‏يتجاهلون كل شخص محبط او بخيل 🌱🌸
يحبون اللي يرفع معنوياتهم ويشجعهم 🙆‍♂🌸

#السرطان #الحمل #الحوت
#العذراء #الثور #الجدي

‏طبعا مختلفين #هالابراج 🙆‍♂🌸
لان غيرتهم قويه و قاتله للحب 🌱💞

#الجدي #العذراء #الاسد
#الثور #الحوت

‏الاغراض الخاصه والشخصيه عند 🌱🐾
#هالابراج ،اهم من ناس كثير بحياته 😹🌸

#الثور #القوس #الميزان
#العقرب #الجدي

‏مُسالم ، ولكن إذا شك في أنك تتلاعب بعاطفته فسيرد بطريقة بشعة لا يُحب أن يكون بدور المُغفل 🙆‍♂🌸

#العذراء #العقرب
#الجدي #الاسد

‏#فتاه_ #هالابراج 🌱🌸
قوية الشخصية لكن اذا ملكت قلبها
تجعلك منك ملك على عرشها 💚💞

#الاسد #العقرب #الميزان
#الجوزاء #الدلو #السرطان

#حكاية_سمر.. (( الجزء الثاني ))

،،،،،،،،،،بقلم الكاتبه زينب ماجد،،،،،،،،،،،

البارت_16

اول مدخلت البيت.. وليد اجاني يركض.. سمر سمر هذا كرايبكم عدنه

-شنو

-هلا سمسم شلونج وابتسم..

-انصدمت شفت بكر كبالي.. وابتسامته اشوف بيها حقاره.. بس حتى الحقاره.. حابتها منه..

ابتسمت ابتسامه عريضه ورحت سلمت عليه.. دا اسلم همس بأذني.. تشوفين الخير يااا سمر

ابتعدت وابتسمتله..احس كلبي طاير وهوه كبالي.. درت وجهي وشفت نضال موجوده..

انصدمت اكثر بس سلمت عليها واخذت الطفل من بين اديها.. اباوعله ياااا الله..

بكر ونايم.. نفس السمار والملامح .. حطيته على كلبي وشميت افيش ياريحت ابوك..

تمنيت لو بس عندي طفل منه وشايل ريحته وملامحه جان هسه اني بخير..

كتلها بالعافيه يتربى بعزكم..

-تسلمين انشالله يوم الالج..

-عمار سلم على بكر وكعدو بالاستقبال.. اني صعدت فوك بساع بدلت ونزلت..

لكيت نضال كاعده بالمطبخ وشيما تطبخ.. كتلها شيماء شسوي.. كالت كلبي التمن وسوي زلاطه..

وكفت اثرم زلاطه.. همست شيماء بأذني بس صعدي جهال عمار فوك تره يشهرونه اذا كعدو ويانه علاكل..

-خطيه خل ياكلون قابل بكر غريب

-لااا يمعوده يفضحونه ذوله مشايفين.. متعرفيهم صعديهم واحنه نخليلهم اكل..

-صفنت وين اصعدهم بغرفتي.. يله فدوه شيسوون بيها قابل.. اخذتهم وصعدتهم.. بس عبدلله قفلو عليه الغرفه الجوه..

همه متعودين اي خطار يسجنوه لان مؤذي وميفتهم ويسوي حاجته كدام الناس خطيه..

اشتغل وعيني على ابن بكر وابتسم.. وجه ابوه فد مره .. كتلها شسميتو.. كالت امي سمته مصطفى..

-امج ليش لعد بكر ليش مسماه

-ما جان حاظر بالولاده

-ليش

-لليوم هوه مشايله ..غير مره باسه وبعد متقربله

-خطيه ليش هيج بكر وياه

-هوه ما يجينه ابد كله يبات بره

-وين يبات

-يكول بالمحل او بالسياره

-ليش والبيت

-هوه من يوم ال تعرفين ما اكدر احجي هوه من يمها تعارك ويه ابوه ويه امه وطلع بعد ما رجع الا اليوم تفاجئت اجانه وكال بدلي انتي ومصطفى خل اخذكم..

-هزيت راسي ودنكت.. مرته فقيره فد مره متستاهل هيج تعامل منه.. مو ذنبها..

ههه الوم بيه واني اللي مو كادره اتقبل عمار.. اخ من نار كلوبنه شوكت تطفى ونتأقلم.. يمك يارب..

كملنه و شلنه الاكل للاستقبال.. دنكت اجر السفره اعدلها واعدل بالمواعين.. شلت راسي عيني صدت ابكر كدامي

بس اختلست من نضرته.. مدنك وعيونه رافعها عليه ومخنز.. درت وجهي عمار وراي.. ابتسمت..

اتذكرت هوه يتخبل ادنك و واحد وراي دوم يكولي اكعدي وسوي الترديه لا ادنكين وناس وراج..

ابتعدت.. رحت جبت اللبن من المطبخ واجيت.. كعدت هوه كبالي كاعد وعيونه ما شالها..

-شلونج سمسم مرتاحه هنا

-ابتسمتله اي الحمدلله عموري ورده.. حجيت هيج هوه ابتسم ويصك على اديه حيل..تندمت كلت هيج امداني دوم احجي بدون ما افكر

-تتذكرين ايامنه سمسم

-كال هيج شركت بالبن اريد اتنفس اختنكت.. هذا يريد يفضحني..

همه منتبهو لحجيه التهو بشركتي.. اباوعله يضحك بمكر ومنزل عينه..

باوعلهم.. كال اخذتها وياي لالماني فد يوم تتذكرين شسوينه هناك..

-كمت ابتسم والعرك ينزل.. دار عليه عمار مسافره وياه لالمانيا شو مكايلتلي

-دا اريد احجي.. حجه بكر

-وووو لو تريد تحجيلك عني يرادلها عمر ومتخلص

-باوعت لعمار وكتله بكر اغلى اخ الي بالدنيا لو اعد افضاله منا لباجر ما اخلص.. وباوعتله كامت تجدح نار عيونه.. لان كلت اخ..

- كال اي اغلى شخص على كلبج لدرجة عفتي اخوي على مودي..

-لزمت كلبي هذا شجاي يحجي

-شلون يعني عافت اخوك على مودك

-يباوعلي وهوه مبتسم بحقاره انوب دار لعمار وكاله هاي من نضربت عيني واحتاجيت واحد يسافر وياي وهيه ما قبلت احد غيرها يداريني

تعاركت ويه رجلها الا تسافر وياي وتعالجني ومنها اخوي زعل عليها وعافته زعلان وسافرت وياي..

-عمار سكت ما رد بس ضاج من كلامه.. بررت كتله لان بوقتها انته عيونك عمت وخفت يصير بيك شي..

-اي بس جنتي دوم تفضليني على عادل لهيج ضاج منج وهجرج.. هههه يغار..

