#شقراء_بغداد

بارت_٢٠



خابرتني امي وكالتلي ..
- ولج الحكي رجلج جابوه جريح
- عزا العزاني شمدريج وين هو هسه
- هسه دك تلفون وكالولي ابنكم جاي اسمه ويه الجرحى وناقلي لمستشفى معسكر الرشيد

سديته منهه رأساً وركضت لبيبي حجيتلهه وهي كبل كالتلي .
- امشي جيبي عباتي وجواريبي واركضي البسي
يلا بالعجل

واني انخبصت ركضت جبتهن الهه وعفتهه تلبس جواريبهه ورحت بدلت وخليت الشال على راسي
وركضت الهه لكيتهه هي وعمي متحضرين وكبل
طلعنه لمستشفى المعسكر ...

من دخلناهه هدوء وضخمه تخوف وكلهه ضباط والهيبه الي بيهه تخرس ... جبيره واتيه واحنه نمشي ونسأل لحد ما اخذونه للردهه الي بيهه الجرحى ورحت شفته ملفلفين راسه وبطنه
وجتفه وايده اليسره ملفلفيهه وهو نايم وماكو احد يمه والمرضى البقيه كلهم اهليهم يمهم بس هو خطيه وحده ..

رحت لزمت جتفه تلمسته وحاجيته داشوفه صاحي
لو لا جان يجي الدكتور وكالي ..
- عوفي بنتي عوفي خلي يرتاح
وخرت منه وعمي سأله ..
- شنو وضعه دكتور فهمنه
- جان عنده طلقه ببدايه الزند وسوينالهه عمليه واستخرجناها الحمدلله وعنده شك بالبطن بس
الحمدلله مامأثر على الاحشاء الداخليه وتاكدنه من سلامتهه والظاهر وكعته صايره على راسه لان عنده جرح عميق بالجهه اليمنى تطلب ٩ خياطات
وضعه حالياً مستقر يحتاج فتره راحه ويكوم على حيله ان شاءالله

جانت الوجوه متتفسر بين الي يحمد وبين الي مكسور خاطر ،. ضلينه يمه كاعدين وبيبي دزت عمي يجيب فواكه ويوصي مرته تسوي شوربه ويجيبها وياه ..

ولحد الظهر وره الصلاه كعد محمد يون ويصيح
- اخذوهم للولد اخذووهم

رحت لزمت جتفه وكلتله ..
- محمد فتح عينك حاجيني
ضليت الزم بوجهه واكله ..
- تسمعني عيوني محمد تسمعني
- ايييي زهرااء

ضل يردد باسمي ورجع غفى ..عفته يرتاح ورحت وكفت يم بيبي وهي تجيب وتحجي على ايران وتدعي عليهم واني اريدهه تسكت لاتروح النوب تحجيلهه كلمه على الريس وهذوله هنا كلهه ضباط ورتب عاليه غير يسحلونا وهي مسكتت ابد
تحجي بحركه كلب والنوب هم عجوز ثانيه كابلتها وكعدن يحجن وفرغن هم كلوبهن وكلساع الممرض جاي وينبهن الحجي والصوت ممنوع هنا وهنه ولا يمهن لحد مبزعن يلا سكتن ...

اجه عمي وجايب وياه علاليك وانطانه مي شربنه واخذتهن حطيتهن على جهه وضليت واكفه يم راسه واباوع لوجهه شلون تعبان وخده متجرح
الله اعلم بالحال الي جان بي ..

للعصر اجوي ابوه واخوه وعمامه اثنين وضلو لليل ينتظرونه يصحى عاد الممرضين ضلو يحجون لان عددنا هواي يمه فراحو عمامه وضل ابوه واخوه واني بيبي وعمي هم رجع للبيت لان فارغ ضل بس مرته وجهاله وضلو همه يتمشون بالممر واحنه كاعدين يمه وبيبي هم راحت تحجي وياهم واني ضليت وحدي وياه ..

جنت ادعيله وكل شويه احمد ربي رجعه جريح مو شهيد .. جانت شفايفه يابسه ومتفطره .. فاخذت خاولي نكعته شويه بالطرف وبللت شفايفه ومسحت وجهه شويه هم ورجعت كعدت ..

تالي من التعب حطيت راسي على السديه وغفيت
وماحسيت الا على بيبي تحاجيني .. رفعت راسي وباوعتلهه جان تكلي ..

- كومي يمه اكليلج لكمه هاي عمج جاب لفات كباب عشه النه اكعدي اكلي اسندي كلبج يلا

اخذتهه منهه وتشكرتهه واكلت وبعدين طلعت تمشيت بالممر شويه ورجعت كعدت يم بيبي بره
وحطيت راسي على جتفها جان تكلي ..
- غير تلبسين عباتج جيتي بطرك ثوبج
- بيبي شمدريني نسيت
- اني هم الله عماني جانت روحي مفرفحه على هالوليد وماكلتلج البسي العباه
-هسه ماصار شي ملابسي طويله وزينه
- عمج ماراضي يكول ليش بتكم ماتستر روحهه بعباه واني كلتله من حلاه روحه طلعت ونستهه وزغيره هي بعدهه مامعلمه عليهه
- افف هسه وكت عبايه
- عيالج هالشكل يمه لازم ترضيهم
- ان شاءالله

ماهتميت لهالحجي جنت تعبانه وبالي يم محمد اريده يكعد يحجي داطمن عليه ..
وضلينه للصبح كاعدين واحد يروح وواحد يجي
ونزلنه اكلنه بسكت وجاي فكينه ريكنه بي وردينه صعدنه وضلينه اني ومازن جوه يم محمد وبيبي وعمي بره كاعدين يسولفون ...

