#شقراء_بغداد

الجزءالثاني_بارت_٨


بليله الي راحو بيهه لبغداد ضلينه اني والشيخ سهرانين كل شويه نخابرهم ونتطمن وين وصلو وشلونه الطريق
لحد ما وصلو البيت حسب ما كالي الشيخ
ان البيت بمنطقه الدوره مأجره من واحد
من معارفه من ساعه الي عرف بدخول الدواعش للانبار ..

ثاني يوم الصبح وره ماتريكنا كالي اكتبيلي احتياجاتك للبيت حتى اجيبهن
من هسه ..
كتبتله بورقه كلشي وانطيته وراح
وللعشره رجعلي وصار ينزل بالمسواك
وضل كاعد وياي ونسولف شويه وجان تندك الباب ...
راح طلع فتحهه جان يطلعون
جراح ورماح وحسن جايين ..

تفاجئنا بيهم وهو ضحك وحضنهم وجراح كال ...
- والله يايابه ما هدالي بال من ساعه ماعبرت ديرتي الدنيا ضاكت بعيني
-حياااك يا يابه حياك وجدتك وش علومها؟
- جدتي مارضت اعاود هين وانا بعد صلاه الفجر وكفت وحكيتلها .. ان تجبريني برضاج حتى اهد ابوي وحديثه واكعد حدرك الحين ازين هالشارب واضل مكابلك والبس شيلتك واصيرلك حرمه حتى ترتاحي وترضي وتامني
عاد هي دمعت عينها وحكيتلها ..
حديثه بدمي هين تمشي مخنوك من هوا بغداد ماكدر على ضلتي هين
ودعتها وكعدت الاخو وتوكلنا
-والله والنعم اييييه هالشكل انا ولدي رجال نشامه حديثه النه يايابه ماانطيها لو تخضر الكاع دم مفهوووم
- مفهووم يابه مفهوم

من بعدها طلعو كلهم واني بقيت اعزل المسواك والبيت واخابر بغاليه وحسين
ومشى الامر هادىء مده يومين وبعدين بدا صوت الاشتباكات ...

هنا الشيخ بعد ما شفته هو وولده وولد اخوه وولد عمامه وولدهم كلهم تحزمو بالسلاح ومشو للساتر الغربي الي سووه بهذنيج اليومين ...

جنت اخابر عليه كل نص ساعه ومااسمع بس صوت الرمي والصياح مال الزلم بيناتهم وهو يكولي بخير يابه بخير ويسده
اضل ادعي ربي يحفظهم وينصرهم اليوم كله ...

انكطعت علينه الكهرباء والمي وضليت اشغل الفانوس من وكت المغربيه والمي
يجيب رماح جلكانين بيض بين يوم ويوم ومرات اذا عنده مجال يجيب يوميه

جان باول اسبوع يجيني الشيخ ساعتين العصر يسبح وياكل وبعدين يضل يحجيلي على وضعهم هناك جان يكولي..

- الحين حنا مأذيتنا منطقه الخسفه هاذي
استحلوها داعش ومن عندها يضربو الهاونات على اطراف حديثه صح حنا
سوينا الساتر على ٣٦٠ درجه لكن همه
على البيوت بالسطوح متمركزين ويشتغلوهه كنص لان الماشي منهم ياخذ حكو من الاحاديه رجالنا اخرطوهم خرط
لكن الي صاوب رجالنا الكنص هذا
والحين نفكرلو بحل مانخليهم يرتاحو لاا والله وجلال الله

يطلع من بعد مايحضني واني اقراله ايه الكرسي باذانه واني حاضنته واوصيه
لايطول عليه ويروح ...

الولد ابد ماشفتهم اول شهر بس من اخابر جراح اسال عليه يكولي ..
-عمتي ونسه هيييين بالله متونسين عليهم
ماينطيني كلبي اتركو للساتر والله

رماح هم نفس الحجي يكول متونسين بالحرب وياهم ومطكطكيهم ..

صار الحصار على حديثه بسبب ان الدواعش مستحلين الطريق الي يوصل لحديثه من كل جهه وملغمين الشوارع
لا احد يطلع خارج حديثه ولا يطب
وكل فتره صمود حديثه بوجه الدواعش
جانت بجهود ولد العشاير وشرطه المنطقه اما تعزيزات من خارج حديثه
مااجتي الا بعد مرور شهرين ومو بكثره لان طريق دخولهم صعب ملغوم كل الشوارع واكو جسور مكسره بالنص من اثر تفجيراتهم ...

كلشي صار غالي اذا نشتري كيلو طماطه وبتيته ب ١٠٠ الف ،، وبعد فتره
الناس صارت تعاني من هالاسعار وشكد يتعاركون على هالشي ..
صارت كونيه الطحين او التمن بمليون
عوائل متكدر تشتريهه تصير تتقاسم سعرهه ويه عائلتين وياخذ كل واحد حصته من الكونيه ...

اكو كم واحد من اصحاب المحلات شريف صار ينطي بلاش الكواني والبقيه لا يكولون احنه منين نعيش منين نشتري
هو هذا رزقنا ...

الشيخ من اول ماعرف بالاسعار راح تغلى اشترى مؤونه كامله وترس مخزن الاكل الي يم مطبخ الديوان وترس غاز ونفط اكثر من الكميه الي نحتاجها صرف عليهن هواي بس كال هاي قليل كدام الي راح يجي ..

كلها جانت تقتصد بكل شي الا الشيخ
جان كل خميس يكولي ..
- تينه ياعيني بكرا جمعه بأذن الله
وانا رايد منك تطبخي لرجالنا على الساتر
كتلهم الجوع كاضينهه تمر ولبن وتمنات بكد حفنه اليد وهمه رجال اكاله ولزوم ياخذون حيلهم من اللكمه وانا محضر
خمس ذبايح لبكرا ،، بعون الله الصبح اشرف على ذبحهن واخذهن لك بمطبخ الديوان وانتي فزعي جاراتك هين دحكي الشاطره منهن وخليها تحدر تساعدك
- ان شاء الله تدلل عيوني
- تسلمي ..رايد حين افرغ من صلاه الجمعه ادحك السيارات محمله بالاكل حدري زيين يابه
- زين عيني تدلل من الصبح اخذ النسوان ونطبخ تدلل
- يحفظك ربي لي ياسند كبرتي انتي

من الصبح هو طلع حتى يشرف على الذبايح واني رحت للجيران اختاريت
اثنين نسوان بعمري وبناتهن اثنين هم اجني وياهن ولزمنا الطبخ من ساعه
ثمانيه الصبح ...

لحد ال ١١ احنه مكملين كل شي
محضرين الجداري مال تمن والتشريب
وصفطات الخبز والمناسف الفافون هم غسلناهن وحضرناهن واني خابرته

جان يكولي ..
- تينه تكبعي بعباتك واكفي حدر الولد
انا ارسلتلك رماح واثنين من صحابو ولد نشامه ، انتي اشرفي عليهم باليعجك ام البيت انتي بعد
- ماشي ياعيني انتبه على نفسك

سديت الخط ورحت لبست عبايتي و دزيت النسوان لبيوتهن ووياهن غداهن
وضليت واكفه بالحديقه انتظر جيتهم
ومن اجوي الولد متربين من فوك ليجوه
ورجليهم سووود وحالتهم حاله ..
سلمو الولد عليه وهمه مدنكين الراس
عاد كلتلهم ...
- رماح عمه اخذ الولد وروحو اسبحو وارتاحو شويه بعد ساعه على الصلاه
تلحكون ترجعون
- هااا ياولد تمشون داخل نرتاح ؟

رفعو راسهم وابتسمو وهو اخذهم ودخلو لبيت الشيخه ...
رحت للمطبخ وضليت كاعده ومشغله جوه التشريب بنار هادئه حتى يضل حامي بين مايجون ..
وشفتهم طولو طفيت النار ورحت للهول
واشوفهم مجطلين بالكاع والخاوليات بيدهم ونايمين ...
فاتحين الحلك ورايحين بسابع نومه
شكد كسرو كلبي بشكلهم هذا خطيه ليل ونهار همه بنص التراب وحتى نومتهم وهمه كاعدين ..

شفتهم مبدلين الولد من ملابس رماح وطالع وجههم هسه جانو بيض من التراب ماينعرفون ...

كعدتهم وهمه كامو بسرعه ويكولون
اليوم كتلنا حلال والله ... وركضو لبسو شحاطاتهم وراحو للمطبخ واني وراهم

تكابلو على الجدوره وصعدوهن بالسياره
واخذو المواعين والخبز وطلعو ..

ضليت اني وحدي اتلفت على هالبيت الجبير والكاع الي على مد عيني كدامي
كلها فارغه ووحدي اتمشى بيهه

ضليت واكفه بنص الحديقه واباوع للبييت
واكول ...
- والله هالحياه عجيبه اني الي جنت مااعرف اسم حديثه بدولتي هسه صرت الوحيده الي مرابطه بيهه واهلها هاجريها
بس اني حبيتها اكثر من اهلها اني اعرف قيمتها واعز ذرات ترابها لاني اخاف بيوم اخسرها وارجع لاصلي بس همه مطمئنين مرجعهم هنا

انداريت ومشيت على الشارع الي وره بيت صياح ابو حسن الي يودي لبيتي
واني اباوع للسمه شلون حلوه وصافيه
ودافي هالجو واكول ..
- اسم على مسمى والله كل ما طال بيهه الزمن تبقى احديثه

مثل كل يوم العصر اتاني رجعته وهالمره
تأخر وصار الغروب وهو ماكو اخابره ميجاوب وضليت بحيره كاعده واهز برجلي والخوف كاتلني عليه .. عاد للساعه تسعه يلا سمعت الباب انفتحت
ركضت لباب الكليدور وشفته جاي يمشي ويفتح بلثامه من وجهه ،
مشيت بجهته واني اكوله ...

- خالد هي هاي سالفه الله عليك يعني متشوف تلفونك شكد اتصلت عليك متجاوبني تكولي راح اتاخر ليش تعوفني بقلق كاع

بعدني ما مكمله كلمتي وهو لزم حنجي ورأساً باسني بشفتي .. بكل هداوه ورزانه
منه يبوسني على نفس وكفته .. ضل هيج لحد ما من وحده وخر وحط ايده على خدي ويكولي ..
- انا اعشكك تين

ابتسمت بخجل وحضنته ضليت مخليه راسي على صدره وهو يتلمس بجتفي
ويكولي ..
- تدرين لو حرمه ثانيه غيرك كانت كملت حكيها وماسكتت ببوسه
-هههههههه
- يووول يابه هالصووووت يردلي موازيني

رفعت راسي وضليت اباوعله وكفت على اصابعي وبوست خده وهو يبتسم كلتله..
- مشتاقتلك حبيبي مااحب يومي بدونك
- وانا تعمدت اتاخر حتى اضل هالليله حدرك مشتاك انام على يدك تين رايد راحتي حدرك محتاج لها
- يا نور عيني انته تدلل ،،متعشي ؟
- لا رايد العشى من يدك
- صار حبيبي تأمر

ضحك وكرص خدي ودخلنا عفته يبدل
ورحت اسوي العشه .. سويت شوربه
بيضه على مي لحم هو يحب اكل خفيف على العشى اذا اكل دسم على الغدا

تعشينه وبعدين صار يكولي ...
- تينه اليوم رجال الساتر كلها كلت من طبخك والي زاد تعشو منه بعد
- الف عافيه
- دايماً انتي رفعه راسي حتى وكت الشده
الاكي المدح والمفاخر يصير نصيبي من زين فعايلك معي
- حبيبي اني ماسويت شي جبير هو طبخ
شنو مطابخين قبل
- هاذي تختلف تين الحين انا تاركك وحدك هين مأمن بيدك البيتين ومحملك مسؤوليه جيش من الرجال عجل انا ما دحكت كم قزان هالكبر اليوم محضرتو
- هههه ياعمري اذا هنه خمس ذبايح
ليش لعد ميصيرن هواي ! واني هم وياي نسوان ثنين وبناتهن تكفلن بالخبز وجوه ايدي يساعدني بالغسل والتهدير الحمدلله اكو من وكف وياي وساعدني ياعيني
- الحمدلله .. تين دحكي انا صحيح اخاف عليكي تتعبي واحب راحتك لكن انا وعدت الرجال ان كل جمعه هالغدا ينعاد
يعني حسبي حسابك كل جمعه خمس ذبايح تلاكيهه محضره بالمطبخ
-ان شاء الله
- دحكي حنا اربع شيوخ مترأسين الساتر
كل صوب منو باسم عشيره مننا يعني
انا ورجال عشيرتي عندنا الجهه الشرقيه
من الساتر هين مجودرين عليه والي يجرالو مسؤوليتنا وش نحتاج من عتاد
مي اكل هذا كلو من جيبي يطلع وبقيه الشيوخ نفس الشي وانا من ساعه ما دحكت الرجال هين كتلهم الجوع ضالين على التمرات كفيلك الله كلمن تارس جيبو وحاط سلاحو حدرو ويضرب من هين وياكلو تمره من هين هالشكل يضلون لحين ما يحنون عليهم اهلهم بلكمتين
من ساعتها عاد حكيت مع باكي الشيوخ
واتفكنا على نجمع خمس رجال من هين
نكفلهم بالاكل والفلوس كلها تشارك
صار كل ليله يجمعون على الفين او خمسه ويتسوكون حتى يطبخون ويكضون اليوم ...

