شرب الجاي عافني وراح يغسل اسنانه
عرفت ما يجيبلي ف ما لحيت نزلت الاكل وغسلت الماعين وصعدت نمت
كعدت الصبح حضرت ملابسه للدوام و خليتهن بل غرفه طلع من الحمام لبس ونزل
اني هم سبحت يعني اكتسبت هل عاده من عنده والملل صار الحمام بمثابة الترفيه عندي

كملت و لفيت شعري بدون تمشيط ونزلت لكيتهم ملتمين على الريوك بل مطبخ ويسولفون كعدت وياهم اكل

عمو "شسويت البارحه... بعد هايهيه قررت مو ؟؟؟
رفعت راسي استغربت شكو شقرر مدري ليش اجه ابالي يطلك لو يسافر
رد عليه "ايي يابه احسن تعبت من المحاكم "
رديت "شكووو شحسوي اطلكني شنو حجيتها بشقه "
باوعلي خزرني وضاج
رد عمو "ليش ما كلج راح يدرس ماجستير "
رديت "اها بل توفيق "
رجعت عمو "ليش ما ترجعين للدوام بابا مو احسن من الكعده وانتي سادس هاي بناتنه كلها كملت "
رفع راسه مهند ورد بعصبية "لاااا ما اداوم يابه سد الموضوع هي مسأوله مني "
عمو صار عصبي من رده "لك شو انت ما تحترم وبعدين شنو مسأوله منك اني هم عمها و اريدلها الخير خليها حالها من حال البنات اشوفها ضايجه و مخنوكه عاد تطلع تشوف ناس ليش هيج حابسها لو تريدها بس للخدمه خاف الله لو تريدها على كد ايدك مو هاي هنا شكد اجوا عليها وانت اول واحد يعارض ويريدها تكمل خليها تشوف مستقبلها وهي شاطره خطيه وانت لا اطلعها لا تونسها "

مهند ما رد على عمو وطلع بعصبية وهو يوخر بل رباط بعصبية اخذ الجنطه وطلع
اني خفت على عمو لان صار عصبي وانفعل من تصرف مهند عمتي هم تهدي بي قصص وروايات عراقية كرار صلاح
شوي سكت وطلع على شغله اني ما خليت عمتي تمد ايدها على شي كلتلها اليوم خليني اني اشتغل والله ضايجه
هي هم ضايجه على عمي ومهند راحت لبيت جدي تسير سويت حملة على البيت طلعت كل ضوجتي بل شغل
كعدت هنا شافتني هم ساعدتني ل ١ وحنا ممكملين دخلت عمتي وهي تحجي عليه
"ليش هيج يا امي متعبه نفسج ...هو شبي البيت كل اسبوع اسوي شغله عليمن هل تعب شعندج انتي شو بس بطرك روحج لا توصخين لا عندج طفل "
رديت "عمه ما صار شي اني احب اشتغل واضيع وقت وانتي ما تنطيني مجال امد ايدي "
كملت الشغل و صعدت سبحت من التعب ونمت كعدتني هنا اكل بس ما جنت اشتهي كملت نومتي كعدت شبعانه نوم ساعه اربعه العصر و مهند نايم هم
كمت غسلت وجهي ونزلت يمهم لكيت عمتي اخت ابوي موجوده هي وبناتها و امي ونور فرحت بوجوده
و التمينا تونست للمغرب مهند كعد رادوا يطلعون عمي ما قبل اله يتعشون هنا
تعشينا و كملنا اجه ورانا جدي و بيبيتي هم ضلوا يمنه للتسعة ونص طلعوا ردت اروح وياهم اشوف مياسه لان ما شايفتها صار هواي و مشتاقتلها توسلت بمهند ما قبل
طنكرت و بقيت عاكده حواجبي
هنا وهديل بنت عمتي دخلوا للغرفه و باتت هديل علمود هنا لحت عليها اني بقيت كاعده واباوع لمهند صفح و عمو ما يحاجي من الصبح ولسه
طلع عمو من الصاله راح ينام و بقى مهيمن و مهند
اني كل شوي اباوعله صفح اريد احسسه بل ذنب طكت روحي وهو متجاهل الوضع
ضوجني صرت اتنفس بعصبية و اريد اخنكه
هو ما تحمل طكها بضحكه قويه "ههههههههههههههههههههههههههههههههههههههههههههههههههههههههههههههههههههه ولللج شبيييج راح تموتييين نوب شلون تباوعلي بحقد كومي يابه لا يطلع بل طفل تعالي اخذج "
رد مهيمن "هااا حاااملللل مووو وتضمون علينا "
رد مهند "لاا منين تحبل من الهوى ...كومي يابه كومي "
من حجه مهيمن هيج حسيته ضاج و من رد عليه مهيمن استغرب بس بلعها و صعد لغرفته
اني ماكلت باطل كبل خليت شال على راسي و طلعت حتى بدون نعال
"هاااا ولج على كيفج عاد لبسي نعال ...نوب حتى ما تنتضرني هيج متلهفه الهم مو كل اسبوع ترحين "
ما رديت عليه لبست تعالي و طلعنا سويه
دخلت يمهم بعدهم كاعدين بس مياسه ماكو الضاهر نايمه ضجت و شوي وكلت لمهند نروح للبيت

حجت ماما "دضلي ليوم قابل طاير مهند ...مكطعه روحج عليه ولا تجينا لا تباتين ...باتي هنا غيري جو شوفي خواتج ...هاي مياسه مريضه خطيه شوفيها "
انحرجت من كلام ماما
رد بابا "ايي باتي اليوم اشتاقينالج حتى ما نشوفج ليش ما تجينا "
اني سكتت رد مهند بمكاني "عمي اني ما اخليها تبات ...هو الباب بل باب عليمن بايته "
كلها ضحكت وجدي يرد عليه "اي جدو حقك عزيزتك ما تكدر تفاركها وتنام بلياها "
رد على جدو وهو يضحك "اي ما افاركها غير اليل كله ما انام من تبعد عني "
ردت عمتي "حقك يمه هي بس من تباوع بوجها ترد الروح ...بس عيونها تسوالها الف مره شو جسم وطول وبياض و عيون ملونة وسباعية... والله جنت رايدتها لبني احمد بس انت سبقتني الله يهنيك بيها عمه "
رد جدي "الله يسعدهم چا احنا شنريد "
خجلت من كلامهم ردت بس اطلع سوتني اجنبية بوصفها وغزلها بيه

