صعدت السيارة و السايق يهدي بيهم، دفعه خالد و كاله روح، و بقو خالد و امجد اثنينهم ، تحرك ابو السيارة اني ابجي، اتصلت برافد :- الو

رافد :- الوووو

- الحك خالد.

- وينه ؟ طلع يدور البرب*** بتج

- احترم نفسك و الحك اخوك راح ينكتل، اسلاح عدهم و متذابحين اني عفتهم بالبيت و ماخذه ديار للمستشفى راسها مفتوح و يصب دم

رافد:- العنوان وييييين احجي

-- راح ادزلك اياه برسالة
قفلته من عنده و دزيته اله برساله و شمرت الموبايل،
باوعت البتي الدم مغطي وجهه اديها محركة، صفحة من شعرها محترك لاعب باحوالها لعب

حضنتها و كمت ابجي و اصحي بيها :-ولج ماما ديار كليلي شسوالج امي حبيبتي، اصحي يا امي الله لا ينطيه بجاه النبي يشل ايده طول العمر ان شاءالله و ينتقم منه ، ااااخ دعوة ام يا ربي لا تردني اريدك تنتقم منه مثل ما سوا ببنيتي

هاي جزات تعبها و كسران ظهرها عليه و على جهاله النذل ، اني الك بس خل اشوف حال بتي

السايق :- هي تصير مرته ؟

- عشتو اي يداده مرته عساني متت بيوم الزجتها اله هالسافل

- و هذا الثاني اخوها ؟.

- اي عيني ، بس وصلنا بساع فدوة بنتي راح تروح من ايدي

وصلنا للمستشفى كلت اله :- صيح احد يشيلها اني ايدي ما تعيني

صاح على الحرس الواكفين بالباب كال للهم:- شباب همتكم ويانا بس هاي البنية فاقدة الوعي

ركضو ذولاك جابو كرسي متحرك، رادو يحطونها تموع و توكع من الكرسي ما تثبت

شالها العسكري البالباب وفات جوا، ركضت وراه، شاف سديه حطوها و هم يسألون شبيها ؟

- زوجها ضاربها الله ينتقم منه

شالوها و نقلوها الممرضين و الاطباء و كفوا على راسها، كالو متعرضه للضرب براسها و اكو شك جبير براسها يحتاجله خياط ..
و يحتاجلها اشعة فورا حتى نشوف اذا كانت الجمجمة او الدماغ متأذي
حروق بأيدها قوية لازم تتداوى فورا

فاقدة دم، و ما ماكله يوم كامل ، الضغط عدها هابط و نسبة الدم نازله ، بقوا يداوون ومحتارين بيها

خابرني اسماعيل :- بشري ما جتي بتج

- هنيالي عليك والله عشتو عدها اب

- بالدوام اني باجر انزل وينها هي

- بتك مكتوله اسماااعيل مشكوك راسها و ما ديعرفون علتها

- منو هذا الكاتلها

- رجلها كاتلها بيك خير تعال اخذ حق بتك منهم تهموها باطل و كتلوها الله لا ينطيهم بجاه الله و سماواته

- امجد مسوي بيها هيج

- اكلك انت سكراااان ؟ بتك تهموها و كتلوها هاي بالمستشفى ميته الا شوية وين اروح بيها ووين انطي وجهي كلي

- من تكعد كليلي

- من الله ياخذك ان شاءالله لو بيها فلوس و فايدة جان عاركت الدنيا بس لأن بنية ما تهتم الها ، روح الله ينتقم منك امشي

سديت الخط و بقيت محتارة، اثار بالبيت وحدها و اني بديار وحدي، بقيت افتر منا و اجي منا انتظهرهم ينطوني نتيجة عليها

...........

رافد :- طلعت من البيت بسرعة من انطتني ميعاد العنوان اخذت سيارتي و دستها وصلت للبيت
دفعت الباب و فتت

لكيت خالد مدمى الحلك ووالخشم ما ينشاف من الدم، كاتل امجد و امدده بالكاع و خالد يشمر عليه بانزين ، لزمته :- تخبلت انت شمسوي بيه

- وخر منيييي

- لا تتخبل خااااااالد راح تضيع روحك و عائلتك و اتضيعنا وياك

- حاركهااااااا بسببيييييييي حاركها

- عساها بجهنم تحترك احناااا شعلينا اوعى و اصحى على روحك خااااالد لا تضيع رووووحك

دفعته للحايط ورحت لامجد الوجه صاير خريطة من الضرب ما ينعرف الخشم وين و العين وين، الوجه كله مورم و مدمه

شلته كعدته و خليته على ظهري و نقلته للسيارة ، باوع خالد :- حاول تختفي هاليومين او الافضل اخذ مينا و ابنك و اطلع لعمان ما راح يعوفونك عمامي راح يدرون دمك

- ما اطلع و اريد منهم زلمة يوصل

- هي مو مال مرجلة خالد شوف شمسوي بامجد عمامي لو عرفو يشمرونا من العشيرة لو يهدرون دمك ، استحي على روحك عاد و لا تبقى تفكر بروحك بس ولو انت حتى بروحك ما مفكر

خالد:- اخذه وروح مني رافد

كسيت من عنده و عفته وراي كمت افرك براسي دخيلك الهلي الا شوية جان حركته و ما ادري بروحي فقدت و اني اتكاتل وياه ، خابرت على ميعاد:- الو

- الوو ها خالد كون بردتلي كلبي بهذا الكلب

- عوفج منه وكليلي ديار شلونها ؟

- لهسه بيد الاطباء دا يحاولون وياها

قفلت الخط منها باوعت الموبايل ٥٦ مكالمة
من ابوي
و امي
و بتول
ومينا
وضحى
ورائد
ورافد
الغيتها كلها ردت اسد الموبايل شفت رسالة
باوعتها مينا كاتبتلي :- ابنك مريض و يحتاجلو دكتور فورا تعال

خابرت عليها :- الو

مينا :- وينك انت ؟

- جان شبيه

- ما بنو شي انا حكيت هيك مشان ترد عليه

- هالاسلوب هذا ما اريد تعيده من ما ارد تنتظريني لما ارجع لحجيلي ليش ما رديت افتهمت

- لا يا عيني مفهمت و بدك تجي هلاء لتخادني ع عمان فورا ما بدي ابقى هون ولا ثانية زيادة

- انت اللي اصريتي ترجعين البغداد و انت الغيرة جانت ذابحتج لأن اجي لهنا ومن تجين تكولين رجعني، احترمي نفسج و اكعدي بالبيت لا تخليني اغير تصرفاتي وياج وكتها والله ما اباوعلج

قفلت الخط منها، خابرتني ميعاد، رديت :- هاا

:- انت وين هسه

- بأرض الله وييييين، شراااايدة مني بعد

قفلت الخط بوجهي
باوعت نفسي وجهي كله دم، حلكي كله دم ادية
اشتريت بطلين مي من الجوالهاللي بالشارع و كلتله صبلي

صب و اني اغسل
خابرني ابوي، ترددت ارد بس بعدين رديت :- منعول الوالدين شمسوي بأبن عمك

- هو اللي تعدى و لو ما كاتله جان كاتلني يابه

- كتلك الله و خلصنا منك ولك انت راح تجلطني انعل اليوم الصرت بيه ولك يوم اسود الورطني و جابك عليك ولك خويلد اخوتي كلها ضدي من وراك خويييييلد

- اتبرى مني ولا تخسر اخوتك اني راح اخذ ضحى ومينا و اطلع لعمان و انسى خلفت واحد اسمه خالد

- ولك خويلد عليت كلبي الله لا ينطيك شسوي هسه اني شكل للناس ابني جان حاط عينه على مرت ابن عمه و كتل ابن عمه لان متعارك ويا مرته شكلهم فهمني

-يابه دماغي ما جاي يفرك يرحم اهلك عوفني هسه

- دماغك ولك و تحجي ابرود و احنه اكلوبنا مفرفحة من سوايتك ولك امك راح تنجلط خويييييييلد

..........

ميعاد :- عالجو جروح ديار و خيوا الجرح البراسها وداووها ، صحت بس فاقدة و عدها غواش بعيونها من قوة الضرب التعرضتله مسبب الها فطر بالجمجمة
شدو راسها و منعوا طلوعها من المستشفى لحتى يسيطرون على وضعها

اذا شافوا الفطر شديد و مأثر على حالتها يبقوها و اذا خفيف ينطوها علاج و يطلعوها

اخذت تقرير بكل حالتها و اريد اروح للمركز اقدم دعوة ، بس ما اكدر اطلع من المستشفى و ديار هنا، و اثار بالي يمها وحدها بالبيت

دزيت رسالة لاسامة ( امشي روح لاختك اثار وحدها بالبيت اني ويا ديار بالمستسفى حالتها خطرة )

بسرعة خابرني :- شبيها اثار

- ضاربها امجد و بالمستشفى

- اذبحة والله اني اله

- اكعد لا تورطنا ، اني اعرف اجرجره انت بس روح لاختك هناك بقت وحدها خطية تلكاها هسه تبجي

- دليني

دليته بالمكان و راح وصل لهناك خابرني حتى ادليه ع البيت، لما وصل لاثار ... خابرت واحد صديقي اسمه مؤيد هو بالدولة يشتغل

كلت اله :- طالبتك و طالبة مساعدتك

- تفضلي ست ميعاد

- بنتي زوجها متعدي عليها و حاركها و حارك شعرها و مسويلها فطر بالجمجمة و ما الي الياخذ حقها

- شنو من بشر هذا شلون يسوي بيها هيج

- هءا الما اله ظهر بالدنيا الناس تتولاه و ما الي غيرك يالمعدل اعرفك اصيل و ما ترد احد و اريدك تساعدني حتى اشتكي عليه لان هسه اذا اروح مركز و اشتكي انذل بجرجرتهم اكثر ما اخذ حق

- اني خادم والله اشوفه نجوم الظهر بس انطيني اسمه

- فدوة الكلبك يالمعدل روح الله يوفقك و لا يحرمك من نعمة ينزلها

- ست ميعاد احنا اهل ان شاءالله و بنتي بنتج و اني اخذلها بحقها

- تسلملي اهل و نعم الاهل بعد عمري

سديته من عنده و باوعت لديار تون

- ها ماما حبيبتي

- راسي ماما راح امووت

- الله لا ينطي ان شاءالله

خابرتني ام امجد تسأل تصيح و تدعي علينا لأن هيج صاير بابنها ، نزلتوبيها دوسة و نص و غلقت الخط بوجها

فات اسامة و اثار اثنينهم تراكضو لديار، اسامة باوعلها و دموعه بعينه باسها براسها و هو يتحلف لامجد

راد يمشي وكفته :- اكعد.استر عليه خليني اجرجره بالمحاكم و السحون و اخذ حقها من عيونه

اثار :- يعني شبي راسها ؟

-ما بي شي ماما ايام و تصحى ان شاءالله و ترجع النا
... الفتت لأسامة :- ابوك وينه ؟

- ما موجود بالبيت بالدوام

- زين لعد، اخذ اثار و ارجع للبيت لا تبقى هنا
خليني اشوف وين توصل

اسامة :- ما ارجع انت ارجعي، اني اذا ما اكتله لامجد ما ارتاح ما تايهتله و هيج يسوي بيها

- خالد تكاتل وياه عوفه كتلك و اخذ اختك و امشي

سحب اثار و طلعو و هو عصبي،

شوية و اجا مؤيد :- اهلا

- اهلا ، هلا و مرحبا عيوني شلونك شلون صحتك

- الحمدلله اجيت اطمن بنتج شلونها

- و الله بعد يريدون يتأكدون من حالتها بعدها تتقيئ و غواش عدها بسبب الفطر

- كلش مو خوش خبر

- اي والله شسوي و اني وحيدة و ما الي احد

- ليش مو متزوجة

- طالبة الطلاك منه حشاك عار ردت استقر و اكعد وياه و انطيته من عندي ١٨ومليون حتى نبني و اعيش وياه تالي من بنى و كمل نكرهن و لعب عليه

- اي والله، شفت وياه الويل شسوي الله يسامحه اني ما عندي حظ بهالدنيا

- لا تكولين هيج ام اسامة انت معدله و خوش مرة وبعدج تره بعز الشباب والف رجال يتمناج

- يمعود بس خل نحظى بالصحة و الله كريم ع الشباب

-تريدين انقل بنتج بمستشفى خاص

- لا خليها هيج الصراحة ما عندي الامكانية الاكدر انومها خاص

- ما مقبوله منج رقودها و علاجها على حسابي و غرفة خاصة حتى تاخذين راحتج ويا بنتج ما تبقون هشكل كاهدين بنص الهوسة و الناس

