم مااريدة وكارهتة .. كنت مااريدة يدري بالطفل .. بس مضطرة گلتله لمن حسيت بألم قوي ..
بس شنو مصيري اني وابني بعد اليوم ماادري..
رسمية يمي ماتركتني .. وكل شوية تسألني " شسوالج وشلون وگعتي "
باوعت منا ومنا .. سألتها وين جنطتي ..؟؟
ردت " خاف بالسيارة عفتيها نزلتي هيج انتي مابيدج شي .. "
رديت " خاله تگدرين تجيبيها خاف خالتي تخابر "
ردت " اي هسا اخلي نسر يجيبها"
راحت شوية ورجعت وياها الجنطة…
طلعت الموبايل لكيت خاله هواي متصله عليه "
خابرتها جاوبتني بسرعه.. مبينه جانت تبجي صوتها رايح ..
سألتها " شبيج خاله سوالج شي خالو ؟؟"
ردت " معليج بيه اني بالي يمج خاف سوالج شي هذا عصبي ومايتفاهم "
اتنهدت . وماگدرت اكلها على وضعي كافي الي هي بي وخاف يبقى بالها يمي .. بعد ماشفت الحقد الي بعيون خالي عليه .. عرفت مستحيل يخليها تجيني بعد ..
رديت عليها " لا مابيه لاتخافين جان نسر مارايح وشايفه من جاي واجة بسرعه "
ردت " ونسر هسا وين خو ماسوالج شي "
رديت " لا بس تعارك هو وخالو من راح خالو راح "
بقت تلوم بروحها .. " اني جبتلج المصايب .. وخايفه لايروح العمامج يگلهم "
اتنهدت " وين ميروح خلي يروح بعد مايهمني تعبت خاله تعبت .. الدنيا كل يوم تسود بوجهي اكثر "
ردت " لاتقهرين روحج .. مو زين على طفلج تغذي وارتاحي ونامي ماعندج شي "
اتنهدت وخليت ايدي على بطني..

ماتدري حتى الي ببطني يريد يتخلى عني ومايريدني .. بالبداية ماردته لان راح يذكرني بوحشية نسر وذيج الليله الي مااريد حتى اتذكرها..
بس من حسيت بخطر خسارته خفت عليه لان هذا الشي الوحيد الي طلعت بي من الدنيا الظالمة.

راح واجة جايب عشا ..
انطاه بيد رسمية .. سوتلي لفه ماقبلت اكل ..
بقت تصر عليه سويت نفسي نايمة ..
مااريد شي منه ..
حجة وي رسميه گالها اني رايح للصبح اجي..
من راح گعدت ..
رسميه لگت نسوان بالغرفه تعرفهن وكعدت تسولف وياهن وخلتني وحدي .. من العلاج ساعه انام وساعه اگعد للصبح اجت الدكتورة..
شافتني وفحصتني ..
" وضعج تمام بس الطفل مازال بخطر لازم تنامين على ظهرج وابد ماتتحركين الا للحمام وترجعين .. وهاي مثبتات كتبتلج تاخذيهن .. "
هزيت براسي بدون حجي ..
منو الي واني وحيدة .. شلون راح اكمل هالاشهر كلها وحتى خاله انحرمت منها ..
گمت بسرعة " يلة خاله خلينا نروح "
ردت " ونسر مو كال اجي الصبح "
رديت " خلينا نروح قبل لايجي "
ردت " ماجايبه فلوس اجيت ركض منين ندفع كروة "
رديت " خاله عندي فلوس بجنطتي خلينا نروح "
اتكيت على رسميه وطلعنا .. عيني منا ومنا خاف يشوفنا ..
اجرنا تكسي ورجعنا للبيت ..
فتحت الباب دخلت وياي ..
" تعاي للغرفه نامي وارتاحي .. واني اسويلج غدا واجيبلج لا تگومين "
رديت " لا خليني بالاستقبال انام هنا مااسمع الباب "
خلتلي جرجف ع القنفه ومخدة .. بدلت ملابسي ونمت
سألتني " اسويلج كوب حليب دافي "
هزيت راسي " كلشي مااريد بس اريد انام تعبانه "
ردت " لعد راح اخذ المفتاح وياي اسويلج غدا واجي ابقى يمج "
هزيت راسي .. اخذت المفتاح وقفلت الباب وراها وراحت . بقيت وحدي بالبيت .. حاولت اغفى ماگدرت
بدلت السيم كارت وخابرت عذورة ..
مرة مرتين ماردت ..
بعدها ردت . " الف مبروك يول فرحت حيل وربي من گال نسر لسا طايرة من الفرح "
سألتها " شگالكم "
ردت " مااعرف اجه بالليل مثل عادته .. ماما سألته وين جنت وليش تتأخر..
گالها " جنت وي شذر بالمستشفى "
ردت " شذر ؟؟ شبيها ووين لگيتها "
اتنهدت " شذر حامل يمة "
انصدمت " حامل شنوووو ؟ معقولة من زمان وضامه علينا "
رد بتنهد " لا وين من زمان هستوها .. يعني معقولة الوحدة تحبل من مرة وحدة "
ردت امي " وليش لا اني من ليلتي حبلت بغيداء .. بس گلي انت شمدريك حامل وشگد عليها ؟؟"
اتنهد " شهر عليها بالصدفة جنت هناك وتخربطت .. الدكتورة تگول لازم ترتاح لان الطفل مهدد بالاسقاط "
ضاجت " وشناوي بس لاتعوفها هناك وابنك ببطنها .. ع الاقل هنا كلنا يمها لمن تجيب "
باوعلها " وشلون اجيبها تحجين صدگ ؟؟"
ردت " اي جيبيها ماكايلتك راضيها ومالي دخل بيكم بس مادام طلعلها اهل وضامه علينا .. يمكن تاخذ ابنك وماتشوفة بعد "

من سمعت كلام خاله ضحكت ع حظي .. عبالي مهتمين الي ومقهورين عليه .. طلع كل همهم الطفل .. وحتى نسر اذا اجه بيوم واعتذر احتمال علمود الطفل مو علمودي ..
قطعت افكاري عذورة وهي تحجي على هديل ..
" لج لو شايفه هديل من عرفت انتي حامل .. تخبلت وصارت تبجي وسوت نفسها متخربطة .. وكل شوية مخابرة امها وتفرفح .. ومو بس هيج .. گالت هو مو ع اساس مايتقربلها منين حبلت ..
بس ماسكتتلها " شتقصدين ولج "
ردت " مااقصد شي .. بس مو عبالجن مااعرف هي ونسر مابينهم شي .. يعني شوكت تقربلها "
عطت بيها " وشتردين خانم ينطيج مواعيد واوقات شوكت يتقربلها .. شو انتي ماتعرفين تحجين تشطري وخليه يتقربلج واحملي منه .. ترى اني هم اعرف صارلة شهر مايتقربلج…… . هي من سمعت هيج تخبلت .."
بقت عذورة تسولف الى ان خلص رصيدي ..
شفت نسر داز رسالة " المن مشغول.. ليش ماانتظرتيني وطلعتي "
بدلت السيم كارت .. ونمت
صحيت على صوت بالبيت .. فتحت عيني ..
شفته گاعد ع القنفة وصافن عليه…
من انتبه الي گعدت ..
فرك وجهة واتنهد ..
فزيت من مكاني " انت شلون دخلت لهنا ؟؟"
رد " ليش طلعتي ؟؟"
رديت " وانت شعليك .. انطيني المفتاح العندك بعد ماامن على نفسي هنا مادام اكو مفتاح عندك "
رد " وقابل شسويلج ؟"
رديت " لو قبل اگول لا ماتسويلي شي .. لان جنت واثقة انك مستحيل تأذيني بس هسا لا .. انت طلعت وحش ماعندك رحمة مستحيل تكون بشر "
تعصب " لاتخليني احجي غير حجي مراعي وضعج لان مريضه وساكت .. والا… "
رديت بعصبية وتمالكت نفسي حتى ماتنزل دموعي ..
" والا شنو . تضربني مثل مريم لو تعتدي عليه مثل الوحش وتحطم حياتي . لك اني اكثر شغله اخاف منها سويتها بيه ومارف الك جفن .. انت تعرف كرهت ابوي وانهزمت منه لان نهش جسمي وحطمني شلون تسوي بيه هيج شلون .. انت اكثر واحد تعرفني شلون عندي عقدة واتعالج .. شلون تصدگ اخونك ووي منو وي واحد زعطوط مووووو ؟"
عاط بيه " كافي كافي سدي حلگج .. ااااخ لو الزمه ذاك الكلب . شمدريني ماهو الي حاول يعتدي عليج وانتي نايمة .. بس گلت حتى لو هو المعتدي وهي ماتدري جان صرخت حجت مو تسكت "
ضحكت بعلو صوتي " صم حلگي وخنگني شعيط شلون اصرخ فهمني.

