عقيق.. شنو قصدج مافهمت
فجر.. احسن لاتفتهمين ولاتسألين السبع عن اهله يضوج
عقيق.. ااي ادري مااحجي
فجر.. وانتي شو ماكو خبر عن اهلج

عقيق.. تدرين ناسيتهم منيلي اهل عمام واحد بالسجن وواحد
مدري وين شارد مطلوب وعمتي مره مخابره السبع واني موبحاجتهم الله يخلي السبع هو من جان بابا عدل محد بحالي من مات يريدني خليهم بعيدين عني....

صار المغرب اجه السبع متسوك وجايب صندوق طماطه
عزلنه المسواك وهو كال خليت ابو عبد بالباب وانه اروح
ويه ضرغام للشط وقفل الباب علينه ...

الطماطه صغار ناعمه واني وفجر كعدنه نغسل وناكل
بدون شعور كولت فجر مهروش وطاح بكروش ناكل
ونسولف وماندري كل وحده شكد اكلت لمن صاحت
بينه لبابه يله كمنه...

وره العشه كعدنه نقره واحس الم ببطني كلت هسه يروح
وشويه شويه زاد كمت خابرت السبع كتله بطني توجعني تعال وره نص ساعه اجه جنت نايمه بالكاع وابجي من الالم معدتي نار وحته كلياتي توجعني...

كام يحجي شبيج موهسه جنج ورد ومااكدر احجي واكله
طيرت نص صندوك الطماطه بدلت واخذني للمستشفى
ضربوني ابر مهدئه لالم ومغذي وابره لعبان نفس صرت زينه

طلعنه بالطريق كتله راح اكلك شبيه ؟؟
السبع.. شكلتي ؟؟
عقيق.. الطماطه الصغار واني وفجر واكلت هواي
السبع.. تحجين صدك ؟؟ عقيق راح تخبليني صغيره
انتي ماتعرفين الشي الغلط الطماطه تسوي املاح
والسانج شطوله وتصيحين ماماكله شي!!

عقيق.. والله كله من فجر هي تاكل وانسولف واكلت هواي
السبع... كالتلج عقيق ذبي روحج بالشط كل مصيبه تذبيهه براس فجر وانتي اسم الله عليج فقيره..

عقيق.. شبيك تصيح عليه قحط هي طماطه
السبع.. ظلي بهذا عقلج ومره ثانيه تخربطي ووني وحدج
ومااخذج
عقيق.. سكتت لان كام يصيح ورزلني وكلساع يلتفت عليه يرزل واسكت بلعتهه وسكتت مثل كل مره ...

رجعنه للبيت فجر كاعده تقره قران ولبابه نايمه
حضرت ملابسي مال الدوام والسبع فاتح القاصه وعنده اوراق يسوي بيهن كل غراضه مطلعهن ومهوس كعدت
بصفه لابس نظاراته ويشتغل ..

كمت اكلب بالاوراق اجه بيدي عقد الزواج مالتنه
وظليت اكلب سندات هواي مال اراضي
وعنده كاع ببغداد دائما افكر بس اتخرج اقنعه ونروح
هناك احس البصره مشاكلهه ماتخلص مدام جبار موجود...

كمت انعس مددت بالكاع بصفه وماادري بروحي غفيت
فزيت وهو يشيلني ويخليني على الجربايه افتح بعيوني
واغمض بس سمعته كال صايره ثگيله اذا تاكلين صندوك
طماطه شلون ماتسمنين...

لبابه.. الصبح رحت للدوام شفت دكتور اسامه ودنگت الموضوع حيل شاغل بالي اكو شي بداخلي مثل العناد واريد اكسر خشم جراح بس اخاف اذي نفسي حته راسي
راح ينفجر من التفكير..

جنت كاعده بالاستراحه ودك تليفوني رقم غريب ماجاوبت شويه واجتني رساله مكتوب اني نور بنت عاصم استغربت شعدهه هاي عوزني قهر

فتحت خط تحجي بصوت ناصي لبابه شلونج؟؟
لبابه.. هلو نور شلونج ماعرفت رقمج
نور.. لبابه مااكدر احجي بگت التليفون من رجلي وخابرتج بس انتي حافظه رقمج اخاف اخابر السبع

لبابه.. شكو نور بيج شي؟؟
نور.. مابيه شي بس جدي الشيخ جاي يكيد مكيده
للسبع يريد يخلص منه وسمعته يخابر بواحد يكله
اكتلوا لاتخلونه وانه مراقبتهم صار مده عدهم شي
هو وزلمه على السبع

لبابه.. فهميني بالتفصيل حته اكلهم
نور.. مثل ماكتلج جدي متخبل لان اخذوا الكاع منه
والشيخه وانه سمعته يريد يدفع فلوس ويكتلون السبع
والله يكتله جدي الشيخ ظالم

لبابه.. شتسمعين خابريني فدوه واني راح اخابر
السبع بس شتسمعين كليلنه وبلكي تعرفين اسمائهم
سديته منهه وكلبي يدك سريع كلشي ولا السبع
بسرعه خابرت على ابو الخط وطلعت عفت المحاضره الاخيره ...

رجعت للبيت خابرت السبع كتله لازم تجي خطيه عباله
بيه شي نص ساعه وهو بالبيت كعدت اسولفله
عن نور وهو ساكت كال الله الحافظ اذا يريد يصير شي
الله يستر مو بني ادم ...

ماحجينه لعقيق بس لفجر وظلينه بقلق خابرت رانيا
سولفتلهه كالت راح احجي لضرغام حته الكل يكون
مستعد على غدر جبار لان معروف عنه يغدر ومايواجه

السبع كعد عقيق من الدوام سوالهه اجازه مرضيه وماخلاهه اداوم بس تسأل ليش وشكو بس كالهه
علمود صحتج الطبيب كال تتهيء للعمليه السبع ماعنده
نقطه ضعف يلزمو منهه غير عقيق اذا يريدون يأذوا
يأذوا بيهه..

مر اسبوع وبليل السبع مايطلع هو يكعد بغرفته واحنه
مهوسين اندك الباب طلع السبع يشوف منو نسمع بس
تفضلوا واحنه مهوسين وحده تشيل البطانيه وحده
تشيل الملازم وشبشب فجر تخلي يم راسهه شكم
مره نحجي عليهه ودكول شبي بالباكيت ..

طبن للصاله واني متفاجئه ايناس ونوال وهيام ومروه
لاول مره اكره الخطار واصلا موخطار عباره عن
جمعيه للعقارب جايبهن عاصم وكعد بالاستقبال هو والسبع واني الحراره صعدت للراسي من المنظر

مروه لابسه جبه مخصره على جسمهه ومخليه مكياج
خفيف وشايله ابنهه وواحد عايفته يم ام جراح
زين بأي حق تجي واني ليش ماطردتهه شلون استقبلهه

اريد اخذ النفس مااكدر ليش عمتي خلتهن يجن
تدري بيه مااتحمل وجودهن راحت عقيق جابتلهن
مي وفجر كاعده تباوعلهن صفح حجت هيام وكالت
اعذرونه متأخرين نبارك للبيت الجديد بس هسه
يله صارلنه مجال

فجر.. اهلا وسهلا بس موجنج جامعه حته اعدائنه وجايبتهم زين انتي تدرين ليش شلنه مناك ؟
هيام.. يايمه لاتحجين بالعداوه كلشي قسمه ونصيب
واحنه جنه بواجب يم اهل نوال امهه مسويه عمليه
وكلنه انريد نجيكم وكالن انروح وياكم

فجر.. وعمتي ام جراح وينهه
هيام.. ماتدري سوده عليه كنالهه ننطي واجب ونجي
وصارت الجيه الكم وعاصم كال عندي شغيله ويه السبع وكناله بدربك اخذنه

لبابه.. ماحجيت ساكته وعقيق جابتلهن عصير
شربن ويسولفن على الجهال نوال حامل وبطنهه جبير
مروه ابنهه بحضنهه ولبابه الي على اساس اختارهه النشمي مطلقه بنصهن...

كامن يتعمدن يفتحن مواضيع زواج وزوجي هيج
وهذا هيج وابني هيج وطفلي يتحرك هيج
اخاف اكوم ويكولون انقهرت واخاف اظل كاعده
وابلع الغصه بصعوبه...

هيام.. بشرينه يمرت السبع ماكو حمل
عقيق.. لاااا
هيام.. شجاج يمه خاف دايسه مااخذج لساده يسولج
گطع چااا تظلين هيج وماعنده خلفه شعره ابيض

فجر..وين هذوله وشيسوون ؟؟
هيام.. شيوخ تعرف بهالسوالف يحبلون النسوان
يسولهن كطع للتابعه والدايسه وحته الماتعرس هم يعرسوهه
فجر... زين ماتاخذين ايناس الهم عمرهه جبير حته تزوج خاف ماتحصل خلفه بعد

هيام.. يا بنيتي بنت شيخ ماكز واحد ماخطبهه
بس غير ابوهه مايقبل وهي هم ماجاي تقتنع
وانتي لبابه ماكو خطيب منا منا سمعنه خطبج الدكتور
مالتج

لبابه.. اجلت الموضوع من اتخرج لان ملتهيه بالدراسه
اتخرج وارجع جواب ... على اعصابي كاعده فرن الموضوع وكامت تحجي مروه الجهال متعبيني
وجراح دوام ومايلحك يساعدني
ونوال ترد عليهه هو جراح عجوزي اسأليني علي
ماينطي من روحه ...

وهذيج جراح هيج سوالي وهيج سوالي
وهيج كالي بحيث كلامهه ملح وينزل على جرحي
صاحت فجر بيهن والله دوختنه جراح وجراح
ترى انعرفه اكثر منجن ربينه وياه ونعرفه شنو جديد
علينه ..

مروه.. شبيج فجر عصبيه هي سوالف عاديه خاف تحسستوا
فجر.. من شنو بسلا من جراح اوكفي خلي اضحك
اسمعي لج اني مااعرف امثل ولا اعرف اجامل واتملق
مثلجن هاي جيتجن مشنهه على غيري

لبابه تستحي وعقيق تستحي اني مااستحي لامتجن
مرت الشيخ وجايات تنفخن سمجن علينه مالنه خلك
سوالفجن الماصخه جراح اختي العافته لان مايستاهل
وانتي ست مروه ماكو داعي لهالنفخ هذا ترى ندري جراح
يكومج بكتله ويكعدج بكتله

رادت تحجي مروه سكتتهه فجر انهدت بيهن فد هده وعوزهه تكتلهن وانتي نوال خاف عبالج نسينه سوالفج
والتختل بالغرف وتشمشمين بملابس جراح مو عرستن
واجيتن اتشوفنه انجازجن

كل وحده بيجن هسه جايه بغايه مروه نوال غايتج
لبابه لاعيوني ماتنكسر بنت ساهره وانصحج روحي لرجلج سألي هم ينام ليلي وشبي متخبل على لبابه وعوزه
يبجي هنا من سمع راح تنخطب

وانتي نوسه بنت الشيخ غايتج عقيق مووو؟؟ ترى مرت السبع هاي خاف نسيتي اشمريهه بمي وشوفي شيسوي بيج هسه احنه انريد نتعامل بالمثل وياكم

لهنا وكل وحده تلزم الباب وتطلع وروحن كولن للشيخ
طردتنه فجر احنه ماعدنه عمام وانتي مروه بالذات
اذا وصلتي بيتنه بتليفون واحد اخابر جراح اخلي
يوكفج عند حدج ...

هيام.. يا متستحين ياصلفه هيج تحجين ويه وحده
بكد امج مامربايه
فجر.. لاگيمر عرب... لاتجيبين امي على السانج نفسج
انتي الشهدتوا على اصابه السبع وتريدين استقبلج
يله يله زيارتجن خلصت ولحد تجي بعد بيتنه مومضيف
جبار...

عقيق.. فتت بثوبي من الفشله فجر انهدت بحيث يريدن
يحجن مايكدرن منين مايحجن تسكتهن وطلعت هيام تحجي وتصيح حته عاصم طلع وصافن بس من شافت السبع سكتت طلعن واجه السبع كال شبيهن طلعن يرعشن...

حجيناله على فجر ضحك كال سباعيه
اني فشله اطردهن بس ادري اكو
مره سباعيه تطردهن وانتن ظلن فاهيات...

بعدين سمعنه من ام جراح جراح مايدري طالع
ومروه جايه وملاسنته وضاربهه وكل اخباله
يطلعه بيهه بحيث دكول ماشايفه هيج وحده
تحب الكتل والاهانه...