طلعنا وسلمت عليهم وكلهم لحوا على مهند يبقيني وما قبل
رجعت للكأبه مهند صعد واني بقيت شوي اعزل بل بيت و رحت ورا
لكيته كاعد و بصفه علبه مغلفة باوعت عليها وشلتها "شنو هاي المن "
باوعلي" لصاحبتي جبتها"
رديت "واني شنو مو مرتك شو ولا يوم ذكرتني كلشي ما تجيبلي ها ...لو بس لصاحباتك نوب يكلي شكد ما تستحي ...وشنو المناسبة جايبلها هدية...الحمد لله والشكر صدك ابو بنات ...بس احبج واحبج الي يسمعك يكول روميو ما يلحكه " قصص وروايات عراقية كرار صلاح
شمرتها وكمت تخصرت "انت حتى لو تجيب هدايا وتصاحب بس لا تكلي شوي خلي احترام الي ...لييش هيييج تتصرف هذا اعتبره عدم احترام واهانه الي "
كام من مكانه عبالي راح يضربني شو هذا ادنه عليه ولزم ايدي وخله العلبه بيدي "لج اشاااقه والله شبيج انهديتي بيه ...هاي الج انتي مرتي وحبيبتي وصديقتي وام بيتي انتي كلشي شعندي غيرج احبل اجيب ...وبعدين ليش ماخذه عليه نضره ابو بنات شوكت شفتيني اخابر بنات لو اقلدلهم شو بس انتي البنيه الوحيده الي حبيتها وذلتني ولسه تذلني و بعدني انتضر الكلمه منها حارمتني منج حتى واحنا بنفس الغرفه صرنا مثل الاخوان والناس حاسدتني عليج "
رديت "والله تجذب عليه بس لان كشفتك لفت السالفه "
"هههههههههههههههههه ولج شبيج حبيبتي والله اشاقه شنو كشفتيني قابل خايف اني يابه فتحيها وشوفي "
اخذتها وافتح بيها شفت كارت مكتوب عليه
شعر
لكِ أهدي سلامي مع أحلى تحيه
وأكتب إليك أعذب ألحاني الشعريه
يا من احتار الشعراء بوصف طلتكِ البهيه
يا من أعجزتي الرسام بِرسمكِ لوحةً فنيه
أتشجعُ أنا وأكتبُ في جمالكِ قصيدة ارتجاليه
عيونٌ أبدع الخالقُ خلقها فطغى جمالها على البريه
عيونٌ لها لون أصفى من قطوفِ العسلِ في الخليه
عيونٌ لها بريقٌ يضئ ظُلمات الليلِ الخفيه

إليكِ وفي عينيكِ أكتبُ شعراً بكلماتٍ نثريه
عيناكِ ما عيناكِ سوى نبعٌ للحبِ والحنيه

عيناكِ يا حُلوتي من الله أجملُ هديه
عيناكِ قصةُ حُبٍ لن تُكرِرها البشريه

عيناكِ سيدتي رمزُ البراءةِ والعفويه
عيناكِ.؟ نعم!! أنتي يا صاحبة العيونِ العسليه

يا من بجمالها لم أرَ أي فتاةٍ ولا صبيه
يا من تملُكينَ خدوداً بنفحاتٍ ورديه

يا من يغارُ الورد منكِ ومن انفاسُكِ الزكيه
أنتي وعيناكِ ووجهكِ وشفتاكِ النديه

أنتي صورةٌ من صور الجمال الابديه
يا ساحرة القلوبِ يا زهرةً مخمليه

كتبتُ فيكِ شعري ونظمتُ قصيدةً غزليه
عنوانها أنتي يا صاحبة العيون العسليه
كاتب بل نهاية الى حبيبتي شام وموقع
ابتسمت و باوعتله "هاي كله الي ..شكرا كلش حلو الشعر "
فتحت العلبه شفت الهدية موبايل حديث احدث من جهازه
كلش عجبني شكرته و فتحه الي مخليله رمز ومنزل بي كل البرامج حتى فيس

بيومها للصبح ما نمت بقيت ابحوش بي وسويت الحسابات كلهم بأسمي واشتركت بكروبات نسائيه ورياضيه وتعليمية


يتبع ..........

قصه جريئة لفتاة تتعرض للتحرش و...........

#بارت 15


****************

أشعر بحزن يعتصر قلبي، جسدي يتداعى من شدته، شيء يحيّرني ويقلقني أتساءل ما هو؟ أشعر بفراغ كبير في قلبي مكان سُيهجر لأيام وربما لشهور وربما إلى يوم القيامة، وإن لم يحن وقته بعد لكنه إحساس بدأ يتسرب إلى أعماق ذلك القلب العليل، إحساس بالخوف والحزن حزن لفراق الأصدقاء وخوف أن أكون سائرة أسيراً وحيداً على شاطئ الذكر والتسبيح وقيام الليل، من يذكر ومن يعين؟

شام ..كعدت الصبح و نزلت لجوه باوعت ساعه ١١ واني نايمه مهند طالع لشغله وعمتي تطبخ وهنا هي وهديل
يسوون حلويات صبحت عليهم وردوا
حجت عمتي "شعجب اليوم متأخره كل يوم من الصبح تكعدين "
رديت "مو البارحه بقيت سهرانه وما نمت وراحت عليه النومه ...مهند ماكعدني "
ابتسمت بوجهي "يله امي ميخالف بس بعد لا تسهرين ريكي رجلج حضريله ملابسه بعد هو مسؤول منج "
"ان شاء الله "كعدت اساعد بيهم و افتر بل بيت اريد اخلص حتى اشوف الموبايل واكعد عليه
ل ٣ اجه مهند بس وجه عصبي ابد ما ارتاحيت سألته شكو ما جاوب صبينه الاكل ما قبل ياكل
راح صعد واني بقيت جوه يم البنات اشرتلي عمتي رحت يمها "روحي شوفي رجلج شبي خاف متعارك صاير شي استفسري منه "
صعدت لكيته متمدد و صافن بل سكف ادنيت يمه
"شبيك اليوم شو مو طبيعي صاير شي ...قلقتني اكو شي عمتي ضل بالها يمك "قصص وروايات عراقية كرار صلاح
ساكت ويباوع عليه رجعت حجيت "متعارك بل دوام شكو "
رد "ماكو شي بس قضية مهمه جانت شاغله بالي وخسرت بيها صار شهر اشتغل عليها "
ما اقتنعت بجوابه رديت عليه "ابد ما قنعتني لابد اكو شي ليش هيج معصب على قضية قابل اول مره تخسر "
سكت ودار وجه ونام عاد اني عفته وهم نمت لان ما شبعانه نوم كعدت العصر ماهو غسلت وجهي و نزلت جوه محد موجود بس بل استقبال اسمع صوت عمو ومهند يتناقشون بصوت رحت ادنيت اسمع كلامهم
مهند "يابه انت شتحجي كلشي مكملين ومجهزين "
رد عمو"من شوكت هل كلام اني اذكر ببدايه زواجك حجه بل موضوع واكد علينا ما نحجي بس ما كنت متوقع بهذي السرعه يكمل كلشي ما جنت متوقع ماشي بل معامله زين هو ليش ماحجه لاحد ويوصيك على شام لازم ما الهم رجعه بعد"
مهند "مايريد احد يعرض و اكد عليه ان شام ما لازم تعرف لان كلش تتأذى بهل خبر ماراد تعرف هسه "
كلبي انقبض الموضوع عن اهلي وعني شبيهم شكو ابوي ليش يوصي عليه ياربي سترك ادنيت اكثر لحتى اسمع

