دت يمها
وبقيت ادير براسي يمنة ويسرى
و العريس جان ديسئل على ناهز
وعلى اخبارها وشلون صارت رجلها
وبااثناء كلامهم التافت عليه ام خضر كالتلي
...تعرفين يابنونه ناهز خايفه تجي لبغداد دكول خاف موكد اهل بغداد
...ليش خاله شبيها ناهز وردة وعبالك العافيه ‏ ‏
....الله يعافيج فدوة لسانج
وكلت بكلبي الله يصخم وجهي ياعبالك العافيه ‏
زركه بس صدك من كال حظ الزرك كاعد
استغفرالله حرام عليه احجي هيج
ولو هذا الصدك والعريس هوايه احلى منها
بس يمه على البخت بس لو اعرف شلون صادته جان رتاحيت
اني احجي بيني وبين نفسي وعيني على الكاع
سمعت الولد يكول
...عمتي ام خضر شو ماعرفتيني منو هاي الي وياج
ام خضر ضحكت
...اي بالله نسيت. هاي بدريه بس ماتحب احد يكللها بدريه هههههه
وتصير جوارينه بنيه حبوبه واخلاق ومعدله والله من كتلها ناهز ماتكدر تروح ويايه لبغداد واريدج ماترددت
خدومه وبت حموله
باوعلي وابتسم وكلي
...اشرفت ونورتي بغداد
...منورة بيك وبااهلها
...وترة ضلموج من سموج بدريه
خجلت وخدودي صارت حمرة اول مرة اخجل لان
هذا نظيف ومرتب وشكله ابن زاوات عوذة
على الشكول الي اشوفها هناك يمنه
ضحكتله
....اي سموني على اسم بيبيتي
....ولعد شتحبين يصيحوج
....بان
...اي يلوكلج اكثر
ام خضر رادت تغير الموضوع
وكالت
...لعد شنو ماكو احد بالبيت اتصورت عمتك موجودة موكلت هذا بيت عمتي
..اي صحيح بس طالعه هسه على وصول صدك
اخذني الكلام وماكتلكم شنو تشربون
...لاتسلم ابني
بس اني جنت عطشانه
كلش
شاورت ام خضر
......خاله اني اريد مي واريد اروح للحمام اغسل وجهي
......اي خاله احجي ليش مستحيه محمد ابنه مو غريب
فدوة محمد ابني بنونه تريد تروح للحمام وتريد مي خطيه فحطت اليوم من التعب وشيلت العلاليك
...اي بعيني تفضلي
شو باوعت عليه وكلبي لعب منه
بس شسوي
عدلت عبايتي وكمشتها زين ومشيت ورا
اشرلي على باب وكلي
...هذا الحمام
...شكر ا
...تدللين عيوني
...تسلم
...ومن اطلعين هذا المطبخ اذا تحبين تشربين مي
...اي اشكرك
هز براسه وراح دخلت الحمام وقفلت الباب
خفت
منه ماادري يمكن لان مشايفه هيج ناس
غسلت وجهي وفتحت شعري وعدلته ورديت خليت على راسي العبايه ولمن طلعت
رحت للمطبخ شفت بطل كزاز وبصفه كلاص صبيت بي مي وشربته وسمعت صوت ورايه نداريت
وشفت خطيب ناهز
....كلي بالعافيه
....الله يعافيك
....اني ماجنت اعرف انتي صديقة ناهز
...اني موصديقة ناهز وماعندي بيها ذيج العلاقه
القويه على كد السلام والسؤال على الحال
بس خاله ام خضر تمون عليه واحبها ‏
ودائما واكفه ويايه
...هامو
وسكت
...انت شنو الي تريدة بالضبط جنك دتحوم على شي
....هههههه اني لا لتخافين
ودار وجه وطلع من المطبخ
رحت وكعدت بالصاله وبقيت خانسه بمكاني
وكلت لروحي هاي شلون راح اكضي ليله هنا
هاي الليله راح اصير كلش طويله عليه بس بلكي هو مايبقى ويروح لبيت اهله
وبقى يحجي ويسولف ويضحك
وجان فد واحد حجاي وماينكدرله
ويدوخ اكبر واحد
وبهاي الاثناء نفتحت الباب الخشب ودخلت امراة
لابسه بنطرون اسود وقميص نيلي ورافعه شعرها
ليفوك جانت جبيرة ومبين عليها العمر
اول مادخلت باوعت وبعدين كالت
...مساء الخير
ردت ام خضر
...مساء الخيرات عيوني
تقربت وكعدت على الكرسي الي كدامنا وكالت
.....اني اسفه مستقبلتكم بس جنت يم
الطبيب وعالعموم حمدلله على السلامه
واتمنى ترتاحون بااثناء تواجدكم بيتي
......لاتتاسفين واكيد نرتاح وساعه المباركه الي شفناج وتعرفنه عليج
حجى محمد خطيب ناهز وكال
...عمة ام خضر هاي عمتي ام كميل
....يااهلا وسهلا
...اهلا بيج ونورتي
...بنورج ام كميل
...لعد معرفتينه على البنوته هاي بنتج
....هي مثل بنتي بس اني ماعندي بس ناهز وعندي ولد واحد
هاي بنت جوارينا
...اهلا بيج وبيها وزارتنا البركة
....بيتكم عامر ان شاءالله ومبارك بحسكم
..اشكرج
....من رخصتكم اروح اغير ملابسي
...غاليه عيوني
وهي كامت وسمعت واحد يصيح محمد تعال
كام خطيب ناهز طلع وشويه ورجع
ولمن دخل وكعد دخل واحد ورا
يمه عبالك شمس ودخلت
مايشبه البشر شنو طول شنو جسم
شنو شعر يلمع شنو بشرة
يمه دخت من شفته
عبالك صينيه مال حلويات ماشاءالله اللهم لاحسد
بس حرامات ماشفت عيونه لابس مناظر ومامبينه زين
اول مادخل صار وجه بوجهي باوعلي
وعبالك ذبانه وكشها ودار وجه عني عالسريع

وكال
..السلام وعليكم
....وعليكم السلام
محمد كال
.....عمتي ام خضر هذا كميل ابن عمتي محامي وتاجر
....اهلا وسهلا اهلا بيك ابني ماشاءالله
الله يزيدك
...اشكرج وفرصه سعيدة تعرفت عليكم اني سمعت عن ناهز وعن حضرتج من محمد
....ان شاءالله الي سمعته عنه خير ‏
.....اكيد يله من رخصتكم وطب جوة
وبعدها كال محمد
...يله اوديكم لغرفتكم حتى ترتاحون
كالت ام خضر
...اي والله ياريت
كام وكف وكمت اني وام خضر ورا وتمشى شويه
وكف يم باب غرفه بالطابق الجوة وكال
...هاي الغرفه واخذو راحتكم واي شي تحتاجو اني موجود
ودار وجه وراح
دخلنا للغرفه

