-انته ذكي
-هههه
-والله انته ذكي مثل امي وعقلها تعرف شلون تربح كلشي بعز اعصابها
- العقل مريود حبيبي الاعصاب تخسر بس العقل يربح اني لو مانازل وعايفج جان ضلينه نتعارك وتطول بينه بس عرفت اتصرف
- شلون انته اعصاب وشلون هادي بنفس الوكت ؟؟
- ضبط النفس هذا تعلمته بمهنتي الاختبارات النفسيه الي مرت عليه بكد اختبارات الطيران وساعاتهه شكد هسه اني طاير ٢٠٠٠ ساعه
حوالي ٦٠٪؜ منهن اختبارات نفسيه وسيناريوهات وضغوط نفسيه وجويه وغلطه وحده او تسرع واحد يرجعني لنقطه الصفر
فتلكيني كتوم وطويل خلك ومستمع بدون استفزاز

تلمست لحيتو وقلتلو ..
- هنيالي بيك
- غاليتي والله اعرفج انتي مثل خيط الحرير
ناعمه ورقيقه كلب مااذيج اني اضل ادرايج لان اخاف هالخيط ينكطع واخسر حريري
- يابعد عمري

دنكت بوست راسو وعيونو وهو ضل مخلي راسو على صدري ويحكيلي ..
- هسه يلا نبضج هدأ
-ههه تطمنت وعقلت
- انتي حلوه جسمج ترف مربرب وترف عبالك الزم بكطنه فقدت بي ارجع واكول حقهم اهلج من يضموج
-هههههههه صدتني انته
- نصيبي بعد على كد نيتي اجيتيني
- وانته هم على كد نيتي مرتاحه وياك والله
- شكد تثقين بيه ؟
- بكد صبرك وياي
- زين لعد كومي اريدج تنامين بحضني هسه

فتحت عيني بوسعهم وانا افسر هالكلمتين
على نفس الصار كبل ساعتين .. بس مابينت شي كمت وياه للفراش تمددت وهو راح طفى الاضويه ونزع كل ملابسو وحدر تمدد
وصار يشيل مني كل قطعه وبعدها حكالي
..
- تقربي يلا
تقربت وصرت بنص حضنو جسمي كلش طاخ بجسمو هو هادىء وبس يتلمس بشعري وحكالي ..
- شدتفكرين ؟
- ولا شي
- لاا احجي
- بصراحه افكر ليش ما كنت هادىء هالشكل بالاول
- جنت فاقد واصل مرحله يعني لو ابو العقل مايسيطر بيهه
- فهمت
- بس هسه هدوء تام عندي اكدر انومج هيج لباجر ماطخج
- زين شنو بنفسك ؟
- الي بنفسي ارتاح وياج شلون مايعجبج
- اريد انام والله راسي مصدع
- من البجي سويتيهه مناحه جان هسه اني شابعلي فد
-هاا شو سكتت
- نسيت بعدج حبابه فقيره مايصير تسمعين هيج حجي
-ههههههه حياااال
- خلي نام باجر زين اذا لحكنا على الطياره
- وقت تلفون
- مايحتاج موقت عقلي

بوس خدي وعدل الغطى وعلى اثر الهدوء بينا كدرت انام ...

حسيت على صوت يمي يصيح باسمي وانا النومه بعيني عاد بالعجل اتلفلفت وصحت ..
- عفيه بيت مايخلون واحد ينام
ول احتركتو بدون غاليه احتركتو
- غاليه كومي يلا ورانه طلعه
- ايييييه ماتطلع كاضبتك انا
- تكومين لو شلون
- ول خييي خلني انام بروح اعزازك

حسيت بايد على صدري بالعجل كمزت وحكيت ..
- يووول ويييين اتصخمت
دحكت اسامه يضحك وانا حكيتلو ...
- مو بالقصد بس مادري مادري اييه والله مادري
- شبيج نسيتيني
-اييه ولله نسيتك كل ظني هذا جراح
- وجراح شجابه يمج هسه متكوليلي وين عقلج
- مو انا معوده انام حدرو وهو يكطع نومتي كبل مايطلع الصبح وترجع تكملهه جدتي
-هاا وانتي هالاسطوانه يوميه تعيديهه عليهم
-ههههه ايييه اسفه بعدو تأثير النوم بيه ماقصدت احكي عليك
- هههه والله انتي حتخبليني بيج بس شغله حلوه
-شنو
- ماادفرين بنومج
-ههههه لااا عاد مو لهالدرجه اصير
-اييي الحمدلله بهاي كعد حظي

ضليت اتثاوب وهو يدحكلي ويضحك دحكت الساعه بالعشره قلتلو ..
- ايمتى كعدت
- قبل ربع ساعه
- زين ايمتى رحلتنه
- العصر
-عجل مكعدني من الحين شعدنا ماخليتني انام ارتاح صارلي يومين تعبانه
- ضجت وحدي كلت خلي اتونس شويه قبل مانطلع
- مااعاركك بعد لتخاف
-ها قفلتي على العقل
- ايييه سديت باب الخبال بعد رجعتهه نايمه
- زيين لعد تعالي نجرب وكت العقل شلونج
- ههههه لااا مو عاد كل شويه
- شوكت لازمج اني هي مره غير عريس يشبع وينهد حيله انتي كضيتيه تنعوص وياي
- زين زين على الاقل خلي اغسل
-مو هم تضلين ساعه بالحمام
-لاااا مو حكيتلك خلصنه بعد
- داشوف شلون يلا انتظرج هنا

رحت غسلت وفرشت اسناني وتعطرت وضليت واكفه كدام المراه وارفع ايدي وانزلها ويه كل نفس واحكي لنفسي اهدي واسترخي وتعقلي ماكو شي ماكو شي
طلعت ومشيت حدرو وانا اردد بداخلي ماكو شي اطمني اهدي ...
هو هم تهدا وياي بكل شي وعلمني على كل شي يريده وصار هالمره تقربه براحه وكل شويه يحكيلي عفيه وضلي هالشكل هاديه وكلام الغزل مانزل من لسانو .. بهالمره
فهمت حكي امي ومقصدها بكل شي فهمتو الي على هالعلاقه .. كدرت ادحك الجانب الثاني غير الرعب والرهبه منها ..
دحكت اسامه من بعدها شخص ثاني
كثر ماكان اسلوبو حلو ومتفهم وياي كثر ماصار ازيد وشاعري وكل الحنيه بي

سبحنه سوه وحكالي ننزل نتغدا ونطلع نتمشى
ردت البس عباتي والنقاب ماخلاني حكالي
ماتلزم بعد انتي مرتي وياي وهنا محد اكو من اهلك براحتنا نطلع وهي كم ساعه ونمشي للمطار ..

لبست بنطرون قماش وستره طويله وحذاء رياضي ناصي ونزلت وياه ايدي بايده بس مستحيه واسألو كل شويه لبسي زين اوضيك او مكياجي كثير وهو يحكيلي كلشي زين ومناسب لو بيه فد عيب مااطلعك الا تغيريه

تغدينا وتمشينه براحتنه بالحدايق وتصورنا وساعه ٣ طلعنه للمطار .. بالطريق سألتو ..
- اسامه هالسياره لمنو ؟
- سيارتي
- عجل والبيضه العاليه لمنو ؟
- هذيج مال ابويه وسالم همه متشاركين بفلوسهه .. هاي سيارتي الجارجر على كد فلوسي رخيصه وكشخه سياره ابويه يراد اجمع فد سبعين راتب يلا اجيبها
-هههههه عجل ابوك شلون كدر ياخذها
-ابويه يحفر الكاع ويطلع فلوس
-لااا والله
- والله شبيج لحد هسه اني ماعرف ابويه شنو مصدر فلوسه غير التقاعد يعني
بس السياره تشارك هو وسالم بفلوسهه لان كلش غاليه وسالم دك رجل الا ياخذهه دفع الي عنده وابويه كمل الباقي واشتروهه
- الله ينيهم بيها .. بس سيارتك احلى
- موو صح اكوللهم احلى يكولون شبابيه مال طربكه
-هههه لاا حلوه بالاخص لونها الاسود محليها اكثر
- السياره وصاحبها بايدج حبيبي
- يابعد عمري تسلم

تذكرت امي ماتصلت وطمنتها .. فتحت الرسايل وفكرت شكتبلها ؟؟
كتبتلها .. ' امي ياروحي احبك '

ضليت انتظرها وتالي ردتلي ..
' ياعيون امج انتي ربي يبرد كلبج مثل مابردتي كلبي تهني حبيبتي '

احب من امي انها تفهمني بكلمتين وماتحرجني بالكلام .. تمنيت اصير مثل امي
واتعامل بنفس عقلها وحكمتها بزواجي ..

كبل مانصعد بالطياره خابرت على جراح
حكيتلو ..
- هاا خيي اشتااكيت
- غلوووي شلوونج عيني والله ورحتي
بعد ماادوريني تلفوني فارغ بدونج
- ييي جراح لاتخليني ابكي الحين وبعدين انته بس اصبرلي ارجع من رحلتي الحلوه بتركيا واسطرك بتلفوناتي
- ايييه تسافرين بدوني يابذاات زماان والله انا الي علمتك على السفر يا ياسمينه
- سندبادي طيارتي بالانتظار باااي
- هههه روحي افلتي

ضحكت وسديته وكضبت ايد اسامه ومشينا للطياره ... كعدنا وهو صار يحكيلي ..
- شوفي هسه اني عقلي ديفتر هناك وره هالباب

دحكت على مكان اشارتو وقلتلو ..
- هين مكان السياقه
-هم كالت سياقه بابه هاي مكان التحكم غرفه الطيار المفردات تفرق
-هههههههه والله احبك من تتعصب عليها
- ههه انتي من تحجيها تحركين كل تعبي
- سكتت يابه سكتت
- شوفي اني حجزت بهالدرجه حتى اضل قريب منها اتعقد من الكعده بالدرجه السياحيه
-شدعوا عيني كلها تطلع لنفس المكان
- الامتيازات تختلف حبيبي اهم شي عندي مكاني بالمقدمه
- هسه روحك تلوب على القياده
- دافكر بحسابات الرحله هسه كلهن ديطلعن كدام عيني .. اني مساعد اول لكابتن الطيار
بهاي الرحله لتركيا يسموهه رحله قصيره
يطلع بيهه بس مساعد اول من الرحلات المتوسطه والطويله يطلع الكابتن وياي
فهسه لو انتي ماكو جان اني ماخذ الطياره وطاير وحدي بهالركاب
- اممم زين صعبه شغله القياده بيها
- الشغله حسابات اكثر من كونها قياده
يعني هي تشغيلتها سهله بس تركيز يحتاج بقراءه الاحداثيات
- زين وهاي السماعه الي تلبوسهه شنو فايدتها؟.
-هاي لان الطيار يضل يتواصل ويه مركز التحكم على طول الرحله بدونهم محتمله هواي حوادث
-يعني شنو يحكولكم
- مثلاً ارتفع هلكد درجه بعد هلكد مسافه انخفض هلكد درجه هذا كله لان اكو طيارات ثانيه راح توصل هالنقطه بفلان دقيقه فاني مثلا انزل حتى هي تمر او همه ينزلون وحده حتى اني امر وهيج تكمل الرحله
شوفي احنه مسوين السما بشكل خطوط طول ودوائر عرض ونقاط احداثيه مقسمه الي هواي منها ومفصله عند المركز واحنه عدنا الي يفيدنا بس والباقي نتلقاه منهم بالصوت
- هااا زين عجل متكدر تتحم بالطياره وحدك بدونهم
- اكدر بس لازم اتحمل مسؤوليه واي شي يصير اتحاسب قانونياً عليه وهذا شي خطر لان بالسما صعب السيطره بدون احداثيات اذا اني قررت احسبها واستخدم الاجهزه الي عندي احتمال تسعين بالميه اسوي حادث تصادم بغير طياره لان سرعه الطياره مو مال تتلافاها ولو صار هالشي وغيرت عن مسار خط الطول راح اتسبب بذعر للطاقم والركاب وهذا كله ينحسب من نقاطي ويضعف درجتي
- يممممه السالفه مو هينه
- حتى تبطلين تكوليلي سايق شفتي شكد اتعب واركز ذكاء هذا كله ذكاء عقلي مشغله عشره عشره
-هههههه فدييت ابو عقل انا
- شوفي هسه راح احجيلج كم شغله بعد هنا محد يعرفها
- شنو اييه احكيلي حتى افيك بيها على جراح
-ههههههه اسمعي . . اول شي هنا ليش ممنوع التدخين تعرفين ؟
- غير حتى ما يصير اختناق و
- لااا لااا هاي جذبه هيج نكدر نكول جذبه اقتصاديه .. شوفي هنا اكو فلاتر تنقيه للهوا
هاي بكل الاحوال هي تبدل الهوا الداخلي بالي بره بشي متنظم يعني ماكو شي اسمه اختناق لان الهوا يداور بس شنو اذا صار تدخين تتوسخ بسرعه وتبديلهه غالي فمنعو التدخين حتى ادوم فتره شغلهه للفلاتر ومايصرفون عليهه
- ياااا والله انهم لاعبيها عدل
- اييي وبعد الموبايل ليش نقفله ؟ حتى متتعارض الذبذبات ويه الرادار واجهزه التحكم الخاصه بالقياده مو علمود ماكو شبكه وهو اصلا التقنين عدنا مسوين حاجز عن التلفونات بس للامان اكثر
- حلووو وبعد بعد احكيلي
- هواي هنه .. زين اسألج منو الي يشتغل اكثر بالقياده الكابتن لو المساعد ؟
-الكابتن
-لا المساعد ..

