اخلي حتى بالاحلام ماتطولن خيالهم
والي تعلى كلمتو على هالكلام ينال جزاتو ويزيد عليها

سكتنا كلنه واباوع لام جراح تبجي وحاطه ايدهه على حلكهه رادت تكوم صاح بيهه وكعدهه والشيخه ماكالت غير ..
- هو العرك دساس عيناً ابوك ساعه الي يهيج يهيج

ما رد عليها بس ضل يفر بسبحته ويباوع للباب والولد نزلو واحد واحد مبدلين وماخذين بايدهم علاكه ملابس وكفو يباوعولنه وهو كاللهم ..
- ما سألتوني ايمتى ترجعون ؟

سكتو ودنكو راسهم وهو كللهم ..
- ايمتى مايفهم حسين غلطو ويفهمكم ساعتها ترجعون
تمشون تكعدون حدرو وترجعون تحسبون افعالكم وكلمن يحاسب نفسو ويدحك بشنو مكصر وما منكم احد يفكر ما مسوي شي ومالي دخل كلكم بنفس الغلط واكعين
تطلعون من هين ما مرضي عليكم لحين ما تفهمون الغلط وييييين وتصلحوه يلااا ينالكم رضاي ...
توكلو يلا

طلعو بدون كلام وضلينه احنه نتصفن بوجهه
جان يطك بسبحته وكال ..
- تين امشي نروح لبيتنه انا اناملي ساعه وانتي تلمين الغرض الي يعوزك وتكعدين هين بينا بعد .. دحكي اي غرفه من غرف الولد مناسبه الك ورتبيها

رحت وياه واني ساكته من دخلنه بيتنه
كلتله ..
- خالد امهم خطيه على الاقل برد كلبهه بكلمتين عنهم
- انتي كلبك بارد على ولدك ؟
- لا بس اهون شويه
- عجل انتي صبريها بمثل ماصبرتي نفسك
- ان شاء الله .. ليش تريدني اضل هناك مو هذا بيتي ومرتاحه بي
- البيتين فرغن وانا اريدك حدر عيني تضلين ماريد فكري يضل عندك
- زين شلون ياغرفه اكعد تناسبنا
- غرفه رماح كبيره رتبيها النه
- خاف يرجع هالايام
- مايرجع هين ماعندي ولد بعد يعتب الباب
وزين ذكرتيني بسالفتو
- شنو شتريد تسوي ؟

فتح تلفونه واتصل على عباس وكله ...
- اسمع يول هذا اخيك رماح ايمتى ماتسمعو يريد يرجع هين تحكيلو ابوي مايرحب بيك بالبيت وشلون مايريد يدبر حالو خله يدبرو
اييييه يضل كاعد حدركم حاله من حالكم
يريد يرجع لبغداد يريد يضل هين بالشارع وين مايولي خله يولي ماهمني انا المهم مادحكو هين مفهوووم

سد الخط وتمدد وكالي ..
- كعديني بالاربعه حتى اروح اخذ تحليل
- ماشي عيني

ضليت افكر بسالفه هالولد شنو الي غلطو بي كلهم ؟ وليش اليوم بالذات مو هذيج الشهور ؟

اخذت فرشات وملابسي وغراضي وانتقلت بيت الشيخه بغرفه رماح رتبت غراضي جانت غرفته هي غرفتي قبل هنا وجربايته ام نفرين غيرت فرشتهه ونظفته ونزلت كعدت ويه الشيخه ... تسألني اذا اعرف شي من الشيخ واحلفلهه ماعرف ..

كعدت احجي ويه ام جراح واصبرهه
اكوللها ..
- الشيخ اكيد مايكره ولده ولا يريد اذيتنه هو بس عنده فد غايه باله خلي نصبر لامره ونشوف تاليهه لانصعبهه عليه ويضل حاير بينه

جانت بس تهز براسها بدون مترد شي
على العشه رجع الشيخ ومن كملنه اكل وجاي كالي اروح لغرفه الشيخه .. رحت واجه ورايه طلع ورقه التحليل وكال ..
- تين يولو هالتحليل اخذتو لدكتور وحكالي نسبه الكرياتين عندك مرتفعه وهو السبب بكل هالاعراض ومن حكيتلو على كليتك طلب فحص ثاني الها ولزوم بكرا نمشي حتى تسوين هالفحص
- ضروري يعني
-اييه ضروري بكليتك تعرفين مانتهاون
- ماشي نروح

ثاني يوم رحنه للدكتور سويت سونار وتحاليل جديده وطلع ارتفاع باليوريا الكيرياتين
رجعت هالايام انتظم بالعلاج لان من فتره طويله تركته ...

عدا اسبوع على طلعه الولد والبيت كئيب
كل وحده منا كاعده وحاطه ايدهه على خدهه وتتصفن مالنه نفس بشي والشيخ على كد الاكل يجي وساكت ميحجي شي
غاليه تخبلت من سمعت كل اخوتهه بالشارع صفو وضلت تتوسل بالشيخ يرجعهم وهو ميقبل وكل مايسكتهه ترجع ثاني يوم تخابر وتعيد نفس الحجي ...

عزمتهه كلت عيب طولت عزيمتنا ومبين سالفتهم متنفض هالايام ردتهه تجي مقبلت
كالت حالي حال اخوتي مااكعد بيت مابي صوت اخوتي ولا اعتب بابه ..

حسين من اخابره واسأله على وضعهم يكولي عايشين الحمدلله .. مأجرين مشتمل صاير طابق ثاني وكاعدين وكلهم يشتغلون ويلمون فلوس الايجار والعيشه ..
يكول كل ليله نلتم ونضل صافنين نفكر ونحاسب نفسنا شنو الشي الي غضب ابويه هيج منا ومانعرف
وجراح عايفهم ورايح للرمادي ماقبل يكول شعنده رايح وضلو همه وحدهم ..

دخلنه شهر العاشر ودوام الولد راح يبدا
حاولنه ويه الشيخ بس يوضحلهم شي ينطيهم عقاب ثاني راح يضلون بره عايشين سنين اذا يعوفهم على عمى عينهم هيج وهو مقبل
كال كل اعمى يصنع لنفسه طريقه حتى يعيش
خلي يدبرون نفسهم بنفسهم ..

حسين لازم يروح لبغداد يداوم اقسام داخليه
وضل حاير شلون يروح ويعوف بقيه اخوته هنا ! ..
رماح اصلاً مارجع ولا وصل من سمع هالحجي من الشيخ عليه ..

نص شهر العاشر حسين كال ..
- يمه راح نطلع كلنه ويه جراح للرمادي
مدبر شغل هناك ويريدنه نعاونه
-شكد تضلون هناك
- مادري بعد يم الله بس احنه من الصبح نقفل البيت ونطلع
-الله يحفظكم

راحو من الصبح للرمادي وعرفت بعدين ان
هناك اكو مشروع بناء وماخذهم جراح عماله
خمستهم ...

ضلو ٣ اسابيع ورجعو كلهم لحديثه وجراح ماخلاهم يرجعون للدوام ياخذهم من شغل لشغل وحسين يكول ..
مانصرف شي احنه بس العشه جراح يدبره
وكل يوميتنه عنده نلمهه ..
جراح صار مايكعد وياهم يتنقل بين منطقه ومنطقه وميكول شنو الي باله بس قبل ميطلع يكللهم رايح لهالمكان ويروح ..
الولد ضلو من شغله لشغله يتنقلون ومايصرفون بس على كد المسواك الباقي يجمعوه لجراح ...

ودخلنه شهر ١٢ اول اسبوع بي يوم جمعه بالليل دك تلفون الشيخ .. عرفناه عباس لان بس هو من الولد يجاوب على اتصاله
سده منه وكال ...
- الولد راح يصلو هين لا اريد بكي ولا صوت يطلع ولا وحده تكف وتسلم عليهم

فرحنه وصرنا ندعي ربي يعديها على خير هالمره ...

من وصلو وسمعنه صوتهم صرنا نريد نطير ونحضهم واحد واحد وحتى الشيخه تدمع عينها من شافتهم ... سلمو وردينا السلام بس على كعدتنا ...

اباوعلهم شلون مبين التعب بوجوهم
ولحاياهم طولانه شعرهم ثخين وممرتب مثل قبل ..يباوعون بالوجوه ونظرتهم تكسر الخاطر ...

الشيخ اشرلهم يضلون واكفين بمكانهم يم الباب وكال ..
- جراح احدر اكعد هين وانتم ضلو بمكانكم واكفين لان هي كلمتين ان عرفتوها تدخلون ماعرفتوها تديرون ظهركم وتمشون بلا نقاش

جان رماح وياهم وضلو ستتهم واكفين يم الباب وبس جراح كعد على يمين الشيخ
كال ..
- يابه طلبك كلو تنفذ وان امرت بغيرو هم يتنفذ مانريد غير رضاك
- شلون تنفذ اشرحلي شسويت من فعل يستاهل رضاي !
- اول شي يابه انا راح احكيلك على شغلي الي لنفسي صنعتو بعيد عن الي اريد بيه رضاك
- اسمعك
- مثل ماتعرف يابه انا يوم مشيت من هين اخر مره مابجيبي غير فلسين يكضن يومي
وانته طلبت مني اسوي شي اكبر من هذاك
بالاول انا ظنيتك تريد اعيل هالايتام والفقرا
بعدين فكرت ان هالمطلب غايتو شنو؟
وين ابوي ناوي يصل وياي بهالشي؟
فكرتلها كثير وتالي فهمت ..
انا المستفاد بكل هذا التعب فهمت انك تريد تعلي شأني بين اهل ديرتي بعمل خير انذكر بي طول العمر وهين راح يرافك اسم جراح صفه خيره تنذكر لو طرى اسمي ..
وهين لكيت الفكره الي توصلني لهالشي
درجت قائمه باسماء اشخاص معروفين بكبر شغلهم بكل الانبار ومشيتلهم واحد واحد التكيت بيهم بلسان وكلام طيب كسبت نصهم
سجلت كل واحد ومطلوب شغله من عمال ومن مواد او خدمات صعب يحصلها
هين قسمت شغلي لاثنين ..
الاول اجمع كل هالمحتاجين لاشغال من اهالي ديرتي والثاني اجمع كل الي يطلب شغيل عندو ونوع الخدمه المحتاجها

سويت صفحه بالفيس وشاركتها ويه جماعتي وجماعتي شاركوها ويه غيرهم وبدو ولد ديرتنا وغيرهم بعد من اهالي حديثه يراسلوني وتواصلت وياهم و ويه الجماعه هذولاك وكدرت اشغل ٣٧ ولد من اهالي الشاميه و٢٢ من الحقلانيه والبقيه الشغل الي ردتهم بي ما رضو عليه

- وعفتهم ؟

- ههه لاا شغلتهم هين بترميم محل طابقين
هالمحل انا اشتريتو من ولد بالتقسيط
وناوي افتحو الهم مطعم صغير للاكلات السريعه اخليه شبابي يمشي شغلو هالوكت

- ايييه وبعد

- للحين انا ماوكفت بشغلي بس هذا الي انجزتو لليوم وبعون الله اكدر ارتب هالمطعم و يضل لهالولد مصدر رزق وكل الي يطلع منو ينصرف على اهل ديرتي وهذا عهد علي امام الله اني بعد ماارجع حك اخوتي الي جمعتو منهم هالايام ، كل الي اكسبو من هالشغل ينصرف لتدبير حال بني ادم
وانا الله رازقني بالحيل والعقل وادبر امر عيشتي
يابه انا اشكرك انته وعيتني على نفسي يشهد الله بكل ما اتعب واسعى لشي شغله بهالشهور اترحملك بيها .. دحكتها نعمه من الله ودكت بابي هين انا اطلب رضاك حتى اتوفق بباقي دربي انا بدون رضاك يابه اضل متعثر

ابتسم الشيخ ورفع ايده اشرله يجيه وهو كبل راح حضنه ويبوس بي من جتفه وراسه ويدنك على ايده يبوسهه واحنه بس دموع
فرحانين ومتأثرين بموقفه ..

رجع كعد يمه والشيخ كال ..
- دحكت يوم الي فهمت الهدف وين عرفت ترسملك طريق وسعيت ووصلت
جراح يابه زمان كانو يقولو ..
الي يلبس التاج لزوم يحمل وزنو
احنه الرجال تاجنه عكلنا لزوم نعرف نثبت ونكف وكفه اسود شامخه ونتحمل كل الي يكع على هالعكال من بلاوي ومطالب
هين انا ردتك تتعلم الصبر وتتحمل الضياع بس بثقه .. وردتك تتعلم ان الانسان مايصنعوه اهلو هو يصنع نفسو
انا لو بعد كبل كم سنه مسلمك المشيخه
واحكيلك امشي ياجراح اكعد بمكاني وشيل امر هالديره على كتافك ماكنت راح تكدر تدبرها اسبوع واحد ماتتحمل ولو صبرت فتصبر بجزع مو برحابه صدر
لانك ماتعرف قيمه الي فوك راسك موضوع
وبعدك للحين ماتعرفو ولا واحد منكم يعرفو الا ساعه ما يكضبو ويدحك ثكل وزنو بدنياه واخرتو

ويوم الي سألتك على ديرتنا انا ماسألتها عبث
ردتك تدحك نفسك وشكثر انته جاهل بامر ديرتك وشكثر انته بعيد عن مسؤوليه ساعه الساعه تنحط بيدك وانته ماتعرف شبرين هالديره وشكثر ومن فيها سعيد ومن تعيس

مااظن يخفى على احد هين ان انا عيني عليك انته الشيخ من بعدي لان انا من صغرك ادحك بيك الي ماتعرفو انته عن نفسك ولو كنت فشلت بفهمي اليوم ارجعك بره واذيك اكثر واخليك تفهم ولو تطلب مني الامر ابعدك عن عيني عشر سنين بس مااسلمك هالمكان الا وانته كاشف قدره نفسك لنفسك ..

