-زينه عينك ماتحركك
-لاا والله تحركني وتحكني من هالجفن
-دكافي لعد خلي اسدهه
-يولي اصبري انا وش دحكت
- بعدين ياروحي بس خلي اطيب هالايام
اصبر شويه
-عجل افتحي الثانيه خلي ادحك وش حالهه

سديت هالعين وفتحت اليسره ضل يفتحهه بصعوبه ويركز عليه ويكولي ..
-تيين غواشه هيين بس بياض ضباب كلشي مادحك
- الله كريم حبيبي بعدهه مال عمليه اصبر
- سديهه يولو تحركني
جان هو مغمض وعاصر عيونه واني اجيت لزكت فوكهه الكطن وهو صار يكول..
-يوولي راااسي صدع اخذيني خلي انجضع
-اسم الله عليك مو كلتلك مايصير تتعب
-امشي عاد يولو

اخذته جوه للغرفه وضل متمدد ولازم راسه واني يمه جبتله براسيتول شربته وغطيته وضليت افرك راسه وانتظره ينام .. وسمعت صوت حسين نزل
كلت خلي اشوفه يجي يسلم علينه لو يطلع ؟؟
انتظرت انتظرت وهو ماكو عرفته طلع
لليل شفت الشيخ نام رحت صعدتله وشفته متمدد ويلعب بتلفونه كعدت يم راسه وهو باوعلي ورجع عاكد حواجبه ويلعب بتلفونه ومايحجي شي ..
خليت ايدي بشعره ودنكت بوسته وبقيت راسي على راسه واكوله ..
- حسون حبيبي والله كلبي مثل النار عليك يمه لاتعبني هيج
- مااتعبك يمه لا تخلين بالك عليه
- شلون وانته مثكل وجهك عليه ليش مو اني امك حبيبتك ليش هيج اهون عليك !
- يمه انتي على راسي بس انتي اختاريتي ابويه وانا عفتك باختيارك مااجبرك عليه بعد مو تريدين تداريه وانا ازعجك هاي خليتك براحتك ليش ضايجه ؟
- ابني قابل اني كلتلك عوفني لتحاجيني ولتتقرب مني هم اريد اكعد وياك اشوف شبيك ما بيك اسمع اخبارك والله متلوعه عليك يايمه كافي فدوه
- يمه هالشكل احسن النه كلنه دحكي ابويه ساكت مايغثك ولا يغثني لاني بعيد هو مرتاح ومطمن خليه هالشكل مرتاح احسن
- لااا ما مقبوله منك هالحجايه شنو يغثني شنو يغثك ولك كم مره اكولك هذا ابوك عيب تحجي عليه هبج ماارضاهه ابني افتهم عاد شيبت كلبي
- شفتهم شفتهههم
-افهتم ابوك بجهه وانته بجهه اثنينكم احبكم واريد رضاكم ودلالكم واجب عليه اني ماكدر اهتم بواحد واعوف الثاني
هم ارحموني انتو ميصير هيج
- ماافهم هالشي انا مااافهمو لو اناا لو هو
وانتي اختاريتيه لا تدوريني بعد
-استغفر الله شلون بلوه هاي

سد تلفونه وانطاني ظهره وتغطى
نزلت وضليت اروح منا واجي منا
بعدين اجتي غاليه تكولي ابويه يريدج
رحتله وهو كالي ..
-احدري دحكي عيني اليمين يولي تحركني اهجسها مفصصه مدري مرمله ماتحمل حركتهااا دحكيها

بكل خوفي فتحت الكطن ورفعت جفنه واشوف عينه حمره وبيهه نقط بيض صغييييره مطشره على داخل الجفن الجوه .. حرت شسويله مالكيت غير انطيه قطرات وخليتله قطرتين ورجعت لفيتهه وهو يون منهه ..

خابرت على جراح وحجيتله الصار وكلتله يشوفلنه دكتور لباجر ناخذه
وضليت انتظر منه جواب ..

الليل كله مانمت سهرانه ويه الشيخ هو يغفى ويكعد يريد يشيل الكطن ويحك عينه واني مااخليه واصبر بي النوب عينه صارت تلزك ومنفوخه حمره واليمنى بيهه شويه حمار بس اليسرى فد مره صارت وبالف ياعلي طلع هالصبح علينه وكبل اخذناه للمستشفى فحصو عينه وكالو بيهه
رمد صديدي لان مسدوده وهي بيهه تلوث من قبل وضاله البكتريا بالرمش
ومنتشره بالجفن ...