بعدين بنتك يمي وبحظني شلون اسوي هيج يمها .. ااااوه نسر كافي تعبتني وبطني اذتني انت الشك عماك المفروض تتعالج انت مو اني .. انت حتى ماسمعتني . ولاتنتظر يجي يوم اسمعك بي .. الي بينا انتهى واذا الطفل خلاك تجي فحتى هو انساه مستحيل اخليك تشوفة"
ضحك " مو بكيفج اذا ابني مستحيل اخليج تمنعيني منه "
رديت " اذا ابنك ؟؟ يعني بعدك تشك مووو؟"
هزيت راسي " اي مو ابنك يله اطلع وكافي بعد تفرفحني .. سمعتني مو ابنك مو ابنك اطلع من حياتي كلها بعد ومااريد اشوفك.. الله ياخذني ان شاء الله وارتاح منك ومن اهلي ومن الدنيا كلها……

بقيت الطم وابجي اتهسترت من سمعت الكلمة..
اجة لزم ايدي حيل وگعدت گبالي.
" اهدي اهدي والله زلة السان زلة السان ماقصدي "
عطت بي " اطلع نسر اطلع منا لااكتل روحي والله اطلع مااريد اشوفك "
گام بسرعه وضل يضرب بيدة بالحايط .. ويعيط . اااااخ يانذل بس خلي الزمك .. ااااه ياربي ريحني ريحني ليش كل الاربيه واتعب عليه يطعني ليش ..
عافني وطلع وماعرف شصارله على ضربات الحايط ايده گلت انكسرت ..
بقيت ابجي بمكاني..
انفتحت الباب عطت . " نسر روح روح مااريد اشوفك "
دخلت خاله رسمية ..
" يمة اسم الله .. انتي منا شحالج .. وذاك طلع هيج مثل الثور ولازم ايده .. شبيكم .. شدخل بينكم '"
اتنهدت " خالة تعبت والله تعبت شوكت ارتاح "
ردت " گولي يالله يمة هي هاي المرة والرجال كلشي يصير بينهم .. هو صح عصبي بس يحبج مبين لاتكبرين السالفه وارجعي الرجلج الخاطر الطفل الببطنج منو الج هنا"
سكتت عنها .
راحت جابت الاكل " تعاي تغدي سويتلج تشريب اشربيها زينة الج وهاي برياني .. "
اتنهدت " خاله مااشتهي هسا '
عاطت فززتني " مو وكت دلال اشربي هاج الطفل شنو ذنبه يتحمل خبالاتكم .. "
بالگوة شربت التشريبة ..
كملت غدا اخذت الماعين وراحت " للعصر اجيج لو ادزلج وحدة من البنات يمج "
گلتلها بس اطبگي الباب وراج لاتقفليه ..
حتى لو قفلته اصلا عندة مفتاح ويفتحة اذا يريد يدخل ..
يعني ماكو مهرب منه ..
للعصر .. اندگت الباب . گعدت وبالگوة امشي اكو الم قليل ..
فتحت الباب تفاجأت بخالة وهنا ..
مااتوقعت تجي ..
رحبت بيهن عادي ودخلن ..
گعدنا بقت تباوع البيت وللاثاث ..
حجت " نسر گالي ع الطفل " يتربى بعزكم ان شاء الله اتمنيت اسمع هالخبر بغير وكت ..
يمة مهما يصير وصار الطفل ماله دخل تخلوه بينكم وانت يحتاجلج رعايه مايصير هنا وحدج تبقين ..
باوعتلها " تحجين صدگ خاله يعني تردين انسى كلشي سواه وارجع لهناك .. اتهمتوني بشرفي تعرفين شنو بشرفي .. هنا خانها زوجها ..گلبتوا الدنيا وسويتوا كلشي ورجعتولها حقها وطلگتوها منه .. واني ظلمتوني رغم كلكم تعرفوني ومتربيه بوسطكم .. اهلي غدروني واعتبرتكم انتو اهلي .. "
ردت بعصبية " وسالفه اهلج الي طلعوا عايشين هاي هم ظلمناج بيها . عبالنا صدگ گرايب ام وليد واحتضناج بينا طلعنا مخلين غريبة بوسطنا وماندري شنو سالفتها وشنو اصلها وفصلها "
عطت بيها " اولا الغريبة هاي مااذتكم شالتكم على راسها خمس سنين .. واصلي معروف بالكاظمية كلها .. واهم اثنين بحياتي نسر وعمة خديجة يعرفون قصتي وراضين بعد ماكو داعي احجيها الاحد "
سألت " واحنة من حقنا نعرف شنو قصتج "
رديت " نسر يعرفها لو يريد جان حجاها الكم بس معناها مايريد وهالشي سر بيني وبينه ومو من حق احد يعرفه.. "

همستلها هنا " يمة مو هيج احنة اجينا علمود .. "
قاطعتها امها " ليش مو من حقي اعرف مرت ابني منو هي ومنو اهلها "
استغفرت ربي .. " خاله تعبانه والله واكيد نسر گالج على وضعي يعني مابيه افرفح .. الي ترديه شنو هسا "
ردت " اريد ابن ابني يولد يمي ويربى بحضني "
رديت " ماعنده هديل يمه وتجيبله مو زوجتيه علمود الاولاد خلي هي تجيبله .. ابني عندي ويربى بحضني "
گامت " لازم نسيتي مريم ووين بنتها هسا ؟"
رديت بعصبية " مريم لزمها بيده وشافها بعينه وتنازلت برضاتها .. اما اني ماعليه شي والي يگول غير شي خلي يجيب دليل مو بس حجي.. لو جيبو مهيمن واعرفوا منه شعنده بغرفتي . ولو هذا ما يغير شي عندي .. بس عندكم ماادري اذا يتغير او لا .. تندمون او لا ..
ردت " والله ماعرفتج ياشذر صايرة قوية والسانج طالع لحد هاللحظة اگول مستحيل شذر تسويها وادافعلج وتالي هيج تحجين وياي "
رديت " شذر القديمة انتو موتوها .. خليتوا بمكانها وحدة ثانية .. شافت قهر الدنيا كلها وهالقهر خلاها تقوى محد الي والابني .. ولازم اصير هيج وادافعله واذا اضطر الامر اصير مثل البزونة .. اخرمش كل من يوصل العندة.. "
هنا " شذر اعرف وضعج ومقدرته والله بس مو هيج خلينا نتفاهم واصلا انتي موزين عليج تفرفحين ياعيني"
رديت " مو اني هنا .. شفتي خاله شلون اجت حاميه عليها بينما جنت اگول هي بدل امي الي .. شلتها على راسي وتالي جزاتي تهددني بأبني .. "

اتنهدت خاله " حجيت من حرگة گلبي واي وحدة بمكاني وتكتشف انه جنتها تطلع مو يتيمة وهربانه من اهلها ومانعرف السبب تحجي اكثر شلون ترديني اثق وصدگ بعد "
وجعتني بطني واني افرفح .. لزمتها حيل " خاله لاتصدگين اصلا انتو حكمتوا عليه قبل لاتعرفون الحقيقه يعني ماتفرق بعد "
اتقربت هنا " شبيج تحسين بشي .. ترحين للدكتورة "
رديت " لا ماكو داعي هسا انام وارتاح "
اشرت الامها " يلة يمه كافي خليها ترتاح خطية "
رجعت باوعتلي " ديري بالج على نفسج والصبح اجي اشوفج.. اذا تردين اجي يمج ابقى "
رديت " لا هنا مشكورة هم انت عندج دوام واولاد اني مرتاحة وحدي ماعندي شي "
طلعن قفلت البيبان وراهن مااريد واحد يجيني بعد ..
رجعت اخذت علاجي وتمددت ..
خابرت خالة من الخط الثاني ..
جاوبتني تبجي " شبيج خالة هم خالو اذاج مرة ثانية "
ردت " لا بس من تعاركنا اني وياه وضربني اني صارت بوسطنا وتخربطت.. هسا اني يمها بالمستشفى "
شهگت " وهسا شلونها "
ردت " استقرت حالتها "
سألتني " نسر دزلي رساله گال مريضه روحي يمها شبيج ؟ ماگدرت اخابرج "