الكابتن هو صاحب المسؤوليه بالرحله اكثر شغله حل المشاكل الي تعارض الرحله بس القياده وقراءه الاحداثيات وكل الحسابات المساعد الاول يسويها قبل جان اكو مساعد ثاني هم يعني نصير ٣ بس بالطيارت الحديثه تخصص بس اثنين الكابتن ومساعد الاول
-عجل شنو شغلتو الكابتن كاعد
-كلتلج المسؤوليه عليه وضبط الحاله النفسيه اذا طرىء اي حادث او خلل وكلتلج هو بس بالرحلات المتوسطه والطويله يجي ومرات ينبه على المساعد الاول ببعض الشغلات ويعلمه اثناء كل رحله يعني احنه نستفاد من خبرته
- زين يعني اكثر الرحله عليك
- اي بس المسؤوليه الي عندي اخف من الي عند الكابتن
- كم ساعه تحاج وتصير كابتن ؟
- هنا احتاج ٦٠٠٠ ساعه اكو كباتن يصيرون ب ٤٠٠٠ او ٣٠٠٠ ساعه بس بغير دول يعني كل ماانخفض مستوى شركه الطيران تنخفض ساعات الكباتن اكو عندج نيجيريا تاخذ ٤٠٠ ساعه يعني اني لو عدهم جان ابو الكباتن هسه
- ههههه بس اكيد الراتب اقل
-اي اكيد بس تدرين الكابتن شكد يطخ راتبه
- شكد
- احنه نحسب ع الساعات يعني ياخذ على رحله ذهاب واياب ١٥ ساعه مثلاً فد ٧٠٠٠ دولار مرات بغير شركات يحسبوها ٥٠٠٠ دولار يعني اذا يريد يتقاعد يطلعله فوك الميه او ميه وعشرين الف دولار
- واوووو رقم خيالي
- شي بسيط هذا حبيبي هو الكابتن من يطلع تقاعد جامع اضعاف هالمبلغ
- الله يزيدهم .. زين وانته شكد يحسبولك
-هو على العموم حسابنه يصير على الساعه
اذا رحله بس ذهاب احصل ٣٢٠ دولار وتتزايد اذا صارت رحله ذهاب واياب مرات توصل ٥٠٠٠ اذا رحله طويله وهاي يحسبوها الي شهرياً شكم ساعه اطير يجمعوهن واخذهن مرات يحسبوها كل كم شهر حسب وضع البلد والشغل
- الله يرزقك اضعافهن ويهنيك بيهن ياعيني
- ياعمري انتي

صار المضيفات يقدمن الاكل وسلمن عليه حكالهم هاذي زوجتي ورايحين شهر عسل هنه ضلن وحده تدحك للثانيه وحكالهم مانريد اكل وراحن ...
قلتلو ...
- خير خيرر شهالنظرات شبيهن هذني
- هذني خفيفات عوفيهن شكو حاطه بالج يمهن انتي تاج راسهن
- يمه الله يستر على كلبي شلون يتحمل هالاشكال وياك كل العمر
- ههه كلبج مايتحمل ادري ساعه الساعه تنفجر قنبلته
-ههه والله عقلت ليش متصدك
- حذر اني حذر .. شوفي هسه الاكل راح يقدمون لطاقم القياده غير شي
-ليش
- حتى خاف الاكل الي عند البقيه بيه شي او مسموم مايتأثر بي الطيار ويضل مسيطر
ووجبه المساعد تختلف عن وجبه الكابتن
- هااا حتى هين حذرين
- لعد شلون .. اني مافد يوم اكلت منهن ولا بأي رحله
- هم حذر ؟
-اي ولان ماحب الاكلات البارده وسريعه
احب ادلل نفسي بالاكل فكل مانهبط بمكان
اروح اجرب مطعم ونوع اكل مختلف
- ياعيني على اليدلل نفسو
-ادللج هم بعد صرتي شريكتي بكل شي

ضحكت وتلمست ايدو وضل يدحك للساعه ويحكيلي بعد هالكد دقايق ونهبط والحين احنه على فلان مكان حافظ كل شي يحكيلي كل الاحداثيات اقراهه براسي الحين بدون شاشه
هالرحله شابع منها ..

وصلنه تركيا وهو كل مكان نمشيلو يحكيلي هين سويت هالشي عندهم وهين انا تغديت وهين نمت وهين ويه صاحبي سوينا هالشي
وعشنه احلى ٨ ايام هين .. كان عندو خصومات بالمطاعم وكم محل ملابس وحتى بالفندق الي كعدنا بي كلها امتيازات من وظيفتو ..

رجعنه باليوم الثامن بالليل و لكينا فيصل هين تلكانه ومعو سياره اسامه سلمها اله وراح ويه صاحبو بسياره ثانيه ...

وصلنه لبيتهم وعمي تلكانه من باب الشارع
بوست ايده وهو بوس راسي ويبتسم يدحك بوجهي ويتمعن واسامه يحكيلو ..
- يابه مرتي مايجي منها اثنين
- صدكت يا يابه انته اخذت الي تمنيت اخذه
تهنو يابه عسى عمركم طويل وسعيد

اخذ ايدي اسامه ودخلنه تلكتنه عمتي ام اسامه طشت الجكليت علينه وتهلهل بوستهه وبوست هديل وبعدين ام سالم واسامه حكالي جدتو بغرفتها هالوكت تنام ... رحنه عليها للغرفه وهي كعدت وسلمنه عليهه وضلينه ملتمين سوه هديل تسألنه متعشين وهو يحكيلها اي
بس احنه مااكلنه وانا ميته جوع وساكته بس اتبسم بالوجوه ..

ترخص منهم وصعدنا اول مدخلنه صار يحكي ..
- جبتهه ياغرفتي جبتهه ام خشم يابس اخيه جراح صارت النه
- هههههههههه احس هين اريح مكان الي من بين كل الي كعدنا بي
- طبعا حبيبي هاي بيتنه الصغيرون مو بس غرفه عاديه
- احلى وارقى بيت
- ياحلاه ام بيتي ... غاليتي اعرفج رزنه وذكيه بس هم احب انبهج على شغله
- اي ياعيني اسمعك
- كل الي يصير بينا هنا ما يطلع الباب حتى لو نتعارك ننزل جوه متصالحين وهنا تعالي ازعلي وعاتبي براحتج مفهوم عيني
-اكيد هالشي ميحتاج توصي عليه

بوس ايدي وحكالي ..
- بدلي يلا اني راح اوصي اكل
ماردت اتعبهم هسه وادري امي لو طبت المطبخ متطلع منه الا اذا معدده اصناف الاكل
- زين سويت شنو راح توصي
- شنو يعجبج
- غير البيتزا شنو يعني ماعندي غيرها خيار
- ههه والله تحيرين شسويلج يعني مطاعم كلهه لحوم ضلي انتي بس عجين وجبن اكلي
مدري منين جايبه هاللحم بجسمج
-هههههه هذا من الحلويات

- صدك افتحي اول مجر يم جهه اليسره من الفراش تلكين نساتل اخذي اليعجبج
- اييي هين الحكي الحلوو

رحت اخذت وحده وضليت اكلها وانا اطلع ملابس وهو يتصل بالمطعم كمل وراح يسبح
وانا ضليت اخابر امي وبعدين سبحت ومن طلعت هو نازل ياخذ الاكل وكعدنا ناكل براحتنه ..تعودت وياه على الراحه بالاكل بدون تقيد ...

ثاني يوم نزلت لابسه قفطان ابيض ومذهب
وشعري فتحتو واخذت راحتي بالمكياج لان سالم بالدوام .. ونزلت سلمت على الاهل
عمتي لبستني محبس ذهب خفيف وناعم
حكتلي .. الغالي يستاهل يترحب بي بالغالي
وعمي ابو سالم بوس راسي وحط بايدي ورقتين .. جدتو هم حطت بايدي ميه
وام سالم مادحكتها بس من بعيد ردت السلام وراحت ...

بهاليوم زارونا كم حرمه زوجات اصدقاء اسامه من المنطقه واخياتو بس على التلفون سلمن ...
اهلي ثاني يوم زارونا .. عماتي وامي وجدتي وخالتي دعاء ومرت خالي مصطفى والجهال
وصارت لمتنه حلوه ... امي تحضني وتضحك وتدمع عينها بنفس الوكت وتبوسني كل بوسه تحكيلي هاي من ابوكي ومن رماح ومن حسين ومن عباس وعلى عدد اخوتي تبوسني ..
جدتي هدتني ثلاجه صغيره رصاصيه
وامي زوج اساور وحجل
جراح ارسلي لعبه ياسمين بس بطول امي تطلع طرت من الفرح بيها
ورماح ارسلي لوحه
عباس وصكر ارسلو فرشه باسمهم
وحر واسر ارسلو زوج طيور حب
عمتي ام جراح و عماتي مناسك وصفيه
فرشات

امي فرحتني بخبر ان رماح يريد يتزوج
وطالب يخطبون هدى بنت عمي ابو حسن
وابوي حكالو هالجمعه نمشي نطلبها الك

ساعه الي راحو اخذو كلبي وياهم حسيت روحي ضلت عدهم مشتاكه لاخوتي
ومادحكت واحد منهم ..

رجعت ادحك للعبه ياسمين واخذتني الفرحه بيها صعدتها وصرت اخابر اسامه واحكيلو جراح هداني ياسمين وكملت مجموعتي

اتصلت على جراح حتى اتشكرو عليها وهو ما يرد ابد من المغرب لنص الليل انا اتصل
وحتى اسامه مانمت حدرو بالي على جراح
وهو يحكيلي عوفيه مشغول مابيه شي
بس انا اخوي واعرفو ما يطنشني لابد يطمني برساله على الاقل ...

واتصل اتصل لحد ساعه وحده بالليل جاوبني باعصاب ....
-هااا غاليه هااا شكو شتريدين
- خيي وش حكيت انا تهدا بسم الله
-لا اله الا الله
- شصاير وياك انته وين ليش ماترد على اتصالي من الغروب للحين
- غاليه طافره روحي تفهمين انا الحين متهجول بالشارع الشيخ ابوي المحترم طردني من البيت تسمعين طردنننني
.
.
.
يتبع

#شقراء_بغداد

الجزء_الثاني_بارت_٢٢


واتصل اتصل لحد ساعه وحده بالليل جاوبني باعصاب ....
-هااا غاليه هااا شكو شتريدين
- خيي وش حكيت انا تهدا بسم الله
-لا اله الا الله
- شصاير وياك انته وين ليش ماترد على اتصالي من الغروب للحين
- غاليه طافره روحي تفهمين انا الحين متهجول بالشارع الشيخ ابوي المحترم طردني من البيت تسمعين طردنننني
- لاا تكذب انت !
- غاليه ولي ولييي

سد الخط وانا ضليت مصفنه وشويه واستوعب حكيو ورجعت اتصلت طول يلا رد قلتلو ..
- شصاير جراح فهمني شبيه ابوي شسويت انت
- من ذاتو انا ماسويت شي هو الي حاطني بعكلو اليوم
- خيي تهدا باسم الله واحكيلي من الاول شصار شقلتلو انته شحكالك فهمني
- ول احنه كاعدين نتعشى وعين الله علينه
كملنه العشى وتانشرب هالجاي وابوي سألني
تعرف كم مساحه منطقتنا ؟
قلتلو كل حديثه لو نص منها تكصد
قلي بس الشاميه
قلتلو بحدود ٣٠٠٠ كم مربع او ٣٠٠٠ ونص
قلي زين تعرف كم نسمه هين ؟
قلتلو لا والله يابه ماعرف
قلي زين كم عايله هين شاركت رجالها بحمايه حديثتنا ويه بقيه العشاير من هين؟
قلتلو والله يابه ماعرف بالضبط بس كثير شاركت
قلي زين الي شارك من هالكثير كم واحد منهم استشهد وكم واحد تعوق وكم واحد عاش او تهجر ؟
قلتلو يابه ماعرف الا كم واحد من ربعنا مالي علم بالكل
قلي موبايلك عندك ؟
قلتلو ايه هذا بجيبي
قلي محفظتك هين
قلتلو لا بالغرفه
قلي امشي جيبها

رحت للغرفه اخذت المحفظه ورجعت كعدت حكالي ..
اوكف لا تكعد قلتلو خير يابه ؟
قلي محفظتك وتلفونك بايدك تلبس شحاطتك وتطلع من هالبيت وماتعاود الا وانته تعرف جواب كلشي سألتو
قلتلو يابه مايلزم اطلع الحين ابحثها بالنت واجاوبك انطيني خمس دقايق
حكالي ولاا ثانيه تطلع من بيتي ومالك رجعه هين لا على بيت ولا ديوان ولا بيت عم لو عتبت هين بدون رضاي على الجواب
يصير بينا غير حكي
قلتلو .. يابه شتسوى هالسالفه حتى تطردني من البيت ؟؟
قلي الي مايعرف ديرتو وحال اهلو مايستاهل يكعد بينا
قلتلو عجل يابه بس انا الي ماعرف اهلي وديرتي كل الولد هين مايعرفون هالاجوبه بالحساب الدقيق
قلي انته مو حي الله ولد ولو حاسب نفسك منهم فتستاهل اكثر انك تنطرد

تدخلت امي من سمعت مصايح ابوي وهو سكتها مارضى يسمع من احد شي قلتلو زين بس اخذلي كم غرض قلي عندك تلفونك ومحفظتك غيرهن مالك شي هين اطلع
وطلعت وهاي من الساعه ثمانيه لحد هسه انا افتر بالشوارع راسي مسطور ابوي شسالفتو وياي يعني بذمتك غلوي انا اطلع اذرعلو الكاع واحسبها بالملي يلا يرضى ؟؟؟
صايره هاي ! سامعه بيها !!

- والله تعجبت وعكلي فصل عجل ابوي يطردك ومترهي هالشكل ؟ انته الي مايغمض عينو بدون مايدحكك تعجبت والله تعجبت

- استغفر الله استغفر الله انا ادري شغير حاله
عجل انا الحين شسوي وارضيه ؟ امشي اذرعلو الكاع ؟! لو ادك باب الناس بيت بيت
واسالهم ؟ والله حيره يعني ... استغفر الله

- تهدا ياخيي الا ماتنحل جايز ابوي عندو نيه من وره هالحكي تعرفو ما يتصرف بعبث

-ول اعرفو اعرفو بس مو هالشكل يخليني بديره ظلمه ودليلها الله

- ياحسرتي عليك ياخيي والله كلبي شب نار عليك وينك الحين وين كاعد

- وين يعني كاعد على حجلان

- زين عندك فلوس شايل مبلغ زين

- عندي ورقه مامصرفه وخمسه وعشرين بس هذني شايلهن

- خيي انا ارسلك لو اعتزت وان شاء الله ماتطول انته فكر بحلها ماتصعب عليك ياابن الشيخ انته جراح يصعبك هالكم سؤال

- قهرني موقفو مو صعب السؤال
عجل لا يرضى ادخل على عم ولا اعتب بابنه ليش يعني انا جرمت بشي حتى ينفيني من اهلي ؟؟؟؟

- تحمل ياخيي لابد وترجع ابوي مايكدر بدونك والله واكيد جدتي وامك مايخلونك تضل بعيد

- والله لو مدحكه ابوي شسوا بيهن ساعه الي طلع صوتهن كان مانطقتي هالكلام

- ليش ليييش شغير ابوي !!! انتو متكاونين كبل هالسالفه

- ول احكيلها كنا نتعشى مابينه شي شتعرفيني انا اتكاون ويه ابوي !!!