انطوه قطرات وصابونه وعصاره وعلموني على استخدامهن ..
من رجعنه غسلتله عينه بهالصابون ونشفتهه وخليتله قطرات والعصاره من ينام ...

شويه هدأت عينه وكدر ينام حجيت ويه جراح على الدكتور وكالي لاكي واحد بالكراده وحاجز على العصر ..
هم للعصر اخذناه .. عباس وصكر يمشونه وجراح كدامنه واني وياهم شايله الادويه وعيني عليه ..

فحصه وكال ضلو ملتزمين بهالعلاج حتى يخف الالتهاب بعينه وبعدين نفحص القرنيه .. من طلعنه ضليت احجي على جراح على هالدكتور البايخ الي ودانه عليه .

رجعنه للبيت وتلكانه حسين سلم على ابوه واني من بعيد بس كلي شلونج يمه وراح

منا قهر الشيخ والنوب حسين طنكر فدمره كملت عليه ..
اشوف الشيخ الليل والنهار هو يون من عينه اليسره رغم الرمد بيهه قليل مقارنه باليمنى بس تأذيه اكثر ..

ضليت وياه بالعلاج واغسلهه لعينه وانشفهه واداويهه وبدأ يخف بعينه اليمنى
وخفت الحكه بيهه ضلت بس اليسرى يكول نص عيني بيهه مثل حبايه احسهه محمله بيهه ..
ناخذه لدكتور يكول مابيهه حبايه هاي بسبب القرنيه والخدوش هيج يحسهه
يرجع هو الطريق كله يحجي على الدكتور ويون منهه ..

خمس ايام ضل على هالحال واني ابجي على حاله احير شسويله ..الشيخه مكابلته وكاعده مره تبجي مره تقراله قران مره تكعد تدعي على الدواعش وهم متكلوطه
وام جراح متكفله بالاكل والبيت وتروح وتجي تجيبله شي ياكله لو عصير واني بس تروح اصير اوكله منه . .

بخامس يوم بالليل هو يون بحركه كلب واني بعد صبري خلص طلعت رحت للهول يم الولد وكفت كبالهم وهمه متمددين بفراشهم ..كلتلهم ...
- ما بيكم خير انتو ما تتحركون تشوفون جاره لابوكم هيج مابيكم فايده ما تسمعوه يون الليل والنهار

جراح - عمه ماناسين ابونه احنه ومادحكتي هالدكاتره ماخليت منهم واحد يعتب علينه ماخذتو
- مايفيد هيج جراح مايفييد ابوك ديتلوع من عيونه شلون نضل نتصفن عليه
شوفولكم جاره تره كلوبنه خلصت بعد مالنه حيل ونشوفه بهالحال
- عمه ان شاء الله الصبح اطلع افتر بالشوارع واحجز عند دكتور دكتور ماخليه يضل بهالحال
- مااااريد هالدكاتره كلهم نفس الشي طايحين حظ لو بيهم خير جان عالجوه من اول مره .. كلبو بهالتلفونات البيدكم دورو على دكتور بالخارج زين شبيكم يعني اعلمكم شتسوون خلو بيكم شويه همه احنه لعد عليمن معتمدين غير عليكم
- ادور ان شاء الله
- جرااااح منا لباجر تجيب اسم دكتور زيين مو مال ماطل هالسالفه افهمني ابني
- صاااار عمتي فهمتتت
- داشوف شيطلع بايدكم

عفتهم ورجعت للشيخ وهو حاط مخده فوك راسه وعاصرهه بايده .
شلتهه منه وحضنت راسه وضليت افركله كصته وهو وجهه ذبلان ومابيه حيل حتى يحجي ...

غفيت شويه وفزيت باوعتله شفته غافي
رحت طلعت بره شفت الولد نايمين رحت صعدت فوك داشوف حسين موجود
وهم لكيته نايم يم غاليه ..

كعدت يم راسه وتلمست شعره ودنكت بوسته وانداريت على غاليه هم تلمست شعرهه .. ولدي يمي ومااشوفهم واضل مشتاقه الهم .. هواي هملتهم ومادريت بحالهم واني الي معودتهم على الدلال
هسه مادري بيهم شوكت ينامون شوكت يكعدون ...

