#شقراء_بغداد

بارت_١٧



بديت اشوف عائلتهم عن قرب اكثر واول ماكشف قناعه كدامي هو وضعهم الاسري .. او علاقاتهم بشكل عام .. جانت مليانه بالحسد والتطفل ...

نظرتي جانت عليهم طيبه واتوقعهم محبين لاهلهم واعمامهم وكلب على كلب وماجان عندي شك بهالشي الى ان بديت اختلط واعيش وياهم اكثر واول جزء توضحلي هو نسوانهم ...

من بقيت بيت عيالي تقسم الشغل بيني وبين اخواته
صار عليه الطبخ وغسل الملابس واخواته تعزيل والمسح ومساعده امهم .. وامهم شغلهه للحلال والزرع ...
عائلتهم متكونه من ٣ بنات و٤ ولد والام والاب
وبصفهم بيت عمهم الجبير عايش وياهم الحجي والحجيه وعمهم متزوج اثنين وعنده ٥ ولد ،٤ بنات .. وبصف بيت العم الجبير موجود بيت العم الصغير والاصغر منه هم ..
يعني اربع ولد واربع بيوتهم واحد بسد الثاني
بس بيناتهم حديقه جبيره تفصل بيت عن بيت
وماكو اي وجرد لاي سياج بس حدايق هي حدود كل بيت عن الثاني ...
وره هاي البيت يبدا البستان ويمتدد الى اطراف النهر من الجهه الثانيه .. وكل واحد منهم مقسم اله كم دونم يزرع بيهن ويبيع ويعيش منهن ...

بيت عيالي جنت اطبخ الغدا من ساعه عشره وساعه ١١ ونص السفره تنمد بالمطبخ والاكل ينصب وكلها تجي تتغدا ..
اني علاقتي ويه اخته الجبيره عاديه وحديه بنفس الوقت على كد الضروره لان هي ماتحبني ابد
بس البنات الصغار الاثنين هذني يحبني حيل وكل كعداتنا وسوالفنه سوه وهنه كلش خدومات وطيبات
وحلوات حيل .. الخدود تنكط دم والشعر اشكراني
وعيون عسليه كل عائلتهم هيج البنات بس الولد من همه وصغار بيض من كبرو صارو سمر والشعر اسود بس العيون بقت عسليه ...

اخوان محمد مازن يصغر محمد بسنتين وباسم وحازم توم وهمه بعمر ١٦ ... خلوقين ويومهم كله بالفلاحه ومااشوفهم بس وكت الاكل ...

بعد مااخلص الغدا وتنظيف المطبخ اروح اجمع
الملابس الي شارتهن من الصبح واوديهن للغرفه ويكعدن البنات يصفطن واني اتمدد شويه وبهالمره
صدفت وكت غفوتي اجني خالاتهم كعدت على صوت امهم تصيح حتى نجي وركض لبست حجابي وطلعت سلمت عليهن .. بعدني داريد اقدملهن مي وجان وحده منهن تكول ..
- ها ياام محمد بيتج مليان نسوان وانتي عجينج ضال لهسه مامخبوز

جان ام محمد تجر حسره وتكول ..
- اييي جا شسوي ردتهه مكحله جتني مدمغه
هاي كسمتنه بعد
- وشبيهه جنتج ماتخبز شني محنايه !
- لااا لااا خيه خليهه هنايه بالمطبخ جاعده ولا تمشي وتشهرني جدام هالنساوين وشفهمهه بالخبز والعجن وشجابهه عليهن غير يحرم علينه مواجيل اليوم كله
- اااهي كرت عينك يامحمد على هالمره طحينات ماتعرف تعجنهن وتطركهن كرت عينج ياخيه كرت عينج

اني جنت واكفه ولازمه بيدي الكلاص والسراحيه
واباوعلهن وهنه عينك عينك يحجن عليه واكلني اكل بعيونهن ولا استحن وكالن عيب تسمعنه وعيب واحد هيج يواجه المقابيله ويحجي عليه واحنه خطار ولا عدهن ذره حياء ...
اخذت نفس وترست الكلاص ومديته الهه وكلتلهه ..
- تفضلي خاله

جان تاخذه وتشرب وتكلي وهي رافعه الحاجب.
- شكراً

ابتسمتلهه وقدمت للثانيه ورحت طلعتلهن فواكه مليت ماعونين كبار وخليته كدامهن وبعدني مادايره وجهي منهن جان ترجع تكول ...
- ماتزوجينه لمازن وتجيبيلج جنه تشفي الكلب
- اي ان شاء الله جاي ادورله على مره
- موش هم تركضين على الحضيريه اخذيهه منه وبينه تحمل عيشتنه وماتموع جدام الرايح والجاي
خلهه تكض بيتج وحلالج انتي اكعدي وحطي رجل على رجل ماكفاج هالعمر كله تهورفين تريحي عاد
- والله جن يراد اجيبن موه تحزب لهالبيت وانه هم ريولي تونن علي موش عاد اضلن اركض ورا هاذ وذاك هم اريدن التعين حالي
- اي ماتشوفين من بنات عمهم موش ضالات ماتاخذين منهم
- لاااا لااا خيه شني جايزه منهم اخذلهم هالسلابيح هذن امهات الوصخ اخليهن يكضن بيتي ياااه شمالي ياخايبه تدمغت وتسودنت
- جا هاا منين تجيبين
- اشوفن منين الكطلي وحيده

طلعت وعفتهن واني مخنوكه منهن .. اذا هيج ماعجبهه شكو كتلت نفسهه عليه لعد ؟؟

ردت ابدي اثرم واحضر كباب عروك للعشه وهنه
كاعدات بالمطبخ هم زحمه اهوس وافردش كدامهن وضليت انتظر بلكي يكومن لفد مكان ..
وساعه يلا كامن ويه عمتي ديخبزن ..
هنا خبزهم مرتين يصير .. مره من الفجر وياكلون منه الريوك والغدا ومره الثانيه العصر وياكلون منه بالعشه ... لان مايبقى خبز هاي شغله والثانيه
ميحبون ياكلون خبز بارد وبايت ...

وره ماراحن بديت اني اثرم واجهز للعشه وسويت نجانه كامله حشو وجبت الطحين شويه وعجنته وخليته على جهه .. وطلعت لوبيه حطيتهه ع النار
وضليت الملم بالمطبخ جان يفوتن وبيدهن الخبز
اخذته منهن وغطيته وجان تجي عمتي كشفت الجدر وشافته وكالتلي ...
- امشي طلعي هالجدر بره ع الحطب حطي هنايه مانطبخ اللوبيه على الغاز يمه تحركي يلا

اخذت الجدر وطلعت حطيته يم التنور وضليت واكفه وافر براسي .. منين اجيب حطب ؟ وشلون اشغل نار وبيا مكان !!!!
جان تجيني عمتي وتصيح ..

- ياحظي حطبات معرفتي تشعليهن ولساعج صافنه اووووويلي على حظي شكد شغلتج بطيه

ماحجيت شي ضليت مدنكه ..يعني اني شمعرفني بهالسوالف وشمدريني شلون يسوهن ..
باوعتلهه وشفتهه جابت من وره البيت حطب واخذته لحفره صغيره وجابت بطل النفط من من وره البيت وهم رشت فوكاه وخلت طوابيك اثنين
وشعلته بالشخاط وصاحت علي جبت الجدر وحطيته فوكهن جان تكلي ...
- نوبه الثانيه تعلمي الطباخ للگلي بس مانضل نترس غاز احنه منين نجيب كل اسبوع دبه هاذ حطب مكوم اشعلي وحطي جدرج عليه
- ماشي

راحت واني ضليت واكفه يم الجدر باوعت شويه على المكان وعلى حالي ووكفتي هنا بنص الحطب والصخام وين جنت ووين صرت ...
رجعت للمطبخ حطيت الطاوه على النار ووكفت اكلي الكباب واحطه بصينيه صغيره وسويت زلاطه وردت احمي تمن ومركه هم ويه العشى
وكلت اروح اسئلهه تقبل احطهن ع الطباخ لو لا
ورحتلهه بالغرفه جانت كاعده ويه خواتهه عاد دكيت الباب ودخلت ورحت ليمهه وكلتلهه ...

- عمه عادي احمي الجدوره على الطباخ لو هم اخليهن بره

جان هاي الخاله تنط من يمهه وتكول ..
- ياحظي وهاي هم رادلهه تعلوم ! مامحميه جدر بيتكم ياخايبه
- لا مو هيج بس داسألهه لان

جان تكلي عمتي ..
- حطيهن اي حطيهن امشي شوفي جدرج ذاك استوه بعده امشي يلا

درت وجهي وطلعت والدمعه بعيني كلش صايره حساسه هالايام وانغث من كل كلمه ...
كملت العشى وساعه سته ونص حطيت السفره واني عفت الاكل كله وكعدت اكل روبه وخيار
احبهن ومالي نفس بغيرهن .. واشوف خالاته
كاعدات بسف مازن ويدغن بي ويأشرن بعيونهن عليه ويتمضحكن .. اني دنكت وغلست عليهن بس كمت ماعرف ابلع اللكمه .. عفت الاكل وضليت كاعده وياهم لحد ماكملو كمت لميت السفره والمواعين جانت على بنين بس اني كلتلهه اغسلهن بدالهه ماردت اكعد وياهم بعد وهم انغث بحجيهن
ردت ابتعد والهي نفسي عنهن ...

كملتهن وكلتلهم رايحه اشوف الحجيه قبل متنام
ورحت لبيت عمهم الجبير .. سلمت عليه وعلى الحجي وجهه بشوش وماعنده شغله غير التسبيح
وطبيت للهول من شافتني الحجيه هلت ورحبت بيه
حضنتهه وبوست راسهه وايدهه وضليت يمهه اسولف وهي تكلي ...
- ضلي يمنه هنايه وبيتكم اجروه هم تونسينه ونونسج شعندي غادي بالمنكطعه ضاله وحيدج
- حجيه والله هيج بعاد احسن اليه والهم
- هااا جنهن بدن وياج هههه
- هاا حجيه تعرفين شبيه مبين عليج
- هذني عجين ايدي يايمه شلون ماعرفهن شيسون مايسون من وراي .. من جان الحيل كبل مركصه عليهن العصا ومافاد ويه هاللسنه عاد هسه وكت الطحت بي وتوجيت وحيل ماضل بيه شصارن تفرعنن هالنوب
- والله ياحجيه اني ماعرفهن مثلج والي يحجنه
مردوده عليهن اني مالي دخل بشي .. بس اريد اكلج شغله
- اي ياحبوبه كولي اسمعج
- اريدج تعلميني مثل ماعلمتيهن .. حجيه والله اني ماعندي مشكله بشي اشتغل عادي هذا شغل بيت ماينعاب ولا استنكف منه ..بس اني اطباعي مو مثلهم وهنه مديفهمن هالشي عبالهم اني ماعرف وكلشي ماافهم ولا اكدر اسوي شي بس والله اني الي مداافهمهم شيريدون ..يعني يريدون اكل اروح اطبخ الف سالفه يطلعلي وهالشي ديتعبني ويتعبهن
فدوه علميني على اطباعهن
- هاااا والله هذن لا عدهن عكل ولا فهم ماخذاتهه بالصياح واللبك والهوسه .. شوفي يابنيتي شكثر
يسمعنج حجي ويدوسن بطنج لا تحجين ولا تراددين عمتج خلهه تهوبد وحيدهه وانتي اسكتي
عبن هالعمه باول سنينهه ويه جناينهه تحب تسيطر عليهن والتطاول بلسانهه بحك ولا باطل ماتحصل الا الحيل وابو زايد من الاهل والرجال لين هاي ام البيت حتى لو هي غلط مايطلعوهه غلط فهمتيني يايمه .
- اي فهمتج حجيه واني هم ساكته والله كلشي مااحجي
- اي وشغله الثانيه .. خلي شغلتج نظيفه مثل توكفين تطبخين لاتهوسين المطبخ واليفوت يشوفه جن صايرله فرهود لا خلي شغلتج نظيفه ماعون التكضينه اكضي شغلتج بي واغسلي وردي لمجانه
السجين هم بساع اغسليهه ورديهه وهيج وانتي تطبخين الملم شكو داير مدايري حتى اليفوت يشوفن مطبخج نظيف ويفتح النفس
- اي حجيه ماشي هم انتبه عليهه
- وعايني تره هنايه النسوان مايحبن التبذير ايدهن كصيره ومشدوده كِلش هالسنه تطب وتطلع مايشترلهن غير ثوبين وانتي مااكلج صيري مثلهن لين اعرفن موش عوايدج هاي
- هههههه اي حجيه وين اكدر اني هيج
- اي اعرفنج روحج تحب الغوه وخلج يايمه مدللـه رويحتج جا هاي انه كبرت وعجزت ومايوم عشت لروحي كله كضيته اهووف بالحلال والزرع والجهال وعصابتي على راسي من يوم شبيت
انتي لاتحرمين روحج لجن عليهن هنه اكلج هيج طبايعهن حتى لاتستغربيهن زين
- اي حجيه زين
- داري بطونهم تكسبيهم بالاخص زلمهم يعاينون الجنه يوم التوكليهم .. عمج دايماً هالفواكه اجيبله ماعون ووكت الغدا طبختج دسميهه وكثريهه وحضريلهم العصريه لحموينج وعمتج هم سويلهه صينيه ودزيلهه وهيج لميهم بسفره الوحده حتى لو رحتي لبيتج يذكروج ويفكدون مداراتج ليهم
ويوم التجيهم يفرحون بجيتج ويتلهفون عليهه
- صار حجيه هالنصيحه ماانساها

- اي يمه هيج اريدنج تحبينهم انتي يوم التحبين بيتج تبدعين بي ويوم التبدعين تذهلين اهله وتكسبيهم
- ان شاء الله
- وخلي اكلج فد سالفه هاي بيني وبينج ماتطلع لاحد
-اي شنو
- عمتج انه اعرفه زين تحب التفاخر والابهه
شما بيدج دلليهه وتحيليلهه بلبسه بذهبه وهيج طيري عكلهه
- ههههه سهله هاي ... والله ياحجيه ماعرف شسوي بدونج الحمدلله انتي موجوده وياي
- هههه جا يايمه العمر هم يعلم الوادم وانه شبعت تعلوم منه وهالدور صرت اعلم

حفظت نصايحهه وصرت اطبقهن .. واولهم بديت
بشغله الاكل ... صرت وكت الغدا كله ثريد اسويلهم ٣ مواعين اثنين كدام الولد وواحد للبنات وعمتي .. وماشاء الله مايرجع منه نتف ..
وصرت انطي فلوس لمازن واكتبله بالورقه شنو احتاج من غراض وادزه للولايه يجيبهن الي ..

