‏لا تُحاصر مساحة ‎#الحوت الشخصية لأنه سوف يشعر بالإختناق منك

‏لا تحاول النقاش مع ‎#الدلو إذا كان عقلك غير منفتح، فهو لن يتحمل ذلك

‏لا تكذب على ‎#الجدي، لأنه لن ينسى الكذبة لفترة أطول مما تتصور

‏لا تتعالى على ‎#القوس، فهو لن يتحمّل أي نوع من التكبُّر من حوله

‏لا تستهزأ بالـ ‎#عقرب أمام الناس وإن كان مزاح، ردّه قد يكون قاسي جدًا

‏لا تُواجه ‎#الميزان بغضب، لأنه سوف يغلق أذنيه ولن يستمع لأي كلمة تقولها

‏لا تنتقد ‎#السرطان بقساوة، بل وجّه له ملاحظات لطيفة لكي لا يكرهك

‏لا تعطي ‎#العذراء أقل من قيمته، فهو يأخذ هذا الأمر بطريقة شخصية جدًا

‏لا تفعل عكس ما يطلب منك ‎#الثور، فهو يكره أن يُساء فهمه

‏لا تتظاهر بأن ‎#الحمل ليس موجود، فهو لا يُمكنه تحمُّل التجاهل

‏لا تتعامل مع ‎#الاسد على أنه خيارك الثاني، يجب أن يكون خيارك الأول دائمًا

‏لا تحاول التقليل من شأن ‎#الجوزاء، فذلك يجعلك تبدو سيّء أمامه

#شقراء_بغداد

بارت_١٦



-وصلج خبر منه ؟
- اي هو الصراحه
- احجي كلبي تعود على الصدمات احجي
- شوفي حبيبتي لاتضوجين والله ميستاهلج هو
- روعه احجي الصار
- اني هذاك الاسبوع كله بس اخابر على رقم بيتهم ومرات تطلعلي بنيه مرات رجال واكللهم اريد ايوب ضروري يكلولي مو هنا ولحد ما حصلته بيوم الاربعاء بالليل طلعلي هو وراساً كلتله انته عايش ميت وينك جان يكلي بارض الله موجود
كلتله باجر لو بيدك ذهب تعوفه وتجي لازم نحجي
كالي صار وسديته
- ايي واجاج ؟
- اي اجه وجان هادىء كلش ماحجى شي واني دمي فاير وضليت احجي عليه كلتله وينك اختفيت بس وكت الحجي والتهديد تصير استاذ وادك صدرك ومن تصير صدك تختفي وتعوف البنيه وحدهه وعينهه على الدرب واتاني بيك كلتله
حركت عليك امه محمد محد وصلك خبر !انته ماكلت اشوف هالبنيه شصار بحالهه تدري بيهه تزوجت وكسر كلبهه كاتمته وراحت لناس ماتعرف شيسون بيهه راحت مكسوره كلب منك هيج تالي التعب بيك !
- ليييش روعه ليييش تجرحينه هيج هسه كسرتي كلبه وحرجتي وقللتي من قدره ورجولته بحجيج
-دسكتي سكتي وادافعله بعد كلشي لو شفتي الي اني شفته جان محجيتي هالحجي
- ليش شسوه !! احجي شسوه
- تخيلي وره كل هالحجي يكلي ادري بيهه تزوجت الثلاثاء والله يسعدها
- روعه هو يكابر مايبين ضعفه
- لج يامكابر هذا اكللهه مامهتم بكل بروده دم يكلي ادري بيهه لعد مدامه يدري الافندي وين جان ؟
شبي ميدري بيج منتظرته لو ميدري بنفسه منطي وعد ؟
- وهو الوعد شيفيد حتى لو اجه شراح يغير هو الفاس وكع بالراس بعد
- ماراضيه على تصرفه ابببد لو من صدك هامه الموضوع وخايف على خسارتج جان رجع محمد للجبهه وشتله واخر المده مو سواها مره يكدر عليهه مو صعبه عليه بس هو رادج تزوجين
وحتى من كلتله دزتلك هالامانه من قبل ايام اخذهه مني ودار وجهه ومشى حتى سؤال ماسأل عنج ولا كال شسوت بغيابي شلون حالهه يتعذر على الاقل بشي يكول يابه هيج وهيج جان وياي بذمتج هذا موقف منه ؟ هو هذا الرجال العرفناه !
- مامعقوله لاااا اكيد اكو وره سكوته شي اني اعرفه روعه هذا حبيبي هذا روحي اعرفه مايرخصني ولا اهون عليه اكيد تلكيه جارع المر بسكته اكيد اكو سبب منعه يحجي لا تظنين بي السوء
- ضلي انتي بهالكلب خلي هو يسرح ويمرح وانتي بمحكوميه محمد ادمغي
- هذا القدر شبيدي وماسويته .. اذا حزام ظهري تخلى عني روعه اني من ابويه دار ظهره اليه مابقت عندي قوه وحيل هو كل قوتي وسلاحي الوحيد وخسرته .. ورجعت استندت بايوب وهم دار ظهره الي بس عذرته ومبري الذمه هم الرجال مابيده شي عليه ومذبوح مثلي .. اكو رب اليرحم بحاله وحالي ..