غطيتهم زين ونزلت تمددت يم الشيخ وضليت كاعده اباوعله وادعي ربي يفرجها عليه ويشافي خطيه تعذب من وره عينه ..

للصبح كعدته واخذته غسلتله وغاليه جابت الريوك وكلته واجاني جراح كالي ..
- عمه رايدك بكلمتين

رحت وياه للهول وهو كالي ..
- عمتي دحكي البارحه راسلت كم واحد من معارفي ونصحوني باطباء ايران للعيون وبالهند
-اي يالله يعني مضبوطين هذوله
- اييه حسب ماعرفت منهم كل الحالات الصعبه يسافرون لهالدول يتعالجون واجهزتهم حديثه ويعتنون بالمريض
- اي يلا لعد احجزلنه
-اييه بس وين هو اريدك تقرري حتى احجز
- اي شي الجان المهم نروح باسرع وكت شوف ياهوه الاسرع واحجزلنه
- زين انتظري مني خبر لليل.

رجعت للشيخ وهو ضل يسألني وحجيتله علمود الدكتور وهالحجي ..
لليل رجعلي جراح وكالي .. على ايران اسرع السفر بس باجر يروح يحجز

ضليت متأمله والشيخه وياي تدعي وتنتخي حتى تسهل هالسفره وثاني يوم
العصر رجعلنه جراح وكال ...
- عمتي حجزت بس الفيزا اطول بالقليل عشر ايام ولازم ننتظر
- يبوووه ولك عمه شنو بالقليل اسبوع وشلون ابوك يضل يتلوع هيج
- شسوي ياعمه شبيدي فهميني
- استغفر الله استغفر الله

عفته ورحت للغرفه افتر بيهه وعيني تكت دموع محتاره شسوي شلون بي هالايام شلون حيكضيهه بهالوجع ..

سمعت صوت الشيخ ورايه باوعتله وجان اشوفه جاي يمشي وهو لازم ايد عباس ويصيح باسمي .. رحتله ولزمت ايده وهو كالي ..
- خيرك يولو وين مشيتي وعفتيني
- ياروحي هنا موجوده
- صوتك مخنوك شصاير !
-ماكو شي عيوني ماكو شي
-يووولي تين احكي
- تعبانه شويه ماكو شي لتخاف

اخذته للفراش تمدد وصار يكولي ..
- تينه مشتاك ادحك طولك بالله هالعمى اخذو لحيلي وخلاني خركه من يد ليد انشمر
- لاا ياروحي بعدك شيخ وهيبه وكلهه شده وتنكضي ان شاء الله وترجع لحيلك الاولي
- مااظنهه تكضي بعد يولي خسرت عيني بعد وش اليعوضهه
- تتعوض ياروحي بس لا تيأس كلشي ينحل خلي املك بالله جبير
-الله كريم

للعصر رجع جراح وياه عباس ومتعاركين عباس كالب خلقته وجراح يصيح عليه .. سألتهم ام جراح شصاير
عباس ماحجى شي وراح صعد ، جراح كال ...
- اخذتو تا نتفاهم ويه على السفر وهو يتلاغى بالحكي ويه الولد .. قلتلو ول اسكت طنشهم اكضب اعصابك مايسمع الا جريتو وطلعت وهو جنابو مايرضى يريد ياخذ حيفو ظنو احنه مثل حيلنه الاولي نسحل باليعارضنه
ما يدحك دارت احوالنا وراسنا مسطور
وكت مكاون !!!!

اجتي غاليه جابتله مي شرب وكعدت يمه
اني سألته ..
- هسه شنو جراح عمه فهمني شصار
- بعد عمه بعد شسويلهم ما يرضون يسرعون حجز وش احكيلهم يردون مو يمنه السالفه مابيدنا شي
- شلون ياربي شلووون
- نصبر شبيدنا بعد
- شنصبررهي مال صبر وابوك يتلوه!!
انطيهم فلوس ما يمشوهه بالفلوس !!
- عمتي منيلي فلوس انا !! شغلنه كلو واكف هاي الي بجيبي كضيتو على الدكاتره عندكم انتو تدفعون !!!!
- انطيك اني بس خلصني شوف اذا يمشوهه بالفلوس انطيك شكد ماجان
- عمه ورانه سفر وعلاج هناك هم احسبيلها لا كلهن نصرفهن هين ونضل حيارى
- تدبر ابني تدبر بس استعجل الله يخليك
- ان شاء الله

راح بره وغاليه لحكته واني والشيخه ضلينه نحجي بالفلوس .. كالت انطيكم
٣ اوراق وام جراح كالت راح تبيع اساورهه زوجين وتنطينه فلوسهن
واني عندي مليون ونص وكلت اذا اعتازيت بعد ابيع ذهبي ..