دنك جراح على ايد ابوه وبوسهه وتشكر منه
وكال ...
- يابه انا كل هذا افضل رضاك عليه ان منحتني رضاك تسعدني وترفعني بعين نفسي
وان مارضيت فاضل محرمو على نفسي هالمكان
- رضيت يابه رضيت عليك دام انك وصلت للي اريدك تفهمو رضيت
- الحمدلله الف الحمدلله

رفع راسه الشيخ وباوع للولد الي بعدهم على وكفتهم .. ضل يفر بسبحته وكال ..
- حسين
- نعم يابه
- فهمت غلطك وين ؟
- يابه انا عصرت مخي على هالغلط وماعرفتو كل ماافكر هذا هو غلطي ادحكو لا
رايد منك بس تحكيلي اي يوم انا غلطتو بس دليني هالمره يابه
- رماح يالدكتور عرفت انته ليش مامرحب بيك هين ؟
- والله يابه انا ماسويت شي يغضبك وظنيت طردي على واهس اخوتي يعني
- هاااا وانتو يا حر ويااسر فهمتو ؟
- يابه احنه عمرنا مافتحنه حلكنه بكلمه تغضبك وكل افعالنه انته تدري بيها مايوم تعدينا للي مايرضيك
- هااا زين زين وانته ياعباس ؟
- يابه ان كان على كلامي هذاك اليوم فانا حكيت الحك ومااعتبرو غلط وان حاسبتني عليه فهذا مو حك
- صكر اذكر قلتلي انا من راي اخوي ! الحين شنو صار رايك ؟
- مادري يابه انا متحير بامري كدامك لا ان سكتت ترضى ولا ان حكيت ترضى
- يعني ؟
- يعني كيفك يابه انا بكل الي تطلبو حاضر
- عجل مدامكم للحين ثولان تطلعون بره ومادحك خيال واحدكم يعدي حدري

الولد كلهم ضلو ينافخون وجراح رأساً لزم ايد الشيخ وكال ..
- لاا يابه اترجاك لا
اخوتي طايعين الك والله وتعبو هالشهور كلها ماضاكو طعم الراحه رايدين رضاك ويدورون عليه بس محد منا فهم مقصدك وين
- عجل وش الفايده منهم ان ماعندهم عكل يفهمهم
- يابه استحلفك بالله لا تطردهم بعد وحك عينك متبهذلين وسنه دراستهم راح تفوتهم
عليك بنور محمد يابه احلفك بنور نبينا
تفاهم وياهم اسمع منهم وفهمهم دليهم ولو على راس خيط الموضوع لا تردني يابه هاي اول مره انا اتوسلك واطلبك بشي

عدل كعدته الشيخ وكال للولد ..
- مثل ماشفع يوسف بيوم لاخوته
انتم شفعلكم جراح وهو عندي
بمعزه يوسف عند يعقوب
اكعدو اكعدو

كعدو الولد وكال ..
- تين مي لولدنا

كمت بسرعه جبتلهم المي وقدمتلهم ورجعت كعدت جان يكول ..
- انتم السته غلطتو نفس الغلط وظنكم هو ماكو غلط .. غلطكم هو سكتو عن الظلم ..

انا يوم ما طردت جراح على سؤالين صغار
مادحكت الخير منكم وكف بوجهي وحاججني وحكالي ليش يابه هذا اخوي ليش تطردو !
تريد الجواب انا اجاوب بدل عنو! تريد الشغل انا امشي اشتغل حدرو انا اعينو ونرضيك
احد منكم نطق هالشي ؟؟؟!!!
الكل خنست وسكتت ...
انطيتكم مجال يومين وثلاث وما منكم واحد سوه شي .. تالي حسين كدام عينه يدحكني
ارفض الكلام ويه اخوه واقسي عليه وياخذ تلفون ويدير ظهرو ويمشي ولا كأن السالفه تخص اخوه وابن ابوه ...
سكت عن حك اخوه وتخلى عنو بشدتو
والي ما يعرف حك الاخوه ماله مكان بينا
انا مااربي قليل نخوه انا رباتي للرجال الي ماتفوتهم صفه حسنه الا مايكون الهم منها نصيب ..

ويوم الي مشى حسين انعاد نفس الغلط من البقيه .. مادحكت رماح الي اكبر من حسين والي هو كبير البيت بعد جراح مادحكتو رفع حسو واعترض على طرد اخوه
مادحكت اقرانو عباس وصكر حزت بكلوبهم مشيه اخوهم وهو يصيح بلا سبب انطردت
وامهلتكم اربع شهور ... اربع شهور انتو
ما رف كلبكم على خويكم ... مادحكت منكم واحد الي اخذ لاخوه فراش او هدم يلبسو
مادحكت الي ذكر اخوه على الاكل وتعلكم ريكو لان خويه ينام وياكل بالشارع وهو هين مترف العيش !
مابيوم سمعت منكم واحد بس واحد يفكر ياخذ لاخوتو طبخه بيت ويمشي يدحكو شمحتاج
تعرفون خويكم يكد ويتعب ويشتغل من الصبح ويوفر بمصرفو وما اخذتو علاكه فواكه وانتو تمشون ادحكوه ولا علبه حلى
وانتم تصرفون الالاف كل يوم على نفسكم
تلبسون وتطلعون وتاكلون وناسين اثنين من خوانكم الي بينكم وبينهم نفس الدم
نايمين بالشارع والحر يصكع فوك روسهم طول النهار ..
اربع شهور انا كل يوم ادحكلكم بي اتأسف عليكم وادحكم بالعين الصغيره وحاسبكم حشرات هين اجر الصبر وياكم شهور
متأمل واحد منكم يتحنن كلبه وتطلع من لسانه كلمه حك
تالي يلا عباس نطق وقلت يلا خلي ادحك من الي يتشجع ويكف حدر اخوه ويسندو بكلمتو
وتالي هم رجعتو لنفس الغلط
صكر شمرها كلمتين مثل الشص ياتصيب ياتخيب وهو بالاصل مطنش الدنيا دافرهه برجلو وحر واسر انا غاسل الايد منهم
جهال حرام حتى اسميكم شباب
جهال مالكم لا راي ولا فكر ولا شجاعه اي صفه من صفات الرجال ماتحملون
ورماااااح اااخ يارماح حاير بشهاده الطب وناسي وراه اهل واخوه واكعين بشده
تمنيت لو بيكم رجال الي يحدر يحاججني
رجال الي يكف بوجهي ويعترض على طرد خويو وطولت بعادو عن البيت

غاليه وهي بنت وبعيده عنا ومن يوم ماسمعت بسالفه جراح لليوم وهي ماخلت شي ماسوتو حتى الين وياكم واتفاهم .. وهي حامل وروحها بخشمها صايره وبراسها بيت وعيال
ومافكت عن خويكم ساعه اذا مااتصلت وتطمنت وتكاطعت ويانه وماعتبت بيتنا لان اخوتها مو هين ومو راضيه على حكمي عليهم ..
دحكتو الفرق !
دحكتو غلطكم ويييين !!!!
الي يسكت عن الظلم هذاااا شيطان
وانا مالفي شياطين بيتي انااا بيتي لاهل الله والرجال والي بدمهم نخوه

انتم ماتفهمون كبر غلطكم كبر سكوتكم هذا
ماتفهموه .. جهله انتم عقلكم على كد يومكم بس مايفكر لبعيد ..

اليوم انتم سكتم عن ظلم وهو ظلم لخويكم
خوفاً من ابوكم بكرا هم تسكتو عن ظلم غريب خوفاً من الاكبر منكم
جايز الي يظلم شرطي او ضابط او مدير او حتى دكتووووور اكبر من دكتوررنا هين
وهم تسكتو ليييييش لان هاذي صارتلكم سهله
تكفون ايدكم من الناااااس وحكها حتى تسلمون على مصالحكم كلمن يضل بامان ماتصيبه صايبه بسس انتوووو نسيتو هذااا كله حسااااب وكتاب عند ربنااا يوم الي ينعرض وتنسأل يا حسين ويا رماح يوم الي تنسأل ليش سكتت عن حك اخوك !
شتجاوووب هاااااا شتجاوب ربك
تحكيلو مادري لو ماعرفت لو ماتدخل ابوي هو يقرر!!!

وانته ياصكر يوم الي يسألك ربك لييييش ما عنت اخوك وسندتو بكلمتو يوم الي شهدك ابوك !!! تعرف ترد لو تحكي حرت ويه ابوي كيف ارضيه !!!!

وانتو يالجهااااااال ياحسافه طول اللحايه والشارب بوجه جاهل لانفع بفعل ولا بكلام
ول انته سميتك حر تفهم معنى اسمك انته يول لو ماتفهم !!! جااااااوب تفهموووو

كلهم جانت عيونهم تدمع ومدنكين الراس
وبصيحه الاخيره لحر يلا رفع راسه وكال ..
- اييه يابه افهم
- تفهم بس ماتحمل صفات اسمك
حر انته حر مايكضبك شي ولا يوكفك شي عن مرادك كان لزوم تحرك الدنيا وترجع خويك لبيتو وتدخل بعيني تحاجج بلا خوف

واسر هه ااااسر ول تخيرتلك هالاسم وتمنييييت اخر ولدي يصير اسر اسم على مسمى ... اثاريك طلعت خووووان عشره
وصاحب مصلحه حالك حال الي اكبر منك

ول حسافه والله الف الف حسافه على كل يوم اصحى بي وانا اتأمل ادحك سبع رجاااال حدري يكفون .. تخيرتلكم زينه الاسامي وانا اتأمل كل صفه بهالاسم تترسخ بروحكم
تاليكم طلعتو خنااااايث من موقف واحد تكشف عن داخلكم الهش وخلاني اتنددددم
ما كشفت عنو من زمان وعدت ترباتكم
كان لزوم اربي جهااال بلحايه هالسنين
ياحيف والله ياااااحييييف ولد ابو جراح هاذي سواتهم ياحيف

راح جراح كعد يم حر واسر وكال ..
- يابه هذول رجال والله رجاال و واحدهم كلبو اصفى من الغيم وعودهم كوي وصبرهم طويل تحملو كثير من الصعاب والمشقه حدري وسندوني انا لولا وكفتهم ماكنت اكدر اكسب رضاك

قبل مايحجي الشيخ شي حر واسر حضنو جراح ويبجون .. ودنك صكر على راسه بوسه وصارو يعتذرون منه وعباس هم دنك بوس راسه وجتفه واعتذر منه وهو ضل يهدي بيهم .. حسين راح على الشيخ دنك باس راسه وجتفه وكال ..
- يابه انا متعذر من جراح من زمان ويشهد الله ماعفت اخوي لحظه وان كان سكوتي هو سبب غضبك عليه انا اتعذر عنو يابه والله ماكان سكوت رضا بس طاعه الك بقرارك
- لا تطيعني على الظلم صير صاحب حك وخلي موقفك موقف شهامه ورجوله هي الرجال وكت الشدايد تبان
- حكك علي يابه حكك علي وحك اخوي
على راسي وانا تعلمت من هالغلط كثير
يابه والله توضحلتي الحياه اكثر من اي يوم بعمري العشرين .. سامحني يابه
يشهد الله اخوتي كلهم بمعزيه روحي وهمه يعرفون حسين يفديهم بدمو لو اعتازو
يابه احنه بينه خوه طيبه وان ماتبينتلك بس احنه واحدنه ماينام اذا مايتطمن على خويه
وان كان هالحد الي احنه بيه ما رضاك نوعدك نتغير ونخليك مرفوع الراس بينه

كعد رماح بصف حسين وكال ...
- يابه كلامك نبت سهام بكلوبنا ماعشنه ولا حيينا وانته متحسف علينه وخايب املك بينه
يابه احنه واحدنه يتعب ويكد طول يومو حتى يكف وكفه شرف حدرك ونسمع كلمه الفخر منك .. انا صح ماكنت حدر اخوتي هالفتره وضليت وياهم بس على التلفون بس انا بنفس الوكت ادرس وابني لنفسي اسم تفتخر انته بي كبلي انا صح تهاونت بهالموضوع بس لاني حسبتها لصالح المشيخه لجراح وانا اعرف هالشي وارد بعايلتنه فماتدخلت
لا تحسبنه رجال خوانه يابه
احنه ولدك رباه ايدك ما تربي هالايد الا رجال حميه ..
واتعذر انا يابه اتعذر منك ومن خويي جراح ومن حسين ومن كل اخوتي اتعذر منكم على تكصير وعلى بعدي وكت هالشده

بوس ايد الشيخ وراسه وبوس حسين واعتذر منه وراح بوس جراح وهم اعتذر وكعد بداله عباس وصكر ..
عباس كال ..
- يابه ليش مارضيتلي وكت الي اعترضت
- لانك متاخر يلا صحيت كان لازم تاخذ نصيبك من الغلط وبنفس الوكت حتى يتحمل اخوك توأمك ذنب رخاوتو بهالموقف
- اتعذر انا يابه على سكوتي هالايام كلها بس يشهد الله انا مارضيتلهم هالشي وسكتت احتراماً الك ولقرارك
- لا تسكت وكت الي يكون حدر عينك حك مسلوب لا تسكت
- ان شاء الله يابه ماتسمع عني الا كل طيب
وهالدرس بعمري مانساه

بوس ابوه وراح كعد يم جراح وتقرب صكر
يمسح بعيونه وكال ..
- يابه غلطان انا والله ادري الغلط الي بيه اكبرهم كلهم
- اييه انته جمره بكلبي ياصكر جمره قابض عليها بصدري وساكت تدري ليش !
لانك ما طلعت صكر جارح مثل ما ظنيتك
- سامحني يابه والله اوعدك اتغير
صحيت على عمري والله صحيت وعرفت كل اغلاطي و وعيت على نفسي واوعدك
ما تضل هالجمره بصدرك مني بس انطيني هالفرصه يابه وسامحني

جان يحجي ويبجي حتى مارفع راسه والكلمه تطلع منه بشهكه لدرجه ان الشيخ تقرب يمه وحضنه حتى يسكته .. بس هو زاد بجي بحضن ابوه خلانه كلنه نبجي وياه
الشيخه تمسح بفوطتهه كل شويه وام جراح لازمه ايدي وتبجي من فرحتها بولدهه

مسح على راسه الشيخ وهو وخر من حضنه وضل يمسح بوجهه وابوه كاله ..
- مسامح يا يابه بس كون ادحكك غير شكل بعد
- عند عيناك يابه تلكاني ان شاء الله
- ان شاء الله روح غسل روح

راح صكر يغسل والشيخ يباوع لحر واسر الي همه ايدهم بايد جراح ومدنكين الراس
كومهم جراح واخذهم بايده للشيخ وكال ..
- يابه هذول اعزاز عندي ولدي مو بس اخوتي ان رضيت عنهم معناهه رضيت عني

تقربو اثنينهم حضنو الشيخ وبوسوه ويتعذرون وهو كال ..
- جراح اكذب انا ان قلتلك رضيت عنهم بس ان تكفلتهم وتعهدت ترجعهم الي مثل الي محسبهم بالي ارضى عليهم وعليك وافتخر وانسعد بسعاده تزيدكم حسنات دنيا واخره

حضنهم جراح وكال ...
- انا اوعدك يابه هالسعاده تصيرلك على اسم حر واسر ان شاء الله
- ان شاء الله .... يول حسين
- نعم يابه
- احدر يابه احدر

كعد حسين يمه والشيخ جر راسه بوسه وحسين ضل مبتسم وفاك عينه على وسعهه
كاله الشيخ ...
- ان كان جراح بمعزه يوسف من يعقوب انته عندي بمعزه هارون من موسى بس لا تندك بالي انا وياك نعرفو خط احمر
- ههههههههههههه يابه تروحلك فدوه هالخطوط بس احضني احضني واوعدك شهر تكميل اخليك مرتاح مني

ضحك الشيخ وحضنه ومن وخر حسين يفرك بايده ويصيح ...
- ايييييييه نعنشنا نعنشناااا اليوم
- ههههه يحفظكم الله ... اسمعو يولد
بكرا بعون الله تذبحون وترتبولنه غدا معدل
وتعزمون غاليه وعيالها لزوووم يحضرون لزووم لان خبر راح يفرحها بكرا انا اعلنو
- شنو يابه غششنا
- هههه الخبر بعيد عن المشيخه بس يخصكم
هديه محضرها لولدي اريد انطيها بحضور اخيتكم
.
.
.
يتبع

#شقراء_بغداد

الجزء_الثاني_بارت_٢٤


صباح جديد يبدأ بلهفه من كل افراد البيت
اليوم ولدنا من الفجر كاعدين تسابقو على الصلاه الجماعيه ويه الشيخ ..
تريكنا بسفره وحده والكل تبتسم مرتاحه بعد طول هالغياب ...