رانيا... طلعت من الدوام اجاني ضرغام اخذني
هاي الايام مالي خلك تعبانه من صعدت كال شبي
وجهج اصفر ؟؟ جاوبته ماادري شبيه مالي خلك
ضرغام.. اخذج للطبيب
رانيا.. لا هسه ارتاح يمكن لان امتحانات وتصحيح اتعب
من الهوسه..

وصلنه للبيت حته مااشتهيت اكل بس صعدت للغرفه
جاي ابدل بعدني ماكملت واحس معدتي گلبت
ركضت للحمام تقيئت والم قوي عندي بمعدتي
بالاول عبالي مستبرده ...

صعد ضرغام لكاني هيج كلساع وكال اخذج
واني اكله مابيه شي اصر بيومهه اله اخذج
خاف عندج تسمم لان بالامتحانات ناكل من بره يجيبن
المدرسات وناكل ومرات اتخربط...

بدلت ورحنه للمستشفى تحاليل وفحوصات اكو طبيبه
طلبت تحليل حمل جنت مأيسه اصلا ماافكر بهالشي
ومن صاحوا اسمي وكالو حامل رجليه ماشالتني لزمت
بزند ضرغام وهو يحجي ويه الطبيبه كتبتلي علاج
وطلعنه...

صعدت بالسياره دموعي عشره عشره لاهو يحجي ولا اني يمكن اثنينه من اثر الصدمه مانكدر نعبر عن فرحتنه
حرك السياره مسافه ومااتحمل طبكهه على جهه وجر راسي باسه واديه اثنينهم لاول مره اشوفه فقير ومايعرف يعبر عن شعوره غير كلمه مبروك النه...

رجعت للبيت واني ابجي الجهال يكمزون ماما حامل
وماما حاضنتني سبحانك الهي جان ماعندي ولاذره
امل بالموضوع حته قبل يومين زعلت علي لان كال
عندي شغل ومااكدر اخذج لاربيل وحسيته هو مايريد
طفل ونمت زعلانه...

ولاتقنطوا من رحمه الله وحاشاه لله يخيب
عبد متأمل بكرمه وعطائه الحاجه النمت بليل
ابجي ودموعي تجري مثل الجمر علمودهه
كعدت الصبح وهسه اني ابجي دموع مثل الثلج
من شدة الفرح...

هنا ضرغام طلع وجهه الثاني اخذلي اجازه ممنوع اصعد
وانزل ممنوع تشيلين ثگل حته اذا اكح يكلي
راح يوكع وصاير فدمره يدقق ويراقب بيه بحيث
مرات اعيط بي اكله تحكمك ماينطاق وعنده اوامر تنفذ
اجباري ...

بيوم منهن نايمه بليل ب11 واشتهيت فراوله
وطلع يدور فوك الساعه جابلي علبه بيهه شكم وحده
وجايب وياهه علاكه بيهه مشكل فواكه اكلت الفراوله
واكله شكو جايب هذني يكلي خاف هم تشتهين واني
رجال عسكري دائما على هبة الاستعداد....

فجر..شبيج امبوزه؟؟
لبابه.. تعبت من التفكير السبع كالي على اسامه
ويريد جواب
فجر..وانتي بعدج تفكرين موزين الرجال ساكت ومقدر
حالتج
لبابه... حته مااشوفه هواي بالصدفه ومومثل قبل حته
مايرفع عينه حيل محترم وهو كايل للسبع الوقت الهه
خلي تفكر براحتهه...

بس اريد اسأل اكول ياربي ليش لسه ماطلعت حوبتي
سمعت حته تريد ترجع للدراسه وعوفج عن وضع جراح
هو اصلا يأذي نفسه وهي تتحمل عادي عدهه

فجر...احنه البشر عجولين وانريد كلشي انحصله بسرعه
خاصه من ننظلم من واحد انريد. بين يوم وليله كون
تطلع حوبتنه ونشمت بي ونكول ظالم والله اخذ حقنه
وهالشي غلط الانسان الظالم يمر باربع مراحل
المرحله الاولى( الامهال) " ان الله يمهل ولا يهمل "
الله ينطي الظالم فرصه لعلى يتوب ويكفر عن ذنبه

المرحله الثانيه (الاستدراج) ربنا كال" سنتستدرجهم من حيث لايعلمون" مو معناته تضيق الدنيا علي لا راح يفتح الابواب بوجهه راح شيريد ينطي راح يخلي كل همه الدنيا وتشوفين كل ظالم نكول موذاك عايش ومتونس
والفقير واقع بيهه

المرحله الثالثه ( التزيين) " وزين لهم الشيطان اعمالهم"
بهاي المرحله يموت بيهه قلب الظالم بعد مايشوف غير بس نفسه وكل افعاله اليسويهه بنظره صح والناس غلط
يزود البطش مالته وتزود الاثام وهو غافل عن ذنوبه

المرحله الرابعه ( الأخذ) وهنا اكو ايه دائما اردهه واني على ثقه تامه بربي مايترك حق ولامظلوم
" لأنصرنك ولو بعد حين" وهاي اخر مرحله وهنا يكون
الحق رجعلج والله راح يضربهم ويشتت شملهم
لان مهلهم وماتابو الله روؤف بالعباد لاتفكرين بالحوبه
تبطي بس ماتخطي ....

لبابه.. دمعت عيني على كلامهه حضنتهه ياربي رغم صغر عمرهه بس احسهه بلسم واداوي الجرح
ومن هذا اليوم وفعلا صار كلما يجي على بالي سالفه
الحوبه اكول هم والله وتركت مراقبتي الهم نهائيا...

عقيق... رجعنه من الدوام واانشوف سيارات بالباب
كومه وزلم وعگل بسرعه طبينه جوه ومانعرف شكو
لبابه جانت بعدهه مجايه بس جراح موجود وياسين
وازواج عماتهم وصوت عالي وهوسه

سألت جراح شكو ووين السبع؟؟ كال مشكله جبار
مشتكي علينه عود احنه مزورين الكاع وبايكيهه منه
ومدري شلون مرتبهه وتعبنه راح بلاش وعركه بينه وبين السبع وهسه يطالب بالكاع واذا ماكو ينسجن السبع...

عقيق.. صوت عالي وقال وقيل وهوسه وكلبي
يدك سريع خاف تنعاد نفس سالفه السنين راحت
وجبار كدام الشيوخ ضرب السبع وخاف هسه يعيدهه
اجت سياره بالباب والسياره لحزب معروف ويصيحون
اليمس ابو عباس نخلي دمه بطوله

كله هذا صار بين يوم وليله البارحه ماكو شي وهسه
مااعرف الزلم والصياح منين يطلع
السبع تعارك ويه الحزب وطردهم وجبار لازمه ابنه عاصم
ويريد يهد على السبع وبنص الزلم يصيحله
بگتني ياحرامي ابن اخوي حرامي باگني حته ذهب نسوانه باگه من انه بالسجن حجي ماينلبس علي ثوب
والسبع نار ومشتعل لازمه ياسين وجراح يدفع
بي وجبار يستفز بي وهي هاي غايته ...

صاح واحد من الزلم مايصير هالحجي كلنه نعرف ابن فاضل شنو ونعرف شلون كتلته كدامنه وربك ستر
وكتبله عمر جديد وهسه عدت نفس السالفه عندك ثار
ويه ابن اخوك انت عمه المفروض سند اله موهيج...

عقيق.. كلمنه نسمعهه وكلمه لا وماادري شلون جبار متحضر وجايب كل هالزلم والسبع مايدري كلبي نار علي
لايصير عصبي ويرتفع ضغطه طبوا جوه يحجون ومانسمع شي باب الاستقبال خارجي ومن الشباك انبين
انخاف يشوفونه...

ربع ساعه واسمع صوت السبع وهو يصيح اكتلك وروح
ابوي اكتلك ودمك بركبتي اخلي من صغري لسه
باليني بلوه اكتلك واخلص الناس من شرك انفعل حيل
ركضت دنيت البرده شويه اباوع وهذوله رب جبار
حزب معروف بسوالفهم يهددون بالسبع ويكلوله
الك يومين اذا مارجعت الكاع للشيخ نحرك بيتك عليك
وتعرفنه انفذ احنه دوله ماتكدرلنه ..

حجوا هيج وراحوا وهذا الشيخ ابو علاء يريد يهدي
الوضع ويلكه حل جبار يصيح والسبع وجراح يصيحون
همزين ضرغام ماكو جان صارت اسوء طبوا جوه ويقنعون بالسبع ينطي نص الكاع لجبار يعني قسمه رضائيه مو بالقانون...

هنا ومااحس غير فجر لابسه عبايه ومصعده الشال
على وجهه وحته جفوف لابسه وكالت من وفاة
شهد لهذا اليوم الامانه كسرت ظهري واحلامي بيهه
تعاتبني ليش سكتت وماحجيت بس ماردت يجري
دم بس مدام جبار هيج لازم احجي..

كلشي ماعرفت اجر بيهه وابجي شتردين تسوين
اخذيني وياج سحبت نفسهه وطلعت اكو زلم واكفين
بباب الاستقبال وبالطارمه لان مايكفي وهي فاتت
من نصهم ومااعرف شراح تسوي

فجر.. قبل يوم جنت نايمه وفزيت على صوت الاذان
صليت الفجر ومددت لاهو حلم ولا كاعده لان ماجنت غافيه واشوف ابو السبع العمري ماشايفته اجه وعلى نفس نومتي خله ورقه بيدي وكال انطيهه للسبع
لاتخلينه وحيد انطيهه للسبع ..

انتهبت واني ارعش من شدة الاحساس العندي الله
انطاني هذا النور معناتهه راح يصير شي معناتهه
اجه دوري واحجي السر الضامته جنت كلما اريد احجي
وعبالك واحد يمنعني...

جنت على يقين تام راح تصير مشكله ومن رجعنه
وشفت الهوسه تحضرت اليوم موعدهه اليوم السبع
يعرف كل القصه السولفهه بابا وبالدليل حته جبار
ماينكر وراح احجيهه كدام شيوخ وعمام وعشيره
كامله وشيريد يصير بيه خلي يصير المهم اوكف
هذا البطش والظلم الكاع ليتامى احنه ولجراح وللسبع ولضرغام كلهه يتامى ويريد ياكل حقهم وكلما انكول
تاب يفتح دفتر جديد...

دخلت للاستقبال مجال ماكو حته وكفه كلهه زلم
عگال بصف عگال مغطيه وجهي بس عيوني طالعه
جواريب وجفوف لابسه من شافوني كلهه سكتت
والسبع وجراح كاموا يريدون يلزموني وياسين صاح
منهي انتي؟؟؟

حجيت بكسره الراء وكتله فجغ اشوف عيون السبع
شلون انفتحت بعصبيه شلون عرضه واكف بنص
ديوان وزلم كبار واحنه محد سامع صوتنه الي اسمه ابو علاء كال خير بويه طابه بنص الديوان على شنهي...

فجر.. صار 8 سنوات ضبط واني حامله امانه ثگيله
وسر جبير واليوم وهسه وبهاي جمعتكم لازم اكوله
بعدني مامكمله صاح ياسين بنتي اطلعي وانه اجي احجي وياج لاتخافين على السبع تنحل وشفت زلم جبار
شلون متحضرين وناوين على مصيبه والسبع مايطلع منهه

اكثر خطوه جريئه سويتهه بحياتي هاي رغم العواقب
الوخيمه بس جازفت وجنت متوقعه احتمال جبار يسوي مصيري مثل اختي ماردت يتستر الموضوع ردت هاي الزلم التدافع عن جبار كلهه تدري ...

اقوي بروحي اريد احجي بس صوت ضرغام اخترق مسامعي وهو يكول لاتسكتهه خلوهه تحجي والماحجت اني احجي واليرفع سلاحه من زلم جبار بطلقه كاتم امشيكم بالسره.....

.
يتبع.........

#خبايا_الاقدار
❤️♨️

... البارت السابع والسبعون


تمامًا الأمرُ أشبهُ بأنّ أحدهم أمسك قلبك كطرفِ خيطٍ فرَّ من كنزةٍ صوفيةٍ، وسـحبهُ حتّى اهترأ حتّى تقطّعت كُلّ أوصالهِ ثمَّ قال: أصبحت بشِعاً، هيا نستبدلك
......

ابو علاء... شصاير ياجماعه الخير شنهي سالفتكم حرمه
بنص الزلم وعدهه امانه وابو ليث يهدد بسلاحه
شجاكم نسيتوا الاصول لا احترام لديوان ولا للشيوخ
من دون الوادم حسكم يوميه طالع بالعشيره ..

ضرغام.. خلوهه تحجي العدهه وبعدين هي واكفه بمضيف ابن عمهه واحنه يمهه لا واحدكم يصير براسنه الطاهر العفيف واغلب الموجودين ماضيهم اسود ووجه كلامه للسبع كاله خلي تحجي..