ومن شافت العلاكه عمتي سالت ..
- هاي شنو المن جايبهن

كلتلهه ..
- عمه هاي اني وصيت يجيبهن كلت اليوم الولد تعبو بالحصاد فخلي اعضوهم شويه باطباق حلى
- هااا وهاي شلون يسوونهن
- هسه اشوفج اياهن عمه .. جان عمتي عدهه كتاب طبخ واني مره كتبت كم وصفه منه وسويتهن بيتنه وهسه اذكرتهن وكلت اسويهن الكم
بلكي يعجبوكم حتى دائماً اسوي هيج حلى
- اي يلا شوفينه شطارتج

تشكرت من مازن واخذت الغراض وكعدت بالبدايه خبطت كيكتين وحده حطيت بيهه ككو
ووحده خبطت وياهه شويه من شربت البرتقال
ابو الجيس وخليتهن بالفرن ... وجبت مواد وسويت لقيمات وخليتهن شويه يختمرن بين
مانفشت الكيكه وصعدتهه فوك ..شغلت الطباخ
وبديت اكلي هاللقيمات واني محضره الشيره
وترست صينيه منهه وخليتهن شويه بردن
وهم بين ماتخدر الجاي واخذت صينيه مشكله من كيك ولقيمات والجاي ووديتهن للولد .. وجان عمي بالاستقبال متمدد ويه اخوانه هم سويتلهم صينيه واخذتهه الهم كله كيفت وعشتي وتسلمين ..
واجيت للمطبخ لكيت البنات حاطات الباقي بصينيه الهن وكاعدات ياكلن ويه عمتي ..
ضحكت وفرحت من شفت هالخطوه فادت وعجبت الكل .. وبقت شويه من الكيكه اخذتهه للحجي والحجيه ويه استكانات الجاي ورحتلهم الحجيه ضحكت من شافتني وكبل كالتلي ..
- بنت اصول ماتنسى الجلمه وتعرف معناهه

اجيت بستهه وحطيت الصينيه كدامهه وكعدت تاكل وتمدح باكلي وتشجعني استمر على هالشي والحجي هم وصاني يوميه اسويله هيج تعلوله ..

وصرت كل يوم اسويلهم عصريه شكل وتعلوله شكل .. وكت العصريه اسويلهم مرات خبز مكلى بالدهن وعليه شكر يموتون عليه .. ومرات اسوي
طاوه مخلمه وعليهه بيض للولد ومازن حبهه ووصاني اكثر منهه .. وللتعلوله اسوي كاستر
واخلي عليه شياف تفاح او انثر عليه رمان او مبروش واسوي للبيتين بيتهم وبيت عمهم الجبير
ويوم الثاني ادز لبيت العم الصغير وهيج كل يوم لبيت ،، والكيك كل يوم والثاني لازم اسوي للحجي
وكسبت بي محبه ولدهم وصارو باسم وحازم وكت العصريه يجيبون من البستان التفاح والالو ويكلولي سويلنه كيك بطعم الالو واني اضل اضحك شلون اسوي بطعم الالو ؟ عبالهم اني
من اسوي بطعم برتقال لو خوخ هاي عبالهم من هذني هيج اثرمهن واحطهن وياهن مايدرون هو كله منكهات ....
ماردت اكسر بخاطرهم وصرت اسفط بالقالب قطع تفاح واحط فوكاه الخليط وباالاول باسم اعترض
شنو هاي مابيهه من جوه بس من فوك وكلتله غير مره احط من جوه .. ورحت لمازن وصيته يجيبلي
شكو نوع مال شرابت جياس ويجيبلي ياسميري هم
وثاني يوم هو راح جابلي مثل ماوصيته ..
وسويتلهم بالتفاح ومن ضاكه باسم وشاف الطعم بتفاح ضحك وكال هسه خوش بيهه من جوه وفوك

هنا بدت عمتي تذيع بصيطي بين حبايبهه وتتباهه بيه كدامهن وتروح تحرك بنسوان عمهم وتكول
اله اخذلي حضريه ثانيه هم تبرد كلوبنه مو مثل هالهوش العدنه .. ويبدن يعدن ويصفن وحده للخ
وهي تعوفهن وتجي للبيت وتكول ..
- حيل والله لمااكسر خشومهن هالجايفات امهات الوصخ كاتلهن الذبان معشعش على وجوهن

وتضل تعيب عليهن وعمي فقير مايحجي ولا يحل ولا يربط ...
وهنا بدت مشاكلي ويه بيت العم ...
صارن نسوانهم يشوفن دم سنونهن ولا يشوفني واذا طبيت لبيت وحده منهن من الباب اسمع
لا هله ... وبالاخص بيت الجبير واني ماكدر لازم اروح اشوف الحجيه واخذلهه شي .. وهنه كامن
يسفطن عليه بالحجي كدام الرايحه والجايه ..

على ها كاعده تتبغدد علينه وتتحايل على عمتهه وهي مطربكه وياهه .. وتروح تروح وترجع للحجيه تريد ادستر وياهه وتتمسكن كدامهه خاف يصير شي تفزعلهه .. وسالفه الثانيه .. مخليه مازن جوه باطها تتحايله وتخلي يركض ركض لحجايتهه ...

وكل يوم تجي وحده من المنطقه هاي بس تنقل اخبار هي شغلتهه الوحيده هاي .. وعمتي مشغلتهه عدهه تنطيهه حليب وزبد وجبن بس تجيبلهه هذني شيحجن علينه ... وهي تروح تجيب الحجايه من فلانه وفلانه وتجيهه ... وعمتي من تسمعهه تضل تتحلف وتتوعد بيهن وماتفوتلهه يومين اذا ماتكب العركه وياهن وهنه وكحاااات مايوكف بعينهن بس
علييييي ... هذا صكارهن وحتى عمتي هم صاكرهه .. هذا بس يسمعن باسمه يخنسن وكل وحده تطب لبيتهه وتسد بابهه ...

علي هذا رجال طول بعرض .. جف ايده يعادل وجهي كله .. ضخم جثيث ودومه محزم وخنجره بحزامه .. يصير ابن عمهم الجبير .. عمره يطلع
٣٠ سنه .. هو ثاني ابن لعمهم متزوج ومرته خانسه ماسمعتلهه بيوم حس ،، عدهم ولد وبنيه
وهو ضابط يروح اسبوع وينزل خمس ايام
وبهالخمس ايام الينزلهن اذا جاهل بجه عاط عليه وخنسه .. اذا اثنين من ولدهم تعاركو اثنيهن ينربطون على الشجره لمده ساعتين وينحرمون من العشى ...

جان اذا يشوفني اجي لبيتهم يضل يترصد حركتي وعاكد حواجبه ومخنزر عليه حتى اذا وديت شي الهم ماياكل منه .. ووكت الهو موجود نسوانهم كلهن كلب على كلب وكله حبيبه وعوينتي يتحاجن
ويتراجفن كدامه كلهه من تمشي تهمس ..
- يبووي يمه الرحمن بس لا يجيني

اني ماجان عاجبني هالوضع كله .. يعني على شنو هالمقام المحمود الي منطي اله .. بسبب هو ضابط؟ لو لانه قاسي وياهم ؟

صادفت وكت نزلته هالمره ويه وكت نزول محمد الي صار ينزل كل ٣ اسابيع ... فضلينه يمهم يوم والثاني رجعت لبيتي ...
نام محمد واني استلمت البيت غسل من فوك لجوه
وحضرت الاكل ورحت نمتلي شويه وكعدني احطله الغدا ... ورحت صبيت وتغدينا وضل يحجيلي عن روحته والايام هناك شنو صار بيهه من معارك وشلون تصدولهه وكم صديق خسر
بكل معركه ...
جان هالمره حيل مهموم وملامحه قاسيه وماله خلك اي شي ... وحتى من كمل شرب الجاي
راح طلع شويه ورجع كلي اريد انام وماريد اي صوت ... عفته ينام وسديت الباب واخذتلي كتاب
وشميته شكد جنت مشتاقه لريحتهن ووجودهن وياي ...
وكعدت كل اليوم بالحديقه اقرا ولحد ماصار الغروب رحت للمطبخ حضرت العشى وكلت بين مايكعد هم احضرله فد شي حلو ياكله بلكي يتعدل مزاجه خطيه.. وسويتله حلاوه جكليت وخليتهه تبرد بالثلاجه وكل شويه اريد اكعده واكول لا
وضليت هيج عايفته لحد ما هو بذات نفسه كعد بالتسعه وجهه منفخ وشعره مهوس ويفتر بالشورت
غسل وكعد واني حطيت العشى وكعدنا ناكل
من كملنه اكل ونظفت المطبخ رجعتله وهو بعده على كعدته وصافن ... كلش انكسر كلبي عليه هالمره جان حاله مايطمن ...
كعدت بصفه وجريت راسه لجتفي هو كبل استسلم وخنزل نفسه اكثر وضل مخلي راسه بركبتي
مسحت على وجهه شويه وكلتله ..
- شبيك ياعيني ليش هالحزن احجيلي شنو المثكل على صدرك هيج ومتعبك
- زهرااء صاحبي عرفته من ست شهور مات جدام عيني بايدي انه شلت جثته للمعسكر

شهكت من سمعت شكال وحضنته وهو ضل يبجي شويه ورفع راسه ومسح وجهه وكال ...
- جان الولد عاشك بنت واحد من باشوات بغداد ومايرضون ينطوه وهو عنده شال ستن منهه لافه على ركبته من يوم الشفته وشافني هو لابسه ووكت الي تنشد علينه الحرب يجره ويشمه ويضل كاضه بيده وكلساع ياخذله شمه منه واخر شهادته جانت عليه انه جدام عيني جنت اعاينه يتشاهد من صار الرمي وهو تصدر التله وخرطهم واجته جيله براسه كتلته بكاعه

جان يبجي شويه ويرجع يحجي عليه واني بس امسح بدموعه ..
- الله يرحمه مات مرفوع الراس وبكرامه مات شجاع افرحله بالجنه لاتنقهر عليه
- تدرين انه صارلي سنين اشوف الموت جدام عيني وبيني وبينه شعره مرات اتصاوب ومرات اطلع منها بسلامه وماهزني شي بس هاذ اااخ هاذ
مات محروم جان ينتظر ويدعي تخلص الحرب ويرجع يشتغل ويه ابوه ويجمع فلوس ويمشي عليهه مره اللخ هاي كل احلامه جانت وتالي اخذته الحرب وماخلصت ..اخذت كل عزيز وحفرت بكل بيت بير من الحزن وماكفاهه انه جنت افكر لو هاذ اليوم راح يمر عليه هم ومااشوفن هالحرب خلصت ولا اتهنى بشابي وبيتي ولا اتهنى بيج
وهم اموت محروم
-لااا لاا اسم الله عليك عمر الطويل ان شاء الله
وماتموت محروم لا اسم الله .. لاتكول هالشي بعد
واني عندك وياك لاتخاف والله جاي ادعيلك وادعي لكل شباب هالبلد يرجعون بسلامه لاهلهم وترجعلي سالم ومتعافي وربنا رحيم مايكطع باحد لاتخاف
وكل من راح فهو سبقنه للجنه ان شاء الله هناك تلاكي بالاخره وبدمهم احنه اليوم عايشين ومرتاحين الف رحمه على ارواحهم الطاهره

دنك وتمدد وخله راسه على رجليه واني ضليت امسح بوجهه وامسد على شعره وجتفه ومقهوره عليه وعلى هالراح هم كسر كلبي شرادو هالشباب من هالدنيا غير يعيشون كم يوم ويه اهلهم وناسهم وجوه سكف بيت امن ينامون .. حسبي الله بكل من جان السبب بدمار ولدنا وبلدنا ......

وره يومين بدت نفسيته تتحسن وصار يطلع من البيت يروح يشوف اخوته واصدقائه ويسهر وياهم
واني اضل بالبيت بين تنظيف وطبخ وبين الكتب اكضي باقي وكتي ....

باليوم الثالث كالي ...
-عاجبني اروح زياره شو روحي مشتاكه تزور الامير علي
وكالي حضري روحج نطلع العصر نبات ونرجع ثاني يوم ...
وتحضرنا ورحنه بس اني وياه العصريه طلعنه للنجف .. زرنا وصلينه وتعشينه وضلينه نفتر بالشوارع وبعدين اخذلي جيس شاميه وكعدنه
على الرصيف ناكل اثنينه واني جنت اشاقي واحاول انسي همه واريح باله شويه وهو متجاوب وياي ويضحك ورحنه نمنه بالصحن بره ومن الفجر كعدنا صلينه وهم رجعنه زرنا وطلعنه تريكنه واخذنا سياره ورجعنه للبيت ...