ساعه ثمانيه الصبح الولد اخذو الذبيحه لمطبخ المضيف الي بره وكالو احنه نطبخ لحد تدخل

عفناهم بنشاطهم واني صرت احضر حلويات وام جراح تحضر الزلاطه والخبز ..
طبخت شويه برياني لغاليه لان متاكل اللحم
و رحت نظفت غرفتهه وهويتهه واني كل شويه اتصل بيهه حتى اعرف شوكت توصل
وساعه بال١١ وصلو ...

جنت بيت الشيخه هناك انتظرها وطبكت سيارتهم البيضه العاليه كدام الحديقه ..
نزل اسامه و راح فتح الباب الوره ونزلت غاليه وبطنها كدامها ... كبل دمعت عيني من شفتهه هيج ..

مانتبهت على احد بس عليهه .. اشوف مشيتهه وهي لازمه ايد اسامه وترفع النقاب من وجهه .. تباوعلي وتضحك وجهه متفح
والفرحه ماليه معانيهه ..

رحت حضنتها وهي تبوس بيه وبطنها اطخ بيه واضحك ... لزمت وجهه بوستهه وكلتلهه..
- كلها ايام وتجيني وابنج بايدج
- ان شاء الله يمه يجي هاليوم وتدللين ابني مثل ما دللتينا

دنك اسامه باس راسي وسلم ودخل ويه الولد
سلمت على ام اسامه والحجيه ورحبت بيهن
دخلنه وكعدو كلهم ..

هنا يلا انتبهت على ايوب .. لابس دشداشه بيضه واليشمغ وبيده سبحه سوده ..

جنت هنا نازعه المناظر تعلمت اتقبل شكلي ومااستحي منه .. هالعين البيضه هي وسام فخر الي وصار كل من يباوعهه يرجع يباوع لعين الشيخ ويسكت مايحجي شي ...

غاليه نزعت جبتهه والنقاب واجتي لابسه فستان سمائي مال حمل وهي سمنانه وجهه المقسم صاير هسه بي عبالك اربع خدود
مسويه شعرهه ضفيره هنديه صفح وكاعده هادئه تباوع لاخوتهه وتوزع ابتسامات
شاورتهه ..
- شبيج شو مو على طبيعتج
- يمه اسامه هييين
-ههههههه صدك تحجين !
- والله عجل ترديني استخف وهو هين كاعد
لاا عيني لاا انا بايعه ثكل ومدلعه زياده
- هااا هم زين بدرت منج هاي
- ايي بس هذا ابنك حسين احس راح يفشلني
يمه نظرتو مو راحه اعرفها واخاف مااكضب لساني عنو دحكي اذا زليت كرصيني سكتيني زين

ضليت اضحك واباوع لحسين وهو يأشرلهه اصبريلي ويمسح بلحيته ...
عفتهم ورحت اصب الاكل واساعد ام جراح
ولكيت هناك عباس يغسل الكلاصات
واخذ السفره وراح فرشهه بالصاله لان احنه كعدناهم بالاستقبال الصغير ..

هالولد خدوم بدون مااحد يكوله هو يعرف شمحتاجين ويسوي من وحده ..

دخلو حر واسر شايلين صياني الدليميه الي همه طبخوها باشراف جراح ورماح ..
واني اخذت الفواكه والخبز واكل غاليه
وسراحيات اللبن والمي يرتبهم عباس
رتبنه السفره ورماح صاحلهم حتى يجون يتغدون ...

التمينه على الغدا وجانت فرحتي بوجود ايوب بينه بصحه وعافيه والضحكه على وجهه
اكثر من فرحتي بغاليه ...
اليوم ايوب رجع لدياره وكاعد ويه ناسه اليحبهم وبين اهل حديثته ومن اكلهم ياكل
بعيد عن عائلته الي مااحسه فرح بيوم وياهم
واحس ميوله اكثر لعيال ايهاب يرتاحلهم اكثر من ولده ...

انتبهت على غاليه تبسبس وحدهه كلتلهه .
- ها شدكولين
- يمه مادحكين اسامه ماياكل
- يا ليش !!
- مايعرف ياكل بيدو الا بالخاشوكه وانا اشرلو لا وهو مايرضى وضال ياكل بس زلاطه
- ههههه يبوووو منكم هسه خلي ياكل بخاشوكه مو اني وياج دناكل هيج
- يمه عيب من اخوتي هسه يحسبوهه بزر نستله ويضلون ينفخون بريشهم علي
وانا الف مره احكيلو جرب اكل بايدك يحكيلي اضوج ماحب
ولا هو حكو مايكدر اذا اهلو معلميه على الشوكه والسكين واتكيت وين يدبرها هين
- ههههه اكلي يمه دكلي هو يدبر نفسه مو صغير هسه واحد من اخوتج يفشله ويخليه غصب عنه ياكل

سكتت وضلت تباوعله والخاشوكه بيدهه
اباوع لايوب ناسي نفسه ويه حسين اثنينهم متاكبلين على صينيه وحده والشيخ معروف ماعون اله وحده ما ياكل بغيره ..

انتبهت على جراح قدم الاكل يم اسامه وضل يشاوره بعدين اسامه عاف الخاشوكه وصار ياكل بايده وكل شويه يباوع لبنطرونه وينفض بي ...
هنا يلا غاليه صارت تاكل ..
شاورتني غاليه ..
- يمه تدرين احس عمي مو هو نفسو الي اعرفو بيتنا هناك ... والله متعجبه عليه عجل هو ليش ما يطلع صوتو بالبيت ولا يضحك ولا يجامل لا ويه ولدو ولا ويانه احنه الحريم
- خلي هسه مرتاح شكو ادققين وراه
- خلي يصبرلي اذا ما دحكتو هالشكل بالبيت بعد الا افشلو واذكرو بهاليوم
- غاااليه معليج بعمج اني كم مره كايلتلج ابتعدي عنه عيب هذا رجال جبير واله اسلوب حياته لاتخربين عليه
- وشدعو هالاسلوب البارد هذا كأنو مايدحكنا والله انا طاك كلبي من الملل بهذاك البيت
خلف الله على اسامه الي يكعد وياي اسبوع
يونسني ويخفف وحدتي .. باردين يمه ماينحملون مادحكيني شلون صرت كله منهم
اخاف احكيلي كلمتين وينزعجون
- هههه كلمن وطبعه بنتي كلمن وطبعه

كملنه الاكل وصارو الولد يلمون السفره

واني وغاليه وام اسامه بالمطبخ واكفين نعزل المواعين وام جراح صبت الجاي ودزته بيد عباس وضلت يمنه ..
صرت اني اغسل وغاليه تنشف ونسولف ويه ام اسامه جان تكول ...
- اني رجلي ابو اسامه الله يرحمه جان مدرس عربي و النه بيت وحدنه بنينه بصف بيت الحجي الله يرحمه بيوتنا جانت رنانه شكبرهه
والله لو خيل اكو جان سرحت بيهه كل غرفه
نوم بكبر مطبخكم و الولد جانو الله يرحمهم
كل واحد عنده بغرفته نص تخم واخشاب كامله وجانو على باب زواج .. الكبار اثنينهم خاطبين من خوالهم بس صادف صفر وانتظرو يكمل يلا يعرسون وماصارلهم نصيب وافتهم المنيه بليله وضحاهه فاجعه صارت بهالبيت وضلينه مانسمع بس صوت البجي ومصايح الرجال
والله لو ضالين كاعدين شهر النوب جان كضو ولدنا كلهم على هالثار
- الحمدلله الي حفظكم وعوضكم عن الصار
- اي والله عوضنه باابو سالم الله ينطيه الخير والعافيه هو شال العايله من ساعه ماكعدنا بغداد لحد هاليوم .. جان ابو اسامه بوكتهه ماعنده شغل لان ماطلع نقل مالته لمدارس بغداد بسرعه وابو سالم هو الي جان يصرف على البيت مانعرفه شوكت يشتغل شوكت يدرس منين يجيب ماندري الا ساعه ما يدخل مسواك البيت متلتل بالباب
تالي عاد ابو اسامه صار يدرس باعداديه ولد و عاونه

جنت ساكته اسمعلهه واذكر كلامه وياي قبل عن تعبه من العيشه بعيد عن حديثه
صح جان فاتحلي كلبه بس مايطرق لوضعه الصعب بس يكول تعبان من حمل الوطن
هاي اكثر شي جان يكوله من يتعب ..

فضول مني زاد وخلاني اسألهه ..
- اكولج عيني ام اسامه هي ام سالم من كرايبكم لو غريبه اخذتوهه
- شوفي عم الحجي الله يرحمه جان كاعد بالرمادي هي تصير بنت ابنه الجبير خوش مره هي الله شاهد كلبهه وعينهه على بيتهه وولدهه وشالته لابو سالم بعينهه ياما وياما تحملت منه ضيم وضلايم وضلت صابره

سكتت اني ونشفت ايدي جان غاليه تحط جايهه بالكاع وكالت ..
- والله ياعمتي شكثر ماتحكين عنها زينه انا ادحكها العكس
- ليش ولج !
- شنو هو ليش مبينه هي طباعهه مو مثلك انتي المره الزينه هي لا شايله خشمهه وكارهه روحهه وكارهتنا
- هههههههه ولج هي من ضيم عمج هيج تلكيهه اعصاب بس هي والله طيبه كلب
- زين همه من ايمتى هالشكل مامتصافين ؟
- من يوم يومهم همه كل واحد بصفحه
ويجمع بيهم الحجي والحجيه خلف الله عليهم الي ضلو فوك روسهم وخلوهم يخلفو
ويستقرو
- ليش عمه هو عمي مااخذها برضاه ؟
- لاا الحجي هو اختارهه اله عمج جان رايدله وحده من الكليه وماصارت
- هىىىىىىىىئ عمي جان يتمعشك !
بروح الغالي كملي كملي خليني افهم عقدتو

لزمت ايد غاليه وكلتلهه ...
- كافي بنتي بعدين لاحكه على السوالف امشي شوفي رجلج خاف يحتاج شي
- يمه لو يريدني يتصل خلينه كاعدين ول هالسالفه انا اشمشمها صارلي سبع شهور وماحصلتها خليني بداعت ابوي خلي اسمعها
- غاليه كافي عيب لتلحين ويه المره عيب بنتي كافي اسرار رجال شكو تدخلين
- يمه انتي لاتسمعين كيفج بس انا اموت لو ماعرفها كملي عمتي بروح الغوالي خلينه اليوم كعدتنا براحه خلي نسمع الماضي وعمايلو بعمي

ضلت تضحك ام اسامه وام جراح هم طبكت وياهن تريد تكمل السالفه واني كلتلهه ..
-ام اسامه معليج منها هاي بنتي فضوليه اذا تضل وياج للصبح متخلصين من اسئلتهه
- لاا ياخيتي شعدنا احنه كاعدين خليهه بنتج سوالفهه حلوه
- ميخالف سولفو بس هالرجال عوفوه على جهه خاف مايرضى احد يحجي بسالفته
- ههههه هو كل الدنيا تدري بهاي سالفته
غير زلزله للبيت بهوسته وكت العرس
- ياويلي ياووويلي دحك الحماس يمه اذا تقاطيعنه هالمره البس عباتي واطلع والله ازعل منك خليني اسمع كلبي رفرف لهالسالفه
كملي عمه كمممملي اسمعك انا

ضليت متوتره احس الجو صار يخنك وهي تحجي واني كلشي يمر كدام عيني كأنه البارحه ...

