تعاي تعاي وسحب راسي ع صدره ومد ايده
ع عيوني يمسح بايده وباسني من راسي
وخله ايده ع كلبي وكال اهدي محد يجبرني
ع اذيتج ابد..

عقيق.. رفعت راسي وعدلت كعدتي وكتله ليش
سكتت ماحجيت كدام خاله وكلت ارفضهه
شوسكتت؟؟

السبع.. والله عقيق انه رجال جبت عمري حاضن سلاحي
استحي من مواضيع النسوان ماكدرت احجي واهدي بيج
واسكت كدامهه واكلج حبيبتي وعقيقتي هاي وصلنه
للبيت وشتردين احجي..

عقيق.. ماتزوج عليه؟
السبع.. شتزوج هو انه متمم زواجي الاول حته اتزوج
الثاني گبل اتذكر ابوي جان من يكعد يكول لو يخيروني
امك بچفه والدنيا وملك من چفه ثانيه اختار امك

وهسه انه اكلج لو يخيروني بكنوز الدنيا كلهه ماابدل
شعره منج انتي تمشين ويه دمي ربيتج ع ايدي طفله
صغيره وكبرت كدامي شويه شويه شلون ابدلج وانتي
عوض الهي عن تعبي وصبري...

عقيق.. ممم كلبي بعده يوجعني
السبع.. يابويه كوه تريدين تفتحين باب الجهاد
والله بعد ماعندي صبر جنت گبل اصبر هسه الحيل
وياج راح

عقيق.. ميلت راسي ع كتفه حاوطني باديه ومددني
ع الجربايه مدد بصفي وايده جوه راسه خله ايده
ع كلبي من جوه القميص وكام يحرك بصوره دائريه مثل
كل مره ...

بديت اهدء واني مغمضه عيوني دك تليفونه بوسط
هدوئنه جان ضرغام يتصل وكاله انتظرك ع الشارع
سده منه وظل يلعب بشعري كال نامي انه اجيب عشه
وياي من اجي ...

غفيت ع لمساته وغطيت بنوم رغم جنت بوضع صعب
بس بسرعه تبدد الشعور عندي وتحول الى شعور حلو
ومريح واطئنيت اكثر...

لبابه.. من رجعنه للبيت جراح سبح وطلع راحن ويانه نوال
وامهه ورجعن ويانه بس اي حديث بينهه وبين جراح ماكو
لاحظته ابد ماباوعلهه ولا حته لفظ اسمهه..

عندي الم بظهري قوي مددت شويه دك تليفوني نور
استغربت شعدهه متصله فتحت خط حجتهن دفعه وحده
نور.. لبابه ماعندي رصيد بس ديربالج من هاي نويله
الحيه سمعتهه هي وايناس يتفقن يروحن لام عواد الكشافه
بذاك الصوب كلي لعمه زينب حته تراقبهه..

خلص رصيدهه وهي بعدهه تحجي بعد عوزني بس
السحر هو جراح وضعه موتمام وانوب سحر حته
يكوم يربطني خاف الليله الاولى عدت..

طلعت صحت عمه حجيتلهه كالت لاتخافين عيني عليهن
حته مااخليهن يطبخن ويتقربن للاكل شفت ابرار كالت القبولات
طالعه خابري جراح يجيب قبولج

ركضت للغرفه دكيت علي كال هسه اروح اشوفهن
ماطلعت من الغرفه ظليت مدده واتابع تلفزيون
صار قريب المغرب طلعت للمطبخ اني وابرار نسوي عشه

نوال وامهه بغرفه خاله وماالهن علاقه بينه بس
اني اخاف من الهدوء احسهن مثل جبار يكيدن
مكيده من يهدأن ...

لليل اجه جراح كال متعشي عفت العشه وركضت
للغرفه كتله شطلع قبولي جان واكف يفتح بقميصه
كال تربيه مبروك وابتسم

اني راضيه بقبولي الحمدلله كلشي يجي من الله
يفرحني نزع قميصه وشمره ع الجربايه وظل بالفانيله
الداخليه دار ظهره للكنتور يطلع ملابسه

عيني ع اكتافه شلون مشخطه اخذ تراك وكال راح اسبح
بس اريد تكويلي القميص الرصاصي باجر عندي مقابله
ويه الآمر هزيتله راسي وهو راح للحمام واني كويته
وعلگته

من طلع فاجأني وهو يفرش بالكاع كتله ليش ماتنام
ع الجربايه؟؟ حاجاني بتعب
جراح.. تعبان حيل ومااكدر اخذ العلاج خاف مااسيطر
ع حالي خليني انام هنا اليوم

لبابه.. شبيك اليوم مو ع بعضك صاير شي؟
جراح.. لا ماصاير شي بس العلاج تعبني جذب اي تحسن
ماكو اخذ العلاج زين اتركه اتخبل تعبت يالبابه
ومنظر هذيج الجثث والبنات العاريه وهي تطلب الرحمه
كدامي ..

لبابه.. جراح قبل شكم يوم قريت بالتلفزيون يكول الشي
الي يأذيك وتخاف منه احجي اكثر من مره حته تخلص
منه اذا تظل كاتمه بداخلك تتعب

جراح... شحجيلج؟
لبابه.. المريت بي كله الشي اليسيطر عليك احجي
جراح.. تعالي افركيلي راسي خليني اغفه واقفلي الباب
لحد يجي ويشوفنه بهيج وضع

لبابه.. تقربت يم راسه خليته ع رجلي كمت افرك بكصته
والعب بشعره شويه وهو مغمض شويه وحسيته غفه ظليت
اباوعله احبك رغم اذيتك ...

رجعت لفراشي مددت جانت الساعه هستوهه ب8 مومال نوم
بس هو نام تعبان تابعت مسلسل لحدما نعست
طفيت التلفزبون ونمت ...

ساهره... ولاصدريه تصير عليج من العام وحته هاي
الجديده طالعه بيهه جنج كونيه تمن

فجر.. ماما لاتقلدين عليه شوفي خصغي الجميل
ساهره.. وينه خصرج ولج يمعزايه محد ياخذج راح
تصيرين مثل ليالي جيرانه ببغداد شوفي عقيق شحلاتهه
ولج رايحه حاصره روحج بهالصدريه اليوم المديره اطيح حظج

فجر.. اشتغيلي وحده اكسين
ساهره.. البسي صايه فوكاهه
فجر.. ماما شدعوه هي مدغسه بنات ماشايفين وحده
دبه حميسه

ساهره... معترفه بروحج تعاي يمه عقيق خلي يجي الخط
اكعدي انتظري بين ماتكمل علف هاي العجله
فجر.. اكو لقب ظل يعتب عليج؟

وانتي عقيق منيلج هاي الصدغيه ؟ موكلتي مااشتغيت؟
عقيق.. البارحه السبع جابهه
فجر.. اني ماعندي السبع منو يجيبلي .. يله كومي شبعت
واجه الخط

عقيق... طلعنه اني وياهه هي بصف خامس واني بصف سادس
مدرستنه اهليه فتحوا اعدادي وخلانه السبع اثنينه فتحت جنطتي اريد اتاكد من كتبي شفت فلوس بجيب الجنطه
ابتسمت عرفته هو مخليلي مصروفي لان مرات انسه..

وصلنه للمدرسه اهليه نموذجيه نفسهه القديمه مالتي بس موسعيهه هي راحت لصفهه واني رحت للسادس العلمي
بصفي بنيه اسمهه ضحى مااعرف شلون اوصفهه كشكل
عاديه حالهه حال اي بنيه بس ممعتنيه بنفسهه

اكو بنات يعرفنهه جايات نقل من نفس مدرستهه كلهه
تتجنبهه وهي موطبيعيه اذا فتحن المروحه تكوم تسدهه
اذا المدرسه كومتهه تحضير تسوي نفسهه يغمى عليهه..
لو اذا حاسبتهه مدرسه تطلع من الصف وتروح تشتكي بالاداره وغير تطلب رقم الحارس وتخابر ع اهلهه دكلهم المدرسات
كتلوني يعني ارتكابيه..

اني مالي علاقه بيهه دخلت ام الفيزياء انطت تحضير وشرحت
وكالت اذا عدكم درس اقروا اني فتحت الادب اقره صاحت ام الفيزياء انتي البصف ضحى شسمج؟؟

كمت وكفت كتلهه عقيق
... عاشت الاسامي انتي متزوجه؟
.. اي ست
.. وشلون تكدرين ادرسين ليش تزوجتي وانتي صغيره؟
... اني عمري 21 وادرس خارجي

... استريحي ماما سباعيه اقري زين حته تنجحين
عقيق.. كعدت جان دكلي ضحى رجلج حلو؟ باوعتلهه
وسكتت شحاجيهه هاي كلت بكلبي اذا عالت بيه
اجيب فجر واجي...

خلص الدوام وطلعنه اندور ع الخط وكفت سياره كدامنه
نزل الجامه لابس نظاره كال اصعدن الخط مايجي عاطله
السياره اباوع لفجر هذا الملامحه باهته ومثل الماعاجبه الوضع

فتحنه الباب وصعدنه مدري شجاب اواب علينه بس احتمال
السبع مخابره وصلنه للبيت من نزلنه شفته باوع لفجر
ومصدوم بشكلهه حيل سمنانه كل اليشوفهه يتفاجىء

ضرغام... احس نفسي ضايع ورجعت لنقطه الصفر من طفولتي واني اصارع وحدي ياما جرعت مر بحياتي بس هذه الكاس ماينجرع بديتهه من وفاة ابوي وتيمت وربيت ع ايد جلاد لو امي الجنت اشوفهه خدامه لهيام ومااكدر احجي لو عائلتي واطفالي الراحوا بسببي ...

شكد احاول اضاهر بلقوه بس داخلي هش محطم
رانيا جانت الامل الوحيد اليخليني اتحمل
واتعده المريت بي ... جنت اكول مااحب بعد ولا حته
ارتبط. بس من شفتهه صارت دومهه متربعه براسي
وماردت اخسرهه بأي شكل من الاشكال..

شكد الانسان يحلم بس مرات
ماريد اغمض عيوني حتى لا احلم واشوفهه!!
حتى لاطيف رانيا يمر كدامي!!
حته لا اكعد مسلوب القوه واتمنى لو اشوفهه لحظه..

ثنينه مرينه بضروف صعبه ونفس الضروف الجمعتنه فركتنه شكد احاول اشغل بالي وتفكيري واشتغل اضعاف شغلي حتى اصدقائي الوياي ملو مني شكد حجو يمعود ماتريد روحك وين ماكو خطر وذاب نفسك هاي الروح امانه ولازم تحافظ عليهه

بس محد يحس،بلنار الشابه بين ضلوعي
في سبيل انسه بس بدون شعور الكه نفسي سارح بيها وصورتها كدام عيني مستحيل اكدر اعيش طبيعي بعد الصار ورانيا ماكو بحياتي، بعد مالونت ايامي ببتسامتها

اشتاگ لثولهه وفطاريتهه اول ماشفتهه اخذت نظره موحلوه
عليهه اكول خفيفه وتنطي مجال بس بمرور الوقت عرفتهه
فطيره وماتعرف تصرف وضعيفه حال..

جنت ماانام اذا مامرتي كدامي واعيد ذكرياتي وياهه
بس من حبيت رانيا رحت لقبرهه وكعدت اطلب منهه
السماح ماوفيت بوعدي الهه..

هذا الشهر الثالث يارانيااا اي خبر واي تفصيله ماكو
عنج اقاوم واقاوم حته لا اروح اسأل ساهره عنهه
حته لااسمع خبر منهه واضعف اكثر لا نسيت ولاتناسيت
اثنينهن مادبرتهن...

بعدهه ع ذمتي بس شيفيد ع لحظه يدك تليفوني
تطلب الطلاگ اذا عرفوا بيهه جمعتنه مستحيله
مدام اكو طرف ثالث بالموضوع كل الامال تصير
سراب..

اندل بيت اخوهه مرات اراقب من بعيد ماتطلع ابد
لاهي ولاامهه مرات اشوف اولادهه يرحون للمحل
ويرجعون يركضون ومبين الخوف عليهم..

حاسبلهه بدت المدارس والي ادري بي اخوهه سوالهه
نقل هواي اشياء مستغربهه شلون عايشه؟ ومعامله
اخوهه شلونهه؟ يتخيلي يضربهه واكوم افور ..

رانيا... كاعده بلغرفه والحزن مخيم على كل عضو بيه
بس من اشوف جهال كدام عيني اكول الحمد الله
بس ضرغام زدت عذابه عذاب ياريت ماشايفته
بحياتي ولامتقربه منه ...

جاي احتاج وجوده وياي احتاج احضنه
احتاج يطمني بكلامه ويكلي اني وياج لاتشيلين هم الله لايشوف نارك الفراك لعبده نار تحرك بيه وتلتهم اعضائي..

افتر بلبيت وحدي الجهال يلعبون احس البيت يخنك
اشتاقيت لعمه و البنات اشتاقيت للبصره
بكبرها لان هواها هوه احباب كلبي...

طلعت الرسائل اخر رساله من ضرغام اقره بيها واركز بكل حرف بيها نزلن دموعي على شاشه الموبايل واحس كلبي راح يطلع من بين اضلوعي مشتاقتله ليش اني من دون هاااي الناس فرحتي ناقصه؟؟

شنو ذنبي تزوجت رجال خاين ليش يحاربون حبنه شنو الجرم السويناه حتى نعيش بعاد والفراك هد حيلنه بذني الاشهر المرن تأكدت موتي ارحم ولا بعدي عنه ماكدر،

ماكدر ابعد تفكيري عنه ليل الله اليمر على ناس وتنامه اني اكضي اتكلب بفراشي ودموعي تحفر خدي كل مااذكر اخر
مره حجه وياي بيها لو من دار ضهره الي وطلع احس الموت اهون عليه نحطيت بين خيارين كلش صعب اختار ضرغام على حساب اطفالي ماكدر اعيش مرتاحه واطفالي بعيدين عني...