رد "هي بس شام وابوي وامي بلكوه قنعوا يرجع من الموصل ونلتم كلنا هسه شيصير بيهم وهو رايح لديار الغرب وما نشوفه بعد زين هو مايفكر ببنته باهله شلون يعوفهم ورا ...ادري هسه هو شناقصه حتى هيج يسوي ...شو شغل خير من الله وبيت وحياته ماشيه بعد ليش هيج ياخذ بناته ببلد غريب و يطبعون بأطباعه وهما بعدهم صغار ابوي ابد ما اتوقع يوافق "
اسمع بل كلام واتكطع فهمت كلشي ابوي من كنا بل موصل يشتغل في سبيل نطلع للخارج يم اخويه
جان وسام يلح على ابوي يسحبنا لعنده لبين ما يجهز حياته هناك ويشتغل حتى يأمن حياتنا بل خارج
ابوي من بعد الحاح طويل من وسام وافق وما اتذكر بوقتها ليش سكت وما رحنا بس هو وامي دائما يتناقشون بهل موضوع ومن لجأنا لبغداد من دنس داعش الموضوع راح عن بالنا او بس احنا نسينا اما ابوي الضاهر بعدها هل فكره براسه
ومقرر كلشي وراح يسافر شلون هيج يسوي بيه ويتركني هنا يعرفني ما اتحمل غيابهم حتى لو بين اهلي وناسي و مزوجه
مأمنه بوجود السند اعرف شما يصير وراي ابوي بضهري يحميني يسندني اما هسه حسيت بل عجز والهوان
هيج اني هينه عند ابوي ويتركني ويسافر ليش ما فكر بيه شنو احساسي وشعوري ليش وافق ينطيني لمهند اذا يعرف راح يترك البلد بلا رجعه ليش يعلكني هنا
ويروح امي اخواتي ابوي بعد هذول كلهم ما اشوفهم ما ينورون حياتي حتى وسام كان عندي امل التقي بي هنا او هناك اما هسه الامل تحول الى رماد
كان يشتغل وسام بل خارج دكتور ويحاول يطور من شغله في سبيل يجمعنا عنده من كان يدرس كل ما يجي اجازه يسولف عن الحياة هناك غير ويكول ما ارجع لهنا
احلى ايامي هناك وصدك تخرج وكمل دراسته وهو بل خارج صار ما يجينا هواي الى ان شوي شوي صار نهائيا ما يجي للعراق يعني بل مختصر ما شايفته هواي بس اذكر القليل من الذكريات الي جمعتني بي من كنت صغيره
حتى الاتصالات بيناتنا قليلة لان دائما مشغول ويدرس جانت امنيه نتجمع كلنا ونعيش مثل ما نريد
مــا اصــعــب أن تــصــبـح
تــائــهــاً بـيـن حــلــمٍ لا يـكـتـمـل
و واقــع لا يـــحـــتـــملـــ .....!!

كنت اتوقع هل موضوع انتهى وبعد محد يفكر بي بس انصدمت بتصميم ابوي على الرحيل بدون عودة
انصدمت و عفت كلشي وصعدت للغرفه هم هسه كاعده من النوم وهم مصدومه بقيت مصفصفه و كاعده بمكاني
فكرت بكلشي وبحياتي بعدهم شوي شوي تحولت الصدمه الى عصبيه جنت كاعده على الجربايه واباوع لشكلي بل مرآيه رجلي صارت تهتز بتوتر و اشتعلت نار بسوايتهم

"كااافي ليش ضايجه وحاركه دمج هما اختاروا هذا الطريق ... يسافرون ويتركوج لوحدج ببلد ما بي ريحتهم ... يتبدل كلشي بعد رحيلهم تزول عني الطمانينة والامان ..اكون وحيده حتى لو موجودين عمامي وزوجي هذا ما يمنع الوحدة الي راح اشعر بيها ...زين امييي شلون قبلت تعوفني وتسافر شلون تتركني ليش زوجوني اذا هما مصممين يرحون معقوله يخففون الحمل ... ايي ايي ماكو غير هذا السبب ...بس اي حمل حالي حال خواتي وابوي شغله تمام وعنده خير من الله واخوي دكتور ...لاا ما اعتقد هل سبب ...زين شلون يهون عليهم فراكي شلون سوو هيج زين وسام شلون ياخذهم مني ما فكر بيه ...ليش هيج حياتي كلها انكلبت كلشي تبدل بين يوم وليلة اريد راحه ...اريد خبر يفرح قلبي بس ابد كلشي يكسرج بكلشي مكسورة خلااااااص لا. تفكريييين ولا تشيلييين هم لاحد حتى اهللللج واذا عااافوووج هما عادي عندهم انا هم لازم يكووون عااادي عندي ...قرروا ونفذوا ...وبعدين باخر محطة يودعوني ويصدموني برحيلهم ....كلهااا تكرررهج كلهااا ترررييد اذيييتج للليش تقهرييين نفسج على ناااس ما شوفوج خييير ايشي صار يجي منهم يأذيني ...بهل خبر تأكدي ما يحبووونج ولا يهتمووون انتي هم لا تهتمين "
سكتت ورجعت احجي وي نفسي..
"كاااافييي كااافيي ثرثرة شام اصحي على حالج كومي لحيلج كافي كسل كافي ضعف حققي احلامج واذا تزوجتي حققي اهدافج وطموحاتج مو هو الي جبرج ترضخين وتقبلين تتزوجي اني هم لازم اجبره يقبل بخياري مثل ما دامشي ويا عدل يمشي وياي عدل ...ويحترم قراري مو كافي عزله وحياة ممله مو كافي فقدان امل ...كل يوم تنصدمين بشخص كل يوم تنصدمين بخسارة هذا هو حتى اهلي هم راح اخسرهم ... لازم اثبت نفسي بهذي المعركه... لازم اواجه الحياة واتحدى كل الصعاب والعقبات ...ربي يوكفلي هو اعلم بحالي واعلم بأحساسي ...مااا ابجي وعدددد من اليوم اقطعه على نفسي ما ابجي حتى على اهلي ...ما اضعف بس امام رب العباد التجأ اله وحده قصص وروايات عراقية كرار صلاح
كمت توضيت و اتجهت لربي بعد ما تزوجت رجعت قطعت الصلاة وكل ما اقطعها ارجع لربي بضعف وقلة حيله واشكوا اليه اوجاعي و هضمتي ولوعة روحي
وكل ما اكوم من السجادة بعد ضعف واحساس بل هوان اصير اقوى و اكثر صبر وثبات
هو ذاك الركن الشديد ، والملجأ الوحيد ، هو اقرب الينا من حبل الوريد ، يرى زلاتنا ولا يفضحنا ، يسترنا ويغفر لنا ويردنا اليه
كل ذنوبي وافعالي واخطائي وبعدي عنه وزلاتي بل دنيا وهو الي يغفر الي ويسامحني ويساعدني لمن التجأ اله يرجعني الى رشدي ويقويني استمد كل الطاقة منه
شكيت اله ونتحبت و بجيت ووعدت نفسي ما ابجي او اشكي اله يمه ووعدت نفسي امام الله كل همومي واثقال روحي اشكيها اله وحده و اكون اقوى من هيج وكل ما انكسر اعود له وحده وما اطلب مساعدة احد غيره واسند نفسي بنفسي