والاكل كلو بيتنجان وطماطه وبصل مشوي لو شوربه عدس

- سوده عليه هاي عود دتجمعون وتطبخون وهيج

- ول يابه ان جمعولهم ٣٠٠الف ما بيهن
الا خمس كيلوات طماطه كم مره اشترو كياس بتيته وخلصو زيت وكعدو يتصفنون ..عاد حولناهه شوي وشوربه
وبالله الشوربه مي وبصل على حالو والعدسات طايفات اسمها شوربه عدس

- سوده عليه حبيبي جان انطيتوني اني اطبخلكم مدامهم ميعرفون

-يعرفون وش فيهم ناكصهم طول عرض
لكن همه يتعمودها خفيفه حتى تكفي الكل

- هههه اقتصاديين هالولد الله يحفظهم

- ايييه عاد انا كسرو كلبي حكيتلهم كل جمعه غداكم عليه دليميه تكعدكم وزن
وهمه رد الدم بوجوهم ساعه ما حدرت السيارات اليوم محمله بالاكل وكضوها يتشكرون .. صار شيخ ثاني من المشايخ الي معنا يحكيلهم عشاهم بعد كل يوم عليه
والحمدلله تعاونا وكدرنا نعين حيلهم
-الحمدلله بعد كولي شنو تحتاجون هناك
اني اسوي كلشي ماعندي كاعده وحدي
خلي اتلهى بالشغل
-والله ياتين كثير نحتاج لكن انا مااحب اتعبك خليكي على غدا الجمعه كافي
- لا لا حبيبي كولي شنو تحتاجون حتى هم اجمع كم وحده من البنات ونتعاون عليهن شعدنا احنه كاعدات وساكتات
- بصراحه اكثر ما دحكتهم حايرين به
هو ملابسهم ماكو مي حتى يغسلون
نصير نبدل بينهم شفتات جماعه يمشون لبيوتهم يغسلون ويبدلون ويرجعون حتى جماعه الثانيه يمشون ومنهم ما يرضون يمشون لاهلهم لان مواقعهم مهمه يصيرون يغيرون ملابسهم ويكومون الوصخ منها اسبوعين لحين ما يمشو لاهلهم يغسلوهم

- خطيه الله يكون بعونكم لعد خلي يجمعون الملابس وهنا نغسلهن الهم
هذا اقل شي نقدمه لوكفتهم هاي

- من يعاونك هين ؟

- بنات جيرانه هذني اثنين شاطرات وخدومات اجيبهن يمي ونغسل سويه

- زين عجل من بكرا ارسلك بيد رماح
وشغله ثانيه تين ودي ترامز جاي امي عندها هين بالبيت ضامتهن دحكي وينهن وحضريهن لي بكرا من يعاود رماح ارسليهن معو

- اي عيني صار تدلل

- تسلمي يابنت الاجواد .. يلا ما ننام !

ضحكت ورحت للمطبخ وديت الصينيه
وغسلتهه ورحتله .. ضليت حاضنته واتلمس وجهه الي تغير ملمسه من اثر الكبر .. ابوس براسه وادعي ربي لا يحرمني منه ومن هالامان الي بحضنه

ماخذني التفكير بابني حسين هواي مشتاقتله وبنفسي شوفته ورايح بالي عن الشيخ عبالي نام جان مااحس الا على
لمسه بارده على رجل من فوك رأساً جفلت وهو ضحك وكالي ...
-هااا يولو من ماخذ فكرك وانتي بحضني
- هههههه عبالي نمت
- ماكدرت انام
-ليش حبيبي
- مادري كأني مشتاك اتدلل الليله
-هاااا
- اييه بعدين انا كم مره موصيكي ساعه تنامي حدري لا تلبسي شي
-ههههههه
- هااا يولووو ظنك كبرت وماتهمني هالتفاصيل بعد !
- لاا حبيبي بعدك شباب
-ايييه يابه بعدها الروح خضره
- يحفظها الله شكد احبهاا
- لاا تمشيها علي حكي يلاا

ضحكت ورحت نزعت ملابسي وعلكتهن بالزاويه واجيت يمه تمددت ..
هو صح من قبل يحب ينام هيج على كولته جلد على جلد نصير قريبين اكثر
من حضني هيج كال ..
- بالله اكره فواصل الملابس بيني وبينك
لا تعيديها بعد
- مانساهه بعد حبيبي
- تين ارفعي شعرك خليه على ظهري

اعرفه من يطلب هالشي معناهه يريد ينسى كلشي ويريح باله .. لان هو من اول مره طلبهه قبل مني كالي ..
انتي راحتي واريدج تحتويني وكت اتعب

يصير نايم عليه وراسه بركبتي واني اخلي شعري عليه من الجهتين امده فوك ظهره واضل حاضنته وساكته وهو يتنفس بركبتي ..

ياخذله غفوه هيج واني امشي اطراف اصابعي على ظهره واتلمس راسه وهو نايم ... مرات يكمل نومته ومرات يكعد
واذا كعد يبدا يدلل رأساً ..

هالمره ضل نايم واني هم غفيت وياه
ومن كعدت الصبح لكيت نفسي على ايده
وهو لازم خصله من شعري ويمشي بيهه على وجهه ..
ابتسمتله وبوست ركبته واني اكوله صباح الخير وهو ضحك رأساً وكال ..
- انتي تحرشتي انا صارلي ساعه صافن وساكت ماتدنيتلك بس اتمعن
-ههههههه حيااااال رايدهه حجه مني
- عجل انتي استغليتي نومتي البارحه وماحصلت شي الليل كله
-هااا ومن الصبح تريد تعوض
- اييه حبيبتي الصبح نشااط ماتعرفين نشاط حبيبك من الصبح كيفووو
-ههههه اعرفه شلوون ماعرفه حبيبي

رجع شال شعري ونام وخلاه فوكاه وبدا يبوس .. اعرفه بهيج حال هو كلش ينفعل
ومن بعدها يكضي يومه مرتاح ونشيط

من ديطلع وره ماسبح وتريك كالي ..
- بنفسك شي حبيبتي احكيلي حتى لليل اشتريه برجعتي
- كأنك كاعد بالي هههه
- ههههه احكيلي عجل
- اريد شي بي ككو صار هواي مماكلته
- صااار تآمرين من هالعين بالليل يكون عندك
-تسلم حبيبي
-يلاا اترخص انا
- خااالد حبيبي انتبه على نفسك وارجعلي بسلامه
- ان شاء الله

طلع واني رشيت مي وراه ورجعت اخذت عبايتي ورحت لبيت الشيخه
ادور على ترامز الجاي ..

طلعتهن ٣ من باب المعرض واخذتهن غسلتهن وحطيتهن على جهه ورحت اشوف شكو هنا بالمخزن ..

ولكيت خير من الله مواد غذائيه كلت هاي هنا تنفع بعد ماخلي الشيخ يشتري اجيب منا ..

خدرت الجاي وفرغته بالترامز وخابرت على الشيخ كالي دزيت رماح بالطريق
ومن وصل رماح جان جايبلي ٣ بقج هالكبرهن مليانه ملابس وصخه خلاهن بالباب وراسا اخذ الترامز وراح ..

استحيت اروح على بنات الجيران يجن يغسلن وياي وخاف نفسيتهن متتقبل
كلت اغسلهن وحدي ماعندي شي

واخذت الطشت الجبير خليته بره على بوري الحديقه هناك مي يوصل بس ضعيف وضليت مكومتهن يمي واغسل بيهن ولحد ال ١١ يلا خلصتهن وشريتهن
ورحت تمددت ارتاحيت ..

والعصر رحت لميتهن وصفطتهن وخليتهن بعلاليك كبار وخابرت على رماح حتى يجي ياخذهن ..
من اخذهن كالي باجر هم اجيبلج وجبه

صار الليل اني مشغله الفانوس ومعلكته بالحايط مال هول واحد وواحد بالمطبخ
نفس الوكت بالتسعه رجع الشيخ تلكيته
من الباب وهو انطاني علاكه بيهه خمس نساتل ام الككو .. تشكرته عليهن
وحطيت العشه اكلنه سوه واشوفه هاليوم مرتاح ..
وره العشه جبت علاكه النساتل واخذت وحده منهن وسألته ...
- خالد بله هاي بيش صارن
- بعشره
- يممه عزا شدعوه هيج
- تستاهليهن انتي
- يابعد عمري لعد اكل وياي يلا

خليت النستله بحلكه وهو اكل منهه بعدين يلا اكلت اني وضليت مخليه راسي على جتفه وهو يخابر بجماعته كل شويه واحد
وصاني اكعده ب ٣ بالليل حتى يروحلهم

استمر هالحال سنه ٢٠١٤ كلها ..
يوميه صار يجي بالتسعه بالليل وينام وب ٣ يروحلهم ..
كل جمعه الذبايح مانساهه وجان يفكر لو خلص الحلال الي عنده منين يجيب بعد ويذبح ؟ بس الله رزقنا بيهن وشكد ما ناخذ منهن يزيدن ... جانن ٤٠٠ راس غنم
وماخلصن ابد ...
ملابسهم كل يومين يجيبولي اغسلهن
و كل اسبوع تقريبا نسمع تشييع لشهيد
مرات جراح يجي يسلم عليه ويكعد يشوفني بتلفونه فيديو يصوره للساتر شلون يقاتلون وينشدون بمفاخر عشايرهم

الجيش صار وياهم وكادرين يسيطرون على الوضع .. رجعولنه المي بس الكهرباء ماكو ..

بنهايه شهر الرابع من ٢٠١٥ كاعدين اني وياه بالليل جان يكولي ..

- تين تدرين عن كريب عندنا معركه راح يحضرها وفد من بغداد
- هاا يامعركه ! وين ؟؟
- نحرر الخسفه
- وين صايره ؟
- دحكي هي جنوب الموصل صايره بوسط صحراء شمال غرب حديثه هاذي المنطقه حاكيلك همه متمركيزن فيها
ويطلقو الهاونات منها على حديثه لزوم نحررها لنخلص من اذاهم علينا
- اكيد راح تكون ملغومه
- ايييه اكيد لكن قواتنا كثيره ومجهزين خبراء الالغام وحنا راح ندخل عليهم
بفوجين العشاير والجيش وبعون الله
نحررها
-ان شاء الله ربي يكون بعونكم وينصركم
- ان شاء الله .. تدرين تين هالمنطقه صارلهم ثمان شهور مستحليها بهالشهور
اهلها تهجرو والحلال كلو تصادر والبيوت والسيارات كل شي ماخلو كشه بالكاع تعتب عليهم ماخذوها وفوك هذا كله مسويها مكبره جماعيه
-يمه اسم الله شلون شمسوين
- حفره الخسفه الكبيره هاذي الي بالصحراء مليانه جثث ياخذون الي مايرضى يبايعهم يعدموه بجيله براسو ويزتو بالحفره اكثرهم اهالي الموصل الشرطه والموظفين ياخذوهم من بيوتهم
معصبين وتاليها ماينعرف اثرهم وين
الي يبايعهم يخلوه بالسجن والي مايرضى يعدموه ويزتو
-لا اله الا الله ليش هيييج ياربي شذنبها هالعالم هم موته مثل البشر ماحصلو الله الاكبر
- هالجرذان مو بوعيهم والله
- همه شبيهم جايين يريدون مبايعه على شنو
- يولي هذول يحسبونا كفره وهمه اهل الاسلام وجايين ينشرون دين وتعاليم بينا هيك فكرتهم
- وشبينا احنه مو اسلام ونصيح لا اله الا الله هاي صارلنا سنين وسنين من نبي لنبي ومن امام لامام ماصرنا مسلمين هسه بالتالي طلعو هذوله يعلمونا الاسلام !!!!
- انا وانتي عكلنا براسنا ونفهم هالحكي هذول ما يفهمو مثلنا هذول يدحكون نفسهم على عقيده والي يجاهد على عقيده عندو الشهاده هي النهايه هذول يدحكون نفسهم على حك لانهم باسم الدين يحاربو
- اوووف يربي شلووون هالعقول دمرت البلد دمرتنا شلون مالها جاره
- حلهم الكتل والاباده مالهم غير حل
تدرين ليه ؟
-ليش
- لانهم مغسولين الدماغ هذا مغسول الدماغ عمرو ماينعدل .. تدرين حنا وصلتنا اخبار ان من بينهم عراقيين
دواعش عراقيين
- عزاا عراقيين !! شجاااهم هذول
- انا احكيلك ... تذكرين من زمن السقوط
والاعتقالات الصارت وكلها تحولت لسجن بوكا مو سامعه الي يمشي لسجن بوكا اقري عليه السلام مايرجع
-ايي بس مو طلعو منهم بالافراجات هذيج السنين
- ايييه طلعو والي طلعو هذول همه دواعش
- شلون هيج هاي شجابهه بهاي؟
- دحكي هي السالفه مو من تالي السالفه مخططه من سنييين واكبر من حد نظرنا
والله اعلم باليخفى منها للحين لكن الي فهمنا ودحكناااه بعينا ان هذول الي صارو مع داعش همه نفسهم الارهاب الي باول ب ٢٠٠٨ لحين ٢٠١٢ هذول جماعات منهم منظمه لداعش والخلفاء بداعش يدعموهم بالفلوس والاليات حتى يستفادو منهم كونهم يعرفون زواغير المناطق
ودروبها .. وارجعلك على هذول جماعه سجن بوكا ... هذول كانو يدسون بين كل مجموعه مساجين واحد خطيب ع اساس انه سجين مثلهم وعراقي حاله حالهم