ماتحمل يخابروني يبجون ومحتاجين وماسويلهم شي،
ومن جهه ثانيه ضرغام اووف يضرغام الضاهر مكتوبلنه نعيش بنار الفراك ومقسوملنه نعيش ابعاد عن بعض...

بسبب مجتمع وناس ماترحم احس روحي
فاقده كلشي حلو بالدنيا عشت يمه ايام بعمري
ماراح انساها بأي وقت احتاجه هوه موجود
شيسوي هسه هم يفكر بيه ؟

سمعت من لبابه من يوم الرجعت لجهالي
وهوه منازل ومكانه خطر والسبع دايخ بي وخايف عليه بس هوه معاند اعرف بي مايتحمل يبقه بمكان يذكره بايامنه

افترگنه بدون وداع صورته ماتروح من عيني
استفزازه وعصبيته.. اشتاقيت لكلشي حته لرزالته
وهو يكول الثول كاتلج

سرح بالي للبعيد واحس داخلي بحالة فوضى
من يبوسني من وره اذاني يكزبر جلدي واصير
مسلوبه الاراده واكله ليش تبوسني منا كلما يشوفني
اله هذا المكان ..
يضحك ويكول احبه واذا حبيت شي الزك بي..

واكف بطوله كدام المرايه وجنت كاعده ع الكرسي وراه
بيومهه انريد نجي لبغداد من جابني اتفق ويه وسام
على اطفالي اتذكر هذاك الطول الحلو

لابس كله اسود وعدل شعره بااثنين اديه
ويدنن باغنيه قديمه بنفس اللحن وصوته عذب
كلماتهه براسي اكوم اكعد اغني بيهه

هواه الغرب بروحي اخذهه وسافر بليله
تظل جم دوب ياروحي صبرهه العين تربيله
يگلبي بخير ادعيله
سلام احباب وديله
اندى يريعان العمر ماضوه بسنين الگمر
شلي بليالي بلا كمر.. شلي بليالي بلاكمر..

مندمجه ويه صوته ويه حركاته شلون شال العطر
ورش ت معصم اديه اثنينهم بمكان الوريد ورش
بركبته قريب ع المكان الخلفي للاذن والاخيره يم عكس
ايده ...

ضحكت بوقتهه وكتله هاي ليش هيج تخلي العطر
التفت عليه وكال هو يتخلى العطر بمكان النبض
متشوفيني احب ابوسج منا ورفع حجابي وباسني
من نفس المكان..

فززتني من صفنتي دمعتي الحاره شلون انسابت
ع خدي وهي محمله شوگ وحنين مااتحمل
بديت اتعب واصبر بروحي لخاطر اطفالي...

وضعي ويه حسام عادي يتأمر وعليه انفذ
نطبخ ونخلي كدامه ياخذن من عدنه مصرف من راتبي
طلبت ارجع لدوامي بيومهه راد يضربني وماما منعته...

اجه وسام ع الاطفال اخذهم وبالطريق سيف حاجي
لابو ومن رجع حاجه حسام وماادري شنو سبب هالقبول
من حسام والطاعه اتجاه وسام ...

راح سوه نقلي وهو ساكت وبنفس الشهر الي انقلت
بي حسام انقبل بالجيش عرفته وسام دبرهه اله
وخلاه بمكان قريب علينه بدائره حكوميه ...

بديت اداوم بمدرسه قريبه اطفالي يم امي
اروح مشي وارجع مشي صار اسبوعين اداوم
تهيئلي مدري لمحت سيارة ضرغام وتعوذت من الشيطان
كلت هواي نفس سيارته..

امشي بالفرع واستغفر بكلبي بس اريد اهدء
كلبي مثل النار فجاه دكات كلبي زادت وشعوري
تخربط اتلفت يمنه يسرى مثل مايدليني كلبي ويكلي
هنا ضرغام..

اشوف سيارته دخلت الفرع واني وكفت بمكاني
اريد اشمه اريد احضنه اريد ابجي بين اديه
بلكي دموعي تبرد كلبه ..

طبگت السياره بصفي ونزل الجامه كال اصعدي
بسرعه فتحت الباب وصعدت مانحجي يمكن
هي دقايق بس حسيت كلبي راح يوكف ابتعدنه عن المنطقه
ودخلنه بمنطقه زراعيه وكف السياره واندار عليه..

حضني حيييل ياخذ نفس طويل ويرجع
يتمم واني ابجي بحضنه ابتعد شويه واني
اكله مشتاقتلك والله مشتاقتلك...
مااحس غير راشدي انطبع ع خدي بس موذيج
القوه وسحبني من زندي ورجع حضني

بجيت بين اديه لحدما عيوني كالت كافي
لحدما كلبي كال ارحميني مااتحمل لحظات
اللقاء واني ادري وراي فراك حته عقلي شارك
گلبي بشعوره وكانو يكله افرح انت متعوب...

باسني من خدي وكال ليش هيج عيونج ذابله
وخدودج الحلوه رايحه ماحجيت بس اباوعله اريد
اشبع منه شوف رفع ايدي باسهه ..

بهالاثناء دك تليفوني حسام رجفت ايدي اشرلي
جاوبي فتحت خط كلت الو اجاني صوته بالغلط والفشار
وهو يكلي وينج اليوم اذبحج واكفلج باب المدرسه
الدوام خلص وانتي دايحه ؟؟!!!

.
يتبع...

#خبايا_الاقدار
❤️♨️♨️

... البارت السابع والاربعون


‏والك ردناك بس النه
شكثر جينه وترجعنه
شكثر دگينه بالبيبان
لسه ولون بيبانك ب اصابعنه...
....

رانيا.. ضرغام انت روح لايشوفك وتصير مصيبه
اني ادور حجه اكله عدنه اجتماع اي شي
ضرغام.. عليمن اروح بايگ ترى انتي مرتي اذا اطبله
ادوس ع راسه

رانيا.. الله عليك ضرغام رجعني قريب ع المدرسه واني
اطلع واكله عدنه اجتماع لو اضافي ويه الدوام الثاني
فدوه لخاطري

ضرغام.. راح اوصلج بس مااروح من شارعكم اذا
ماتخابريني ودكليلي ماسوالج شي
رانيا.. متوتره حيل هاي الاشهر بس الخوف مسيطر عليه
حرك السياره ورجعني للمدرسه ماحجه شي
بس كال انتظرج تخابريني ..

نزلت اركض من الفرع وطبيت من الباب الثاني الدوام
الثاني متوسطه اعرف مدرسه وياي حايره شريد اكلهه
وشحجي قريت الفاتحه لام البنين وتليفوني تكسر
من اتصالات حسام..

الله نقذني المدرسه كالت راح اطلع عبالهه عندي درس
اضافي لزگت بيهه وطلعت وياهه عبرت الشارع شفته واكف
من بعيد من شاف مدرسه وياي مشه كدامي

هي صعدت سياره واني دخلت للفرع سحبني من ايدي
ويشحط بيه بالفرع الرايح والراد يباوعلي وهو يكلي
شعندج بالمدرسه عندج مدرس وظاله تنتظرين..

ابو المحل طلع يباوع اليغسل بسيارته صافن علينه
تبهذلت بنص الشارع لحدماوصلت للبيت فتح الباب وشمرني
بالطرمه الكاشي مالتهه قديم تزلغت اديه..

كمت اعيط ماما الحكيلي وهو يضرب بيه دفرات
يمي طابوگه شمرتهه علي وركضت للغرفه قفلت الباب
اسمع صريخ جهالي وصوته وهو يغلط ع ماما ويكلهه
بنتج كح... اليوم اربيهه بعد شكم يوم نلكاهه نايمه
ويه مدرس..

ام رانيا.. الله يبهذلك ولك هاي عرضك اختك هيج
تحجي عليهه يامتستحي شفتهه بعينك لو اخوي
ماعرف يربيك..

صوت ماما وهي تدعي علي وصوت رضاوي يصيح
لاتضرب بيبي دفع ماما حيل ووكعهه بالكاع ويكلهه
اذا ماسديتي حلگج اكطعج بالصونده..

رجع يضرب بالباب ويصيح اوكفيلي راح اكسر الباب
واليوم اخلي دمج بطولج جنطتي ظلت بره اتمنيت
تليفوني عندي هسه اخابر ضرغام وشيصير خلي يصير..

لاول مره انضرب وانهان بهاي الصوره وكدام اولادي
جبت عمري عزيزه بزود بابا حته وسام ماضربني ابد
مره وحده غلط عليه ودفعني وطلع خاين وفضلت اموت
وماارجعله...

اندفع الباب حيل وطب عليه مثل الوحش صونده
مال مي صغيره يابسه كام يضرب بيه بوحشيه
وعبالك عدوته وجاي ينتقم منهه اتلوى جوه اديه
وماما تسحب بي ويدفعهه لو يرفع الصونده عليهه..

من حلاة روحي ومن كدما شاغت من الالم ركضت
من الغرفه للصاله اريد منفذ اطلع منه عيني اجت ع سيوفي
بالزاويه يبجي ويهز براسه ويضرب برجليه بالكاع

حسام ماعافني منين مااكمز. يركض وراي وين
ماتجي الضربه ع ايدي ع رجلي ع صدري
ومحد ينقذني منه ماما وكعت بالغرفه ومالهه صوت..

واني تحت ادين هالنذل اندفع الباب حيل وصاح
بصوت عالي ولك حسام شيل ايدك لا اكسرهه
الك وحط ايده بصدره ودفعه حيل رجعه ليوره
اخر واحد اتمنيته ينقذني..

حسام.. عوفني ابو سيف اربيهه هاي محد مربيهه الصلفه
وسام.. اطلع بره قبل ماابتلي بيك ولزمه من ياخته
خنكه وذاك السان دلاله يلعلع تالي ضربه بوكس ع خشمه
يله طلع بره..

حالتي حاله شعري منفوش ومشلع ودكم قميصي
مكطعه اشهك من الالم واصيح امي كعد كدامي سحب
القميص منا ومنا وسترني وكام وكف اخذ سيوفي
شاله هو ورضاوي..

دخل للغرفه اسمع يصيح خاله ويكل لسيوفي اركض
جيب مي .. بيه مابيه الالم موتني احس رطوبه نزلت
ع رجليه بس روحي تفرفح ع ماما شبيهه..

طبيت للغرفه واكعه ومغمي عليهه اضرب بخدهه وابجي
نكعتهه بالمي يله فتحت عينهه انتبهت شويه وهي تبجي
وتشكي لوسام دكله ضربهه اذاهه لان تاخرت بالدوام..

كمت وكفت الغرفه تفتر بيه اريد اوكع اريد اوصل لغرفه ماما
ابدل يمكن صار عندي نزف لان ضربني دفرات ع بطني
واني كوه معتنيه بنفسي حته ثگل مااشيل..

شفت وسام يباوعلي انتبه كام من يم ماما واجه عليه
كال جاي تنزفين رانيا خلي اخذج للمستشفى
باوعتله ودموعي تجري كتله حسبي الله ونعم الوكيل بيكم
انت دمرتني كتلك ماعندي اخ وانت اصريت ارجع يمه

وسام.. مو وقته هالحجي امشي بدلي خلي اخذج للمستشفى
وحسام اني اعلمه
رانيا.. مشكور علم روحك بالاول كل الصار بيه بسببك
هم الك عين تحجي لا اريد مساعدتك ولا اريد اي شي
منك عوفني بحالي شنو التريده هالذله التحملتهه علمود
الاولاد وبعدك مستمر

راد يحجي مالي خلك روحي عفته ورحت لغرفه ماما اطلع
ملابس وابجي بس اني هيج صار وياي اذا اطلگت جريمه
صارت عايفينه يسرح بطوله وهو خاين واني متحمله القهر
والضيم...

بدلت واني منين ماارفع ايدي واحرك رجليه ابجي
الله لايوفقك ياحسام طلعت واني اضغط ع نفسي
وسام كاعد يم ماما ويمهه الجهال لبست حجابي
وكعدت ..

وسام.. ليش ضربج؟
رانيا.. تاخرت بالمدرسه وجابني سحل بالشارع
والناس تتفرج عليه
وسام.. ليش هيج وياج هو مو اخوج اني اعرف علاقته
بسهاد قويه ليش انتي حاقد عليج

رانيا.. روح اسأله ليش تسألني كتلك الف مره ماعندي
اخ هيج واحد حرام يتسمى سند وانت خوش خليته
يتجربع عليه لان واكف وياه..

وسام.. بشنو واكف وياه ؟؟ علمودج ماردتج تظلين يوميه
بمكان لاتقبلين اخليلج بيت ولاتقبلين تكعدين ويه اخوج
شتردين بعد؟؟

رانيا.. مااريد اشوفك اطلع من حياتي السنين العشتهه وانت
ماموجود بالنعيم من اجيت خربطت كلشي والله العظيم
وروح ابوي ياوسام اذا ظليتوا هيج تأذون بيه احرك روحي
وعود انت افرح اخذ الجهال ربيهم ..

