وصلنا البيت.. جانت اكو دومنه قديمة اصر نلعب لان التلفزيون عاطل والثاني مابي ستلايت ..
گال " لازم اسويهن مو كلما نجي نتصفن "
ضحكت " ليش ناوي تجي لهنا هواي ؟"

رد " احس براحة من اجي حتى انتي تتغير نفسج هنا مو مثل هناك "

ابتسمت " لان كل الذكريات الحلوة موجودة هنا .. لهذا احس بالامان "

ابتسم " لهذا عمة حس گلبها .."

رديت " بشنو ؟".

رد " بعدين تعرفين .. خلينا نلعب "
رديت " بس اني مااعرف هاللعبة "

رد " اني اعلمج "

صار يعلمني لعبتها ودنو تشجعنـي وهو يضربها بالمندر
" وج فد مرة صيري ع گلب ابوج "

هي بس تضحك .. بالاخير غلبني هو لان مو كلش اعرفها.. بس حبيتها للعبه ..
صار نص الليل فرشت اله بالاستقبال ..
وردت اني ودنو ننام بالغرفه مال عمة .. ماقبل

فرشت النا كلنا وبينا صارت دنو ..
غفيت بسرعه ..
ماحسيت الا حركة يمي توقعت دنو بردت وقرفصت يمي ..
فتحت عيني ظلمة بس ضوة الطارمة يجي من الشباك
شفته نايم بمكان دنو ..
فزيت سحبني " اششش لاتخافين .. لازم تتغلبين ع نفسج .. اعرف الي صارلج مو شويه .. بس الى متى؟"

رديت " مو بيدي مااكدر لاتضغط عليه "

رد بهمس " انطيني فرصه هي بس اول مرة وبعدها تصيرين احسن "

رديت " لاتجبرني ومنا دنو مايصير "
رد " ماهي خليتها بغرفه عمتي "

گمت " لا تخاف تنام وحدها "
سحبني " هي ساعه بس .. سمعت كلامج وي خالتج حاولي مرة واذا ماگدرتي اوعدج مااضغط عليج "

فعلا حاولت وقررت احاول .. كلام خاله ببالي ..
لازم اقاوم خوفي واتغلب على طفولتي المحطمة

غمضت عيني واستسلمت لأول مرة ..
كان هادئ ومتفهم .. بس للاسف مشاعري ما تحركت
ماكنت احس بنسر .
كنت اشوف ابوي يمي .. واحس بكلشي جان يسويه
مو مبالغه او برود .. بس هذا جان احساسي بساعتها
مااتحملت ودفعته صرت ابجي واعيط بلا وعي
" مااگدر مااگدر افهمني حرام عليك .. لمساتك انفاسك قربك كله يذكرني بي يأذيني ويدمرني "

رد " اشششش لاتبجين گلتلج شوية شويه تتعودين"

رديت ودموعي تنزل " مستحيل مااتغير اعرف نفسي شما اتحدى واقاوم افشل .. ماافيدك لاتحاول وياي ..
شوفلك وحدة غيري اتزوج عيش حياتك لاتبقى بأملي"

فتح الضوة جاب مي واجه.. جنت مقرفصه ولافه نفسي بالبطانية وابجي ..
شعري نازل ع وجهي .. انطاني المي وحاول يبعد شعري دفعت ايده بخوف ..
ابتعد بسرعه وگعد ع القنفه ..

" بكل مرة تگليلي اتزوج.. وسبق واني گلتلج لو اريد جان تزوجت .. بس اني اريدج انتي افتهمتي ؟"

رديت " وگلتلك ماتحصل شي مني .. گلت اصبر بس ماصبرت واعرفك ماتصبر "

تعصب حيل " الي اسويه مو حتى ارضي رغبتي الي اسويه علمودج علمود تصحين النفسج وتتغيرين "

رديت " مستحيل اصحى يمكن الا اذا رجع الزمن لورة وحاسبته وطلعت الي بكلبي كله اتجاهة يمكن ساعتها ارتاح "
سألني " يعني لو گابلتيه هسا وفرغتي داخلج بي ترتاحين وتتغيرين ؟"

سكتت مارديت .. لان اني مجرد مااتذكره اخاف واتوتر فكيف لو شفته شراح يصير بيه ..

اتنهد " نامي هسا وارتاحي "
رديت " راح اروح بغرفه عمة يم دنو انام "

سكت مارد ..
گمت لميت شعري وخليت حجابي ورحت الغرفه عمة قفلتها ونمت يم دنو ..
بعد مابديت احس بأمان احس الخوف رجعلي ..
صرت اتخيل لمساته وقربه وانفاسه كلشي بيه اذاني ..

نسر فهم كلامي وي خاله خطأ وماراعه مشاعري كان يحاول بأي طريقه يخليني مرته ..
لان شگد دفعته ومنعته وهو مستمر ..
خفت منه وخوفي الاكبر من كلام عذراء الي بقى يرن بأذني ..

ثاني يوم كعدت مالگيته ..
كاتب ورقه ومخليها على طاولة المطبخ ..
" ابقوا هنا لتطلعون شوية واجي اخذكم "

بين مارتبت البيت وتريگنا اني ودنو ..
اجة اخذنا..

جان هادي وساكت ..
بس مارجعنا للبيت .. اخذني الدائرة حكومية ..
سألته " ليش اجينا لهنا ؟"
رد " بعدين تعرفين "

بقانا بالسيارة ونزل للدائرة بقى فترة ورجع ..
اشرلي يلة تعاي ..
نزلت امشي وراه .. دخلت ..
وقعت وبصمت من غير مااعرف شنو السالفه ..
توقعت عقد محكمة لان احنة معاقدين لسا ..
بس الي عجبني الدائرة جانت للعقار ..

طلعنا مااتحملت " ليش احنة هنا وع شنو وقعت "
رد " اصعدي وافهمج "

صعدنا اتنهد " البارحة حلمت بعمتي "
رديت " الله يرحمها "
كمل كلامه " عمتي قبل وفاتها جنت اخذها للعلاج مرة منهن طلبت بالتوكيل العندي الي سحبته منج وسوته الي .. انه اداور بيتها بأسمج "

من گال هيج انصدمت ..

بس مااجذب جنت ماثاق بيج .. ومادرته بأسمج بعد وفاتها رغم هي دارته بأسمي واصرت انه لو صارلها شي بيوم احوله الج ..
لاعبالج طمعت بي ابد والله ..
حتى عمي مايدري بي بأسمي .. الكل عبالهم لسا بأسمها
بس خفت ادورة الج ..
والسببين الاول گلته الج ..
والثاني بعد ماعرفتج اكثر خفت تتركين البيت وتعيشين بي ..
ماردت احجي بي هسا ولاردت ادورة الج هسا بس هاي دنيا باجر عگبه اموت واتحاسب عليه ..
رديت بأستغراب " وليش درته هسا ؟"
رد " لان حلمت بعمتي تعاتبني وتكلي ماصنت الامانة ولارديت الحگ لأصحابه "

نزلت دموعي .. حتى وهي ميته تفكر بيه .. رادت تحميني من الشارع ومن غدر الناس والزمن "

رد " هالبيت صار الج .. خابرت معارفي وخليتهم يرتبون الاوراق بسرعه بقت بس المصادقة ع الطابو وتستلميه .. بس اريد وعدج انه محد يدري بي ولاانتي تطلبين بيوم تعيشين وحدج بي "

رديت " بس اني مااريدة مو من حقي هالبيت انتو اولى بي .. مااكدر اخذه "

رد " بس هذا طلبها يعني مو بكيفي "

رديت " مااريد احد يكول طمعت بيها وقشمرتها "

رد " قبلج حجيتها يعني لاتستغربين بس من عرفتج وعرفت عندج عزت نفس لدرجة ماقبلتي احد يصرف عليج واعتمدتي على نفسج .. غيرت رأي "

باوعتله " كم سنه من وفاة عمة معقوله حلمها خلاك تسوي هيج "

رد " لان هاي امانة والامانة صعبه .. هسا يلة ارتاحيت تدرين بكل مرة اگول اكلج وابطل .. من زمان وهي مسويتلي وكاله وتنازل عن البيت .. حتى يمكن شفتيها بالسيارة مرة من اخذتكم من المستشفى "
رديت " مااتذكر "

رجعنا للبيت بعد ماانطيته وعد لااحجي ولااترك بيته بيوم .. رغم اصلا لسا مامصدگة ولا مستوعبه الي صار يعني بيت عمة وروحها البي صاروا الي ..
ذكرياتي الي بهذا البيت راح كلها تبقى الي ..

وصلنا للبيت جان معتز موجود ..
شافه نسر ضاج ..
سلمت وصعدت ابدل وانزل ..

حضرت الغدا وي البنات .. اجت عذورة فرحانه ..
" هااا عيني صايرين هواي تختفون من البيت "

ابتسمت " وانتي راد الدم بوجهج "

ضحكت " لا والله بس ماما عزمتهم .. رغم هم لاعزموني ولا امه اجت يمكن زعلانه بعدهي من ماما "

صبينا غدا نسر تغدينا وغسلت الماعين ..
دورنا ع دنو ماكو… دخلت الغرفه خاله شفت اسراء تسألها وهي ساكته ..

عرفتها تحقق وياها .. باوعتلي دنو وحجت
" ماما والله ماكلت شي "

ردت اسراء " هاااا اكول .. طلعتي موصيتها لگدام .. بس كلشي ينكشف بعدين "
الصراحة نرفزتني ولاول مرة ارد عليها..
اشرت الدنو تطلع ..
بعد ماطلعت " وانتي تصرفج هذا حلو من مخليه طفله وتسأليها وين رحنا وشسوينا .. شوكت تعرفين انه نسر زوجي وهو الوحيد الي يسأل ويحجي وانتي مالج حق"

تعصبت " نسر معمي والدليل جان يكرهج شغيره .. وليش تاخذيه بين فترة وفترة وتروحون البيت عمة شتسويله هناك "

ابتسمت " اكيد مايرتاح هنا ويطلب يروح هناك حتى نرتاح ومحد يتدخل بينا "

ابتسمت " يعني هيج ؟ بسيطة .. ماعرفتي ويامن وكعتي قبلج مريم ومافلحت "

رديت " لاتقارنيني بيها وبعدين انتي ليش تكرهيني شمسويتلج او ليش تكرهين الناس ؟؟ لان اختج وغدرتي بيها ماتغدرين بيه ؟"

عاطت وتهسترت من كلتلها هيج .. صارت تهدد وتتوعد
والاكثر گالت " لاعبالج ساكته وماگلت النسر عليج لمن تسترين العذراء وتضميلها الموبايل وصايرة وسيطة بينها وبين معتز .. عذراء مراهقه ومحد شجعها وخلاها تنحرف غيرج "

رديت " منين تجيبين هالحجي ؟"
صوتها وعياطها سمع البيت كله .. سمعت صوت وراي
" صدك هالحجي شذر ؟"

التفتت مصدومة جان هو وخاله واگفين وراي ماعرفت شحجي انصدمت وجمدت بمكاني..
الباب جان مفتوح وهمة واكفين يسمعون او هي شافتهم وتعمدت حجت هالحجي حتى تسمعه !!
اشرلي اروح وراه ..
صعدت وراه ومااعرف شلون راح ابرر .. جانت ابتسامة النصر ع وجهها ..

دخلت صاح " اقفلي الباب "

قفلتها كعد ع الجربايه.. " اسمعج "

ردت احجي قاطعني " مااريد انغدر بيج .. بس جاوبيني جنتي تعرفين بعذراء وسكتي لو لا ؟

رديت " باوع خلي احجيلك وبعدها احكم "
عاط " اي لو لا "

غمضت " اي "
گام الي اتقرب وضرب الحايط فزيت ..
عيونه كلهن غضب ..
" معناها انتي الشجعتيها وشلون صرتي وسيطة بينهم يعني الگ…… منج طلعت "

جنت صافنه عليه شلون انگلب ..
رديت " لاتعيط خليني افهمك "
اشر بأصبعه " اشششش .. شلون گدرت انخدع بيج واصدك عيونج .. شلون كدرتي تقشمريني .. فوكاها من وقتي رحت داورت البيت بأسمج مثل الاثول شلووون"

مااتحملت اتهاماته عطت " كافي كافي كلشي يصير تتهموني .. اي ادري وهي هم تدري ومن سنين ليش ماحجت هي بوكتها… اني سكتت لان مالي حق احجي وافضح انسانه امنتني ع سرها .. بس هي اختها ليش مانصحتها مافهمتها غلطها بدل ماتفضحها ..
تعبت واني كلشي يصير براسي تخلوه .. اذا ندمان ع البيت الي داورته .. اصلا مااريده ولا بعيني ..
طلعت الاوراق من الجنطة مزگتهن بالنص .. سحبهن مني ..
ساعتها مااعرف شلون اجتني الجرأة ادافع ع نفسي..
وهو مصمم اني جذبت عليه ..
باوعتله بعتب " تحجي عليه لان مااتغير .. بس انت اصلا ماتغيرت بس تتظاهر بعدك ذاك الانسان الي يشك وماعندة ثقه بأحد .. انت لاتحب ولاتعرف تحب .. بعده گلبك وعقلك وكلشي بيك يشك لدرجة ماتصدگ احد وعندك يقين انه كل النسوان تشبه مريم . بس اني مو مريم ولاكل البنات مثلها .. بلسانك كلت صرت افرق بين الذهب والفالصو .. بس طلع كله كلامك كذب .. الشك يمشي بعروقك .. اذا تريد تتهمتي اتهمني لان ماعاد يهمني ولو يرجع الزمن وعذراء او وحدة من اخواتك تأمني ع سر مااكول ابد "

عفته بالغرفه وطلعت.. جسمي كله يرجف اول مرة ادافع عن نفسي بس لان تعبت وفاض بيه ..
رحت الغرفه الخياط فرغت همي وبجيت.. ماردت انزل واواجه احد ..
بقيت طول النهار بالغرفه ..
الى ان صار الليل .. جاي اصلي .. انفتحت الباب ودخل!!