وهو طول الطريق يكول والله زيارته راحه ما من بعدهه راحه ...

وصاني محد يعرف بروحتنه لان خاف اهله يعتبون عليه ليش مااخذهم وبس اخذني وهالحجي الي مايخلص ...

وبيومهه ماطلع من البيت ضل بس وياي ينام ويتشاقى ويكضيهه تكرص بزنودي ومن اكول اووي يخرب ضحك ويرجع يعيدهه ...

وكت نزوله جان عشر ايام وهالعشره كضاهن بس وياي وبكل يوم يكلي خاف يصيرلي شي هالبيت
لا تطلعين منه واني صرت اضوج من هالحجايه
اخاف منهه ماريد اذاه والله ماحب اشوفه متضايق او متأذي ولو بكد شعره .. اكول خطيه شاف من عمره واني ازودهه عليه فلا اتشكى يمه ولا اتطلب
ولا ارفضله شي شيكول سمعاً وطاعه ...

قبل مايروح نطاني مصرف وخلالي زياده فوكهن كالي خاف بنفسج شي اشتري ...
واني جنت مجمعه كم فلس ضفتهن فوكهن وكلت من اروح لاهلي اشتريلي بيهن محبس ذهب ..

ورحت لبيت عيالي ... اول ماراح محمد استلمتني امه ...
- ماخذته لابني يامضروبه الجلوه عشر ايااام صارله مامر عليه وجابلني .. مربطته بيج ليل نهار ماتردينه يجي شني سجلتي باسمج ياخايبه وحاصرته بهالبيت

جانت تصيح ولمت حتى ولدهم .. كلتلهه..
- عمه هو جان حيل تعبان ونفسيته تعبانه من الصارله هناك وراد يرتاح اني شعليه قابل شعندي وياكم حتى ماخلي يشوفكم والله مالي دخل هو جان تعبان والله
- للللللللا عيني انتي ساس البله كله منج حرمتيني شوفته انه الربيت وتعبت وتجين انتي على الحاضر تاخذين من اهمدااااج والله فلاا احضيج بي داام هاي سوايتج كل مايجي تاخذي وتمشين الا اربيلج كلب

عفتهه تصيح وادعي ورحت للغرفه كعدت واحاول اهدي نفسي واصبرهه .. يعني اني شبيدي هو مايريد يجي هنا يعرف بسوالف امه ويريد يرتاح هالكم يوم الينزلهن وهو يمرلهه الصبح من يجي على اخوته بعد اني شكو قابل حابسته عنهه !!

رحت للحجيه سولفتلهه الصار وهم كلتلي بعد خلي يجي هنا يباتله يوم ويسكتهه هم كلب والده ويحن
شفت حجايتهه صحيحهه هي من حركه كلبهه على ابنهه تحجي هيج وهم حقهه تنقهر ينزل ويروح وماتشبع بشوفته فعذرتهه ونسيت الصار ورحت اعتذرت منهه وبست راسهه وتصالحنه ومشت الامور عادي .....

وره اسبوع نزل علي وصار الكل انضباط ولا حس يطلع المنطقه هادئه وحتى الجهال الي يلعبون بصوت ناصي ويتختلون بلعبهم ..
عزمه كل عم على غدا وصار غداه كل يوم بيت
واحد منهم .. ويوم الاول جان يمنه بأعتبار هذا بيت العم الاكبر اله ...
ومن الصبح كل البيت مخبوص وذبحوله فسيفس عمي وصه عليه الا يذبحوه للغالي .. ولزمه مازن ذبحه ... وطبخته عمتي لان اني ماعرف شلون يطبخوه .. اكتفيت بالتمن والتاجينه والمرك
وحضرت الفواكه والبنات يسون الزلاطه ويحضرن السفره وبال ١١ وربع حطينه الاكل
للزلم وحد والنه النسوان وحد ...

بين مااني كاعده على الصينيه باوعت من باب المطبخ صاير على الحديقه والمدخل مال الاستقبال
فشفت علي واكف وحازم يصبله المي حتى يغسل
وشايله الخاولي وهذاك بس يزمخ عليه ...
مادري شكو ضيك الخلك هذا الي عنده ؟؟؟

اجوي الولد جابو المواعين وكمت اني والبنات عزلناهن وصبيت الجاي وضليت اعزل بالجداري
والبنات يغسلن بره ....

وكت الي طببنهن للمواعين هو اجه للمطبخ
واكف وحاط ايده وره ظهره واجه تقرب من
الوسطانيه وكلله ..
- نوبه الثانيه رجليج لو بينت من ثوبج اكسرهه الج واخليج تزحفين زحوف سمعتتتتتتتتي

وهي جفلت والدموع تكت وراحت ركضت جوه
ورجع باوعلنه كلنه وكال ..
- والحجي الجن هم موجهه المره الترفع ثوبهه على الساجه تنكسر رجلهه وبنت ابوهه التعيدها النوب

باوعلنه كلهن مدنجات ويتراجفن واني مرتجيه على السنك ومجتفه ايدي واباوعله بهدوء جان يحط عينه بعيني ورفع اصبعه وكال ..
- وانتي يالحضريه هم يشملج الحجي

على نظرتي بعينه وكلتله بكل هدوء ..
- الحمدلله مطبقه قبل ماتوصي

صفن بوجهي شويه وكال زين وطلع .. والبنات راحن كعدن وبعدهن يطكطكن اني ضحكت ورجعت اكمل شغلي ...

وره ماخلصت عزايمه يم العمام اجانه مره وكت العصريه جاي يريد يحجي ويه عمي بسالفه وكعدو بالمطبخ .. وعمتي جانت طالعه بالزرع وبس اني وبنتهم الجبيره بالبيت والبقيه يلعبون ومازن بسامراء جان يودي الزرع وبعده ماراجع ...

اني كاعده اعزل ملابس بالغرفه وسمعتهم يحجون
جان عمي يصيحني حتى اسوي الجاي .. عفت الي بيدي ورحت سلمت ورحت اشوف القوري خلصان .. غسلته وحطيت مي واريد اخدر جديد
خليته على الطباخ وضليت واكفه احضر استكانات وطلعت كليجه هم ترست ماعون وحضرت الصينيه بين مايصير الجاي واصب ... جان يطبون الحجي والحجيه .. رحت تلكيتهم وجبتلهم مخاد استندو عليهن وهم حضرت استكاناتهم
وجان تجي عمتهم اخت ابوهم هم جايه تشوفه لعلي وسامعه بي هنا وجايه عليه وكعدت يمه وتباوع لحلكه من يحجي وتلزم بايده وتكله يايمه رديتلنه سالم الف حمد وشكر يارب ... وشلون تلمع عيونهه بشوفته ... وشويه وسئله عمي ..

- ابو جواد شعجب هاليومين اشوفك تفرفر وماتلفي بالبيت منتبه عليك

جان يرفع ايده ويأشر ويكول ..

- والله تكرمون المره مريضه وانه اكره اكِعد بمجان كله تعطس وكح ما كح وانه مااطب البيت لما تطيب وينغسل من جديد يلا

الزلم ضحكو الا العمه والحجيه دنكن .. اني ضليت صافنه عليه هذا شديخربط !!! جان يباوعلي ويكلي ..

- انتي هي صبي الجاي يلا

باوعتله واني دمي فاير واخذت نفس وكلتله ..
- مااصب الجاي

جان كلهه تباوع علي وفاكه حلكهه .. وهو عكد حواجبه وكلي باستهزاء ..
- شنننننيييي بويه
- ليش اصبلك ؟ ها !

جان عمته تعيط بيه وتكول ..
- امشي وبلايه لغوه زايده صبي الجاي

باوعتلهه وكلتلهه ...
- اصبلج الج تدللين بس اله مااصبله

رادت تكوم عليه وجان يكللهه ..
- اكعدي عمه خل اشوفن هاي شمالهه اليوم ناويه على كسر ركبتهه احجي انتي شني كاعد تشرطين بروسنه
- مااتشرط انته ضيف على راسي احطك واحترمك بس من تقلل احترام تعامل بالمثل
- شننننني انتي شجااااي تخربطييين شتمسلتييين

كام واجه كدامي واني هم تقربت اله وكلتله ..
- انته كلت تكرمون المره يعني شنو يعني المره نكسه يعني قللت احترام واهنت المره وجاي هسه تطلب من المره الي وصفتهه نكسه ان تصبلك الجاي وشلون ترضاهه على نفسك تشرب جايك من ايد نكسه تكدر توضحلي لو اني جنت غلطانه

كلهه سكتت وحتى هو صفن بوجهي ومتفاجىء
وبعدين جان يكلب ملامحه للعصبيه وضل يصيح
- انتتتتي شني شااااايفه نفسج !!! قنننندره ماالبسج برجلي
- ولااا اني الي رايده منك تشوفني بشي اصلاً بس واجبك تحترم من يتعب لاجلك ... انته رجل محترم بعيني وضيف عزيز بس كلامك ماينسكت عليه
- حجي موش يممممج شعندج انتي تنطيييين وتبيعين مثاليات برااااسي شجابج انتي بالنننص
- ااااني امثل كل مره سكتت وبلعت هالكلمه بغصه
ان اني سكتت وغيري سكتت راح نصير ماطخه جوه اديكم .. المره مو شي قذر وعليه تكول تكرمون جان استحيت على هالحجايه لان هي تمسك وتصغر قدرك قبل ماتصغر قدرنا لو فعلاً توزن كلامك
- هييييييي بننننننننت الكللللللللب رادلج تربااااه من جديييييد بنت شواااارع ملفيييييين
- بنت اوادم واصووول و ابويه يشرفك ويشرف ناسك لاتهين من ماتعرف قدره

راد يضربني ولزم ايده عمي وكلي ..
- اعتذري منه وكفو عاد بسكم
- خووووش جنه ملفين عممممي والله خوووش جايبين دلالات ولسان بطول متررررين لا احترااام ولا خوووف ولا مستتتتحى
- هاي صفاتك مو صفاااتي .. انته القللت احترام ومااستحيت من قللت من شأن نفسك وامك ومرتك وكل مره مرت بحياتك
- وخرررر عميييي خلييييي افررررك حلكهه هاللسان السززز

كامت عمتهم وجرتني تريد اطببني جوه وكلتلهه
- وخري عني .. انتتتي شلون تسكتين وهو يهينج
اني ادافع عليج وعلى امه واخته ومرته وانتي
تصيحين وتجرين بيه .. شنو انتي مو مره لو بس اني مره مامستج الحجايه ماكسرت كرامتج

جان يعيط هو ويكول ...
- واننننكس من كل نكسسس ونعاااال رجلي يشرف راااااسج وراااس الخلفوووووج
- لعد انته هم نكس دامك طلعت من بطن نكسه
التحجي عليه وعلى مرتك نفسه ينطبق على امك واختك ياحضره الضابط يامحترررم

دفع عمي الجان مجتفه وهجم عليه واجتي عمته تريد تحامي عليه دفعتهه وكلتلهه ...
- مااحتاج اعرف احامي لنفسي وانتو شكو خايفين

جان عمي يكول ..
- امشي طبي جوه الرجال اذا كضج هسه ماتسلمين من ايده امشششي جوه

ضحكت وكلتله ...
- عمي ليش اخاف مدام اني واكفه بحضره رجال
الخوف مايصيبني واني واكفه يم تلث زلم احس بامان لان الرجال يحامي للمره مو يسترجل عليهه

عاد عمي مسح وجهه والعمه هم راحت ليم الحجيه كعدت واني باوعت بعين علي الي جانت تلهب
ونفسه اسمعه من كد ماعالي ووجه احمر دم
كلتله ..
- والله ياابن عمي انته على هالراس واني احترمك واعزك وماعندي مشكله وياك بس اني ماتربيت على ان اسكت على الحق ولا على الظلم
- انتي ماتطلعين اليوم عايشه من هالباب
هجم عليه ودفعني للحايط انضربت بي حيل
وكلهم محد ادخل وهو واكف قريب مني ونفسه
يضرب بوجهي كالي ..
- ماااتخااافين مووووو ماااتخافيييييييييين حافظتلج جلمتين وتسبعين بيهن علييييه بكد جف ايييدي انتتتتي ووواكفه وترااااددييييني وتعلللين صوتج جدااامي اليوم اكتتتتلج خلاااااص تفهمممممين

باوعتله وكلتله ...
- ماااخاف اني مااحجيت الا حق ساكت عليه الخايفين منك الي صايرين حبال بيدك تجرهم
واني مو منهم ولاا اصير تريد تكتل اكتل الذنب للكاتل مو للمكتول

جان يصيح واني سديت اذني من صوته العالي
وجر خنجره الي دايماً مخلي بحزامه وكاال ..
- اشوووهه لوجههج هاااذ واعلمج شلوون تضلين بالراس اليابس لاخلييييج كل عمرررج تصيحين الغوووث والرحمممه

جان يحجي وحاط الخنجر ليم وجهي واني اباوع عليه ومخنزره عاد دفعت ايده وكلتله ...
- ماايخوفني تهديدك تريد تكتل تعاال اذبحني يلااا

هنا ادخلت العمه مره ثانيه وكامت تتوسل بي يعوفني وعمي هم وياهه واجتي عمتي هم كامت تولول وتتوسل بي جان يكلي ....

- انزززلي انزززززززلي ليم رجلي دنجي واعتذري واعفيج يلاااااا انززززلي

حجيت بصوت عالي وكلتله ...