جان يكعد محمد ركضنه عليه وهو يباوعلي ويرجع يباوع لمازن ورجع يباوعلي ومازن طلع صاح بيبي وعمي وكلنه صرنا نحاجي وهو يرد
بس ..زين ..
جان يكول عطشان .. ركضت جبتله مي وشويه شويه شربته مايكدر يكعد ..
بيبي اخذت الشوربه ونزلت كالت اشوف بلكي اكدر احميهه دياكله لكمه ضال على لحم بطنه
وراحت ووياهه مازن وضلينه اني وعمي يمه

كشرتله برتقاله وصرت اوكله شيف شيف وهو بالكوه ياكل يكول راسي يوجعني ..
باوع على الي يمه وكال..
-بويه اسألي هذول الولد شساميهم

كام عمي وراح سأل اهلهم واجه كله فلان وفلان
جان يضحك وكالي ..
- روحي اخذي هالفواكه لناظم وكليلهم سلام من محمد خوييك
عمي كالي اخر سديه بالسره المقابيلنه .. اخذت الفواكه ورحت شفت مره جبيره وحدهه كاعده يمه
وهو لافين راسه وصدره ومجبسين ايده اليمنى
باوعولي واني جنت مستحيه عاد دنكت وكلتلهم
- السلام عليكم
- - وعليكم السلام

- الحمدلله على السلامه خويه
- الله يسلمج
- هاي سلام من محمد خوييك دزهن الك
- محمد !!عليج علي عايش لساعه وينه هو وينه
- هنا بنفس الردهه وياك

جان يشيل الغطى من رجله وراد يكوم وامه ماخلته بس هو جان يضحك ويريد بس يروحله وجان يدور على شي يلبسه برجله باوعت شحاطه محطوطه بالطرف جبتهه اله وهو تشكرني وكام
وراحله يمشي ويصك على سنونه ويكلي
- وينه يامره دليني عليه وينه اخوي

دليته وراحله كبل دنك باسه ومحمد هم حضنه
وجبتله كرسي كعد واني ضليت واكفه بعيد عنهم
عفتهم يسولفون جان تجي ام ناظم يمي وكلتلي
- انتي مرته لمحمد ؟
- اي خاله مرته
- ماشاء الله بعدج زغيرونه الله يحفظج لشبابج يمه
- تسلمين خاله ويحفظلج ابنج ويبرد كلبج بسلامته

ضلت تضحك بوجهي وتتلمس جتفي وعيونهه تتمعن بيه واني بس ابتسم ..شويه واجوي بيبي ومازن اخذت من مازن الجدريه ورحت صبيت
كاستين جانن بالعلاكه صبيت بيهن وانطيت وحده
لناظم ماقبل ياكل عاد انطيتهه لامه وكالت اني اوكله وتشكرتني .. وهو ترخص وكام وراح لمكانه ويه امه واني اجيت جبت الكاسه لمحمد
جان بيبي تكلي ..
- جيبي اني اوكله

باوعت لمحمد اشرلي اي وعفتهه لبيبي توكله وضليت واكفه اباوعلهم ...

وره ماخلص الاكل كال اريد انام شويه وطلعو كلهم ضليت بس اني كاعده يمه جان يفتح عينه
ويكلي ...
- تعالي تكربي مني

قربت الكرسي وصرت قريبه من يم راسه جان
يكلي ..
- من يمتى انتي هنايه
- من بارحه الصبح اجيت ويه عمو وبيبي
- شلون وصلج خبري
- امي خابرت من جنت بيت بيبي وكلتلي مخابرين من وحدتكم وكالو اجه اسمك ويه الجرحى
- اييي تذكرت انه نطيت رقمكم ويه رقمنه باخر فتره
-اي زين سويت .. الحمدلله الي حفظك جان كلبي حاسني راح يصير شي والحمدلله عدت سلامات
- الحمدلله
- بيك حيل تحجي لو تعبت تريد تنام
- اريد انام واريدج يمي تضلين زين
- اي عيوني يمك نام ارتاح

غمض عيونه ودار وجهه ناحيتي .. اني جريت بطانيه غطيت صدره المكشف ضال بس بالبجامه
والجو برد مو مثل قبل .. وهو هم جرهه اكثر لحد ركبته ونام ...

للعصر هم رجعو اجوي عمامه وكعدوه وحجو وياه وتطمنو عليه وللمغرب رجعو وجانو جايبين وياهم تمر ولبن وبرتقال .. وزعت منه للموجودين ووديت لناظم هم وهو كل شويه يتشكرني وكل حاجه يجيبوهه النه اقسمهه بينه ..