ولليل رجع جراح وكلنه تلكيناه نسأله شصار وياه وهو كال مايقبلون قافلين فد قفله ...
رحت للغرفه يم الشيخ وهو نايم وضليت الوب اروح منا واجي منا وماغمضتلي عين والشيخه كل شويه جايه عليه وتتحسر على ابنهه وتروح وهي تدعي

وللصبح هو كعد وضل يصيح باسمي
رحتله وكالي ..
- يولي عيني افتحيهه هاذي تحركني
وهاجسها ثكيله

فتحتهه واشوف الكطنه كلهه جراحه وعينه المدمع مالهه مورم وكله جراحه
تخبلت عليه وكمت امسحهه وهي تذب دم ووصخ اصفر بين ما نظفتهه ولبسته المناظر رحت عليهم للهول واني منهاره
الولد كلهم كاعدين وهستوهم مخلصين ريوك .. كلتلهم ....

- سبع ولد انتو ومابيكم فايده ماكدرتو ادبرون دكتور لابوكم ولكم كومو شوفوه عينه راح تنعمي دتحركو شوفولنه جاره

كلهم دنكو ويتأففون عاد جراح كال ..
- عمه صبر بس انطينه صبر
- ياصبر ولك ابني ياصبر عينه غاديه دم على حالهه هسه فتحتهه دم وجراحه صايره هاي اذا تضل هيج تخيس عينه ياصبر هذا جرااح ولك الرجال يون منها ليل نهار وصابر عليهه وهي دتزيد متنقص
- والله ادري والله بس انا ماكعدت وسكتت عمتي مادحكيني النهار كلو افتر من مكان لمكان
- مااريد حجي جراح اريد فعل اذا وحدك متكدر عندك اخوتك خلي يمشون وياك
- عمه وين يمشون لا تشلشينه بالله عليكي
- عمت عين كل فارع طول ومشورب منكم .. حرام بيكم الربى والتعب اثاري الشيخ ماا عنده رجال لعازته يعينه
- عممممه
- ان مادبرتو سفر لابوكم هالايام لا تجون للبيت بعد ولا تشوفونا خلقتكم

الشيخه كالت ...
- سبعتكم ما تعتبون الباب لو ما دبرتو حل للشيخ وعلى هالكلاااااام خلص النقاش .

عفتهم ورجعت للشيخ وهو سألني على الهوسه شنو وكلتله تعاركنه هيج وضليت يمه حاطه ايدي على خدي وصافنه مابالي شي ولا كاعد اركز بس القهر كاتلني ...

اجتني غاليه وكعدت يمي وتكولي كل الولد اخذهم جراح وطلعو ..

لليل يلا رجعو واني ماطلعت وشفتهم
ضليت بالغرفه كاعده وافرك راس الشيخ
واجاني جراح .. سلم وضل واكف وكال ..
- عمتي دبرنا السفر وحجزنا بعد اربع ايام لايران .. رماح بكرا يطلع طيران من عين الاسد ويحدر هين حتى يسافر معنا
لان هو عندو جواز باقي اخوتي ماعندهم
-زين عفيه عليك
- واحد من جماعتي ارسلي رقم مترجم
راح اراسلو واخليه يحجزلنا بالمستشفى
- زين افتهم منه تفاصيل واحجيلنه
-ان شاء الله

اجه بوس الشيخ وكعد يحجي وياه شويه وراح وضلو الولد يجون يمه شويه يحجون ويروحون ..

اني شويه كلبي هدأ من سمعت حصلو حجز قريب .. ثاني يوم وصل رماح الفجر وتلكيناه وهو ضل حاضن ابوه ويشم بي .. بعدين راح نام بغرفه امه
وللعصر ام جراح كالت تريد تروح للسوك حتى تبيع الذهب واني وصيتهه
تجيبلي تراكسود وبلوز ابيض لحسين
وانطيتهه الفلوس ...

خابرت على مصطفى ووصيته يجيبلي جنط سفر وهو لليل دزهن بيد علي ضل يمنه ساعه وراح ..