عمار كام.. كاله من رخصتك بس اسوي اتصال

بكر.. لااا خويه اخذ راحتك..

-كمت اخزر بوجهه لان صدك ناوي يفضحني.. وهوه يضحك بحقاره.. انوب دار وجه لنضال وكاللها

-يله حبيبتي صار لازم نروح..

-يتعمد يكولها حبيبتي بداخلي.. اي ويكللها اني شعليه.. بس ليش محترك دمي واحس لجمه بكلبي من يكوللها حبيبتي شعليه مو لازم اهتم سمر اصحي

-كامت هيه تلم بغراض الطفل ..ابد مترد على افعاله شلون عدها هيج برود..

كتلها انطيني صوفي ولمي براحتج.. اخذته ابوس بخده.. اتقرب يمي بكر بحجة ياخذ الطفل ويهمس لج والله هاي بس البدايه..

ما رديت وبقيت عيوني علطفل اخذه من ايدي وبقى يبوس بيه ويكوله يرحولك فدوه باباتي..

-احس كلبي راح ينفجر صح مو من حقي بس غير اقتنع.. كلبي يريده..

طلعو من الغرفه.. عمار كاله وين بكر عيب تطلع هيج اشرب جاي..

-مو شرّاب جاي.. متقصر ومشكور علضيافه اجيت بس اشوف وابارك لسمسم وا

مشي..

اجت نضال انطتني 25 الف.. كتلها يمعوده بس جيتكم كافي.. كالت لاا ميصير وشايفه الف خير..

وهوه يكولي سمسم اخذيها تفيدج منا وهيج صدكيني.. مفتهمت شنو قصده.. بس سكتت وكتله مشكور خويه يحفضك الله..

هوه يسلم على عمار ويخزر شلون اكوله خويه.. طلع وكال سموره عود خابريني مو تنسيني ويغمزلي كدام عمار..

صعدو بسيارتهم وراحو.. طب عمار عيونه نار .. بس ما حجه وصعد بسرعه..

جاي اصعد صاحت عليه الحجيه انطيني 25 الف.. كتلها ليش.. كالت سويت سمج ب12 الف ولبن ومسواك انطيني..

كل العندي راتب رعايه اجتماعيه اصرفه على كرايبج اني.. شلت الفلوس النطانياهة بكر وانطيتها الها..

وهيه تاخذ كومه رواتب.. راتب رجلها مال شهيد بحرب ايران وبتها ارمله وراتب عبدلله مال معاقين وراتب الها هيه مال رعايه اجتماعيه

وكل هاي وتبجي بوجه الله بومه .. عفتها وصعدت.. لكيت عمار لاف راسه ونايم. صحت عمار كاعد.. ما رد..

عفته.. ومشيت من الجهه الثانيه نمت.. هوه كام من مكانه وراد يطلع.. عمااار وين

-شعليج

-لحظه احجي وياك

-شرايده..

-اكدر اشرحلك وضعي نزل راسه وكعد علسرير

-وهاي كعدت سمعيني

-شرحتله شلون غلطت بمراهقتي وشلون عادل رفضني بليلة العرس..

-كل رجال بوضع عادل جان رفضج.. حقه

-ليش اكولك بكر غير الكل.. بكر صدكني وحماني منهم.. وتولى مسؤوليتي عن عادل وعادل تزوج عليه واشكال الوان العذاب شوفني

بس بكر جان يحميني منه.. عادل جان الي زوج على ورق وبس ابد ما يربطني بيه اي شي..

فمن انضربت عين بكر شفته يستاهل اروح وياها واعينه واردله جزء من افضاله عليه.. بكر مثل اخويه بس هواي اله افضال عليه..

واذا اني اليوم عايشه واشتم الهوى فبفضله هوه لان حماني حتى من اهلي..

عمار بكر متعايشه وياه من اني وصغيره.. جان عمري 5 اسنين وعمتي جانت تزعل من رجلها وتضل ابيت بابا اشهر وهمه وياها

وجانو يدخلونه الحمام واحنه اصغار ويردوه علينه ونسبح سوه ونلعب .. دا احجي واتذكرت هلموقف وكتله مره من المرات

عادل كرصني واني اسبح.. وبقيت ابجي.. بكر لزم عادل وكتله. جان بوقتها عمره 10 اسنين..

ههه من هوه صغير ويحميني.. بس هوه اليشوفه يكول مكروه وابد ما ينحب بس لو تتعرف عليه عمار والله تحبه..

التفتت على عمار يباوعلي..

-زين ممكن اعرف ليش بس من تحجين بيه تضحكين وباقي الوقت كالبه وجهج عليه..

-غيرت ملامحي وحاولت اخفي الارتباك.. هاي شبيك عمار كتلك رفيق طفوله.. اكيد من اتذكر طفولتنه اضحك

ما قبل بالكلام.. اوف يا بكر صدك راح يخرب حياتي بافعاله.. فتحت ايد عمار ونمت عليه هوه استغرب التصرف..

واني نفسي استغربت.. بس ما كدامي حل ثاني اخليه ينسى سالفة بكر.. كمل ونام..

نزلت دموعي.. اكره روحي من يجي يمي احس روحي وصخه خاينه .. بودي احرك نفسي..

رحت سبحت وكمت ابجي جوه المي.. بكر عوفني ارتاح تعبت لخاطر الله تعبت.. كملت رجعت للغرفه اباوع مكياجي كله مكسر ومشمور بزباله

اوف هاي اكيد جهاله.. طلعتها من الزبل.. ورجعت شمرتهم بالله هاي شسوي.. مكسرين مكياجي كله..

ردت امشط.. اتقرب عمار ويكولي اني امشطلج.. كتله لاا يتعبك.. كال انطيني.. بقى يمشطلي يمشطلي انوب

اقترب.. بعدته.. كتله عمار جهالك كاسرين مكياج..

-شبيج يا مكياج تعاي

-دا اكولك كسرو مكياجي

-وشنو فايدة المكياج وانتي تكرهين قربي

-عمار شبيك.. متمل كافي لعبت نفسي منك

-لعبت نفسج..لج مصارلنه 15 يوم من تزوجنه.. شأمل

-عمار اريد اروح للسوك.

-سمر انتي ما هامج غير مكياجج والسوك. . زوجج اني ليش هيج تتعاملين وياي

-عمار الاكدر عليه دا اسوي لا تحملني اكثر من طاقتي.. اليسمعك يكول حارمتك..

-هااا هيج.. خووش.. عافني وطلع.. اول ما طلع خابرت امي.. كتلها هااا يوم

-شبيج تلهثين

-يوم مليت والله

-شكو يا ستار

-يوووم مكاعد اتحمل اصير اله زوجه بفراشه ما اتحمله ما اطيق اكرها..