يتبع .…

///// البارت الثالث والثلاثون /////


من انت ؟؟
أأنت لاشئ ام انت كل شيء ام انت مابين الاثنين ..
من تكون ؟؟
هل انت ملاذي ومنقذي ؟؟ ام تكون شقائي ومعذبي
احترت بأمرك فمن تكون ؟؟
حيرتني وشتتني وشتت افكاري فلم اعد اعرف من تكون ؟؟
تارة ملاك وتارة اخرى جلاد ..
تارة يعتذر وتارة يتهم بالله عليك من تكون ؟؟
______________________

بقيت طول النهار بالغرفه ..
الى ان صار الليل .. جاي اصلي .. انفتحت الباب ودخل!!

كملت صلاتي ..
" تقبل الله "

هزيت راسي من غير جواب ..
لميت السجادة بس بقيت لابسه ملف الصلاة ..

جان ساكت وكانه عنده كلام ومتردد يحجي ..
" گالوا ماطلعتي من الغرفه ابد .. شنو زعلانة ؟"

باوعتله " لا ابد مزعلانة بالعكس المفروض ماازعل لان مو من حقي "
رد " هسا اني شحجيت ؟"

رديت " عبالي جاي تعتذر على كلامك الي !!"

رد " بس اني ماغلطان حتى اعتذر .. انتي غلطتي ومثل ماحجيت عليج حجيت على اسراء هم "

اتنهدت " بس اسألك سؤال ؟؟ لو اني جاية وكايلتك اختك تخابر وخربت حياتكم وصارت مشاكل .. انت او اي احد بهذا البيت شراح يگول عليه ؟؟"

سكت مارد ..
ابتسمت " بالحالتين طبعا اطلع غلطانه.. يعني سواء حجيت او لا ماتفرق .. اني هنا علاگة تعلگون بيها اتهاماتكم واخطائكم "

رد " ادري قسيت عليج بس حقي .. كلما ابدي اريد اعرفج تصديني .. مااعرف اطباعج ولا اعرفج شلون ترديني احكم عليج "

رديت " اربع سنوات عايشة ببيتكم .. وماتعرفني ؟؟ بعد ماكو داعي احجي خليني ساكته احسن .. ووعد بعد مااتدخل ولا الي علاقه بأحد ماعدا دنو طبعا "

رد " ماقصدي هيج .. لاتكبرين الموضوع وانزلي تعشي"

رديت " ماجوعانة من اجوع انزل اكل "
تركني وطلع .. افتهمت ساعتها انه لو مهما اسوي راح ابقى غريبه عنهم .. وتصرفاتي كلها خطأ ويفسروها ع مزاجهم ..

فعلا من ساعتها قررت مااختلط بأحد ..
انفتحت الباب اجت دنو .. بيدها صينية صغيرة .. مخليه بيها عشانا اني وياها ..

" ماما مااكل الا وياج جبت عشا النا ناكل "
ابتسمت " اكلي انتي حبيبتي مااشتهي "

ردت " لا الا انتي وياي مااكل وحدي "

اضطريت انقش وياها وهي تسويلي لفات صغار وتنطيني تجبرني اكل ..

سألتها " ليش مااكلتي وياهم "
ردت " متعودة الا اگعد يمج واكل .. انتي مو من مااشتهي تسويلي لفات وتنطيني .. هسا اني هم هيج اسويلج "

سألتها وعبالي تجاوبني غير جواب .. كان توقعي انه ندمان ودزاها الي .. بس يوم عن يوم يثبتلي اهتمامه مو حب مثل ميگول وانما يطبق مقولة كل ممنوع مرغوب ..

كملت دنو اخذت الصينية ونزلت اغسلها .. شفت عذورة تغسل ماعين ..
شافتني ابتسمت " نزلتي واخيرا .. نسر نبه مانضوجج لهذا ماصعدت "
هزيت راسي من غير مااحجي ..
تركت كلشي بيدها وسحبتني للحديقه ..
" زعلانة مني "

رديت " لا ابد بس مالي خلگ "
ردت " اعرف الي صار بسببي وحتى النسر گلتله انه اني طلبت منج تسكتين .. وهم حجيتله عن اسراء تدري وسكتت يعني مو بس انتي.. وهم راح وحجة وياها بس هي لوتيه گالتله :

" اني سكتت لان نبهتها ورزلتها ورزلت معتز وهددتها وهم انطوني وعد لا يحجون سوة بعد ولا يلتقون .. شعرفني من وراي وبمساعدة غيري ترجع علاقتهم .. ومن كشفتهم مرة ثانية ماسكتت وحجيت لان مايفيد بيهم التنبيه "

اتنهدت " اكيد يصدگها ماهي اخته واني غريبه "
ردت " بالعكس نسر يحبج ويعزج بس هو مايظهر مشاعرة "

ضحكت " اي حب .. الرجال كلها ماتعرف الحب كل واحد بيهم يركض ع مصلحته وبس .. اتذكر عمة الله يرحمها جانت تحجيلي عن هواي ازواج تزوجوا عن حب وتالي فشلوا لان الزوج بطبعه من يحب يسوي المستحيل حتى يحصله وبعد ماتصير اله .. تصير حالها حال اي قطعة اثاث عجبته واشتراها .. يوم يومين ويملها "

ردت " يمعودة لاتخوفيني ترى مو كلها سوة "
رديت " يمكن اكو حالات استثنائية بس برأي كلهم نفس الشي "
حسيتها ضاجت من كلامي .. وصارت تقنعني انه معتز مختلف رغم اني ماخصصت احد ..

بعدها صارت تضحك وتحاول تضحكني لان ضايجة ..
اثناء ماگاعدين نضحك طلع نسر .. شافنا سكتت بسرعه

همست " والله اثنينكم ماينگدرلكم .. شوفي شلون يباوع بحجة يسقي الحديقه.. وانتي تلگيج مشتاقة

التفتت وقاطعتها " اي شوق ؟؟ الي يشتاق هو الي يحب بس اني مااحب "

ردت " لعد شتسوون يومين والثالث ببيت عمة "
رديت " هيج نغير جو يدري بيه احب ذاك البيت "

ضحكت " بس ؟"
رديت " اي بس "

هو كان يسترق النظرات علينا . جان يسقي الحديقه وفوكاها هو الي ماخذ ع خاطرة "

كلتلها خلينا ندخل ..
ردت " اي خلي اكمل المطبخ لاتحجي عليه ماما "

دخلت للمطبخ واني صعدت ..
فرشت بغرفه الخياط واجت دنو..
" شنو حنام هنا حارة "
رديت " حبيبتي الجو حلو اذا تردين نامي يم فروحة جوة "
ردت " لا انام يمج "

نامت يمي .. اني مانمت بقيت اتگلب .. استمرينا يومين احنة مابينا الا السلام ..
حتى نومتنا وحدنا ماحجة عنها .. وهذا الي مخليني مرتاحة ماعاد يضغط عليه ..

من التحق رجعنا للغرفه اني ودنو ..
صار كم يوم تاركتها نظفتها وداورتها .. رتبت المجرات
اكو اوراق شفتهن بالمجر هو متعود يخليهن بجنطة خاصه بأوراقه والمستمسكات..
طلعت الجنطة ردت اخليهن .. لفتن انتباهي…
فتحت جان بينهن طابو بيت عمة الي داوره بأسمي ..
اتفاجأت من قريت اسمي ع الطابو ..
شلون كملهن واني شگگت الاوراق بيدي ..

رجعتهن المكانهن بالمجر ماخليتهن بالجنطة خاف يعرف اني عرفت ..
ابد مافرحت ببيت عمة صار الي رغم احب ذاك البيت بس مو من حقي .. اخوها وهمة اولى بي ..

بعد رجوعه من الدوام…
سمعته يحجي وي خاله عن الاوضاع.. وانه راح يصدر قرار فرض القانون واحتمال تكثر الانذارات عليهم ..

نزلت صرنا وجه بوجه .. هو متعود يجي من الفجر ..
سلمت عادي .. رد السلام وسألني عن حالي ..
" شلونج ؟"
" الحمد لله "
" دنو شلونها "
" زينة فرحانه لان حيبدي الدوام "
" هي بالغرفه فوك "
" اي نايمة "
" اروح اتمدد يمها "
سألته " تريگت "
رد " اي وي امي "
جان كلشي طبيعي ..
رحت حضرت الريوگ گعدوا البنات تريگنا سوة ..
كملت شغلي بين مانزلت دنو ..
ريكتها ..
وصعدت اكمل خياط ..
دخلت شفت كارتون ع المكينه استغربت ..
فتحته جان موبايل ..

انصدمت معقولة نسر جايبة ..
رحت للغرفه لكيته لازم موبايله .. وجان جديد وجبير مو مثل الي جابه والي عند البنات ..

سالته " هذا شنو ؟"
رد " الج .. وخليت رقمي ورقم خالتج بي وبس .. ممنوع تخلين اي رقم ثاني "

رديت " بس اني مااريد موبايل "
رد " خالتج هواي تخابر عليه لان تنحرج تخابر ع البيت وگالت اجيبلها موبايل حتى اخابرها .. گلتلها لا اني اجيبلها "

رديت " شكرا "
باوعلي " ماكو داعي تشكريني المهم تعرفين شلون تتصرفين بي "
سالته " شتقصد ؟!"
اتنهد " ما اقصد شي "

تركته وطلعت . مااعرف شبي فوك ماهو غلطان وماخذ ع خاطرة مني .. ومن جهة يجيبلي موبايل ويوصيني يعني اذا ماعندة ثقه المن جابه ..

اخذتة ونزلت العذورة تعلمني عليه ..
فرحت من شافته " لامااصدگ نسر يشتري بيده موبايل يمكن هاي علامات اخر الزمان "
ضحكت بيداء " وج ليش تگولين هيج اصلا هو طيب بس الوكت اغبر مو اشتره الهيومي موبايل وكل شهر يعبي رصيد اله .. واخذلي موبايل هم .. "

ردت خاله " انتو عندكم احد تخبرون اله .. بس هي منو عندها وتخابر يعني مااشوف اله داعي "

ردت عذراء " عندها رجل يمة .. يعني اكيد يريد يخابر مرته ويحجون سوه من يلتحق "

ردتها" اسكتي انتي هو اذا هم بالبيت محد طايق الثاني تردين من يلتحق يخابر ؟"

اشرتلي عذراء اغلس .. وصارت تعلمني شلون افتح وشلون اخابر .. باوعت للارقام سألت ..
هاي منو خالتي ..

انصدمت .. همزين ماكاتب اسمها .. رديت هااا خاله رسميه ..
ردت " والله عزيزة هالرسميه يعني رقمي مموجود عندج ورقمها موجود "

سجلت رقمها ورقم البيت… استحيت اكلها نسر مايقبل
سكتت ..

بعد ماتعلمت عليه .. للظهر خابرت خاله ..
فرحت من عرفت عندي موبايل ..
سألتها عن حالها وعن بيبي… طمنتني زينة ..

ماطولنا شوية وسدته ..
وصارت كلما تريد تتصل ترمش او تدز رساله اذا فارغة او لا ..
بدأت الدوامات والتهيت وي دنو .. نسر واني علاقتنا باردة مثل قبل رجعت…
بالنسبة الي جنت مرتاحة لكن هو جان منعزل حتى عن اهله .. ومرات حتى الظهر مايرجع للبيت ..
وخاله تشكي وتحجي ..

" يمة انت مسوي البيت فندق بس بالليل تجي تبات "
رد " يمة شغل هواي هالفترة ودوام وين الحگ "
ردت " لايمة وضعك ماعاجبني احسك مهموم وضايج اذا مامرتاح وياها خليها تربي بنتك وشوفلك مرة الي تريحك وتشيل همك "

جنت بالمطبخ واسمع كلشي ..
اصلا خاله بكل شهر تسألني اذا اكو شي او لا ..
ومن اكلها لا .. تضوج وتحجي..
تتوقع علاقتنا طبيعية وتنتظر كل شهر انه اكون حامل
لهذا صارت تلح عليه يتزوج واني ساكته ..

الى ان بيوم سألتني .. " خالة شذر ماتخلينا نراجع دكتورة ؟؟"

من سمعت انصدمت ماعرفت شحجي " دكتورة شنو ؟"
ردت " دكتورة نسائية يعني شنو ؟ خلي نشوف شنو السبب لسا ماكو طفل "

رديت " خاله بعد وكت والعمر گدامنا "
ضاجت " ياوكت يمة بنته بالثاني والي بگدة عندة ثلاث اطفال واكثر مو واحد "

بعد ماتعلمت عليه .. للظهر خابرت خاله ..
فرحت من عرفت عندي موبايل ..
سألتها عن حالها وعن بيبي… طمنتني زينة ..
ماطولنا شوية وسدته ..
وصارت كلما تريد تتصل ترمش او تدز رساله اذا فارغة او لا ..