- فدوة الكلبك يبعد عمري ما اعرف شلون اجازيك يالمعدل الله يحميك و يحفظك بجاه النبي

- تسلمين

... خابر على صديق الى بمستشفى اهلي و طلب لديار غرفة و عناية و معالجة على حسابه

اخذت ديار حطيتها على كرسي شاف ايدي ما تكدر ادفع بأيد وحدة انطى لوحدة من الفراشات اليشتغلن خمسة و خلاها تدفع بمكاني

و اخذنا بسيارته و نقلها لمستشفى اهلي ، غرفة خاصة و كلشي بيها راقي .. حتى الي وياها كرسي و سرير و غطا

نومت ديار و شكرته ، و كال :- لا تشيلين هم للقضية عندي صديق بالداخلية راح اخليهم ياخذونه و يسجنونه

ديار :- الفترة الفاتت كن كثر الالم ما وعيت على احد ابد .. بس من نقلوني للمستشفى الاهلي و نوموني بقيت اسمع امي و هي تحجي ويا هذا الرجال

راح ، فتحت عيني، حجيت بألم :- تسجنون منو

- امجد غير

- ما اريد عوفي

- لا والله ما اعوفه شايفه شسوا بيج لو لا

- لخاطر جهالة فطومة تحب ابوها ماما

- وليش هو ما فكر بيه من سوا بيج هيج تريديني اني افكر بجهال، و بعدين شوصلج لهالحال غير تفكيرج بجهاله

- ربيتهم اني ماما احبهم ما اكدر اذيهم لا تسويله شي عوفي

- دكومي على حيلج هسه و الله كريم، ينسجن يومين نشرط عليهم الغايب مالتج و العلاج و عود نتنازل عنه

- ما اريد منهم شي

- و حروحج منو يداويها

- ماما راسي راح اموت من الوجع

- اي غير مفطور خوما مضروبه بكلينكس يا امي

دك خالد .. ردت امي طلب منها عنوان ال المستشفى ، انطته امي ، اني نمت من قوة العلاج الينطونيا ما اكدر اصحى زيادة

لهناك و حسيته يمي و هو يمسح على راسي
فتحت عيني هو كبالي :- خالد ردت اموت

- بخير هسه الحمدلله

- كابوس طلعت منه

- انتهى و خلصتي منه

- انت شسويت

- اهلي و عمامي جايين يدورون عليه

- ورطتك

- ما ادري ورطتيني مدري ورطتج مدري تورطنا اثنينا ، المهم احنا بمحنا الله يخلصنا منها

-حرك ايدي

- ردت احركه لو ما رافد لحك ولزمني ولج والله فقدت عقلي من شفتج بجروحج امدده

-امي وين ؟

- تخابر برا

غمضت عيني حسيته حط راسه على الحديد مال السرير ، فتحت عيني، باوعلي:- من البارحة ما نايم والله من ساعة العرفت بيج انت ماكو و اني عقل ما بقى براسي بغداد افتريتها شارع شارع لحد دخت الفجر و رجعت

- شراح تسوي

-ما ادري دايخ كلش ما اكدر ارجع للبيت

- عائلتك

- ما عليهم شي ابيت اهلي بس هم يردوني اني

غمضت عيني، سكنت .. و هو يتنهد يمي ، فتحت عيني، باوعلي، حجه :- ديار لو متت لا تنسيني

- فتحت عيوني :- اموت لو صار بيك شي

- مراح يصير بس تأكدي من اذيتج والله ما جنت فد يوم قاصد اذيتج ولو اتعديت عليج مرة كل الجان ابالي امنعج من هالزواج بكل وسيلة

ضيعتيني و ضيعتي روحج بهالزواج
لا انت كدرتي تبتعدين عني صدك
ولا اني كدرت انسانج و اتصرف عادي من اشوفج كبالي ويا غيري، جنت كل يوم اتعذب ، كل الليلة انذبح

باعي الشيب بين براسي، ما احجي ولا اشكي لاحد بس الكلت الج عليه هان بعمره ما هان بكلبي

كل ليلة اسأل ليش حبيتها
وليش ما انساها
و شبيها حتى هيج ابقى معلك
ليش ما اكدر ابتعد و كلما اقرر ابتعد الكى روحي مخابرج و سائلج تحتاجين
كل ليله اسأل نفسي .. ليش ؟
و ما الكى الجواب

- نزلت دموعي و اني اباوع عيونه دمعت و هو يحجي
...لا تحجي هيج، اخذ عائلتك و اطلع برا العراق عيش، اني اسفه ، اني الحركتك لما تقربتلك و حبيتك.

روح من عندي خالد
لا تتقربلي
اني شؤم كل اللي يتقرب مني يتأذى
روح ولا تتقرب مني بعد واوعدك بعد ما اتقرب منك

بقى يباوعلي و هو حاط عكس ايده ع الجرباية و ساند راسه بأيده ، هز راسه و اندار يباوع على الصفحة الثانية و هو يفكر

فاتت امي :- رافد يخابر عليك ؟

خالد:- شنو ؟.

- رافد خابرني يسأل عنك ، ابتعد خالد انت صار عندك عائلتين التهي بيهم و انسى ديار و خليها تنسى جانت كبال بيتك و ما تنساك هسه شالت .. امسح رقمها و شيلها من بالك و عيش عائلتك

انتو اثنين ما انخلقتوا لبعض
لا تفكر لو اطلكت ترجعلك عوفها و شوف حياتك

ما جاوب .. كام من مكانه :- اني راح اروح هسه انتم شتحتاجون خابروني

-الله وياك

طلع و اني درت وجهي للشباك دموعي كامت تجري ، اجت يمي امي :- كافي اخلصي منهم شعلكتي روحج متكليلي هالعالئلة هم و كرايبهم و البيهم انسيهم و اطلعي منهم اليربطنا بيهم مهى و مها ماتت و انتهينا

- كالي كلمة خوفتني عليه كلش ، يكلي ( لو متت لا تنسيني )

-الله يحفظه و يحمي من كل شر خليه يشوف نفسه و يطلع من هالبلد و مصايبه

- ولو صار بيه شي

- عاد لا تكعدين تفاولينه

كمت من مكاني بسرعة حسيت راح اتقيئ دخلت للحمام و استفرغت ، درت وجهي حسيت الكاع افترت بيه

سندتني امي :- دختي

- الدنيا جاي تفر بيه

- زين ليش حتى اكل ما ماكله بس ع المغذي ؟

- راسي راح اموت ذبحني الوجع

- و عيونج

- من اركز بشي يغوشن ما اكدر اشوف

- الله لا ينطي ان شاءالله، دنامي حتى ترتاحين

رجعتني للفراش ، و هم حسيت نفسي جاي تلعب رجعت للحمام

صاحتلي الدكتور انطاني علاج و كدرت انام

ثاني يوم .. عرفت ان امجد ناقله رافد للمستشفى و طالع بنفس اليوم و جايين عليه الشرطة للبيت ماخذينه و مخلينه بالتوقيف

خابر ابو امجد على امي و كال الها :- جان المفروض يحط طلقة براسها بس ابني و اعوج و غلطان بهاي ما سواها

رادته امي :- قدرة الله ابو امجد خاف على ابنك لا تجيه طلقة تايهة بالسجن ، يضربها طلقة تايهة الكم يمه و يضربها ، من جان يخونها و ينام ويا غيرها محد فك حلكه ولا احد حجه و من ظن ظنيت وبيها خاينة ادورون طلق

ابو امجد :- ظن شنو بتج نايمة ويا ابن عمه و هي و ابن عمه ينكتلون بس صبرج علينا

- هذا منو مطلع عليها هالحجي بتي ما خانت امجد و هي على ذمته ، يمكن غلطت و ردت عليه موبايل لو حجت وياه و طلبت يساعدها اي، بس ما سوت التكوله لا تكعد تتهمه لان من تتهم القضية تكبر و مو من صالحكم تكبر

- واصلة رسالة لامجد حجتله الحقيقة كلها الشمس واضحة يا ام ديار ما تتغطى بغربال

- شمسيش رسالتيش

- شنو هاي الرسالة ومنين ابو امجد تصدك برسالة روح شوف منو الدز الكم هاي الرسالة و حرك بينك و بين بيت اخوك و خلى الدم و الثار بيناتكم لان بتي ما سوتها

قفلت الخط منه ..

وره كم ساعة اتصل بيها رافد يطلب العنوان يريد يكعد ويحجي وياها ، انطته العنوان ، ساعة او اقل ، اجا رافد

امي جانت امدده بمكانها و تكلب بالموبايل

فات :- السلام عليكم

ميعاد :- و عليكم

رافد.:- المستشفى راقي و ديار ما بيها شي شعدج مكعدتها هنا والا عندج فلوس زايدة

- ماكو شي يغلى على بتي وبعدين مو اني المتكفلتها اهل الخير هواي

- منو

- شعندك جاي

- خالد اجا لهنا ؟

- اي اجا البارحة بليل و تبارى الذمة ويانا

- خالد بورطة كلش جبيرة و عمامنا كلهم مكاومين ويانا لو نتبرى منه لو يشمرونا من العشيرة وبكل الاحوال راح يكتبو سند بخالد و يطلعونه فاسد بالعشيرة

- ما يستاهل خطية

- بفضلجن

- والله عاد كاعدين ببيوتنه ما كايليلكم ركضوا ورانا

- ابعدي ديار من خالد ميعاد

باوعتله ، حجة :- اذا عندج ذرة احترام للعشرة الجانت بيناتنا ابعدي خالد اخوي راح ينهدر دمه

- احترام ، ههه ضحكتني يمعود شوف منو يحجي بالاحترام

- مو وكت الحجي

- مدام مو وكته شوفني كفاك ولا تجي بعد ، و حقي رجعه احسن ما ينهدر دمك انت هم خطية

- تهددين انت

- و احجيها بوجهك اتجفى شري و رجعلي حقي ليش تروح تتأذى انت لو واحد من عاىلتك حرام

- جربي و شوفي شنو راح اسوي بيج

- ان شاءالله اجرب لا تشغل بالك انت

دخل مؤيد :- السلام عليكم

معياد :- يا هلا و كل الهلا بابو علاوي شلونك يالمعدل

رافد :- نعم منو انت

مؤيد :- اهلا بيج ام ديار ، منو الاخ

رافد :-، اني زوجها

- زوجيش بالله رافد جفيني شرك جاي تهددني و اني و بتي بهالحالة بالمستشفى خاف ربك و عوفني بحالي

باو و هو يخزر :- انت شتريد منها

ميعاد :- الاستاذ مؤيد صديقي و رجل متفضل عليه و هو اللي ساعدني و نقل بنتي بهالمستشفى على حسابه مشكور ، فاطلع من عندي و عوفني بحالي

رافد :- بعدني ما مطلكج و لكيتي غيري بربو**

مؤيد:- ست ميعاد اني راح انتظرج جوا للكلام بموضوع مهم

رافد :- تنتظرها شنو من تتقرب من مرتي اذبحك

ميعاد :- اسكت و اطلع من حياتي الف مرة كلت الك طلك حرام عليك اني ما الي احد و تأذيني، عيوني ابو علاوي كلش اعتذر صارت بوجهك دقايق وراح اجي

طلع الرجال، انداريت على رافد :- انت شرايد بعد

-لكيتي غيري حقيرة

-شمتوقع اكعد اكعد اجمع كلينكس و اني ابجي عليك ؟ و مرتك التالي وكت كابه عندك الغيرة وصايرلي ديج هراتي و تغار عليها اتذكر انت الركبت الي صور و فضحتني بالمنطقة كلها

- لا ركبت ولا اني الي علاقة بالصور، الصور وصلتني عنج، اما لعبج و مكح... سويها لما اطلكج افتهمتي

- اي طلك لعد و خلصعاد، و بعدين تعال كولي منو من صديقاتي خايني وياها

- صديقاتج ؟ و شعندي ويا صديقاتج اني

- لا تغشم روحك بعدني مريضة و ما فاضية خل تصفى دنياي وياي الا اطلع حليب امك الرضعته من خشمك، و هسه امشي مني خليني اشوف حياتي

- تعاي هنا حياة شنو التشوفيهة

- غاثك موضوع اشوف غيرك موو ؟ بس اطمن راح تنغث منا و جاي هواي ولو ما طلكتني مبروك عليك اثنين كرون بالمجان هدية

جابني جف و سحبني اله :- لو فكرتي تشوفين غيري اذبحج

- ولو مديت ايدك مرة لخ تنكسر ، نزلها

- ميعاد

- خلصت الزيارة ولي

- لا تستخدمين وياي هالاسلوب انت و بتج الخليتوني اصير هيج وياكم انت اكثر وحدة تعرفين شكد جنت احبج

- ضحكتني عفية و اني ما الي خلك اضحك بطني توجعني

فديت هالعيون الخضرة اني ، مووواح، باااي
حجيته و اني اطلع

مشيت بالممر حسيته تبعني، فتت للمصعد ، دخل هو ، انقفل المصعد ، تقرب مني :- لهسه من اتذكرج حيلي يرجف و ما تحمل تصيرين لغيري

- تريدني ارجعلك و مشتاق

باوعلي

- تسجل البيت اللي بنيته بأسمي

- انت اطلبيني ١٨ مليون و سعره البيت هسه بال١٠٠ مليون

- ضريبة السويته بيه يبو گلب اسود
مسكين اجيت حتى تبعدنا من اخوك و انتهيت و انت تتوسل بيه حتى ارجعلك
هههههههههههههههههههه

فتح المصعد، طلعت و هو وكف يباوع ، مشيت راد يطلع وراي صاح ( تعاي ) انقفل المصعد
عفته و مشيت

........

