#الجزء_الثاني_بارت_١٣

✨
🔹🔹

روحي ساعتها اكتست ببروده جارحه حتمت عليه السكوت مقابل كلمه " عوره"
وباوعتلهه بنظره باهته ورجعت لبست مناظري وهي كملت حجي الي بكلبها وكالت ..
- انتي صابك شي من الهبال تالي عمرك تسكطي نفسك بايدك ! اكيد انجنيتي سوايتك مايسويهه عاقل
- اي اني احب الشيخ بجنون وسويتله هالشي
- حبيه بجنونك هذا محد كاضبك بس خلي بالك الرجال مايتحمل وحده عوره تصير حرمتو وتنام حدرو وهو شيخ ماناقصو شي ان دللك يومين ترا يستخطيكي بس بداخلو ودو لو يمشي من حدرك بالعجل
حبيبتي الرجال ماعلى عينو عمى مثل الي على عينك ..بعدو بكوتو ويريدلو الحرمه التعجب مو الي هالكداتها عظمتين وفوكها عوره

ضحكت ام جراح وتأشرلها اسكتي و
هي كالت ..
- مادري شعندو اخوي ذبحها لنفسو عليكي من الاول وتاليه ماحصل منك غير ولد واحد وبالاخر صرتيلو سكيطه
خلف الله على ام جراح خلفتلو ست ولاد وخلت عندو عزوه بهالرجال الحين الي ملو بيتو وسندو ظهرو
- الله يخليهم الهه

كلتهه ودرت وجهي عنها ورجعت كالت ..
- مو تزعلين من حكيي خيه بس انا حكيت حك الله عجل صارلكم سنين متزوجين ماعرفتي تخلفي اخ لحسين
- حسين عنده اخوه مو وحيد
- اخوتو من الاب واخت من الام بس اخ بنفس دم امو وابو ماعندو وشدعوا هالتمضيك هذا على ولد واحد وصرتي تتعبين من الحمل عجل لو مثل حريمنا سبع بطون تولد كان شحكيتي !
- خيه كلمن وقابليته وقناعته واني هاي قابليتي ولد واحد ومقتنعه بي الحمدلله
- تتمضيكين والله .. عجل اخوي من تزوج حرمتين غير يريد يكثر نسلو
وشيفيد الحكي الحين كبرتي وعجزتي ماضل وكت على الحمل
وانتي ام جراح خيه داري الشيخ عاد هو راح يكثر جياتو عندك شويه داري نفسك وغيري بشكلك رجعي الشباب لا تضلن انتن الاثنين مصوفرات الوجه حدرو

ضلت ام جراح تضحك وتتشاور وياهه واني اخذت صينيه الجاي ورحت للمطبخ حطيت الاستكاين بالسنك و ضليت كاعده بالمطبخ وصافنه ... حجيها يرن باذني
ونظره الشماته منهن حزت بكلبي حيل
بس التزمت السكوت ..الانسان من يكبر بالعمر يصير يتجنب المشاكل والقيل والقال .. ومو بمثل حيل وخلك كبل حتى الاسنهن بكل حجايه ..

للعصر راحو اثنينهم واني صعدت يم غاليه .. نزعت شالي وكلتلهه ..
- بنتي انزلي يم اخوتج واني راح انام لتكعديني بعد راسي يوجعني اريد ارتاح
- خيرك يمه
- ماكو شي راسي يوجعني شويه انزلي يلا ولتخلين احد يكعدني زين
- زين يمه ماعندك الا العافيه حبيبتي

بوستني ونزلت واني تلفلفت بالبطانيه واحس هالبرود الي تملكني من هذيج اللحظه ديثكل على صدري ويخنكني بالنفس .. يمكن جان لازم انطي حق لرد الفعل مااكبت لهالدرجه .. يمكن لو بجيت جان خف الحال .. بس اني سكتت لاني اعرفه هالشي صح بيه مو تلفيقاً منها او من غيرها .. صح هالنظره راح احصلهه من الكل وهذا لقبي الجديد بينهم بعد مره الشيخ العوره .. هيج راح يسموني ويميزوني ويذكروني بكلامهم

ماجنت اشوف نفسي متشوهه لهالدرجه ومتغيره والغير ينظرلي بهالطريقه
جنت اشوف بس تضحيتي لاجل سلامته
اشوف بس اني وكفت وكفه حق لاجل هالعائله الي احتوتني بعز غربتي وضعفي .. جنت اتوقع الي حواليه يشوفوني بعين الفخر ابد ماظنيت راح يهمهم منظر عيني شلون صار ماظنيتهم بهالسطحيه من التفكير والنفسيه ..

والشيخ معقول راح يملني بيوم بسبب شكلي !؟

سؤال جان يدور بعقلي طول الوكت ولحد الغروب مانمت افكر شلون راح يتعايش وياي بعد الي صار ؟

كعدني حسين حتى انزل اتعشى واتعذرت بحجه مالي نفس وراسي يوجعني اريد انام ورجعت لنومتي .. مالي قابليه اشوف احد بعد .. احس كل العيون تتشابه بنظرتهه الي وهالنظره مااقوى عليهه
بقيت بفراشي اتحسس نفسي شلون متكسره بكل برود وسكوت ...

سمعت صوت فتحه الباب وغمضت عيني .. اشتغل الضوا وعرفته من عطره الي فاح بالغرفه هذا نظر عيني الشيخ

كعد يمي وتلمس خدي وصار يكعدني
انداريت وباوعتله وهو ابتسم وكالي ..
- غبتي عن عيني كثير هاليوم ليه يولو
- غير خطار وملتهين
- وبعد ما مشو
- نمت
- وللحين ضاله نايمه! خيرك ياعيني حسين حكالي تعبانه وراسك يوجعك
-اي شويه يوجعني مانمت زين بارحه طولت بالسهر اني وغاليه وكاعده من وكت
- زين الحين شلون صرتي
-الحمدلله زينه
-عجل ماتنزلي تاكلي ضاله على الغدا
- ماشتهي والله خليني انام ارتاح احسن
-هاا ترجعين تنامين ؟ عجل وانا !!
- انته هم نام ارتاح
- ما محضرتلي مكان انام بي وانا وصيتك البارحه تحضرين هالغرفه النه بعد
- نسيت وجنت تعبانه باجر اسويهه
روح نام بغرفتك يم ام جراح اليوم اريحلك
- هااااا عجب هالمره ؟ صاير شي ماعرفو؟!
-لا
-تين ما مرتاحلك يولو
- ياعيني مو تريد تنام ترتاح روح لغرفتك ارتاح بيهه محضره ومرتبه هنا هوسه باجر ارتبهه ماصار شي

طك بسبحته ووكف كالي ..
- زين يصير خير

طلع بسرعه من الغرفه واني رجعت لفيت راسي بالغطى وضليت امسح دموعي ..

ماريد بعد قربه يمي صرت اخاف ينفر مني ويجبر نفسه على وجوده وياي ..

ضليت منطويه على نفسي لحد ما اجتي غاليه ونامت يمي وحسيت البيت هدأ بنص الليل يلا نزلت ..
غسلت وشربت مي وفتحت باب المطبخ وكعدت على الدجه .. جو بارد يريح الكلب .. ذكرني هالهدوء باابويه هو هيج جان هادىء لدرجه انه مثل النسمه ماتحس عليهه شوكت تجي وشوكت تروح ...
حسيت على ايد لامست جتفي باوعت شفتهه غاليه .. كعدت بصفي ..
كلتلهه ...
- شكعدج بنتي
- جراح كعدني حتى انزل ادحك شعندك كاعده بهالبرد وحدك
- هيج داشم هوا شويه
- يمه مادحكك مرتاحه ماتحكيلي الي بكلبك
- ماكو شي بنتي بس شبعانه نوم ونزلت
- عجل نسهر سوا الليله وشورانا ابوي وخفر وحسين نايم ناخذ راحتنه
خلي اجيب شي ناكلو على هالكعده

كامت وجابتلنه صينيه بيهه ماعون حب وماعون فواكه وراحت جابت بطانيه خليناهه على ظهرنا وكل وحده اخذت طرف لفته عليهه .. وصرنا ناكل برتقال وهي كالت..
- يمه مادريتي رماح قدم على الدراسه هين راح يرجع يكمل كليتو
-ايي الحمدلله ربي ييسرله اموره يستاهل رماح يتوفق وياخذ شهاده الطب
- ايييه خطيه كان الحين يتخرج لو ما هالاحداث الي اخرتو سنتين وهاذي الثالثه ان شاء الله ماتضيع منو
- ان شاء الله
- يمه حسين صرعنه اليوم بسالفه الكيكه
بالله عليكي يمه ماعاد توعديه وتنسينو
وتخليه ياكل راسي
- سوده عليه ضلت بنفسه بلكي باجر اسويله خطيه وليدي ضلت بنفسه الكيكه
- علميني بدربك يمه
- انتي اوكفي يمي وتعلمي بعد عيب هالعمر ومتعرفين بالطبخ شي
-اييه والله شينه بحكي
يمه دحكت عمتي اليوم وجهه مورد وتدلل ولدهه بهذا اللسان الحلو مو من عوايدها هالشي استغربتو والله
- شتريدين منهه عوفي المره مرتاحه
- زين عجب اليوم ماسألتي على ابوي ولا دحكتيه !! متكاونين انتو،؟!
-لااا بس اني نمت والتهيت عنه
- زين هو ليش مانام حدرك اليوم
- اني كلتله روح لغرفتك ارتاح احسن
- هااا ليش
- متشوفين غرفه مو مرتبه اله بس على كدنا اني وياج وهو ميحب هيج كلتله باجر ارتبهه وتعال نام هنا
- يمه ما مرتاحلك كلبي انتي مايغفل عن بالك هالشي وتعذرتي بي وتعمدتي ماتحضرين الغرفه هالليله !ليش هالشكل تسوين؟
-ماااكو شي
- الاا اكو واكو كثير .. يمه ماتشاركيني حزنك عجل انا مو بنتك صاحبتك مو كل شي عندي يصير اشاركك بي ليش انتي تضمين عليه

اكلت شويه من موزه وضليت اباوعلهه وهي تنتظر مني احجيلهه عاد كلتلهه ..
- اليوم فهمت شكد حياتي تغيرت جنت شويه غافله عنهه
- مافهمت ؟
- شكلي تغير بهالعين مو ؟
- لاا يمه بعدك حلوه
- يعني تغير
- لاا
- اني ماسالتج حلوه لو لا واضافتج هاي يعني تغطين على الموضوع بس هي مفهومه .. عين عوره شلون تصير بعد
- يمه لاتحكين هالشكل انتي والله حلوه بكل حالاتك حلوه وبعدين انتي ضحيتي بهالعين لابوي لاتنسين هالشي
- تروحله فدوه هالعين عساه بخير وعافيه دايماً
- يمه غثك احد بالحكي اليوم مو
- كل واحد بعد راح يحجي نفس هالحجي لازم اتعود
- يخسى الي يمسك بكلمه شينه عجل انتي ماقلتي لابوي هالحكي وخليتيه يتصرف معهم ليش سكتي وانطويتي على نفسك هالشكل
- بنتي هو حتى ابوج هم يجيه يوم ويمل ويجي باله هالحجي
-ابووي مستحيل يمه ابووي يحبك مايحكي هالشكل
- مادري بنتي بس اني استحيت منه يشوفني هيج بعد اخاف هم يجيه يوم ويحجيله مثل هالحجي
- لاا يمه ماتوقعتك هالشكل تظنين بالشيخ لا يمه لاا ابوي مايجرحك بكلمتو ماتعرفين معزتك عندو !
- اعرفها بنتي اعرفها بس يجوز يتصرف كدامي شي وبداخله شي
ماكمت اثق بعد بنظره الناس
-ليييش يمه هذاا ابوي حبيبك الي ضحيتيلو ليش هالشكل ماتثقين بي
- اثق بي بس اخاف من نظرته الي بهالشكل الي صرت بي اخاف احس انه يشوفني مشوهه ويصد عينه مني دتفهميني
- افهمك يمه انتي فقدتي ثقتك بنفسك مو بس بالناس ..صرتي تفكرين كلمن يدحكلك هو يدحكك مشوهه ومو حلوه ويتخوف منك بس احنه مو هيك يمه احنه اهل وكلنا شهدنا على الي صار حتى عينك صارت هالشكل لا تفكرين احنه بيوم ننفر منك انتي حبيبتنا كلنا نحبك ونعزك ونقدر تضحيتك هاذي وبالاخص ابوي ما بيوم يفكر غير تفكير وينفر منك
- الله كريم بنتي الله كريم
امشي خلي نفوت نام كافي سهر

شلت الصينيه وطبيت للمطبخ غسلتهه وصعدت وهي ورايه .. نامت يمي وثاني يوم كعدت من وكت حضرت ريوك للولد
ورحت كعدت حسين والبقيه ..
نزلت ام جراح وكالتلي ..
- زين والله خلصت فتره نقاهتك واذكرتي عندك بيت وعيال يردون اكل وغسله هدم

درت وجهي عنها ورحت للمطبخ حضرت الصينيه وبقيتها على الكاونتر انتظر حسين ينزل ياخذها ..

بهاللحظه دخل الشيخ وشايل علاكه الصمون الحار .. اخذتها منه وصبحت عليه واجه حسين اخذ الصينيه وراحو يتريكون ..
ضليت النهار كله ملتهيه ارتب بالغرفه وارتب غراض حسين وغاليه وماشفت الشيخ .. حضرت الكيكه لحسين وغاليه واكفه يمي اعلمهه تحط هالكد مقدار من كل شغله واخليهه تخبط وانبهه على كل صغيره وجبيره ..