فجر... فات ضرغام وسوالي مجال اكعد وصار بصفي السبع كدامي مصدوم بتصرفي بس عيونه مليانه ثقه وسمحلي احجي بديت بدكات كلب سريعه وكلت اني بنت علي الصغيره سنين طويله واحنه منعرف اهل بابا لان ميحجي عنهم

وبيوم الي جابنه للبصره اني جان عمري 12 سنه اصغر اخواتي وكل الي انعرفه اجينه انرضي اهل بابا ونرضي ابن عمنه اسمه السبع لان بابا تاهمي بقتل عائله اخو وبيوم الي وصلنه بابا خلال نص ساعه تخربط واخذوا للمستشفى ومات...

حته ماالتقه بالسبع جاب الطريق كله هو يكول لازم احجي وشيصير خلي يصير وبحكم عمرنه ماجنه نعرف شي ولانكدر اناقشه واحنه حته اسماء عمامنه مانعرفهم
مات بابا والي مدعي اسم شيخ ويكول عمكم وحسب مانعرف بنات الشيخ يكونن معززات مكرمات لااا احنه شغلنه خدم يطلعنه ب4 الفجر بالظلام واحنه 3 بنات اكبر وحده بينه عمرهه 17 يخلينه نشتغل حالنه حال الفلاليح الزلم وبناته معززات بالبيت وبنات اخو خدامات...

وبيوم منهن اختي الجبيره شهد اصرت اله نشرد لان مانتحمل عيشه جبار بس كلت هيج كام يريد يضربني ويصيح بس جراح وكف بوجهه السلاح بخصر جراح بسرعه خله ايده علي وكاله ديربالك تمد ايدك عليهه وصاحت الزلم لان كلهه تسمع وتصغي تريد تفهم السالفه..

اشرلي الشيخ الجبير من الناصريه كال كملي بنتي اخذت نفس واني اتذكر عزيزتي البريئه شهد شلون انذبحت كدامنه اتذكر عيونهه شلون ممليه خوف وهي تغمض وتفتح والدم يجري من نحرهه بده صوتي يرعش وبديت احجي عن كل ظلم شفته وعن كل قصه سمعتهه عن ظلم جبار

الشيخ.. انتي ضعيفه حال وحكم جبار قوي ماخفتي
من دخلتي المضيف وتحجين اريدنج اتجاوبيني قبل
لا تحجين السالفه...
فجر.. راح اجاوبك ياشيخ عن قصه عن بني اسرائيل تناقلتهه الكتب واني راح اجاوبك عن طريقهه

بيوم منهن خرج النبي موسى ع يناجي رب العالمين من كميه الظلم الي شافهه ببني اسرائيل وسأله يارب كيف يأخذ الضعيف حقه من القوي؟؟

فقال له الله اذهب الى مكان كذا لترى كيف يظهر الحق ولو بعد اعوام وكيف يأخذ ضعيف الحال حقه من القوي ؟؟ فذهب موسى الى المكان المحدد فرأى شلال يخرج من الجبل و يتحول الى نهر جاري ..

جلس موسى ينتظر وينظر كيف ياخذ الضعيف حقه من القوي وهو يتأمل ابداع الخالق فأذا بفارس يأتي راكبا حصان يريد الماء فنزل الفارس يشرب الماء ونزع حزامه وتركه على جهه شرب الفارس الماس واغتسل وركب حصانه وذهب ونسه حزامهه في هذا المكان...بعدها جاء شاب صغير يركب حمار شرب الماي واغتسل فوقعت عيناه على الحزام اخذ الشاب الحزام وفتحهه واذا يتساقط منه الذهب طمع الشاب واخذ الحزام وذهب..

وبعد ذهابه بقليل جاء رجل كبير السن عجوز فشرب الماء
واغتسل وموسى ينظر وينتظر حكمه الخالق لحظات واذا
بالفارس يقف على رأس الشيخ العجوز ويسألهه عن حزامه نكر الشيخ العجوز ولايعرف عن اي حزام يتكلم الفارس فرفع الفارس سيفه وقطع رأس الشيخ وكان موسى ينظر ويفكر ويتأمل ففزع النبي وقال يارب ان الفارس ظلم عبدك الشيخ العجوز؟؟

فقال له تعالى ياموسى.. الشيخ كان قد قتل والد الفارس
قبل عشرين سنه فغصبه حقه !! والان الفارس اخذ بحق
والده من الشيخ وهكذا يأخذ الضعيف حقهه من القوي...

هدوء تام المضيف الي بي فوك 25 رجال او اكثر وغير الواكفين بالباب ومادين روسهم يسمعوني ورغم الخوفه والارتباك العندي بحيث ايدي ترعش من احجي بس جنت اتذكر اختي شلون انذبحت واصر على كلامي

قاطعني الشيخ وهو يكول والنعم من
تربيتج والف رحمه على البطن الشالتج
والنعم من بنت عم السبع

فجر.... كملت كلامي وشلون حمونه ضرغام وجراح والسبع وشلون دافعت عنه امي الله يرحمهه جنت احبس بدموعي حته لا ابجي واني اتذكر المرار من اختي لبابا لأمي وصفيت بس اني واختي المكسوره..

واحد من الشيوخ رجال حيل جبير كال اريدن اسمع كل الحجي من بنت المرحوم مااريدن تفتح حلكك بكلمه ياجبار والجان تهددني بازلامك والوراك عيب على شواربنه ما نرد عليك ونچتلك بدارك انريد نسمع الحقيقه وين والظلم وين؟؟

رد واحد كال فوك 35 سنه على موتت اهل السبع وانتي تدرين الحقيقه چااا ليش ماحجيتي الجان تعرفيهه
فجر... ماعدنه سند غير الله والسبع واعرف اذا حجيت السبع راح ياخذ بثاره واحنه منو النه احنه كوم لحم بنات اني واختي ومرته يتيمه منو النه؟؟ كلهه تسد الباب بوجهنه واحنه عايشين بخيره وبزوده وجنت اتمنى السر يظل مضموم للموت بس هسه وبهاي الحاله ومن يجي يتعده علي وبسببه سنتين هو فاقد النظر مااسكت لو كلفني الامر روحي

جنت مفتخره حيل بنفسي واني كلما احجي اشوف نظرات الكاعدين نظرات اعجاب وواحد يهمس باذن الثاني ماعدا جبار ماباوعتله بس جان يحاول يسكتني والشيخ يصيح بي بس السبع ماباوعتله خاف يمنعني ومااكدر اخالفه...

الشيخ.. بنتي الي عليج تحجين التعرفي بس قبل لاتحجين كدام الكل هاي البت امانتي موامانه السبع ياجبار ويا ازلامه اليمسهه بشعره يحسب انچتل على ايدي وكول زلم الناصريه مايسويهه

كلهه صاحت عد عيناك شيخ احنه انريد حقيقه المرحوم ودمه مايروح الجان جبار الكتله واذا واحد ثاني بيوم منهن جان فاضل شيخ علينه وماقصر ويانه

رد واحد من طرف المضيف كال انه لسه عايش بخيره والخبزه الناكلهه من خير المرحوم بيوم اجيته وكتله ماعندي والحال ضاگ بينه ودز واحد من ازلامه وبنالي غرفتين انه واهلي وانطانه كاع صغيره وهسه انه مسويهه محل واسترزق منه يوميه حته ابني الصار وره وفاه ابو السبع من يكمل اكل يكول الفاتحه لشيخ فاضل لان يسمعنه انكول ناكل بخيره ...

فجر.. جانت كلمات المدح وهي توصف عمي المرحوم تخلي العين تدمع والسبع ساكت ضرغام بصفي حرك نفسه وادنه عليه كال احجي فضيني ...

بعد ماخلصوا من كلامهم اشرلي الشيخ احجي بديت بكامل التفاصيل انقلهه شلون حجاهن لشهد وياسين مخلي ايده على فخذ السبع حته لا ينفعل ويكوم ...

ابو شهد.. يابنتي ياشهد اذا بيوم صار عليه شي هذا السر امانه عندج من يصير الوقت المناسب وتشوفين ابن عمج بمحنه ويسأل منو قاتل ابو روحي اوكفي بوجهه وكليله عمك الشيخ جبار كتله واذا طلب منج دليل احفظي كلامي زين واكعدي احجيله لاتنسين حرف الله يحاسبج لان دم عائله لسه بالكاع

بيوم التهموني بقتل اخوي عضيدي الزود وانه ربيت بيده
بفضله درست ووصلت وبفضله حماني من العشيره الرادت تكتلني اخوي الجنت اخذ الشور منه مومن ابوي وابوي الشيخ الجان مايطب مضيف اذا مافاضل وياه

حبسوني بغرفه بالبستان طين لان تهموني انه القاتل واجت زينب مرت اخوي جانت هستوهه متزوجه وحامل وفتحت الي الباب وطلعتني وكالتلي اشرد جبار ذابهه براسك وشردت وره شهر وماكدرت اظل ودم اخوي وعائلته بالكاع رديت برجليه للقصر وبيومهه ظليت بالبستان اريد اشوف الوضع شلونه

صار الليل وبيت اخوي المرحوم هيكل جان يبني بي وانه
اتختل بين الشجر وبنص الليل واسمع رجلين زلم تفتر بالبستان وصوت الحيوانات وانه اضم بروحي لا احد يشوفني جاي انه اريد اعرف الحقيقه وربج مايعوف دم مسلم سال وانهدر ومايظهر حقه

شفتهم على ضوه الگمر طبوا بيت اخوي الهيكل وانه طلعت صرت من وره البيت جانو 5 ازلام اعرفهم حق المعرفه اخوي جبار ورجل اختي نوفه اسمه عبيد واسعود جان بعده مراهق واثنين من ازلام القصر من حمايه الشيخ وجانو يحجون بطاري يدورون عليه حته يكتلوني ويكولون اخذنه بثاره

سمعت سمع اذني عبيد يكول لجبار احنه تورطنه انت ماكلت هيج كلت اكو واحد يشيل الجريمه وينه الواحد ذبيتهه براس اخوك وهالشرد جيبلك واحد يكول انه كتلت وبگت الفلوس وخلصنه

جبار.. اسكت يعبيد انه اعرف شغلي ابوي مصدك علي هو الچتل فاضل وعلي بعد مايرجع يخاف دمه مهدور وانه
وصلتله خبر اذا اجه ينكتل واخوي واعرفه جبان ومايجي
هسه السالفه تنطم هنا كتلنه فاضل وعائلته وبعد ماله حصه لا بالورث ولا بالشيخ هسه ابوي يموت من قهره على فاضل ويصير شيخكم جبار وكل واحد بيكم يوصله المقسوم

عبيد.. شحصلنه انطينه الحصه التفقنه عليهه وين الكاع
وين الفلوس فاضل عنده املاك اخذتهه كلهه انت احنه
اتفقنه نچتله والفلوس بالنص
جبار.. بس خلي يموت ابوي والحصه تجيكم واخذوهه
من هالشارب هسه مااكدر احجي لان ابوي يشك هسه
انطيكم التطلبوا والباقي وره موتت ابوي

فجر.. هذا كل الحجي بابا سامع الحجي وكال راح يطلبون دليل كليلهم دليلهم العباس ياخذون عبيد للعباس ع ويحلفوا هناك والعباس ينطيهم الحقيقه كال لا ياخذون جبار لان جبار ظالم ويحلف عادي عنده وكال الحقيقه تاخذوهه من عبيد

من ضمن الموجودين عبيد كمز من مكانه ويكلهم جذب
هاي تجذب علي يجذب شلون اكتل خال ولدي
وجبار يصيح جذب واسعود ماموجود من سالفه عقيق الخطف السبع كاله وين مااشوفك اكتلك وبعد ماشوفنه وجهه

انگلب المضيف بس صياح والسبع على كعدته من جنت احجي لزموا كتف السبع حته لاينفعل بس شفنه عكس التوقع كاعد والمضيف وحده اشتعل نفسهه الزلم الجابهه جبار حته يهدون على السبع انگلبوا ضده ...

ابو علاء..مرحبا عليكم ياجماعه هسه الحقيقه انكالت وبدون دليل ودليلنه ابو فاضل هسه نتوجه لكربلاء واذا انت عبيدبريء احلف بالعباس وروح وهاي السالفه تندفن هنا ولاسمعنه ولاشفنه واحنه نتكفل السبع مايمسك بسوء ..

طلعت هاي الزلم كلهه من المضيف واني ركضت ليجوه
وجهي عركان كلبي ماطور عقيق تبجي تريد تعرف شكو
طب السبع اخذ محفظته وطلع كال رايح لكربلاء وضرغام وياه لاتخافون ...