امجد انسجن .. على الرغم اني ردت اتنازل منه بس امي ما قبلت .. فرضت عليهم يطلكون و ينطون فلوس علاجي و علاج التشوهات التسواها بيه

الرقم اللي دز الرسالة بعدين ياله كعدوله و فكروا خاف صدك احد محاول يدخل بينهم و يخلون العمام تتكاتل و بيوت تتهدم

بحثوا بالرقم .. ما لاكين احد
بس كل مجرم لابد يترك اله اثر من جريمته او ثغرة يكشفه الله بيها، و الصار جريمة ..

الرقم جربه احمد ع الفيسبوك ...
جانت الناس بعدهم ما يعرفون يخفون رقم ولا عدهم خبرة باعدادات فيسبوك فلما درج الفيسبوك طلع هذا الرقم مرتبط بأسم مرته ( رغد )

لازمها احمد مجنزها من الكتل لان هيج دزت رسالة لامجد و خلت امجد يتورط بهالسالفة

كايلتله اني ردت انتقم منها لان بسببها امي صار بيها هيج و بس ردت اكشفها، هو متخبل عليها و طالب منها صحة الكلام الدازته

كايلتله :- اني عرفت كل هالكلام من ضحى وردت اكشفها ،

رايحين محققين ويا ضحى منين تعرف هالكلام و اذا صدك صار ، ضحى نكرت كلشي لا مسولفة لرغد ولا مخابرتها

ذابه التهمة كلها براس رغد و تكومت السالفة براسها
كايم احمد رامي عليها يمين الطلاك و طالع لان هيج سوت باخوه وخلته يتورط و ينسجن بسبب هالسالفة

مينا لما عرفت خالد هيج مسوي وياي و مخابرته و ما مجاوب و غايب من البيت يومين و عمامة مهددينه
ماخذه ابنها و طالعة العمان وحدها

متعاركة هي و خالد و متضايق هو منها لان مسافرة بدون علمه و ماخذه الطفل وياه ..

يومين و طلعت من المستشفى
بقيت بالبيت امي اداريني هي و اثار .. بقيت ع العلاج لازم استمر و الاعراض ملازمتني

كاعدين ... اندكت الباب بقوة
فزت اثار للباب فتحته فات رافد و هو يرجف

وكفت امي حتى تشوفه شيريد ، لزمها حيل و هو يكللها :- بتي ميعاااااد وين ، بتي مخطوفة من الصبح و لحد هسه ماكو .. وينها بتييييييييي......

☆☆☆☆☆☆

#اتمنى_ان_افعلها


الحلقة_ 50

ليتني استطيع فعلها !!
وامحو كل تلك الايام التي مرت وانا لست بقربك
ليتني استطيع فعلها !!
واعبر كل تلك المسافات واخلد في احضانك
ليتني استطيع فعلها !!
واعانقك بشدة لأعبر لك عن مدة شوقي
ليتني استطيع فعلها !!
واجعل شفتاي تلتهم شفتاك لتخبرك كم احبك
وليتنا نستطيع فعلها !!
ونحقق مانحلم بهِ مع من نحب ❤

..........

كاعدين ... اندكت الباب بقوة
فزت اثار للباب فتحته فات رافد و هو يرجف

وكفت امي حتى تشوفه شيريد ، لزمها حيل و هو يكللها :- بتي ميعاااااد وين ، بتي مخطوفة من الصبح و لحد هسه ماكو .. وينها بتييييييييي احجيييي

ميعاد :- على كيفك عيوني سارحة ابتك اني حتى اعرفها وين راحت

ديار كمت من مكاني ، طلعت اني و اثار نباوعلهم هو و امي واكفين و يتعارك وياها

لزمها من ايدها :- انت الهددتيني ماكو غيرج ماخذ بتي طلعيها وينها ميعااااااااد

- عاد لا كلشي و ذبيتو براس ميعاد، هسه اطلع اني المحتله فلسطين مو اسرائيل ، لف ما عندك وراويني عرض اجتافك يا حلو يلا توكل

- لو عرفت انت ماخذه بتي و جاي تلعبين عليه فلا ارحمج والله

- اوووي عفيه لا تخوفني اكو ارجف، دكوووم لك اشطح منا يلاااا

طردته بره و هو يصيح، دفعته و سدت الباب، اجت فاتت للبيت :- حركلي اعصابي هالتافه

- بنته مخطوفة ، وينها ؟

- ليكون انت هم شاكة بيه ؟

- اعترفي ماما

- اعترف شنو مسويتلي جريمة و اعترف اعرفي احجي لا تخليني اكوملج

باوعت بعيونها، بقيت مركزة، ابتسمت

- شبيج ؟

- ما مطمنتلج

- اي عادي ولا تطمنين

- بيش احلفج و تجاوبين

- لا تحلفين

-بته وين ؟ .

- فوتي ارتاحي ولا تشغلين بالج بشي

- حرام امي

- مو حرام كل السووه بينا ؟
مو حرام خلى ابني يرميني
مو حرام من اخذ فلوسي و لعب عليه ؟
مو حرام شهر بيه و سوالي هوسة كدام الناس
مو حرام ايدي هاي سكطها و ما اكدر احركها
مو حرام حبيته و خذلني
كل هذا مو حرام ولنا اريد اخذ حقي منه حرام

- بس مو ابنته

- بنته بمكان امين لا تخافين ما اذيها، اني بس رايدة اضوكة اللوعة و الحركة الخلاني بيها وكت القتلني بأيد ابني وراد يورطة

- من البداية حذرتج من رافد و كلنالج......

- راح ابقى اعيد و اكلج غلطت و الغلطة ما تنعاد

- مو اول مرة الفرق هالمرة حبيتيه

- كافي ديار كلت الج بنته بمكان امن كم يوم اخذ حقي منهم و ترجع الهم البنية

- متخافين تنسجنين هذا خطف

- خو ما اني خطفت

- يعني ناس مجرمين مختصين بهالشغلة، اخ راسي يابه ، ماما راح تموتيني انت بنت الناس شلون مأمنتها عد ناس مجرمين

- كلتلج بأمان و كافي

- غايتج شنو ؟

- يسجل البيت البناه بأسمي

- الدنيا مو بس فلوس

- لا ماما كلها بفلوس كلشي تشتري بفلوس، صار الما عنده فلس ما يسوى فلس، و دمه ارخص من كلاص المي

- لا اله الا الله، اعوذ بالله من تفكيرج كلش اكرهه،
اروح انام راسي اذاني.

تمددت بالفراش و بالي ضل ويا الطفلة ، لا اكدر اعوفها و اكول معليه ولا اكدر ادخل، اذا صار بيها شي شنو ذنبها هي بافعال ابوها شعليها

دزيت رسالة لخالد ع السيمكارت (موجود ) من رقم امي
عشر دقايق و اتصل ، رديت :- الو

- الو هلو خالد

- هلا ديار كولي

- شبيك لهفان و تعبان

- بت رافد راحت للمدرسة و ما رجعت و هاي جاي ادور عليها، محتاجة شي

- لا بس ... هيج ردت اسأل عنك

- اكو شي ديار ؟

- لا

- افرغ و اخابرج هسه هوسة يمي متاكد اكو شي،
سدي هسه

سديته و بالي انسطر اكول لو لا، احجي تتورط امي، اسكت تروح بيها البنية، شلون بامي اني شلون يا الله
حتى اسلوبها و حلها للامور صاير اجرامي ما جانت هيج
كلما يمر بيها الوكت وينداس عليها تطغى اكثر

رجعت لكيتها لازمة موبايل الف ومية تتصل، قفلت الخط و باوعتلي جهازها بايدي، حجيت :- شلون لو عرفوا انت الخاطفتها اتضيعين يوم

- و يعرفون العنده دليل خل يثبت هياني كاعدة ابيت و الحجي ميوكل خبز ولا يثبت شي

- و شلون لو البنية لما رجعتيها سامعة اسمج و اعترفت شراح تسوين

- لطمي بعد لطمي ، عوفي الموضوع عليه و محد يتضرر اني اعرف شلون احلها

دخلت الغرفة و كلت معليه اني احسب نفسي لا سمعت شي ولا اعرف شي ، بقيت اتكلب بفراشي وراسي ملفوف بشاش ابيض جني حاطة عمامة على راسي و منين ما ادور يوجعني
اديه مضمدات ع المسكن هادئات من الالم
و فوك هالالم ، الم ضميري الكاعد يأنبني لأن ساكته احس صوت بداخلي يكلي ( الساكت عن الحق شيطان اخرس ) تالي عمري اصير شيطان اخرس
هسه اني لو ساكته و ما محققه بالموضوع مو احسنلي

فاتت :- ديار

- ها

- مخابرة خالد

- هو خابرني

- و انت دازتله رسالة

- ليش ؟

- شعندج ويا و شكلتيله

- مكلت اله شي

- لو عرفت حاجيتله شي ما تلومين الا نفسج

- سكتت

- سمعتيييييي

- اي

طلعت من عندي، اخذت فاليوم حتى انام و ارتاح
و فعلا حوالي ساعة دخلت بنومة ما دريت بعدها شصار بالدنيا ما صار

الصبح كعدتني حتى اروح للجامعة، رفضت بيا وجه اروح وجهي بيه اثار ضرب و كدمات

كومتني غصبا ما عني و دخلتني للحمام و هي تكلي :- غسلي

غسلت .. سوتلي تغطية مال كريم اساس على وجهي خفتلي اغلب الاثار و الكدمات ما كدرت تكملي كل المكياج ايدها ما تساعدها

سويته و رحت للجامعة .. اصدقائي جانو كلش قلقين عليه ، ليندلون البيت ولا يعرفون رقم امي ولا احد يوصلهم اليه ، من سمعوا باللي صار بيه نجنوا و بقوا يتحمدولي ع السلامة

دخلت للقاعة بس لان اهتزت بيه السيارة و مشيت هواية راسي وجعني، كامت روحي تلعب
كمت اون من راسي ، و نفسي كامت تلعب
رفعت ايدي للدكتورة اريد استأذن مكدرت احجي

كمت على حيلي من وجع راسي كمت ابجي ، التمو علية الطلاب ، اتخربطت ما حسيت بأي شي بعدها

فتحت عيني و همزيصحون بيه ، اخذولي اجازة اضافية ع الايام الفاتت و طلعوني، وصلوني مهند و عذراء للبيت

جان محد بالبيت امي مموجودة و اثار بالمدرسة دخلت مهند بقى واكف بالباب تعذر مني و تحمدلي ع السلامة و عذراء فاتت جوا يمي كالتلي :- راح ابقى يمج لبين ما ترجع امج

ودتني لفراشي و نمت ..
مدريت بيها بعد راسي كلش اذاني ، كعدت امي موجودة ، كومتني حتى تاخذني للدكتور

العرفته منها الصبح طالبينها للتحقيق بقضية بت رافد ، ناكرة كلشي و ماخذتهم بالسانها و رايدة تجرجر حتى رافد لان تاهمها الى ان سامحيلها تطلع.