ضلت ساكته وكالبه خلقتهه ومراضيه بهالوضع ولا اني العاجبني تصرف ايوب بس عذرته كلت يجوز بحكم شغله سوه هالشي وبعد اني تزوجت وفات الوكت على العتب ...

ضليت هالاسبوع بيت اهلي مرتاحه محد اله شغله بيه اطلع يم صديقاتي بالمنطقه اونس نفسي وياهن شويه واكضي باقي الوكت بالدراسه والجمعه قررت اروح لبيت بيبي اشوفهه ورحت طارت بجيتي الهه وعلى طول مااحنه كاعدين هي حاضنتني وتشمشم بيه واني احجيلهه شلون كضيت هالايام وبقيت يمهه للسبت باليل رجعت وكملت دوامي وايوب نهائياً ماشفته ولا سمعت عنه خبر حتى روعه كالت لو يموت بعد مااسال عليه واخابره .. وانكطعت اخباره ...
وضلت بس ذكرى ايامنه ..بكل ركن النه ذكرى
بكل نسمه هوا بارده اذكره واردله السلام بكلبي
اشوفه بضحكه الجهال واشوفه بشمس الصبح
يرن صوته باذني كل ماوكفت لوحدي باب القسم وانتظر روعه تجي .. من اسمع صوت ضحك الطلاب عالي اضل اركز بلكي المح صوته بينهم
وبكل ليله اكتبله بالمفكره الي هداني اياهه ..

مرات انسى اني متزوجه واضل اسهر واتخيله واني اباوع للنجوم من شباك غرفتي واعيش وكأني انتظره يرجع من المهمه الي غاب بسببهه
انتظر صوت ضرب الحصوه بالشباك وانزل متلهفه واشوف مرساله ... وتلمح عيني حلقتي بيسرتي واشهك قهر على الصار وارجع امحي افكاري واذكرهه بالشرع والدين والمسؤوليه
وانام واني مابين احب ومابين احاول قتل الحب

وصار نزول محمد واجه كبل لبيتنه تغدا واخذني ورجعنه وتغيبت عن دوامي يومين والاسبوع الجاي يوم الثلاثاء تبدا امتحانات نهايه السنه
واني اضل اتحجج بالدراسه حتى ماروح لبيت اهله بعدني اخاف عشرتهم وماعرف شتصرف وياهم
ومحمد كل مايشوفني كاعده اقرا يضل يتأفف وره ساعه او ساعتين يطلعله حجه ويعيط عليه بيهه
فضليت وكت النهار اعوف كلشي واضل مكابلته
اكول خطيه هم حقه هو ويامن يكضي وكته شو بس احنه بالبيت ومايكدر يعوفني ويطلع لازم اراعي شويه ...

اضل اسويله اكل واكعد افتح وياه مواضيع مرات عن وضع البلد ويضل يسربت بالحجي على الدوله
ومرات اسأله عن حياته قبل زواجنه شلون جانت
ويكلي ... جنت اكضيهه بالجبهه وهناك كل يوم اعاشرلي صاحب ولو يستشهد لو ينقلوه لغير مكان

ويوم الي ارجع بي لاهلي ارتاح واشبع نوم واكعد ادير بالعرب اشوف شنهي الاحوال واشتغل وياهم بالزرع والوكت الي يضلي اخلي للبيت شوف شني يحتاج وعايش هالشكل ....