بدأت الدوامات والتهيت وي دنو .. نسر واني علاقتنا باردة مثل قبل رجعت…
بالنسبة الي جنت مرتاحة لكن هو جان منعزل حتى عن اهله .. ومرات حتى الظهر مايرجع للبيت ..
وخاله تشكي وتحجي ..

" يمة انت مسوي البيت فندق بس بالليل تجي تبات "
رد " يمة شغل هواي هالفترة ودوام وين الحگ "
ردت " لايمة وضعك ماعاجبني احسك مهموم وضايج اذا مامرتاح وياها خليها تربي بنتك وشوفلك مرة الي تريحك وتشيل همك "

جنت بالمطبخ واسمع كلشي ..
اصلا خاله بكل شهر تسألني اذا اكو شي او لا ..
ومن اكلها لا .. تضوج وتحجي..

تتوقع علاقتنا طبيعية وتنتظر كل شهر انه اكون حامل
لهذا صارت تلح عليه يتزوج واني ساكته ..

من سمعت انصدمت ماعرفت شحجي " دكتورة شنو ؟"
ردت " دكتورة نسائية يعني شنو ؟ خلي نشوف شنو السبب لسا ماكو طفل "

رديت " خاله بعد وكت والعمر گدامنا "
ضاجت " ياوكت يمة بنته بالثاني والي بگدة عندة ثلاث اطفال واكثر مو واحد "
سكتت مارديت .. هي مصرة تاخذني وتگلي اذا تستحين مني خلي بيداء تاخذج .. ومن كم ارفض ختمتها وياي ..

" اذا ماتردين اطفال گولي حتى ازوجه "
" زوجيه خاله اذا تردين هو كلشي بيد الله "
" يعني شقصدج السبب من ابني "
" لا مو هيج قصدي "

" خلص اقنعيه يتزوج مو راضيه انتي .. ماكو مره ترضى زوجها يتزوج عليها اذا مو معيوبه "

صفنت عليها ماعرفت شنو ارد .. عفتها وصعدت للغرفه خابرت خاله ودمعتي بعيني مااگدر اشكيلها .. ادري بيها ماترضى واحتمال تروح تعاتبه النسر ..
بس هي حست بيه ضايجة وحاولت تعرف شنو البيه بس ماحجيت ..

وليش اضوج مااني مستحيل اخليه يتقربلي وهو يريد حقوقه وامة تريد طفل .. بعد شنو الي يخليني اصير انانية واحرمه ..

بس ساعات اتراجع . واخاف اخسره هو ملاذ بالنسبة الي .. رغم عصبيته وشكه وطبعه بس هو اكثر واحد وكف وياي وحماني .. وخفت اذا تزوج يتغير ..
كلام خاله كله اجه ببالي ..

رجعت عذورة من الدوام .. جانت ضايجة
دخلت وراها سألتها :
" شبيج مو عوايدج كلما تجين الضحكة ماتفارگ وجهج"
ردت " اليوم اجه حسام "
رديت " وشعندة هو مو تخرج وتعين بعد شعنده يفتر بالجامعات "
ردت " اي صح بس يگول عندي شغل ومريت .. بس مو هنا المشكله "

رديت " جا شنو ؟"
ردت " اجة يسم بدني بكم كلمة ويضوجني "

عذراء :
صار شهر من داومنا .. الكل باركلي ع خطوبتي وسولي البنات حفله صغيرة بمناسبة خطوبتي ..
جنت فرحانة حيل حتى الي واهس للدراسه وملتزمة بمحاضراتي .. احسب يوم واسابيع حتى اكمل واجتمع بحبيبي .. مرات يجيني للجامعه ومرات يتصل .. ودايما ينبهني مااحجي ولااختلط وي ولد . اعرف معتز وغيرته لهذا اتجنبت حتى الزمالة وي الولد ماعدا السلام

بس اليوم اجه حسام الصراحة تفاجأت .. خفت يجي معتز ويشوفه وتصير مشكله..
سويت نفسي ماشفته بس هو تقدم الي ..
جانوا البنات گاعدين يمي ..
اتقرب وسلم " السلام عليكم "
ردوا البنات عادي ..
باوعتله " اليوم هنا دكتور خير "
ضحك " ليش الجامعه ممتلكات خاصه مايصير اجي .. باوع للبنات وكمل " اني ابن خالها يعني مو غريب "

ردوا " اهلا وسهلا " بعدها تركونا وگاموا ..
اتنهدت " شعندك جاي حسام لايجي معتز ويشوفك مااريد مشاكل ..
رد " هااا لازم استاذ معتز متعود كل يوم هنا يجي "
رديت " وانت شكو خطيبي ويجي يشوفني وبعدين احنة عاقدين واعتبر حلاله "
رد " بالعافيه عليه دوم محظوظ .. ولو هو خبيث مااعرف شلون حبيتيه "

گمت من مكاني ماردت اسمع تفاهاته .. رغم هو ولد عم بس احسه حاقد على معتز .. مثل طبع اخته بالضبط مايحبون بس نفسهم ..

ردت امشي صاح وراي " گالج معتز راح يسافرون الابوهم التركيا لو لا ؟"

من سمعت هيج التفتت " بطل كلامك هذا لوين تريد توصل "
رفع ايديه اثنينهن " لا وربي مالي قصد بس توقعت گايلج "

عفته ومشيت بس ميته حرگة خابرت ع معتز ماكو مايرد ..
دزيت مسج " خابرني بسرعه "

دخلت للمحاضرة وطلعت لكيته متصل هواي لان اسويه سايلنت داخل المحاضرة ..

خابرت رد بسرعه " شكو حبيبتي قلقتيني ودور اتصلت هواي ماكو "
رديت وحاولت اكون هاديه " كنت بالمحاضرة انت وين ؟"

رد " بالشغل ليش صاير شي صوتج ماعاجبني وين ذيج الي من اگول الو ضحكتها توصل الاخر الدنيا "
بدون مقدمات سألته " صدگ حتسافرون التركيا يم خالو "

رد " منو گلج "

رديت " يعني صدگ ؟"

رد " لا مو صدگ لان هالشي مجرد اقتراح من ابويه .. ومحد يعرفه بس عمي وماكو شي اكيد نسافر لو لا فمنو الي گالج ؟"

رديت " حسام…
قاطعني " ووين شافج اجاج للجامعه ؟"
رديت " اي اجاني "

صار يعيط ويحجي " شلون تنطيه مجال .. وليش توگفين وياه بالجامعه.. وليش تسمعين منه .. وووووو

اشكال حجي حجاه اخر شي تعاركنا وسديت الموبايل
اول مرة نتعارك من يوم الي بدأت علاقتنا لسا ..

ضجت منه لان ماعندة ثقه بيه ولان ماكالي حتى لو كان اقتراح المفروض ينطيني علم ..

رجعت للبيت ضايجة حست عليه شذر كـ العادة ..
واجت تفهم مني وتواسيني ..
رغم هواي سببتلها مشاكل بس ماتركتني ابد ..

وهدأتني " المفروض تسمعين منه الاول وماتاخذين كلام حسام وتهجمين بي ع الولد .. شمدريج مايگلج ؟؟ واذا هو الحديث صاير البارحة فاكيد مالگة الوقت المناسب يحجيلج .. استعجلتي "
رديت " يعني هسا اني الغلطانة ؟؟ "
ردت " مااگول انتي غلطانه بس المفروض تفهمين السالفه قبل لتحجين .. اني مااعرف حسام بس مادام اخته مريم استغفر الله ومااريد اسيء الظن احتمال يشبهها ونفس طبعها .. ماشفتيها من اجت لهنا شلون حاولت تغيضني وتحاول تغري نسر يعني نفس التصرفات "

اتنهدت " وهسا شسوي .. اخابرة لو اغلس "
ردت " بكيفج الي تشوفيه صح سويه ..

بس انتو مخطوبين ويعتبر زوجج لاتخلين الامور تكبر بينكم من البداية.. وخاصه اذا كان الحق عليج "

ابتسمت " الي يشوفج يگول عندج خبرة بالزواج وهو انتي صفر من عشرة تاخذين "

ضحكت شذر " والله الي يعيش هنا كلشي يتعلم .. تعلمت هواي من هنا واخواتج وانتي وكل الموجودين بالبيت يعتبرون مدرسة وخاصه اسراء "

صدگ ضحكتني " مدرسه اسراء تختلف.. شتگولين لو نخلي حسام يخطبها ونخلص اصلا هم متراهمين بالخباثة "

همست " اششش لتسمعنا مالي خلگ "
رديت " ليش اليوم ممداومة "
ردت " راحت ورجعت من وكت عندها بحث "

طلعت شذر وتركتني .. بدلت وكملت طلعت موبايلي من الجنطة باوعت ماكو اتصال..
ترددت اتصل ..
ساعه اشتاقله وساعه اگول خلي مااعوده من هسا يزعلني واراضيه .. مااصير مثل هنا .. تزعل وتجي لهنا تشتاقله وتريد تصالحه ..
نمت وگعدت عندي امتحان التهيت لليل .. اجت رساله
فتحتها " ادري الغلطان يعتذر مو يدير وجهة ويزعل "

ابتسمت وكتبت " معناها عرفت غلطك بحقي واجيت تعتذر "

دز ضحكة " ههههههه خوش تگلبيها عليه مووو .. يلة يابة راضي المهم اسمع صوتج "

اتصل رديت واحجي بثگل .. بس من سمعت صوته لنت لكن صمدت حاولت احافظ ع بريستيجي.

" مامتعود على هيج برود .. اريد عذورة الي من ابدي مكالمة الحد مااخلصها ماتفارگني الضحكة "

رديت " هيج احسن لان مالك ثقه بيه "
رد " طيحت حظه والله .. حتى بعد مايجي للجامعه ويحرجج "

رديت " الى متى .. مو قبلها هم تعاركت كم مرة .. احسه يتعمد عنده غايه يجي حتى يخلينا نتعارك "

رد " انتي دور اذا اجه خابريني او اصلا اتركيه وگومي لو بلغي الامن عليه هو اصلا مو بالجامعه وبس يعرفوه جاي يضوج بنات الجامعه يطيحون حظه "

سألته " هسا احجيلي سالفه السفر شنو ؟"

رد " سالفه السفر مو سالفه اصلا .. هو مقترح .. عمي جان عندنا يسأل وبالصدفه خابر ابوي مشتاقلنا وامي من سمعت صوته بجت ..
فهو گالها بيعوا كلشي وتعالوا يمي اذا تردون ..
وعمي گال " بعد انتو شعندكم هنا لو ترحون يمه احسن بس لا اني ولاهنودة قبلنا .. لان هنودة دوامها هنا واني مامستعد للسفر وهالسوالف يرادلها فلوس وانتي بعدج ممكملة ولازم تسافرين ويانا اذا رحنا .. يعني الشغله مو سهله "
ارتاحيت من سمعت .. لان عندي دراستي واهلي وبلدي مستحيل اتخيل نفسي بعيدة عنهم حتى لو كنت وي الشخص الي احبه تتسمى غربه ..

شذر :
مر كم يوم .. واجت خاله گالت راح يجونا خطار ..
سألتها بيداء " منو ماما "

ردت " ام هيام بنت خالتي وبنتها .. اجو من الحلة خطية يزورون الامام الكاظم .. واني گلتلهن يبقن يمنا هنا .. ولو هن يخافن من الوضع ماقبلن يبقن لان تفجيرات بس طمنتهن يمنا امان "

ضحكت بيداء " حيييل شذكرهن بينا من وفاة عمة ماشفناهن بعد منو من بناتها تجي ؟"
ردت خالة " هديل الوسطانية .. يمكن هي بعمر هنا مووو؟"

ردت بيداء " اي صح اتذكر ولدتن سوة بنفس الشهر هي هديل الحلوة ام الگصايب الطوال مووو ؟"

ردت خاله " والله ماادري اني هم ناسيتهن بس اتذكر ختام الصغيرة الي تجيبها دائما وياها "

قبل يوم جهزنا كلشي .. خاله سوت دولمة وسوينا كليجة..
نسر تسوگ مسواگ كامل .. بيوم الاجن سوينا الدولمة وتشريب ومطبگ باگله ..
حارت خاله شسوت .. وهي اصلا بطبعها من يجيها احد ماتحب تقدم شي واحد ع السفرة لازم تنوع .. من دخلتلهم تعلمت طبعهم الكرم والضيافة وقبلهم جانت عمة هم هيج ..

اذن اذان الظهر ومااجو ..
بقينا منتظرين حوالي بالوحدة اندگت الباب .. اني غديت الجهال ونومتهم بغرفه بيداء ..
طلعت شفت مرة متوسطة بالعمر ووياها بنية .. لابسات عبايه ع الراس ..
سلمت عليهن ..
گالتلهن خاله " هاي مرت نسر "

البنية بسرعه شالت راسها وصارت تباوعلي من فوگ لجوة ..
ردت امها " شايفتها بوفاة ام وليد بس هسا حليانه اكثر .. شصار عندكم جهال "
ردت خاله " لسا ماكو شي كلشي بيد الله "

اشرتلنا خاله نفرش السفرة ..
صبينا الغدا وفرشنا..