"من اليوم يا الهي ما اعتبر احد قبلك ولا بعدك السند ...الكل يتخلى عني بس انت ما تتخلى انت سندي وانت ملجأي حين ضعفي. "
كمت بعد ما كنت مكسورة مليانه ايمان وطاقة ووعدت نفسي بوعود كثيرة واولها ما ابجي
كمت بس اكو حسره كل ما اجر النفس تجرحني وتأذيني شي صعب فعلا تقاوم كل اوجاع الدنيا وتكتمها بداخلك
بس الحلو نتقرب للرب ونشكي افضل من عبادة الي يأذوني حتى بكسرتي
لليل مهند ما شفته ولا احد شفت من العصر من نزلت ورجعت ولسه ما شفت احد ولا احد صعدلي

شفت الساعه صارت ٨ نزلت اشوفهم وين صاروا
البيت فارغ ولو تعودت على فراغه و بروده جدرانه الي تأذيني من داخلي

لبست حجابي وطلعت للحديقه خالي من اي بشر استغربت بل عاده دائما اشوف احد بيها ابد ما تخلوا من وجودهم
رحت لبيت جدي يمكن موجودين دخلت شفتهم متجمعين ويسولفون طبيعيين كلش
"السلام عليكم "
ردوا "وعليكم السلام "
رحت ل امي بستها وبابا وجدو وبيبي التفتت على عمتي
"عمه ليش كلكم هنا وما تكلولي خفت لوحدي "
ردت "مهند كال عوفوها نايمه وعفناج واجيت لهنا وره عمج و هنا وهديل هم اجوي انتضرتج ما اجيتي "
رديت "مهند وين شو ماكو "
ردت "طالع ..بعده ما جاي ؟؟"
سكتت ما جاوبت رحت لمياسه دخلت للغرفه ماكو
جاي اطلع صار بوجهي رضا دخل للغرفه
سلمت عليه وردت اطلع
"شام شلون مهند وياج خو ما مضوجج ...ايشي يصير وياج تعاليلي لا تستحين مني اعرف شنو دواه لهل كواد "

التفتت اله "زين وياي وعساك سالم "
ردت اطلع ضل ببالي أسأله "رضا ولو الموضوع راح وانتهى...بس اريد اعرف ليش سكتت وانت تعرف بكل الي صارلي ... ومنين عرفت "
تنهد ورد "هو صح مو وقتها بس اكيد ضال ببالج ... اني جنت اعرف بمهند رايدج ومتمنيج جان يسولف بيج دائما جنت اسأله ليش ما تخطبها من ابوها يكول هي ما احسها راغبة بل موضوع...ويعرف حتى لو فتح الموضوع ترفضين واكيد ابوج ما يجبرج على شي جان يحاول يرضيج و يخليج تقتنعين ...بعدها ما اعرف شنو الي صار بسبب دواماتي وابتعدت لفتره عبالي شال الموضوع من باله لان ساكت وبعد ما جاب طاريج ..وبيوم
جر نفس وكمل ..بيوم الي اخذتج للمستشفى جنت مستغرب وضعج ...بس مياسه اقنعتني ان انتي تتوجعين من الدوره