جانت شخصيته كلش تحيرني .. ساعه اشوفه فقير على نياته وكلبه ابيض ساعه اشوفه قاسي مايرحم وبتعامله وياي حدي كلش .. ممنوع النقاش عنده
بالخير ولا بالشر وممنوع التدخل باي شي
ومايهتم على بيت نظيف شبي مابي ماله دخل
عليه بس يجيب مسواك وهاهيه ..
مرات اني اضوج من صياحه عليه اذا ماسويت شي نفس ماراده بالضبط بعدني مافهمه ولا اعرف طبعه بس هو ميقدر هالشي يريدني كون من بطن امي اكون عارفه شبي مابي ولهالسبب احجي وانبهه ان العياط والتزمخ ماارضاهن بس احجيهن بنبره هادئه وبشكل تنبيهي اله بحيث من وراهه مايحجي شي بعد وتنسد السالفه ...

بالليل صرت اسوي العشى من وكت بس نصلي المغرب احط الاكل حتى اخلص واجب الساعه
الي وياه قبل ماينام وبعدهه اسبح واكعد بالهول اقرا للامتحان واضل سهرانه للفجر اصلي وانام

وبيوم الثلاثاء هو وصلني للكليه وضل ينتظرني بره لحد ماكملت الامتحان رجعنه للبيت ..

اني اكثر الوكت ساكته .. وكلش هادئه بالتعامل والحجي وياه .. يغلب على علاقتنه البرود لدرجه تخليني اصفن معقول هو هذا نفسه محمد الي ذبحني بحبه ؟ ماتخيلته لهالدرجه راح يكون بروده تجاه وجودي وياه وهو الي استعجلني للزواج وخبص الدنيا حتى ياخذني توقعت على الاقل يكابلني ويسولف وياي .. اني حتى كلام غزل منه ماسامعه ...

فضولي وشكوكي خلني اسأله بالليل بعد ماراح لغرفتنه وتمدد واني جنت هستوني مبدله ملابسي
ومتعطره .. اجيت كعدت كدامه وهو متمدد وكلتله
- محمد بعدك تحبني ؟

عقد حواجبه وكالي ..
- اي ليش تسألين
- نحجي بصراحه هالمره ؟وبدون زعل او عصبيه
- اي احجي
- ماشفت حبك هذا الي جنت تحجيلي عنه بخطوبتنه وقبلها يعني مداشوفك هذاك الرجال الي حارب الدنيا حتى ياخذني جنت اتوقع منك غير شي
- انتي كلتيها نحجي صراحه
-اي
- انه احبنج اي انتي تعجبيني وتثيريني وماخذه عكلي بس انه ماحب اضلن شاعري دايماً يعني شبيه هسه انه وياج مكصر بشي ؟
- لا حشاك من التقصير بس اني ردت اعرف مشاعرك مو اكثر
- شفتي البرود شلونه ! موش يجرح !
- شتقصد
- اقصد انتي هيج جنتي وياي انه اتمنى منج الجلمه وانتي تصدين وجهج مني وهاي انه صرت وياج
مثل طبعج
- بس كلشي تغير بينه شنو نسيت وعدي الك
- لا مانسيته
- لعد هسه اني مقصره وياك بشي
- انتي بارده باسلوبج وياي اخاف انه متغزل بيج بيوم مبينلج مشاعري انتي مايوم كلتيلي احبك
ولا عاملتيني معامله حبيب انتي رضيتي بيه زوج وكمتي بواجبج موش ازيد من هيج فهالاسئله اسأليهه لروحج وانه كايلج شتصيرين وياي تلكيني اردلج بالمثل

ضليت ساكته ماعرفت شكول .. اجذب واكله حجي مو بكلبي لو شسوي ؟؟؟

جر الغطى وكالي ..
- امشي طفي الضوا خلي انام

اندار وعافني بصفنتي تالي كمت طفيت الضوا وطلعت بره كعدت وصفنه تجيبني وصفنه توديني
وبعدين كلت اني شكو مهتمه هسه قابل اني رايده شي من هالزواج لو مفكره بحياتي شلون حالهه
خلي شسويله يعني كافيني الي بيه مو النوب اكعد امثل واجذب بحبه ...
ورحت كعدت اقرا ... ولحد ما خلص ثالث امتحان
هو وداني لاهلي والتحق ..