گعدنا كلنا سوية ..
مبينين من عائلة محافظة .. لان الام ملتزمة حيل وجانت تحجي عن زوجها .. مايقبل بنية تطلع ويمشي ويوصي مو تطلعن ولاتفترن ببغداد زورن وارجعن ..
بس البنية من النوع لبقة بالكلام ..
واخذت ع البنات بسرعه .. لدرجة اسراء گامت تضحك وتسولف وياها وبدن يحجن عن طفولتهن وشلون من ينجمعون بالمناسبات..
بهذي اللحظة اجة نسر .. سلم عليهن ..
من شافته طفرت لبست عباتها عدلتها وسلمت " هلا خوية شلونك مشتاقين .. سمعنا رجعت للوظيفة بالعافية وع الخير وان شاء الله الترقية وبأعلى الرتب يارب "

وهو جان يحجي رسمي ويرد بشكرا ورحم والديج ..
بعدها استأذن وصعد ..
صاحته خاله " بدل وتعال تغدا امي مادام الغدا موجود"
رد " لايمة اخذوا راحتكم .. ام دنو تجيبلي غداي فوگ"

سألت ام هيام " ليش رجعها مرته ؟"
ردت خاله " لا اسم الله وين يرجعها "
ردت " لا مو من گال ام دنو استغربت عبالي رجعها "
ردت خاله " هااا لايقصد على شذر لان هي الربتها وتصيحلها ماما فمتعودين هي امها تعتبر "

ردت " الله ينطيها يمكن الله ماانطاها جهال حتى تكون ام الهاي الطفله وتراعها وتعوضها "

ضجت من سمعت كلامها عبالك الله ماانطاني .. واذا انطاني مثلا راح افرق بينهم وبين دنو .. اكيد مستحيل هاي العالم مدري شلون تفكر ..

صبيت غدا وصعدته اله ..
جان سابح وجاي يبدل ..
اشرلي "خليه هنا مشكورة "
خليته ع الجرباية وردت اطلع گال " تغديتي لو تتغدين وياي "
رديت " لا تغديت بالعافيه "
رد " الله يعافيج بس وراها اريد كوب جاي راسي يوجعني حيل "
هزيت راسي وطلعت ..
نزلت بعدهن ياكلن ويسولفن ..
رحت للمطبخ خدرت جاي ومارجعت للسفرة بعد ..

اجت هديل تغسل .." ليش گاعدة هنا حبيبة وحدج "
رديت " اسوي جاي نسر متعود بعد الاكل جاي "
ردت " هااا الله يحفظكم .. گالوا الصراحة حلوة بس مااتوقعت هيج "

ابتسمت الها ..
غسلت وكملت واجت يمي .. هسا خالتي گالت تخيطين مثل الجاهز وحلو خياطج .. اذا اشتري قماش تخيطيلي ..

هزيت راسي " اي عادي ..ولاتشترين اني عندي اقمشة اختاري الي يعجبج واخيطلج "

شكرتني " مشكورة متقصرين .. صدگ شخبار مريم هم تجي تشوف بنتها ؟"
رديت " لا بس دنو مرات خاله تاخذها الهم "

ردت" اي خطيه هم ام ذيج مو تحرميها منها .. اذا ماتفاهموا مو ذنبها .. الي اعرفه الحضانه للام شلون صارت واخذها نسر "

هزيت راسي " مااعرف "

اتنهدت " مشتاقة البغداد جنت اجي الخوالي من جنا صغار هواي بس هسا كبرنا وابوي مايقبل شوية هو متحفظ حتى جامعه ماكملت بسبب الاوضاع والتفجيرات لان طلعتلي كليه بالموصل خاف وماخلاني اداوم "
رديت " جان انقلتي "
ردت" معدلي مايقبل انزل للأدنى الا معاهد وهو ماقبل يگلي مداومة علمود معهد تقني وبالتالي ماتتعينين "

حسيتها تاخذ ع البشر بسرعه وتجامل .. ماصادفني هيج بشر بس رسميه لكن ذيج محبوبه بسوالفها والله اشتاقيتلها شگد بذات اني. .

صبيت جاي واخذت الهم والنسر ..
قدمت الهن .. سمعتها تهمس الامها .. " يمة خلينا بعد مانزور نروح البيت خالي عباس وخالي علي .. مشتاقه للبنات وهن يومين ابوي منطينا خاف مانلحگ ..

خزرتها امها " ان شاء الله بس مو اليوم .. اليوم نزور وتعبانين الباجر ان شاء الله "

خاله ضاجت من سمعت اسم بيت خالو عباس ..
لان الاغلبيه مايعرفون حجم المشكله بينهم لهذا يشوفها شغله عادية انه يزوروهم… واصلا الواضح مخلين اللوم ع نسر ومسوين مريم مظلومة ..

للعصر الكل طلع .. وخالة اخذتهن يزورن الامام وكالت احتمال نتعشا هناك ونرجع.. ومناك نسر يجي ياخذنا نروح البيت عمه نشوفهم ..

نظفت البيت كله ..
اسراء عندها بحث وعذورة هم ماراحت تدرس ..
دنو راحت وياهم تتونس ماعندها دروس ..
اجة ببالي اخابر خاله رسمية .. خفت ماالگيها ..
يس حظي هي الطلعتلي سلمت عليها وصارت تعتب كالعادة لان مااخابر ..

شرحتلها وضعي بعدها همست " اكلج شذورة صدگ من زمان اريد اخابرج واتردد من عيالج والشغله الشفتها تاكل بيه اكل "

خوفتني "شنو شفتي خاله "
ردت " قبل شهر او اكثر من زمان شفت نسر جايب مرة مو صغيرة متوسطة وصاحبة عيون ملونة تشبهج البيت ام وليد .. بالاول حسبالي انتي بس لمن تقربت طلعت مرة غريبة اول مرة اشوفها ..
دخلوا للبيت وبيدهم علاليگ .. وماطلعت للعصر من البيت .. اخاف متزوج عليج لو استغفر الله ..

ضحكت اتذكرت خاله سماهر من جابها نسر ..
رديت " لا خاله اني جنت وياهم .. والي شفتيها اقاربنا اجت زيارة وراحت "

اتنهدت " الحمد لله ربي طمنتيني واني عبالي غير شي انقهرت عليج وشايله همج.. گلت يتيمة ومااريدها تنظلم "

بقت تحجيلي عن حياتها ووضعها وشغلها واگف لان اكو ناس ماتنطي ديونها ورأس مال ماعندها .. فكرت اخيط وهي تبيع مثل قبل وتاخذ ربح .. بس ماگدرت اتصرف اذا مااسأل نسر ..

سألتها عن زمن.. اتنهدت " هالمگرودة كاسرة خاطري متحملة ضيم اخوانها والبيت .. ردتها الابني اخذها بس ماقبلت تگول اخواني صغار مااعوفهم .. ماتحجين وياها وتقنعيها لان احسها مثلج فقيرة ومالها احد ومرت ابوها شالعه گلبها "

رديت " ان شاء الله اصلا اني وعدتها احجي وياها ونسيتها .. احاول فد يوم التقي بيها واحجي وياها "

ردت " اي ينطيج العافيه "

كملت منها ورحت سويت مخلمة لان بس احنة البنات ..
لليل يلة رجعوا ..
جنت اغسل بالطارمة ..
دخلت خالة والبنات وام هديل ..
وبالاخير دخلوا نسر وهديل وبيدهم علاليگ ويضحكون شافتني ابتسمت .. " فاتتج ونسه من العمر لو جايه ويانا !!"

يتبع……

///// البارت الرابع والثلاثون /////


لااستطيع ان اصنع شخصية مؤقته لنفسي ..
لكي ارضي احدا ..
ولااستطيع ان اتصنع الحب لكي تبقى معي ..
فانا انثى محطمة ..
ان احببتني فكن دواء لدائي ..
لأكون يوما بلسما لجروحك ..
وان لم تحب فأبتعد عني لأعيش بسلام .. !!
______________________
دخلوا نسر وهديل وبيدهم علاليگ ويضحكون شافتني ابتسمت .. " فاتتج ونسه من العمر لو جايه ويانا !!"
هو صار يباوع الردة فعلي ..
وكانه متعمد او يتوقع اغار ..
ابتسمت " بالعافيه عليكم الونسة "
اخذ العلاليگ منها ودخل ..
وهي بقت واگفه ..
سديت المي ونشفت الطرمة… باوعتلها
" محتاجة شي ؟"
اتقربت " انتي تحبيه ؟"
رديت " هذا شي يخصني اني وزوجي مااحب احد يتدخل بينا "
ردت " بس مااحسكم متزوجين .. ماكو لهفة بينكم مثل اللهفة الي جنت اشوفها بعيونة وي مريم "
اتنهدت " هديل مو گلت هالشي يخصنا واللهفة الي تحجين عليها مااعتقد استمرت .. اذا الحياة الزوجية مو مثل مامتوقعتها انتي ولاعايشتها "
ردت " لا عشتها بس مااتهنيت بيها "
تركتني ودخلت ..
دخلت وراها وقفلت البيبان .. جانت عذورة تفرغ الفواكه بالسلة وجايبين بقلاوة هم ..
انتبهت عليه " شبيج ؟"
سألتها " وين نسر ؟"
ردت " صعد للغرفه يمكن شبيج ضايجة ؟"
اشرتلها " بعدين افهمج "
صعدت للغرفه ونار تغلي بداخلي ..
دگيت الباب .. رد " تفضلوا "
دخلت جان متمدد ع الجرباية شافني گام ..
بدون مقدمات گلتله " اذا تحاول تغيضني او عندك غايه غلطان "
ضحك " شنو شبيج بس لا غرتي "
تعصبت اكثر " لا طبعا بس كرامتي اهم .. ع الاقل اسمي مرتك .. تقبلها ادخل اني وي احد واضحك واسولف وهو يستفزك ويگلك ونسه تخبل وفاتتك !!"
گام بسرعة من مكانه مثل الاسد فتح عيونه بغضب
" اياج اسمع هالكلام منج بعد .. لاتستغلين منطيج ع راحتج .. او مراعي وضعج "
رديت " اي وضع ؟؟ اني هنا مالي اي مكانه مجرد امانة عندك بكل يوم تذكرني بيها .. لكن تحملت اهانتك الي من اجت مريم وتحاول تغيضها بيه .
وهالمرة هديل بعد مستحيل اسكت "
اتقرب " اعترفي غرتي "
ابتعدت عنه " شوفي هاي العيون البلورية شلون صارت تلمع وبينت عليهن الغيرة ليش تنكرين "

ردت افتح الباب واطلع .. لزم ايدي وي ايد الباب وعصرهن ..
صار ظهري اله وهو وراي يهمس ..
" اذا ترديني وتغارين عليه ليش ماتنطقيها وترحين داخلي "
حسيت ايدي ترجف براحة ايده .. وهو يحاول يوگف الخوف والرجفه الي بداخلي بمسكة ايده ..
غمضت عيني والتفت ..
ردت ابعده عني واطلع ..
لكن…
سبقني وهمس ..
لنطفئ لهيب الشوق المشتعل بيننا ..
أحس بالعطش الكبير
أسقيني ريق شفتيكِ فقد ثملت بهم قبل ان اتذوقهم ..
اصبحت مولعاً بدفء أحضانكِ قبل ان اشعر به ..
وسحر تلك النظرات الشهوانية التي تأسرني بحزنها ..
أغرقيني في بحوركِ ياوردتي
وأسقيني حلو العسل من شفاهك ..
أنا أجيد السباحه فوق جسدكِ فدعيني أغرقْ بك
ولتحتضن أرواحنا .. !!
استغربت من جرأته ولعبت نفسي ..
دفعته بقوة وعطت " كلكم هيج اهم شي نزواتكم عبالي تختلف طلعت نفس الشي "
فتحت الباب وطلعت ..
انفاسه وكلامه يرن بأذني .. حسيت اريد استفرغ ..
دخلت للغرفه الثانية اخذت كلينكس ونظفت اذني من انفاسه الحارة ..
كلما احاول مااگدر اعرف بنفسي مااگدر هو يريد اكثر من نظرة وكلمة ..
يريد انسانه تمتلكه بكل جزء من جسمها وعقلها وروحها وگلبها .. بس مااگدر ولا راح اگدر ..
نزلت لجوة .. كلهن بالهول يسولفن ويضحكن ..
اجت دنو " ماما ننام "
ابتسمت " اي حبيبتي روحي يم بابا وهسا اجيج "
سألت ام هيام " ليش تنيمون الطفله يمكم مايجوز "
ردت خاله " عودتها من الصغر وتعلمت .. اني كل طفل عندي يگوم يفتهم ماانومة يمي .. "
مارديت رحت للمطبخ اجت عذراء :
" شبيج ضايجة ؟"
رديت " اگلج هاي هديل جانت متزوجة لو شنو "
ردت " ياااا وين خطية ماطولت شهر وتوفى زوجها هالحجي قبل السقوط "
سألت " شلون مات ؟"
ردت " ابوها من النوع المحافظ شوية .. هي صغيرة وخطبوها سادة وانطاها .. بس فترة قليلة وتوفى حتى ماصار عندها طفل منه ولا اتهنت "
رديت " خطية معناها هواي صارلة متوفي شعجب مااتزوجت "
ردت " ماادري .. بس ليش تسألين بس لاغرتي لان شفتيها تضحك وتسولف ترى هي هاي طبعها مرحة وجنا صغار دائما ننجمع وكلنا متربين سوة يعني عادي "
رديت " لايمعودة شنو اغار شعليه بيها "
بقيت افكر بكلام عذراء .. ليش لسا بنية مثلها ممتزوجة واشو ساعه يگولون ابوها محافظ وهي تصرفاتها بحرية مافهمت شي "
حاولت اتجنبها وماافكر لان فعلا مااعرف ليش شغلت بالي الهاي الدرجة ..
صعدت للغرفه ..
كان نايم .. فرشت ونمت اني ودنو ..
ثاني يوم گعدت الصبح ..
سويت ريوگ وبدلت الدنو ومشطتلها ..
سويت لفات الها والفروحة .. لان السايق راح يجي ياخذهن ..