-سمر يمه غير زوجج

-افتهم يووم بس عمار ما اعرف شبي مو طبيعي

-غير عريس يايمه اتحملي

-يوم جاي تلعب روحي منه

-عيب هيج حجي.. اتحملي حرام عليج تمنعيه.. اكلج

-كولي

-ابشرج طلع راتب ابوج

-يرادلها ذبيحه وهلهوله

-ههههه هوه هم راح نذبح وخابرت اعزمج انتي وعمار

-انشالله شوكت

-الجمعه

-انشالله.. يله باي.. سديته من امي ونزلت نضفت وكملت الاكل وحطيته الهن وسويت لفه وصعدت..

خلصتها تلفزيون لحد ما نمت.. اجه عمار سويت روحي نايمه..

هوه ما كال نام بساع.. كعدت الصبح.. ما مكيجت.. بس بدلت ملابس وخليت كحل.. كعدت عمار

كعد من وره خشمه.. نزلت قبله سويت ريوك.. مشيت للجهال.. كعدت وليد وبدلتله.. عايفته شيماء ونايمه..

انطيته لفه طلع ورجع.. كال بابا بابا تعال شوف سيارتك.. طلعنه ثنينه نركض..

لكيناها مفلشه تفلش صرخ عمار هاي شكسرها هيج.. دخيلك الله شلون مصيبه.. بقى يفتر عليها ويباوع ويمسح على وجهه.

مزلغه من كل مكان.. صاح عمار باع ولد الكلب كاتبين عليها سمسم..

-خليت ايدي على حلكي عرفته بكر.. بس هم زين عمار ما انتبه لكلمة بكر

وهوه يكولي سمسم..

بقى دايخ خطيه.. كتله هسه شلوون.. صاح متشوفيها متكسره كبالج.. ديحجي ومر بكر وصاح له له هاي شنو شصاير

دار عليه عمار وسلم.. وكاله شتسوي هنا.. كاله مو اشتريت هذا البيت الكبالكم وجاي اتفق ويه صاحبه انشالله راح نصير جيران..

باوعت هذا من كل عقله يحجي..

بكر. سهله لتهم خويه اني اعاونك واذا تريد اشغلك وياي..

عمار.. شتشغلني خويه اني غير السياره ما افتهم

بكر.. سهله سهله واذا على مرتك اني اوديها واجيبها..

-باوعلي عمار وكال خلي ابن عمتج يوصلج خل اشوف هاي شلون اصلحها اليوم.. انوب حتى امبنجريها ولد الكلب..

بكر.. يله سموره امشي وياي

-اخ بدي الزمه اذبحه.. كتله لاا ما اريد اتعبك بكر اني اروح.. جاي احجي وجر ايدي بقوه وعصرها ويكولي صعدي عيني

هسه متكبره عليه وتستحين تصعدين وياي.. منو جان السايق مالتج غيري..

اباوع لعمار.. كال دروحي وياه هسه واني اخابر البقيه ابلغهم بعطل السياره..

صعدت ويه بكر وبدي اشيل الجنطه واكسرها فوك راسه.. خل يسوي بيه شما يسوي ليش يوصل لعمار هذا رزقه..

مشى.. واني ساكته وهوه ساكت. طلعنه المنطقه مالتنه كتله وكف.. كال اوصلج ويضحك بحقاره..

ضربته حيل على صدره. كتلك وكف.. داس حيل وكام يسوق سريييييع.. كمت اصيح اوووووكف بكررررر اخاااف اووووكف اكووولك.

وهوه يسوق ولا يهمه وصاك على اسنانه.. واني اضرب بجنطتي عليه.. وكف فجأه.. انضرب راسي بالسياره..

اجه راسي بالتتكيف.. انجرحت كصتي وكامت تجري دم.. كمت ابجي حيل نزلت من سيارته ابجي..

سديت باب السياره حيل وكمت امشي.. صاح وراي تعاااي.. ما رديت..

-دا اكولج تعااااي..

-جر ايدي.. ويه ما درت ضربته راشدي.. لزمني من وجهي ودفعني للسياره..

- انتي شنو تردين تذليني

-يحجي ويعصر بوجهي.. وخانكني.. ضربته حيل على صدره ودفعته

كاااافي مليت كافي اطلع من حياتي اطلع اريد اعيش متت.. ابتليت حبيتك.. كتلك ما اريد احبك اخااااف

جبرتني عليك وورطتني.. لا كادره انسى ولا كادره ارتاح.. تعبت اطلع من حياتي اطلع.. ودنكت ابجي

-بعديش اطلع بعديش بعد ما دمرتيني .. لج بس فهميني ليش خنتيني بس جاوبي

-ضرته على صدره ما اجاوب وما اريدك. وابتعد مني اكولك ابتعد اطلع من راسي.. حبك الخليته بكلبي اخذه جاي امووووووووت بسببك جاااي اموووت

-لج لعد اني العايش .. ولج ما اكدر اتنفس وانتي ماكو ولج تخونيني بكلب بارد لييييييش بس جاوبيني لييييش..

معقوله ما حبيتيني وكل حجيج وكلامج ذاك جذب.. لج استخدمتيني وقت الحاجه وشمرتيني. كمت احس بروحي رخيص من وراااااج

بس فهميني لييييييش..

-مفكرني اني مرتاحه..

-اذا ممرتاحه ليش اختاريتي غيري واني وعدتج اخذج من عيونهم وكتلج بس طاوعيني

-اني حركت روحي بيوم الرضيت بغيرك.. خليت كلبي وعقلي يمك وسلمت جسمي الغيرك.. تتوقع بهشكل ارتاح

بكر ابتعد مني ومن عمار ابوس ايدك..

-تخافين عليه مني

-ابتعد وبس. شلت جنطتي من الكاع ومشيت.. عبرت الشارع.. واباوعله يمسح دموعه ويضرب بتاير سيارته بحركه..

ركبت ودموعي تجري.. رحت للمدرسه كوه ادرس نص الدروس اعتذرت عنها.. وطلعت للبيت..

دخلت وما احس الا دفره على ضهري.. عبدلله دفرني.. كمت منه.. هم ضربني.. كتله راح اضربك والله

طلعت الحجيه تضربين منو انتي .. كتلها دا اهدده ما ضربته.. كالت شحدج تتقربيله احرك اهلج..

درتلها.. اهلي شعليهم.. كالت قابل صدك حركتهم بس لو ضربتي صدك احركهم.. هزيت ايدي وصعدت..

الغرفه مكلوبه فوك جوه ياااااا الله كعدت اصفط .. نص ملابسي مكصصيها بالمقص..

لميتهم وكعدت.. ابجي ابجي لحد ما تعبت ونمت.. كعدت على صوت دخول عمار..