هالليله حسين بالمولده ما رجع وضليت اتاني بي للصبح اغفى واكعد اباوع للساعه اريد بس يصير وكت رجعته
كلبي مثل النار عليه ... ماارتاح اذا ماشوفه كدام عيني ومرتاح ويروح هالزعل بينه ..

الصبح كضيتهه ويه الشيخ اغسله واوكله
وانظف عينه واشاقيه شويه وهو بس يبتسم وما يحجي شي ..ادري بيه تعبان وضايك خلكه والقهر كاتله ..هو وين متعلم على الكعده بالبيت وبهالضعف هذا
وتارك جماعته وعشيرته هناك مايدري شبيهم مابيهم .. مو عيشته هاي مايكدرلهه

عفته كاعد ويه الشيخه وولده ورحت صعدت لحسين .. لكيته نايم على بطنه
وصافن .. من دخلت دار وجهه للجهه الثانيه ..

كعدت يم راسه وتلمست خده وكرصته
كلتله ...
- كوم حسون حبيبي خلي نحجي
-نعسان عوفيني
- نتفاهم وبعدين نام يلا لا تعبني وليدي

جريته من جتفه وهو كعد وضل يباوعلي
كلتله ..
- ابني انته روحي والمدلل انته ابني الوحيد كلبي متفطر عليك والله حبيبي
لا تشيل بخاطرك عليه هيج اني شعندي غيرك يايمه
- يمه اناا ادري تحبيني ووحيدك لكن انتي تفضلين ابوي بكل شي هو الاول وانا بالاخر
- ليش هالعمر كله اني مو اداريك انته بالاول وابوك على كد جيته يمي تصير عيني عليه بس هسه الوضع اختلف هسه ابوك مريض وتعبان وشايف بعينك شلون هو معتمد عليه تريدني اعوفه !؟ ترضاهه اعوف ابوك يعتاز لاحد واني موجوده؟؟؟
-لا ماارضى
-لعد دفهمني ياابني ليش تشلع كلبي هيج ماكافيني القهر هذا تجي تكملهه انته والله كلبي مايتحمل هم عيني انته لعد اني عليمن اعتمد غير على وليدي والنوب تعوفني !!
- لا يمه ماعايفك انا حدرك والله

حضنته وضليت اشتم بي واكوله ..
-ولك يمه الدنيا تسود بعيني لو ماحجيت وياك لا تمرمر كلبي فدوه رحتلك
-اسف يمه سامحيني انا ما ردت اتعبك والله بس ماتحمل تهمليني وعينك كلهه على ابوي ماتحمل ياخذك مني والله ماتحمل
- بس اصبر هالايام يتحسن ابوك ان شاء الله وتدلل اعوضك على كل شي وشوف هاي جبتلك هالتراكسود مال صلح

طلعته من العلاكه وهو يضحك لزمت وجهه وبوسته وهو حضني قوي
لبسته البلوز وعدلته عليه وشفته شلون لايك عليه وكل شويه ابوسه وهو يضحك
بعدين طلعت البلوز الابيض وكلتله ...
- شوف ابني هاي جبتلك هالبلوز حتى ترجع اداوم ولتنطيني حجج واعذار تره ماارضى على هاي كعدتك بالبيت ماارضى تخلص هالسنه وتنجح وبذاك الوكت اكعد براحتك

-يمه والله مالي خلك وبالي مو يم الدراسه
-لعد وين بالك ولك لا تشلع كلبي كلت اداوم يعني اداوم وخلي اختك ادرسك
-ماااااريدهه لا تجلبيلي بيهه
-لعد انته اقرا وحدك
-ايييه انا ادبر اموري
- تعوف الشغل بعد وتنتبه على دراستك
-يمه ماكدر اعوف الشغل مستلم فلوس هالشهر
- لعد شلون ومدرستك ؟
- انا اضبطهه
- حسين من باجر ترجع للمدرسه فهمت ابني
-ايييه يمه فهمت
- وتركز مو بس تصفن بالصبوره وتجي تره هاي ثالث سنه بعد اذا رسبت يحولوك مسائي
- وشحلاته المسائي اروح وارجع بكيفي
- اكسر راسك والله اذا رسبت هالسنه بعد تحلم تسمع مني حرف واحد ومالي شغله بيك بعد ولا ارضى عليك
-هااا يمه تحاربيني !
-اي احاربك لانك مستهين بدراستك ومدتعرف قيمه الي بيدك ..ابني الشهاده مثل الكرامه للانسان تعلي من شأنه
افهم هالشي وخليه بعقلك
-صار يمه صار
- اسأل جماعتك من اليوم شوف شدرسو شنطوهم شوكت الامتحانات يلا مو تروح اطرش بالزفه
- مفهوم صار
- ابني صح اني بعد يومين واروح بس كلبي يمك ياروحي انتبه على نفسك وعلى دروسك لا تصير مهمل
-يمه ماسويتيلي جواز وخليتني اسافر معك
- ابني هو اني اشوف دربي والله راسي مسطور
- سلامتك يمه