وثاني يوم طلع ناظم وقبل مايروحون اجه سلم علينه وراح وبقى محمد مايكدر يطلع لان جرح بطنه بعده مانشف ...

اني رجعت العصر ويه بيبي وضلو يمه ابوه ومازن وهو وصاني ارجعله ماعوفه واني هم بس سبحت واكلت وسويتله هم شوربه دجاج مهروس بيهه واخذت ترمز جاي وكلاصات وشكر ولبست العبايه ورجعني عمي للمستشفى ...

وهناك كل شويه اصب جاي الهم واكشرله برتقاله اوكله لو انطي تمر ياكل ماعفته بدون اكل كل شويه انطي ...
وبالليل بقيت اني يمه وابوه رجع لبيتهم وبقى مازن بره ويه عمي ...
سألته ..
- ماحجيتلي شلون تصاوبت وشنو الصار وياك
- صار اشتباك والايرانين تكربو علينه كِلش وانه والولد صعدنا على التله حتى نسيطر وجتلنه منهم الصادته عينه وجان يتصاوب ناظم بجتفه وانه جنت بسده واكف راساً جريته وراي والضربه الثانيه اجتي بزندي جان يرجع ناظم لمجانه وصار يرمي والولد منهن الي انجتل ومنهم الي ضال واكف وانه هم رديت ارمي عليهم وتالي جان ماسمع الا صيحه ناظم عاينتله واشوفنه بصدره مضروب عفت الساتر وجريته جاي ارجع وانه اجرن بي جان ينضرب واحد من الجنود وطيحته صارت علي ونكلبت انه وناظم من راس التله وعلى التراب نزلنه ومادري بيمن نشكت بطني بس الاذكره طيحتي بالاخير على كوم خشب
- الحمدلله على كل حال
- لا الحمدلله لو ضال واكف جان انه هسه اسير عدهم
- يمه اسم الله
- انه شفتهم شلون زحف جيشهم وصعد على التله ودريت اخذو الجرحى هناك
- الله لا ينطيهم ان شاء الله يمه الف حمدلله وكعتو اثنينكم ونجيتو منهم
- الحمدلله .. الله لايراويج حالنه بساعته مانعرف الدم منين يتطشر وكلمن عينه على خويه كبل مايعاين لروحه
- سوده عليه .. الله يحفظكم عيني الله يحفظكم
- ضلي يمي هنايه حطي راسج ونامي لا تطلعين بره زين
- ماشي

غطيته ونام واني خليت راسي يم ايده ونمت
وضلينه على هالحال لمده اسبوع يلا طلعوه
وهو كال لاهله ياخذوه لبيته ابوه ماقبل شلون يعوف بيت اهله وهناك كلهه تنتظره يجي بس هو ضل مصر الا بيته يبقى واخذوه ...

وهناك من وصلنه واخذوه للغرفه تمدد وراحو ابوه واخوه لبيتهم .. بدلتله ملابسه وهو حضني كلي
- ردت اضل هنايه حتى اشبع بدلالج هناك حتى شوف ماشوفنج
- اي زين سويت اني اريد اعتني بيك على راحتي هنا

ابتسم واني رديتله الابتسامه وبست راسه وخليته يرتاح ورحت نظفت البيت وحضرت الاكل لان اعرف اهله راح يجون على العشى وجان ماعندي خبز رحت كلتله ..
- محمد راح اطلع لجيرانه اشوف بلكي يندلون خبازه هنا ماعدنه خبز

اشرلي اروح ورحت لبست عباتي ودكيت باب جارتي القريبه عليه وسألتهه على خبازه جان
تكلي ..

- على بختج حبيبه حايره بالخبزات وانه موجوده
انه انطيج خبزي الصبح خبزت جيس شكبره
- لا ياعيني تسلمين ماخذهن منج حبيبه هاي لكمه عيالج شلون اخذهه بس دليني واني اروح
- خيه لاتتعبين روحج هنايه مايخبزن ويبيعن كلمن عدهه تنورهه بيتهه
- لعد شلون ياربي غير يشهروني بيت عيالي
لو مادبرتهن
- انه هالساع اخبزلج لا تشيلين هم
- داده راح اتعبج
- لسلامه اخونه مامش تعب امشي لبيتج وانه
هالساع اطب اعجن واخبزهن واجيبهن الج

حضنتهه وبوستهه وتشكرت منها لو ما كلبهه الطيب ونفسهه السخيه جان هسه اني حايره وادك بالبيبان ...
اني متعوده من اجي من عيالي اجيب وياي خبز ومرات محمد يجيب من السوك وتورطت هالمره

رجعت كملت تحضير الاكل و قبل الغروب دزتلي جارتي صفطه خبز ابو السمسم واني صبيتلهه صينيه مشكله و وديتهه الهه عشه ...

اجوي بيت عيالي ام محمد وخواته والحجي والحجيه والعمام وولدهم ومديتلهم السفره وتعشو وتعللو يمنه وراحو ..