-شبيها كصتج

- انضربت بالباب ما ادري.. شصار علسياره..

-يرادلها مليون تصليح بلله كوليلي منين اجيب..

-لا تشيل هم تدبر انشالله هز راسه ونام.. كتله جوعان كال لا بس دايخ.. واقترب جر ايدي ونام عليها..

جريت نفس.. وكمت وخليت راسه على رجليه وادلكله والعب بشعره غفى ونام..

وخرت وخليته علمخده جاي اكوم جرني ليمه.. ما منعته فوك تعبه اني ازيدها عليه..

خليته ينام. و كمت للحمام سبحت و رحت للبيت انضف وابالي بكر وكلماته وصياحه يرن بأذني لسه..

كل شوي دموعي تجري وامسحها خلصت شغل رحت للجهال بس وليد مدرسه نور عمرها 5 سنوات وعبدلله ما مدخليه مدرسه..

كعدت اقري بوليد يكولي انتي طلعتي خوش بنيه.. ضحكت.. كتله ليش شكالولك عليه..

كال ماما تكول عليج انتي شريره وتكتلينه وتشربين دمنه.. بسته براسه.. كتله اكو ام تضرب اطفالها..
اني ما اضربكم ولا اعوفكم.. باوعلي يعني متعوفينه مثل ماما.. هزيت راسي لا وابتسمت وحضنته..

وليد صف ثاني ابتدائي بس مستواه ضعيف.. كمت اقري بيه يفتهم بساع ..اثاري محد يقريه ويتابعه..

كتله باوع لو جبتلي الشهاده كلها 10 الك مني احلى طياره اطير بالجو كال والله كتله والله..

خطيه لزم القرٲه وحفظ الانشوده بساع والرياضيات كمل واجبه والعلوم قراه اختبرته كولشي حافظ كتله عفيه..

شلت الف و

كتله هاي هديه زغيره ومن تنجح اجيبلك الطياره..

شلت راسي عمار يباوعلنه ويضحك.. ابتسمتله اجه باس راسي.. كال الله يحفظج افرح من اشوفج هيج تهتمين بيهم

خطيه انضلمو.. كتله اني نور ووليد اخليهم بعيوني بس عبدلله اخاف منه..

-صح عبدلله صعب بس معليج بيه بس داريه بالاكل وغسل ملابسه

-شراح تسوي على السياره

-ما اعرف اشو بكر يكولي اني اداينك

-شيداينك لا لا لا ابد لا تاخذ منه اني اداينلك واسددهم على كيفي

-منين

-من عمتي رويده معليك اني اخذ منها واوصللها كل شهر 200 الف

-مشكوره

-كمت من يمهم كال عمار اني طالع ويجوز اتأخر لا تنتضريني نامي

كلت بكلبي عساس يوميه انتضر عفته وصعدت..
باوعت تلفزيون .. شوي ودك جهازي..

رقم دولي.. رديت جان يكول الووو اني علي مهدي من برنامج علي على مودك من اذاعة سومر اف ام

بقيت مصدومه هذا البرنامج اذاعي جنت اتابعه وي بكر من يخابرهم ويغنيلي بالعود على الهوى ويهديها اليه ..

كتله اهلا استاذ علي.. كال سمسم حظرتج موو كتله اي.. طبعا جنه نتواصل وياهم بأسماء مستعاره اني جان اسمي سمسم

وبكر عاشق نجمه.. لا يعتبرني نجمه بحياته دوم المع بعيونه بس صعب يوصلي..

-سمسم عدنه وياج عتاب من محب

-اخذت نفس استاذ علي العتاب ميفيد الصار صار

-ليش كسرتي كلبه

-هه مكسرت كلبه بل كسرت نفسي

-شنو السبب

-ضروف اقوى مني ومنه

-بس الحب اقوى من الضروف جان المفروض اتضحين

-اضحي بمنو ابوي وسمعته لا استاذ علي… اكو اشياء اهم من الحب.. صح ننكسر بس لازم. نتحمل لاجلهم

-سمسم عاشق نجمه التجئ لبرنامج علي على مودك بس يريد منج تبرير ليش سويتي هيج

-لأن بكل بساطه حبنه ممنوع بالعراق ولحتى اقطع سنين العذاب بيني وبينه فضلت كل شخص يشوف سبيله افضل

-سمسم عاشق نجمه يهديلج هاي الاغنيه اهداء منه ومن برنامج علي ..على ..مودك..

استمعت.. اشتغلت الاغنيه شو كدرتي على فراكي شو كدرتي وابد ما تعبتي نفسج ما سئلتي..

نزلت راسي وكمت ابجي حيل وبحركه.. لا استاذ علي لاااااا .. نهيت الاتصاال.. وركضت جبت الهيتفون وشغلته

وبحثت الاذاعه… كملو الاغنيه.. وكال سمسم انقطع اتصالها.. اتصلو شخصين..

انوب اتصل بكر.. كاله علي اهلا عاشق نجمه ..

يمكن سمعت رد محبوبتك عليك.. كاله جوابها مو مبرر استاذ علي دمرتني..

جان تكدر تخبرني تكولي مو الكاها لابسه بدلة عرس ويه زوجها.. ليش ..شلون ..شنو السبب كل هاي ما جاوبتني..

استاذ علي حرمتني حتى نومتة الليل.. بأستطاعتي ادمر حياتها واخلي زوجها يتركها وارجع اخذها..

بس استاذ علي ما اكدر ائذيها .. لكم خلتني عاجز لدرجة حتى عن اذيتها واسترجاعها.. ادمرت استاذ ادمرت

اني اسمع صوت وهوه يحجي بحركه وابجي… يتبع

🌺🌺🌺🌺🌺

اووف من الحب وعذابووو .. المشكله لا هي مرتاحه ولا هوه مرتاح.. بس طبعا ماكو شي يبقى على حاله

لابد ويجي يوم ويتغير كولشي…

..وكم عاشق جان متابع لبرنامج علي على مودك..
اووف شكد عالج كلوب وكسر كلوب..

اجمل تحيه للاعلامي المبدع علي مهدي

#حكاية_سمر (( الجزء الثاني ))

،،،،،،،،،،،،، بقلم الكاتبه زينب ماجد،،،،،،،،،،،،،،

البارت_17

استاذ علي حرمتني حتى نومتة الليل.. بأستطاعتي ادمر حياتها واخلي زوجها يتركها وارجع اخذها..

بس استاذ علي ما اكدر ائذيها .. لكم خلتني عاجز لدرجة حتى عن اذيتها واسترجاعها.. ادمرت استاذ ادمرت

اني اسمع صوته وهوه يحجي بحركه وابجي... رجعت اتصلت بالبرنامج..