واني جنت ميته من التعب نزعت عبايتي وخليت راسي ونمت حتى اكل ماقبلت اكل
وماكعدت الا بالليل
بس كعدت ميته من الجوع وام خضر ماكو بقيت خايفه اتحرك
اخير شي لبست عبايتي وطلعت من الغرفه وشفت ام خضر ماكو
وهاي المراة وابنها كاعدين يحجون من شافوني دخلت
سكتو
صاحتني المرة كالتلي
...تعاي
مشيت ورحت وكفت يمها
وسلمت عليها وكتلها
...لعد وين خاله ام خضر
....راحت ويامحمد دتشتري كم حاجه وماكعدتج
كالت نايمه خطيه
تعاي كعدي
استحيت اكول لا
رحت كعدت على الكرسي غادي منهم
وبقيت ساكته
بس رفعت عيني وشفت هذا الولد الي اسمه كميل
شلون اسم حلو اول مرة اسمعه
كاعد وخال رجل على رجل وبيدة قلم وعلى رجله اوراق
وبصفه فنجان الكهوة
باوعت على شكله
الشعر المرتب والبنطرون والقميص الي
عبالك متفصل عليه تفصال
وكلامه وياامه جان موزون وقليل يحجي
ويباوع
بااوراقه ومركز
وكل هذا واني بس اباوع ومااحجي شي
وخفت احجي شي
وهما اصلا ماحجو ويايه
وجنت مرتاحه لان ماحجو ويايه لان مااعرف شنو احجي وياهم
وطولت كعدتي وسكتي
وفوك هذا جنت ميته من الجوع
بس اخاف اتحرك من مكاني
وهما ولاحاسين بوجودي
ناس جامدين الابن والام ماحجو اكثر من عشر كلمات سوا
وهذا الي اسمه كميل
عينه بااوراقه
شكد جامد ياالله
بس الصراحه ماشفت هيج انسان بحياتي
وفجاءة سمعت صوته وكلبي رجف وكام يهتز
عالسريع
كلي
...انتي شنو اسمج
رفعت عيني وباوعت عليه جان يحجي بس عيونه بعدها على أوراقه
كتله بصوت يرجف
...بان
.....اها
....شكد عمرج
... راح اصير 20سنه بعد كم يوم
...مبين عليج اكبر بهوايه
رفع راسه وباوعلي ورد نزل رأسه
سكتت ومجاوبته
وكالت امه
.....اني هسه اجي
....كللها اوكي
.....
واني لملمت نفسي
....انتي شنو تشتغلين
...اني ابيع بالسوك
ذب الورقه الي بيدة وباوعلي واني باوعت بااتجاه
بس ماستجريت اخلي عيني بعينه
خفت
ماادري ليش
كلي
....شتبيعين بالسوك
...خضرة و خبز
....انتي عندج كاع ازرعيها
...لا
...لعد
.....عندي بيتنا حديقه صغيرة اني زارعتها خضرة
وابيع منها
...وتخبزين
...اي اخبز
..وتبيعين للناس
...اي
.....وشلون تشتغلين هيج شغلات موصعبه
....كلشي صعب والعيشه هم صعبه شسوي المضطر يركب الصعب
....ماعندج احد يساعدج ام اب اخ
...عندي الله المعين وعندي ام واب بس مرضه
ميكدرون يشتغلون
...هااااااااا اتصور سوك وبي اشكال ونماذج تعبانه شلون دتتوالمين ويا هيج اجواء لو انتي متعلمه
على هيج أمور
حسيت كلامه بسمار ودخل بكلبي حسيته دينتقص
من اخلاقي. ورديت وكلت لنفسي شنو ‏الجرأه الي عنده
حتى يحجي ويايه هيج وهو منو حتى يكعد يحقق ويايه وفوك كل هذا يكلي انتي هيج
والسوك ونماذج وماادري شنو شكد مكروة
رديت عليه بتحدي
.....والله ياافندي بكل مكان اكو الزين واكو الشين
والي ميسوي الغلط الناس ماتطلبه منه
لان معروف وموعيب الشغل
العازة تخلي الناس تضطر تشتغل
بس ماتخليهم يضطرون يبيعون نفسهم
بقى يباوع عليه
وابتسم
...وكلي

يتبع
‌‎

.....البارت الثاني.....

وكلي
..عالعموم فرصه سعيدة
....شكرا
وطلع من المكان الي اني بي
واني هم كمت رحت للغرفه وبقيت كاعدة وبعد
ماطلعت وبقيت انتظر ام خضر
تجي وهسه تجي وهسه على جيه وماكو
وكعدت على الجربايه
و اذكرت كلام هذا الي ميسمه كميل سبحان الله
الله شكد منطي شكل حلو بس شكد منطي لسان طويل
عوذة عود كاعد يتبغدد براسي
مكروة
والله خضر ابو الزلابيه احسن منه
عود شايف نفسه لان ابن بغداد ومحامي
عشتووووو
عشنا وشفنا
شلون ناس
تانيت ام خضر وماهلت وين صفى بيها الدهر هالعجيزة
اني شجاني واجيت لبغداد موجنت كاعدة يم اهلي وساكته بقيت قلقه
بس ردت هذا اليوم يمر على خير
مااعرف ليش كلبي واجعني
و بالي يم اهلي والحسبه طولت واني كاعدة انتظر ام خضر
وساعه جرت ساعه
وعيوني تاني
والجوع اكلني
واخاف اطلع من الغرفه لااشوف هذا ابو كذيله
باوعت الساعه صارت بالعشرة
ام خضر متعلمه تنام من وكت
وهي طالعه طريق من الصبح واكيد تعبانه معقوله ظلت لهيج وكت
ورا شويه سمعت صوت الباب تندك
كمت رحت يم الباب وفتحتها
باوعت عمته لخطيب ناهز
ابتسمت بوجهها
كالتلي ترة محمد خابرنه
وصاير وياهم حادث
كمشت كلبي
كتلها
...ياستار شكو فدوة
....ام ناهز ضاربتها سيارة من دتعبر الشارع
وهي هسه بالمستشفى
...ياصخام بوجهي وشصاير بيها ميته
..لا بس كسور بجسمها
وهسه هم راحلهم كميل
وجهي كام يضرب الوان
كلت اني شورطت
نفسي هسه شلون بي شلون راح ارجع
وهي بالمستشفى
رحت كعدت على الكرسي
ودخلت المرة للغرفه كالتلي
...لاتهتمين مابيها شي ان شاءالله تصير زينه
.....الحمدلله وان شاءالله دكوم وتكون بعافيه
....بس اعتقد راح تضطر تبقى كم يوم علما تتعافى اكثر
...اي اكيد وهمين ناهز رجلها مكسورة متكدر تجي هنا
ماااعرف شلون
...الله كريم منا ليومين ثلاثه شوفي شلون
....مو المشكله اني عايفه امي وابويه واثنينهم مرضه وماعدهم غيري
وهسه يمهم وحدة بيت جوارينا
...تدبر ان شاءالله كومي تعشي
....اي
كمت وراها ولو جان مو وقت اكعد اكل بس راح اوكع من الجوع
رحت وياها للمطبخ كعدت
على الميز وجان مليان اكل
اكلت شويه
...وكتلها اني اغسل الماعين
...كالت لا ميصير
.... لاشكو بيها
عد كمت نزعت العبايه
وخليتها على الكرسي
وكفيت ارداني
وجنت لابسه دشداشه سودة بس حلوة عبالك نفنوف
هاي مبقيتها للطلعات
الزينه
وكمت اشتغل وباوعت هاي المرة كامت تشرب جكاير
يمه نصدمت
كلت شكد عيب ليش نساوين بغداد يشربن جكاير
اني ماشايفه مرة تشرب جكاير ممصادفتني يكولون العجيزات عدنا يشربن بس مشايفه بعيني
وهي
ماحجت ويايه بعد وجانت عبالك بكوة متحملتني مبين عليها بس اني جنت ابتسم
واحجي بذوق لان عيب احنا ضيوف ومن زمان جنت اسمع بيبيتي دكول الضيف لازم يكون مؤدب لان راح يعكس صورته
وبقت هاي الكلمه ترن باأذاني وفعلا ذاك يوم وهذا يوم
واني امشي بحجايات بيبيتي جانت مرة حكيمه الله يرحمها
كملت المطبخ وكمشت عبايتي وخليتها على جتفي
ورحت يم المرة جانت كاعدة تباع تلفزيون لمن شافتني كالتلي كعدي
...اي جيت
كعدت وعيوني ماترمش اباع تلفزيون احنا تلفزيون جان عدنه بس مرة عطل وكالولي مايصلح
وذبيته وانطونا بيت جوارينا تلفزيون بس تعبان وصوته ناصي وامي موتتني كاعدة كباله النهار كله جايبه فراشها وحاطته كدام التلفزيون ونايمه واحنا
مانكدر نباوع شي
واني هم مكضيه يومي كله اشتغل فماالحك اباوع تلفزيون
سمعت صوت الباب نفتح
عدلت نفسي دخل محمد خطيب ناهز وهذا الي اسمه كميل
كلت يمه صدقه لله شكد حلو شكله
بس يمه باع الخشم العالي
عبالك وزير
كالت امه لكميل
...هاشصار احجوو
...كال كميل
....راح تبقى بالمستشفى يومين وبعدين تطلع لان مكسورة يدها من فوك ومكسورةرجلها
....خطيه مسكينه
باوعت على محمد كالتله
...محمد شلون ندعمت
...اشترينا ملابس من محل وكتلها هذا المحل الي عبر الشارع يبيع اقمشه
حلوة نفسه الي تاخذين انتي منه قماش
....اي
وهي عبرت قبلي وجان فد ولد شاب ديسوق سريع وضربها
....خطيه
.... والله خطيه تأذت
...لعد شلون عفتها
....هسه راح ارجع للمستشفى ابقى يمها
....اي لازم احد يمها
...مواني كلت بس اجي اغير ملابسي وارجع
ومارحت للبيت اهلي وكميل كلي تعال اخذ من ملابسي وروح
...اي اصعد حبيبي بدل ملابسك
تريد اكل
...لامااشتهي
كالت ام كميل
.....شنو هاي العائله الي كلها مصايب خطيبتك رجلها مكسورة وامها هم تكسرت بقى بس اخوها ابو العربانه ههههه
شفت محمد ضاج من كالت هيج واني هم ضجت منها عبالك شمتانه بمصايب العالم وفوك هذا دتقلل منهمً عود اخوها عنده عربانه
اني بقيت ساكته وشويه وكمت وكفت وكتلهم
....من رخصتكم اني ادخل انام
...اي براحتج
....راح اثكل عليكم بس هالليله وباجر اروح يم خاله ام خضر لازم اكون وياها
سمعت صوته
يكول
....عادي ماكو مشكله وحسب مكلي محمد انج راح تبقين لحد مصير ام خطيبته بصحه جيدة يله تروحين لان بتها متكدر تجي
..