ويصير يدرسهم ويزرع بالهم افكار واحقاد ماتخطر على بال بشر وبطريقه مايحسسو انه متكصد يدس هالحكي براسو وهالشي ضل سنين يتشبع بعقولهم
حين ما طلعو من السجن صار منهم الاخ
ما ياكل حدر اخوه ولا من مال اخوه او ابوه لان يحسبو حرام ! يحسب هالمال
اصلو من طريقه غير شرعيه واخوه على عمى وهو على بينه من امرو ومتمسك بتعاليم دين وتغير بعد السجن صار متدين وكلبو وفكرو ممتثل لاوامر الدين والشريعه الاسلاميه وهذا عندك ابسط مثال الحادثه الي كبل سنتين على نقطه الشرطه الي هين بحديثه هالمجرم الي كتل سبع عناصر منهم بالنقطه كتلهم باسلحه الكاتم وكرر هجمتو مرتين عليها
هذا كان اصلو شرطي واعتقلوه بزمن الاحداث الاولى ومن افرجو عنو طلع متشبع بالحقد وهذا نتيجتو كتل هالعناصر
وغيرهم بعد وهو بذااات نفسو حين مامسكوه اعترف انهم مايفهمون وش هو يسوي وواكفين ضدو ويشتم بيهم
فهالقضيه ماتنحل بعد الا بالكتل لان هالعقول خلاااص انتهت انغسلت تعب سنين هذا يابه تعبانين عليهم هذول ما شروهم بفلوس شروهم بعقيده وهميه
مجااالس ومشايخ وهابيه تدرسهم
الي يدحكونه سني يزرعون فيه حقد الشيعي والي يدحكونه شيعي يزرعون فيه حقد للسني وخلو الوادم تتكاتل على باطل .. وحتى زمن التفجيرات اول مابدا
والذبح على الطريق تذكرينه على شنو سببو !
-اي اذكر بسبب طائفيه
-ايييه وش هي طائفيه هذا يكره الشيعي وهذا يكره السني ! يمشي السني اذبحوه لو عبر لمنطقه الشيعي والشيعي بمنطقتو يتفجر بانتحاري لو بسياره والعالم تذبحت من الجهتين والوهابي هو المستفاد كان يمهد ويمههههد لحين ما تمكن وحطلو رجل بكاعنا
- الله يستر منهم الشياطين مو هيج لا حول ولا قوه الا بالله شيخلصهه وياهم
- يكضيها ربك حنا ضحايا حقد متكدس وهمه بعد ضحايا العقول الجاهليه
تصدكين انا عندي جراح الاكيه مرات يبكي بالليل لحالو
- يبجي !!! ليييش يالله ليش يبجي !
- ساعه الي تشتد الاشتباكات وتروح ضحايا من الطرفين يبكي على شهيدنا يبكي وعلى الي مزعوم شهيدهم
هالجرذ الي نكتلو منهم يبكي عليه
وحاكاني مره بهالخصوص
حكالي ..انا ودي اصد هجوم لكن مااكتل احد يصير هالشي يابه لو ماترضاها مني
سألتو بوكتها وش السبب حكالي
ينقهر على كتل الولد الصغار منهم بعمر ال ١٦ وال ١٥ هذول يحكيلي همه بالهم انهم على عقيده يقاتلون وانا حين مااكتلو تااظلمو مثل ماظلمو الي حشى براسو هالافكار وخلاه يحدر يحاربني وهو مستقتل لاجل دينو وتارك اهلو وديرتو

عاد حكيتلو .. حنا نيتنا صافيه خالصه لوجه الله والوطن حنا نحامي عن شرفنا
نحامي عن حريمنا واهلنا ..مو احنا الي اندكينا بيهم وظلمناهم همه الي حدرو علينه برجولهم ودمرو بلدنا وذبحو ناسنا
حكيتلو انته عندك شك بدينا وعقيدتنا !
حكالي لا يابه احنا اهل الحك من نسل بيت اهل النبي حكيتلو عجل ما تخاف
وكوي كلبك ان تنقهر على اهل الميت منهم فحنا اهلنا بعد الهم ميت وهو ما مات لو ماانه عااال باهل العراق

والله عاد من حينها تغيرت نفسيتو وعاود لنشاط اول .. جراااح عكلو كبير وكلبو ترف بعدو ما معود على الكتل وانا عذرتو كون كتل الانسان ماهو بهين هاذي روح بني ادم مو بهيمه وكثره الموت والدم حدر العين تورث ضيك النفس والهوان لصاحب النفس الطيبه الي يسامح ويعفي عمرو ما يجرع الكتل لان دايما يضل بالو لو اني عفيت عنو ومشى بحال سبيلو

- كثره الطيبه تاذي صاحبها
- اييه لزوم باحيان الرجل يقسى لاجل غايتو وحنا غايتنه الوطن كاعنا مايدنسها محتل وراس حديثي مننا يشم الهوا
- ان شاء الله عن قريب تفرج وتهون
والله يعوض اهل الشهيد ربي يصبر كلوبهم
- ان شاء الله ان شاء الله.

من بعد هاليوم ما طولو اربع ايام واجاني بالليل كالي ...
- تين حبيبه بعون الله حنا من الفجر ماشين نحرر الخسفه تحضرنا فوجين من كل عتاد واليوم وفد بغداد وصل هو والاعلام معو وبكرا مرافكينا للمعركه
- ربي ينصركم يابعد عيني دخيلك حبيبي
انتبه بكل خطوه خالد ياعمري لا تاخذ الولد خاف يصيرلهم شي الله يخليك عوفهم هنا على الساتر
- ماكدر ماخذهم يولو عجل انا امشي بدون ولدي ! اليسأل عنهم وش اجاوبو !
هي موته وحده وانا مااخاف على ولدي من الشهاده ان انا خفت وتهونت غيري هم يسحب ولدو ويسحب نفسو وتضل ساحه المعركه فارغه
- ياربي ياااربي تحفظهم وترعاهم دخيل اسمك يارحيم

ضليت رافعه ايدي وادعيلهم وهو بعدهه
حضني يطمني وبوس راسي وكالي.
- خلينه نصلي قيام هالليله سوا

ابتسمتله ورحت جبتله الاكل اكلنه ومن بعدها بدينا نصلي بالهول سوا ..
هو صوته عالي بكل شي يجهر القول
لاني وياه .. بعد ماكملنا صلاه الليل
ضل يجود القران سوره الاحزاب وسوره الملك وبقينا تسبيح وصلاه على محمد لحد ٣ بالليل يلا اني كلتله ..
-لازم تناملك على الاقل ساعه ترتاح بيهه

رفع ايده ودعى بالنصر والتوفيق بهاليوم وبعدين كام .. رحنه للغرفه وضليت حاضنته واشم بريحته كلبي ماسكن ولا هدأ كل مايمشي الوكت واعرفه راح يروح لمعركه خطره ..

ماخايفه عليه من الرمي لان اعرفه سبع ماينصاد بطلق بس خايفه عليه من الالغام ...

هو غفى واني ضليت كاعده حتى اكعده على الصلاه واودعه ...

وعلى طول هالساعه اني اردد الصلاه على محمد وال محمد يم راسه بهدووء
من اول ماكعدته وصحصح باوعلي وكال
- صاحيه من خوفك تينتي
- لو بيدي امشي وياك والله كلبي ماينطيني اعوفك ومادري شيصير وياك
- تطمني ياعيني بعون الله راجعلك بسلامه
- والنعم بالله اني واثقه بربي مايهون عليه حزني ومايفجع كلبي بيك

حضني بكل قوته واشتم ركبتي بقوه وبعدين كالي ..
- تين حضريلي ملابس غير الدشداشه
واليشمغ عطريه بريحتك هاذي ودي اتلثم فيه واتنفس ريحتك ماعرف كم يوم انا اضل بعيد عنك
- صار ياعمري بس اهم شي ارجعلي بسلامه ضل شكد متريد بس ارجعلي

بوس ايدي وخدي وكام لبس ملابسه وراح يتوضى واني حضرتله بنطرون
وبلوز واليلك العسكري هو معلكه بالزاويه وجواريبه ولزمت اليشمغ
شميت ريحته الدافيه بيه وبعدين رشيت من العطر هواي على ركبتي وراسا خليته على ركبتي وهو دخل وشافني هيج مخليته ابتسم وضل يباوعلي وكال ..
- كل ليله بعد البسيه وخليني اتلثم به الصبح مشبع بريحتك
- موو تدلل ياعيوني

ابتسملي وصار يبدل ملابسه واني واكفه امسح باليشمغ بركبتي واتاكد اتشبع بالعطر ورحت سويتله ريوك واني لافته على ركبتي وهو ياكل ويباوعلي ويبتسم
ومن راد يطلع هو فتحه من ركبتي ومشاه على شعري وسحبه منه واخذه يتلثم بي
من راد يطلع بالباب رفعت نفسي وبست شفته من وره اللثام وضحكت وهو كالي
- ضلي بهالضحكه ياروحي لا تتعبي نفسك ولا تخافي انا كل ماحصل مجال اخابرك اطمنك
- اي ياعيني انتظر اتصالك وسلملي على الولد وكللهم امانه ينتبهون على نفسهم تره احنه بحاجتهم
- ان شاء الله يوصل يلاا في امان الله
- محروس باسم الله ونبيه

طلع وسمعت صوت تجمع الرجال يم بيت صياح وصار يكوللهم بعلو صوته
- حنا ماشين بزوود ومفخره اليموت منا شهيد واليعيش سعيد يااارجال الموت لاجل الوطن هيييييبببه شدو العزم يا يابه توكلنا

سمعت صوت السيارات وصارو يشغلون الشيله باسم عشيرتهم واغاني كلها حماس وطلعو ...

بعدهه الدنيا ظلمه وخيط الفجر هستوه بدا يطلع وهمه راحو ..
اليوم كله مكابله تلفون وكاعده حسين يخابر مو بواهس احاجيه اطلعلي حجه واسد الخط واضل ادعي وانتخي بالائمه
احير شاحجي وعيني على الساعه
عبرت ال ١٢ وهو ماخابر وصارت الاربعه العصر وهم ماكو واني الوب
اخابر مايردون كلهم وماضل بيه قطره دم من هالخوف وقبل صلاه المغرب بدقايق دك التلفون وشفت اسمه
حبيبي الشيخ كبل جاوبته ..
- خااالد حبيبي وينك
- ها يابعد الروح هين انا بالخسفه ياعيني
ماصارلي مجال النهار كلو حنا نلاحكهم بالبيوت مختلين وصار هين انفجار بلغم على وحده من سياراتنه
- ياربي بس لا احد اتاذى منكم
- لاا الحمدلله من عشيرتنا سالمين الولد لكن مع الاسف من الجيش راحت سياره كامله والي بيها بالله انشدهنا بيهم وهالخنايث استغلوها وصارو يشتغلون كنص من ورانا وصارتلك هين ناار على حالها استلمنه البيوت قذايف وسيطرنا عليهم والحين حنا واكفين على بدايه المنطقه وبكرا بعون الله نكمل مسيرتنا لداخلها ونطهرها منهم
- يابعد عمري الله يحميكم ويكون بعونكم
- ان شاء الله منتصرين يلا انا اروح اصلي ساعتين واعاود اتصل
- ماشي حبيبي انتظرك

سد الخط وراح واني سجدت شكر لربي حماهم من كل هالكوارث اليوم ..

كدرت اكل واصلي براحه وضليت انتظره لحد ماخابر مره ثانيه وضل يحجيلي شلون الي كتلوهم كلهم شباب صغار وشكد لكو من اسلحه هنا عدهم
وكال باجر ينقسمون ٣ فرق ..
الاولى تمشط الكاع كدامهم وتفكك اللغم
والثانيه تدخل للبيوت والثالثه تتمركز قناصين وحمايه ظهر ..

وبعدها راح حتى ينام واني هم نمت وكعدني الفجر صوت تلفون هو يتصل
كالي ...
- صباحك عافيه حبيبه
-هلاا بحبيب روحي صباحك امن وامان ياعيني
- تينه انا الحين راح اتوكل داخل المنطقه
واشتكت اسمع صوتك وانا اشم ريحتك كبل ماامشي
- يا روحي انته ترجعلي سالم ان شاء الله
- تينه ادعيلنا انا اتفائل بدعائك
- كل لحظه اني ادعيلكم والله ما وكفت عن الدعاء وانته وديعتي عند ربي ماتضيع الودائع عند الله واثقه يحميك ويحفظك من كل شر
- بااالله الحين بعد هالحكي لازرفهم وامحيهم عن بكره ابيهم
- معددل حبيبي روووح مودع باالله
- لا اله الا الله
- محمد رسول الله
- انا اعشكك تين
- واني امووت بيك حبيبي
- يلا لزوم امشي السيارات حركت
مع السلامه
- بامان الله ياعيني

عشت هاليوم هم بالقلق ومكضيتهه افتر بالبيت وادعي وانتخي لسلامتهم ولحد العصر خابرني وكال ..
- تين حنا بخير وتمركزنا بالوسط الحين ماخلينه منهم جرذ هين
- الف حمد وشكر الك يارب
اكلت ياعيني
- اكلت تمر كل ساع يحدر واحد من الولد يحط بيدي حفنه تمر وبطل مي
- يابعد عمري سوده عليه
- الحمدلله على نعمتو ان شاء الله من اعاود عوضيني باكلك الطيب
- ادلل ياروحي احضرلك كل الي بنفسك بس ارجع

- ان شاء الله يلا انا امشي ادحك ولدي وينهم
- انتبه على نفسك وضل طمني
- تآمرين يابعد اهلي
- يحفظك الله

سديت الخط واخذت نفس براحه
صوته الامان بحياتي ...