گعدت بيداء ..
" صباح الخير .. شنو لسا محد گعد ؟"
" صباح النور .. لا لسا "
سألت " ونسر طلع ؟"

رديت " لا بعده ؟"
ردت " اذا نزل لايطلع محتاجته ضروري .. البارحة ماگدرت احجي وياها "
جانت ضايجة ومقهورة ..
بعدها ماكملت نزل نسر سلم .. ردت عليه
" صباح الخير .. همزين بعدك اريد احجي وياك "
باوعلي " كوب جاي اريد "
سألته " اسويلك ريوگ ؟"
رد " لا مااشتهي بالمحل اتريگ "
دخل هو وبيداء للاستقبال واني صبيت جاي واخذتة
دخلت سمعت بيداء تبجي وتشكي على حماها ..
" رجع يخابره ويقرأ براسة وهذا يريد يروح البيت جده يكول كبرت واعرف اتصرف ليش تحرميني من اهلي "
خليت الجاي ع الطاولة .. خله عينه بعيني ورد
" مشكورة "
هزيت راسي " العفو "
كمل حجي وياها " لا تبجين اني احجي وي مهيمن هو بعدة نايم؟"
عفتهم يحجون وطلعت ..
صارت بوجهي ام هديل .. ابتسمت
" صباح الخير خاله "
رديت " هلو خاله صباح النور .. خاله بعدهي نايمة "
ردت " اي نايمة اخذتنا السوالف وللفجر يلة نمنا .. صارلنا شگد مامتشاوفين "
" الله يجمعكم دوم .. اسويلج ريوگ لو تنتضرين خاله "
ردت " لا هسا اكعد هديل .. ابو مريم من سمع بينا هنا اصر نجي ع الغدا ومناك نروح البيت ام معتز نشوفهم "
راحت تغسل واني رجعت للمطبخ شفت عذورة مبدلة ومنتظرة السايق يجيها مأجرة خط للجامعه ..
صبت جاي ابتسمت من شافتني " شلونه الحلو "
ابتسمت " اليوم صاحيه تضحكين "
ردت " اليوم الحب يجي للجامعه "
رديت " اممممم اگول هالاناقه والترتيب والمكياج "
ردت " شنو قصدج كل يوم ممرتبه اني "
ضحكت ..
سمعنا صوت " صباح الخير "
التفتت هديل گعدت.. ضحكت عذراء وغمزتلي ..
اجه السايق خلت الكوب ع الطاولة وسلمت وطلعت ..
غسلت هديل ونشفت وجهها ..
طلعوا نسر وبيداء من الاستقبال ..
ابتسمتله " صباح الخير شلونك "
رد بثگل " هلا اخيتي صباح النور "
بعدها باوعلي " اني طالع محتاجة شي "
هزيت راسي " لا سلامتك "
سلم وطلع ..
گعدت خاله .. وانجمعنا كلنا ع الريوگ ..
گالت خاله " شمشتهيات اسويلجن ع الغدا "
ردت ام هيام " لا دادة مو گلتلج غدانة عند ابو مريم "
طلعت اسراء مبدلة تريد تروح للجامعه ..
" يعني شنو تبقن هناك ؟"
ردت هديل " لا بس نتغدا ونروح البيت خالو علي اشتاقيت الهنودة وعبير هم گالت تجي الاهلها "
ضاجت اسراء بس ماحجت وحتى خاله .. ماقابلات ع روحتهن بس مايگدرن يمنعنهن ..
كملن ريوگ بدلن وخاله اجرتلهن مشتاق جيرانه ياخذهن ..
راحن من الصبح ورجعهن معتز بالليل بعد العشا ..

جان الوضع يخوف ..
خاله ماقبلت يرجع وحدة بالليل .. گالته بات هنا ..
رد " لا عمة مناك البيت واهلي وحدهم "
ردت " مو زوج عبير هناك وعبير بعد عليمن خايف "
نسر هم گاله ابقى لان الوضع موزين والقتل صاير هواي
ارتسمت ملامح الفرح ع وجه عذورة ..
گاعدين كلنا بالهول .. سوت عذورة جاي وجابته ..
ثاني يوم جمعه وماكو دوام كلنا انجمعنا ..
حجت هديل " ديرتوا مريم انخطبت وراح تتزوج .. جانت تحجي وعينها ع نسر تريد تشوف ردة فعله ..
هو سوة نفسه مامهتم ويشرب جاي ..
خزرها معتز تسكت .. بس هي كملت..
تگول الواحد بالبرلمان هو متزوج يصير حما خالتها ..
نزل الاستكان بسرعه وباوع الامه .." شگلتلج .. ذيل الجلب عمرة ماينعدل "
ردت ام هيام " بس يمة هم حقها بنية حلوة وصغيرة انظلمت وتطلگت بشبابها .. شبيها اذا تزوجت لاعيب ولا حرام "
ماعجبة الحجي استأذن وگام ..
خاله ردت " خيه اذا تلمحين لان طلكها فلا يغرج تمسكنها .. هذا ابن عمها شاهد .. شلعت گلبه الابني وماسعدته .. وتعرفين مريم تمشي ورى خالتها .. حطمتها وعلمتها ع الطلعات والونسات .. حتى الحجاب نزعته ولبسها فد مرة ماشفتيها .. وهسا دارت ع هذا المتزوج والله العالم شبينهم لان من زمان علاقتهم مو هسا "
ردت ام هيام " اسكتي دادة اسكتي عندج بنات مايصير هالحجي "
كل الناس تتصورها مظلومة لان مايعرفون السبب ..
لليل ردت اقفل الباب واصعد لان هذا طبعي اذا مااشوف المطبخ نظيف والباب مقفول ماارتاح ..
شفت خيال بالطارمة.. خفت .. اتقربت من الشباك
جانت عذورة ومعتز رغم الجو بارد ..
استغربت معقولة ذولي هيج مايبردون والله الهم حلگ
تركت الباب وصعدت ..
وصلت يم باب غرفه الخياط ..
سمعت صوت .. فتحتها شفت هديل ع المكينة گاعدة
استغربت ..
" شتسوين هنا ؟"
ردت " اعتذر ماگلتلج بس دشداشتي مفتوگة واجيت اخيطها "
رديت " جان گلتيلي اني اسويها الج "
ردت " لا مايحتاج تعبين نفسج .. بس تدرين عجبني خياطج "
شالت الدشاديش تباوعلهن .. " يخبلن عبالك گلبيات "
رديت " اخذي منهن اذا يعجبوج "
ردت " شكرا حبيبتي ماصدكت من گالتلي بيداء تخيطين وتبيعين . استغربت الصراحة "
سألت " ليش استغربتي ؟"
ردت " لا يعني انتي ممحتاجة زوجج ماشاء الله عندة املاك وراتب وشغل ويخليج تشتغلين ؟"
رديت " احب اخيط مااحب ابقى هيج بلا شغل .. وهالشغله تعودت عليها يعني هوايه مو غير شي "
هزت راسها " اني هم اخيط بس مو كلش يعني مو محترفه مثلج . والله لو يمج جان خليتجن تعلميني "
رديت " عادي اعلمج ولو راح ترحون "
ردت " لا وين نروح ..

خابرت امي الابوي نخلص عرس مريم يله لان توسلت نبقى "

صفنت عليها مااتوقعت يطولن ..
ضحكت " شبيج انصدمتي لازم وجودنا ضايقج "
رديت " لا ابد شعليه واتضايق البيت بيتكم .. اعذريني اروح انام وانتي براحتج كملي الدشداشة "
تركتها ورحت للغرفه .. شفت نسر يراجع الدنو املاء
ابتسمت " حبيبتي باجر جمعه ارتاحي اليوم وندرس بعدين "
رد نسر " اصلا هي حافظته مايحتاج "
حضنتها " طبعا بنوتي شاطرة ماينخاف عليها "
طلع نسر خمسه من جيبه وانطاها .. " وهاي البنتي الشاطرة ودور كل عشرة تحصلها انطيها مثلها "
فرحت دنو " لعد جيبلي حصاله وياك اجمع بيها لان راح احصل عشرات هواي "
ضحكنا اثنينا ع سوالفها .. انتبهت الخيال من جوة الباب وبعدها راح ..
معقولة احد يتنصت علينا ..
سويت نفسي اريد اطلع فتحت الباب ماكو احد ..
سأل نسر " شكو ؟"
هزيت راسي " ماكو شي "
فرشت باوعلي " ماتبطلين هالحالة "
رديت " ماارتاح ع الجرباية ودنو الا يمي ماتعرف تنام "
رد " شلون يعني اجيب جرباية ثلاث امتار يله "
ردت دنو " اني فرشيلي بالكاع انام ماما كبرت وبيبي كالتلي مايصير تنامين وي ماما وبابا عيب "
ضحك " ع گلب ابوج "
ماعرفت شرد .. فرشتلها بالگاع ونامت ..
بقيت اتگلب وماعرفت انام ..
همس " نامي مرتاحة لاتخافين مجرد وجودج يكفي "
سويت نفسي نايمة ومارديت ..
عذراء :
لما سمعت معتز راح يبات فرحت .. همزين باجر جمعه ا الاقل نسهر سوة ..
طلعنا بالحديقه ع المرجوحة الجو جان بارد بس حلو
جان لازم ايدي ويتغزل ..
عيني ع الباب خاف يجي نسر واستحي ..
گال مشتهي گهوة ..
اتذكرت عندنا گهوة اسراء دائما تسوي وتشرب علمود تسهر تدرس لو تسوي بحث ..
دخلنا للمطبخ .. گعد ع الكرسي ويباوعلي .. استحيت من نضراته الي ..
سأل " تعرفيلها لو لا ؟"
ابتسمت " الصراحة ممسويتها قبل "
گام اخذها مني .. سحب ايدي من الدلة وباسها ..
التفتت شفت اسراء تباع وتخوزر ..
سويت نفسي مااهتم .. والصراحة مافهمت تخوزر لان سهرانين او لان اخذنا گهوتها ..
سألني " اسويلج وياي ؟!
رديت " خاف مرة "
رد " لا بالعكس طيبة "
سوة الي واله .. بقينا بالمطبخ كاعدين .. سأل اذا اكو شي حلو وياها ..
تذكرت البقلاوة الي جابوها البارحة ..
خليت بماعون وجبت .. اخذ برمة اكلها ووراها گهوة شرب ..
ردت اسوي مثله .. اخذت برمة اكلتها ووراها شربت گهوة احس لعبت نفسي مرة مدري شلون يشربوها ..
بقيت اغصغص .. ضحك " عوفيها يمعودة ليصير بيج شي .. المرة الثانية اريد اطلعج واضوگج الكهوةة البيضة بيها رغوة تخبل ضكتها ذيج المرة .."
رديت " خاف هم مرة مثل هاي ؟"
رد " لا ابد كلش طيبه عبالك جكليت "
سكتنا شوية بعدها سأل " هم تشوفين حسام بعد ؟"
رديت " لا ليش ؟"
هز راسه " لا هيج عبالي بعده يضايقج "

رجعت سألته " خالو شلونة هم يخابر "
رد " اي يخابر ضايج لان وحده "
رديت " ليش مياخذ خاله يمه مو احسن "
رد " وهنودة واني منو النا ؟"
رديت " اذا كلش احجي وي ماما ونسر ونتزوج .. واني هسا ثاني مرحلة وهنودة بعدلها مرحلة وتكمل يعني ماعدنا شي "
رد " لا عذراء مااريد اتزوج هسا !!"
استغربت " ليش مو انت الي تلح عليه نتزوج بسرعه "
اتنهد " الوضع هسا مختلف .. جان ابوي موجود وشايل حمل البيت .. هسا سافر وبقيت اني المسؤول والحمل عليه .. اشتغل واجيب مصرف تعينات جاي تشوفين ماكو بس للواسطات .. وابوي ماعندة وكم مرة حولتله لسا هم مالگه شغل .. ماتشوفيه يريد يبيع البيت وبفلوسه يفتحله مشروع هناك "
سكتت وماضغطت عليه لان فعلا حالته حاله والبيت كله برگبته ..
لزمت ايده " حبيبي لاتشيل هم كلشي ينحل .. اني مامستعجله ع الزواج ومن طلبت منك نتزوج علمودك حتى اشيل وياك الحمل واكون يمك .. واذا تريد اخذ من ذهبي وافتح مشروع واوكف ع رجلك منا لمن اكمل جامعه ونتزوج "
ابتسم وباس ايدي " اعرف بگلبج الطيب بس هذا ذهبج ومستحيل اخذه "
رديت " ذهبي هو ذهبك حبيبي اثنينا واحد وماكو فرق"
صارت ساعه 2 گال راح اروح انام .. لان لازم اطلع للشغل من الصبح ..
فرشت بالاستقبال اله ..
خليت البطانية .. دخل وراي ..
طفى الضوة وسحبني يمة ..
همست وعيني ع باب غرفه ماما .
" لا معتز ليطلع احد عيب "
رد " وج غير مرتي شنو عيب .. ساعه بس اغفى وروحي والله مااسوي شي "
رديت " لحد ماتنام بس "
هز راسه .. نمت بحضنة.. سحب القراصه جنت مسويه شعري كبايه .. وفتحة جان طويل حيل .. فرشة ع المخدة ونام عليه ..
يشتم بي ويهمس " اول مرة اشوف شعرج واشمه ليش حارمتني من هاي النعمة ..
احس نار تطلع مني بسبب الخجل.. صح احبه واعشقه هم ومتعودة عليه .. بس اول مرة انام بحضنة واحس بهيج شعور ..
حسته بدأ يتمادى .. همست " معتز شگلت .. اذا تسوي هيج اكوم والله "
خلة ايديه ع خصري وحاوطني عبالك سلاسل قيدتني
وهمس " خليني ارتاح بحضنج تعبان عذورة "
بقى هيج لحد مانام واني نمت .. جان احساس حلو
رغم كنت خجلانه وخايفه ..
لان اذا شافنا نسر مايعرف لا عاقدين ولامرته ..
يسويها ظلمة علينا ..
حسيت بي غفى .