وضل كل يوميه واحد من جماعته جاي على الغدا لو على العشه لو العصريه يدكون الباب الجوارين
واني بس اركض بالمطبخ وحايره بالخطار ومحمد منتحس كلش يريدني اعوف كلشي واضل مكابلته
واني حايره احضر الاكل ولازم طبخ مرتب لان على غفله واندكت الباب شو منو جاي وهو يريدني بس يمه اضل وادلل بي وضليت محتاره مره هنا ومره هنا ...

كمت اوكف شويه بالمطبخ واجي عليه لو اكشرله فواكه واوكله لو اشوفه شمحتاج واضحكه شويه
ورايحه جايه احضن بي ومثل الطفل مداريته يلا شويه خفف ضغط عليه .. وبالليل لازم حاضنته والعب بشعره وانتظره ينام يلا انام ..

خابرتني روعه تسأل ليش مااداوم وكلتلهه على وضع محمد وطلبت منهه تسويلي اجازه وتستاذن من الاساتذه على غيابي هاالايام ..

وضل هالوضع ماشي هيج الى ان بدأ يتحسن وفتح الخياطات وهنا اجانه خبر علي متصاوب برجله
وهم جايبي جريح لنفس المستشفى .. راحله محمد
والاهل زاروه بالمستشفى وهمه وره يومين طلعوه
للبيت واخذني محمد حتى نروح نسلم عليه ونتحمدله بالسلامه ...

وهناك من طبينه وشافني كبل رفع حاجبه وكلب وجه واني هم بس كلتله حمدالله ع السلامه ابو جواد وترخصت وطلعت ...

وضلينه هناك بايتين وبهالليله محمد كالي جماعتي راح يجون يتعللون يمي حضريلهم شي ..
فكعدت اسوي كيك ومحلبي وكلت خلي اخذ للحجي والحجيه وحطيت بالصينيه ماعونين محلبي وماعون كيك وردت اطلع بس كلبي مانطاني كلت خلي اخذ لعلي هم خطيه يجوز يشتهي يحلي بهالوكت ..
وهم خليت حصته ورحت لبيتهم ..
انطيت للحجي والحجيه وترخصت منهم وطبيت للهول .. شفت علي متمدد وحاط رجله الملفلفه
على المخاد وحاط ايده على عيونه عبالي نايم
فحجيت ويه مرته الي جانت كاعده ..كلتلهه ..
- ابو جواد نايم ؟

بعدهه مفاتحه حلكهه وهو رفع راسه وكبل كال
- شكوو شجابج خير

اخذت نفس بقله صبر وباوعتله كلتله ..
- كل خير لاتخاف .. ذكرتك بالحلى جبت للحجاج وكلت يجوز يعجبك تاكل
- اخذي ماريد منج شي

رفعت حاجبي وكلتله باستهزاء ..
- ولا تريد كيفك اني صوجي وجبتلك
- طلعي بره يلاااا جهرتج هااااي لاتخليني اشوفهه ولييييي من جدااامي يلاا
- لاتصيح احتفظ بطاقتك طالعه اني

ذبيت الصينيه بالكاع وطلعت وطبكت الباب حيل
واسمعه يسب وينعل صاحتني الحجيه وسألتني عليه ليش يصيح وكلتله يعارك ذبان وجهه عوفي
وكعدت تنصحني اعوفه ومالي دخل بي مادري ليش عبالهم اني ميته عليه وعلى الحجي وياه
اني بس كلت خطيه هو مريض بس هالغلطه ماتنعاد...

وخلص هالاسبوع ورجع محمد التحق واخذني لبيت اهلي حتى اداوم وهناك بالدوام تلكتني روعه
تحضن بيه وتبوس وماخلت اي بنيه تحاجيني اخذتني على جهه وضلت تسولف وياي وبعدين دخلنه محاضره وكملنه اليوم بس متحاضنات ونسولف وثاني يوم هم واكفين دنحجي وجان يتزلزل كلبي بصوته وهو يكول ..
- هاا السلام عليكم
رفعت راسي وباوعتله وصرنا عين بعين ماعرفت ارد حتى السلام هذا حالي جان ولازال وياه يرجف كل طولي وينعقد الساني كدامه وهو عينه تلمع وصوت نفسه العالي المتعوده عليه قريب
خلاني انسى كلشي واضل بس اباوعله وللحظه تذكرت انه متزوج باوعت لايده ماكو حلقه بيهه
رجعت باوعتله حسيته افتهم من ضحكته
دنكت وروعه ردتله السلام واني هم رديتله السلام
كال ..
- شلون حالكم يابه والله وطالت الغيبه وصار زمان ما كعدنا سويه والتمينا هاللمه

اني دنكت ماحجيت شي وروعه كالت ..
- احنه موجودين عيني ونداوم يوميه انته الي ماكو
تداوم يوم وتغيب شهر
- انا تركتو للدوام اجيت اسلم عليكم وامشي
- ياااه لييش مو حرامات هاي كل سنه تعيدهه
- مايوالمني انه بصوب وهو بصوب
- بس انته شاطر بكل المواد حرامات تترك الدراسه