ب طلبت منها تجددلي السيمكارت ع الهوية نفسه اطلعه الية، و تشتريلي موبايل جديد .. اشترت اللي موبايلي ( كالكسي تو )

دخلت ع الدكتور بقى يسألني على نظري و على نوبة الاستفراغ و الوجع .. و هم كتبلي اشعة و بعدها شافها و انطاني علاج
حسيت راح اموت على كد ما افتريت كلش راسي تعب و الالم ذبحني

.. و احنا بالطريق خابرت ام امجد على امي كالتلها :-، احنه مستعدين نطلك بس خلي تتنازل عن قضية امجد

كالت الها امي :- ٢٠ مليون تخلوها بأيدي مهرها و علاجها و تتنازل غير هيج عملت ابنج ما ينسكت عنها

و سدته ، باوعتلها :- انت شنو جاية اتجارين بيه ؟

- لمصلحتج

- ما اريد مصلحتي بهالشكل ، مهري من حقي اخذه اي زيادة ما اريد ولا اتاجر بجروحي

- راضية باللي سواه بيج انت

- مو بس الذنب ذنبه اني كرهته ما عاد احبه بس هو حاول وياي من كبل هواي اني الماكدرت احبه و ما كدرت انسى خالد و اني غلطت لما جبت خالد يصلح و هو شاف الذنب مو بس ذنبه و خالد ما قصر وياه هم ضربه و اذاه و انتهينا لا اتاجرين بيه هذا الاسلوب رخيص ما احبه

- اكولج شو انت شايفة روحج شوفة عليه فوك ما جاي ادور مصلحتج ؟

- مو بهيج اسلوب، خلينا نعيش ويا الناس على حب الله والله مليت كلالعالم هذا مهددته و هذا موكلته لابوي و هذا لاعبه بيه طوبه عوفيهم اني مليت

- و ملتهم اني هم مليت منج و ما ادخل بيج بعد لو شما تسوين يطبج طوب، والله فوك ما ادور حقها ما راضية ست ديار

دخلت البيت، اخذت رقم ام امجد و دزيت الها ( خالة اني ما راضية بكلام امي امجد راح اتنازل عنه و الارجوه بس تنطوني ورقة طلاكي و ما اريد شي ثاني )

دزتلي ( تنازلي عنه حتى نجيب شيخ يطلكم)
رحت لامي كلت الها اريد اتنازل ، ما حجت وياي
خابرت واحد تعرفه و حجت وياه

اتصل خالد على رقمي، فتت جوا حتى احجي وياه

- الو

- اشتريتي موبايل هم زين

- اي اشتريت اليوم لما رحت للدكتور

- اعذريني ترا ما مخابر ولا سائل بس والله منسبين سباية على بت رافد لا خلينا شرطة ولا احد ما فزعنا يدور الطفلة فص ملح و ذاب

اخذت نفس ، حجه هو :- ديار احلفج بروح سلمان بروح كل عزيز امج الها ايد بالسالفة ، كوة لازمين رافد لا يهد على امج مانريده يتورط بيها بس هو يصيح هي
جايها مرتين و طاردته

خالد اخاف احجي و اتورط اني امن بيك بس صدكني صايرة مثل بلاعة الموس لا اكدر اطلعها للحجاية ولا اكدر ابلعها

- كولي و قسما بذات الله ما اشهر بامج ولا اذيها

- توعدني

- وعد والله

- امي رايدة تضوك رافد لوعة الولد من سوا بيها هيج باسامة و بنفس الوكت رايدة حقها، خالد امي ما اعرف تعرف منو لدرجة هيج مسيطرة بس ما اكدر اسكت لان ما اعرف الطفلة عد منو و هاي ما الها ذنب لا بافعال رافد ولا بأي احد ما دا انام بسببها بفاليوم يلا اغمض

- تعرفين المكان انت

- لا ، و اذا حجيت راح تنكر الكلام عليك و ما تحقك ، افضل شي يسويه رافد ينطيها فلوسها

- يربج والله غاطين بالدين ابوي اتورط بدين حليمة و ميعاد تريد من امج .. و اني عندي عائلتين كوة على الله مدبرهن

- خل يبيع البيت و يسدد دينه مو معقوله يريد كلشي على مزاجه امي هم الها حق يمه

- راح ارتب الموضوع لا تخافين

- ماشي

خالد :- سديت الخط من يمها
من بعد الصار اليه ويا عمامي، شلت من بيت ابوي حولت ابيته الثاني الجان كاعد بيه احمد و مشترك بأيجاره ويا ابوي

من طلك احمد رغد بقى الايجار على ابوي، ففرغت الفوك غرفتين و صالة و مطبخ و كعدت بيهن ضحى و شلت من كدام بيت ابو امجد

و رغد و امها بقالهن الجوا الهن، قررنا نبني و نطلع درج من برا ، بس شغلة رافد عطلت كلشي ، افتر راسنا و احنا اندور على البنية ، مصايبنا كثرت يوم ابوي و حليمة يوم ميعاد و رافد يوم اني و امجد

حتى العشيرة سدت بابها بوجهنا ..
عمامي كلهم كاطعوني رادوا يذبون بيه سند و يفسدوني بس بعدين اكتشفوا الرسالة جانت مفبركة
بس بيت ابو امجد عرفوا جانت عندي علاقة ويا ديار فقطت علاقتهم بينا نهائي

و حتى ابوي كال بس نفك من المصايب نبيع البيت و نشتري بيت جبير نلم عايلتنه كلها بعيد عن الكرايب

من كالتلي على امها ، خابرت على رافد كلت اله ارجع و تعالي للبيت ، اجا صعدلي فوك

فات :- ولك كلي بتي راح اتخبل راح انجن اني عقل ما ظل براسي شلون فهمني

- رافد البنية عد ميعاد

- منو كالك ؟

- محد كالي الواضح هيج هي الوحيدة الهددتك مو ؟

- مو صارلي يومين شسربت و ابوي لاصمني على حلكي ..

- حقه، رافد ميعاد مو سهلة ، و الوراها اصعب منها
تتذكر شسوت بحليمة ؟ احتمال كلش جبير بتك عد اسماعيل و هو الارهاب و هو الدوله كلي بتك امنين تجيبها

- غير اكسر ضلعها والله بتي اطلعها من جوا الكاع

- الكاع ما اطلع احد اسمعني، لو خطيت اي خطوة بتك الثمن رافد

- و ابقى كاعد هيج

- لا التسويه ترجع حق ميعاد خلصنه منها

- ومنين اجيب بكملاتي

- سيارتك ، عوف البيت ، بيع سيارتك باسرع وكت وانطي فلوس السيارة لميعاد

- ميعاد تريد سند البيت

- غير حقها ما راح تاخذ

- شلون

- ما الك علاقة سوي الكلت الك عليه و خلي الباقي عليه

- وين رايح انت تعال هنا، شنو تتصرف فهمني لا تخبلني بتي خالد عد منو بالضبط اذا عد ميعاد خليني اروح الزمها من زردومها و اخذ بتي

- روح ذاك الباب وحر ميعاد، افهمممم هاي تاخذ للشط و ترجعك عطشان ، خاف لا تبليك بالاكبر منها فكنا خلينا نحلها رحمة لوالديك

- يا والديك و بتي ؟

- مو كلت الك بتك ترجعلك بس امشي وياي بعقل يا رافد شبيك

كمت من عنده، انت اطلع للمعرض اعرض سيارتك شوف اشكد تجيبلك

- تطلع بشدتين

- كلش زين ، بييع

... طلعت من عنده و رحت على بيت ميعاد ، دكيت الباب ، طلعت الي اثار :- هلو حبيبتي ديور موجودة

طلعت ميعاد ، كالت :- ها خير بعد

- جاي اسلم على ديار شلونها سمعت اليوم بالدكتور

- زينه عيوني بس فك منها

- اكدر اشوفها و عندي حجايتين وياج احجيهن و اروح

- شكو

- مو ع الباب

فتحتلي الباب، طلعت ديار :- هلو خالد

- هلاو ديور بشري على سالفة طلاكج فضت

- اريد اتنازل

ميعاد :- باجر تروحين و تتنازلين ، فضني انت شرايد

- رايد بت رافد

- انتم شلون....... قاطعتها

- عندج ولا تنكرين اكثر انسان فاهمج على هاي الكاع اني، اعرفج و اعرف شيدور براسج ولو حطيتج براسي انزلج مثل ما نزلتج كبل مرة

- قبل مرة شلون يعني فهمني

- ياريت انت تفهميني بت اخوي وينها

- اني كلت الكم ما عندي اذا اجيتوني مرة لخ راح اضطر ابلغ عليكم مصختوها

- هاا، زين و اذا انطيتج مقطع صوت يأكد انت الماخذتها

- مقطع صوت ؟ مقطع شنو ؟

باوعت لديار هي بسرعة باوعت على ديار ، ديار صلرت تباوع بوجهنا بخوف

- ما تخوفني اني ما عندي شي و البنية مو عندي

- بكيفج ، اني كلت الج العندي ، ما اريد اتصرف لخاطر ديار تبقين امها و هي غالية عندي بس اذا رايدتني اتصرف براحتج

كمت من مكاني بس تأكدي لو طلعت من هذا الباب راح تتبهذلين ، اقل شي يصير وياج تنسجنين بقضية خطف و بأعتراف اقرب الناس الج و بتسجيل صوتي يثبت كل الكلتوه

- انت تهددني

- اعتبري تحذير كلت الج اني ما ناوي اذيج بس شوفي ميعاد دزيت رافد هسه راح يبيع سيارته وراح ينطيج فلوسج و حقج ما ينقصج شي
بس والخلق محمد بت اخوي لو متأذية كشاية مو فلوس، لا عمرج راح يكون الثمن

ديار طلع من البيت .. و امي تخبلت رجعت عليه كامت تجرجر بيه :- حاجيتله شي اعترفي شنو المقطع الصوت

كلت الها :- اي حجيت و احتمال صدك رجعي البنية و خافي الله البنية مو لعبه بينج و بين رافد و تلعبين بيها

ضربتني راشدي و كالتلي من اليوم يا ديار الساني بعد ما يطخ السانج ما دام انطيتي بيه لخالد و اصبري عليه

شالت الموبايل و حجت ما اعرف ويا منو
ضلت ابالي معقولة خالد مسجل صوتي و خاطة دليل ضد امي، هو كال ما راح اذيها شلون يسوي هيح بامي

رحت دخلت جوا ، خابرته ما رد عليه
بقيت محتارة و امي خبصت الجو علينا بالبيت
حتى اثار كرصت يمي خافت منها

....الصار
الطفلة رجعت للبيت و رافد انطى لامي ١٨ مليون لا زايد دينار ولا ناقص دينار .. بس بعد متحجي ويايه
ابتعدت مني ابتعاد كلي ولا كأنو عايشين بنفس البيت

امجد طلع من السجن و طلكني ..
ما ادري ضجت بطلاكي مدري فرحت
ضجت لان جان اغبى قرار اخذته بحياتي
ضريت روحي و ضريت اعز انسان اليه بهذا الكون و اللي هو خالد .. جنت احاول اتعدى كلشي بس حتى ابقى ويا الجهال بس الجهال وحدهم ما جانو كفاية

عمود الزواج التفاهم .. ان سقط العمود انهارت العلاقة

وهذا الي افشل زواجي من امجد .. التفاهم
لما كلبي يم شخص ثاني و باعتقاد غبي ظنيت ان لو اتزوج انسى و بالاصح .. نسيت انسى.

من بعد هاي الاحداث امي باعت سيارتها على الفلوس العدها على الذهب كله لمته و قررت تسافر تطلع برا

و كالتلي :- تروحين تعيشين يم ابوج، اني ساقطة و اني مو زينة و اني مجرمة بعد ما افيدج ماما روحي يم ابوج يفيدج و احمي نفسج بنفسج، ما دام بعتيني لخالد ، اني اشيل ايدي منج

- اني ما بعتج لخالد ولا انطيت بيج اني خفت عليح تتورطين و بنفس الوكت خفت على البنية تتورط

- لا اورط احد ولا اتورط ويا احد اني قررت اسافر و اطلع برا هالبلد هذا عفته لاهله اطلع ادورلي بلد يحترمني ما يقيس شرفي بمقياس محدود ولا كل تصرف اسوي انتظر السلاح على راسي و ينغسل عاري ... اني قررت اطلع لاوربا
عسى اكدر احصل لجوء عندي قضية غسل عار و عندي زوج لهسه ما ناوي يطلك كل ذوله اكتب بيهم تقرير عسى اكدر احصل اللجوء.