اول مارجع حسين من المدرسه طلعتله القالب كله وكلتله اكل واتهنى بي
فرح ونشنشت روحه على الاكل

لليل ام جراح تخربطت معدتها توجعها وراسهه وضلو ولدهه يمهه شويه ونزلو
وصعد يمهه الشيخ ضل يمهه كل الليل ومن عبرت ال ١٢ دزلي رساله يكولي ماكدر اعوفهه تعبانه راح ابقى هالليله هنا

مارديت شي وكلت حقهه تريد رجلهه يمهه وكت تعبهه .. نمت وعفت كل شي
وثاني يوم اجوي خطار على الشيخ وضلو على العشى و ام جراح متقبل تسوي عشه لان تلعب نفسهه من الريحه ومعدتها بعدها توجعها ..
وكفت اني سويت العشى بس جان الطبخ هالمره ثكيل حسيته عليه مو مثل ماتعودت هالسنين كلهه ايدي خفيفه بالطبخ .. هسه اتاخر بكل شي لازم اضل دايره راسي لليسره شويه حتى اشوف
غاليه تساعدني بس بترتيب الاكل هذا الي تعرفله ..
تعشو وراحو الخطار واجاني الشيخ كالي ..
- حضريلي الجاي واخذيه الي فوك

راح للشيخه حجه وياهه شويه وصعد واني صعدتله الجاي كعد يشربه ويكلب بتلفونه واني بدلت ملابسي وفتحت شعري واجيت تمددت وانطيته ظهري
كالي ..
- هاا تنامين
-اي
- متغيره عليه هالايام مبين الكبر اثر عليكي

سكتت مارديت شي وهو طفى الضوا وتمدد ضل لازم شعري ويلعب بي ويكولي ..
- بكرا اخذ ام جراح للدكتور يدحك شبيها معدتها كان لزوم اخذها اليوم وماصار مجال .. تمشين معنا نسوي فحص للكلى ندحك احوالها صار زمان مافاحصين
- لاا غير مره خليها هسه ركز على ام جراح احسن
- اييه والله نساوني كبرو وتسكربو صرت افرفر بيهن بالدكاتره رادلي وحده احديثه
- هسه صرنا مانسوه وتدور الصغيره !
- عجل اثنينكم تسكربتن ومالكم حيلي بعد الحديثه تفيدني هالايام تونسني انتن كل وحده همها بطولها
- ماشكيتلك همي حتى تضوج مني عيني شيخ واذا ضاله بنفسك الزواجه روح تزوج
- اتزوج عجل اضل هالشكل
بس ارجع للانبار اتزوج واريح بالي حدرها

جريت الغطى وغطيت راسي وضليت اضبط اعصابي واكول هو ديستفزج اسكتي وعوفي الموضوع .. هدئت نفسي ونمت وكأني ماسمعت شحجى ..

ثاني يوم اول ماكعدت لبست النظارات
ونزلت اهتميت بالبيت مثل كل يوم وساعه ٣ همه طلعو للدكتور ومارجعو للمغرب .. خلص الصلاه وتعشه وكالي
كدام ام جراح والشيخه وغاليه وحسين
..
- انزعي النظاره يابه ليش هالشكل مقيده نفسك بيها انزعيها
-مرتاحه هيج ماعليهه شي
- انا مامرتاح انزعيها يولي

الشيخه كالت ..
- ابني عوفهه براحتها هي ماترتاح بعد بدونها اعرفها زين
- يمه مايصير هالشكل تضل لابستهه من ساعه ماتصحى لساعه ماتنام
- لاتضغط عليها براحتها تذبها وكت اليعجبها
ام جراح - انا من رايي خلها لابستهه بعدهه ماتعودت على شكلها الجديد خلها تتأقلم بالهدا وياه بس خوفي ساعتهه احنه الي نتعود على النظاره
- تين ماعليكي بكلام احد انتي سوي اليعجبك مااجبرك انا بس مالهه لزوم والله يايابه ماتلزم لبستها هين بينا
- مرتاحه هيج شيخ لا يضل بالك

رحت للمغسله فرشت سنوني ودانشف جان تجي يمي ام جراح وشاورتني ..
- خيه خليهه نظارتك لاتنزعيها ولدي حر واسر شقاهم ثكيل ومايكضبو لسانهم اخاف ياخذون عينك سالفه ويضلون يتمضحكون عليها وتنقهري انتي
ضلي هالشكل ضامتهه احسن

طبطبت على جتفي وراحت صعدت واني نزلت دمعتي وبسرعه مسحتها وصعدت لغرفتي وكفت كدام المرايا واباوعلهه زين .. اطابق حجيهم ويه شكلها ماكدر اركز بشي .. سمعت الباب انفتحت كبل رجعت لبست النظاره وانداريت شفت الشيخ وهو كالي ..
- خير. ؟
- ماكو شي
- متاكده ؟!
-اي راح تنام هناك
- ماتريديني حدرك !
- الليله الهه
- بس انا كبلها ثلاث ليالي حدرها اكدر اخلي الليله الك
- لا ماريد يصير بينكم حجي روحلهه عادي
- ليش صايره ماتريدين كربي
- لا ماكو هيج شي بس مو تعرفني دائماً اتجنب الامور الي تسببلنا مشاكل اني وياهه
- اعرفه بس مااعرف احدر عندك بعد طول اليوم وماتحضنيني ولا ادحكين بوجهي

دنكت وهو كال ..
- مااكرب غرفتك بعد ارتاحي

كعدت بالكاع وشمرت النظاره وصرت اضرب على هالعين واكول ..
كله منج انتي زرعتي هالخوف والسكوت بيه ...
ضليت ابجي ماداتحمل روحي هيج
دخلت عليه غاليه واجتي حضنتني وتكولي ..
- خير يمه ليش هالبكي ياعيني انتي خيرك دحكيلي يمه فهميني

دفعتهه ومسحت دموعي وجريت نظارتي دالبسهه وهي جرتها من ايدي وكالتلي..
- ماتضلي تخجلي وتتصرفي هالشكل يمه احنه اهل انا بنتك مو غريبه وتلبسيها كدامي وتدحكيلي
- غاليه روحي امي روحي
- مااروح من هين يمه فهميني شبي ابوي طلع و روحو بخشمو
- وين طلع
- مادري نزل مسرع وطلع بره ويركع بالبوب وانتي هين تبكين شصاير بينكم
يمه ليش هالشكل تغير حالكم
- ماصار شي بنتي ماصار شي والله
- عجل فهمييني ابوووي من حالو يتعصب
- كلتله روح نام هناك هاي ليلتهه ماحجيت شي ثاني
- يمه مدام هو حدر عندك يعني يريدك انتي ليش تصديه عنك
- ماكدر بنتي افهميني ماكدر
- يابعد عمري يايمه والله مكبره الموضوع زياده ابوي يحبك بكل احوالك مايفكر مثل تفكيرك والله

- يفكر بنتي يجيه يوم ويفكر اني ماكدر ارفع عيني بعينه بدون نظاره وهو هنا ميقبل البسهه يضل يشوفني هالشكل هم يجيه يوم وتبزع روحه ماريده بذاك الوكت هو يبتعد مني لان بساعتهه اموت ماتحمل هالشي خليني من هسه اعوده احسن
- يمه انتي تذبحين ابوي وتذبحين نفسك هالشكل
- هيج احسن بنتي اني اعوده مايشوف عيني احسن ماهو يجرحني بحجايه فديوم بساعتهه ماتحمل ادري بنفسي اتحمل كلشي من الناس بس منه لا ماكدر
انتي هسه تشوفيني ابالغ لان متعرفين شعور المنبوذ شلونه فاسكتي ولتحجين بعد وعوفيني خلي انام

رحت لفراشي تمددت وهي اجتي باست راسي وطفت الضوا ونزلت ..
ثاني يوم جمعه والشيخ من الصبح على اعصابه كاعد ويرزل بكل واحد كدامه
وكل واحد يترزل يباوعلي واني ادير وجهي عنه ...

صاحني حتى اجيبله الريمونت ورحت ادوره بالهول ماجاي اشوفه جان يصيح بيه ويكول ...
- حدر رجلك يولي عميه مادحكين

دنكت وشلته واخذته انطيته اله وكلتله ..
- اعذر قله نظري ياشيخ

عفته بايده وداطلع من الهول جان سمعت صوت تكسير انداريت وشفته راكع الريمونت باب الحديد مال الهول
عفته ومشيت واني اكول بداخلي هاي اولها ياتين هاي اولها ...

صار الغدا وكاعدين ناكل جان يدك تلفون عباس وهو رأساً صاح بي ..
- ول ماتسد هالتلفون وكت تلفونات الحين والزاد كدامك ماتعرفون الادب لا والله
الا تطلعون الواحد من طورو اسد التلفونات هاذي كل ساع واحد داك روسكم بنص هالتلفونات من صبح لليل وحتى وكت للاكل ماضللكم ولاتحترمون نعمه

كلنه سكتنه وعباس يباوعلي ويرجع يباوع لجراح وعاف الاكل وضل صافن
جان يصيح بي ..
- ماتاكل ماعاجبك يول !
- شبعت الحمدلله
- ولد الكوفي والمطاعم يتربون ولدي انا خنايث بين هالمسلوعين اهل الصبغه هذول ..حسافه على الوكت خلاني هين بين هالطيحان الحظ والله بس ارجع لحديثه لادزكم انتو السته للبدو بنص الصحرا اخليكم تتربون من اول وجديد

سكت شويه ورجع كال ..
- صحيح تذكرت هاذ ياهو منكم محضر معسل برا البارحه وعايف بكايتو حدر الباب هااايولو جاوبو لا افلش هالخشوم منهو هذا الي يدخن بالنراكيل من وره ظهري ويعرف انا محرمها هييييين
ول انااا احاكي صنااام انتو صنااام من منكم الي يدخن النركيله هين بالباب

صكر كال ..
- يابه هاي كم واحد من صحباني هين كعدو حدري بارحه وهمه متعودين على النركيله وكعدو يحضروها
- وانته ياكديش يا ارعن تماشي هذووول
مالكيت غير هالصحاب خلصت الرجال
تكعد تكهكه مثل الحريم هين بنص الليل ويه هالمزعطه !!! بالله ان دحكتهم هين بعد ولا دحكتك كاعد حدرهم وكاضب النركيله اكسرها على راسك واخليك فرجه بينهم سمععععت
اناا ولدي مالهم دخل بهالسوالف مااربي رجالي انا على الطيحان حظ هذا بيك خير اكضب كتابك وادرس مالك خلك الدراسه اذلع اشتغل وكون نفسك ماتضل مكابلي هالمخانيث احرم عليك عتبه الباب بعد لو كابلتهم

كام من السفره وبعده الولد كلهم كامو يتأففون ويستغفرون وغسلو وصعدو كلهم فوك ضل بس جراح جوه كاعد يشرب جاي ويانه ..

رحت لغرفه الشيخه اجيب حبه سوده من غراضهه حتى نسوي فطاير للعصريه
جان يجي الشيخ ورايه ويسد الباب
ضل واكف ويفرك راسه وكالي ..
- راسي يوجعني تين
- هسه اجيبلك براسيتول
- مااريد
- لعد تمدد و ادزلك الشيخه تفركلك راسك
بين مااكمل العجينه واجيك
- وكت عجين الحين يولي مادحكين خلكي ضايك شغيرك يولو كنتي تفهميني من عيني الحين انعميتي عني فهميني هالعين الاخذتها انا عمتلك الثانيه بعد
صرتي لاادحكين ولا تفهمين خرب بهالوكت الخلاني هالشكل معتازلك امشي لعجينك امشي ينعل ساعه الكشره

فتح الباب وطلع وهو يدردم .. رحت للمطبخ مهضومه منه كل كلمه والثانيه ويكولي عميه ليش هالكلمه بالذات ينطقها
ويتعمدها ...
غاليه جانت محضرتلي المواد بس عجنت ولفيتهه وصعدت لغرفتي شويه وسمعته يصيحني نزلتله جان يكولي ..
- ورقه كاتب بيها عنوان الرجل بارحه كتبو الي هين حطيتو هييين وين راحت
- ماشفت ورقه هنا من عزلت
- انتي تكشين كل شي بتعزيلك دحكيها عدل دوريها الحين اريدها

رحت ادور بالهول بين القنفات يم الميز
ماكو مالكيتهه وداكوله ماكو جان يصيح
- مو قلتلك مثوله ومنعميه هالايام الدشداشه الي ذبيتها الصبح وخليتهه بايدك هي بيهه بالجيب امشي جيبيهه
يلا صاير اله اعلم الصغير والكبير هين يلا يمشو عدل ويخلصو الشغله محد هين عندو عكل ويفكر ويدحك مثل الاوادم

جابتهه غاليه قبل مااني اروح وهو اخذهه وكال ..
- الظاهر للحين ماغسلتيها عايفتهه تعفن عندك يولي الهدم الي ينذب بساعتو اغسليه ماياخرك دقيقتين لو ماصار بعد يعجبك غسلتو
انتي كل شي كرهتيه وكاد ماضلت على الهدم هي تبين بالتداريج

سكتت وصعدت لغرفتي ضليت كاعده ومخليه راسي بين ايديه واريد اهدي بالي
وره حوالي الربع ساعه انفتحت الباب
ودخل هو عصبي ازيد من قبل شويه
وكبل جر ايدي وكومني وهو يكول ..
- يولي هالسمعتو صحيح هااا يولي تين

انااا اعيرك انااا انقص من قدرك واهينك يولي !! جاوبييينييي ول لاتسكتين
- كافي خالد فدوه كافي صياح
- انتي بقيتي بيه عكل لييييش كل هذا تين ليييش انا يايوم عيرتك وحكيتلك كلمه الشينه !!! ول انتي ليييش ماتفهمين شغيررررك شغيرررررك

جريت ايدي منه ورحت كعدت وانطيته ظهري وصرت اكوله ..
- ماحاس بنفسك من تحجيها كل شويه
عميه .. عميه .. ماتشوفين ماتفهمين مامنج فايده .. لا تلومني على شي انته ماتعرفه ولا تحس بي

-انتي شلون تفكرين بيه هالشكل يولي شلون تسمحين لنفسك تخونين بيه بهالتفكير ول انا لعدوي ماتشمتت مو عاد الك انتي الي ماامشي وادحك بلياكي

- ماتتشمت بس ماتنسى اني تغيرت ضلت بالك وطبقتها بالحجي

- يولي لاتربطين هاذي وهاذي هين انا اعصابي غلبتني ماتكصدتها والله

بجيت وذبيت المناظر وضليت امسح بعيوني وهو كعد يمي وجر راسي لحضنه وصار يكولي ..
- والله ماتكصدت اهينك بشي ولا بالي افكارك السوده هاذي ول انتي منين جبتي هالحكي
- ماجبته اني سمعته كلهه هيج تفكر بيه وانته يجيك يوم تصير مثلهم محد يتحمل هالشي
- ول عجل انتي ماتحكيلي الي يسمعك هالحكي لاكضبو امعص راسو

وخرت منه وكلتله ..
-مو جذب هو موجذب شتسوي لو عرفتهم مايغير شي هذا واقع
ادري اني مسؤوله عن كل شي لان هو قراري بس

ماكدرت اكول انها صعبه ثكيله ماتحملتها
بين هالانظار ... بجيت وهو حضني وضل يكولي..
- انااا ادري عافيتي ثمنها غالي يولي والله ادري ثمنها غاااالي والله غااالي والله والله

حضنته اقوى وبجيت براحتي طلعت كل قهري وهو يكولي ..
- وحك دموعك انا ماهانت علي عينك ولاتهون بيوم ولا انسى فضلك ووكفتك يوم الي الكل دارت ظهرها لي
ماانسى مدارات ايدك ليل نهار لراحتي
يوووولي انتي اكبر من تعب عمري انتي عندي اكبر من ظنون الناس ونظرهم انتي مايعوضك احد والله ياتين والله مااملك بيوم ولا افضل غيرك ولو يضل عندك بس النفس اضل عاشكك وتضلين اجمل مادحكت عيني

لزم وجهي باثنين ايديه وكالي ..
- ليش هالدموع والقهر يا يابه كلها على نقطه سوده بالعين هي هاي الي كاتلك ومخوفتك !!!هاي الي لوعتي كلبي علمودها!! ماتسوى والله انتي هالشكل بعيني احلى مميزه صرتي
اسمعيني تين خلي هالحكي بالك انتي ماتشوهتي ولا تغير جمالك انتي تجملتي بنيشان الوفا هذا .. هالعين وذاك الجرح
وهالاثر الي باليد كلها اثار الوفا والشجاعه هذول انا افتخر ساعه ادحهكم واغضب عليكي لو حرمتيني منهم
انا احبك بيهن يولو انا بيهن افضلك على الف والف حرمه

خليت راسي بركبته وهو لازم اصابعي
كلتله ...
- تحجي على ولدك وانته الي ادخن
-هههههههههههههههه ياالله ول جكاره وحده
- لااا اكثر
- ايييه يعني يمكن اربعه بس من الصبح مو الحين
- باقيه الريحه بيك اعرف اميزها
- عجل ماتعرفين تميزين ايمتى انا ازعل منك
- اعرف كلهن اعرفهن مابيك شي مااعرفه
- عجل ماتحنين عاد شلعتيه لكلبي والله
-ههه احبك
- بس هاي ! كل هالحريكه الي بصدري وكلمه وحده بس مقابيلها !!!