باوعتله وكلتله ..
- ايوب فرصه عمرك هالدراسه لاتضيعهه
- يابت الحلال انا ما اضيعهه ان شاء وكت الي تتخرجين انا ارد ادوام
- هاا يعني طلعت اني سبب تركك الهه
- عجل يابه من يكدر يكلب موازين عيشتي غيرج

انا يولو ماعرف افوت من هين واشوفج وجه بوجه وماسلم عليج ولا اعرف اسلم عليج مثل الغربه
خلي هالمدفون مستور يولو اسكتن من هالسالفه

مسحت دمعه خاينه نزلت بضعف لاشتياق صوته وضعف كدام الذكريات الي تحولت رماد ..
كالي ..
- يولو هاذ الطحش تعرضلج النوب ؟
- تقصد علي
-ايه هو
- اي بس يحب يهدد ماعنده شغله غيرها
- وانتي شجابج عليه ورجلج الاغم وينو عنج ما يوكفو عند حدو
- ايوب رجاءا
- هاااا جن الحجي مس خاطرج عليه يابه نتعذر
- لا مو هيج ليش تعتذر بس عوف هالحجي

باوعلي بنظره غضب وقله حيله ..كلتله..
- الحمدلله على سلامتك
- الله يسلمج طلعت بفضل دعواتج وتضحيتج
- ههه حتى هاي وصلتيهه ياروعه
- ماعرف اسكت اني كايلتلج من قبل لتلوميني

ضحكت وهي تاشر احجو احجو فاني كلتله
- شنو الي صار وياك احجيلي ضل بالي اريد اعرف
- والله جان عندي شغله تعرفينها بفد مكان وهناك بي تجمع لهذول الشيوعيه واجوي جفتو علينه واخذو كل الموجودين وانه رحت بيهه وهناك لا فاد اعتراف ولا صخام بعينهم وضليت بالسبع ايام انا متهجول من سجن لسجن ومن تحقيق لثاني ولا انا الاكدر احجي واكول يابه هيج وهيج سالفتي ولا الاكدر اضل ساكت واروح بهالتهمه وهو انا رايح اجيب هالولد تاليهه رحت وياهم وربج دزلي من رحمته ضابط جاب اسمي بالخصوص وكللهم طلعلولي ايوب واخذوني عليه وهو بكلمتين كللهم هذا وياي فكو اسره وكبل طلعت وياه ورديت لاهلي
- الف حمد وشكر الك يارب
- والله عاد من ساعتهه دزو علي الجماعه وطلعو همه دازين هالضابط حتى يغطون وجه بي وهم حصلت شكر من الجماعه على الصبر هالجم يوم
وربج حفظنا

نطت روعه من يمها وكالت ..
- وانتو ماتحجون عدل شنو جماعه وجماعه شنوو حاسبيني غريبه بينكم
- ول يابه انا والبت نحجي انتي شحطج بالنص جم مره انا كايلج لاتسمعين حجينه
- روحو بعيد احجو ماكدر اسد اذني
- ول اصبريلي انا احاسبج بعدين
- عفيه دكافي للتتعاركون احجيلي هسه حياتك زينه مستقره

باوعلي بنظره صفن بيهه ورجع ابتسم خفيف وكالي..
- حييل مستقره يابت الحلال حييل

هزيت راسي بمعنى فهمت قصده ان هو مامرتاح
وبنفسي اكعد احاجي اكثر واسمع منه كلشي بس الرجفه الي بيه مربطه لساني وبالكوه احجيلي هالكلمتين وياه ... صحاني من صفنتي من كالي ..
- ياامي انا اجيت خصوصي عليج اليوم
اجيت اودعج هالمره انا اعرف بعد مالنه شوفه
سوه

باوعتله ودمعت عيني من ذكر كلمه امي جان يكول..
- انا تارك البيت وماشي لاربيل اشتغل ويه ولد عمومتي هناك فتره ماتقل عن السنه
- تروح وحدك ؟
- ايه وحدي

جان روعه تتقرب علينه وكالتله ..
- ومرتك متاخذهه
- لاا شعندي ماخذهه هي حالهه من حال اهلي تضل بالبيت كاعده
- شلونهه وياك هي زينه ؟ شنو مواصفاتها

خزرها واني دنكت وهو رزلها ..
- يولو اكضبي لسانج انا ماريد اتخارب وياج اليوم يول مالج سالفه غيرها
- اييي كاتلني الفضول وانتي ماتريدين تعرفين شي عليهه معقوول!

رفعت عيني وباوعتله وهو ينتظر مني رد كلتله
- اريد بس اعرف دايره بالها على ابني لو متعبته

جان يزفر بقوه وعصر وجهه ورفع راسه للسمه ومادري شيحجي بس شفايف تتحرك رجع دنك وكالي ...
- والله احجي انا حك الله .. المره كايمه بواجبي ومالها صوت بالبيت تخدم اهلي وطايعتهم لجن انا ماشوفهه الا وكت العشى اكعد على السفره اتعشى
واطلع ماارد البيت الا اصلي الفجر بالجامع وارد اناملي ساعتين ثلاث واطلع وماسمعتهه اشتكت
ولا كالت شي هي حتى ماتحاجيني تريد شي تروح تطلبو من امي انا كل العلي اخليلهه فلوس على الميز وامشي ومادري عنها وين ماوين تصرفهن

