هنا جان كلبي يدك سريع متشوقه اسمعه وهو يكولي داشوف زين وبنفس الوكت
خايفه من رده فعله لو شافني ..
كلت لعلي يوكف كدامي ماريده يشوفني رأساً ..

جانت عيني عليه واشوف شلون الدكتور شال اللفاف من عينه وهو صار يفتح شويه ويغمض ويرجع يفتح بس يرمش شويه ويرجع يغمض ويكول تحركني عيني والدكتور ضل يكوله حاول شويه شويه بس افتحهه زين حتى لو دقيقه وارجع غمض حتى انطيك قطرات
تهدأ عينك ....

وهو ضل يحاول شويه وضل مفتح ويباوع كدامه وكال ..
- ادحك الاشياء متداخله ماكدر اركز بيها

الدكتور رجع راسه وكاله غمض هسه
وكلشي يترتب بعدين بس يحتاجلك شويه صبر وراحه ..

باوعلي الدكتور وحجه ويه المترجم وطلع .. اجاني المترجم وكالي ..
لازم تاخذين قطرات هسه وتفتحين عينج
ينتظروج بنفس الغرفه ..

كمت داروح وياه وصاحني الشيخ رحتله وكالي ..
- عجب ماتكعدين حدري اليوم يولي
- موجوده يمك ياعيني مو بعيده
- يولو جوعان ما ماكل من بارحه ماحضرتيلي شي اكلو
- يابعد عمري هسه شويه واجيبلك اكل ادلل

طلعت ويه علي ورماح نزل يجيب اكل
واحنه رحنه للغرفه كعدت انتظر الدكتور
ومن اجه وفتح عيني كالي ..
صح العمليه جانت الغرض منها القرنيه
بس لسلامه عينج من التلوث والالتهابات
زرعنا غلاف ابيض بدال القرنيه الشفافه
حتى مايسبب وجع بالعين وصداع من كثر الضوا الي يدخل للعين استخدمناه ابيض سميك يمنع الضوا .. لان وظيفه القرنيه جانت تعدل انكسار الضوا وكميته الداخله للعين حتى توصل انعكاس مناسب للبؤبؤ ومن ثم لباقي الاجزاء .. بحاله عدم وجودها راح تصير خربطه وكثره ضوا داخل يسبب وجع وصداع لذلك استخدمنا الغلاف المعتم الابيض اللون ..
وحالياً اكو غرز مثبته الغلاف بعد فتره اسبوعين نشيله ..

من طلع الدكتور رحت للحمام باوعت بالمرايا وشفت عيني كلها بيضه وبس اثر الخيوط مبين بشكل دائره بيهه .. منظرها جان يخوف متحملت اشوفها هيج رأساً سديتهه بايدي وطلعت تلكاني علي واخذني كعدني على الجربايه وجابلي النظارات لبستهه وكالي نامي ارتاحي
راح اضل يمج والشيخ ولده يمه ..

اني هم بعده التعب بيه كبل تمددت وغفيت ...
كعدت بعدين على صوت علي وهو يكولي لازم نرجع للشقه صار وكت طلعتنه ...
هستوني اريد انزل رجلي وانفتح الباب بسرعه وشفت الشيخ جاي وجراح ورماح لازمينه كل واحد من جهه
وهو دفعهم واجاني ..
ضليت مغمضه عيني ودايره وجهي منه وهو لزمني من زندي بكل قوته ويكولي
- دحكيلي تين دحكيلي يولي احكيلي هالسمعتو من جراح غلط تينه دحكيلي يابه

راد يشيل النظاره من عيني ماخليته لزمت ايده وهو هنا ضل يصيح
- يوووولي لييييش لييييش ليييييش

بنص صياحه ضربني راشدي وهاي جانت اول مره يمد ايده عليه وضربته بقوه صار خدي نار ..
اسمع صوت صياح علي وجراح بس مارفعت راسي وباوعت لاحد منهم ولا حجيت شي ضليت مدنكه وابجي وهو كعد يمي ورجع لزمني من زندي وضل يكولي ...
- ليييش يولو ليش تخليني مديون الك كل مره ليش تخليني ضعيف هالشكل كدامك!
اناااا عتبت عليكي !!! طلبتهاااا منك لييييش انتي بالذاااات ليييش يوليييي
حركتي روووحي تييين
ماااسامحك عليهاااا ماااسامحك

دفعني وطلع وعلي اجاني ويكولي ..
- عايزه عليه يسامح لو يزعل
ديلاا هذا الكتلتي نفسج عليه هيج يجازي
حرراامات والله حرااامات
-اسكت علي اسكت كاافي ولاا حرف تحجي عليه كافي

وخرت ايده مني ورحت للحمام غسلت وجهي وحاولت مااوصل مي لعيني
وعدلت ملابسي وطلعت كلتله..
-يلا مو لازم نرجع للشقه امشي يلا
-ورجلج
- هو غير نرجع سوه لعد نعوفه
- هسه هم يرجع يتخبل عليج هناك عوفي وخلي نرجع وحدنا هو ولده يجيبوه
-لاا مثل مااجينه سوه نرجع سوه
- استغفر الله

طلع كدامي وخابر جراح كله احنه نازلين قبلكم واشرلي امشي كدامه ..
مشيت شويه وهو اجه يمي لزم ايدي ونزلنه سوه وضلينه واكفين باب المستشفى منتظرينهم ...
لحد ما نزلو يلا اخذنا تكسيات اثنين ورجعنه للشقه ...
اول شي همه دخلو والولد اخذو الشيخ
للغرفه ورجعو يمي .. رماح كالي ..
- عمه اعذريه لابوي
- معذور معذور

ردت اروح للغرفه يمه جان يوكفني جراح وكالي..
- عمه خليه الحين وامشي ارتاحي
هو من ذات نفسو يتقبل الوضع بعدين
- لاا ابني عوفني اني اعرف اتصرف
-عمه بعدو باعصابو خليه يهدأ بعدين وعاتبيه براحتك
- مابينه عتاب ابني شبيك وخر عن طريقي

وخرت ايده ودخلت للغرفه .. شفت الشيخ متمدد بس مقدم ظهره ومدنك مخلي راسه بين ايديه ..
رحت يمه لزمته من جتفه ورجعت جسمه خليته يرتاج على المخده وجريت الغطى غطيته زين وانتبهت بعدهه الباب مفتوحه وجراح يباوعلنه .. رحت سديتهه واجيت
كعدت على الجهه الثانيه من الجربايه
وخليت راسي على صدره وهو نزل ايده تلمس خدي وكالي ..
- اذيتك بضربتي !
- لا
- تكذبين صايره هالايام

رفع وجهي اله وكالي ..
- نبتي خنجر بنص كلبي بفعلك هذا تين
ليش مااخذتي رأيي كبل ما تقرري هالشي
ليش ما حسبتيلي حساب
- بعافيتك ماكو نقاش بس تنفيذ
- يولي مافكرتي شلون تعيشين هالشكل

انا جربت العمى وعرفت ظلايمو
- ماانعميت اني بعدني اشوف وهاي دااشوفك زين ماتغير عندي شي
لتنسى عيني الثانيه مابيهه شي واشوف بيهه
- ماايرضيني هالشي يولي ماايرضيني
تعبك وتضحيتك ليش تخليني ضعيف هالشكل كدامك تخليني مربط الايدين
كدام عافيتك يولي انا للحين اخاف عليكي تتعبي ويأثر على كليتك تجين تكمليها بهاذي !!! انتي تريدين مووتي !!
- لااا اسم الله
- عجل ماتفكرين انا شلون ارضاهه على نفسي تضحيتك هاذي !شلون ارضى تعبك مقابل عافيتي ! انا من ايمتى افكر بنفسي ازيد منك !!!
- خالد حبيبي
- ماااضل من خالد شي يولي حركتيه انتي الحين خليتيني رمااااد

رفعت نفسي شويه وقربت وجهي على وجهه وضليت اتلمس خده وهو يكولي...

- يولي خجلان من نفسي وخجلان من كل اهلي ماكدر افتحهه لعيني وادحك بيهه
وانا اعرف انك ماادحكين ماكدر ابني عافيتي على عافيتك يولي ليييش خليتيني هالشكل لييييش !!!

- مو تذكر اني كلتلك قبل العمليه احبك اكثر من روحي مو كلتلك لا تنسى هالشي
ليش بعد جاي تسألني ليش سويتي هيج
هاي اني مجاوبتك من قبل ماتسأل

- ول حبك هذا دمرك وش بقى منك
هذا مو حب هذا انتقام بلاء هذا موت على البطيء لاتحبيني هالشكل يولي تذبحيني

- ماكدر مااحبك هيج مو بيدي روحي مستميته الك .. هسه لو اني صارلي هالحادث ماجنت راح تتصرف مثل ماتصرفت الله عليك

- انا واجب عليه احميكي واداري عافيتك

- واني هم عليه نفس الواجب .. خالد
صدكني مرتاحه وفرحانه والله لانك رحعت تشوف وخلصت من وجع عينك
بعد مااشوفك كدامي تتلوه من وجعها والهم كاتلك هاي اكبر فرحه بعمري

- تينه وانتي شلون !!! انا رجعت ادحك وانتي شلون بحالك !!

- اني عندي انته .. اضل ادلل عليك واذا احتاجيت لهالعين اشوف بيها منك
انته صيرلي كل شي احتاجه

- اصيرلك العين واصيرلك حتى الروح لو تحتاجيها بس كلبي ما تطفى نارو
يولي انا احبك متعافيه حدري ماريد حبي ووجودي معك ياخذ عافيتك ايمتى تفهمين هالشي ايممممتى!!!

- والله متعافيه ومرتاحه وعايشه ملكه وياك لتضل تفكر هيج تره والله مرتاحه
خالد ياروحي افهمني اني من سويت هالشي لانك تستاهل اضحيلك انته مو شخص عادي انته حبيبي وكلشي بدنيتي
تعرفني روحي بيك ووكعتك هاي ماخلت بيه حيل ردتك ترجع لعافيتك وترجع للمشيخه بزود وهيبه وماتحتاج لاحد
انته عندك شغلك والعائله كلها مستنده عليك والعشيره تنتظرك .. بيوتنا بعدهه بحاجتك ترجعها النه .. انته عندك هواي شغلات محتاجه وكفتك وحيلك اني شعندي ! كلشي ماعندي غيرك انته وولدي ولو شفتكم بخير اني اصير بخير
وبعدين اني احب اضل ادلل عليك ترفض دلالي يعني !؟

- يول ارفضو ! انا ارفضو !! انا طوع امرك كلشي املكو هو حدر رجلك ول انتي تدللي عليه كل ثانيه بعمرك بالحرام لغيرك مايحلى الدلال ولاااا بعمري ادلل حد مثلك بس انتي تدللي وتدلعي وامري كثر مايعجبك

حضني وضل يبوس وجهي واني اضحك كلتله ..
- هسه ماراح تجاوبني شكد ؟
- ولييييييه ول هو ينحسب انا لو افني عمري بحسابو مايخلص
- هههه يلا المهم عرفت انه هواااي
-عارفو من زمان يا يابه .. تين مشتاكلك
والله كلبي مليااان شوك كأني مفاركك من سنين
- يارووحي يمك اني
-اريدك اكرب بينه فواصل شيليها
- ههههههههه خالد هستونه راجعين من مستشفى وكتها يعني ؟!
- ول بس حضن مايروح بالك بعيد
- هههه زين خلي اسبح
- تكدرين وحدك يعني
-اي اكدر ما بيه شي لا تخاف
-لااا امشي نسبح سوه
- عيب هنا الولد استحي
- زين انتي بس تغسلين جسمك ؟
- اي
- اييه عجل انا بعد اريد اغسل جسمي امشي يلا ما ينتبهون علينه عادي امشي

لزم ايدي وطلعنه جان وحده جراح كاعد بالهول وباوعلنه وضل رافع حواجبه
مافهم شبي هالولد عينه علينه دائماً ؟!

دخلنه الحمام هو نزع نظارته كلتله ..
- شنو تشوف هسه احجيلي فهمني
- اليسرى ادحك بيهه بفضل الله وفضلك
نظري واضح وضوح الشمس
- الحمدلله
- واليمنى ادحك زين بس وجع الخياط من تحت هالجفن تأذيني اذا فتحتها بس نظري زين الحمدلله

حضنته من فرحتي بهالخبر اخيراً رجعله نظره ورجعت عافيته ..

سألني وهو يشيل النظاره من عيني ..
- توجعك هالعين
- شويه تحركني لا تخلي بالك يمها
انساهه
- وش انسى وانا بيها ادحك

ابتسمتله وانداريت انزع ملابسي وهو جان واكف يباوعلي كلتله ..
- شنو غيرت رايك ما تسبح؟
- لاا بس حبيت ادحك طولك مشتاكلو

ابتسمت وصرت افتح قميصه وهو يتلمس ظهري كالي ..
- تين اليوم تضلين بس نايمه حدري ماتتحركين ولا تسوين شي زيين
-زين تُأمر

ماخلاني اغسله جسمه هو غسل وغسلي جسمي ويكولي بس ضلي رافعه شعرج
وراهه طلعنه ورجعنه للغرفه هو قفل الباب وراح نزع ملابسه وتمدد و اني هم رحت تمددت يمه .. حضني وضل يباوع لعيني ويتلمسهه وبعدين باسهه وكالي..
- كل عمري مديونلك اضل يالي بدونك ماايضلي عمر
- هسه رجع العمر حلو بعافيتك وراحتك
- حبيبتي نامي متطمنه حدر شيخك مثل ماعهدتيه يضل يحاميلك وشايلك بكفوف الراحه

خليت راسي بركبته واشتميته براحه هالمره بعد طول هالتعب .. صدك جنت محتاجه لهاي النومه بحضنه وهالامان
هسه خلصت من الهم ووفيت بوعدي
انام نومه خاليه البال ومرتاحه ..