. حاولت اكوم من يمه ماگدرت
نايم ع شعري ومحاوطني بيده ..
همست " معتز اسمع صوت فوگ يمكن نسر نزل "
هو سمع هيج طفر بسرعه . سحبت نفسي من يمه وطلعت ..
وهو دار وجهة ع الجهة الثانية ولف نفسه بالبطانية لف
ضحكني من شفته شلون استسلم وسوة نفسه نايم..
رجعت بسته بخدة " اعذرني حبيبي جذبت عليك بس ادري بيك ماتتركني اذا مو هيح "
دار وجهة واشرلي " بسيطة اعلمج "

ضحكت ورحت للغرفه .. واحس بكل همسة ولمسة منه
يوم عن يوم اعشق هالانسان اكثر واكثر ..
اتمنيت ابقى نايمة بحضنة واشم ريحته ..
حسيت نفسي مثل الطفل الرضيع ببطن امه ..
رحت نمت واخذتني النومة للعشرة فزيت ..
جان رايح ..
سألت ماما ردت " سودة عليه طالع واحنة نايمين حتى محد مسويله ريوگ لان جمعه اليوم وكلها تتأخر "
رجعت للغرفه خابرته " صباح الخير "
رد " صباح الانوار ولو زعلان "
ضحكت " لاحك من نتزوج تشبع مني .. اتخيل ينزل نسر ويشوفنا شيسوي ؟"
ضحك " عادي كلشي مايسوي بس يشوينا تكة ويتريگ بينا "
رديت " يعني تعترف .. ضجت من كعدت ومالگيتك "
رد " اذا مرتي كسولة شسوي .. عبالي اكعد الكيج محضرتلي الريوگ ومنتضرتني "
اتنهدت " تدري بوضعي بالبيت .. بس اعوضك من نتزوج احلى ريوگ تگعد كل يوم تلكاه '
رد " ياالله منا لمن يجي ذاك اليوم لن روحي طالعه "
رديت " الله كريم حبيبي "
سديته ورحت وي شذورة كملنا الريوگ ..
نسر هم طالع ..
وهديل حايرة شتلبس باجر بحنة مريم مسويه زواج مختلط بقاعه وعازمين ناس كباريه بالدولة "
سألتها " بله ماتستحي ليش همة اول مرة يتزوجون وبعدين شلون نطاها گلبها تاخذة من مرته او شنو موقفه لو سمعت مرته مسوي حفله وبقاعه "
ردت هديل " الشرع حلل اربعه مابيها شي .. بعدين شذر هم اخذت واحد متزوج وعندة طفله "
شفت شذر ساكته ماترد رديتها " شذر من اخذتة مطلگ مامتزوج .. وبعدين الشرع ماعرفتوا منه بس التعدد ..
التعدد اله شروطة ..
ولاتنسين الله گال :
" فأن خفتم الا تعدلوا فواحدة "
يعني الشرع حلل تعدد الزوجات .. لكن بالمقابل أن يضمن الزّوج قدرته البدنيّة والماليّة على هذا التعدد .. وأن تكون عندة القدرة على العدل بينهن ..
واذا سبب الزوج بزواجه ايذاء نفسي للزوجة الأولى .. فعليه أن يتلطف بزوجته الأولى .. وأن يقنعها ويبذل جهد حتى يجبر خاطرها .. لأنّ هذا كله يعتبر جزء من العشرة بالمعروف واحكام الشرع الي انتو مافاهمين منه بس تحليل اربعه للرجل ..
هاي اذا قاريه وتعرفين شنو حلل اربعه وليش ؟؟
ضاجت هي " وشمدريج مايعدل جايز هي راضيه "
اشرتلها امها تسكت سكتت ..
همست شذر " وج ماادري بيج صايرة متكلمه "
غمزتلها " اعجبج .. بس غير انتو مستصغريني "
شذر :
مااعرف ليش ارتاحيت من كلام عذورة الها .. والغريب انه اسراء لاول مرة تساندها .. لان ماتحب مريم اكيد وانطتها كلام بالقانون وشلون يكفل حقوق الزوجه الاولى ولازم يتم الزواج بموافقتها ..
ثاني يوم ..
نسر التحق مثل العادة محضرتله كليجة واكلات مسويتها…
گعدت خاله هم من الصبح متعودة تودعه قبل لايطلع
سلم وطلع ..

صليت وبقيت گاعدة اقرأ قران العمة ووليد .. دائما اذكرهم ..
گعدت ام هديل هم توضت واجت صلت ..
كملت سألتني " رجلج التحق "
رديت " اي راح "
ردت " الله وياه "
شدي حيلج وجيبيله وليد يشيل اسمه ..
رديت " كلشي بيد الله خاله "
شفتها تريد تحجي عفتها وكمت صعدت ..
غطيت دنو ونمت ..
گعدت رتبت الغرفه ونزلت ..
شفتهن يبدلن يردن يرحن البيت مريم ..
جانت هديل تقيس بفساتين عذراء ..
ردت امها " ماتلبسيهن ذني مكشوفات وتصوير وابوج من البارحة ينبه "
ضاجت " يمة تحجين صدگ راح تعزم الدنيا كلها ويجن على اخر موديل .. عود مااخلي احد يصورني "
اختارت فستان واخذتة…
جانت عذراء صافنه همست " وج شنو طبعها هاي عادي عدها تفتح الكنتور وتاخذ حتى مااستأذنت "
لمن غراضهن وكالن احنة باجر بعد العرس نمشي مناك البيتنا ..
سلمن ع خاله والبنات وعلينا وراحن ..
گعدت عذراء ع الكرسي بالمطبخ " واخيرا .. ولو فستاني الله يرحمة راح بس ميخالف اعتبره صدقه "
ضاجت خاله " لاتصير عينج ضيگة شبيها اذا اخذت منج غير بنت خالتج وبعدين انتن بناتي بيجن طبع اي مناسبة تلبسن بيها فستان بعد ماتلبسنه بعد "
مر كم يوم هدوء ماكو احد يجي او يطلع .. بيداء ضايجة بسبب رجوع علاقه ابنها بعمه وخايفه ياخذة منها ..
جانت تفكر تبيع بيتها من يمهم وتشتري يم اهلها حتى وباقي الفلوس تفتحله مشروع وتلزمه بي ..
تركتهن يسولفن هي وخاله وصعدت للغرفه طلعت الموبايل لان بالمجر اخليه ومرات انساه اصلا لان مااخابر بس خاله وبالصدف ..
اتصلت ع خاله .. عاتبتني .." هاا ياگاطعه گولي خالتي شبيها مابيها "
سألتها " خير شبيج صاير شي ؟"
ردت " لا سلامتج بس كم مرة اتصلت ماكو قلقتيني "
رديت " اي جانو عندنا خطار والتهيت حتى ماادري الموبايل مابي شحن حتى نسر هم متصل ولاكيه مغلق ومخابر ع البيت وسألني ليش مغلق "
ردت " شلونه وضعج حياتج مرتاحة "
رديت " الحمد لله بيبي شلونها "

ردت " احسن الحمد لله "
اتنهدت " خاله مشتاقتلج '
ردت " حاسه بيج شي تحبين نلتقي "
رديت " لا والله مابيه بس هيج مختنگة وضايجة "
ردت " اني اخابر نسر واخليه يجيبج حتى لو للامام "
رديت " نسر هالاسبوع بالدوام واحتمال يتأخر لان عندهم انذار بسبب الاوضاع "
ردت " اخابرة شوكت مايجي يجيبج "
بقيت احجي وياها وبعدها سديته ..
نزلت جوة اسمع خاله تحجي وي بيداء بالمطبخ
" البنية نادرة وفلفل . مو جامدة مثلها . يعني تگدر تنسيه وتفر عقله .. تعبت وراح يطلع على الساني شعر واعلمها ومايفيد .. قشمرته كم يوم وحتى شكيت بيها مسويتله شي . وتالي رجعوا النفس البرود "

ردت بيداء " يمة البنية حبابه وشايله البيت وشايلتنا ع راسها .. خرسة وطرشه وماترفع صوتها على احد .. بعد شتردين منها الي بينهم معليج بي ولاتتدخلين هذا اختياره ويتحمله "
اتنهدت خاله " شحصلنا من اختياره الاول حتى نحصل من الثاني "
ضجت بداخلي بس عادي تعودت ع كلامها .. هي تريد اطفال وبس مايهمها شنو احس اني او ابنها شيحس ..
شافني سكتن…
سألتها " خاله محتاجة شي مني اروح اكمل خياط"
باوعتلي وسألت " يمة انتي ماتعرفين بس الخياط والشغل والطبخ "
استغربت " ليش خاله تردين شي بعد ؟"
خلت ايديها ع خدها وسكتت ..
وبيداء تخزر بيها…
وردت عليه " لا حبيبتي روحي كملي خياطج اني هنا ماعندي شي "
بهذي اللحظة اندگت الباب ..
البيت مابي احد كلها بالدوام بس احنة ثلاثتنا ..
راحت بيداء فتحت ..
جانت هنا وولدها ..
دخلت سلمت علينا وتركت ولدها وراحت ..
" ماما مستعجله السايق بالباب .. اروح اتسوگ اني وشجن وعندي احتياجات وارجع مااتأخر "
جود كبران وحليان احسه يشبه نسر بضخامته وسماره
وفهودي يشبه ابوه ..
من شفتهم ماصعدت بعد بقيت وياهم طلعت بيداء الهم العاب دنو وفروحة. والي اغلبهن لعابات واكو مكعبات
اخذ جود العابات وشمرهن " اني لجال ماالعب بلعابات بنات ضحكنا "
من زمان وهنا ماعادت تجينا مثل الاول.. احسها متغيرة لبسها رجع احلى من قبل واناقتها .. ومهتمة ببيتها وولدها . مرات تجي وي زوجها وتروح ..
حتى اخواتها الي محافضات مايجن الا بالمناسبات بس يخابرن دائما ..
وغيداء هم .. هالفترة سمعنا تريد تزوج احمد ابنها ومشغوله بالتحضيرات ..
عزمت اخواتها بس نسر گالهن الي تروح ماتعرفني بعد ولا تكول عندي اخو ..
هنا :
اتفقت اني وشجن نطلع نتسوك .. اريد ملابس واحتياجات ومن اطلع وي ليث كلشي مااشوف لان دائما تعبان ويريد يرجع .. او الاولاد يشلعون گلبنا ..
مريت عليها للشغل اخذتها وطلعنا..
طول الطريق وموبايلها يدگ وتنطيه رفض ..
ابتسمت " ليش ماتردين ؟"
ردت " شبيج تبتسمين ماكو شي "
هزيت راسي " اي صدگت "
بس الاخ كلما تنطيه رفض يزود بالاتصال ..
اخذتة منها مكتوب حبيبي ..
ضحكت " وج من وراي حب وحبيب زعلت "
اخذتة مني " لا هنا ليش هيج تسوين اصلا انفصلنا طلع مابي حظ ومو گد حجايتة.. تعبت منه ومن وعودة الفارغه "
همست " سالفتج سالفه خلي ننزل وسولفيلي كلشي .. ولو المفروض ازعل لان محاجيتلي عنه .. ولو كنت حاسة بيج عندج احد بس ليش تستحين "
سكتت ماردت وجانت ضايجة… الضاهر مأذيها حيل
سألت نفسي ليش بس احنة نتعذب بالحب وهم عادي عندهم يجرحونا ومايهتمون ولايحسون بينا .