- والله وجلااال اسم الله لو تذبحني وتكطعني وصل هسه ماانزل واطخلك راااس .. اموت بكرامتي مرفوعه راس وبحقي وتصير انته الظالم والجاني ولاا انزل راسي واعيش بذله وان تريد تذبح اذبح واني الاعينك مااخايفه من موت بكرامه ويااحسافه وحسبتك وكفه امان

وهنا كام الحجي واجه حاوطني بايده ورفع عوجيته على صدر علي ودفعه بيهه عني وكال ...
- هالمره مفخره بيتي وصوت حك بي ماينكطع
لموتي وموتهه .. والي صار ممسوح وحكهه من حجت وحكك من تعصبت وكل من يمشي بدربه وانتهى الموضوع .

عاد هو هنا باوعلي بنظره حقد وطلع من البيت
واجتي عمتي جرتني من ايدي وضلت ترزل بيه
جان الحجيه صاحت بيهه ..

- هييييييي يااام محمد عيفي المررره انتي شفهمتي واجيتي تلعلعين
- حجيه ماشفتيهه صخمت وجوهنه جدام الرجال
- رفععععت راسج وراس اهلهه والله والنعم من رباه ابوج يازهره .. والله ماحجيتي الا البكلبي ساكن من سنين وطلعتي حيفي وخذيتي بثار كل مره من عربنه بوكفتج هاي
- والله حجيه اني هنا بهالسوالف ماعرف اسكت
واعذروني اذا حجيت كلمه مو حلوه وعصيت امركم بس اذا اني سكتت وهي سكتت وهذيج سكتت منو اليفهمه هذا غلللط ومو علمود هوسته ونفخته كدامنه نسكت وننهان حتى يرضى جنابه
وهو حجايته جبيره يعني ديهين امه الي ربته وتعبت عليه ومرته القايمه بواجبه وعايش براحه بسبب تعبهه وهو يحجي وينتقد ويطلعنه نكسين وبالتالي مرجعه الهن والله ماافهم هالعقول

جان الحجي يضحك وكال ...
- ابوو محمد والله جنتكم ذهب صافي والله ماعجب عكلي غير عكلهه ولا ريح كلبي غير لسانهه
- بس بويه موش هيج سودنت الزلمه كل جلمه بعشره
- جا انته وانه كدرنه نكول الكالته ! جثير يظلم فجينه حلجنه بحجايه جدامه ! احنه الغلط منه
السكتنه وخليناه يتفرعن علينه .. وانتي بويه
لايغرج شي .. ضلي طلعي هاللسان بس وكت الحك غيره ضمي بمجانه
- هههه صار حجي تدلل

فرحت وجن مي باااارد ونزل على كلبي من شفته طلع مغلوب لاول مره .. وشفت عمتي وعمي ساكتين ماعترضو والحجي والحجيه راضين عليه
كمت رحت شفت القوري الي نشف ميه وضفتله من جديد وحطيت كم مكياله جاي وخدرته وصبيتلهم وكعدت هم شربت وياهم باريحيه

وضلت هالسالفه تتناقل بين عربهم على جنه ابو محمد وكفت بوجه الضابط علي ودافعت للمره

واجني بنات عمهم وكل مايشوفني وحدي وعمتي ماكو ينتهزن الفرصه ويضلن يسألني ..
انتي شلون تكدرين هيج تحجين ومتخافين ؟
انتي منو معلمج هالحجي ؟
منيلج هالثقه وتحجين بيهه ؟
شجان سويتي لو كتلج ماخفتي ؟

واني اجاوبهن واكللهن ..
الي تسكت على حقهه الناس تاكلهه .. والي يرضى بالذل ويهين كرامته ماله حياه بعد .. الموت بكرامه
افضل مليون مره من العيشه بذله .. والي تربى
على حمايه الحق ورفض الباطل يستمد ثقته من مبادئه الحسنه ويترك الخوف للظالم لانه هو الغلط
واني الصح ...

ويضلن صافنات ووحده تباوع بوجه الثانيه وصارن يجن يمي دائماً ويكللي احجيلنه عن حياتج قبل شلون جانت ...
واحجيلهن شلون جنت اداوم واطلع والعب ويه صديقاتي واتسوك واطلع زيارات والعاب ومنتزهات واسولفهم على شارع المتنبي وعلى المكاتب الي داخلتلهه واسولفلهم شلون ابويه رباني وعلمني وشلون جان مدللني وهنه يستمعن الي
بكل حواسهن ويضلن يتناقلن الحجي بينهم وبين بنات عمهن وكل يوم وجايتني وحده تسالني على شي ...
لحد ماصار نزول محمد واجه للبيت ... وبعد ماتغده ونام .. استلمته امه العصريه على كل الصار حجتله واني جنت متخوفه من رده فعله
لان هو الوحيد الي اله امر عليه فاهتم لرأيه بهالموضوع وشنو راح يسوي لو عرف ...

ولليل وكت مافرشت واجه تمدد كالي ..
- سمعت اليوم من امي مسويه مغامرات وراي
- هههه اييي صارت بعد
- والله شوفي يابت الناس لسانج هذا لو عرفتي تحمين بي روحج طلعي وان ماامنتي على روحج اسكتي واكعدي
- هو هم هيج

سكت بعد عاف السالفه ونمنه وثاني يوم جانت امه مترقبه تشوف حالنه بحيث هي ضاله كاعده بالمطبخ ومكابلتنه ماطلعت لا منا ولا منا
وشافتني احاجي واضحك وهو هم وحطيت الريوك اكلنه سوه وطلع مرتاح ويضحك ويه اخوانه
وهي كلبت خلقتهه وكامت تشمر بالحجي وتصيح
- مايفيد الربى لااااه والله مايفيييد غاسلات العكووول امهات الحمر والكحل

واني اسمعهه واضحك من جوه لجوه ...
لليل كلتله لمحمد .. اريد اروح استلم نتيجتي واشوف اهلي صار شهرين ماشايفتهم وهو كالي
خلي ارتاح كم يوم واخذج .....

ورجعنه لبيتنه يومين واخذني لبغداد رحت اول شي للكليه استلمت نتيجتي وطلعت ناجحه وبعدين
اخذني لبيت اهلي وكالي نبات وثاني يوم نرجع
ماقبلت على هالشي يعني صار شهرين وابقى بس ليله يمهم .. بس هو اعترض وكالي اريد اشبع بيج هالكم يوم قبل مالتحق وضل مصر على هالشي
وضليت للمغرب بيت اهلي وبعد ماتعشينه كلتله
خلي نروح نشوف بيبي وعمامي واخذني لبيتهم
وضليت حاضنه بيبي واشمشم بيهه وهي هم
وكاعده بسدنه اني ومحمد وتكشر بالفواكه وتنطينه

ومن سمعت باجر ارجع تخبلت وكضتهه شلون وشلون بس محمد مايقتنع الا بشور راسه واخذني ثاني يوم الظهر رجعنه للبيت ....

عاد بالليل كلتله ...
- محمد اريد اطلب منك شي ممكن
- كولي شني بالج
- اريد تشدلنه تلفون هنا ..اريد اخابر اهلي صديقاتي اخابرك هم اعرف اخبارك .. هناك تلفونهم عاطل واني ضاله كلشي ماعرف عنكم
- انتي مو تكضيهه بيت اهلي بعد شكو
- ميخالف يعني اجيلي يوم بهالبيت واخابرك مايصير يعني .. ووكت الي انته موجود هم اخابر اهلي والله اشتاقلهم ارجوك اعتبرهه هديه نجاحي
- يلاا صار تدللين .. هاليومين اشدلج تلفون

بسته وتشكرته وصار عندي امل احاجي اهلي وصديقاتي من جديد ....

وقبل يوم روحته شدلي التلفون بالبيت ووصاني
اجي ويه مازن وامه لو وحده من البنات للبيت
كل يوم العصر واخابره وكتبلي بدفتر الارقام
رقم وحدتهم وكلي العصر اكعد يمهم انتظر تخابرين ....

ورجعني لاهله والتحق وقبل مايروح وصى امه
يجون هناك ويخابروه كل يوم العصر ...

وصرت كل يوم العصر اروح ويه امه ومازن يوصلنه نكعد نحجي وياه ونعرف اخباره واني هم اخابر بيبي اسلم عليهه واهلي اخابرهم كل يومين
بس بيبي كل يوميه تكيف بمخابرتي واني اكيف بسماع صوتهه ...

وبيوم احنه اجينه للبيت وعفت عمتي تحجي ويه محمد واني طلعت للحديقه لعبانه نفسي ومخنوكه
وتالي دخت ووكعت .. وماحسيت الا على صوت
يمي فتحت عيني وشفت عمتي فوك راسي وبيدهه
كلاص مي وترش على وجهي ..
كعدتني وصفنت وتذكرت شلون وكعت وجان تسألني ...
- شجاج خايبه متكليلي
- مادري عمه طلعت لعبانه نفسي واني من كم يوم حاسه هيج روحي تعبانه ومعدتي كالبه بس مادري ليش وكعت
- من يمتى فايتج العاده ؟
- ها
- وصماا عادتج من يمتى كاطعه
- هواي مادري شكد محاسبه
- كومي جدامي امشي

كمت واخذتني للسياره وكالت لمازن ياخذنه للمستشفى ... وهناك حللت وطلعت حامل
جنت متفاجئه وماعرف شسوي بس اضحك
ولازمه بيدي الورقه .. وعمتي تهلهل واخذتني
للسياره ومازن باركلي ورحنه للبيت خابرنه محمد
وهو جان خايف عليه لان مازن جاي وصايح لامه ورايحه بدون ماتفهمه وضال يدك ومحد يجاوب
ومن كلتله اني حامل وسمعت شهكته وضل يضحك ويكلي ..
راح ارجع بعد واصير اب .. وضل يوصيني ادير بالي على نفسي ووصى امه هم ماتتعبني بالشغل
ورجعنه للبيت وبشرتهم عمتي بحملي وكلها باركتلي والحجيه تبوس بيه وتكلي ..
كون هالولد يطلع عليج كووي ..

اني ماجنت مصدكه راح اصير ام ويني ووين الجهال مادري شبسرعه دتركض بيه الايام ركض
جان كل همي شلون حداوم مرحله رابعه وبطني شكبرهه شيوديني وشيجيبني ؟؟؟؟

ومشت الايام ونزل محمد واول ماطب الغرفه وياي حضني وباركلي على الحمل وضل يتلمس بطني ويكلي شوكت تكبر هالبطن وتجيب ابني
واني جنت مشتهيه خوخ ومن اخذني لبيتنه راح تسوك وجاب انواع الفواكه وجابلي الخوخ وكل يوميه ينبه عليه اكل زين واشرب حليب لازم قبل مانام ومن اكعد وشايلني بالصلوات ...

ومر على حملي ٣ اشهر وصادف نزول محمد وعلي بنفس الاسبوع وجانو الحجي وابو علي
والحجيه رايحين للحج ... وبيوم اني جنت الظهر
اشر الملابس وره البيت وسمعت صوت بجي
وعياط علي بيت عمهم الصغير .. ركضت عليهم
واشوف ....
.

يتبع..

#شقراء_بغداد

بارت_١٨



وبيوم اني طالعه اشر الملابس الظهر وسمعت صوت عياط علي من بيت عمهم الصغير ورحت اركض الهم ومن طبيت شفتهم متجمعين كلهم بالمطبخ وعلي شايل خنجره وواكف بنص المطبخ
ويعيط ..
- لااااذبحج هييي سزززز

وبنتهم الوسطانيه ترجف ومكرفصه نفسهه بحضن امها واثنينهن يتباجن ... عاد اني سألت جنتهم
- شكو يامعودات شصاير هنا هذا شبي
- ولج حيذبحها حيذبحهااا
- اي غير تفهميني شكووو شسوت
- ماترضى تزوج
- شنوو
-يريد يزوجهه وهي مترضى وكالبتهه مناحه وهلست حت شعر راسهه
- وهي بكيفه وينهه وين الزوااج
- حبيبه ضلي غاد لا يعلكهه عليج النوب
- دروووحي اني مخايفه منه شنو تايهتلته البنيه

وركضت طبيت بنصهم وجريت البنيه من ايده
لان جان لازمهه من شعرها واني جريتهه وخليتهه وراي وهو كب بالعياط ..

- همممم انتتتتي شجاااابج بالنص شصخم وجهههج وجابج عليييي وليييي منااا

- جيت اخلص البنيه منك يالشايخ علينه

- ولييي من وجهههههي وللللييييي لااادفرج انتي والي بطنننننج امششي غاااد

- علي سمي بالرحمن وعوف البنيه طفله بعدها ياخي مو مال زواااج طفله هاي عوفها

- تتزووووووجه وغصباااا عليهه وانه بااااجر كاطع مهرهم لو يجي الحسسسسسين

- موووو بالغصب هي وهذا مو حق البنيه بعدهه طفله مو بسن قانوني للزوااااج

- امششششي مناااا انتي وقوانينج هناااايه اااانه القانوووون سمعتتتتتتي سمعتتتتتتي ااانه الاكوله يمشششي ومن كلت تتزوجه يعني تتزوجه ورجولهه فوك راسهه

- مو غابه هنا وتتحكم بكيفك اكو قانون واكو عشاير والاثنين ماترضى سوايتك

- لاااااالطعج على حلكج وخرررري من درررربي ماريدن ابتلييي بيج وانتي حبله مييييلييي ميلللللييييي

- اروووح واخذهه ويااي وضل انته بغابتك احكم بكيفك

- شننننننني بوووويه النوب ضال علي النسوااان تحكمممم وتلعلع

- هذا حق ماحاجيه من كيفي ومااطلع منا الا والبنيه وياي

- شجااااابج انتتتتي هناااايه هالبت بنت عمي ازوجهه ادفنهه اكسرهه بكيفي انتي شحطج بالنص

- اجيت لان اني مارضى بالظلم
ولو ادري اكو هنا الي كلبه مايهاب ومايسكت عن الجور مااتلكاني كدامك

- ولييييي مناااا يلاااااا حريمنا موش دلالات ولسنه مثلج ياحضريه اطلعيييي برررره هو كله منننج سممتي عكلهه بنفختج وخليتهه تصد وترد بس والله لا طلعهه من عيننننجن انتن الاثننننييين

- اني ماسسم عقل احد اني احجي الحق مااسكت واصير باطله .. وانت يهالنسوان لا تكيفن بسكوتجن وعبالجن هيج تحامن روحجن منهم
تره الساكت عن الحق شيطاااان اخرررس وهذا حجي نبينا ماجايبته من جيببببي .. لو ماتنفعن بشي لا توكفن هناا للفرجه والشماته

دنكن ومنهن الطلعن ورجعت باوعتله واني حاضنه راس البنيه وكلتله ..