- و تعوفينا ؟

- انتم ما عدتوا بحاجتي لا انت و لا اخوج كلما اباوع نفسي الكاني عار بعيونكم و هذا الاشوفه

- مو هيج

- اني قررت ديار بقية بهالبلد بعد ما اريد ابقى تعبت
اريد اشوف حياتي برا ..
اريد اعيش بالكريقة اللي تعجبني و محد يكلي شنو لبست و شكد عمرها و ما مفكرة و ما مخليه احساب لاحد

عشت وياكم جهالي و اطلكت و كابلتكم اخوج انطاني طلكة بكلبي و انت بعتيني برخص المي، قصرت وياكم هواي ادري و ما عندي عذر و حاولت اعوض و انتم الرفضتوني ، خليني اسافر

- هي تحجي و دموعي تجري ، و اثار ؟

- اثار ابقيها امانه يمج لبين ما استقر هناك و اخذ لجوء يلا اسحبها ما اكدر اخذها هسه و اعلعلها ، هم خطر عليها.

كلش تضايقت بسفرها ، رغم كل مساوئها و اخطائها بس ارتاح بوجودها من اتعب و التجئ لحضنها يكفيني، من اتمرض و ايدها تمسح على راسها اداويني يكفيني
من انظلم و تطلع هي اتدافع عني و تاخذ حقي يكفيني
من تشوفني ضايحة و مهمومة و تصر الا اطلعني و تنفه عني يكفيني

كلش ضايقني سفرها ، حاولت اشرحلها هواي اني ما بعتها ولا متضايقة من وجودها، اني بس ما احب طريقة استغلالها لظروفنا بالفلوس
و هي ما فهمت و او يمكن ما حبت تفهم
هي ابالها تسافر .. و اني احترمت قرارها

صادف سفرها ويا الفاينل مالتي
سبحان الله دوم بامتحاناتي يختبرني و يجعل اصعب ايامي بأمتحاناتي .. حجيت ويا ابوي قبل لا تسافر بموضوع رجوعي للبيت ، فرح لان البيت محد جان بيه غير اسامة و هو اكثر وكته واجبات برا بغداد

اخذت غراضي و غراض اثار من البيت و فرغنا و هي واكفة .. جانت تبجي بدون بمتابوعلنا

لزمت ايد اختي ردنا نطلع باوعت دموعها تجري ورانا ، عفت الحنطة و رجعت الها حضنتها و كمت ابجي بصوت عالي ، اجت اثار حضنتنا
اخذتنا امي بحضنها و بجت بصوت مسموع من كل كلبها
مسحت دموعنا و كالت النا :- وعد بس اسافر و استقر هناك و اخذ اللجوء راح اسحبكم هناك يمي و راح نعيش احسن عيشة
عيشة افضل من عيشة هالبلد الحطمنا اني وياكم و دمرنا

صيروا قويات و سندوا بعض بغيابي، اثار اسمعي كلام اختج و لا تعذبيها، و انت ديري بالج على اختج

اثار :- اني اريد ارووووووووووح وياج

- ميصير ماما ابقي ويا اختج هالفترة لبين ما امن نفسي و اسحبكم

اخذت اثار و هي تبجي، و اني ابجي، صعدنا السيارة جان اسامة منتظرنا بالباب ما فات، وكفت بالباب هي بس باوعت لاسامة

فاتت للبيت بسرعة ما تحملت ، اسامة دمعت عيونه و هو يباوعله، التفت الي و كال :- اصعدي

- هي مسافرة و هذا سفر كلشي يصير بيه لا تخليها حسرة بكلبها فوت ودعها

هز راسه و كال اصعدي، صعدت هو فرك وجهه و فات للبيت ، بس اسمع صوت البجي مالتهم بالكراج
دخلت اباوع عليهم و ابجي ، باسها و طلع هو طلعنا وراه و اثار نطت من البجي تريد امي كوة سيطرنا عليها اني و اسامة و جريناها ويانا

صارت زركة من البجي فحطت، مشت السيارة كامت ترافس و تصيح :- ولج ماما لا تعوفيني ولج مامااااااااااااا

درت وجهي لشباك السيارة من ورا هي طالعة مادة راسها و تبجي ، درت وجهي من عدها و ابجي و اسامة عيونه مدمعة و اثار بعدها تكمز من البجي

وصلنا البيت ابوي جان خفر، خليت غرفتي و غرفة اثار وحدة ، حتى كدام عيني ما تروح بعيد عني و امن عليها

اول ليلة جانت حيل صعبة ما كدرت انام
كمت حسبة توديني ولخ ترجعني
شلون راح تصير حياتي ؟ و شلون راح تمشي
بيا فصل هسه اني خريف لو شتا ..
لا شتا .. كل فصل ما بيه حضن امي بارد

اثار كسرت خاطري نومتها على ايدي اليوم كله ما بطلت بجي على امي تتوسل بيه و تكلي :- والله بعد ما اسوي وكاحة ولا اشلع كلبها خل نرجع للبيت

حضنتها و كمت اسكت بيها لحد ما هدت و نامت

اجت رسالة ( نمتي ) .. خالد
دزيتله .. لا
خابرني

رديت عليه :- الوو

- هلو ديار شلونج

- زينة

- انتقلتي ؟ ..

- اي

- يجعلها خير

- امين ، بيك شي ؟

- مخنوك

- ليش ؟

- مشتاق لابني ديار

- مينا وين

- بعمان

- ليش ما تسافر و تشوفه

- تريد الطلاك مينا

ضحكت ، هو استغرب، ارتفعت ضحكتي بصوت عالي ، حجه :- شبيج

- دتشوف احنه شنو سوينا بروحنا

- هه

- اني تزوجت حتى انساك ، و انت تزوجت حتى تنساني و شوف شدنسوي هسه ، دنشكي لبعض

- الحب غبي لو صاب انسان يخليه من اغبى الاشخاص

- صح

- شوكت الفاينل مالتج

- اليوم الصبح رحت امتحنت و اجيت نقلت الغراض و باجر لازم ابلش اقرأ

- الله كريم

- خالد

- ها

- انت وعدتني

- بشنو

- اذا اطلكت تبتعد عني تماما

- رايدة ابتعد ؟

- كلش لا

- ديار اني عرفت راحتي يمج و انت عرفتي راحتج يمي

- وشلون راح تفض

- لا تفض مدامنا مرتاحين خلينا هيج

- وين انت هسه ؟

- بالبيت

- ضحى ما تتضايق من تشوفك تخابر

- تعرف بس تحجي تطلك

- ليش ؟

- سالفة رغد و امجد بلعتها الها و ضامها الها بكلبي لهسه ما محاسبها و هي خايفة من ردة فعلي

- نكرت هي

- نكرانها كاشفه ، نهدر دمي لو ما كاشفين رغد صاحبة الرسالة و رغد تكول ضحى يعني بسببها جان متت بسبب غبائها و لغوتها

- احنا هم جنا غلطانين

- انت الجبرتينا على هذا الغلط، الا يبربو* اكو وحدة ادك مثل دكتج الناقصة تتزوجين ابن عمي و كبال بيتي

- قصرت انت لعبت بحالي لعب

- احنا مخابيل اصلي
اكوول نعسانه لو بيج حيل سهراية

- ليش ؟

- حتى اطلع للسيارة احجي اهنا متضايق

- اكدر اطلول وياك ل٣ غيرها ما اكدر

- خل انزل لعد

- وياك انسى همومي .. انسى اني شنو و منو و من وين اجيت، اطير وياك بغير جناح ، احس حالي فراشة و اطير كلش ارتاح

- اااااااه .. اي كملي شكد مشتاق لهالخواطر و لهالاحاسيس

- مو نرجع لنقطة الصفر

- ورجعتهم .. كملي

- طارت الخواطر و الاحاسيس كلها

ضحك بصوت عالي :- مشتاق للافاعي

- يا افاعي

- افعى تلتف على جسدي و تكولي ( دع عنك ذلك القميص المزعج دعني اعبث بشجرتي كيفما اشاء)

- اووو عابتلك شتتذكر ، شجنت احس من اكتب هيح اووو

- ما عمى عليج غير الافاعي هههههههههههههه

- غير اشتهرت شهيرة ماكو احد ما قرا اني اريد التف ع الشجرة هههههههههههههه

- يربج مو الشجرة منتظرتج اي دتعالي

- اتأدب

- اتأدبت وياج هواي

- ترا عيب احنا هسه بمثابة الاصدقاء

- هاي اي صح حكج عليه يابه، احم احم .. شلونج شخبارج

- عاد مو لهدرجة ههههههههه

- هههههههههههههههههههه

- اخ يا ضحكتي و اني وياك .. احسها تطلع من كل كلبي ولا جن على كلبي هم

- طز بالدنيا انسيهم و تعاليلي

- وين تكعدني هن فرفتين و مكسر جهالك بيهن

- خير و بركه حتى لو بالبيتونه

- ادري بزونه

- انت بس تعاي

- وين اجي يمعود خليني بمكاني لا يروح خيالي يشطح و شيخلصك من خيالي لو شطح

- اني المستفاد غير اخلصهن حيايا و افاعي هههههههههههههه

- ههههههههههههههههههههه عابتلك دموعي نزلت الضحك والله

- اسمعي اسمعي
شغل اغنية لماجد المهندس
ناديت وينك



بقيت استمع وياه ، حجيت :- انت بالسيارة

- اي لعد وين متشوفين مشغل اغاني بصوت عالي الا جان طردتني العمصة و بتها

- هههههههههههههه صدك شلونها

- عرك هي و بناتي

- والله تورط بيها ابوك ورطة

- ما تهنى المسكين كم شهر و انجلطت انشلت بمكانها

- تعرف اكو صفة تشتركون ويا ابوكم ، كلكم اتحبون تعدد الزوجات بحجة من الحجج

- اغلب عمامنا امثنين ، بس اني ما ثنيت من رغبة ، ضحى رجعتها لجهالها و مينا اخذتها حتى استقر وياها تالي شفت نفسي ظالمها مشاعر ما عندي وياها شكد ما احاول الين وياها الكى نفسي اعاملها بحدية

هو يحجي و اني اتثائب .. كال :- روحي نامي روحي لا تتثاوبين خليتيني اني هم اتثائب خرب يومج

- مو كاعدة من الفجر والله

- روحي نامي يابه نوم العوافي

- تصبح على خير

- و انت من اهله

قفلت الخط منه رغم هاي جانت اصعب ليلة بس بوجوده كل صعب سهل عندي ، نفسه و صوته و ضحكته بالنسبة الية حياة اتنفسهم و اعيش مرتاحة

جان كل يوم امتحان يجيني يبقى وياي ساعة و يرجع

اخر يوم بالفاينل قررنا احنا الشلة كلنا نطلع نحتفل و نتغدا برا ...

فطلعت وياهم محسبت احساب لاحد
ابوي ميسأل .. امي سافرت
وسام ميدخل بشي يخصني متكفل اثار يوديها و يرجعها لامدرسة لامتحاناتها .. لان شلنا و صارت مدرستها بعيدة

فطلعت بيومها ويا شلتنا
مريم يمي و عذراء .. و وسام كبالنا و مهند يمه و حسام و الجماعة كلهم، مريم ركزت بوسام فد مرة

هو انتبه ، بس غلس من عدها
من عرفته غلس ، تضايقت من الكعدة هي و كامت كالت :- اريد ارجع للبيت

- كمت وراها اني و عذراء

- شكو شنو صار

- ولا شي بس اريد ارجع
كامت تبجي ، طلعت من المطعم تبجي، باوعتلي عذراء :- مدا يحس يا اختي مدا يحس شنسوي

-مو المفروض احنا نحجي ويا و نحط النقط ع الحروف حتى اذا اكو شي مانع نكوللها احس ما باقيها تتامله و تتمناه

- و كدام حسام هذا يشهرها بالجامعة

- لازم نلكالنا شي حجة نطلع وسام و نحجي وياه

- شوفي انت سوي روحج متضايقة و تريدين اطلعين و اني راح ادزلج وسام يحجي وياج

اوك

طلعت و عذراء فاتت، اتصل خالد :- طلعتي من الجامعة ؟

- اي

- وين هسه ؟

- طلعت ويا الشلة دنتغدى برا

- هااا هيج الحجي

وسام :- ها ديور بيج شي عيوني

خالد :- ديور و عيوني ، استمتعي عيوني استمتعي

قفل الخط ، يا الله
انداريت الوسام :- اريد احجي وياك بشغلة

- مريم

- اي

- ديار السالفة طويلة و ما تتسولف ع الواكف

- مختصرها ؟

- مختصرها اني احب عذراء و عفت بت عمي بس لاني احبها بس ما محسسها بشي لان اعرف عذراء حاسبتني اخوها و مريم تحبني وما اكدر ابادلها و ... اخذ نفس

- تحجي صدك انت ؟

- والله العظيم

- تدري لو حجيت علاقتنا كلها تخرب لان عذراء تحب ابن خالتها

- ادري

- تدري و مستمر

- اجت غلسي ع الموضوع

- اجت عذراء بصفنا :- هااا

وسام :- نروح لو نكمل الغداء

- عذراء اروح احسن لازم اخابر مريم

- وسام اوصلكم

ديار :- طريقكم مو على طريقي اخذوا راحتكم

كامو يحجون خابرت خالد ما رد .. رجعت و اني اخابره

رد.:' الوو

- شبيك انت مخبل

- ما بيه شي الظاهر تعديت حدودي نسيت اني مجرد صديق

- ضحكت : هاي منو كال هيج ؟

- شنو اني ؟
.
- تعرف نفسك

- لا كوليها

- انت كلشي

- اذا اني كلشي ، عوفي كلشي و اتزوجيني .....