كملت الامتحانات يمهم وضليت انتظر رجعته حتى ارجع وياه ... وبرابع يوم العطله خابرتني روعه
وكلتلي لو تجين يمي مشتاقه لسوالفج وخلي اشبع بكعدتج قبل لايرجع رجلج وبعد منتشاوف ..
دلتني بيتهم بالضبط ورحتلهه ..اني اهلي مايحجون من اكللهم اطلع لبيت صديقتي بس المهم مااتأخر
بالرجعه ... ورحتلهه وره الغدا رحبت بيه هي وامهه وجانو اخوانه طالعين وابوهه هم سلم وطلع
وضيفتني كيك وعصير وضلينه نسولف واحسهه
تريد تكول شي ومتردده عاد كلتلهه ...

- روعه شبيج اكو شي
- شوفي اني الله غاضب عليه بهاللسان ماعرف اضم سالفه وراح احجي وشيصير خلي يصير لان اني راح انفجر اذا اضل ساكته بعد
- عزا بعينج ولج احجي نشفتي دمي
- ااا تزوج
- منو تزوج
- ايوب منو غيره
- ش ششنوووو
- والله العظيم اتزوج قبل اسبوع واني قبل يومين يلا عرفت ماكدرت اصبر وكلت خلي اشوفه وين ماوين ومن خابرته جان تطلعلي اخته وتكلي
لتضلين ادكين الرجال تزوج بعد مو بحالج فكي عنه واني انهديت بيهه كلتلهه ماميته على زواجه اخوج وانتي شكو هالزياده منج وتجذبين قابل اكلتكم اني وهيج تريدين تصديني عنه
جان تكلي وشكو اجذب يجي هو واسالي بنفسج وخلي يحركه لكلبج ولو تموتين مناخذج جنه النه
عاد اني ضحكت وكلتلهه والله عقلج رايح بعيد وسلميلي عليه وكليله خلي يجي يحركه لكلبي
وللعصر ويخابرني كلتله اختك هيج وهيج تكول
كالي اي صح اتزوجت قبل اسبوع

- لااا ياربي دخيلك
- والله هيج كلي عاد اني كلتله تتهنى ياعريس وسديته بوجهه والله ياداده ماعرفت اسكت واضمهه عليج هنا واكفه السالفه بزردومي

حسيت نار وشبت بصدري وكمت ماعرف شلون اتنفس ضليت اروح واجي واني لازمه صدري والدموع تكت وروعه تحجي وتريد تهدي بيه واني فقدت بالبجي وحتى امهه جانت كاعده وصافنه علينه وعاد كلتلهه ..
- هسه ادكين عليه
- عوفي خلي يولي حبيبتي انسي مثل مانساج انسي لاتحركين دمج عليه
- خااااابررري هسه خااابرررري شلون يسوي بيه هييييج ليييش ولج روعه ليييش بشنو غلطت اني ويااه ليييش هيج خااابري مامشي منا اليوم لو ماتخابري كدااامي هسه يلااا دوسي هالرقم دووووسسسسي

ضلت مخبوصه وكعدت ادوس بالارقام واتباوعلي واني فقدت بالبجي جان شويه وتحجي ويه وحده وعيطت عليهه كلتلها خلي يجي مو وكتج
وضلت لازمه السماعه وتنتظر لحد مااشرتلي اجي
وركضت اخذت السماعه من ايدها وسمعت صوته
رجف حيلي ومكدرت اوكف بعد كعدت واني ابجي هو ساكت كلتله ...