اتنهدت " ماكو شي لاتخافين "
ردت " احجي لاتشلعين گلبي "
جاوبتها " بسبب خالو من تعارك هو ونسر عبالي راح يضربني رجعت لورة وگعت من دنگة المطبخ مو تعرفين الطارمة اعلى من المطبخ .. بس وگعتي صارت قوي على مقعدي حسيت بالم من المقعد للعمود الفقري اهتزيت حيل . "
ردت " عززااا وهسا الطفل خو مابي شي "
اتنهدت " رحنا للمستشفى صار نزف عندي بس انقطع ووصتني انام ومااتحرك وانطتني مثبت "
ردت " اووووف ياسعد من يوم الشافج وهو تخبل عبالك شايف سماح .. ودور يتهدد يروح العمي يگله .. لاامي سلمت منه ولاانتي وفوگاها ضربني تالي عمري"
رديت " يمكن مكتوبلنا نعيش اني وانتي مظلومات بسبب اهلي .. وهم عايشين حياتهم "
ردت " استغفر الله اگول رب العالمين شو ماطلع لا حوبتي ولا حوبتج "
رديت " لا طلع حوبتج . اكبر حوبة هو خلاه مثل الحيوان يشتهي بنته ويحاول يعتدي عليها .. وتالي تنهزم منه وتجيبله العار ويبقى طول عمرة مهزوم منكم ومني ومن الناس "
ردت " مو هاي المشكله خفت ادعي عليهم بعد . من ادعي ماتطيح بيهم تطيح بيج لو بأخواتج اسم الله "
شهگت " يمة اسم الله .. الله لايراويهن مكروه ولايشوفن الشفته "
خلص رصيدي الثاني وبقيت هيج اثنين خطوط مابيهن رصيد.. فتحت التلفزيون وبقيت اگلب الى ان صار الليل ..
لليل گعدت ماادري بروحي غافية ..
اسمع حجار ينشمر ع الشباك .. فزيت ..
گمت اتقربت من الباب وصحت منوو.
ردت رسمية " اني وج موتيني خوف حسبالي شو شبيج "
فتحتلها الباب ودخلت " وين جنتي "
رديت " ماادري نايمة "
ردت " وهيج الينام .. البنات اجن المغرب جابلج عشا كسرن الباب وراحن .. واني صار ساعه ادگ "
رديت " اي والله ماادري بنفسي گبل نمت .."
جايبتلي ماعون مخلمة وزلاطة وخبز .. اكلت شوية
فرشت فراشها ونامت خطية بسرعه ..
هم تتعب طول النهار ودور اجيت اني حمل عليها ..
النهار كله نايمة مااجاني نوم بقيت گاعدة للصبح صليت وخليت قراني اقرا .. صار الفجر گعدت رسميه سوتلنا ريوگ ريگتني وراحت ..
نطيتها فلوس تجيبلي رصيد ومسواگ للبيت ماكو ..
راحت بقيت وحدي دزتلي الرصيد بيد زمن ..
جانت ضايجة ومقهورة ..
بقت يمي ساعدتني بالطبخ بس مبين مهمومة…
سألتها " عوفي الشغل تعاي يمي .. شبيج مو على بعضج .. ؟؟"
اجت گعدت يمي .. " مرت ابوي شكو غيرها .. "
" شبيها ؟"
"جايني واحد اكبر من ابوي وتريد تنطيني "
رديت " معقولة عمرج بالعشرين تنطيج الواحد جبير زين ابوج وين "
ردت " ليش هو ابوي اله حجايه يمها . ماتشوفيني اشتغل وانطيها من شغلي حتى ترضى عليه .."
اتنهدت " واخوج ؟"
ردت " اخوي شيسوي يعني مقشمرته ازوجك وازوجك وهو فرحان مامصدگ"
اتنهدت " زين مو رسميه خطبتج الابنها ليش رفضتي ؟ جان هسا انتي مرتاحة "

سكتت وتنهدت..
سألتها " جاوبيني شبيج "
نزلت دمعتها وبجت .. اخاف اقبل . وهم علمود اخوتي الصغار منو الهم ..
سألتها " ليش تخافين ؟؟ "
ردت ولزمت ايدي " راح احجيلج وعليج ابو الجوادين هذا . بداعت الي ببطنج .. ماتحجين الاحد ولا كأنه سمعتي مني .. بس مالي احد احجيله ماعندي احد ينور دربي ويرسيني على بر "
حضنتها " اعتبريني اختج واحجي والله ولا كأنه سمعت .. اني هم مالي احد لاعبالج الدنيا زاهيتلي ومرتاحة "
ردت " هو اني ارتاحيتلج لان حسيتج مثل تشبهيني من يوم الشفتج بالامام الكاظم ودموعج يبجن وي دموعي"
من حجت هيج نزلت دموعي مااتحملت ..
هزيت راسي " احجي اسمعج "
من جنا صغار .. گلتلج گاعدين بمنطقة زراعية وعندنا گيعان ..
جان عندي ابن عمي جبير حيل. جان عمري ثمان سنوات .. ياخذني…… ..
اوووف شلون احجيها..
من سمعت تخبلت .." اي احجي .. يتحرش بيج مووو"
هزت راسها " اي .. بالاول ماجنت اعرف شيسوي بس بعدين فهمت .. "
بالاول جان يحبني ويشترلي .. بيوم .. جاي يلاعبنا عود بحجت يدغدنا ببطنا ودور يسوي حركات بيده وشغلات ضوجتني ..

بعدين ثاني يوم .. گال ضيعت حصاني .. خلونا كلنا ندور عليه ..
خلاهم كلهم يتفرقون يدورون عليه ..
سحبني " امشي خلي ندور عليه منا .."
خفت منه ردت اعوفه جرني حيل واخذني الغرفه من طين هناك عندنا ..
سد حلكي وشالني خاف اصيح ..
گال لاتخافين مااسويلج شي بس نلعب غميضان عنهم .
صار يعصر بجسمي ويتقرب من حلگي ويسوي شغلات هواي .
كمت ابجي واصرخ ..سد حلگي وخوفني ..
" اذا حجيتي اكتل ابوج واشمرج بالنهر "
بخوف وبشهگات هزيت راسي وسكتت . اخذني غسلني وكال روحي .. واشرلي اذا حجيت يموتني ويكتل اهلي واني جنت صغيرة وهو جبير ماجنت اعرف افكر لو احجي ..
رجعت طول الطريق خايف واتلفت .. صاروا كبالي اخواني والجهال كلها .. من الخوف ماحسيت وسويتها على نفسي .. وكلها بقت تضحك عليه .. اخذتني اختي غسلتلي بس جنت مثل المصدومة لااحجي ولاانطق ..
واستمر كل يوم لو بين يوم ويوم ياخذني الهاي الغرفه الغرفه الي كرهت بيها كل جنس ادم وحطمت حياتي ..
بدأ ينزعني ملابسي .. صرت ابجي من الخوف عمري ثمان سنوات بوكتها .
اتوسل بي يعوفني .. صار يخزرني بعيونة حيل ويهددني.. لو يضربني ..
صار يسوي شغلات محلولة وياي الى ان مااعرف شيصير بي وبعدها يهدأ ويكلي روحي غسلي بالنهر وامشي.. ومثل ماكلتلج بس تحجين اموتج انتي واهلج .. صرت احلم كوابيس كل يوم ..
يوم مخلي حيه بفراشي ومرة احلم بي قاتل ابوي ..
صرت اتهرب منه .. ويجي ياخذني بالگوة وهم يروح الذيج الغرفه .. جسمه وحركاته والاشياء اليفرزها صرت كل يوم اشوفها ومااعرف شي بس ابجي ..
.. ومن بديت اكبر وافهم صار يهددني بالمسدس عنده مسدس صغير يگلي اكتلج واكتل اهلج .. وماعندي احد احجيله امي ومتوفيه ومرت ابوي اخاف منها واختي مامقربتني الها حايرة بضيم مرت ابوي وشغلها ..
ماارتاحيت الا لمن تزوج ابن عمي وخلصت ..
بس من كبرت ووعيت . وتزوجت اختي وسولفتلي تخبلت وردت اكتل روحي .. بس ماگدرت خفت..
هالكابوس عاش وياي عمري كله . وبكل مرة اتذكره اتمنى الموت ..
وهسا مااعرف اني بنية لو لا .. لان مااتذكر اذا اخذ عذريتي او لا .. اصلا من الخوف صرت مااتذكر اي شي
گامت تبجي وتشهگ .. حسيت الي گبالي شذر .. احس الي صارلي صارلها ..
حضنتها وبقينا نبجي سوه مااعرف ابجي عليها لو على نفسي ..
صرت العن بيهم وادعي عليهم بحرگة گلب .. لان حيوانات مايعرفون بس غريزتهم . مايگولون طفله او صغيرة الاهم يرضون رغباتهم وبس ..
من كملت بقت تحلفني مااحجي..
لزمت ايدها " والله مااحجي بس لازم تشوفين حل .. خو ماتبقين العمر كله تحت رحمة مرت ابوج .. روحي الدكتورة شي "
من سمعت دكتورة تخبلت .." لا مااروح مااروح .. اخاف اذا نعرفت السالفه لو دروا اهلي يذبحوني اصلا مايصدگوني .ولاتنسين احنة هربانين لهنا ومحد يعرف مكاننا بعد شلون اگلهم ابن عمي سوه بيه هيج لو يواجههوه "
رديت " هاي اذا اعترف بغلطته .. مستحيل يعترف وينكر ويمكن هو الي يذبحج بيده "
هزت راسها وصارت تدعي عليه ..
سألتها " انتو ليش هربانين من محافظتكم "
ردت " سالفه طويله خلي اكمل شغلي واروح مناك اروح اطبخ لأخوتي خطية "
كملت شغلها وراحت .. قهرتني حيل وصرت ادعيلها بالستر .. رفعت راسي للسما " يارب مثل ماسترتني وطلعت بنية اريدك تستهرها وتريح بالها ."
الي يشوفها تشتغل وتضحك وتسولف مايگول هيج بيها مثل شذر بقت صامدة بس الخوف جان بداخلها ..
اشتاقيت الدنو ..
خابرت عذراء .. اول ماردت تعيط وتبجي ..
خفت حيل " شكو شبيج .. دنو بيها شي ؟"
ردت " لا شذر وج وينج جنت محتاجة احجي وياج واشكيلج .. وج معتز مهاجر الالمانيا صارله اكثر من شهر وماادري ماگالي سمعت من مريم تتشمت بيه وهو ماگالي ماگالي !""


يتبع……

///// البارت ثلاث وخمســــون /////
ج2
..

أين وعــــــــــدك لي بالامــــــاان؟

عندما وضعت بين يديك قلبي

سلمت لك عقلي ..