- علي هالشي ظلم بحق الطفله عوفهه لا تكسر ركبتك بذنبها

- موووش ظااالم انه هي التجيب الاذى لروحهه
خلهه تصم حلكهه وتمشي بالي اريده واكف عنهه

- وتمشي بدرب موتهه ! انته ماتشوف هالبنيه بعد حتى عودها ما كمل ماتشوف البنت بعدها قاصر
حتى الله مايرضاهه البنيه بعدهه تلعب ويه الجهال تريد تربطها بيت ورجال وهي شعرهه متعرف تضفره وحيدهه شبيك انته من كل عقلك !

- ايييييييه يابت بغداد هاااي احنننه وهاي نساوينه كلهن مشن زواجهن هالشكل ان ماتعرفين نعلمج عله طبايعنه وصمي حلكج وووامشششي اطلعي مناااا لااااخر مره اكللللللللج امشششششي اطعععععي ووولي لدااااارج لااانعل سلفى الخلفوووووج

- ماااعاش ولاااصار اليهددني ويمس اهلي بحجايه
وعرفكم ونهجكم باطل وحرااام ولايرضي الله ولاعباده ... وهالعريس لو بي خير خلي يجي يدك بابهه يوم يرجع جبير البيت وهو لو راد ينطيهه
وبرضاهه

- اااانه عفيت عنج مررره وهالثانيه ماتنعاااد

عاط بيه و راد يهجم عليه ورفع ايده جان اعيط بي ..
- اييييييدك لاتمدهه اني محرمه عليك ولو غلطت عندي رجال اليحاسبني

- اكسسسسسسره لراااااسج بنت السككككط

- يشرررف اصلك ويسوه راااسك

- لاااانعل ابووووج ياااابو الفاااااج بهالدييييره
ياااابو الدوررر عليييييج وجااابج

- انعل والمسبه ترجع عليك

دفعني للحايط واني لازمه البنيه وحاضنتهه وهي تعيط واني ساكته .. انلطخت بظهري بالحايط وهو حط السجين على ركبتي وينافخ نااار مو نفس
كلتله ...

- شيييل ايدددك ووخر مني ماتايهتلك اني ولا مكطوعه من شجره اكو من يكسر عظامك لو تماديت

- هاااااااا كلتيلي اكووووو يااااهو هاااذ ابن امه ويمد ايييييده والله لاكبرج انتتتتي ويااااه

- ما تُكبر الا نفسك ولاتحسب روحك سبع بصوتك وضخامتك ومحد كادر عليك تره اكو الله بالمرصاااد لكل وحش ظالم مثلك

ضل يصيح ويضرب بالخنجر بالحايط زرفه تزرف واذني طرشهه من صوته واني ساده عيني وحاضنه البنيه .. جان يدير وجهي بحافه خنجره
وصارت عيني بعينه جان يكول ....

- باااايدي هسه اجعصج وحته عظمج افتته واخليج رمااااااد يااام الكباحه واللسان الطوووويل انه مااسكت تسمعععععين مااااسكت ولااا انه التجي مره تالي العمر تعلمنننني انتي بضربه مني اسويج رماااد وادوسن عليج

كلتله بصوت ناصي ..
- جرب مد ايدك ومايصبح عليك الصبح
- هخخخخخ منين من ابوج الفكاكه لو من اخوتج الرضع

رفعتله حاجبي وحطيت عيني بعينه وكلتله ..

- كلمن اله ظهر اليسنده .. بمثل ما شايخ برتبتك تنزلك الاعلى منهه

عكد حواجبه وضل صافن بوجهي وكررت عليه حتى اأكد كلامي اله ..

- مره التحجي بزود بظهرها رجااال
واني علمني رجال مثقف وفقيه وسندني رجال من ظهر رجال ماتجي انته تخوفني برفع صوتك .. صوت المابي كلمه حق مااعتبره انسمع

دنك ليمي وحجه بصوت ناصي وكال..
- منين انتي ؟
- من الي يعرفون يجيبون خيالك
- شمامه !

ضحكت وكتله باستهزاء حتى انفي كلامه ..
-شنوو هذا اسم لو شنو

فرك وجهه ورجع دنك وحجه بصف اذني ..

- انه جنت شاك انتي رباة عسكر فاحجي منييين !
- من كل عالي بيهم

عفته صافن ودنكت وسحبت نفسي والبنيه من جوه ايده واخذتهه للغرفه واجتي امهه تحضن وتبوس براسي وتتشكر اني كلتلهه ..

- ماسويت الا واجبي اني ماعرف اسكت على الظلم وبنتج حاخذهه لبيتي كم يوم منا لما يرجعون الحجاج ويصير الحجي بينهم يلا ارجعهه

- اي فدوه يمه اخذيهه هنايه ياكلوهه بكشرهه وانه شوفت عينج لا حول ولاقوه

- والله هو كله منجن سكتن وخليتن الذيابه تنهش بلحمجن .. لمي غراضهه عاد خلي نمشي

راحت امهه تركض للكنتور طلعت علاكه ولمت هدومهه وهي البنيه بس تشهك وترجف واني واكفه صافنه واذكر شحجيت وياه .. وكلت
هذا شلون ربط ويه العسكر ؟؟

واخذتهه وطلعت من باب الغرفه جان يصير بوجهي محمد يلهث وكال ...
- شصخمتي النوووب شجابج هنااايه
- بعدين نحجي خلي نمشي لبيتنه
- امشي جدامي عاد امشششي

طلعت واشوف بوجهي علي جان يصيح على محمد وكاله ..
- محمممممد حرمتك بيني وبينهه ثار ويجي اليوم الانزل كل عالي والثار تاليته دم

محمد باوع عليه وعاكد حواجبه ورجع باوع عليه
جان اكله ..
- واني لهاليوم منتظره

ضحكت وباوعت لمحمد وهو صافن علينه واخذت البنيه ومشيت كدامه ورحت لبيت عيالي واخذت غراضي وطلعت لكيت محمد ينتظرني بسيارته البيكم وصعدت اني وبصفي البنيه لميعه وجنت متنرفزه حييل لان سمعت كلام يغث من عمتي
وضلت تعدلي وتصف طول مااني الم بغراضي
وطلعت كارهه روحي من وراهه .. ومحمد شافني هيج امشي واحاجي روحي من الاعصاب سكت
بس لميعه جانت تبجي وتفرك بعيونه وتشهك جان اعيط بيهه ...

- اسكتتتي شكو البجي هاي اني ذبيت روحي عليج وطلعتج من الموت حتى تكضيهه بجي اسكتتي
مااسمع حسج بعد لاتبجين

عاد هي خنست ومسحت وجهه ومحمد يباوعلي ويرفع بحواجبه وساكت لحد ماوصلنه البيت
ونزلنه جان يكلي ...
- منين جايبه هالصلافه والملاسن
- محمد ارجوك انته ماشفت الموقف لتحجي عليه
- شفت ماشفت انتي شوداج للرجال وكعدتي تعدين وتصفين شتكول عليه الوادم هسه ماعرف يضب مرته وتلعلع بكيفهه
- لااا راح يكولون خلف الله عليهه خلصتنه منه
- هااااااا وشدراج
- هسه تشوف واذا سمعت غير الحجايه الزينه
تعال حاسبني وسوي الي تريده ماامنعك

شمر السويج واجه عليه ورفع اصبعه بوجهي

- انه هالمره اسكت لين طلعتي البت من ايده
وكفيتي شر بينهم بس مره الثانيه لو سمعتج حاجيه حرف ويه علي ومهوسه مثل هالهوسه ازوركه لوجهج وانسيج حت اسمج فهمتي

بس محمد الي كلامه يخوفني ويخليني اسكت واطيع فسكتت وهزيت براسي باي وهو طلع
وعافنه وحدنه بالبيت ...

اني كعدت ولازمه راسي وضليت افكر هذا شيريد يسوي ؟ شنو ثار ؟ بس لا يسويلي مشاكل النوب
اني عايزني ...

ضليت كاعده وافكر وبعدين كلت لميعه تروح تسبح وترتاح واخذتهه للحمام ... هي بعدهه طفله
وعمرها ميتجاوز ١٤ سنه يمكن ودائماً اشوفهه تلعب ويه الجهال وكل وكتهم لعب ركيضان لو مرات يروحن يسون بيوت طين وره بيت الحجي
يعني جاهل شوداهه للزواج هو اني هسه ٢١ سنه وكل ثقافتي ودراستي ونبهاتي بالتعامل ويه العيال وبالكوه مدبرتهه النوب هاي الي حتى مدارسه شتصير تاليهه بس يكفخون عليهه ..

رحت خابرت روعه وعيني ع الباب خاف يرجع محمد وانتظر تجاوب .. مره ثانيه اتصلت يلا ردت..
- ها خيه السلام عليكم
- هلااا والله وعليكم السلام
- شلونج حبيبه شلون الاهل
- نحمد الله بخير انتي شلونج وين هالغيبه
- بعدين احجيلج هسه مستعجله واريد اوصيج على شي قبل مايرجع محمد
- اي داده كولي اسمعج
- تروحين لايوب وتكليله الضابط علي
ستخان من عشيره (...) ناوي على الشر وياي
وصليله سلامي وكليله اذا يريدني احصن نفسي منه خلي يخدمني هالخدمه
- ياخدمه يعني شيسويله مفهمت وانتي شعندج وياه
- بينه ثار حبيبه انتي لادوخين نفسج بس كليله هيج وهو يفهم شريد
- يلا ماشي شكلج مستعجله بعدين تحجيلي كلشي بالتفصيل
- اي اكيد شعندي غيرج لعد المن احجي

وتعذريلي منه على ذاك الموقف جنت منهاره ويجوز حجيت حجي مو لائق بي وكليله ربي اليسعده ويهني
- ماشي داده يوصل
- يلا سلمي ع الاهل ورجعيلي خبر وسجلي هالرقم يمج حتى تخابريني يلا حردلج الرقم

سديته منهه ورحت شفت لميعه كاعده بغرفتي ودتمشط وصافنه جان كلتلها ...
- لميعه احجيلي شصار وياج من البدايه
- عمه والله خايفه عمي علي مايعوفني هيج الا مايزوجني
- ميكدر ياخذج وانتي يمي بس فهميني حتى اعرف اتصرف
- هو من البارحه كال لامي جايين عليه خطابه
وهو منطي جلمه ليهم وكال خل تحضر روحهه
يجون الوادم يقرون فاتحتها وانه مارضيت اتزوج
انه شفته لصاحبه من اجه سير علينه .. عمه جبير يشبه عمي علي وشواربه ثخااان يخوف والله عمه انه اخافن يكتلني اخافن ماريد اتزوج انه اريد امشي للمدرسه مثلج واتثغف ماريدن اضل ضعيفه بينهم
- ان شاء الله تفوتين مدرسه وتنجحين وتصيرين احلى خريجه بس صيري قويه وضلي على رفضج
حتى لو امج تكلج وافقي لا تقبلين واني ماخليهم يزوجوج
- ماشي عمه انه اشكرج واصيرن خادمه ليج بس لاترجعيني هناك
- لااا حبيبتي شكو شنو السالفه هنا احنه خوات
والبيت بيتج شتريدين سوي وشنو تشتهين كولي اسويلج والثلاجه كدامج شيعجبج اكلي لاتستحين

ضحكت وكامت حضنتني وكلساع تباوعلي وتضحك .. حمدت ربي بهاللحظه ان دزني الهه بالوقت المناسب وحميتهه من الضياع مثل هالاف الضاعن ..

رحت تمددت شويه وريحت بالي من الصار على لحظه جان رحت بيهه بس مادري منين تجيني هالقوه من اشوفه ماعرف اسكت وكلبي يصير ميت مايهاب شي بس خلي تطلعلي حشره كدامي
اكوم اكمز واخبص الدنيا بالصياح وحتى جسمي يكوم يرجف .. مافهم شنو هالتناقض الي بيه !!!

لليل اجوي على بيتنه ابو واخو لميعه وابو محمد
هم كعدو وشربو جاي وجان يحاجيني عمي كالي

- بويه انه شكثر شايف نساوين مثلج انه ماشفت
تذبين روحج بنص البليه بالكوه شجاريلج بويه تردين تبلينه تورطينه ويه هالزلمه الي ماتصلين جف ايده

باوعت لمحمد الي جان عاكد حواجبه وكاعد معاجبه الوضع جان كلتله لعمي ..