- ليش ايوب ليش هيج ترخصني واني غليتك
تدير ظهرك وتمشي وتعوفني اواجه مصيري وحدي ومتسأل وعذرتك وماتهتم وعذرتك وتاليهه تطلع راسم حياتك بعيد عني ! تضحك عليه ايوب
احججججي انته ضحكت عليه بحبك املتني جذذذب وعدك وحجيك وحلفاااانك جذذذب
- ول يابه انا مو جذاب لا تمردين كلبي بحجيج
- انته جذذذذبت عليييه جذبببببت خليتني انتظرك جذب واصبر جذب وتاملني جذذذب ليييش لك لييش شسويتلك اننني شسويتلك ايوووب احجججي برد كلبببيي كلي اي شيييي لتسكت وتزززيد بناري
- يولي والله مغلوب علي وحك دمع عينج مغلوووب علي ول يابه انا مخننننوك من الجرى ممروده روووحي
- لعد لييييش تزووووجت ايووووب لييييش والله كلهاا بجفه كلبي وكسرته وحياتي والدنيا كلهه بجفه واني اشوف غيري تاخذك بجفه
- اسكتي يايابه لاتبجين
- شسوووت واخذتك فهمنني شسوت .. اني السهرت الليالي انتظر بيك واني الي اتعب لتعبك
اني البجيت عليك لحد ماذبلت جفن عيني لك اني الدعييييت وصليت ونذرت بحبك اني الخفت عليك مثل ابني وبرووووحي جنت اداريك واحصنك بايات ربي وتعديت بحبك حتى شرع الله واكول يستااااهل ولييييدي هذاا يستاااهل اضحيله
كلي هي شسووووت وحصلتك شسسسوت اني ماسويته احججججججيلي شسسسوت شسووت
- ووووول ياااااابه هدوه واااالله هدوووه اجتني والله لااعرفها ولا شايفها ولا شايفتني
- اخذذذت تعببببي بيك هي اخذته ع الحاضر اجتي اخذت سنين لوعتي وصبري بيك صار نصيبهه
لييييش ليييش قببببببلت لييييش
- يول مردتتتتي روحي الله يرضى عليج اسكتي
لاتبجين يووولي ماياخذ تعبج احد وماياخذ حبج احد ول انتي بدمي تتمشين ووووول هييييين
يااهل هالبيت جاعد تسمعون هالوحيده بكلبي ماتثنى
- ماااايفيييد ولااا اريد حجيك بعد راااح كلشي
اخذتك هي اخذذذتك
- يولي والله حبج ماتصله مره وهي تدري انا
حجيتلهه يشهد الله علي وحك هالنطك هاللسان
انا كلتلهه يابت الناس تعيشين بيتي معززه والج
كل حكج الا كلبي بابو لا تدكينه مالج مجال بي
يولي والله انا هالساع احاجيج وهالبيت كلو يسمع
وماخايف انا حبج فخري وسام شرف اليه واريد الكل تشوفو
- مااصدكك بعد ايووب مااصدك بعد حجيك ولا حبك كله بعته وذبيتني وسط النار ومشيييت
- يووولي لاتحركيني هالشكل ول
- انننني الي احتركت اننني المتبهذله وكضيت ايامي امشي على سجاجين وابلع الحركه وادوس على كلبي يريدك وخايف عليك وانته كاعد متهنى وياها
- ول مامتهني اناااا مامتهني مشلول حااالي يولي لاتخليني اجيج هالساع حركتي فااادي
- لعدد حركتي علييييك شتسمييييههه اني الجنت اغاار من اليباوعلك ويتصفن لضحكتك هسه غيري حضت بيك وتنام ليلهه على ريحتك وتشم انفاسك الجنت اسهى عن هالناس واضل اسمعلهن والله والله لو تعيش وياهه عمرين ماتشوفك مثلي
- يااامي انتي اهدي وحك عينج مايصير الي بالج
وهي كلهه ليله وكضت
- لاااااااتحجي لااااتحجي عنهه لاتحجججي لاتلجمم بكلبببببي كاافي كااافي والله دمرني حبك
والله شل حاااالي ليييش ياااربي ليييش...
لك ااااني بهااليله العندددك امووووت الف موووته
بسكووت اخنك النفسسس وانته تكلي ليله وكضت
- ياروحي انتي تهدي بالله عليج تهدي ذبحتيني ببجيج يولي كافي
- عسى حركه كلبي ماتتعداكم
- ياامي ياروحي والله كل هالصار غصب عني بليله وضحاها تكربست براسي هالزواجه
- جذاااب جذااااب والله جذاااب
- وحك عينج ماجذب انا يولو من يمتى انا اجذب عليج يولي انتي روحي
- ايووب لاتضل بهالحجي انته حتى وداع مودعتني كلمه منك ماسمعت خليتني بحركتي وحددي وتزوجت كل حجيك ماصدكه بعددد ماصدكه
- والله مكدرت انا اودعج غصب عني يابت الناااااس غصصصصب والله واالله مجبووور
- ياريتك ذبحتني ولا عيشتني هاليوم

ذبيت السماعه وكعدت بالكاع ابجي بعلو صوتي واجتي ام روعه حضنتني وضلت تهدي بيه وتحجي واني كل شهكه تزيد هالنار بيه
رجع دك التلفون وجاوبت روعه وحاجته ورادت تنطيني احاجي مقبلت ولارديت عليه وهو يصيح من السماعه وضليت بحضن ام روعه ابجي وهي تمسح بدموعي وبعدين حاجته روعه شويه وسدته
واجتي كعدت يمي وتكلي ...