حضني وضل يبوس بايدي وكالي .،
- يمه نامي حدري

ابتسمتله وتمددت بصفه وهو حاضني ومخلي راسه بركبتي ويكولي..
- من ينام ابوي احدري هين نامي يمه الله يخليكي على الاقل هالنومه خليهه الي
-هههه ماشي حبيبي مااشي
-تره ماانام اضل انتظرك
- ماشي

غفيت شويه وحسيت على غاليه تكعدني
وتكولي ابويه يريدج .. سحبت ايدي من جوه راسه ورحت نزلت للشيخ وهو كبل كالي ..
- شابعه نوم حدر ابنك وعايفتني هين وحدي
- ياروحي كلت تكعد ويه الشيخه شويه بين مااراضي حسين
- هذا تالي دلالك كل عمري احكيلك اتركيه خليه يتعلم على بعدك ماتسمعين مني ودحكي هاي نتيجتو
-ياعمري شلون اعوفه هو هالوحيد قابل عندي العشره
- استغفر الله
-شبيك حبيبي
- ضايك خلكي تين بالله كاره النفس الي بصدري
-ليش حبيبي ليش هيج
- اريد اعاود لديرتي وناسي الكعده هين ولو ماادحكها بس تخنكني اهجس اني غريب هين
- كلنه نحس هالشي بس شنسوي مجبورين على هالكعده
-الله كريم
- راح احضر غراضنه رماح كالي باجر الظهر لازم احنه بالمطار
- زين
- اخويه علي راح يجي ويانه
-ما يلزم يابه لا يتعب نفسو
- كلتله والله بس هو ماقبل كال مو عيب اعوفكم بوكت الشده والشيخ فضله جبير عليه مستحيل اعوفكم وباجر ينتظرنا بالمطار
- والنعم منو ماكصر

ضليت كاعده يمه شويه واشرت لغاليه تجي يمه بدالي واني رحت حضرت الجنط ..

خليت ملابس للشيخ بنطرون وقمصان وبجايم بس لزمت اليشمغ والعكال وصارت بعيني صورته بيهن وهو يمشي بهيبته الصبح من يطلع متكشخ ومتعطر
صارله زمان مالابسهن بسبب مرضه
حلفت ماارجعه الا بيهن ويرجع شيخ بكامل هيبته واناقته وماينقصه شي ..

خليت لبس المشيخه هم وزدت اصرار وعزم على علاجه بأي ثمن جان ..
اخذت علبه الذهب مالتي وصحت على غاليه وخليتهه بايدهه وكلتلهه ...
- بنتي هذني امانه عندج خليهن خاف نعتاز فلوس هناك واخابرج تاخذين منهن وتروحين لعمتج تكوليلهه تبيعهن وتخابرين على خالج وتنطي الفلوس ويحولهن النه
- حاضر يمه تآمرين
-عينج على اخيج بنتي مو تعوفي ضلي نبهي على دراسته وشددي عليه لا تخليه يلتهي بالتلفون والنوم ياخذه
-يمه هو مايسمع مني بس يتكاون معي
- جيبي باسلوب مااضل اعلم بيج
-زين يمه فهمت