خليت ايدي على وجهه وتقربت بوست شفته وهو كبل حضني وتمدد وجرني عليه .. ضليت ابوسه وهو يمشي اصابعه بشعري ..
وخرت وخليت راسي على صدره وضليت مغمضه جان يكولي ..
- حركتي اهلي
- ههههه
- بالحرام لو ما وراي طلعه مااهدك لليل
حسبي حسابك بس نتعشى ادحكك هين وفاكه هالشعر الي صار زمان مامشبرو على ايدي
- تدلل
- تين بغلاتي عندك لا تهتمين لحكيهم كائن من كان الي يسمعك هالكلام لاتهتميلو تذكري انتي عند شيخك شنو
- ماشي ياعيني
- والله انك خليتيها كول وفعل
- تستاهلها مايغلى عليك شي حبيبي
- تسلمي ،، انا بعد اعرف شلون اخلي الكل تسد حلكها وتخجل لو تحكي حرف

رفعت نفسي عنه وبوست عيونه وراسه وكلتله ..
- الله لايحرمني منك
- الله مخليني حدرك بس انتي لا تصدي عني وتخليني هايج باعصابي ترضيها عجل الحين تندمت كلبتها سم كعدتنا اليوم بهالجمعه استغفر الله يولي لا تغيبي عن عيني انا لو مادحكك يطبكن هالخيوط الي هين
-ههههههه اسم الله عليهن عيوني
- وليييه ول والله الدنيا حلوه بصوتك
تعوضيني اليوم لا اكلبها عليكي عزا
- والله تدلل صار
- زين يلا انا ماتاخر للمغرب انا هين ان شاء الله
- ان شاء الله ترجع بسلامه

نزلنه سوه وهو هادىء ويحجي وياي بصوت ناصي يسألني خاف اريد شي
واجوي حر واسر كالو ..
- يابه نروح للطوبه عدنا لعبه هسه ويه جماعتنا
- اييه روحو يابه روحو

كبل باوعولي وهو جر ايدي ودخلنه للهول جان يكول ..
- يولد عباس وين ؟
رماح - فوك بغرفه امي
- دك عليه خليه ينزل هين بالعجل

باوعلي وكال بصوت ناصي ..
- تريدين موالح لو بقلاوه وهالشغلات
- اريد الحلو لان هسه دنسوي موالح للعصريه
- زين عجل خليلي منهن

انداريت على صوت عباس وهو يكول
- ها يابه
- احدر هين .. اكضب هاذي تجيب بيهن كيلو مشكل بقلاوه و برمه وكيلو زنود
وتاكلوه بالعافيه عليكم .. و هاذي خمسه وعشرين الك ولصكر دحكو شنو الي بنفسو واشتريلو بدربك واخذ الباقي الك
- مشكور يابه

باس راسه واخذ الفلوس وطكطكهن كدام اخوته وهو يضحك جان جراح يكوله ..

- خذها كلمه مني ياخيي
ان لااا سلطه تعلو على النسوانِ

جان يضربه الشيخ بالسبحه ورجع كال .
- وان الرجال فوارسًُ وابونا فارس الفرسان شيخ شيخ مدهام مالو مثيل
مو تنسى هالكلمه زيين خيي

ضحك الشيخ وكال ..
- وانتو اخذوها كلمه بعد ان الفرسان اغراب ماحييو ان ماصادتهم الاوطان الي بحينها تصير لا سلطه تعلو عليها
يلااا بسلامتكم

طلع وحسين كال ...
- لووو بس افهم شلوووون تكدرين شلووون !!!
- هههههههه افهم كلام ابوك تعرف شلون

رحت للمطبخ شغلت الفرن وكعدت احضر بالفطاير وغاليه تشويهن وتكولي ..
- يمه انا ماوشيت بسرك بس تدخلت شويه لان الحال لزم عليه اتدخل
- مزاجي حلو ماتعارك وياج عادي
- هههههه فدييييت الامهااات المعدلات انااا فديييت والله

سمعنا صوت عباس وهو راجع محمل علاليك الحلويات ويكول ..
- اكلوو اشبعو اليوم من زعلنه انا وصكر خويي المظلوم تهمو باطل هالمره الوحيده الي تطلع تهمتو باطله بس حصلنه فلووس
عليهه اشبعو حلويات اشبعو كيلوات كيلوات جبتلكم ادللو براس اخوكم ادللو

ركضت عليه غاليه واخذتهن واكلت قطعه من كل وحده وراحت وكلت جراح ورجعت وكلتني ..

من خلصت شغل بالمطبخ طبيت سبحت وطلعت رتبت الغرفه وعطرتها وبعد العشى بس شربت جاي صعدت بدلت ولبست ثوب نوم ستن كريمي وفتحت شعري ضليت امشط بي ..
شعري طوله صاير فوك حجل الرجل باربع اصابع .. غاليه كل ماتشوفه تكولي كم سنه مربيته يايمه واكوللها خمسين سنه
تضل تسمي عليه ...

اذا اغسله اله اكعد بالكاع وافرك نص نص منه واكومه بحضني .. ومن امشطه هم الا كاعده حتى اسيطر عليه ..
هواي بنفسي اكصره لحد الركبه حتى اكدر اظفره وافتحه هيج بس الشيخ محرم عليه لزمت المكص ..
القراصه الي اشده بيهه تصير ثكيله براسي فدائماً ارخيهه بحيث انزل الشعر على ركبتي واثبتهه بس باخر لفه من الشعر حتى يخف ثكله ..

بعدني مامكمله تمشيط ودخل الشيخ
باوعلي وضحك واني ضحكت كالي ..
- ياحوريتي بالدنيا وش هالجمال يابه
- الجمال كله لهالشعر
- يحفظو الله سابيني من يوم الي دحكتو على ذاك القميص النيلي ومتدندل على التنوره الكصيره هذيك
-هههههههه خطفت كلبك بشعري يعني
- لااا هنه كثر يابه وحده اثنين شعدد منهن

ذبيت المشط ورحت حضنته وهو يكولي
- انا اول مرا احب الشيب بشعر الحرمه
- ييووه والله انسى اصبغهن كل يوميه اكول باجر والتهي
- لا بالله حلوات وهنه قليلات كم وحده هين ناثرات بس حلوات جمال الطول مغطي عليهن والله
- لا باجر اروح اصبغهن مابيهه مجال بعد
- براحتك بس انا عاجباتني عادي خليهن
عجل مو الحين انا انترست شيب مابيها شي
- ماتصبغهن؟
- يخسى الصبغ احطو على شيبتي يابه هذا وقار العمر مامنو عيب
- هههه يابعد عمري كل عمرك حلو

بوسني بشعري واخذ بايدي كعدني وراح نزع ملابسه واجه كعد يمي وكالي ..
- تين تطفين الضوا وتحدريلي هين تكفين
زين
-زين

كمت طفيت الضوا واجيت وكفت كدامه وهو على نفس كعدته على الجربايه
قربني كلش بين رجليه وضل مخلي راسه بطني .. كالي ..
- صرت بهالعمر اكره الاضويه تضل تخلينا ندحك كبرنا واحنا بعدنا للحين ماشبعنا من الشباب سوه
- بس هيج احنه هسه مرتاحين اكثر خلي مانفكر بالعمر هو كل الي تغير بس شكل
- تخيلي لو احنه الحين بتونس
- الله احلى ايام جانت
- من بعد هالسفره انا ماتحسف على العمر عشتو بتفاصيلو بيها
- كل ماينذكر اسمها تخطر بالي ريحه الياسمين بكل شارع وتجربه الغطس
- عشناها باحلى ايام الله يمكني واخذك بعد ان شاء الله
- نروح نشوف اسامينا بعدهه لو راحت
- تلكين الحين اكلها المي صارلها بالعشرين سنه زين لو ضل حرفين
-هههههه بس احلى شي صار هو هالذكرى
- زين اريد اخذك الحين لليالي تونس بفنادقهه

ضحكت على ضحكته وسهرت وياه هالليله بكل راحه وحب ..

وصار من بعد هاليوم يعاملني بشكل مختلف تماماً بين الاهل ..
دائماً اذا كاعد بالهول يصيحني حتى بس اكعد يمه واعوف كلشي الجان بايدي يكلي مايسوى انا اهم منو ..

رحت للصالون وصبغت شعري بس الشيب الي بدايه الشعر وبنفس لون شعري وهناك مافتحته كله بقيته ملفوف بس بحضني مغطيته بالشال ..
كصيت كذله وصيتها للبنيه تسويها بحيث تغطي العين وسوتها الي مشفره نازله على عيني اليسره هيج ارتاحت نفسيتي
صرت اكدر انزع النظاره براحه
وهو صار يكولي اظفريه لشعرج وانزلي بي مره وحده بس ..
وسويتهه واول ماتخبل عليه حسين ضل يحير شيسوي بالظفيره وام جراح تباوعله من الطول للطول ..
صاحني حتى اجيبله مي ومن انطيته الكلاص اشرلي اكعد يمه وكعدت جان يلزم الظفيره ويكول بعالي صوته خله الولد كلهم ينتبهون عليه ..
ماشاء الله تبارك الرحمن هالكصيبه مكانها بكلبي كبير بكبر عمرها وطولها
خلي اشبع عيني منها اليوم وبعدين ارفعيه ولاتخلين غير عيني ادحكو

بيومها ضليت كاعده ومكومه الظفيره بحضني وتجي غاليه تقيس شكد فرق طول بين ظفيرتها وظفيرتي ..

وجراح يكوللها يجيج يوم وتنافسين امج بالطول ..

صار اذا يطلع يرفع كذلتي من عيني ويبوسها حتى لو كدام الولد ومن يرجع هم نفس الشي يبوس عيني ويكول بصوت عالي يسمعهم ..
رحم الله ذاك الاب الطيب على هالخلفه
الطيبه
مرات يكول ..
بفضل عينك انا رحت واجيت بعافيتي ما اعتازيت لاحد

زرع قيمه لعيني بينهم بدون مايوجهلهم كلمه وحده بس بافعالو واحترامه وياي خله الكل تحترم وتقدر .. عرف شلون يسكت اليحجون ويخجلهم بعد لو حجو

مشت الايام وحسين نجح بنص السنه واني ادرسه العربي والاحياء اكضي يومي اقرا موضوع بالنت واسجل ملاحظات واشرحله بالليل ..

صارت البكلوريا واني كل تعبي ذابته وياه لحد ماامتحن وعطل اني بديت انتبه على نفسي صاير نظري ضعيف
الشي اشوفه حيل مغوش اله اركز بي يلا يوضح شويه ..

ويوم بعد يوم تزيد الغواشه .. رحت فحصت جان يطلع مي ابيض بيومها الشيخ تخبل ليش هيج يصير ومنين اجه ؟؟
الدكتور الي سوه عمليه للشيخ بالحارثيه
مسافر ومايرجع الا فد اسبوعين وضلينه ننتظره وبهالايام فهمت من ملاحظات غاليه على اخوتها ان رماح متغير وعنده شي ..
صاير كلش كئيب ومايلزم تلفون ولا يطلع لاحد من شغل للبيت وللشغل
ويضل يباوع تلفزيون وهو يهز رجله ووجهه مدخن اعصاب بس ميحجي

كلنه اكلنه الفضول حتى نفهم شسالفته
الى ان بيوم الشيخ خصمهه ..
جان راجع باليل ورماح على نفس كعدته التعودنالهه كدام تلفزيون ويهز برجله ومجتف ايده والشيخ من دخل كبل حط ايده على جتفه وكال ...

سلام الله على كل من باتت روحيتو بنيه

باوع لابوه وبعدين طلع للشارع وكلنه سألنه الشيخ شلون عرفت جان يكول
- يولو الرجل شغلتين تشل حالو
جيبو لو فرغ وكلبو لو رفرف على بنيه
واخوكم حالو من الثانيه

من رجع استلمته غاليه تحقيق وهو بس يعيط عليهه عاد صاحله الشيخ وكعده يمه
وكاللهم اسكتو كافي وسكتو ..
راحت ام جراح صعدت وراحت الشيخه تنام وجراح وغاليه بالمطبخ والولد بقيه ملتهين بالتلفزيون عاد استغلهه الشيخ وسأله ..
- فهمني يابه البنيه منين اهلها امشي اخطبها الك
- لا يابه مايحتاج
- احكيلي شسالفتك عجل
- يابه انا مو رايدها البنيه انا محروك كلبي عليها ماراضي حالها بس هي رعنه ومدللـه وماتسمع كلام احد
-هاا سولف ابني سولف جايز نفيدك بنصيحه وين عرفتها ؟
- عرفتها بالكليه البنيه تدرس طب اسنان مثلي بس داخله بالموازي يعني دافعين اهلها فلوس لان معدلها ماوصل
-اييه اييه افهم
- اييه هي اهلها من المنصور والبنيه بعدها صغيره ولبسها مو محتشم كل جسمها مكشف وشعرها تنثره وخفيفه فد مره خفيفه والولد ماخذيها مضحكه وهي مصدكه .. تتلطش بالرايح والجاي بحجه الميانه وزميل وهذا حاله حال اخويه وهذول احنه اصدقاء تضرب بيهم وتعلي صوتها بالحكي وياهم وضحكتها توصل لسابع جار بس هي فطيره كلب وايدها مو الهه .. تصرف على جماعتهه صرف الهبال .. الولد والبنات تصرف عليهم
رحت مره حكيتلها يابنت الناس حكمي عكلك هالناس تستغلك والولد هذول مو امان مو حك صداقه خلي الك هيبه بين الناس وهي طلعت لسانهه هالطول عفتها ومشيت ... وره كم يوم دحكتها تتمشى وره الجامعه وايدها بايد ولد ملطلط ومحفحف والدنيا زايعتو كلها تعرفو ناقص اصل وهي تميل بجسمها عليه وهو مستغلها اكلها اكل بعينو وياخذلها هالصور بتلفونو عاد رحت جريتها من حدرو وعطت عليها قلتلها ..
ان ماتخلين احترام لنفسك خليلك شرف
احفظي شيبه والدك الصارف دم عمره على جيتك هين
وهي ضلت تحكي شدخلك بيه ومنو انته وشلون تكضبني واستشرفت براسي
وانا لو عايفها ساعه ثانيه ويه ذاك كان اخذها وطلع بيه
- والله زين ماسويت ونبهت بس دامهه مرخصه نفسها لهالدرجه خلها تضوك لوعه الخساره وتالي تبكي الندم
- دحك تالي صار مو انا اشتغل بالمطعم الحدر الجامعه بالشفت المسائي ودحكت المغربيه كونه برا سيارات طابكه والولد سمعتهم يحكون هالجماعه مسلحين
وحدرهم بنيه .. عاد انا طلعت مسرع وعفت المطعم وادحكها واكفه بين السيارات والولد كلمن كاضب سلاحو وموجهو على الثاني والعالم ملتمه حدرهم تهدي النفوس وهي تتراجف وتبكي
رحت كضبتها واخذتها بعيد عنهم وسالتها
منين هذول الولد شجابك حدرهم بهالوكت ؟ قلتلتي هذا حبيبي وطالعين وكسر علينه هذا الولد لان عنده عداوه وياي هو جان حبيبي القديم يلحكني من مكان لمكان وضلينه نفتر بالسياره لحد هنا حتى مايعرفنا احد من هذيج المنطقه