- عمي اني هاي تربيتي مااسكت على غلط ولا على ظلم وماعندي شي اخاف منه ويكعد يهدد ويصيح ويريد يفرض شخصيته عليه هالشي مايمشي عندي اني ان خفت فاخاف من ربي
يسألني على كلمه حق جان لازم احجيهه وسكتت
واخاف من رجلي لو اتصرف تصرف مايرضي
هو ما يخوفني ولا يهمني الي يهمني هالبنيه ترجع تدرس وتتعلم وتفهم هالحياه عدل وتالي عود زوجوهه لرجال ابن اودام يصونهه مو تنطوهه لواحد بكد ابوهه حتى الله مايرضاهه

صفك بايديه عمي وهو مدنك جان يكول ..
- بويه انتي دوله وحدج
- لا عمي اني تره ماصير هيج بس بالضروره هاي شفتني عشت وياكم شكد ماطلع صوتي
بس وكت الحق حق مايحتاجلها نقاش
- والله انه اشوفن زين وتدخلتي وخلصتي البت منه
لجن انه خايف من هالجلمه الكالهه اخاف النوب تجينه المصايب منه وتطيحن على روسنه وتعال ياعمي شيلني
- عمي هو يريد يسويهه كسره خشم لان هو مامتعود احد يواجهه فيريد يضل ثابت نفسه ومسيطر واني والله ماكرهه بس هو ينرفز

ابتسم عمي لان ضليت اكسر بالكلام بسبب هالحرف وجان يكلي ..
- الله كريم بويه الله كريم

جان يكول ابو لميعه ...
- ماكصرتي بويه زين ماسويتي .. انه حاجاني بالسالفه و مارضيت من كل كلبي لجن كلت اخافن نتخارب علمود مره وهاذ ابن اخوي وهيبتنه والجبير معزته ثجيله بكلوبنا لجن انه هم اخافن على بتي واريدن ليهه الزين
- اي والله عمي مايناسبها هيج زواج تشلعون كلوبكم بي كل العمر لان تضل هي ممرتاحه
وهي صغيره شمفهمهه بالمسؤوليه من هسه
- يصير خير ان شاء الله ،، هو استغل مشيتنه لسامرا وخذاها كباله .. هسه جيبي البت وخلنه نرد لاهلنه
- لا عمي خلي البنيه يمي هالكم يوم بين مايرجعون الحجاج واجيبهه
- بويه شني ضلتهه هنايه .. امشي صيحيلهه خلي نرد للبيت
- لا فدوه عمي الله يخليك بقيهه يمي هي منا نفسيتهه تعبانه وبعدهه الخوفه بكلبهه وخاف يصير شي بعد خليهه هنا بامان واني بس يجون الحجاج من الصبح اجيبهه واجي

صفن شويه ومحمد كاله ..
-بقيهه عمي بحمايتي هنايه ماعليهه شي
- يلا زين ديرو بالكم عليها وماريدن تطلع لاي مجان زيين
-زين عمي زين

شويه وراحو واني طبيت سبحت وطلعت مشطت وتعطرت جان يجي محمد سد الباب وكال ...
- والله وطلعت جلمتج بمجانهه دام ابوي وعمامي راضين بعملتج هاذ سد امان صار ليج
- الحمدلله ..شفت الله شلون يوفق الي يوكف ويه الحق الله مايرضى بالباطل وسكوتهم جان باطل
- اي صحيح بس مثل مانبهت عليج جلمه ثانيه وياه ويصير حسابنه غييير
- ماتخاف كلمتك مطاعه

ابتسم واجه حضني وتلمس وجهي وكالي ..
- شلونه ابني وياج خما متعبج
- هههه لااا حباب زين بعدني مااحس بي تره
- هاا ويمتى تكومين تحسين بي
- بعد كم شهر
- ديري بالج عليه تره انه رويحتي من هالساع معلكه بي
- ان شاء الله يجي بسلامه
- ان شاء الله واسميه جاسم واضل ادلل بي
- هههه سمي بكيفك عيني ابو جاسم

جان فرحان كلش بي ويتلمس بطني كل شويه
واني ماعندي اي بطن اصلاً ماحاسه روحي حامل
حتى النساوه عندي خفيفه ...

وره اربع ايام خابرتني روعه وكلتلي ..
- وصلت سلامج داده بنفس اليوم وهاليوم رجعلي خبر بس قبل مااكلج تكليلي ايوب شيشتغل
- بعدين روعه احجي هسه شكو
- مااحجي الا تكليلي
- روعه من نلتقي ان شاء الله
- هاا يمج موجودين
-اي
- زين دسمعي حبيبه .. كال سلمي عليهه وكليلهه
ابن شمر يضل حزام ظهرج وهالسألتي عليه غاطس بالحرام لراسه وسألته شمسوي وشبي كلي
سوالف ماتنحجي وكلي لاتنغر بمظهره تره بين ربعه صغيرون و وصاني لو اشتدت وياج بسالفته
بس ادكين عليه واوصله خبرج وهو يكسر ظهره
وكال خاف تترددين وهم ماترضين بهالشي منه
اكو كلمتين كوليهن اله لو اضطريتي
- اي شنو هنه
- درب التبانه يتانيك
- شنو هاي شتعني مافهمت
- ولا حتى اني هو كلي كلليهه هيج ومعليجن هو يفهم ويكوم يطكطك وتره ايوب لو مايدري الكلمه هاي سلاح مايكلج عليهه مو صح
- اي صح بس شنو مافهمت معناهه يعني قابل احجي شي ماعرف منه بله تورطت بيهه
- مادري بعد بس هو اكيد محسب حساب هالشي قبل مايكلج ولاتجربين تسألين بيهه احد خاف الشكوك تصير عليج
- لاا طبعا لاا
- اي زين وهسه شلون الوضع وياج هم تعرضلج بعد
- لا ماكو شي زين الوضع هادىء
- زين لعد اروح اني وعود خابريني واحجيلي شيصير
- اي ان شاء الله تشكري وسلميلنه
-يوصل مع السلامه

سديته واني ضلت بالي شنو درب التبانه ؟ شيقصد بي وليش هيج راح يخاف لو سمعهه ؟

اني جنت وحدي ويه لميعه بالبيت بس ماردت احجيلهه عن ايوب وشغله فجذبت عليهه ..

ومشت الايام بهدوء وسلام وكت الي التحق محمد
اجتي عمتهم مره جبيره وكعدت يمنه بالبيت واني مداريتهن ولميعه ماخذه راحتهه ع الاخير ..
تكعد تصبغ باظافرهه وتلبس بهالمحابس والاساور
وتلعب ويه روحهه وحدهه بالغرفه واني هم مره طلعت للسوك ويه جيرانه وبقيتهن بالبيت وتسوكت وجبتلهه لعابه صغيره ريفيه وجبتلهه طوك وقرصات كيفت بيهن .. وبالليل دائماً نكعد نكرز حب وصارت عندي علاقه بجاراتنه هنا هم يجن يتعللن ويانه ونلتم على سالفه منا واكله منا ونكضي الليل ...
وصار العيد ومحمد مانزل ورحنه لبيت عيالي
عايدتهم وجنت ماخذه قطعه قماش وريحه لعمتي عيديه من اخذتهن شويه وجهه لان وياي ..
من اول ماطبيتلهم معبسه بوجهي ولا عبالك جايه اعايدهه واني لايمهه ولا حواليها ...

وافترينه عايدنه الكل وهذا عيد الاضحى واول يوم لازم ذبيحه والي ذبح بيت العم الجبير الي هو بيت ابو علي والغدا يمه لازم ... اني من اول ماسمعت
اعتكفت عن الروحه وكلت لعمتي ماروح اني وهي
ماهمت عافتني وراحت وضليت وحدي بالبيت
رحت كليتلي بيتنجانه وحطيت كاسه روبه وخبزه
وكعدت اكل ....

كملت وغسلت المواعين ورحت تمددت وشويه
وسمعتهم رجعو عدلت كعدتي وجان تصيحني عمتي رحتلهه للمطبخ وجان تكلي ..
- هاج هاي جبت غدا بهالجداري خير من الله ضل
صبي واكلي لا تموتين ابنه من الجوع
- تسلمين عمه .. اني هسه اكلتلي بيتنجانه وشويه روبه خلي فد شويه النوب اصب واكل
- كيفج عاد انه اريدن الوليد مايجي هالكدوته
اريدنه ملغد لحم

جنت اضحك جان اسمع صوت ورايه انداريت
وشفتهه ام علي كالتلي ...
- وشمالهه عيني جنتكم ماتجي تاكل بيتنه شبينه يمه نبزز لو تخاف لاتنذبح هالنوبه

عمتي كلتلهه ..
- حبيبه جفايه شر مالنه شي وياكم سدي السالفه

عوجت حلكهه وهي تباوعلي واني درت وجهي عنهه وهي طلعت جان عمتي تضل ادردم وراهه
واني اضحك من جوه لجوه ..

ثاني يوم هم خطار رايح جاي والبيت مخبوص
واني صايره اتعب بالحركه بسرعه وبالكوه واكفه وياهن عاد خالتهم الجبيره شافتني هيج كلتلي

- روحي ارتاحي شويه انتي حبله والكراب هاذ مو زين عليج

هي مسيطره بينهن لان الجبيره ومن الله مادري ليش ادافعلي دائماً وخلتني اروح للغرفه اتمدد
وجان ظهري يطكطك وضليت مغمضه وغفيت شويه وجان تكعدني بنين تكلي ...

- ابوي يريدج بساع

كمت بسرعه رحتله بالطرمه وجان يكلي تعاي وراي ورحت وراه للاستقبال وجان ينطيني
علبه بيهه مسابح وكالي ...

- اريدج تكضيهن وتلمعيهن فص فص اريدن هالليله وكت اندهلج تجيبيهن ليه
- صار عمي تدلل بس شتسون بيهن هلكد
- هذني بويه عاده كديمه توارثناهه من ابهاتنه
وكت العيد احنه موش كل يوم عزيمه بيت واحد من الاخوه
— اي
- اي وابو البيت يكرم كباريه ضيوفه بهديه
البارحه ابو علي كرمهم بذبيحه وريح وانه اليوم
اريدن اكرمهم بهالسبح وهمه عويلتي موش غربه
واريدنج تطلعيهن يلالن ويبرجن زين بويه
- صار عمي لليل تلكاهن حاضرات

اخذتهن ورحت كعدت بالحمام وحطيت مي وملح بالطشت نكعتهن لان جانن حيل قديمات وريحتهن مليانه تراب .. وشويه وكعدت اجلف بيهن والمعهن
وهنه يطلعن بالخمسه وعشرين سبحه ..
كملتهن وطلعت للسطح كلت اشرهن هناك محد يوصلهن .. وكعدت سفطتهن على الجربايه الحديد
وفتحتهن هم حتى ينشفن بسرعه على الشمس
واني كملت اريد انزل وجان اسمع صوت رمي

وكبل سديت اذاني ودنكت شويه وهم سمعت الثانيه وقريبه مني جنت ارجف من الخوف وبالكوه رفعت راسي وهو سياجهم مال السطح حيل ناصي
يعني اليومف فوك ينشاف من جوه واني حظي
موكف هالسفاح علي بحديقه بيتهم وشايفني
ومن باوعتله شفته شال البندقيه مال صيد وحطهه على جتفه وابتسم اني صفنت معقوله هذا عنده عقل ؟ شستفاد من هاي عملته بس هوس وهاهيه

هزيت بايدي باستهزاء ونزلت رحت للمطبخ شربت مي نشف ريكي هالخبل ورجعت اساعدهم
بالغدا لحد مامدينا السفره وتغدينا وكملنه والعصريه هم صعدت لميت السبح وحطيتهن بعلبتهن واخذتهن ضميتهن جوه غراضي
ولليل عمي لم اخوانه وعمامه والخوال وولدهم
ودز عليه رحت جبتله العلبه وانطيتهه اله واحنه واكفين بالكليدور وراح هو رجعلهم واني رحت كملت شغلي ...

وكت تلعلوله النسوان هنا عباره عن فلانه حجت وفلانه كالت وفلانه جابت وفلانه ودت ويضلن يحجن على كل عربهن وياخذن غيبه لحد ماتبزع حلوكهن .. اني جربت الكعده وياهن مره مرتين
شفت هذا طبعهن ماكو غيره فسلمت على روحي
وانعزلت منهن وصرت وكت كعدتهن اني
اخذ الكتاب الي جايبته وياي واطلع اكعد بالحديقه من جهه المطبخ بحيث مايتوراى عليه الجاي من الرياجيل وهنه مرات يمدن روسهن يشوفني اقرا
ويرجعن لكعدتهن...

واليوم علي حاط كوره من كوري واني كاعده
ماحس الا هو فوك راسي باوعتله وشفته يحرك بحلكه منا ومنا ونافخ صدره عفته ودنكت اقرا
جان يشمر السبحه بحضني وكال...

- تعلمي تنظفيهه عدل جايبته بوصخهه
رباة العسكر معلمتج على الجيافه وطوله اللسان

مارديت عليه واخذتهه باوعت عليهه نظيفه تلهث اني جلفتهن كلهن بس هو يدورله حجه .. عاد شلتهه وخليتهه بصفي ع الحشيش ..
جان يدفر كتابي برجله هنا اني رفعت عيني وكتله
- شكو! ادور المشاكل دواره انته
- انجبببي هييي لاتخليني شحطج للزريبه هسه
من تحجين اعرفي ويامن واوزني جلمتج يلا تنطكيهه جدامي

مارديت عليه واخذت كتابي والسبحه وكمت
جان يكلي ...
- امشي شيلي هالوصخ الي بيهه ولمعيهه وجيبيهه ليه يلااا تحركي

جان اباوعله وهو يتفحص وجهي ومخنزر واني رحت مشيت ليم تنور عمتي واجيب السبحه واشمرهه بنصه جان يعيط بيه ..
- هييي طررررنه انتتتتي شلون تشمريهه بنص الوصخ حاكج جلدج اليوووم تردين اصلخج

عدلت شالي وكلتله بهدوء..
- حتى سبحتك من صدك تصير وصخه وروح دور الينظفلك ماشتغل عندك اني

عفته ينعل ويسب وراي ورحت طبيت للبيت
وكلت لعمتي الصار بيني وبينهه حجيت بس حتى اذا صارت حجايه تكون هي تدري وماتثبرني ..