كملت الغراض ورحت للشيخ ضليت مكابلته وكاعده ...
حسين للعصر طلع للمولده وخابرني بالليل كالي ارجع وتنامين يمي لو ابقى؟
ضحكت و كلتله ارجع ..
اني من شفت الشيخ نام طلعت وصيت الشيخه تبقى يمه هالليله هي وام جراح
ورحت حضرت اكل لحسين وانتظرته
من رجع اكل وصعدنا ..غاليه فرشتلنا
سوه .. واني نمت بالنص وصار حسين على اليمنى وغاليه على اليسره ..
يسولفون وياي واني اوصيهم مايتعاركون واوصي حسين يطيع اخته ويدرس وهو يكولي هسه عوفي هالحجي انداري عليه
وغاليه تكول ليش عليك عليه وضلو كل واحد يريدني بس اله ...
تالي اني جضيت بيهم وغطيت راسي وعفتهم ..
سكتو وشويه وحسيت بحسين يدحس راسه بحضني ضحكت وجريته حضنته
وغاليه ضلت ملزكه بظهري ..
نمت مرتاحه بحضنهم وكعدت الفجر نزلت للشيخ شفته نايم بعده وبصفه نايمه ام جراح ..
لاول مره مااغار من شوفتهه يمه بالعكس حسيت نفسي هواي ماخذته منهه وحارمتهه من رجلهه ..

رحت للمطبخ لكيت الشيخه مخدره الجاي وحاطه السياح والبيض ..صبحت عليهه
وكعدنه نتريك سوه وبعدين اجتي ام جراح صبحت علينه وكالت الشيخ كعد ويريدج .. حسيت بثكل هالكلمه من لسانهه ..

رحتله وكعدته وضليت وياه وياه لحد ما صار وكت طلعتنه للمطار ... ودعت ولدي والشيخه كالتلي ...
- يابنيتي من اول ما طلعنه من ديرتنا انتي قلتي ماارجع الا والشيخ وياي سالم
وما وفيتي بهالكلمه هالمره انتظرك تصيرين كد كلمتك وترجعيه هين سالم معافى
- وعد شيخه وعد ماارجع الا والشيخ وياي سالم معافى

بوستهه وطلعنه ..

وهالمره باوعت لطريق بغداد وانتبهت عليه كلشي متغير بي وعيني دمعت كلتله ..
- شيخ ليش هيجي بغداد صايره
- الزمن ياتين مايرحم احد
- بغداد ميته شيخ
- روحها باهلها البنيان يتعمر

الي جنت اشوفه مو بس بنيان خربان ومتهدم ولا شوارع ولا نظام ولا اشكال الاعمار بيهه هو الي يوحيلي انها ميته
اني مداشوف النقاء الي اعرفه بزوايا بغداد .. ماكو هذا الدفو بوجوه اهلها ولا
هذيج الاشراقه المتعوده عليهه بكل نهار
بغداد بعيني هسه ميته مو بغداد الي عرفتهه من الستينات لحد التسعينات
هذيج هي بغداد كل شبر منها جان واكف بفخر انه بغدادي هسه احس كلشي محني الظهر وذبلان .. اكو فد نوع حزن مخيم عليهه شي مااعرف اوصفه بكلمتين ولا اصنفه لنوع بس هو مثل غيمه ملتفه على سما بغداد ومغطيتهه ...

تلاكينه ويه اخوتي بالمطار ودعني مصطفى و علي اخذ مني الجنطه مشينه

اول ما وصلنه ايران تلكانه المترجم واخذنه لشقه ارتاحينه واكلنه ولليل طلعنه لمستشفى بينا بمشهد ..

ضلو هالليله بس فحوصات وميحجولنه شي كاعدين وننتظر وهمه الممرضين ياخذوه من مكان لمكان وميخلونه ندخل بشي ...

بالاخير يلا رجعوه للغرفه وجراح صاحني حتى اروحله بره .. رحتله وهو واكف يم الدكتور والمترجم وياه ..
كال ..
التهابات بعينه قويه تنتشر بسبب البكتريا الي بالرمش ماذيه الجفن كله ونازله على باطن العين والمدمع .. منظفيه اله ومعقميهه حتى يتخلصون من هالبكتريا و كتبوله قطرات ٣ مرات باليوم تعقيم للعين ...
اليمنى كالو عمليتهه وتنظيفهه ناجحه بس يحتاجلهه عنايه ويتخلص من الالتهاب يرجع يشوف بيهه ويفحصون نظره ويشوفون اذا اكو تأثير صاير عليه
بس اليسره كالو القرنيه متاذيه بالشظايا والقزحيه هم مبين بالفحص نابته بيهه اشياء دقيقه صعب استخراجهه لانها تاذي غير اجزاء ومايرجع بيهه النظر هيج
صار لازم يشيلوهه ويبدلوهه بثانيه
ولازم ننتظر ونسجل عدهم الحاله حتى يحصلون النه على قرنيه مناسبه ..