خجلت من كلامه هو حس عليه
"لا تستحين اني مثل اخوج ...المهم مشيت الموضوع لان كل اعتقادي ان عندج التهابات ومشاكل وهذا من اعذار مياسه طبعا حتى تغطي على الموضوع بعد ما سألت ولا دخلت للمستشفى لحد ما طلعتوا وهذا اكثر شي تندمت عليه
من شفت حالتج شكيت وجانت مياسه بكل مره ادافع عنج وتنطي عذر ل افعالج وبيوم الي انتحرتي تأكدت شكوكي من تصرفات مهند و بيومها ما رجع للبيت والكل جان يتوقع لان اهلج اذوج انتحرتي بس اني ما خشت بمخي لان وضعج مو تمام ابد
انتضرته حتى استفسر منه لان الموضوع بدا يثير شكوكي واجهته بل موضوع بل اول نكر تركته
وفد مره صعدت صدفه لفوك بعد محاولة انتحارج بفترة وسمعتج تحجين انتي ومياسه عن الموضوع و هي تهدي بيج وتلعن بمهند عرفت هو الي مسوي فعلته السوده بيج
بيومها اخذته وجنزته تجنز زوعته العافيه... واذا تسأليني ليش ما حجيت وفضحت الموضوع ف هذا ما يأثر على مهند بس يأثر على سمعت الكل واحتمال ابوج او امج تروح بيها
حاولت الملم الموضوع و جبرته يعقد عليج بأسرع وقت ...هل نذل بس اكلج شغله خليها ببالج ترى هو يحبج ومستقتل عليج بس ما اعرف شفسر تصرف وياج طيش غباء ما اعرف
المهم لا تترددين بيوم تلتجأين الي اذا ضاقت بيج الدنيا اني احميج واخليج بنص عيني انتي عزيزه عليه كلش
وبمثابة اخواتي " قصص وروايات عراقية كرار صلاح
رديت "تسلم والله ما انسى معروفك ووكفتك وخوفك عليه ابد الله يخليك فوك راسنه...بس اسألك سؤال مهند من وافق يتقدملي لان انت ضغطت عليه "
رد "لا هو ما وافق وبقى فتره ما يحاجيني وما احاجي...هواي لحيت عليه ابد ما قبل عاند فد نوب ...ومره عمتي ام احمد طلبتج لاحمد جدي فتح الموضوع كدام ابوج وعمامج... ومهند جان حاضر بيومها اول من عارض هو وما قبل ابوج تضايق منه لان يتحكم ويرفض بوجود تعارك ويا ورزله ... مهند ما سكت بعد طلبج من جدي بل اول لحد ما وافقتي انطوا علم لابوج انو قابله بل موضوع...عمي ما عارض لان مهما يكون هو ابن عمج واولى بيج ... وانتي هم موافقة ف بعد ماكو حجه يرفض"
دخلت مياسه للغرفه من شفتها رحت عليها شبكتها وابوس بيها من كل كلبي هل انسانه ما اجازيها ابد بطنها كبرانه وحليانه بس التعب واضح عليها
رضا من شفنا كعدنا طلع لحتى ناخذ راحتنه
"شجنتوا تسولفون ومن فتت سكتوا "
رديت "ماكو شي سألته شلون عرف بمهند هو الي اعتدى عليه و سولفلي ...مياسه جنتي تعرفين هو يعرف لو لا عليج النبي "
ردت "اي اعرف بس ما كلتلج لحتى ما تتأذين وتخافين ...بل اول جان شاك ويحلل الموضوع بس بعدين ...عرف من مهند بطريقته ...بوكتها حتى اني ضربني وتعاركنه لان سكتت عن الموضوع...
خفت لا يحجي وصرت اترجاه بس الحمد لله هو عاقل وتصرف بذكاء وما فضح الموضوع...الله سترج يا شام واله بس هو الي يعلم شحالج هسه ...شام احنا بعد سدينا للموضوع واختج نبهتها ما تجيب طاري ...
انتي هم انسي ولا تحجين بي حتى لو تزوجتي فهذا الموضوع مصيبه انتي ما الج اي ذنب بس لمن احد يعرف كل الذنب يصير عليج ...ديري بالج يكلبي وانسي والله يهنيج ويكتب الي بي الخير ...
وتذكري اذا ابوج او جدي او واحد من عمامي عرف صدكيني ما يسكتون وينهجم بيتنا لا تستهينين بل موضوع يطلع عليج اشكال الحجي وما تكدرين تسدين حلوك بنات العم ولا النسوان وتوصل للكرايب "
"لا ما اجيب سيرته بس جان عندي استفسار ...المهم شلون وضع النونو "
ردت "موتني غير يطلع اختنكت وضاك نفسي من الحمل ...صدك على طاري الحمل ما كو نونو منا منا .."
تلعثمت وتضايقت هذا اكثر شي يضوجني وينغص عليه رديت " ما مستعده لهل خطوه ...حياتي ابد مو صافيه ...بعدني ما متعوده او متماشية مع الوضع ...ما اريد طفل هسه حياتي مو ثابته ولا رست على بر..."
"ليش يا شام لا تخربين على روحج انسي كلشي وتعودي سويلج طفل تنسين والله وهو يحبج لا تصيرين ثوله "
"الله كريم ...خلينا نكعد يمهم "

"يله تعالي "
دخلنا بعدهم متجمعين صاروا شوي شوي تلتمون جدي خابر عليهم كلهم حتى نتجمع
صارت الكعده حلوه و حلويات و سوالف و تحشيش حلوه جمعت العائلة على حب الله وتبادل السوالف والاخبار صار هواي افتقد هل جمعه من ازوجت ولسه كلمن ملتهي بعمله ليوم ناس ورا ناس اجوي
١١ واحنا بعدنا مهند ما بين اخذت جهاز مياسه راسلته ما رد دخلت للصاله جيت اسأل عمتي عنه هو دخل
سلم على الكل وكعد اشرلي اتقرب لعنده رحت يمه كعدت "من شوكت انتي هنا ...اكلتي لو بعدج "
رديت "من ٨ ولسه هنا ... وانتضرك ما اجيت رحت وراهم "
رد "ماكله امي كالت لا تريكت ولا تغدت ... تعشيتي لو بعدج "
رديت "ما اشتهي اكلت حلويات و كرزات انسدت نفسي ...وانت اكلت لو بعدك ..وين جنت صدك "
رد "طلعت اني وجماعتي تغديت برى البيت "
رديت "شوكت يسافرون "
باوعلي مستغرب "منو قصدج "
باوعت عليه وعيوني يحركوني "تعرف منو ...ليش ما كلتلي ...لو كلشي تعزلون واخر من يعلم "
انصدم بجوابي تنهد "خلي الموضوع لبعدين نحجي بي واشرحلج كلشي ...واحجي الي يعجبج .."


يتبع ...

قصه جريئة لفتاة تتعرض للتحرش و.............



#بارت 16


............🥀🥀............................🥀🥀..........

من المؤكد ان النوم قد أضاع السبيل الي... يا اللهي قد سئمتُ تبريراته... يعدني بل حضور كل ليلة ويغيب... اخبروه كم أن الإنتضار في عتم الليل مهيب... حين تحاكي الوحدة أن احزان الماضي.. فتطلب قسط راحه لكن ما من مجيب

دخلت للبيت بارد مثل ما تعودت عليه .. برودته توجع قلبي
صرت افتر بل بيت وحزن يعصر قلبي عصر
حسيت نفسي جعت دخلت للمطبخ كل شوي افتح الثلاجة واضل صافنه ما اعرف شاريد ولا عجبني شي
بقيت ابحوش .. مليت ردت اطلع انتبهت اكو على المجمده اندومي .. طبختهم وكعدت اكل .. متتت من الحلويات والكرزات الي اكلتهم
كملت وغسلت الاماعين الي وصختهم .. صعدت لغرفتي اخذت ملابس فضفاضة سبحت وفرشت اسناني ودخلت للغرفه مشطت واتجهت للجربايه
احس راسي راح يطك من القهر والوجع .. بقيت اتكلب والتفكير اكل مخي .. اريد انام وانسى ماكو .. زاد الوجع
كمت ادور بل جرارات على علاج .. اخذت حبايه من مال مهند هما مو منوم مال حساسيه بس لان كال مره ينومن
وفعلا اخذوا مفعولهم بجسمي يسري ونمت ..
مرت الايام واني بين البيت وبين مهند هيج حياتي على الهامش مابيها اي شي مهم يذكر
اهلي عرفوا اني اعرف بموضوع سفرهم .. اني ما سويت اي رد فعل او حجيت سكتت وتصرفت طبيعي وما جبت طاري

اما البقيه من عرفوا .. كلهم زعلوا على بابا وصاروا يحجون عليه وبيبي بوقتها نامت مستشفى من القهر .. وجدي زعل على ابوي وابد ما يحجي ويا

بس عمامي بعد فتره ورجعت علاقت بابا بيهم بس بقوا مصرين على انو يتراجع عن قراره بس هو ابد ما سمع مهنم وسوه الي براسه