انتضرت شوي لحد ما حولوني للجو.. اهلا استاذ علي

-رجعتي ويانا سمسم

-اممم

-سمعتي كلام عاشق اعتقد.. حرام قلبه مكسور

-بجيت.. استاذ علي شيعتقد اني مرتاحه.. لو فرحانه..

علاوي حبنا مسحيل جان لازم انطي قرار وانهي الموضوع.. لا اني ولا هوه نكدر نوكف كدام العادات والتقاليد..

شنو بيدي واسوي خيكولي.. اترك اهلي وانهزم.. ما اكدر اكسر بأهلي ولو كسرت بيهم حنصير ثنينا عار

واحد من عدنه راح يدفع حياته ثمن لهلحب.. تعتقد لو جبنا العار لاهلنه يخلونه عايشين..

علاوي هوه لو صار بي شي اجن اموووت والله اموووت.. انهاريت على الهواء وكمت ابجي.. طلعو اغنية

اني من كلبي بعدتك تدري ليش مو لان ناسيك لو قل العشك .. كلبي بيتك وانته عايش دوووم بيه من بعدتك مو لان حتى افترك..

احترك كلبي زين ما جنت انته بيه.. لان لو بيه جنت لاااازم تحترك



دا استمع و ابجي طب عمار.. سديت الخط.. وحولت راديو..كال شبيج.. كتله لا هيج دا استمع اذاعه وقصص تبجي لهيج تأثرت..

-مو كلت راح اتأخر

-اي غيرت رأيي

-عمار وين تروح باليل من تطلع..

-شنو بدت التحقيقات..

-مو قصة احقق بس من حقي اعرف وين تروح وتجي .. لان ما اعتقد تطلع تشتغل فلوس جيبك تقل متزيد بعد الليل وسياره اليوم ما عندك

-حتى فلوسي مراقبتها

-اوووه.. يابه معليه وين تروح روح اسفين.. كمت منه بنرفزه ونمت علسرير تغطيت ونمت..

شال الغطا وصرخ اكولج انتي متحسين..

-شبيك

-وج عروس عروس انتي اتنامين يمي بكلابيه..

-شبيك عمار تخبلت صوتك نصي..

-وج مليت تنامين مجودره .. كافي استحي كولي هذا رجال خل احس بيه وج بارده بارده تكول ميت موتيني

-وشرايد مني ارتاح هيج..

-شترتاحين وج اني سايق تكسي اشكال الوان البنات اشوف كبالي.. واليتعرن بسيارتي واغض عنهن واريد املي عيني بمرتي..

اجي الكه مرتي مجودره ونايمه.. ما صار على عرسنه 15 يوم.. فكرتي تتحضريلي ليله من اليالي لو اتوسلج توسل مو چن زوجتي.. لعبت روحي منج دكومي

-بقى يحجي ويصيح وطلع.. اي وشسويله وفوكاها هوه اللي لعبت روحه... عفته ونمت.. حسيت بيه اجه بليل اخذ بطانيه ومخده ونام بالكاع..

ما حاجيته..غمضت عيني ورجعت لنومتي واتذكر بكر شلون يحجي ويكتلني الهم. تالي يربي مو ناوي تنسينياه...جبرت روحي علنوم ونمت

.. كعدت الصبح.. بدلت وكعدت عمار.. شو هذا رجع البطانيه على وجه.. ورجع نام..

-عمار شنو متوديني للمدرسه..

-ما عندي سياره..

-يحجي وهوه ضام راسه.. جوه.. شلت البطانيه منه.. كتله ليش متحجي ويايه.. وليش نايم بالكاع..

-عاجبني..

-نزعت الجاكيت والحجاب. وفتحت بطانيته ونمت يمه..

-شجاي تسوين..

-عاجبني.. اتلفيت يمه بالبطانيه ونمت.. فرح هوه وحضني.. بعدها رحت لاحمام سبحت وبدلت..

كام هوه ابتسمتله.. كتله الساعه 9 اتأخرت توديني.. كال اي بعيني .. كملنه ونزلنه. . اخذني بتكسي ووصلني للمدرسه..

شلت فلوس انطيته.. كال لا عندي.. كتله اعرف عود ضملياها بالبيت .. واعرف بجيبه ما بقى فلوس غير 10 الاف..

كملت الدوام ورجعت.. عمار مكابلني وكاعد.. وحاسب نفسه روميو يموت علرومانسيات واني كوه متحمله

خابره بابا كاله باجر عازمك انته والاهل يمي على الغدا.. كاله انشالله عمي ب11 احنه يمكم..

خلص اليوم زين ما بيه مضايقات.. ثاني يوم جان جمعه نزلت دزيت ريوك وكعدت عمار والجهال..

بدلتهم ونضفتلهم.. كال عمار.. سمر الجهال يرحون لامهم مو ويانه.. كتله ماشي.. لبستهم ملابسهم..

وكمت نضفت البيت وكملت.. وصعدت بدلت.. وكملنه ورحنا اني وعمار والحجيه.. لبيت اهلي..

لكيت نجوى ورجلها واقاربنه وحتى عمو خليل وعمه ساميه ورنا.. بودي هسه اكوملهم بالحذاء اشحتهم..

همه سبب دماري وعذابي.. بوست ماما وبابا وكعدت اساعد امي واطبخ وياها.. صبينه الغدا.. الرياجيل وحد وال نساء وحد صبينالهم

كملو اكل .. امي كالت راح نخطب لاحمد كتلها يا الله شوكت.. كالت هاي الايام مدام طلع راتب ابوج وقبض خوش مبلغ تعويض..

اريد ازوج بيه احمد.. اجه احمد.. ما يحجي وياي ميسلم.. كتلها يوم شبيه. كالت شايل عليج من يوم العرس

والفضيحه السواها بكر.. وحتى دك قطعه اباب البيت ويريد ننتقل من البيت.. يكول نزلت راسي

كتلها هوه اني كولشي اسويه يكول نزلت راسي.. لو صدك انزل راسه جان ما حجه.. ..

عفته ما رديت عليه..خل يزعل.. كملنه العزيمه ونضفنه البيت.. صاح عمار هاااا سمر هم يله نروح

كتله اي بس البس حجابي.. لزمه عمي الجبير سليمان.. كاله سمر احتاجها اليوم تكدر تبقيها..

كاله اي عادي بليل اجيها.. كاله ممنون.. استغربت ليش عمي رادني اب

قى..

فضى البيت لل4 العصر.. صاحلي عمي للاستقبال.. اجيته ها عمو كول ..

-تعاي كعدي بنتي

-اجيت وكعدت يمه.. جانو ماما وبابا ومرت عمي وعمي كاعدين.. حتى نجوى راحت..

-كال عمي.. خليل ابو بكر شاهر بيج وبسمعتج.. ويكول بت فرحان لعبت بولدي لعب.. اطلكت من الاول بعد ما خلته يحبها وحبت الثاني

وخلت واحد ميريد الاخ وهسه مجننه الولد ومخليته هاج من البيت.. من وراها..