ظل ساكت شويه وكام ماما طلعت وراه ورجعت تطمن عليه
ماردت اخوفهه خطيه مريضه اخذت جهالي بحضني
سألت ماما وسام شجابه؟؟

رفع راسه رضاوي وكال اني خابرت بابا كتله حسام
يضرب ماما وهو اجه بسرعه حجيت بكلبي طفل واخذه
الخوف ومالكه احد غير ابو يخابره..

حسام طلع مارجع مددت يم ماما كتبت رساله لضرغام
ماكو شي صيح شويه وسكت لايظل بالك
بسرعه رد عليه متاكده ماكوشي ؟؟

جاوبته ماكو شي لايظل بالك اي شي يصير
اخابرك ديربالك ع نفسك
ضرغام.. انتي هم ديربالج ع نفسج

رانيا..لليل رجع حسام ماحجه ويانه ولا احنه ثاني يوم
ماداومت جسمي مكسر خابرت المديره اخذت اجازه 3 ايام
الم قوي بكل جسمي منا لمن تحسنت ..

رجعت وره ال3 ايام داومت ايامي باهته حته طعم مابيهه
ماتوقعت بيوم ادور بيه الدنيا هيج واظل اعاني
حته من اطلگت موهيج حالتي كلت مايستاهل وصبرت روحي
بس هسه شصبر وضرغام بين عيوني..

مانتواصل بالتليفون ابد مره وحده دك وانطيته رفض
لان حسام موجود وبعد ابد مااتصل ولا اني اتصلت كلت
ازود ناره ونتعلق اكثر خلينه هيج ...

لبابه.. جنه كاعدين ع الغده نفسي لعبت حيل بسرعه كمت
للحمام تقيئت هواي واني حته ريوك ممتريگه
اجت وراي ابرار كتلهه مدري شبيه طلعت وهي لازمتني دايخه

جراح ماموجود عمه زينب اجت تركض عليه
كالت خاف مستبرده الجو برد وانتو فاتحين
التبريد كتلهه يمكن لان هسه بردانه..

اخذتني ابرار لغرفتي مددت رفعت رجليه ع مخده
بلكي يستقر ضغطي باب غرفتي مفتوح طبت نوال وامهه
بحجه يشوفني بس عيني ع نوال شلون تباوع ع الغرفه

ام نوال.. خاف حامل
لبابه.. كلمتهه صبت ع اذاني بسرعه اتذكرت صدك الشهريه
فاتت هواي بس مامنتبهه من كدما فكري مشغول بجراح
وشلون اراقب نوال واخلص منهه..

زينب.. الله يسمع منج خيه يوم المنى
ام نوال.. شبيهه مستعجله بعدهه صغيره متوازيه
زينب.. جراح وحيد واني وحيده ورزق الله شوكت مايجي
هله بي

لبابه.. ولا ركزت بحديثهن ياربي اذا حامل شلون
بيه هو وضع جراح وين يتحمل وحده تدلل علي
وحامل وهو روحه مايتحملهه؟؟

عمه طلعت وابرار شويه وراحت سحبت تليفوني
خابرت ع جراح انطاني مشغول معناتهه جاي صدك
شويه ودخل شافني مدده ويمكن عمه كايلتله اجه يم راسي
كال سلامتج شبيج ؟؟

لبابه.. يمكن هبوط شو تخربطت!!
جراح.. حرك ايده ع شعري وكال تروحين للطبيب
لبابه.. ااي العصر اخذني اريد احلل
جراح.. يعني كلام امي صحيح؟؟

لبابه.. مواكيد ولو مو وقته
جراح.. لادكولين هيج اذا الله قاسمه كولي الحمدلله
لبابه.. اكيد الحمدلله بس الحامل تصير ماتنحمل وانت
منا وضعك

جراح.. شبي وضعي اطمئني ماراح يتحسن اله بمعجزه
لاتفكرين بيه لاتخافين مني ماتوصل بيه اذي حته ابني

لبابه.. لا لا مااقصد هيج لاتاخذهه بغير شي بس
اني اريد نكون قريبين اكثر نطلع نمشي واني عندي
دوام اول سنه يعني مامستعده

جراح.. كام وكف كال راح اسبح واتغده واخذج
نامي شويه
لبابه.. كمزت من مكاني بسرعه مااريد انام ويبقه
وحده يم نوال كمت صبيتله غده وكعدت يمه
بين ماكمل وراح للغرفه وهي كاعده تشوف تلفزيون

خابرت ماما تروح وياي بدلت ونزلنه عمه زينب ماحجتلهن
كالت اله نتاكد اخذنه لطبيبه نسائيه حللت شويه وماما
جابت النتيجه حامل...

اتذكر هذا اليوم وحته الشعور موذيج الفرحه الي تتمنى
كل بنيه ماادري ليش مامرتاحه خايفه مااكدر احتوي
جراح وخاف تأثر ع دراستي وخاف الطفل ينظلم؟!!!

ماادري شبيه كتبتلي الطبيبه وصفه وطلعنه صعدت
بالسياره وماما كالت لجراح مبروك ابني باوعلي بفرحه
وكال الله يبارك بيج وصلنه للبيت بوجهي للغرفه كتله انت
كول لعمه زينب..

دخلت للغرفه بدلت ومددت انفتح الباب عمه زينب ركضت
عليه حضنتني هي وابرار تتنقل من عندي لجراح فرحتهه
ماتنوصف وتوصي بيه ماتنزلين كلساع لامج الدرج موزين
وماتشتغلين انه اشتغل انه وابرار ..

ضحك جراح كالهه ع كيفج يمه باسته من خده ودموعهه
تجري حجت بغصه لسه ايام فراكك ادك بكلبي اظل طول عمري
احمد واشكر ربي ع رجعتك وقرت عيني بشوفتك ..

طلعت هي وابرار واني كعدتي سد الباب وراهن وقفل الباب
اجه بصفي مدد خله ايده جوه راسي وباسني من خدي
ومن راسي وكال ليش مافرحانه؟؟

لبابه.. شلون مافرحانه الحمدلله بس قلقه
جراح.. من شنو؟
لبابه.. خاف يأثر الحمل ع نفسيتي ونتعارك اني وياك
جراح.. هههه كولي يالله بعدنه باولهه

جان وياي ضابط كلما يصير نزول ماينزل يستلم بمكانه
هو من النجف ومن ينزل يظل ببغداد يم جماعتنه يكول
مرتي حامل واذا طبيت للبيت تدخل مستشفى تكره عطره
وماتريده حته ينام يمهه وخلص 5 اشهر الحمل هو لوينزل يومين ويجي شارد..

لبابه.. ضحكت وكتله لا كلشي ولاهاي السالفه اذا كرهت
عطرك وانت منا عصبي حته نوال تشمت بينه

جراح.. دگج ومدگوگج نوال شكو مخليتهه ابالج اساسا
مااشوفهه كدامي ابد
لبابه.. اكلك شي بس بدون عصبيه!!!

جراح.. كولي
لبابه.. اول يوم اجت بي سمعتهه تخابر ودكول انتظرك ع الغده
ياجرح كلبي ودكلك مرتك تفتر وراي تراقبنه خلتني اشك بيك
بس من شفتك مامهتم ودورت تليفونك وراقبتهه عرفتهه
جذابه..

جراح.. تحجين صدك؟وليش سكتي غير تحجيلي حته
اواجهه واوكفهه عند حدهه هيج قابليه عدهه وتجذب

لبابه.. عوفك منهه لاتحاجيهه هي تريد تفتح موضوع وياك
ويجوز تحلف ماحاجيه هيج وحده جذابه تألف وتتهم
خلي تولي..

جراح... يلعب بشعري ويحجي واني اباوعله مد اصابيعه
بكذلتي رفعهه وباسني من كصتي رفع فكي باصبعه
ويحرك الجبير ع بشرتي عيوني ذبلت واني اتمعن بي..

دنگ راسه واخذ شفايفي ببوسه عميقه اكثر
مااكول عليهه هادئه رومانسيه ممليه احساس
ومشاعر ..

رفع راسه وباسني بوسات متفرقه من شفايفي
ومن رگبتي وضمني بحضنه حيل مرتاحه ومطمئنه
حيل لان هادىء حته تجاوبت وياه وهو ضامني
لصدره ويهمس يم اذني احبج حيل..

لعلهه بوادر خير ولعل هالطفل هو بوابه خير ع جراح
ويحسن من نفسيته شفته شلون فرحان
والشي الحلو ماطلعت ولاشفت ردة فعل نوال

وبليل يمكن ماتحملت جاي ابوهه ماخذهن اول ماجاي
من الشغل خلصت منهن ورجعت طبيعيه جراح رجع يداوم
مكانه حلو ضابط بدائره الجوازات مرات يكول من اعصب
افرغ عصبيتي بالشغل لان هوسه ..

عقيق.. دوامي كله صباحي يكعدني السبع الصبح
ابدل واتريك واروح لفجر يجينه الخط يصعدنه هو
وينطينه مصروفنه اثنينه ..

مااضغط ع نفسي اقره بس مو هالكه حالي مسيطره
ويه المدرسات احضر يوم بيومه المدرسه حلو حيل
والصفوف بيهه اعداد متجاوز 25 طالبه وصفوف كبار
مومثل الحكومي دكول فجر ننجعص كل 3 برحله..

البصفي ضحى غريبه الاطوار بس متجنبتهه بيوم منهن
عدنه درس شاغر طلعنه بالساحه كعدنه ع درجات اني كاعده
وحدي اكل بلفتي اجت كعدت بصفي وصافنه ليكدام

كالت اني ماعندي حظ بكلشي ومهمومه محد يحبني
وكلهه تشرد مني
عقيق.. ليش ؟؟
ضحى.. يكولون عليه مخبله والتفتت عليه وكالت شدكولين
مخبله؟؟

عقيق.. جانت لابسه شال من طوله يسحل وراهه يمكن
مخيطه شالين وتباوعلي بنظرات مدري شلونهه
كتلهه لاحشاج وكمت من يمهه كتلهه اريد اراجع من رخصتج

رجعت للصف مدنگه اطلع كتابي مااحسهه غير فوك
راسي فزيت بسرعه من تمشي عبالك نمله محد يحس بيهه
جان دكول اريد اسولف وياج ارتاحيتلج

عقيق.. اريد اراجع ماقاريه القصيده
ضحى.. شويه اسمعيني لوانتي مثلهن ماتحبيني
عقيق.. لا شعندي وياج بس خاف تجي ام العربي وتكومني
ضحى.. چاا نسولف باجر احجيلج قصتي

عقيق.. هزيت راسي وطلعت خفت منهه اتمشه واراجع بس
كلساع يتخيلي بصفي البنات كلهه مهزومه منهه ومره يكولن
بيهه جني وام الارشاد دكول حته عائلتهه هيج نفس التصرفات

مرات اشوفهه عاديه بس تجيهه حالات بنص الدرس
وتضحك ومره منهن كومتهه ام الكيمياء كالتلهه ماكاتبه
الاسئله وحاسبتهه كالتلهه باجر تجين كاتبتهن

هن 30 سؤال ثاني يوم من كامت تفتش لكتهه كاتبه تعريف
واحد وعايدته ب5 اوراق متروسات كتابه وكلهن نفس التعريف
خلت ام الكيمياء بيومهه تخبلت علينه ..

اتذكر مواقفهه زين خلتهه ام الكيمياء واكفه طبت المديره
تفتش جان فجأه ودكوم تبجي وتعيط وتصيح ام الكيمياء
ضربتني ع ظهري واحنه كلنه صافنين عليهه وتصيح
اااخ ظهري يوجعني...

دك الجرس بوقتهه وركضت ع فجر حجيتلهه كالت هاي
المدرسات يحجن عليهه هاي نص سويج ..

عقيق.. اخاف منهه؟؟
فجر.. شتخافين خلي تندك بيج وشوفي شسوي بيهه
عقيق.. خاف ماالحك اجيج
فجر.. اذا ضغبتج اضغبيهه بالكتاب وتعالي اغكضي
حته املخهه تملخ شالهه بي دشداشتين اليه..

عقيق.. جنت مخليه فجر للاوقات الصعبه حته من نشتري من
الحانوت ازدحام هي تدفعهن وتشتريلي ودكلي اكلي اعلفي
وهي بكل فرصه شايله لفه وقوطيه ببسي وكيكه

من رجعت حجيت للسبع عليهه وكال اتجنبيهه
واذا لزم الامر كومي من يمهه كعدي بغير رحله
بس مدري شبيه خايفه منهه لان كاعده بصفي والمدرسات
حته لرحلتنه مايوصلن ...

بعد كلام جمره هدئت ونسحب الخوف البداخلي غفيت بين احضانه وايده تتجول بشعري فتحت عيني بتعب ماعرف شكد نمت جمره طالع ماموجود بقيت امدده بفراشي شويه واسمع الباب نفتح عرفته هوه اجه نفتح باب الغرفه وطب

السبع... عقيقي لسه نايمه
عقيق... عدلت كعدتي وخليت المخده وره ضهري تقرب مني باسني بخدودي كل واحد بوستين واني مبتسمه ابتعد عني واني نفس ابتسامتي ..