- الحجي الله يرحمه جان يريد يزوج عمج
لان احنه طلعنه من البيت وكعدنا ايجار
بنفس المنطقه وضل البيت بي بس اخته وامه و اخته هواي اجوهه خطابه والحجيه تريد تنطيهه لان كبرت صار عمرها بال ٢٣ سنه
وهي حلوه وجان جايهه استاذ جامعي كاعد بنفس منطقتنه وشايفهه متخبل عليهه رادهه
وكل يوميه اهله داكين الباب والحجيه تكول انطيهه منو يضل بالبيت يطبخ ينظف ضلو يلحون على عمج يتزوج تالي كاللهم اريد اخطب بنيه وياي بالكليه واخذهم واهلهه مانطوهه كالو مخطوبه البنيه وابوهه مايرضى هنا الحجي صار يدورله مره سكتاوي وكل فتره يكوله على وحده وهو مايرضى واجتي فتره الحرب ويه ايران جانت وهو يشتغل مدري وين والله بس يطلع اسابيع يلا يرجع وتأجل زواج اخته سنه
ضلو بس خطوبه

- يعني اخذتو لهالاستاذ

- اي انخطبو وهو كال يريد يكمل بيته وياخذهه مايكعد ويه اهله لان همه عايله جبيره وبيتهم على كدهم

-ايييه رجعيلي لعمي كملي

- اي مو خلص البيت وصار لازم يتزوجون

هنا الحجي طلع متكتك ويه هذا عمه الي كلتلج كاعد بالرمادي ورايح خاطبله ومنطيهه مهر وفلوس جهاز و جابهه واجه وعمج مايدري كل هذا هو هاج مدري وين يغط يغط والعصريه نلكاه جاي تعودو عليه محد يسأل وين رحت واجيت وليش ما هاليوم رجع
والحجي كايله هالمره خطبتهه الك وقرينا فاتحتهه ويه عمك وبس تاخذهه وتكطعون مهر محكمه جان ماكو سيد بوكتهه بس محكمه وقرايه فاتحه يوافقون الاهل
ويصير الزواج كامل

- ايييه وعمي شسوه هين

- كولي شنو الي ماسوى يبووو هجم البيت هجم بحيث من خوفهه لام سالم وبجيهه طلعتهه الحجيه الله يرحمهه حجيتنا الجبيره
طلعتهه بعباتهه وكلتلي اخذيهه لبيتج وسكتيهه
واني اخذتهه وطلعت اركض وبيتي قريب نفس الشارع وبره واسمعلج الصياح تخبل بوكتهه لا خلى شي ماكسره لا احترام لابوه
ولا اخوته وطلع هج ضلت المره بيتي اسبوعين تبجي وتنحب على حظهه
وعمج مختفي تالي يلا رجع وكال للحجي
يابه رجعهه المره بعدهه حره مايربطنا بس قرايه فاتحه ومو بعلمي ما تصح
بس الحجي ماقبل كال ..
صارلهه المره اسبوعين كاعده تنتظر رجعتك وتالي هم عفتهه اسبوعين وتريد هسه ارجعهه مكسوره خاطر وذليله لابوهه تريد تكسر وجهي وكلمتي كدام عمي ..
وضل المصايح بينهم وابو اسامه اخذه لعمج وكعد يحجي وياه ويفهمه ميجوز هالشي عيب بعد المره دخلت بيتنه وجايه على اسمنا اهلهه مايسكتون لو يدرون بيك هيج مسوي وتخرب هالعلاقه الضاله بين عمامنه واحنه ماضللنه احد ومن هالحجي عاد يلا اقتنع وكال بقوهه
ودزني ابو اسامه اخذهه وارجعهه للبيت

- عاد هين تزوجهه عمممممي

- لااا وين دنطي صبر

- هاا عجل شصار مو اقتنع !

- اي كال رجعوهه لهذاك البيت بس مااخذهه عقد عليهه محكمه عافهه كاعده هيج ومدري وين راح هج .. وبالليل احنه نايمين ودك بابنه
اخوه هذا عم البنات هسه
فزينا من نومنه ونسأل خير شصاير
يكول ابويه وايوب تعاركو ونروح ركض لبيتهم لا ندري شكو ولا شوكت رجع ولا شصار ... ادخل بينهم ابو اسامه وفاككهم
والحجي خشمه يطك دم مرتفع ضغطه ويرجف رجف مابيه حيل يوكف بعد
اخذوه الولد لغرفته وعمج ضل كاعد بالسطح
ردنا نفتهم الصار والحجييه اسكتو واسكتو
والله فلا انسى هالليله كاعدين بانذار و سادين حلوكنه وللفجر على كعده الوحده لا الي فهمنه من الكاعدين ولا عمج النزل من السطح وحجاله كلمه التشفي الكلب
ولثاني يوم كعد الحجي للصلاه جان يكول
الي يريد شور راسه وخراب بيتي خلي يطلع برا ولا بارك الله بيه
والله وهو هستوه كمل صلاه جان ينزل عمج وبيده جنطه جامع غراضه وكال
عايفلك البيت وماشي بشور راسي
وطلع بعد ماعرفنه وين راح اخوته يريدون يتفاهمون ويه الحجي وهو يصيح اخوكم يريد يغضب الله ويمشينا بالحرام وضل اليوم كله هو يدعي على هاي حبيبته لعمج
والحجيه الله يرحمها هم تدعي عليها
طلع اثاري عمج يريد ياخذ الحجي ويروح لابو البنيه يقنعه بلكي يفصخ خطوبته ويزوجهه اله وكلهه تصيح هذا مخبل
وين صايره هاي اب يرضاهه ورايد بس الحجي يمشي وياه كايله اني عندي الحجي الي يجيبلياهه بس امشي وياي ماكدر اطب بيتهم وحدي وماقبل الحجي متعارك وياه لان البنيه محرمه عليه وهو حاط عينه عليهه
ونفسه بيهه وكايله انته واحد خوان عرض
الي تسوي هسه باجر يرجع يطلع باهلك عيب بطل هالسالفه هذا نصيبك يمك ونصيبهه يمهه
بس هو ماقتنع ومن طلع عمج هالطلعه بعد
ما رجع الا شهر تكميل واذكر اني بوكتهه جنت هستوني اعلك البردات الجدد لان بعد باجر تصير الحنه مال اخته وهو دخل كبل كال ..امشي انطي لابويه هالفلوس وصيحي اخيتي ... رحت ركض صحتهه وبس بوسهه وحط بايدهه تراجي ذهب وطلع من البيت ولا حضر عرسهه وتزوجت وخلصت سبعتهه
وهو ماوصل البيت .. ضل راسه من راس ابوه وتالي اسبوعين ورجع كال للحجي
امشي رجع البنيه لاهلها لتخاف ماخذ الي اريدهه بعد تزوجت وراحت لغير محافظه
رجع البنيه لا تكسر ركبتهه هيج خلي تمشي لحال سبيلهه بس الحجي ماقبل كال
من شوكت نسوانا تطلع من بيت زلمهن هيج
احنه عدنا المره من تعتب بيت رجلهه بعد ماتطلع الا بتابوت وتريد فوكاهه ترجعهه وهي بعدهه بنيه ! شيكولون علينه الناس صار شكم شهر مكعديهه بينا وحتى ماعاقد عليهه ولا داخل بيهه ! تريد تسود وجهنا كدام عمامنا ! وحصره لو ياخذهه مره اله لو يكتلهه خلاص لان اذا رجعت هيج لاهلهه يذبون بيهه العيبه ويكتلوهه همه ومايصدكون بحجينا عاد بعد مصايح ومعارك يلا اخذهه عقد عليهه ودخل بيهه يوم بنفس اليوم وثاني يوم طلع هج
وره ويين يلا رجع ..هاي اني ماعرف بي رجع الا من يروح العصريه ابو اسامه يم اهله يكول اخويه نار وساعه الساعه تكب بينه وبين ابويه خليني بينهم احسن
و هاي حاله ضل هيج يومين لو ثلاثه بالبيت وشهر بره مدري وين عايش وشيسوي

والله اذكر اول سنه مرت على زواجهم وهمه ماعدهم غرفه اخشاب هيج منطيهم غرفه فوك يفرشون وينامون واكثر الصيفيه عمج ينام بالسطح هاي اذا موجود بالبيت وضل هو والحجي ما يتحاجون على كد السلام وهو نافخ نفسه بينا حده الي يحجيله كلمه وياه ينفجر عليه كلهه متجنبته وساكته صارو ينتظرون طلعته من البيت ساعه ساعه
من كد ما يخليهم متوترين والوجوه مكلوبه
ولا يحضر بعيد ولا برمضان و ضل سنتين يلا اقتنع يخلف وصارت المره حامل و اربع شهور الاخيره من حملهه هو ماكو مختفي لا نعرف بي عدل ميت الا ما نولد سالم هالليله هو ثاني يوم الظهر رجع واخذ ابنه بايده بوسه وكللهم شسميتوه الحجي كال سالم
مارد عليه رجع الولد بحضن امه وحط فلوس يمهم وطلع وامه والحجيه يجيبن ويحجن عليه
يوميه مادخلتلهم مره اذا مو حاطاته بالسيره ويعتبن عليه
وضل كل شهر شهرين يجي مره ويتجنب الكل والكل تتجنبه وضع بينهم هادىء جان الا فد مره بيتي اني ودكو بابي الجيران الحكي
عمتج تصيح وتعيط بيتهه وطلعت اركض بطرك ثوبي ويمه من ادخللهم واسمع صوت التكسير فوك والمصايح عرفته هو وعمتي ادفع بي وتريدني اصعد اجر المره من ايده
هي تخاف منه وذبتهه براسي
واطبلهم واني اطكطك يمه جان شيطان مابراسه عقل لازم المره من ركبتهه رافعهه ويصيح بوجهه بيه مابيه اجرجر بيهه تالي ضربنه اثنينه وكال ارجع بالليل الكه الي اريده هنا بمكانه محطوط
وطلع والمره حال الضيم حالهه
يمه يوم اسود جان هاليوم ولا ينسي نتراجف هيج والله وحتى هو بره نتراجف من جيته شراح يسوي

- يمه هذا عمي الهادي يطلع منو كل هذا !
زين وشالسبب لهالمصايح

- مادري شماخذه من غراض البنيه هذيج
وهو مالاكيهن ومتخبل مكسر الكنتور وهاجمه هجم ناثره نثر والميز مجراته
مشمرات وهي مزوركه نفس ماتكدر تجر
كلنالهه شعندج تندكين بغراضه ماتعرفين طبع رجلج تكول معليجن لاتدخلن
ومن رجع بالليل كبل صعد وهي جانت جوه
نداويهه وضالات يمهه وايدنه على كلوبنه لا يرجع يهوس نوبه الثانيه بس هو سكت
وضل فوك مانزل جان تكول هاي حصل الي يريده وسكت وضلت تعاتب بعمتي تكوللهه ليش اخذتوني وانتو تدرون ابنكم نفسه بغيري
ليش جبرتوه عليه شذنبي اني اتحمل رجلي عايش بغير عالم كدام عيني وراحت للحجي هم عاتبته وكلتله رجعني لاهلي ماضل هنا بعد والولد اخذوه ماريده بس خلصوني
وهو عمج يخوف والله اذانه اذان فيل كبل نزل وكاللهه اصعدي لمي غراضج تصبحين انتي بيت اهلج

- يايمه عمي مايتفاهم وتالي

- اخذهه من الفجر طلع وداهه لاهلهه وضليت اني اربي سالم ويه اسامه
وعمج راح لاربيل ويه عمامه هناك عاش يمهم ويشتغل هناك وضل هالمكرود سالم وحده من ايد لايد
الحجي صيح وهوس لحد مانبح صوته وعمج كله كل مااسايرك تخرب حياتي عوفني اني اتصرف هو بعد راح لعمامه وانسدت هالسالفه
- ياويلي عمي حياته اكشن باكشن عجل شلون تصافو ورجعو !
- الحجي راح تعذر منهم ورجعهه بحجه الولد وحده ويريد امه وابوه مسافر وهيج رجعهه
- وهم رجع عمي وسواله هوسه مو !
- هههه لاا هالمره سكت لا كال ليش ولا شوكت بس فجعنا بسالفه ثانيه
- هم تكاونو بعد !!
- لاا هالمره رجع من اربيل شايش علينه
دخل صيح وهوس وكسر وحتى كفران كفر
وسب شكو واحد بينه وكل الصياح والهوسه بوجه الحجي يعاتب بي يكوله لو مطاوعني
بس مره وحده جان رحمت بحالي
وضل يكوله انته السبب وبركبتك البنيه وحالها وبركبتك كل صيحه بعمري صحتها

- شبيهه البنيه ! هم يتواصل وياهه !!

- مادري شبيهه بس هو هوس هالهوسه بخبال هوسهه جان هذا وجهه دم احمر واصبع ايده شويه ويطب بعين الحجي وابو اسامه يجر بي وهو ماينكدرله صوته سمع الفرع كله نص الجيراين بالباب تصيح خير وخير شصاير وشبيكم ولا هو الي يسكت ونفتهم منه بهداي
ولا الي يتعب ويكعد
ضل اليوم كله هو مشلوش يفتر بالبيت يصعد يصيح وينزل يصيح والحجي اتخربط واخذوه للمستشفى من وره ضغطه صاعد وهو ولا رف كلبه ولا هدا ولا راح شاف ابوه
ورجعوه الولد من المستشفى ونوموه بفراشه ومادخل وسلم عليه وكاله يابه شلونك
بس يفتر بالبيت ماندري شيريد حتى بيومهه عشه ماسوينه نخاف نطلع من الغرفه ونسويلنه فد شي وهو مايعجبه حتى اني عايفه بيتي وخاتله وياهن بغرفه الحجيه
ولليل والناس نامت وهو يطلع يتحسب ويرجع يتحسب ويعدد اسامي مانعرفهه
ضل اربع ايام هو مدري وين يطلع يغط النهار كله ويرجع بالليل يذب اعصابه بيهم
والله كلوطنه تكلوط لحد ماعقل وسكت

- اويلي يا يابه عمي سالفتو سالفه
ول ويني انا عن هالحكي وينننني
عمه اسامه يعرف بهالشي كلو

- ولج هو ياهو المايعرف كلهه تعرف وساكته

- عجل دام عمي هالشكل مبتعد عنكم شلون صار عنده بقيه ولده ايمتى تقبل مرتو ؟

- هو وره سنه الواحد وتسعين صار هادىء
مدري شلون هيج من وحده نزل عليه الهدوء
وصار عنده هند وبعدين فيصل وبعدين ليلى
جان يحب جهالهه بس ما يسميهم كل واحد يجي الحجي يسميه هو بس يداريهم شويه
يحب بناته اكثر من ولده بالاخص هند

يموت عليهه اذا هو بالبيت يضل مكعدهه بحضنه بس كولي هم بيوم لاعبهم ضحك وياهم هالابهات هذوله اشكال يسوون لجهالهم هو بس عنده بوسهم حط بايدهم فلوس وكعد يتصفن عليهم وهند بحضنه يلعب بكصيبتهه
هاي كل حياه عمج

- كسر كلبي والله عجل هالبرود والهداوه هاي كلها من وره حركان الاعصاب كبل !