ورابع يوم العيد نزل محمد واهله ذبحو لجيته بسلامه لان هالمره جانت الاخبار عن وضع الحرب ابد مو زينه ولازمين كلوبنه بادينه خاف ساعه الساعه يجيبون خبر موته والحمدلله رجع سالم معافى .....

كالعاده كعدنا يومين بيت اهله ورجعنه لبيتنه وبقت لميعه بيت اهلهه مارضت ترجع وياي واني هم اطمئنيت على وضعها هناك ورجعت ...

ضليت بهالايام اداري محمد وادلل بي واعوضه عن ايام الحرب الي جان بيهه وبنفس الوكت اكول
رجلي يستاهل الدلال والمحبه اكثر من غيره وحرام عليه جنت ظالمته وظانه بي السوء وضميري دائماً يأنبني عليه واحاول كل مااتذكر غلطي اكثر من مداراته واقوم بواجبه ...

ورجعو الحجاج ورحنه اخذنالهم الهدايا وسلمنه عليهم هواي جنت فرحانه برجعتهم وهم فرحت راح يجون اهلي يسلمون عليهم واشوفهم لان محمد منع علي الروحه الهم منا لوره الولاده يلا ..
ودائماً نتعارك على هالسالفه اكله دوامي شلون يكلي بعدين بوكتهه واني لازمه كلبي بس لا يحرمني هالسنه بحجه حامل ...

ورجعنه لبيتنه بعد مابقينه ليله بيت عيالي واخذنا هديتنه من الحجاج و اجاني خبر من اهلي على نهايه الاسبوع يجون يزورونا ...

وبعد ٣ ايام من رجعتنه للبيت نايمه اني الظهريه وحسيت عصره بصدري وكعدت مفزوعه واول ماصار كدام عيني ايوب مادري ليش احساسي
مختلف عليه هالمره وممرتاحه ومتوتره كمت
كبل خابرت روعه ...
- هلا حبيبه شلونج
- هلا بيج عيوني
- اكلج حبيبه كعدت هسه من النوم وكلبي ناغزني
على ايوب دكي عليه شوفي حاله
- يمعوده صدك تحجين عبالي بيج شي خفت
ماعليه شي شيصيرله قابل
- لاا لاا بي شي اني متاكده احساسي بي ميخطأ
روحي فدوه بس عرفيلي خبر عنه اطمن بي روحي
- ابتليت اني بيكم .. يلا ضلي يم التلفون حتى ارجع اخابرج
- اي ضاله انتظر

وسديته وكعدت انتظر مكالمتهه وانتظر وانتظر وماكو مادكت ومحمد كعد ماكدرت بعد اخابرهه
وضليت باعصابي وادعي مابي شي لحد ما ويه الغروب دك التلفون ركضت جاوبت وطلعت هي
جان تكلي بصوت مفزوع ...

يتبع..

#شقراء_بغداد

بارت_١٩



دك التلفون وركضت رحت جاوبت جان تكلي روعه بصوت مفزوع ..
- ولج رااح ايوب رااح
-شنو
- لج خابرتهم وبالكوه يلا حصلتهم وطلعتلي اخته
اول مسئلتهه جان اتكوم تبجي وتصيح راح اخويه
ماخذي الدوله ويه مداهمه على اهل المناشير
وصارله خمس ايام مفقود ماعنه اي خبر ولج داده ماخذي ويه الشيوعيه راح بعد الرجااال راااح ولج خيه احساسج بي مااخااااب ياخيييه

جنت بهاللحظه كأن واحد هدمو بيته كدام عينه
هيج اني متصنمه واشوف بيتي وسندي يروح من ايدي .. نزلت السماعه وسديت التلفون ورحت رجعت للمطبخ وضليت افتر اشيل واخلي بالكلاصات والغراض واني ماعرف شريد ولا مستوعبه شي امشي بدون مادري ششوف لحد ماوكع كلاص مني وفزيت وهنا كبل كمت ابجي
كعدت بالكاع وابجي اجاني محمد ودنك ليمي
وضل يسألني شبيج وليش البجي واني كلشي ماحجي ولا باوع عليه بس ابجي وجان ياخذني للغرفه خلاني اتمدد وكعد يم راسي واني بس اتشاهك وابجي كلبي يوجعني على وليدي خلي بعيد خليني محرومه منه خلي كلشي يصير بينه الا ان يصيبه شر ويتاذى اموت قهر عليه ..

راد يعرف مني شبيه وتالي ايس وكام طلع واني جنت متغطيه بالبطانيه وابجي واكح وتالي كعدت
وضليت احاجي ربي ..
- ربي احفظه ربي لاتفجعني بي وليدي هذا وديعتي عندك لاتفجع كلبي بي
وكل شويه ارجع ابجي وادعي واحاجي ربي
اني عرفت بي شي كلبي ماغلط وياه بالاحساس
اعرف خنكه صدري عليه اعرفهه كلش زين
وهسه اكيد صايرله شي مدام صار خمس ايام مفقود وهسه يلا تاذيت عليه اكيد صابه شي مو زين ...

رجع محمد فات للغرفه واني كمت امسح دموعي
جان يكعد يمي ويكلي ..
- سولفيلي شمالج شجاج هيج نكلبتي منين هالتلفون
- صديقتي خابرت عليهه الصبح ومحد جاوب ورجعت انطيت خبر لجيرانهم تخابرني وهسه
كلولي مسويه حادث

جنت احجي ومدنكه وابجي ماعرف شلون طلعت هالجذبه وياي بس نقذتني وخلته يصدكني ..
- لاااه وحالهه شلونه
- مو زين
- الله يحفظها بسج عاد هبطتيني بنوحج هاذ
كومي امشي غسلي وجهج وصليلهه ركعتين
احسن من النوح عليهه

هزيت براسي باي وكمت توضيت وصليت المغرب وصليت ركعتين لوجه الله ودعيته
يرجعه سالم لبيته وكلتله ..
ربي روحي فدا اله بس رجعلي ابني سالم لبيته كلشي ماريد حتى حجايه وحده مااحاجي بس كون اسمع هو بخير

كمت حطيت العشه وكلشي ماكدرت اكل بس كاعده واتصفن وفكري بي ولحد مانام محمد اني
طلعت بالحديقه وكضيتهه بجي ولطم وساعه اكتم بشهكاتي لايسمعني وساعه ماتحمل بعد واضل ابجي بحركه وضليت هيج للصبح ادعي والدموع تصب .. جنت مذبوحه بهالخبر مذبوحه ماضل بيه حيل ولا خلك لشي .. هذا سندي وروحي و وليدي هذا شلون يأذوه ..عقلي مايرضى يستوعب الصار وكل ماذكر حجيهه اشب بناار واضل ادك على رجليه واون عليه .. لحد ماصارت الصلاه الفجر
كمت صليت وضليت حاطه راسي ع السجاده ومتمدده وامسح بالدموع وبعدين كمت امشي بهالبيت مثل المزوهره ماعرف شسوي وشيصبرني ..

خليت محمد يطلع وره الريوك واني خابرت روعه
وسئلتهه وتكلي ماكو خبر عنه وضليت ادك والطم واصيح وحدي بالبيت وطلعت كل قهري ...

وضليت على هالحال يومين اني متكلوطه كدام محمد هاديه والنار تاكل بيه من جوه ووكت مايطلع اضل اصيح والطم واتهستر بس اريد اعرف خبر عليه بس اعرفه عايش بعده لا
ماكدر اضل هيج وحدي اتلوع اريد اليطمني عليه

وثالث يوم الصبح كاعد اسوي الريوك واحس بوجع بظهري سجاجين وتنغز بي كملت شلون مجان وحطيت الاكل لمحمد وهو اكل وطلع ويه ولد عمه ينتظروه بره وهو راح واني كعدت بالكاع بعد ماكدرت اكوم رجليه ماتشيلني وظهري احسه راح ينفصل من جسمي وزاد الوجع ببطني ومثانتي وماحسيت روحي الا مغركه بالدم
اريد اتحرك للتلفون بعد ماكدر منا الهبطه ماكله من حيلي ومنا جسمي باد وبعد استسلمت وماحسيت الا بغواشه ومادريت بشي بعد ...

وكت مافتحت عيني شفت عمتي وجيرانه واكفات يم راسي واني بالمستشفى باوعتلهم بتعب وهمه صارو يحاجوني واني بس سألتهم ..
- عمه ابني
- الله يعوضج بغيره يمه ماله نصيب بهالدنيا

هي كالت هيج واني الدموع كامت تكت وضليت ابجي من كلبي .. ليش ردته ونيس الي بوحدتي
بس هالدنيا ماترضى تنطيني ابن غير ايوب ولا حبيب غيره ولا خلتني احضى بي ...

تالي كلت بكلبي ربي ابني الاربع شهور عمره راحله فدوه مضحيتله بي بس رجعه بسلامه

اجه محمد شافني ابجي وباوعت عليه وجهه مهموم ومتغير مو ذاك الجانت ضحكته تارسه وجهه
جان يكلي ..
- حمدلله ع السلامه
-الله يسلمك
- راح اطلع اشوفن الدكتوره يمتى تخرجج

دار وجهه وراح واني ضليت اتلمس بطني الي دتكطعني بالوجع ودموعي ماوكفت وضليت ابجي لحد مالمغرب طلعوني من المستشفى واخذوني لبيتي وضليت اكللهم اريد بيبي وخبصت الدنيا عليهه ومحمد خابرهم بالليل وكللهم الصار وخطيه بنص الليل اجتي بيبي وامي وعمي ومرت عمي
وضلت بيبي تبجي ويه بجيي حاضنتني واني ابجي من قهري بحضنهه وخايفه من كل هالدنيا

خايفه لا تكسرني بابني الثاني وهم تحرمني منه
ونمت واني بحضنهه وكلساع افز واكللهه
بيبي اريد ابني وتكلي .. طير بالجنه يابيبي ويعوضج الله

يعوضني الله برجعه ايوب والله هاي تعويضي
هيج جنت ارد على حجيهه واحاجي نفسي راح يرجع ربي رحيم مايكسر بشر ويعذبه واضل اصبر نفسي بهالحجي لحد ماانام ...

وضلو اهلي يمي ٣ ايام بيبي توكلني بايدهه وتحاول تضحكني وتصبرني وعمي هم يروح لبيت عيالي ويرجع جايبلي تمر وحامض وعنكود عنب ويكعد يترسهن بحلكي واله ابلعهن غصب عني ومحمد مرات يواسيني ومرات يتجنبني
وجنت اشوفه حيل مقهور وبالكوه يبتسم واليوم صار. لازم يلتحق اجه يودعني وكعد يمي ولزم ايدي وكالي ...
- جنت اريدن اشيله بايدي هالوليد واملي بهالبيت صوته بس مالنه نصيب بي وعايني علي انه شكثر اغتاضيت وتدمى كلبي عليه بس اكولن
مريتي موجوده وبعافيتها الحمدلله وهي ارزاك ومثل ماحبلتي هالنوبه تحبلين الثانيه هم بس اريدنج كويه وتعبرين هالشده واريدن من ارد ان شاء الله هالنوبه اشوفنج مورده مثل كبل وتطيبين كلبي بهالمصاب

دمعت عيني وحضنته وهو هم ضل شاد على حضني كلتله ..
- ربي يعوضنا ان شاء الله اريدك ترجعلي بسلامه ولاتضل تقهر بنفسك وتكتم بكلبك ارجوك لاتزيدني قهر النوب عليك والله كلبي خلص
- لاتشيلين همي انه بشوفتج زينه اصيرن زين

وخرت منه شويه وباوعتله وابتسمت حتى اطمنه
وبست راسه وخده وكلتله ..
- اني صرت زينه لاتشيل همي بس انتبه على نفسك واقرا ايه الكرسي اول ماتوصل الجبهه وبكل ليله هم اقراهه
واعذرني ماسويتلك شي هالمره تاخذه وياك تاكله
-معذوره ياعوينتي معذوره يلا انه امشي ديربالج على روحج واكلي زين وانه خليت مصرفج بالمجر هاذ اخذي لاتنسين
- تسلم عيوني تروح وترجع بالسلامه ومحفوظ بالله واهل البيت

باس راسي واخذ جنطته وطلع واني صرت كل مايطلع هالطلعه اضل بقلق عليه كلبي شبعان قهر
من كل جهه .. وانتظر فرج الله بحفظهم كلمن اله معزته هذا ابن كلبي ماكدر عليه وهذا زوجي وبينه عشره طيبه هم يكسرني اذاه وتخوفني روحته
يمكن صح مرات نكره شي بس هو يكون خير النه
اني لو محمد يصيرله شي لاسامح الله ليكالوني بكشوري ويتكالبون عليه كلهم بس وجوده حاميني منهم ....

جنت من امشي وجع يكطعني وراساً اكعد ماكدر اضل بعد واكفه .. وهمزين اهلي يمي ماخلوني اسوي شي بس متمدده وهمه مداريني وثاني يوم اجه ابويه وجايب اخواني وياه ... حضنته جنت
كلش محتاجه استمد قوتي وتفائلي منه وهو ماقصر وضل يحفزني بكلامه البليغ ونبرته الهادئه وتعديت خلال هالاسبوع مرحله الانكسار بفقدان اول جنين الي وضليت بأمل ربي يعوضني برجعته سالم لبيته ...