- يييييي ياخيي شدراني انا تعجبت من فعلو
الحين اخابر امي وافهم منها زين افهم منها واخابرك انتظرني

- يلا روحي

سديت الخط وكعدت حدر اسامه واحكيلو الصار وهو تفاجىء وراد يتصل على جراح ماخليتو قلتلو ينحرج منك ..
اتصلت على امي جاوبتني بصوت ناصي ..
- ها بنتي شلونج
- يمه مو زينه انا اخوي هذا حالو ليش يمه ليش شلون تسكتين وتخلين ابوي يطرد جراح
- ماكدر بنتي شسوي يعني شفتيني بيوم ادخلت بينه وبين ولده
- حتى لو يمه هين لزوم تدخلين هذا جراح يمه تفهمين شنو جراح !!!
- افهم افهم وجراح عزيز كلبي بس اصبري افهم من ابوج واحجيلج
-معقول مافاهمه للحين ! يمه مااصدكك
- غااليه
-يمه ماتقنعيني ماتعرفين احكيلي شنو السبب
- مغثوث منه يكول مو كد الحساب الي محسبه اله
-يعني شنو
-يعني الامر بيد اخوج والقناعه عند ابوج
-بس اسأله ابوي مو معقوله يمه يعني جراح وش يعرفو بيهن ؟؟

- والله مادري حجى شي هو بس هالكلام كاله للشيخه لان ضلت تحجي ومارضت على طلعه جراح ،ابوج حجى هالكلام وكال الي بعد يفتح هالسيره يتفضل يطلع وياه وكلهه سكتت
- وابوي وينه هسه
- نايم هنا
- يمه خاولي تقنعيه سوي شي انتي تكدرين تاثرين عليه اقنعيه خلي يرجع جراح وبذاك الوكت الي يطلبو ابوي ينفذو شتعرفوه يعصى امر !!!
-الله كريم بنتي باجر نتفاهم

سديت الخط وضل اسامه يهديني بس انا نار شبت بكلبي ماكدرت احط راسي واغفى اروح وارجع بس اتصل بجراح واتفاهم وياه
وهو ساكت مايرد بشي بس حكالي روحي نامي والصبح نتفاهم
قلتلو وين تنام حكالي بالجامع

ضليت اتصفن الليل كلو وافكر شمطلب ابوي ؟ ليش هالشكل يسألو ؟ هي هاي اسئله !!

ثاني يوم اسامه اتصل بجراح وطلب انه يحدر هين ويكعد عدنا وهو مارضى كنت اعرفو مايرضى بس اسامه اصر انه يحكيلو هالشي ...

عرفت من جراح انه راح يبدا هو وصاحبه
يتعاونون ويدورون جواب مفصل لابوي ..

بهاليوم اسامه حكالي رحلتو بكرا ولزوم ساعه سته الصبح هو بالمطار وراح يغيب
اسبوع عن البيت ..

انقهرت ازيد من عرفتو راح يمشي عجل انا وش دحكت منو ماصار يومين كاعدين بالبيت
حضرتلو الجنطه وضلينا اليوم كلو سوا يوصيني على اهلو وعلى نفسي وبعدين من دحكني مدلغمه الوجه على سالفه جراح
حكالي ...
- اذا عجبج تروحين لاهلج كوليلي عادي اكول لابويه يوصلج

فرحت بداخلي بس مابينت لاني متبعه ثكل شويه .. رحت اتصلت على جراح مايرد اتصلت على امي قلتلها ..
- يمه اخذ رايك بشي
-شنو عيني
- اسامه راح يطلع بكرا لشغلو ومايرجع بعد اسبوع حكالي اروح ازوركم ويوصلني عمي
-لاا لااا
-يمه خلي اكملك اسمعيني .. والله مشتاكتلكم
وهو راح يمشي لشغلو خلي اكعد حدركم احسن ووكت مايرجع هو ياخذني
- غاليه هالتصرف ماارضاه الج حبيبتي
-ليش يمه وشنو الغلط هين
- بنتي يعني رجلج يروح لشغله انتي تعوفين البيت وتجين ؟ مو عيب قابل الزواج بس رجال مو عندج عيال
-يمه ماناكصهم شي هين وانا ماعندي شغله هين غير اسامه وهو راح يمشي
- حتى لو لتعلمين نفسج وتعلميهم على هالشي
رجلج بشغله يطول اسبوع اسبوعين تضلين بيتج عندج عيال تعرفي عليهم شوفي اطباعهم
اكسبي عمتج هاي سوالف الروحه والجيه متلوكلج حبيبتي بيتج اولى بيج لتنسين هالشي
- يمه انا مشتاكه لاخوتي شلون اضل هين ومادحهكم وبالي على جراح اريد امشي ادحكو وافهم منو
- اخوتج مطايرين وجراح مو بالبيت وين تشوفيه ؟ تروحيله بالشارع حتى يتخبل
- عجل شلووون يمه
- بنتي احنه مقررين نعزمكم بس تخلص سالفه ابوج وجراح بلكي منا لما يرجع رجلج من شغله همه فاضيهه وتعالي انتي وياه هنا واشبعي باخوتج
- واذا طولت سالفتهم
- اذا طولت عادي تعالي بس كون من رجلج موجود مو هو يطير انتي هم اطيرين عيب هاي مو حلوه بحقج
- زين يمه زين فهمت اضل هين
- اي استغلي هالوكت بعيالج تعرفي عليهم شوفي اطباعهم اكعدي سولفي وكليهم شي من ايدج الحلوه لاتضلين جامده وكارصه بغرفتج
- زين يمه صار
- يلا ماماتي مو تضوجين مني اني احجي لمصلحتج حتى لاتجيج حجايه من عيالج يكولون ماصارلهه يومين هنا ورجعت لاهلهه
وانتي اذا بديتي بيهه مره بعد تتعودين على هالشي وهذا غلط بنتي شوكت مايرجع رجلج تعالي وياه
- مفهوم يمه مفهوم
-يلا سلمي عليه
-يوصل

سديت الخط ورجعت لاسامه كان ياكل كرزات ويدحك للتلفزيون .. صفنت عليه وافكر بكلام امي قلت هالشي ياترى راح يسعدو لو درى لو عادي ؟؟

كعدت حدرو وهو سألني ..
- ها حصلتي جراح
-لاا ماكو اتصل عليه ومايرد جايز حدرو ناس
- ايي هسه تروحين مبين بنفسج تشوفينه
ادري بيج تلوبين
-ههههههه هو صح بنفسي بس ماكدر ادحكو حتى لو رحت نسيت ابوي منعو يصل البيت
- مامعقول مايخلي يجي وانتي تريديه
- حتى لو خليهه بعدين من ترجع بسلامه ان شاء الله نروح سوا
- متاكده ؟
- اييه متاكده عيب اروح الحين لبيتنا وانا ماصارلي يومين كعدت بين اهلك
وانا مااحب اترك بيتي وامشي حتى لو انته مو هين اضل انتظرك ترجع ونطلع سوا

ابتسم وباسني بخدي وهو يحكيلي ..
- صدقه لله شلون عقل
-هههههه
- يعني هالمره ارجع لبيتي انتي تتلكيني
-اكيد ياعيني هالمره وبعد كل مره ماافوت هاللحظه الحلوه وياك
- فديت مريتي حلو الزواج تره
- ههههههه انته الي محليه

حضنتو وضليت ابتسم واشكر ربي بداخلي على وجود امي وياي لو ضاله عليه اهجم بيتي بكل خطوه مني انا ماافهم غير بدلع نفسي وسوالف اخوتي ..

وقتت المنبه على ساعه اربعه الفجر وكعدت سبحت بسرعه ونزلت حضرت الريوك لاسامه رتبته على الميز وصعدت لغرفتي
دحكتو بالحمام .. تعطرت ورتبت شعري بين ماطلع ..
بوستو وصبحت عليه وصرت انطيه الملابس يلبسهن و انا اوصيه ...
- اسامه بعد ممنوع الحكي ويه المضيفات او صديقات او اي جنس انثوي حدرك
- هههههههه بدينا بالشروط
- صار ولا ما صار ؟
- صار عيني صار منتهين منها حبيبي
- زين و تخليني على علم بكل رحله لوين

ومثل ماتعودنا اول ماتصعد الطياره تحكيلي ومن تنزل تحكيلي و مكان نومك وين يصير تصورلي وتنتبه على اكلك بلا اللحوم بغير دول ماتعرف اصلها وخزنها شلون
- صار بعد
- لا تسبح وتطلع بوجهك للهوا تتمرض وهاي انا دائماً انبهك عليها
- شلون لعد تعرفيني اسبح يلا اطلع
-ايييه نشف شعرك زين لا بس تمشط وتطلع سشور وخليه ينشف
- ماشي
- انته تنام وحدك لو حدرك جماعتك يعني
- وحدي
-اي زين عجل تخابرني كبل ماتنام واذا كنت مشغول بشي وماتكدر ترد على اتصالي ارسلي بالواتساب وطمني زين
- زين حبيبي زين
- و اقرا ايه الكرسي كبل ماتبدا رحلتك لا تستهين بيها وتنساها
- وعيونج ماناسيها اقراهه
- زين وارجعلي بسلامه
- ان شاء الله ارجعلج لاتخافين بعدني ماشبعت ماعوفج
- ههههه يابعد عمري .. وين رحلتك الاولى
- بيروت ذهاب واياب اتاخر بيهه شويه
- توصل بالسلامه ، يلا ننزل حضرتلك الاكل
- شنو هالدلال من الصبح والله اغم الي مايتزوج

ضحكت واخذت ايده ونزلنه اول ماكعد باوع على الاكل جان يكولي ..
- غاليتي اريد زعتر وزيت زيتون شويه
- لحظه

جبتهن اله وهو ضاف شويه من الزيت على الزعتر وصار يخلي الجبن بالصمونه ويضيف فوكاهه من الزعتر وياكل ..
حكالي ..
— الزعتر وين ماتحطينه بأي اكله تلكيه يعجبني ابد لا تنسيه بريوكي
- من عيوني

كرصني بخدي وكمل اكله ياكل لكمه ويدحك للساعه بايده .. دخلت عمتي صبحت علينه
وهو وكف بوسهه و ودعهه واشرلي اطلع وراه .. رحت وهو اخذ جنطتو خلاهه بالسياره ورجعلي ..

واكفين حدر السياره وهو حضني قلتلو ..
-اسامه لا تدحكنا امك عيب
- ماتجي وداعتج حشتاقلج غاليتي صارلج عشره ايام وياي بس تعودت عليج حيييل
- وانا بعدني ماشبعت منك
- اوعدج بس ارجع اطول نزلتي عشر ايام واعوضج
- يابعد عمري ان شاء الله ترجعلي بالسلامه
- الله يسلمج اذا بنفسج شي كوليلي شوكت مجان واجيبلج
- بس انتبه على الي وصيتك عليه كل شي مااريد غيرو
- هههه يدلل حبيبي

بوس خدي وصعد بسيارته وطلع ورجع نزل سد الباب وراح ضلت الدمعه بعيني
ماكنت اظن روحتو هالشكل صعبه

دخلت للبيت وصرت الم بشعري واظفرو
ودحكت عمي نزل من فوك بالعجل شهكت وقلت هذا كان بمكتبو عجل اكيد دحكنا !!!
ياخجلتي منو ياخجلتتتتي ..

مشيت بالعجل للمطبخ وعمتي واكفه تحضر الاكل قلتلي ..
- هاا بنتي شبيج
- اا عمه اسامه مشى
- يوصل بالسلامه ان شاء الله
- اسوي شي عنك
- لا ماعندي شي بس اكمل بيضات الحجيه تحبهن مسلوكات
- زين عجل انا صاعده اصلي الفجر تاخرت عنها

رحت صليت ورتبت غرفتي واتصلت على امي صبحت عليها وسألتها عن الاحوال وحكتلي ماكو شي جديد كلشي هادىء هين

كل الصباح انا اتحسر على اخوي والله مارضيتلو هالطلعه ولا بلعتها عجل جراح هو ابو البيت يصفى بالشارع وحيد !!

امي كانت كل ساعتين ترسلي امشي سوي هالشي واطبخي هالشي وانا على تعاليمها امشي ...

كعدت حدر الحجيه وعمتي وهديل ماكعدت الا على الغدا .. دحكت عمتي ام اسامه هي الي تطبخ وتصب وعمتي ام سالم ماحطت ايدها بشي من ساعه ماكعدت
عمي ملتهي بالزرعات وماكعد حدرنا
الا وكت ماصار الغدا يلا دخل ..

دحكت طبعهم هادىء بارد بكل شي .. ماكو بينهم روح العايله .. ادحكهم كاعدين سوا بس همه كل واحد منعزل عن الثاني ..

الاكل مايخلوه الا على ميز كبير صاير بساحه الدرج .. كل واحد وماعونه الخاص
وادوات اكلو ومحد يحكي ولا حرف كلهم مندمجين باكلهم وساكتين ..

انا ماالفت هالجو .. وين انا متعوده على هوسه اخوتي وسوالف ابوي وجدتي اقل شي ابوي يتطمن علينه واحد واحد ويسمعنا كلمه الله يرضى عليك يابه ..
هين عمي من ساعه ماكعد للحين ماسمعتو نطق حرفين ويه احد ...

دحكتهم كملو اكل و هديل بالعجل كامت تلم المواعين وتاخذهم للمطبخ .. وكفت ساعدتها
وهمه على كعدتهم ..
دحكتهم غسلو ورجعو كعدو نفس مكانهم
وعمتي ام اسامه واكفه تريد تحضر الجاي
وهديل تغسل المواعين .. قلتلها ..
- عمه عنك انا احضرو روحي اكعدي
- لا خلي اعلمج شلون تصبيه وبعد عليج انتي سويه

طلعت صينيه فضيه مربعه وحطت بيها اربع فناجين عريضه بيضه ومذهبه شويه باليده
وحطت شكردان بيضه صغيره بس بيها قطع شكر مو ناعم و كبل ماتصب الجاي رشت عليه هيل مطحون وعلت النار فار فورتين وبعدها صبت وهي تصفي وتحكيلي ..
- عمج يحبه مهيل زياده .. هو خلطه الجاي متروسه هيل بس هاي بالاخير حتى تضل ريحته تفوح اول مايشتمه

اخذت الصينيه وراحت صرت ادحكلهم من باب المطبخ .. عمتي قدمت لكل واحد
وتالي كعدت وصارت تشرب جايها
بس عمي اول ماكضب الفنجان رفعه اشتمه ونزله وبعدين يلا صار يشربو ..