كان وعدا وقد قطعته على نفسك

وعدا حلفت لي ان تحافظ عليه

الا انك.. اخذت مني قلبي وعقلي

تركتني في مهب الريح اصارع الحياة.

كنت آمل ان ارتاح بين يديك

لكنك .. وببساطه.. رحلت دون كلمه.

رحلت دون وداع .

رحلت.. ولم اعرف بأنك رحلت.

ما الذي فعلته حتى ترحل؟.. هل كان رحيلك لأنني اسلمتك قلبي وقبلها عقلي؟

ام ان طلب الاماان كان صعبا ولم تستطع انت ان تضمن الاماان لك فكيف بلي أنا؟!

عذراء :
من يوم الي راحت بي شذر .. والبيت ماينطاق ..

بدأ الدوام ..

بس دنو تكسر الخاطر .. كانت فرح وحمودي وياها اولاد بيداء يرحون ويرجعون للمدرسة ..

هسا بقت وحدها .. وشذر ماهي عنها .. فصارت انطوائية حيل .. ادرسها وتكمل تروح تنام .. حتى اكلها قليل ..

ماقبلنا نأجرلها سيارة وحدها نخاف عليها وماقبلت تروح وي ابو صديقتها مثل قبل لان فروحة مو وياها

فأجرنالها هي وجود وي هنا .. ياخذهم للمدرسه بالاول وبعدين ياخذ هنا للدوام ..

فيوم من الايام اني وامي رحنا للسوگ .. خابرت هنا
" هلو عذورة وين انتن ؟"
رديت " بالسوگ ومناك للمول رحنا عندي احتياجات"
استغربت " لعد وفهد بس لاتركتنه يم هديل "
رديت " لا هياته ويانا اخذنا عربانته ويانا "
ردت " خابرني مشتاق گال سيارة عاطلة اذا تگدرن روحن للاولاد بطريقجن اخذنهم اني اتأخر " ..

كملنا شغلنا واخذنا تكسي للمدرسة اخذناهم ورجعنا
وصلنا للبيت ..
نزلت فهد والغراض ودخلنا ..

ماما بطبعها اول ماتجي من السوگ ترتاح بالمطبخ ع الكرسي وبعدها تغسل وجهها وتدخل للبيت ..

فهد نايم بحضني دخلت للغرفه بسرعة البيت هدوء
طلعت من الغرفه شفت الاستقبال مفتوح..
وطلعت منه هديل وتمتمت بحجيها ..

" عذراء وين خاله هاي مريم هنا بالاستقبال "
شهگت " شعندها هنا وشلون تدخليها "
ردت " هسا اجت قبلكم بدقايق وهي دخلت شسويلها قابل "

صحت ماما ودخلت للاستقبال.. ولاعرفتها من شفتها متغيرة ومسويه عمليه الخشمها ونافخة شفايفها صايرات عندها براطم "

باوعتلنا وابتسمت .. سالتها ماما " شعندج جايه مريم مو تدرين نسر مايقبل تجين لهنا "

ابتسمت " عمة اجيت علمود بنتي صار كم سنه ماشايفتها "

ضحكت " وهسا ذكرتي عندج بنت .. والله عبالي جبتي من زوجج ونسيتيها "

ردت " لا طبعا مانسيتها .. بس كنت ادرس دراسات عليا بالخارج مافارغه اجيب واربي "

ردتها امي " يعني خلصتي تفرر بالخارج ودرستي وگالبه وجهج وبالاخير ذكرتي دنو "

رديت عليها " انتي تعرفين دنو صار عمرها تسع سنوات يعني تعرف كلشي وتفهم .. مو ذيج الطفله الي نقنعها بحلويات ونگلها روحي الماما وذيج امج وكذا ونضحك عليها .. اصلا هي ناسيتج وماعندها الا ام وحدة "

صارت تتلفت " ووين امها الي تحجين عنها .. ماشاء الله نسر يجي عليه وهو راح يطلع رقم قياسي بالزوجات .. لازم ملت وتركته ست الحزن الهيج تزوج هديل .."

عطت بيها " ومنو گالج تركته فاهمة غلط .. وبعدين انتي منو وتتدخلين بحياتنا لو باقية بالخارج احسن ع الاقل كنا ناسيج "

ابتسمت " فاهمة وضعج وعصبيتج .. مسكينة بقيتي معلگة لا انتي تزوجتي ولا طلعتي الخطيبج الالمانيا بقيتي مثل الزوجها مفقود لاتعرفه عايش ولاتعرفه ميت "

عطت بيها " المانيا شنو منيلج هالجذب "

سكتت عني وخلتني بحيرتي وناري .. باوعت الماما وگالتلها ..
" عمة من يجي نسر احجي وياه ودزولي دنو .. والا تعرفون زوجي ومركزه بالدولة بجلسه وحدة اخذها منه"

تخبلت من سمعت كلامها .. خليتها تطلع خابرته بسرعه
رد ..
اول ماكال " الو "

عطت بي " انت صدگ بألمانيا "
رد " منو گالج ؟"
رديت " هذا الهامك يعني… هسا عرفت ليش ذيج الفترة ماتخابر وجهازك مغلق .. وحتى هذا خطك خابرتني منه .. گلتلك شنو هذا الرقم گلتلي غيرته واني الغبية مااعرف شي بسرعه صدگتك "

رد " اهدي عمري والله ماگلتلج حتى ماتضوجين وطلعت تهريب لان خفت تدرين وتقلقين عليه .. بعدين انتي شكد حجيت وياج قافلة ماقبلتي نتزوج ونطلع لألمانيا سوة "

ضحكت " يعني السبب بيه .. انت بالجذب مانطيتني علم صارلك شگد بألمانيا .. اسمع من مريم ونظرات الشماته بعينها ومااسمع منك "

اتنهد " فترة مؤقته وداعتج .. بس اخذ الاقامة اخذج يمي .. اجي للعراق ونتزوج ونروح ونكسر شوكت كل واحد حاقد وشامت .. وهاي مريم الا اطيح حظها "

رديت " لك شعليه بمريم وغيرها .. اني ماردت اطلع ولا ردت شي بس نتزوج ونستقر انت دوم تمشي رغباتك عليه وماتهتم المشاعري "

رد " ليش هي اكو عيشه بالعراق وارجع .. اشو تعينات وماكو وشغل وماكو .. بس المفخخات والموت وماتعرف بأي ساعه تنقتل .. شنو الي يخلينا بعد نبقى "
اتنهدت " اني لو جهنم راضيه ابقى بيها وياك لان احبك"

رد " واني اموت عليج .. بس والله علمود مستقبلنا كل الاسويه .. تجين يمي هنا ونعيش احلى حياة وحتى اهلي احتمال يجون يمنا "

ضحكت " طبعا ماتهتم اهلك راح يجون يمك واني مكتوبلي اعيش العمر كله بعيد عن اهلي "

رد " هسا انتي ضايجة وعصبيه اهدي وارجع اخابرج ونتفاهم .. لاتضوجين نفسج گلبي .. بس تفكرين زين تلگين الشغله بسيطة وين حبج الي المفروض تگولين وين ماتروح اني وياك "

سديت التلفون منه وشهگت بالبجي .. مااتحملت اسمع الخبر من مريم وهو يضم عليه .. ومايگلي .. صارلة شهر او اكثر ومااعرف شي عنه وحتى ماكلف نفسه يگلي "

خابرت شذر اشكيلها وابجي .. ماعندي غيرها اشكيله
صارت تواسيني رغم الي بيها مكفيها ..

ردت " اهدي .. وافتهمي منه .. جائز صدگ بس يستقر يجي يسحبج وياخذج "

اتنهدت " اني مو عن هذا الشي المضوجني ليش كذب عليه وماگالي رغم من غلق جهازة عاتبته وگال جهازي مابي شحن .."

ردت " مااعرف شأگلج .. لان الصراحة بعد ماوثقت باخوج وخذلني .. گمت اشك بكل الرجال.. مااريد اخليج تتأثرين بيه بس انتي فكري بعقلج وشوفي .. لان مرات مشاعرنا تغلب عقلنا وتالي نخسر كلشي "

سديته منها واعرف هي موجوعه من نسر وهيج تحجي بس حجيها منطقي .. لازم افكر واتصرف خو ماابقى عمري كله انتظر الاقامة "

طلعت ضايجة ومقهورة وشابعه بجي ..
صارت گبالي هديل ..
" هااااخابرتي معتز ليش عافج وراح الالمانيا بس لا بعد مايريدج لو شايفله وحدة اجنبيه غيرج "

اتقربت منها " انتي تتشمتين لو شنو ؟"
ردت " يااا اسم الله عليمن اتشمت بس هذا الواقع هو اليطلع شيرجعه بعد علمودج اني لاتبقين هيج عانس لاانتي المتزوجة ولاانتي الفاسخة "

من حرگة كلبي واصلا اني ضايجة منها لان حجت المريم عن شذر زعلانه والله العالم شحجايه بعد ..
لزمتها من شعرها سحلتها ..