انا يا يابه ضربتها وسطرت خدها لان حركت كلبي عجل بنات العالم هالشكل صارن بلا حيا

وبعدين اخذت تكسي وقلتلها دليني عنوانكم واخذتها لبيت اهلها وقلتلها تتصلين الحين بوالدك وتنطيني التلفون
مارضت تتصل وضلت تصيح بالسياره وخبصت الدنيا بصوتها عاد انا جريتو للتلفون من ايدها وبعيطتين فتحت الرمز واتصلت بوالدها وقلتلو اذا انته طالع انا وبنتك جايين البيت ولازم نتفاهم

- والله كفو هذا ولدي كفو والله كفوو
ايييه ودحكت ابوهه

- اييه دحكتو وحكيتلو بنتك ماخلت قدر لشيبتك لو تبطلهه وتكعدهه بالبيت وتستر عليهه لو تعلمهه درس وتخليهه تبطل فضايح بالشارع .. ضل يزامط وانا بنتي متربيه وانته منو وتجيب طاريها وشعندك وياهه قلتلو انا ابن شيوخ وعشاير انا رجل انباري اصلي بدوي عندي الحرمه خيالها ماينشاف البنت عدنا مايدنسها كلام ولا نظر ويوم الي دحكت بنتك تتهيلك هالشكل حذرتها اكثر من مره وماسمعت مني واليوم اخذتها من نص الولد بهالليل وجبتها الك مستوره محفوظه ماريد منك شي ولا منها بس خلي تحفظ نفسها هي عقلهه صغير وبعدها طايشه وانتو منطيهه حريه زياده عن اللزوم وخليتوهه تضيع نفسهه خليهه بيتك مستوره ومحفوظه الشهاده ماتجيبلهه الشرف والكرامه لو ضلت بهالصلافه خلي تحط قدر لنفسها لاتضيع عمرها بالطيش

الاب ساكت ويدحك لبنتو وراد ينفجر وجهو من الاعصاب بس هي صلافتهه اكبر من كل ظني وحدرت علي تدفعني بره بيتهم وتصيحلي ..
العامل ابن الفكر السني الارهابي تبيع شرفيات براسي وانته اهلك وخواتك مهجرين الله يعلم شسوو بيهن الدواعش لحد ماجيتو هنا .. قلتلي
شفهمك بالحريه وانته ابن محافظات شعرفك بعيشه بغداد هستوك كلت ابن بدو انته ابن الخيم وعيشتك على الحيوانات والوصخ همزين بغداد علمتك تلبس وتدرس بس تضل فكري وتحلم بالفلس تكضي عمرك نادل وتخدم بالاكابريه الي مثلنه

انا سمعتها للاخر وبعدين كضبتها من شعرها وركعتها بحافه الباب خليت وجهها متروس دم وقلت لابوها
اذا تريد فصل دز عليه لشغلي وبنتك تندل وين يشتغل هالنادل ويفصلها ببيت شيوخ

عفتهم وطلعت وهمه ركضو بيهه كدامي للمستشفى ومن ذاك يوم لهاليوم ماعرفت شي عنهم بعد

- كل هذا يا يابه وكاتمو بصدرك ماقلتلنا مشكلتك

- ماتسوى يابه تصرفت انا وابوها طايح حظ لو رجال وحوك كان ماخلاهه تستهتر هالشكل وتعلي صوتها حدرو وتصيع بنص الليالي

- زين هسه انته شنهو المضايكك هالشكل

- كلهن يابه كلهن كرهني روحي كلامهه للحين يدك براسي وماشفى كلبي من ضربتها

- اسمع ياولد انته كفيت ووفيت وعلمتهه درس الي ماتنساه وزين من حكيت لاهلها بس هدي كلبك انته اكبر من وصفها لك والشغل يا يابه مو عيب دام هو ساتر الحال انته تعرف نفسك ابن خير والي عندك ماتحلم بي لا هي ولا اهل اهلها
بس الوكت الحين بعدنا عن خيرنا ونرجع باذن الله ويرجع الخير لاهلو لاتنسى الي عندك ومضموم لك

- يابه اله ورث يلا يصير عندي خير انا من يوم يومي اكد واتعب لمصرف شهر

- هههههههه انا عايفكم تتعبون حتى تقدرون الي اخليه بيدكم بعدين

- شكثر عندي حصه يابه بيهن سياره بيهن عياده

- بيهن الاثنين ووياهن مره

- ايييييه هذا اليريح البال عجل بس نرجع لحديثتنا يابه تورقلي اطك السياره زحمه دكتور وهيبتي واصعد نفرات

- ترخصلك السياره بس نرجع لكاعنا ذكرني بيهه واخذهه الك تستاهل

رجعت ضحكته ونور وجهه وضل يمدد بجسمه ويضحك ..

صح موقفه صعب ويه هالبنيه بس ارتاح كلبي انه مغثوث منهه مايحبهه ..
اكثر شي اخاف على ولدنا منه هو الحب
احسه فخ مو كلمن يكدر يطلع منه .

مشت الايام وصارت عيني نظرهه قليل بس غواشه وبالكوه اركز بالشغله الا اقربهه لعيني واضل مركزه بيهه يلا

صار كل شغل البيت تسويه بدالي غاليه واني بديت استعد للعمى احفظ اماكن كلشي بطريقي وارتب الاشياء حسب حفظي الهه بغرفتي .. الشيخ فلوسه ماتكفي هسه للعمليه هالشهر ينتظر لراس الشهر الجاي ...

اني اتصرف كأني اشوف كلشي بس اني احس الاشياء وحافظتهه واتعب نفسي بالتركيز بالشغله التشتبه عليه ..

دائماً احس الشيخ ضايج وكل مااساله يكولي ضيق الحال هالايام مو وكته

قبل رمضان بخمس ايام خابرني مصطفى وكالي ..
الجماعه الي رايدين غاليه رجعو حجو بالموضوع وانطيتهم العنوان راح يجون باجر وتفاهمو وياهم اني اطلع من السالفه بعد تعبت كد مااكوللهم ماينطون انتو فهموهم ..

تذكرت بساعتهه حجي الولد وكلت بلكي اذا اهله طيبين وخيرين انطيهم غاليه مبين رايدهه من كل كلبه ..

وثاني يوم ساعه اربعه العصر اندكت الباب وطلعلهم حسين دخلهم للهول
والشيخ راح كعد وياهم والشيخه هم وره شويه اجاني عباس يكولي الشيخه تكول خلي تلبس شالهه وتجي ...
.
.
يتبع

#شقراء_بغداد

الجزء_الثاني_بارت_١٤


🌷 بارت طويل مال دلال 🌷

اخذت غاليه وياي للغرفه طلعتلي كلبيه خليجي سوده ومذهبه ولبستني الشال وحطتلي حمره خفيفه ونزلت بايدي المناظر قبل ماادخل لبستها وصار النظر عندي شبه معدوم لانها سوده واني بدون شي عيوني مغوشه .. خليت عباس هو يدليني ..
دخلت كلت السلام عليكم بصوت عالي وردو السلام منهم اصوات زلم ونسوان
اخذني عباس للنسوان سلمت عليهن وبوستهن اثنين جانن كبار وبعدين سمعت صوت الشيخ كالي تعالي اكعدي يمي
واخذني عباس ايده بايدي وكعدني يم الشيخ صرت على يسرته ...

شاورني كالي ..
- ماتعرفنا عليهم انتظرت جيتك
- زين

سكوت عم المكان وبعدين قطعه صوت الباب انفتح درت راسي باتجاهه والشيخ كالي ..
- هذا عباس حدر يضيف الجماعه

اني اجمع كل تركيزي اريد اشوف ولو واحد منهم ماكدرت كلشي عباره عن تدرج الوان ترابيه وهيئه اشخاص كاعدين بس ماواضح منهم اي تفصيل

قطع تركيزي بيهم الشيخ وهو يكولي ..
- تشربين عصير
-لا ماريد تسلم
- من ايدي اخذي ياعيني
- تسلم حبيبي

اخذت الكلاص من ايده بحذر ورفعته يم حلكي وايدي الثانيه تتلمس حافة الكلاص
وشربت منه ونزلته اريد اخليه على الطبله اخذه الشيخ من ايدي وخلاه على الطبله و كالي ..
- الظاهر الجماعه متوترين كلهم يدحكون بعيون بعضهم ومايعرفون من الي يحكي منهم

ابتسمت على حجايته وهو جهر صوته وكال ..
- حي الله من زارنا هاليوم

واحد منهم كال ..
- الله يحيك ويحي اصلك .. اعرفك بنفسي اني ابو سالم وهذول ولدي سالم و اسامه
وهاذي زوجتي الاولى ام سالم وزوجتي الثانيه ام اسامه
- يااهلاً وسهلاً تشرفنا والله تشرفنا بيك وبعايلتك ياابو سالم
- الشرف النه بهالكعده ويه الوجوه الطيبه والله كلي شرف بضيافه اهل الصيت والاصل الطيب الممدوح من كل كبير وصغير
- حياك الله انته واهلك على هالراس
- يسلم راسك ياابو جراح .. احنه جايين على سمعتكم الطيبه واخلاق ولدكم وتربيتهم الي كل الناس تمدح بيكم ان كان بالانبار او ببغداد مااسالنا احد اذا ماكال ونعم الاصل والخلق وكل عائله بهالوكت تتمنى تناسب اصحاب الخلق والصيت الطيب وسمعنا عدكم بنيه ماعرفنا عنها غير اسمها يشهد الله واني رايد بنتكم لابني اسامه

- جيتكم وطلبكم على هالراس بس انا ارد اسألك من وين عرفتو بنتنا ؟
يعني الظاهر انكم ماتعرفوني معرفه شخصيه ولا من اهل ديرتي وغير هذول محد يعرف اسم بنتنا

- مااجذب عليك ياابو جراح ابنا شايف بنتكم بالكليه مره وحده شافهه وحجالنه عنها وسألنه عن اهلها بذاك الوكت وماعرفنا غير انها من الانبار ومن كالي ابني ان بنتكم منقبه وخالها يوصلها بيده ويرجعها بيده والكل تمدح باخلاقها وعفتها تمنيناهه تصير من نصيبنا
الرجال شيريد غير مره عفيفه تصونه وتصونه اهله ومن نسل طيب وماشاء الله انتو اصحاب نخوه وكرم واهل مرجله
تره اني من هذيج السنه لهسه اسأل عليكم ومن اجيت اليوم بعد تعب وروحه وجيه من مكان لمكان

- ههههههه حياك يابه حياك

- الله يحيك .. ابو جراح خويه الي تريدوه حاضرين بي اطلبو الي يخطر بالكم
كله تم ويجرى لاجل عين بنيتكم

- تسلم يابه تسلم انا اريد اسمع من الولد

- تفضل عمي

- شنو دارس انته يابه

- عمي اني تخرجت من هندسه الكهرباء وبعدين قدمت على كليه الطيران ودرستهه بعمان وتخرجت من قسم الطيران التجاري وحالياً طيار على الخطوط الجويه العراقيه

- زين زين الله يوفقك يابه
عجل دامك طيار وشجابك على اهل الفنون !؟ انا سامع الطيارين مايدحكون الي حولهم وعينهم مثل طياراتهم بالسما معلكه

- هههه عمي صح اني طيار والله مكني بس بنتكم هم مو قاصره عدهه نسل ماتملكه لا ام الطب ولا الهندسه

- يعني الحين انته رايدهه على نسلهه واهلها !؟

- اي والله لان ماكدراكول جاي على جمالها او اخلاقها اني ماحاجي وياهه ولا شايف منها غير سواد النقاب
بس اني ضلت بالي لان ماعرفت بحياتي وحده هيج محافظه على نفسها وشفتها تستاهل احط بيدهه تعبي وبالاخص بنت شيوخ واخت رجال تكدر تصيرلي المره الي تسند رجلهه وكت الشده
لو هي على الجمال والعشره فهواي بنات كدامي بالدوام او بالدراسه وحتى بالسفر
بس اني جان بالي هالمواصفات ولكيتهه عدكم ويشهد الله غير هالنظره من بعيد بالكليه ما مباوعلهه

- معلوم يابه معلوم

صرت اسمع صوت طكه سبحه الشيخ وبعدين ابوهم كال ..

- اني هواي عندي معارف بالدوره وبالانبار هم وكلهم دزو ناس تسأل بمنطقه خوالكم وكلهه حمدت باخلاق الخوال والبنيه كالو اربع سنين داومت هنا ماتطلع غير ويه خالها الصبح للدوام وترجع ويه خالها وحتى اذكر واحد منهم كال نسوانهم رايحين مرات خطار على بيتهم وصايحين عليهه حتى يتعرفون عليهه وماقابله تطلعلهم ومحد من نسوان المنطقه شايفتهه بعد شلون متريدنا نتعنى لهيج اخلاق وبنت رفعه راس مثل بنتكم ياابو جراح

- عجل مادحكني سألتكم منين عرفتو بنتنا لان انا ادري بنتي مامدحكها غير اهل بيتي ..