ضلينه اسبوعين هنا حتى افتح الخيط من العين وطول هالفتره هو مايشيل عينه مني ... اذا نكعد سوه هو يعوف الكل ويصفن عليه من اسأله شبيك يكولي معليج شي بالي ..

نزلنه للسوك اخذنا غراض للاهل
اني والشيخ نمشي سوه والشي الي نريده نكول لرماح يشتريه ويجيبه ورانه ..

شفت احذيه حلوه رياضيه اختاريت منهن ٢ لحسين والشيخ هم اختار منهن لبقيه الولد ومابقينه واحد مااشتريناله شي ..

بيوم الي شلت الخيط من عيني هو الي جان لازم الكلينس ويمسح دموعي من كملت وضل يتلمس خدي ويباوع لعيني وكالي ...
- لو اصيرلك خادم لعمرين من عمرك هم ما اوفي حك هالعين
- لااا ياعيني انته تاج راسي بس اشوفك ترجع بحيلك وعافيتك توفي حقها وزياده
- مادامك معي انا بكل حيلي وعافيتي

جان اذا نمشي يلزم ايدي كدام الولد بدون يحسبلهم حساب .. يضحك وياي ويعدل شالي اذا وكفنا بمكان وايدي ما يهدهه
مااسبح وحدي الا هو وياي يكولي اي شي تريدنه كوليلي وانطيه الج ...

من صار وكت رجعتنا طلبت منه يلبس
لبس المشيخه الي جبته وياي خصوصي لهاليوم ... لبسه وهو يبتسم واني عدلتله اليشمغ مثل ماتعودت كل هالسنين
و وكت الي طلعنه وشافوه الولد كبل اجوي حضنوه وبوسو ايده وراسه وجراح كل شويه ويكولي مشكوره عمتي
شوكت مايشوفني ويه الشيخ ويشوفه زين يكولي مشكوره عمتي ..

اول ما نزلنه بمطار بغداد جان مصطفى ينتظرنا هناك واخذنه اني والشيخ بسيارته والولد رجعو بتكسي ورانه ...

من وصلنه للبيت ونزلنه جانت الباب مفتوحه وعباس وحسين والشيخه واكفين يم الذبيحه ..
اول ما تلكاني حسين مصدوم وقبل مايحضني جر المناظر من عيني وكالي ..
- خير يمه خير ليش لابستهه
- بعدين ابني
- دحكيلي ليش مغمضه

دنكت راسي وبقيت مغمضه والشيخ عافهم واجاني حاوطني بيده ولبسني المناظر واخذني يم الذبيحه الشيخه جانت تهلهل وعباس يذبح جوه رجلينه ...
دخلنه البيت وغاليه وام جراح واكفات متحضرات وبيدهن الجكليت وصارن يطشن علينه منه ..
حضنت بنيتي وهي فرحانه وتضحك
وتتحمدلنه بالسلامه بعدين من داسلم على ام جراح وردت السلام كبل جرت المناظر من عيني وكالتي ...
- بالحرام كلبي علمني من اول ما دحكتك

ابتسمت واني مدنكه وغاليه اجتي دارت وجهي عليهه وشهكت ولطمت على صدرهه كالتلي ...
- يمممه عينك ليه هالشكل بيضه !!!

جراح جاوبهه بدالي وكاللهه...
- عافيه ابونا من عافيه امك ياغاليه
- يممممه لييييه هالشكل سويتي ليش ماحكيتيلي مو كل ساعه انا اتصل ما قلتولي على الي صار بامي جراااح تضمهه عليه !!
- ما رضيتلها والله بس هي ماترضى احد يحكي بهالسيره الكم عداها

جانت تباوعلي وعينها مدمعه واني عفتهم ورحت نزعت شالي وكعدت .. اجاني حسين يركض ولزم وجهي وضل يباوع لعيني وهو يكولي ...
- يمه من كل عقلك !!! يمممه ليييش تاذين نفسك هالكثر لييش !!
- شكد طايحين حظ انتو الاثنين
هو هيج الحجي تلوموني وتعاتبون ليش يعني اريد افتهم !!! جاوبوني ليش !
- يممه شنو ليييش هاي عين عيين شلون تعيشين هالشكل يااامي فهميني
- لعد ماتفكر هيج بأبوك ماتكول شلون يعيش وهو شيخ وجبير العايله جاي عليه اني الي ماعندي لا شغله ولا عمله
-استغفر الله امي انا مااكرهو لابوي بس ماقلتو مقدمين على حجز بالتبرع ليش انتي تسرعتي !!
- ابني عوف هالحجي الصار صار بعد
روح جيبلي مي ريكي ناشف بعدني توني طبيت واستلمتوني بهالهوسه ماتكولون امي راجعه من سفر تعبانه خلي ترتاح

دنكت عليه غاليه وبوست راسي وراحت جابتلي مي وحسين واكف كدامي وبس يتأفف ويفرك بوجهه ..

دخل الشيخ هو وبقيه ولده وكعد يمي
والولد كلهم كعدو كدامنه ويباوعوله
اجتني الشيخه ولزمت وجهي وتباوعلي وهي تبجي كالتلي..
- يايمه بأي جزى اجازيكي من يوم الي دخلتي بيتي وانتي رفعه راس وفعايلك ماتتجازى لا بالغالي ولا بالنفيس من يوم يومك عينك وكلبك على ولدي كأنو ولدك انتي ماخليتيه يحتاج حتى لامو وهي حدرو ... ريت ربي يجزيكي الجنه من كل ابوابها ويبرد كلبك مثل مابردتي كلبي
من يوم ما عرفتك لليوم

وكفت حضنتها وبوستهه كلتلهه ..
-اني وعدتج واستحيت ارجع وتعاتبيني
- والنعم والله والنعم ربي يرحم ذاك الاب الطيب

ربتت على جتفي وكعدنه اني وياهه يم الشيخ والتهينه بالسوالف ويه الولد وام جراح وغاليه يحضرون الاكل ..

بين ما اكلنه وشربنه الجاي ورحت اني فوك اتمددت جان تجيني غاليه سدت الباب وكعدت يمي كالتلي ..
- يمه عسى ما تعبانه ؟
- لا زينه الحمدلله
- زين يمه عندي سالفه ضامتهه عنك من اسبوع
- خير ان شاء الله احجي بنتي
- من هذاك الاسبوع ولد دخلي على الانستكرام وراسلني يمه يدز يدز بهالرسايل وانا والله ما جاوبتو بس ادحكهن واطلع
- جان انطيتي لاخوتج يحاجوه

- موو هو انا من فضولي وغبائي دخلت على حسابو وصرت ادحك منشوراتو وبالغلط انعجبت بواحد منهم وخفت احكي لاخوتي ويحذفون حسابي
- اووف اووف بنتي غير تنتبهين هسه خليتيه يجلب بعد
- يمه مادري ماحسيتو واحد مهتلف وماعندو سالفه دحكي هالرسايل وانتي احكمي بعد دوخني بسالفتو
.

.

يتبع

#شقراء_بغداد

الجزء_الثاني_بارت_١٢


- يمه مادري ماحسيتو واحد مهتلف وماعندو سالفه دحكي هالرسايل وانتي احكمي بعد دوخني بسالفتو

اخذت التلفون منهه وصرت اقرا الرسايل
جان مكتوب ..
- السلام عليكم
ردي بلا زحمه طالبج بموضوع
رجاءاً ردي بس كلمتين نحجي
ليش بس تشوفين ومتردين حاجيني دافهمج شكو جاي اراسلج
يمعوده
دخيلج جاوبي هنه كلمتين
اذا انته الي دتقرا رسايلي اخوهه ابوهه امهه جاوبني يمعود شلون يعني تريدون اتوسل بيكم يا الشيوخ !!

باوعتلهه وهي كالت ..
- يمه مادري شسالفتو شعندو هالكثر يلح على المراسله
- هو مراسلج قبل ماتدخلين على حسابه لو وراهه؟
- لاا من كبل ماادخل حسابو عجل انا كيف عرفتو لحسابو هو من راسلني

رجعت باوعت للمحادثه وقريت باقي رسايله ..
- كلبي حاسني انتي الي دتقرين رسايلي مو اخوتج جاوبيني يابنت الناس والله حجايتي وياج كد كلمتين مو اكثر

حتى اذا انطيتي تلفون لاحد من اهلج خلي يحاجيني اتشرف بحجيي وياهم وادورهم دواره

اضل انتظرج تردين بأي وكت راسليني
وافهمج

كلتلهه ..
- شو عبالك يعرفنا هالولد
- اييه والله مو قلتلك مو خالي وراه سالفه
- شو تعالي دزيله انته منو خلي اشوفهه شيكول شيريد
-يمه اخاف اخوتي مايرضون
- خلي نفتهم منه هسه اخوتج يهدون عليه غير بس يدرون بي يعرفج ويعرف اهلج
يسحلونه من بيته ..خلي اني اتفاهم وياه ونسد السالفه على خير
- ماشي
-الزمي واكتبيله انته منو
- هاي ارسلتها

ضلينه ننتظر ونباوع للمحادثه وهو ماتاخر دقيقتين وجاوب كاتب ...
- الي ديراسلني منو ؟ احد من الاهل لو البنيه
- اكتبيله اني امها واريد افهم شعرفك ببنتي
-ماشي
- راح اتمدد وانتي احجيلي شيكول زين
-اييه .. يمه هذا جاوب كاتب ..
اني اسامه ايهاب من اهالي السيديه
خريج هندسه كهرباء و خريج اكاديمية الطيران الملكيه الاردنيه اختصاصي الطيران التجاري شغلي حالياً طيار بالخطوط الجويه العراقيه
شفتهه لبنتكم من قبل كم سنه بكليتها
اذا تسأليها عني اكيد تذكرني اني الي تعارك خالها وياي

يممه هذا ذات نفسو الي تمشكلت معو !!!
- وهذا شذكره بيج هسه ؟ اكتبيله
الله يوفقك ويحفظك لاهلك وبعدين اكتبيله
شذكرك ببنتي هسه
- هاي كتبتلو .. يمه تدرين انا دحكتلو كم صوره بحسابو بس ماعرفتو والله
- حلو لا ؟
-ههههه ايييه حليوه بس اخوتي احلى
- شلون يعني ازوجج الا واحد مثل اخوتج
- لااه حسب مزاجي يمه .. رسل يمه
-اي شنو يكول
- اني رايد بنتكم على سنه الله ورسوله
ومن هذيج السنه وره تخرجهم اني جنت ادور عنوانكم وماكو واحد يشفي الكلب ويدليني عليه بس كالولي بالانبار وبعدين
كدرت اوصل لبيت خوالهه وطلبت العنوان وهم ماقبلو ينطوني وبعد تعب حصلت حسابهه واجيت بس اريد اكوللهه رايد اخطبج بس انطيني عنوانكم وتمنيت واحد من الاهل يحاجيني حتى نتفاهم اكثر
ام غاليه بس عنوانكم ونهايه الاسبوع اجيب الاهل واجيكم

رجعت كعدت وباوعت لغاليه فاتحه عيونها وتباوع للتلفون وبعدين شمرته بحضني وكالت ...
- يمه اخوتي يذبحوني والله لو عرفو
-كولي يالله بنتي شجاج خلي اني اراسله بس اسألج شي جاوبي بصراحه لتستحين
- اييه
- ما بالج الزواج ؟ يعني العمر يمشي يا بنتي ما فكرتي بالزواج ابد
- اييه يمه فكرت بس احس بعد وكت عليه
-هههه شكد عمرج ست غاليه
- ٢٥ يمه بعد بعد مو وكتو
- اي زين لعد راح ارفضه من هسه حتى لا يجي ولا يتعب نفسه ويحرج اهله ويانه
- اييه كيفك يمه سوي الي يعجبك
- بنتي مو شغله يعجبني انتي اذا عاجبج
الولد ومواصفاته كولي لا تستحين حبيبتي
تريدين ننطي فرصه ويجي يتقدم رسمي ونشوف اهله ونقرر لو تريدين من هسه نلغي كلشي ! فكري هسه وكليلي حتى اجاوبه

ضلت تهز برجلهه واطكطك باصابعهه
وبعدين كالتلي ..
- لا يمه ما بنفسي الزواج الحين ارفضيه من الحين ووصيه لا يراسل بعد ولا يندك باحد من اخوتي خليه يسد السالفه
- ماشي بس شنو السبب تكدرين تفهميني
- يمه احكيها الك هيك عدله انا اخاف اتزوج واترك اهلي ايييه لا تضحكين عليه انا مااعرف اعيش بعيد عن اخوتي
ارفضيه ارفضيه
- شوفي بنتي هاي العمر كله اني ماحجيت وياج بطاري الزواج عايفتج على هواج واضل عايفتج على هواج لاخر يوم بعمري انتي بينه اميره مدللـه
مايغيرج العمر وهذا هسه احاجيه وانسد هالسالفه
- يا بعد عمررري ياامي الله لا يحرمني منك

بوستني وضلت حاضنتني واني اكتب للولد ...
- اقدر اهتمامك وحرصك على الوصول النه بعد كل هالتعب وتعاملك بهالاخلاق الحلوه .. بس بنتي ما تريد الزواج رافضته لأسبابها الخاصه واني مااجبر بنتي على شي
ان شاء الله نصيبك يكون الاحسن

دااكتبله الرساله الثانيه وهو كتب ..
- براحتهه بس كوليلهه اني واهلي اتمنيناهه يمنه طول هالسنين

باوعتلهه وهي تكولي ..
- عشتو اهلو وشعرفهم بيه اهلو !! دحك هالكذااب هذاا خلصينه منو امي يلا

كتبتله ...
- كل شي بالنصيب رجاءاً ابني هالموضوع ينسد بعد ولا تراسل

اخوتهه ان عرفو بعد الموضوع ينعاد ما يسكتون وخلينه متجنبين المشاكل وربي يرزقك بالبنت الي تسعدك واطيب خاطرك
- تمام
ما اراسلهه بعد والموضوع انسد
مع السلامه

انطيتهه التلفون وكلتلهه ..
- امسحي المحادثه لا تنسين
- ماشي
- وهالموضوع عوفيه بيني وبينج ماتسوى ندخل اخوتج بي سالفه انسدت بعد
- ايييه احسن
- يلا راح انام انتي ضلي يم ابوج خاف يريد شي عينج عليه

بوستني وطلعت ... نمت وكعدني حسين
بالليل تعشينا وضلينه كاعدين اني وغاليه وحسين و حر وآسر وصكر ملتمين بغرفه الشيخه وام جراح والشيخه بالمطبخ والشيخ وجراح ورماح وعباس بالهول ويه الخطار ...