اجت ام جراح يمنه وادك على خدودهه شلون طبيتي وكدام المضيف حجيتي شلون هيج وظلت تلوم بيه بس جنت اسمع صوت واحد وهو صوت ضميري مرتاح عقيق قلقه على السبع حته من يتصل مايرد وبعدين طلع ناسي تليفونه ظلينه لليل واحنه قلقين وكل وحده بينه دمعتهه بعينهه انخاف السبع يسويهه ويكتل جبار...

عقيق... صارت ب1 بليل نسمع الباب انفتح ركضنه كلنه ام جراح ماعافتنه طبوا ضرغام والسبع تعبان جبتله مي وام جراح تتوسل بيهم يحجون ...

السبع.. شنحجي جنت اقنع بنفسي واكول خلي يطلع
واحد غريب ولا عمي اخو ابوي حته مرات اسد عيوني واذاني عن لا اشوف ولا اسمع الحقيقه بس هاهي الله راد يظهر الحق

ام جراح.. حلف؟؟
السبع..بالاول كال احلف بس من وصلنه حاجينه واحد من اليشتغلون بالامام سوالنه مجال وطبينه وياه كاله ابو علاء شيل ايدك على العباس واحلف انت لامشارك ولاسمعت ولا شفت بس شال ايده ظلت ترجف يريد يحجي مايكدر وطلع يركض مفزوع ويصيح احنه كتلناه ...

شكد جانو يحجولي عن شارة العباس ويكولون اليريد يحلف بي جذب يشوفه كدامه وينفزع وهذا الشفته بعبيد عبالك شافيوم القيامه عيونه تريد توكع من محاجرهه ويركض مثل الخبل والناس تباوعله ...

بس اسعود حلف شال ايده هو وجبار وحلفوا مامشاركين ولايدرون يعني حلفوا بالعباس وطلعوا حته يضحكون كل
رهبه ماعدهم كولت الشيخ يكول هو الظالم مايخاف من الله يخاف من عبده ...

ام جراح.. وشراح تسوي بسلا تكتل ياالسبع امشيه عليك
العباس ابو فاضل تعوف ثارك. منو النه حته ابني مو سند الي انه امك الربيت على ايدي لخاطري يوليدي لا تفجعني بفراكك

ضرغام.. ماياخذ بثار اكو دوله واكو قانون راح نشتكي وعبيد يروح يعترف وكل واحد ياخذ جزاته لاحزب جبار ولا بطيخ الدعوه والشكوه ماتصير هنا نشتكي ببغداد احنه غركانين بعد مانخاف

ام جراح.. ماشفت حزبه شلون يهدد؟؟
ضرغام.. مالكم علاقه خلوهم عليه هذوله ينرادلهم جره زينه حزبيش وهم وين الزايعته الكاع يصفك وره خروفه
السبع اذا سويت شي وروح ابني مااعرفك ولاتعرفني بعد

السبع.. فجر ليش ساكته اذا تدرين ماالومج بس السويتي اليوم مااعرف اكوم ابوسج من راسج لو اكعد اعاتبج ليش ماحجيتي
فجر.. علمودك مااريد مشاكل ودم سامحني ضميت عليك

السبع... وانت ضرغام كلت انت تحجي اذا ماحجت
فجر يعني انت تدري؟؟
ضرغام.. من تخربط ابو شهد واخذته للمستشفى هناك
كالي بس ماحجه هواي بس كال جبار القاتل وهو جان حيل متخربط وكتله مو وقته وراهه مات بس جنت ادري سمعت من ابو شهد

السبع.. وانتي عقيق هم تدرين؟؟ طلعت كلهه تدري
وانه اخر واحد يدري بثاره
عقيق.. منين ادري همزين ماادري لان اجي اكلك
مااسكت. بس احسن ماحجوا حته ماتقتله احنه وين انروح اذا صار بيك شي ...

عقيق.. جان تعبان حيل كام ضرغام وام جراح واحنه
رحنه لغرفتنه ماله طاقه يحجي بس خله راسه
على رجلي واني افرك بگصته وغفه من التعب...

ثاني يوم الكل ساكت وانحاول مانفتح الموضوع بس التليفونات ادك على السبع وياسين كلساع يجي
صادفت جمعه وكاعدين على الغده ودك تليفون السبع
انسمعه يكول كله لا ماعدنه مره للزواج

من سده كال بدت رحمه الله من الشيوخ الكاعدين انعجب بلسان فجر وخطبهه ضحكت فجر وكالتله منا وجاي احجز مواعيد كلساع واحد يخابرك غير هو اني وانعجبت بروحي...

فجر... مدده بفراشي ولبابه تقره ودك تليفوني رساله
فتحتهه رقم دولي ومكتوب سباعيه من يومج ووكحه
وعرمه ومحد يكدرلج وفوك كل هذا اذا طبيتي للگلب
مااطلعين منه دبدوبه شلونج ادري راح تحجين عليه بس
السويته علمودج ...

اقره برساله واعيب بحلكي ابد ماتفاجأت برسالته لان
جان عندي احساس على اي لحظه يراسل قريتهه
مرتين وكتبتله منو حضرتك؟؟ لان هواي كالولي هذا
الكلام هسه اني منين راح اعرفك منو انته؟؟

شويه ورد مو اكلج عرمه على اساس ماعرفتيني؟؟
ولاتجذبين متابعج اكثر من مامتابع صحتي واعرفج
فارغه كلشي ماعندج لاتبيعين ثگل عليه

فجر.. انت منو؟؟
... اواب
فجر... ايباااااه شنو هاي شذكرك بيه حته شكلك
نسيته كلي بعدك نفس شكلك لو صرت روسي
اواب... احبج

فجر..والله مستخف ابن الشيخ وين الدشداشه
وين العرض التحجي عنه يله عمي معذور بس هاي
رسالتك راح اشوفهه للسبع ولابوك حته يذكروك
باصلك

دزيتهه وانتظر ومارد سديت التليفون اي شعور ماعندي
حسيت نفسي حاقده علي ولازم انطي المقسوم
حاجيت كلبي من رخصتك نسحب منك القياده ونسلمهه
للعقل بين مانأدب الدكتور ...

لبابه... كلما اسمع صوته بالبيت لو يجي على السبع
ادخل الغرفه ابد ماشفته مروه نهائي مالهه حته ام جراح
دكول ملتهيه بجهالهه وبطلبات جراح يمكن بديت اتعود رغم الحزن رغم الكسره بس نفسي الهه حق عليه...

رجعت خبر بيد السبع رفضت دكتور اسامه مااكدر اعالج
الخطأ بخطأ ثاني وره اسبوع جنت كاعده بالقاعه واجت
صديقتي كالت دكتور اسامه يريدج كمت اريد اشوفه شيريد دخلت لغرفته جان مدنك يكتب اشرلي اكعد

لبابه.. داز عليه دكتور؟؟
اسامه.. بغض النظر عن الصار وتقدملج لان شفت انسانه مناسبه الي انسي هالموضوع وناقشيني دكتورج لا اكثر حاب اساعدج اذا انتي عندج رغبه
لبابه.. بشنو؟؟

اسامه.. بحثكم اول مره يبحثون عنه واكيد هالشي مثل اي دفعه سابقه العماده تتكلف بنشره بمجلات علميه هالموضوع تبنته العماده وراح تحصلون على درجه عاليه علي وقارنت درجاتج وتقديراتج مال السنوات السابقه طالبه ناجحه واريد اطرح عليج موضوعو الدراسات اذا حابه تكملين

لبابه.. قصدك ماستر ادرس بس بي منافسه واخاف مااكدر وشويه دكتور نفسيا تعبانه اني يعني هاي السنه حته ماركزت بدراستي اعذرني على كلامي

اسامه.. ماكو واحد بينه مرتاح كل انسان همه لون بس اني حاب اساعدج من باب الانسانيه لا اكثر لاتعبري استغلال الموضوع انسد انتهه بس قبل لا اتقدملج جان هذا الموضوع ابالي وقبلج هواي طلاب ساعدت بحكم اختي دكتوره بالتنافسي وحجيتلهه عنج وكالت شجعهه تكمل

لبابه.. يقبلوني؟
اسامه.. معدلج ينقبل اكيد بس يبقه اصرارج وعزيمتج
ماظل شي على الامتحانات مالتج اذا حابه ادرسين
لازم تقرين من هسه لان وره اسبوع من امتحاناتكم
يبدي التقديم ولازم انتي متهيئه حته هم من يمي اسرع
نتيجتج اريد جواب اكيد

وخليني اكون صريح وياج كل سنه اختار طالب اوطالبه متوفقه اساعدهه وكل تكاليف الدراسه اتحملهه اني اومرات اختي نعتبره زكاة العلم والمكان الوصلنه اله بفضل الله

لبابه... تسلم دكتور اذا اقدم مااحتاج اي تكاليف بس محتاجه دعم معنوي لا اكثر لان نفسيا ماثره على دراستي وان شاء الله باجر ارجعلك الجواب...

طلعت من يمه والموضوع حيل عجبني وارتاحيت اله
رجعت سولفت للسبع كال اتوكلي دكتور اسامه خوش انسان واني وياج لاتخافين بسرعه اتخذت قرار ورجعت خبر لاسامه ثاني يوم وبديت ادرس للتنافسي ولدراستي كل وقتي صار دراسه حته ماالحك اسمع قال وقيل ....

رانيا.. شدكول بيه ولد لو بنيه
ضرغام.. كلشي الجان اليجي من الله هله بي
رانيا.. شنسمي اذا ولد
ضرغام.. ليث
رانيا.. واذا بنيه
ضرغام.. انتي اختاريهه خاف اسميهه ودكولين
ليش خاف حبيبتك السابقه

رانيا.. شخبار اقبال
ضرغام.. لو ادري محاجي شراح يسكتج
رانيا.. احجي واشرتله بالسجينه جنت اسوي زلاطه
وهو كاعد
ضرغام.... *
رانيا.. صوتك لحد يسمعك شلون اللسان منحرف

ضرغام.. سمعت مشتكيه على بيت عمهه وساجنيهم
وماخذين تعهد عليهم وتتواصل ويه الضابط دكول زينه
هسه صارت احسن من قبل
رانيا.. الله يوفقهه بحياتهه ويعوضهه

ضرغام.. اني مااتعوض
رانيا.. حيل شايف نفسك
ضرغام.. ليش مااشوف نفسي كلشي عندي الحمدلله
رانيا.. باوعتله صفح ودرت وجهي
ضرغام... ماتعوفين لبيدج وتجين اسلم على ابني
رانيا..الطبيبه كالت 9 اشهر ممنوع ممنوع رحمي تعبان
ضرغام.. شفمهمه الطبيبه تعاي بويه بس انسلم

رانيا.. والله مامستعده اخسر طفلي اكعد راحه
كام واجه بصفي وباسني من وره اذني وكال طفلج
طفلي قابل مااريده بس عاد لاتصيرين حقيره على الاقل
تصبيره

رانيا.. ضرغام لايجون الجهال والله اخاف يصير شي
اتحمل بعد 4 اشهر
ضرغام.. يله اشوفلي وحده بهاي ال4 تعذريني
مااجذب عليج
رانيا.. سويهه وشوف شسوي

دنگ على رگبتي يبوس بيهه مااتحمل قربه واخاف
على طفلي حته ايدي ماتساعدني وادفعه بادلته البوسه
واحنه ناخذ نفس الهوه ابتعد هو من ذاته وحضني
وكال نصبر وانشوف...

عقيق... ضرغام يركض بالدعوه وجبار يوميه داز تهديد
علينه بس جراح هو يطلع للحزب حته مره رفع اسلاح
بوجهم وخابر على المركز وشردوا قلق هاي الايام ولا انساه اذا طلع للباب السبع اركض وراه خاف يسوي شي..

بيوم منهن رجعت من الدوام لكيت ام جراح يمنه كعدنه
يمهه انسولف كالت فدوه لأسمه ابو فاضل ماقصر اسعود محد يعرف شبي متخبل يكلهم افتح المي اشوفه دم
لو يكلهم واحد يركض وراي لو يفز يحجي ويه روحه ويوميه ماخذي لمكان وهسه يكلك مخبل من راجع من كربلاء لسه بينت شارة العباس وحته يأذي اهله وحابسي
بغرفه ومايعرف حته اهله كايليلهم هذا مشور بي..

ظلت يمنه لليل واجه جراح اخذهه من يجي يتلفت
بس يريد يلمح لبابه ومايشوفهه عينه على باب
الغرفه شوكت تطلع بس ابد ماطلعت ..