" وج انتي فگر من دخلتي البيت فگرتينا .. بيتنا تشتت حياتنا تدمرت .. جنا عائلة وحدة كلنا وهسا كل واحد بمكان "

گامت تعيط واجت امي تركض " شبيجن تخبلتن "
ردت بعياط " خاله ماتشوفيها شعليه اني راح تموتني "

صاحت ماما " عوفيها ولج شمالج انجلبتي عود هاي الدراسة والمثقفه هيج تسوين جا شخليتي للجاهلات "

رديت بعصبيه " هو اليعيش وي هاي يبقى عنده عقل .. اريد حقي وحق شذر منها "

عاطت هي " واني شعليه بشذر قابل اني الزمتها لو اسراء . دفعتني حيل وعاطت .. " همجيه والله بي حظ معتز وعافج وسافر وان شاء الله يوم الي يتزوج عليج ويخلص فد مرة "

هي گالت هيج وتخبلت زدت بالضرب اكثر بالگوة صارت امي بينا وبعدتنا…
اااخ لو مانسر ملتحق جان هسا خليته يخبزها خبز

بقيت مهمومة كم يوم وضايجة ومااحجي وي احد
حتى هو ماخابرته زعلانه ..
شگد يتصل يدز رسائل واني مطنشه ..
حتى تمرضت وسخنت وبس نايمة..

شذر :
قهرتني عذورة حيل .. دعيت ربي يسعدها بس حسيت معتز راح يخذلها مثل ماخذلني نسر ..

سالفتها تگول شنو هالعائلة هاي كلها لو تخون لو تخذل وتأذي ..
اما وضعي فبقى على حاله .. نايمة دائما وخاله رسمية تبات يمي ..

خالة تخابرني تسأل عليه وتطمأن بالموبايل بس ماتجي اني هم عاذرتها .. وخاصةً بيبي مريضة وهي تراعيها

بيوم جمعه اندگت الباب فتحتها جانت هنا وولدها ودنو
فرحت من شفتهم .. من سديت الباب انتبهت السيارة نسر ..
معناها هو الجايبهم ..
جانت بيدها علاليگ ..
ابتسمت " اجينا اليوم نبات يمج تضيفونا لولا ؟"
رديت البيت بيتج اصلا فرحتيني من جبتي دنو يمي
مشتاقتلها ..
جانت مخليه جنطتها ماالمدرسة على ظهرها ..
بس حاضنتني وگاعدة..

سألت هنا " نسر گالج تجين مووو ؟"
ردت " لا والله صح هو وصلنا بس اني مشتاقة الج موووت واجيت. اشتاقينا الگعداتنا قبل فوگ بغرفه بيداء تتذكريهن ؟"

هزيت راسي ..
كملت " بس ناقصه بيداء وعذراء .. الغبية گلتلها تعاي ماقبلت مطنگرة ومالها خلگ ..
شنو رأيج نخابر بيداء خطية گلبها محروگ على ابنها "

سألت " لسا مالگوه "
ردت " لا لسا بس شاكة عند عمه يعرف مكانه لان مبين هادي كلش .. حتى من نسر راحلهم .. بالبداية تعصب وهدد اذا صار بي شي يحملنا المسؤوليه… وبعدها سكت وهاي صارلة شهر واكثر وماكو خبر .. وعود نسر عنده اتصالات ومعارف "

سكتت ماحجيت .. رغم اعرف مهيمن بس الي سواه خلاني اضوج منه .. هو السبب بلي صارلي ..

رديت " خابري بيداء خطية خلي تجي "
ردت " يعني ماتضوجين "
رديت " وليش اضوج هي شذنبها "

خابرتها بالاول ماقبلت تجي تستحي مني لمن حجايتها وكلتلها تعاي ..
ماجانت تعرف بوضعي من شافتني تخبلت ..
بيومها سهرنا للصبح ضحك وسوالف .. البنات ماخلوني اكوم ابد هم يطبخون ونظفن البيت كله وفرشنه لان الشتا حيجي ..
رتبن البيت كله صار يخبل ..
الا غرفه عمة ماخليت احد يدخللها ..

دنو من شافت غرفه وليد فارغه ..
سالتني " ماما هذي الغرفه الي مووو من اجي يمج ابقئ بيها .. بس مااريد هاي اريد غرفه لونها وردي "

اتنهدت " يعمري ان شاء الله تجين يمي واجيبلج احلى غرفه "

سألتني " اذا جبتي طفل هم تبقين تحبيني لو لا "
استغربت " طبعا احبج انتي بنتي وهو اخوج "
ردت " مووو خاله هديل تكلي بعد ماتحبج راح يجيها طفل "

ردت هنا " شگد غبيه هاي شبيها عقل وي الجهال ماجانت هيج ابد جانت مرحة وتضحك ويانا وتسولف"

ردت بيداء ماتعرفين البشر الا لمن تعاشريه .. ترى جانت تجي يوم يومين وتروح الاهلها مو باقية يمنا هاي راح يصيرلها سنه بس طلعت كل خبثها حجتلي عذراء كلشي والله بودي انتقم منها .. بس خلي اتأكد هي الي ورطت ابني هالورطة لو ذيج اختي اصلا حرام اگول عليها اخت "

كلامها ذكرني بكلشي.. ضجت حيل ..
شافتني هنا ضجت حجت .. غيروا الموضوع كافي موزين ع النونو يضوج.. يمة فدوة اتخيله هيج مثلج حلو وعيونة ملونة ..

ضحكت بيداء " واخيرا راح يتغير نسلنا .. "

اتنهدت " من جبت مهيمن يخبل طلع ابيض احمر واربع كيلوات ونص كلها متعجبه بي .. "
بقت تتنهد وبعدها مااتحملت بجت ..

" اعذرني گوة صابره .. ولجن لاليلي ليل ولا نهاري نهار اريد اموت على ابني اريد اشوفه بس .. خلي شيسوي بي خاله يسوي بس اشوفه واطمأن عليه "

ماعرفت شلون اواسيها .. حسيت بمغص قوي مااعرف شنو سببه يمكن لان بقيت كاعدة مانمت ..
رجعت نمت واخذت علاجي .. الى ان نعسوا الجهال ونامو .. دنو بحضني مافارگتني .
بعدين شالتها هنا من يمي كالت خاف تدفرج ..

للصبح خابرت خاله من الصبح على هنا ..
ردت " ها ماما خير من الصبح .. شنو .. شبيها عذراء . اي راجعه راجعه .. يلة باي "

گعدت بيداء " خير شصاير صارت الهبطات ماتفارگنا"
ردت هنا وهي تگعد بجهالها تريد تبدللهم
" عذورة متخربطة بالليل وماخذيها امي ونسر للمستشفى "

شهگت شبيها
ردت هنا " مايعرفون لازمتها الصخونة وتنفض وتهلوس من السخونة هي صارلها كم يوم مالها خلگ "

اتنهدت " اكيد بسبب معتز زعلت وضاجت خطية "
ردت بيداء " وهذا المصخم شبي دور "
ردت هنا " غير هاجر الالمانيا .. اسكتي لسا ماگلنا النسر امي ماقبلت تگول كافي المصايب العليه"
ردت بيداء " عزا العزاه وعذراء شلون .. "
ردت هنا " عود من يحصل اقامة ياخذها "
ردت بيداء " بالمشمش .. هذا ملعب مثل مريم واذا شاف اوربا وبناتها بعد بحال عذراء .. احجن النسر ولاتسكتن "
ردت هنا " امي ماتقبل "
ردت بيداء،" هي امي خلصت عمرها لاتحجن لايصير بي شي .. مثل ماردت اشكيله على مهيمن وروحاته وي عمة وطلعاته ماخلتني لمن ابني راح بيها ومااعرفه وين"

بدلت هنا واجاها مشتاق واخذها هي والجهال دنو ماقبلت تروح بقيتها يمي ..
بيداء هم للعصر وراحت ..
لقينا اني ودنو .. باجر عندها مدرسة ..
خابرت هنا اطمأن على عذورة ..
ردت " زينة هسا احسن عندها حمى فايروسية انطوها ابر وعلاجات ونسر اخذها الاخصائي وهسا نايمة خطية"

رديت " خطية بوسيلياها امانة.. وهاي دنو شلون تروح باجر للمدرسه تدزيلي ملابسها بيد مشتاق "

ردت " لا وين تگدرين انتي راح ندز مشتاق ياخذها "

حضرت غراضها وهي تتوسل " ماما خليني يمج والله مااتعبج ابد اني اسوي كلشي حتى عشا نسوي جبن مااخليج تطبخين "

حضنتها وبجيت مااتحملت صايرة حساسة اني اكثر من قبل يمكن الحمل مأثر عليه ..
" الله لاينطي البعدني عنج وحرمج مني "

للمغرب اندگت الباب .. لبست جنطتها ودمعتها بعينها توقعت مشتاق جاي ..
طلعت وياها للباب اوصيه عليها .
فتحتها شفت نسر .
استغربت ..