تذكرت امي هين باغلب الاحيان تسويها ومن اسألها تحكيلي .. ريحه الجاي تهدي النفس احب اشتمها تعجبني ..

مشيت حدر هديل وساعدتها بتنظيف المطبخ
وقلتلها ..
- هديل ما نظف هين او نسوي شي بشغل البيت احكيلي حتى اعرف شنو اسوي احسن ماكاعده
- مادري والله اسالي عمتي هي تكولج اذا اكو شي تسويه
- وليش هي مو امك

- لان هيج متعودين .. اني ماسوي شي بس اغسل مواعين الغدا والعشه واشر ملابسنه وانظف حمامنا بس هذني شغلاتي والباقي مرات امي تسويه مرات تجي هاي جيرانه تنظف البيت من فوك ليجوه تلمعه كل ٣ ايام
- وام سالم شنو شغلتها ؟
- ولا شي بس تكول شنو الي يصير والي ميصير
-هاا عجل الحجيه شنو كعدتها هين مالها كلمه ؟
- لاا بس ماتدخل بشي كيفنا شنو نسوي نسوي هي عليها بابويه بس
- زين عجل الحين البيت مامنظف من ايمتى ؟
- هو نظيف البيت مابيه شي قبل ماتجون جانت جيرانه منظفته الصبح
- يعني مثل ماكلتي ٣ ايام
-اي ويمكن اليوم لو باجر تجي مادري بعد شوف همه شوكت يدزون عليهه

سكتت هين حسيتها مطنشه الامر بالبيت
بس تعجبت شلون يخلون بيتهم مامنظف ٣ ايام ولا تنحط عليه وصله مسح !
تمنيت جدتي هين والله كانت سوتهن هنه وصل ولمعت بيهن الكاع ...

بيتنا امي من وعيت عليها هي تشيل وتحط وتمسح وتعطر وحتى عمتي ام جراح هم بيتها دايماً ريحه البخور تعط بي وماتخلي شي ماتنظفو جدتي فوك راسها من ساعه ما تصحى لوكت العشه هي تأمرها سوي هالشي وجيبي هالشي .. هين كلمن على حل شعرو ..

طلعت اخذ تلفوني عفته على الميز ودحكت اسامه مراسلني وحاكيلي هو بيروت وكاعد يتغدا ..
بديت اكتبلو وسمعت صوت عمي جفلت بالعجل مشيتلو وهو بالاستقبال كاعد ..
وكفت حدرو وهو يدحكلي .. ابتسم وحكالي ..
- اكعدي يابه

كعدت حدرو وقفلت تلفوني صار يحكيلي ..
- شلونج هنا بينه مرتاحه
- اييه عمي مرتاحه الحمدلله
- غاليه يااا غاليه بنتي اي شي تحتاجيه بنفسج فد شي من بره من محل يعجبج تشترين شي
كوليلي اني اجيبلج
- تسلم عمي ماتكصر
- حتى لو اسامه مو هنا احنه موجودين اني عندج شتطلبين اعتبريه عندج صار زين يابه
- زين تسلم عمي
- اذا ميعجبج تشتغلين شي هنا كولي يابه
عادي مابيها مستحى اذا انتي متعوده بيتج ماتسوين شي وكلولي بنتنا اميره بالبيت فاحنه مانريد نغير عليج شي انته عزيزه من ريحه عزيز امانه بينا
- لاا عمي مو هيك المكصد .. انا بين اهلي اميره بدلالهم ومحبتهم الي بس انا هم اشتغل واطبخ صح بحديثه بيتنا امي ماتخليني اشتغل كثير كله عليها بس هم اساعدها
وهين من كعدنا بغداد نسينا سوالف الامراء جدتي ماخلت شي اذا مو نسويه ماعدا اخوتي وطلباتهم الي ماتخلص فالشي هذا عادي انا متعوده عليه واحبو
- هههههه براحتج بنتي براحتج البيت بيتج شنو يعجبج سوي بس خلي بالج شغله
- شنو عمي
- اريدج تضلين انتي انتي مايغيرج شي
يعني شعلموج اهلج وشنو تربيتي عليه ضلي بي اذا تغيرتي عن الي اعرفه عنج ابدا ادخل
وتدخلي مايعجبج زين يابه
- اي زين عمي زين
- اخذي راحتج

ترخصت ومشيت وانا كلبي يطكطك يمه
هالرجال نبرتو تخوف وعينو احسها تخترقني والله من كثر مامركز بوجهي ..

صعدت لغرفتي واتصلت على امي ..
حكيتلها الصار وهي بس ساكته اخر شي حكتلي ..
- حلو تنبيه عمج هذا يعني اكو الي خايف عليج منه
- يعني شنو يمه ؟ منين الخوف ؟
- مادري تبين بعدين .. نامي هسه ومن تكعدين نزلي سوي شي للعصريه وقدمي للحجيه وعمج
- زين يمه .. صدك ماعرفتي شي من سالفه ابوي
- ابوج قافل على جراح ما يدخل المنطقه مو بس البيت خطيه مخابر على حسين حتى ياخذله ملابس وحسين رايح ماخذله جنطه الملابس جان يلكطه الشيخ ومشبعه رزايل
اجاني حسين يعيط متخبل يكول رجلج يريد يسيبنا بالشارع مثل المجادي واحد واحد
- يااااه
- والله مهدده اذا عادهه النوب ينطرد وحتى لو رجع جراح هو مايرجع عاد الولد كعد وسكت
- يمه شسالفه ابوي لخاطر الله
يعني انتو متكاونين حتى مخلي حركتو باخوتي !
- ولج شبيج انتي اكولها من وحده اني شكو
- اييي انتي هاي متعودين عليها تطلع اعصابو بعد ماتحركين كلبو
- ياا والله ممسويه شي شتعرفيني ابقيه محروك كلب !
- لاا هم صدك اذا مو تتحايلين عليه
- روحي روحي يلا ماعندج سالفه

ضحكت وسديت الخط وضليت اتصل بجراح
وهو بس يرفض .. ارسلتلو بصمه صوت قلتلو ...
- ويييييينك شعلت اهلي لا تضل ترفض جاوب

مادحكها وضليت انتظر نص ساعه وخابر
جاوبتو وبالعجل قلتلو ...
-ياخيي ميت عايش شسالفتك ماترد وتبرد كلبي
- اييييي غاليه مشغول مو يطلعلك الرقم مشغول ماتفهمين
- ايييه وشدعوا هالاعصاب وياي غير انا من خوفي عليك الح واسأل
- زين زين مابيه شي عايش الحمدلله
- تفاصيل ياخيي احكيلي تفاصيل وين تنام وين تاكل شسويت
- انام بالجامع واكل بالمطعم
- زين بالجامع عندك بطانيه مخده شي
- يولي جامع هذا مو فندق .. حاط راسي على ايدي ونايم والجو طيب مايحتاج غطى
- يابعد عيني ياخيي
- مابيه شي لا تولولين
- اوووف ياربي .. ما لكيت جواب عاد
- لكيت بس ابوي مايجاوب على اتصالي صار من البارحه المغرب اتصل بي وهو مطنشني
- اكتبلو انك لكيت جواب
- كتبتلو وهم طنش
- يتصل يتصل اصبر
- لا مااصبر دزيت حسين الحين يروح ينطيه تلفون وانا اتصل عليه
- زين عجل انتظرك من تكمل اتصالك احكيلي
- زين زين

سد الخط وانا ضليت ادعي يارب ابوي يرضى ويرجعو للبيت خطيه اخوي مايستاهل والله يضل متشرد بالشارع ..

ساعه عدت وانا انتظر بي وتالي غفيت وكعدت على صوت تلفون دحكتو اسامه
رديت عليه وضلينه نسولف عشر دقايق وحكالي راح يرجع لبغداد الحين ..

سديت ودحكت ساعه اربعه صارت رجعت اتصلت على جراح جاوبني وبالعجل صاح ..
- ول خليني بروحي لا تضلين تلحين
- خيي شصار فهمني
-غاليه بعدين
- والله ماعوفك جراح والله كلبي موجر نار عليك خيي فهمني بغلاتي عندك احكيلي شصار
- مارضى
- ليش مارضى !
- ابوي يطلب طلبات تعجيزيه مادري احد حاكيلو انا عندي الفانوس السحري واغيرلو الحال مثل مايهوى
- بهداي ياخيي احكيلي بهداي
- استغفر الله .. ول مو قلتلك راح اتصل عليه وارسلت حسين ياخذلو تلفون
- اييي
- ايييه جاوبني بلا سلام كبل حكالي
عرفت الجواب ؟ قلتلو اييه يابه عرفت
وضليت اعددلو بيوت الي اشتركو بالحرب ويانه على داعش وقلتلو كم واحد مات وكم واحد تعوق وماعدنا بس اربع عوايل تهجرت ومارجعت للحين وهاي بس من الشاميه مثل ماطلب زين للحين !
- اي زين بعد شصار
- حكالي وانته شسويت من عرفت عندنا هالكد ايتام وهالكد فقرا معوقين !
قلتلو يابه شسوي انا بطرك ملابسي شسوي يعني
قلي من تعرف شتسوي وترجعلي بكلام يليق بيك وبمكانتي انا يلا بعد تتصل وسد الخط
- يااااربببببييييي شسالفتووو يالله
- ماضل بيه عقل يعني شسوي شسوووووي
شسوي هسه انا عندي ملك ثروه محل راتب وانطيهم ماعندي شي بالحرام لو عندي انطي من دون مايطلب بس انا هالاشتغلو عايش بي
دحكتيني بيوم اخذت من ابوي شي !؟
- ياخيي انا مااعرفك يعني والله اعرف هالشي اعرفو
- والي كملهه بعد طرد حسين وهذا هو مكابلني وكاعد مدلغم الوجه
- حسسسين !!! ليش طردوو
- مانعرف ليش هو انسد الخط من هين وحسين اخذ تلفون وطلع بعدو مامعتب الباب وابوي حكالو بوجهك تطلع لاخوك ولا ترجع بعد
- يالله ياالله هاي شصاير بينكم ليش هالشكل والله حرام اخوي ماسوى شي
هاي لان يساعدك ويتواصل وياك يعني ؟!
- مادري هو ينحزر ابونا ينفهم عقلو لا والله لاينفهم ولا ينعرف فكرو
- وشلون الحين ياربي شتسوون هاي ابوي ناوي عليكم كلكم يشردكم !! شصاااير
- استغفر الله غاليه عوفيني بهمي خليني افكر لا تضلين بعد تتصلين انا من وحدي اتصل واحكيلك زين
- زين ياخيي .. امانه عليك انتبه على حسين لا تفرغ اعصابك بيه خطيه تلكاه الحين شاب نار
-اعرف اعرف روحي يلا بعدين نحجي

سديت الخط وضليت استغفر ربي رحت اتصلت على ابوي جاوبني بصوت مرتاح ويحكيلي ..
- شلونها غاليتنا
- يابه مو بخير انا
- ليش يابه شصايرلك ؟
- اخوتي يابه ليش هالشكل تطردهم هذول اعزازنا
- ههههههه راحو توسطو الك
-لا والله ما حكو شي بس انا كلبي مانطاني عليهم عجل يابه تطرد حسين بلا سبب خطيه الولد وشحكى ! الحين امي تتخبل والله بس تسمع
- تخبلت وراحت
- وساكت عنها !!
- تتحمل مثل ماغيرها تحمل
- ياابه ليش ليش
- كلمن يجي من ايده الله يزيده
جراح من ايده وحسين من ايده واي واحد ثاني من اخوتك يتصرف بهالشي نفسو هم يلحكهم ولو غلطو سبعتهم هالغلط نفسو ينطردون ويضل البيت فارغ هم ما يرجعون
- يابه اخوتي والله طيبين وحاضرين بالي تطلبو بس شويه لين وياهم والله حرام كعدتهم بالشارع وهمه ولد الخير
- ماحافظو على خيرهم يتجازون هالشكل
لادوخين راسك يابه هالشي عندي انا اعرف اتصرف انتي انتبهي على عيالك وريحي بالك
زين
- يابه لا تطول بعدهم الله عليك
- الله كريم يابه

سد الخط وانا ضليت اتصل على امي ماتجاوب والله خبلوني بحالهم هذا صرت ماادحك غير شاشه التلفون ..