- اهدي ياداده الرجال حظه فان مثل حظج هم ابوه مايرحم

- وشدخل ابووه شدخللله
- لج والله هسه هو باعصاب حاجاني وكلي كليلهه
مو اني الردتهه ولا دورت على مره غيرهه هاي
ابويه هدوله مره من الرمادي وهو قبلها وجابهه
الي واني مادري يكول اجيت لكيتهم مكعديهه بالبيت ومنطين كلمه للزلم يعني هم شبيده الرجال
هم هوس وخبص الدنيا واهله حطوهه براسه براسه
- روعه والله ممروده روحي مدتفهمين اني ماهمني شلون اجت اليهمني هاي اخذت تعبي
تفهمين شنو ديصير بيه من اتخيله يلزمهه وتتمعن بطوله والله نااار نااار وتاكل بحشاي والي موتني قهر ازيد بعد هو ماهمه اني صرت لغيره مااكلته نار الغيره مثل ماسوت بيه لج يكلي ليله وكضت روعه يكلي ليله لزمهه واخذهه روعه اخذ غيري ايده لزمت جسم غيري ورغبته يموتني هالشي ياداده يمووووتننني

حضنتني وضلت تبجي وياي وتسب وتغلط عليه وترجع تواسي بيه وضليت بحضنهه اناشغ بجي
لحد ماتعبت وجفت دموعي ... اخذتني رحت غسلت وجابتلي مي شربت شويه وضليت كاعده وحاطه ايدي على راسي ومسطوره ... عقلي وكف بلحظه تفكيري بي هو ويه ثانيه بغرفه وحده
كل مافكر هاي تصير تدلل بي وتحضنه وتلزمه وكت متريد وتصير هي ام جهاله روحي تشوغ وبودي لو اجره لكلبي من صدري واكطع بي ولا يضل هيج يحرك بيه ...

ردت ارجع للبيت وامهه ماخلتني خافت لايصيرلي شي واني هيج حالتي وراحت دزت على جيرانهم عنده سياره واجتي هي وياي ووصلوني لبيتنه ورجعو .. اني كبل صعدت لغرفتي وذبيت روحي على الفراش وضليت بس صافنه .. جسمي تعب وعيني نشف دمعها وبعد مالي قابليه شي ..

غفيت وماكعدت لليل وضليت بس لازمه راسي واون واليسألني اكله منشوله .. وثاني يوم هم نفس الحال بعدني بصدمه وعقلي يسهي وماركز بشي
لحد ثالث يوم الظهر اندكت الباب ورحت فتحته
طلع محمد راجع ببدلته العسكريه وجنطته حاطه على ظهره وشايل بايده ورده حمره من شافني ابتسم وطب واني هنا مادري شجاني جنت كلش
محتاجه اختل بمكان واخلص من نفسي المعذبتني
بافكارها وتعبها .. كبل بجيت وحضنته ..
هو ذب جنطته وخله ايده على جتفي وباس راسي
وكالي ..
- شعجب هلكد خايفه علي ؟
اني هزيت براسي ب اي وهو ضحك ورفع راسي
وكالي ..
- سيلتي كحلتج بهالدموع بويه هاي انه بخير مابيه شي بسج بجي وين ضحكتج مشتاكلهه

ضحك ومسح دموعي واني ابتسمتله .. انطاني الورده وتشكرته عليهه ودخلته جوه وصحت امي اجتي كعدت يمه ورحت سويتله الغدا وجبتله
اكل وكال خلي نمشي .. عاد اني كلتله نام ارتاح شويه بين ماالم غراضي واجهز نفسي ..
وهو من تعبه كبل تمدد واني صعدت لغرفتي
اول شي سويته هو رحت للمرايه وضليت اباوع على نفسي وحجيت ....

البجي والنوح مايفيد مثل ماهو عاش حياته ومااهتم اليه اني هم راح اعيش حياتي واداري رجلي وبيتي وادوس على هالكلب الي حبه واذاني بي
رجلي طيب وميستاهل الي اسوي بي هو اولى بحبي ومداراتي من غيره .. ومن اليوم اني راح انسى هالماضي وابدا صفحه جديده مابيهه غير رضى الله بيتي وعيالي ...