خابرت على حسين وكلتله يحول رصيد لابوه خاف يخلص وشلون يخابرني
هو حسين على طول هالسنتين يدزلنه رصيد كل اسبوع الي ولابوه وعباس يدز لجراح ورماح لان هنا شرايه الرصيد غاليه كلش فاعتمدنا عليهم ...

لليل خابرني الشيخ بعد صلاه العشى وكالي ...
- تين ياعيني طالبك
- امر ياروحي
- هين واحد من ربعنا كبل شويه سمعتو يحكي اهلو ماعندهم لكمه ياكلو وضالين على عشى البارحه افزعيلهم يا يابه خذي هالتحت يدك وامشي دكي بابهم
- اي عيني ادلل سوده عليه ينامون بلا اكل هسه البس عباتي واروحلهم بس دليني وين
- الحين اخذ عنوان بيتهم من واحد من صحابو وارسلو لك
-يلا عيني انتظرك

سديت الخط ورحت ركض للمطبخ لميت بالعلاليك شعندي تقاسمته وياهم والخبز العندي كله حطيته الهم ورحت لبيت الشيخه من مخزن المطبخ طلعت العدس والماش والشعريه هم خليتلهم ورجعت لبيتي طلعت جنطه مال ملابس من وخليت بنصهه العلاليك وسديت السحاب
واخذت جزداني والموبايل وطلعت بالطرمه خابرته حتى يدليني اكثر مافهمت بالرساله ودلاني وطلعت شايله الجنطه واخذت تكسي ورحتلهم ..

ومن وصلت ضليت اتاكد من ان هذا بيت ابو فلان يلا دكيت الباب ...
وطلعلي ولد صغير يطلع عمره عشر سنين كلتله صيحلي امك وهو دخلني جوه
وضليت واكفه بالطرمه واباوع للبيت ظلمه وتالي اجتي مريه بعدهه صغيره بالعمر شايله لايت وتضوي عليه
كالتلي ...
- هلا ياعيني
- شلونج خيه
-الحمدلله اعذريني ماعرفتك
- فاعله خير ياعيوني هاي الجنطه بيهه
عشه الج وللجهال تقبليها مني واعتبريني اخيتج
- يااه ياه الحمدلله مامحتاجين احنه ابو البيت ما مكصر
- هو لخاطر ابو البيت اني اجيتج مو رجلج بالمعركه هسه
-ايي والله من البارحه ماشي وعينا بعين الله
- ان شاء الله يرجع بالسلامه اقبليهه مني وعشي الجهال والي تحتاجي اطلبيه مني وانطيج عيوني لو تريدين
- يمن فدوه رحت لهالوجه الطيب منو انتي خيه منين عرفتينا !
- اعذريني ماكدر احجي بس حك الجار على الجار خلاني اجيج
- على راسي وكفتك هاذي والله يمد بعمرك ويحفظلك ابو بيتك وعسى الله لا يكسرلك خاطر بجاه نبيو

حضنتني وبوستني واني كلتلهه ..
- خيه عدكم غاز
-اي عدنا الحمدلله
- الحمدلله امانه بركبتج اي شي معتازته كوليلي هسه تره اي شي بالج اطلبيه ولا تستحين الله عليج
- الحمدلله مستوره حالتنا وربنا مايكطع باحد تسلمين يابعد كلبي انتي تسلمين ماكصرتي
- واجبنه هذا يلا عيني اترخص
- خليني اضيفك شي اكعدي معنا
-لاا ياعيني تسلمين دربي بعيد خليني الحك ارجع
- مشكوره يابعد عيني تشكريلي من الي دلاكي بيتنا

ابتسمت بوجهه وطلعت مشيت لراس الشارع واخذت تكسي وخابرني الشيخ
- هاا حبيبه وش صار. معك
- وصلتلهم كل الي يحتاجوه منا لرجعه ابوهم وهسه طلعت
- كفووو والله تعيشين يابعد عيني
عليم الله سريتي كلبي والحين انا اكدر انام مرتاح
- ان شاء الله كل عمرك مرتاح
- ان شاء الله يلا من تصلين خابريني
- ماشي عيني

سديت الخط وضليت اباوع للشارع وابتسم براحه اني هم ارتاح كلبي بهالطلعه السريعه وفرحت كلش من ربي خصني بهالمهمه اليوم وصارت فرحتهم على ايدي ...

رجعت للبيت وخابرته وهو بنص مادنحجي كالي لحظه وسمعته يحجي ويه واحد وبعدين رجعلي يضحك وكالي ...
- حبيبه تدرين الحين هالرجل الي حكيت معو هو نفسو ابو البيت الي مشيتيلهم
- ها صدك
-اي والله مادري كيف عرفني انا الي ارسلتك حدر علي يبكي وحضني وهو يهمسلي مشكور كل عمرك كريم من اصل كريم وحكالي الحين لو انه استشهد مأمن على عيالو دام انا بينهم بالله خجلني ماكنت رايدو يعرفني
- يااابعد عمري اكيد هسه مرته خابرته
فرحانه وشوف شلون اجاك متلهف
-ايي بالله كان يبكي من فرحتو
-الحمدلله الي قسملنا هالفرحه اليوم
بس اني ماحجيتلهه اني منين ومنو دزني
- اييه اعرف جايز ان هذا الولد الي سالتو عن عنوان بيتو هو الي وصلو الخبر وفهمها الحين
- ايي اكيد هيج السالفه
- والله اني محظوظ بحرمه ماانخلك مثلها بهالكون والله
- ياروحي انته
- جايز بكرا بالليل انا عندك ان شاء الله
- يابعد عمري كل الهلا ان شاء الله ترجع بالسلامه
- ان شاء الله يلا انا انام الحين
- نوم الهنا ياروحي

سديت الخط ورحت تمددت ونمت بالهول بالكاع وفاتحه الشباك حتى تجيني بروده
واني اغفى شويه ويخابر حسين ..
- ها ابني شو كاعد بعدك
- يممه مشتاكلك انااا لايمتى اضل مفاركك
- ياعيني شبيدي عليك غير هالحرب بعدتنا
- يمه خليني احدر مع ولد عمي واكعد معك
-الطريق خطر يمه اكعد واسكت
- استغفر الله يمه احكيلها مشتااااك ماتحمل صارلي سنه ونص اتصبر بحكيك
- ابني قابل صغير انته ماتتحمل فراكي صرت جبير لازم تتحمل وتصبر
- يمه يعني الكبير مايشتاك لامو
- حبيبي اصبر هالشهر ان شاء الله تفرج

يابعد كلبي وليدي لا تقهرني عليك هيج اني بالكوه متحمله بعدك هالسنه
- سنه ونص يمه
-ههه اي سنه سنه ونص
- عجل انتي ما تخافين علي مثل ابوي هو تتركينا وتكعدين حدرو واناا ماهتميتيلي
تاركتني هين وحيد مع هالاخت الهوجه هاي اكلها يلعب النفس كاضيتهه علي بيض وطماطه خيست بطني منو
-هههههههههه دطول خلكك ياابني شبيك هيج على البنيه مو زين مداريتك
- ماااريدها ماتزوجها عاد شكبرها صارت الي مثلها جهالها الحين مالين البيت وانتو مربطيهه بيه
- يااا ولك شبيك على اختك حسين كافي شجاك
- مالي خلك يمه طاكه روحي هين الكعده ماتنراد بدونك
- اوووف اووف يمه شبيدي عليك حبيبي
- يمه ماتحمل بعد اريد ادحك وجهك عاد انتي ماتعرفيني انا مااصبر بدونك شلون تتركيني هيييين وحدي وتكعدين معو
- معو شنو ولك ابوك هذا شلون اعوفه وحده علمودك
- ايييه اناا عادي اتحمل واصبر لكن ابوي مايصير ليه مايصير بله من منا الكبير ! ليه تفرفقين بينه
- اهوو شبيك حسين هسه النوب درت على ابوك
- ماتحبيني مثلو لو تحبيني كنتي خليتيني حدرك بس انتي ردتي تضلين معو وحدك
- ابني مو وكت غيره وسوالف الجهال هاي كافي كبرت عليهه هسه الوضع صعب وابوك بنص المعارك شلون اعوفه مايريدله احد يداري هنا يغسل هدومه يسويله اكل لعد يضل وحده مو عيب !
مااسمعك بعد تجيب طاري ابوك ابد مفهوم
-ايييه فاهمينها من زمان يمه
-اي لعد اعقل عاد
-اييه
- حسين
-هاا
- احبك وليدي لاتضوج وتقهرني
- اوووف يمه مشتاكلك والله انا اشتاكلك اكثر من ابوي
-ههههه اهوووو رجعنه كافي امشي روح نام يلا وعوفني انام نعست
- زين يمه من تكعدين خابريني
- ماشي عيني يلا لتضل تحجي على اختك خبلتهه كافي عوفهه بحالهه
- ايه فهمت هذا الي تعرفينو اختك وابوك
فهمت

سديت الخط منه واني اضحك على سوالفه كل يوم لازم هالمنوال ينعاد
طلعت تربيه الولد تعب اكثر من البنات
شحلاتهه بنيتي خفيفه على كلبي والله بيتي وحشه بدونهه ..

ثاني يوم الظهر خابرني الشيخ ويصيح ..
- يولي تييين الحكي
- خير خير حبيبي خير
- يولي جراح تصاوب وخذوه الحين للمستشفى يولي الحكي عليه امشيلو
الحييين
- يمه سوده بوجهي جراااح
.
.
.
يتبع

#شقراء_بغداد

الجزء_الثاني_بارت_٩


من ساعه ما عرفت من الشيخ ان جراح
تصوب ونقلوه للمستشفى ركضت لبست عباتي واخذت فلوسي وتلفون وطلعت
امشي واتلفت ادورلي تكسي واني اردد
يارب لطفك ورحمتك بهالولد يارب

بين ما وصلت المستشفى وسألت عليه
كلولي بالعمليات ويامن يدليني بيهه
صرت امشي واسأل بالممرضات
ووصلت للردهه واشوف حسن وولد وياه واكفين بالردهه وايدهم وملابسهم مدمايه ومتربين ... ركضت على حسن ولزمته من جتوفه واسأله ...
- شصارله جراح ولك عمه احجيلي
- عمه جراح راح على بيت ويه فريقه
وهو بالمقدمه وضربوه برجلو اليمين
ساعه ما دنك عليها صاوبو النوب
ببطنو
- سوووده عليييه يمه جراااح
- كان صاحي من تلاحكناه وعمي الشيخ
دحكو من بعيد وصاح اسحبوه من هين
واحنه خليناهم بنص الهجوم وشلناه ومشينا كبل للسياره وهين فقد وعيو
- عمت عيني عليه الله لا يوفقهم الله لا يهنيهم بليل ولا نهار الله يحرك كلبوهم مثل ماحركو كلوبنه
ربي دخييييل اسمك ياعظيم شافيه وعافيه
هذا روح بيتنه ياربي

ضليت امشي بالردهه واخابر على الشيخ وهو ميجاوب وحتى رماح ميجاوب واني كلبي مثل النااار الوب واحسب الدقايق
لطلعته ..

جان تخابرني غاليه رفضتها شحجيلهه هسه تروح تموت ضلت كل ماتخابر ارفضهه ودزيتلهه رساله بعدين بنتي
يلا بطلت تخابر ..

ولحد ما طلعوه احنه مابقينا امام ماانتخيناه .. اخذوه كبل للانعاش
وصار يحجيلنه الدكتور ..
الطلقه الي بطنه ضاربه الامعاء ومخليله بدالهه اصطناعيه على كد الي متضرر
والطلقه الي برجله نابته باللحم بالكرشه
مال رجله اليمنه صايره ضربتهه صفح
وهم مخيطيهه اله وينتظرون حالته تستقر

اني ابجي ماوكفت بجي واخابر على الشيخ ميجاوب حرك كلبي ازيد خفت لا هم صايرله شي مبين الوضع يمهم مايرحم ...

ضلينه كاعدين كدام الردهه مال الانعاش
ومتصفنين ورجعت خابرتني غاليه جاوبتها ..
- ها بنتي
-يمه خيرك ؟ ماتردين عليه لا انتي ولا ابوي ولا اخوتي خيييركم
- بنتي جراح تصاوب بالمعركه وهسه طلعوه من العمليات
- شنووووو يممممه جرااااح اخوووي '!
- اهدي يمه اهدي لا تفزعين كلبهم
-يمه شلونه الحين جرااح وين ضربتو يمه لاتضمين عليه بغلاتي عندك يممه
- لا تبجين بنتي كلتلج لا تخوفيهم
جراح زين هسه هو بالانعاش مضروب برجله وبطنه بالامعاء وبدلوهه اله ووضعه مستقر هسه
- يمممه كل هذاااا باخوووي وتحكيلي مستقر يمه لاتكذذذبين عليييييه
- غاليه فدوه اروحلج كافي تره ماضل بيه حيل داكلج هذا الصار احجيلهم بهدوء ولا تشلشين الدنيا بالبجي صيري قويه يلا بنتي حبيبتي امه والشيخه بحاجتج يلا عيوني انتي اسكتي كافي
- يمه اول مايصحى تخليه تخابريني اسمع صوتو يمه دخيلك لاتنسي
- ان شاء الله بنتي
-وابوي وين ؟ رماح وينو !حدرك همه!!
- لا بعدهم بنص المعركه محد منهم يجاوب
-لااا يالله دخيلللك ربي اخووتي
- امشي روحي بلغي امه وكافي تبجين

سديت الخط واني راسي مسطور وجسمي يرجف رجف بالكوه كاعده
وصدك هالمره حسيت نفسي وحيده
بدونهم .. هنا وحدي لا رجلي ولا ولدي ولا عم ولا خال يمي وهالولد نايم جوه
ماينعرف حاله شيصير بي .. صدك حسيت بضعف هنا وقله حيله واحتاجيت لكل فرد منهم ...