مشت الدعوه وراح عبيد اعترف بكلشي واخذوا جبار
وعبيد وهناك معترفين بكلشي هم وازلامهم واسعود مخبل رابطي بحبل وحته كايم يفتر بالشارع حافي
ويرفع ملابسه كدام الناس وكل عرفت من وره حلفانه الجذب

بعدنه ننتظر الحكم مال جبار وهالمره كلهه ويه السبع
وكلما يكول اكتله ضرغام يوكف بوجهه ويبطل
يكول نار بكلبي وماتهدأ حته وضعه الصحي موتمام دائما ضغطه مرتفع ويقهر بروحه...

طلعت من الدوام اني وفجر جان اخر امتحان عدنا واحس نفسي ارتاحيت بعد ايام متواصله من التعب والسهر بقت بس النتيجه اني متاكده من نفسي مجاوبه بس وعدي لجمره يخليني اقلق وافكر لازم انجح وارفع راسه فززتني فجر وهيه تسحب الكتاب من ايدي

فجر... عقيق تشمين ريحه الدجاج الشوي؟
عقيق... لا وين شميتي
فجر... دومج مطفيه موهسه مرينه على مطعم

عقيق... وانتي مثل البزون تشمشمين هسه بس نوصل للبيت اخابر السبع يجيبلج.بس لاتفضحينه واني اشوفج صافنه عبالي تفكرين بأجوبتج طلعتي مركزه وي ريحه الدجاج

وصلنه للبيت سياره السبع موجوده بلباب مو من عوايده يتواجد بلبيت بهيج وقت طبينه للبيت بعدني بلطرمه كرصتني فجر من ايدي

فجر....كوليله انتي تردين موتكولين فجر والله ازعل عليج
عقيق....هاي انتي لسه بالج يم الدجاج
فجر...اي غير،جوعانه

عقيق....لبابه بعدها بلدوام فتحت باب الغرفه وطبيت لكيت السبع فاتح القاصه مالته وبيده اوراق من شافني رجعهن لمكانهن واجه بتجاهي

السبع...هااا بويه اجيتن.؟
عقيق....اي كملنه امتحان من وقت اليوم
السبع...وشلونج؟
عقيق...جمره خايفه

السبع...وليش الخوف يانسمتي وتقرب،لمني لحضنه
عقيق...والله درست وجاوبت بس اخاف ماانجح الدكتور صعب حيل
السبع...كولي يالله وان شاء الله من الاوئل ومدام كملتي امتحانات صار وقت تسوين العمليه

عقيق....تحجي صدك؟
السبع...مجذب عليج بيوم
عقيق..لا موقصدي بس تفاجأت
السبع.لا على بالي بس جنت منتضرج تكملين امتحانات
خلي اروح اصلي

عقيق....حجاها وطلع ركضت وراه صحت جمره
التفت عليه كتله جيبلنه من المطعم مابيه حيل اسوي غده تعبانه
السبع... خلي اصلي واروح هستوني اجيت
عقيق...خلي اسال فجر شنو مشتهيه للغده وصحت لفجر اجت تمشي خطوه وترجع خطوتين ليوره مبينه سمعتني

عقيق،... السبع راح يجيبلنه غده شنو تردين يجيبلنه حجيتها وشبح ابتسامه مرسوم على وجهي
فجر..ماعرف بكيفكم شتجيبون اكل وياكم
السبع...راح اجيب سمج من راس الشارع

عقيق..لا لاجمره والله تجذب من اجينه بطريق اشتهت دجاج شوي وضلت تشمشم بريحه
السبع...ابتسم وكال تدلل اصلي واروح
عقيق...اباوع لوجه فجر كام مايتفسر ستوها تريد تحجي وتبرر جمره عافنه وطلع وما حس غير تهجم عليه من شعري

فجر....اني شكتلج مو صيتج ياام نص السان ماتستحين توبه اذا اكلج على شي خبيثه

عقيق....واني ماجذبت موانتي شتهيتي دجاج احجي وياها ولزمتها من بديها وبايدي،الثانيه لزمتها من اذانها وهيه لزمتني من كصيبتي وعاضتني من ايدي كتلها هديني،واهدج عضتني حيل من زندي عطت بصوت عالي ضربتها برجلي، ابطنها بعدنه متكامشين طبت لبابه من شافتنه اجت تركض

لبابه....صدك ماتستحن كل وحده شكبرها وتتعاركن مثل الجهال يمته تعقلن بس فهمني خلي يجي السبع اله اكله
يشوفلجن حل صوتجن للشارع
فجر.. كليله وشوفي شسوي بعقيق اوكفيلي هين عبالج
اعوفج عقيق انعاااااله

عقيق.. عيبت عليهه ورحت غسلت وهي تصيح انعال
ابو الاصبع تسمع وتسكت تغلسين ام كفشه البرتقالي
خلي تنام لبابه وشوفي شسوي بيج تفشليني كدامه
هسه يكول ام بطن...

اخاف اجاوبهه بس رحت صليت بين مااجه كعدنه تغدينه
وكلما ارفع راسي تخزرني ولبابه تكرصهه تريدهه
تسكت ردت اجمع المواعين لبابه ماقبلت كالت عوفيهن
رحت للغرفه مددت بحضنه وانسولف على العمليه
ماانكر خوفي بوقتهه

مر اسبوع والبيت هدوء، السبع بده يحضر،للعمليه مالتي بيومها طلعنه من الصبح لبغداد بس اني وياه اول شي رحنه على بيت ضرغام لكيت رانيا مجهزه الغده تغدينه يمهم للعصر،ورحنه على دكتور مالتي نفس كلامه غير،العمليه ماتفيديني طلعنه من يمه وثاني يوم لازم نسافر للهند بذاك اليوم مانمت امثل اني نايمه على كد ماخايفه القلق والتفكير، بلعمليه اكلني

مارحنه لشقه بعد الصار،كرهتها وماحب اطبها فرشتلنه رانيا بلغرفه مددت بفراشي وماعرف شنو شعوري صاحولي للعشه سويت نفسي نايمه ماريد اي شي اريد ابقه وحدي السبع عاف العشه واجه يم راسي

باسني من شعري وكال مانايمه لاتجذبين عليه
وادري بيج خايفه انه مااجازف بيج اذا ماكلهه
كالت ناجحه العمليه نسبه نجاحها زينه وانه وياج واريدج تبقين قويه وابتسامتج متفارك وجهج من اشوفج ضايجه اني اضوج

عقيق....رفع راسي وباوعت بعيونه وعيونه مليانه دموع كتله جمره تحبني.؟
السبع....هااا بيها الخير،اذا هذه المگدر خاطرج بويه وعلي احبج بس لاتبجين ورفع ايده مسح دموعي بطرف ابهامه

وكال كومي نطلع نتعشه بره بدلت وطلعنه شويه
بس اتعشينه ورجعنه بسرعه نمت اريد اشرد من التفكير
والقلق كعدنه من الصبح وصلنه ضرغام للمطار بعد ما ودعناهم صعدنه بلطياره وبده العد التنازلي عندي اجذب اذا اكول ما خايفه

تذكرت بابا وشلون جانت امنيته اسوي العمليه واعيش طبيعي حالي حال الناس جمره ماترك ايدي ولا لحظه حس بيه خايفه ماعرف شلون وصلنه ماتذكر تفاصيل الرحله لان جان عقلي مشوش وخايفه اول ماوصلنه حجزنه بلفندق بعد تعب الطريق والقلق نمت حسيت على عطر السبع قريب مني وايده تغلغلت بشعري فتحت عيوني باوعتله صافن عليه

السبع..شلونه الحلو اليوم
عقيق...الحمد الله بوجودك اصير،زينه
جمره... يلا كومي ورانه كومه ولازم تكونين جاهزه
عقيق...كمت بسرعه غسلت وجهزت نفسي نزلنه جوه بلمطعم تريكنه وطلعنه للمستشفى جان اكو مترجم ويانه احاول اكون طبيعيه ماريد السبع يضل باله يمي شافني الدكتور،وسوالي تحاليل كامله حدد موعد العمليه

والخوف بده يسيطر،عليه شعور كلش صعب تنحط بهيج موقف عمليه القلب من العمليات الكبرى تذكرت بابا شلون جابني للبصره حتى يعالجني وبتالي فارقتنه المنيه و عافني بقيت وحيده ورب العالمين حط السبع بطريقي،وماعافني،وحدي وهنا وكلت امري الى الله مستحيل يعوفني،بهيج ازمه مثل مسهلي،وجود السبع بحياتي متاكده راح يسهل العمليه عليه توضيت وصليت وكعدت اقره قران وي كل كلمه انطقها تنزل دموعي بعجز وقله حيله بيومها وكلت امري لرب العباد ونمت بدون تفكير

السبع جان حاضر وياي بروحه وجسده ثاني يوم توجهنه للمستشفى وهنا القلق بين على السبع اكثر،مني وحتى ضغطه ارتفع جهزوني لغرفه العمليات وهو ماترك القران يرتل ايات يم راسي وصوته يبعث الراحه والسكينه الروحي بقيت اسمع لصوته وعينه بعيني ماعرف شكد مر من الوقت وشنو صار بس جنت افكر اكدر ارجع واسمع صوته مره ثانيه واشوف عيونه المليانه حب لو لمسته ايده الكلها طمأنينه وامان الي جانت هذه الاساله ادور براسي فقط لان ماعندي شي،اغلى منه

صاحوا اسمي واخذوني وعيني علي عيوني غوشت
من الدموع واني كلما ابتعد كلما صورته تتلاشى كدامي
دخلت وماادري اطلع سالمه لو اطلع بنفس الحاله لو
تزود سوء حالتي بس عيون السبع وصوته باذاني
وهو يكول لخاطري صيري قويه....

.
يتبع........

#خبايا_الاقدار
❤️♨️♨️

... البارت الثامن والسبعون


وانته وحـْدك َ
لا شمع
لايـْاس
لاعگدة ظفيره
ولا حلم يچـويك وتغني اعله هونك َ.!
.......

لبابه...خابرنه السبع من الصبح كال دخلوها للعمليه وهسه صار الضهر وماكو خبر كل منخابره يكول بعدها هواي تاخرت فجر جانت كاعده يمي وتقره قران بالنه يمها سالتها فجر هم تحسين شي العمليه تنجح؟؟؟

فجر....ماعرف ماحس،بشي بس عقيق خطيه شلون تتحمل والسبع هسه شحاله عليها
لبابه....عقيق قويه وان شاء الله تنجح وترجع تمشي على طولها بعدنه نحجي دك مبايلي رانيا تتصل فتحت خط وكتلهه هااا بشري ماكو خبر

رانيا...ولج ناجحه ناجحه وصاحت بصوت مملي فرحه وهسه بلانعاش السبع خابر ضرغام وحجاله
لبابه....الحمد الله وشكر ولج فجر ناجحه العمليه ناجحه احجي وي فجر ونكمز بنص الهول ونسيت رانيا على خط لحد مافصلته بوقتها فرحتنه ماتنوصف صار شكد مفرحانه بس بعمليه عقيق احس الدنيا ضحكت النه لان عقيق نقيه طيبه تستاهل كل خير

فجر جانت ناذره تصلي 20 ركعه شكر لله واني نذرت
اصوم ثاني يوم لوجه الله مجرد مااتخيل لاسامح الله
صاير بيهه شي انهار اختنه تعتبر وربت بيناتنه ومايوم اذتنه ولا سمعتنه كلمه موحلوه...

من راح السبع اجت ام اواب يمنه هي والحجيه ام ياسين
شكد حاولو انروح ابيتهم وفجر ماقبلت وبالاخير هن اجن
يجي الشيخ ياسين يمر يشوف شمحتاجين ويروح ومخلي واحد من رجاله بالباب ام جراح ماكدرت تجي لان مروه وحدهه بالبيت وجراح صاير دوامه خفر ...

اني مركزه على التنافسي طلبت من ام اواب تخابر الشيخ
حته اروح للجامعه اسأل عن التقديم ومحتاجه كتاب للامتحان بدلت واباوع لنفسي حيل ضعفانه النور طافي بوجهي كل ملامحي باهته رغم التعويد واحمد الله على كلشي بس تبقه الكسره البكلبي محد يشوفهه بس احساسهه ماينجرع

وصلت للجامعه مابيهه طلاب بس الجايين يقدمون
والي عنده تأييد دخلت لقسمي شفت طلاب وياي هم مقدمين والي من غير دفعات سألت طالبه عن كتاب كالت مموجود الكتاب وصار هواي ادور علي بس يكولون موجود عند دكتور اسامه هسه يجي وانشوفه

مرت ساعه يله اجه انسان بسيط حيل كل الطلاب تحبه وكف وياهم يحجي واحنه من بعيد التفت شافني ابتسم وكمل كلامه ويه الطلاب وصعد لغرفته واني والبنيه صعدنه انريد الكتاب جان بعده ماداخل الغرفه صاحت البنيه دكتور دكتور التفت علينه وكال نعم...