نزلت وانا الوب طلعت بالطرمه اتمشى واتصل بامي وماكو رد .. رجعت دخلت كعدت حدر عمتي والحجيه وانا بالي مو وياهم .. تالي اتصلت امي بالعجل رحت جاوبتها ..
- ها يمه ياعيني وينك
- ولج يمه شفتي سوايه ابوج ولج حرك كلبي حررك كلبي هو واحد وبالكوه تحملنه بعده ليش يكملهه بحسييين ليش يربي
- يمه الله يخليكي اهدي اهدي تنحل والله وابوي يرجعهم والله بس صبر
- يااا يرجعهم ولج حسين ماسوى شي لو رجع جراح حسين شيرجعه !!!
- يرجعو والله ابوي مايكدر على تعبك اكيد يرجعو
- احاجيه قبل شويه يكولي ولدي وبكيفي اشمرهم اخليهم ماعليجن انتن مادري شغيره هيج !!! يكولي ابنج مايستاهل تعبج عليه ولا يستاهل يكعد بيت شيوخ وحرام هيج واحد ابن شيخ وتربيته اكوله شبي ابني شبيي لا تخبلني شسوا ومادري بي ! يكولي ابنج نذل خليه يتربى من جديد الظاهر تربيتنا اله ماجانت صح وماجابت النتيجه الي اريدها
ياااربي ابني ماسوه شي هذا تربيتي اعرفه مايمشي بالموزين والله اعرفه طيب كلب ماياذي احد
-يمه فدوه لاتضلين تبكين خلي ابوي يتصرف
- خلييييه يتصرف خلييه بس ليش يحرمني منه ! ليش هيج بهذل احوالنا ! الشيخه تكوم وتكعد وتصيح ياجراح وياجراح وامه متخبله عليه جنت اني واكفتلهم هسه هم كسر كلبي بابني وخلاني اتيه دربي

ليش هيج يسوي !! كم مره سألته ياعيني شنو الي بالك شبيهم ولدك وهيج حقدت عليهم
مايحجي المصيبه مااايحجي ويبرد كلوبنااا
- يمه والله ابوي باله شي انا اتصلت عليه وحكالي انا اتصرف وياهم وكلمن تاذه من ايده جايز اخوتي مسوين شي وضاميه عنا وابوي عرفو
- شمدريني يايمه شمدريني تعبت والله من كد مااحاجيه وماحصلت نتيجه
- اصبري يمه حبيبتي اصبري كم يوم ويبين كلشي
- كلشي ولا حسين بنتي كلشي ولا هالولد
ينهد حيلي والله موبيدي
-يايمه والله هو بخير وحدرو جراح وهو صار رجال مو صغير وتخافين عليه من شارع
- بعدين نحجي بنتي
- وين يمه
- بعدين كتلج عوفيني ارتاح

سدت الخط وانا ضليت اتصفن وكاضبه راسي دحكني عمي صاحلي..
- غاليه صاير شي
- مشاكل بالبيت عمي لا يضل بالك
- محلوله ان شاء الله
روحي لغرفتج ارتاحي

صعدت بالعجل ورحت اخذت ياسمينه حضنتها ونمت بالي اشكال الافكار
ساعه افكر اخوتي غلطانين بشي وابوي عاقبهم لان ماعرفو منهم كبل ؟
ساعه افكر انه سامع عليهم شي
ساعه افكر ابوي هو مو صلح ويه حسين جايز راد يبهذلو شويه بدون شي !!

مرت الايام وانا على اتصال ويه اخوتي وامي .. امي وضعها تعبان وبس تتكاون هي وابوي وعمتي وجدتي نفس الشي ...
حسين وجراح ينامون بالجامع و حسن عرف بيهم راد ياخذهم لبيته بس ابوي ماقبل حكالهم اي شبر من منطقتنا مايعتبون ..

جراح وحسين صارو يشتغلون عمال ومن اسأل جراح انته مو عندك شغلك بمحل ابوي
يحكيلي مايكفي حتى انفذ الي يريده ابوي
امي موصيه حسن ياخذلهم ملابس وفراش بدون علم ابوي ومنطيتو فلوسهن ..

بيت عيالي دحكت وضعو مايعجب هين كل شي على عمتي ام اسامه وهي مره فقيره من اهل الله تخاف من عمي وحتى ماتنزع الحجاب حدرو ولا ترفع عينها ويطلع صوتها
هديل يومها كله على التلفون عرفت عندها حبيب وتستغل نزول امها وتضل تخابر بغرفتها ..

ام سالم هين هي المسيطره صح كدام عمي مايطلعلها صوت بس وراه تمشي وتتامر
مادحكتها كضبت كلاص مي وغسلتو
من العشره الصبح تمشي للمطبخ وتحكي لعمتي سويلنا هالشي على الغدا وتروح
وعمتي بالعجل تبدا تحضرو ..
انا احكي عليها واريد افتهم منها ليش هي تسوي كل شي ليش ماتعلم بنتها او تخلي ام سالم تسوي الشي الي يعجبها ..
تحكيلي .. مابيهه شي احنه اهل

صرت انا اشيل عنها التنظيف ماخليها تكضب شي .. لان طلع البيت كل يوم هي تنظفو وتمسح الاخشاب والمرايا من دون مااحد يحكيلها او يدري عنها .. لان اصلاً هين محد يدري بالثاني كلمن اله ركن خاص بي ..

صار يوم الجمعه واليوم ينزل سالم ومنطي خبر لامو الظهر هو هين ... من ساعه تسعه وكفت فوك راسنا وتحكيلنا ...
- راح يجي سالم على الغدا عيني ام اسامه سويله مطبك دجاج وكسبيه مثل ميحبه وشوفي منو من بناتج تروح تعزل غرفته تمسحهه تعطرهه والملابس هم باقيات بالغرفه بسلتهن ماعزلتهن هديل خلي تعزلهن هسه

عمتي بالعجل حكتلها ..
-اي ان شاء الله هسه اسويله واصيح هديل

انا هين طكت مرارتي كل يوميه تتامر واحنا ساكتين وانفذ على مرامها بس الحين لااا
قلتلها ...
- عيني عمتي ماتسويهن انتي مو هالشي راجع لابنك
- هاي صوتمن طلع !
- صوتي انا مااظنو غريب على مسمعك
- اي وشتريدين ياجنتنه
- ماريد شي غير تكومين بواجبك وماتخلين عمتي تخدمك ابنك يريد مطبك دجاج احدري انتي اطبخيه هذا بيتك ومطبخك محد يخدم الثاني هين كلمن خادم نفسو

عمتي تجر بايدي وتأشرلي اسكتي وام سالم تكربت حدري ومتخوصره وصارت تحكيلي ..
- من شوكت صارت عليه الجهال تتامر
خاف بعدج جديده هنا ومحد علمج مكانج اني اعلمج
- لا تعلميني ولا اعلمك مكاني اعرفو زين بس انتي الي مخليه الناس هين بغير اماكنها
- هااا ياام اسامه هاي شلون جنه عندج لسانها بطولها هي هاي الكتلتي نفسج عليهه
- اكيد عمتي ماترد عليكي لانها مو غاويه مشاكل ومره من اهل الله بس انتي ياعمتي مايجوز تستغلين طيبها هالشكل
انتي كبيره وهي كبيره واثنينكم بنفس الحيل
ليش هي تشتغل كلشي وانتي تزيدين فوكها شغلات ولدك ماعندك شي انتي سويها مابيها عيبه هاذي
- بيها شي لو مابيها اااااني اقرر هنا فهمتي
انتي مايعجبج طلعي منا روحي ولي لغرفتج هي متعوده على هالشي وتسويه لتضلين تزامطين براسي امشي اصعدي وخلصينا
- لاااا والله يعني جاهل هي عندك لو خادمه ؟
تره هي حرمه عمي مثل ماانتي حرمتو واثنينكم نفس المستوى والقدر لاتعلين نفسك عليها
- هههههه حرمه منو ! اني المره الاولى هنا والبيت بيتي اني من تعب رجلي وابني لتحطين نفسج بالنص تره ماتخلصين مني
خليني كافيه خيري وشري عنج روحي ولي لغرفتج عاااد لا تخلين صوتنه يطلع امشي ولي
- والله انا ماامشي من هين واريد ادحك الي يطبخ اليوم
والله ياعمتي اذا طبختي اعوفلك البيت واطلع الحين اخابر ابوي يحدر ياخذني واخلي اسامه يتفاهم زين وياكم بس يدرى

كضبتني من ايدي وصارت تحكيلي ..
- يمه كفي الشر هسه الولد على جيه وخطيه تعبان خلي ياكله لكمه وينام يرتاح ماتسوى هالوكفه والمصايح هو هم ابنه

- عمه انا مااكرهو لسالم يشهد الله احترمو واعزو بس انا احترمك انتي اكثر من الكل هين وماارضى ادحكك مذلوله وساكته
خلي كلمن يعرف مكانو مو هذا حكي عمتي
وانتي مكانك عالي هين البيت هذا هم ينصرف عليه من ابنك وتعبك انتي بي
والرجل رجلك بعد مهما كان انتي على اسمو ليش هو يرضى هالشي الك ومايرضاه الها !؟
شنو الفرق بينكم !!!
ام سالم - انتي لسانج طويل وحيه على امج
هو هاي قسمتي تضل ملاحكتني وين ماروح
امشي ولي واخذيهه وياج فوك ولن يلا
لااريدجن ولا اريد خيرج

تكربت عليها ورفعتلها حاجبي قلتلها ...
- الاااا امي الااا امــي زين !
- مسمومه على امج ولي من وجهي
- امي تاج راسك لا تجيبين طاريها

بهاللحظه دخل عمي وهي سكتت ضل يدحك بالوجوه ومخلي ايدو وره ظهرو حكالي ..
- ها غاليه خير ؟
- عمي تعذرني لو طلع صوتي بس انا ماعرف اسكت عن الحك وصارلي كم يوم ادحك عمتي ام سامه مسلوب حكها هين وهي ساكته انا ماعرف اسكت تريدون تزعلون مني ازعلو بس هاي تربيتي الغلط يضل غلط
عمي انا قلتلها لام سالم كلمن هين خادم نفسو محد يخدم الثاني كلنا كبار وبحيلنا ليش عمتي وحدها الي شايله البيت ويتامرون فوك راسها ؟ لان فقيره ماتعارض !
حتى لو ضلت هي راضيه بحالها انا ماارضى
لان لو درى اسامه انا راضيه لامو الاهانه وساكته تصير عيبه بحكي
انا احبها لعمتي ام سالم والحين ابوس راسها والله بس خلها تكف عن عمتي

كنت احكي بحركه كلب وهو يدحكلي ويهز براسو .. وعمتي ام اسامه تجر بثوبي حتى اسكت بس انا ماهتميت حكيت الي بكلبي وفرغتو . . سكت عمي و بعدين تكرب باس راسي وحكالي ...
- راح اطلع تريدين شي يابه
بنفسج شي اجيبلج حلويات اي شي بالج
- هاا !؟
- تريدين شي اجيبلج وياي
- لا عمي تسلم
دار وجهه وطلع وخلاني اتصفن عجل مارد على حكيي بشي ليش هالسكوت !!

هو طلع وام سالم هم طلعت .. جرتني عمتي وحكتلي ...
-اي ليش يايمه ليش هالملاسن مو اعرفج عاقله
- عمه ان ترضيها على نفسك انا ماارضاها
شنو هي تتامر هين علينه ابنها هذا ماتكوم تطبخلو عجل لو كان هذا اسامه كانت تروح تطبخلو !؟ هي سلام ماتسلم عليه الا بالصدف
- بس هذا سالم ابنه قابل غريب ان سويتله اكل فهو للكل قابل بس اله مو كلنا راح ناكل
- عمه انتي بالك شي وانا بالي شي
و بالحرام بالحرام لو وكفتي على طباخ ازعل منك والله امشي ارتاحي وانا اطبخلو
- انتي تطبخين ؟ لعد مو صار ساعه تهوسين
-انا هوست حتى ماتتامر عليكي بعد بس انا كنه البيت خليني انا اطبخ احسن ماتروح تتمسكن كدام عمي وابنو وتحكي مايرضن يطبخن لسالم ومايحبنو ..
انتي روحي اكعدي وخليني انا اتصرف والله لاتوبها من هالشي والله

ضلت تستغفر وحاطه ايدهه على خدها اخذتها وقلتلها اصعدي فوك احسن ماتحدر تسمعك حكي .. تقلي ..
- خلي اروح اشوف غرفته شمحتاجه مدامج راح تسوين الغدا
- ول استغفر الله .. عمه انتي ماتفهمين انا على شنو حاركه اعصابي خلي هي امو هي
تحير بي ماعندها شغله خلي تحرك نفسها
- ولج راح توكعينه بمصايب انتي هاي العمر كله ساكتين وصابرين ليش حجيتي يايمه ليييش
- وعلى شنو الصبر والخوف بيتك هذا بيتك
عمتي برضاه الله عليكي اكعدي واسكتي لا تسوين شي زين بس اكعدي انا اليوم حطيتها بالي الا هي تروح تسوي الي تتامر بي خلي تنزل هالريشه الي على راسها

اخذتها للدرج وراحت هي صعدت رجعت اني للمطبخ و صرت احضر الغدا واحكي بداخلي ..
عجل الهوسه هاي كلها والحجيه ساده بابهه وكاعده ! يممه تمنيتها جدتي كان طكت راس براس ..

عمتي فقيره واميه كلشي ماتعرف اسامه دايماً يوصيني عليها وهي ادحكها ساكته بس كلمه الحاضر والصار تطلع من لسانها وهاذي مستغلتها .. ردت احكي لامي وبعدين قلت هي بيا حال خليها بعيده عن مشاكلي ..

حضرت الغدا ورتبتو على الميز وارسلت لهديل انها تنزل تتغدا .. كان سالم واصل قبل ربع ساعه وراح يسبح من طلع كان لابس روب الحمام وانا دحكتو من كنت احط الاكل على الميز .. جوه حد ركبتو مطكع بنفسجي
خربت ضحك قلت هذا الي تزامط بي امو
هو الله اعلم شلونها ليلتو ...

التمينا على الغدا وانا كنت مخليه صحن كبير مرتبه بيه مطبك الدجاج ومحضره السوب وياه .. عمتي بالعجل مدت ايدها حتى تصب للكل انا جريتها وشاورتها ..
- حرمتو هي تحطلو الاكل مو هي المره الاولى والوحيده هين خليها

ضلت تخزرني وانا كاضبه ايدهه جوه الميز
انتظرت ام سالم حطت الاكل لرجلها وابنها يلا انا اخذت وحطيت الي ولعمتي وهديل قلتلها تحط لنفسها لان اقرب عليها
والحجيه اكلها وحد مطبوخ ..

اكلت هالمره براحه حسيت هذا اكبر انجاز بحياتي رغم بساطتو بس مفتخره بي ..
ومن صار وكت الجاي انا اخذتو قدمتو
ومخليه عمتي كاعده حلفتها بالله ماتتحرك الا احركو لكلبها بكعدتها ..