....................
البليل كملت شغلي وكلها دخلت بغرفها اني هم صعدت
دخلت مهند كان ملتهي يشتغل على الحاسبه علمود الماجستير
كعدت على الجربايه والصمت سيد الموقف لا اني تكلمت ولا هو ...
بعدها بدقايق حجيت "مهند اريد ارجع للدوام .." حجيت من دون سابق تفكير او تخطيط ما اعرف شلون طلعت مني الكلمه
هو باوعلي من حجت ومن كملت رجع بل حاسبه يشتغل وسكت ما رد اني هم افتهمت ان ما قابل على الموضوع
نمت على الجربايه غطيت نفسي وحتى راسي دفنته بل مخده الدمعه محصورا بعيني .. ضغطت على نفسي لحتى ما تنزل دمعتي اني وعدت نفسي وما اريد اكسر وعدي

اريد ارجع لشام القديمه المتنزنه الما تبجي على اي شي يصير وياها .. افتقد نفسي هواي
كنت مقهوره حيل واريد انفجر .. الكتمان والملل والحياة الروتينية احس كل هذا راح يقتلني
نفسيتي تعبت ماكو جديد ابد بس كاعده صرت ما اشعر بقيمة نفسي ابد احس نفسي , لا شيء ،
صار هل احساس يراودني على طول .. اتمنى اموت واخلص .. حتى اهلي راح يتركوني بعد بشنو التهي وشنو انتضر من الحياة
سمعت تنهيده طويييله ورد مهند "ترجعين .. بس بشرط .."
نسيت كل شي وكمت اله بسرعه تقربت يمه
"شنو الشرط .."
رد بابتسامه "تجيبين معدل عالي اذا قليل ما ادخلين كليه .. وخصوصي ماكو بل بيت تقرين .."
رديت بفرح وحماس "ماااشي وشكرررررا الك .."
رد بمكر "بس شكرا .. شسوي بيها ما توكل خبز عندي ابد .. يعني بس شكرا يابسه .."
افتهمت شيقصد تخصرت اله واهز برجلي
"وشتريد مثلاً هسه مو زين واشكرك وله اني هاي مو من عادتي .."
رد "شكد بخيله هسه هي بوسه .. صار من العرس ولسا اتمناها منج انتي .. يله بوسيني لا تخليها حسره بكلبي .."
هزيت ايدي ودرت وجهي
جاي ارجع لمكاني ... ما احس اله سحبني عليه بحيث وكعت وصرت بحضنه
رديت "اووووه مهند اتركني اروح اريد انام .."
رد "ما اتركج اله تبوسيني.. يله ترى اغير رأيي وتصير اكبر من البوسه فـ استري على روحج احسن .." حجه هيج وغمزلي ويباوع بوجهي كلش ارتبكت احس نفسي صخنت وخجلت
رديت "استغفر الله شيخلصني من هل ليله .. كافي مهند خل اولي انطمر نعسانه .."
رد "انتي اجيتيني برجليج تتوقعين اعوفج .. لا يا حبيبتي .."
رديت بعصبيه "كااافي هدني .."
رد "راح احسب منا لـ ٣ اذا ما تبوسيني .. اغير الشرط وانتي الخسرانه .. "
رديت "خوش عوفني واني اسويها .."
رد "تؤ تؤ تؤ ما حزرتي .. اني ما أأمن بوحده حياله مثلج .."
"استغفر الله شكد سخيف يا ربي .. عوفنيي جاي اكلك .."
ما رد
مهند "واحد .. ثنييييييين ....
بعده ما مكمل وبست خده
مهند :
"ههههههههههههههههههههههههههههههههههههههههههههههههههههههههههههه لا يا حبيبتي ما حزرتي .. اني مو اخوج الزغير لحتى تبوسيني بخدي اريد بغير مكان .."
رديت "اهووووووو بدينه بل سخافه وقلة الادب .. مهند عوفني احسن الك .. "
بعده ما راد عليه اجا اتصال اني بسرعه فلتت من عنده وهو اخذ التلفون ويحجي بعصبيه وتغيرت ملامحه

طلع بره الغرفه يكمل المكالمة.. واني رجعت لمكاني .. بقيت اضحك وفرحانه برجوعي للمدرسه
مهند تاخر هواي بره وبعد ما دخل ظل بالي يمه
طلعت وصرت ادور عليه حتى جوه نزلت وماكو بقيت افتر وبالي مشغول شنو صار يا ترى لحتى طلع
صعدت لفوك اخذت جهازي ونزلت لجوه اتصل عليه يرن وماكو رد انشغل بالي اكثر
صرت اروح وارجع من القلق .. بقيت كاعده واني انتضر لو اتصل عليه

كمت بهمه واتجهت لغرفة عمو دكيت الباب على كيف حتى ما اخرعهم .. ماكو محد سمعني .. تراجعت وكلت خاف يطلع ماكو شي واخوفهم على الفاضي

بقيت افتر وادز رسائل وماكو بل عادة اذا اخابر عليه بسرعه يرد خصوصا اذا اني الي اخابر هسه ماكو لـ ٣ الفجر واني اخابر عليه وهو ماكو انقلقت اكثر وصرت ادعي ربي ان ماكو شي وافتر بل بيت طلع عمو يصلي
ابو مهند "شمكعدج بابا روحي نامي .."
رديت بتلعثم "ها موو .. ايي هسه عمو .. جيت اشرب ماي .."
رد "روحي بابا .."
راح عمو يصلي بغرفته وبعد ما طلع
طلعت للطارمه فتحت باب الشارع باوعت بل حديقه السياره ماهي ماخذها

كمت افتر وافتر راحت رجليناتي من الفره
كعدت على الكاع والقلق ماكل كلبي

تعبت من السهر و اتصل وهو ماكو ايست من عنده بعد بقيت كاعده بل طرمه باوعت الساعه الموبايل صارت بل ٥
الجو كشف واني حتى الصلاة نسيتها وما صليت لحضات وانفتح الباب رفعت راسي شفت مهند دخل
جان باين عليه التعب وحالته حاله من شافني فتح عيونه "شام شمكعدج لسه "
كمت بعصبيه "وتسأل شمكعدني مو ؟؟ شوف تلفونك شكد خابرت وما ترد ... شنو معناها هااا خليتني بقلق وحتى ما تكول وين طلعت ...تروح بنص الليل وما تخبر احد ولا تتصل وتكول يابه اني بفلان مكان شنو معناها هااا ولله متتتت من القلق وين رحت مدكلي الخاطر ربك "
تنهد و تقدم عليه "على كيفج شامتي ...بس صارت شغله وياي ونسيت حتى تلفوني بل سياره راح عن بالي يابه اعذريني "
باس كصتي ودخل للبيت رحت ورا صعد للغرفه وهو هادىء وحزين لابعد الحدود
حجيت بهدوء وخوف "مهند شبيك خوفتني شصاير وياك ليش ما تحجي ووين جنت "
اخذ منشفه وشورت و يمشي ويحجي بهدوء "صديقي محمد سوه حادث من البارحه ولسه وهو حالته خطره ادعيله شام "
طلع وسد الباب اني نزلت توضيت وصليت و دعيت لمحمد صديقه من الاعدادي حسب ما سمعت من هنا