..اي صحيح رجلها مكسورة يله الله كريم
منا لباجر
باوعت عليه المرة وكالتلي
...اي موانتي لازم تبقين لان اني صعب اداريها
وهي يرادلها اكيد كم يوم يله تسترد قوتها
صفنت عليها
وكتلها
....اكيد ابقى الدنيا مادكاطعت الناس للناس
تصبحون على خير
ورحت للغرفه
واختنكت من هذا البيت ردت بس اطلع منه
ماعول شوكت يجي الصبح
وافتك منهم والمشكله بقيت بقلق
و بقيت انام واكعد
لحد ساعه بالسبعه الصبح
كمت ادكلب بالفراش سمعت صوت كمت فتحت الباب على كيفي
ورحت للمطبخ شفت
المرة كاعدة وحدها
....صباح الخير خاله
....صباح الخيرات
....تفضلي اسويلج ريوك
...لاخاله اني اسوي
...لاميصير انتي ضيفتنا
...اشكرج

بس كمت وياها وطلعت البيض وسويت جاي
وطلعت حليب واني داصب حليب وكع على هدومي

...... يا ملابسي دمرت واني مجايبه هدوم هسه شلون اروح للمستشفى حتى العبايه صارت بيضه
باوعت عليه وعوجت حلكها
....مومشكله هسه انطيج من ملابسي وهذني غسليهن وخليهن ينشفن
طفت الجاي والطباخ وكالتلي تعاي ويايه دخلتني لغرفتها جانت كلش حلوة غرفتها
وجبيرة
فتحت الكنتور كامت دكلب بالملابس
كالتلي
...اني ماالبس عبايه
راح تضطرين تلبسين من ملابسي علما تنشف هدومج
...شلون لعد
...اي شسوي انتي محجبه
...يعني اني ماالبس فوطه بس اخلي على راسي عبايتي
...يعني مومحجبه
....اي يعني
...زين لعد اني عندي هاي الملابس صغيرة عليه كلش جنت داريد انطيها
هاج هذني على كدج اكيد روحي للغرفه لبسيهن ومشطي شعرج لان
مخربط كلش
...اي ميخالف
اخذت الملابس وطلعت ورحت للغرفه ودخلت وقفلتها عليه
باوعت الملابس جانت قميص ملون ميت لون بي
وردانه موكلش طويله
وبنطرون مثل الي جانت لابسته لونه كشمشي
كلت هاي شلون راح البسهن عيب اطلع هيج مثل لبس الرياجيل
الرياجيل هم يلبسون بنطرون
بس شسوي هاي مضطرة البسهن
ذكرت اني وام خضر اشترينا غراض هوايه لناهز
كلت خلي اخذ منهن حاجه
بس كلت لاهذا جهاز عروسه موخوش ،،فال،،
المهم لبستهن والله طلعن كلش حلوات عليه واول مرة البس هيج لبس يبين جسمي
وطولي
وباوعت الشحاطه الي جنت البارحه امشي واتعثر بيها حلوة اذا تلبس ويا هذا البس
اخذتها ولبستها
وصدك جان شعري مكفش
فدمرة عبالك جنت بمصارعه
شبيه مو بنيه اني
ليش هيج هامله نفسي
باوعت بالمرايه ومشطت شعري وسويته ظفيرة
واني شعري طويل
ومسحت وجهي بالخاولي وخدودي حمر صارن
كلت لروحي
اي طلعت اني الي جني العافيه ههههه
ضحكت على نفسي
وطلعت من الغرفه ودخلت للحمام غسلت ملابسي
وطلعت شريتهن ورا البيت ورجعت للمطبخ من دخلت للمطبخ شفت
كميل كاعد
جان ديحجي وياامه من شافني سكت وبقى يباوع شويه ودار وجه
ندارت امه وكالتلي
...ها بدلتي ملابسج
..اي بدلت
....الله حلوة عليج نفس قياسج بالضبط
...اي صحيح اشكرج
...تعاي كعدي تريكي حتى من يطلع كميل
يوديج للمستشفى
...اي
ورحت كعدت وهذا ابو دم الجامد يباوع من جوة ليجوة
وماحجه بعد شي
ابد
وكمل ريوك وكام وكف واشرلي بيدة يله
سلمت على المرة ومشيت ورا
وهو طلع من باب الخشب طلعت ورا
يمشي هيبه
وعبالك جبل
وانيق وعطرة يفحفح
صعد بالسيارة واني وكفت ماصعدت رد نزل
...شو ماصعدتي
لو تريدني اشيلج واصعدج اني حاضر
....لالا لاعيني اني اصعد شبيه
فتحت الباب الورا وكعدت باوعلي بالمرايه
...ليش منو كلج اني سايق
...شنو شسويت
...تعاي كعدي ليكدام
...بس هنا مرتاحه
...بس اني مامرتاح
لتخافين مااسويلج شي
....اي
نزلت وكعدت بصفه
عدل مناظرة وشغل السيارة وطلعها من الكراج ومشى بسرعه
كلي
...ذكريني بااسمج مرة ثانيه
...بان
...بان هههه
...اي
....مراهملج يعني انتي يرهملج بدريه فوزيه سعديه
ردت انفجر بي بس سكتت ومجاوبته
.....اسمي بدريه بس اني مااقبل احد يكلي بدريه احب يصيحولي بان
...ليش اسم بدريه كلش حلو عليج لايكلج
....عشتوووووً
...شنو شكلتي
....ماكلت
لمحت طيف ابتسامه على شفايفه
كلت هذا هم يضحك مثلنا
...صار عندي فضول بخصوص شي
....شنو
...بقى ساكت
...لاماكوشي
وبقى ساكت وصلنا للمستشفى ودخلنا جوه
وتمشينا وصلنا للغرفه الي موجودة بيها
وشفنه يم باب الغرفه واكف محمد خطيب ناهز
سلمت عليه وشفته فتح عينه من شافني
استغرب ضحكت كلت يمكن معرفني
دخلت للغرفه وجانت الغرفه بيها هوايه ناس كلهم مكسرين وملفلفين
كلت ياستار شنو هالشوفه من الصباحيات
رحت على ام خصر شفتها ملفلفله تلفلف خطيه عبالك دولمه صايرة 😳😳😳
....ها خاله سلامات هاي شنو
...الله يسلمج بنونه اي بله شفتي على هالحظ المصخم
والكتبه السودة هاي شلون هسه اني هاي نومتي بالفراش بعد
....لا ان شاءالله كم يوم وتصيرين احسن وماكوشي كسور بسيطه
...يابسيطه عظامي كلها طكطكت
...ماعندج غير العافيه
...الله يعافيج هسه شلون مانكدر نرجع وناهز متكدر تجي وخضر هذا ملكوف
ميجي واني هم مااريدة يجي يفشلنا كدام الناس
...اي اعرف خاله هسه الله كريم شوفي شلون
بس انتي انطيني الرقم مال تلفون مال بي