سالم دخل غرفتو وبعدين صاح ..
- يمه الغرفه ليش مامتهويه والملابس ممعزله وينجن لعد كاعدات شتسون وينج هديل

ركضتلو امو وانا كضبت هديل قلتلها ..
- امو تحير بامرو كملي المواعين
- ولج هسه يجي يكسرني لو مارحتله

- ليش يكسرك انتي عندك شغلك انا اروح بدالك

رحت لغرفتو ومن الباب قلتلو ..
- خيي هديل قلتلي ادحك بشنو طلبتها هي تغسل المواعين وايدها منكعه احكيلي امرك
- ماريد شي تسلمين

ابتسمت ودحكت ام سالم واكفه تعزل الملابس ودايره ظهرها على الباب ..
رحت بالعجل لعمتي وقلتلها ...
- شغلتها والله وغصب عنها
- اوووف منج اوف يعني هسه شلزوم هالهوسه كلها جان سويناهه وفضت
ليش خليتن الولد يصيح
- ويصيح عجل امو هين ما يطلبها وانتو على شنو مرعوبين هالشكل ادحكم حاسبين نفسكم مأجرين هين وساعه الساعه تنطردو
- لعد هي جذب ليش مو كاعدين بفضل هالرجال وخيره وهذول اهله مرته وابنه لازم غصب علينه نطيع ونتحمل عيب ننكر خيرهم
- لااا تنكرين خيرهم انتي كفيتي وزياده
بس لا تنسين انتي الك كامل الحك بهالبيت
وانا متاكده عمي مايرضى مذلتكم بس ماعرف ليش هو ساكت
- عمج هيج طبعه يدري بكل شي بس ميحجي واذا حجى معناهه شغله تخوف يعاقب كل واحد هنا باسلوبه فلا تشوفينه ساكت معناه ماله دخل بالرايح والجاي تره هو عينه عشره عشره بالبيت بس يدخل وكت الي يعجبه
- هاااا عجل عمي يخوف
- الله لا يشوفج اعصابه متشوفين البيت كله خانس لان محد يعرف شنو الشي الي راح يكلبه علينه
- الله يهديه علينا

رحت اتصل بحسين جاوبني وهو يلهث قلتلو
-ها خيي وينك
-بالشغل وين يعني
- وشبيك اعصاب
- ووول تعباااان تكسر ظهري واخيك مايعرف يفرك
- عمت عيني عليك ياخيي
- ااااخ يمه يولو هذا عمك شدراه انا مطرود من بيتي
- ياا درى !
- اييه خابرني يحكيلي اجي اخذك عندي اجيبلك شي قلتلو لاا انا بيت عمي كاعد
وكلها يومين ويرضى الوالد ونرجع
تحلفتلك والله قلت بس اكضبك اندمك على لسانك هذا حدرو
- ياخيي والله ماحكيتلو شي جايز هو سامعني احكي ويه امي بس انا والله ماحكيتلو
- يلا يلا بعدين من نتلاكى نتحاسب خلي اروح اشرب مي ريكي نشف
- من ترجعون وترتاحون خابروني زين وصي جراح يخابرني
- مللتي والله هو بحالك عوفي الرجال
عوفيه
- ول انا بدون جراح مااعيش غصبا عليه يتحملني روح يلا

سديت الخط ورحت كلبت الغرفه على بطانتها ونظفتها لان من الصبح اسامه يرجع هين ..
رتبتها على اخر حبه وسبحت و هم نزلت احضر للعشه .. والليل كلو اتصل بجراح
وارسلو .. والله ماتحمل بدونك ياخيي ماتتصل عاد مو حاله هاذي ..
وهو مايرد وللساعه ١١ بالليل اتصل ..
- ها غلوي شلونج
- جراح وينك والله بطيت كلبي ماترد ياخيي تشب بكلبي النار هالشكل
- نايم والله تعبان راجع بالخمسه ونمت
- اوووف ياربي .. بعدك ماتعشيت
- اييه بعدني
- احكيلي كبل ماتروح شصار على هالسالفه ايمتى تفض شمفركلهه
- مادري اجمع فلوس والله كريم
- خيي انا ارسلك الفلوس وارسلك ذهبي وكل شي تطلبو بس خلصنا والله امي وامك متبهذلات بدونكم
- خليهن الك من ايمتى انا اخذ منك يولو !
انا عندي حيل واشتغل وادبر امري عندي شغلتين الحمدلله كافياتني بس اريد شويه وكت
لا يضل بالك زين
- بعون الله ترجع ماتطول
- يلا اروح اجيب اكل

سديت الخط وضليت ادعي ربي يهدي ابوي عليهم ويرجع بيتنا عامر بضحكتهم ..

نمت بعد ماعرفت من اسامه انه يوصل بغداد بكرا ساعه خمسه الصبح .. وقتت المنبه على ساعه اربعه ونمت ..

كعدت هالمره متلهفه وبداخلي نشاط كبير
احس حياتي صارت كلها تتمحور على اسامه ادور الي يرضيه ويخليني ادحك بسمتو ادور التعب لاجل ارتاح من ادحكو يرضى حدري

نزلت حضرت الاكل مثل مايحب وخدرت الجاي المهيل بكثره وحطيتلو الكعك ومانسيت الزعتر وصعدت سبحت بالعجل وطلعت تمكيجت بكحل وحمره اللون الي يحبو
عطرت الغرفه واخذت شالي ونزلت وانا ادحك الساعه صارت خمسه ونص والجو بدا يكشف واكفه بالطرمه وادحك لزرعات عمي
موردات وريحتهن طيبه ومكانهن نظيف
كاضبه التلفون واريد اتصل وبعدين اتراجع
اريد ادحكو من يدخل ويلكاني هين انتظرو
شراح يسوي !...

ضليت ادحك لفوك ودحكت هين يطل بس مكتب عمي والشباك عريض على اكثر من نص البيت .. تطمنت انه مسدود وقلت اكيد عمي بعدو نايم جوه ..

اتمشى واحسبهن دقيقه دقيقه صارت ساعه ٦ وربع وسمعت صوت سياره طبكت بالباب
ضحكت وصرت ادحك بكاميرا الموبايل اعدل شعري وهو فتح الباب بس دحكني ضحك وسد الباب بالعجل وحدر علي حضنتو
وهو يحكيلي ..
- حبيبتتتتي حبيبتييي
- يابعد عمرررري حمدلله على سلامتك
- ربي يسلمج

حط ايدو على وجهي وضل يتلمسو وبوس راسي اخذت ايدو بوستها وقلتلو ..
- والله البيت مايسوى شي بدونك
- حبيبه روحي هاي رجعتلج واعوضج والله
-انته احلى عوض يلا ندخل
- بس ادخل السياره هاي سالم شوكت رجع
- بارحه رجع
- يلا انتظريني جوه

دخلت وهو دخل سيارتو وقفل الباب ورجعلي حضني ويبوس وانا اخذتو للمطبخ هين اكو ميز صغير مخصص للريوك وانا محضرتلو الاكل بس حميت الجاي بين ماغسل ورجع

صار ياكل وانا بس ادحكلو واحس بروحي ارتوت الحين .. صرت افهم ليش امي كانت تسهر للفجر تنتظر ابوي يرجع حتى تحضنو ويتريكون سوا .. وصرت افهم ليش هي مفضلتو علينه بكل شي .

..

احس دنيتي صارت شي ثاني وكت الي تزوجت وجربت شعور المحبه وصار بحياتي شي غير اخوتي هين راحه بنص الصدر تصير .. شي مثل ان هاي اللحظه هي الي انا مخلوقه حتى اسويها ..

هو كان يحكيلي عن رحلتو بس انا ماكنت اسمعو زين مادري بالي صفن بس ادحكلو
وهو حس عليه كرصني وحكالي ..
- احبج ولج
-ههههه وانا احبك اسوم
- صدقه لهالحلك من شوكت كاعده
-من الاربعه
- حيل ليش حبيبي جان ضليتي نايمه اني بكل الاحوال اجيج
- لاا ماكدرت اذا مو ادحكك تدخل وانتظارك شي حلو
- احبج والله يمكن هاي احلى رجعه للبيت صارتلي كل مره ارجع مطفي كبل بوجهي للغرفه اسبح وانام واهلي مايدرون بيه شوكت اجي شوكت اطلع
- ماكو بعد هالشي ياعيني خلص هذاك زمان
هسه كل شي بالتفصيل عندي
-ههههه حلو هالتفاصيل بيهه اهتمام يجنن
يلا خلي نصعد
- اغسلهن واصعد وراك
- لا انتظرج كمليهن بسرعه يلا

اخذتهن غسلت بالعجل ونشفت ايدي ورحنه صعدنا سوه لغرفتنا .. دخل يسبح وانا غيرت ملابسي لبست شورت وفانيله وفتحت شعري بعدو رطب ..
اول ماطلع يصوفر ويحكيلي ..
- مشتاااق يالله مشتاااق
ضحكت وحضنتو واشتميتو براحه يالله صارت راحتي بشمتو .. سبحان الي غير خوفي ومزاجيتي ولساني كلهن غيرهن لحب ورضا هالشكل حدرو ..

نمت بحضنو وضليت انتظرو يغفى هالتفاصيل صح هي صغيره بس تعنيلي شي كبير ... احس مالازم افوت دقيقه من اني ادحكلو ..

نمت بعد نومتو وماحسيت بعد الا على صوتو وهو يكعدني .. كعدت وبوستو صرت الم شعري وحكالي ..
- حبيبي شمسويه بدون متكوليلي
- شنو ماسويت شي
- لاا مسويه
- شنو !

دحكتلو وهو جر ايدي بوسها وحكالي ..
- اروح فدوا لمريتي والله من سمعت هالحجي فرحتي زادت اضعاف اضعاف فرحتي الصبح بشوفتج
- ياعساها ماتفاركك
- شكرا غاليه من صدك شكراً رجعتي لامي الشي الي حتى بفلوسي ماكدرت ارجعه
- هاا ههه لاا هذا واجبي
- والله ونعم من اختاريت اخت رجال والله اصيله فرحتي كلبي ورفعتي راسي
امي حجتلي قبل شويه نزلت اسلم عليهه وصارت تحجيلي شلون داريتيهه هالايام ومارضيتي الها تصرف عمتي
- اكيد ماارضى عجل شنو فرقها هي عنها انا اكره الي يحسبون نفسهم اسياد والقوم عدهم عبيد
- اي والله هالشي من زمان ردت اغيره ومتغير .. تعرفيني دائماً طالع ومادري شيصير ميصير هنا بس مرات هديل تراسلني تحجيلي اذا امي مغثوثه واضل احجي ويه امي بس هي كضتها اسمتو واسكتو عمكم وفضله وعيب وميصير .. صرت اشتغل واصرف على البيت حتى لا تضل امي تحس بهالشي بس هم مافاد عاد عفتهه بعد
بس وكفتج ريحت كلببببي هسه اني صدك صدك مرتاح ومطمن لو شكد مااغيب عن البيت عندي الي يداري اهلي بدون منيه
- اسامه حبيبي ضل متطمن عهد علي ماارضى الهم ذله ولو اعرف ازعل الكل اشتري رضاك
- فدوه لله شلون مره معدله

بوسني وهين حسيت باحلى انتصار بحياتي
نزلنه كعدنا ويه الاهل وهين دحكت عمتي متبسمه وكاعده حدر ابنها ..
حضرت الغدا والتمينا كلنه نتغدا وانا كاعده حدرو هو ياكل ويشاورني .. وانا اتبسم وادحك الكل عيونو علينه احكيلو بعدين
بس هو مستمر يشاورني ويضحك بهداوه ..

كضينا هاليومين سوا ومرتاحين خابرت امي
حتى افهم منها ايمتى العزيمه حكتلي ..
اعذريني بنتي بس وضع البيت مو مال عزايم اثنينه محروكات كلب وبالنه مشدوه على ولدنا بس تصفى الامور اسويلك احلى عزيمه

عذرتها وماحكيت هالشي لاسامه قلتلو مادام جراح مارجع مالي نفس ادخل البيت خلي اشبع من كعدتك هين لاحكين على الروحه ..

اخذني اسامه زياره للامام الكاظم عليه السلام
رحنه بعد صلاه المغرب وسهرنا بره لنص الليل يلا رجعنه محملين لكل واحد بالبيت شي من الكاظميه ..

ام سالم صارت ماتحكي ويه عمتي ولا وياي
وانا مشدده على عمتي انها ماتتحرك مثلها
وغيرت طبع هديل وروتينها ..
صار الطبخ مسؤوليتي انا الي احدد نوع الاكل اليوم واطبخو ونتقاسم التنظيف انا وهديل هي عليها الجوه وانا الفوك وطلبت من عمي يلغي جيه هالمره جيرانهم الي تنظف هين وهو ماحكالي غير صار انتهى موضوعها ..

بيت فيصل يحدرون علينه كل يومين يتعشون ويانه ويمشون بنص الليل لبيتهم .. طيبين ودحكتهم مثل اطباع هالبيت باردين ومالهم دخل بشي ... يمكن انا الوحيده الي يطلعلي صوت بالبيت ..

انا اطلعلهم مواضيع واخليهم يسولفون واشغل هديل وياي وماخليهه تضل بغرفتها طول النهار .. انوعلهم بالاكل الحلويات و غيرت نظامهم الي ماياكلون اذا مو على الميز حتى لو شرب الجاي .. صارو اذا كاعدين بالصاله
اخذلهم الحلى عندهم وشويه شويه تغير هالشي ..
اسامه اول ايام بارد وثكيل بتصرفو حدر اهلو
بس بعدين خليتو يكسر هالشي .. صرت احكيلو ..
البيت والاهل راحه مو حرج
وهو على سوالفي يسولف شويه ويضحك وطلع من جمود هذاك ويه اهلو ..

اما عمي فهو عالم وحدو صعب اصلو
كل يوميه الصبح اسمع من مكتبو احلى الاغاني .. اكثر اغنيه اسمعها يشغلها هي
' ماريده الي ميرابط يا بابا ماريده '

سألتو على اسمها مره لاني مالكيتها باليوتيوب حكالي اسمها ' شناشيل '

تدرين شكان ردو !
-شنو مارضى بي ؟
- يحكيلي من قلك العوز بس اكل وانته ظنك احنه الكبار هين ناسينهم وعايفيهم بجوع ؟ حتى ننتظر جناب جراح ياخذلهم مؤونه !

غاليه ردت اركع راسي بالحيط والله تعبت حتى جمعتهم فلس فلس ويستهين بيها !

تالي حكيتلو .. يابه وش الي يرضيك فهمني
انا طعتك وتعبتك وسويت كل هذا لاجلك شنو اليرضيك اكثر بعد احكيلي فهمني !