اتنهدت " ولو تعودت اني على ليث وصارت ايامي وياه يوم عسل ويوم بصل .. لدرجة صرت بعد مااهتم البرودة وعدم اهتمامه .. جنت اتصنع السعادة ومااشكي مثل قبل .. حتى رغد مرت قصي صارت تحسدني على هيج سعادة ..
" هنيالج.. عندج طفلين وبيت ورجل يسعدج ويطلعج ويمشيج "
ماتدري حياتها احسن من حياتي .. قصي طبعه مثل عمو وبابا يقدرون المراة لدرجة السبب بيها وهو ابد مايحب يجرحها وكم مرة مرت عمو رادت تزوجه وماقبل يكلها حرام عليه اكسر خاطرها حتى الله مايوفقني بطفل لو تزوجت ودعت عليه…
اما ليث فكلشي الله منطيه وماراضي ع حياته ..
كملنا الطريق اثنينا اني وياها .. هي تباوع بجهة الشباك وسارحة بعالمها وهمها ..
واني نفس الحاله .. اخذتني الصفنه الحياتي بحلوها ومرها ..
وصلنا حاسبت السايق ونزلنا ..
دخلنا المول بقينا نفتر ونشتري .. شفت كوت حلو عجبني والصدفه اثنينا سألنه ع سعره اني وشجن ..
ضحكت " شنو عجبج "
رديت " اي وج حلو "
ردت " لعد ناخذة اثنينه "
رديت " اي بس غير لون احسن "
اخذنا اثنينة نفس الموديل بس الوان مختلفه ..
اشتريت الاولادي ملابس واخذت الليث ساعه عجبتني
هي جانت صافنه ..
همستلها" اخذي من هاي الحبيبج وراضيه "
ابتسمت " ممتعوده اني اراضيه هو الي يراضيني دائما"
اخذت الساعه .. واخذتها ورحنا گعدنا بالكافتريا ..
" تعاي احجيلي شنو سالفتج .. لا عبالج اهلج رجعوا الاربيل ومحد يحاسبج "
تنهدت " شحجيلج ماكو شي علاقه عابرة وراحت "
رديت " مااصدگ هذا الحزن بعيونج وتگولين عابرة زين هو من وين وياج بالشغل "
ردت " لا بغير دائرة "
سألتها " تحبيه "
سكتت " ماادري ساعات احسه النفس الي اتنفسه وساعات احسه غلطه "

استغربت " ليش مامتعودة عليج تكونين هيج مترددة بقراراتج "
ردت " هواي وعود وعدها الي وخلفها "
سألتها " من شوكت علاقتكم وليش مايخطبج اذا يحبج "
ردت " علاقتنا بالبداية كانت صداقه واعجاب لااكثر بعدين تحولت الى حب شلون وشوكت ماادري فجأة حسيت نفسي متعلقه بي .. رغم اعرف علاقتنا خطأ .. وهو ظروفه ماتسمح يتقدملي رسمي "
سألت " مافهمت يعني شنوووو ؟"
اتنهدت " مو وكتها هنا حبابه لاتضغطين عليه "
سكتت وماضغطت لان حسيتها ضايجة حيل ..
رجع يتصل وهي ترفض .. بعدها دزلها مسج قرأته وگامت .. " هسا اجي "
طلعت موبايلي .. ردت اخابر ع ليث اشوفه اذا مايجي الظهر ابقى عند اهلي للعصر ..
اتصلت مشغول.. ضجت حيل . حسرة اتصل عليه والگاه ..
بقيت منتضرة شجن ..
اجت كلتلها " خلينا نتغدا هنا "
ردت " لا خابروني من الشغل محتاجيني لازم اروح "
رديت " بس مو اخذتي اجازة اليوم لويش خابروج "
ردت " اي صارت شغله ضرورية.. يلة نعوضها غير مرة بوستني وطلعت مستعجله "

اني هم اخذت غراضي واجرت تكسي ورجعت الاهلي
خابرت الليث وكلتلة راح ابقى عند اهلي ماعارض ..
شذر :
السنة اوشكت على نهايتها ..
بكل سنة تبدي جديدة احسها نفس سابقتها ..
رغم البنات يحضرون للاحتفال وكل سنه يحتفلون ورغم شهر الواحد عيد ميلادي بس ابدا ماا افرح واحس بطعم السنة الجديدة وامنياتها كانت امنياتي محصورة الدنو وبس الي كلما تكبر سنه تحسسني بانجازي بتربيتها ..
وخاصه بعد مامريم تزوجت والتهت بسفراتها بعد ماتطالب تشوفها .. ودنو اصلا كبرت وافتهمت ودائما تگلي انتي ماما وراح تبقين دوم امي الوحيدة ..
حسيت الله اخذ مني اخواتي وطفولتي وعوضني بيها
بالاشهر الاخيرة هواي اشياء تغيرت ..
وحياة الكثير انقلبت ..
ويمكن سنة 2008 فالها سيئ علينا كلنا .. لكن كان فال حلو ع اسراء ..
الي كملت دكتوراه وتعينت استاذة جامعية رغم طموحها انه تكون قاضيه ..
بيوم رجعت عذراء ضايجة ومبينه جانت تبجي ..
عذراء :
كنت احسب يوم يوم حتى تنتهي السنه واحسب شگد يبقالي واتخرج وانجمع بحبيبي ..
لكن اتفاجأت بيوم يجيني للجامعه ويطلب يحجي وياي
رحنا للكافتريا گعدنا ..
" ها حبيبي شبيك "
رد بتنهد " مااعرف شنو اگلج .. بس ابوي طلب نبيع البيت "
سألته " وانتو مافكر وين ترحون "
رد " هو هذا الي مضوجني .. بعد ماهنودة كملت جامعه صار يلح نجي يمه "
رديت " اي خليها هي وخاله يرحون وانت ابقى عندنا او كلش نتزوج ونأجر شقه ونستقر "
رد " وتتوقعين الاجار والمصرف هين .. عذراء احنة بالعراق الفلوس تلزمها تصير تراب يعني الاجارات غاليه والبيت كلشي يحتاج "
رديت " اشتغل وي نسر وصدگ مايقصر وراح يوكف ويانا "
ابتسم " تعرفين نسر مايطيقنا دور يشغلني وياه "
سكت وبعدها كمل بتردد " اني قررت مؤقتا يعني بين ماتكملين جامعتج .. اطلع وياهم واشتغل واكون نفسي واجي واذا قبلتي نتزوج ونسافر "
صفنت عليه مصدومة " يعني انت ماجاي تاخذ رأي .. انت اصلا مقرر وجاي "
لزم ايدي بعدتها عنه لا حيل ضجت ..
" افهميني .. شنو البيدي ومااسويه .. اني رجليه وتعرفين وضعها وتعيين وماكو . حتى مريم ذليت نفسي الها وطلبت منها تشوف رجلها يعيني وماعينتني لان خاطبج .. بعد فهميني شسوي .. عبالج هينة عليه اعرف اهلي وناسي وانتي اولهم واروح وج والله مانايم الليل وحاير اذا رحت شلون مااشوفج مااتحمل "
لااراديا نزلت دموعي مسحهن بيده " لاتبجين وتأذيني اصلا بعد وكت هسا على ماينباع البيت ونكمل الجوازات يله.. بعدها والله بس تكملين اسحبج يمي مااخليج هنا "

رديت بحرگة " ومنو گلك اني اريد اتغرب واسافر .. اني ردت هنا نفرح ونتزوج ونستقر بين اهلنا وناسنا "
رد " ليش وهو اكو استقرار هنا فهميني بعدين هي سنتين بس تكملين نشوف حل واذا ماتردين تسافرين عادي لن مكون نفسي وارجع هنا وربي ارجع ونتزوج اول وتالي احنة مخطوبين منا للتخرج .. وتلفونات اكو ونتخابر "
باوعتله بحزن وگمت " اصلا انت مقرر الكلشي وحاسب حسابك "
عفته ومشيت صار يمشي وراي ويتوسل اسمعه ..
رحت لگيت البنات منتضراتني وابو الخط جاي ..
صعدت وتركته واحس كل الجامعه تباوعلنا والبنات يسألني اذا متعاركين او لا ..
بس مارديت بقيت كاتمة العبرة بداخلي ..
انفجرت اول مادخلت للبيت .. نزلن دموعي وصرت اشهگ ..
همزين اهلي هيج وكت ينامون ..
دخلت صارت شذر گبالي مااتحملت حضنتها وبجيت
گعدتني بالمطبخ وسألتني
" شبيج شصاير احجي لاتخوفيني "
حجيتلها كلشي انصدمت مثلي .. بس بعدها صارت تقنعني انه هو اول تالي ماراح نتزوج هسا خليه يكون نفسه ويرجع وبعدها نستقر ونرتاح ..
بين مقتنعه وبين لا ..
لكن بعد مااجة العصر وگعد وي امي واهلي وحجة الي حجالياه . حسيت الكل مقتنع الا نسر گاله ..
" تريد تطلع تكون نفسك وترجع تتزوج .. فبكيفك واني وياكم ومااترككم والي تردوه جاهز اله .. بس مال تخلص دارسة وتطالبها تسافر وياك مستحيل اقبل وحدة من اخواتي تبتعد عني وتتغرب "

هز راسه ووافق " واني موافق بس المهم مااريد اخطو هالخطوة وهي ضايجة وزعلانة "
خلونا اهلي وحدنا وطلعوا .. اجة حضني وباس راسي وحلف انه ماراح يمر يوم اذا مايخابر .. وبكل فرصه راح يحاول يجي يشوفني .. رغم گلبي مامرتاح بس اضطريت اوافق .. عسا وان تكون هالسفرة خير عليه ويرجع مكون نفسه ونتزوج ..
بس كان بكل مرة يخابرني بيها ويكلي لگيت مشتري للبيت او جاي اسوي الجوازات او جاي نجهز .. اضوج وانقهر واخلص الليل بجي ..
جنت ادعي ماينباع البيت وفعلا بكل مرة تفشل البيعه بس بالاخير نباع وبدأوا يجهزون للسفر ..
حتى احس نفسيتي تعبت واختفت ضحكتي الي كنت حتى لو ضايجة مااستغنى عنها…
شذر :
عذورة حالتها النفسية تعبت حيل بهاي الفترة .. واختفت ضحكتها الحلوة .. مخلصتها دوام ونوم ..
حتى اكل قليل تاكل ..
سألتني خاله " تغدت "
رديت " اي اكلت شويه "
هزت ايديها " هاي تريد كلشي ع مزاجها .. ولد يريد يكون روحه قابل يگابلها ويگعد .. خليها كم يوم وتتعود"
اتنهدت وحجيت بداخلي " صار شهر من گالها وهي ما تعودت هسا تتعود ؟؟"
صعدت فوگ جاي اخيط .. سمعت صوت نسر اجه ..
گمت اسويله غدا ..
ردت انزل سمعت خاله تحجي وياه ..
" هااا شگلت يمة "

ضحك " تحجين صدگ يمة .. عبالي تتشاقين واگول حجايه وتنساها "
ردت " شأنسى صارلك كم سنه متزوجها وكلشي ماكو الى متى تبقى هيج "
رد " يمة اني مو مال حب شوكت تعرفين اني مستحيل احب واتزوج واستقر "
ردت " وهاي الماخذها المن لعد اذا ماتريد حب وزواج "
رد " اخذتها لان وصية عمتي ارتاحيتي ؟؟ وهم ردت ام تربي بنتي .. وماالگى ولا راح الگى احن منها على دنو "
سألت " يعني بس الهيج ماخذها "
اتنهد " اي ارتاحيتي .. وهالموضوع انسيه "
ردت " لا ماانساه .. ماتحب لاتحب بس لاتگطع نسل ابوك حرام عليك .. اتزوجها ولاتحبها مااجبرك بس هي مالها احد وارمله وانت هم محتاج طفل يشيل اسمك "
تعصب عليها وصعد ..
رجعت للغرفه بسرعه .. بقيت افكر بكلامة .. ساعه يكول اريدج.. ويحاول يقترب وساعه يكول مااحب وماخذني امانة ماعرفت شنو هالانسان هذا..
من گلتله كلكم متشابهين زعل وگال عني مريضه ..
وطلع هو المريض مو انه او يمكن عنده انفصام لان كلامه شي وتصرفاته شي "
ضجت منه حيل بسبب كلامه ..
خابرت خاله وحجيتلها من حرگتي… صارت تواسيني
وتگلي مبين يحبج وهذا حجي السان وتحاول تقنعني
بعدها تسولف .. انقطع الاتصال خلصت رصيد رجعت اتصلت بيه شوية لان هي هم ماعندها… وطلبت احجي وي نسر ونلتقي ونسولف لان بالتلفون مايفيد الحجي ..
ماحسيت خاله فادتني .. وفوك ضوجتي ..
لزمتني خاله من شافتني نزلت ..
رحت يمها ..
صارت تحجي عن نسر " يمة ادري بيج يتيمة ومكسورة وصح مرات اقسى واحجي بس الله شاهد معزتج مثل معزة بناتي .. لكن رغم كلشي اريد اشوف اطفال ابني بالبيت وولده شايلين اسمه "
رديت " وشنو البيدي خاله "
ردت " ردت اخطبله وگلت اخذ رأيج لان هو يكول انتي امانة وخاف يكسرج. "
سالتها " يعني الشغله متوقفه ع موافقتي .. مثلا اذا وافقت راح يوافق هو ؟"
ردت " اي طبعا .. اذا شافج راضيه يوافق "
هزيت راسي ورديت " خلص خاله اذا يريد يتزوج خلي يتزوج مالي دخل "
حسيتها فرحت " اي يمة هيج صيري عاقله وهو اصلا علمود الجهال والا انتي ماكو مثلج .. واكيد راح تبقى معزتج محفوظة "
حسيت مستعدة تبوسني وترضيني بكلشي حتى اقبل ومن قبلت ماصدگت فرحت ..
كان بداخلي شعور مأذيني .. ساعه اكول مااريدة وخلي يتزوج. ويبعد عني.. وساعه اخاف من هذا القرار واتردد..
مر يومين جنت بالغرفه افرز الملابس اريد اغسلهن ..
دفر الباب بعصبيه ..
" انتي گايله الامي اني موافقة نسر يتزوج ومستعدة اروح واخطبله هم "
صفنت بوجهة مااعرف شنو ارد ..
عاط " ماتحجين كايله لو لا "
رديت بتوتر " مو هيج الحجي "
رد " يعني تعترفين انه موافقه .. "
رديت " گلتلها اذا هو يريد "

صار عصبي واتنرفز " يعني هيج ست شذر .. تردين بأي طريقه تخلصين مني .. براحتج الي ترديه يصير .. بس تذكري الاخر لحظة اني شاريج وانتي البعتي "
طبگ الباب حيل وطلع وماخلاني حتى احجي ولاعبالك هو الي كال امانة وبس .. ومستحيل احب !!
بقيت گاعدة بمكاني وجامدة ومااعرف شنو نهاية تهديدة الي !!
تغير بعدها حيل عليه ولا يقبل اغسل ملابسه ولاياكل مني ..
وبيوم يريد يطلع .. حجة وي خاله بصوت عالي ..
" يمة الحجي الي حجيتي نفذيه… اخذي بيداء ومرت عمي وروحن .. وبعدها يصير خير "
جانت خاله فرحانة بس كاتمة فرحتها حتى ماتضوجني
وبيداء جانت تواسي بيه وتكلي انتي الاولى لاتضوجين مهما يصير راح تبقين انتي العزيزة عندنا وام دنو ..
اتنهدت " لاتواسيني ام مهيمن .. صدگي ماضايجة لان تعودت الدنيا تلطش بيه بقت ع هاي "
ثاني يوم اخذهن قصي وراحن للحلة ..
من اول يوم دخولها البيتنا حسيتها راح تستقر هنا ..
عذراء تواسيني وتگلي " مستحيل ابوها يقبل شبيج لان متزوج مرتين ابوها محافظ ومايقبل ع الغلط "
مااعرف ليش ماضايجة ع زواجه بگد ماضايجة ع اختيارهم الهديل ..