حجيت اني دكتور محتاجين الكتاب وماظل وقت على الامتحانات وعدنه نقص بالمعلومات هز راسه وكال هسه
اشوفه الكم بالمكتبه انتظروني هنا...

كعدت واني صافنه على حالي يمكن الله دزه هديه اليه يساعدني اخذت نفس وانقبض صدري واتذكرت جرحي
شلون اتقبل غير شخص اتمنى ادوس على كلبي واصير
قويه واكمل حياتي واكون اسره مثل مامشت حياته
بس شلون بكلبي الضعيف ...

كمل شغله وطلع فززني صوته وهو يكول لبابه وين صافنه باوعت البنيه رايحه واني صافنه تاخذني وصفنه ترجعني وملامح الحزن مرسومه على وجهي كمت كتله العفو دكتور مامنتبهه

اسامه.. الظاهر حزنج قوي وتفكيرج عميق بحيث
انرسمت على ملامحج كل افكارج ساعه تعقدين
حواجبج ساعه تصكين على اسنانج

لبابه.. العفو ممنتبهه كمنه نمشي لجهه المكتبه ويسولف
اسامه.. انتي ببدايه طريق طويل وهذا الطريق جدا صعب
مو كدراسه لاصعب كشعور عندج لان وضعج مومثل بقيه
الطلاب راح بكل عثره ترجعين لنفس المحطه وتلومين نفسج وهالشي راح يأثر على مستقبلج اذا ناويه تكملين وتعتمدين على نفسج خليج قويه

لبابه.. دكتور الهموم من تتراكم تخلي الانسان مايحس بطعم اي انجاز يسوي ولايفرح حته بنجاحه
اسامه.. حقج وسابقا كتلج ماكو انسان مرتاح كل واحد همه لون لادكولين هنيال فلان وفلانه لان هم تلكين بيهه نقص كل واحد عنده شي وناقصه شي انتي العليج تكولين اني احسن من غيري ...

اضربلج مثال راح تتعرفين على اختي بيوم الامتحان ان شاء الله ومتأكد من راح تشوفيهه راح تقررين حياة ثانيه
الكلام الراح احجي اعتبري دعم الج مااحب الانسان الضعيف نهائي وخاصه اذا كانت من جنس حواء الله فضلكم بهواي علينه وانطاكم قوه صبر وتحمل معناتهه لازم تكونين قويه...

لبابه.. شبيهه الدكتوره موهي نفسهه الدكتوره عُلا
اسامه.. اي نفسهه انه ابوي متزوج اثنين وعلا من مرته الثانيه بس هاي حصلهه وماتت امهه وابوي رجال مستبد تعارك ويه خوالهه وعاف بنته تربت بعيد عنه لحدماصارت بالاعداديه جابهه يمنه مااعرف شلون احجيلج عنهه بس جان يعاملهه غير معامله حته مايسمحلهه تكعد تاكل ويانه وجان يهدده بس ترسب تبطل ...

احنه اخوتهه ندعمهه ومانتعارك واندافع الهه مع العلم عدنه 4 اخوات من امنه بس علا جانت المظلومه الوحيده اخواتي من امي موفريلهن اخر دلال والحجي مفضلهن على الولد وولاوحده توفقت بالدراسه بس علا كل سنه يدزون على ابوي يشكروا ويكرموهه وكل هذا ومايوم رفع من معنوياتهه

جبرهه على الزواج من ابن خالي كلنه بوقتهه اعترضنه وماعبرنه كال اتبره منكم وماتكسرون حجايتي وزوجهه
وهي بالمرحله الرابعه وجنه نتوسل بابن خالي بس يخلي تكمل وبطلهه لان ماخذ الحجي من ابوي وكايله بطلهه من الدراسه وهي مرحله رابعه هندسه

سنه وحده ظلت ويه ابن خالي وخانهه وياريت خيانه بالمعقول لا طعنتين تزوج عليهه وبغرفتهه نقل غراضهه بالمخزن وسواهه خدامه لمرته وكام اتزوج الثالثه وهي محبوسه بغرفه مخزن قديم عدهم وجانت ماتحجيلنه تخاف من ابوي لحدمايوم اجت سولفت لاخوي الجبير وهنا طلكناهه وعلى اثرهه انجلط الحجي لان صارت مشاكل...

اني ممتزوج الوحيد باخواني كالت امي اخذهه واطلع واخذتهه واجرت بيت وحدنه ورجعتهه لدراستهه رغم شكد جانت حزينه جنت من اجي اكلهه لاتهتمين تضحك بوجهي ودكول انت لاتفكر بيه اصلا اني جوهره والله خلصني منه المهم نجحت الاولى على دفعتهه مباشرة درست ماستر وراهه دكتوراه بحيث ماانطت مجاا لنفسهه ...

كامت تجيهه بعثات لمصر وللاردن واني داعم الهه وموبس اني اخواني كلهم يكولون نمشي راسنه مرفوع بيهه صعدت لاعلى مرحله ومن ترقيه الى ترقيه لحدماعينوهه رئيسه قسم ومااكتفت كل دوله بيهه مهرجان تشارك واسمهه صار لامع بين كل جيلهه ...

اكو بنات من اقربائنه جانن يضحكن عليهه لان تزوج عليهه رجلهه وماصار عدهه اطفال وهسه يتحسرن على الحياه العايشتهه حره طليقه الكل يمدح بيهه بس رفضت الزواج وبالاحرى كرهت جنس ادم بسبب ابوي والمعامله الشافتهه منه ومن رجلهه ...

لبابه.. وصلنه للمكتبه واني اسمعله احس كلامه موطاقه ايجابيه لاااا كانو باب وانفتح بداخلي وبعث نور بسرعه
اجه ابالي ياريت اصير مثلهه بسرعه كتله خلي اشوفهه
كون اصير مثلهه.

ابتسم ومد ايده كدامي كال تفضلي خلي انطيج الكتاب واخذج الهه موجوده هسه استلمنه الكتاب وكل اليشوفه يباوعلنه انتبهت على نفسي شجاي اسوي امشي وياه بنص الكليه وانسولف اني رفضته ليش سامحتله يحجي ؟؟ هذا السؤال الوحيد الي مالگيتله جواب ...

اخذني لقسمهه دخلنه غرفتهه كامت بابتسامه متوسطه العمر تقريبا نهايه ال30 راقيه راقيه حيل لابسه تنوره سوده وستره جوزي وابتسامتهه حلوه ومبينه انيقه كامت كالتله خاف غلطان بالطريق دكتور اسامه جايني برجليه

ضحك وكالهه لامواني طالبتي رادت تتعرف عليج وانتي مسوؤله عن التنافسي اريدج تهتمين بيهه خوافه شويه
ابتسمت وسلمت عليه تأقلمت بسرعه كعدت تسولف وتشرحلي عن الامتحان واناقش ومنطلقه موهاي لبابه التتختل وره حزنهه

انطتني رقمهه خاف احتاج شي وطلعت من يمهه خابرت الخط واسامه ظل يمهه امشي مبتسمه وحدي شعور حلو من يكون عندك طموح من اني كاعده يمهه شكد يجون كبار اساتذه وهي بلقبهه العلمي اعلى منهم عجبتني شخصيتهه حيل وقصتهه ادل على قوتهه موكل انخانت اندثرت ولا كل التطلك مالهه حق تمارس حياتهه ....

عقيق....فتحت عيوني واحس راسي ثكيل وكوه اجر النفس باوعت بس الاجهزه وصوتهه اليوتر كدامي شاشه سوده ماادري صارلي شكد بس كمت اصيح جمره محد يرد عليه مااكدر اتحرك اخاف ماعندي الم بس راسي من البنج ...

اجت ممرضه هنديه تحجي ويه دكتور واني بس صافنه
طلع الطبيب واجن اثنين غيرن ملابسي ولبسني احزام للصدر ونقلني على غير سرير واخذني لغير غرفه ربع ساعه وينفتح الباب واشوف السبع كدامي

رغم الثقل البراسي شهكت من شفته وصار عندي الم
بصدري بسرعه اجه عليه باسني هواي متفرق من راسي
وجهي وهو يكلي الحمدلله يارب الحمدلله عدت عقيقتي
شتحسين الحمدلله على السلامه

عقيق...جاوبته بثقل زينه بس شصار صارلي شكد
وجهك تعبان
السبع....صارلج سبوع نايمه بلانعاش والحمد الله حالتج مستقره وهسه نتاكد بعد من الدكتور

عقيق.. اسبوع هواي
السبع.. اي اكو منهم طلعوهم 3 ايام من الانعاش بس انتي كال اله نتاكد وعمليتج ناجحه الحمدلله هسه الباقي
عليج تصيرين سباعيه وتساعدين روحج حته اطيبين بسرعه
عقيق... ظلينه يومين بعد بالمستشفى وطلعنه للشقه المترجم ويانه ماعافنه ابد صحتي زينه بس حركتي
قليله اديه مااكدر احركهم ولسه ماشفت جرح العمليه ...

كلهه تخابر السبع وفجر ولبابه ورانيا حاجيتهم من السبع
اشتاقيت للبصره جنت اكذب من اكول اريد اخلص واطلع
منهه اصلا هواهه صاير بين عيوني كلساع واكله عود هاي والبصره ماكو مثل حرهه وهواهه ...

عقيق.. اريد اسبح ضايجه من نفس الملابس
السبع.. كال ممنوع المي كومي اساعدج هو ااصلا جرحج
مامضمد هاي لو يمنه جان لفوا من فوك ليجوه
عقيق.. جونه ملوث هذوله شعدهم احنه شخلت بينه الحروب والاحتلال قبل الناس وين تعرف الامراض هسه طفل يطلع بي خبيث اسم الله...

السبع.. كومي يله غسلي ولاترفعين ايدج ممنوع
اله يسمحلنه يله تتحركين
عقيق.. السبع بهاي الفتره حسيته الام التداري بتهه
من بعد العمليه هو يبدلي ويغسل وحاير بيه حته اخجل منه بس ماعندي غير حل...

جرح العمليه 15 سم من جهه كلبي رغم قهري تشوه جسمي بس اكول الحمدلله على الاقل صرت انسانه
طبيعيه وامارس حياتي بدون الحبوب التعبت منهه
ومااكدر انساهه يوم واحد

اخر يوم طلعنه تمشينه سوه واشترينه شغلات بسيطه
للبنات الطبيب كال صحتهه تمام وخلي تسافر لاتخافون من اي شي بس العلاقه الزوجيه تبتعدون عنهه مده 3 اشهر والعمل الشاق مده 6 اشهر والسبع يهز براسه ويكول
الله كريم ماادري لشوكت يتحملني....

رجعنه للعراق وتلكانه ضرغام انبات يمهم وثاني يوم
نروح للبصره علمود مااتعب تلكتنه رانيا بطنهه جبيره
وكوه تحجي وتاخذ النفس دكول الحمل متعبني
مشتاقه لفجر وللبابه شوكت يجي الصبح وانروح...

فجر... خاله ام اواب تليفونج يدك
ام اواب.. الله اكبر
فجر.. رحت شفته اواب يتصل وهي تصلي عجبني
اخبث فتحت خط كلت الو كال هلو يمه شلونج
فجر.. هله يمه يابعد امك شلونك يوليدي؟؟

اواب.. يمه !!!! منو انتي
فجر.. الجنيه
اواب.. فجري
فجر.. فجرك شنو عيني امك تصلي تكمل وتخابرك
اواب.. اوكفي اوكفي شلونج ام اللسان
فجر.. بخير

اواب.. عساج بخير دراستج شلونهه
فجر.. وانت شعليك
اواب.. جاي اسالج خلي عندج ذوق لسه ماتعلمتي
فن الرد
فجر.. ايبااااه يحجي بالفنون عمي حقكك غير عشت
بغوسيه
اواب.. وين وين بروح امج عيديهه كولي روسيا

فجر... جاي تقلد بشرني ماصرت اب
اواب.. اصير اب؟؟؟؟ ليش منين شنو متزوج وماادري
فجر.. غير تزوجت الغوسيه وفغحنالك حيل
اواب.. شو الصمي ياروسيا هو على ورق علمود الجنسيه ومقابل فلوس بسلا متحمله عليه علمود هالشي

فجر.. اني!! ليش اتحمل عليك بصفتك شنو؟؟
اواب.. فجر كافي تمسلت الغربه شاگه حلكي ورفضتيني
عينك عينك وهم سكتت وهسه مسويه نفسج
كلشي ماكو ترى اعرفج بطلي ثگل وداعه ابوي احبج

فجر.. عيني اواب المزيون باجر يجي السبع
واله اكله عليك كلما تخابر دكول احبج شنو هناك
مايدرسوك بس احبج حبتك حيه دكيت الدكه وسافرت
واتزوجت وجاي دكول احبج

اواب.. لللللللج فجر
فجر.. اجت امك وديربالك دكول احبج لان اخزيك
جرب كولهه مره ثانيه وشوف شسوي بيك
سديته وركضت للغرفه

شويه واجتني رساله منه كاتب احبج بعدج دبدوب
كالولي رشيقه بشريني بخدودج راحت ؟؟
قريتهه واني ابتسم اني الك يااواب 3 سنوات صارلك
وهسه جاي دكول احبج والله لشوفك الويل...