نزل " شلون صرتي " يحجي بثگل ..
رديت بثگل " زينة "
والتفتت الدنو " حبيبتي ماما اريدج تدرسين زين صايرة مو مثل قبل .. خلي عمة تدرسج"

ردت انبهة على مستواها نازل ..
رد بنتر " لا تسويهن علينا سوالفج بحجة اني جنت شايله بنتك ودراستها . ترى هاي اخر مرة تشوفيها لو ماوضعج مااخلي احد يوصل لهنا .. تردين ترجعين لهناك وبغرفتج اما تبقين هنا وتعاندين محد يجيج بعد"

اتنهدت " مادام الله وياي مااعيش وحيدة "
رد " هينة اول وتالي ترجعين بس ذيج الساعه ترجعين مجبورة مو برضاتج "
رديت " مستحيل بعد احد يجبرني على شي .. ابني لاتختبرني بي لو اعرف اخذه وماتشوفنا بعد "

ضحك " وين تاخذيه مادام ماعاقدين محكمة مستحيل تطلعين بي الخارج الكاظمية مو بغداد .. والى متى تبقين هربانه وابنج ماعنده جنسية .. بطلي اسلوب التهديد اذا انهزمتي مرة مو معناها تاخذيها عادة لاتخليني اضوجج وانتي هاي حالتج "

رديت " كل هاي وماضوجتني .. هم نعم الله عليك مقدر وضعي ومااعتديت عليه "

تعصب حيل وضاج " يلة بابا يله خلينا نروح "
صعدها بالسيارة دگ موبايله ..
الو .. هااا نصر بشر لگيته ..اي اسمه مهيمن .. عفية عليك لا انتظرني اني جاي ونروح سوه "

ركب سيارته بسرعه وطار بيها حتى ماخلة عينه بعيني
معقولة لكه مهيمن وين خاتل كل هاي الفترة..

خليت السيم كارت ماعندي رقم بيداء .. خابرت عذورة ادري بيها مريضه بس هنا يمها هي ترد ..
جاوبتني هديل ..
ردت اطبگه بس اضطريت احجي " انطيني هنا "
" شرايدة منها . هنا ماهي بالحمام وعذراء نايمة "
طبگته بوجهي ..

اتعجبت ع صلافتها يعني مو مبايلها وترد عليه وفوگاها تطبگه بوجهي ..

بقيت اروح وارجع من القلق .. خاف يلزمة ويقتله لو شو شيسوي بي وبيداء تموت وراه غير ..

بعدين اجت ببالي افكار .. خاف يتهمني بشي حتى يبرأ روحة ..
طردت هالافكار من راسي " لا مستحيل مهيمن يسويها صح طايش وراد يبوگني ومن خوفه خنگني . بس مااتوقع يسويها "

رجعت گلت " ليش مايسويها الي يبوگ يسوي كلشي صرت مااثق بأي احد بعد "

بقيت بقلق . اجت رسميه
" شبيج ليش هيج وجهج اصفر وشعندج تفترين روحي نامي "

رديت " تعبت من النوم خليني هيج مرتاحة "
اندگت الباب طفرت .
ردت " شبيج منتظرة احد "
رديت " هاااا لا بس عبالي نسر"

مااعرف ليش كل شويه اتخيل يجي ويكتلني لو شيسويلي .. همزين رسميه يمي وجودها طمني رادت تروح وترجع بعد العشا ماخليتها ..
گلتلها صارت عندي الآم ..
وفعلا بدت عندي الام ومغص من الخوف..

طلعت تفتح الباب واني لبست حجابي ووكفت بباب المطبخ گلت اذا هو حتى بسرعه اسد الباب واقفله

طلع ولد متوسط بالعمر .. ابيض وحلو . مااعرف ليش شبهتة البابا بشبابه حيل يشبهة ..
سألته خاله " تفضل خالة شرايد "

رد وعينه عليه يباوع خازرني " هذا البيت للايجار للبيع"

باوعتلي " شني عارضين البيت للبيع "
هزيت راسي " لا "

عيونه ماشالهن مني ..
ردت عليه خاله " لا عيني متوهم "
هز راسه " هااا اعتذر لعد توهمت بالبيت"
سدت الباب ودخلت ..
مااعرف ليش نظراته خوفتني ..

بس التفكير بنسر شاغل بالي اكثر ومخوفني ..
رجعت خابرت على موبايل عذورة شالته هنا واخيرا

رديت " وين اتصل ماكو وهديل ردت عليه وطبكته بوجهي "
ردت " صدگ اني اعلمها هاي الله مشور بيها .. كل شوية تخابر النسر تتخبل بس يجي الليل تريد تحبل گوة " حجتها گوة ..

سألتها " هو وين نسر مااجة "
استغربت " لا هي تخابره وهو يرفضه اخر شي عاط بيها وكالها اذا خابرتي بعد ماتلومين الا نفسج وهي دخلت الغرفتها تبجي .. وتدعي تگول حبلت واخذتة مني وصارت تدعي دعاوي مااگدر احجهن مايصلح عليج "

اتنهدت " عزاااا هسا اني بالي مو يمها ولا يم دعاويها .. اسمعيني خابري بيداء بس لاتگولين اني گلتلج .. نسر سمعته يحجي وي واحد وذاك لاگي مهيمن .. ونسر شخط سيارته .. وراح "

شهگت هنا " عزراااا بس لايموته .. هاي اذا اكلها تنجلط خلي نشوف شيصير يلة اگلها "

رديت " بعد بكيفج بس ردت يكون عندجن علم ولاتگولين اني گلتلج مالي خلگ "

ردت " لا شلون اكول وانتي ارتاحي لاتفكرين مو زين عليج "

بقيت احوس وعيني ع الموبايل .. وصيت هنا بس تعرف شي تخابرني…

الليل كله مانمت .. اخذتلي غفوة الفجر .. حلمت بعمة تفتر بالبيت وشايلة طفل بيدها ..
واني افتر وراها واحجي وياها ماتسمعني ..

فزيت مرعوبة الشمس طالعه . سمعت طگطگة بالمطبخ
حسيت بشي يوگع عليه .
خفت بس جان قليل .. يمكن من القلق والخوف ..
لزمت بطني وخايفه دعيت ربي يحفظه الي ..

بدلت ورحت للمطبخ…
رسمية تريد تطلع شافتني حجت " هاي سويت جاي حار وجبت كيمر عرب من الصبح .. تريكي ونامي

رديت " تگدرين تمرين عليه شوية نروح للمستشفى اشو مااعرف شبيه وخايفه .."

ردت " اي شوية واجيج بس شتحسين .. مو گلتلج بطلي تفترين . الليل كله مانمتي وتتگلبين .. ان شاء الله ماكو شي لاتخافين "

طلعت دخلت سبحت وبدلت مااشتهي بس جاي شربت
خطية تركت شغلها واجتني…
راحت جابت تكسي واجت علمودي لان مااكدر امشي الراس الشارع ..

طلعت قفلت الباب صارت عيني على سيارة بيها اثنين
واحد رجال جبير والثاني الولد نفسه الي اجانه البارحة

من شفتهم ارتعبت .. شيردون مني ذولي وشعندهم مراقبين بيتي !!
صعدت بسرعه للسيارة وبقيت اتلفت خاف يجون ورانا

دك جهازي رقم عذورة .. رديت جانت هنا ..
" شذر ردت اگلج ..اجة نسر هسا . بس عصبي حيل ومايتحاجة حتى امي سألته وين جنت من البارحة لليوم عاط بيها وتعارك وياها .. وصعد الغرفتكم .. كسرها تكسر مانعرف شبي .. خاف يجيج ابد لاتفتحين الباب وهسا راح اخابر بيداء افتهم منها "

ااااه ياربي منين ومنين اتلگاها .. من ذولي الي مااعرف شيردون مني .. لو نسر وخوفي لا مهيمن شو شكايله عليه ومتخبل وخاف يطلعني خاينة صدگ وياخذ ابني !!

يتبع……

///// #البارت اربعة وخمســــون /////


‏يامن ظلمتني :
انتظرك في محكمة عنوانها
"لا ظلم اليوم"
والقاضي فيها "أحكم الحاكمين" !!

من يوم الي انهزمت وكلت امري لله انه يحميني ..
توقعت راح تكون هاي اخر خطوة بالاحزان والالم والخوف الي كنت عايشتة..
املي بربي كبير لدرجة. كلما اوگع بمصيبة التزم اكثر بصلاتي ودعائي.. واتذكر كلام عمة من تگول ..
" المؤمن مبتلى "
هذا امتحان من رب العالمين .. يشوف الانسان المؤمن ثابت على ايمانه ..
اذا اصابته مصيبة قال انا لله وانا الية راجعون..
ودائما تذكري ايات عن الابتلاء والصبر ..
وحتى بديت احس انه الابتلاء بس الي .. وكأن الصبر انخلق الاجلي ..
بكل مرة اگول عسا وان الله يفتحها بوجهي ..
حتى من نسر اعتدى عليه بوحشية .
صح تأذيت منه وكرهته .. بس گلت هالشي ارادة الله حتى يرزقني بطفل ينور حياتي ويعوضني عن حياتي السابقة ..
بس بديت افقد هالصبر واتعب لدرجة الضعف والاستسلام ..
من طلعت من البيت وي خاله رسميه واني گلبي مقبوض ..
توتر ممزوج بخوف .. بالي يم نسر وشگاله مهيمن ..
وبالي يم ذولي الواكفين بالباب ..
التفتت ماكو احد .. تنفست شوية وارتاحيت .
حست عليه رسمية " يا شبيج يمة كل شوية تتلفتين اكو شي "
اتنهدت " لا ماكو شي "
وصلنا للمستشفى " دخلت للطوارئ .. فحصتني الدكتورة سألتني" شوكت اخر مرة فحصتي"
.. كلتلها " قبل اسبوعين .. "
هزت راسها .. خلي نشوف نبض الطفل ..
طلعت نبضه طبيعي .. سمعتني صوته ابتسمت وبقيت ابجي لااراديا ..
دموعي تنزل واشكر ربي .. الي خلاني احس بهيج شعور رغم المرار الي بحياتي ..
هالشعور حسيته يشبه .. نزول المطر بالصيف ..
رغم حرارة الجو بس نزول المطر وان كان مو بارد بس يحسسك بشعور البرد والشتا ..
خليت ايدي على بطني وغمضت عيني اتخيل صوته بأذني ..
كملت گالت " بعد اسبوعين تعاي اسويلج سونار حتى نتأكد من وضعه .. حاليا التزمي بالراحة .. مادام مانزفتي فماكو خوف . ابقي ع المثبتات ولتخافين .
الخوف هم يأثر ع الحالة النفسية وبالتالي ع الطفل ووضعج .."
طلعت مطمأنة شوية ومرتاحة ..
رجعنا للبيت ..
نزلت رسميه براس الشارع وگالت للولد البنية وصلها الذاك البيت ماتگدر تمشي ..
نزلت وطلعت المفتاح ..
حسيت بخيال وراي .. التفتت شفت رجال واكف
" انتي بنت عادل مووو؟"
بقيت مصدومة. " شرايدين مني "
وكفت سيارة يمنا .. بيها الولد نفسه الاجة للبيت ..
عرفتهم من اهل بابا .. اكو شبه بينهم ..