قويت روحي بهالحجي ورحت لميت غراضي وبدلت وتمكيجت وتعطرت ونزلت كعدت محمد
وسلمت على اهلي وطلعنه ... من دانمشي محمد
لزم ايدي ويباوعلي ويضحك اني هم بادلته الضحكه وكلتله ...
- عساك دائماً هيج مرتاح والضحكه متفاركك
- يارويحتي بوجودج والله من حضنتيني نسيت كل تعبي ومن شفتج هيج خايفه علي ومشتاكتلي كلبي انفتح وردت ليه الفرحه
- الله يخليك الي ويخليني اسعدك

ابتسملي وتنفس براحه وكملنه طريقنا للسيارات ورجعنه لبيتنه ... اول ماوصل كالي ..
- حضريلي حمام كلش عركان
ورحت نزعت ملابسي ولبست دشداشه خفيفه واخذتله ملابسه للحمام وصحته .. اجه دينزع ملابسه واني جنت متردده اكله لو لا بعدين هو كالي ..
- شني بالج احجي
- اا عادي اني اسبحك يعني كلت تعبان و
- هههه عادي بويه كلش عادي وياريتج والله وكل يوم تسويهه

ابتسمتله بخجل وصرت اليف له وهو واكف جوه الدوش وهو ضل يحضن ويبوس وكل حجيه حبيبتي .. وطلع نشف شعره وراح نام واني ضليت
انظف البيت واغسل ملابس وكل شويه احاجي نفسي هذا الصح وهيج لازم تصير حياتج شفتي
من زينه وياه شلون زين وياج اكسبي ولا تضيعين بيتج بغبائج وحسرتج على الراح .....
جنت احاجي نفسي واني اشتغل كأني اصحيهه واعلمهه واقوي نفسي بنفسي ...

لليل هم تعشينه وضليت بحضنه لنص الليل وثاني يوم طلعنه لبيت اهله .. وجنت حذره وياهم بكل شي انتبه وماضليت هذيج البنيه الفطيره الي على لاهيتهه تتصرف لا صرت احسب حساب الكلمه
قبل مااحجيها كدامهم ...

كضيت يومين افتر بالبساتين ويه محمد ماجان يعوفني ويه اهله كل شويه يجي ياخذني بحجه شكل ... واني من شفته هيج تغير للاحسن وياي
من تغيرت اطباعي وياه صرت ازيد اصرار اكثر
بأن اداريه واعوضه عندالايام الجنت هاملته بيهن
جنت احس بالذنب تجاهه واكول مايستاهل السويته بي وهذا غلط وذنب عليه راح اتحاسب عليه

وضميري دائماً يأنبني عليه من اشوفه شلون يدللني ويضحك وياي وعايف اهله واذكر حجيه من يكلي اني تعبان من هالدنيا وانتي راحتي واشوفه صدك بس وياي هيج مرتاح واعصابه هاديه وطاير من الفرح ...

ورجعنه لبيتنه وهو انطاني فلوس كلي اشتري الي بنفسج .. بس اني ضميتهن بوكتهه ماجنت محتاجه شي .. وهو من وحده راح تسوك فوك الي عدنا والي جبناه من اهله هم .. كوم لحم وفواكه وكعك
واني ماقصرت ضليت اطبخله كله اكلات دسمه واشكله الصينيه من كلشي وادلل بي ...
دائماً مرتبه ولبسي كله كصير كدامه وشعري معطر ومفتوح وحتى حجيي وياه تغير عفت
هذاك الاسلوب والصوت البارد وصرت كله
اصيحله حياتي وعيوني واسولفله دائماً على مواقف تضحك صايره وياي قبل وهو هم يسترجع ذكرياته ويحجيلي عنها وحتى اصدقائه كام من يعاتبوه ليش ميجي يكللهم انتم تعالو اليه ومايعوف البيت .. وعزم اصدقائه على العشى واجتي اخته
وياي ساعدتني وحضرتلهم سفره مشكله من كل صنف ونوع ...
ومن كد ماردت كلشي منظم ماخليته هو ياخذ ويصفط بكيفه بالاستقبال وين ماكاعدين ..
اني مديتلهم السفره بالصاله وفرشتلهم مدات حواليهه ورتبت الاكل وسراحيات العصير والكلاصات كل واحد وكدامه كلاصه ورتبتهه
على الاخير وسويتلهم صينيه وحدهه متروسه
فواكه ومشيفه ومرتبه وخليتهه على الطبله وخليت يمهه مواعين وبعدين رحت دكيت الباب عليه
وهو اجه شافهه جان يكلي ...
- والله ماظنيتج تكدرين على كل هاذ
- لاتستهين بيه عيني
- عمي معدله هي كوه