السبع.. شبيها بنيتي ليش مبتسمه ؟؟
عقيق.... رفعت ايدي واشترتله على الشامه البركبتي
السبع.... اووويلي شلون فاتتني وتقرب طبع بوسه دافيه رقيقه محمله بلحب.والطمأنينه رفعت ايدي حضنته وخليت راسي على صدره

عقيق... اعترف صايره جريئه وياه ومااخجل منه
السبع..اوووف ولج گربج تيار كهربائي ماسيطر،على ذبذباته اترجف كلبي وتنفض كل احاسيسي يمج
عقيق...جمره تحبني ؟؟

السبع....ابد لاتسالين هيج سوال
عقيق...ليش؟
السبع...انه اكلج ليش هيج سوال ينسال للانسان المامتأكد من حبه بس انه ياعقيقي كلي ملكج كلبي وروحي وكلشي بيه كولي شكد تحبني وانه مستعد اشرحلج لصبح شكد احبج

عقيق...واني احبك
بوجوده احس بروحي مالكه الدنيا بوجوده اصير مثل الفراشه واطير بين الازهار جمره اماني وملااذي الوحيد الاحتمي بي
من ناس ماتت الرحمه بداخلها بنظرهم اني ما اصلح اكون زوجه للسبع ...

ينظرولي بنظره ماحبها شنو ذنبي نولدت مريضه شنو ذنبي يتيمه وماعندي اليسندي ويسال عني رب العالمين خله السبع بطريقي لان نوايانه بيضه ثنينه وثنينه بينه نقص واحد يكمل الثاني..

دائما اكعد بنص اليل واناجي رب العالمين الجمعني، بي وخلاني بضرف لايمكن يخطر على بال اجيت ويه
بابا بمكان ماعرف شخص بي ونكسرت بشوفة
بابا مرمي بشارع واني مريضه ضعيفه لا حول ولاقوه

رب العالمين جاب جمره وخلاه كدامي الهي انته اعرف بضعفي، وقلت حيلتي الهي لاتكسر كلبي بلسبع بس هذه طلبي منك وابعد عني كل انسان حاقد ويحاول يدخل. بيناتنه يوميه قبل لا انام اطلب هذه الطلب من رب العالمين ومن افز بليل الساني يلهج بهذا الذكر،

اخاف.واكثر مخاوفي افقد السبع مستحيل اكدر اعيش بدونه لو يمر يوم وما اسمع صوته جمره امي وابوي وكل دنياتي مجرد اتخيل افقد السبع لو صدك جبار يضغط عليه ويتزوج ايناس كدامي اكعد ابجي ماتحمل الهي كل اختباراتك اتحملها بس لاتختبر صبري بلسبع صافنه ومجرد تفكير فكرت نزلن دموعي بدون ماحس..

عقيق....كمت من فراشي وهوه راح فرش السجاده يصلي غسلت وجهي على مغسله وحضرت الاكل وكعدت انتضظره بين مكمل شكل الاكل يشهي،فجر وينه عن الاكل جابه من المطعم دكول بس الريحه تسطرني

كمل صلاه واجه كتله جمره دزيت عشا لفجر وخاله ساهره
السبع...دزيتلهم اتعشي بين ما اخابر ضرغام واجيج

عقيق...ما اكلت بقيت منتظرته يكمل مكالمته يخابر واسمع صوته يحجي بالالغاز بس عرفت الموضوع يخص جبار شويه وصار صوته عالي ماعرف شكاله ضرغام وهيج صار عصبي

نهه المكالمه واجه كعد كبالي على ميز بس مبين عليه ضايج واكو حسبه اباله اعرفه من نزره عينه فتح علاكه الصمون طلع صمونه وخلاها كدامي خفت اساله واني بطبيعتي مااسأل وادقق وياه رفع عينه باوعلي مركزه وياه ..

السبع...ليش متاكلين يابويه شو تعشي وعلاجج موتنسيه احتمال اطلع بشغله عندي اذا تأخرت روحي يم ام شهد

عقيق،...بعده يحجي دك تليفونه بسرعه جاوب
السبع..هااا. يعني هيج صارت يدلل ولا يهمك اني احلها

عقيق...فصل الخط وكال راح يجون ازلام يمي المضيف مرتب . كتله اي نضيف بس خل ارشله معطر كمت من يمه وهوه صافن بلفراغ ماعرف بشنو يفكر ومنو راح يجي بهيج وقت ؟؟

شويه وندك الباب فتحه ضرغام وجراح
وكفوو بلطرمه يحجون ماعرف عليمن بس اسم
جبار كل شويه ويذكروه ماكو اقل النص ساعه
فات ضرغام للمطبخ كال سوي جاي هواي زلم عدنه
وام شهد راح تجي يمج...

فعلا اسمع صوتهم وسلامهم واحد يسلم على ثاني
قوري جبير ماعندي حرت بيمن اسوي بعدني ادور بلكاونتر فاتت خاله ساهره وفجر لافت نفسهن بلعبي..

متت ضحك على شكل فجر مدبدبه وخدودها حمر، ومطلعه بس عين وحده ودردم لان ضرغام خابصهن من جايات وملبسها عبيه عن لا واحد يشوفهن لان هواي زلم بالحديقه وياسين واواب هم اجو وضاجت شلون ضرغام عايط بيها وكايللها لفي روحج زين كدام اواب ومفشلها...

طلعت خاله جايبه وياها قوري جبير واستكيان تدري ماعندي عدد جبير وكفت هيه تسوي جاي واني بقيت اضحك على فجر وشكلها يموت ضحك ادور،شافت الاكل على ميز نزعي العبايه و
فجر... ولج عقيق اني جوعانه ماتعشيت هذه خبصني وماكملت عشاي

ساهره...ولج ام نص السان منو اكل الكباب وصمونتين هااا
فجر....اي بس بعدني جوعانه تعاي تعقيق وياي واذا ماتغدين بعد احسن ..

عقيق... يلا نتعشه سوه اني وياج اني هم ما اكلت
ساهره.. اكلي يمه اكلي هري ومري وسم بكلب جبار

عقيق.. بعدهه تحجي دخلت عمه زينب نزعت عباتهه وكالت
هذا صدك يحجي يامايستحي ياناقص غيره وناموس
ساهره.. شكو فهميني اجاني ضرغام ماخلانه انشوف دربنه..

هسه جراح سولفلي يكول ضرغام مخابر السبع كايله
شيوخ جاين عليك عدهم سالفه وياك عرفته من جبار
دفعهم حتى يحط السبع تحت الامر الواقع

والسبع متخبل يكلهم يحلم اذا ما اندمه على هاي عملته فلا اتسمه السبع ولامن ظهر ابوي رجال مستقر تريد تهجم بيته
من نكون انهجم راسك ومالكولك اثر...

وجنه جبار داز عليهم حته بايتين يمه مدري هم مدستريهه
الله اعلم بعد والسبع مخابر ع ياسين يجي ومنا جبار وياسين
شلون واحد يحب الثاني

عقيق.. عفت الاكل وكمت وكفت عيني ع الباب خاف
يحرجوا ويقبل شويه نغزني كلبي طبك مرض ظل اوجعني
هسه حالتي بس الله يدري بيهه هاي الزلم كلهه معقوله
يرفض السبع كدامهم وهي بنت عمه؟؟

اجه جراح اخذ الجاي وكال لامه وين عفتي لبابه
وحدهه كالتله يمهه ابرار هسه ارجع بس عبالي
عقيق وحدهه ..

كمت اني وفجر من جهه الصاله لازگين اذانه بالحايط
وام جراح وخاله واكفات يدعن اسمع صوتهم وهم يكولون
يالله نبدي سالفتنه بالخير والبركه..

الشيخ ابو علاء... عمي السبع الله بلخير عليك
السبع... الله بلخير، والعافيه

ابوعلاء.. عمي احنه نعرفك ونعرف انته منو وابن ونعم منك زلمه ومابيك قصور بس ياعمي مارضيناها منك ترد ابنيت عمك ومو من شيمك ولامن شيم اهلنه

صافن عليهم السبعو مركز وياهم ولم قبضه ايده بعصبيه وجكاره متوكع من حلكه ..

السبع.. شنو القصور البدر مني حته تجتمعون وتزوروني بهيج
وكت وكاطعين طريق طويل من الناصريه
اريد حجي عرب تناقشوني بي!!!

ابو علاء..بينك وبين عمك حزازيه وعداوه وانت يا ابني
ايدك تلطخت بدم ابن عمك وهو ابن الشيخ وتعرف من معزتك
عنده حته اتنازل عن الدعوه

انطاك بنيت عمك حته يكسر شوكه الشر ويرد الماي لمجاريه
صدكني ياابني من تناسب عمك ويصير بينكم نسب كل
العداوه تنمحي وهاي مامرجيه منك ياالسبع كدامنه انطاهه
الك وهي بنت شيخ لان راد يصلح الامور

السبع.. الله بالخير عليكم مثل اهلنه يكول اكعد اعوج. احجي عدل مع احترامي لجيتكم وانتو بداري بس منو بيكم يحجي
ضميره قابل ع هاي السالفه وماانتقد ابو عامر ؟؟

الشيخ.. هي مايصير تنحجي بيهه بديوان وتعتبر هديه لان
بنت شيخ بس من محبته الك ويريدك ويه ولده مثلنه يكول
انه ولدي ع ابن عمي وانه وابن عمي ع الغريب

السبع.. انتو بهاي جيتكم تهجمون بيتي انه رجال لا ام ولا اب
ماعندي بس هاي المره وراضي بقسمه الله ماملزم
احط ايدي بايد عمي حته يكسر شوكه الشر يكدر يكسرهه
بغير شي مو بهجمان البيوت..

جيتكم على عيني وراسي وكلامكم على راس بس ياعمي هيه موكوه وذا على بت عمي مااسمح لا لعمي ولا لغيره يذكرها ويجيب طاريها بلدواوين..

وهاي شجم زلمه كاعد كدامكم كلكم بت عمي وبت جبار ماتسمه عليه مره وهذه كلامي يوصل لجباره
ويتعداه واليفتح الموضوع مره ثانيه مايصير،خير..

الشيخ.. موهيج الحجي يالسبع احنه جنه وياك ونكول حگه
يتعامل بحزم ويه عمه بس هسه شفنه العكس انت
رايد العداوه والتفت ع الشيخ ياسين ماتحجي يا ابو اواب
ترضاهه ؟؟

ياسين.. رسولنا محمد عليه افضل الصلاة والسلام
وصانه بناتنه وبنسائنه وكال استوصوا بالنساء خيرا
وكال ( مااكرمهن الا كريم وما اهانهن الا لئيم)

وانتو بجمعتكم هاي هنتوا اثنين من النساء الوصه بيهن
رسولنا وحده منهن مرت السبع تشجعون يتزوج عليهه
بدون ذنب وتنكسر وهي يتيمه والثانيه بنت الشيخ
هنتوهه وانتم تعرضوهه بديوان اجباري ع ابن عمهه

انتو شيوخنه ونتعلم منكم والمفروض من دزكم جبار
توكفون بوجهه وتذكروا هو ابن منو واهلنه جان ينحلف
براسهم هن وامهاتنه مانجاب اسمهن بكعده

عيب وفشل وخزي ع جبار ولده السبع رجال متزوج
ومكتفي بمرته واذا اله نيه يتزوج واله نفس ببنت عمه
يدك الباب ع عمه ويطلبهه مو تنفرض علي فرض

واحد من الكاعدين.. ابو اواب گبل اهلنه اذا اجتهم هديه
ماتنرد ولسه اذا انهدت مره حته اذا بنت العم ماتنرد

ياسين.. والله يااخوي هاي اعذار لادكلي رجال رافض الزواج
ع مرته ويجي ينجبر بحجة هديه لو فشله من الديوان
الفشله ع الماصان بنت الناس والله والله لو وحده من بناتكم
مرت السبع جان هسه بسلاحكم هادين ع جبار..

الشيخ.. يخوي ردناك عون يا ابو اواب مو تزودهه
هسه السبع يعقد ع بنت عمه حته تخلص هالعداوه
والماقبل انه اكلكم راح تظل العداوه وراح نارهه تلوح البريء

عقيق.. كلامهم ثگيل ساعه يرتفع صوتهم وساعه
بهدوء وكلما يحجي السبع الزم كلبي خاف يكول
هاهي ماافشلكم وافشل عمي...

اشتد الحديث وكل واحد عنده رأي كاله كلهه سمعت صوتهه
ونقاشهه اله ضرغام ماسمعت صوته وماادري ليش
ساكت ع الاقل يحجي ويه السبع لان اعرفه ضد هيج زواج

شويه واسمع صوت السبع بكل وضوح بعد
ساعتين كامله من الهوسه والنقاش جنت واكفه
ومن سمعت كلامه رجليه ماساعدتني وكعدت بالكاع ...

السبع... حجه بصوت حاد وكالهم ماراح اردكم وراح
اقبل اناسب جبار بس بشرط موتريدون العداوه تخلص
هسه اعقد ع بنت عمي بس اريد الشرط يتحقق بحضوركم
وكلكم شهود ومن باجر بنت عمي تصير مره الي...

يتبع.........

#خبايا_الاقدار

❤️❤️♨️
.. البارت الثامن والاربعون


يگلها
متغيره موذيج التضل تتباچه من نزعل
ولأذيج البعدها صغير وتحبني
تگله
إشطبني العشگ مونخوة حتئ وأنخاگ!
ولأگلبي ضريح أمام من تدعي يگلك هاگ!.
....