عطت بيهم " وربي اذا سويتولي شي افضحكم "
سحبني حيل وفتح الباب دفعني بالسيارة ..
ردت اطلع ضربوني براسي ودفعني تأذيت وخفت على ابني .
صعد يمي الرجال والولد يسوق ويباوع ..
بس سد الباب حرك السيارة سريع ..
تخبلت اباوع منا منا .. ماكو احد عبالك الشارع مابي بشر وهو اصلا شارعنا مابي احد كلمن ببيته وساد بابه
حتى رسميه گلت بلكي اشوفها ماكو ماهي داخله البيتها ..
باوعتله " وين ماخذيني اني مالي علاقه بأبوي وامي والله تاركتهم سنين صارلي اسألوا خاله سماهر "
عاط بيه " شبيج خايفه مانسويلج شي .. انتي بس گليلنا عنوانهم ونعوفج مالنا علاقه بيج "
بجيت " مااعرف مااعرف همة اصلا مو ببغداد بالمحافظات "
رد " اييييه هو نريد نعرف يامحافظة همة .. هسا تنطينا العنوان ومانأذيج ابد مثل مااخذناج نرجعج البيتج "
دك موبالي ردت اطلعه .. لزم جنطتي اخذها ..
باوع هاي خالتج بالها يمج ..
رغم اهلج انذال بس هي مو مثلهم والدليل خايفه على بنت زنا مثلج…
تخبلت " شنو بنت زنا اهلي متزوجين واني شعليه بيهم اصلا عايفتهم ومتزوجة هنا مو يمهم "
ضحك " هو طلعتي مثلهم مثل ماطلعوا عار انتي عار مثلهم وعفتيهم مااعرف انهزمتي وتزوجتي بعيد عنهم .. ابن البط عوام "
بجيت " انت شنو ماعندك رحمة ع الاقل اني من دمك ليش تسوون وياي هيج "
رد بعصبيه وراد يضربني خليت ايدي على وجهي " انجبي لج بنت زنا ماتصير من دمنا ابد .. حتى لو تزوجوا اهلج مايمنع جابوج بالحرام "
تخبلت من سمعت كلامه عطت ودموعي تنزل وابجي بحرگة " مو بنت حرام اني مو بنت حرام فاهم اني انظف منكم ومن اهلي ومن عشيرتكم كلها "
ضربني راشدي " السانج لج لا اگوصه "
كان عصبي حيل حسيت الراجدي دوخني واصلا مامتريگة حسيت بهبوط .. وعبالك راح يغمى عليه .. بس قاومت وبقيت مسيطرة على نفسي "
الولد الي وياه صاح " عمي مو هيج مايصير ماتشوف حالها "
عاط بي " ارشد سوق ومالك دخل .. هاي مثل امها عرمة دشوف السانها شطوله "
رديت " لو اعرف مكانهم كان گلتلك ليش قابل اضم عليكم اصلا اني مااحجي وياهم بعد ليش احميهم "
جنت خايفه انطيه العنوان لايأذي اخواتي .. ماخفت على اهلي ولا رفلي جفن عليهم بس خوفي كان على اخواتي لايقتلوهن او ياخذون ويعذبوهن مثلي..
اتنهد " زين خليج هادية ارتاحي واحجيلي اخر مرة وين جنتو ساكنين يعني ببغداد لو وين ..

رديت بخوف ومااجت ببالي اي محافظة ردت انطيهم محافظة غلط بس حتى اخلص گلتلهم " اي بالناصرية كنا "

رد " زين هسا خوش حجي.. وين بيا منطقه او قضاء الناصرية كبيرة مو صغيرة "
بقيت صافنه مااعرف شأرد لان اصلا مااعرف اي منطقه بيهم ومااعرف شلون ذكرت الناصرية وشلون اجت ببالي ..
عاط " احجي لج "
وگف الولد السيارة حيل فجأة حسيت بطني اهتزت .. ومنا الطسات ويمشي سريع بالافرع حتى ما يمر ع السيطرات خاف افضحهم ..
صاح الولد " عمي كافي لو تعرف جان گالت "
عاط بي " لا تعرف مبينة تخاف عليهم .. "
بجيت " مااعرف مااعرف شبيك.. عبالك تايهة زوجي ضابط والله اذا عرف يدمركم .. "
تعصب " لاتخليني اذيج . تخوفيني بزوجج .. شيسوي خلي يسوي .. بس احجي وانطيني العنوان "
من الخوف مااعرف شصار بيه .. تعبت حيل واني اتوسل وابجي ..
اباوع منا ومنا ماكو احد .. بس بيوت اختاروا الوقت المناسب وقت الظهر والناس ببيوتها ..
شفت رجال بسيارته صرت اعيط واشرله ..
سحبني من راسي ودفني بالكشن ..
ضغط على ظهري حيل ونومني حتى مااتحرك صار وجهي ع الكشن وبطني اريد اتنفس مااگدر احس نفسي اختنگت وبطني اذتني ..
بقيت اتوسل بي .. يعوفني ومااعيط.. بطني اذتني وهو ضاغط على ظهري ..
گال للولد " ارشد رجعها قريب ع البيت "
رجعنا للبيت تركني ..
" بلا صوت راح نرجعج وياويلج تحجين.. اما اهلج اذا طلعتي تجذبين ومو بالناصرية ماتلومين الا حالج .. "
هالمرة اكتفيت بهيج المرة الثانية يكون مصيرج من مصير اهلج ..
الطريق كلة ساكته بس دموعي تنزل .. اباوع بالمراية الولد يباوعلي ..
كلما اشيل راسي يباوعلي .. مبين ماقابل بس مااعرف ليش مطاوع عمة واجه وياه .. وليش اجاني للبيت اصلا ..
وصلوني قريب البيت براس الشارع ..
نزلت وحركوا بسرعه خافوا لاافضحهم .. الالم موتني لازم بطني وابجي رجعت للبيت اسحل بنفسي ..
طلعت موبايلي خابرت خاله ..
بسرعه ردت " انتي وين ليش متردين بالي يمج .. لاتفتحين الباب ابد هذا سعد طلع حاجي الولد عمي… .."
قاطعته " خاله اريدج تعاي .. اريد اموت ..اجو لهنا اخذوني وضربوني .. يردون يعرفون بيت اهلي وين "
عاطت " وهسا انتي وين ؟؟"
رديت " ذبوني براس الشارع حالهم من حال ابوي مايفرقون شي عنه "
ردت " هذا اكيد علاء .. علاء عصبي حيل عامر مايسويها .. روحي للبيت بسرعة وقفلي بابج ونامي اني احاول اجيج واشوفج .. اذا حسيتي بشي اخذي رسميه وروحي واني اخابرج "
دخلت للبيت ابجي .. وحيدة غريبة… مالي اهل ولا سند .. حتى الامل الي بداخلي يردون يحرموني منه ..
الالم زاد .. رحت للقنفه وبملابسي نمت .. ما بدلت
اريد ارتاح اخذت علاجي ونمت بس ماگدرت اتگلب من الالم .. اخر شي صارت لوية قوية ببطني بحيث گمت اعيط وابجي منها ..
وبعدها ماحسيت الا صار نزف قوي .. ماسيطرت على نفسي ركضت للحمام .. اباوع النفسي وابجي .. قرفصت على رجلي وگعدت اغسل وبعد اكو ..
شسوي ماادري اخر شي وگعت مثل الكبد احمر ..