☆☆☆☆☆☆

#اتمنى_ان_افعلها

الحلقة_51

خالد :- اذا اني كلشي، عوفي كلشي و تزوجيني

صفنت ، ابتسمت :- انت مخبل اكيد

- كولي اللي يعجبج ، اتزوجيني

- لا

- ليش ؟

- لان اريد ارجع للبيت ، اوصل هناك و نحجي

- ماشي، انتظرج

رجعت للبيت، بقيت افكر بيه ، اني دا اعيد نفسي للمربع الاول من حياتي، رجعت اتمناه و هو يتمناني ، بس الحصيلة شنو ؟
اذا جان قبل مطلك .. فهسه متزوج اثنين
و اهله اذا جانوا رافضيني لأني مشوهة
فهسة اني طليقة ابن عمة و امي طليقة ابنهم
يعني لو منين ما راح اجيبها مترهم

يمكن اني ما الي احد و ابوي ما مهتم ومحد يوكف بطريقي، بس هو الكل راح يوكفون بطريقة، ولو تعديت كلشي وردت اتزوجه فارجع نفسي لاول نقطة
اشاركة و اغار عليه و اقارن !!
و اذا مو وحدة اثنين
هاي اذا ما اهله تبروا منه

شلون ترهم ؟
ما ترهم
ولا عمرنا اني و خالد رهمنا
حبينا وركبنا كلوبنا على غلط

وصلت للبيت داريت اخواني و شفت احتياجاتهم
ابوي لهسه ما رجع من دوامه، من يوم الاجينه و لليوم
يداوم بالانبار ما يرجع فوك ال١٥ يوم

كملت شغلي و رجعت لغرفتي، راسلت امي واتساب، ما جانت موجودة ، عفتها ، بقيت اباوع لاسم خالد
ترددت اراسله

هم ارجع احن و هم اتعلك .. وارجع اتعلعل
هيج ايام جنت مرتاحة نوعا ما
لا امجد ولا ضغط المشاعر وياه
جنت وياه احس روحي مربوطة و مخنوكة من ركبتي، يمكن اغلب ايامي خلصتها وياهم سكوت كد ما اكتم بداخلي و ما احجي
هسه احس تحررت و دا اتنفس براحة
لا اخاف احد يفضحني ولا اخاف امجد يكتشف الجان ويا خالد ولا ادير بال لأي شي

عايشة لروحي ولاخواني بس
ما رايده اكثر من هيج

عفته و طلعت ع اليوتيوب وكعدت اباوع
نص ساعة و نزل اشعار من خالد مكتوب ( هلو )

باوعت الاشعار ..
ما جاوبت ، رجعت اباوع
بس فقدت التركيز ويا الفيديو
بقيت احوص بمكاني الا ارد و اجاوب
ردت ادخل الواتساب و اتردد و اكول لا لازم اعرف اضبط نفسي، بعدين قنعت روحي.. الى متى ابقى هيج لازم اجاوبه و نحجي و اكوله اني ما اكدر

دخلت للرسالة مالته، كتبت اله (هلوات )
ثواني و شاف الرسالة .. كتب
وصلتني الرسالة ( شدا تسوين )

- جاي اباوع فلم

- اتصل ؟

- اوك

اتصل، رديت .. الو

- هلو ديور

- هلو عيني

- شو صنطة ؟

-محد اكو اسامة بغرفته و اثار بالهول دا تباوع

- ابوج لهسه ما اجه ؟

- اي وعساه لا يجي

.... ضحك

كلت اله :- خالد

- عيونه

- انت جدي بالكلام الجنت دا تكوله ؟

- اللي هو ؟

- الزواج

- هذا افضل قرار ممكن ناخذه

- ما اعتقد

- ليش ؟

- انت متزوج

- لينا طالبة الطلاق و راح انطلك

- و ضحى ؟

- شلج بيها هالسالفة كبل السوايا السويتيها جانت هي ادك حتى ترجع و راضية اتزوجج بس ترجع

- مو عليها ، اني على نفسي، اني اتزوجت حتى لا اشاركك شلون اقبل هسه ؟

- مفهمت تريديني اطلكها لو شلون، اذا انت الدكيتي على رجعتها

- و اذا اني الدكيت على رجعتها تتوقع اقبل اطلكها

- يعني باختصار ما رايدة الزواج

-سكتت

- كلت الج قبل بمرة رايدتني ابتعد كلتيلي كلش لا ، تتزوجين ما تريدين و تريدين نبقى هيج لا احنا لسما ولا احنا الكاع

- مو .......قاطع

- لا لا خل اسألج سؤال ، تكولين تركتك لأن ما رضيت اشاركك
زين ليش بجيتي من رجعت ضحى
ليش بجيتي لما اتزوجت
ليش رجلج ما حبيتي و عشتي
انت مستعدة تكضين عمرج بجي و كتمان و هم بس ما مستعدة تشوفيني ويا وحدة غيرج و انت تعرفين كلش زين حالتي ويا هاي الوحدة
تره رجعتها لجهالها حتى اتزوج مينا ما رجعتها زوجة
ليش تغشمين نفسج ؟
ليش تصعبين امر بسيط مقابل امور هواي اصعب

-عوفك من هذا كله ، و اهلك ؟.

- شبيهم

- جنت بس مشوهة و رافضين

- الرفضوا و القبلو شيفرق وياي اني راح اعيش وياج لو هم ؟

- اني طليقة ابن عمك خالد

- يفرق عندج انت ؟

- ما راح يخلونا نتهنى بحياتنا راح نبقى نعاني

- وليش ما جنا نعاني ؟
ترا خلصناها معانات و نركع مشكلة بمصيبة اكبر منها
ع الاقل ... نرتاح مع بعض مو بعيدين عن بعض
مو جربنا و عشنا و خصوصا انت
اني يمكن رجال اطلع و اكدر انسى و اسوي اليعجبني
انت شنو صار وياج ؟
لا كدرتي تتقبلين حياتج ويا رجلج ولا عايشة بدون
وراح يبقى هذا وضعج
فليش مكبرتها

- ردت اقنعك، فريت راسي

- افر راسج ليش ما عدنا شي و لا حبكت الشهر الجاي نتزوج من كلت الج نتزوج يعني بطلي كلمة صداقة و هالامور.. خلينا نرجع لبعض

- اني هيج مرتاحة

- و اني ارتاح من انتي ترتاحين، هذا هو .. نبقى هيج مدام مرتاحة ما عندي شي ترا ..

- ماشي

- اييي

- شنو اي

- غازليني

- سكتت ، اخذت نفس .. تنهدت

- الله .. احلى غزل

- ابتسمت ، ادري احنا غلطة بس مستلذة بهالغلط و حابته

- غلطنا و بكيفنا اتركينا غلطانين و خلي العالم على كولة السوريين يفوت بالحيط

- و حافظ كلماتها بعد

ضحك بصوت عالي :- كلت السوريين ما كلت مينا

- نفس الشي

- لج والله راح نطلك المرة راح هجت مني وراحت

- وليش اتزوجتها من الاساس اذا ما رايدها

- الاسباب جمعت .. هي جانت محتاجة اليسندها و اني محتاج زوجة اكمل وياها حياتي لان جنت هاجر ضحى و طالع متضايق منها و ...و جنت محتاج ابتعد عنج و التهي بزوجة جديدة و انساج و اطلعج من بالي

- و الصار ؟.

- مثل الصار وياج ومن وراج، لو ما وطموافقة على وجه الطركة ذاك جان ما صار ويانا كل هذا

- قابل لخاطرة اني وافقت على مود مها

- المهم ولى خلصتي من عنده و انتهى

- بعدكم متحجون وياهم

- اي خصوصا اني ما واصل ولا سائل حتى عمامي كطعت وياهم اذا صار فد شي ابوي ورافد يطلعون ويوصلون

دخل اسامة ، قطعت المكالمة ويا خالد و كتبتله ( اسامه اجا )

كتبلي :- توقعت

باوعت لاسامة ها ؟.

- ابوي اجا

- اوو لا هله

طلعت اثار متمددة و هو ينزع بحذائه، صحت اثار هو باوعلي و هي لا .. رجعت صحت عليها و كلت الها :-، فوتي جوا باوعي بالغرفة

حجه :- شتريدين منها كاعدة

- تكعد بالغرفة احسن

-امج سافرت

- اي

- خل تلعب براحتها هناك خاف هنا مخفي هناك علني

- شعليك بيها انت ؟
درت وجهي لاثار و صحت بيها :-، مو وياج ، كووومي

- هناك ماكو سبيستون

- اني اطلعلج سبيستون

هو يباوعلها و يضحك و يكول ( كبرانه و جسمها جسم امها يطلع )

كومتها ووديتها للغرفة كمت اكلب الها بالتلفزيون و بالي انشغل ،ابوي عنده غريزة حيوانية يحب الجهال ، يستمتع بضعفهم و ابرائتهم.

اثار جان عمرها تقريبا ٩ سنوات .. ١٠ .. هيج حدود
و البنية بهيج عمر يبرزن ملامح جسمها
و هي فعلا جسمها مثل امي .. الخصر منحوت و الخلفية بيها بروز .. مو مثلي اني جسمي على عماتي خوات ابوي ولو ما شايفتهن هواي .. بس عادي مثل جسمهن لا ضعيفة ولا سمينة

وملامح وجهي اني و اسامة اقرب لاهل ابوي اكثر من امنا ، حتى اثار ما تشبه امي، امي ملامحها حلوة حيل

... المهم
كعدت اثار بالغرفة و رحت سويت السم للخنزير ابوي
شكد ما اكول ارتاح يرجع يطلع بوجهي شي يزعجني

حطيتله الاكل و سألته :- اجازتك مطوله ؟

-لازم رايده اطرديني من بيتي ؟

- هو مجرد سؤال ترا

- ١٥ يوم

بكلبي كلت ... اوووووو شيخلصهن

اكل و هو يكول :- اكلج طيب احسن من طبخ امج جانت خبكة

- هو انت جنت منطيها مجال حتى تطبخ النا، اذا من الفجر تطلع تشتغل

- ادافعين لامج هواي انت

- غير امي .. اذا ما ادافع الها المن ادافع

- و انا مو ابوج شبيه ما ترديني

- اي صح ابوي كلت

باوعلي ، سوا حركة بحلكة و غمني بأيدة و كمل اكل ..

سألته :- ما يأنبك ضميرك ما تراجع نفسك الانسان على ساعة يموت .. ما تفكر لو متت شراح تكول لالله ؟

صوت انهار ما يدك باذانك من خليتها تحرك بروحها بسبب غريزتك و نزواتك .. الطفلة اللي شمرتها بالزبالة و ضاعت ما سألت روحك فد يوم وين راحت وليش هيج سويت بطفلة ؟

- اسكتي عني خليني ارتاح جاي تعبان اني ، روحي

نزل اسامة صار كبالي، مشى للغرفة عفت ابوي ورحت ورا اسامة كعدت وياهم، اسامة صافن ، شوية و حجه
:- ديار

- ها

- ابوي الكتل اختي الماتت انهار ؟

- ليش السؤال

- سمعتج تحجين وياه

- اي بس هي الحركت روحها من وراه

- ليش

- جان يضربها مثل ما جان يضربني

بقى يباوعلي، بلعت ريكي منه و كمت للمطبخ ، دزيت رسالة لخالد ( يمكن راح ارجع لمعاناتي )

شوية هناك و رد ( ليش خير شكو يا ستار )

-ابوي ما اتحمل عيشته خاصة و اثار وياي

- مو تاب من هالسوالف

- ابو الطبع ما يجوز من طبعة

- كولي يا الله و فتحي عيونج على اختج زين لا تروح من عينج

- و شلون اضل هيج ؟

- منا لما امج تكمل و تاخذ لجوء، اي

- ما اعرف المن بقتها لشلعان كلبي، يعني راح يبقى بالي مشغول بيها ليل نهار

- الله كريم هن ١٥ يوم .. ديري بالج بيهن

- وشلون لو خلصت العطلة و داومت ؟.