عقيق... رجعنه للبصره تلگني البنات جنت تعبانه بسرعه
نمت ماكعدت للمغرب طلعت من الغرفه واسمع فجر
تحجي ويه السبع وهو يكلهه لاتجاوبي اني اخابره
واعرف شحجي وياه كعدت بصفهه والسبع طلع كتلهه
شكو؟؟

فجر.. اواب يدزلي رسائل وكلت للسبع علي
عقيق... عزااا ولج شلون دكليله انتي موتحبي
فجر.. يعني اذا احبه اسمحله يدوس عليه شوكت مايعجبه ويرجع شوكت مايريد

عقيق.. وهسه راح تخلي بموقف موحلو واحتمال ينسحب من صدك
فجر.. ماينسحب بس خلي يعرف اني مومن التعرف عليهن يضحك عليهن بكلمه 3 سنين اخذ مني واني افكر واشتاقله وهسه يكلي احبج اطلعهن من بين عيونه

عقيق.. والله تخوفين
لبابه.. عليمن تسولفن
عقيق... ابتسمت لبابه صايره حلوه
لبابه.. امتحنت تنافسي وانتظر النتيجه ادعيلي انقبل
عقيق.. ان شاء الله لاتفكرين انتي تستاهلين كل خير

بعدنه انسولف اندك الباب ام جراح جايه بوستني
وكعدت كلساع تشبگ لبابه وتتحسر عليهه من كامت
لبابه سألتهه فجر شخبار مروه ؟؟
ام جراح.. ملتهيه بولدهه وجراح فوك وهي جوه
ماينام يمهه ومليت من الحجي وهي متحمله على شنو
ماادري وجراح يون على لبابه...

فجر.. وصحته شلونهه
ام جراح.. نفسهه يابنتي من يعصب مايخلي شي مايكسره صارلنه اسبوع بدون تلفزيون كسره
لو يكتلهه للاسوء حته ماياخذ علاج وراح يهلك روحه
وبس يدخن ...

عقيق.. ظلت تسولف ومن تجي لبابه تسكت حته لاتنقهر
بيومهه باتت يمنه ثاني يوم لبابه طلعت نتيجتهه
ناجحه وفرحنه الهه حيل اجونه هواي خطار يتحمدولي على السلامه بس جماعه القصر محد اجه ...

مرت الايام هادئه ولبابه انقبلت وجراح رجع من جديد
يتوسط ويوميه داز احد وماتقبل كام يتوسل بس يشوفهه ماتخلي وصلت بيهه من تطلع بالشارع دكول خاف يشوفني تنزل خمار على وجهه بحيث عاقبته
بشوفتهه وهو يتوسل بفجر بس مره وحده وهي ابد
ماقبلت لان تدري بي يراقبهه ...

اما جبار انحكم ببغداد هالمره مافاده حزبه وطلعت علي كومه شكاوي ومن ضمنهن ضحى هم قدمت شكوه وهذا كله ضرغام الركض بيهه وانحكم 15 سنه سجن وصارت سمعته بالكاع حته القصر محد يروحله ومحد يحترم اولاده عاصم يكول جابلنه العار تالي عمرنه ...

السبع صح اخذ حقه بالقانون بس دائما يكول كلبي نار
المثله المفروض ينكتل حرام شكم عائله بعائلته دمرهه
وخاصه من انضم للحزب وبالجديد الحزب يركضون وره ضرغام يكول حته عارضين علي انضم ويانه وندفعلك هلكد فلوس يريدون يستغلون الضباط والمراتب...

رانيا... ضرغام يمكن راح اجيب
ضرغام.. جيبي يله
رانيا.. لاتشاقه والله عندي الم خايفه ضرغام
عليك الله لاتخليني اجيب طبيعي خلي اسوي عمليه

ضرغام.. اخذج للمستشفى
رانيا.. اخاف لايسون بيه مثل لبابه
ضرغام.. اخذج لاهلي كومي بدلي هي موكالتلج هاي الايام ولادتج
رانيا... كمت بدلت وماما خابرت وسام ودت يمه
الاولاد وراحت وياي جانت ب5 العصر اخذني العصر
بمستشفى اهلي ونظيفه وعنايه دخلت لصاله العمليات
ب9 جبت طفلي وفرحتي ماتنوصف حته الالم نسيته

مخليته على صدري واشم بي والفرحه بعين ضرغام
اجه ليث ونور الدنيا وطايرين بي جانت عطله
وكال من يبدي الدوام اسويلج امومه وسيف ورضاوي
ماينامون اله ينام ليث يكلولي انتي نامي واحنه نكعد وياه....

حياتي حيل هادئه ضرغام مدللني رغم شغله وتعبه
بس مامقصر ويانه الله كتبلي حياه هادئه بعد تعب
ومشقه وسام على وضعه كل جمعه ياخذ الاولاد
وهم كبروا وكامو يحتاجون ابوهم بس بنفس الوقت متعلقين بضرغام لان مايوم رفضلهم طلب...

بعد مرور 6 اشهر..

عقيق... الطبيب سمحلي بالحمل كل شهر دموعي
بعيني الظاهر لازم فرحتي تظل ناقصه والسبع
تعب حته من كدما يصبر بيه كمت الح علي اراجع
نسائيه واخذتني ام جراح وهنا جانت الصدمه بعد مادزتني على تحاليل وفحوصات كالت عندج ضعف بنشاط البيضه وهالشي ينراد وقت طويل للعلاج حجمهه موبالمستوى المطلوب ...

رجعت ابجي دخلت بكأبه موطبيعيه حته السبع تعارك
وياي ويصيح لوادري مامسويلج عمليه وظالين هيج
من كدما تنگين براسي الله مقدر هالشي شنو بيدي
اخر شي استسلمت وكعدت وسكتت ظليت اراجع
بس بدون فائده وماشفت نتيجه...

لبابه... اداوم 3 ايام بالاسبوع الدكتوره علا حيل حبابه
وصارت قريبه عليه شحتاج تساعدني واسامه نفس الشي وكل هذا ومابدر منه غلط حته مايباوع ولاكانو بيوم تقدملي...

جراح شكد حاول حته كام يتصل وغيرت خطي
تعمدت احرمه من شوفتي ادري يراقبني وظليت البس
خمار من اوكف على الشارع جنت من اتذكر جرحه تنزل دمعتي هسه من اتذكره اشمئز واكره نفسي شلون
دفنت نفسي ايام وشهور واني اندب حظي...

بيوم منهن جنت بالغرفه واجتني رساله من رقم
غريب مكتوب لو تصير عندج كرامه وتعوفين
جراح راح يجي ابنه الثالث واني حامل شوفي حياتج
ترى مرجعه لحضني ...

كلماتهه سهام بكلبي ليش كلما اريد انساه ارجع
اتذكره لو يذكروني بي ليش هيج ياجراح
بعدين مسحت دمعتي مثلا شنتظر منه اكيد راح
يخلف مره ومرتين موهي الكال عليهه حلت بعيني....

بلعت الكسره مثل كل مره وكتمت حزني من جديد بس هالمره مااثر على وضعي بالعكس زدت نشاط واقره ومهتمه بدراستي حيل بس يبقه الليل تراكمات الحنين تهيج بي..

وره شهر اجت ام جراح وانفتح الموضوع
وكتلهه مبروك حمل مروه تفاجأت كالت منيلج
هالحجي سولفتلهه كامت تذم بيهه كالت هاي الهه يوم
كتله من الكتلات يموتهه لو صدك يطلكهه والجهال تظل

ام جراح.. جذابه منين تحبل وهو مايوصل يمهه
اشوفهه تبدل وتعدل وتنزله ويرفضهه ومن حاجيته
ردت اصحي على زمانه يكلي مااشوفهه مروه الحلوه
ماادري شلون غلطت هيج غلطه وكل مره يتهدد يريد
يطلكهه واني اتعارك وياه الجهال مالهم ذنب

لبابه... معلم على الصدمات كلبي صارت كلما تحجي امه
ماانصدم من كدما ضگت اللوعات والمرار بحبي
اله هذا الحب الحاملته اله بده يتلاشه وماعندي اي مبرر
بداخلي مجرد مااريد اسامحه اتذكر شلون باوع بعيني قبل يوم ويكلي بس انتي عندي وثاني يوم يطلع متزوج...

سنه 2015 ناقشت رسالتي وحصلت امتياز ولهذا اليوم
وجراح يتوسل يشوفني بطلت اسأل عنه بطلت انتظر الحوبه بطلت اتبع اخباره واراقب حسابه فجر وعقيق
اخر سنه الهن راح يتخرجن ونفس خبالهن وعقيق دومهه ضايجه على موضوع الحمل والسبع ملتهي بشغله...

كمت اقره للدكتوراه والدكتوره علا تشجعني
كمت اغمض عيني يجي اسامه ابالي واكوم
ادعيله هو ساعدني وطلعني من حزني وصار الي
اسم وكيان وحته اناقش واحجي بدون خوف وتردد

بيوم منهن اجه السبع كال اريدج بشغله كعد وفتح
موضوع اسامه وكال حاجاني مره ثانيه لبابه تخسرين
اذا ماقبلتي بي يمكن اصعب قرار اتخذته بحياتي
وظليت اسبوع كامل مامرتاحه وافكر واخر شي
حجيت ويه فجر كالت ثقي باحساسي اسامه
هديه ربج بعد التعب...

كلت انطي لنفسي فرصه وعلا كالت راح ينطيج مجال
اذا شفتي نفسج ماتأقلمتي وياه كل واحد بطريق
وهو انسان متفهم حيل رجعت خبر للسبع اني موافقه
دمعتي بعيني وكلبي يذم بيه ويكلي وجراح!!!

بس ماردت ابقه على ذكراه ردت اكمل حياتي
اني ماارجعله مستحيل بعد ليش دافنه نفسي
بهيج حياه وخاصه اسامه عندي شعور مريح اتجاهه
وتمسكه بيه خلاا 3 سنوات خلاني اتذكر كلام ماما
الله يرحمهه اخذ اليحبك ولاتاخذ التحبه ....

رجعت خبر للسبع بعد تفكير طويل واستشاريت رانيا وصديقتي ام جراح زعلت ومااجتني ابد السبع
حدد يوم المشيه الجمعه وقبل يوم اجت رانيا وضرغام
شكد هوسه وفرحانين بس ملامحي طافيه مثل طفيه الشموع وكت الغروب...

جانو مخبوصين الشيخ ياسين يكول ناس معروفين
ومتمكنين ماانريد نتفشل وياهم واني ايدي على خدي
وكلبي مقبوض اكو دموع تجري من كلبي قبل عيوني
بس اخاف ابجي كدام الكل اليوم بس مشيه وعقد شيخ بدون حفله بعدين نتفق حته نسوان مااجن لسه كله عن طريق الزلم ....

جنت كاعده ومدنگه راسي واسمع صوت رانيا صاحت
بصوت فززنه كلنه كمت وكفت عبالي واحد تكهرب شفت ضرغام شغل سيارته وبس التراب وراه والسبع واكف بالباب وايده على راسه ...

كلبي كالي جراح اااي جراح بي شي دموعي النزلت
من كيفهه والعبره الوكفت ابلعومي كلهه دكول
جراح بي شي طلعت حافيه امشي كلهن واكفات بالطرمه
بس اني جنت جوه كتلهن شصاير ؟؟

واني اغمض عيني ولايكولون بي شي اجاني
صوت ام اواب وهي دكول جراح مايدري وراجع
على ابنه بالسياره وكاتله بمكانه !!!

.
يتبع........