انا اقدر تعبكم وجيتكم لهين بس احنا لزوم نشور البنيه واخوتها ونردلكم خبر

- براحتكم يابه اخذو وكتكم بس كون ماتحرمونا من هالنسب

- كلشي بالنصيب يا يابه .. هين رأي غاليه الاول بتقرير الموافقه لهالزواج صح احنا الرجال اصحاب القرار بس من بعد رضى البنت

- اكيد اهم شي رضى البنيه واتمنى ام غاليه تقنعها وتيسرلنا هالزواج
دور الامهات فعال بهالامور

ابتسمت وباوعت للشيخ الي تمنيت اشوف ملامحه بهاللحظه حتى اعرف رضاه
من عدمه ..
كالي ..
- ام غاليه البنت بنتك وتعرفيها زين اذا كانت هالقسمه تدحكيها زينه اسألي واستفسري الحين الي يعجبك وان كنتي تعرفين شي انا مااعرفو اوزني الامور بمنظورك عليها

- مبين الاهل نفسهم طيبه واهل خير
مايحتاج نستفسر بالامور الماديه
وبالنسبه لبنتي اني ماراح احاجيهه بالموضوع ولا اجرب اقنعها حالياً

ابو سالم - هاا ليش ؟

- بصراحه اني عيوني تعبانه هسه وماكدر اشوف شي شلون احاجي بنتي بالزواج من شخص اني ماشايفته ماترهم مو صح

ابو سالم - صحيح حجيج

- لو كادره اشوف الولد واشوف الاهل هسه تدللون احاجيهه ومايكون خاطركم الا طيب بس حالياً صعبت عليه شويه
اني بنتي اعرفهه كلش زين ومن اشوف الولد اكدر من نظره وحده اعرفه يناسبها او لا لان هي موافقتها وقناعتها على اساس ثقتهه بيه وقناعتي لاني مابيوم خذلتهه بكلمه هذا يناسبج وهذا لا بس هالمره ماكدر اجاوبها بشي لاني ماشفت شي اتمنى لو نأجل هالموضوع كم يوم

الشيخ - وانا اوافقك بالرأي لان الحين اهم شي سلامتك وعمليتك تتم بخير ويرجعلك نظرك وهالامور تتاجل وان شاء الله نكعد كعده ثانيه وانتي حدرنا متعافيه

ابو سالم - ان شاء الله متعافيه واحنه نعتذر اجينه بوكت مو مناسب بس مانعرف ام غاليه هذا حالها ولو نعرفه مانجي هالوكت

الشيخ - لاا يابه حياكم الله بكل وكت

ابو سالم - الزين صار تعرفنا عليكم وان شاء الله متفاهمين وننتظر سلامه ام غاليه و نجيكم بعدها ان شاء الله نتطمن على ام غاليه ونتحمدلها بالسلامه وبراحتها تشوف ابنا وتشوف اهله وتستفسر على راحتها احنه بكل شي وياكم بس كون مانخسر هالنسب وانتو هم اسألو علينه
احنه بيتنا بالسيديه انطيكم العنوان واخذو وكتكم وخلو بالكم ان بنتكم هي اول بنيه اني امشي لخطبتهه لابني ماصارت قبل هالمره ابد والله

الشيخ - ان شاء الله اذا اكو نصيب تصيرلكم

ابو سالم - ان شاء الله كلي امل بيكم
بس بلا زحمه يعني تنتظرون عمليه هنا لو سفر علاج بره شنو مفهمنا بالضبط

الشيخ - عمليه هين حاجزين على بدايه هالشهر

ابو سالم - خير ان شاء الله عمليه شنو ناجحه هنا مضمونه كالولكم

الشيخ - اييه مضمونه ان شاء الله عمليه سحب مي ابيض هين حجزنا دكتور بالحارثيه ومرتب شغلو مضبوط

ابو سالم - ماعدها الا العافيه متشافيه ان شاء الله .. احنه ننتظر خبر منكم على سلامه ام غاليه ونزوركم مره ثانيه ان شاء الله

الشيخ- حياكم الله يابه هلا ومرحبا بيكم

ابو سالم - الله يحي اصلك .. اذا ممكن رقمك حتى نتواصل

الشيخ انطاه رقمه واسمع بسبسه الشيخه ويه النسوان وبعدين ترخصو وطلعو
وويه طلعتهم صارت جيه جراح كبل سأل ..
- شدخل الولد هين ؟

الشيخ وهو يمشي يمي كاله ..
- هذول عايله جايين خطابه على اخيتك
- وشعرفهم باخيتي يابه وشدلاهم البيت
منين عرفوهااا
- تهدداااا
- هديت يابه هديت فهمني شسالفتهم
- هذا الولد طيار ومدحكها بالكليه مره وسائل علينه وجاي على الصيت
- الطيااار حكيتلي الطياار زين زين
مارديتو جواب !
-لا بعد نشور اختك
- مااعدنا بنات للزواج وانتهت هالسيره بعد لا تشور اخيتي ولا غيرو
- هاا ليش يافهيم فهمنا
- بعدها صغيره يابه مو وكت زواج
- هههه يول مادحك نفسك كبرت وماتزوجت ظنك الناس كلها مثلك
اخاف تطلع الحين انته هم تفكر نفسك صغير على الزواج
- ايييه يابه بعد وكت لاحكين للزواج لاحكين
- استغفر الله هههههه والله اناا احساسي يخبرني ان اخوتك كلهم يتزوجو وانته لا
- مو لهالدرجه يابه
- تذكرني بعدين يوم يمشي بيك العمر تذكر كلمتي هاذي تزوج اخوتك وتدحك خلفتهم وماتتزوج تدري ليش
- ليش؟
- لان الي تدروه مو بالسهل تلكاه ودربك حتى تلاكيه طويل بطول عمرك
- عجل خليني صابر لحينها عليه

كعدنا كلنه التمينه والشيخه صارت تكول
- والله انا دحكتو الولد مرتب وقيافتو عاليه وحتى امو حرمه ثكيله لكن دحكتها ماشالت عينها من حرمتك ياشيخ
- حكها عجل هاذي تينه يايمه من الي يكدر يشيل عينو منها
- ههههههه يايمه عساهه متعافيه ويرد ذاك الوجه الحلو منور بينا
- ان شاء الله ماضل الا كم يوم استلم الفلوس واسويلهه العمليه وارجعلها عافيتها

ابتسمت وكلتله ..
- الله كريم ياعيني .. تدرون اني حبيت بيهم شغله ان هو جايب نسوانه اثنينهم والابن الجبير من كل وحده يعني مبين رجل محترم وحقاني ويه اهله ومبين متصافين بينهم حتى جابهن اثنينهن سوه

الشيخه - اييه صدكتي وانا فهمت منهن شغله انهن يخافن من رجلهن كثير

لاني جربتهن وقلت لام الولد ليش ماتحكين ويه ام البنت داخل وتتفاهمو
قلتلي لاا ابو سالم مايرضى والكلمه كلمتو انا عليه بس اجهز لابني لو رضيتو

الشيخ كبل كال ...
- هذااا الكلااام الي يريح البااال مدام الكلمه كلمه الرجل هالعايله انا موافق عليها مبدئياً والباقي عندك تين انتي الي تقرري
- ان شاء الله يصير خير

الشيخه كالت ...
- انا بعد عجبني الحريم اثنينهن مالهن كلمه وكافيات خيرهن شرهن يادوب كدرت اعرف منهن ابو سالم هو متقاعد

الشيخ ضحك وكال ...
- وازيدك من شعر بيت ياامي الرجل عسكري
- شلون عرفت
- من مشيتو ما يثني ركبتو مثلنه هيك لا هو يمشي مشيه عسكر
- ماشاء الله دقيق الملاحظه
- عجل شيخ انا يولو هالدقه شغلتي

ضحكت و جراح كال ..
-ادحكم راضين وماخذين زايد وياهم بالحكي ولو بيدكم تزفوهم الحين خير يابه خير ماعدنا بنات للزواج لا تفرحون زايد هالسالفه خلصانه كبل ماتبدا

الشيخ وكف وكال ..
- انا نطيت رأيي بالسالفه تفاهم انته وجدتك بعد رايح اتوضى

هو طلع والشيخه كالت ..
- اسمع ياولد لا تصير مثل ابوك وكت الي كان يندك الباب على خواتك يطردهم بدون فهم وعلم ويجيب الي على كيفو ذاك الزمن ولى وتغير مو ترجع الحين انته تعيدو
- جدددتي غاليه صغيره على الزواج بعدهه مو وكتو الحين ول هي ماتعرف شي بامور البيت شلون نزوجها
- تتعلم ماكو بنت ماتعلمت الطبخ والتنظيف وشبيها الحين هي مو شايله البيت بدل امها ماكاصرهه شي
- جدتي الا بغاليه لا تناقشيني قلتلك صغيره بعدها ومدللـه مو مال زواج
- ول البنت بنص العشرين وشتطلبها بعد تعمر لحين مايطلع الشيب براسها بعز شبابها البنت مو صغيره بعمرها انا مزوجه ابوك
-وليييه جده سدي الموضوع
-ماااينسد لا والله حرام عليكم خلو البنت تمشي قسمتها عجل تضلون حابسينها بينكم خلوها تتلهى بيتها وعيالهه ويصيرلهه ولد لو بنت يملي فراغ حياتهه مايصيررهالشكل يابني مايصير
- جدتي انتي ماتفهميني انا ماامن على غاليه الا حدري ولو يحدر الحين ابن النبي هم ماامن على اخيتي حدرو وماادحكو يستاهلها عاد تقنعيني الحين بهالطيار!!! وشنو الطيااار شنوو
تلاكيه الحين شابع بنات ويتندر باخر عمرو يدور الحرمه العفيفه
مااا ازوج اخيتي الااا الي يطخ براسي اناا بس اناااا ولا انتو رايكم كله مايمشي لو على جنازتي وحتى رايهه هي هم مايمشي الا ان رضيتو انا يلااا تتزوج
وعلى هالكلام خلص النقاش

طلع وعاف الشيخه تحجي اشكال الحجي وراه ..

رحت اتلمس واتمشى وتلكتني غاليه اخذت بايدي وصعدنا بدلت ملابسي وكعدت احجيلها الصار وهي كالتلي ..
- يمه يعني انا مدحكتو للولد زين شكلو مرتب بس مالي دخل انتي دحكيه وقرري انا اثق باختيارك الي
- بنتي اني حتى لو شفته زين الج يبقى قرارج وقرار اخوتج مهم وهسه جراح افندي عنفص علينه مايرضى يزوجج الا الولد الي يعجبه
- ايييه عجل انا هيك تطمنت انتي وجراح تعرفون تختارولي الزين انا مخليتهه وراكم مالي دخل
- ههههه يعني لو وافقنا توافقين
- افكر مادري
- واذا ما وافقنه وانسدت السالفه عادي
- اييه عادي وش يغير يعني مثل مايجي يروح مابيها شي
- شوفي بنتي بصراحه اني بعد مااخلي زواجج يتاخر
-هااا ليش
- هم اريد اشوفلي حفيد ادلل واداري صرت بالخمسين وماعندي حفيد شوكت بعد متكليلي مو العمر خلص
- لاا يمه عمرك طويل ان شاء الله واني على رايك امشي كيفك انتي دحكي المناسب وامشي عليه انا مايفرق عندي الولد منين ماكان مدام يخليني عايشه اميره مدللـه مثل هين اوافق اتزوجو هذا شرطي الوحيد
-اكيد بنتي انتي ثقي بيه واني اخليج تترحميلي بعدين على هالنصيب

ضحكت وحضنتني ونزلنه سوه ..
على العشى اني اكعد يم الشيخ على يسرته والشيخه على اليمنى ويمهه ام جراح والولد يغيرون باماكنهم بس احنه ثابت مكانه ...
يمي غاليه تصير تشاورني وتكلي هذا شنو الاكل وتعودت تخليلي بماعون جبير من كل شي شويه وصمونه وكلاص مي على ايدي اليمنى حتى اني حافظتهن اكل براحه بدون احراج ..

ثاني يوم الظهريه اني بغرفتي كاعده ومخليه بايدي دفتر مذكراتي اتلمسه واتخيل شنو اكتب لو كادره اشوفه
جان يدخل الشيخ وكالي ...
- شلونهه الحبيبه
- بخير ياعيني
- نعسان ورايد انام على يدك العصر ورايه مشيه لمحل الاثاث اخيك عندو اشكالات ولزوم ادحكها
- ان شاء الله تنحل

كعد يمي واخذ دفتر من ايدي وكالي ..
- زمان صار ماكاتبه
-اي وبالي هواي شغلات اريد اكتبهه
- اييه احكيلي وانا اكتبلك
-ههه لااا مادوخك نام هسه
- لا بالله احكيلي انا اريد اكتب
- زين لعد خلي نتمدد واكولك شتكتب
- يلاا وين القلم هين بالجراره ؟
-اي

تمددنا وهو فاتح ايده ولافهه عليه ولازم الدفتر ويسألني شيكتب كلتله ..
- اكتب .. مذكره اليوم بخط الشيخ
- لا راح اكتب .. بمثل هذا اليوم
٢٠١٦/٥/٢٦الشيخ وحبيبتو التين خطو تذكار اليوم سوى
-هههه حلوو كمل بعد كيفك
- اكضبي القلم وياي ونكتب سويه
- زين لعد خلي نكتب .. تينه بهاليوم مشتاقه وتتمنى تشوف الشيخ

بدون مايكول شي حرك ايدي على القلم وصارت ايدي وايده تكتب هالجمله ومن كملت كالي ..
-وبعد
- اكتب .. اعظم نعمي كانت رؤيه ربيع عينيه
- تقصدين خضار عيني !
- اي هو لو تقرا باقي كتابتي هنا تلكاني اسميك دائما سيد الربيع
-ههه ياحلاته والله
- تره صدك اني مشتاقه لشوفه عيونك
- وانا والله مشتاك ادحك نفسي بعينك ياعيني انتي
اسمعي راح اكتب هين ..
تينه تمنت وشيخها يتعهد بتحقيق الامنيه
- يابعد عمري
- اسمعي راح اكتب بعد ..
الشيخ الحين نعساان ومايرتاح بنومتو الا حدر حبيبتو التينه
- هههههه اكتب على ايدها
- وشرط ينام على يدها وتلاعب شعرو الخفيف وتضل تشم بي كل حين وتفززني من نومي بدون ماتدري
- هااي شنو ماكعدك اني
-لاا تكعديني بس انا ماكعد واخربها عليكي
- يااا لعد ماكلتلي من قبل
- احبها يولو لو مامرتاحلها مااحدر انام على يدك وانا ادري انك ماتكدري اذا ماتخلي خشمك هين وتشمشمي
-هههههههه صدكت والله ماكدر روحي صارت بهالشمه من راسك
- انتي شمي بس لا تحوصين يولو انا نومي خفيف واحس على كل شي بس افتح عيني بالمزاج
- نعرفها ياعيني نعرفها
- هسه نوقع هين ونسد هالدفتر ونااام

حط الدفتر بجهتي على الميز وفتح ايدي ونام عليهه .. ضليت العب بشعره واضحك بسكوت وهو يكولي شكو اكوله اتذكر من توصفني هيج بهالسالفه احسها صارت تخجل بعد .. يضل يضحك ويكلي كملي براحتج اني هيج اكدر انام
اغلب الاحيان اغفى واني مخليه راسي يم شعره ..

طلع العصر وللساعه سبعه بالليل رجع ضايج وحتى ماتعشى ولا يرضى احد يحاجيه وضل بغرفه ام جراح ماطلع لحد ثاني يوم نزل الصبح وطلع مستعجل بدون ريوك ...