- اييي خطيه ما عدل زمانه وياه فوكه فوكه مشاكل وقهر اذوه باخوته وبحلاله وبزواجه
والله يعلم شكو غيره بعد هم على كلبه

- بس والله يخوف عمي عجل انا محسبتو لا ابالي وبارد اعصاب طلع الي يندك بي مايرحمو

- والله كون يلكطج فد يوم مسويه شي مايعجبه ليبلعج لسانج

- يمممه الله لا يجيب هاليوم
صدك عمه هو شنو شغلو كبل ما تطلعو لعمان ؟

- والله وهذا يومنا ومانعرف شيشتغل
وبعمان لو ما زي الضباط الي جان يلبسه هم مانعرف شيشتغل لان هو سكوتي ميحجي والي يسأله يبتلي على عمره
ولا عمرنا ندري راتبه شكد شعنده ماعنده
ابد من يوم الصار لهاليوم محد يعرف شي عنه بس هالسالفه لان هو سمعهه للكل

- هاااا زين يعني ما تصافو بعدين هو وحرمتو ماحبها يعني ؟

- مادري والله بس هو ميتعارك وياهه الا نادراً والا هي مسويتلهه فد دكه جايده وياه يلا
يطلع صوته عليهه بس متصافين يعني عايشين مرتاحين والحمدلله

- يعني نساهه للسالفه مال الزواج

- مانعرف بعد هاي عنده

- زين عمه هو يا كليه داوم ؟

كطعت سالفتهه هنا وسكتتهه كلتلهه ..
- سولفنه هواي وخطيه الحجيات وحدهن ضالات خلي نمشي نكعد يمهن ماضجتو من كعده المطبخ خلي نروح على البروده نكعد

كومت غاليه ورحت اغسل وجهي احس بعد ماصرت اشوف كدامي ومخنوكه هالحجي
جان ثكيل هواي ثكيل سماعه رغم ان غاليه جانت تسال كل الي بالي اسأله كبل بس تمنيت لو ما مفتوح هالموضوع ولو ساكته وما سألت عنه ...

رحنه كعدنه بالاستقبال وجان بس الشيخه والحجيه كاعدات والبقيه كلهم طلعو يفترون بالبستان ...

ضليت صافنه واربط بالاحداث بالي ويه الي عرفته عنه هسه ...
ياخذني البال لهذيج الايام وشصار وياي بيهن واستغفر ربي من هالافكار وارجع احاجي غاليه وانسي نفسي ..

للعصر رجعو كلهم وايوب كال يلا نروح
بس الولد ماخلوهم يرجعون كللوهم ضيوفنا اليوم واخيتنه ما شفناهه وندري متعوفهه النه
عاد ضلو بس ايوب واسامه طلعو ويه الشيخ
وجراح ورماح وضلو بقيه الولد هنا ..
غاليه راحت وياهم جوه وضليت اني وام اسامه نسولف وبعدين اخذناهه هي والحجيه
وطلعنه شوفناهن البستان وبيت الفلاح
واخذته بعدين لبيتي هناك ضيفتهه وكعدنا بس اني وياهه نسولف وجان تكول ..
- والله ياام غاليه بنتج ذهب صافي
وعلى مينه اجتي
- اي والله غاليه طيبه كلب
- مو بس طيبه هي قويه وعاقله عرفت شلون تكسب رجلهه وغيرت اسامه جان هذا الهوا
مو الهوا هم رافع خشمه على الهوا حاله حال ابوه شلون بس يحط الفلس ويطلع هو نفس الشي بس هسه ماشااااء الله يمه عين البارده عليهم ابني تغير ياخيه والله صار حنين على اهله وهذيج السوالف الحلوه والشقى ويكعد بالبيت ويانه نشوفه قبل ماشوفه ساعه لو ساعتين ويطلع يفرفر بهالسياره
- ههههههههه الزواج يغير
هسه صار عنده مره يحبها غصبا عليه يضل بالبيت حتى يشبع منهه
الرجال ما ينكدر عليه بس من المره الي يحبهه
- اييي والله صدكتي
انتي شلونه وضعج زواجج
-اني الحمدلله مرتاحه
- دائما اسمع من غاليه تكول امي هي الكل بالكل اذا كالت هذا احمر بعد كلها لازم تكول احمر
-ههههههههههههه لااا مو لهالدرجه
- والله هاي سوالف بنتج
هديل دائما تسالهه ابوج يحب امج لو ام جراح اكثر تكلله ابويه مايحب غير امي
- ههههه اييي هاي صدك
- اخذتو عن حب انتو
- اي هو حبني واخذني جان بوكتهه عنده بس جراح ورماح
- شلون ام جراح رضت وتصافيتو
- ههههه سالفه طويله بس هو شيخ بعد والي يريده يسوي محد كدر يعترض واتزوجنه
واني ماحتك بام جراح حتى تصير بينه مشاكل معاملتهه بطيب وهي هم طيبه كلب
وعشنه مثل الخوات محد تعدت بيوم على حق الثانيه محترمتهه ومحترمتني فضلينه متصافين
- الحمدلله انتن اثنينجن طيبات كلب ومتسامحات كدرتن تعيشن سوه
-اي الحمدلله
اكولج عيني ام اسامه فدوه لكلبج بس طمنيني
ام سالم تعاملهه زين ويه غاليه لو تضوج منهه ؟ هي متجيب سيرتهه ابد وضل بالي
- والله يعني يوم زين يوم مو زين
تحب تتلاغى ويه غاليه بالحجي وبنتج ماتسكتلهه كل كلمه بعشره لحد مااني افاككهن يلا
- يبوووو والله كلبي حسني ليش ما تسكتيهه لغاليه وتمنعيهه من هالشي
- مو المشكله بنتج من تحجي تحجي حق شسكت منهه
- يعني شلون مفهمت على شنو يتعاركن ؟
- ام سالم تحب الي يخدمهه وما متعوده على احد يكسر كلامها وهي تجور شويه
وبنتج متسكتلهه اي شي يخصنه اني وهديل
هي اطلع لسانهه عليهه
بس هاي مشاكلهن علمودي
واني والله ماريدهه تدخل بهالشي بس هي مترضى
متعوده اني صار لا سنه ولا سنتين
راضيه وساكته هم خلف الله على المره متحملتني ضرتهه وكاعده وياهه نفس البيت

وجايتهه مرت حمى هم ووياي ولد تعلكو بركبه رجلهه وصار حاله وماله النه
مو كل بشر يتحملهه

- صح حجيج والله تضل تحز عدهه بس انتي ماشاء الله عليج معدله وشايلتهم بالصلوات
المفروض تكيف عليج

- هي هم مكيفه عليه بس بنتج مترضى بهالشي هههههههه

-هههههههه فدوه شلون كلبج فطير ياخيه
يشهد الله حبيتج ومرتاحه لهالقسمه مأمنه بنتي الوحيده بايدج

- بعيونه نخليهه خيه لا يضل بالج

رجعنه لبيت الشيخه وصرنا نحضر العشى
والولد طلعو يشوون دجاج بره وغاليه تصيح
- ناس ماتشبع من اللحم والذبح الله الاكبر عليكم تتغدون ذبيحه تتعشون ذبيحه نفس ماتشبع الا بالدم

شكد نحجي وياهه تغير هالنظره ابد متقتنع
تكول شلون تذبحون روح وتاكلوهه مااعقلهه
اني ولا اتقبلهه ..

غاليه حاطه ماعون التمر وفوكاه راشي وتاكل واحنه نحضر العشى
ومن رتبنه السفره دزينه عليهم
ودخلو هالمره اشوف غاليه صافنه على ايوب
واعرف كاعده تفكر بحجي الظهر
كلتلهه ..
- بنتي انسي السمعتيه الرجال هسه جد وهالسوالف راحت من زمان لتخليهه بالج
- يمه عجل وشكثر حبها ؟
- غاليه شحجييييت
- مابالي غير شي واحد
شنو الي كانت عليه هالبنت وكدرت على عمي وضل وفي الها هالكثر ؟؟؟
- اكول لو تاكلين وتفكرين بالي بطنج احسن
- يمه فهمت هسه ليش هو يسمع
لشناشيل اثاريه على باله من ايام شبابو وعشكو
- غاااااليه

صحت بيهه بصوت عاليه وماحاسه على نفسي ،، صفنت بوجهي ودرت وجهي منهه
لكيت الكل صافنه علينه بس ايوب مدنك راسه
عفت الاكل وكمت رحت اريد ابجي
ما اريد اسمع عنه شلون متاذي من هالنصيب لان يرجع يذكرني بكلشي عشته واني سنين اداوي نفسي منه ..

ضليت افتر بالمطبخ واريد اهدي بنفسي
اجاني حسين وكالي ..
- خير يمه شصار
-ماكو شي
- ماترجعين تاكلين
- لا هسه اجي بس شويه لعبت نفسي
واجيت اغسل وارجع
- غاليه شسوت ؟ بشنو غثتك !
- شتغثني يمه شبيك !! هيج اني مادري شلون طلع صوتي عليهه والله مادري شصار
- اهدي يمه اهدي انسيها عادي اصلا بنتك تستاهل الصياح طولان لسانهه

غسلت ورجعت كعدت والشيخ يباوعلي ابتسمتله وصرت اكل واسمع حسين صار يحجي مواقف ويلطف الجو الي توتر بكعدتنا
واخوته وياه يحجون ويضحكون
بس غاليه خانسه ..
كملنه اكل ولمينه السفره ودنعزل المطبخ
جان غاليه تكولي ..
- يمه ليش يعني انا ما حكيت شي معيب
- ضوجتيني اليوم كله اكولج عوفي هالسالفه وانتي حطيتي عقلج بعقله عوفيه بنتي عيب
تدخلين بالناس
-زين يمه مادخل بعد صار بس اهدي شدعوا هالاعصاب
- مو عصبيه اني داحجي بهدوء
-ايييه واضح
- اكلج رجلج مالله هداه ويخليج تعرفين جنس الطفل شنو
- مادري
- شبييج
- يمه مادري لا تساليني شي
- شبيج ضجتي مني ؟
- لا بس بعدين نحكي اريد ارتاح شويه

عافتني وراحت ضليت اغسل مواعين وحدي بالمطبخ كملتهن بسرعه ورحت كعدت ويه ام اسامه ...
الشيخ جان طالع وياه ايوب وبس اسامه والولد كاعدين على تلفوناتهم واصواتهم عاليه
صارت ساعه تسعه جان يرجعون واول مادخلو كال الشيخ ...
- يولو غاليه وينها ؟
- راحت تتمدد شويه تعبت
- امشي صيحيلها وانتو كفو لعب عاد خلي نكعد بهدا

رحت لغرفه الشيخه جانت هي نايمه على جربايتهه .. كعدتهه وبوستهه كلتلهه ..
- اسفه ماماتي مو بقصدي والله
- لا يمه لا تتعذرين عادي ياما وياما شابعه رزايل منك هاذي صغيره عادي اصلا نسيتهه
- لعد دكومي يلا اكعدي ويانه وابوج هسه رجع ويريدج
- اييه انا والله بهالحمل صايره على غفله يأشر عندي النوم
-هههه كلنه هيج اسأليني اني من حملت بيج
شيبتهم
-هههههه دحكي يمه السفرجل الي طلبتيه من ابوي وتعبتيه عليه دحكي شلون جابلك بنت حلوه
- ربي يحفظهه من العين انتي هم اكلي حتى هم جهالج حلوين يطلعون
- مايحتاج اصلاً كل جيناتنه من العايلتين حلوين ابني انا يطلع كمره
- ان شاء الله ربي يفرح كلبج بي

طلعنه وكعدنا يمهم الشيخ على كعدته طلع
ورقه من جيبه مطبكهه وصاح ...
- ول يابه جراح احدر هين

اجه جراح كعد على يسرته والشيخ كال ..
- دحك انته طعتني ورضيتني ودرت بالك على خوتك وانا لاجل اني مرتاح البال من زين فعلك ردتك انته بعد ترتاح
اكضب هذا كتاب تعيينك هين على السدود

اخذه جراح من ايده وضل يقرا بيهه وبعدين باوع لاخوته ويضحك وغاليه كبل راحتله
وصاحت ..
- ول خوييي المهندس تعين

حضنته وتباركله وهو خجلان وخر منهه
وراح للشيخ بوس راسه وتشكر منه والولد كلهم باركوله ..
كلنه فرحنه لجراح لان هو صارله سنين متخرج وكاعد ومكضيهه شغل عند العالم وهو مهندس يتمنى يتعين ويفتخر بشغله
مبين على وجهه ممصدك بالخبر هيج فجأه راح يصير المهندس جراح !!

الشيخ كال .
- صار بعايلتنه مهندس موارد مائيه ودكتور اسنان ومصممه واعلامي واهل الاداره اثنين ماااااشاء الله من كل صنف مميز عدنا واحد
خلي اندحك اخر شي نختمها وين ؟ !

ضحكو وحر كال ...
- هم هندسه يابه ان شاء الله
- اثنينكم لو بس رأيك ؟
- اثنينا يابه احنه مانختلف برأي

اسامه كاللهم ..

- عوفو كل اقسام الهندسه وروحو لهندسه الطيران وتعيينكم عليه اغركم فلوس بيهه

همه حركتهم حر واسر من يعجبهم شي واحد يباوع للثاني ويحركون بحواجبهم يلا يحجون
كالوله ..
- شكد نحصل يعني
- على شطارتكم تحصلون بالطيران الفلوس على كد الشغل شكد ماتشتغل اكثر تحصل اكثر ولكم هو بس الاسم كافي مهندس طيران
منو يندك بيكم بعد عمي
- عليهه خيي سمعت يابه هاي غيرنا رأينا بعد نصيرلك مهندسين طيران

ضحك الشيخ وكاللهم ...
- مو بس حكي وتمني يابه هين دراسه وتعب تتحملوهه !
- رجالك يابه تتعبنه دراسه !
- عجل شدو حيلكم هالسنه وفرحونه بمعدل زين
- يأمر الشيخ
- ول يابه رماح
- ها يابه
- واعدتك انا بسياره مو صح
-اييه يابه صح
- وواعدتك بالزواج هم
- اييه واثنينهن تبخرن
- هههه اختار واحد منهن الحين وبكرا يصيرلك
يلا السياره لو الزواج !