گابلته وكعدت ابجي .. هذا اكيد ابني وكع احس روحي طلعت وياه ..
اسمع الباب تندگ واني جن مااسمع بصوت بجي وعياطي .. ربي كون مو هو كون مابي شي. . بس من اشوف حالتي وهذا البيدي ..
ينعصر گلبي .. اتمنيت اموت بذيج اللحظة اتمنيت اموت وارتاح من هاي الدنيا ..
بقيت گاعدة بالحمام وصافنة .. مثل التايهة والضايعة
مثل وحدة ميتة بلا روح ..
الباب تكسرت واني اصلا ولا ببالي ..
نص ساعه او اكثر واني بالحمام گاعدة مگابلة ابني وابجي ..
مااعرف اذا هذا طفل او لا بس گلبي رف عليه او مانزل مني .. حسيت قطعة من روحي طلعت وياه ..
سمعت صوت خالة بالبيت وهي تصيح " شذر امي وينج "
وعيت على حالي وعطت بصوت " خاااالة تعاااي رااااح راح ابني راااح "
اجت تركض الحمام وتفاجأت وراها نسر ..
هو شافني بهيج منظر رگع راسه بالحايط ودار وجهة ..
هي بسرعه سدت الباب وشالتني ..
" يمة سودة عليه .. سودة عليه يبعد امج .. الله لاينطي كل واحد اذاج .."
عطت بيها " موووووتوني خاله مووووتوني اليوم اني متتتت خاله .. هاي رووووحي شوفيها هاااااي بيدي .."
باوعت الايدي .. مايصير حرام هيج تسوين .. انطينياه حطية هنا .. جابت ليفه " خليه بيها "
عطت " ماااا هذا ابني ابني شلون انطيه "
ردت " اي مايصير ماتشوفيه قطعه حمرة بلكي مو طفل .. واذا صدك هو خلي نخليه بوصله ونطمه مايصير يبقى بيدج .. "
طلعت جابت وصله شاكتها من جرجف مخدة ..
خليه هنا .. نطيته الها وابجي ..
لفيه زين خاله لا يوگع ..
گامت تبجي وتصيح " يمة البنية تخبلت يمة البنية تخبلت وراح تموت .. الله لاينطيكم حطمتوها "
صاح نسر " خاله سبحيها بسرعه وبدلليلها خلي ناخذها"
فتحت المي عليه سبحتني واني بس ابجي ..
فتحت الباب ..
باوعت " روحي منا خليني اطلعها تبدل "
رد " راح انتظركم بالسيارة "
طلعتني .. بدلتلي وجهزتني .. مشطتلي لبستني حجاب وعباتي .. باوعتلها " خاله صدگ اني بنت حرام "
صفنت عليه " شنو هالحجي منو گالج "
بجيت " صدگ لو جذب "

حضنتني " جذب امي جذب ليش اكو انقى واطهر منج هم ولد حرام وانجاس الي يسوي سوايتهم مستحيل يكون ابن حلال "
طلعنا بالسيارة خليت راسي على كتفها حضنتني هدأت
حسيت مثل الي يريد يغمى عليه ..
گمت افتح عيوني تغوش ..
باوعت النسر يباوعلي بالمراية وعيونة حمر ..
ردت احجي واكله انت مثلهم ..
ماگدرت ماحسيت على نفسي بعد ..
گعدت اني بالمستشفى مخليلي مغذي ..
باوعت الخالة " راح موووو؟"
شافتني ضحكت " صلوات على محمد دعائي وصلاتي ماراحن الحمد والشكر الك ربي "

باوعت هنا موجودة وخاله ام نسر ..
تحمدن السلامتي ..
رديت " الطفل راح مووو بعد لويش فرحانة خاله "
اتنهدت وردت " المهم صحتج الله ستر وطلعتي سالمة هواي فاقدة دم خلولج دم وطلع ضغطج مصفر وسكرج هابط دخلتي بغيبوبة سكر صارلج يومين "
رديت " لو ميته احسن "
ردت هنا " اسم الله لاتگولين هيج .. اصلا الدكاترة خوفونا بس طلعتي قوية واجتازيتي الخطر .. "
رديت " شنو الفائدة الامل الي بداخلي راح كله "
ردت خالة ام نسر " يتعوض كلشي يتعوض المهم صحتج .. من شفنا حالتج تخبلنا .. ماتركتي اثر بگلوبنا مو زين .. خفت ترحين ومابارية الذمة النا .. نزلت دمعتها "
سكتت مااحس اكو بداخلي مشاعر بعد او ممكن اجامل .. احس الكل مذنب والكل كان سبب بلي صارلي
هنا خابرت بشرت البنات ..
شوية ودخل نسر ملهوف .. بعيونة حجي ولهفة وشوگ بس كلهن مااثرن بيه ..
درت وجهي اتقرب باس راسي .. لزم ايدي سحبها مني
همس " سامحيني "
اتجاهلته واتنهدت " خالة اريد اطلع منا مااريد ابقى هنا"
ردت " نشوف الدكتور منو يگول يخليج تطلعين "
اجه الدكتور فحصني وقاس ضغطي وسكري ..
سأل " انتي عندج سكر مسبق "
رديت " لا "
رد " لعد لازم تراجعين لان شكل عندج سكر وبدايته ماتطمن "
كنت بس اهز راسي اريد اطلع مااريد ابقى هنا تعبت
ومااريد اشوف احد ..
طلعت .. گال " اني اوصلكم "
رديت " خاله خلينا ناخذ تكسي "
رد " ادري بيج مقهورة بس مايصير ترحن وحدجن خليني اوصلجن "
همست خاله " اهدي امي انتي تعبانه مو مال وگفه "
صعدت بس ماخليت عيني بعينه ..
مقهورة منه حيل .. يمكن صبيت غضبي من الدنيا كلها بي .. لان هو اكثر واحد ثقيت بي .. واول واحد خذلني
وصلنا للبيت ..
نزلت وبقت خالة تحجي وياه ..
اجت فتحت الباب ودخلنا .. لگيت البيت منظف ومرتب
سألت " هاي انتي نظفتيه ؟"
ردت " ليش اجذب البنات ماتركنج ابد .. تدرين بوضعي اني .. جنت اجي بالنهار بس .. والبنات مسويات مناوبة عليج . واجن للبيت نظفنه وغسلن القنفه والجراجف ماخلن شي .. "
اتنهدت " وين وديتو ابني "
ردت " وج هو قطعه حمرة شتسوين بي ؟"
رديت " اريدة كلما اشوفه يذكرني بسوايتهم حتى اكرهم اكثر هم واهلي "
ردت " دفنت الوصله وهو بي بالحديقه "
رديت " دليني بي حتى ازرع عليه وردة واشمها كل شوية "
بجت وحضنتني " مو جنتي ماترديه"
بجيت " اي مااريدة بس بعدين تعلقت بي .. لو من سمعت صوت نبضاته لسا يرنن بأذني "
بجت " والله ماسكتت هزيت الدنيا على راسهم هو انتي عرفوج عرفوج .. رحت العمي وسولفتله على كلشي ادري بعمي رغم ماراضي على اهلج بس مايقبل بالظلم .. طيح حظهم .. ولعب بيهم لعب وتخبل من عرف بيج هنا وصارلج سنين .. حجيتله الي صارلج بيني وبينه وحلفته بأبوي مايگول ومن سمع تخبل وبقى يدعي على ابوج وحلف الا يكتله بيده وياخذ ثار ابوي المات من عارهم وثارج "
بجيت " وشنو الفايدة بعد ما شفت الويل منهم .. شايفتلج واحد يكتلوه ويمشون بجنازته .. هسا هو نفس الشي هم كتلوني وهو يمشي بجنازتي يعني متت بعد ومايفيد هالحجي كله "
ردت انام ماقبلت .. جابت اكل مسلفن يمكن نسر جايبه من المطعم.. ماقبلت اكل ..
بس حلفتني بغلواتها عندي ..
اكلت الاجلها لان هي اغلى شي عندي بعد دنو.. بهاي الدنيا ..
اكلت وتمددت .. الباب ندگت .. تفاجأت بالبنات كلهن جايات بيداء وهنا وعذورة والجهال ..
اول ماشفت دنو .. حضنتها وبجيت .. شميت بيها ريحة ابني الماشفته ولا لحگ يجي للدنيا ..
دخلن بيدهن جنط هواي ..
حجت عذورة " خوفتينا عليج وربي مابطلنا دعاء الج واني جنت مريضه ومن دريت تخبلت .. "
سألتها " شلون صرتي ؟"
ردت " مادام شفتج بخير صرت احسن "
باوعت للجنط " شنو ذني ؟"
ردت هنا " هاي ملابس دنو وغراضها كلها .. نسر قرر يخليها يمج هنا تبقى والصبح كل يوم يجي مشتاق ياخذها للدوام ..
عباله من يخليها يمي ع اساس راح يعوضني عن طفلي الراح او يجبر خاطري ..
ابتسمت عذورة " واني هم راح ابقى هنا فترة يمج ادوخج بسوالفي "
ابتسمت " اصلا افرح بشوفتج ووجودج يمي "
ردت هنا " هيج راح نضوج اني وبيداء معناها ماتردينا بس عذورة "
ردت خاله بمكاني " اصلا بنيتي گلبها طيب وتحبجن كلجن انتن مثل اخياتها ماقصرت وياها "
ابتسمت .. وبداخلي الف وجع ووجع .. مااعرف اذا بقى گلبي طيب لو صار حجر بسبب ظلم الناس وجبروتها..


يتبع… ..