حسين سألني ..
- يمه شلون ادحكين الحين ؟
- اباوع بس جهه وحده
- يعني هسه الي على يسارك ماادحكيه بهالعين
- لا الا اندار عليه يلا
- زين ماتنزعين المناظر ماتضايكك كل اليوم لابستهه
- لا خليهه احسن
- يمه انزعيها ودحكي براحتك
-عوفهه ابني مرتاحه هيج
صكر- عمه تستحين منا يعني ؟
- لا ابني بس مو الكل يتقبل شوفتهه هيج
- عجل عمه مادامك تعرفين اثر هالعمليه صعب ليش تعجلتي بيهه !
حسين- امي جوابها واحد ماتكدر ادحك ابوي تعبان
غاليه - من كثر حبها لابوي ماتتحمل مرضو وتضحيلو
حر- هسه انتو حكيتو بدالهه والسؤال الهه
عمه انتي فهمينا
غاليه - يمه مو صح الي حكيتو !
- كل حجيكم صح بس لو انتو عايشين ويه الشيخ نفس الي اني عشته وياه جان خجلتو من نفسكم على هالسؤال
غاليه- ايييه يمه نعرف ان ابوي مدللك زياده مو غايب عن عينا هالشي
- مو شغله دلال ليش قابل هو ما مدللكم مثلي لو مزيد عليه شي ومنقصه عليكم !
بس العشره يابنتي عشرتنا طيبه الشيخ من يوم الي عرفته هو كرمه مغطيني
و وكفاته ماتتجازى لا بالعين ولا بالروح
يوم الي عرفت الشيخ جنت بطرك ثوبي وجان كل شبر بحياتي اظلم وهو وكف وياي وساعدني خلاني اعيش من جديد واغناني بكل امتنان لوجودي وياه
الي عشته من طيب ويه هالعائله يخليني استحي لو قصرت بحقهم وبالاخص الشيخ روحي ترخصله بس كون هو بخير
هالشي مو بس محبه بي وانما رد دين وحق وكفاته وشهامته وياي من يوم الي تسالمنا بي لليوم
غاليه - يمه يعني ابوي وكفاتو معك وتضحيتو اكثر منك !!
- اي اكثر
حسين - يمه انتي شلون عرفتي ابوي ؟
- هههه سالفه طويله
صكر - عمه انا سامع ان والدك وابوي بينهم معرفه قديمه صح هالشي ؟
- اي هيج شي
غاليه - يمه انا دايماً اسألك عمتي ام جراح شلون رضت بزواجكم وماتحكيلي امانه هالمره فهميني امانه يمه
-ههههه ولج كم مره اكولج توبي من هالسؤال
- يمه ماكدر والله تاكل براسي هالاسئله
حر - اييييه بالله عمه احكيلنا انا عندي كم شغله بالي اريد اوزنها بعد هالجواب
احكي لا تستحين منا احنا ولدك عادي
- هي صارت فجأه السالفه والكل قبلت
غاليه - مو حك هذا يمه وشفهمنا الحين
احكي تفاصيل
- ولج انتي اسكتي عاد
حسين - يمه كلنا نريد نعرف هالشي مو بس غاليه كلنا بالنه اسئله نريد نوزنها على هالجواب
- شجاكم عليه اليوم
غاليه - بعد كعدنا والتمينه هاللمه ولزوم تحكيلنه يلا يمه لا تخربين كعدتنا يلا
- هههه يعني شحجيلكم
- كلشي شلون صار موضوع زواج
وشلون تفاهمتو انتي وعمتي من ذاك اليوم لليوم كلشي احكيلنا
- كلتلكم هو الزواج صار بسرعه بسرعه
بحيث خطوبتنه مطولت اسبوع يمكن ماذكر بالضبط بس هو هيج كم يوم
- اييييه شلون بدا موضوع الزواج شلون انفتح طاريو هيك احكيلنا
- الشيخ حاجاني من قبل واني رفضت وسدينا السالفه ماجانت بالي فكره الزواج وهواي جنه نتعارك اني وام جراح فكلت مازيد المشاكل وبعدين فجأه من بعد فتره رجع الشيخ فتح الموضوع ولاسباب خااااصه قبلت سمعتي خاصه لا ترجعين تسالين شنو تره ابطل وكلشي مااحجي
- هههههه لااا يلا مااسال كملي
- اي وبوكتهه ام جراح والشيخ جانو متعاركين فصارت الخطوبه وهي ماحضرت بصباحيه العرس اجتي وحجينه اني وياهه تفاهمنا ودائماً بينه الكلمه الطيبه وماوحده غثت الثانيه كلمن تعرف حدودها
غاليه - يعني عمتي كانت تدري بالخطوبه وراضيه ؟
- اي على الاغلب تدري وماحجت شي
- زين يمه شنو عمتي وابوي ليه تكاونو
- والله لحد هاليوم اني ماعرف شنو صار بس هي مشاكل زوجيه شكو تدخلين انتي وتنبشين بهالسوالف جوزي عاد
- اييييييه يمه حسره ماسألت شي تسكتيني
- اسألي عدل واجاوبج
- زين عجل جاوبيني الحين ايمتى حبيتي ابوي كبل الزواج لو بعدو ؟
- ههههه شلون بيج
- مابي شي هالسؤال لا تسكتيني بعد
- وره الزواج
- هاا عجل وكبلو ماكو شي من هين او هين
-لاااا ماكو شي ولتضلين تلحين بهالسالفه متستحين انتي اخوتج كاعدين
- وشحكينا ياامي اخوتي كلهم يعرفون هالشي مو جديد عليهم
حسين - يمه بغلاتي عندك جاوبيني هالمره
- شنو ياروحي اسأل
- ابوي شلون تعلق فيكي هالكثر من كبل الزواج !
- لان صرنا اصدقاء
- وضحيلي اكثر بعد

- احنه بالبدايه علاقتنه صداقه يعني جان بير اسراري احجيله كل شي عندي وينصحني ويساعدني ومابيوم طلع سالفه حجيناهه ابد واني هم جنت اسمع منه اسراره و كل شي جان بحدود واجتي فتره اشتغلنه سوه اني اعرف بالمحاسبه وساعدته بكم شغله بالمعمل وهيج مشت الامور اوكفله بشغله يوكفلي بعشر امثالهه صرنا نعم الاصدقاء ولليوم بعدهه روح الصداقه بينه موجوده
- هااااا عجل لهالسبب انتي تعرفين كل شي عنو بدون مايحكي
- الصداقه تكشف الشخصيه اكثر من اي علاقه ثانيه .. الي يضمن روح الصداقه بزواجه ينجح لان يكدر يتقبل ويستمع من الثاني بدون حزازيه وانفعال اخذوهه نصيحه لمستقبلكم وعلاقاتكم ولدي
خلي عدكم روح الصداقه ويه شريك حياتكم حتى تكدرون تحتوه
اذا هو زعل منك او مهموم من اشياء وانته مو مقرب منه لدرجه الاحتواء راح يدور غيرك حتى يستمعله ويصير هذاك اقرب منك حتى لو جنت انته الحبيب او الزوج يصير الصديق اقرب منك لان يستمع وينصح ما يزعل ويتذمر
هيج تنجحون بعلاقاتكم ميه بالميه

كلهم جانو يصغون اليه باهتمام وبعدين كلمن صفن وحده كأنهم ينسجون الاحلام لهالحظه بأثناء ارتباطهم ..

كسرت صفنتهم وافكارهم البعيده بسؤالي لحسين ..
- هاا ابني شصار بدوامك
- بعدني امتحن شهر الثاني
- شكد بقى لنص السنه
- اسبوعين بس يمه عندي العربي ماافهمو وكاضيه من هين وهين
- هااا حسين من بالسادس تغش ! عفيه عفيه هيج معلمتك اني
- يمه والله مافهمو هالقواعد ماتدخل بعقلي حفظتو للادب درختو الا هذا مايدخل هييييين مافهمو
- ماكلت لاختك ادرسك
- انااا ادرسني هاذي ام شبر ونص !
- اكبر منك ولك احترم
- تضل بعيني اصغرنا مابيوم دحكتها ثاني اكبر اخوتي
غاليه - لاتنسى نفسك يالاخو
- وش دخلك انتي انا احكي ويه امي انتي الا تخلي خشمك بالنص
- عشتو ميته عليك انا وعلى سالفتك
اروح ادحك اخوووي الكبير جراح اخاف بنفسو شي
- خفةً وراحه .. اييه يمه نرجع للعربي
- هههه اوووف يربي اووف شبي بعد
- ادرسيني انتي لنص السنه
- انطيني هاليومين ارتاح وادرسك
بعد شعندك مواد صعبه
- مضبط الانكليزي والفيزياء والرياضيات بس الاحياء هيين هم اتيه بسالفتو يمه سبعطش الف مليون خليه ووظيفه لازم احفظها مدري منين يطلعو
- ههههه ابني سهله ارتبها الك وتحفظها ان شاء الله انته ذكي مينخاف عليك
- اييه عجل ابنك انا يالحبيبه
- بس ابني الذكي هم لازم يلزمله كتاب ويراجع شو اليوم كله ماشفتك تقرا
-يمه انتي نايمه ايمتى تدرين بيه اقرا لا
- اعرفك لو كاعد وقاري ومتعب نفسك شويه جان طفيت وعيونك قفلت ورحت نمت ماتكعد ادور سوالف تالي الليل
- هههههههههه والله ماينكدرلك حافظتني حفظ
- لعد ابني لو ابن الجيران انته دكوم اقرا يلا راجعلك شي ماعندك امتحان باجر
-عندي كيمياء
- ومكابلني وكاعد دكوم ولك كوم اقرا
باجر شتكتبلهم
- اكتب يمه انا امتحن على فهمي لتخافين كلشي مخزن هين بهالدماغ صوره وصوت للاستاذ مخزنهن
- حسسسييين
- امني يمه الك الصافي بس ضلت بالي شغله ماحكيتها
- شنو
- بنتك هاذي الحاسبه نفسها الابله نوره علينه ماتفهم بالطبخ شي بالحرام بالحرام بيضتهه يابسه ماتنوكل حتى تمن عدس ماتعرف تسوي بالحرام الجاي من ايدها خفيف لو محروك مالو حل وسط ومنشفه بطني بالنواشف مالها تالي الليل تكضيها علي جبن ومربى وجاي بارد تتعاجز تحميه لو طماطه بعدها مالايحه الدهن وشامتو امي دبريلهه حل لا تخليهه هالشكل بالحرام كطعت نفسي من الاكل من وره ثولها هذا بطولي وماتعرف تسويلهه ماعون حلى حتى هالكاستر ابو الهيل تكلبو عجين اصفر ملكلك ومسفطه الهيلات بالوجه عليه على اساس ذواقه وترتيب وشغلات تفيك براسي عود انا اثول جاهل كدامهه اتقشمر بيهن واسكت

ضحكت من كل كلبي على حجيه وهو مستمر يحجي عليهه ..
- ذاك اليوم واكفه ومسويه حظر على المطبخ محد يدخلو بالليل والله شنو كاعده اركز باكله من الانستا وساعه تجر ساعه لحين مادكت ال ١٢ تالي اجيتهه ها يولو طكنا الجوع وينها اكلتك تحكيلي والله طلعت مخربطه وحاطه طحين التمن بدل طحين الصفر وانتظرت العجين يختمر وينفش ومانفش اثاريه طحين تمن من هذا الي تسيحو جدتي
انا كفشتها يمه ماضمها عنك سحلتها من شعرها على ثولها والله بطت كلبي مرارتي فجرتها انا كلشي عندي ولا الاكل وهي تعوف البيت بكبرو وتنبص روحها هين تتفيك وتطلع ندارتها
- ههههههههه ولك ابني علكيفك وياهه لعد شلون تتعلم هي لازم تغلط مره مرتين تكوم تعرف تطبخ
- ماتتعلم لو تنزللها الملايكه تعلمها هم تجفصلها بسالفه هاذي نفع خياطه وكصاكيص وصل لاادخلوها المطبخ تجرم بحكنا والله تيبس بطونا
- ههههههههه اذا هيج عوفها لتوصيها على اكل انته سوي لنفسك
- عايفها بالحرام مااقلتلها رايد اكل بيوم

لو اكل وارجع البيت لو افكر ارتاح شويه واكوم اطكطكلي شغلتين بس هي ماتعرف تكعد حسين رجع بعد خلي اسم بطنو باكلي الطيب وتروح للمطبخ اطكطك وتصيحلي راح اسويلك اكل مو تنام حسوني انا بالعجل الف راسي بالغطى وين انطي وجهي منها يمه هين فوك راسي تكف وتنك
زوجيها خلصينه ياامي خلصينه
- ماازوجك انته شكو مزوجتهه انته جيبلنه جنه معدله تعرف تطبخ ونشبع اكل من ايدها
- والله لو لاكي هالمعدله مانام الليل لو ماحدرها بس ااخ على الوكت خلاني بالمدرسه للحين محد ادحك بوجهي
- هههههههههههه ليش وين اكو مثل حلاتك يمه
- اصبريلي سنه الاخرى اصيدلك مره معدله تعرف تطبخ وشرط اشرطو عليها كل فتره خطوبتنا كل جمعه الكاهه محضرتلي سفره معدله هيك مال شبع
وبالزواج ماتكضب البيض ولا الجبن لان لعبت نفسي منو هالاخت المعدله اريد كون اكعد فد يوم اقللها .. الله من زمان مااكلت بيض حتى ناسي طعمو ماتسويلنه اليوم نتذكرو .. هيك اريد كون انساه مااذكر حتى ريحتو
- يمه وليدي يمه بطونه متضرره صار محد يدللها
- والله بس انتي شبعتيها دلال
- هسه بعد ان شاء الله ارجع ادللها اشبعها اكلات وحلويات
- كثري حلى يمه هاي بنتك خلتني اتحسر حتى على الكاستر الي يوزعوه بالثواب كل خميس من الجيران
-هههههه تدلل حبيبي تدلل باجر اسويلك اطيب كيكه بالكريمه البيضه مثل ماتحبها
- والفواكه عليها يمه لاتنسين
- اي اكيد لعد اعوفها فارغه !
- ايييه الحين انتعشت وردتلي روحي
اكوم ادحك الكيمياء شلونهه

راح بسرعه جاب كتابه وقلم واجه كعد يمي وضل يكلب ويقرا عبالك مجله
كلتله ..
- ابني دقرا عدل مو فتيت كلبي
- تااقرا شبيه
- الزملك ورقه اكتب بيهه شي
- تاكتب بعقلي يمه لا تقاطعيني انا هيك جوي افهم واعبر
- داشوف درجاتك يااينشتاين

ابتسم ورجع يقرا واني رحت كعدت يم الشيخه شويه سولفنه وكالت باجر يجون مناسك وصفيه وعوائلهم ودتفكر شنحضر غدا لباجر ..