#خبايا_الاقدار
❤️♨️

#البارت التاسع والسبعون



انكسر كأس مُنذ ثمانية أعوام دون قصد فانجرح قدمي وترك ندبة بقت إلى اليوم. كلما نظرت لها تذكرت شكل الكأس ومن كسره وكيف، فما ظَنك بالأنفُس.؟
......
لبابه... الدنيا انهدت على راسي عمري مادعيت علي بأذيه الضمير عمري مادعيت على اطفاله وصحته صح حد يومه وقضاء وقدر بس موبهالموقف شلون يعيش بتأنيب الضمير وهو قتل ابنه بيده
ركضت بدون شعور للسبع دمعتي وكعت كتله روحو وياه لاتعوفو هز راسه وكال راح اروح فوتن جوه ام اواب يمنه
السبع خابر على اسامه كاله عدنه حاله وفاه ساعه واحنه وحده تباوع بوجهه الثانيه اخر شي ام اواب كالت لازم نوكف لام جراح
رفضت اروح ماردت مروه تشوفني وعبالهه شمتانه بيهه بس اصرت اله اروح ومحد بمي يظل خابرنه ياسين دزلنه سياره ورحنه الباب جان مفتوح على حيله وصوت العياط من جوه وصوت عمتي ام جراح وهي تصيح شحال كلبك يا وليدي
نزلنه بدموع اجر بكلبي والله مااتمنيت هيج ينفجع ردت حوبتي بتوفيقي اتوفق واعيش ماردت هيج يصير
بيهم ابنه حيل حلو وعيونه ملونه وشعره اشگر يشبه
مروه وكل اليشوفه يتعجب بجماله هيج راح بهبه ريح
دخلنه للصاله نسوان هواي الجيران واهل نوال واهل القصر وعماتي خفت حيل لاتكوم مروه تطردني بس الشفته خلاني امشي بدون شعور واكعد كدامهه وابجي ...
مروه لاشعر ولا وجه ولا وادين منهاره يلزموهه تصرخ بعلو صوتهه ابني هسه بحضني مايعوف اخو وحده المنظر مااتمنى لبشر موهي الدمرت حياتي بس مااتحملت منظرهه وكمنه نبجي وياهه
نسوان اطب ونسوان تطلع وهاي الدكول الله يساعد امه
وهاي الدكول الله يساعد ابو كتله بيده والتكول دمه بالشارع واكثر ماهزني وحده كالت شفته من رجع علي وانمرد بالكاع حته ملامحه مختفيه الضربه قويه...
رانيا جانت كاعده بعيد وتبجي واشوف مروه تزحف بنص النسوان وحضنت رانيا وتصيح خاله ابني راح انتي كتيلي
ماتفرحين بحياتج من مكرج والله فجعني بي لو مااخذني
اني ولا ابني ...
اخر شي تعبت كومتهه رانيا للغرفه ماتكدر تمشي تريد توكع جانت لابسه دشداشه لونهه سمائي بدلتلهه ولبست اسود وكامت منين مامنين تجي الناس هلكد كرايب اشوفهم بس بالفاتحه والعرس...
صار الليل وكالو مناك اخذوا الطفل للنجف ومروه ماسكتت ولادقيقه هو واخو تؤام متماثل بحيث كلساع يجي يكلهه ماما كلبي يوجعني ويأشر على كلبه ويسأل عن اخو لو يجيب سيارته يكلهه اريد العب وياه رغم كلامه مكسر بس يكسر الخاطر....
جنت كاعده بغرفه ماما القديمه ورانيا ترضع بابنهه يمنه
ودكول سهاد مخابره امي مسافره هي وساره بكركوك وعافت بتهه وحدهه حته محد الهه مخليه راسهه بالكاع وبس ام جراح يمهه ...

رانيا.. هم دعيتي علي بعزيز كلبه؟؟
لبابه.. لا والله مايوم دعيت لان مااريده ينفجع صح خان واستغفلني بس مولهدرجه احقد علي ترى جراح ابن عمي
قبل لايكون زوجي مااتمنى هذا الدعاء للعدو اني ماشفت
طفلي واشهر حزينه شحال هو وهي ام
بعدني اسولف فتحت التفتت على صوتهه وكالت قبل شهر كالتلي ام جراح لبابه يتيمه وماتروح حوبتهه وضحكت عليهه من حجت حوبتج ماطلعت بجراح طلعت بيه اني اني دزيته يركض وره ابو هو مايدري عافه بالبيت
اني دمرتج واخذته منج كوه جراح مارادني واني اخذته بالحيله وهسه من كام يكرهني كمت ادور كشافات واسحوره ودفعت لوحده فلوس بس تسوي تفرقه بينكم ولزمتني عمتي وكالتلي ترى ربج منطيج مهله وعلى ساعه يضربج وتنفجعين وماصدكت
لبابه.. اسمع كلامهه ومامستوعبه تحجي بدون شعور كعدت بالكاع مدت رجليهه وتضرب براسهه بالحايط وتصيح اني اني الله فجعني بابني لان مشيت بدرب الحرام
ماكدرت احرك ساكن اباوعلهه شسوي احقد عليهه لو اكول الله يساعدهه لو الومهه الصار صار وضربه رب العالمين قويه قسمتهه نصين هزيت راسي وكتلهه الله يغفرلج وماياخذ الاطفال بذنبج مو وقته هالحجي الله يصبرج
رانيا.. كومي عقيق اخذي ليوثي من حضني رجلي خدرت
وانتي مروه تعالي وياي ابنج خطيه يبجي وياج الحجي ماينفع بعد كومي غسلي ومددي لاتوكعين
عقيق..اخذت ليث واخذتهه رانيا لغرفتهه باوعنه على لبابه اشرت لاتحجون منو اني حته اتشمت بطفل الله يغفرلهه ويصبر جراح اذا اكلكم تحجون عليه كلبي نار واتمنى اقاسم جراح نفس الحزن والله عبالك ابني النار البجراح نفسهه بكلبي...
ب1 بليل يله رجعوا من النجف جنت مدده وسمعت صياح عمتي ماكدرت اكوم ماردت يشوفني وعباله مثل مروه بسببي طلعت كلهه على الصوت مال بجي امه اجت عقيق تمسح بدموعهه كالت تبجين على حاله حته مارفع راسه
بهاي الليله مانمت كلساع اسمع صوت مروه وهي تنوح نوح الحمام لو اسمع النعي مال ام جراح قريب الفجر كمت توضيت اريد اصلي كلهه نايمه كلنه بتنه يمهم ونسوان نايمه بالصاله رحت للمطبخ ام جراح كاعده بس شافتني بجت كالت شفتي اشصار بجراح يامصيبه ماوكعت براسه ...

مااعرف شحجي وشلون اواسي بس ابجي وياهه جان باب المطبخ مفتوح كلبي حسني هو بره طلعت للطرمه شفته مدنگ بالحديقه ولازم راسه باثنين اديه ولابس اسود...
اخذتني رجليه ووكفت يم راسه اريد امد ايدي اريد الزمه
اريد احضنه اريد اهدي من روعه اريد اشاركه حزنه ماكدرت ماحاس على وجودي ابد اديه محاوطه ركبته وراسه بالكاع حابسه شهكتي لايسمعني بسرعه دخلت جوه مااكدر اتواجه وياه لان راح اضعف...
ظليت بالمطبخ اباوعله شفت ضرغام طلع يفرك براسه وهو يصيح جراح كوم طب جوه يجره من ايده مايكوم تقربت اكثر على الشباك الفجر هستوه طالع والدنيا گمريه وصوت البجي مالته وصل لاعماق گلبي...

كام يبجي وضرغام كعد كدامه ويكله قبلك دفنت 3 مرتي واولادي ومالگيتهم غير فحمه وهم بسببي احتركوا ربك راد هالشي موبكيفك ولابكيفي لاتسوي هيج صحتك تعبانه شوف ايدك الماوكفت لو النزف من خشمك
جراح.. شفته حته ملامحه مختفيه بيدي كتلته من عصبيتي قبل اسنين ردت اكتل لبابه ووراهه ردت اكتل نفسي وهسه شنو ابني بيدي كتلته ضرغام عيتيش راح اعيشهه شلون اشوف اخو النسخه منه وهو بيدي موته ماسمعته من صاح بابا يكولون يصيح وراك ولازم حذائه بيده
انه مااستحق اكون اب ولا حته الي حياه انه انسان مريض نفسي كالي الطبيب قبل ترى نهايتك تكتل وتأذي وهاي نهايتي تعبت محد حاس بيه تعبت يوم واحد اريد انام بدون الم تعبت وتالي طول عمري اعيش بهذا الذنب
ضرغام.. مابيك شي ابنك مات قضاء وقدر لادكول اني كتلته الله راد هالشي استغفر ربك وكوم امه خطيه هم موهينه عليهه لاتحمل نفسك المسوؤليه الله انطا والله اخذه
جراح.. لبابه كللهه خلي ترتاح طلعت حوبتهه صح مادعت عليه بس الله بيمن يفجعني لو بامي لو بابني وهاي بابني شلون هيج وزني الشيطان وهيج سويت ضرغام شلون هيج دمرت نفسي وعايش بالم
ضرغام.. لا اله الا الله كوم عاد وسحبه من ايده مايكدر يمشي ايده ترعش بقوه دنك راسه بالمغسله وصاح بصوت عالي السبع السبع طلع السبع يركض لزم جراح من كتفه بسرعه شمر نفسه بحضن السبع ومدري شيحجي وياه بس يطبطب على كتفه...
لبابه.. خلصت الفاتحه 3 ايام ومروه وحدهه امهه واختهه مااجن انكسرت ادمرت موهذيج مروه ام اللسان عينهه بالكاع وصوتهه مختفي باليوم الثالث رجعنه للبيت بس رانيا ظلت يمهم...
عقيق.. فجر شعجب ماحلمتي هالمره
فجر.. جنت سهرانه
عقيق.. يعني ماحسيتي؟
فجر.. اليسمعج يكول فجر جني هو احساس وبالصدفه يجي
عقيق.. حسي بيه اصير حامل
فجر.. لا ماتصيرين حاليا
عقيق.. امداج ولي
فجر.. عقيق حاسه اواب بي شي
عقيق.. شبي؟؟
فجر... شمدريني كلبي يوجعني وافكر بي هواي
عقيق.. انتي خبله من كلتي علي للسبع
فجر.. وماتدرين شكاله السبع
عقيق.. ماخابره كال ادري بي يحبهه وهو قبل لايسافر كايله ارجع واخطبهه والسبع يكول سفر اواب جنبنه مشكله ويه جبار لان لو يدري صدك يريدهه جان ماتردد بمشكله جبيره
فجر.. هسه شلون نعرف اواب شبي؟
عقيق.. خابري
فجر.. لا انتي دكي من خطج واذا كال الو معناتهه مابي شي
عقيق.. خاف يدري السبع
فجر.. عود كليله فجر ذبيهه براسي انتي استاذ بالتهايم
عقيق..جبت تليفونه ودكينه رقمه وقفلنه الباب انفتح الخط وصوت ابنيه كالت الو مين معي اواب هيدا الرئم عربي
فجر..اخذت التليفون وصحت سم بگلبج وبگلب اواب وينه هذا ابو النسوان
... عفوا مين معي اواب في الحمام
فجر..هلوووو هلووووو يسبح العريس اشتعلت عشيرته
وسديته وركعت تليفون عقيق على الجربايه

عقيق.. شبيج كسرتي تليفوني
فجر.. سمعتي ولج سمعتي واني الزماله افكر بي
عقيق... انطي مجال نفتهم هو موكال بس ورق
فجر.. اشششش ضربيني على حلكي اذا كتلج بعد
عقيق.. بعدهه تحجي وتفتر بالغرفه دك تليفوني رقم اواب
كتلهه رجع اتصل اخذته مني وصاحت شتريد متصل
اواب..هاي انتي ام نص اللسان
فجر..ماتستحي دكول مامتزوج وجذب وانته حاطهه بنص بيتك وترد على تليفونك
اواب.. لا اله الا الله اول شي على كيفج بطلي عصبيه
وخليني احجي وياج بهدوء
فجر.. ياهدوء ماتستحي ادزلي احبج وانت تسبح بشقتهه
اواب... فجر بيمن احلفلج ماكو شي بيناتنه واصلا مووحدي بالشقه هاي ابرار احجي وياهه هي صديقه ابرار وتجي يمهه
فجر.. وانت شعندك بشقه بس نسوان اشو مستفلگ الوضع
اواب.. عاب هاللسان الشقه شقتي ابرار اجت تقره يمي
لان ابو الصيانه بشقتهه وهاي اجت وماادري راده على التليفون خفي علينه علويه فجر
فجر.. اواب انت واحد سرسري ماتستحي ادور بنات خفيف ماعندك حيه حضور ممثل بارع اذا خابرت بعد اخزيك تخزي خووووش
اواب.. طيح الله حظج على هاللسان الزفر والله لو يمي اله افرك حلكج زعطوط كدامج وتغلطين شايفتني اطب بشقه واطلع من شقه حته دكولين سرسري عرمه ماترهملج جاره