صاحتله غاليه ..
-الزواج ياخيي

وحسين يصيحله هو وصكر ...
-السياره ياخوي السياره

هو ضل يضحك وبعدين دنك وكال ..
- الزواج يابه

غاليه ضحكت بعلو صوتهه وتصيحله
- فدييييت خويي المعرس انااا

والولد ضلو يصفكون ويضحكون وهو خجلان مدنك ويحك بشعره والشيخ يضحك
وايوب كال ...
- والنعم من هالاختيار مبين ياولد اخيكم واكع بالحِب ههههههههههههه

حسين كبل كاله ..
- عمي اخينا واكع ومتنكعه ريشاته ويصيح يمعودددين يااهل الغيره حسووو ومحد يحس

الشيخ كال ...
- هاااي يابه حسينه عجل ليش سألنه !
وبكرا نمشي نخطب عدل يابه لو مو عدل !
- عدل وابو العدل

رماح كال ..
- يابه يعني من صدك نخطب بالعجل !
-ايييه يابه عجل ماهو بيت عمك هذا حدر بيتنه نشرب الجايات عدهم العصر ونقرا الفاتحه يحتاجلها شي !!
-لا يابه زين بس يعني عبالي ننطيهم خبر
- انته مقتنع بالبنت لو غيرت رايك لغير بنيه !
-لااا يابه شسالفه نلعب احنه ! هي هاي مختارهه
- متاكد يا رماح مو بعدين تدورلك سالفه وتروح ادحكلك دكتوره وتفر عكلك
- يابه انا لو اريد دكتوره حدري كثير
بس انا مااخذ دكتوره لا اليوم ولا بعد ميه عام
- هااا زين زين يعني مقتنع
- اييه يابه مقتنع انا ادور زينه اخلاق مادور شهاده وبنت عمنا ونعرفها زين ماندحك احسن من اخلاقها وانتو اسألوهه بالاول اذا ترضى خير واذا ماترضى هم خير لا تحطونا بالامر الواقع
- ايييه يابه اكيد نسألها عجل نخطبها غصب عنها !.. ان شاء الله العصر نمشيلهم وان صار نصيب وقرينا الفاتحه .. شهر و اسويلك عرس رنان
- تسلم يابه تسلم
- والسياره على التخرج تطلبني اياهه
- لااااا يابه مدللنه هوااااي اليوم خجلتني والله
-ههههههه تدللو دام ابوكم حي تدللو

راح بوس ابوه واسامه كال ..
-شيخنا لعد وهالشباب الخمسه مالهم شي منا منا
- شيطلبون ؟ حتى ادللهم بمطلبهم
- اطلبو ولكم فرصتكم كل واحد يطكله جارجر يلا احجو

ضل يحاجيهم وهمه واحد يتصفن بوجه الثاني
حر واسر كالو ..
- يابه احنه منريد شي هسه على التخرج
نطلب براحتنه
- ابشرو يابه معدل الزين هديتو زينه

عباس وصكر كالو ..
- تلفونات جديده لان حالياً ميزانيتنه مصفره مابيهه شاحنه تلفون وداخلين سنه جديده بالجامعه وانته بكيفك بعد يابه
- هههههه ابشرو تلفون جديد ولدي يستاهلون دامهم يتعلمون

باوع الشيخ لحسين وهو ضحك وكبل كال ..
- يابه هنه اثنين بالي وادري بيهم مايصيرن
فخليني ساكت احسن
-ههههههه لااا اطلب اطلب حالك حال اخوتك اطلب هو جيب ويفلس ماضلت عليك
-هههههههه خليهه عجل غير مره لان ماظن الميزانيه تسمح
- ول يابه اطلب غيرها بعد مالبيك
هاي اول واخر مره ترا
- هاا عجل .. عجل
يابه عزيز كلبك انا وتعرفني ابداااااً مامتهور
والدراجه الي اريدهه اذا حصلتهه ابداااً
ماسوق سريع وابدااا مانزع الخوذه ابدااً يابه ابدااااً
-هههههههه واناااا ابدااااً مارضى بيهه
- هااا يابه عجل اطلب واطلب وتالي سديتهه بالوجه
- تخاطر انا ادري بسوالفك وتضل تفرفر بيهه ويه جماعتك تالي الليل
- عجل يابه انا ماخذهه للفرجه ! غير افرفر بيها
- استر علينه يابه استر علينه
تريد تطلب غيرها اطلب هالدراجه تشيلها من بالك
- اطلب عجل اطلع فارغ الايد وحدي !
اريد كاميرا لان انا شغلي بالتصوير واريد اتعلم بيهه
- ول يابه انته مو على الصحافه شدخل التصوير
-اييه يابه بس انا ناوي اتخصص بالتصوير والاخراج واحتاج كاميرا من هاي التعجب
يابعد عمري ياشيخ ياكريم انته
-ههههههه سهله على الكاميرا سهله ابشر بالكاميرا دحك سعرهه شكثر واحدر اخذ فلوسهه واشتريها
- اييييييه يسلم الشيخ تاج راسناا
-هههه بعد من يطلب ! يمه اطلبي الي يعجبك
- سلامتكم يمه ماريد غيرها
- الله يسلمك ،، غاليه يابه اطلبي
- اطلب يابه عجل ليش ماطلب
- اييه اطلبي يابه تامرين
- يابه انا اريد الطلب من جراح
-هااه ليش ؟
-هو مطلبي عنده

جراح كاللهه ...
- ول انتي بقيتي عليه شي شتطلبين بعد !
- اييي خيي ماريد منك فلس بعد عندي الي كافيني
-هاااا عجل خيرك تدورين جراح بمطلبك ؟
- ايييه مطلبي هو انك تتزوج

-شنووووووو

باوعت غاليه للشيخ وكالتله ...
- يابه انا هذا مطلبي اريدك تخلي جراح يتزوج راح يصير عمرو بالثلاثين ايمتى ندحك ولدو وكت مايشيب !
- والله يابه حك
جراح - يابه لااا حك ولا شي ماتزوج انا وطلبك هذا مايتم اطلبي غيرو او اسكتي
- خيي هذا عمر ويمشي وانته الكبير هين بولدنا لزوم تتزوج
- لاااا مو لازم اتزوج مدام انااا ماريد اتزوج
- شنو السبب ؟ عندك وحده واهلها مايرضون مو صح!!
- يولو انتي للحمل ضرب على عقلك
ول انا لو بالي وحده اشلعها من اهلها ماعندي شي اسمو ما يرضون انا وحدي مارضى
ومو بالي الزواج شطلعتيلنا بهالسالفه يولي
- والله لو تضل عليك تشيب وتزف ولد اخوتك على ايدك وماتتزوج
خلي ابوي هو يقرر
شنورايك يابه مو كلامي صحيح !
- كلام غاليه صح و رأي جراح اصح
- ليش يااابه
- الحين افهمك ليش
ول يابه جراح انته ليش مافكرت ببنت تتزوجها ؟
- يابه مامدحك الي على مرامي حتى افكر بيها
- انا اعرفو لهالشي بس وضح لاخيتك
ولامك هم خلهن يسمعن حتى يفهمنك بعد
احكيلهم يابه
- يابه انا طبعي صعب مو كل بنت تتحملو
اهلنا يركضون وين الي خريجه وموظفه
و الي عايشه مدري وين يردون اخذها من حياتها التعبت عليها واخليها بقوانين حياتي
مانتفاهم هالشكل ولا انا ارضى اضيع تعب
بنيه خليهه بحالهه مااكرب لهالنوع انا
لان الي اخذها تلتزم بشروطي وماتكدر عليها هالي يقترحنها
- علمنه شنو شروطك ؟
- يعني اولها النقاب ، ماكو شغل ولا اكمل دراسه ، ماكو طلعات مالها لزوم
الي اخذها كون محد يدحكها حتى عمي وهو عمي لو دخل بيتنه ماتطلع ادحكو حدها اخوتي وبس
تضل بس لعيني ومادحك اكو بنيه بهالوكت ترضى بهالشروط فهالسبب انا ماتزوج
انا مو رجال شكوكي ولا معقد بس انا غيرتي
على حريمي فوك الحد المعقول الي عد كل بشر ولا تسألوني ليش وتقنعوني باشياء هي
ماتمشي عندي
انا عندي الحرمه حرمه اشيلها من كل عين
وخيالها ما يدحكو احد غير اهل بيتي
انا صح اعزلها من كل شي بس ادلل وغلوي تعرف شلون دلال جراح يصير

غاليه كالت ...
- يعني الحين لو جبتلك وحده ترضى بهالشروط تتزوجها !!!
- افكر
-جراااح وشضل بعد تفكر
- ايييه يجوز ماارتاحلهه !!
- يووووه ياخيي انته حور الجنه هم تشكك بامرها ضل وحدك كضي عمرك وتحسر على جاهل يترس حضنك تالي هالعمر
- ماعندي وكت انا حتى اتحسر على الجهال
هاي رماح راح يتزوج وبعدين نزوج حسين
ويترسون البيت جهال لو ضلت الا على جراح !
- كيفك خيي كيفك انته مقرر انا بعد بس اتعب لساني بالحكي والله ولا يفيد ولا يغير
- اهااا عجل كفي عني لخاطر عشرتنا سدي هالسالفه بعد لاتفتحيها طول عمرنا زيين
- زين خييي زين سكتت

هي سكتت جان ايوب يضحك ويكول ..
- والله ياجراح لتوكع تاليتك بوحده تشوي ابو شروطك وتخليك معلك لا انته الي بالسمه ولا بالكاع
-لاااا عمي شسالفه ماعدنا عقل
- خلي توكع بالحِب مثل الجماعه وعود سلملي على عقلك
- انا ماتكرب لهالدرب ولا بعمري مدحك لبنيه حتى اكع بالحب رجال دربي واضح ومعلوم لا اميل يمنه ولا يسره
- هو يابه ياهو المشى للحب برجليه
ماتحس الا ساعه الساعه وكع فوك راسك
وهاي عندك هنا شكم مثال
عريس باجر والطيار الي وكع بالحِب من الطياره للكاع هههههه الحِب مالته غميج خطيه كسره تكسير

ضحكو الولد واسامه كال...
- والله شبعت ضيم بس تريدون الصدك
عمره خساره الي مايحب عمي ماشايف الدنيا والله
-اي عفيه ابني شجعهم للولد خلي يطورون
اني اريد اشوف حسييين وين تاليته بيا بنيه

كبل حسين صاحله ..
- عمي البنيه هاي خلصو بالسوك منها بعد ماكو جاي ادور على مهجن ادعيلي ادعيلي

- تجيك هي من وحدهه تجيك لتعب نفسك
-شوكت شوووكت مو راح نشيب
- هههههه ولكم لحكو لاخوكم ميت على الزواج

الشيخ كال ...
- ول حسين الك طرح سنه دورهه اذا مالكيت انا وامك نختارلك ونزوجك
- يااابه انته اليوم مشبعنا دلال مادري منو لاعب الاعدادات بس اتمنى تضل للسنه الجايه ومتغير رايك وتسمطني بوحده
من الجول
- هههههه يووول فوك مااسويلك زين !
- اناا اختار راسمهه بالي رسم بس ماتطلع كدامي شسوي هي بس لو تطلع اصبح ثاني يوم بابهم والله

ضحكنه لحجي حسين جان رماح يكول ..
- هسه انتو كطعتو سالفه زواجي
- خيرك يابه شعندك بعد !
- عندي شروط يابه عجل اتزوج عمياوي !
- هاا تشرط خلنه ندحك شروطك يلا
- هوو انا سمعت انها مكمله كليه تربيه
تفهمهم يابه ماكو شغل ترا
مو بعدين نتختلف ويه الاهل على هالشي
- زين يابه زين بعد
- هذا المطلوب منكم والباقي انا اتشرطو بعدين
- هههههههه ول صح هي بنت عمك بس لا تحسبها هينه وتتشرط براسها وغصب عنها ترضى كلشي بالهداوه يابه
- اعرف يابه اعرف المهم دبرها انته وانا اعرف اتصرف بعدين
- خير ان شاء الله خير
ابو سالم ان شاء الله انته ويانه بالكعده
مكانك مهم بينا
- اتشرف والله رماح ابني وعزيز عليه
اكيد اكعد بخطوبته
- عجل يا ولد امشو افرشولنه يلا
حسين يابه اخذ امك واختك للبيت

وادحكك هين على الصلاه لا تسهر وتضيعها عليك تره ان تخلفت عنها احرمك الكاميرا
وللكل هين هالكلام الي يتخلف عن صلاتو
ينحرم مطلبو
- لاا يابه صار تامر هين تلكاني كبل مايطلع خيط الفجر

رحت فرشت لام اسامه بغرفه الشيخه
وام جراح انطتها دشداشه مريحه تنام بيهه
والولد اخذو فراش فرشو للشيخ وايوب واسامه وجراح ..

رجعنه اني وحسين وغاليه لبيتنه
ونامت غاليه يمي .. كبل غفت كلت هسه تطرني بالحجي تاليهه نامت بدون حس

والصبح على وكت كعدتي نفسه كعدت
و داكعد غاليه كلت خطيه شيطلعهه هسه
خلي تضل نايمه .. رحت اتوضى واشوف حسين كاعد ينتظرني بالهول
توضيت وطلعنه لحكنه على صلاه الجماعه
وياهم ...

هالمره ايوب واسامه ويانه واكفين وره الشيخ
ووراهم الولد واحنه بالاخير ..

عمري كله ما ظنيت يجي يوم وايوب يصير قريب كدام عيني هيج ...
اليوم هو يصلي وره زوجي واني اصلي وراه
سبحان الي قدر وهيء الاسباب ...

بس خلصنه الريوك الولد كلهم طلعو ويه الشيخ وايوب واجتنه غاليه كعدت تتريك وحدهه وصارت ساعه تسعه جان تكول

- نعست راح انام وانتو سوولي بانيه ولا تلوحها قطره لحم تره والله مااكل شي بالغدا
وجوعه ابني بركبتكم

راحت نامت بغرفه الشيخه واني حضرتلها البانيه مثل متحبها .. ولفينه دولمه للبقيه
وضلينه نحضر للغدا ساعه ١٢ ونص
حطينه الاكل وتغدينا كملنه كفينا المطبخ
جان الشيخ يكول يلا امشو ..

الشيخه تكوله بعد وكت دنيا ظهر وهو يكول
احسن حتى ناخذ راحتنه بالكلام نطول براحتنه ..

ورحنه لبسنه عباياتنا والولد بقو بتراكسوداتهم
ورحنالهم تفاجؤ بينه ..
كعدنه ويه البنيه جوه وضلو همه بالاستقبال وحدهم ..

ام جراح حجت لهدى على رماح وشروطه
وكالتلهه هدى افكر بس الشيخه ماقبلت
كلتلهه هسه تكولين يا اييه يا لا
سألت امهه وامهه قبلت كالت ماكو احسن
من ولد الشيخ .. عاد وافقت هدى ..
ضلينه ننتظر واحد منهم يجي ..
جان يجي الشيخ و وياه ابو حسن
سألو هدى هي ضلت مدنكه ماتحجي
عاد احنه كلنالهم سألناهه ووافقت
راحو عاد قرو الفاتحه ...

وعلت الهلاهل والفرحه كملت ...
قررو يسوون كطع مهر سيد ومحكمه نفس اليوم وشوكت مايتحدد موعد المحكمه
يصير يوم المهر والهم شهر يجهزون ويتزوجون ...

رجعنه لبيتنه والكل فرحانه وتبارك لرماح
وايوب ترخص كال لازم نرجع بعد
وبين ماتحضرت غاليه طلعو ..

صار جراح يشتغل بوظيفته الجديده ونفسيته مرتاحه وحسين ما راح لبغداد الا وياه كامرته
والولد تلفونات جديده حصلو ..

