عالم البنات🙈🎀

رديت "ايي جدو اعرف واني ما كلت شي الي تردوا يصير "
جدو. "لعد ارجعي اكلي ما اكلتي شي "
رديت "بس .......
بابا "مو كلج اكعدي ليش تعاندين "
امي "ولج كعدي مو جدج وابوج يحجي شنو هل عناد الي شايلته كعددددي"
كامت تخزر بيه كعدت واكل على اعصابي اريد ابجي بيبي تباوع عليه ومحروك كلبها اكثر من امي عليه
بيبي "ياااا شبيج جده لا تقهرين روحج حبيبه .. وانتم عوفوها على راحتها جا هو كلشي غصبا ما يصير هيج اني شام احبنها الي يحاجيها ما يلوم اله نفسه موتوها من ذاك اليوم لهل يوم .. وانتي عود امها شمالج خيبه ما بيج حنيه عليها وما ادافعين عليها شو اطبكين وي العالم عليها .. اله تهججوها.. هي شكد ضاله عدكم هنا بس كم شهر وتروح .. تخلوها تطلع وكلبها شايل عليكم ليييش "

بيبي تحجي وتفرفح وابوي يهدي بيها وجدو ساكت تالي كلبت على جدو وتحجي عليه
رحت بست ايدها وكلتلها ماكو شي وما ضجت غير اهلي لا تقهرين روحج موزين عليج
عاد شوي سكتت
مياسه ونور يشيلون بل اكل وهي مخليتني بحضنها ما تقبل اكوم و تلعب بشعري وتسولف
وجدو وبابا ملتهين بل اخبار بالهم مو يمنا
بيبي من النوع حساسه وحنينه حيل اي شي يبجيها يا هي تتزوج من البنات تشبع بجي بنات عمي كلهن ازوجن تبجي اكثر من اهلهن عليهن على الرغم مو نفس البيت بس هي تتاثر هل تريد هي وجدو كلنا ناخذ من ولد عمنا حتى ما نبتعد وتنكطع العلاقه تريدها تقوى اكثر
بقت تسولفلي وتنصحني كله نصايحها قصص بيها عبره جانت حنينه وياي حيل اشم بعطرها مال عجايز اوليه
فوطتها ريحتها بخور وملابسها كذالك جانت ما تلبسهم اذا ما تبخرهم لو ريحت المسك الي بيها اوووف شكد طيبه ريحت العجايز وسبحتها بركبتها وتسبح شوكت ما تجيها
ماما كاعده وتسولف هي ومياسه واني يم بيبي ونور كاعده هم يمنا وكل شوي تحجي من يمها
عاد بيبي عاطت بيها وخلتها تكوم تكللها اريد احجي وياها على راحتي
بس كامت نور صارت تحجيلي على الزواج وتنصحني وتكلي كون تتلكي بابتسامه وما اتعبي من يجي تعبان اذا شي مضايقج تاجلي وهواي حجي
واني بس اي واي
صارت ساعه تسعه ونص وهي بعدهي تنصح بيه
شوي وسمعت صوت الباب ينفتح دخلت هنا وبعدها عمو وعمتي ومهند بل اخير بل اول توقعت ما جاي بس من شفته انصدمت
كمت من حضن بيبي بسرعه وسلمت عليهم كلهم بس من بعيد جاي اصعد صاح مهند
"وين شو كل ما اجي تنهزمين كعدي خل اشوفج من خطنا ولهسه كل ما ادز عليج ما تجين "
امي تاشرلي ابقى وعمتي ام مهند حجت "هسه بلله هو رجلج ومستحيه منه اني وعمج هم مستحيه لا نشوفج لا تكعدين يمنه صدك جذب "
كعدت يم بيبي اجا مهند عود بحجة بيبي وهم كعد يمها ويشاقي بيها
انوب دار عليه "شنو بيبي جنتي تسولفين وي مرتي "
"اي جده .. انصحها واوصيها بيك وانت هم دير بالك عليها ترى عزيزه عندي .. بس تحاجيها اخلي جدك يطيح حضك وازعل عليك .. دير بالك عليها هاي بنت عمك .. خلوا الاحترام بيناتكم اهم شي بعلاقتكم و وووو هواي بقت تنصح
ومهند كله من عيوني اخليها بعيوني كل ما يكول هيج اباوعله صفح هو من يشوفني هيج يريد يكوم يكتلني
بيبي تحجي قاطعها عمو بسؤاله
"بابا شام كالت هنا ما تردين ترحين باجر تختارون الذهب .. اذا ما تكدرين نأجلها على غير يوم "
رد بابا "لا تروح بكيفها قابل "
رد عمو " ايي بكيفها غير هي العروس وتدلل علينا .. شتريد يجرالها.. ها بابا شكلتي شوكت ترحون معليج بابوج.. بعد انتي بنت الخامسه .."

رديت "بكيفكم عمو ما عندي شي "
رد "شنو بكيفنا مو اليوم كلتي ما اروح .. حددي يوم ترحون بي "

"باجر .."
كلها سكتت بس اني صرت دم من العصبيه والقهر انجبرت اقبل يمكن لو معترضه بابا يطيح حضي وخصوصا هل فتره كلش متغير وياي مدري شبي ف ماكو كدامي غير اقبل

مهند يباوعلي بانتصار ويبتسم ورافع حاجبه درت وجهي عنه وما باوعتله بعد
اجت مياسه جايبه العصير
صاح عليه بابا اخذه منها لان ما تكدر رحت عليها
وصرت اوزعه عليهم وصلت مهند دنكت اخلي يمه اخذه وصار يباوع عليه ويخنزر وياشر ما فهمت
تجاهلته ورحت انطي لرضا هم كاعد
شو هذا كام وجر الصينيه من ايدي بحيث راد ينكلب
اني رجعت يم بيبي كعدت وسكتت هو وزع للبقيه ورجع كعد بس هل مره بصفي مساع جانت بيبي بيناتنا
قرب حلكه يم اذني وكرصني من خصري بقوه جيت ابجي بس صبرت نفسي
"مره ثانيه ما ادنكين كدام احد طايحة الحظ انتبهي لنفسج صدرج كله طالع ونوب لابسه تراك ادب سز ما تستحين هيج تفترين يم رضا حيوانه "
عيوني تجمعت بيهم العبره بس كبتت دموعي لان كلها صارت تباوع
عمو يباوع ويبتسم عباله يتغزل بيه يتوقع يحبني وكذا وبابا باله يم الاخبار
بس عمو وهنا سويه يتنادسون ويضحكون .. اني من اريد ابجي لو اختنك اصير حمره ف هما عبالهم من الخجل يمكن

625 views”“S҉E҉N҉O҉R҉I҉T҉A҉""✿❧, 21:01