بعد مرور اسبوع اهلي رجعو وضلت يمي الحجيه
اني طلبت منهه تبقى يمي لان اريد تتقوى نفسيتي اكثر يلا اطلع واوجه حجيهن الي اعرف بي يغثني
وهي فهمتني وضلت وياي ..
اني تحسنت شويه وكمت على حيلي وصرت اطبخ وادلل بيهه وجاراتي هم يجن يمنه كل شويه طابه وحده بابي ماسدهه دومهه مفتوحه والي يعجبهه شوكت متريد تدخل لبيتي وتدك باب المطبخ
وكل هذا ومانسيت ايوب وشلون حاله هسه
وشصاير وياه ...

وبيوم من الفجر كعدت على صوت التلفون رحت جاوبت كل ظني محمد جان تطلع روعه ..
- ها روعه خير
- البشاااره حبيبه البشاره جبتلج
- يالله احجي
- رجع لبيته ولج والله رجع
- الف حمممد وشكر الك رببببببي شوكت رجع
- الصراحه اني حجيت لاخويه
- عزا بعينج ولج شحجيتي
- مو هو ضل يرزلني على التلفون مكابلته وكاعده
فكعدت حجيتله كلشي من البدايه وامي هم شاركت وياي وهو اخذله صفنه شويه وبعدين رزلني وراح شو ثاني يوم اجه كلي وين عنوان الولد وانطيته العنوان ورايح هو وجماعته سائلين عليه وهاي قبل شويه كعدني يكلي جماعته كلوله بالليل راجع وطلع وياه واحد هم من جماعه اخويه وبس هالاثنين راجعين من كل الي اخذوهم واني كلت
خلي اكوم ابشرج ادري كلبج على نار

جانت هي تحجي واني ابجي واكول الحمدلله ربي اخذت عزيز ورجعتلي الاعز منه وعوضتني رحيم ربي رحيم ... جان اسمعهه تكلي ..
- وينج يمعوده احجي وحدي شنو
- وياج حبيبه وياج
- شنو دتبجين
- روعه اني خسرت ابني
- لا يمعوده مو داكلج رجع سالم شبيج
- ههه لج الطفل الحامل بي مو هو
- عزا العزاني صدك تحجين
- اي والله من قهري عليه ونوحي وكع الطفل وره يومين من عرفت بخبره
- لاا يالله ولج ليش مكلتيلي صارلج شكد ليش هيج
- ماكدرت ماصار مجال
- وشلونج هسه داده حمدلله على سلامتج ربي يعوضج ان شاء الله
- الحمدلله ربي عوضني برجعته .. اني نذرتله روحي فدا بس يرجع بسلامه وربي هم اخذ مني روح وعوضني برجعت ايوب الحمدلله مادامه زين كلشي لعينه يهون
- اوووف على كلبج هذا اووف
- امانه خابري وتطمني عليه وبلغيه سلامي ووصي ينتبه على روحه ولا ياخذ حيلي بهالمواقف بعد
- صار تدللين بس يطلع الصبح والناس تكعد اخابره .. يلا حبيبه ماعندج الا العافيه
- الله يعافيج مشكوره روعه وكفاتج هاي مانساهه
- شعندي غيركم انتم غالين عليه

سديت الخط وكعدت واني مغمضه وحاطه ايدي على وجهي واضحك واحمد بربي .. بهاللحظه
الفرحه الي بكلبي مو بكلب احد والسبب ان ربي سميع لدعائي وبصير بحالي ويهتم لامري ماخلاني مفرفحه روحي عليه ورحم بحالي هالشي جان مفرحني حيل ...

بيومهه سويت غدا لوجه الله واخذت صينيه وافتريت وزعتلهن بس للقريبات عليه وزعت
٣ بيوت ورجعت تغديت ويه الحجيه وهي تسألني شجاج اليوم متغيره وعليمن هالطبخ .. واكللهه
لوجه الله ..

وللعصر هم دك تلفون ورحت جاوبت وطلعت روعه كلتلي ..
- اليوم اشبعج بشاير
- هههه كون كل يوم هالصوت يهل علينه
- يابعد كلبي سمعي خابرته وكلتله يمعود ماتكللنه وين تغط وتيبس كلوبنه جان يكلي ماتبطلن تسئلن علي انتن كلتله غير اعتزل من الوظيفه بعد اكعد عطاله بطاله شعندي غير اجيب واودي سلام
جان يضحك ويكلي محتاج صوتهه مره وحده خليهه تحاجيني
- لاا روعه لااا ماكدر
- شبيج والله تعبان الرجال ومحتاجج تره راجع من الموت وشكد لحيت عليه يكلي شلون طلع وليش اخذوه ماقبل كلي بس الهه احجي هالشي تعذريني
- روعه شلون احاجي من كل عقلج
- والله ادري صعبه بس كلت انتو اثنينكم محتاجين تحجون وبعد انتي بكيفج
- شوفي اني ادري بنفسي لو حجيت وياه مره واخذت الرقم منج راح اضل اعيدهه وهالشي حرام يصير خليني هيج احسن ماريد اتعلم على صوته
- بكيفج داده اني ماجبرج وراح اكله ماتكدرين تحجين وياه واجبره يحجيلي واجي اكلج
- هههه انتي مكيفهه على هالسالفه
- ايي والله متونسه بيكم احس نفسي داسوي انجاز عظيم بحياتي من اواصل بين العشاق ههه
- يلا ان شاء الله يجيج واحد على كد نيتج وتاخذي بلايه لوعه كلب
- لا اني اريد اتلوع بي حتى يصير حلو
- ههه عود رجعي وكليلي حلو بعدين

حجيت وياهه شويه وسديته وضليت اليوم كله اضحك ويه نفسي ومرتاحه لسلامته وبالليل كالعاده ساعه سبعه خابر محمد وطمني عليه وكالي بعد خمس ايام ينزل ووصاني اروح لاهله ..
واني هم شفت نفسيتي تحسنت واخذت الحجيه
ثاني يوم الصبح ورحنه لعيالي ...

وهناك منهن الي تحمدلي بالسلامه ومنهن الي من وره خشومهن ومنهن الي يسمن بالحجي وعادي ماهتميت وضليت هادئه الى ان وره يومين طالعه
للزرع ويه البنات الصغار .. اني هناك بس اطلع
افتر اشم هوا وماادتنى للاشجار ولا اكطع شي منهن اكول خاف يتحسسون من هالشي واكل بس من الي يجيبوه للبيت .... وهالمره اني وياي بنات عمامهم وهنه صغار من عمر ٥و ٦،٨ سنوات
و هنه حركات هواي فوحده منهن لحت الا تجيب سندي من كاع صايره عبور الساجه واني اخاف عليهن وهي جلبت الا اروح واني ضاله لازمته
جان تضل تكمز وخلت هذنيج هم يريدن يروحن
وفلتت من ايدي وركضت رفعت دشداشتهه وطبشت بالمي وراحت لهذيج الكاع واني اصيح عليهن وهنه يركضن حلتلهن السالفه لان الكاع فارغه ومحد يحاسبهن ... رحت وراهن عبرت الساجه ورحت اتبعهن وتالي وكفت يمهن وهنه يريدن السندي ومايلوحن كلتلهن اني ماعليه من الاول ماراضيه عليجن ماتدخل ..
جان الجبيره بيهن جابت سعفه صغيره وضلت بعودهه تضرب بالسندي لحد ماوكعتلهه وحده
واخذنهه وكعدن يكشرن وياكلن واني واكفه اضحك عليهن شلون عدهن اصرار وشلون ياكلن بسرعه وبالختله ...

جان كامن وردت اخذهن دنرجع وكبل مانعبر الساجه سمعنه صوت واحد يصيح ..
- اكفن انتن هييي

انداريت واشوفه هذا علي كلت لا هلا بالمشاكل
وكفنه وهو اجه ليمنه ومخنزر وكال ..
- شعدجن هنايه كاع الخلفوجن وتتمشن بكيفجن
- لعد كاعمن هاي مو كلنه اهل
- كااعي هاي كااااعي سمعتي وماريدن رجلج تدنسهه
- هاا كلتلي كاعك والله اعذرني ماشفت لافته تحذير حتى ماادخلهه ولو ادري بيهه كاعك ماوصلهه
- بس زين جيتيني برجليج حتى اتشمت واتشفى بيج براحتي

خزرته وردت احجي جان البنات يجرن ايدي ويكللي خلي نروح وخايفات عاد اني انداريت
داروح جان يكول ..
- والله زين واجيتج كسره ظهر ماي بارد نزل على كلبي من سمعت بطيحه ولدج هيج انه الميدان صار ليه بعد والله واجه اليوم وثاري اخذه منج هيدي هيدي ياحضريه

انداريت ورجعتله وكلتله ...
- تحفر كبرك بايدك يوم الي تدنالي
- ياحضريه انتي تحاربين موش بالايد عرفت ضعفج وين وجايج عليه انه خططتلج مثل ماخطط لجنودي وراسم درب موتج ومأشر عليه خطوه خطوه

اشرت فوك وكلتله ..
- الله فوكي يحميني وانته خطط براحتك هي موته وحده وان ردت اموتهه فبحكمه هو مو بخططك

جان يضحك ويفر بشواربه ويكولي..
- انه ماريدج تموتين وتخلصين انه اعيشج بالموت واتلذذ بعذابج .. عطشانه عيني لشوفتج تتوسلين بالرايح والجاي ماعلي هالشارب الا ماسلبتج
حتى ماي وجهج

صفنت بعينه شويه واشوف بيهن الحيله والثقه من هالحجي مابينت خوفي من الجاي وكلتله ..
- كلتلك من قبل وارجع اعيدهه الك
منتظرتك اني
- هه لج انتي طبيتي وكري ايد وره وايد جدام بيمن منتظرتني وتفاخرين
- السلاح مو شرط بالايد اهجم واني اعرف اصد منتظرتك ماخايفه انتقم براحتك وضل عايش ايامك تخطط لدماري الله يسهلك

عفته ومشيت وعبرت للبنات ورجعنه واني ضليت كل الطريق افكر هذا شناوي على يا بليه ؟؟؟

ماشفته بعد وصار نزول محمد وضليت اول يوم افكر احجيله الصار لو لا بعدين من رجعنه لبيتنه
كلتله على الصار وهو رزلني لان حجيت وياه
وضليت ابرر موقفي كدامه لحد ماكالتله ..
- بدال متكعد ترزلني روح رزله وخلي يكف عني
شعنده حاط كورته من كورتي

جان يضرب الباب وطلع ما رد عليه ولليل يلا رجع ماحجى شي على هالموضوع واخذني للغرفه ولا كأن شي صاير .. اني تقبلت محمد بكل شي
الا بهالنقطه لحد هسه بعدني اعاني منهه ورافضه اتقبلهه منه .. هاللحظات بمثابه صراع الي ويه نفسي مافكر الا هسه تخلص وينتهي كلشي

حاجيت محمد على رجعتي لدوام السنه الجديده
ماضل عليها غير اسبوع وهو كالي من التحق اخذج ... ومن سمعت امه تخبلت شلون اضل رايحه جايه لبغداد وبالشافعات يلا سكتت وكفت عني بحيث من راد ياخذني لاهلي جانت بزعانه روحه وماله خلك حتى يباوع بوجهي ..

رحت كعدت يمه ولزمت ايده وكلتله ..
- محمد عيوني ادري بيك متحمل كل هالحجي علمودي وماتريد تكسر بخاطري واني هواي اشكرك لموقفك هذا والله هواي كبرت بعيني وفخوره بيك زوج الي

هو شويه شفته لان بهالحجي وتعدلت معالم وجهه
كلتله ..
- راح يضل بالي يمك شوكت تخلص هالحرب ونرتاح
- العلم عند الله
- زين شنو بالك احجيلي
- صراحه ماريد اعوفنج انه ماجاي اتهنى بيج بزعانه روحي من هالمنوال اريدن اكعد بيتي واستغر كرهت الروحه للموت كل عشر ايام
- حقك والله الوضع صعب الله يكون بعونك وان شاء الله تخلص هالحرب ونستقر بيتنه سوه

حضني وضل يكلي ..
- ضلي اشتاكيلي وانتظري جيتي اريدن اشوف لهفتج نفسهه وتزيد من ارد
- ماتوصيني على ماهو بيه موجود
- ماريدن افارك حضنج الدافي ضلي احضنيني

استغربت طلبه وكلامه هالمره هاي اول مره هيج يحاجيني بكل هالحنيه ..
ضليت حاضنته على طول كعدتنه ومن ردت اسوي العشى اجه كعد يمي بالمطبخ ويسولف وياي واكلنه سوه وهو عينه مافاركت تفاصيلي
ووكت النوم كلي ..
- احضنيني هالليله اريدن انام على ريحتج

وحضنته وضل نايم على ايدي ووجه بركبتي
واني اخذني الخوف شويه عليه حسيت وضعه غريب كلش هالمره .. ضليت اتلمس بشعره الناعم
وقريتله ايه الكرسي وحصنته باسم العظيم الاعظم
وخليته وديعه عند ربي الي ماتضيع عنده الودائع

وثاني يوم من الصبح طلعنه لبغداد وصلني لاهلي ودعته وراح يلتحق ...

مريت على صديقاتي وكعدت يمهن وتونست بسوالفهن وسمعت خبر الي انخطبت والي اتزوجت والي رجلها او اخوها استشهد وثاني يوم رحت لبيت بيبي وطلعنه اني وياهه للسوك اشتريت بالي مجمعتهن تراجي ذهب ثكال
واخذت كم قطعه ملابس للدوام ورجعنه
وبقيت يمهه اربع ايام وجان تخابرني امي وتكلي
.
.