السبع:-هسه شكلتو ينفذ الشرط جبار تسقط العداوة ومن باجر اناسبه بنت عمي مابيها أي قصور بس مشكلتي ويه أبوها
وهاي سالفه ينطي بنته هديه واكفه وحته عيب على شيخ
يحجي بيهه

الشيخ:-شنهي لزومته هالشرط هسه أنت جاي ادكول عداوتي ماتنتهي وتشرط على عمك الشيخ؟؟

السبع:-انتو سألتو؟ أكو واحد بيكم سأل هسه شنو سبب العداوة والكره بيناتنه؟ لا طبعاً محد اجه سألني وكال شنهي مشكلتك ويه عمك؟

أبو علاء:-يا السبع هاي العنتكة والتكبر على الشيخ مو حلوة بحقك واحنه كلنه نعرفك زلمه وكفو منك بطل سوالف العداوة لأن ماتجيب غير المشاكل وعمك من معزتك عنده يريد ينطيك بنيته وانت جاي ادور شروط؟

السبع:-مرحبا عليك أبو علاء لو بعد مية سنة ماراح انسه ثاري أبوي وأمي وأخوتي وأختي الوحيدة انذبحوا وهم مالهم ذنب كلكم شاهدين على وفاة أبوي وكلكم بداخلكم شك على كتال أبوي وحتى إذا عرفتو وسمعتو راح تسكتون عن الحق هواي اسئله براسي من صغري لهذا عمري ليلية ينعادن عليه منو كتال أبوي؟

أنه ماجاي اتهم فلان وعلان ولا اتهم جبار أعوذ باللّٰه من سوء الظن بس هو يعرف وسامع وإذا ما جان شاهد بالأساس..
شيخكم جبار يعرف منو كتال أهلي خلي يجي كدامي
يكلي فلان وفلان وأنه اكوم أحب راسه واناسبه

ابو علاء.. انت بهاي سالفتك جاي دكول انه اريد اتكاتل ويه عمي
السبع.. حگي هذا اريد اعرف منو الكتال انداس بيتنه
وانذبحوا مثل الدجاج على يامال ؟؟ وكل هاي السنين ماشفت
جبار طالب بثار اخو الجبير

وازيدكم بعد مدام الحجي مكاشف خلو يجي كدامي وانه مستعد ادفع كافه التكاليف واطلع قسام شرعي ومساع الكاع وتنعاد القسمه من جديد

ماكو لاشرع ولاقانون يكول الورث بس لجبار جدي المرحوم شچم ولد عنده ابوي فاضل وابو جراح وابو شهد وينهم طلعوا
صفر واحدهم مايملك شبر الكاع والملك والنخل والحلال كله لجبار ...

منو وصه بي وشلون اندارت كلهه باسمه انه عن نفسي الوصي
الوحيد وره ابوي ومامتنازل شلون رهمهه ؟؟ قشمر البنات واخذ
حصصهن هاي مالي غرض بيهه حاجيني بحصه ابوي

انه اريد افتح الدفاتر الصار اسنين مضمومه لابيكم شيخ
ولاسيد سمعني وكال حگك هذا جراح كدامكم شسوه اشترى
كاع من جبار وهي المفروض حصته

الشيخ.. الكاع جدك دارهه باسم جبار لانه الوصي الوحيد
وشيخ ع عمومته
السبع.. ماراح اوصل لنتيجه وياكم اخر كلام عندي
روحوا كلوله يجيب كتال ابوي حته اذا ميت خلي يجيبلي
ابنه .. حفيده المهم ابرء جبار ومن باجر اعقد ع بنته

عقيق.. ايدي ع كلبي اليدك سريع خاله ساهره حضنتني
من كتفي وكالت تعاي اكعدي اخذتني للغرفه ايدي ترجف
فتحت المجر طلعت علاجي وفجر جابتلي كلاص مي ..

ظلت خاله بصفي وام جراح لازمه باب المطبخ شويه وكالو
راحوا جراح صاح ع امه كالهه انروح وخاله طلعت حجت ويه
السبع واسمعهه دكله عقيق متخربطه

ظليت وحدي هوايه لان ظل هو وضرغام بره مااعرف ليش
هيج سوه السبع لو فرض جبار جاب القاتل موراح ينحط
كدام الامر الواقع ولازم ينفذ

سمعت باب المطبخ انفتح بسرعه طلعت من الغرفه
صار كدامي ركضت حضنته حيل وصلت لحد لصدره
ذبيت كل حملي علي رفع راسي واديه ع خدودي
وباسني من خدي..

كعدنه ع القنفه لازم ايدي كال لاتخافين مستحيل اضحي
بيج مااريد اظل حجايه بحلوك الزلم وين مايكعدون
يكولون السبع رفض بنت عمه خليهم يعرفون الاسباب

جبار ع رگبته ماراح يعترف ولاراح يحجي هاي 35 سنه
خيط واحد مالگيت وحته اليعترف ع جبار ثاني يوم
يختفي

عقيق.. واذا جاب واحد وكال هذا القاتل
السبع.. اله بدليل ماكو واحد يشهد ع نفسه ويكول اني
وهو بريء كلهه عدهه عوائل ويخافون عليهه

صدكي ياعقيق حته اذا لفق سالفه الكتال ماراح يتنازل
عن شبر من الكاع جبار واعرفه عاشرته طول عمري
وادري بي شنو من بشر..

ومومحبة بيه ولا ضدج حته اتزوج ايناس هذا يريد
ياخذ ثار عامر ووسن لاتشتغلين بالج من حجيت وشرطت
حاسب احساب لكلشي واولهم انتي ماتتاذين ..

عقيق.. جمره تذكر الخطفني مو كالك جبار اله ايد بقتلهم
جمره.. مرات العصبيه تغلب على الواحد ماعرفت استغلهه
ولاعرفت اسحله واشمره بمضيف جبار واخلي يعترف على
وسن وعلى جبار جنت معمي مااشوف بس انتي

تأذيت حيل منظرج ماراح من بالي لاجان عندي تسجيل
وسجلت ولا شغلت عقلي وتمالكت اعصابي جنت بركان
اريد اكطعه وصل ومايبرد كلبي على السوا بيج لذلك
استعجلت وغلطت من كتلته بدون مواجهه..

عقيق.. جمره متشوف الله شكد جاي يبعد عنك سالفه الثار
عوف السالفه انت مصر عليهه والله مايريدك تعرف
احتمال مابيهه صالح

جمره.. وشنو الصالح بكتل اهلي؟؟ ثاري اخذه لو اخر يوم
بعمري مطول بالي وصابر حته مااغلط وحته محد يلومني
كل العشيره تعرف السبع ثاره يمشي بدمه

عقيق.. خليت راسي ع صدره واخذت نفس كتله
لخاطري اني ماعندي احد غيرك انت اذا يوم واحد غبت
عني احس نفسي وحيده وتظل عيني ع الباب شوكت
تجي انت السند الوحيد عندي..

السبع.. ابد لاتفكرين بالمستقبل رب العالمين وحده يقدر
ويكتب الخير والكاتبه انشوفه لابكيفي ولابكيفج
وماكو قدر شر كل اليجي من الله خير يمنعنه من اشياء
بس بالحقيقه هو رحمنه ..

عقيق.. سكتت وظليت ع صدره ايده تتحرك بشعري
عندي امتحان ومامكملته انخبصت وضجت حيل
ظليت شويه على هذا الوضع بعدين كام رفع نفسه
كال كومي كملي امتحانج..

ماحجيت كمت من يمه فتحت كتابي وهو ظل يشوف
تلفزيون مااكدر اركز بكلمه وحده اقره وكلبي مخنوك
اعرف تمسكه بيه واعرفه مايتنازل عني بس خاف ينجبر
بحجة العيب والعادات والاصول..

سديت الكتاب وكمت للحمام غسلت وبدلت ورحت لفراشي
اني ماخذه علاجي بسرعه غفيت بدون ماانتظره غطيت
بالنوم فزيت نص الليل حركت نفسي نايمه ع ايده
وراسي برگبته وهو غافي..

الغرفه ظلام بس المس بشرته يفز ظليت مركزه ع نفسه
واقرب نفسي اكثر واكثر اتمنى لو اكدر ادخل بنص گلبه
اتمنى لو نتشابك مثل عقدة الخيط ومحد يكدر يحلنه ..

رجعت غفيت حسيت ع صوته وهو يكعدني كومي
عقيق الساعه ب7 وربع فتحت عيني جان واكف
يلبس بقميصه ويسد بالدكم مال الردن ابتسم بوجهي

وكال صباح الخير جاوبته واني اكوم من فراشي رتبت الجربايه
وطلعت غسلت وع السريع سويت ريوك وبدلت كملت كلشي
وهو بره يشغل بالسياره كال اني اوصلكم لان ع طريقي

صعدنه اني وفجر هدوء لحدماوصلنه من ردنه ننزل انطانه
مصروفنه دخلنه للمدرسه الدرس الاول بادي ركضت للصف
اليوم مبين من اولهه مدري شلونه لكيت الجدول متغير ...

اول درسه فيزياء واني ماادري بالجدول ماقبلت ادخلني
اله اجيب ورقه من الاداره جبت ورقه وكعدت بصفي ضحى
كالت شعندج متاخره خاف رجلج ماخلاج؟؟

ماجاوبتهه اساسا مرتبكه من المدرسه صاحت كومي عقيق
اشرحي حجيت بارتباك كتلهه ست ماادري بالجدول متغير
كدام الطالبات اكلت رزاله غسل ولبس واني واكفه طول الدرس..

الدمعه بطرف عيني اني مامطالبه بتحضير ولا بنسبه
اني طالبه خارجي مامحسوبه ع المدرسه ظليت واكفه
لحدما دك الجرس وطلعت...

كعدت واني اضم بكتبي وكعت دمعتي بسرعه مسحتهه
كل البنات طلعن اني ظليت بمكاني اجت ضحى يمي
كالت لاتضوجين هي هاي المدرسه كالو راح يبدلوهه

هزيت راسي وسكتت جان دكول عندج صوره رجلج؟؟
باوعتلهه باستغراب كتلهه لا شسوين بيهه؟؟
ضحى.. لا بس اريد اشوفه انتي احلى لو هو انه اتمنى اتزوج
واحد اكبر مني بهواي

عقيق.. مالي خلك هي تحجي واني ساكته انتبهت
عليهه اخذت نفس عالي وكالت ماراح اتزوج طول عمري
انه مومثل البنات حجت هيج وكامت..

غريبه هاي البنيه يوميه اكول بيهه شي وتطلعلي بسالفه
جديده خلص الدوام رجعت للبيت رحت يم فجر بعد
مابدلت وغسلت لان السبع بالشغل صبت غده خاله
اثناء ماجاي ناكل كالت فجر ماما هم تخابغين غانيا؟؟؟

ساهره.. البارحه خابرتهه صحتهه موشي تعبانه وامهه
ضغط وسكر وبس تبجي مدري شصاير بيهه

فجر.. خطيه
ساهره.. سؤالج مولله اكو شي حاسه بشي؟؟
فجر.. حته اذا احس مااكول حته لايتحقق

ساهره.. الله وحده يعلم الغيب يا امي باجر عدجن امتحان؟؟
عقيق.. لا ماعدنه
ساهره.. الجو ثلج وكلنه فرشنه ابيوتنه وضرغام بيته
لسه مافارشه هسه ادز ع ابرار ونروح انرتبه ونفرشه حته
الاثاث مامرتبه بعده بكارتونته..

تغدينه وغسلنه مواعين واخذت خاله المفتاح من فوك الثلاجه
ورحنه لبيته هو ماموجود محد يعرف بي وين يروح وين
يجي بس السبع كال رجع لحياته السابقه مخلصهه بالبستان والصيد ويبات بالقصر..

دخلنه للبيت اول مافجر مسحته كله وخلته ينشف وبدينه نفرش البيت كله مشتريله زوالي منطي فلوس لخاله ومشتريه
فرشنه الطابق الجوه واكو فوك غرفه وحمام وصاله ..

ردنه نفرشهه جانت مقفوله اصرت فجر تجرب كل المفاتيح
لان كومه جانن ظلينه انجرب لحدماانفتحت وحده تباوع
بوجهه الثانيه مصدومين من الغرفه..

ركن كامل من الحايط بس سلاح نوعيات شكال طويل وقصير
مسدس وهذا مال هذوله اهل قبل ورشاشه وسجين ويسمو
حربه كلهن معلگات ع الحايط هذا ليش هلكد يستخدم اسلاح
اول مره ادري الي بالجيش هيج معقوله عادي يشترون اليعجبهم لو اكو شي وره ضرغام محد يعرفه؟؟؟

الجانب الثاني شغلات مال رياضه وهذا الكيس المعلك
اليتدربون بي هواي شغلات هواي بحيث اول مره اشوفهن
فجر متفاجئه اكثر مني بسرعه قفلناهه ونزلنه

كملنه فرش حته غرفته وطلعنه لكيت السبع هستوه
جاي بعده بره سلمت علي وكتله روح اسبح بين مااحضرلك
الغده كال مااشتهي تعالي وياي..

رحت وياه للبيت سبح وطلع واكف يمشط بشعره باصابيعه
وكال عقيقي اليوم اجاني اتصال من عمامج!!!!!!

هو كال هيج كمزت من مكاني كتله شيردون؟؟
التفت عليه وحجه كال عمتج منطيه الرقم لعمج
وخابرني يريد يجي يتفاهم ويانه شلون تزوجتي
وشلون عايشه؟؟

عقيق.. خاف ياخذوني؟؟
السبع.. اي يجوز ياخذوج
عقيق.. صدك جمره انت لاتقبل روح صيح الشيخ ياسين
السبع.. على شنو اصيحه هم عمامج اولى بيج

عقيق.. لا مومرتك اني مومايصير
السبع.. چااا اذا تعرفين مرتي ومايصير شلج بهالحجي
الماصخ وياخذوني

عقيق.. كول الله عليك خاف مثل اخو رانيا
السبع.. لابويه مبين خوش ادمي وكال بس نشكر منكم
ونطمئن عليهه ويحجون اسبابهم ليش مادورو عليج..