من طلعو الخطار اجانه الشيخ للمطبخ
سلم وصاحني حتى اروح وياه ..
رحت وراه وهو صعد فوك لغرفه غاليه وحسين .. طبيت وسديت الباب وهو نزع شماغه واجه حضني وضل مدنك راسه على جتفي وساكت ...

مشيت ايدي على ظهره وبوست جتفه وهو كالي ..
- يولي شكثر حضنك راحه
- يابعد عمري

رفع راسه وباوعلي ابتسمتله وكالي ..
- ماتنزعين النظارات تينتي
- تعودت عليهه عوفهه
- انا مااحبها عليكي

جرها من عيني واني نزلت عيني بعدتها عن نظره وهو كالي ..
- يولي تخجلين ؟ ول انتي الحين بعيني زايده جمال

ابتسمت بس ماتجرأت احط عيني بعينه بعدني اخجل يشوفني هيج ..
رفع راسي وبوس عيوني اثنينهن وكالي ..
- ول انا ادحك بعينك ماتظني بيوم ادحكك غير اجمل النساء
دحكيلي تين مااشتاكيتي لشيخك ؟
- مايفاركني لحظه
- عجل لا تصدي عينك عني اشبعي شوكك ودحكي براحتك ليه الخجل يولو

ابتسمت ورجعت حضنته وهو فتح القراصه من شعري وضل ينزل بي
ويكولي ..
- هالغرفه من بكرا النه تحضريها وحسين يصير ينام حدر اخوتو بالهول
وغاليه حدر جدتها
- ماشي
- حبيبتي لو تضايكتي من اي شي بالعجل احكيلي
- لا ماكو شي يضايقني ليش تفكر هيج
- بالي هواجس واخاف عليكي منها
- اطمئن حبيبي اطمئن كلشي بخير الحمدلله
- الحمدلله رجع انلم شملنه بالخير والعافيه بس الثمن كان غالي

باوعلي وهو يتلمس خدي وبوس راسي وكالي ..
- لزوم الليله انام عند ام جراح وادحك احوالها صار زمان غافل عنها ووكاد عندها عتاب ليه الحين
- اي صح
- تينتي ياروح روحي اوصيكي وماتخلفي وصيتي .. ممنوع تشتغلي شي بهالبيت
خليكي مرتاحه وبنتك تشتغل بدالك الي تريديه ممنوع الوكفه على طباخ بكل حال من الاحوال حتى بكرا وكت مايحدرو اخياتي انتي ما لك دخل بشي تكعدين وتسكتين وان سمعتك مخالفه هالشي تعرفين زعلي ثكيل ويشلع الكلب
- ههه ما على كلامك نقاش ياعيني صار تأمر
- تسلمين ياعيني انتي ونظرها

بوست خده لاني اعرف انه بيوم الي يروح لام جراح ما يريدني ابوس شفته
ابد ولا هو سواهه مره .. بعمره ماحجاهه الي مباشرة ً بس يعرف شلون يخليني افهمها ...

اخذ ملابسه وطلع واني صرت الف شعري واجتي غاليه كالتلي..
- يمه ابوي هين ينام لو عند عمتي
- لا هناك ينام
- زين عجل ننام سوه اليوم بربك يمه لا تخلي حسين يدري ابوي مو هين
خلي اخذ راحتي بدونو هالليله
- هههههه دسدي الباب واكعدي وهو مايدري
- راح اقفلو حتى لو صعد هين احكيلو شغلات خاصه وينزل مايلطش حدرنا
- شعندج من سالفه فهميني
- يمه عندي سوااالف يمه وحده اثنين هنه
جامعتهن هالكثر
- ام العلوم انتي ينضم عليج شي سولفي يلا
- خلي افرش وانجضع واحكيلك

بدلت دشداشتي وتمددت وهي هم بدلت وطفت الضوا واجتي لفراشهه وصارت تكولي ..
- يمه اول شي لكطت سالفه بعدهه الحين تا تنطبخ
- شنو هالسالفه بله
- عمتي تريد تزوج جراح
- صددك !
- والله هو حكالي كبل ساعه حكالي هالبنيه تصير بنت بنت خاله امو عمرها بالعشرين توها وراسلنلو صورتها حتى يدحكها يمه البنت حليوه بس جراح متكاون مع امو
- لييش !

- يحكيلها عرض عالم هذا انتي ترسلي بصورها بدون علم اهلها مو عيب هالشي
حتى لو ابنك انا والحين ماردت اتزوجها ماتصير شينه بحكها وحك اهلها صوره بنتهم متراسله بينا واحنا مانريدها !!
امو عافت السالفه كلها وركزت لييش ماتريد تتزوجها وهالبنت الخمسين الي احكيلك عليها وماتريدها ؟ من الي بالك ؟
- صدك هو اكو وحده باله رايدهه !
- لاا والله لو اكو انااا من الصبح امشي اشحطها بعباتهه هين وازوجها الو بس هو ما يدحك البنات مااايدحكهمن يمه تصدكين مرات انا اتحرش بي بهالسالفه واحكيلو دحك هين صوره صاحبتي مع اهلها بس هيك يرفع حاجبو ويجمدني بنظرتو ومايدحك بتلفوني حتى
ووكت الي اسألو شسالفتك انته ماعندك احساس ماعندك كلب يرف على بنيه ماتهوى البنات انته شسالفتك !
يحكيلي يولي انا كلبي يهوى الي تستاهلو مايهوى جمال المصنع هذا الي تركضون وراي بيه
- اي عرفته جراح يدور جوهر البنيه
صدكيني بنتي جراح ماياخذ الا شور راسه هسه يجيه يوم ويقنصله فد وحده من نظرتين يجي يكولج هاي اريدهه وصارت بالي
- يوووم السعد يايمه يوووم السعد وين الله ويسمع منك ياام كلب الطيب ويهدي جراح وينعجبلو بوحده ونزوجو
- الله كريم بنتي بعده عمره كدامه ويلكى الي يريدها ان شاء الله
- ان شاء الله .. اسمعي هالسالفه بعد
- اي شنو بعد
- حسن طلع عندو حبيبه
- اااه حسن السكوتي
-ايييه هو سكوتي وحبه سكوتي مثلو
طلع عاشكها من خمس سنين والبنت تدرس وموصلتلو خبر مايفتح طاري الخطبه ويه اهلها لحين ماتتخرج لان خاف يعرفون ويبطلوها وهو صابر عليها من كانت بالسادس والحين سنتها تتخرج
من كليه القانون ولان اهلها هين بغداد كعدو بعد هالاحداث وهو مايعرف بالعنوان هين زين سئل جراح على المنطقه الي كاعدين بيها حتى يجي الحين يخطبها ويتزوجو على العطله
- ربي يسعدهم ان شاء الله تضبط امورهم ويتزوجون بدون شلعان كلب
- ان شاء الله
-وبعد شعندج من سوالف
- صكر ساكن الكهاوي يمه وكاضيهه تدخين انا متأكده بكرا ابوي يكضبو من ريحتو العصر جراح رزلو وحذرو يعاود للتدخين بس مااظنو يقنع ويتركها
- هاي الشباب بنتي هيج فتره يحبون يجربون كل شي
- اييه يمه بعدو صغير على هالسوالف شاربو بعدو ماثخن وجكارتو بيدو
- هسه ابوج خوش يتصرف وياه
- يمه صح على ذكر ابوي
- اي شنو
- بكرا لزوم تتكشخي وتكعدي عروس
- ليش شكو شعدنا
- يمممه ماراح يحدرو عماتنه هين وبناتهم واهلهم لزوم تطلع حرمه الشيخ العزيزه وحبيبتو الاحلى بين الكل وحتى ما يحكو غيرها العمر وصارت ماتهتم بنفسها انا دحكتك من زمان هملتي نفسك مو مثل كبل تسلبين العكل صايره خامله
-هههههههه والله عليج سوالف ولج اني وين وانتي وين قبل جنت بيتي مرتاحه البس واتحمر بكيفي هسه ماكدر كلشي تغير اخوتج كبار استحي حتى انزل شعري كدامهم
- وليييش يمه عجل تحرمين ابوي ولا اخوتي كبرو !
- هسه اليسمعج يكول طالعتله بثوب الخبز لما لبسي مرتب ومعطره دائماً
- ايييه بس بعد بعد اريد ادحكك الملكه بينهم انتي حبيبه الشيخ يمه مو هينه لزوم تضلين تجذبين العين
- هههه الله كريم للصبح يصير خير
- انا كاعدتلك هين والا ارجعك للاحمر والاخضر مثل عمتي شلون ماتنزل مطنطشه وخط كحلتهه لباب الشارع واصل انتي هم هيك امكيجك
- امشي لج تريدين تضحكين العالم عليه
شيكولون صغيرونه وتطنطش وتنزل من الصبح
-عجل عمتي ماتنزل هالشكل ماحكينا عليها شي !!! شمعنى انتي !
- عمتج اصغر مني
- بصلاه محمد عليكي اصغر منك !!!
- اي والله اصغر مني
- يمه انتي كأنك بنتها دحكيها هي تعادلك اربع مرات وانتي هالكدك
- هي بنيتها ضخمه واني ناعمه بس بالعمر اني اكبر منها .. هي مواليد ٧٠ واني ٦٣
- ماااصدددك عمتتتتي ام جراااح مواليد ٧٠
-صوتج فضحتينا
- يمه اقل شي توقعتها ٦٥ كبيره يمه حتى وجهه اكبر من عمرها انتي اصغر تبينين منها والله الي يدحكك كثير عليكي ٧٧
- ههههه ولج اني بال ٧٧ بالمتوسطه
- حييل يمه يعني الحين عمرك ..٥٣ سنه
ماشاء الله
- اي العمر يمشي
-ابوي لحين كم عمرو
-ابوج ٥٤ هو اكبر مني بسنه
- يعني انتي وابوي متساوين بالعمر وحتى بالشكل اثنينكم متراهمين خصوصي الحين ابوي ضعفان مو متراهم ابد ويه عمتي
- اني وابوج بكل شي متراهمين كافي حجي خلينه نام ورانه كعده من الصبح
- ابوي وصاني اشتغل كلشي بدالك
- اي راح اعلمج طبخ بعد
-ايييه يمه تفضلين عليه لو علمتيني اطبخ مثلك واخلص من منكه حسين واتجرأ واقدم شي لجراح ياكلو من يدي
- ههههه اعلمج بنتي سهل الطبخ

غمضت عيني وشويه وكالتلي ..
- يمه تكدرين تنامين الحين وابوي هناك
يعني تعودتي بعد ماتسهري
- ههههه اوووووف منج مايغفل عن عينج شي حتى هاي حافظتهه
-ههههه عجل بيمن اتلهى غيركم
- راح انام نعسانه وهسه ابوج هم نام
- شعرفك نام ؟
- مايسهر هو هناك
-جايز اليوم يسهر صار زمان ماكاعد ويه عمتي وحدهم
-غاااليه نامي كافي ملحه
-ههه نمت نمت

ضليت اتكلب واكول صدك هسه يضل سهران وياهه اليوم وافكر شلون كاعدين وشيصير ميصير وبعدين استغفر ربي واكول هي مرته حالهه من حالي حرام عليه هالتفكير بس يضل عقلي يراوح هنا وهنا لحد ماغفيت ...