-كتله عمو اني شعليه..

-عمو انتي صحيح جانت عندج علاقه بأخو زوجج

-عمو اي زوج هذا.. عادل ما جان زوجي.. فقط علورق..جان يكولي انتي مثل اختي..

-عجل شلون حملتي منه يا بويه اذا زواجج بس ورق..

-عمو خل احجيلكياها من البدايه وافهمك..

عادل رفضني بليلة عرسي.. وباعني لبكر ب10 ملايين..

-يكول ليلة عرسها جانت مو بنيه وستر عليها ابني هاي جزاتها هيج تسوي بينه سمر

-عمو هوه ما ستر عليه.. وانما بكر رشاه بفلوس وخلاه يسكت

-زين بكر ليش يسوي هيج..

-بكر جان يحبني من اني وطفله هوه يحبني.. بس تعرفه لبكر شكد كبريائي

من عرف عادل خطبني.. سكت عباله جانت عندي علاقه بعادل وعادل يحبني.. بس ما جان شي يجمعني بعادل ابد..

فبليلة عرسي بكر ستر عليه مو عادل.. واني ما جنت غلطانه وين احد.. فقدت عذريتي بحادث بدون ما اعرف..

ورغم هاي عادل شهر بيه كدام نسابته اهل مرته.. وخله مرته تعيرني.. وهجرني من ليلة عرسي ما ادنالي ابد..

والله عمو الربع دينار ما جنت اشوفه من عادل كله بكر ينطينياه.. وحتى مصاريف الجامعه وتوصيلي كله بكر..

عادل بنفسه كال لبكر.. انطيني العشر ملايين واخذها ما الي اي حق عليها

-يعني هذا سكط اصلي اذا هيج ينطي مرته لاخو والحلو يسوي نفسه شريف ويتمسكن ويشهر بينه..

-عمو هوه هاي فرصته لعادل ينتقم مني على طلاكي..

-زين عمو خل نحجي جديات اكو جانت عندج علاقه ابكر. .عوفينه منه هوه احجيلي عنج انتي..

-شوف عمو.. لو مو اني لو اي بنت بمكاني بالعالم وتشوف الاهتمام الشفته من بكر اتحبه..

عمو اني جنت واكعه ب بؤرة نار.. وبكر حبل النجاة .. لا اب لا ام لا اخ لا زوج.. كلهم ضدي بس هذا الرجل وياي..

حاولت ما اوكع واحبه لان اعرف غلط لكن عمو انجبرت بيه..

-يعني صحيح اطلكتي علموده

-لا مو علموده.. لما هربت واطلكت بكر جان ناوي يسافر.. اني ردت اخلص بروحي من نارهم..

باوع على لابوي.. كاله واحنه ليش ساكتيلهم.. ولد خليل هم المابيهم خير..

واحد هاجر مرته ومنطيها لاخوه والثاني عاشكها.. ولديش ذوله ويعيرونه ابتنه.. احنه بنتنه رفعت راسنه ورفضت عارهم..

وجاي هسه يريد يركبون عارهم براسنه كوه بس اني اعرف شلون اشهر بعويدل الكلب ..

- عمو والله اني حاولت اقربه مني كزوج وهوه الرفضني.. كم مره تحضرتله وفشلني ويكولي انتي اختي ومن هلحجي مالته..

وحملت منه مو لان رادني لااا لان عمتي تعاركت وياه وجبرته عليه بهذيج الليل ..

والدليل اني عنده سنتين ما حبلت... بس بليلة الوصلني حملت منه.. لان جان هاجرني..

-صار معلوم ابنيتي صار معلوم.. رايتج بيضه من رفضتيهم.. ذوله خليل وولده مصيبه..

ما اعرف شلون فرحان انطاج لعادل.. احنه انطينه اختنه لخليل موتها جوع.. لحد ما احنه اخوتها لمينالها فلس على فلس..

وهذا ابوج يشهد.. بذاك الوكت الجان العوز كاتل العالم.. شال 5 ملايين وانطاها لساميه في سبيل تكعد ابيت وتستقر هيه و جهالها.. جانو صغار..

واشترينالها.. وتالي خليل قشمرها وسجل البيت باسمه..

- بس هسه هوه بأسم بكر..

-هاي هسه سلمه لبكر علمود يستفاد براسه.. اني احجيلج كبل من جانو صغار.. نفس عادل لا يصرف عليها ولا ابد

وملتهي ابنات الليل يوميه جايبله وحده وطاب سكران..

حجت امي.. لعد بكر عليمن طلع شايل مسؤليه اهله و شاهر سيفه وكالب الدنيا..

حجه عمي.. كالها غير على خاله فرحان.. ما وكف بوجه ابوي واتبره منه كلنه وكلب الدنيا علينه هناك بالرمادي علمود ياخذج..

ورغم ما اجه وجابج لهنا بس مصرف ابوي واخوتي جان يوديه النه خل شهر ويصرف عليه وهل ولد طالع عليه..

حجه بابا.. لعد هوه ما كالياها.. حجاها بوجهي ابن الكلب.. ثلثين الولد علخال.. يكلي.. حتى يا خويه سحبت بوش منه..

كلت لا صدك يطلع مثلي وينهب بتي.. كعدت وي سمر وحاجيتها وقنعتها تشوف غيره وسترت عسالفه..

-ولو ما متزوجه سمر جان نهبها والله بلله

-يحجون بيه واني انطحن عليه.. اوف شيصير لو قابلين بيه.. ادري لا حرام ولا غلط الله اكبر عليكم..

ضيعتو حياتي وحياته بس علمود هتقاليد والعيب اووف ربي صبرني..

للمغرب عمو خابر خليل وكاله اريد عادل وياك.. اجه عمو خليل وتعاركو وياه عمي وابويه..

وكاله الزم ولدك ما تستحي.. ابنك يشمر مرته لاخو والثاني يعشك.. جاي تشمر عارك على بتنه

واحنه بتنه رفضت عاركم وتزوجت وصانت نفسها مو مثل ولدك الصايعين شرابين العرك..

صارت هوسه.. انوب ادخل احمد بيها وكام يتعارك ويه عادل.. انوب لشوي هدوه واخذو وعد..

لو اسم سمر ينذكر على السان واحد.. متلومون الا نفسكم وصدك نشهر ولدك ونكول هيج سوو ..

هد

ت الامور وراحو.. واحمد شافني ويكولي شوكت اخلص من مصايبج.. جريت نفس وما رديت عليه..

بليل الساعه 10 اجه عليه عمار.. واخذني.. رجعت للبيت اووف غرفتي شمسوين بيها

كتله جهالك شوكت اجو مو جانو عد امهم

-هيه هاي تتحملهم.. ساعه وتكلهم يله روحو لابوكم..