رجع العصر ووياه ضيف كبل دخلو للهول و شويه وطلع صاحني .. رحتله وكالي ..
- تين البسي واحدري هين داخل
- ليش منو هنا
- بعدين افهمك تعجلي يلا

صحت على غاليه وصعدنا لغرفتي لبست جبه فوك دشداشتي ولفيت الشال ولبست مناظري ونزلت ...
دكيت الباب ودخلت تلكاني الشيخ اخذ بايدي وكعدني على القنفه وضل واكف يمي ...
اباوع بصفي رجال كاعد ماشوف بس هيئته وتدرجات الالوان الترابيه بسبب المناظر ...
الشيخ حط ايده على جتفي وكالي ...
- يابه هالرجل يقول انه يعرفك من زمان و يقول هي اذا عرفتني احكيلكم قصتي وان ماعرفتني امشي واكفيكم خيري وشري
- شيخ اني الي اعرفهم انته تعرفهم وهسه اني مااشوف حتى اعرفه منو انته كولي منو هالشخص
- مااعرف انا علمي علمك انتي اعرفيه
- شلون اعرفه زين يعني احاجيه عادي
-اييه عادي

درت وجهي ناحيته وصرت اكوله ..
- عفيه انته منو احجيلي شي تره اني ماشوف هسه جان عرفتك بس انته فهمني منين .. واحد من كرايبي ! من ولد عمي ! جاوبني ليش ساكت

جان ساكت ومايرد بشي وصرت اسمع صوت شهكاته هنا حيل تفاجأت وكلتله.
- هاي شنو ليش تبجي !!! اسفه عفيه لتضوج مني لان ماعرفتك بس والله ماداركز بملامحك انته بس ذكرني شنو صله القرابه بينه ليش متحجي عفيه

ضل بنفس الوضع ماينسمع منه بس البجي عاد نزعت النظاره وخليتهه بحضني وميلت راسي شويه قريب منه
وكلتله ...
- كافي عفيه اهدأ خلي افتهم بس خلي اركز بوجهك شويه

ضليت هيج اقرب وجهي منه واشوف غواشه وراسي من جهه عيني صار يوجعني من كد ماركزت هيج بي عاد غمضت دااريح عيني شويه وضليت بس اسمع صوت نفسه العالي .. هنا ركزت سمعي عليه .. مره ومرتين صوت هالنفس مو غريب عليه .. بسرعه تلمست ايدي وجهه وبس ميلت وجهي ناحيته
عرفته ...
عرفته وكمت مفزوعه ووكعت المناظر من حضني ...

وبكامل رجفتي وترددي كلتله ...
- ا ا ايووب !!!!

على صوته بالبجي والنوح وصار يكول ..
- ياأمي سامحيني

تربط لساني بعد ماعرفت احجي شي او اتحرك من مكاني وبس الدموع ... وهو
دنك يم رجلي حسيته كعد ويكول ...
- سااامحيني ياامي انتي سامحيني

لزمت جتفه ورأساً وخرت ايدي تذكرت نفسي شداسوي ضليت ابجي واكوله ..
- كووم ابني كوم مو الك هالكعده كوم ايوب فدوه كوووم
- دورتج والله والله دورتج بكل مكان ليش ياامي ليييش ليييش نبذتيني من عمرج بذاك الوكت ليييش جاوبيني لييش هالسؤال سنين ادورله جواب
فهميني شفتيني مااسوى ! مو كد الثقه !
شفتي مابيه خير ماكدر احميج بعد ماكدر اعينج ! جاوبييني دخيل الله دخيل الله جاوبيني

ضل على كعدته ويحجي هالحجي ويبجي واني ماكدرت اوكف بعد تلمست وكعدت وضليت لازمه راسي اريد اصدك الي ديصير اريد افهم ليش هسه ليش باخر العمر يلا رجع ليش !!!!

كطع افكاري صوته العالي وهو يكول ..
- لا تسكتين دخيلج لاتسكتين انا سنين ادور جواب ارحميني
- مو قصوراً بيك والله بس نفسي بوكتهه ماكدرت والمشاكل بوكتهه كثرت عليه وماانطتني مفكه
- بس تعرفيني انااا اكدر على اخذ حقج تعرفين بامكانيتي ليش رحتي للغربه مالجئتي الي ليش ماانتظرتي جيتي
مو كالتلج روعه بااربيل وراح اتواصل وياه بس احصل الرقم ليش ماانتظرتي منهه جوااااب يول والله ماجنت راح اخذلج والله ورب العزه مااخذلج مثل كل مره

ماكدرت اجاوبه شي ضليت بس مخليه ايدي على حلكي وابجي وهو كل حجيه
وكال ...
- انتي فقدتي ثقتج بيه من هذيج الايام صرتي تحسبيني مالي فايده بحياتج حسبتيني ضعيف وراح اتخلى واتحجج واتركج بنص الطريق انتي ماتصدكين بعد ايوب يكدر يحميج ويوكفلج بالشده
حسبتيني ولد امره مو بيده نسيتي الرجوله الي عند ايوب رجعتيه بعينج طفل طفل ماينفع بشي
- لاااااا والله لاااا

صار يكح بقوه وبعدين كال ..
- كلتلج سامحيني ياامي انتي سامحيني غلطه عمري صارت والله وفرضها زماني عليه طلبتج كم مره تسامحيني وظنيتج بالاخيره سامحتي بس من مشيتي و ماخليتيلي خيط اوصلج بي عرفتج مامسامحه بعدج ورجعتيني غريب
اكبر عقاب عفتيني بي هو ظنوني عفتيني باكبر نار اكلتني طوال ٢٧ سنه .. كلمه وحده لو وصلتيهه الي بذاك الزمان جانت راح ترحمني من نفسي
والله ماجنت اسكت واخليج وحدج تواجهين ليش ماوثقتي بيه لييييش يولو
انا احساس الضعف هذا خلاني رماد
صغرني بعين نفسي ... رحت واخذت حكج وامنتلج كل شبر وراج وانتظرتج بس تتصلين بروعه وتكليلهه انا بفلان مكان يولوو دورتج مثل الخبل بكل شبر وين رحتي انتي وتبخرتي هالشكل

مسحت دموعي وكلتله ..
- رحت لحديثه
- حديثه ! حديثتنا يولو !!!
-اي
- ول اااااخ من الزمان ااااخ يعني انتي ماتعرفيني ماكدر اصلها لو تعمدتي تمشين بديره مايوصلج بيها احد
-اي تعمدت ولا تسألني ليش الصار بعد صار وسد هالمواضيع رجاءاً
- بس الصار عندي لليوم بعده مااخلص
-ايوب رجاءاً انتهت هذيج المشاكل وعشنا براحه .. اني تعرفت على الشيخ ابو جراح هناك وصارلي نعم الزوج والاب والاخ والصديق وبفضل الله وفضله كدرت اعيش وصار عندي ولد وبنيه والحمدلله حياتي امنه وربي خلصني من هذولاك الانذال ونجاني منهم
- بس انا الي خلصتك منهم
كلتلج امنتلج كل شبر وراج حتى ترجعين
بامان لاهلج وبيتج حتى وان ماردتي مساعدتي ولا ردتي وكفتي وياج انا وكفتلج واخذت حكج
- شلون شسويت !؟
- رجعت وره ٣ ايام من اتصالج بروعه
ورحت على بيتهه وحجيت ويه امهه ووياهه وفهمتني الصار قبل اختفائج كله حجته الي ودلتني البيت ورحتله اول مره
تفحصت المنطقه ونص الليل داهمت البيت ويه اثنين من جماعتي واعتقلتهم
علي ومحمد اخذتهم من نص المزبله والقذاره الي كاعدين بيهه اخذتهم بمكان مابيه غيرنا ... خمس ايااام ضبط انا شوفتهم الموت بعينه وردتهم بس يفهموني شسوو حتى انتي مشيتي هالشكل وهذاك علي مارضى يحجي حرف جان يتلذذ بحركه اعصابي على معرفه هالكلام منه
ومن نفذ صبري وياه كتلته ودزيته لاهله بتابوت ووياه امر ممنوع يقيمون عليه العزاء ولا ينسمع صوت بجي عليه ويندفن بسكوت وماينسأل شصار

شهكت وضلت ايدي ترجف وحتى الدموع وكفت وهو كمل حجيه ...
- ماعدا اسبوع على روحتج الا وهو مدفون ومحمد اخذله شهرين محبوس وكل ماارجع خايب من فرتي عليج افرغ كل اعصابي بي وبعدين طلعته ماكدرت اكتله خفت ماترضين وتحمليني ذنب كتله
خفت لا يطلع بينكم ولد واصير اني كاتل ابوه ... هالشي وكفني عن كتله وطلعته
وضليت مراقبه جماعه وراه مثل خياله
وبيوم وصلني خبر محمد عليه بلاغ بالمحكمه للطلاك دزيت وراه جماعه لاني جنت باربيل وكتهه والجماعه الي معتمد عليهم بقضيته هذاك اليوم ماكدرو يوصلوه بنفس وكت وجوده بالمحكمه
وضيعو اخر فرصه توصلني الج
تفهميني انا مو ضعيف على حمايتج
انا بس زماني دار عليه

ضل يكح ويجر النفس كوه وبعدين سمعت الشيخ كاله ...
-اشرب مي يابه اشرب وارتاح

ما رد عليه وصرت اسمع جره نفسه القويه وبعدين هدأ وكال ..
- الربو دمرني
- زين انك شايل علاجك معك
- ما يفاركني البخاخ

عم السكوت بينه وسمعت صوت الشيخ ورجف كلبي ..
- تين
-ها عيني
- منو ايوب ؟

الخوف الي بيه هاللحظه ماينوصف
ريكي نشف وايدي وبطني ترجف
لساني متربط مادري شكول ..
رجع سألني ..
- جاوبيني تين ايوب منو ؟

يحجي بكل رزانه وهدوء واني اعرف هالنبره شنو وراهه من مقصد ..
بالكوه كدرت انطق واكول ..
- هو صديق مقرب من ايام الجامعه
-هاا وروعه منو
- روعه هم صديقتي المقربه عرفتهم بالجامعه وجنه احنه الثلاثه سوه وعلاقتنه اخويه قويه
- زين زين

جان بودي لو بهاللحظه اتبخر ومايضل الي وجود ولا هالموقف الي انحطيت بي
يمكن هاي اول مره ارتاح لاني مااشوف
حتى مااباوع بعين الشيخ واشوف نظرته

بعد سكوت طويل بينه ايوب كال ..
- ابو جراح انا اشكرك على طول صبرك وتفهمك وممنون الك كل عمري
بس الله يعرف شكد موقفك هذا عظيم
عندي .. انا مو جاي اخرب حياتكم وهدوءها ولا الي نيه بشي يشهد الله
والي بالي وبنيتي حجيته كدامك

- الي ردته من جيتك هاذي شنو ؟

- والله ياابو جراح ردت اخذ جواب على سؤالي الي كررته اكثر من خمس مرات وماحصلت جوابه لهسه

- هاا قلتلي جواب .. اييه تين جاوبي
سؤالو يلا ليش ساكته يابه جاوبيه

بلعت ريكي وضليت افكر شجاوب ورجع الشيخ كال ...
- صحيح سؤالو هو انتي ليش ما واصلتيه رغم هو صديق مقرب والظاهر بينكم مواقف وعشره طيبه ..

ليش مااستعنتي بي
فهمينا يابه

اخذت نفس وكلتله ..
- ما تواصلت لاني ماردت
اني كايلتلك شيخ من قبل هواي انته سألتني شجابني هنا وجنت اكولك
نفسي اكتفت وردت ارتاح بعيد عن كل احد يعرفني
-ايييه وقلتيلي كل الي عرفتيهم كانو اذى
بحياتك هو من ضمنهم !!!

صعب الموقف صعب عليه اخاف احجي شي يرضي واحد ويجرح الثاني
صار جوابي هنا ...
- لا مااذاني
-عجل الصار ليش؟
ايوب - جاوبينا رحمه لاهلج انا تعنيت وتوسلت بس لاجل هالجواب

فركت وجهي وكلتلهم واني مغمضه ..
- شيخ انته تعرف وضعي شلون جان بهذاك الوكت وشهدت على تعبي وحالتي النفسيه الصعبه بوكتهه
-اييه
- اي هالتعب والخوف والكأبه بوكتها كلها بعدتني عن التفكير بتواصلي ويه اي احد يعرفني واضافه ان ايوب بوكتها متزوج ومستقر بحياته وبيته
ماردت احرجه وياي واني ادري لو نخيته مايردني وراح ينحرج ويه عائلته
هالشي مارضيته ابد وبعدين شيخ انته من يوم العرفتك كفيت ووفيت واغنيتني عن كل ناسي عيب لو طلبت مساعده احد بعد فوك الي قدمته الي ووكفتك وياي
يعني باختصار ... وجود الشيخ اغناني وخلاني مااحتاج اطلب ايوب بشي
وبعدين حتى لو تواصلت وياك ايوب ماجنت راح اطلب منك شي ابد صدكني لان الشيخ سندني وعالج كل مشاكلي
رجاءاً لا تفكر اني استهانيت بيك او استضعفتك ابد والله بس انته الك حياتك وشغلك ومستقر اني زحمه اجي اخربها بمشاكلي وتعبي
هسه كفو اسئله عني تره تعبت وراسي ديأذيني