صار الليل يلا خابرني الشيخ يكح وصوته مبحوح وبالكوه يحجي ..
- شبيك ياروحي وينك ياعيني مو كلبي شيب اي ليش متجااوب
- يولي انا مشدوه حالي بالله هذول كانهم دود منين مانندار عليهم يطلعو اكوام
يولي جراح طمنيني عنو
- بالانعاش هسه كالو حاله مستقر وينتظروه يصحى
- الحمدلله بالله انا كل خطوتين امشيها ادعي له هذا عزيز اخوته ياتين هذا ان راح يكسر ظهري
- لااا اسم الله عليك وعليه الحمدلله عمليته ناجحه ووضعه مستقر منا لباجر بلكي يصحى ونتطمن عليه
- ان شاء الله
- شبي صوتك ليش هيج مبحوح
- من كثر ما صارخت على الرجال هين
من دحكتهم سحبو ولدي بدمو ما ضل براسي عكل فزعت هالرجال بعلو صوت ودخلنا عليهم ياكاتل يامكتول وهمه جرذان والله خنايث وااالله وعزه الله خنايث يتختلون ساعه مانكرب البيت ومسوين زواغيل يتختلون فيها وهالجيش يعرفون دروبهم ويسحبوهم واااحد واحد

ضل يكح وبعدين رجع كمل حجيه ..
- من كثر ما طلعو منهم متختلين خلونا نمشي بامان لانهم كانو يكنصون من زواغيلهم ما ندحكهم وبس نصل حدرهم يتختلون وكضبوهم والله اعدموهم جماعتنه بمكانهم بالراس يحطون هالجيله
- سبااع الله يحفظكم
- ابشرك حررناهه للخسفه الحين رفعنا علمنا عليها
- الف حمدلله الف حمدلله محمووود مشكور ربي الف حمدلله ياربي شكد فرحتني يابعد عيني يارفعه راسي ابطال انتو والله وكدرتو عليهه
-عجل يابه حنه الورثنه المرجله من زمن حاام وحنه الحفظنه ماااي وجه العروبه
حنه عيال حمد ليا ركبنا الخيل عدليين
وكلما غزتنا قوووم ترجع ندااامه يابه
خلينه هالكاع حسره بكلوبهم والله
- انتم ابطال ورجااال ما مثلكم رجال
كول وفعل والله ربي نصركم وعانكم
عليهم لانكم اسباااع حرام تتاذون على ايد هالخنايث ..

ربي اله الحمد والشكر على هالنصر الف حمدلله طلعت بسلامه
- يستاهل الحمد ربنا ذو فضل عظيم
- حبيبي شوكت ترجع
- الفجر بعون الله انا عندك بالمسشتفى
- يابعد عيني والله ما تمنيت يوم رجعتك كبل للمستشفى بعد هالتعب
- هاي مشيئه ربنا والحمدلله اهم شي ولدي طلع بسلامه كلشي يهون لعينو
- الله كريم .. ارتاح ياعيوني واكل
- زين .. انتبهي على نفسك تين مع السلامه

سديت الخط وضليت مغمضه واحمد ربي واشكره على هالنصر والله فرحه بكلبي صار هالخبر وتأملت بي خير وكلت ان شاء الله يوم لباقي الانبار ونخلص منهم

كل شويه يتصل واحد يا غاليه يا اام جراح يا عباس ويسألون على وضع جراح وامه تدك وتلطم تريد تجي عليه
وغاليه وياهه هم والشيخه تصيح عليهن
بهدااي خلنه نفتهم .. واصير افهمهم الوضع خطر هنا مو مال جيه الطريق للانبار كله دواعش ومعارك وهنه يلوبن
على شوفه جراح ...

جان هالحال صعب على الكل ..اني احتاج اخوته هنا يمي وهمه كلبهم نار عليه وبعاد ميكدرون يوصلون يمه ..

حسن راح جابلي كيكه وعصير اكلت
وخليت راسي على الحايط وضليت مغمضه وافكر بحالنه شلون تاليه ؟؟

والفجر اجاني الشيخ بهدومه نفسهن الي طلع بيهن اخر مره مني .. لاف اليشمغ على راسه وكاف ردانه واليلك مليان شغلات مافهمهه ...

رأساً وكفت وضليت اباوعله وابتسم وهو يحجي ويه الولد وعينه عليه شويه ويرجع يباوعلهم وبعدين عافهم واجاني يبتسم بتعب ويباوع لعيني واني ادمع واردد الحمدلله رجعلي بسلامه ..

لزمت ايده وكلتله ...
- يا من فدوه رحت لهالطول ربي راحمني بيك والله هسه ردت روحي بشوفتك ياعيني
- علييم الله صوتك ينسيني تعب هالايام
وكوارثها
- يا بعد روحي تعال اكعد ارتاح

كعد يمي وهو يكح ويكولي ..
- هين بلعومي متجرح والله ذابحني
- اسم الله عليك انزل للصيدليه اجيبلك دوا
اله
-لااا يولي اكعدي انا بعدين انزل
- ياروحي اكلت ؟
- اييه ذبحو بمناسبه النصر وتعشينه الحمدلله
- الف عافيه ..شنو ليش هسه يلا اجيت
- عجل غير اثبت مواقع رجالنه حدر الجيش واتطمن على حالهم يلا امشي
- هاا زين رماح وينه
- ارستلو ياخذ السلاح للمخزن ويحدر هين
- ماصارله شي مو
- لا والله تصاوب بزندو وعالجوه البارحه
هين حدر لهالمستشفى العصر
- يااالله لعد ماكلتلي ليش ضميت عليه
- ماتسوه يابه ماردت ازيدك خوف
- يالله خالد غير تكول خطيه ع الاقل اتحمدله بالسلامه اجي اشوفه سوده عليه
- يولي حكيتلك زيين ماتسوه الخوف
هو حدر هين عالجها وعاود حدرنا واليوم كضب سلاحو ومكانو ولا كأن به شي
والحين يحدر ودحكيه بعينك
- الحمدلله لعد اني شريد اهم شي زين

ضل يكح ويفرك بكصته واني كلبي يمه
وكفت وكلتله ...
- رادلك دكتور مايصير تضل هيج
-اكعدي يولي
-مو وكتهه هسه امشي وياي يلا امشي يلا ياعيني

جريت ايده وكومته ونزلنه للطوارىء
بين ما انتظرنا الدكتور هو بس يكح ووجهه احمر واني اسمي عليه وعيني على الباب لحد مااجه الدكتور المناوب
وفحصه طلع ضغطه صاعد
سجله على مغذي وابر وشراب مال كحه
واني اخذت الورقه ورحت للصيدليه جبتهن واجيت انطيته للممرض علكه اله
واني واكفه يم راسه وهو شويه يفتح ويرجع يغمض لحد مانام ..

رحت للكافتريا اشتريت مي وكلينس
ورجعت ضليت كاعده يمه واتلمس بوجهه ودموعي تصب ..
كلشي ولا الشيخ كلشي تكدر اتحمل الا اذاه ...
ضليت كاعده لحد ساعه بالتسعه الصبح
يلا هو كعد من وحده وشافني يمه مخليه
ايدي على راسي وصافنه عليه
ضحك وكالي ..
- هااا يولو ضاله وحدك
- شلون صرت ياعيوني
-الحمدلله كأني كنت معوز نوم
- لا هو بالعلاج اكو منوم هسه طمني احسن صرت راسك ميوجعك
- لااا الحمدلله حديد
- وبلعومك
- شويه بعد
- هسه اكل وعندك علاج تاخذه يصير زين

انطيته بطل المي وكعدته يشرب وهو ضل صافن شويه وبعدين كال يالله ونزل
من السديه ... ضليت لازمه ايده خايفه عليه وهو يبتسم ويعصر ايدي

صعدنا دنشوف جراح وشفنه الولد نايمين
على كعدتهم ..عفناهم نايمين ورحنه ندور الدكتور حتى نشوف وضع جراح ..

وهو طلع هستوه راح يبدا بفحصهم ودخل للردهه وضلينه احنه بره ننتظر بي
من طلع كال وضعه زين وراح يحولوه لغرفه خاصه بي ..

هنا الشيخ كعد الولد وانتظرنا يطلعوه
وشفناه شلون منتهي وحالته تكسر الكلب
وهناك ضلينه نبوسه واحد واحد وهو بس يمتمت بالحجي وشويه يفتح ويباوعلنه ويرجع يغفى وضل هيج للظهر يلا صحصح وصار يون من الوجع
واني جنت فاتحه تلفون احجي ويه غاليه ماترضى تسده تريد تحاجي وهو يصيح
وهي تبجي وامهه تبجي عاد سديته وعفتهن يخابرن وماجاوب

ضربوه مسكن والشيخ يم راسه واكف
يقراله ايات ويصبر بي ولازم ايده
وهو يصيح عطشاان وميقبلون نشربه مي
بس نبلل شفايفه شويه ..

رماح كل شويه متعارك ويه ممرض لان ميخلون اخوه يشرب مي وهو يصيح عطشان تخبل عليهم يكلوله مو هسه اصبر وهو يصيح ماخله كلمه ماحجاهه عليهم والشيخ عايفه بكيفه وملتهي بجراح

لليل يلا قبلو يشرب شويه مي وكل ساعه يلا ننطي ربع من البطل ..

كدر يحجي ويه امه والشيخه وغاليه واخوته وطمنهم عليه وجماعته صارو
كل شويه جايين عليه ويجي الشيخ ياخذني بره لحد مايطلعون يلا ارجع

رجعني للبيت ثاني يوم سبحت وسويتلهم اكل واخذتله ملابس ورجعنالهم ..

رماح وحسن ابد ماعافوه ولا دقيقه
سبحو بالحمام مال غرفته واكلهم وشربهم كله يمه ... يشاقوه ويشوفوه فيديوات بالتلفون ويخابرون على جماعتهم يضحكون وياهم ..
وغاليه كل ربع ساعه لو نص ساعه تخابر وهو صار يكولها ..
عوفيني بزعت زين مابيه شي على حطت ايدج ..
كامت عاد تخابر كل ساعتين تحاجيني شويه وترجع تحاجي ورماح كل شويه مرزلهه وهي تبجي ويرجع جراح يتعارك وياه لان يحجي عليهه ويضل يرضيهه ويكول ..
ارضي عاد يولي مو الكاع هين حمرره
محضوره وكلنه نضحك لان ندري بيهه شكد تشلع كلبه ومتدللـه عليه وهو طايعهه

ضل اربع ايام هو بس يشرب عصاير ومي وباليوم الخامس يلا سمحوله شوربه بس كون خفيفه ومضروبه بالخلاط
صرت اسويله الشوربه ورماح يوكله
وهو دايماً نحلان وماله خلك بس يبتسم لحجيهم ويرد على تلفونات اهله

الشيخ يلوب فوك راسه اذا يطلعله ساعتين
يرجع جايبله برتقال ويكولي عصريله
لا تخلي بلا مايحط شي بحلكه
ويضل واكف يم راسه ويتلمس شعره
ويحجي وياه بهدوء ..

وعلى طول كعدته هو لازم سبحته وعينه عليه ويسبح ..

طلعوه للبيت ونوموه بغرفه الشيخه
وضليت اني يمه اجيبله طشت المي واغسل رجليه وابلل الخاولي وامسح جسمه وهو يستحي منه مغمض وداير وجهه وعاكد حواجبه بس اني استغل الولد طالعين واغسله همه شمعرفهم

ضاله واكفه بالمطبخ طول اليوم لان جماعته رايحين جايين عليه واني كل شويه اصب جاي واصب اكل ورماح يودي ويجيب والشيخ يدز مسواك وبالتلفون ضال ويانه ..يرجع على العشى
يتعشى ويضل مكابله وكاعد
صرنا اني وياه نام بالهول ورماح وحسن ينامون يم جراح بغرفه الشيخه ..

جنت اعرف الشيخ صارف كل الفلوس الي جانت جوه ايده بالبيت لان المسواك غالي والخطار هواي وهو مايحب تقصير باي شي وبالاخص الفواكه لجراح كلش غاليه بوكتهه وهو يشتريهن مايهمه
والي يكدر يحصله من البساتين هم يجيبه

صار اخويه علي يحوله الفلوس وماادري منين يروح يستلمهن بس يكولي اخوج حولهن مال شغلنه الي بغداد ..
جان علي كل شهر يجمعهن وينطيهن للشيخه مصرف الهم والشيخ موصيه على هالشي بس من اعتازهن والشغل الي بالرمادي واكف اضطر يوصيه يحولهن اله ...
حسين وعباس وصكر يشتغلون هناك
كل واحد بمكان ..
حسين اشتغل بمولده وعباس وصكر بمطعم وصارو يصرفون على البيت
غاليه تخابرني تكولي ابيع ذهبي وادزلكم الفلوس واني مااخليهه اتأمل هالايام تفرج
ومانحتاج وعدينا هالشهرين هيج ..