تكم وخلي اخابر ناهز واكللها
واخلي خضر يروح يحجي وياام عصام ويسوك لااهلي خاف ماعدهم مسواك شي
...اي هسه انطيج الرقم وخابري
....وج بان
...ها خاله هاي شنو اليوم شلابسه وشطالعه اعوذو بالله من كل عين شافتج وماصلت على النبي
ابتسمت
...موهدومي صار عليها حليب واخذت من عمته لمحمد ملابس وهي لبسها كله هيج اسم الله على شيباتها
وضحكت
...اي بعد اهل بغداد
...اي يختلفون عنه
...يمه انتي اليوم متلحكج ميت وحدة من بنات بغداد
هاي لو هيجي تلبسين دائما وتشوفين وجهج المرايه
جان هسه دكتور زوجج
...هههههه خاله مو الا دكتور بس لايجيني يبيع خضرة
لو فلاح لو ابو مطعم
وشلون مطعم فدوة
....ههههه نزول عليج يجيج لاتخافين وهسه نزوجج ابن بغداد
مثل خطيب ناهز
...صدك خاله ماسئلتج شلون محمد خطب ناهز
....انتي تعرفين ناهز داوم كليه بغداد
..اي كلتي مرة اداوم قسم داخلي
...اي عفيه بالضبط هي داوم بالكليه وهو شايفها بالكليه
كم مرة وخطبها
...زين خاله ليش مارحتي لبيت اهله ليش بيت عمته
...يمه كلبي مورم من ورا هاي ناهز
عيني اهله ميقبلون بناهز عود لان بنت محافظه وهو حبها
ورادها بلا موافقت اهله حتى من اجى خطبها
محد اجى من اهله اجى هو واحد اسمه سعد
يصير ابن عم كميل
...وشعجب خاله قبلتي
...موهاي المخبله بنتي كالتلي انهزم اذا ماقبلتي وبعد شسوي خفت تفضحني قبلت
...بس مبين خوش ولد خطيبها
...اي خوش زلمه ان شاءالله يسعدها
...ان شاءالله
والله ياحبيبه انتي هم تستاهلين كل الخير
...تسلمين خاله ام خضر يوم الي تفرحين بخضر وزوجي
...ومنيه تقبل بي هذا المخبل ابو الزلابيه
...هههههه خطيه والله على نياته
..اي والله فقير
نفتحت الباب ودخل دكتور
نداريت باوعته ودرت وجهي على ام خضر
اجى تقرب
وكام يحجي وياام خضر
كتله
.....شوكت تكدر تطلع
.....من المستشفى
......اي
......اني كلتله لزوجج منا ليومين
.....زوجي
.....هذا الولد الي برة مو زوجج
.....لا
رفع حواجبه
.......انتي مو بتها
......لا موبتها
.......ها عبالي زوجج عالعموم منا ليومين تكدر تطلع
...اي خوش لعد
...اشكرك دكتور
......لا هذا ياواجبي يا،،.......شنووو اسمج
...بان
...عاشت الاسامي اسم لطيف اشرفت بحضرتج
...شكرا دكتور
...اني دكتور ظافر
...هلابيك
.. وبيج
ابتسم بوجهي وراح
كلبي وجعني يمه شنو هذا من بشر
فدوة شلون وجه
يمه يمه يمه اني من كثر الجميلين الي داشوفهم
كلبي راح يوكف يمه روحي نسحنت 😬😬😬😬
باوعت عليه طلع ورجعت اسولف وياام خضر ومر الوقت
وفعلا بقينا بالمستشفى يومين وبعدها طلعنا
ورحنا لبيت عمته لمحمد
واول ماوصلنا طلع كميل ويا ولد
اسمه سعد
جان اسمراني ومرتب ودمه خفيف يشاقه ويضحك مثل محمد
لمن طلعو تساعدو على شيلت ام خضر
لان ام خضر سمينه بكوة شالوها
ودخلوها جوة للغرفه
وبهاي اليومين الفاتت خابرت اني ناهز وكتلها على الي صار
وكالت اني ادبرها من يمي
فطمنت على امي وابويه
وصارلنا خمس ايام بيت عمته لمحمد
والي صار حلو كلش وخلاني اتمنى ابقى عمري كله بغداد
هو وجود سعد
جان يحجي ويايه بااهتمام
ونظراته فاضحته
بعكس كميل الي دائما ساكت ومايحجي
كلش قليل
سعد ابن عم كميل ولان بيت كميل ماعدهم بنات
فدائما سعد ومحمد يمهم ولان حسب ماعرفت هما
يشتغلون ويا كميل
...بان
...ها عيني
...تسلم عينج سمعت راح تروحون
..اي ان شاءالله باجر
...لا حرامات تعودت عليكم قصدي تعودنا
...سعد
ندار جان كميل واكف على نهايه الدرج
...ها كميل
...بطل سوالفك وتعال داريدك
...اصعد وهسه اني وراك
...يله واكف دانتظرك
صارت عيني على كميل وخزرني ورفع حواجبه
كله سعد لكميل
....اجيت اجيت بعد واكفلي
صعد سعد واني عيوني عليه
اول مرة يصادفني هيج ناس
مثقفين وراقين ويختلفون عن الاشخاص الي اشوفهم
واول مرة احس نفسي مرة وعندي قلب يدك
ويحس بلأعجاب
والحقيقه اني انعجبت بسعد
برغم انو احلى واحد شفته من اجيت لبغداد
لحد الان
هو كميل بس هو مينحب وشايف نفسه
واني حتى من اشوفه بمكان اكوم على السريع حتى لايحجي ويايه
بس سعد لا شي مختلف
ضحكت ورجعت للغرفه وبقيت الم بااغراضنا وبأدويه
ام خضر وبااشيائنا
ورتبت الغرفه لان عيب
وكلت قبل مانطلع الصبح هم ارتبها
هدورة عبالهم مو معدله ومو ام بيت
بقيت اروح منا ومنا لحد ماانتبهت ام خضر نامت
طلعت من الغرفه واخذت اكلاصات جنت داريد اغسلها
وشفت ابو كميل موجود بالمطبخ ديسوي جاي
ركضت عليه
كتله
...ليش ماكلتلي عمو اني اسويلك
...لالالا ارتاحي بنتي اني احب اسوي جاي لان محد يعرف شلون أحبه
...زين جرب الجاي الي اسوي هسه تحبه
...ها يعني اليوم الجاي عليج خلي نجربه
...هسه تشوف شكد طيب
...هههه نشرب ونحكم
...روح واني اجيبلك الجاي
...اي زين هيج
كلت بله هاي مرته متستحي عايفه الرجال الي البارحه اجى من السفر يسوي جاي
وهو شلون انسان صدك من كال اكو ناس مثل النسمه