ثاني يوم كعدتي صارت على شي مضوجني بخشمي لما باوعت شفته الشيخ كاعد ويفر بخصله من شعري على خشمي .. ضحكت ولزمت ايده وكلتله..
-صباح الخير
-صباحك عافيه ياعيني يلا صحصحي وانزلي نتريك سوه

جر ايدي وكعدني باوعت غاليه نايمه بعدهه رفعت راسي اباوع للساعه هسه يلا بالسته وربع .. ضحكت وكلتله ..
-هم من الفجر
- متاخره عن الفجر انتي اليوم وانا من كبل ساعه كاعد واتاني الوكت يكشف واكعدك
- ياروحي ماتغير عوايدنا يعني
- بالحرام الصباح اذا مو حدرك ابديه مايعجبني ولا اعرف ابديه بدونك
انتي طقوس صباحي ياعيوني

تقربت تلمست وجهه وبوسته و نزلت وياه صبحنه على الشيخه وردت اسوي ريوك هو ماقبل كال اكل كعك وجاي
بين مايكعدون الولد ونلتم على الريوك

صبيت الجاي وكعدنا نغمس كعك السمسم ويه الجاي وناكل ... نزلت ام جراح وباوعتلي رافعه حاجبها وراحت تسبح
رحت كعدت حسين واخوته حتى يرحون للمدرسه وبين ماكامو ولميت الفراش
سمعت الشيخ يصيح لام جراح حتى تجي تسوي ريوك للكل ..

طلعت من الحمام مستعجله وصعدت لغرفتها وهو بعده يصيحلها وتردله اي جايه ...
لحد مانزلت وراحت للمطبخ هو عافهه واجه يمي بالهول واني داعزل والملم السماعات والكلاصات من الكاع
راح هو فتح البرده والباب ويكول ..
- رادلنه بيت اكبر هذا اهجسو يخنك
صغير
- نرجع ان شاء الله لبيوتنا عن قريب
- بعون الله .. اعدي هالاسبوع وامشي لحديثه ادحك احوال الرجال
- وين ياعيني والطريق الخطر
- يدبرها ربك

كالها وطلع بالطرمه يباوع للسمه واني رجعلي الخوف من سيره حديثه والطريق
كل ماذكر رجعتنه منها ينشف دمي ويكزبر جلدي ...

خلت ام جراح السفره للريوك وكعدنا كلنه نتريك واني يم حسين كاعده وانبه عليه
يراجع قبل الامتحان ويركز بالدرس
ومن يحل كبل يرجع للبيت وهو كله اي اي ...

من طلعو للمدرسه يلا نزلت غاليه كبل دزيتهه تغسل مواعين بدال ام جراح
وهي راحت تغسل وتكول ..
-سبع ولد ماشاء الله وماعرفتن تزوجن واحد منهم وتخلن هين نسوان بالبيت ضالين على غاليه كل واحد بطول الباب مايعرف يتزوج ويخلي حرمتو هين تساعدنا

واكفه يمهه اعزل بالمطبخ وياهه وهي بس تغسل وادردم والشيخه طابكه وياهه على الواهس تجيب وتحجي على الولد
وجراح يصيح ..
لو تزينين شعر راسجن ماتزوج حتى انتن تستفادن وتحطن رجل على رجل وتكعدن

كضوهه مناكر واني بالي يم الشيخ وين طلع ؟ تالي وره ساعه رجع ومحمل علاليك فواكه وخضورات وطرشي
وكال جنت اتمشى واتعرف على المنطقه وكلت اتسوك للغدا اليوم ..

غاليه من سمعت طاري الغدا باوعتلي وتحرك بحواجبهه وتضحك واني اخزرهه .. ومن صارت ساعه عشره ونص هي غافلتهم وصعدت فوك وضلت تصيح يمه يمه .. رحتلهه وجان تكولي ..
- هسه انتي مو ابوي مانعك من الشغل
اكعدي هين دللي نفسك ترتبي ساعه الساعه يندك الباب ويحدرو
- يلا دطلعيلي شلبس فضيهه
- يمه حواجبك رادلهه تنظيف
- ايي عود ذكريني اروح اصبغ هالشيب شكد يضوج كل شهر يرجع يطلع
- ما قلتلك مهمله نفسك وخامله مو مثل كبل ماتصدكيني

ضحكت ودفعتهه ووكفت كدام المرايه انظف حواجبي بالملقط وهي طلعتلي
دشداشه لونهه نيلي وشغلها فضي كلتلهه
- رجعيهه طلعي وحده بسيطه
- يمه وشبيهه حلوه
- ملمعه زياده مو مال هيج كعده

طلعتلي بعدين وحده زيتوني وبيهه شغل بس بالحاشيه والردان شويه ذهبي والباقي ساده .. قبلت بيهه ولبستهه وكعدت تكولي احطلج كريم واكللهه لا ضلت تتافف وتكولي شسوينا وشغيرنا ..
عاد خليت بس شويه حمره مشمشي وحطيت منها هنا وهنا على خدي وهي تمسحهن الي ولفيت شالي وضليت كاعده اختارلهه ملابس وجان تعيط وتكولي ..
- يمممممه دحكي جرااااح
- خيررر ولج شبي
- يمه رسلي الحين .. غاليه تطلعين تسلمين خطف على عماتنه وتلزمين مكانك بالمطبخ وما تكابلين حد وتكعدين
يمه سجن هو سجن !!!!
عجل انا بنفسي اكعد ويه بنات عمتي هم مايصير هذااا
- لااا بنتي شكو بيهه هسه هنه عماتج قابل غريبات وميقبل معليج بي
- يهجمها للدنيا فوك راسي لو درى كعدت حدرهن
ماانزل ولا اسلم على احد خليني هين انحبس لحين مااموت ولا ادحك ولا يدحكني بشر
- كومي بنتي معليج بي اني احاجيه شنو قابل كاعده بالشارع هو بيتج وبين اهلج
هم هيج خوف مينراد

ضليت اقنع بيهه لحد مابدلت ونزلت وياي ورحت حجيت للشيخ وهو كال
- حكو واعرفو هالشكل راح يحكيلها
- شيخ البنيه هم تختنك تريدلها وحده بعمرها شابه مثلها تحاجيهه تكعد وياهه
خطيه ضاله كل عمرها وحدهه
- كلنه نفهم هالشي بس انتن الحريم ماتفهمن ان احساسنا احنه الرجال ساعه ما يحكيلنه واحد جاي طلاب على بنتنا او اخيتنا لانو سامع عنها من فلانه وجاي على الوصف وش كثر هالشي يحرك كلوبنا ويشعل النار بصدورنا
من محبتنه وحرصنا عليها مانريدها تنوصف لبشر ..

غاليه عمرها كلو محد يميز خيالها لو مر بينهم وتضل هالشكل ماتتغير
- يعني عمرها كله لا صديقه ولا زواج ولا اي شي
- ماامانع زواجها ولا صديقاتها على التلفون بس بدون مايدحكونها
وزواجها بعد الي ازوجو بنتي كون ما سامع عن وصفها حرف مثل ما زوجت خيتاتي ازوج بنتي بنفس الشكل

سكتت بعد هالحجي مامقبول مني النقاش
اتفهم فكرهم واتفهم حزن بنتي وضيقها من هالشي وضاله بين الاثنين ...

اجتي مناسك بالبدايه هي وعيالهه ورحبنه بيهم وراهه بساعه اجتي صفيه ورجلهه وجهالهه وغاليه على كد ما سلمت على عماتهه يم الدرج وراحت للمطبخ بعد ماطلعت وحتى من انصب الغدا هي صعدت حتى لا وكت يطلعون يغسلون احد يشوفهه لان مكالمات جراح كل شويه
ينبه عليهه تخف ايدهه وتصعد ..

وره الغدا جبت الجاي قدمت للبنات الي صارت كعدتهم بغرفه الشيخه لان الزلم بالهول ..

كعدنا نشرب جاي جان صفيه كالت .
- ما تنزعين المناظر مو عبرت على عمليتك اسابيع
- تعودت عليهه
- لاا اخاف عاجبك تضلين مريضه

ام جراح كالت ..
- خليها احسن لابستهه شويه صعبه بدونها تضل
- ليش عينها شالوهه ؟ شو خلي ادحك شلونها الحين !؟؟
- صفيه عوفيهه خيتي
- خلي ندحكها هسه خايفه منا ! انزعيها يولي خلي ادحك

نزعتها لان ردت اخلص من الملحه هاي
واجتني كلمتها مثل سهم بنص كلبي نبتت
كالت ..
- ياااااه هالحين انتي عوره !!!
.
.
.
يتبع

#الجزء_الثاني_بارت_١٣

✨
🔹🔹

روحي ساعتها اكتست ببروده جارحه حتمت عليه السكوت مقابل كلمه " عوره"
وباوعتلهه بنظره باهته ورجعت لبست مناظري وهي كملت حجي الي بكلبها وكالت ..
- انتي صابك شي من الهبال تالي عمرك تسكطي نفسك بايدك ! اكيد انجنيتي سوايتك مايسويهه عاقل
- اي اني احب الشيخ بجنون وسويتله هالشي
- حبيه بجنونك هذا محد كاضبك بس خلي بالك الرجال مايتحمل وحده عوره تصير حرمتو وتنام حدرو وهو شيخ ماناقصو شي ان دللك يومين ترا يستخطيكي بس بداخلو ودو لو يمشي من حدرك بالعجل
حبيبتي الرجال ماعلى عينو عمى مثل الي على عينك ..بعدو بكوتو ويريدلو الحرمه التعجب مو الي هالكداتها عظمتين وفوكها عوره

ضحكت ام جراح وتأشرلها اسكتي و
هي كالت ..
- مادري شعندو اخوي ذبحها لنفسو عليكي من الاول وتاليه ماحصل منك غير ولد واحد وبالاخر صرتيلو سكيطه
خلف الله على ام جراح خلفتلو ست ولاد وخلت عندو عزوه بهالرجال الحين الي ملو بيتو وسندو ظهرو
- الله يخليهم الهه

كلتهه ودرت وجهي عنها ورجعت كالت ..
- مو تزعلين من حكيي خيه بس انا حكيت حك الله عجل صارلكم سنين متزوجين ماعرفتي تخلفي اخ لحسين
- حسين عنده اخوه مو وحيد
- اخوتو من الاب واخت من الام بس اخ بنفس دم امو وابو ماعندو وشدعوا هالتمضيك هذا على ولد واحد وصرتي تتعبين من الحمل عجل لو مثل حريمنا سبع بطون تولد كان شحكيتي !
- خيه كلمن وقابليته وقناعته واني هاي قابليتي ولد واحد ومقتنعه بي الحمدلله
- تتمضيكين والله .. عجل اخوي من تزوج حرمتين غير يريد يكثر نسلو
وشيفيد الحكي الحين كبرتي وعجزتي ماضل وكت على الحمل
وانتي ام جراح خيه داري الشيخ عاد هو راح يكثر جياتو عندك شويه داري نفسك وغيري بشكلك رجعي الشباب لا تضلن انتن الاثنين مصوفرات الوجه حدرو

ضلت ام جراح تضحك وتتشاور وياهه واني اخذت صينيه الجاي ورحت للمطبخ حطيت الاستكاين بالسنك و ضليت كاعده بالمطبخ وصافنه ... حجيها يرن باذني
ونظره الشماته منهن حزت بكلبي حيل
بس التزمت السكوت ..الانسان من يكبر بالعمر يصير يتجنب المشاكل والقيل والقال .. ومو بمثل حيل وخلك كبل حتى الاسنهن بكل حجايه ..

للعصر راحو اثنينهم واني صعدت يم غاليه .. نزعت شالي وكلتلهه ..
- بنتي انزلي يم اخوتج واني راح انام لتكعديني بعد راسي يوجعني اريد ارتاح
- خيرك يمه
- ماكو شي راسي يوجعني شويه انزلي يلا ولتخلين احد يكعدني زين
- زين يمه ماعندك الا العافيه حبيبتي

بوستني ونزلت واني تلفلفت بالبطانيه واحس هالبرود الي تملكني من هذيج اللحظه ديثكل على صدري ويخنكني بالنفس .. يمكن جان لازم انطي حق لرد الفعل مااكبت لهالدرجه .. يمكن لو بجيت جان خف الحال .. بس اني سكتت لاني اعرفه هالشي صح بيه مو تلفيقاً منها او من غيرها .. صح هالنظره راح احصلهه من الكل وهذا لقبي الجديد بينهم بعد مره الشيخ العوره .. هيج راح يسموني ويميزوني ويذكروني بكلامهم

ماجنت اشوف نفسي متشوهه لهالدرجه ومتغيره والغير ينظرلي بهالطريقه
جنت اشوف بس تضحيتي لاجل سلامته
اشوف بس اني وكفت وكفه حق لاجل هالعائله الي احتوتني بعز غربتي وضعفي .. جنت اتوقع الي حواليه يشوفوني بعين الفخر ابد ماظنيت راح يهمهم منظر عيني شلون صار ماظنيتهم بهالسطحيه من التفكير والنفسيه ..

والشيخ معقول راح يملني بيوم بسبب شكلي !؟

سؤال جان يدور بعقلي طول الوكت ولحد الغروب مانمت افكر شلون راح يتعايش وياي بعد الي صار ؟

كعدني حسين حتى انزل اتعشى واتعذرت بحجه مالي نفس وراسي يوجعني اريد انام ورجعت لنومتي .. مالي قابليه اشوف احد بعد .. احس كل العيون تتشابه بنظرتهه الي وهالنظره مااقوى عليهه
بقيت بفراشي اتحسس نفسي شلون متكسره بكل برود وسكوت ...