حكالي .. تضل للحين ماتوصل عشر من الي اريده منك .
قلتلو بس فهمني المطلوب شنو !
حكالي .. المطلوب تفكر باكثر من رضاي
قلتلو يابه انا ماعندي شي حتى اسوي اكثر من الي وصلتو للحين انا بطرك روحي
والفلس الي عندي ذبيتو عليهم وكعدت مصفر
حكالي .. اييه مثل ما جمعتهم اجمع غيرهم
قلتلو .. وين المفروض اوصل !
حكالي .. اعلى من الي تعلمت عليه
قلتلو .. ماعندي الي يساعدني على هالشي لو عندي ماكصر والله
حكالي .. كيفك ضل بره واسس حياتك وحدك وانسى هالبيت
قلتلو .. ماتنازل انا عن رضاك يابه وارجع لبيتي مرفوع الراس انطيني بعد صبر وان شاء الله اعجبك
حكالي .. مااظن راح ادبرها وحدك يمكن تاملت بيك ازيد من اللازم صدك من كال ايد وحده ماتصفك
قلتلو .. يابه انا مو بحاجه الايد الي تصفك
انا ايدي الوحده تربت وتداري والنه غير كعده واوعدك هي الاخيره

- اوووف ياخيي والله مافهمت ابوي شناوي

- انا بديت افهمو بس مطلبو صعب وانا مصفر الفلس يحتاجلي وكت اكثر

- حكيتلو على حسين فهمت شسالفتو هالمكرود؟

- ههه هذااا سالفته اتعس مني
اول ما فتح حلكو حسين ابوي سكتو وحكالو اذا يرجع جراح بسنه انته بسنتين ويجوز لو ادبرهه لو لا وامشي اطلع بره انا طلبت اتفاهم ويه جراح شدخلك انته
حكالو الك عشر دقايق تدحك امك وترجع من وين مااجيت

- اويلي عليك ياحسين من يومو مظلوم من ابوي وشابع رزايل .. هسه شناوي تسوي !؟

.
.
يتبع

كان بيها مقطع حلو هو يرددو ساعه مايرتب كتبو ..
' فدوه للشناشيلات تكعد بيهن الحلوات
تكثر بيهن الضحكات فدوه للشناشيلات '

كثر ماحاولت اكسر على برود حياتو ماكدرت
هو معتزل بمكتبو او حدر التلفزيون ..
ما ينام بغرفتو ويه ام سالم عندو بمكتبو قنفه تنفتح وتصير بيها مكان ينام بي براحه ..

مرات اسأل اسامه شعندو عمي معتزل بمكتبو؟ يحكيلي عندو جو خاص مايحب احد يكطعو عليه ..

خلصت العشر ايام وصارت رحله اسامه وهالمره يطول عشره ايام يلا يرجع ..
احس بروحتو تغيب نص فرحتي وياه

نفس الايام مشت وجراح وحسين على وضعهم يشتغلون ليل نهار .. جراح يشتغل بمحل ابوي العصر لحد الليل والنهار عماله
هو وحسين .. امي تمرضت على فراك حسين
معدتهه دايماً تاذيهه وتتقيء وروحهه ذبلانه
احكي ويه ابوي يردلي .. كثر دلالهه لحسين ومحبته نساهه تزرع بي القيم خلي كل واحد يتحمل نتجيه خطأو ...

عدا هالشهر واخوتي بعاد عن البيت
وشهر ثاني وهمه نفس الحال .. امي فجاه تحسن حالها بس ماعرفت شلون من سألتها
تحكيلي ... رضيت بقسمتنا ..

انا حللت وطلعت حامل اخذني عمي بوكتها للتحليل لان اسامه مسافر .. بيومها فرحه البيت بهالخبر خلتني ابكي والله بالاخص عمتي ام اسامه تهلهل وتحضن وتبوس
وعينها تلمع من الفرح ..

مانطيت خبر لاسامه كان بنفسي ادحك فرحتو حدري واحكيلو .. ووصيتهم ماينطوه خبر
ومن رجع بعد اربع ايام وتلكيتو من الصبح
مثل كل مره خليتو ياكل ويسبح وبعدين كبل مايكعد قلتلو ..
- حبيبي شتتمنى ؟
- تضلون بخير
- يعني ماتتمنى تصير اب
- ههه هذا حلم مو بس امنيه
- وليش تحسبو بعيد
- مادري بس ماتخيل نفسي اب
- زين واذا قلتلك راح تصير اب بعد سبع شهور
-ابوسج من راسج

دحكتلو وانا اضحك وهو كان ينشف بشعرو صفن شويه ودحكلي حكالي ..
-حامل ؟

هزيتلو براسي وهو شمر المنشفه وحدر كضب وجهي وفاك عينو ويحكيلي ..
- مو شقى ! الله عليج
- ههه والله حامل بشهرين
- جذابه ماصدك شوفيني وين تحليل شوكت شلون عرفتي
-عمي اخذني حللت لاني كنت شاكه بنفسي حامل وتاكدت قبل اربع ايام
-يعني صدك صدك حامل وراح ارجع بعد الكاج بطه تتمشين

ضحكت وهو هجم عليه يبوس ويضحك وبعدين عافني وطلع ركض راح لغرفه امو يحكيلها غاليه حامل وصوتو هرج البيت
ورجعلي يحكيلي طلعي التحليل ..
انطيته الورقه وضل يقراهه ويبوس بيه
ويرجع يبوسني يحكيلي ...
- لج انتي سبع سعادات انطيتي لحياتي
بيش اجازيج حبيبييي
- ضل حبني وانا اصير بطه مو ابطل مااعجبك
- هو غير ميت على شوفتج بهالبطن
من هسه اكلج اذا ولد اسمه ايهاب واذا بنيه كيفج انتي اختاري
- ان شاء الله

بيومها اسامه يغفى شويه ويكعد يتلمس ويضحك ويرجع يغمض وينام ..
ارسلت لاخوتي بالكروب ..
' عندي بشاره يا حنين يرد اول واحد ويحصلها '
بالعجل رد اسر ' اخيك هين بشري '
كتبتلو ' انته اصغر خال واحنهم '
ردلي ' منين اجاني الخال '
كبل مااكتب شي ارسل حر ' ها يولو حامل '
كتبتلهم ' ايييه ماتباركون '
ارسلولي بصمه اثنينهم يحكون بيها
' ياابه مبرووك والعز النا بهالولد اخيرا راح نصير خوال ول غاليه ابنك عندو سبع خوال منو كدو يابه '

رماح ارسلي .. ' تكومين بالسلامه يولي والله وكبرتي وسبقتيني بالولد '
قلتلو ' تزوج يلا حتى يحضر ابني عرسك '
ارسلي ' زواج الاكشر هذا مادحكين الصار '

ضلينه نسولف وبعد وين ارسلي جراح
' غلوي ول يابه فرحتلك والله ان شاء الله تجيبيلنه بنت ونشبعها دلال مثلك '
قلتلو ' ايييه والله انا بعد اتمناهه بنت وانته كون تسميها '

اختفى هين بعد ما رد بس اخوتي عوضو عنو
حسين بالاخر يلا ارسلي ' يولي بس اولدي واشمريه على امي خليها تتلهى بي وانا اربيه الك وياهه ماتحيرين ولاتعبين نفسك احنه هين معوزين حنان وجهال وهرج انتو خليكم لاتموعون ثلج بيتكم '

ضحكت من كلبي على حكيو وتمنيت ربي ينطيهم طول العمر ويدللون ولدي ..

مشت الايام ودخلت انا بالرابع وهين سمعت من جراح راح يتصل بابوي ..
ضليت ادعيلو يتوفق هالمره .. وانا اتراسل ويه حسين حتى اعرف ايمتى يخلصون حكي واتصل على جراح افهم شسوا ..

دقايق وارسلي حسين رايحين للمضيف ابوي طلبنه ...
وضليت على نار ماسكنت ولا هديت لحد ما عبرت ساعتين واتصل جراح ..
- ها خيي بشر
- والله ترزلنا خوش رزاله بس لان شويه
-ليش ترزلتو وشصار انته شسويت بهالسالفه ؟
- انا مو تدرين كنت اشتغل طول هالاربع شهور
-اييه
- اييه جمعت مبلغ زين وتراسل ويه رماح دليتو على مكان كنت جامع بي كم فلس بيتنه وجابلي ضفتهن على الي عندي وكدرت
اجهز مؤونه كامله لهالعوايل حملنه كيه كامله واخذناهه وزعناهه على كل بيت كبل الفجر
ماعرفو هذني منين بس حسين كان كاتب بورقه بداخل كل كارتونه ' شكر لدم اخونا '
والله وزعناهن وانا كنت مسوي قائمه باسمائهم والله تعبت من كثر ماسألت على كل بيت وشعندو من عيال ..
واليوم خلصنه ابوي من حكيتلو يابه صار لازم نتفاهم حكالي احدر هين ..
كعدت حدرو حكيتلو الي سويناه الهم

#شقراء_بغداد

الجزء_الثاني_بارت_٢٣


شهر التاسع من سنه ٢٠١٧ ...

كاعده بالحديقه على المرجوحه اهزها برجلي واني صافنه بالفراغ .. اتذكر شلون جان هالبيت مايهدأ ولا يسكن من صوت ولعب الجهال ... دلع غاليه وصوت ضحكتها العالي ويه اخوتها وركضها من غرفه لغرفه
عركاتهه ويه حسين ودمعاتهه الي تتحايل بيهه لجراح حتى يعاقب حسين لان زعلها

رماح الهادىء الصغيرون ربى على ايدي
جان يحب يحط راسه بحضني واضل افرك بشعره ويغفى ..

عباس وصكر صارولي اصدقاء رغم صغرهم بس جانو حنينين ويايه ومطيعين
يحبون يكعدون بالهول ينتظروني اجيبلهم سله المكعبات ونكعد نسوي قلعه وهمه يهندسوهه بكيفهم ..

صديقي الاول جراح .. ماشفت مثل حنيه كلبه ولا مثل رزانته .. طفولته كلهه كضاهه يشتري ونسوي عزومه لو ينتظر حلى اليوم شنو .. طبعه طبع ابوه ..
يحب يخصص اخر الليل لسوالف يومه
ويستشير ويفضفض وياكل بنفس الوكت ..
كبر وصار يستحي مني .. يراقبني بعيونه
ويبتسم لو تلاكت عيني بعينه ..

طلع الكل من هالبيت وبقى بس مليان بذكرياتهم ..

صار اربع شهور كلبي مفرفح على ابني لو سبب واحد اعرفه ليش جان ارتاح كلبي
جان على الاقل خابرته وعلمته شلون يحل مشكلته ويه ابوه ويرجعلي .. بس عيني بعين الله انتظر يهديله السبيل ..

مشى العمر وتغيرت الايام .. وبينت هسه وحده الكُبر .. صرت اني هسه مثل جارتي
الي جنت اخذلهه ماعون الحلاوه الجكليتيه
وكت العصريه واكول خطيه مره جبيره وكاعده وحدهه اروح اونسهه واكعد يمهه ..

دار الزمن وصرت اني المره الجبيره الكاعده وحدهه والي تفرح باليدك بابهه ...

بدأ صوت المآذن يعلى بالتجويد قبل الاذان
وهنا انفتحت الباب واشوف هذا حسين ابني
حفزت من مكاني وكلبي رفرف عليه
رحت حضنته ودموعي تجري وهو ساكت وحاط راسه بركبتي ..
- وليدي يمه ياروحي يارووحي
- يمه مشتاكلج والله والله مشتاكلج
- ياروح امك حبيبي حسوون رجعت بعد رجعت متروح مو
- لا يمه اروح ابوي طردني للمره الثانيه
- شنوو ليش حسين ليش انته شمسوي لابوك شمسوي ولك يمه فهمني مو كلبي شيب
- يمه وحك عينك وغلاتك عندي مامسوي شي وحك عافيتك ماغلطان بشي ولا ماشي بدوب مو زين ولا بادره مني العيبه مو تعرفيني انتي ياامي مو تعرفيني رباه ايدك انا
شتعرفين اغلط واحرك كلب ابوي !!!
- لا يابعد روحي لا والله اعرفك ماتسوي الموزين وكل خطوه ماتخطيها اذا مو برضانا بس شسوي يايمه من حركه كلبي اسال لعد ابوك مترهي عليك ويطردك !!
- ايييه مترهي مترهي
- لاا والله يحبك لك انته ابن عزيزه كلبه انته متعرف شنو من فرحه فرحها يوم ماعرف بيه حامل لك انته الولد الوحيد الي من دمي ودمه يعزك معزه خاصه لتشك بمحبته الك
- عجل يمه اليحب هالشكل يتعامل !
انا بس سلمت عليه قلتلو كواك الله يابه وهو يردلي شجابك هين !انا ردت احكي ويه جراح شدخلك انته هين امشي ارجع منين ماجيت
- سوده بوجهي يربي شلون بيه ولك يمه والله ماعرف شجاه الرجال هيج
- يمه هسه انا عندي عشر دقايق اشبع منك
بيهه وامشي
- لااا ياكلب امك شفت منك اني وين رايح
- شسوي حكم الشيخ بعد احسن مانطرد للمره الثالثه امشي بكرامتي
- حسين حبيبي راجع افعالك يمه تذكر خاف حاجيلك كلمه كدامه لو بظهره مايرضى عليهه .. تذكر ابني كلشي صار وياك هذيج الايام ارجع اتذكره زين وافهمه ..
ابوك مستحيل يسوي هالشي بدون سبب
لان جراح وفهمنا سالفته اكيد رايدله المشيخه وراه ويريد منه فعل يسوه يحصل تعب ابوه
بس انته شسالفتك ؟ هاي الحيرة عقلي
- ان شاء الله يمه
انا هم ناوي اصفن لسالفتو واتمنى الكى شي يسوه
- ان شاء الله تلكى حبيبي وتخلص من هالعقاب .. تعال خلي احطلك شي تاكله
-يمه مالحك
- تلحك تعال خلي اشبع بشوفه طولك وليدي
والله البيت اظلم بدونك .. كلبي مستاحش بدونكم والله فراك الولد صعب حسون
- والله حاس بنار كلبك ياامي وان شاء الله ماطول الغيبه

بوس ايدي ودخلنه للبيت وهو حاضني
رحت للمطبخ صبيتله ماعون تمن ومركه
وضل ياكل وهو واكف .. رحت لغرفتي
اخذت فلوس واجيت انطيه مقبل ياخذهن
كالي ..
- اشتغل انا يمه والله اشتغل واكفي مصرفي
- بس يفيدنك ياعيني اني مامحتاجتهن
- بالحرام ماخذهن خليهن عندك انا معتمد على نفسي كافي شبعتيني العمر كله بدلالك
- غير هالوحيد انته شلون مادللك
اجيبلك ملابس هسه راح يبرد الجو بعد بالليل
-اخاف ابوي مايرضى اخذهن ؟
- ملابسك هنه شنو مايرضى .. اكل انته يمه اكل طلع من ثلاجه شيعجبك واكل بين مالملك ملابس
- يمه فدوه خليلي حذائي الرياضي الابيض
وعطر على ذوقك
صعدت بسرعه لغرفته وضليت اطلع بالهدوم واسفط بالجنطه .. لميتله كم قطعه ملابس بيت وداخليات وبنطرونين للطلعه وبلوزات بهاريه وحذاءه وعطر ومشط وجواريب
ونزلتهن اله ...
اخذهن وكالي ..
- يمه مشتهي كيك من ايدك بلكي تسويلي وحده وادزلك حسن ياخذهه
- صار يمه من عيني باليل اسويلك
-لا خليهه بكرا الصبح ابوي اكيد يلكطها ويحرمها علي وتضل بنفسي

- والله زمن وصرنا نتختل .. باجر يمه اسويلك واخابر حسن ياخذهه
- انتظرهه يمه داريني بيهه زين
- زين حبيبي ادلل فدوه انتبه على نفسك وشتحتاج يمه كول لا تستحي انته شكد ماتكبر تضل ابني المدلل
- مااحتاج غير دعائك يالعافيه انتي

بوسته وشميته وضليت اتلمس بوجهه واكوله رتب لحيتك وخفف شعرك وهو عينه تلمع
ويبوس بايدي .. طلع وهالمره الوحيده الي حسيت بيها فعلا ابني حسين كبر ...