سويت الجاي واخذت القوري ويايه وسمعت.
صوتهم ديحجون عرفت انو كله

م كاعدين
فااخذت استكانات وخليتهن بالصينيه وخليت القوري وياهم ورحت
للغرفه مال كعدة مالتهم
باوعت جان كميل كاعد وسعد ومحمد وابو كميل وامه
يعني كلهم
دخلت وصار ت عيون سعد عليه ضحكلي وهز كلبي هز
وبكوة كدرت اوصل واخلي الصينيه يدي كامت ترجف
همزين ماوكعت وفشلت كدام الناس
وكعدت وكمت اسئلهم منو يشرب جاي
كلهم رادو
صبيتلهم وكام واحد ينطي للثاني ورت اكوم
كالولي لاكعدي ويانا
وسئلني ابو كميل
....انتي اسمج بان
كميل نط من يمه
...اسمها بدريه
وباوعلي بنظرة تخوف ودار وجه على التلفزيون
...اسمج بدريه
...اي بس محد يصيحلي بدريه يصيحوني بان
...ليس متحبين اسم بدريه
...لا
...ههههه هو الحق وياج لان اسم قديم
لان احنا هسه سنه ال 2001
مابقى هيج اسماء
....اي بس احنا بمحافظتنا اكو هيج اسماء
بس اني سموني على اسم بيبيتي
الله يرحمها
...الله يرحمها
...يرحم والديك ويرحمنا احياء واموات
ابتسم وكلي
...اي انتي شمخلصهً دراسه
...مخلصه ابتدائيه
...ياصف يعني
...خلصت السادس ابتدائي بالدفرات وبالف ذكر الله وعبادة
...هههههه بس المهم خلصتي
..وليش ماكملتي
.... داومت اول متوسط وبقيت شهرين وبعدها شفتها صعب اني ماعندي لااخ ولااخت وابويه وامي اثنينهم مرضه وكبار ميكدرون يشتغلون فااني كمت اشتغل حتى اصرف على البيت
...وصرفتي عد
..اي والحمدلله
... انت شجاعه وقليل الي مثلج وبصفاتج بالذات بهذا الوقت
بس لوكان عندج هدف خلي يكون الدراسه حاولي تكملين
...بعد فات الوكت
...ماكوشي السمه فات الوقت موجود بس احنا مانعرف نستغله هذا الي جالس أمامج الان كان عامل في محل بأجرة قليله جدا عند تاجر ابهارات
بقيت سنوات اني اعمل عندة وماتركت دراستي واني من عائله فقيرة ايضا والدي الله يرحمه كان شيخ جامع يعلم الاطفال بالدربونه مالتنا يعلمهم القران
والدتي جانت أمراة لاتقرأ ولاتكتب
وعندي ثلاث خوات واخ واحد وهما كلهم اصغر مني
اصريت انو اخويه يدرس وخواتي يخلصن دراستهن حتى يكون عدهن سلاح
ولحد الان اصبحن موظفات وعدهن رواتب
وعدهن استقلاليه
واني ايضا كنت اشتغل وادرس
وشويه شويه وصلت اليوم الى هذا المكان
الطموح احنا الي نزرعه بنفسنا بأرادتنا بقوتنا بعزيمتنا
موصحيح يابدريه
...صحيح
من جان يحجي عبالك ديحجي قصه حلوة
شكد حلو المثقف من يكعد يحجي
جان كلامه حلو كلش
بس شفت شي واستغربت منه هو نظرات كميل لاأبو والبسمه الي جانت على شفايفه من جان ابو يحجي
كلت اكيد الي عندة هيج اب
يفتخر بي
ويحبه
وسمعت يكلي
....بس تعرفين شي
نداريت على ابو كميل
...اني داشوفج جدا جميله بكلامج واظاهر الحياة معلمتج هوايه
...اي هوايه علمتني
...الله كريم كلشي تريدي دكدرين تحققي
...ان شاءالله
كام وكف وكال اني تعبان اروح انام وباوع على مرته
وكللها ها دكومين
تنامين
كلتله اي وكلي
..تصبحين على خير
....وانت بخير
باوعت بقيت بس ويا الزلم كلت خلي اكوم احسن
داريد اكول تصبحون على خير
وسمعت سعد يكول
...محمد باجر انت توديهم بسيارتك
...لا
..ليش
...تعرف عندي شغل
....بس ميصير ترة عيب عليك
...عيب شنو هو اكو سايق راح يجيهم يوديهم
بقى يحجون وكميل يباوع عليهم
ولمن ضاج كاللهم
...كافي عد ترة دوختوني كافي خلص سدو الموضوع
اني بقيت بمكاني خفت اكول اريد اروح
باوعلي سعد وكلي
....اني اوديكم باجر
وكام وكف وتمشى وتقرب مني
...تصبحين على خير بنونه
...وانت بخير
ومشى من يمي وسمعت صوت الدرج
ومحمد هم كام بلا مايحجي شي
وبقيت اني وكميل
وباوعت عليه جان كامش يد بيد
وخال رجل على رجل ويباوعلي
كتله
...تصبح على خير
بقى يباوع مجاوبني
كلي
....باجر الصبح كوليله لسعد انو انتو تروحون لتخلي
يوديكم
وكام طلع
بقيت صافنه
وافر بأذاناتي
وكلت لنفسي هو لو اني غبيه ومدافهم هذوله شبيهم
لو هذوله بينهم شي
واحتمال جبير هذا كميل المكروة مريض يجوز عقله ملكوف
على كولت ام خضر
رحت للغرفه ونمت على جربايتي
وجانت النومه عليها مريحه احسن من نومت الكاع الي خشبت ظهري
بس بديت اتخيل واكول
شكد حلو لو اعيش هيج حياة مثل الي عايشتها صار كم يوم
شكد حلو لو ابقى هيج
لبسي اختلف الناس الي كمت احجي وياهم تغيرو
واعيش يومي واني مامضطرة اروح للسوك
واشوف نظرات الي بي
نظرات تخلي كلبي يدك بقرف وبخوف
شكد حلو اعيش واني قريبه على سعد
واشوفه
دائما بقيت افكر واحس النجوم هالليله فرحانه
على كلامي بس ذكرت انو باجر كلشي راح يرجع لمكانه
وكل الي صار راح ينسي
واني جنت افكر وغفيت
وحسيت على دكت الباب
فتحت الباب وكفت وراها
شفت سعد
...صباح الخير
ابتسمت ابتسامه من كل كلبي وهو من شافني ابتسمت هو هم ابتسم
...صباح الخير
....كلت اكعدكم خاف بعدكم نايمين حتى نطلع من وكت
...انت توصلنا
...موكلتلج من البارحه
...ماكو داعي نسوي عليك زحمه
...ماكو لازحمه ولاابد يله روح تحضري
...اي
دخلت وحضرت ام خضر وطلعت الغراض مالتنا باب الغرفه وهو وداها للسيارة
ولبست عبايتي وسلمنا على الموجودين
وط

لعنا
ومحمد وسعد صعدو ام خضر بالسيارة
ولمن جنت داريد اصعد بالسيارة شفت كميل واكف بالشباك مال غرفة الفوك يباوع عليه
ذكرت انو هو كلي لتخلين سعد يوصلكم
صعدت بالسيارة وكلت يله مومهم اول وتالي بعد مااشوفهم كلهم
جان طريقنا متعب
ولكن سعد جان مرح وطول الطريق يحجي ويضحك ماحسيت
الا واحنا واصلين ونزلنا من السيارة
وسلمت على سعد
وشفت سيارته تبتعد حسيت
اخذ شي مني وياه
ورجعت حياتي نفسها سوك وخبز وخضرة وتعب
بس مراح عن بالي سعد
وبعض المرات الكي نفسي افكر بكميل ونظراته
وعيونه وكلامه
بس ماجنت اعرف الي راح يصير والي راح يغير حياتي
ويخليني اسد كتاب من حياتي وافتح كتاب ثاني
.......
حياتنا عبارة عن أوراق
بعضها تكون ورقه تحمل
الكثير من الأمل وبعضها
تبدأ بنقطه سوداء وسطر
طويل وبعض الكلمات
الغائمه وبعض قطرات
الحبر الحزينه فأيهما
ورقتي القادمه وأيهما
سوف تغير حياتي
يتبع....
#الكاتبه #روجمان

.....البارت الثالث.......

......
نتألم ليس لشيء انما
بعضنا نخلقو لكي
يتألمو فقط ولايهم السبب
فمازال الغموض يغلف حياتهم
....

((مرات نحس نفسنا بحلم ومرات
هذا الحلم مع مرور الايام يتحول لشي قوي ويخلينا نضعف وتمر الأيام
و نشتاق لماضينا
لان الحاضر راح يكون موجع اكثر من الازم
ويمكن حياتنا مثل هبت الهوى الى تصير قويه
وبيها هوى بارد ورياح قويه تعصف بينا واحنا بنص هاي الموجه
لازم نواجهها او نكون مثل الي واكف وكدامه نار
وبظهره نار لابي يوكف والنار تلتهمه ولابي يتقدم
ويحرك نفسه بيده
بس تالي المطاف لازم يجازف بس ياترى كلشي بهاي الحياة يستحق المجازفه
وليش احنا لمن نجازف
نجازف بااشياء فوك طاقتنا وفوك قدرة تحملنا
وفوك مستوى احلامنا
مرة كلتلي بيبيتي
بدريه اذا جاج يوم والله دزلج حاجه اكبر منج
لاتاخذيها لان الحلم من يكون اكبر منه
راح ينهدم فوك راسنا ويخلينا ‏جوا ترابه )))