سمعت صوت فتحه الباب وغمضت عيني .. اشتغل الضوا وعرفته من عطره الي فاح بالغرفه هذا نظر عيني الشيخ

كعد يمي وتلمس خدي وصار يكعدني
انداريت وباوعتله وهو ابتسم وكالي ..
- غبتي عن عيني كثير هاليوم ليه يولو
- غير خطار وملتهين
- وبعد ما مشو
- نمت
- وللحين ضاله نايمه! خيرك ياعيني حسين حكالي تعبانه وراسك يوجعك
-اي شويه يوجعني مانمت زين بارحه طولت بالسهر اني وغاليه وكاعده من وكت
- زين الحين شلون صرتي
-الحمدلله زينه
-عجل ماتنزلي تاكلي ضاله على الغدا
- ماشتهي والله خليني انام ارتاح احسن
-هاا ترجعين تنامين ؟ عجل وانا !!
- انته هم نام ارتاح
- ما محضرتلي مكان انام بي وانا وصيتك البارحه تحضرين هالغرفه النه بعد
- نسيت وجنت تعبانه باجر اسويهه
روح نام بغرفتك يم ام جراح اليوم اريحلك
- هااااا عجب هالمره ؟ صاير شي ماعرفو؟!
-لا
-تين ما مرتاحلك يولو
- ياعيني مو تريد تنام ترتاح روح لغرفتك ارتاح بيهه محضره ومرتبه هنا هوسه باجر ارتبهه ماصار شي

طك بسبحته ووكف كالي ..
- زين يصير خير

طلع بسرعه من الغرفه واني رجعت لفيت راسي بالغطى وضليت امسح دموعي ..

ماريد بعد قربه يمي صرت اخاف ينفر مني ويجبر نفسه على وجوده وياي ..

ضليت منطويه على نفسي لحد ما اجتي غاليه ونامت يمي وحسيت البيت هدأ بنص الليل يلا نزلت ..
غسلت وشربت مي وفتحت باب المطبخ وكعدت على الدجه .. جو بارد يريح الكلب .. ذكرني هالهدوء باابويه هو هيج جان هادىء لدرجه انه مثل النسمه ماتحس عليهه شوكت تجي وشوكت تروح ...
حسيت على ايد لامست جتفي باوعت شفتهه غاليه .. كعدت بصفي ..
كلتلهه ...
- شكعدج بنتي
- جراح كعدني حتى انزل ادحك شعندك كاعده بهالبرد وحدك
- هيج داشم هوا شويه
- يمه مادحكك مرتاحه ماتحكيلي الي بكلبك
- ماكو شي بنتي بس شبعانه نوم ونزلت
- عجل نسهر سوا الليله وشورانا ابوي وخفر وحسين نايم ناخذ راحتنه
خلي اجيب شي ناكلو على هالكعده

كامت وجابتلنه صينيه بيهه ماعون حب وماعون فواكه وراحت جابت بطانيه خليناهه على ظهرنا وكل وحده اخذت طرف لفته عليهه .. وصرنا ناكل برتقال وهي كالت..
- يمه مادريتي رماح قدم على الدراسه هين راح يرجع يكمل كليتو
-ايي الحمدلله ربي ييسرله اموره يستاهل رماح يتوفق وياخذ شهاده الطب
- ايييه خطيه كان الحين يتخرج لو ما هالاحداث الي اخرتو سنتين وهاذي الثالثه ان شاء الله ماتضيع منو
- ان شاء الله
- يمه حسين صرعنه اليوم بسالفه الكيكه
بالله عليكي يمه ماعاد توعديه وتنسينو
وتخليه ياكل راسي
- سوده عليه ضلت بنفسه بلكي باجر اسويله خطيه وليدي ضلت بنفسه الكيكه
- علميني بدربك يمه
- انتي اوكفي يمي وتعلمي بعد عيب هالعمر ومتعرفين بالطبخ شي
-اييه والله شينه بحكي
يمه دحكت عمتي اليوم وجهه مورد وتدلل ولدهه بهذا اللسان الحلو مو من عوايدها هالشي استغربتو والله
- شتريدين منهه عوفي المره مرتاحه
- زين عجب اليوم ماسألتي على ابوي ولا دحكتيه !! متكاونين انتو،؟!
-لااا بس اني نمت والتهيت عنه
- زين هو ليش مانام حدرك اليوم
- اني كلتله روح لغرفتك ارتاح احسن
- هااا ليش
- متشوفين غرفه مو مرتبه اله بس على كدنا اني وياج وهو ميحب هيج كلتله باجر ارتبهه وتعال نام هنا
- يمه ما مرتاحلك كلبي انتي مايغفل عن بالك هالشي وتعذرتي بي وتعمدتي ماتحضرين الغرفه هالليله !ليش هالشكل تسوين؟
-ماااكو شي
- الاا اكو واكو كثير .. يمه ماتشاركيني حزنك عجل انا مو بنتك صاحبتك مو كل شي عندي يصير اشاركك بي ليش انتي تضمين عليه

اكلت شويه من موزه وضليت اباوعلهه وهي تنتظر مني احجيلهه عاد كلتلهه ..
- اليوم فهمت شكد حياتي تغيرت جنت شويه غافله عنهه
- مافهمت ؟
- شكلي تغير بهالعين مو ؟
- لاا يمه بعدك حلوه
- يعني تغير
- لاا
- اني ماسالتج حلوه لو لا واضافتج هاي يعني تغطين على الموضوع بس هي مفهومه .. عين عوره شلون تصير بعد
- يمه لاتحكين هالشكل انتي والله حلوه بكل حالاتك حلوه وبعدين انتي ضحيتي بهالعين لابوي لاتنسين هالشي
- تروحله فدوه هالعين عساه بخير وعافيه دايماً
- يمه غثك احد بالحكي اليوم مو
- كل واحد بعد راح يحجي نفس هالحجي لازم اتعود
- يخسى الي يمسك بكلمه شينه عجل انتي ماقلتي لابوي هالحكي وخليتيه يتصرف معهم ليش سكتي وانطويتي على نفسك هالشكل
- بنتي هو حتى ابوج هم يجيه يوم ويمل ويجي باله هالحجي
-ابووي مستحيل يمه ابووي يحبك مايحكي هالشكل
- مادري بنتي بس اني استحيت منه يشوفني هيج بعد اخاف هم يجيه يوم ويحجيله مثل هالحجي
- لاا يمه ماتوقعتك هالشكل تظنين بالشيخ لا يمه لاا ابوي مايجرحك بكلمتو ماتعرفين معزتك عندو !
- اعرفها بنتي اعرفها بس يجوز يتصرف كدامي شي وبداخله شي
ماكمت اثق بعد بنظره الناس
-ليييش يمه هذاا ابوي حبيبك الي ضحيتيلو ليش هالشكل ماتثقين بي
- اثق بي بس اخاف من نظرته الي بهالشكل الي صرت بي اخاف احس انه يشوفني مشوهه ويصد عينه مني دتفهميني
- افهمك يمه انتي فقدتي ثقتك بنفسك مو بس بالناس ..صرتي تفكرين كلمن يدحكلك هو يدحكك مشوهه ومو حلوه ويتخوف منك بس احنه مو هيك يمه احنه اهل وكلنا شهدنا على الي صار حتى عينك صارت هالشكل لا تفكرين احنه بيوم ننفر منك انتي حبيبتنا كلنا نحبك ونعزك ونقدر تضحيتك هاذي وبالاخص ابوي ما بيوم يفكر غير تفكير وينفر منك
- الله كريم بنتي الله كريم
امشي خلي نفوت نام كافي سهر

شلت الصينيه وطبيت للمطبخ غسلتهه وصعدت وهي ورايه .. نامت يمي وثاني يوم كعدت من وكت حضرت ريوك للولد
ورحت كعدت حسين والبقيه ..
نزلت ام جراح وكالتلي ..
- زين والله خلصت فتره نقاهتك واذكرتي عندك بيت وعيال يردون اكل وغسله هدم

درت وجهي عنها ورحت للمطبخ حضرت الصينيه وبقيتها على الكاونتر انتظر حسين ينزل ياخذها ..

بهاللحظه دخل الشيخ وشايل علاكه الصمون الحار .. اخذتها منه وصبحت عليه واجه حسين اخذ الصينيه وراحو يتريكون ..
ضليت النهار كله ملتهيه ارتب بالغرفه وارتب غراض حسين وغاليه وماشفت الشيخ .. حضرت الكيكه لحسين وغاليه واكفه يمي اعلمهه تحط هالكد مقدار من كل شغله واخليهه تخبط وانبهه على كل صغيره وجبيره ..

اول مارجع حسين من المدرسه طلعتله القالب كله وكلتله اكل واتهنى بي
فرح ونشنشت روحه على الاكل

لليل ام جراح تخربطت معدتها توجعها وراسهه وضلو ولدهه يمهه شويه ونزلو
وصعد يمهه الشيخ ضل يمهه كل الليل ومن عبرت ال ١٢ دزلي رساله يكولي ماكدر اعوفهه تعبانه راح ابقى هالليله هنا

مارديت شي وكلت حقهه تريد رجلهه يمهه وكت تعبهه .. نمت وعفت كل شي
وثاني يوم اجوي خطار على الشيخ وضلو على العشى و ام جراح متقبل تسوي عشه لان تلعب نفسهه من الريحه ومعدتها بعدها توجعها ..
وكفت اني سويت العشى بس جان الطبخ هالمره ثكيل حسيته عليه مو مثل ماتعودت هالسنين كلهه ايدي خفيفه بالطبخ .. هسه اتاخر بكل شي لازم اضل دايره راسي لليسره شويه حتى اشوف
غاليه تساعدني بس بترتيب الاكل هذا الي تعرفله ..
تعشو وراحو الخطار واجاني الشيخ كالي ..
- حضريلي الجاي واخذيه الي فوك

راح للشيخه حجه وياهه شويه وصعد واني صعدتله الجاي كعد يشربه ويكلب بتلفونه واني بدلت ملابسي وفتحت شعري واجيت تمددت وانطيته ظهري
كالي ..
- هاا تنامين
-اي
- متغيره عليه هالايام مبين الكبر اثر عليكي

سكتت مارديت شي وهو طفى الضوا وتمدد ضل لازم شعري ويلعب بي ويكولي ..
- بكرا اخذ ام جراح للدكتور يدحك شبيها معدتها كان لزوم اخذها اليوم وماصار مجال .. تمشين معنا نسوي فحص للكلى ندحك احوالها صار زمان مافاحصين
- لاا غير مره خليها هسه ركز على ام جراح احسن
- اييه والله نساوني كبرو وتسكربو صرت افرفر بيهن بالدكاتره رادلي وحده احديثه
- هسه صرنا مانسوه وتدور الصغيره !
- عجل اثنينكم تسكربتن ومالكم حيلي بعد الحديثه تفيدني هالايام تونسني انتن كل وحده همها بطولها
- ماشكيتلك همي حتى تضوج مني عيني شيخ واذا ضاله بنفسك الزواجه روح تزوج
- اتزوج عجل اضل هالشكل
بس ارجع للانبار اتزوج واريح بالي حدرها

جريت الغطى وغطيت راسي وضليت اضبط اعصابي واكول هو ديستفزج اسكتي وعوفي الموضوع .. هدئت نفسي ونمت وكأني ماسمعت شحجى ..

ثاني يوم اول ماكعدت لبست النظارات
ونزلت اهتميت بالبيت مثل كل يوم وساعه ٣ همه طلعو للدكتور ومارجعو للمغرب .. خلص الصلاه وتعشه وكالي
كدام ام جراح والشيخه وغاليه وحسين
..
- انزعي النظاره يابه ليش هالشكل مقيده نفسك بيها انزعيها
-مرتاحه هيج ماعليهه شي
- انا مامرتاح انزعيها يولي

الشيخه كالت ..
- ابني عوفهه براحتها هي ماترتاح بعد بدونها اعرفها زين
- يمه مايصير هالشكل تضل لابستهه من ساعه ماتصحى لساعه ماتنام
- لاتضغط عليها براحتها تذبها وكت اليعجبها
ام جراح - انا من رايي خلها لابستهه بعدهه ماتعودت على شكلها الجديد خلها تتأقلم بالهدا وياه بس خوفي ساعتهه احنه الي نتعود على النظاره
- تين ماعليكي بكلام احد انتي سوي اليعجبك مااجبرك انا بس مالهه لزوم والله يايابه ماتلزم لبستها هين بينا
- مرتاحه هيج شيخ لا يضل بالك

رحت للمغسله فرشت سنوني ودانشف جان تجي يمي ام جراح وشاورتني ..
- خيه خليهه نظارتك لاتنزعيها ولدي حر واسر شقاهم ثكيل ومايكضبو لسانهم اخاف ياخذون عينك سالفه ويضلون يتمضحكون عليها وتنقهري انتي
ضلي هالشكل ضامتهه احسن

طبطبت على جتفي وراحت صعدت واني نزلت دمعتي وبسرعه مسحتها وصعدت لغرفتي وكفت كدام المرايا واباوعلهه زين .. اطابق حجيهم ويه شكلها ماكدر اركز بشي .. سمعت الباب انفتحت كبل رجعت لبست النظاره وانداريت شفت الشيخ وهو كالي ..
- خير. ؟
- ماكو شي
- متاكده ؟!
-اي راح تنام هناك
- ماتريديني حدرك !
- الليله الهه
- بس انا كبلها ثلاث ليالي حدرها اكدر اخلي الليله الك
- لا ماريد يصير بينكم حجي روحلهه عادي
- ليش صايره ماتريدين كربي
- لا ماكو هيج شي بس مو تعرفني دائماً اتجنب الامور الي تسببلنا مشاكل اني وياهه
- اعرفه بس مااعرف احدر عندك بعد طول اليوم وماتحضنيني ولا ادحكين بوجهي

دنكت وهو كال ..
- مااكرب غرفتك بعد ارتاحي

كعدت بالكاع وشمرت النظاره وصرت اضرب على هالعين واكول ..
كله منج انتي زرعتي هالخوف والسكوت بيه ...
ضليت ابجي ماداتحمل روحي هيج
دخلت عليه غاليه واجتي حضنتني وتكولي ..
- خير يمه ليش هالبكي ياعيني انتي خيرك دحكيلي يمه فهميني

دفعتهه ومسحت دموعي وجريت نظارتي دالبسهه وهي جرتها من ايدي وكالتلي..
- ماتضلي تخجلي وتتصرفي هالشكل يمه احنه اهل انا بنتك مو غريبه وتلبسيها كدامي وتدحكيلي
- غاليه روحي امي روحي
- مااروح من هين يمه فهميني شبي ابوي طلع و روحو بخشمو
- وين طلع
- مادري نزل مسرع وطلع بره ويركع بالبوب وانتي هين تبكين شصاير بينكم
يمه ليش هالشكل تغير حالكم
- ماصار شي بنتي ماصار شي والله
- عجل فهمييني ابوووي من حالو يتعصب
- كلتله روح نام هناك هاي ليلتهه ماحجيت شي ثاني
- يمه مدام هو حدر عندك يعني يريدك انتي ليش تصديه عنك
- ماكدر بنتي افهميني ماكدر
- يابعد عمري يايمه والله مكبره الموضوع زياده ابوي يحبك بكل احوالك مايفكر مثل تفكيرك والله

- يفكر بنتي يجيه يوم ويفكر اني ماكدر ارفع عيني بعينه بدون نظاره وهو هنا ميقبل البسهه يضل يشوفني هالشكل هم يجيه يوم وتبزع روحه ماريده بذاك الوكت هو يبتعد مني لان بساعتهه اموت ماتحمل هالشي خليني من هسه اعوده احسن
- يمه انتي تذبحين ابوي وتذبحين نفسك هالشكل
- هيج احسن بنتي اني اعوده مايشوف عيني احسن ماهو يجرحني بحجايه فديوم بساعتهه ماتحمل ادري بنفسي اتحمل كلشي من الناس بس منه لا ماكدر
انتي هسه تشوفيني ابالغ لان متعرفين شعور المنبوذ شلونه فاسكتي ولتحجين بعد وعوفيني خلي انام

رحت لفراشي تمددت وهي اجتي باست راسي وطفت الضوا ونزلت ..
ثاني يوم جمعه والشيخ من الصبح على اعصابه كاعد ويرزل بكل واحد كدامه
وكل واحد يترزل يباوعلي واني ادير وجهي عنه ...