فتحت عيني وصرت اباوع باتجاهم وايوب كال ..
- الحمدلله على وجود الشيخ بحياتج
اني خوفي جان لا تتاذين وتحتاجين لاحد وماكو ابن حلال الي يفزعلج
الله يجزيك كل الخير شيخ على وكفتك وشهامتك ويه امي انا والله اعتبرها امي واخاف عليها خوف الابن لامه ماعندي غير شي .. واتعذر انا لدخلتي هالشكل بحياتكم بس ماكدرت امنع نفسي بعد كلت مااجذب واحاجيكم بكل شي انا مو طبعي الدغش والحيله
- معلوم يابه معلووم .. تين ماسألتي عن سالفتو وشلون عرفك وحدر هين !
- جنت انتظرك تحجيلي شيخ
- هذا ابو سالم ما ميزتي صوتو
- لااا والله ماركزت بي
- طلع ابو سالم باله شكوك على انك امها لغاليه ومدور عنوانا هالسنين حتى يتاكد انتي لو غيرك
ايوب - لااا ياا شيخ لاا اسأت فهمي
- مااسأت الفهم انته الي نطقت هالشي بعظمه لسانك
- لاا بس خلي اعيدلك السالفه اسمحلي
انا والله مو بالي هالشي وصار صدفه قدر ربك والله ... ابني اسامه مو تعرفون بموقف الكليه وهو بنفس اليوم حجالنه على العشى ان اليوم بنيه هيج وهيج موقفها صار ويانه وعنده اخته هم بالكليه جان يكللهه صيري مثلها هيج بنيه قويه مايوكف بوجهه احد ولا احد يكدر يستضعفها وتحجي كلشي لاهلها
انا من شفته هيج يمدح بيهه ومعجب بموقفها كلتله يرادلك هيج مره تتزوجها
حتى ترجعك لاصلك لان هو كال مبينه انباريه .. وراحت ايام اجتي ايام هم رجع ذكرهه بالحجي وهالمره يضحك ويصفن كل شويه ويكول سايق الطياره تعبت ودرست حتى يسموني سايق الطياره
ضل يروح ويجي ويكول سايق الطياره ويضحك على نفسه كضبته كلتله يابه شسالفتك اليوم كالي يابه هالبنيه اليوم تسمعني حجي وسمتني سايق الطياره
تخيل كل هالابهه والمكانه وتسميني سايق
عاد انا ضحكت وكلتله والله انها بنت خير وخيرها معلي على خيرك وشافتك سايق لانك فعلا سايق بس مال طياره وبراتب محترم ..
كلتله بوكتهه .. هيج بنيه هي التستاهل تتزوجها الي تشوف الانسان انسان مو فلوس وتتمشى
وهو من ذات نفسه رايح سائل عليهه بالكليه ومندل بيتهه واجاني كال شتكول يابه اجرب اخطبها شو شفتها بنيه رزنه وتستاهل احط بيدها تعبي كلتله توكل
كالي بيتها عنوانه باب الشيخ انا من سمعت باب الشيخ كلتله دليني بالضبط وين وصار يدليني البيت يوصفلي هنا الجامع وهنا ابو المولده والدربونه الثالثه بالبدايه اول بيتين والثالث بيتهم
ماصدكت الي سمعته بوكتهه وخليته يعيدلي العنوان واكد عليه بالخمس مرات
وثاني يوم اخذته ورحت وشفت البيت هو نفسه بيتكم دكينا الباب وحجينه ويه الحجيه كالت هاي بنت بنتي وتخرجت هسه وراحت لبيت اهلهه بالانبار
يابه وين بالانبار دلينه كالت ماكدر ومااندل ردت وياهه تحجي شي ماقبلت
من يومها اسامه كالي مو نصيبنا يابه
الله يوفقها ويستر عليها كلتله لاا هالبنيه تضل ادور عليهه وتجيب عنوانهم
وغيرها ماتتزوج وضل هالسنين يدورها ويرجع على خالها كل فتره لحد ماقتنع وانطانه عنوانكم هذا
يعني والله هي رب صدفه خير من الف ميعاد .. انا كبرت وتقاعدت وكاعد بيتي لا يمي السالفه ولا ادري بيهه اصلاً البيت هذا قبل بالتسعينات جنت ادز روعه عليه
هي وامها تسأل امج وتكوللهه مادري البنيه سافرت بشغل مااندل وين بالضبط ومره تكوللهه بالشمال مره تكول لا راحت للموصل مره تكول بيت رجلها وماخذت منها كلمه التنفع خلتني أيس منها وبعدين بسنه ٢٠٠٢ نهايتها بشهر ال ١٢ انا عرفت بالهوسه الي راح تصير بغداد ودبرتها بالخفى وسافرت للاردن بين ما اجرت بيت ورتبته ورتبت امور سفر اهلي صار الي مامحسبله حساب

سكت والشيخ كاله ..
- شصار يابه ؟
- خطفو اخويه الجبير ايهاب الي هو ابو اسامه خطفوه من شهر الثاني جماعه مامعروفه منين ووصلوه للامريكان
وضل كل يوميه يوصل بلاغ لاهلي ان
رجعتي بدال طلعه اخويه و والدي الله يرحمه مارضى ارجع واسلم نفسي
كالي يحرموني منكم اثنينكم وحط يمين عليه ماارجع للعراق حتى لو اسمع كتلو اهلي واحد واحد ... عشت بمرار هذيج الايام مراار وضيم اسود الخوف على اهلي ياكل بكلبي الليل والنهار ومن وكتها صار عندي الربو ..
وبعد السقوط كلنا راح يطلع بهالهوسه
النوب دزوه النه مذبوح من الوريد للوريد
انكتل اخويه واندفن وانا ماحضرت يمه
كل مااريد اكسر اليمين وارجع والدي يكولي تنحرم رضايه دنيا واخره
وضليت بعمان للشهر الخامس من ٢٠٠٣
انا بس اتوسط بالعلاقات ويه فلان وفلان حتى ادبر سفر اهلي بأمان وكدرت الحمدلله اسحب زوجتي وزوجه المرحوم والجهال بالبدايه امنت عليهم يمي وضل بالبيت بس ابويه وامي واخويه يونس
اصغر اخوتي هذا .. اهلي من يوم خطف رحمتو ايهاب همه دزوه لبيت عمي باربيل خافو عليه وضلو الامريكان يداهمون بيتنا كل يومين ويفزعون ابويه وامي وهمه شياب ماتحملو هالخوف كله
ابويه انضرب جلطه واول مااخذوه للمستشفى وسمعت بخبره رحت لجماعه اكبر من الي دزيتهم بالاول وانطيتهم توقيع على ان بيت اهلي الهم ملك وحق
وبس يرجعون اهلي هنا ابيعه واسلمهم الفلوس كامله ..
وهمه دزو اثنين رجال جابو ابويه وامي وابويه بوكتها جان هستوه طالع من المستشفى بنفس الليله راحوله والظهر ثاني يوم همه يمنه .. كدرو بالفلوس كلشي يسوون بوكتها وجابوهم الي
وكلت الحمدلله التم شملنه بعد هالغربه
وسلمت البيت لنفس الجماعه حتى يبيعوه
وبهذاك الوكت البيع والشرا واكف
ضل لنص ال ٢٠٠٤ يلا انباع البيت واخذو فلوسه كلهه حتى الغراض الي بالبيت باعوهن واخذو فلوسهن
وهمه استجوبوني اكثر من مره
وعرفو شغلي ضابط استخبارات لصالح صدام ماعوفوني بعد ...
بالاخص من عرفو صدام مات كالو ولاءً لصدام نحافظ عليك وعلى عائلتك بس تشتغل ويانه وتفيدنا بمثل مافدت دوله صدام حسين ...

- يعني اشتغلت لصالحهم ونسيت دولتك !

- لااا يابه لااا شلون ابيع وطني انا من اول كلمتين وياهم كلتلهم اي مساومه على اسرار الوطن اختار الموت عليهه
تريدون اشتغللكم بالزين والي يفيدكم اشتغل بدون تنبيش بالماضي .. قبلو
لان همه بوكتها جانو دوله ركيكه بكل شي وتريد بس تكسب الروس الكبار من دوله صدام حتى تقوي دولتهه نفس الشي
ومن اشتغلت وياهم يلا كدرت اوكف
على رجلي من جديد وبديت اعالج ابويه
واشتريت بيت جبير يكفينا و هواي ذبيت حيلي بالشغل وياهم جان عدهم فوضى امنيه بشكل جبير .. نشالين وحراميه من الدرجه الاولى جانو مسوين خلايا كدرت اشعب بينهم جماعه واندلينه اماكنهم وماخلينه بيهم واحد ماكضبناه
من عدا الي شغلتهم على الصحراء هذوله اخذو نص حيلي وسنين اني اركض حتى انظف هالدوله من الحثاله هاي وترقيت كم مره ومره وكتب شكر وسيارات وقطع اراضي كلها جانت مقابل امان الدوله
قدرو تعبي وياهم ومو بس اني هواي عراقيين تحول شغلهم للاردن ونجحو بحياتهم هناك لان الجماعه هناك يعشقون صدام حسين وبالاخص هو شبعهم فلوس ونفط كل هالسنين ضلو ممتنين اله وكل عراقي يحطوه على الراس انا اشهد شلون يسهلون امره

- هاااا زين انا سامع ان هالمحبه من الاردن لاهل السنه بس مو للشيعه
مايودهم هالكثر

- ايي صحيح للسنه اكثر بالاخص تكريت
همه اي شي من ريحه صدام يحبوه
ويسهلون امره

- اييه معلوم هالشي يابه مو جديد علينه
عجل ايمتى رجعت من عمان

- رجعت وره ماتخرج اسامه من دورات الطيران وسمعت الوضع استقر بالعراق شويه بسنه ٢٠١٣ ترقيت لرتبه عقيد ركن واخذت اجازه شهر رجعت بيها لبغداد اني وابني سالم .. اشتريت بيت بالسيديه ورتبته وخليت اسامه يجيب الاهل ويرجع وامنت عليهم ورجعت لعمان اكمل شغلي وخابروني ابويه مريض فد مره حالته رجعت حتى اشوفه ويومين شفته وتوفى

- الله يرحمه

- ويرحم الجميع ... اي هنا بعد ماكدرت اعوف اهلي وحدهم بالاخص اسامه صار مايتواجد بالبيت الا يوم او يومين بالاسبوع كله سفر رجعت لعمان وبديت اقدم طلب التقاعد وطولت السالفه صار بيها هواي اشكالات كمت ارجعلهم مره بالشهر اسبوع واحد اشوف ولدي وامي وارجع لعمان ولسنه ٢٠١٥ يلا استقريت بغداد وتقاعدت وبقيت بيتي هناك بعمان مابعته اجرته واملاكي هم بقيتها كلت كلشي يصير الوكت ما مضمون

- زين سويت .. الحين مستقر بالسيديه

- اي بالسيديه خوش منطقه مرتبه

- الله يهنيك بعيشتك هين وترا ماكو مثل عراقنا عراق
- ابد والله نسمه من هواه تعادل الف ملك والف دوله الغربه شما تغنيك ماتعوض ربع من الوطن
والله انا اتذكر شربه استكان الجاي بنص كهوه العزاوي والهوسه داير مدايري احلى وارقى من كعدتي بارقى مطاعم عمان
- ايييه والله صدكت مايعوض الوطن شي
- ايي والله

جنت ساكته طول الوكت واستمعلهم

بداخلي شي فرح بمعرفه حياته شلون صارت وشلون اترقى بشغله وحصل هالمكانه والمال وكدر يأسس حياته مثل مايعجبه ..

سأله الشيخ ..
- الحين انته زوجتك وحده والثانيه هي ام اسامه زوجه المرحوم
- لا هي هم زوجتي .. من اول سنه عشنه سويه بعمان والدي طلب مني اتزوجهه
بس تطلع دوره السنه مال اخويه وانا مارضيت اتزوجهه بس امي فهمتني ان ابوي طلب هالزواج حتى يضمن المره تضل بينه لولدها وحفاظاً على ولد اخويه ورد دين حياته الي انتهت بسببي تزوجتهه وسجلتلهم الكاع الي بعمان وتكفلت بمصاريفهم كلها اسامه جان بنفسه يصير طيار ودخلته كليه الطيران
بعمان ومن تخرج اخذتله سياره
عنده اخت اسمهه هديل دخلتهه تحليلات
اهليه وام اسامه هي الهه جناح خاص بيهه و ولدهه .. انا محرمهه عليه مره اخويه ما فارك عيني لحظه راعيت عياله وزوجته وصرتلهم الاب ومدلل ولد اخويه اكثر من ولدي وصارلنه عمر
عايشين سوه ما واصل جناحهم ولا معتب بابه حافظ حك الاخوه بينه
- الله يحفظكم الهم ويجزيك حك تعبك عليهم
- الله يسلمك

سكتو شويه وبعدين رجع ايوب كال ..

- ضلت بالي عينج ليش هيج صارلهه

- هالعيون ومرضهم كانو ثمن عافيتي
انا تصوبت بعيني ايام ماكنا نحارب داعش على اسوار حديثه وهي داوت عيني بعينها اليسار والوكت اخذ منها نظر اليمين

- امي من يومها مضحيه وهذا يدل انك سعدتها واستحقيت هالتضحيه

- انا قدمتلها القليل بس هي كلشي مني تعتبر ثمنه مايتجازى بس هي ماتدري انا الي كل عمري مديون الها من سنه التسعين لهالسنه ماكدرت افك ديني لها
وكل ماافكر الحين جازيتها تطلعلي بدين اكبر من الكبلو وهاذي اخرها هالعين
تحيرت برد جميلها

- الله يكدرك وترجعلها على الاقل نظر عينها .. ليش ماتسافرون للهند خوش دكاتره هناك ويعالجون عيونها اثنينهن

-الله كريم

- احجزلكم هالشهر و نسافر سوه وانا اتكفل بكل تدابير السفر والعلاج وماعليكم بس تحضرون نفسكم

- لاا يابه تسلم

- رجاءاً شيخ خليني اقدم ولو هالشي البسيط واريح ضميري

- مستحيل هالشي يابه الحرمه حرمتي ومايصرف عليها غيري اكطع نفسك من هالسالفه

- زين عجل يابه نتقاسمها انا اتكفل بالسفر وعليكم العلاج احسبوني دافعلكم كروه كيه هسه هم ثكيله هاي ياابو جراح

-اييه يابه ماترهم والسفر غير وكت ان شاء الله الحين عندي شغل اتفرغ ويصير خير

- زين هسه مو حاجزين لعمليه بعد كم يوم
-اييه راس هالشهر
- اي زين خلي تخلص من المي الابيض بهالعين وترجع عافيتها وانته كمل شغلك هالايام حتى وراهه نطلع للهند او تريدون غير بلد كيفكم كلش انا حاضر
- يابه تسلم مايلزم تعب نفسك وانا مو لاهي عنها بس اضبط اموري وشغلي واخذها انته تريح ياخيي
- لااا والله ماعوفكم بعد احنه راح نصير كرايب ان شاء الله وهسه احنه اصحاب
وحك الصاحب على الصاحب ياابو جراح
- الله كريم يابه الله كريم
- امانه بركبتك شيخ امانه امانه يوم ماتحدد العمليه كولي امانه عليك يوم الي اخابرك واسال على العمليه لا تضمها عليه
- ان شاء الله يابه سهله ان شاء الله
- اترخص انا يابه واعذرونا على هالجيه المفاجئه واذا بدر مني كلام غث خاطرك ياامي انا اعتذر وان شاء الله ماشوفك الا بكل خير وعافيه
- ان شاء الله

طلع هو والشيخ واني ضليت على نفس كعدتي بعدهه الصدمه بيه حسيت على رجعه الشيخ واول مادخل الهول كال ..