،،،،،،
بعد مارجعت تقريبا بشهر وبيوم الظهر
سمعت الباب تندك قوي
رحت ركض وعبالي صاير شي
وصلت للباب واني الهث
....فتحت الباب
شفت ناهز واكفه وعبايتها على راسها وذيال العبايه مليانه تراب
بس ضحكتها تارسه وجهها
كتلها
...هلاناهز خير خوما امج بيها شي
...لا ولج ماكو شي يمه شكد فكريه شبيج تتلكين العالم بالشر
داريد افرحج
..شكو
...وج يامسعدة يامبخته نيالج عيني طلعتي هم محظوظه
...شكو دحجي موسحبتي روحي مني
...سعد يريد يجي يخطبج
......سعد منو
.....سعد وج
عرفته
وصفنت وكأنما الدنيا شالتني وحطتني
كتلها
...صدك تحجين
...اي بالله وبنهايه هذا الاسبوع يجي هو وامه ومحمد هم يجي وياهم
...لاممصدكه
...ليش مامصدكه
...معقوله يباوع عليه اني وهو شاف مني اشو السالفه ماداخله عقلي خاف ديقشمر عليج
...اني ماحجيت وياسعد
.....لعد منو كلج
....محمد هو كايل لمحمد
وليش ميباوع عليج قابل شبيج وسكتي وفرحي ولصيرين خايبه ومتعرفين مصلحتج انتي مصدكه مكذبه
بقيت ساكته
ردت كالتلي
....يله خلي اروح الشمس تجوي جوي
وانتي بعد رتبي نفسج على نهايه الاسبوع
...اي خوش خوش روحي الله وياج
ودخلت وسديت الباب وظليت واكفه ورا الباب واضحك وفرحتي جبيرة
ممصدكه سعد يريدني وراح يزوجني
واني كلبي رف اله
وعيوني هوت خطواته
بس رجعت كلت واهلي شلون وين يروحون
شلون اني اتركهم
ورجعت فرحتي نكسرت وسكتت
وماحجيت شي لأهلي ومن شويه كسرت الشمس
لبست عبايتي
وشلت جزداني وكلي ابويه
....بدريه وين رايحه مومن عوايدج اطلعين هيج وكت
....داروح على خاله ام خضر دزت الظهر عليه ناهز اشوفها شرايدة واجي
وامي من يمها
....اي ظلي منا ومنا
.....استغفرالله توب عليه ياربي
عدلت العبايه وطلعت بلا مااحجي شي وياها
وصلت لبيت
خاله ام خضر
ودكيت الباب وطلعلي خضر وبيده جيس مال شكر
ويضحكلي
كتله
..... هلا خضر وين امك لعد
....جوة دخلي هسه اجي اسويلج جاي يخبل مهيل
....لا مااريد روح كمل شغلك داريد احجي وياخاله
....اجي اكعد يمكم
....لاعيب تكعد يم النسوان روح اشتغل
....اي زين راح اروح
.... عفيه عليك
دخلت جوة وخاله ام خضر كاعدة تاكل
.....هلا خاله شلونج
.....هلا بان تعاي يمه اكلي
......لاخالتي بالعافيه
كملت وكمت اسولف وياها
....خاله اني شايله درد اهلي شلون اعوفهم منو الهم
كالتلي
...شوفي بنتي هذا زواجج فرصه وجتي يم رجليج
وراح تروحين تعيشين بغداد وابوج وامج مومايمشون يمشون
بس هما مايتحركون و معتمدين عليج
واعتمدو اكثر من الازم لحد ماكسرو ظهرج
.....ميخالف خاله هما ربوني بالضيم شلون اعوفهم
....شوفي حبيبه اني راح ازوج خضر بيت الصغير مالتي الي ورا السوك
وناهز راح تروح لبغداد مثلج
واني راح ابقى وحدي فأمج وأبوج يعيشون يمي ويأجرون بيتهم ويعيشون بفلوسه ولو هو خرابه وتريدين الصدك اني احب امج وابوج رجال فقير
واني اخاف ابقى وحدي
وهم اريدهم ونس ويايه على كلمه على نفس
...لا خاله شلون يصير
...ليش ميصير تصير وانتي سهليها خلي تمشي الزوأجه
هاي فرصه ماتتعوض ابد
وترة اذا ماصارت تندمين طول عمرج
...ان شاءالله تصير واني رايدتها بس مامرتاحه لعوفت أهلي وداحس اني داتخلى عنهم وهما بحاجتي
.....اول وتالي تزوجين وتعوفيهم هاي دنياج هيج ماشيه يابنتي
وشوفي بان مبين الولد رايدج وشاريج ولاجان مااجى
ومنا لفترة بلكي تكعدين بيت وحدج وتقشمري وتاكلين عقله بهاي العيون الي تخبل وبهذا السان الطيب
وتخلي يجيب اهلج يمج يعيشون يمج
هي كلها فترة بنيتي
....ماادري والله شو السالفه مامريحتني وليش عود اني ياخذني شنو قحط بنات
يعوف بنات بغداد ويجي يخطبني
...موناهز هم اخذها ابن بغداد ماتفرق بنتي القلب ومايميل واكيد الولد كلبه مال الج وعيونه هوت حسنج
...دايخه خاله وكلبي ماناطيني اعوف اهلي
....تهون هونيها حبيبه
...الله كريم خاله بس اهلي شلون اكللهم
...اني اعلم ناهز وافهمها وهي تجي تحجي وياهم
....ان شاءالله شوفي هي شلون تدبر
رجعت للبيت وبقيت حايرة
وبقى سؤال يتردد بالي

ليش اني معقوله حبني
يجوز نعجب بيه وليش وليش
وميت سالفه دارت براسي ويمكن
هذا الشعور جان ناتج من أحساسي بأنو اني اقل منه بهوايه
مر يومين وفعلا مثل مااتفقنا اني وخاله ام خضر
ونفس الكلام الي حجينا وصل لاامي وابويه عن طريق ناهز
واليوم العصر وصلي خبر انو سعد باجر يجي
وماعرفت انام وجنت اخاف اغمض عيوني
اخاف اصحى من هذا الحلم
كمت اكول لروحي هيجي واعيش غير حياة واعوف
كلشي ورايه وهيجي واصحى على دنيا مرتاحه
ومابيها قهر
وثاني يوم اجى سعد وجان لازم يحجي وياأهلي
ويخطبني من ابويه
وبقيت على نار خفت يغير رأيه وميجي

بس اندكت الباب وركضت عليها
وفتحتها
وباوعت على سعد وضحكت وجهي نور
وشفت محمد خطيب ناهز واكف بصفه
كتلهم
....تفضلوًً
كلي
....شلونج بان
...اني بخير اسئل عنك
...اكيد بخير
وضحك
وسلمت على محمد
ودخل جوة بس مجانت وياهم مرة
جانو وحدهم
ولمن دخل سعد بقى يباوع
على البيت
وعرفت من نظراته انو هو معاجبه البيت ويمكن ديكول بينه وبين نفسه هذا المكان مو من مستوايه
بس برغم هذا
هو دخل وكعد وسلم على اهلي وبدا يحجي
وياابويه بكل احترام
وبوسط الكلام
سمعت صوت الباب تندك
رحت وفتحتها جانت ناهز
كتلها
..يله دخلي
دخلت جوة واني رحت للمطبخ
اسوي جاي احنا ماجان عدنا مطبخ
عدنا
هيجي غرفه ورا البيت مسكفه وبصفها حاطه تنور
وجان اكوً
حمام خارجي
واني مندارة وسمعت صوته وكلبي رجف عالسريع
كلي
....بان
نداريت
...عيوني
...تسلم عيونج
...ممكن دكوليلي وين الحمام
...هذاك
واشرتله
...شكرا
...تدلل
خليت الجاي على النار ورحت ركض جبت الخاولي
وخليته بيدي وكفت انتظرة
ولمن طلع وشافني
وابتسم انطيته الخاولي ومن كمل اخذته من يده
بقى واكف وعيونه تتفحص كلشي
اول مرة اخجل من المكان الي عشت بي عمري كله
،،،،،،،،،،،،،
اول مرة اخجل من نظرات انسان
واحس بأنو اني صدك اقل من غيري
وبعدها دخل جوة ورجع يحجي وياابويه واني
خلصت الجاي
وصبيته ودخلت جوة وقدمتلهم
وكعدت اسمع شيحجون
وصار هوايه كلام بس ماجنت منتبه على اي كلمه
برغم حجيهم عني لان جانت اكو غصه بكلبي
بس سمعت سعد يكول لاابويه
....لتخاف عليها بان اخليها بعيني وصدكني اني
رايدها لان مو مثل البنات الي بجوي
لان مختلفه
.....كله ابويه
.....اني مااكدر اكلك شي اذا هي متوافق والناس ياابني مبينه وانت مبين خوش انسان وبيت ام خضر مدحو بيكم
.....ان شاءالله اكون عد حسن ظنك
.....ان شاءالله بقى بدريه دكولك اي او لا
بقيت ساكته وخجلت وسئلني سعد
....هابان شدكولين
....بكيف ابويه
....كال ابويه
.....لعد خلي نقرأ الفاتحه
وكعد شويه سعد واتفق انو بعد تلث ايام يجيني حتى نروح نرتب اجراءات الزواج
وراح سعد بس اني
كلبي يوجعني ومامرتاحه اكو شي كاسر الفرحه
بكلبي مدااعرف شنو
والتفكير تعبني بس لمن جنت اتخيل ملامح سعد وضحكته وابتسامته وصوته الدافئ اضحك
واروح بدنيا ثانيه
ومر ت لثلاث ايام واجى سعد ورحت وياه لبغداد وجانت ناهز ويانه واشتريت ملابس على ذوق سعد
وبعدها
بكم يوم خابرني كلي راح اجيج حتى نعقد
وتحضرت على اليوم الي يجي بي
....بدريه
...ها يمه داسمع صوت سيارة يمكن اجوي
....اي سمعت بس دقيقه
طلعت لاامي لابسه من البس الي اشتريته
جان تنورة طويله وسترة لونها جوزي وسويت شعري
ظفيرة واني مااخلي مكياج ومااعرف اخلي
امي من شافتني كامت تهلهل وكالتلي تعاي وحضنتني
وسلمت على اهلي وطلعت
شفت ناهز واخوها
ضحكت كلت يبووو هذا خضر وذكرت
ام خضر كالت يجي وياكم خضر لان لازم وياكم رجال خوما تروحن وحدكم للمحكمه
صعدت للسيارة وخضر وناهز هم صعدو ليورة يمي ومحمد كاعد ليكدام
سلمت عليهم
ولمن صعدنا كلنا شغل سعد السيارة ومشى
و جان يباوعلي بالمرايا الكدام
واني كلما تجي عيوني بعيونه اخجل وخدودي اصير نار
سمعت محمد يكول
.....بان
..نعم
.....اليوم راح تبقون بيت عمتي وباجر نروح للمحكمه
سعد كملها المعامله مال زواج
بس بقت على جيتج
...ليش مو اليوم
...لا طبعا شوكت نلحك وطريق ورانا علما نوصل تعبانين واحنا طالعين فايت وكت
باجر ان شاءالله الصبح
.....ان شاءالله
وبقيت ساكته بس المشكله انو سعد ماحجى
ويايه ابد
وعبالك باله مشغول بشي بس جان يباوع
وبقيت اني هم ساكته لحد ماوصلنا لبيت كميل
نزلنا ونزلت الجنطه مالتي
ودخلنا جوة وشفت ام كميل وسلمت عليها وبوستها
وزوجها هم سلمت عليه
وكعدنا شويه وبدينا نسولف
ومااعرف ليش اجى بالي كميل وردت اعرف وينه
بس محجيت لان هذا الشي ميهمني الي يهمني سعد
وهذا اليوم بالذات احس نفسي كلش تعبانه فدخلت نمت من وكت
وحسيت ثاني يوم من وكت
كعدت ناهز وكمت اتحرك بسرعه فرحانه واضحك وبدلت ملابسي وحتى ريوك ماقبلت اتريك وفتحت باب الغرفه وكفت
وبقت عيني على الدرج
جنت اريد اشوف سعد وينه
وشوكت ينزل
بس شفت كميل نزل وجان شعرة مخربط وخال يده بجيب بالروب مالته
دخل للمطبخ وكف يم الثلاجه وطلع بطل مي وبقى كامشه وباوع عليه من فوك ل