ضحك وراح صاح جماعته واني واخته ضلينه بالمطبخ مددات بالكاع من التعب وانتظرناهم
خلصو اكل وهو اجاني وكالي..
- اجيبلكم المواعين لو انتم تلموهن
- لا احنه نلمهن اخذهم للاستقبال بين ماصب الجاي
- زين كثري شكر الجماعه يحبوه حلو
-ماشي

وراح واني صبيت الجاي واخته راحت تلم بالسفره واني اخذتله الصينيه ليم الباب نطيتهه اله ورجعت اشيل وياهه ونسمع صوت شقاهم وضحكهم العالي
وبكلبي اكول ... الحمدلله كدرت ارفع راسه كدام جماعته واهله وبهيج بلكي اكدر اوفي دينه الي بركبتي واريح ضميري منه ....

وبعد ماخلصنه تعزيل كعدنا اكلنه اني واخته وشربنا الجاي واني كمت غسلت المواعين وخليتهه تروح ترتاح بغرفتي وضليت الملم بالمطبخ لبين
ماراحو جماعته واجاني ...
كبل حضني وباس راسي وكالي ...
- رفعه راسي والله مريتي .. الولد يكولون
تشكرلنه من المره وكللهه رحم الله البطن الجابتج والايد الربتج
- هههههه قابل شسويت هو كله عشه
- عجبهم ترتيبج للاكل وهمه اول ماطبو وشافو السفره كالو اللهم صل على محمد خير وبركه
عفيه عليج والله ماكصرتي هالعزيمه راح يضلون يسولفون بيهه كل عمرهم ماينسون اكلج
- الف عافيه على كلبك وكلبهم .. هو اني شريد لعد غير الصيت الزين الك عيوني
- يابعد كلبي

باس خدي وراد ياخذني للغرفه كلتله اختك نايمه هناك وبعدين عفته بالصاله كاعد ورحت سبحت
بين ماطلعت لكيته مكعدهه ومخليهه تفرش لنفسهه
بالاستقبال وتنام رحت كلتله ...
- مو خطيه البنيه مكعدهه
- جا احنه وين نام مانريد ناخذ راحتنه شلون
- ههههه هسه خلي اليوم نفرش ونام هناك شكو بيهه
- لاا انتي تعبتي اليوم اريد ادللج وتنامين مرتاحه

مافهمت عليه وضليت اباوعله جان يكلي تعاي تمددي وجر ايدي وتمددت وصار يفركلي ظهري وجتوفي بس بقوه ماتحملهه اني هيج احس اتجعص
بس مابينتله سويت نفسي اضحك وتشكرته وكلتله
- اي زين سويت عفيه شكد ارتاحيت هسه شكراً

ضحك وتمدد وحضني وضل يلعب بشعري واني غفيت شويه وكعدت على ايده تتلمس بجسمي ونفسه قريب من وجهي .. ماحجيت شي وخليته على راحته ياخذ الي يريده اني هنا من هالناحيه
ماعندي اي شعور او اعتراض المهم هو ياخذ كفايته ويرضى ...

ومشت الايام هادئه بينه وحلوه ووكت الي التحق
اخذني يم اهله .. وهناك خابرت من تلفونهم على اهلي حجيت ويه ابويه واخواني وامي من وره خشمهه تحجي مادري ليش تكرهني ؟ وثاني يوم خابرت على بيبي حجيت وياهه ودمعت عيني من سمعت صوتهه .. وهي وصتني وخلتهه امانه بركبتي اداري الحجيه ام ابوهم تصير واخليهه بعيوني ودائماً امر عليهه واكعد وياهه ..

واني صرت امرلهه وهنا بديت اشوف عائلتهم
عن قرب اكثر واول من كشف قناعه كدامي ....
.


يتبع..