- واهلك راضين بهالوضع ماحجو شي

- لا شلون ماحجو .. حجو وهوسو وكلبو الامه واهلها بعد وتعاون علي القومين وانا كلتلهم المره انتم الجبتوها انا نطيتها حكها الي اكدر علي غير هاذ تعذروني مافاد الحجي كلتلهم انا تاركها وتارك هالبيت وكلشي الكم وماشي وهاي انا جيتي اسلم عليج واطلع لاربيل وجنطتي بالسياره بره حاطهه
والله
- مو حل هذا ايوب مامتعوده عليك تهرب وماتواجه
- لا انا هربت مره وصارت عندي هالسالفه عاده

فهمت انه ديقصد موقفنا الاول بهالحجي ..
- ولو تراضها على نفسك اني مارضها عليك
ارجع وتفاهمو كل الحل بيدك لا تكسر ركبه البنيه هيج حرام عليك
- يولو الحرام على كل هالعالم مو علي انا مذبوح ومغدور من كل وجه عرفتو بعمري كلو
يول انا ماعارف اكعد معها ساعه تفهمين شنو ساعه ماطيك كلبي مايطيك ولو كعدت انا لاهي بكل شي عنها لتكضي هالساعه وامشي من البيت
عليش ماتفهمو انا مو حجر انا هم عندي كلب وكلبي ممرود لهاليوم انا عايش بحزن وهم فوك متوني مانزل لا انتي التعرفين همي وحالي ولا انا الشاكي لاحد همي انا عايش وحيد ماكدر ادخلها بوحدتي بيوم وليله الكاها كبال عيني ورابطين اسمي باسمها شتنظنين هالشي هين علي ولو انا زلمه هين !
- لا اعرف مو هين واعرف بكلبك مضموم هواي حجي وشكوى من كلشي والله افهم الدنيا عمرها مانصفتك وكلشي يمشي بالضد وياك

- عجل لا تطلبين مني هالكل يطلبوه خليج انتي الوحيده وياي .. انا بالذات هالوكت ماكدر افتح مكان لاي بني ادم بحياتي من كلشي انا مجروح
والي يكعد بسدي دقيقتين اختنك منو صاير الهوا احب اشمو من مكان مابي ريحه بشر ..
النوب يجون يطلبون مني اهتمام وحك وباطل هو انا روحي ماعارفها وين ماوين يولو انا الساعه عندي وكفت يوم شفتهم اخذوج للمحكمه هنا انا وكف عندي الوكت وصار كلشي يمر عليه بلايه زمن

من بين دموعي كلتله ..
- جنت تشوفني
- ايييه اشوفج اييه ماصبرت وعرفت اكعد وانساج
انا جنت رايد اجتلو والله وهو علي شاهد انا جنت ناوي اجتلو ومو مره لا الف مره انا اصل لعندو وابطل يكف بعيني عتابج الي لو عرفتي انا جتلتو
وبهذاك اليوم انا عرفتكم ماشين للمحكمه ومن شفت اهلج وضحكهم عقل ماضل براسي انا هالعالم يفرحو على موتي وماوكفني الا صاحبي جان عارف بيه انا اراقبو وعارف بالصارلي من ابوي وهو الوكفني عن جتلو بهذاك اليوم ولا انا جنت فاقد عقل لو اذبحج ماحس على روحي
ومشت هالايام كلها والساعه عندي واكفه على ذاك اليوم فلا تظنين مني بيوم راح اتهنى انا ورب الخلقج مانولدت الا لعذاب العيشه

جان حجيه سهام وتنزل عليه تكطعني بكل مكان
ماجنت حتى اباوع بعينه مدنكه وابجي وروعه لازمه ايدي وهو مستمر يحجي بحركه كلب واسمع منه اذاه بكل كلمه يكولها ومابيدي شي عليه يوم الي اريد اساعده اذي كل الي حواليه وكل الي اني مسؤوله عنهم واذا ردت اتجاهله فوجعه بكلبي يدك ماكدر انساه لو مهما حاولت اضل اطل عليه
من زاويه بنهايه يومي وابتسم بوجع على هالذكرى