يجوة
ودار وجه وراح للميز لان سمعت صوت الكرسي ينسحب
دخلت للمطبخ
وكتله
....صباح الخير
مجاوبني وكام مرة ثانيه
فتح الثلاجه وطلع منها باكيت ماادري مال شنو
وحطه على الميز
وصار وجه بوجهي
كلي
....مبروك
...الله يبارك بيك يوم زواجك
ونفرح بيك
.....انتي متاكدة من اختيارج لو مومهم انتو عدكم بس زواج وبس
رفعت حواجبي وبقيت ساكته ماعرفت بشنو أجاوبه
رجع كلي
....جنت متاكد انتي متفتهمين ومراح دكدرين اجاوبين
بقيت صافنه هذا ليش هيج يحجي
اني شمسويه اله حتى هيج يسوي ويايه
ابتسم بوجهي وكلي
....اذا دتنتظرين سعد فهو ماموجود بالبيت
طلع
....بس هو كلي
....اعرف كلج تروحون للمحكمه اتصور يرجع بعد شويه
وضحك بااستهزاء
ورجعت للغرفه وخليت يدي على خدي
وكعدت وبقيت انتظر والانتظار كلش مملل
ضجت وكام يرن بأذاني
كلام كميل
وسمعت صوت الباب تندك
فتحتها جان سعد
....صباح الخير
...صباح الخير وين جنت
ضحك ومجاوبني
...يله تحضري
...مخلصه اني ودانتظرك
...يله لعد وين ناهز
....بمكن اجى محمد وطلعت بالحديقه وياه
...زين يله امشي
طلعت من الغرفه ومشيت ورا
ودخلنا لغرفه الكعده مالتهم وشفنا كميل
كاعد
سعد كله
....ها كميل كاعد عبالي نايم
مجاوبه
اشرله يعني تعال باوع عليه وكلي
...انتي طلعي هسه اجيج واذا شفتي ناهز ومحمد كوليلهم يله
...اي خوش
طلعت وشفت محمد وناهز وكتلهم
واجوي وكفو يم السيارة
وشويه وطلع سعد بس جان ضايج
اظاهر كميل كله شي ضوجه ومحمد بقى يباوع عليه
وعبالك يعرف بلي كاله كميل لسعد
حسيت بينهم شي بس مداكدر اتوقع شنوهذا الشي
صعدنا بالسيارة وساق سعد
ورحنا للمحكمه وعقدنا القاضي
وصرت مرت سعد الدنيا جانت مسايعتني وفرحانه
بس اول مارجعني للبيت وشفت كميل كلبي نكرب
ونخمط ومااعرف شصار بيه
وهو جان ميحجي بس يباوع واذا يحجي
يحجي حجي
مامفهوم وسعد عبالك مامهتم
بس اني ردت ابقى بفرحتي
ويمكن فرحتي خلتني انعمي عن تصرفات الداير مدايري
اتفقت وياسعد انو ثاني يوم ارجع لااهلي
وخلال شهر نزوج
بس هو كال لا نزوج خلال اسبوع كلي مااكدر بدونج اريدج يمي وفعلا قبلت ورجعت لااهلي وسويت حفله جانت حلوة وبسيطه والناس الي بيها هم بسيطين
وبعد الحفله بيومين اتصل بيه وكلي بعد باجر اجيج واخذج ونروح لبغداد
هناك تلبسن بدله بيضه ومرت عمي تسوي حفله بسيطه ونطك صور لان كلي هاي الصورة راح اظل ذكرى
حلوة
وبهاي اليومين رتبت كعدت بيت اهلي يم ام خضر وبقى البيت ام خضر كالت اني اشوف احد يأجرة
وكلت اني هم ان شاءالله اساعدهم
من ازوج سعد
واجى اليوم الي لازم يكون احلى يوم بحياتي
وقبل زواجنا بيوم اجاني سعد واخذني
جنت اتمنى ازوج والناس الي اعرفهم داير مدايري ويفرحولي اسوء شعور تعيشه العروسه هو عدم وجود اهلها
لان امي ماقبلت تروح كالت مريضه مااكدر وابويه هم
بس ناهز علأساس محمد خطيبها يجيبها
واجاني سعد واخذني ورحت لبيت عمه وبقيت ليله وثاني يوم كان اليوم الي البس بي البدله البيضه اليوم الي راح تكون بي
الاحلام نهايتها سعيدة خلصت الحفله واني عندي شعور الغريبه واول ماوصلنا لبيت سعد
واول مادخلت وياسعد لغرفه وحدنا
كلي
....اني تعبان وراح اروح انام وانتي هم اكيد تعبانه روحي نامي
وطلع من الغرفه وسد الباب
كعدت على الجربايه وبقيت ساكته وبعدها نمت
وبقيت للصبح نايمه بدلتي
وحسيت الصبح احد يكمشني
......بان
فتحت عيني شفت سعد واكف وعاكد حواجبه
...صباح الخير سعودي
....ياخير هذا نايمه بدلتج انتي شنو متفتهمين
...شنو الي سويته
...كومي نزعي البدله
...اي هسه
ضحكت بوجه وبكلبي بركان ديثور
طلع وسد الباب وكمت انزع بالبدله ودموعي تنزل
وفجأة حسيت غربتي زادت وكلبي بارد
وخالي
بس كابرت ومسحت دمعتي
وطلعت وبديت اتصرف وياه كلش طبيعي
ومر اليوم وبعدة يوم واني انسانه على الهامش
حتى السرير ميجمعني بي هوايه
ومرت 4سنوات وشهرين 4سنوات مخنوكه بعبرة سنوات عبارة عن صورة
واني مبتسمه بيها بس خلف كل ابتسامه حزن جبير
بس اني حبيت سعد بكل ذرة املكها جنت اشوف الدنيا بعيونه واحس الحياة بأنفاسه
بس هو دمرني حتى اهلي بعدني عنهم
وكام ميخليني اشوفهم ومن بعد زواجي بسنه مات ابويه
وبعدابويه بست اشهر ماتت امي
سعد حطمني جان بارد يطلع كل الوكت
والشي الوحيد الي جان مهون عليه الي عايشته ابني
يوسف الي اجى لدنيا من بعد زواجي بسنه وهسه راح يصير عمرة 3سنوات
حياتي مابيه معنى
وكل كلمه وسعد يكلي
انتي متخلفه بدائيه متعلمه تفترين بالسوك
تبعين خضرة
متعلمه تخبزين
وبعض المرات يحجي بطريقه تجرح جدا بس
جنت مااحجي وياه شي واضحك وابتسم بوجهه
لان جنت احبه وبيوم الي جان يلمس حضني احس الدنيا كلها
نامت بين عيوني
من كثر حبي رضيت بقسوة الاحوال الي عايشتها
وخفت على يوسف
وخفت ارجع لنفس المكان الي عفته قبل 4سنوات
وخفت لان مابقى عندي احد
لهذا سكتت حتى لمن
اكتشفت انو اهله مقاطعي من زمان وكل هاي الفترة مافكرو يشوفو او يشوفون حفيدهم
واكتشف العلاقا