صار الساتر هدوء اكثر من قبل ومتسيطر عليه من الجهه الغربيه
بس الشرقيه خطر عليهم ويعانون منها

جراح كدر يوكف على حيله من جديد
ويمشي على العكاز يروح للساتر ويه اخوه ومن يرجع مايخلي احد بالحكومه مايحجي عليه وعلى الدواعش لسانه مايوكف حجي عليهم ليل نهار على طول ماهو كاعد يحجي عليهم اشكال الوان

غاليه خلته يشترك بالنت مره وجان كلش ضعيف كلشي ماحصل منه ومارجع جدد بعد ضل على الرصيد يخابر وهي من تحوله رصيد يرجع يرزلهه ويكوللهه اكو خمس اخوه غيرج يدزون لادزين انتي
وهي تسده منه تبجي وتخابرني تتشكى
واني اطيب بخاطرهه ..

حسين حارك كلبي حرك لا يرضى يداوم ولا يدرس وهو هالسنه سادس علمي ومن اول السنه هو مطنكر ميداوم واذا جبرته وراح من يرجع يكولي تره كلشي مافهمت بس اتصفن بالصبوره وماداوم بعد .. يخليني اشب بنار واضل اصيح وارزل بي وهو قافل عقله ميداوم
والسبب يكولي مشتاقلج لو اشوفج لو ماداوم .. مالي خلك دراسه واحنه بهالحال لو تجونه لو نجيكم لشوكت نضل هيج !

اضل ابجي مرات حيل اشتاقلهم راح يصير سنتين مشايفتهم وهو مايرضى يداوم وشالع كلبي ..اخوته يداومون وهو لا مكضيهه الصبح نايم ومن العصر بالمولده مايرجع للفجر ..

خليت اخوته يحاجوه والشيخ رزله وجرحه بالكلام وهو يكللهم لتعبون نفسكم عقلي قافل ومو يم الدراسه هسه ..

اخر شي ايسنه منه وعفناه وضل كلبي محروك عليه شلون ضاعت عليه سنتين

جراح رجعتله صحته وصار ضعيف
واكله لازم مو دهون كله سلك وعصاير وشوربه بالخلاط .. صار وجهه ضعييف وراح هذاك الكرش والخدود كلهه راحت
وهو عصبي ليل نهار يحرك بدمه
ويريد يرجع للساتر ويه جماعته وابوه يكوله ارجع لصحتك وبعدين ارجعلنه
وبس كدر يمشي زين رجع وياهم وصار يبقى يومين بالساتر ويرجع يوم المغرب بس ينام هنا ويسبح ويطلع من الصبح
واليوم الي هو هنا رماح هناك ومتعاكسين بنزلتهم ...
الشيخ كل يوميه المغرب يرجعلي
نتعشى سوه ونضل نسولف ونام من وكت حتى يطلع هو من الفجر يروحلهم ..

مره طافيه الكهرباء والدنيا حاره طلعنه اني وياه كعدنا بالطرمه ومرتجين على الحايط مال استقبال ..

سألني بكل هداوه وهو يباوع للسمه ...
- تين انتي ليه رضيتي تضلين هين وحيده ومارديتي لديرتك وناسك ! فضلتيني على ولدك فهمتها ..

لكن اتعجب رفضك لبغداد وهي موطنك الاول
- اني عندي الوطن قربك شسوي بغداد وانته مو بيهه لو تروح اروح وياك
ماعندي مشكله
- هههههه يعني كل شي ربطتيه بوجودي
- لعد اكو اهم من وجودك !
- زين يعني ماخفتي هين وحدك وانا اتركك بهالمنطقه طول هالسنتين واحنه بنص حرب وضكنه الويل !
- لا والله خفت وشبعت خوف هم
- عجل عجب ما طلبتي بيوم نمشي من هين. ؟
- ادري هالطلب لو طلبته راح تاخذني بس ماتبقى وياي واني مستحيل اعوفك وحدك
- ليه يولو صغير وتخافين علي ؟
- لاا
-عجل وش الي بالك !
- احجيهه الك بصراحه اني من موجوده هنا ادري بيك تخليني كدام عينك وتحمي نفسك وترجعلي سالم لان تخاف عليه شلون اضل بدونك وحيده هنا ! بس لو اني رايحه لبغداد جان من اول شهر تضحي بنفسك وماتحسب حساب لشي
لانك مأمن علينه هناك ماتفكر وراك شي يجبرك ترجع وتهتمله بس عقلك بالوطن
- هههههههههه بالله انتي كدرتي والله
صبرتي لحد ماكدرتي تخليني عايش للحين ولا انا الف مره اصل للموت ويبعد عني شعره وانسحب خطوتين حتى اتفاداه لاجلك بس والله لاجلك افكر بحالك هين وحدك بنص هالوضع
- اي شفت هذا هو مقصدي من ضلتي هنا
- عظيمه والله انتي ام فكر عظيم انا محظوظ لانك زوجتي حظي من الدنيا انتي وانا قلتها مره واعيدها مليون مره ربحي بهالدنيا انتي

ضحكت وميلت راسي على جتفه وهو لازم ايدي كلتله ..
- اني اريد اعيش واموت على ايدك مو تعوفني بنص الطريق ماسامحك تره
- عسى عمرك طويل ياعيني
انا ماياخذني منك شي وعد ياتين وعد مني
- طمن كلبي هذا وعدك حبيبي
- تين مشتاكه لحسين!
- حيييل مشتاقتله وكلبي ملهوف عليه
- والله لو ان الطريق بي مجال ينمشي
كنت اخذتك لكن والله الطريق ملغوم والي يطلع من حديثه لزوم يعبر على الصحرا
ويجازف بنفسو ولو يصل لو لا
- الله كريم نصبر ان شاء الله تفرج
- تدرين انا هاذي اكثر مره مرتاح من بعد زواجنه لليوم
- لييش يعني
- لانك حدري وحدي وكل وكتك الي ما يشاركني بتينتي حد لا ولد ولا بنت ولا مسؤليات
-ههههههههه اشلون عليك سوالف
على اساس اني قبل عايفتك
- لااه بس مجرد ماالاكي عين لي وحدي هاي راااحه انا بالله ماتحمل اهتمامك للغير حتى لو كانو ولدنا ماتحمل ادحك هالشي ابد والله وهاي كبرو وشبو وانا شيبت ولو دحكتك توكلي ابنك انا يضرب مزاجي وما ينعدل بعد
-هههههه شلووون بيكم انتو شلون حتخبلوني هو يصيح تحبين ابويه متحبيني انته متريديني اداري احد زين اني شسوي
- طنشيه بعدو جاهل لا تدللي وتخليه يصير مثلي مايكدر بلا الدلال
-ههههههه اووف اووف دللتكم زياده
-هااا
- تستاهل الدلال شيخنا

ضحك واخذ سراحيه المي يشرب وضلينه كاعدين لحد مااجتي كهرباء
وطبينه جوه نمنه ..

مشت الايام ودخلنه شهر ال ١١ ب٢٠١٥ وحديثه بعدهه محاصره
وحسين فد مره تعبت نفسيته ويخابرني بس يبجي ويتوسل يشوفني لو بس مره
واني كلبي منا مجمر من فراكه رحت للشيخ كلتله ..
- خالد حسين تعبان ومايصبر بدوني بعد
- ابنك جاهل مايكبر
- لاا مو تدري بي شكد متعلق بيه لتحجي عليه
-اييييه فهمنا
- تكدر ادبرلي روحه اله فدوه اروحلك
بس مره اشوفه والله كلبي نار عليه ماتحمل بجيه عليه وفراكه بعد
- يولي اناا لو كادر كنت اخذتك لكن الدرب خطره
- هسه مو ديجون الجيش شوف طريقهم منين ونروح منه فدوه رحتلك خالد جنها هالمعركه هم راح تجر بعد سنه وماتخلص شلون اني باابني
- استغفر الله زين يابه زين ادحك كيف ترهم ويصير خير لكن تعذريني لو ما كدرت
-اعذرك اي بس جرب فدوه
- ان شاء الله

ثاني يوم طلع مثل عادته للساتر من الصبح ورجعلي بالليل وكالي وصيت جماعه يدبرون لنا طريق ويردولي خبر
كلت يالله بلكي تفرج وخابرت حسين
وكلتله راح اجي بس نامن طريق ورجعتله حيويته شويه و وره يومين رجعلي الشيخ خبر ان لازم نطلع ويه رتل عسكري و بطريق الصحراء مو على المناطق مال هيت والرمادي وهذني
لازم من الصحراء وعلى النجف ونطلع من هناك لبغداد ولازم يوقع على كفاله
لو صار شي بالرتل العسكري هو يتحمل مسؤوليه واذا صار علينه شي همه مالهم دخل ..
وكالي ماجازفت بهالولد وما وقعت
ضليت الوب واسودت الدنيا بعيني
حسيت هالمره صدك احنه متحاصرين
ومحد النه وراح يضلون ولدنا واحد وره الثاني يستشهد لحد ما يقضون عليهم

ضليت ابجي وهو شافني رزلني ويكولي مابيدي شي عليج اصبري
عفته ورحت للغرفه كعدت وحدي واهدي بنفسي وخابرت حسين كلتله هيج وهيج السالفه وهو ضل يصيح ويلح الا تجون
عاد رزلته وسديت خط بوجهه ورجعت للشيخ نمت على رجله وهو يمشي ايده على شعري ويخابر بجماعته
وراهه
٣ ايام ضبط واجاني اتصال من حسن
يكولي الشيخ تصاوب بانفجار وطلعو بي ولده للمستشفى ...

هنا عطت عيطه شكت بلعومي وركضت لبست عباتي وطلعت بالشارع امشي مثل المخبله ادور سياره وطلعت كبل للمستشفى واخابر بجراح كالي انتظرج باب الطوارىء
من وصلت لكيته واكفلي هناك واخذني كبل للشيخ ..

شفت عيونه كلهه ددددم تصب دم وصدره وجتفه كله دم ومجرح ضليت ابجي بحركه واني لازمه ايده واكوله
فدوه لتعوفني وهو مايحجي شي ومنظر عينه كطع كلبي شال شكو عقل براسي
اخذوه الممرضين بالسديه ومدري وين راحو واني وكعت من طولي وابجي وجراح لازمني ويهدي بيه واني فاقده مادري شحجي شسوي بس منظر عينه كبالي ...

كومني وضل لازمني واني ارجف واخذني وراهم لردهه العمليات وضليت كاعده هناك وادعي وانتخي بعلو صوتي
كلشي ولا الشيخ انجن هنا مايضل براسي عقل ...

ساعات مرت عليه مثل السسسم اتجرعهن لحد ما طلع دكتور وكاللنا
- الشظايا الي بجتفه وصدره طلعناهن ونضفنه مكانهن بس الي بعينه مانكدر عليهن هنا بالاخص اليمنه رادلهه جراح مختص بالعيون وماعدنا هنا دكتور الهن
كدرنا بس نظف مكانهن بشي بسيط ونوكف الدم بخياطات بسيطه

ضليت ادك والطم وابجي حبيبي خالد يتاذى بعيونه من عمت عيني عليه
جراح عافني وراح وره ابوه من طلعوه اني بالكوه امشي واتعثر بعباتي وعيني مغوشه من البجي بالكوه اندل دربي
وبعد ما خلوه بغرفته ورحت شفته وتلمست عيونه الملفلفه بالشاش وجتفه وصدره المطكع عليه التعقيم الاصفر
دنكت بوست راسه وكلتله ...
- الحمدلله نفسك موجود وكلشي يجي من ربنا نعمه ان شاء الله تتعافى يابعد حيلي انته

باوعت على جراح يباوعلي وعاكد حواجبه وعيونه تلمع ويخابر ورماح مخبوص ويه الممرض يريده يجيب بطانيه ..
رحت على جراح وهو سد تلفون كلتله..
- تدبر طريقه ونطلع ابوك منا اليوووم
فهمت اليوم نطلع عينه اذا ضلت هيج تسكط
- مااناسي هالشي عمتي والحين كنت ادبرهه على التلفون بس اصبري
-مااصبر جراح مااكو صبر امشي روح منا ولا ترجع الا وياك حل لطلعتنا زييين

هز راسه وطلع واني رجعت كعدت يم الشيخ ولازمه ايده واتلمس وجهه وادعي ربي يعديها على خير ويكوم بالسلامه

للساعه ١٢ ونص بالليل اجاني رماح وكالي ..
-عمه جراح خابرني وكادر يحصل موافقه من الجيش وياخذونا الفجر لقاعده عين الاسد ومن هناك نطلع بالطياره لبغداد
-اي زييين الحمدلله
-ايه امشي اخذك للبيت تلمي الغراض حتى ساعتين ونطلع من هنا
-ومنو يبقى هنا
-ابقي حسن
-زين خلي اكعده

تلمست وجه الشيخ وضليت احاجي حتى يكعد وهو يرد عليه بس هاا واي
كلتله على روحتنا وكال اي وبعدين غطيته زين ورحت ويه رماح لبيتي
لميت ملابسنا وذهبي وودعت بيتنا بدموعي وطلعت واني اخابر غاليه
احجيلها على طلعتنه هالليله وهمه كلهم كلبهم على الشيخ ويتباجون عليه

رجعنا للمستشفى واخذنا الشيخ بكرسي متحرك للباب والولد صعدوه بالسياره يمي ليوره ضليت مخليه بطانيه عليه مغطيته ومخليه ايدي وره راسه وهو يون
واني اصبر بي وامسح بدموعي

كل لحظه من هالساعات بمثابه الموت
كلشي مانعرف شيصير وكلوبنا محتركه والخوف كاتلنا ..