عقيق.. شوكت يجون؟؟
السبع.. كال احنه نخابرك هالايام وضعج ماعاجبني
ليش وجهج اصفر
عقيق.. مابيه شي شبي وجهي؟؟

السبع.. انه اسألج تردين عليه بسؤال شنو ماتاكلين
لو قلقه من شي؟؟
عقيق.. البارحه حلمت متزوج ايناس ودكلي العرس يخبل

السبع.. طكهه ضحكه بصوت عالي وكال هاي حلمتي ووجهج
اصفر لو صارت صدك چااا شلون؟؟

عقيق.. رفعت رجليه من الكاع وتربعت ع جربايه وكتله
جمره انت ليش ماحبيت ايناس وهي كدامك

السبع.. چاا منو يحبج اذا حبيت ايناس عقيق
وضعج ماعاجبني وصايره هرموناتج مخربطه ومشاعرج
خيط بخرابيط

عقيق.. كلشي مابيه من حقي اسأل واستفسر صدك
جمره هسه فرشنه بيت ضرغام وصعدنه للغرفه الفوك انصدمنه
اني وفجر متروسه اسلحه

السبع.. باستغراب وهو يتقدم اتجاهي كعد بصفي وكال
شنو من اسلحه؟؟
عقيق.. مااعرف اشكال وانواع طويل وقصير
السبع.. ابتسم وكال اااي وبعد

عقيق.. شبيك مبتسم انت تدري بي؟
السبع.. هسه سمعت منج هو ضرغام يايوم شارك واحد
بينه وكال شي لاتحجين لاحد الشفتي ووصي فجر
اني اسأله واشوف شنو؟؟

عقيق.. بعد يومين اجتماع اولياء الامور وانطوني ورقه
تجي علينه اني وفجر
السبع.. الله كريم اذا عندي شغل ادز ام شهد
عقيق.. لا المديره كالت ابوكم يجي لان الامهات تستر لبناتهه

السبع.. وانتن شعدجن وتستر الجن حته ماتنعرفين متزوجه
لولا
عقيق.. شوكت تاخذني للطبيب
السبع.. ليش تحسين بشي؟
عقيق.. لا بس حته انشوف حالتي ماتحسنت حته
اصير حامل

السبع.. استري ع روحج
عقيق.. انت ليش مستهين بيه خلي اطيب وشوف شسوي
السبع.. شتسوين اتجيبين الذيب من ذيله...

عقيق.. متسهين بيه موو؟؟ وتقربت علي بسته
من رگبته وظليت ماوخرت غمض عيونه وسكن
كال مااجاهد بعد لو تسترين ع روحج لو الله يستر

ابتعدت فتح عينه ودنك باسني من ركبتي
وحجه يم اذني حلاوتهه بعد الفقدان
نصبر ونحلي بعدين..

اباوعله مبتسمه واجاني صوت فجر تصيح
عقيق تعالي اكلي سويت شاميه لوتلحگين
لو راح تخلص ومبين حلكهه متروس لان صوتهه مال
واحد ياكل...

كال كومي اني راح انام شويه عفته مدد وطلعت
لكيت فجر مطيره نصهه تاكل وتصيح مقهوره
واني اباوع وين مقهوره صح وجهه حزين بس
حلكهه متروس شاميه..

بليل السبع يمي اكمل دراسه واجي احشك نفسي
بحضنه ع القنفه انشوف فلم ومرات اغفه وهو يظل
يتابع ومن يريد ينام ياخذني للغرفه..

ايامي هادئه اي خبر من جبار ماكو سكت لارد اي
ولا رفض اكيد وراه شي املي بالله جبير وان شاء الله
ماانكسر من اكثر مكان امن بي..

لبابه.... كملت تنظيف البيت واصلا هوه نظيف وعمه متخليني اشتغل هواي بس اني متعوده ماعرف ابقه كاعده ومليت من النوم جراح نوعا ما بده يتحسن وضعه وتصرف وياه طبيعي ابد ما احسسه بضعفه ومرضه كملت شغل طبيت سبحت وطلعت فتحت باب الغرفه لكيت جراح جاي من الدوام ومتمدد على سرير بعد وقت جيته شعجب جاي من وقت ؟؟

جراح... سابحه حجاها وكام من مكانه وتقرب عليه
لبابه... اي كملت شغلي وسبحت بس شعجب جاي من وقت؟

جراح.... شتاقيتلج وبده يتلمس بشرتي بيده
لبابه... واني هم اشتاقلك واضوج طول اليوم وحدي
جراح.... من يانوع مشتاقتلي ؟

لبابه... مشتاقه لجراح القديم جراح اليحبني ويدافع عني مشتاقه لذيج نظره عيونك من تشوفني كلش مشتاقه لذيج الايام .

جراح... تنعاد ان شاء الله ومايكون خاطرج الا طيب
واعوضج عن هذا الصبر والتعب تحملتي ووكفتي بجانبي
رغم اذيتي الج..
لبابه... بوجودك كلشي يهون وبتسمت بوجهه نسيت اسالك متغدي لو احضرلك غده

جراح.. لا ماريد بس قفلي الباب وتعاي مشتاقلج
لبابه...ترددت اقفل الباب بس لازم اساعده واساعد
نفسي نتقرب من بعض واشيل حاجز الخوف ونتجاوزه قفلت الباب وتقربت منه رفع الغطه وفتحلي اديه مددت بحضنه وخليت راسي على صدره

جراح...الحمل خو ما متعبج ؟
لبابه....لا بس انام هواي ودوم دايخه
جراح....ذكريني باجر من نطلع من الكليه احجزلج يم الدكتوره
لبابه...رفعت راسي بحركه سريعه ليش نروح للكليه

جراح....غير تقديم مالتج لازم من ذاك الاسبوع اقدملج بس صارتلي شغله اخرتني ولان دوامي جديد بصعوبه الواحد
يتعود مامتعود ع كرسي وميز متعود ع الصحراء

لبابه...متصور شكد فرحانه لان رجعت لدوامك
جراح..ارتاح من اشوف عيونج يضحكن والفرح مرسوم على وجهج

ابرار لراس الشهر لازم تسافر مشغول بالي عليهه شلون
راح تعيش وحدهه صح اكو وياهه بعثه كامله وهي سباعيه
بس ماادري صحيح وكفتي بجانبهه ولبيت طلبهه لو خطأ

لبابه.. ليش خطأ هي طموحه وهاي امنيتهه وهي سباعيه
ووياهه بنات وهناك كالت اكو عائله عراقيه هم كرايب
وحده من صديقاتهه لاتخاف عليهه خليهه تجي رافعه راسك

جراح.. ابرار صرفت دم كلبي عليهه خابرني جبار
يصيح وشنو تسافر واسوي هيج واسوي هيج كتله
مكالمتك سجلتهه راح اشتكي عليك سكت انه اريد اطلعهه
من جبار واتمنى لو تزوج حته خارج المحافظه المهم مرتاحه

لبابه.. تلمست خده كتله لاتقلق يخلصن بسرعه
وترجع الايام والسنين تركض ركض..

جراح... لبابه اهتمي،بنفسج واكلي،زين لاتظلين
ماشتهي امي تكول ماتاكل ليش هيج

لبابه....موبيدي ماكدر شهيتي مسدوده
جراح....هذه الحجي ما يمشي عندي لاتنسين شايله روح ابطنج وانتي عندج ضعف اذا ما اكلتي اني اوكلج بيدي

لبابه....حجاها وتلمس شفايفي بطرف اصبعه وضغط على شفايفي رجع سحبني ولمني لحضنه وايده تتلمس خصلات شعري ضليت نايمه بحضنه غفيت بين اديه...

ماحسيت غير على صوت مبايله يدك فتحت عيني الغرفه ظلمه شكد نمنه ماعرف باوعت بلموبايل الساعه بلسبعه يعني الاذان مأذان على حركتي كعدت جراح فتح عيونه بثقل

جراح....شنوو نمت هوااي
لبابه....اي الساعه بلسبعه كوم صلي بين ما حضر العشا عمه متكدر وحدها
جراح....لاتسوين عشه هسه اصلي واطلع اجيب من
بره حجاها وكام توضى وفرش سجاده وكف يصلي
طلعت لكيت عمه تقره قران خليت القوري على نار

لان جراح اهم شي عنده الجاي خليته على نار هادئه
وتوضيت وصليت بين مكملت طلع جراح جابلنه
عشه حضرته وكعدنه ناكل جان كبد جايب الي

وكباب الخاله لان متحب الكبد واني هم ما احبه
كوه جبرني وعمه تخزرني وتصيح اكلي لا اصيح
ساهره عليج كملنه عشه نطيتهم جاي وطبيت لغرفتي
مددت احس بتعب

وافكر بوضع جراح ما خذ كل تفكيري ومن جهه الدوام راح يبدي وحملي ماعرف اذا اكدر اوفق بينهم او لا رتبت الغرفه وفتحت التلفزيون على. فلم اجنبي، وطفيت الاضويه وكعدت اتابع شويه وطب جراح ماينام بملابسه ابد

نزع التشيرت وظل بس بالفانيله الداخليه سوده
ابد عيني ماتروح من اكتافه شلون الاثر حافرهه
كلما اشوفهن اتألم من داخلي..

مدد بصفي وكال شوكت بده؟؟ جاوبته
هستوه بده اتابع وياي؟
جراح.. اتابع ليش لا وياج كلشي حلو

لبابه...بقينه نتابع الفلم واني بحضنه لحدما خلص وغفينه كعدت ثاني يوم من الصبح سبحت ولبست تنوره وقميص بيجي وجاكيت اسود ولازمه جنطتي واكفه اباب الحمام منتضره جراح يطلع فتح الباب باوعلي بتركيز وهوه ينشف بشعره

جراح...اليوم كاشخه من الصبح شنو هل نشاط
لبابه...غير نروح تسجلي بلكليه
جراح....ترى الساعه 7 بعده الدوام

لبابه....احسن عمود منتاخر
جراح...تدللين بس خل اشربلي كوب جاي لان راسي يوجعني

لبابه....مجهزه الريوك يم عمه تريك بين ما اكمل لبسي
جراح...طلعي كدامي تريكي اذا ما اكلتي ما كو تسجيل
لبابه...طالعه بس والله ماشتهي
جراح....يلا كدامي البس،واجيج

لبابه...اكلت لكمه بسرعه وهوه عيونه عليه يباوعلي بتركيز كملنه وطلعنه وصلنه للكليه يمشي واني امشي وره خطواته سريعه كوه الحك بي كملنه تسجيل ورجعنه للبيت خابرتني فجر سولفتلها عن الكليه والتسجيل وكلشي شفته هناك فصلته منها واني طايره من الفرح واخيرا راح احقق حلم من احلامي الف حمد وشكر

.خلص اليوم عادي جراح وصلني ورجع لدوامه لليل انتظرته تاخر ونعست ماحسيت على نفسي شلون غفيت واني انتظره ما حسيت غير على نفسه قريب من وجهي وايده تتلمس بجسمي فزيت مفزوعه همس يم قريب اذاني

جراح...لاتخافين ما أذيج
لبابه...حاولت اكون طبيعيه وياه سحبني لحضنه
احس الخوف مسيطر على كل عضو بيه بس لازم انطي فرصه لازم نحاول لحد ميتحسن وضعه

بده يطبع بوسات خفيفه وشويه شويه بده يتغير وضعه وعيونه حمر واخذ شفايفه بوسه اشبه بالعنيفه ونزل على ركبتي وعبالك وجبه دسمه كدامه ويريد يستلذ بيهه

توجعت احس لمسات ايده صارت اكثر قوه
ويتنفس بصعوبه همست بصوت خافت وشفايفي
ترجف خوف جراح دا تأذيني حباب ابتعد.

ماسيطرت ع حالي اتذكرت ذاك اليوم كمت ابجي واني
ابعد بي واكله عوفني ماجنت اعرف التوسل والدموع تزيد
حالته

جان مايسمعني ولاحته حاس بألمي اول ليله ماكو روح
ابطني بس هسه ماخايفه ع نفسي ولا ع مشاعري خاف
تنكسر وتنجرح مره ثانيه خايفه ع ابني..

قيد اديه بثنين اديه ورفعهن فوك راسي
وتقربلي بكل وحشيه توسلت بي جراح اني حامل
جراااااح ااااصحه راح اموت جان فاقد

نعادت نفس الليله نفس الوجع الجرح كلبي ومشاعري نفس المأساه جنت اكول تغير بس الصار،خلاني اتأكد جراح مستحيل يكون طبيعي ومستحيل ارجع لبابه القديمه

كل السويته راح بمهب الريح من اقل تقارب شفت انسان
ثاني اني يطبني طوب بس الي ابطني شنو ذنبه
لازم يتحمل وحشية ابو هاي اذا ماخسرته بسبب هالليله
الكشره..

ابتعد عني واني اخذ النفس بصعوبه الم قوي بنهايه
بطني شفته طلع للحمام وبسرعه انفتح الباب صوت عمه
وهي تصيح يمه بنيتي اسم الرحمن يحرسج..

الليله الاولى رانيا شاهده وهاي الليله امه بدون ملابس
ع الجربايه حته مااكدر ارفع ايدي لفتني بالفرشه وهي
تردد بايات ع راسي ..