مسحت دموعي وكلتله ...
- لو بيدي امسحلك هالوجع كله اني ياريتني مااجيت بحياتك وماعذبتك هيج ياريتني ماعرفتك وصرتلك نقطه ضعف
- لاا يالغاليه انتي حياتي الوحيده لو انا ماعرفتج جنت راح اضل ادورج كل عمري
- ايوووب
- اااه يابعد هالعين سمي
- اني مايهمني من هالدنيا كلها غيرك لاتنسى هالشي خليه ببالك .. اريد هسه اوصيك شي
- ابشري
- هالمره مراح اوصيك كأم لابنها لاني اعرف اعتني بيك من بعيد كابني اني حافظتك ومامنه عليك بالدعاء بس وصيتي هالمره لروحي العايشه بيك و وصيتي لصديق عمري الي يهمني تعبه
- وصي يا كل هالروح انتي وصي
- من بعد هاليوم عيش لنفسك لا اني ولا الوطن ولا الاهل تضحي وتأذي روحك علمودهم
من بعد هاليوم اريدك ترجع نفسك انته قوي ونبه وعقلك مايملكه بشر وعندك كل صفات الشجاعه
واني اثق بيك حتى لو كل هالعالم تخلت عنك وخذلتك اني عندك تلكاني وياك دائماً سانده ظهرك بالدعاء ومحد يكدر يسندك مثل سندي هذا واني اعرف انه احب شي لكلبك لذلك اريدك تمشي بزود وراحه اريد تريح كلبك بانك ماخسرتني انته ملكتني بكل الي صار اني عايشه ويه الغير بس جسد الروح والشعور كله ختمته يمك افرح بهالملك الي ملكته افرح بي
وقرارك بترك البيت اني اسندك بي روح ارتاح هالفتره وابدي صفحه جديده من كتاب عمرك وعيش كل ما بخاطرك وانسى الاهل والوطن ولو صار وذكرتهم لشي مهم فلا تخلي شعور الكره والملل يطغى عليهم خليهم شي عادي عيشه لكم ساعه وشيله من بالك
وحب نفسك لاني احبها .. واحفظلي نفسك لاني بخوف عليها دائماً وانته ماتريد تفجع كلبي بيك فاحفظها مثل لو انك تحفظني وتهتم بيه وكل مامشت بيك السنين واحتاجيت لنقطه راحه تذكر هاي وصيتي وتذكر ان اكو من يدعيلك ويسلم عليك كل يوم بظهر الغيب

جان يباوعلي وينصت لكل كلمه وتقرب ودنك لمستواي وكال ...
- انا عمري مااحب مره غيرج وعمري ماافرح بنعمه مثل ماانعم الله عليه بوجودج وتبشرين بكل هاذ يتنفذ انا عمري ماارفضلج طلب يابعد هالعين ونظرها

باوعتله وهو قريب مني ودمعت عيني جان يأشر ويكلي ..
- اشش ولا دمعه ماريد ابدي صفحتي الجديده بدمعتج
ضحكت ومسحتها جان يرفع راسه ويضحك وكال
- والله هاليوم الاشوفج بي ماي بارد ينزل على كلبي يغسل بي كل همي وتعبي والله انا هالساع ماحس عندي هم بدنياي نطيتيني طاقه اواجه بيهه اكبر عدو

ضحكتله وكلتله ..
- ياعسى كل ايامك راحه وفرح .. تشرح صدري بهالكلام ريتك تضل دائماً هيج متفائل

ضل صافن عليه وكالي ..
- شو اضحكي هاي ضحكتج الجبيره

اني بخجل دنكت وضحكت جان يصيح بيه
- يولو هين ارفعي راسج عدل تاشوف هالسنينات وهالدكه تااطبعهن براسي

رفعت راسي وباوعتله واني اضحك وروعه خربانه ضحك واني ضحكت على ضحكتها اكثر
وهو صاافن ويتمعن بكل حركه اسويها جان يكول

- استودعكم الله يالعزاز

واندار ومشى اني لا ارادياً صحتله وكمت من مكاني ..
- ايووب
اندار وباوعلي واني كلبي يرجف ماريد الوداع
وماعرف شحجيله بعد اريده بس يبقى حياتي ظلمه بلياه عبرت عن كل هذا بنظره مكسوره وايد مرفوعه ومتردده تكله ارجع .. اجتي روعه لزمتني وتكلي خلي يروح لاتصعبيهه عليه واني اباوعله وهو منتظر مني الكلمه ويقدم رجل ويرجع بالثانيه جان كلتله ...
- روح ربي وكلبي راضين عليك

ابتسمتله وودعته بايدي وهو رفع ايده بالسلام وراح مشى بسرعه وضلت عيني على خطواته

رجعتني روعه لمكاني كعدت واني بس دموع تتجارى ماعرف اواسيه لو اواسي نفسي
بعد دقايق من البجي استرجعت قوتي مثل كل مره
وكلت اني لازم ابقى قويه دربي طويل واكو من ينتظر كسري وماعاش الي يتشمت بيه .. كمت رحت غسلت واريد اعدل الكحل ايدي ترجف
احاجي نفسي اقويهه وبعده الضعف بكلبي ماخلص
رجعت ابجي مره ثانيه على حالي الي مايرضى بحالي .. ورفضت ان اكون منهاره. وضعيفه
ورجعت غسلت ورتبت نفسي ودست على كل مايأذيني من شعور وافكار وطلعت كلت لروعه
نروح نطلع نتمشى وهي ماصدكت وطلعنه تمشينه وشربنا عصير وهي تحاول تحجيلي شغلات تضحك حتى انسى واتلهى وياها واني اتراوح مابين لحظه اقوى ولحظه احافظ على القوه

وكملت مسيره ايامي بهالنحو اسبوعين بالدوام
وعشر ايام ويه محمد واذا عندي امتحان ياخذني امتحن وارجع وياه للبيت ولحد امتحانات نصف السنه ضليت بيت اهلي امتحنتهن ورجعت وياه
لبيتنه يوم والثاني كال ..
- امشي نكعد بيت اهلنه هالاسبوع

ورحنه هناك لبيت اهله وضليت وحدي وياهم كالمعتاد مااشوفه بس وكت الاكل مرات ومرات يضل لوكت النوم يلا اشوفه ...