بالاخص اني ما شايفه هيج اجواء حرب
وجيش واسلحه وهمه منظرهم يخوف كلهم ملثمين ومسلحين وصوتهم عالي

منا رجفتي على وكعته بعدهه بجسمي
ومنا هو يون وحالته تكسر الكلب وهو سندي اني مامتعوده بدونه شسوي شلون اقوى على هالوضع مادري !!

طبكت سيارتنا يم سياره ثانيه بيكم بيضه
وبالبدي حاطين سلاح شكبره من صعدنا بيهه الجامه الي وره ماكو حاطين بس نايلونه يحركهه الهوا ...

بالصدر كاعد جراح والسايق ورماح كعد ويه السياره الثانيه مال جيش واني ملفله الشيخ بالبطانيه ومغطيه راسه من الهوا
وعلى طول الطريق اردد
سلاما قولاً من رب رحيم
لحد ما وصلنا البغدادي واخذونا لقاعده عين الاسد من كلتله وصلنه للقاعده كالي
- تين لا تخافين هين امان

اني زيدني خوف بهالحجايه لان هالطريق كله هو ماحجاهه شمعنى هسه
اكيد اكو شي ..

من نزلنه واشوف كبر المكان والجنود كل واحد هالكبره بالغراض الي حاطه على ظهره والنوب طلعولنه امريكان اني كمت اطكطك ... وامشي ومجلبه بايد رماح لان جراح اخذ الشيخ سنده وصديقه من جهه ثانيه ويمشون كدامنه ..
والنوب شفت سره الطيارات الحربيه
شلون مسطرات يمه منظرهن يكزبر الجلد وهذوله يرطنون بالانكليزي ورانه
كمت ارجف رجف وخفت حتى من صعده بهالطياره ..

ضباط ويانه اثنين من الجيش همه الي يمشون كدامنه ويحجون ويه الامريكان
وياشرون على الشيخ ويعبرونه كل شويه لمكان واخر شي وصلونه للطياره
وكال واحد من الضباط تصعدون الشيخ ومرته وواحد من الولد بس
رماح كال خلي جراح يروح لان تحتاجوه هناك بالمستشفى واني ابقى هنا ويه عمامي اقاتل ..

من خوفي حتى ما ودعته رحت يم جراح واكوله شيصعدني بهاي الطياره ماكدر
وهو يكولي اسكتي دخيل الله
رعب صارتلي صعدتهه رررعب
وهمه صعدو الشيخ بالاول وبعدين جراح مدلي ايده حتى اصعد ولزمتهه وهو جرني وصعدني بيهه واشوفهه ظلمه بس ضوا من يم جهه الطيار خفيف اصفر
ومكان كعده بس حديده طويله كعدنا عليهه اني والشيخ ورماح ضل واكف ويه واحد جندي مسلح واكف يم باب الطياره ومنزل سلاحه ومن اشتغلت وصوتهه يضرب بالاذان جفلت وضليت مجلبه بالشيخ وهو لازم ايدي ويحجيلي بصوته تعبان اهدي لا تخافين اني يمج

بس الرعب الي اني بي ما ينوصف
همه رجال متعودين على هالشي اني شوفه السلاح عندي وحدهه خوف

وطرنا واني مجلبه بالشيخ من جوه البطانيه وهو يشيل بيهه ويلف على ايدي
واني اردد ياربي نوصل بسلامه دخيل اسمك الهي صبرني وقويني على هالبلاء

طرنا بامان بس هذا الجندي ابو سلاح الواكف يم الباب قلقني سلاحه بطولي
وهو كل شويه رافعه ويباوع من العدسه
واكول هسه يضرب واحد ويضربونه
ونروح بيهه ..

من نزلنه بغداد صليت على النبي وتحمدت ربي عبرنا بسلامه وهناك كبل اخذنه تكسي وطلعنه للدوره ..

لكينه الولد واكفين براس الشارع واولهم حسين واجوي يركضون وره سيارتنه
لحد ما وصلنه البيت ونزلت اني وهمه تكفلو بالشيخ ..
بوسوه واحد واحد واخذوه جوه تلكته الشيخه تهلهل وتصلي على النبي واني
اول ماعتبت الباب حضني حسين وضلينه نبجي حاصرني بكل قوته بحضني ويشهك بركبتي ..
واني ممصدكه هذا وليدي بحضني بعد هالفراك كله رجعتله وشميت ريحته

جرتني غاليه من حضنه وحضتني وهي تتشاهك ببجيها وتكولي مامصدكه رجعتولنه اليوم ..

من شافت جراح خلص تلفونه راحتله ركض وحضنته واني عفتهم وطبيت جوه
سلمت على ام جراح والشيخه ورحت كعدت ويمي حسين واني دايخه ونفسي تلعب اريد بعد اوكف على حيلي ماكدر
كلت لحسين ياخذني للحمام وضل ساندني ولازم ايدي ووصلني للحمام تقيأت وهو صار يغسلي واخذني لغرفه جوه يم الدرج نومني بفراش بالكاع واجتي غاليه تفتحلي الشال وتبوس بيه وراحت جابتلي ملابسي بدلت وضليت متمدده وراسي مسطور
وحسين يمي يفرك راسي ويبوس بايدي
وره شويه جابتلي غاليه عصير شربت
وضلت توكلني خيار مالح وهنا اجوي عباس وصكر ساندين الشيخ وجابوه للغرفه وهو بعد عيني مايشوف شي
وهمه يمشوه ويدلوه وين يحط رجله
وكل هذا ويكولي ..
- ها تينه دايخه بعدك
- لا ياعيني صرت زينه لا يضل بالك
-الحمدلله

نوموه بالفراش وغطوه وضلت الشيخه يم راسه كاعده وتشربه عصير شويه شويه
وام جراح واكفه وتبجي وحاضنه جراح
وتبوس بي ..

الشيخ كاللهم ...
- امشو نامو وخلونه نام ونرتاح يلا

راحو الولد وضلت ام جراح والشيخه هنا
وغاليه يمي كاعده كلتلهه روحي نامي اني راح انام ما قبلت كالت اضل كاعده هنا خاف تحتاجون شي ..

غفيت بسرعه من التعب وكعدني صوت الشيخ وهو يون والشيخه تسمي عليه
كمت رأساً رحتله ولزمت وجهه وهو يكولي ...
- يووولي تين عينننني ذابحتني عيننني ماتنحمل ياااايابه ماتنحمممممل

يصيح بكل كلمه ويلوب منها يريد يفركهه ويشيل الشاش منهه واجر ايده واصبر بي
وبعدين كلت لغاليه ..
- ولج بيش ساعه هسه
- بالسبعه وربع
- اييي دمشي كعدي اخوتج خلي ياخذونه للمستشفى تحركي

راحت ركض عليهم واني والشيخه نصبر بي وام جراح من بعيد واكفه وتبجي
اجوي الولد مفزوعين يباوعون والشيخه صاحت بيهم وركضو طلعو حتى يجيبون سياره ..
اني دزيت غاليه جابتلي عباتي والشال لبستهن وضليت واكفه بالباب متحضره
والشيخه هم لبست جواريبهه وعباتهه
و طلعت فلوس خلت نص عندي ونص عدهه واجوي الولد اخذوه للسياره وكعدوه بالصدر واني والشيخه وجراح
وره ..

وطلعنه لمستشفى ابن الهيثم علمود عيونه
وهناك اول ما وصلنه جان اشوف حسين وعباس وصكر نزلو من تكسي ورانه
وركضو يساعدون جراح بمشيه الشيخ وجابوله كرسي وهمه يركضون للباص
وياخذونه من مكان لمكان ..

بقينه بس اني وجراح يم الشيخ بغرفه الفحص ومن فتحو الشاش جانت عينه كلهه جراحه نضفوهه يلا فحصوهه بالجهاز ..

وكالو ..
عينه اليمنه بيهه شظايا ناااعمه صايره بياض العين من جوه يم الجفن السفلي
ورادلهن دكتور شاطر يسويله عمليه
ويحافظ على عينه لان هاي اذا تبقى تلوث العين وتخليهه تخيس ويشيلوهه
وعينه اليسره صايره الشظايا بالقرنيه
وسالفتهه اصعب من اليمنه

دزونا على دكتور شاطر بالحارثيه
واخذنه الرقم مال العياده وخابرهم جراح
كالو يفتحون ب ٢ الظهر وحجزلنه يمه

رجعنه للبيت كلنه ملجومين الكلب عليه
نشوفه يون من عيونه وما بيدنا شي عليه
اني صوتي انبح من كثر البجي ومكابلته وكاعده اصبر بي بس ادري بيهه ماتنحمل ...

للساعه بالوحده ونص طلعنه من البيت
للحارثيه وهناك دخلونا ثاني اسم
من شافه الدكتور وكاله جراح انفجار صار وتاذت عينه واحنه من الانبار كتبله راساً عمليه بالخاص اليوم بالليل
وكال بوجهكم اطلعو للمستشفى وانطانه اسم دكتور كال كلوله اني دزيتكم وانطوه ورقه العمليه ...

طلعنه بوجهنه للمستشفى وهناك اخذوه لغرفه خاصه راساً نظفو عينه لان بس تذب جراحه ورجعو لفوهه بالشاش و
انطوه منوم حتى يخلص من الوجع منا لليل ...

راح عباس وصكر للبيت الشيخه دزتهم يجيبون فلوس العمليه واني هم خابرت اخويه مصطفى وحجيتله الصار وطلبت منه فلوس لان مبين المصاريف هواي
وهو للعصر اجاني ووياه علي سلمو وضلو يمي حضنتهم وهمه يصبرون بيه
ومصطفى انطاني مليونين خليتهن بجنطتي وماحجيت لاحد عليهن كلت من يطيب احجيلهه اداينت من مصطفى

ضلو ويانه لحد ماصار الليل همه واكفين على رجلهم ويمشون باجراءات العمليه

ويجيبون العشه والشيخ نايم مايدري بشي

ساعه ب عشره ونص بالليل اجه الدكتور
وضل يصحي بي بالكوه صحى ورجع نام ...

دزلنه الممرض حتى يلبسه مال عمليه
واني جراح ماخلاني ابقى طلعني وبقى هو وياه والممرض وبعدين طلعوه بالسديه وراحو بي للعمليات ..

ضليت مكابله باب العمليات وابجي
اخوتي يحاجوني يسكتون بيه وحسين يمي بس اني ماكدر كلبي ناار عليه
شلون حبيبي يتاذه هيج واكعد هاديه
مابطلت بجي لحد ما طلعوه وشفته
يلا مسحت دموعي ورحت وراه
للغرفه وضليت واكفه يم راسه ولازمه ايده وامشي ايدي على كصته واباوع بالوجوه اريدهم يحجون يفهموني شصار بالعمليه شسوو ومابيه حيل احجي واسال

لحد ما جراح حجالنه لان هو جان يحجي ويه الدكتور بره وكال ....
مطلعين الشظايا الي بعينه اليمنه وفاتحين الخياط الاولي وراجعين مسويه بطريقه زينه بحيث بعد ما تذب جراحه عينه
واليسره هم مطلعين الشظايا منهه بس مو كلهه لان اكو منهه ناعم اذا يجروه يجرحون العين وكالو خلي يتحسن هسه
ونرجع نحاول باليسره

حمدت ربي شويه وضعه تحسن وضليت انتظره يصحى يحاجيني دالوب على صوته ماتلوكله هالنومه هاي مو للشيخ خالد والله مو للشيخ

من كعد جان بس يون ويصيح تين اكوله ها عيني يمك يرجع يصيح تين ومايحجي شي ...

ضل مصطفى يحاجيه ويصحي بي لحد ماركز ويانه وضل يكول عيني ثكيله
وتحركني راح جراح حجى ويه دكتور
وكاله هالشي طبيعي شويه شويه يتعود عليهه .. وتبرد عينه ..

رجعو انطوه مسكن ونام وضلينه متصفنين للصبح محد منا اكل ولا شرب ولا غمضتله عين واني عيني بس عليه
اتذكر جيته عليه وضحكه واتذكر نظره عينه الي وكعدته وسالفته وياي وابجي
روحي جمره صارت ماتنطفي الا بسلامته من هالشده ...

ثاني يوم فتحو عينه وحطوله قطرات وعلموني شلون اقطرله وكم مره
ونبهوني ماكو ضوا قوي ولا مي يوصل لعينه والشاش فتحوه من عينه العصر
وخلو كطن وفوكاه المناظر وكالو بالبيت شيلو الكطن بس نظارات تبقى ابد ميشيلهه من عينه ...

رجعنه للبيت المغرب وتلكونه بذبيحه
ومن تعشينه وكعدنا نشرب جاي سألت غاليه ...
- جراح شلون صار هالانفجار وليه ابوي تاااذت عينووو بالذات كيف هالشكل ؟
.
.
.
يتبع

#شقراء_بغداد

الجزء_الثاني_بارت_١٠


رجعنه للبيت المغرب وتلكونه بذبيحه
ومن تعشينه وكعدنا نشرب جاي سألت غاليه ...
- جراح شلون صار هالانفجار وليه ابوي تاااذت عينووو بالذات كيف هالشكل ؟

باوعت لجراح وانتظر يحجيلنه شصار
لان اني من خبصتي بالشيخ نسيت اسأل واعرف شلون .. كال..