ت الي يسوها سعد وياالنسوان
وهوايه اشياء وهم سكت
وجنت لمن
اطلب منه اطلع يكلي
انتي متعرفين تحجين مااكدر اكعدج بمجتمعات راقيه
وجان يكلي ثقفي نفسج اقري كتب تعلمي
غير من نفسج
وحتى اتغير لخاطر عيونه بديت اقرا كتب
ماتنعد ولاتحصى
بديت اغير ‏طريقة كلامي واسلوبي
ولكن هم مافاد
المكان الوحيد الي جان يخليني اروحه ومرات جدا قليه بيت عمه بيت كميل
وكميل لحدالان مازوج ومحمد من بعد سنه من زواجة
من ناهز نفصل عنها وهم مازوج بعد
والاشخاص الوحيدين الي جان يثق بيهم سعد ويدخلون لبيتنا
ومايخجل اني اطلع كدامهم واحجي وياهم
هو كميل ومحمد
ولكن كميل تغيرت بي الاحوال وصارمن اكبر تجار العراق وكان شغله ويا سعد ومحمد
ومجان سعديكلي اي شي عن شغلهم بس بعض المرات
جنت اسمع كلامهم
والي اعرفه انو هما يجيبون مرمر من خارج العراق ويبوعو
للاغنياء والي يبنون اقصور
ولمن تغير وضع العراق كام دائما سعد يكول اريد اسافر الوضع موزين وبعض المرات اشوفه مايقبل ينام والسلاح ميفاركه
لحد ماقرر انو هو بعد ميكدر يعيش بالعراق
لان ديصير عندة قلق مستمر
وبيوم وليله ‏فجأة قرر انو احنا بعد كم يوم لازم
نروح للاردن
وفعلا مثل ماراد صار وسافرنا وماكدرت ارفض
ولاتهتميت انو ارفض لان ماراح يتغير
شي اذا هنا او اذا بغير مكان
اني نذرت حياتي لاابني يوسف
ولمن سافرنه بفترة كصيرة اجى كميل واجى محمد
ومنا بدا كلشي يتغير بشكل اكبر وكلشي كام يبين
والغواش الي كان مالي حياتي
بدا ينجلي شويه شويه
بس بقيت حبيست كلبي وحبيست مشاعري
يتيع ...
#الكاتبه ‎#روجمان

هههه..لاتتعجبين😅 حبي اكو هج امهات قلة يمشون عل نمط القديم..انو البنت ماتحف اله ببيت رجلها

بس اشويه اشويه رح تقتنع ..حاولي تحجين بهدوء..كوليليها فشلة اكعد كدام خطيبي واني مشعره😅.
.....هج كلمات بسيطه احجي وياها تحن وتقبل..❤️

فاذا عاجبج مشقر ..عادي حبي ميضر وتكدرين تستعملي

بس اذا عاجبج تحفين..عادي كوليلها بكم حجاية يجوز تقبل

#ملوكه

باعي حبيبي..الوالدة مسويه دايت ومسويه عمليه..فأي منتج تاخذين مارح يفيد☹️

لان والدتج محتاجه فيتامينات ..صار عدها نقص....ابسط شي الوردة من مانسيقها ولانخليلها شمس ..تذبل

فنفس الحالة احنا..من مانشرب ماي وماناكل الاكل الصحي..الوجه يذبل ويصير شاحب
فانتي عالجي الجسم من داخل..حته من خارج يتعدل وتبين كل النظارة🥰

حاولي تسويليها نظام غذائي متكامل..يعني سوي جدول للاكل الصحي ويشمل كل فيتامينات🌚

الريوك يوميا خل تشرب حليب و تاكل ضروري بيض .
وتكدرين تنوعين ببقيه ايام..يعني يوم بيض مسلوك وثاني يوم طرك..الخ

وكت الغده..عادي خل تاكل تمن وخبز..بس كحجم طبيعي..وحاولي تخلين بالغده..يوم دجاج ، يوم كباب لو يوم سمج..الخ

عصريه بحدود 6 ..قبل العشه
سويلها ماعون فواكه..ووياه مكسرات

وبليل شي خفيف من معكرونه لو زلايط وكثري من السبزي ..من ريحان وكرفس وكراث...الخ هذيني اهم شي بكل وجبه كون تحضري

واهم شي لازززم تشررب اهواي ماي..هاي اهم الخطوة ☺️👍

#ملوكه

وخصصي فد يوم بالاسبوع ☺️سويلها ماسك بياض البيض...حته يشد البشرة ويزيل تجاعيد

وكل 3ايام سويلها ماسك اللبن والخيار
ولاتنسين خطوة ترطيب🌸

وهذيني الماسكين كولش زين للنضارة البشرة

ف ماي +فيتامينات (الاكل الصحي)+ماسك
رح تحصل عل جسم صحي وبالتالي البشرة تتعدل وتصير صحية😍❤️


#اعادة_توجية_للفائدة
#ملوكه

هلو سندويشات اشونچن
اريد احجي شويه عن المراه بالمجتمع وبشكل خاص بالحياه الزوجيه وأغلبنا نديمه مشاكل ويه جويسم وزعاطيطه ....

اول شي أغلبنا أزواجنا يحبونا ❤️❤️❤️لتكولين زوجي ميحبني لكن يختلف التعبير عن الحب وطريقه كسب الزوج من شخص لآخر واكو كتاب اسمه لغات الحب الخمسه
يعني بالجلفي زوجج لو ابو بطن اطبخيله راح يكيف واكو واحد ميهتم بالأكل مو تكعدين تطبخين وتنفخين وتكولين زوجي حته مكلي عاشت ايدج 😡😡 او عجوزي يحب كلشي جاهز يلكا حته جواريبه تحضيرها اله

او زوجج يحب تشجيع وكلام حب يعني دايما انفخي😜😜 انته ماكو منك انته حلو كفشتك بشده عيونك يدوخن😂😂 اكو ناس تحب مدح واكو لا
اكو ناس تحب هدايا 😳😳هاي اني حاولي تشوفين شنو اهتمامه بالفيس مثلا قميص عجبه او تلفون او ساعه او شنو يحب جويسم وهاي الأغلب يحبها
اكو رجال المراه الرومانسيه 😜😜 كل الناس عدها رغبات وهذا زوجج لاتستحين وكوني جريئة ودايما خلي يتفاجأ بيج بس مو تتهورين وتلبسين فسفوري😡😡وبعد هواي حجّي طولت عليكم المهم

اخر شغله واريد رايكم وهذا سوْال حته لو بينكم وبين نفسكم تسالو???

بنات ليش تساهلون بخيانه الزوج الشي الوحيد المكاعد افتهمه يعني ليش احنه دايما نضغط ع نفسنا ونتحمل وعلمود شنو يعني اغلب البنات من تكولون زوجي خاني يكللولها كصي شعرج وحطي مكياج وبدلي ستايلج😂😂😂 صدك تحجون لو تحشيش لاجديات اريد اعرف مثل واحد بي سرطان واحد يكله نكع رجليك بمي وملح😡😡
وكأنه دنكافأ الرجال بخيانته ونكلها اي انتي المذنبه ومنج التقصير

تره اغلب النساء متشوف الصالون غير بالسنه مره يوديها جويسم ومن وره خشمه ويجوز مصرف خاص شهر كامل ميطلعها ٢٥ يعني مااضن اكو وحده دزها رجلها لجويل ومقبلت تروح وتلكه زوجها فانيلته مزروفه واذا تعطل الغده ١٠ دقايق يكلب الدنيا

ياريت ننطي لنفسنا شويه قيمه وتقدير واحترام واذا حيينا نغير فلنفسنا ومنتهاون بالخيانه لان الزواج رابط مقدس والزاني المتزوج شرعا يرجم حته الموت مو تسوين ستايل جديد سندس 😡😡😡


#اعادة_توجيه_لغيرج_للإفادة ❤️
#ملوكه