كومتني بصعوبه واني ابجي كل الكدرت اكوله عمه
اني حامل خاف صار بي شي؟؟ كعدتني ع الجربايه
وفتحت الكنتور طلعتلي ملابس وتهدي بيه..

اريد ادنك اباوع اكو شي ينزل حاسه برطوبه
بس ركبتي احسهه مخلوعه من العمود الفقري من
كدما اذاني سمعت الباب مال الحمام انفتح طلعت عمه مدري
شحاجته بحيث مااجه للغرفه واخذتني للحمام...

هي وياي سبحت واني ع فد بجيه ماسكتت ابد
يأست من حالي ومستحيل يتعالج واذا صار شي
بالطفل لو اموت مااظل وياك ياجراح..

بعدني ابجي وعمه تهدي بيه بالغرفه واسمع صوت
فجر وهي تصعد الدرج سريع وتصيح جراح
وين جراح ؟؟

كامت عمه تلكتهه حته ماانتبهت ع حالي فجر
بس كالت وين جراح السبع يصيحه خابرت
خاله ودكول رانيا من الصبح شردت من البيت
وعايفه حته جهالهه وهسه نص الليل ومالگوهه..


يتبع.....

#خبايا_الاقدار
❤️♨️♨️

#البارت التاسع والاربعون


جا هيج فركه بلا سبب؟
لو ادري هاديلك عطر
حته ابقه الوم بروحي..!
.....
لبابه.. رغم الالم البيه بس رانيا تعنيلي الاخت الجبير
كمت ع حيلي واني لازمه بطني وعمه ساندتني كتلهه
وين رايحه ووين ضرغام؟؟
فجر.. ماادغي خاله تبجي ودكول من الصبح اندوغ عليهه
وهي اليوم ممداومه وضغام بالقصغ السبع كال صيحوا
جغاح
ام جراح.. بنتي نزل جوه شوفو بالحديقه هسه ننزل يم
امج
فجر.. شبيهه لبابه ليش تبجين؟
لبابه.. ماكو شي بس عندي الم هسه انزل وياكم
دارت وجهه ونزلت وعمه وياي لبست روب فوك ملابسي لان بارده وساندتني ونزلنه سوه بعد مااخذت مسكن نزلت قطرات دم قليله وتوقفت بالي مشوش خاف يصير بالطفل شي..
تضارب بداخلي شعور كره وشعور يكول خطيه اعذري
رجعت لنقطة الصفر وهالمره ماحجيت لماما لان ضغطهه
مرتفع وبس تبجي ع رانيا...
كاعده بالصاله مالتنه وطبوا السبع وجراح مارفع راسه ابد
جان يحجي ويه امه ويه ماما بس ابد مااجت عينه عليه
شويه واندك الباب حيل عرفناه ضرغام..
دخل على السريع تلكته ماما تحجيله شكالت خاله
بس مبين كوه مصبر على وضعه صاك اسنانه ويتنفس
سريع كال شلون تعوف جهالهه ماتعوفهم!!
ساهره.. ماادري ياأبو ليث شصار وعافتهم امهه متخبله
دكول كعدنه الصبح ب7 مالگيتهه بفراشهه مدوره البيت
ماكو تخابرهه مغلق رايحين لمدرستهه ماجايه وهذا اخوهه السكط كالب الدنيا..
السبع.. هي جبيره وعاقله وضحت بسعادتهه علمود جهالهه ماتسويهه وتعوفهن بيد واحد عار لازم اكو شي جبير خلاهه هيج تسوي
ساهره...امهه دكول خابرت ع وسام مايدري كايلهه اني بالجيش ملتحق وجاي جد الجهال ماخذهم لان يبجون على امهم ويخافون من حسام..
لبابه... يتناقشون وضرغام ساكت تليفونه بيده وملتزم الصمت التفت علي السبع كاله انت هم تخابرهه؟؟ هم كالتلك شي؟
ضرغام.. ماعدنه تواصل بس حجه هالكلمتين وسكت
شويه وكام وكف كال راح اروح لبغداد
السبع.. ضرغام مالك حق ادور عليهه كدامهم وراح تتصادم ويه اخوهه وتكبر السالفه
ضرغام.. ليش مالي حق مرتي ترى على ذمتي يعني عرضي بعدني ماطلگت حته اشوفهه غريبه وهذا اخوهه احسابه يمي كلما اكول البسه هو يجيبه لروحه ..
لبابه.. عافنه وطلع والسبع راح وراه كلنه انخبصنه كلساع
انخابر على خاله دكول حسام لازم السلاح وكاعدلهه بالباب ولكم ياناس بنتي راح تروح من اديه

اجه جراح كال لماما بدلي راح تروحين ويه السبع مايكدر
يعوفه وحده وانه اظل هنا التفت اجت عيني بعينه بسرعه دار وجهه
بدلت ماما ووصت عمه على البيت اجت عقيق يم فجر وعمه نزلت يمهن تبات صعدت واني لازمه الدرج وايدي جوه بطني عندي الم خفيف طبيت للغرفه نزعت الروب ومددت بالفراش
عمه مرتبه الجربايه وحته مبدله الفرشه رفعت عيني
على السگف واني اعيد الصار براسي مثل مانكول ننفخ
بجربه مزروفه وهذا جراح مايفيد لا الاهتمام ولا التضحيه
علاجه النفسي ملتزم بي جلسات يروح كل شهر بالموعد
ابد مايفوته ظاهريا متحسن علاقاته العامه والاجتماعيه
متحسنه تصرفاته ويه الكل طبيعيه حته يكدر يتماسك ويسيطر على عصبيته بس علاقتنه الخاصه هي هاي
الماكدر يتحسن اتجاهه..
هم راح يجي وهم راح يعتذر ويوعدني اعوضج بمكان
التعب واعذري حالتي وراهه شنو لازم انظل اصدقاء
مالنه حق نتعمق بالعلاقه الزوجيه لان الظاهر صار طبع
عنده وماراح يتجاوزه...
انفتح باب الغرفه صوت طكة مفاصله من يمشي واضح
مطفيه الضوه بس اشوف خياله نزع التشيرت وواكف يم
الكنتور اجاني صوته بهدوء لبابه نمتي؟؟؟
لبابه.. لااا
جراح.. متأذيه
لبابه.. اذا الي خاطر يمك ولو شعره مااريد اسمع اي مبرر
ولا دكلي اسف وماتنعاد ومااذيج بعد كلهن مااريد اسمعهن لان اعتذارك ماراح يصلح الصار
الي اريده منك تبتعد عني خلينه مثل قبل مولخاطري
لخاطر ابنك اتحكم بنفسك وسيطر ع وضعك ولاتتقربلي
مامستعده يوميه اعيش نفس الشعور واظل اعاني شلون انساه وبعدني مانسيت تجي تكملهه من جديد
جراح.. ماراح اعتذر بس الخلل بيه انه طبيعي ومتحسن
بكلشي حته بعملي بس وياج ويمكن هاي راح تظل
صفه سيئه مااكدر اعبرهه
لبابه.. منو كالك اني اتحمل اعيش ليله وحشيه ومااحس
بأي احساس مجرد تاخذ التريده وتكوم وترجع تعتذر وماتدري البداخلي شنو والكسره شكبرهه تعال شوف اثار اديك وعنفك شلون طابع بكل جزء بجسمي..
كملت حجي وهو ساكت ياربي تعبت شسوي اضغط علي تنتكس حالته اسكت اني اتأذى ومااتحمل بعد اجه كعد على الجربايه من الجهه الثانيه ظل هوايه كاعد ومدنك ولازم راسه اني انطيته ظهري ونمت...
فزيت على بوسه انطبعت على گصتي فتحت عيني

جان لابس الزي العسكري ويخلي مسدسه بحزامه
رجعت غمضت عيوني ماكمت ولاردت احجي وياه..
نزل واني مدده بالي يم رانيا كمت على كيفي اكو الم
بس خفيف رحت للحمام اطمئنيت ماكو شي بس لازم
اراجع حته مااظل قلقه خلي تجي ماما وتاخذني..
رانيا بالدوام نزلت جوه بس عمه وفجر وعقيق بالدوام
رفعت تليفوني خابرت ماما جاوبتني هابنيتي شلونج
البنات راحن لدوام ؟؟
لبابه.. صباح الخير ماما اي راحن عمه يمهن واني نزلت
جوه بشري لگيتو رانيا؟

ساهره.. ااوف يالبابه مالگيناهه واني ويه خالتج بالمستشفى واطفالهه يبجون ورجعهم جدهم وهذوله لازگين ببيتهم
لبابه.. وين راحت ماما حسام شيكول شصاير؟؟
ساهره.. قبل اسبوع عابر عليهم حرامي وبايگ كل فلوسهم حته الذهب وهسه ربع دينار مايملكن وهذا متخبل عليهن يكلهن جذب ماانباكن انتن ضميتهن ورانيا الله يسلمهه متعاركه وياه وتاهمته وكاتلهه حيل
دكول خالتج صار اسبوع هو يدك بيهه حته مايخليهه تكعد ويانه على الاكل والظاهر طك گلبهه ومااتحملت وعافت الدنيا بحملهه وشردت
لبابه... سوده عليه رانيا شلون عكست وياهه الدنيا
ماما ضرغام شيكول وخوما تصادم ويه حسام؟؟
ساهره.. لا ماسوه شي عافوني وراحوا بس يخابرني
يتاكد ادعولهه ماما انتن يتيمات والله يستجاب منكم
كولي لعقيق تدعيلهه ينجيهه من هذا الكرب ...
لبابه.. سديته من ماما ورحت توضيت وكلت لعمه تدعيلهه قلقت حيل شصاير برانيا اتذكر نصيحتهه الي وشلون جنت اخذ رأيهه بكلشي شلون هيج تصرف...
لو ضرغام الله يعين گلبه احسه مثل التايه وبعد ماعنده صبر ولو يوكع بيده يخطفهه من الكل جاي يعاني من الم الفراك وماعنده احد يواسي حته ام ماعنده يشكيلهه ..
عمه سوت الغده واني وياهه شلون ايام صعبه احس سنه
2009 مثل الكابوس شوكت تخلص موخلصت ارواحنه
ماكو مصيبه ماصارت بيهه رغم هي سنه زواجي ..
اجن البنات من الدوام صبينه الغده كلهه ماتشتهي تاكل
باوعت لفجر كتلهه شدكولين رانيا وين؟؟؟ ماجاوبتني
ظلت ساكته بس كالت خلونه انسبح الهه انه على رجعه
لقادر...
كل وحده لزمت سبحتهه وظلينه انسبح وعينه
على التليفون شوكت يخابرونه ويبشرون بسلامتهه
دك تليفون عقيق اخذته ودخلت للغرفه سمعتهه كالتله
هلو جمره ..
جمره.. شلونه الحلو مالتي
عقيق.. زينه الحمدلله انت شلونك
جمره.. الحمدلله شلونه دوامج؟ تغديتي؟
عقيق.. زين دوامي انطونه اوراق الرياضيات
ماخذه 90
جمره .. عفيه ببنيتي لاتروحين للبيت ظلي يم
البنات..
عقيق.. مالكيتوهه
جمره.. لااا اصلا مامبين طالعه من البيت لان اخوهه
يكول الباب الخارجي اقفله وظال على قفلته اله عبرت
من السياج
عقيق... هو شصاير حته هيج تنهزم
جمره.. هم ماادري هذا ابو راس اليابس حته مايسولفلي
ومبين عنده شي ويخطط بس لشنو مااعرف كتله ازعل
عليك اذا ماسولفتلي بس ضاربني عرض الحايط
يله عقيقي ديربالج على نفسج اخذي دواج
ونامي لاتسهرين خابرت جراح يجيبلج
حلويات انتي وفجر اكليهن مو ماتاكلين
اني عندي شغل يم صديق قديم راح اروح اشوفه..
عقيق.. ماشي انت هم انتبه على نفسك وشيصير
طمنه البنات بالهن مشغول ... نهيت المكالمه وطلعت
سولفت للبنات فجر كاعده على الدرج كالت غاح يلكاهه
ضغغام ويطيح حظهه...