- ابوي وكتها واكف حدر الساتر الامامي ويحكي مع واحد من الحشد والثاني ضابط من الجيش هو طلبهم كبل يومين بسالفه وحدرو يتفاهمون وحدهم
صارت مواجهه خفيفه وابوي مشى حدرنا يدحك الوضع وبس عبر مكانو بدقيقه وكع هاون وهو انشمر على يمينو
الولد الي حدرو تصاوبو اكثر منو تصاوبو برجلهم بس ابوي وكت ما وكع صارت وكعتو حدر كوم الحطب الي احنه نشعل منو بالليل ونتدفى عليه والظاهر شي منو داخل بعينو

-الحمدلله على كل حال

الشيخ كال ...
- الله لطف لو انا ضال بمكاني كان تنثر لحمي
-لا اسم الله عليك
- جراح يابه ماعرفت اخبار هالرجال شصارلهم بعد هالحادثه
- اييه يابه عرفتهه .. الضابط رجلو متأذيه كلها بالشظايا وابن الحشد هم رجلو و ظهرو والاربعه من ولدنا تصاوبو ببطنهم وفخاذهم اسعفوهم بساعتهه وبعدهم للحين بالمستشفى بس وضعهم مستقر الحمدلله
-الحمدلله ما يستاهلون والله ابطال حرام يناخذون غدر

وراهه بساعه الولد اخذو الشيخ للغرفه
حتى ينام واني رحت وراه ..
هو ميقبل اروح من يمه لو دقيقه واذا رحت كبل صاح تين لو يدز عليه غاليه
فضليت وياه وياه ..ام جراح تسوي الاكل
وتكعد يمه هم تسولف بس هو مايطلب منهه شي لو راد يشرب مي يكولي الي اشربه حتى لو الكاعدين كلهم ولده مايطلب الا مني ...

افرش يمه واتمدد والشيخه صارت تاخذ فراشهه وتروح تنام بالهول يم الولد

اضل اني مرتجيه على المخاد ومخليه راسه يم صدري وامشي ايدي على شعره وهو يكولي ...
- يولو انا الحين ما دحك شي انعميت
- لااا حبيبي شده وتنكضي ان شاء الله ويرجعلك النظر
- ول الموت اهون من العمى
- اسم الله اسم الله عليك لا تكول هيج حبيبي هاي نفسك ويانه كافي واني اصيرلك العين لا تشيل هم ياروحي
- وش كثر تحبيني تين
- ماعندي حد لحبك لو اخليله حد يصير عيب بحقك
- تدرين انا الحين عايش بظلمه كل الي حدري غريب بس صوتك حدري أألفو
وامن بي
- يا روحي انته يمك اني ماعوفك والله
وماابقيك هيج تعاني صدكني اسوي المستحيل وارجعلك عافيتك
- الله كريم الحمدلله على كل حال
-الحمدلله

شلت النظارات وحطيتله قطرات وبوست راسه وبعدين بدلت دشداشتي وطفيت الضوا واجيت تمددت بفراشي وهو نايم على ظهره ولازم ايدي بديت اغفى شويه وحسيت على واحد يمي يبوس بيه ابتسمت اعرفه ابني حسين من ترافته
انداريت عليه وهو يشاورني يكولي..
- يمه انا هم الي حصه مو كله لابويه
- هههه يمه كل شي الك حبيبي شوكت رجعت
- هسه رجعت اليوم بادلت المناوبه ويه الولد حتى انام هين حدرك والله مشتاكلك
وكلشي مافهمت منك
- اي والله حقك صارت جيتنه ركض بركض .. جوعان اسويلك اكل؟
-لاا ماكل ماريد شي بس انام
- يلا لعد جيبلك فراش هنا يمي
- ماريد فراش هين بفراشك انام
-ههه ولك كبرت مايكفينا
- يكفي يكفي

نزع قمصله التراكسود وشال البطانيه ونام على ايدي وحضني وهو يكولي اووف يمه مشتاكلك واني احضنه وابوس بخدوده واكرصهن وهو يضحك جان الشيخ يكعد وكال ...
-تين هذا حسين هين
- اي عيني
- وش عندك هين بهاليل ماتمشي تنام
- يابه مشتاك لامي وحدرت عليها
- دحك امك الصبح الحين ودها تنام
-اي انا هم اريد انام وكلنا نام شنو المشكله
- لااا امشي نام حدر اخوتك ماتدحك امك نايمه حدري ماتستحي انته
- يابه استحي ليش امي هاي امي وانته ابوي وين المستحى بعد
- ايييه دامهه حدري تنام عيييب انته تحط نفسك بالنص كبرت مو جاهل واعلمك

ضل يتافف وكعد واني هم كعدت وهو يأشرلي احجي وياه واقنعه عاد كلتله ..
- خالد خليه ينام يمي اني هم مشتاقه لابني وماشبعت منه حتى شوف ماشوفه كله بالشغل خلي اشبع من ابني شبيك
- عندك الصبح واشبعي من ابنك ما طاير هو ولا انتي طايره وما يدحكك بعد
- ياعيني هسه شنو شبيهه لو بقى يمي
-تيييين
- يمه عجل امشي انتي وياي فوك نام وخلي عمتي تنزل هين تنام حدر ابوي
-لاا شبيك انته وين اروح اسكت اسكت
-ايييي لا هاي ولاا هاي دبري حل يلا
لو انا لو ابويه
- حسييين
- شنووو حسيين !! يعني عفت الشغل ورجعت هين حتى تخليني امشي ! عجل شكو رجعت !!! حتى انام وحدي !!!

ضليت مخليه ايدي على راسي واباوع مره للشيخ ومره لحسين وهمه اثنينهم ساكتين ينتظرون مني ادافع لواحد منهم
واني اريد حسين بس ادري لو رحت الشيخ يزعل وكلبي ماينطيني عليه
وهو مريض ..

ضليت ساكته عاد حسين كال ..
- هااا هسه شنو تمشين وياي لو تضلين هين حدر ابوي
- ابني باجر حبيبي
- ضلي ضلي ماريد شي بعد واني صوجي ورجعت عبالي كلبك مثل كلبي بس انتي ماتدحكين غير ابوي ماتتغيرين

اخذ قمصلته وطلع زعلان حتى الباب ماسدهه ..

رحت وراه وشفته طلع من البيت صحت عليه ماهتملي رجعت للشيخ وكلتله ...
- ليش هيج خالد حرجتني وياه وخليته يزعل جان عفته ينام يمي هسه شكو بيهه
- خلي يولي هذا ابنك يدلل وانا مايعجبني غييييري يتدلل عليكي
- ادري ياروحي ادري بس خطيه يعني مو تعرف بي شلون مشتاقلي ومشايفني من شوكت ليش هيج كسرت بخاطره سوده عليه
- لا تضلين تاكلين راسي بسيرتو خليه واذا ماصار عليه شي تدحكيه الصبح هين وناسي السالفه

ضليت اخابر عليه وميجاوبني واني متمدده بس عيني ماتاخذ نوم بس اتكلب
وكلبي يمه انقهرت عليه بس الشيخ حرجني كدامه ...

ثاني يوم رجع بالعشره الصبح بس سلم بسرعه وصعد .. رحت وراه وشفته متمدد على بطنه كعدت يمه وبوسته كلتله ..
- حبيبي انزل خلي نتريك سوه يلا ابني كوم
-ماريد
- حسين شبيك حبيبي
-مابيه شي
- اكلت قبل ماتجي ؟
-اي
-جذاب متتريك بره انته اعرفك
-عوفيني يمه اريد انام نعسان
- اي اكل ونام يلا حسين امشي وياي حبيبي لا تشلع كلبي
- يمممه مااريد عوفيني شكو هسه بالك يمي خليه على حبيب كلبك احسن
-هههه ولك يمه هذا ابوك شبيكم انتو والله خبلتوني
- تعرفين شبيه مايحتاج اشرح
- دمشي هسه اكل وبعدين نتفاهم
-ماااريد عوفيني

انطاني ظهره وغطى راسه ..ضليت اباوعله وحايره بيهم شلون تصفى
واحد اعند من الثاني ...

نزلت وجان الشيخ يصيحني ويعاتبني ليش عايفته ومن اكوله جنت يم حسين اراضيه يكولي عوفيه شكو مهتمتله
وخلاني كاعده يمه بس اني طلعت حجه ورحت للمطبخ سويت طاوه بتيته مكسبه وطكيت عليهه بيضتين وسويت طاوه طماطه وجبن ودزيت الصينيه بيد غاليه
حتى توديهه لحسين ياكل ماينطيني كلبي اعوفه ..

من نزلت غاليه كالتلي ماقبل ياكل بس اني عفت صينيه يمه ونزلت ..

للظهر صار الغدا اصيحله ما يرد رحت صعدتله وشفته نايم بس ماكل وعايف الصينيه يمه .. اخذت الصينيه ونزلت
وهم ترزلت من الشيخ كلت يلا مره اتحمل رزاله منا ومره زعله منا وهيج تكضي وياهم ..

للعصر يلا نزل بس بوس الشيخه وسلم على ابوه واني ماباوعلي حتى وراح طلع للمولده .. ضليت الوب ابني حبيب كلبي زعلان مني ومبين زعله ثكيل شلون بيه

اخابره بس يجاوبني مره وحده ويكولي عندي شغل ويمي ولد ماكدر احجي
ويسده ..جانت الدمعه بطرف عيني ماتحمل وجهه ثكيل عليه

لليل ضليت انتظره لل١٢ وما رجع
خابرته جان يكولي اخذت مناوبه صديقي وماارجع اليوم .. تعاركت وياه وهو ساكت وبعدين كالي نامي هسه ابويه يريدج معليج بيه اني عندي شغل
وسد الخط ..

رجعت للشيخ وهو يحاجيني وماركز وياه كلبي يوجعني على حسين ماحبه يزعل مني ...

للصبح هم بالعشره رجع تلكيته وحضنته وهو ماانطه رد فعل ولا حتى رفع ايده وحضني بس وخرت منه هو عافني ومشى ..
جنت محضرتله الريوك اخذت الصينيه وصعدتله حطيتهه وهو كعد ياكل ومايباوعلي احاجيه ومايرد عليه عاد كلتله ..
- ابني الدوام رجع هم يلا شد حيلك واطلع هالسنه من السادس
-ماداوم
- انزول عليك ولك ليش مداوم لتشيب كلبي راح اصير ٣ سنين
- مااادااااوم
-حسييين كافي عناااد هذا مستقبلك مو لعب جهال غصباً عليك اداوم هي بس سنه خلصهه واكعد
- ماريد
- مو بكيفك هاي اني يمك بعد شنو عذرك ومداوم
-ماااريد اداوم مالي خلك
- حسين لتشلع كلبي تره الي بيه كافيني
- اي خلي بالك على همك الثاني انا لا تعبي نفسك وياي مااسوى
- يبوووه ولك يمه شهالحجي انته قطعه من روحي شلون متسوى
- واضح هالشي
-حبيبي ابوك هسه مريض ومعتمد عليه ماتشوفه شلون مايريد غيري يمه شلون اعوفه ياابني متكولي شلون اعوفه وهو بهالحال هم اعذرني انته ليش هيج تشيل بخاطرك على امك
- يوم يومين هي هالسالفه صارلها سنين انتي تفضليه عليه
- ابني شبيك يعني هذا رجلي غصب عليه افضله واطيعه واداريه لعد تريدني اهمله حتى ترضى جنابك
- لاااا اناااا اهمليني حتى يرضى جنابو
- اسكت اسكتتت لتجيب طاري ابوك هيج لا اكسر راسك متفرعن علينه تالي هالعمر ولا عبالك اني الربيت وكسرت ظهري عليك كل هالسنين هسه طلعت مو خوش

عفته ونزلت جوه كعدت يم الشيخ وكلبي يفور فور احس راح انفجر ساعه الساعه
اجتي غاليه حضنتني وتكولي ..
- يمه الظاهر ابنك المدلل متعبك
- طايح حظ صاير
- ههههه شكلو هالمره مزودهه مامتعوده اسمعك تجيبين طاريه الا بحلو الكلام
- عوفيني انتي الثانيه ضل عليه بس انتي وتكمليهه
- يااا يمه وشسويتلك
- عوفيني بنتي مالي خلك الله يخليج

وخرت مني وضلت تباوعلي واني افرك براسي والشيخ يكولي اريد اطلع للشمس
رحت لزمت ايده وغاليه من جهه ثانيه وطلعنه بالطرمه كعدناه على الكرسي وضلينه واكفين وره شويه كالي ..
- تين احدري افتحي هالعين ودي ادحك الضوا ماتحمل اكثر بهالظلمه والله بزعت روحي
- مايصير ياروحي مايصير اشيل الكطن بس بالليل
-افتحيييه يولوو كلبي طك افتحيه خلي ادحك ضوا الله اختنكت روحي اريد ادحك مثل هالبشر
- بس شويه وارجعه زين
-اييه

فتحت اليمنى بالاول وهو فتحهه شويه شويه وصار يباوع من وره النظاره
ويكول ..
-اييييه هالحين ادحك هالنوور