- يربج شايلة هم للدوام و انت عطلتي اليوم الدنيا بيوم وليلة تتغير دكولي يا الله ليش هيج تفكرين

... بقيت احجي وياه
هو دائما ينطيني الطاقة الايجابية ويخلي كل صعب عندي سهل، و يبسط بعيني الامور و هالشي

مشت الأيام و اني مفتحة مو عيوني الثنين لا.. كل جسمي صار عيون من ورا اثار حتى لا يأذيها ابوي
مرات اصفن على خوفي عليها
شصار لو امي هيج جانت تخاف و تحذر عليه و على انهار من ابوي، جان صار بينا هيج

ما اعرف من اتذكر الماضي .. الوم منو ؟
امي .. ابوي .. لو الوم الحظ و النصيب الخلانا بهيج عائلة شتتنا و ضيعت كل مستقبلنا ..

شصار لو جان ابوي مثل كل اب يطلع و يكد على اطفاله و يخاف عليهم مو هو يفترسهم ، و شصار لو امي صارت قوية من اول يوم شمر الها طفلة و ضيعها ، و عافته ؟

اغلاطهم احنا نتحملها
الى متى ؟

مر على اجازة ابوي ١٢ يوم ..
اغلب وقت اثار بالغرفة حتى تضايقت الطفلة وين يمشي عدها هالحجي، هي مدللت امي جانت تاخذ البيت طول بعرض
لا والله مو البيت .. المنطقة كلها ما تلفي للبيت الا وكت اليعجبها، مو هسه محبوسة

تتذمر و تشكي براسي هواي
بس وين اطلعها ؟ ابوي بس وكت الطلعة شريف بروسنا ويخاف علينا لما ردت اطلع اني وياها ما قبل نطلع وحدنا.

جنت كاعدة و اجت هي يمي
:- ديار ديار

- ها ؟

- اني ما اريد ابقى هنا اريد اروح لماما

- ومنين اجيبلج ماما هسه، مو كالتلج لما اكمل اموري برا اجي اخذج

- معلية اريد اروح يم ماما

- اكو شي

سكتت

- اذا اكو شي احجي اني موجودة

- بابا هذا ما احبه

- ليش ؟

- ما احبه من زمان ما احبه

- سوالج شي ؟

- لا بس عيونه تخوف

- اكعدي يمي ولطلعين لبين ما يولي لدوامه ، تريدين اخليج تحجين ويا سارة

- يصير احجي ويا مهيمن ؟

- ولج يا مهيمن دا اكلج سارة

- اني مشتاقتله هواي

- هسه تريدين لو لا

- اي

راسلت خالد كلت اله ( من تكون يم سارة بتك خابرني حتى اثار تحجي وياها )

لليل يلا خابرني، رديت عليه كال :- اسف والله جنت بالشغل ما دريت برسالتج هسه يلا رجعت

صاح على سارة بته خابرت اثار وكعدن يلغن بيناتهن
شوية و كال الها :- يلا بابا روحي نامي

انطتني اثار الموبايل و فرشت الها .. و تمددت يمي
فتحت التلفزيون تباوع و حجيت ويا خالد :- ما تروح تنام ؟

- ما جاي على بالي رايد ابقى وياج

- وضحى

- شبيها

- غير هم زوجتك ما عادت تغار عليك

- لا ما كامت تغار تعودت جنت من اجي هنا مينا تتصل بيا و ابقى فاتح كاميرا ويا مينا ..

- هاجرها ؟

- نوعا ما الا وكت اللي تتحضر هي و تطلبني ما افشلها بس كلبي انغسل منها ولا جن بعمري حبيتها مدري ليش

- تدري ؟ بيوم زواجي من سلمان جانت ضحى تتشمت بيا و تصيح (شايف خير و مستاهلها ) وتكلي "تستاهلينه تلوكون البعض " وكتها دعيت عليها دعاوي من كل كلبي بعمري ما دعيت على بشر مثل ما دعيت عليها ..

- شدعيتي ؟

- اللي صار بالضبط .. ينغسل كلبك منها و ما تحبها .. يمكن لو ما هي ما جنت حبيتك ولا خليتك ابالي من استصغرتني اول ما شافتني و استهزئت بشكل وردت انتقم منها، بانتقامي حبيتك.
ومن هنا بدت معاناتي وياك

- ما كرهتها بسببج، كرهتها من يوم السوت سحر وكرهتها اكثر من اتزوجت و شمرت بناتها عليه، و زاد كرهي لما على ذممة رجلها و تتوسلني .. من اطلكت و رجعت ما الها اي مكانة بكلبي
وكل مرة بتصرفاتها ازيد بكرهي الها
مرات من اعصب من فد شغلة ينرفزني وجودها اكوم اصيح عليها ... هسه هي و الماكو سوا
و تعرف هالشي .. لهذا متحجي ولا تفتح حلكها لو شما سويت .. تعرف جوابي ما يعجبج روحي لبيت اهلح

- جهالكم كبروا ميصير

- و هو المصبرني بناتي و كل مرة اتغاضى عن تصرفاتها و اعوفها بس للبنات

- ابنها ؟.

- من تروح لاهلها يجيبونه الها تشوفه و اذاك رجلها مشدد ع الموضوع بالقطارة يخليها تشوفه

دا يحجي خالد فات ابوي للغرفة، نزلت الموبايل من ايدي و كلت اله :- شرايد ؟

- نايمين ؟

- اي نايمين

- اثار كومي صعدي جيبلي الجكاير مالتي من فوك

- اكعدي اثار ، اني اجيب
ردت اكوم .. فكرت لا يبقى يمها .. كلت ... لا اثار كومي انت جيبي

كامت هي صعدت اني صعدت، كمت من مكاني و كلت :- خل اصعد وراها هاي فاهيه ما ادبر شي

لزمني :- ما عليها شي اني راح اجيب

- جريته من عندي و سبقته للدرج حتى اجيب اصار منها .. هو ما صعد بقى جوا.، دخلنا لغرفة اسامة و كلت اله :- كوم ودي الجكاير ذني لابوي

- ليش ما انتم تودونهم شكو ؟

- ماكو شي وديهن بلا حجي

اخذهن من ايدي ووكف ع المحجر صاح يابه و شمرله الجكاير من فوك و فات للغرفة حجة :- ديار اذا اكو شي احجو شنو ضامين عليه

اثار :- هذا بابا يباوعلي هيج

تقلد نظراته و تعض على شفتها، باوعلي اسامة :- ابوي شيريد منها يعني

- لازم نحافظ على اختنا و بس

- شحده يوصلها والله العظيم اكص ركبته بالسجين

- لا انت و لا اني نكدرله لا تورط روحك وياه

- شنو اورط روحي معقوله ابوي يسوي هيج دسار احجي الصدك حتى اذا صدك و الله اذبحه

- كلت الك نحفظ اختنا و بس

- نامن يمي لا تنزلن جوا يمه حتى اذا صدك تاكدت منه عنده هيج شي اتورط بيه

-اسامة اهدئ ولا تتهور ، هسه اجيب غراضنا يمك و انام بلا كلام ..

صعدت فراشاتنا بغرفة اسامة، ابوي رغم اساكة مراهق صغير بس يخطر منه ما يسوي شي كدامه ولا يحجي وياه

بالف يا الله .. خلصت الاجازة مالته وراح لدوامه
رجعنا ارتاحينا اثار تلعب بكيفها، اني مرتاحة و ما شاغلة بالي و متوترة و اصيح على اثار

جنت كل يوم اتصل بخالد
رغم كلت ما اتقربله و كلت ابعد روحي منه
بس اعترف .. اني فاشلة بقراراتي بخالد
هو الوحيد الما اكدر اخذ قرار بيه امري بيده مو بيدي
لا اكدر انسى ولا ابتعد ولا حتى اطول ساعات و ما اخابره

اذا جان رصيد و نخاف نخلص رصيد هسه اجا النت .. وكله مجان و ليل نهار مع بعض

... خلصت الفترة مالت دوام ابوي براحة
ورجعت لنفس الخوف ..
بهالفترة كلش تعبت

لان مو بس سوالفه هاي، كام يجسب صاحباته للبيت
اسامة وكت العاش وياه دره بيه كم مرة جاب صاحباته بس لما احنا اجينا للبيت اتضايق من تصرفات ابوي

جنه كاعدين اني واثار فوك
اسامة كاعد على اعصابة و صوت الغنى و طكة الاصبع مسموعة، ما تحمل اسامة كام من مكانه
فزيت لزمت ايده وخرني من عنده و نزل

بقيت اني و اثار فوك واكفين

اثنين بنات يطلع عمرهن ب٣٠ لابسات لبس مثير
وحدة كاعدة على رجل ابوي و الثانية صاعدة ع الطبلة لازمة الجكارة و تركص على انغام الاغاني
ياوملها بايده

فات اسامة دفع التركص من الطبله و كام يصرخ عليهن :- برا يلا براااااا

لزمه ابوي :- اساااامة

- لا اسامة و لا غيره عيب عليك فكر كول بناتي فوك شلون اجيب هيج بنات للبيت ، جنت وحدي و امشيها بس خلصت وصلت وياك ليجاي .. طلعت روحي كااافي

كام ابوي و ضرب اسامة راشدي نزلت اركض و ابوي يصيح :- توكف بوجهي ابن الكح***

صرت كبالهم :- كافي بابا كافي الله عليك اسامة اصعد لخاطري اصعد

- لا ما اصعد و لو اني لو هو هن هنا، هسه يطلعن

اسماعيل :- انجب و اكل خ** لك ،عايف امك تكو*** باوربا ولاحكني ، امشي اصعد فوك يلاااا

- اسامة لخاطري اسامة بس اصعد فدوة

- ما ابقى هنا والله

- وين تعوفنا ووين انروح اسامة بس اسكت و اكعد لخاطري، اصعد فدوة

اسامة يهد و ما يتهدى و ابوي شارب و يصيح
ابتليت بيناتهم .. كوة طلعت اسامة برا و قنعته :- وين نروح ؟ غير نصفى بالشارع انتظر نتصرف و نطلع المؤجر من بيت امي الاشترته و نكعد بيه و بالفلوس الجنت ضامتها الك نفتحلك مشروع صغير و نعيش بس اصبر وياي فدوة العينك

صرخ :- ليش من دون العالم حظنا هيج ليييش لا امي بيها خير ولا اب ليييش ، اذا ما يريدونا ليش خلفونا ليش جابونا لهاي الدنيااااااا ليش

طلعت اثار تركض اجت يمنا، شافت اسامة يصرخ حظنته ، هو حط ايده عليها و سكت بقى بس يذب حسرات و محتار بينا وين ياخذنا

قنعته و كلت اله ما النا دخل بيه نعيش وياه لا نسمع ولا نشوف .. بس ادخل معلينا بيه

...كوة كوة دخل جوا ابوي مستمر يطك اصبع لبنات الليل و هن يضحكن حتى ما باوعلنا، صاح اسامة :- صعدن كبالي

صعدنا اني و اثار و نمنا بغرفته و قفل الباب هو بس كلش متضايق ، الليل كله ما نامه، للفجر و هو كاعد

حجيت وياه :- شبيك

- جاي افكر بشغل اشتغله حتى نطلع من هنا

- حتى لو تلكالنا ايجار اقل من ايجار بيتنا هو ٤٠٠ .. الكالنا ب٢٠٠ و ندبر حالنا ب٢٠٠ البقية و نعيش بيهن

- الله كريم اني ادبرها

... ثاني يوم اسامة خلصها نوم ما حس على روحه غير المغرب لان جان سهران بالليل، و اني حابسة اثار يمه و منطيتها موبايلي تلعب بيه في سبيل ما تنزل يم ابوي

.. كوة خلصت اجازة ابوي
اخذت اثار و طلعت للمنصور، خالد جان يدري اني طالعة ، فخابرني راد المكان الاني بيه دليته

التقيته بابو نؤاس، اثار منطلقة تلعب و تركض، اجا هو اباوع طوله و هو يمشي ، ابتسمت اله، اجا اليمي و كعد :- ها الله يساعدج

- هلا بيك

- شكو ماكو

- شكو والله خالد انشلع كلبي شلون ما اكول ارتاح اتسمم بحياتي

-اخاف احجي و اشكي البدتخلي و انفجر و افقد اخوي و تعبت اضم بكلبي عايشة حياتي برعب خاف و خاف ..