وبيوم بالليل اجاني محمد عصبي ....
.

يتبع...

عمري للطاقة الايجابية اهواي اشياء تسويها
ابسط شي خليج دائما قريبة بالأشخاص الإيجابيينّ
*الأشخاص الي دائما يشجعوج وميضوجون من نجاحاتج ✨
*الأشخاص الي ميركزون ع صفاتج السلبية ✨
*الأشخاص إلي متسمعين منهم غير الكلام الطيب
*الأشخاص إلي يضحكون وميتشكونّ من ظروف الحياة ✨ ترى السعادة " مُعدية " 💜

احنا المسؤليين عن اختيار الأشخاص بحياتنا واحنا الي نگدر ننهيّ علاقتنا بالأشخاص الي ميجيبونّ إلنا غير الطاقة السلبية🤚🏼🌿 لذلك اختاريّ الأفضل الج 💕
_ أما اذا كانوا قريبينّ منج ( مثل الأهل ) ويجيبون الج الكلام السلبيّ والشكوى ومتگدرين تقطعين علاقتج بيهم فالأفضل تتجاهلينّ ومتسمعين لكلامهم اذا كان سلبيّ 😌

#ملوكه

يي حبي اكيد زين🌚🌺وتكدرين تسوين كمكعبات للثلج او كمادات
وكمادات الشاي اكو نوعين لو كيس شاي بارد لو دافي

★اذا عندج هالات او انتفاخ او العين محمرة ..فتستعملين كيس شاي البارد
يعني توفرين كيس شاي بالماي ومن يفور زين ..تطلعي وتخلين الكيس بالثلاجة...لمن يصير بارد..خلي عل عينج

★واذا عندج جفاف بالعين او اكو حبوب ملتهبة جوة الجفن او التهاب..فتستعملين كيس شاي دافي☺️
يعني تفوري بالماي ومن يفور زين..لمن يصير دافي . خلي الكيس عل عينج


#ملوكه

#عنايه_لبشرتكِ

مكعبات ثلج الشاي الأخضر 🌱

المكونات 🥣

ظرف شاي اخضر 🌱
ماء مغلي 💧
قوالب ثلج ❄️
نقطتين قيتامين E (إختياري) 🍊

الطريقة 🍥:
صبي الماء المغلي بكوب وضيفي
الشاي الاخضر واتركيه يبرد واضيفي
كم نقطة من فيتامين E وبعدها صبي
الشاي بقوالب الثلج وخليه بالفريزر
حتى يتجمد وفيكي تستخدميه لوجهك
ورقبتك وعيونك .

فوائد المكعبات ❄️
1- تعمل على تجديد خلايا البشرة
وجعلها مشرقة 🌸
2- يعمل على التخلص من انتفاخ الوجه🍎
3- يُزيل أثر العيون المنتفخة، وذلك
لوجود مضادات الأكسدة🌿
4 يعمل على زيادة الدورة الدموية 💉

#مكعبات_النضآرة ⭐️💗



#اعـاده_توجيـــہ_لصديقتج
#ملوكه
@stylegrils

حبي أبو الاعشاب مايعرف غير سوالف الزيوت😅
فكون ترحين للمختبر وتحللين..لان اذا عندج نقص بالفيتامينات فاي شي تسوين لايثخن ولايطول

فلازم تحللين ...مال الغدة الدرقيه وفيتامين د...والحديد وزنك

واي ماسك للشعر بي بيض..فهو زين يقوي الشعر لانو كل بروتين..وزيت الزيتون للتنعيم وتطويل

فانتي كل اسبوع مرة استعملي ماسك بيض وضيفله كلشي من زيت زيتون وعسل وجل الصبار اذا عندج

وبقية الايام كل 3 ايام استعملي اي زيت عندج..لو زيت الزيتون لو زيت الخروع..واستمري عل هالعناية هم ينعم شعرج واشويه اشويه يطول..لان الشعر ميطول اذا تعبان ومتقصف
فلازم يكون صحي فيبين الطول🥰✨


#ملوكه

وللقشرة اكثر من نوع اكو🌚🌺..هسه اوجهن

بس الشي المجرب واللي مايأذي ولايسبب تساقط..الليمون
كلشش زين للقششرة يعني كل 3 ايام تغسلين الشعر..فقبل ماتغسين تجيبين الليمون ودلكين عل فروة راس واشويه اشويه تعصري ..ضلي دلكي لمدة 10 دقايق
وتركي عل الشعر فد ربع ساعه وغسلي..بشامبو مخصص للقشرة
فضروري تاخذين المخصص

فاذا تستمرين منا لشهر..رح تشوفين فرق😻

#ملوكه

عيوني اللي يرهم وياه شال بيج ووردي وصخي وابيض واسود
والجنطة بلون الشال البسي🥰✨

#ملوكه

ومنا تنسيقات الزيتوني👆🏻😇


#ملوكه