- امشي كدامي فوك يلا

بلعت ريكي ومشيت وياه صعدنا كبل للغرفه واول مادخلت صاح عليه ...
- ابني هااااا ابنننننننك من ايمتى يولو
من ايمتتتتتى شيبتو براسوووو وتسميه ابني !!!!!
تيييين تضميهاااااا هالسالفه علي اناااا !!
كلشي تشاركناه ليش هذااا تضميه عني ووووول سنين احنا سوووووى بحديثه
ماحكيتيلي عرفتيها منووو
ما ذكرتي طاريه كداااامي ان كان هووو صديق وبس صديييييق مااا علمتيني بسيررررتوووو ووووول لييييش تيييييين لييييييييش يولوووو

جنت واكفه ومدنكه ولازمه المناظر بيدي اعصرهن بايدي كل مايعلي صوته بالصياح وبالاخير ضرب حيل على باب الكنتور وهو يصيح ...
- الفيييين مره سالتك وردت اتاكد ماااردت اخذ مكاااااان غيررررري تفهمييييينييييي انتي تفهميييييين مكاااانتو هااااذي ماردتها الي دغششششش
ردت ملكي مااا ملكو كلبي بشر لييييش تخليني عاااايش بكذبه كل هالعمرررر يوليييييي لييييش ماجبتي طاريوووو ماكنت احااسبك عليييييه ول تين مو كنا اصحاب مو سبع سنين احنه اصحاب وسرنا واحد ليش ماذكرتي طاريه كدامي ولا مره !!!! ليش يوووولي

ضل يهز بجتفي ولازم وجهي بايده عاصره ويعاتبني .. دفعت ايده وكلتله ..
- ليش تعاتبني عليه وتزعل مني هيج
الي صار كله قبل مااعرفك وقبل حتى مااتزوج
- عتبي على سرك الي ماشاركتيني بي
انااا ماضميت عنك حرف واحد لا بحياتي كبل اعرفك ولا بعدها بس يوم الي يخابرني الرجل ويقلي انا الي معرفه بزوجتك ورايد اتعذر منها على شي صارلو سنين واجي ادحك حرمتي تعرفو وبينهم اسرار وخبايا وانا مثل الاطرش بينهم هييييين الي كااااامل الحك بالعتب

لوووو انك حكيتيلي عنووو من كبل كان اليوم انااااااا الي قلتلك هذااا ايووب هيين
مااا صفن على نطقك اسمو بهالرجفه

نتر ايدي واني كلتله ..
- ماكدرت احجيلك هيج شي
-لييييش ماكدرتي ليييييش بكل شي اناااا وكفت حدرك لييييش هين ماكدرتي
هااا ليشششش
- مااادري مااادري
- لاااا تدرين كلش زين تدرين
تعرفين ليييش لانه كااان شخص خااص عندك ومكانتو خاصه لو انه عادي كنت ذكرتيه بحديث عابر حاله حال البقيه
لكن هذاااااا سالفتوو سالفه وخفتي تحكيها واغير نظرتي تجاهك
ردتي تدفنين السالفه وراكي وتمشين بحياه جديده حدري وتاخذيني على عمى عيني بحبك بس نسيتي ان الدنيا تدووور
وتكشف كل مستور

طلع من الغرفه واني ضليت كاعده بالكاع ابجي والطم على حظي الي فتح هالجروح هسه وزادها وجع..

اجتني غاليه مفزوعه وتكولي ...
- يمه خيرك ياحبيبه خيرك شصار بينكم
- اطلعيييي انتي روحي منا
- يمه حبيبتي انا بنيتك اشيل همك والله لا تبعديني عنك
- بنتتتتي روووحي منا روووحي انزلي وسدي الباااب ماريد احد يمي رووحي داكلج رووحي
- يمه بغلاتي عندك لا تقهرين نفسك هالشكل مشاكلكم تنحل ان شاء الله مو زين عليكي كثر هالبكي ياامي
- رووووحي كلتلج روووحي انزلي

دفعتهه وهي طلعت وسدت الباب
ضليت مخليه راسي على الفراش وابجي

يوم الي جنت اتمنى شوفته براحه ماجنت اكدر اوصله ويوم مانسيته وبديت اعيش
يطلع بحياتي ويخليني اسد باب وينفتح عليه الف باب ...

بشنو غلطت وياك ياشيخ بشنو !!
ماحجيت بسيرته احتراماً الك ومكابر على نفسي بذكره .. لو جنت تعرف شكد جنت اتاذى بكل طاري يجي اله بي ذكرى وياه جان عذرتني على خوفي من ذكر اسمه وسالفته

هذا الي عشت شبابي كله انتظر جيته واسهر ابجي عليه .. حبه جان الاذى الاكبر بحياتي يوم ماتناسيته كدرت اعيش
شلون اكدر افهمك كل هذا هسه شلون اكدر احجيلك هيج !!!!

جنت احجي هالشي بنص البجي والحيره
واسال نفسي شلون اكدر افهمك ياشيخ هالشي شلون اكدر اشرحه الك وابري نفسي كدامك !!!

صار الليل واني على نفس كعدتي
اجتني غاليه وضلت لازمه ايدي وتكولي ..
- يمه زعلكم يهون بس عافيتك يايمه ماتهون عافيتك مهمه لا تأذي نفسك هالشكل يابعد عمري انزلي غسلي واكليلك لكمه صارت الساعه ١١ بعدج على الغدا والله مايصير هالشكل
انزلي يمه حسين يسأل عليكي وانا ماخليتو يصعدلك قلتلو امي تريد ترتاح
انزلي الحين دحكيه
- ابوج وين
- كاعد يدحك تلفزيون بس صافن ولا يسمعلنا حتى ماتعشى
- صيحيلي حسين وانطيني ملابس خلي ابدل
- يعني ماتنزلين
-لا مابيه حيل
- زين عحل اجيبلك الاكل هين
-لاا ماريد لا تجيبين شي
-يمه
- غاليه مو وكت عنادج مابيه حيل كلتلج
كومي جيبي ملابسي يلا
-زين يمه زين

جابتلي الملابس بدلت ونزلت هي وره شويه صعد حسين كبل اجه حضني ويبوس بيه .. ضليت لازمه وجهه وكلتله ..
- شلونك ياروحي
- يمه زين انا بخير بس انتي شسالفتك
خيرك يابعد عيني
- تعاركت اني وابوك شويه وضجت
— عجل ماقلتلك حبيني اناا ماازعلك ولا اغثك بكلام ماتسمعيني عاجبك ابوي قافله عليه دحكيه الحين كاعد ومامهتملك
-اشش ولك كم مره انبهك متحجي على ابوك
- ماحكينا شي يابه اكلتينا وشربتينا
- لاتغثني بحاجيه مو حلوه بحق ابوك مفهوم
- مفهوم يمه مفهومه من كبل ااا يمه صدك راح تزوجون غاليه
- لا بعد ما قررنا بس حجي صار
-اييه يعني مامستعجلين على زواجها
يعني خلوها براحتها
-هاا مو تريدها تتزوج وتخلص منها
-لااا يمه عجل انا ويامن اتكاون بعد
خليها متونس عليها والله
- الله يديم الصلح بينكم
امشي نام يلا مو وراك دراسه
- انام حدرك مبين اليوم ابوي مايحدر هين زعلان
- امشي جوه نام هذا مكان ابوك بس يدري بيك هنا يملص اذاناتك
-ايييي لااا من راضي مستفاد ولا من زعلان اريد افهم انتي امي لو مره ابوي
ماتفكرين بس برجلج
-حسييين
- نازل يمه يلاا تصبحين على خير

طلع وضليت اني متمدده واريح بالي
ومشى الوكت وطفو اضويه البيت
وضليت اني الوب مخنوكه ومحتاره
وكلبي يوجعني من هالصدمات ..

حاولت انام ماكدرت كمت عاد اتلمس
وامشي على حفظي للطريق ونزلت
للهول رحت كلت اشوفه هنا موجود
فتحت ضوا الدرج يلا فتحت باب الهول
وضليت اباوع نفس اماكن الولد بالكاع
وانتبهت على القنفه اكو احد عرفته هو
رحتله ورفعت الغطى من راسه وتلمست وجهه وصرت اكوله ..
- خالد اكعد عفيه كوم وياي خاالد

جنت احس بي كاعد من رمشه عينه بس مايحاجيني .. بجيت وكلتله ..
- كووم لا تستغل ضعفي هيج
- استغفر الله

كعد وكالي ..
- بسك يابه الولد كعدو امشي

لزم ايدي واخذني بره وسد باب الهول
كالي ..
-شنزلك بهالظلمه وحدك
-تلمست
- وشعندك نازله ماخليتي بنتك حدرك
- نزلت اريدك شلون تعوفني هيج وتروح يعني مو تعرفني ماكدر انام بعد الي صار
-هااا ماتنامي من كثر الصدمات لو من العتب
- خالد لتجرحني بهالكلاام انته اكثر واحد تعرف حياتي ومحبتي الك شلون صارت
هالحجي يكوله الغريب مو الي حاسبته نفسي

- استغفر الله تين انتي شككتيني برووحي ول انتي تفهمين انا وش الحارك كلبي لو ماتفهمين
- اي افهم بس اكو شغلات لازم تفهمها مني مو تاخذني بالصياح وتالي تعوفني وتروح يعني هيج تعودنا بمشاكلنا هيج تاليها تصير !
-لااااه الحين انتي ام الراهي وتعاتبين وزعلانه
- ماازعل منك اني بس اعاتبك
- انا الي عاتبتك بالاول
- اي واني هم اعاتب قابل خلص بعد ميصير يعني بس الك
- ههه ووول تين امشي فوك امشي
على هالسالفه نكعد النيام ومانخلص

مشيت كدامه ولزمت بالمحجر قوي وهو يكولي ..
-انطيني ايدك اساعدك
-ماريد تساعدني اني مثل مانزلت اصعد
- وول انتي الحين مكعدتني من نومي حتى تتزعلين وماتدحكين بوجهي واناا الزعلان ! ماصايره هاي يابه
- مو زعلانه هسه مو كلتلك ماكو زعل
- عجل هذا شنو يسموه
- يسموه واحد ضايج طاكه روحه ويحجي متنرفز
-الفظيها عدل بعدين تنفرزي
- صارلي خمسين سنه الفظها هيج مابيها شي
- عوجه كلمتك مكسره
- باوع لتغير مواضيع
-ول شغير من موضوع وانا ابو الراهي وابو الحك انتي لا تكسرين بكلامك حدري الحين وتخليني اتيه سالفتي

طبينه الغرفه واني ابتسمت شويه احسه هدء واكدر اتفاهم وياه هسه ..

لزمت ايده وبوستهه كلتله ..
- انته شلون تسمح لنفسك تشك بحبي الك
والله ازعل منك وماسامحك لو تفكر حبي الك دغش
- تين عجل مغطيه على سيرتو هالشكل ليش ؟!
-هذا وحد وانته وحد .. خالد اني فديتك بروحي انطيتك عمري كله فنيته بحبك ورضاك مااصدك انته متعرف اني مااشوف غيرك بهالدنيا لا من اهل ولا ولد ... تجي بعد كل هالعمر والتضحيات تشك بحبي !
- يولو انا ادري انك تحبيني وفضلك علي مااجازيه كل عمري بس هذااا شسالفتو !!
تين انا الحارك اهلي ومسود يومي هو ان احساااسي يوضحلي ان كلبك زايرو حب هالرجل .. وكضيت الليل كله اتذكر مواقفك كبل واقارنها والشك اكلو لكلبي اكل
- زين هسه اني محتاجه انام بحضنك والله تعبانه وراسي حيل ديوجعني
- وعيونك ورمت من البكي ليش هالشكل يولووو
- من وره اعصابك عيني
- حدري هين

جرني لحضنه واني ضليت مخليه راسي بصدره واكوله ..
- انته النور الوحيد بحياتي مو تحرمني منك
- ول يابه انا الي انعمي وتظلم حياتي لو بعدت .. راسك ياذيكي من هين

لزم وسط كصتي واني اكوله اي وبعدين تمددت بحضنه وهو يفرك كصتي
شويه وجريت ايده بوستهه وخليتهه على خدي وضليت اتلمس بيهه واكوله ..
- شتريد احجيلك
- لا تحكيلي تفاصيل مااتحمل اسمعها
اريد تجاوبيني على اسئلتي
- ماشي
- صحيح كنتو اصحاب ثلاثتكم؟
-اي
- تقدملك مره للزواج
-اي
- و وافقتي ؟
-اي لان بوكتهه جان اكو بدايه احتمال للزواج من خوالنه وماردتهم فوافقت عليه
- وشنو الي منع الزواج ؟
- ابويه ما وافق الا اتزوج من خواله لان هو جان منطيهم كلمه وكال استحي من خالي ارجع بكلمتي وياه
- زين وهو شكان رد فعلو؟
- حاول وياه اكثر من مره وبعدين زعل وطلع من البيت وهو بوكتهه يشتغل بالاستخبارات وبحرب ايران هو جان يدزوه بشغل صعب هناك ويضل ايام مختفي
- وشعرفك بهذا شغلو ؟
- من نلتقي كل كم شهر بالكليه جان يحجيلنه شنو صار بشغله وليش اختفى
بس اني وروعه نعرف بشغله
- ووكت الي تزوجتي هو شسوى؟
- ماسوى شي تزوج قبلي
-هااا والله
-اي والله تزوج قبلي وبعد زواجي بفتره يلا عرفت عبالي جان بمهمه بس طلع متزوج
- يعني ما تأذيتي بوكتها عليه ؟

تذكرت بلحظتها هذاك اليوم بيت روعه
وشلون حالي جان بعدين كلتله ..
- اني جنت متزوجه اصلاً شكو داتاذى عليه
- ما تمنيتيه بيوم ؟
- اي تمنيت لان جنت اعاني بزواجي وجنت احسبه منفذ مابيه اذيه
بس كلشي راح بوكته
- تين كلبك سكنو غيري ؟
- خالد شنو هالسؤال شبيك
-جاوبيني ونكف اسئله
- الكلب كله الك انته طردت كل الي بي
شاركك بي شويه حسين وغاليه بس هيج والله
- يعني ما راودتك ذكرى على الماضي من يوم الي تزوجنا لليوم ؟
-ابد ونور عينك ماراح فكري لاي ماضي واني وياك لا لايام الجامعه ولا لايام الخوال ولا لاي شي
اني احترمك خالد بكد مااحبك واحسبلك حساب كل شي ومستحيل افكر بيوم بشي بعيد عنك
انته اخذتني قطع متنثره وركبتني من جديد خليتلي اسم وحياه جديده مابيها بس انته وكل شي يسعدك واني هيج مشيت عمر جديد وياك ومالتفتت وراي ابد
لانك دائماً ماخذ عقلي واهتمامي
ومن ماحجيتلك بالموضوع هذا ولا مره
فالسبب لاني من عرفتك جنت متزوجه
عيب على المره تذكر اسم رجال غير زوجها كدام الناس حتى لو صديق او اخ عيب هالشي ثكيل وماينفهم صح ولا اني عندي هالجرأه واحجي هيج شي كدامك
واني بعدني غريبه بينكم مو صحيح عيب وصعب تنحجي ! ؟
- اييه صح
- فبعد لا تلومني ليش ماحجيت هو دفتر ومسدود قبل لا ينكتب بي شي وهو صح سمعته يكول امي وامي لان هو مابيوم صاحلي باسمي كله يصيح امي واكيد هسه يستحي يكول اسمي وصاحني هيج
- بس تين انا تاذيت من جيتو صح انا رحبت بي وسايرتو بالحكي وتصرفت بهدوء بس ما عجبتني جيتو ابد عطيتو حك الضيف مو اكثر ولا انا اول ما