- الله يساعدج ، ليش ما اطلعون من عنده

- هو ديدور ايجار ب٢٠٠ بس ماكو البيوت ب٢٠٠ عدم ما ينعاش بيهن ، الشايل روحة ب٣٠٠

- شيلي ولا تفكرين و اذا ع الايجار اني اساعدج بيه

- شتصير انت .. براسك عائلتين

- اي عائلتين ؟ ابوي جاي يتسوك لبيتي و لبيت حليمة بالجملة كل اسبوع على حساب الاسواق يبقى العليا شي بسيط .. ما متضايق شغلي ماشي الحمدلله و حتى مرات تكسي اطلع بسيارتي امن اذا احتاجيت لا تفكرين ترا راح تصيرين مرتي

باوعتله ، ابتسمت :- انت مخبل

- لا مو مخبل اني رايد اشيل الحمل عنج، رايد اكلج نامي و خلي همومج على كلبي اني اتحملهن و اشيلهن

- راح تخليني ابجي

- دياري والله احبج

- اني اموت بيك والله بعمري كلبي ما ذاك طعم كرهك
لو شما سويت بيه كلبي ما يعرف غير يحبك
كلكا التفت و احتاج ما الكا غيرك واكفلي

- كوليها

- اللي هي ؟

- الانتظرها منج و باخلتها عليه صار اسنين

ابتسمت :- احبك

- اموت بيج

اخذ ايده بأيدي و باس ايدي، ابتسمتله .. اوعدني

- بشنو ؟

- متعوفني

- اي

- و ما تتركني

- و غيرها

- و ما تحب احد بكدي

- اي لعد اسمعي مني
اخذ ايدي و تربع وكعد يعددلي :- اوعدج .. ما اعوفج، و ما اقهرج ، ولا اخليج تحتاجين شي، و ما اخلي الضحكة تفاركج ، ولا اخلي احد يمسج لو يضايقج و اوعدج راح احبج و احبج و احبج

دمعت عيوني .. احبك

- مو بكدي

- اكثر منك بشوية

ظل يضحك بصوت عالي و كمنا من المكان طلعنا وكلنا بمطعم ووصلنا لبيت ابوي ..

.. رجعت و اني طايرة فرح ونسيت وعودي نفسي
نسيت روحي نسيت اني منو ووين و شنو
كل الاتذكرة بروحي اني حيل احبه ..

... بس جانت الحسرة هي لما فاتح ابوه بالموضوع و كاله اني اريد اتزوج ديار

هنا رجعت الامور اختبصت فوك راسي
ابوه تخبل من عرف يريد يتقدملي .. كايله ما صار اشهر من اطلكت من ابن عمك و تتزوجها خلصت النسوان ما ظلت غير بت ميعاد

خالد كالعادة ابرودة كايله :- اني جاي انطيك خبر ما اجاي اكللكم تقبلون لو لا كافي بعدوها عني باول مرة هسه هم توكفون بطريقنا

ابوه متخبل من كلمه و صاير عصبي و كايله اخذها مني يا خويلد لو صدك و سويتها و كسرت كلمتي و فضلت بت ميعاد عليه قسما بالله العظيم اروح لجبير عشيرتنا اكتب بيك براءة و اذبك من العشيرة و اتيرى منك و لا انت ابني ولا اني ابوك

هنا خالد متراجع ..
مو سهل اهله يتبرون من عنده

اجا يحجي وياي و يكلي هذا الكالة ابوي
المصيبة اني مننت روحي
هيج راح اتزوج خالد
و هيج اسوي بيتنا
و هيج راح ارتب حياة اخواني وياي
وهيج راح اخلص من ابوي
ورتبت احلام يا ابو احلام على كلامه ..
تالي احلامي كلها اتفلشت على راسي

..... هو سد الموضوع من يمه و ما عاد جابلي سيرة الزواج ولا يحجي بيه ، يخابر نسهر بس من نوصل للزواج احس يريد يغير الموضوع
اعرف مو سهل ع الانسان يتبرى من اهله لاجل شخص و اقدر... تقبلت الواقع و تركناها على الله شلون ما يحلها يحلها ... الكاتبه الله يصير و اذا قسمتنا لبعض ما تصير لغيرنا

بهاي الفترة جانت مظاهرات قوية بالغربية و الناس مختبصة وصلت لحد الاقتتال و كلس اتازم الوضع بهاي الفترة .. فابوي طول ما رجع من الدوام
شهر و هو ما نازل

مصائب قوم عند قوم فوائد .. و احنا خلصنا من ابوي بهاي الفترة .. اجا كم مرة يبقى ٥ ايام و يرجع يلتحق
صارت اغلب ايامه هناك.

ارتاحينا بس اسامة ما مرتاح اسمه يدور شغل و ما يلكه انفجارات كثرانه و و الوضعية شوية مو تمام

كلت اله اكعد هالفترة لبين ما نلكه بيت على راحتنا و ننتقل، كوة قنعته و اقتنع و بعده ويا صحبانه يدور شغل

خابرني خالد رديت عليه الووو

- ها حبيبي

- هلو عيني

- تسلملي عينج اني كلش تعبان

- ليش

- جان مريض

- يا خطية شبيه ؟

- ما ادري خابرتني تبجي و تكلي تعال

- وراح تروح

- اي والله باجر من الصبح اطلع بس مختك حيل

- ليش ؟

- ما ادري، على ابني ه الطفل معلعل من يوم الجابته و لهسه ، شكد فرحت من صار عندي ولد بس طلع عليل و الاطباء ما وكعوا على علته كل الاروحله يكلي شكل
لا الدكاترة اللي بالاردن ولا اللي بالعراق احتاريت بيه

- انت مو راح اطلكها .. شلون هو يبقى عندك لو عدها

- ما تشوفيني متردد بهاي السالفة من وره هالموضوع شلون انطي الها و اعوفه لهذا ما خاطي خطوة و باقي بمكاني

- الله يكتبلك البيه الخير

- امين، حبيبي .. اني باجر من الصبح راح اطلع ، خاف ما ارد عليج لان بالطريق .. من اوصل هناك اني اراسلج

- ماشي عمري

- راح اشتاقلج هواي

- فدوة حبيبي تروح ترجع بالسلامة ان شاءالله

- احبج

- اموت عليك ...
نهيت الاتصال وياه و اني افكر بيه
هو الشغلة الوحيدة اللي مصبرتني بهذا العالم
والبي تنطيني القوة و الطاقة .. لحظاتي وياه اجمل اللحظات .. و الوقت يمه يمشي بساع لو اطول ساعات .. كأنما دقايق ما احس بالوقت و هو وياي

ردت اغلق الجهاز طلبته اثار انطيته الها و نمت

ثاني يوم راسلني رقم .. مكتوبلي ( انت فد وحدة ساقطة و ما تستحين ولا تتوقعين اخليج تتهنين والله لاطلع الدنيا من خشمج )

كتبت :- منو انت و تحجين وياي هيج استحي على روحج و كولي انت منو

ردت :- خلصت من وحدة و راح اخلي يطلكها و الدور جايج يا ساقطة

- انت ضحى

- و تاج راسج

- تاج راس النعال احسن، استحي على نفسج انت من جنت مطلكة و تريدين ترجعيله جنت تبوسين بالايادي بعد ما تمكنتي كمت تتوعدين و تهددين الله يرحم الايام الجنت لازمة بيه بابنا و كل ساع داكته

- انت اصبري و شوفي شراح يصير بيج اذا ما عفتي خالد لو ابتعدتي عنه

-كليله يبتعد هو ليش جايه عليه لو ما تكدريله

ما ردت عليه، انطيتها حظر و خلصت منها
بقيت انتظر اليوم كله يوصل خالد و يراسلني ..
بس ما راسل

اجا الليل و الواتساب مالته ما متصل ..البارحة جان اخر اتصال ، حاولت انام .. بس ما كدرت .. كل شوية ياخذني الفضول الموبايلي افتحه خاف دازلي شي

بس هباء
ما دز ولا مسج ولا حتى تفعل الواتساب مالته

اجا ابوي الصبح دفرني و اني نايمة كال :-كومي حظريلي اكل

كمت للمطبخ نعسانه كلش الليل ما نايمته بتك عين اسويله زقنبوت، و اني واكفة ع الطباخ اتءكرت اثار بالغرفة

فزيت بساع للغرفه لكيته نايم بمكاني ..
وايده على ظهر اثار و هاي نايمة

شلت ايده منها و شلت اثار بكل قوتي و هي طويله

صاح :- شبيج لج رجعيها لفراشها

- اريد اصعدها يم اسامه نومها مزعج ..

- رجعيها

- كعدت اثار و هو يصيح نزلت من عندي وركضت فوك

- اسمع شوف لا تعتقد اللي سويته بيه ينعاد باختي قسما بالله العظيم ادمرك افتهمت لو لا .. نذبحك اني و اسامة و نشمرك للجلاب

هو سمع هيج كام على حيله لزمني من جتف دشداشتي :- شوفي لج بالقران اذا ما تجرين عدل وياي ازوجج الواحد يكومج بكتله و يكعدج بكتله و اخلص منج هنا افتهمتي فاحترمي نفسج و استري على روحج

دفعني من يمه و هو يفشر عليه و على امي طلعت وضربت الباب حيل وراي ..

صعدت بغرفة اسامة ما اجاني نوم بعد طير النوم من عيني النذل الله ياخذه و يخلصني منه

بقيت كل شوية اباوع بموبايلي .. خالد ما راسلني
راسلت بتول كلت اله :- خالد ما راسلكم لو خابركم

كالت :-، لا والله ما مخابر البارحة هو راح

- اي بس كال من اوصل اراسل وما راسل بعد

- لا والله لا اتصل ولا خابر ..

- من يخابركم انطيني خبر ممكن ؟

- ابطن عيني ادللي

تسلم عينج

... نهيت الاتصال وياها و اني مشغول بالي عليه
و على وضعي بالبيت ابوي سببلي ازمة و عقدني من حياتي .. ما اعرف شلون اخلص

امي اراسلها بس ما اكللها بشي لان هي ذبت كومة ملايين على هالسفر حتى تحصل لجوء عسى ولعل تكدر اطلع اثار و اخلص ..

مر اسبوع كوة اتجرعته بسبب خالد اللي لا راسلني ولا اتصل بيه ابد ...
ومن صفحة ابوي الكرهني بعيشتي
كوة كمت اتحمل ايامي
تعبت حيل و اني اسبوع كل ساعة تمر بيه اباوع للموبايل خاف راسلني ..

حتى من انام كل ساعة افز .. بلكي داز رسالة و ماكو
ورا ٨ ايام .. خابرت بتول مرتين و ٣ ما ترد

احتاريت وين اروح و اعرف اخباره
معقوله خالد ما يذكرني ولا يراسلني ولا يخابرني ؟
ما معقوله

لليل هي خابرتني رديت عليها .. كلت الها الو

- الو ديار

- صوتج ما يطمن خير بس كليلي فدوة خالد بي شي

- ولج ديار شكلج و شحجيلج ولج كلبنا ورم والله انسبينا سباية

- شكو ؟

- مينا خابرتنا قبل ايام خالد ما واصل الها و ابنها مريض ...

- شنو يعني ما واصل الها غير راح الها وين راح يعني ؟

- ما ادري ولج ما ادري المصيبة جواز خالد ما داخل الاردن و الطرق مقطع و خالد ٨ ايام ماكو

- يعني شنو خالد وينه

- ولج امي راح تتخبل ديار اكلوبنا نار عليه .. خالد بلعته الكاع لا بسما ولا بكاع الله وين نلكا ما ندري اخوتي انعمت عيونهم و هم يدورون اثاره .. خالد اختفى راح امن ادينا ولج ديااار ......

☆☆☆☆☆