-يعني بربك بيه حيل انضف هسه.

-عوفيها باجر الصبح..

-لميت الغراض اشون ما جان.. اجيت على فلوسي. لكيت مأخوذكنها 100.. استغربت.. منو شايل من راتبي..

زين ضامته جوه الهدوم بعلبه.. منو وصللهم.. خل اسأل عمار..

-عمار ماخذ فلوس من عندي..

-منين يعني..

-من كنتوري راتبي ضامته جوه الملابس.. وهسه ناقصات 100

-لا مماخذ.. اتأكدي زين خاف ساحبه منهن ومتدرين..

-لااا وهوه اني ردت اتفقدهن لان شفت الملابس المصفطتها فوك العلبه مكلوبات ومبعثرات..

-ما اعرف. شوفي خاف واكعات هيه الغرفه هوسه..

-خل انضف الغرفه واشوفهم. دا امشي جر ايدي ويكولي عوفيهم اريدج يمي مشتاقلج..

رحت يمه. بس احس ماكو اي مشاعر ابيتنه.. هوه لهفته قويه عليه.. واني ابد ميت..

كمت حتى اضوج منه اصلا من يريد هيج.. مرات اسأل نفسي اني هيج بلا مشاعر لو لان ما احبه..

وارجع اتخايله بكر اكول اوف لو بكر جان طرت فرح واحير.. استغفر الله شجاي افكر اني.. يربي ابعده من تفكيري ابعده..

نمت.. لثاني يوم الصبح كعدت.. نزلت للجهال.. لكيتهم كاعدين.. غيرتلهم ملابسهم.. دا الم افراشاتهم ولكيت 100 الف جوه مخدة وليد..

كتله وليد هاي شنو.. كال فلوس ماما.. كتله لا ماخذهم من فوك.. كال لا والله فلوس ماما اريد اوديها الها..

وضل يتعارك ويايه يريد ال100 كتله يكعد ابوك وانطيهمياه.. اشو هذا راح يبجي لبيبيته.. واجتني تركض وتهده..

-اتهمين ابن ابني بواااك.. ولج بت الفكر تبوكينه

- وهوه منو مبوكه.. فلوس من عندي ناقصه فوك.. لكيتهم جوه مخدته.. اشو هاي جريني من شعري وفركي ايدي واخذي الفلوس..

وتصيح وتغلط صحت انتي شنو وتضربيني.. والفلوس الي.. اذا مترجعيهم ميصير خير..

نزل عمار.. كال شكو.. كتله ال100 لكيتهم جوه مخدة وليد ويكولي مال امه..

كال اني اشوف شغلي وياه هذا.. صاح ولييد.. صاحت بيه امه وتصدك مرتك وتجذب ابنك..

كاللها يمه وليد مستهتر ولعبت روحي منه.. بقت تتعارك وياه.. وتكله مابيك خير تكتل ابنك علمود هاي..

لعبت روحي منهم.. لزمت عمار وكتله عوفهم لخاطر الله ما اريد الفلوس ما اريدهم بس فكوني..

اخذت عمار.. وصعدت فوك.. كتله عمار وليد لازم تأدبه..

-هاي ثالث مره يسويها.. كم مره يسحب مني وياخذهم لامه..

-يعني هيه توصيي..

-اي هيه كلبه.. تعلمهم على كلشي مابيه خير بنت السكط..

-اذا هيج ليش تخليهم يرحون يمها امنعهم..

-تقبل غير تكلب الدنيا بالمحاكم..

-شفتها هيج.. تحسبت عليهم.. وعفتهم يم الله.. نزلت علدرج دا اريد انضف..

جان اسمع الحجيه تحجي ويه وليد وتكله عفيه هيج اربدك تاخذ فلوس من ابوك وتنطينياهن.. علمود انطيك منها 5 الاف..

وهوه فرحان الطفل بلفلوس..

طلع.. اني وكفت اباوعلها من الشباك مكسور الجام شوي.. شفتها وين ضمتهم..

وصعدت لعمار.. كتله شكد اخذ منك وليد قبل..

- شكو ليش..

-بس كول..

- ما اعرف يمكن 300 الف

- هاااا زين.. تانيت لثاني يوم.. بدلت للمدرسه وكملت جان بيومها اني ضهري دوامي.. دخلت الغرفه الضمت الفلوس بيها..

غرفه بس للغراض دواشك فراشات هيج.. هوسه.. وهيه ضامه الفلوس جوه النضده..

باوعت هيه كاعده بالصاله عتلفزيون وشيماء يمها.. شلت النضده لكيتها كلها فلوس ملفوفات..اخذت منهم 400 الف خليتها بجنطتي وطلعت للمدرسه..

رحت داومت بيومها انطوني راتبي 600 الف.. طبكتهن سويتها مليون وخابرت عمار يجيني..

اجه اخذني بتكسي.. كتله هاك هذا مليون صلح سيارتك.. كال منين جبتي.. كتله استلمت راتب والبقيه اداينتها من زميلتي مدرسه وياي

خطيه باس راسي من الفرح.. رجعني للبيت وهوه طلع.. جر سيارته وبقى يصلح بيها 4 ايام رجعها جديده جام وصبغ وتقنيات كملت..

والحجيه ما انتبهت للفلوس .. وره ما اشتغلت سيارة عمار وتصلحت.. درت بعد 6 ايام كبت عطيتها بالبيت

ولكن الحكوووووولي .. نزلنه نركض.. اني وعمار كتلها ها حجيه.. كالت باكوني عمار كاللها شكد يمه شوكت..

كالتله ما ادري فلوسي ناقصه 400 الف.. عمار صاح ولييييد ..وليد قفل الباب من الخوف ويبجي ويكول بابا والله ما ماخذ..

وعمار لازم صونده ويدك علباب.. وكفت الحجيه تكله لا لا هاي مرتك باكتني.. كتلها خافي الله حجيه..

لو ما اني هم انوخذت فلوسي قبل كم يوم وكتولي اسكتي وسكتت.. عمار كاللها لا اعرفها هاي الكلبه تعلم ولدها يبوكون..

وهيه تصرخ لااا وليد ما اخذهن هيه اخذتهن مرتك.. انوب عمار كام يتعارك ويه امه..

وهيه تكوله ولك انته ليش اغم والله مطيح صبغك.. ولك اكلك هيه ماخذتهن.. يكلها هاي الكدامج التحجين عليها شالت مليون بدون تردد وانطتنياهن..

مو مثلج توسلت بيج تنطيني اصلح سيارتي ما قبلتي.. كالتله يل اغم.. باكت فلوسييييييي ونطتكياهم..