كملت ولفيت المصلايه و انتضرته يطلع فتح باب الحمام شافني واكفه انتضره
ابتسم بوجهي بحزن وكمل طريقه عاد اني عدلت الفراش لبين ما ينشف شعره
نشف ونام اني هم تقدمت انام هو اول ما خله راسه على المخده نام من التعب واني كذالك
تأخرنا بل نومه حسيت بل باب يندك
كمت فتحته والنعاس بعيوني
هنا "ولج كعدي مهند تأخر على الدوام شو اليوم متأخرين "
رديت "يكول ما اروح "
هنا "اممممم لازم سهرانين البارحه "وغمزت
"دروحي شكد منحرفة خل اكمل نومتي احسن ما اكابل الفاسقون "سديت الباب ورجعت نمت
لـ٢ واني نايمه كمت من فراشي و مهند ماموجود من شفته ماكو كمت لحيلي غسلت بسرعه ونزلت
"عمه وين مهند "
"طلع ب ١٢ تقريبًا للمستشفى خطيه محمد مسوي حادث سوده عليه ما يستاهل ...جا انتي لبارحه غير تكعدينا "
رديت "خفت لا عمو يصيرله شي و ما ردت افززكم... هو مهند شسوه بيه البارحه عيوني صارت توجعني من التعب وهو ما يرد لو مكعدتكم شالفايده وانتو حتى ما تعرفون وين راح ولا حتى يرد على تلفونه "
"ايي شيسوي يا امي غير اخيه بين الحياة والموت ...بحال موبايل انتي ما تعرفينهم شلون روح بروح مثل الاخوه مو اصدقاء "
"الله يشافي "
كمل اليوم وكل شوي اتصل اشوف شصار ويا الولد و اكثر شي خفت على مهند من شفته حزين لهل حد بقى ببالي اليوم كله مشغول فكري بي
صار اليل وهو ماكو عمو هم راح هو و مهيمن الضهر ورجعوا يكولون مهند هناك يبات
صعدت لغرفتي افتر من الضوجه والملل
خابرته
"الووو ها شام حبيبي "
"مهند ما تجي اليوم تبقى "
"اي عمري ليش رايده شي "
"ها لا بس اسأل ..شلون صار محمد "
"تعدى مرحلة الخطر بس لسا ما كاعد ..نامي يروحي لا تشغلين تفكيرج ولا تسهرين "
سديته و بقيت اتصفح الى ان نمت كعدت الصبح مهند موجود استغربت شوكت اجه شو محسيت بي لمن دخل ونام
غسلت وجهي باوعت الساعه ب ٨ الصبح

رحت لعمو صبحت عليه و كعدت اتريك وياهم عمو طلع للدوام. ومهند لسه ما كاعد

الساعه بل ١٠ لمحت مهند نزل رحت يمه
"صباح الخير "
"صباح النور عمري "

"تتريك "
"انتي تريكتي ؟"
"ايي اني وعمو من الصبح "
"لعد انتضر الغده "

انقهرت عليه حيل تغير من الحادث ولسا ما جنت اعرف بي هيج عزيز عنده قبل اربعه وعشرين ساعه لازك بيه ويضوجني لو يسوي حركات هسه ابد ولا مهتم

حاولت هواي وايا بس ابد ما يستجاب صار من المستشفى للبيت ويسهر ويا الولد

**

بهذي الفترة محمد تشافي من الحادث و بداء الدوام مهند قدم السنه و داوم
واني كذالك بلشت بل دوام و القرائه المبكرة كان مهيمن وهنا يدرسوني اغلب الدروس كانت هنا قويه بل رياضيات فبذلت كل جهودها بتدريسي
والدروس الباقيات اعتمدت على مهيمن الي يدرس صيدلية هذي ثاني سنه اله بس خطيه كان يحاول قدر المستطاع يوفر وقت لحتى يدرسني
و غالبا ما استعين بمهند ببعض المواضيع مثل القواعد والانكليزي
كان مشغول كذالك بل ماجستير من صدك تعبت من اول ايام السادس تعب ارهاق تفكير مستمر تعذيب نفسي
ضغط قوي و عمتي خطيه ابتلت بل بيت من بداء الدوام ولسا ابد ما عارضت هي او اي شخص برجوعي للمدرسه بل عكس شفتهم يشجعوني و يقوون من عزيمتي
يمكن بيناتهم حسيت نفسي فد شي على الاهتمام و التقدير كلها والحلو اجواء الدراسه بيناتهم كلها تتجمع بل صاله وواحد يساعد الاخ والفواصل الحلوه ايضا
مهند مو هواي متواجد بيناتنا بس ما يفوت يوم اذا ما ينزل شوي ويرجع للغرفه يدرس ومرات ينزل الحاسبة يدرس يمنه هم
رغم انشغاله بدراسته بس ما يتركني ابد يشجعني دائما ويساندني اذا شافني مقهوره وفاقدة الامل بسبب صعوبة المواد
اما عن اهلي البنات السنه ما داوموا المفروض نور السنه ثالث بس علمود السفر تركت
ابوي من فاتح جدي وعمامي بل موضوع كلها عارضت وبيبي تخربطت ونقلوها للمستشفى اما جدو ف زعل على بابا وابد ما يحجي ويا
ولليوم وهما ما يتحاجون بس عمامي فترة ورجعوا تصالحوا بيناتهم بس رغم هذا كله وهما يقنعون بي يتراجع بس هو مصر على الرحيل
اني ابد ما صادفتهم بعد بس مرات تجي نور او ماما لهنا بس ما عندي وقت بسبب الدراسه
قرب موعد امتحانات نصف السنه و كلها مشغوله عني هم امتحانات هما بس ابد ما تركوني كل ما يصير وقت يدرسوني
مرات اروح لرضا هم دارس ومتعلم لان هنا و مهيمن امتحانات وما يلحكون
على طول الامتحانات اني للصبح كاعده بس انام بل ٥ واكعد بل ٦ ونص اراجع واروح التعب ما انسى ابد شصار بيه انسليت بوكتها ضعفت حيل
والتعب بان على ملامحي بس كل الامتحانات احس نفسي ما مجاوبة و ارجع ميته قهر
تعبت حيل بأخر امتحان ذبيت كل حيلي عليه كان فيزياء نفس كل ايام الامتحان سهرانه اراجع واقرا و مهند هم مرات يسهر بس ما يطول هواي
بيومها امتحنت و رجعت طايرة من الفرحه بحلول العطله رجعت سبحت و نمت للــ ٦ العصر واني نايمه