صاحني حتى اجيبله الريمونت ورحت ادوره بالهول ماجاي اشوفه جان يصيح بيه ويكول ...
- حدر رجلك يولي عميه مادحكين

دنكت وشلته واخذته انطيته اله وكلتله ..
- اعذر قله نظري ياشيخ

عفته بايده وداطلع من الهول جان سمعت صوت تكسير انداريت وشفته راكع الريمونت باب الحديد مال الهول
عفته ومشيت واني اكول بداخلي هاي اولها ياتين هاي اولها ...

صار الغدا وكاعدين ناكل جان يدك تلفون عباس وهو رأساً صاح بي ..
- ول ماتسد هالتلفون وكت تلفونات الحين والزاد كدامك ماتعرفون الادب لا والله
الا تطلعون الواحد من طورو اسد التلفونات هاذي كل ساع واحد داك روسكم بنص هالتلفونات من صبح لليل وحتى وكت للاكل ماضللكم ولاتحترمون نعمه

كلنه سكتنه وعباس يباوعلي ويرجع يباوع لجراح وعاف الاكل وضل صافن
جان يصيح بي ..
- ماتاكل ماعاجبك يول !
- شبعت الحمدلله
- ولد الكوفي والمطاعم يتربون ولدي انا خنايث بين هالمسلوعين اهل الصبغه هذول ..حسافه على الوكت خلاني هين بين هالطيحان الحظ والله بس ارجع لحديثه لادزكم انتو السته للبدو بنص الصحرا اخليكم تتربون من اول وجديد

سكت شويه ورجع كال ..
- صحيح تذكرت هاذ ياهو منكم محضر معسل برا البارحه وعايف بكايتو حدر الباب هااايولو جاوبو لا افلش هالخشوم منهو هذا الي يدخن بالنراكيل من وره ظهري ويعرف انا محرمها هييييين
ول انااا احاكي صنااام انتو صنااام من منكم الي يدخن النركيله هين بالباب

صكر كال ..
- يابه هاي كم واحد من صحباني هين كعدو حدري بارحه وهمه متعودين على النركيله وكعدو يحضروها
- وانته ياكديش يا ارعن تماشي هذووول
مالكيت غير هالصحاب خلصت الرجال
تكعد تكهكه مثل الحريم هين بنص الليل ويه هالمزعطه !!! بالله ان دحكتهم هين بعد ولا دحكتك كاعد حدرهم وكاضب النركيله اكسرها على راسك واخليك فرجه بينهم سمععععت
اناا ولدي مالهم دخل بهالسوالف مااربي رجالي انا على الطيحان حظ هذا بيك خير اكضب كتابك وادرس مالك خلك الدراسه اذلع اشتغل وكون نفسك ماتضل مكابلي هالمخانيث احرم عليك عتبه الباب بعد لو كابلتهم

كام من السفره وبعده الولد كلهم كامو يتأففون ويستغفرون وغسلو وصعدو كلهم فوك ضل بس جراح جوه كاعد يشرب جاي ويانه ..

رحت لغرفه الشيخه اجيب حبه سوده من غراضهه حتى نسوي فطاير للعصريه
جان يجي الشيخ ورايه ويسد الباب
ضل واكف ويفرك راسه وكالي ..
- راسي يوجعني تين
- هسه اجيبلك براسيتول
- مااريد
- لعد تمدد و ادزلك الشيخه تفركلك راسك
بين مااكمل العجينه واجيك
- وكت عجين الحين يولي مادحكين خلكي ضايك شغيرك يولو كنتي تفهميني من عيني الحين انعميتي عني فهميني هالعين الاخذتها انا عمتلك الثانيه بعد
صرتي لاادحكين ولا تفهمين خرب بهالوكت الخلاني هالشكل معتازلك امشي لعجينك امشي ينعل ساعه الكشره

فتح الباب وطلع وهو يدردم .. رحت للمطبخ مهضومه منه كل كلمه والثانيه ويكولي عميه ليش هالكلمه بالذات ينطقها
ويتعمدها ...
غاليه جانت محضرتلي المواد بس عجنت ولفيتهه وصعدت لغرفتي شويه وسمعته يصيحني نزلتله جان يكولي ..
- ورقه كاتب بيها عنوان الرجل بارحه كتبو الي هين حطيتو هييين وين راحت
- ماشفت ورقه هنا من عزلت
- انتي تكشين كل شي بتعزيلك دحكيها عدل دوريها الحين اريدها

رحت ادور بالهول بين القنفات يم الميز
ماكو مالكيتهه وداكوله ماكو جان يصيح
- مو قلتلك مثوله ومنعميه هالايام الدشداشه الي ذبيتها الصبح وخليتهه بايدك هي بيهه بالجيب امشي جيبيهه
يلا صاير اله اعلم الصغير والكبير هين يلا يمشو عدل ويخلصو الشغله محد هين عندو عكل ويفكر ويدحك مثل الاوادم

جابتهه غاليه قبل مااني اروح وهو اخذهه وكال ..
- الظاهر للحين ماغسلتيها عايفتهه تعفن عندك يولي الهدم الي ينذب بساعتو اغسليه ماياخرك دقيقتين لو ماصار بعد يعجبك غسلتو
انتي كل شي كرهتيه وكاد ماضلت على الهدم هي تبين بالتداريج

سكتت وصعدت لغرفتي ضليت كاعده ومخليه راسي بين ايديه واريد اهدي بالي
وره حوالي الربع ساعه انفتحت الباب
ودخل هو عصبي ازيد من قبل شويه
وكبل جر ايدي وكومني وهو يكول ..
- يولي هالسمعتو صحيح هااا يولي تين

انااا اعيرك انااا انقص من قدرك واهينك يولي !! جاوبييينييي ول لاتسكتين
- كافي خالد فدوه كافي صياح
- انتي بقيتي بيه عكل لييييش كل هذا تين ليييش انا يايوم عيرتك وحكيتلك كلمه الشينه !!! ول انتي ليييش ماتفهمين شغيررررك شغيرررررك

جريت ايدي منه ورحت كعدت وانطيته ظهري وصرت اكوله ..
- ماحاس بنفسك من تحجيها كل شويه
عميه .. عميه .. ماتشوفين ماتفهمين مامنج فايده .. لا تلومني على شي انته ماتعرفه ولا تحس بي

-انتي شلون تفكرين بيه هالشكل يولي شلون تسمحين لنفسك تخونين بيه بهالتفكير ول انا لعدوي ماتشمتت مو عاد الك انتي الي ماامشي وادحك بلياكي

- ماتتشمت بس ماتنسى اني تغيرت ضلت بالك وطبقتها بالحجي

- يولي لاتربطين هاذي وهاذي هين انا اعصابي غلبتني ماتكصدتها والله

بجيت وذبيت المناظر وضليت امسح بعيوني وهو كعد يمي وجر راسي لحضنه وصار يكولي ..
- والله ماتكصدت اهينك بشي ولا بالي افكارك السوده هاذي ول انتي منين جبتي هالحكي
- ماجبته اني سمعته كلهه هيج تفكر بيه وانته يجيك يوم تصير مثلهم محد يتحمل هالشي
- ول عجل انتي ماتحكيلي الي يسمعك هالحكي لاكضبو امعص راسو

وخرت منه وكلتله ..
-مو جذب هو موجذب شتسوي لو عرفتهم مايغير شي هذا واقع
ادري اني مسؤوله عن كل شي لان هو قراري بس

ماكدرت اكول انها صعبه ثكيله ماتحملتها
بين هالانظار ... بجيت وهو حضني وضل يكولي..
- انااا ادري عافيتي ثمنها غالي يولي والله ادري ثمنها غاااالي والله غااالي والله والله

حضنته اقوى وبجيت براحتي طلعت كل قهري وهو يكولي ..
- وحك دموعك انا ماهانت علي عينك ولاتهون بيوم ولا انسى فضلك ووكفتك يوم الي الكل دارت ظهرها لي
ماانسى مدارات ايدك ليل نهار لراحتي
يوووولي انتي اكبر من تعب عمري انتي عندي اكبر من ظنون الناس ونظرهم انتي مايعوضك احد والله ياتين والله مااملك بيوم ولا افضل غيرك ولو يضل عندك بس النفس اضل عاشكك وتضلين اجمل مادحكت عيني

لزم وجهي باثنين ايديه وكالي ..
- ليش هالدموع والقهر يا يابه كلها على نقطه سوده بالعين هي هاي الي كاتلك ومخوفتك !!!هاي الي لوعتي كلبي علمودها!! ماتسوى والله انتي هالشكل بعيني احلى مميزه صرتي
اسمعيني تين خلي هالحكي بالك انتي ماتشوهتي ولا تغير جمالك انتي تجملتي بنيشان الوفا هذا .. هالعين وذاك الجرح
وهالاثر الي باليد كلها اثار الوفا والشجاعه هذول انا افتخر ساعه ادحهكم واغضب عليكي لو حرمتيني منهم
انا احبك بيهن يولو انا بيهن افضلك على الف والف حرمه

خليت راسي بركبته وهو لازم اصابعي
كلتله ...
- تحجي على ولدك وانته الي ادخن
-هههههههههههههههه ياالله ول جكاره وحده
- لااا اكثر
- ايييه يعني يمكن اربعه بس من الصبح مو الحين
- باقيه الريحه بيك اعرف اميزها
- عجل ماتعرفين تميزين ايمتى انا ازعل منك
- اعرف كلهن اعرفهن مابيك شي مااعرفه
- عجل ماتحنين عاد شلعتيه لكلبي والله
-ههه احبك
- بس هاي ! كل هالحريكه الي بصدري وكلمه وحده بس مقابيلها !!!

خليت ايدي على وجهه وتقربت بوست شفته وهو كبل حضني وتمدد وجرني عليه .. ضليت ابوسه وهو يمشي اصابعه بشعري ..
وخرت وخليت راسي على صدره وضليت مغمضه جان يكولي ..
- حركتي اهلي
- ههههه
- بالحرام لو ما وراي طلعه مااهدك لليل
حسبي حسابك بس نتعشى ادحكك هين وفاكه هالشعر الي صار زمان مامشبرو على ايدي
- تدلل
- تين بغلاتي عندك لا تهتمين لحكيهم كائن من كان الي يسمعك هالكلام لاتهتميلو تذكري انتي عند شيخك شنو
- ماشي ياعيني
- والله انك خليتيها كول وفعل
- تستاهلها مايغلى عليك شي حبيبي
- تسلمي ،، انا بعد اعرف شلون اخلي الكل تسد حلكها وتخجل لو تحكي حرف

رفعت نفسي عنه وبوست عيونه وراسه وكلتله ..
- الله لايحرمني منك
- الله مخليني حدرك بس انتي لا تصدي عني وتخليني هايج باعصابي ترضيها عجل الحين تندمت كلبتها سم كعدتنا اليوم بهالجمعه استغفر الله يولي لا تغيبي عن عيني انا لو مادحكك يطبكن هالخيوط الي هين
-ههههههه اسم الله عليهن عيوني
- وليييه ول والله الدنيا حلوه بصوتك
تعوضيني اليوم لا اكلبها عليكي عزا
- والله تدلل صار
- زين يلا انا ماتاخر للمغرب انا هين ان شاء الله
- ان شاء الله ترجع بسلامه

نزلنه سوه وهو هادىء ويحجي وياي بصوت ناصي يسألني خاف اريد شي
واجوي حر واسر كالو ..
- يابه نروح للطوبه عدنا لعبه هسه ويه جماعتنا
- اييه روحو يابه روحو

كبل باوعولي وهو جر ايدي ودخلنه للهول جان يكول ..
- يولد عباس وين ؟
رماح - فوك بغرفه امي
- دك عليه خليه ينزل هين بالعجل

باوعلي وكال بصوت ناصي ..
- تريدين موالح لو بقلاوه وهالشغلات
- اريد الحلو لان هسه دنسوي موالح للعصريه
- زين عجل خليلي منهن

انداريت على صوت عباس وهو يكول
- ها يابه
- احدر هين .. اكضب هاذي تجيب بيهن كيلو مشكل بقلاوه و برمه وكيلو زنود
وتاكلوه بالعافيه عليكم .. و هاذي خمسه وعشرين الك ولصكر دحكو شنو الي بنفسو واشتريلو بدربك واخذ الباقي الك
- مشكور يابه

باس راسه واخذ الفلوس وطكطكهن كدام اخوته وهو يضحك جان جراح يكوله ..