رحت كعدت يم الشيخ واني على سكوتي ماحجيت شي عقلي واكف اريد اخلص من هالتعب والخوف عليه دمرني
وعينه مو بالشي الهين ..

وره شويه دخلو الولد وعلي كال
- سجلنه اسمه ويه مجموعه وكالو انتظرو فد اسبوعين
- وشنسوي بهالاسبوعين !!
- يضل على العلاج القطرات والدهن
-وهاي اجينه من هناك لهنا حتى ينطونه قطرات ! شبيهم الي عدنا مايعرفون ينطوهه !!!
- شبيدنا بعد لازم نصبر حالنه حال العالم
- وصبرنا اسبوعين وماحصلنه شي شنسوي هم نرجع نتصفن !!!
-الله كريم دكولي يالله تفرج ان شاء الله

سكتت وضليت احرك بروحي وبعدين عفتهم وطلعت كعدت بالممر وحدي وابجي ماتحمل وضعه الصعب ولا اكدر اصبر واشوفه يتاذه كدامي ومابيدي شي عليه ..

للصبح كالو اذا تريدون طلعوه وابقو انتظرو خبر منا على العمليه وهم بين مااطيب عينه من الالتهاب ..

طلعنه للشقه وضلينه اني وياه بالغرفه
تمددت يمه وخليت ايده على وجهي وضليت صافنه عليه لحد ماغفيت وكعدت على صوته يريدني اجيبله مي .. رحت جبتله مي وشربته وطلعت للهول شفت جراح صافن كعدت يمه وكلتله..
-شبيك ابني
- محتار عمتي
- خير ان شاء الله شنو الي محيرك
- عمتي كبل ساعه خابرني المترجم وهو كان يستفسر على زراعه القرنيه وكم يوم يحتاج حتى تدبر
-اييي؟
- طلعت السالفه سالفه شهور لان بالمراكز عندهم ما يحفظون اجزاء العين لاكثر من اسبوع غيرو تفسد والي تصلهم بالعجل يرسلوهه للمريض الي مسجل اسمو عندهم .. وهذا يعتمد بعد ايمتى تصلهم عين ميت ويجزئون هالاشياء منها
- عزا بعيني عزااا يعني هاي تضل حطته هالشكل منا لشهور !!
- وش الي باليد ياعمه فهميني

عفته ورحت للغرفه كعدت يم الكنتور وضليت ابجي بسكوت واباوعله
خلص حيلي والله كل يوم تصعب اكثر من
الي قبله

للعصر كلت لعلي نطلع اني وياه وبقيت جراح ورماح يم الشيخ وطلعت كلتله اخذني للمستشفى ...

رحنه للمستشفى والمترجم ويانه وصرت احجي ويه الدكتور وادقق بكل تفاصيل وتأكدت من حجي جراح هم ..

اخر شي كلتله
.. اني اتبرعله بالقرنيه يصير ؟؟ ..
.
.
يتبع

حبي متلكي بالبيجات والمولات لان نادر يشترون

فاذا تلكي يمكن محل ..محلين بالأسواق الشعبية واحتمال بأربيل و سليمانية تلكينه لان اهناك اكثرية مامحجبات فاهواي يلبسوهن بالصيف
كون تدورين زين يله تلكين واذا لكيتي عود بشرينا😅🌚

#ملوكه

عيوني برامج الافلام هنهن سينمانا ،الشو بوكس ،نتفلكس ، Tv tubi ،viu ، وموقع Egybest وبعد اكو برامج بس هذيني اللي اعرفهن🙃🌸

#ملوكه

خية للاسف 😂🤦‍♀ماكو غيرهن لو شيرة لو شمع لو خيط لو براون لو ليزر

فعادي اذا شعرج كثيف كم مرة اذا تشيلين بالشيرة اوالشمع يخف وحته سمكه يخف
فاذا من الالم متتحملين استعملي قبله مخدر emla واذا يطلعلج حبوب فخلي بعد ازالة ب3 ساعات عصارة فيوسيدين

#ملوكه

والكيبورد المزخرف بس هذا اشوفه زين
بعد مادري يجوز تلكين احسن منه بكوكل

لان السوك بلي كل فترة تمسح البرامج القديمه☹️💔 ..بس يبقن موجودات بكوكل

#ملوكه

حبي هذيني صور انمي😻👇🏻يخبلن

#ملوكه