كعدت على مهند و هو يكعدني و يبوس بيه ويكول "لج شامتي حبيبتي كعدي صار شكد ما كاعد وياج ومسولف ومضوجج اشتاقيتلج كلش افيييييييييش يا ريحتج ...لج كومي اكلي ضاله بس جلد وعظم كومي حبيبتي "
كمت لحيلي ما رديت عليه غسلت وجهي ونزلت جوه كلها تباركلي لان خلصت امتحان و متأملين خير بيه
لكن اني الوحيده الي خايفه و ما مرتاحه من ناحية النتائج نزل مهند "يابه اليوم خل اطلعكم ما دام خلصت الامتحانات "
هنا ما قبلت لان عدها امتحانين بعد اني كلتلهم اذا ما تروح هنا ما اروح عمو يلح لحتى نطلع ونغير جو بس اني ومهند وعلى الجايات نطلع كلنا
عاد مهند كال كومي خلينا نطلع نزور كربلاء ونبات هناك كلها ايدت الموضوع
اني كيفت بوقتها اخذت ملابس وسبحت و مهند سبح بعدي و طلعنا الساعه ٧ المغرب
جانت ازدحامات منا لحد ما وصلنا طاح حضي تعب من الطريق والجوع وكل شوي ينزل يشتري شي بس ما اكل لعبانه نفسي من الطريق
وصلنا قريب على الامام دخلنا مطعم نعشينا و كلتله بعد ما بيه اوكف خليها على باجر نزور ونرجع احجزلنا غرفه اريد انام
هو خطيه بسرعه اخذني لاقرب فندق على الامام بحيث صاير الشباك مقابيل الكبه مال امام العباس (عليه السلام )
اول ما دخلت للغرفه كبل نمت هو راح يزور وما اعرف شوكت رجع
كعدت من الفجر شبعانه نوم و مرتاحه غسلت و صليت و بقيت اباوع من الشباك
٨ الصبح واني افتر بل غرفه مليت وجعت
"مهند كووووم يلة جايبني هنا حتى تنام وتخليني وحدي ..يلة متتت جوع "

يتمغط ويحاول يكوم بس نعسان خطيه عفته وتمددت نمت لفتره وكعدت لكيته سابح و يعدل بلبسه اني هم اخذت ملابس ودخلت اسبح و طلعنا اول ما طلعنا تريكنا و اتجهنا للامام

بقيت هناك لحد ٣ واني كل شوي ادخل ازور ولو متت من المدافع طلعت روحي بس جانت الزيارة كلش حلو ما نروح هواي بل عادة ف اريد تطلع من خشمي
طلعت لكيت مهند بل مكان الي اتفقنا نلتقي بي
صارت الضهر وحاره رحنا بضل وكعدنا هو يقرأ قران واني استمعله
صفت وحجيت "اكلك انت اذا تقرا قران شلون هيج سويت "
تصدق ويباوعلي جانت نضراته كلها ندم "تدرين من سويت هيج جان ببالي انتقم منج على كلامج وياي واجبرج بيه..توقعت من نزوج اكدر ااذيج بس كل ما اشوف دموعج لو حركة كلبج ..اتندم على كلشي صار بذيج الليلة..والي صار ما زادج اله كره وحقد عليه "

رديت بسرعه "ما اكرهك ..بس الي سويته بيه ما أغفره ولا انسى ..وبنفس الوقت ما اتقبلك لان مجبوره بيك ولا احبك مثل حب المراة للزوج ..يجوز قبل لا نتزوج اكرهك واحجي عليك اي بس هسه ما انكر تعاملك ووكفتك وياي بخصوص المدرسه وتشجيعك سواء انت او اهلك يزول كرهي الك ..تعاملي وياك نفور وهل شي مو بيدي "
تنهد بصوت "اعرف مو بيدج ونافرة مني لهذا ما احب اجبرج على شي ولا اتقربلك لان تنفرين بزيادة صرت اكره نفسي بسبب فعلتي ..اعترف ما جنت متندم هيج قبل بس هسه متندم على فعلتي بيج و استاهل جافج و نفورج مني ..اني استحق اكثر من هيج "
قاطعته "شوكت نرجع "ما جنت اريد يكمل على الرغم اني الي فتحت الموضوع و اصلا الوقت غير مناسب لهذا الكلام
تنهد "خلينا نتعشى وبعدين نفكر "
كمت ويا اخذني لغير مطعم اكلنا كباب و طلعنا ساعه ٥ العصر
"اليوم خلينا نبقى هم ما ضل وقت شوكت نوصل "
"اييي لعد وين نروح هسه "
"ههه يعني وين نروح تردين كولي "
"اريد اشوف السوك ونوب نرجع للامام نكعد هناك "
اخذني اشتريت اشياء الي وللبنات اخواتي و مياسه و هنا ومهند تكفل يجيب لعمامي حلويات وكذا
اخذت ثوب قصير للنوم لان ما عندي اختاريت وردي
ومهند اخذلي قطعتين واحد ازرق وواحد احمر بس مو نفس الموديل يختلفن كلش عجبني ذوقه بل ملابس
بقينا نفتر على المحلات و اخذنا هواي غراض طاح حضي من الفره
عاد هو كال امشي نروح للامام
"والغراض وين نخليهم "
يتبع ..........

حبي يعني حسب حالتج ..يمكن تتحسن نفسيتج اذا تغيرين المكان وتكسرين الروتين لأن تغيير المكان يغير نفسية الانسان 🙃✨
اخذي أي شخص ترتاحيله من اب او ام او اخت او اخ او بنات عم وخال..الخ وروحي لأي مكان يعجبج من متنزه لو مطعم لو مول ونوعي كل يوم ف رح تشوفين فرق
وحاولي لاتكعدين وحدج والهوايات المحببة الج سويها واستغلي كل دقيقة من يومج
واي شي يعكر مزاجج ابتعدي عنه
واذا اكتئاب قوي فكون تشوفين دكتور

#ملوكه

عيوني تلكيهن بكوكل أكتبي أيات قصيرة للقرأن مع الحكمه او المعاني فكلشي يطلع☺️🌸

#ملوكه

حبي اهواي بايوات ناشرة بالقناة بس اللي ناشرتهن مال انستا يعني بيهن زخارف
فعادي تكدرين تشيلين الزخرفة و تنسخين بس الكتابة اللي تعجبج فهسه اوجهن☺️🌸

#ملوكه

مشاهدة "How to make balloon arch without stand?" على YouTube
https://youtu.be/FWqYejZWzdA

مشاهدة "قوس البالونات بدون استاند" على YouTube
https://youtu.be/8PxqXdKxgFQ