رماح كطعناله مهر وره اسبوعين من قرايه الفاتحه .. وجان البيت طاير طير من الفرح
غاليه وعيالهه حضرو بهاليوم وايوب جان
مشتري لرماح قاط مرتب لونه رصاصي
طلع بي رماح يضوي وياهو اليشوفه يصلي على النبي ..
مرته هدى حبابه وثكيله كلش الكلمه ماتطلع منهه الا بالشافعات ..
طويله وجسمهه مرتب .. اصابعهه رفاع وطوال وشعرهه بي لمعه شكار يوصل لنهايه ظهرهه ... معانيهه حلوه ورماح ماخله بيهه شبر ما تفحصه بعينه ...

خلص المهر و غاليه وعيالهه رجعو بنفس الليله لان اسامه يريد يسافر الفجر ..

وصارت بدايه تجهيزات عرس رماح
هو بالدوام بغداد واخوته حايرين بغرفته
يصبغوهه ويغلفون الارضيه خشبيه سووهه
و جراح اشتراله تلفزيون والشيخه اخذتله
ثلاجه صغيره و هو من بغداد مختار غرفه تركيه ودزها يشدوهه وضلو حر واسر
يرتبون ويه اهل النقل ..
اشتريتله اني البردات والتيبلام
وفلوس الغرفه جانت من الشيخ
ورتبو كلشي ضل جهاز البنيه يكمل وهو يحصل النقل هنا ويتزوجون ..

ويوم ١١/٢ خابر ايوب على الشيخ ويكوله ....
- غاليه واكعه وصاير عدها نزيف
ودخلوهه للعمليات يولدوهه

اني سمعت بيهه لو انجنيت .. ركض ركضت لبست وطلعت بالباب والشيخ يكولي بس اصبري اترخص من الرجال واطلع اخذج
واني ماصبر كلتله ابقى انته تتاخر ادري بيك
اريد الياخذني هسه لبنتي ..

ودز على حسن وحر اخذوني لبغداد ...
.
.
يتبع

#شقراء_بغداد

الجزء_الثاني_بارت_٢٥


دخلت المستشفى واني ايدي على كلبي وادعي لبنتي تكوم بالسلامه وما يصيب طفلهه شي
واكفين بالاستعلامات و ايوب اجانه وسلم على الولد كبل كلتله ..
- بنتي وينهه طلعوهه ! بيهه شي !!
- طلعوهه اي وبعدهه ما فاكهه البنج
امشو اخذكم لغرفتهه

مشيت وياه ونسيت حتى اسأل على الطفل
دخلت غرفتهه وشفتهه تون بصوت عالي
حتى ماسلمت على ام اسامه كبل دنكت على بنيتي بوستهه وضليت حاضنه راسهه
وابجي بدون حس ..

وهي تصيح يول جرااااح ذبحوني يولوووو

ضليت امسح بوجهه عركانه جانت
واحاجيهه يم اذنهه حتى تصحصح
وهي بس تكول هااا وترجع تون
من صحت شويه وفتحت عينهه باوعتلي
كبل كامت تبجي وجلبت بايدي
حضنتهه وهي تبجي ام اسامه تكوللهه ..
- سمي باسم الله بنتي شجاج
الحمدلله شده وكضت وهسه انتي والبنيه بخير وسلامه لتخافين يمه ماكو شي

باوعتلي وتكولي ..
- يمه دحكتيها لبنتي ؟ زينه !
- لا والله ماشفتهه كبل اجيت عليج
ماضل عقل براسي من سمعت بيج واكعه
شوكعج ياعيني شجاج !!
- يمممممه

كالتهه وصارت تبجي شاورتهه ..
- بقصد لو قدر ؟
- قصد
- اسكتي لعد بعدين نحجي حبيبتي

باوعت لام اسامه وكلتلهه ..
- عيني ام اسامه فدوه ماتشوفيلنه البنيه وضعهه صحتهه شلونهه نكدر نجيبهه هنا تشوفهه امهه !
- هسه اكول لابو سالم وبلكي يخلونه نجيبهه
- اي فدوه لعينج

طلعت واني لزمت وجه غاليه وكلتلهه ..
- شصار بنتي شصار احجي
- يمه هاذي ام سالم الله لا يوفقها بدنيا ولا اخره هي دفعتني عمداً والله يمه والله
- عزا بعينهه ليش ولج هم تلاغيتي وياهه
- لااا والله ماتلاغيت
-لعد شصار فهميني
- يمه انا كفيت شغل البيت وكعدت حدر الحجيه وفكيت شعري اضفرو ودخل عمي
كعد يدحك تلفزيون ودخلت وراه ام سالم
وعمتي ام اسامه صاحتلي وحكتلي تطبخين انتي لو انا اطبخ قبل ماارد عليها عمي حكالها انتي اطبخي خلي غاليه ترتاح
وضليت انا اكمل ضفر شعري والحجيه حكتلي هذا شعرك وارثتو من امك
قلتلها اييه وهي شعرها يعادل طول شعري مرتين شعر امي بطولها
حكتلي شلون بطولها يعني داك بحجل رجلها
قلتلها ومعدي بعد امي ماكصت شعرها من يوم يومها تربيه وهي اعتنت بشعري مثلها
عاد حكتلي ان شاء الله انتي تورثين لبنتك هم هالشعر وعمي حكالي .. اريد بنتك شعرها
يعادل شعرك مرتين يصير وشتطلبين من زيوت انا اشتريلها
هذا الي حكيناه وضلينه نضحك
بعدها قلت اروح ادحك عمتي واحط الغدا وياهه وانا بعدني ماعتبت باب المطبخ وام سالم عتت شعري انداريت عليها وكاتمه صوتي عنها بس هي حكتلي
ردت ادحكو خاف تلزيك اثاريه طلع اصلي
توني امشي وهي عثرتني برجلها ماسيطرت بعد وانا بطني لخشمي صايره بالعجل وكعت عليها وعلى خشمي صارت ضربتي يمه والله تاذيت وحسيت احشائي راح تطلع من نص خشمي والله

حضنت راسها بقوه واني ارجف رجف من الاعصاب ضليت ساكته وحاضنتهه
وهي تبجي وتكولي الخوف والهبطه بعدهه بالي والوجع هايج عليه
طلعت صحت على حر وكلتله يشوفلنه دكتوره دتجي تنطيها مسكن
ورجعت يمهه ... شويه ودخل ايوب وام اسامه والممرضه وياه جايبين الطفله
اخذتهه وشميتهه ..
خليت خشمي على وجهه واتحسس نعومتهه
البنيه حمره دم وتتنعوص خليتهه بحضن غاليه وهي صارت تبجي وتشمشم بيهه
وحاضنتهه حيل جريتهه منهه وكلتلهه ..
-على كيفج يمه مطايره البنيه راح تخنكيهه
- يمه كلبي نار عليهه والله
- حقج ياعيني حقج بس هاي سالمه بيدج
تربى بعزكم ان شاء الله وتشوفين على وجهه الخير مثل ماشفته على وجهج يايمه

بوست راسهه و اشرت لايوب نطلع
طلعت وتمشيت بالممر شويه بعيد عن الولد وهو ورايه اجه ..
وكفت وبينه مسافه بدون مااحط عيني بعينه كلتله ..
- ايوب هي هاي الامانه هيج متعلم تصونها!
بنتي جان راحت من ايدي اليوم بسبب مرتك
لتكولي متعرف اني ادري ماتفوتك هالسالفه
- حكج عليه يابه حكج عليه
- اعاتبك الك لان انته المسؤول بكل شي
ردت بنتي تصون ابن اخوك واهله وانطيتك
وشفتهه شالتهم بالصلوات وماقصرت بحق احد منكم تجي ام سالم توكعها هيج وبدون ماتفكر بالي بطنهه وهي هذا شهرهااا لييش!!
لو صايرلها شي ! شتكول شتحجي !
لو خسرانه الطفله هاي وتضل تشوفه تنوح كدامك عليهه شتسوي !!!
- يابه قابل اني هاملهه لبنتج شايليهه بعيونا
والصار يناخذ حقهه من الاذاهه لتخافين
- شتسوي !
- اني اعرف اتصرف
- ايوب لو اعرف ان مرتك تعرفني وحاقده عليه جان والله مانطيتك بنتي
- ليش يولي بنتج اني شقصرت وياهه !
احسن عيشه معيشهه
- بنتي صارت ثار مرتك اليوم عدت بسلامات باجر شنو اليضمن ما تاذيهه بالاكثر ! شمدريك ماتاذي الطفله هم
- يولي اني موجود ماخليهه تاذيهه والله ثقي بيه اخذلهه حكهه ماعوفهه تعدي
- مااقتنع بهالحجي ماقتنع
لان شمهما تسوي من عقاب انته تزيد كرهه اكثر وحقدهه على غاليه
ايوب اني مو غشيمه وادري كلش زيين
المره عانت ما عانت من سوالف قبل ووصلت لهالحد انها تطلع اذيتهه ببنتي

- ههههه حلوه وكاد حلوه منين ماادير نسلها حلو وكاد حلوه بس هاذي ايمتى تفتح عينها وندحك لونها ! مادحكتوه ؟
- انا دحكتو يابه عيونها بلمعه صفار وامي حكتلي تتغير بعدين جايز
- ايييه اييه لاحكين ندحكها
شلون حالك يابه مايوجعك شي
- الحمدلله يابه بخير والوجع مسكن على الحبوب
- شده وتكضي ياعيني ماعندك الا العافيه
-الله يعافيك يانظر عيني
- اسامه راح يضل هين ؟
- اييه يابه خطيه هو رجع الفجر من المطار وبوجهو علينه
- زين عجل امشي حدرو وانتي ارتاحي

بوسهه وطلع رحت وراه وكلتله ..
- عيوني اخليلهم هالغرفه الهم واحنه نصعد فوك بغرفتهه
- دومنا متهجولين
- هههههه شلون لعد مو خطيه الولد هم يريد ياخذ راحته ويستحي منا
- يلا يابه كيفك سوي اليعجبك حسين ايمتى يرجع ؟
- كال الخميس
- زين زين حضري الاكل وانا شويه وادز اسامه حتى يرتاح

بوسته وطلع ورحت اسوي الاكل
وكل شويه غاليه تصيحني وتسألني شلون انوم البنيه وهيج زين ارضعهه !
وشلون ابدللهه واني اعلمهه ورايحه جايه
بينها والمطبخ ...

اسامه حطيتله الاكل بالغرفه وعفتهم ياكلون
وحدهم .. وهو جاب الصينيه وتشكر مني
وراح للغرفه ينام ..
اني هم خليت مخده على القنفه وغفيت
تالي كعدتني الشيخه وتكولي صار المغرب
وام جراح هم جايه تريد تسلم على غاليه

اسامه سلم عليهن وطلع واني هنا صليت
وباخر سجده رفعت راسي ودخت.
ولعبت نفسي اريد اتحرك من مكاني ماكدر
انتبهت عليه الشيخه واجتي كومتني
غسلت وشربت عصير كلت خاف هبوط
بس نفس الشي احس جسمي راخي
وصيت الشيخه اتضل هنا يمهه بين مارتاح شويه وبالكوه صعدت الدرج وذبيت نفسي على الفراش ..

ضليت مغمضه واحس جسمي صار حار
وراسي بوخ ماكدرت اتحرك وانزل ضليت بالفراش وغفيت وتالي حسيت على صوت الشيخ يكعدني ويتلمس بوجهي ..
باوعتله وابتسمت لزمت ايده وهو يكولي ..
- خيرك يا يابه طمنيني تين
- تعبانه بس هيج
- ليش شنو الصار عفتك بعافيه
- مادري بس صليت ودخت شويه
- اكلتي ؟
- اي
- جسمك حار اخاف بدايه افلاونزا وتغير عليكي الجو هاليومين
- اي يجوز ليضل بالك
اسامه رجع
- ايييه تركتو كاعد هو و جراح والتوم
مكابلين البنت ومن ايد لايد مخليها تفتر بينهم
- ياعيني فرحانين بيهه
- اييييه والله فرحت كلوبنا هالمِزنه
- تعشيت حبيبي
- اييه تعشينا كلنا مشاوي سووها الولد
- بالعافيه
- ماتنزلين تاكلين تغسلين شويه تبردي جسمك
- لا ماريد خلي نام لو عندك شي تروح ؟
- لا يابه ساعه عشره بعد ماضل عندي اهم منك

ابتسمت وهو راح طفى الضوا واجه نام يمي
جربايه غاليه ام نفر بس عريضه واخذتنا راحتنه بيهه ..
جنت نايمه على ايده وهو يمشي ايده بشعري وكالي ...
- تين بس تتحسن غاليه هالكم يوم وتتعلم على مداراه بنتها وحدها اخذك لدكتور عيون
زين وصفوه الي بالرمادي
- مابيهه شي عيني زين نظري
- لااا الثانيه اخليه يرجعها الك انا مقدملك بمركز الاعضاء واكدر احصلك القرنيه بس كنت اريد الدكتور الشاطر وهذا وصفوه الي شاطر بالعمليات ونروح نحكيلو السالفه من اولها
- خالد ميحتاج حبيبي تعودت عليهه وماضرتني بشي
- انا ماارتاح يولو الا اردلك هالدين
صبرت هالايام كلها لان فلوسي كانت كلها مجمده هين وتالي صارت سالفه ولدنا
بس انا مانسيتهه لعينك ولا يوم والحين صار وكتها ترجع
- ياعيني والله مايحتاج هم تعال روح وراجع لدكاتره وهوسه عمليه وصرف وقلق خلينه هيج مرتاحين شبينه
- يولي لا تجادلين
- ماريد والله اخاف يروحون يسكطوهه خليني هيج مرتاحه عفيه
- ول انا اسلمك لدكتور اثول الا مااتاكد منو يلا وهذا بس نروح نفحص عندو ندحك شينصحنا
- خالد والله اخاف يعني هذيج الايام هم تنعاد مال الخيط بالعين يبوو والله توجع وادك بالكلب عوفني هيج مرتاحه
- من يقفل هالراس بعد يعل كلبي
- اييي هسه غير احجيلك الي بالي
- تين نمشي ترضين ما ترضين
- الله كريم
- عزمت اخياتي بكرا على الغدا
لان ذبيحه المولود بكرا ان شاء الله نذبحها
وراح اذبح اثنين وحده للغدا والثانيه لوجه الله نوزعها
- ان شاء الله
- يولي جسمك حار انزلي غسلي
- مابيه حيل والله خليني هسه انام وارتاح
- وتنامين بهالحراره !
- خالد والله مادري شبيه بس جسمي راخي
ومابيه حيل اتحرك

شال الغطى ووكف وجر ايدي نزلت رجلي ووكفت بس مجلبه بايده احس وجع برجلي
وراخيات .. ضل ساندني ولازم ايدي
و نزلنه وكف يمي واني اغسل وهو يشل مي ويخلي على ظهري وراح جابلي بندول
وحبايتي مال الكلى الناسيتهه شربتهن
وضلينه كاعدين بالهول ماقبل نصعد
كال نام هنا ..
وراح جاب فراش ونمنه بالهول
يمي نجانه مي كل شويه اغسل
وهو يبوس براسي ويتلمس ركبتي ومانام كل شويه يسألني شلون صرتي شيوجعج ؟

مادريت شوكت غفيت بس حسيت على صوت البنيه تبجي وصوتها عالي
كعدت وباوعت الشيخ ديصلي ..
رحت للغرفه ودكيت الباب ...
- غاليه يمه بنتج شبيهه
- يمه شدراني شسالفتها دخليك احدري دحكيها ماتسكت

دخلت وشفت اسامه كاعد ومخلي ايده على راسه وصافن عليهن وكالي ..