اليوم ليله ام جراح والشيخ يتعشى يمها
ماسويت عشى ولا الي نفس اكل وحدي
صار فتره احس بخمول وتعب ودائماً
لعبانه نفسي واتقيء .. اكلي قل هواي واكثر وكتي متمدده اكلب بالتلفون لو احجي ويه غاليه الي مافوتت يوم بدون ماتسألني شي عن الحمل ...

ساعه عشره صارت خابرت حسين اطمنت عليه وكمت اريد اقفل البوب حتى انام
جان تجيني رساله من الشيخ كاتبلي ..
' انتظريني '

كعدت بالحديقه انتظره وهو نص ساعه
ودخل بهيبه مشيته الي ملينهه بشاشه وجهه وابتسامته وهو يباوعلي ..

رحت يمه بوست خده وهو بوس راسي وكالي ...
- رجع الدم بوجهك يولي اثاري حسين اعز مني
-هههه حسين ابن هالكلب وانته الكلب كله
- ههههه تعرفين شلون تلوتين بالكلام من يكدر لسانك المعسول انتي
- انته تكدر
- تين ما بخاطرك شي من شيخك ؟
- لا ياعيني اطمن اني مسلمه امري الك واثقه ماتاذي كلبي بابني بس شده وتزول ان شاء الله
- هذا درس ياتين درس للي يخطىء بجهاله
درس حتى يوعى بعد يفتح كل خلايا عقلو
-بشنو خطىء ليش متحجيلي
-لان كلب الولده مايضم سالفه
-ههههههه
- دحكتي ! انا ساكت عنها لانك راح توضحيها لابنك وتضيعين تعبي عليه
-زين بس كولي يعني هو حاجي شي لو متصرف بشي مو زين مسوي شي بدون مندري يعني
- اهااا هو مشكلتو ان كل هذني ماسواهن
- شنوو!!! تره اول مره مافهمك
- تفهمين ويه الايام
اسمعيني تينتي بكرا الغدا جماعي بيتنا
انا ادري بصحتك مو تمام ماريد تحضري شي او تدخلي بشي ابد .. ام جراح تتكفل بكل شي .انتي ضلي هين كبل الغدا انا ارسلك واحد من الولد
- صار ياعيني بس والله لو ماهاللعبان نفس الزايد جان اني طبخت وياهه ماعندي شي بس كاعده
- ارتاحي ارتاحي وانا بكرا العصر بأذن الله امشي ادحك التحليل شصار عليه
لو ما كعدتي ويه الولد اليوم كان رحت اخذتو
- شصار بسالفتهم هسه شقررت
- شقررت !همه شسوو حتى اقرر!
مصفنين وهاي فرحانين بكم علاكه غذائيه موزعينها عجل انا ما منطي حصه لكل عايله منهم من حصاد اراضينا !!
- ميخالف ياعيني هسه همه مو زين منهم
اشتغلو ولموهن فلس فلس بهالحر بالعماله وسوو هالشي هم على كيفك وياهم
- زين منهم لو ماكان هالوضع نفسو الحين
بس دام فكرهم هالصغر وهاذي محدوديتهم
مايرضيني ولا ادحكو شي قيم
- انته وين تريد توصل ويه جراح
- اريد اخليه صاحب سيط بافعالو مو ابن الشيخ الكبير صاحب الميراث
وهذا هو يبنيه بايدو
- الله كريم .. جراح ذكي وصاحب اراده وعزم اكيد يكدر على الي بالك
- ان شاء الله يكدر لان لو ماكدر عليها راح يخسرني تعب العمر
- شلون يعني
- تخيلي كل الي انا ورثتو من ابوي وتعبت عليه سنين ومضيفي العامر هذا والاسم الي تعبت يلا رسختو بين اهلي كل هذا اسلمو لغير ابن بيتي والي ياخذو جايز بفعل واحد متسرع منو يخرب كل هالتعب والسيط
المشيخه امانه بهالاعناق ان انخانت الامانه مره بس مره تهدم تعب اجيال كلها تصير كلمه الشينه تلحكهم ولو كانو اصحاب جود وكرم .. تضل العيبه بالوجه ظاهره من فعايل فلان الي تسلم المشيخه بالاخر
- صح والله . بس انته بعدك بحيلك ماشاء الله ليش تعوف المشيخه من هسه !
- ياتين العمر هم اله حوبته
ان اليوم انا واكف على حيلي شامخ جايز بكرا ماكدر ارفع راسي من هالفراش لزوم اأمن على تعبي واربي ولدي على الي تعلمتو بسنيني بين المضايف غير هذا انا اموت ماادي الامانه
- لاا اسم الله على عمرك حبيبي اسم الله
- كلنه على درب واحد نمشي ياعيني
- ربي لا يفجع كلبي بيك بيوم بجاه حبيبه محمد

ابتسم وبوس راسي وكالي ..
- يعز علي اخليكي وحدك هين والله
- كلهن ساعات ويطلع الفجر واشوفك مثل كل يوم
- ماتمشين تنامين حدر امي
- لا خليني هنا مرتاحه ماعليه شي مثل كل يوم اقفل بابي وانام
- عجل نامي من الحين ياعيني لا تاخذك الافكار وتسهرين وحك عينك كلشي يرجع احسن من الاول بس اصبري كم يوم
- تلكاني صابره وراضيه ان شاء الله

بوس خدي وطلع .. اني اعوف باب الشارع ماقفلهه بس باب الكليدور والاستقبال اقفلهن
واروح لغرفتي انام ..

ثاني يوم كعدت على صوت الاذان وبمرور هالعمر صرت اعرف ان كعدتي للصلاه بهالوكت قبل الاذان بدقايق هي نعمه من ربي لان صوت الاذان مو بهذاك العلو الي يكعد واحد من نومه ..
ابدأ يومي ب
' الحمدلله الذي هدانا لهذا وما كنا لنهتدي لو لا اذ هدانا الله '
اتوضى واصلي الفجر على نفس سجادتي من سنين رغم انها احتكت شويه بس احسها عزيزه وقيمه عندي ماحب ابدلها هالسجاده جبتها من مكه الها مكانه عندي ...

بنفس التوقيت على كعدتي وبأثناء مااني اسبح بالصلاه على النبي اسمع باب الشارع تنفتح
الم السجاده بفرحه وانزع احرام الصلاه
وامشي افتح باب الكليدور الكاه واكف ومتلفلف باليشمغ على وجهه يحضني وابوسه من وره اليشمغ على شفته يلا هو يفتحه ويرفعه عن وجهه ..

ندخل جوه نكعد متحاضنين وهو يعيدلي نفس الحجايه من سنين ...
- اليوم انعم الله علي بحضنك من هالصباح وكاد يومي حلو
- عسى الله يديم بينا هالنعمه

يبوس راسي ويكولي ..
- نتريك بعدين خلي نناملنه ساعه بهداوه وراحه بال

نروح للغرفه نتمدد وننام متحاضنين
هاي احلى جزء بيومنا .. قوتنا وراحتنه وهداوه بالنه كلهه بهالعاده الي بقينا عليهه ثابتين من سنين ..

ساعه سبعه يتريك ويطلع واني اتلهى انظف البيت الي مابيه شي بس تكضيه وكت
واخابر غاليه اكضي وياهه وكت بسوالفهه الحلوه .. بنتي بكل شي قويه ورداده لسان الا ويه رجلها دجاجه مصلحه لاتهش ولا تنش

يحاجيها تحاجيه يسكت تسكت يبوسها تبوسه
شيسوي هي تقلده .. واني عقلي كله ازقه الها زق كل يوميه اعلمهه شي وانصحهه وهي بس اي وافتهمت وتسده وره كم ساعه ترجع
اكلج يمه هذا هيج كلي اردله هيج لو اسكت ؟
تخليني اريد اشك الهدم الي عليه ..

اتفاجىء بيهه والله مااتوقعتهه هيج فاهيه وتنثول ويه رجلهه .. على الدلع والدلال الي جانت تمشيه على اخوتهه وابوهه كلت هذا اسامه اقل شي يمكن يكوم مايسد الخط وياهه
طلعت بس هنا سباعيتهه ..

حضرت الكيكه لحسين وسويتله اثنين وحده بالككو ووحده بالبرتقال وغلفتهه وخابرت حسن اجه اخذهه بسكوت ..

الظهر رحت لبيت الشيخه ويه عباس وكت الغدا سلمت وكعدت وياهم .. تغدينا وكملنه ورحت اصب الجاي واجيت قدمته جان يأشرلي الشيخ اكعد بصفه ..

كعدت وصرنا نشرب الجاي والولد عباس وصكر وحر واسر كاعدين هم ويانه
رماح عنده تطبيق وكاعد اقسام داخليه بغداد
ينتظر يبدا الدوام حتى يحول هنا ..

دك تلفون الشيخ وهو اول ماجاوب ساكت جان شويه ويصيح بعصبيه ..
- ول هذا انا ماقلتلك لا تشغلو وان كان ابني لا تشغلو وصيت انا ولا ما وصيييت
ايييه لا تحسبو غريب ولا كريب هالولد هذاااا تعثر دربو زييين
خلني اسمع مره الاخرى مدخلو عتبه بابك
اطردو اييييه اطرود انا طردتو ضلت عليك خله يتهجول بالشارع هو يحير بامرو انا مانكسر كلبي عليه انته ليش ينكسر كلبك !
ولااا حتى حسين اثنينهم نفس شي اثنينهم ماتشغلهم
يلا يلا مع سلامه

كلنه باوعنه عليه والكل ساكت .. كلتله الشيخه ..
- شجرالك على الولد انت يعني تريد تكسر ركابهم من كل صوب !
-ايييه انا ناويلهم شر ما مبين يعني !
-والله بعكلك ضميمه ولا انك ولدي الاعرفو

سكت ماردلها واني كلتله ..
- لو تتهدأ وياهم شويه خلي يعينون نفسهم خطيه مو ولدنا هذوله
-تين لا تدخلي ولا احد يتدخل ولدي وانا كيفي اتصرف بيهم

سكتت وباوعت للولد كلهم ساكتين ومدنكين بس عباس كال ..
- يايه هذا ظلم يصير مو عقاب ولا تربيه
ميصير نكطع الارزاق مو هذا الي متعلمين عليه !

باوعله الشيخ ورافع حاجبه وكال ...
- ايييه بعد كمل
- اييه يابه قرارك احنه نحترمو وعلى هالراس بس من تصل لكطع ارزاق اخوتي هين تعذرني يابه سكتي عليها ثكيله
عجل همه من يدورون الشغل غير حتى ينفذون الي تطلبو منهم شلون بهالحال يضيع وكتهم بالشارع يدورون على شغله وتالي مايلكون شلون يعيشون ! يكتلهم الجوع مو تعرفهم اكلهم كله من المطاعم منين يصرفون !!!
هم حك الله هذا لازم مانكطع دربهم خليهم بره بس لا توكف بدربهم خلي همه يدبرون حالهم لا كلش تخنكهم من كل جهه والله حرام يابه
هذول اعزازنا والكبار حرام يصير بحالهم هذا ونسكت

شرب اخر قطره جاي بالاستكان وحطه بالكاع وكال ..
- وانتو ياولد رأيكم؟

حر واسر كالو ..
- براحتك يابه انته ادرى

وصكر كال ..
- اني من راي عباس

فر سبحته مرتين وهو يباوعلهم برود رفع اصبعه واشر على حر واسر وكال ..
- اصعدو اخذو تلفون والشاحن والمحفظه واطلعو دورو اخوتكم وين اكعدو حدرهم

كلنه صفنه عليه والولد فكو حلكهم .. رجع اشر على صكر ..
- انته هم تلحك اخوتك
وعباس تطلع توصلهم وتبلغ سلامي لحسين تحكيلو ..ابوي دزلك الي يشبهك علمو وتعلم منو .. زين يابه بالحرف تنقلو وتبات حدرهم سوولكم خوش لمه تونسنو هالليله بالشارع

من صدمتنا ببرود اعصابه بطردهم كلنه ساكتين منعرف شنحجي .. جان يطك بالسبحه ويكول ..
- يول اشو تتصفن بوجهي وش حكينااااا
امشو اطلعو يلاا عجل انتم صمان ماتسمعو مو قلت تلحكون اخوتكم شمكعدكم هين !!!

لزمت ايده وكلتله ..
-شيخ على بختك مو كل ولدنا يطلعون كافي هذولاك الي حاركين كلوبنا لليوم لاتطردهم فدوه
-تين انا ما قلتلك لااااا تدخلي
-بس ميصير هيج والله ميصير
- كلمن ينطرد من هيييين هو من ايدو
ماطرد احد عبث انااا وهذول السبع ولد مايستاهلون دقيقه يكعدون بهالبيت
ولو هالرماح هين كان هم شردتو بالشارع حدرهم ..بالحرام مامنهم احد يرجع ولا يعتب شارع بيتنا واسمعن انتن يالحريم
فلس واحد لو عرفت واصل لايدهم