رانيا... من يوم الشفت بي ضرغام واجه وسام ودافعلي
شد وياي حسام فد مره منين ماالتفت اسمع الغلط فشار
ضرب وصلت بي يشيل الصينيه ويشمرهه بوجهي
ويكلي صبي مره ثانيه..
واحد قذر الى درجه ماتنوصف لاصوم ولاصلاه مايعرف
الاذان شوكت يأذن يطب يطلع يكفر حته رضاوي
كام يلكف منه وخلاني اعاني بتربيه الاطفال شلون
دارت بيه الدنيا هيج...
وسام شد وياه كلما يخابره يرزله مجرد ماواحد يبجي
من الاطفال وسام يتخبل تحلف بي وكاله حته فصل
افصلك من دوامك كدام وسام زين وبس يختلي ينگلب
چلب ويعوي فوك راسي..
مرات اصفن اكول شنو الذنب السويته؟
وليش اخوي يكرهني ويحب سهاد ويوميه يخابرهه
واسمع ضحكهم ويه الجهال وهذيج النذله بالجذب
ماتسأل على امهه اشوف الدمعه بعين ماما وتنقهر
ترباتهه وكسرة ظهرهه راحت لهيج وحده...
حسام عنده خاله اخت امه ماعدهه اطفال عايشه
بكركوك يوم منهن خابرته كالتله اريد اجي شكم يوم
ببغداد رجلهه يدور على شغل بلكي يلگه طبعا احنه
مغلوب على امرنه مانكدر نرفض لو نوافق ع جيتهن
البيت بيت حسام واحنه خطار ابيت ابن ابوي المهم
وره يومين اجت خالته عمرهه ب30 هي ورجلهه
بس اشكالهم توحي هم اكبر خالته اسمهه مها حبابه حيل
ماشفت شي منهه موحلو ابد...
اله رجلهه اسمه فارس مرات اشوف نظراته مومريحه
اتجنبه لا اكعد يمهم ولا حته اكل بنفس السفره
اكمل شغلي واركض لغرفتي حته جهالي مااطلعهم اخاف
عليهم لان كلام حسام كله فشار وكفر وكاموا يلكفون

منه وين الكلام البذيء...
احنه عدنه حصتنه اني وماما صح مايجيبن قطعه بس
عندي امل تنفتح سلف واسحب ع راتبي واشتري حتلو
غرفه وحده واستقل بعيد عن حسام وعندي شكم
قطعه ذهب ضاميهه بالكنتور..
هذيج الليله ماادري شلون ماحسينه وعبالك مخلين النه
منوم واحتمال فعلا لان لا اول ولاتالي طلع حسام هو ورجل خالته بليل وجابولنه عصير طبيعي وكلنه شربنه منه
كعدنه الصبح ع صوت حسام وهو يغلط ويصيح ويصيح
باب الممر مفتوح اسمع صوته بره بالصاله اجت عيني على الكنتور شلون مفردش بسرعه هزيت ماما كعدت
زحفت زحف بالكاع من الصدمه كلشي ولا الفلوس منو
مسوي هيج بالكنتور اندور اني وماما ودموعي تجري
ماكو ريحه فلوس ماكو حته مصروفي بجنطتي ماخذي
ماكو ولافلس بالكنتور...
كمت ادك والطم واعيط وماما وياي فتح الباب علينه
يصيح شبيج تصيحين جنج صوت كح... عايقه منين
الله بلاني بيج وضربني دفره لزمته من رجله وصحت
بصوت عالي ...
حقير نذل حرامي انت ومنو انت ورجل خالتك ياعار
ياسكط هسه اتجيب فلوسنه لا اشتكي عليك كلماتي هيجت الوحش البداخله كام يضرب بيه بوكسيات
دفرات بس انگلبت علي جماد منين مايضربني اضربه..

جهالي انفزعو من النوم وهو يعيطون ماما تحاول
تخلصني من ايده ماتكدر اجت خالته كوه بعدته
عني وطلع يصيح صوته واصل لسابع جار ...
كعدت مهدود حيلي تعبنه وورثنه راح جسمي
يوجعني بس مومثل گلبي اجه كدامي ضرغام وينك
ياضرغام مااوجعك كلبك عليه من الهم والمصايب كمت
ماالحك حته افكر بس اريد انام وارتاح...
ماما من شافت حالتي عافت سالفه الفلوس وظلت
تهدي بيه شحجي ياامي راح نبقه طول العمر تحت رحمه
هذا النذل هو الباكهن متاكده منو يعرف بيهن غيره
هو ورجل خالته السكط...
دبرله جذبه على اساس حراميه داخلين للبيت من باب
الممر وعود حته مكسور الجام مااستبعد هو مألف ومخطط لهالشي وشمعنى بذاك اليوم جاب عصير
وشلون هيج انفتح الكنتور ويم راسنه وماحسينه ...
طلعت الدنيا من عيني فكرت اخابر وسام واكله قابله
ارجع بس المهم اخلص من حسام وبلحظه تنرسم صوره
ضرغام كدامي اتذكر دلاله وغزله
صوته من يحاول يخفت صوته شلون يلامس خلايا
السمعيه وعبالك ندى الصباح ولامس الزهور وتفوح
الرائحه من فرحتهه ...
الحب الي انزرع بگلبي لضرغام خلاني بوسط الطريق
لا اتقدم خطوه ولا ارجع تربطت رجليه وصرت اسيره
حب مقتبل عمر الثلاثين...
المن اشكي واعاتب منو فكرت اروح اشتكي علي
بس خفت على ماما واطفالي هيج انسان يكدر
يسوي كلشي يكدر يأذي البريء بدون مايرفله جفن...
ظليت اتحسب علي ليل نهار اكوم واكعد اكول
حسبي الله ونعم الوكيل بيك ياحسام كون كل فلس
ينگلب عليك نار وماتعرف تعالج ياوجعه بجسمك...
وره يومين داومت فوك القهر لزمتني المديره
غسل ولبس لان متهاونه بدوامي غياباتي هواي
من غير الاجازه واني المدرسه الوحيده حاسوب وجاي
تصير شواغر بسبب اهمالي...
صار راتبي يادوب يكفي لراس الشهر ومرات اداين
من المدرسات وين جنت وين صرت اول مااستلم
الراتب يتلكاني ياخذ نصه من احجي تجيني الضربه
لو يهد على ماما وهذا الكاسر ظهري...
بين يوم وليله صابني اليأس من خابرتني المدرسه
وكالت بلكي الفلوس ماعندي صح هنه موهواي بس
اني ماعندي ارجعهن ماصرفتهن ع نفسي صرفتهن
على ماما لان كل اسبوع بالطبيب...
اتذكر هذيج الليله بجيت ومحتاره شسوي رقم
ضرغام كدامي ع الشاشه ومتردده اتصل بي واحجيله
لو اتصل بوسام ؟؟؟
فكرت هواي ودمعتي على خدي ماردت اورط ضرغام
اعرفه عصبي واعرفه مايسكت اذا عرف بحسام شمسوي
بيه وخاف انكشف اني على ذمته وتصعب اكثر...
دكيت على وسام جانت الساعه ب9 مارد عليه سديته
وسكتت وكلت باجر ابيع حلقتي لان مانزعتهه واكلهه
الباقي على الراتب...

وره ساعتين دك تليفوني جابه سيوفي يركض باوعتله
وسام كمت للغرفه سديت الباب وجاوبته رغم حيل
كارهه نفسي مااتمنيت اوكع بهيج موقف كدام وسام..
وسام.. داكه عليه اني خفر وهسه شفته
رانيا.. اي اريد منك شغله
وسام.. كولي
وسام.. حجيتله على المدرسه وختمتهه بجمله انت
تدري فلوسنه كلهه انباكت وهاي تريدهن واني صرفتهن
على ماما...
وسام... وليش تاخذين منهه؟؟ الحبل البيناتنه ماانگطع
ليش رانيا تنزلين نفسج للغريبه ترى ابقه اب اولادج وواجبي اساعدج واعتبريهن رد للدين الصرفتي عليهم
هذيج السنين
رانيا.. مااريد شي منك حته هذني اعتبرهن دين
من استلم راتب انطيك نص نفقة الاولاد الي ادزهه
ياخذهه حسام مصرف للبيت وكال بس تحجين ارجعهم
لابوهم يعني اني عايشه بنص راتب ...
وسام.. هذا حيل مصخهه انزل ويصير خير باجر الصبح
ادزلج فلوس بيد السايق للمدرسه من ادك عليج اطلعي
اخذيهن لاتخلين حسام يعرف بيهن بين ماانزل..

رانيا... وسام اني تعبت حيل انت شلتني وشمرتني
بالنار يم حسام
وسام... رانيا اسمه اخوج شمدريني نذل واختج السبب
جانت تخابرني وتذمج وسوت حسام اخو خيته
لاتقلقين اسبوع وارجع واني اطلعج من البيت بس
بطلي عناد موعلمودج علمود امج والجهال
رانيا... اخذت نفس وتشكرته وسديته الله لايوفقج ياسهاد شنو البدر مني حته هيج تأذيني ...
اتذكر من جنت يم اهلي اجيب راتبي انطيهه نص لان
رجلهه كاعد وماعنده شغل اكول اني مااحتاجه
لو من رادت تشتري بيت اجت علينه وبابا انطاهه العنده
واني ركضت جبتلهه كلادتي كتلهه بيعيهه واخذيهه
ليش هيج جازتني هو عمل الخير غير يرجع خير
عليه شو ماحصلت بس الشر استغفرت ربي وطلعت
من الغرفه ماردت اشغل بال ماما سألتني منو كتلهه
مدرسه وياي خابرتني...
ثاني يوم خابرني وسام كال راح يجيج السايق وكتله
يفوتلج لليجوه اطلعيله صدك شويه واجه الرجال انطاني
ضرف فتحته جان مبلغ زين انطيت المدرسه دينهه
والباقي ضميته للايام السوده....
من. تخابر عمه اسألهه عن ضرغام دكول رجع مثل
قبل واحمل نفسي المسوؤليه ليش هيج سويت بي
رجال جانت حياته ماشيه دخلت حياته. خربطتهه
وطلعت ...
مايروح عن بالي لحظه واشتاقله هواي بس مااكدر
اخابره نتعلق اكثر واعرفه مخبل اذا عرف بلي
امر بي ماراح يسكت...
جانت الساعه ب11 كلهه نايمه كمت للمطبخ طلعت مي
وادور على كلاص لان الجهال بليل يكعدون عطشانين
سمعت حركه عبالي حسام بس مااحس غير ادين
حاوطت خصري وراسه برگبتي ويتلفظ بالفاظ بشعه
صرت مثل الخشبه تقززت حيل ادفع بي وايده على حلكي من صوته وريحته القذره عرفته رجل فارس
رجل خالته تخبلت احس روحي تريد تطلع من المقاومه
وهو دافن راسه برگبتي...

حرك ايده شويه عضيته حيل ابتعد هستوني اريد
اعيط سد حلكي كال بس تعيطين اكل لحسام تحرشت
بيه وتعرفين حسام شلون يصدك ضربته دفره برجلي
وانهزمت للغرفه...
لازمه راسي احسه صار بلوكه بيدي وجسمي مايشيل
الثقل افرك برگبتي وابجي بدون دموع متقززه
دخيلك ربي مااتحمل بعد..
فقدت اعصابي كمت اتخيل واني ونايمه يعتدي
عليه حته تخيلته يعتدي على اطفالي فوك الساعه
كاعده يم الباب وكاتمه صوتي لاتسمعني ماما وتكعد
نفسي لعبت حيل فتحت الباب اريد اطلع اجه صوت
فارس بنص اذاني وهو يحجي لحسام يكله هاي اختك
ضبهه لاتسويلي مشكله ويه خالتك هسه بالمطبخ
اتحرشت بيه وطردتهه..
يمكن هذا الموقف يجي بالمرتبه الثانيه بعد اختطافي
تخبلت واني اسمع هالحجي يعني هيج نطفه قذره
انخلق منها حسام دخيلك الهي..
بدون شعور ركضت للغرفه اخذت تليفوني وصعدت
ليفوك فتحت باب السطح على كيفي وختلت جوه درج
الطابق الثاني اكو سكراب قديم وتنك مال دهن
سويتهن مثل الساتر وكعدت..
مااعرف ليش هيج سويت بس جنت خايفه حيل
اتخيل حسام يطب للغرفه ويذبحني بالي يم جهالي
بس مايكدر يسويلهم شي يخاف من وسام بس خايفه
على ماما
بهذاك الليل وشهر 12 جان طلعت رقم ضرغام اريد
اتصل علي طلع مغلق كلما اتصل مغلق قفلت الجهاز
وحاضنه نفسي وانتظر الصبح يطلع بين مايجي وسام
لان بس ينزل يجي ع الاولاد...
ماغمضت عيني نايمه بنص السكراب والزنجار اسمع
صوته الصبح ويغلط عليه ويفشر حته على ماما وروحي
تحترك مثل الشمعه ماتأذي غير نفسهه...
شلون ايام اعيشهه مثل بطن الفانوس
كلما يعبر يوم تسود وتسومر جوانبي
كلما يشتعل ساعه السواد يحيط بي...
ماكدرت انزل اسمعه يكول اليوم اذبحه عايقه
سوت سوايتهه تتحرش برجال معوزه هالساقطه
اكول ليش ماترضه ترجع لرجلهه ثاري متعلمه
على الاستهتار...
من يطلعون بره اسمع اصواتهم ومن يدخلون جوه كلشي مااسمع بس عرفت خالته ورجلهه راحوا بيومهه واجت
عمه ساهره لان سمعتهه رزلته وكالتله خاف عبالك اني
ام رانيا وترفع صوتك عليه وراي زلم اتشك حلكك شك
بدون اكل اكوم اشرب مي من التانكي وارجع لمكاني
الطابق الفوك متروك بي حمام بابه على السطح متروك
بس ادخله اشكال الحشرات بي بس تكربست مااكدر انزل
ماينلام ضرغام من يكول ثوله وغبيه شبيه
جبانه ليش ماواجتهه على الاقل لومخابره على وسام
يدز ابو بس هم خفت خاف يتهموني وياخذون الاطفال..
3 ايام ضبط حيلي انهد احمد الله واشكره اكو جيس تمر
يابس اكلت منه جبناه ويانه من البصره ضاربته
الشمس حته سني يوجعني من اكله...

اخاف افتح جهازي بس كلت مدام عمه ساهره هنا معناتهه ضرغام يدري فتحت الخط دكيت علي هم مغلق
هستوني نهيت المكالمه دك عليه رقم ماجاوبته دز رساله
افتحي لا ابتلي بيج وروح اولادي...
من حلف هيج عرفته هو بسرعه فتحت
اجاني صوته يرعد وين انتي؟؟ بيج شي احجي
لا اشعل عشيرتج ..
جاوبته بهمس اني على السطح اخاف انزل
ضرغام.. ثوله غبيه رعنه الله انطاج بس شكل عقلج