ليش حجيت هالحجي وادخلت بي !
ليش مااكتفيت بطلعه بنتي منهم ليش لحيت وياه وهيجت مواجعه !!

ضليت الوم بروحي وافرك وجهي واستغفر ربي .. ايدي ترجف وصوته باذني بعده
من صاح تسالين ليييش !! كأنه فجر الي كاتمه بصدره هالسنين فجرهه بعتب ..
ادري لو طال هالحديث جان رجع عاتبني ليش ما رحتله ! ليش ما ردته بحياتي بعد !

اليوم اسأل نفسي شتالي هالقدر !
وين ناوي يوصلني !! سنين هو شايلني من روجه لروجه ما رسيتلي على بر الا وشالتني روجه لبعيد وذبتني بنص التعب والدوخه

كلشي اسأله لنفسي ماعرفله جواب
من يوم يومي ماعرفتلهن جواب
بس متأكده من شي واحد
وهو اني ماريد اشوفه تعبان ووحيد بتالي عمره
وهالشي هو الي خلاني اتمادى بالحجي واتجاوز حدودي

من اشوفه اشوف حسين بي .. هواي مرات
سألت روحي شعتبره هسه بتالي هالعمر؟
ولكيت روحي تجاوب مقامه بمقام حسين
لا يزيد عنه ولا ينقص ...

شديت حيلي ووكفت ومشيت بثقه وبدون مايبين على ملامحي شي من التعب ..

رحت لبنتي اطمنت عليهه وخابرت على الشيخ طمنته وكلتله راح تجي يمنه وعليت صوتي حتى تسمع ام اسامه وماتعترض بعد
ورجعت حجيت ويه اسامه وهو كال الفجر اني يمكم ...

وصيت ام اسامه ترجع للبيت وتحضرلي غراضهه ودزيت وياهم حر وضلينه بس اني وحسن بالمستشفى .. هو كاعد جوه واني يمهه
سألتني ..
- يمه شنو قلتيلو لعمي
- كلتله تعرف الصار لبنتي ليش
كلي اي اعرف
- شلون يعرف ! هو مادحكنا !!
- هههه هذا عمج يشم الخبر شم
- ايييه وشصار
- كال راح ياخذلكم بيت وتكعدون انتي واهل اسامه وحدكم وترتاحون واعتذر على الصار وكال تبقى بتكم اميرتنا مدللـه ان شاء الله
- يمه وانتي رضيتي اطلع بيت وحدي ؟
- اي رضيت هيج احسن بنتي احسن ما كل يوميه هبطه اكعدو واستقرو وحدكم
- منو كال عمتي ترضى تطلع من البيت
وتعوف زوجها وعمتها !
- مو وايحه ويه ابنها بعد شكو
- مادري يمه مااظن اسامه يرضى
- ابوه يقنعه ولا تحجي لاحد الصار الي يسألج كليله دخت ووكعت زين يمه
- ايييه افهمو لهالشي افهمو
اتستر على راس البله هالحاقده الغيوره والله يمه انها تغار مني والله
حسره مالبست ونزلت متأنقه ورجلي حدري
الا ما تدحكلي بطرف عينها وتعبس شكلها
وماتفوت فرصه الكلمه اذا عمي مو حدرنا
- ميخالف يمه طنشيها
- انكصت ايدها ان شاء الله شلون عتت شعري عبالها انا مثلها انفخ بهالوجه وادك الحاجب والزك الشعر
-ههههه
- والله كاتلتها الغيره
يمه انتي ماتدرين هي ساكنه مراكز التجميل
ماتعدي شهر اذا مو رايحه ومسويه شي لنفسها والله حتى رجلها تروح تلمعها بالمركز
والشعر دومها فاكتو وبس ينزل الصبغ مشت غيرتو جديد تره حتى حراجبها هاذي تاتو يمه
مامنتبهه عليهه !

- خلي تسوي شتريدين منها مو زين تعتني بنفسها

- عجل انتي شسالفتك يحضي حمره تخجلين تحطين وهي كحل عينها ارقى من كحلي
والحمر الي تحطهن والله انا مامخليه منهن
كلو فاقع يجذب العين وهالايدين تخرخش بالاساور وانتي كلاده ماتحطين بركبتك
خلف الله على حلقه ومحبس ابوي الي مزينات ايدك مادري المن تجمعين هالذهب وماتلبسين

- هههههههه والله اضوج اضل مخرخشه النهار كله واني اشتغل قابل كاعده حتى اضل مطنطشه من فوك لجوه بالذهب

- لااا والله انتي مو هاويه غوا

- همزين تعرفين حتى تسدين هالسالفه

- لااا والحلو بالسالفه كل هالعنايه والمكياج واللبس والعطور وعمي هههههه عمي ما يدحكلها والله
ههههههه ااااخ يايمه بطني بس والله ماكدر اسكت ههههه يمه عمي مطنشهه يدحك التلفزيون وما يدحكلها والله
مرات احسبو متزوج المكتب كثر ما يكعد بي
والله حتى نوم ينام هناك
ههههههه وهاذي حاركه نفسها باللبخ والصبغ وما هزت منو شعره هههههههههه
والله لو غير رجال كان مشى على عمى عينو وراهه لان والله هي حلوه بهالعمر مو مثل غير ناس لون الاحمر ماتلبسو

- هههههه ولج شلحيتي وياي ابوج وراضي انتي شكو

- من حبي لابوي يمه اريدلو الزين

- هسه على اساس اني مقصره وياه بيتي مو اشكال البس وامكيج واتعطر لو هاي ناسيتهه

- والله ما يجي شعره من الي هاذي تسوي بنفسهه

- يعني مره تحب تعتني بنفسهه انتي شحارك حمامج

- احب اضحك عليها يمه هسه خليني اضحك
حتى هين تسكتيني

ضحكت وعفتها براحتها تفضفض
اخوتها كل شويه واحد متصل يحاجيها
و حر من رجع جايب وياه العشه
اني مانمت الليل كله كاعده للفجر دك التلفون
ورحت اخذته شفت اسامه يتصل
جاوبته ودليته رقم الغرفه وشويه واندكت الباب فتحتله وهو دخل سلم عليه وراح لغاليه
دنك بوس راسها وضل يكعد بيهه
من كعدت طلعت وعفتهم وحدهم
رحت اشوف الطفله بالخدج
ودخلت وياي الممرضه بس شفتها نايمه
وطلعت ...

للساعه ثمانيه راح اسامه جاب الطفله وضل مخليهه بحضنه ويتمشى بيهه ويسألنه شنسميهه !!
غاليه سألتني .
- يمه برايك شنو الاسم اليناسب بنتي
- والله يمه مادري اسألي عمج اشوف احسن اذا انتو ممقررين فد اسم
- احنه بالنه اسماء بس ولا واحد ثبتنا عليه

خلي نسأل عمي انا بنفسي اعرف شنو الاسم الي يعجبو

اسامه هم وافق ان يسأل ابوه عنها وهمه اجوي بالتسعه جايبين ريوك ..
وهديل جايه وياهم وجايبه علبه ككو وزعت علينه وانطت الباقي للممرضات ..
سألو ايوب على الاسم وهو اخذهه بايده وكال ..
- طيف او مزن اختارو واحد منهن

غاليه باوعتلي اشرتلهه مادخل عاد اسامه كال ..
- غاليه نختار مزن حلو هالاسم عجبني
- يلا نختارو مِزن
- لعد يابه انته كبر باذنهه وسميهه مِزن

جان ايوب يبتسم ويتلمس بوجه الطفله
ووكف وصار يكبر باذنهه وسماهه
مِزن وصار يكوللهه ...
- انتي مِزنه مطر طيبه بعمرنا صرتي
مبارك عليك ياابو مِزن تربى بعزك يا يابه

اسامه بوس راسه واخذ بنته بحضنه وراح يم غاليه وكاللهه ..
- غاليه يعني مترجعين لبيتنه. !
- خليني عند امي لحد مايرجعلي حيلي
- وشلون اشوفكم وانتو هناك والله ميصير
مو امي موجوده هنا واداريج وهديل يمج

قبل ما تحجي شي غاليه كبل ايوب كال ..
- لاا يابه خليهه يم اهلهه البنيه ترتاح وماينه عليهم اكثر وانته روح عليهم شكو بيهه
يكيفون بيك الولد
- يابه زحمه روحتي عليهم كل يوميه

رحت لاسامه وكلتله ..
- ليش زحمه ابني مو صرت واحد منا وبينه
البيت بيتك واني مارتاح اذا مو بنتي كدام عيني هي هالوحيده عندي ومااصبر اذا ماشوفهه كدام عيني واطمن عليهه
- زين يعني شكد اضل يمكم
- الله كريم شوكت ماتكوم على حيلهه نرجعهه لبيتكم
- والله عمه اني ماعندي مشكله خلي تضل بس اني هم اريدهه كدام عيني وبنتي شلون اضل بعيده كلشي ماشوف منهن
- اي مو كلنالك ياعيني ضل يمنه شكو بيهه
مو ابنه انته .. وبيتي فارغ اكعد على راحتك هناك حتى حسين ماكو عنده امتحانات منا لما يكملهه ويرجع فد اسبوعين وان شاء الله لهذاك الوكت غاليه اطيب وترجعون براحتكم

باوع لغاليه وهي شاورته وكال يلا ميخالف
بين ما كملو الاجراءات وفحصتها الدكتوره
وجابو الادويه صارت ساعه ١١ خابرني حسين وكال اني بالطريق انتظروني جايكم

ربع ساعه ووصلنه سلم على الكل وبس ايوب تحاضن وياه واخذ البنيه شالهه وكبل كال ..
- ول راح تضلين يم خوااالك يولوو راح تشبعين دلال وتسكطين حالنا

اخذتهه من ايده ولفلفتهه زين وهو كال ..
- يمه الخميس بالليل يمكم لازم اسهر حدر هالشحمه اريد ادحك انا الي اخبلها لو هي تخبلني
- ههههه كل الهلا يمه ترجع بالسلامه
- الله يسلمك
- راح ترجع للقسم هسه
- اييه واصلاً الولد واكفين هين ينتظروني
بسياره صاحبي اجيت
- يلا لعد يمه روح عيب تخليهم مشتولين ينتظروك احنه هسه راح نطلع
- يلا ماشي .. يمه يومين وارجع اريد الي تعرفيه بالي محضرته
- تدلل ياعيني تدلل

بوسني وراح سلم على ايوب وطلع
واحنه وراه طلعنه ..
حر رجع بسياره حسن والغراض مخليهن عنده واني وغاليه بسياره اسامه
كاعده ليوره ومخليه البنيه بحضني
ودعناهم وطلعنه ....

غاليه جانت ممرتاحه بكعدتهه بسبب عمليتهه
تلوب عاد اسامه طبك ورجع الكرسي لوره
وخلاهه مرتاحه وكاللهه..
- مريتي التعبانه راح اطلعلج اغنيه تعدل مزاجج
- ياريت والله خليني انسى هالبطن
- اسمعي اسمعي

شغل اغنيه .. يابنات يابنات
اول مره اسمعهه وجانت حلوه كلش وغاليه تضحك ويه الاغنيه و هو ضحكته ماليه وجهه
طول الطريق وهو يسألهه زينه مرتاحه
ويرجع يسألني مزنه كعدت !جاعت !

وصلنه منطقتنه واول ما تلكانه جراح
دينزلون غاليه جان يصيح علينه ..
- ول انتو مطلعيهه مكشفه من بغداد لهيييين
عمتي وين بالك عنها !!!

خزرته وهو ضل يستغفر ولازم ايدهه واسامه ضاج وكله ..
- بسيارتي كاعده ماعليهه شي والجام مضلل منو يشوف هسه وكت هالسوالف متشوفهه بيا حال

مارد عليه جراح واخذوهه جوه والشيخه اجتي علينه اخذت مني البنيه وضلت تسمي عليهه ..

اسامه دخلهه بغرفتي وطلع وضل جراح
يم الشيخه يبوس بالبنيه ويشمشمها
رحت على غاليه جان تكولي ..
- يمه اسامه اخذ على خاطرو ترا انا اعرفو من نبره صوتو
- ادري يمه ادري
- هسه شدعوا يعني هالاعصاب هو انا الحين مكلوبه خلقتي على شنو يدحكون
- هذا اخوج وهاي اعصابه شتعرفيه
- اففف يمه فدوا خليه ينطيني البنيه ويروح لاسامه لا يخليه وحدو

رحت لجراح اخذتهه من ايده ودزيته لاسامه
وره شويه سمعت صوت الشيخ يصيح
- وينهن الحبيبات وين روح بيتنا

رحتله وهو حضني وكالي ..
- كبرنا يولو صرنا اجداد
- الف الحمدلله الي عيشنه هاليوم
- ان شاء الله يوم ماادحك ولد حسين بيدك
- يوم السعد هذا

دخلنه لغاليه وهو دنك حضنها وبوسهه
وهي شالت البنيه خلتهه بايده وكلتله ..
- بنيتي مِزنه يابه
- ياااحلاتها وحلاه اسمها يولي غاليه ذكرتيني بيوم ماخذتك بيدي بنص الليل وانتي بنت سبيعي واصغر منها .. والله ومشى العمر بالعجل وخلاني ادحكك اليوم ام
- يااابه والله راح ابكي
-هههه يولوو افرحي الحين انتي ملكتي ضنى وباب من الجنه
الله يهنيكي ببنتك ويجعلها مِزنه خير وسعد عليكم
- يابعد عمري يا يابه الله لا يحرمني منك
يابه حلوه بنتي ؟