- خذها كلمه مني ياخيي
ان لااا سلطه تعلو على النسوانِ

جان يضربه الشيخ بالسبحه ورجع كال .
- وان الرجال فوارسًُ وابونا فارس الفرسان شيخ شيخ مدهام مالو مثيل
مو تنسى هالكلمه زيين خيي

ضحك الشيخ وكال ..
- وانتو اخذوها كلمه بعد ان الفرسان اغراب ماحييو ان ماصادتهم الاوطان الي بحينها تصير لا سلطه تعلو عليها
يلااا بسلامتكم

طلع وحسين كال ...
- لووو بس افهم شلوووون تكدرين شلووون !!!
- هههههههه افهم كلام ابوك تعرف شلون

رحت للمطبخ شغلت الفرن وكعدت احضر بالفطاير وغاليه تشويهن وتكولي ..
- يمه انا ماوشيت بسرك بس تدخلت شويه لان الحال لزم عليه اتدخل
- مزاجي حلو ماتعارك وياج عادي
- هههههه فدييييت الامهااات المعدلات انااا فديييت والله

سمعنا صوت عباس وهو راجع محمل علاليك الحلويات ويكول ..
- اكلوو اشبعو اليوم من زعلنه انا وصكر خويي المظلوم تهمو باطل هالمره الوحيده الي تطلع تهمتو باطله بس حصلنه فلووس
عليهه اشبعو حلويات اشبعو كيلوات كيلوات جبتلكم ادللو براس اخوكم ادللو

ركضت عليه غاليه واخذتهن واكلت قطعه من كل وحده وراحت وكلت جراح ورجعت وكلتني ..

من خلصت شغل بالمطبخ طبيت سبحت وطلعت رتبت الغرفه وعطرتها وبعد العشى بس شربت جاي صعدت بدلت ولبست ثوب نوم ستن كريمي وفتحت شعري ضليت امشط بي ..
شعري طوله صاير فوك حجل الرجل باربع اصابع .. غاليه كل ماتشوفه تكولي كم سنه مربيته يايمه واكوللها خمسين سنه
تضل تسمي عليه ...

اذا اغسله اله اكعد بالكاع وافرك نص نص منه واكومه بحضني .. ومن امشطه هم الا كاعده حتى اسيطر عليه ..
هواي بنفسي اكصره لحد الركبه حتى اكدر اظفره وافتحه هيج بس الشيخ محرم عليه لزمت المكص ..
القراصه الي اشده بيهه تصير ثكيله براسي فدائماً ارخيهه بحيث انزل الشعر على ركبتي واثبتهه بس باخر لفه من الشعر حتى يخف ثكله ..

بعدني مامكمله تمشيط ودخل الشيخ
باوعلي وضحك واني ضحكت كالي ..
- ياحوريتي بالدنيا وش هالجمال يابه
- الجمال كله لهالشعر
- يحفظو الله سابيني من يوم الي دحكتو على ذاك القميص النيلي ومتدندل على التنوره الكصيره هذيك
-هههههههه خطفت كلبك بشعري يعني
- لااا هنه كثر يابه وحده اثنين شعدد منهن

ذبيت المشط ورحت حضنته وهو يكولي
- انا اول مرا احب الشيب بشعر الحرمه
- ييووه والله انسى اصبغهن كل يوميه اكول باجر والتهي
- لا بالله حلوات وهنه قليلات كم وحده هين ناثرات بس حلوات جمال الطول مغطي عليهن والله
- لا باجر اروح اصبغهن مابيهه مجال بعد
- براحتك بس انا عاجباتني عادي خليهن
عجل مو الحين انا انترست شيب مابيها شي
- ماتصبغهن؟
- يخسى الصبغ احطو على شيبتي يابه هذا وقار العمر مامنو عيب
- هههه يابعد عمري كل عمرك حلو

بوسني بشعري واخذ بايدي كعدني وراح نزع ملابسه واجه كعد يمي وكالي ..
- تين تطفين الضوا وتحدريلي هين تكفين
زين
-زين

كمت طفيت الضوا واجيت وكفت كدامه وهو على نفس كعدته على الجربايه
قربني كلش بين رجليه وضل مخلي راسه بطني .. كالي ..
- صرت بهالعمر اكره الاضويه تضل تخلينا ندحك كبرنا واحنا بعدنا للحين ماشبعنا من الشباب سوه
- بس هيج احنه هسه مرتاحين اكثر خلي مانفكر بالعمر هو كل الي تغير بس شكل
- تخيلي لو احنه الحين بتونس
- الله احلى ايام جانت
- من بعد هالسفره انا ماتحسف على العمر عشتو بتفاصيلو بيها
- كل ماينذكر اسمها تخطر بالي ريحه الياسمين بكل شارع وتجربه الغطس
- عشناها باحلى ايام الله يمكني واخذك بعد ان شاء الله
- نروح نشوف اسامينا بعدهه لو راحت
- تلكين الحين اكلها المي صارلها بالعشرين سنه زين لو ضل حرفين
-هههههه بس احلى شي صار هو هالذكرى
- زين اريد اخذك الحين لليالي تونس بفنادقهه

ضحكت على ضحكته وسهرت وياه هالليله بكل راحه وحب ..

وصار من بعد هاليوم يعاملني بشكل مختلف تماماً بين الاهل ..
دائماً اذا كاعد بالهول يصيحني حتى بس اكعد يمه واعوف كلشي الجان بايدي يكلي مايسوى انا اهم منو ..

رحت للصالون وصبغت شعري بس الشيب الي بدايه الشعر وبنفس لون شعري وهناك مافتحته كله بقيته ملفوف بس بحضني مغطيته بالشال ..
كصيت كذله وصيتها للبنيه تسويها بحيث تغطي العين وسوتها الي مشفره نازله على عيني اليسره هيج ارتاحت نفسيتي
صرت اكدر انزع النظاره براحه
وهو صار يكولي اظفريه لشعرج وانزلي بي مره وحده بس ..
وسويتهه واول ماتخبل عليه حسين ضل يحير شيسوي بالظفيره وام جراح تباوعله من الطول للطول ..
صاحني حتى اجيبله مي ومن انطيته الكلاص اشرلي اكعد يمه وكعدت جان يلزم الظفيره ويكول بعالي صوته خله الولد كلهم ينتبهون عليه ..
ماشاء الله تبارك الرحمن هالكصيبه مكانها بكلبي كبير بكبر عمرها وطولها
خلي اشبع عيني منها اليوم وبعدين ارفعيه ولاتخلين غير عيني ادحكو

بيومها ضليت كاعده ومكومه الظفيره بحضني وتجي غاليه تقيس شكد فرق طول بين ظفيرتها وظفيرتي ..

وجراح يكوللها يجيج يوم وتنافسين امج بالطول ..

صار اذا يطلع يرفع كذلتي من عيني ويبوسها حتى لو كدام الولد ومن يرجع هم نفس الشي يبوس عيني ويكول بصوت عالي يسمعهم ..
رحم الله ذاك الاب الطيب على هالخلفه
الطيبه
مرات يكول ..
بفضل عينك انا رحت واجيت بعافيتي ما اعتازيت لاحد

زرع قيمه لعيني بينهم بدون مايوجهلهم كلمه وحده بس بافعالو واحترامه وياي خله الكل تحترم وتقدر .. عرف شلون يسكت اليحجون ويخجلهم بعد لو حجو

مشت الايام وحسين نجح بنص السنه واني ادرسه العربي والاحياء اكضي يومي اقرا موضوع بالنت واسجل ملاحظات واشرحله بالليل ..

صارت البكلوريا واني كل تعبي ذابته وياه لحد ماامتحن وعطل اني بديت انتبه على نفسي صاير نظري ضعيف
الشي اشوفه حيل مغوش اله اركز بي يلا يوضح شويه ..

ويوم بعد يوم تزيد الغواشه .. رحت فحصت جان يطلع مي ابيض بيومها الشيخ تخبل ليش هيج يصير ومنين اجه ؟؟
الدكتور الي سوه عمليه للشيخ بالحارثيه
مسافر ومايرجع الا فد اسبوعين وضلينه ننتظره وبهالايام فهمت من ملاحظات غاليه على اخوتها ان رماح متغير وعنده شي ..
صاير كلش كئيب ومايلزم تلفون ولا يطلع لاحد من شغل للبيت وللشغل
ويضل يباوع تلفزيون وهو يهز رجله ووجهه مدخن اعصاب بس ميحجي

كلنه اكلنه الفضول حتى نفهم شسالفته
الى ان بيوم الشيخ خصمهه ..
جان راجع باليل ورماح على نفس كعدته التعودنالهه كدام تلفزيون ويهز برجله ومجتف ايده والشيخ من دخل كبل حط ايده على جتفه وكال ...

سلام الله على كل من باتت روحيتو بنيه

باوع لابوه وبعدين طلع للشارع وكلنه سألنه الشيخ شلون عرفت جان يكول
- يولو الرجل شغلتين تشل حالو
جيبو لو فرغ وكلبو لو رفرف على بنيه
واخوكم حالو من الثانيه

من رجع استلمته غاليه تحقيق وهو بس يعيط عليهه عاد صاحله الشيخ وكعده يمه
وكاللهم اسكتو كافي وسكتو ..
راحت ام جراح صعدت وراحت الشيخه تنام وجراح وغاليه بالمطبخ والولد بقيه ملتهين بالتلفزيون عاد استغلهه الشيخ وسأله ..
- فهمني يابه البنيه منين اهلها امشي اخطبها الك
- لا يابه مايحتاج
- احكيلي شسالفتك عجل
- يابه انا مو رايدها البنيه انا محروك كلبي عليها ماراضي حالها بس هي رعنه ومدللـه وماتسمع كلام احد
-هاا سولف ابني سولف جايز نفيدك بنصيحه وين عرفتها ؟
- عرفتها بالكليه البنيه تدرس طب اسنان مثلي بس داخله بالموازي يعني دافعين اهلها فلوس لان معدلها ماوصل
-اييه اييه افهم
- اييه هي اهلها من المنصور والبنيه بعدها صغيره ولبسها مو محتشم كل جسمها مكشف وشعرها تنثره وخفيفه فد مره خفيفه والولد ماخذيها مضحكه وهي مصدكه .. تتلطش بالرايح والجاي بحجه الميانه وزميل وهذا حاله حال اخويه وهذول احنه اصدقاء تضرب بيهم وتعلي صوتها بالحكي وياهم وضحكتها توصل لسابع جار بس هي فطيره كلب وايدها مو الهه .. تصرف على جماعتهه صرف الهبال .. الولد والبنات تصرف عليهم
رحت مره حكيتلها يابنت الناس حكمي عكلك هالناس تستغلك والولد هذول مو امان مو حك صداقه خلي الك هيبه بين الناس وهي طلعت لسانهه هالطول عفتها ومشيت ... وره كم يوم دحكتها تتمشى وره الجامعه وايدها بايد ولد ملطلط ومحفحف والدنيا زايعتو كلها تعرفو ناقص اصل وهي تميل بجسمها عليه وهو مستغلها اكلها اكل بعينو وياخذلها هالصور بتلفونو عاد رحت جريتها من حدرو وعطت عليها قلتلها ..
ان ماتخلين احترام لنفسك خليلك شرف
احفظي شيبه والدك الصارف دم عمره على جيتك هين
وهي ضلت تحكي شدخلك بيه ومنو انته وشلون تكضبني واستشرفت براسي
وانا لو عايفها ساعه ثانيه ويه ذاك كان اخذها وطلع بيه
- والله زين ماسويت ونبهت بس دامهه مرخصه نفسها لهالدرجه خلها تضوك لوعه الخساره وتالي تبكي الندم
- دحك تالي صار مو انا اشتغل بالمطعم الحدر الجامعه بالشفت المسائي ودحكت المغربيه كونه برا سيارات طابكه والولد سمعتهم يحكون هالجماعه مسلحين
وحدرهم بنيه .. عاد انا طلعت مسرع وعفت المطعم وادحكها واكفه بين السيارات والولد كلمن كاضب سلاحو وموجهو على الثاني والعالم ملتمه حدرهم تهدي النفوس وهي تتراجف وتبكي
رحت كضبتها واخذتها بعيد عنهم وسالتها
منين هذول الولد شجابك حدرهم بهالوكت ؟ قلتلتي هذا حبيبي وطالعين وكسر علينه هذا الولد لان عنده عداوه وياي هو جان حبيبي القديم يلحكني من مكان لمكان وضلينه نفتر بالسياره لحد هنا حتى مايعرفنا احد من هذيج المنطقه

انا يا يابه ضربتها وسطرت خدها لان حركت كلبي عجل بنات العالم هالشكل صارن بلا حيا

وبعدين اخذت تكسي وقلتلها دليني عنوانكم واخذتها لبيت اهلها وقلتلها تتصلين الحين بوالدك وتنطيني التلفون
مارضت تتصل وضلت تصيح بالسياره وخبصت الدنيا بصوتها عاد انا جريتو للتلفون من ايدها وبعيطتين فتحت الرمز واتصلت بوالدها وقلتلو اذا انته طالع انا وبنتك جايين البيت ولازم نتفاهم

- والله كفو هذا ولدي كفو والله كفوو
ايييه ودحكت ابوهه