لان اعرف هديل مو سهله واحسها تشبه مريم ..
طول اليوم گلبي مقبوض ..
وكملتها هنا بجيتها ..
دخلت شمرت جهالها عليه واخذت مشتاق جان منتضرها لان هي دايما تاخذة وين متروح صعدت وراحت ..
بقيت مستغربة والجهال تبجي بحضني..
هنا :
اجة ليث الظهر بين مااسوي الغدا دخل يسبح ..
خله موبايله ع الشحن ..
سمعته يدگ ..
گلتله " ليث جهازك يدگ "
رد " عوفيه هسا طالع "
اخذتني رجلي للموبايل .. شفت رساله " حبيبي مو تتأخر منتضرتك ترى ازعل وتعرف زعلي شلون "
حسيت بي طلع .. تركت الموبايل مالمسته ابد ..
ورجعت للمطبخ.. احس نار بيه تسعر ..
ماردت اتهور مثل ذيج المرة ويضيع حقي .. عبالي صدك اتغير وانعدل .. بس ذيل الجلب عمرة ماينعدل
گعدنا نتغدا وهو ياكل وعينه ع الموبايل ..
سألته " ليث اذا ماعندك شي خلينا نروح الاهلك والاهلي صار هواي مارايحين "
رد " ع باجر حبيبتي اليوم عندي شغل هواي لازم هسا ابدل واطلع "
كملت غدا ونومت جهالي وبقيت اباوعلة وهو يبدل ويتأنق ..
فكرت بشغله " ليث اذا طالع اخذني اهلي وارجعلنا بليل "
رد " هااا مو اخاف اتأخر "
رديت " والله مااخرك بسرعه "
رد " يله بسرعه "
بدلتلهم بسرعه وبدلت وطلعنا..
طول الطريق ساكتين ..
وصلت الاهلي .. فتحت الباب شذر شمرت الجهال عليها واني دازة رساله المشتاق ينتظرني بباب اهلي صعدت ورحت وراه ..
لازم اعرف منو ومن شوكت يخوني ..
الي عجبني البيت الي راحله قريب ع بيت اهلي مو بعيد والشارع هذا شارع بيت شجن ..
والبيت الي نزل يمة .. هو بيتها فعلا ..
ماردت اصدگ وردت بكل الطرق اكذب احساسي ..
نزلت ودگيت الباب مثل المخبله .
اول مافتحت الباب .. دفعتها ودخلت حسيتها انصدمت لزمتني " شبيج هنا شصاير ؟"
التفتت ضربتها راجدي وتفيت عليها "
دخلت جوة لگيته ينزع بقميصه يريد يدخل للغرفه
عطت ودمعتي بعيني " وي صديقتي يانذل .. وي صديقتي يازاني .. الله يمسخكم اثنينكم ..
عاطت شجن " ليث زوجي يعني مو زانيه ولا هو زاني "
هي گالت هيج واني اريد اوكف ع رجلي مااگدر
التفتت " هسا عرفت شلون اهلج اقتنعوا يرحون الاربيل ويتركوج وحدج ؟؟"
وج حرام بيوم سميتج اخت وحرام دخلتج البيتي ووكلتج من زادي…
دمعت عينها " مو بيدي گلتلج كلشي فجأة صار "
رديت " يعني تشكيلي وتگليلي علاقه خطأ طلع تحجين عن زوجي واني المغفله اواسيج واقنعج "
اتقرب من ليث يهديني ضربته هو الثاني .. لاتجيسني ياقذر تحلم بعد تشوف ولدك وتشوفني انت الخسرت لان الي تخون صديقه عمرها واختها لاتعتقد تصونك"
لزمني بسرعه " خلينا نحلها بينا لاتوصليها الابوي "
تعصبت منه اكثر وتفيت عليه وغلطت وفقدت وكسرت كلشي گدامي .. " الله ياخذكم اثنينكم الله لايوفقكم ياوسخين امنت بيكم وغدرتوني وماجنت اثق بس بيكم"
عفتهم وطلعت ودمعتي بعيني . بذيج الضهرية الحارة رجعت البيت اهلي مشي .. اتذكر من جانت تمر عليه ونروح للمدرسه سوه… لبسنا ضحكتنا سالفتنا كلها سويه .. طلعت غدارة واخذت مني الي جنت احبه
امشي تايهة مااعرف وين اروح اتمنى اشوف سيارة
واذب نفسي گدامها واخلص…
ااااااه حيل صعبه لو خايني وي غريبه يمكن مااضوج هيج ..
رجعت للبيت دخلت تلگتني شذر وعذراء ..
" وين رحتي وشبيج ؟"
ماحسيت ع روحي بعد بس الدنيا تلف بيه وغواش الشمس بعيني !!
شذر :
ايام سوداء حلت علينا .. ثلاث قارورات كسروا وقلوب محطمة تركت ..
رجعت خاله وهي متألمة يوافقون ويرجعولها خبر بالموافقه ..
بس انصدمت انه بنتها متخربطة وبالمستشفى بيتها وحياتها انهدموا هنا الرقيقه صارت اشبه بغصن يابس ومصفر من قلة الماء ..
وعذراء الي اضطرت تودع حبيبها وخطيبها بگلب مكسور .. بعد ماسافروا واخذ گلبها المجروح وياه
اما اني فحكايتي اغرب من الخيال .. ومازالت مستمرة
وهناك قوارير اخرى مثلنا محطمة ..
ستعرفونها بالجزء الثاني.

يتبع… .. في الجزء الثاني ..
_______________

///// #البارت الخامس والثلاثون /////
ج2

________________

أنا امرأة كنت صامتة عنك ..
والآن سأتحرر ..
كنت خائفه منك !!
والآن سأثار
خيانتك مفجعة تستلزم وقفة !!
صدقي العميق معك سأقتله بصفعة ..
لا تستحق حبي يامن بعثرتني
ويامن محوت بيدي كل عبارات حبي لك ..
____________________

كلنا خلقنا قوارير ناعمة وجميلة .. نمتع الناظر لجمالنا
لكن عندما تكسر هذه القوارير تصبح جارحة تؤذي كل من يلمسها او يحاول التلاعب بها !!

احاول أغمض عيني وانسى الموقف حتى من اغمض اشوف بالظلام خيانتهم ..
كنت اتمنى يطلع كلشي حلم واصحى منه ..
ضربتين بالراس توجع زوجي وحبيب طفولتي وصديقة طفولتي الي كانت شاهدة ع كل لحظة من لحظاتي وياه
كانت تعرف كل تفاصيل عشقي وهيامي اله ..
حرت اسامح منو ؟؟
وانسى ذنب منو بيهم ؟؟ ومنو بيهم اكثر يستحق أعاقبه او ادعي عليه ..

دمعة اجت تنزل من عيوني خزنتها بين جفوني مااريد بعد أبجي مااريد اضعف واستسلم ..

زوجي خاني للمرة الثانية ماادري الثالثة او الرابعه او كم. مرة اصلا ..
لان بصراحة جنت مغفله وعايشه حب اعمى الوحدي ..
كسر گلبي بعد ان نطيته كلشي .. الحب والاهتمام والاولاد والبيت الهادئ حياة يتمناها كل رجال ..
لكن للاسف جازاني بخيانة ليست كـ اي خيانه ..
خيانة قلب .. وجسد .. مع اقرب صديقة الي .. لابل اخت
او كنت اعتبرها اخت..

كنت شبه صاحية بالمستشفى افكار كثيرة براسي وطعنة بداخلي ..
اهلي كلهم يمي والكل قلق ويحاول يعرف شبيه ..
سمعت صوتة بباب غرفة المستشفى ..
غمضت عيني مااريد اشوفه .. ولا الي القدرة اواجهة حاليا ..
اتقرب مني وباس راسي اشمئز جسمي منه ..
لأول مرة احس بهيج شعور اتجاهة .. حتى جسمي رافض يتقبله ..
همساته وطريقة كلامه المستفزة وهو يحاول يقنعني مقابل ارضائي بعد حين ..
مثل كل مره يريد يتعشى بمشاعري قبل لا يتغدى بخبثه ..

-" هنوة الي ترديه يصير بس خلي هالشغلة بينا "

مااتحملت انفاسه الكريهة وصوته المزعج ..
توقعت جاي يعتذر او ندمان بس كان خوفه انه عمو واهله يعرفون .. هذا الشي الوحيد الي شاغل باله ..

صرخت بلا وعي بقدر حرگة گلبي وعذابي ..
كل الكلام الي كان بداخلي وكاتمته .. ترجمته على شكل صرخات مكتومة محطمة نادمة ..

" أطللللللع براااااااااا اطلللللع.... اطللللع مااريد اشوفك طلعوه منا طلعوه ..
كانت نظراته متفاجأة مني...لاول مرة اوگف بوجه ذكوريته... مايعرف هو السبب !!
هو الي قتل هنا الهادئة .. وخلق بمكانها هنا العصبية هنا الي مستحيل راح تذل نفسها بعد الان ولو كان الثمن انه تقلع قلبها من بين اضلاعها ..

بصراخي مااستغرب هو بس بل كل الي كانو موجودين ..
اتقرب نسر وعصر ايده حيل ودفعه ..
سأله " شسويتلها وهيج صارت حالتها .. لك ضغطها مرتفع وبداية جلطة لو ماالله ستر احجي شسويتلها ؟؟"

بقى يمتمت ويحلف .. " والله ماكو شي شبيك نسر العالم تتباوع النا خلي تطلع للبيت والله كريم "

قبض ايديه نسر والتفت الي .. اتقرب والشرار طالع من عيونه .. قرفص گدامي ودموعي ينزلن .. فقدت بذيج اللحظة واني اشوف وقاحته وهو واگف گدامي ولاعبالك مسوي شي ويطالبني اسكت ..

مسح راسي وهمس " گولي يبعد اخوج شبيج .. لاتشلعين گلبي دموعج يغسلني "

حسيت ابوي اليحجي مو اخوي .. اشتهيت احضنه وابجي بحضنه ردت اشكي وافرغ همي "

بس حسيت الساني ماينطق والنفس بالگوة اخذه ..
همست بصوت مبحوح .. " خاني نسر ليث خاني "

اول ماسمع مني هالكلمتين .. سحبني الحضنه وحضني هنا صدگ شهگت وفرفحت من البجي ..
اشر الامي " ديري بالج عليها هسا اجي "

وكفت امي بوجهة " يمة منا عالم اسكت لاتفضحنا "

اشرلها " لاتتدخلين يمة "

اشر الليث " تعال اطلع برة "

ليث سمعني او لا مااعرف بس جان متوتر ويمسح بوجهة وعينه عليه ..
بسرعه درت وجهي ماردت اضعف .. مستحيل بعد عيونك وكلامك يخلوني اصدگ بيك وارجع ..

لهنا حبنا او بالاحرى حبي اعلن استلامه قبل ليوصل الخط النهاية ..

" لاتنتظر مني المسامحة .. لاني حذفت من قانوني الطيبة بعد الان !! "

اخذه نسر وطلعوا .. وليث يأشر بيده ويحاول يبرر
اتقربت ماما " لاتسولفين شي الاخوج مو ناقصه وتدرين بي عصبي وخاف يتهور ويسوي شي .. ترديهم يتكاتلون فكري بعمج رجال جبير خطية "

درت وجهي عنها ومارديت .. لان اللوعة الي بداخلي والحرگة ماتنوصف .. اتمنيت تاخذني الحضنها واعيط وابجي واطلع النار الي بگلبي .. بس امي جان همها نسر لا يتهور ويصير شي .. من احنة صغار هيج .. صح تحبنا وربتنا وتعبت علينا بس حبها النسر وخوفها عليه مختلف ..

اسراء ردتها بصوت خافت " يمة شبيج هذا الي هامج عمي والناس.. خلي يصير الي يصير ماتشوفين حالها الله اعلم شمسويلها اصلا المفروض نسر يربيه حتى مايكررها "