كتله عمار جيب

القران واحلفلك.. كل فلس منها اني ما ماخذه.. ومستعده احلف.. واذا راح تبقين تتهميني فألي اهل والي عمام همه يتصرفون ويحجون عني..

عمار سمع هيج وتخبل كام يتعارك وي امه.. وهيه تصيح باكتني الزركه باكتنييييي..عافها وطلع.. اني دكيت الباب على وليد..

كتله افتح راح يجي بابا.. فتح.. دخلت وبسته.. كتله اني اعرف بيبي تكولك اخذ من بابا موو. سكت..

كتبه لعد ليش تكول ماما.. كال هيه تكلي كول ماما كتله لااا عيب بعد اذا طلبت بيبي منك.. كولي واني اتصرف وياها اوك..

والك مني مصرف بعد يوميه الف. ماشي.. حظني وبقى يبجي خوف ظن ابوه.. حظنته وبوسته.. وخليته بحظني..

نومته.. وصعدت.. الحجيه بيومها ما تحملت من الصدمه بقت تحجي تحجي وتصيح باكتني لحد ما صاعد عدها السكر وواكعه..

شالها عمار و شيماء للمستشفى.. حسيت بتأنيب الضمير خطيه موتت المره.. بس تستاهل محد كاللها تمد ايدها على مال غيرها

وهيه فلوسها متلتله.. لشوي جابوها.. نايمه وتصيح اخ فلوسي يمه.. باكتني سميره الزركه..

اني اضحك بداخلي عمار باوعلي ابتسم.. كال شبيها امي.. كتله شمدريني..

قبل الزواج سموره وسموره وشحلاتج واحبج.. وره الزواج سميره الزركه.. ههههه هذا هم حظي بقى يضحك هوه و..يتبع

🌺🌺🌺🌺🌺🌺

اخ من العجايز ولا يكعدن راحه امهات فليس..

هم عدكم من ام عمار.. اللي قبل الزواج تبوس 🌚💔ووره الزواج اخخخ تفو والزركه ههههه

#حكاية_سمر

،،،،،،،،،،،،بقلم الكاتبه زينب ماجد،،،،،،،،،،،،،

البارت_18

مشت الايام.. وعمار رجع ياخذني ويجيبني بخط بسيارته.. كام ياخذ بس الطالبات.. بس ست نرمين يكولي ما اروحلها بعدد..

طريق بيتها صعب.. نتأخر كل مره من وراها.. استغربت ليش هيج يحجي.. عاتبتني هيه ليش ميجي..

شنو صار زوجج وعززتي علينه.. كتلها شنو عززته. هوه خط.. بالعكس لو اخذج نستفاد بفلوسج..

بس هوه يكول نتأخر.. تفاهمي وياه لدخليني بالموضوع..

اني ابد مو نبه وغبيه.. كل هلاشارات.. وابد محطيت بالي على شي..

وصلني اليوم هوه للدوام.. دخلت للمدرسه.. لعبت نفسي.. ما اعرف ليش..

رغم الدنيا بارده.. اكو ورود بالمدرسه زغار بس عطرهم حيل فواح بالمدرسه..

من اشتمه روحي تطلع.. احس اريد اذب معدتي كلها.. اليوم لا كمت فعلا اتقيئ منهم..

دا ادرس.. سمعت صوت الاذان.. تذكرت الاذان.. مع الاذان اذكرت عادتي الشهريه.. صار شهر ونص ماكو..

معقوله حامل.. كملت دروسي.. وقبل الدرس الاخير طلعت.. جان دنيا العصر. طلعت علشارع العام مال المدرسه..

اكو محلات ومختبرات هم اكو .. رحت سويت تحليل دم.. كال ربع ساعه.. كعدت انتضر..

شوي وصاح.. سمر فرحان.. كلت نعم وكمت.. كال حامل مبروك.. سمعت هلكلمه. احس طرت من الفرح..

حيل احب الاطفال واتمنى يكون عندي هيج طفل مثل العابيه اداريه.. للحظه اتذكرت بكر..

خليت ايدي على بطني. اوف جنت اتمنى اكون احمل طفل اله.. بس الله مكاتبلي قسمه وياه..

يله الحمدلله المهم حيصير عندي طفل.. اخذت النتيجه.. ورحت خابرت عمار.. كال راح اوصل.. كتله اوك شوي ونطلع..

مكتله اني بالمختبر ردت افاجئه.. رحت للمدرسه.. لكيت عمار صاف الخط.. وكاعد وره الستيرن يخابر..
ردت اكمزه.. بس سمعته يحجي..

كلت خل يكمل اتصاله واكمزه.. بقيت واكفه.. يكولها لا تلزكين عاد نرمين.. انسي اني متزوج هسه.. اي اي اعتبريها نزوه..

ما اكدر سمر كامت تشك بطلعاتي بليل ما اكدر اجيج ابتعدي مني.. بقيت مصدومه.. ضميت التحليل بجيب البنطرون..

وتراجعت.. ما حاجيته.. ما اعرف.. ماكو مشاعر ما احس ضايجه عليه.. لان ما احبه ما املكله مشاعر غيره واغار عليه..

بس احس تفشلت.. لان اجيت افاجئه بحملي.. يله يمكن حتى بهاي ممقسوملي افرح.. خليت ايدي على بطني..

وكتله حبيب امك انته .. انته فرحتي الي وبس ما اتشاركك ويه احد.. سويت روحي جايه عليه وطلعت صوت بالحذاء انتبه بساع..

غلق الجهاز وكال هلو حبيبتي.. كتله هلو عمار.. يله نروح.. كال بس خل يجون الطالبات..

كعدت يمه.. احس العرك ينزل من كصته ويمسح بارتباك. ويحاول يخفي ارتباكه.. خايف خاف سمعت شي..

كتله شبيك عمار..

-ما بيه شي حبي..

-اي زين.. درت وجهي.. شغل احبيني بلا عقدي.. باوعت هه.. عود هم الكه مثل بكر احد يوفيلي ويغنيلي من كل كلبه مو بس كلمات..

اوف يا بكر.. بقيت بكلبي امنيه اتحسر عليها كل يوم.. لا كادره اصير الك ولا كادره انساك

اجوي البنات.. كتله عمار انتضر نرمين خطيه .. كال اتركيها سمر.. كتله ليش اكو شي.. ارتبك. لااا يعني شكو مثلا

بس نتأخر..

-اي شعلينه.. راح نرجع ناكل ونام.. شعدنه قابل.. خل ننتضرها.. طلعت صحتلها.. اريد اشوف ردت فعلهم كدامي شنو ..

حابه اتسلى عليهم والله.. اكسر ملل .. اجت هيه كعدت.. كالت هلا عموري شلونك..

-هوه حاجاها من وره خشمه هلاا..

-شنو اشو متاخذني هليومين..

-طريقج يتعب.. ياريت تشوفيلج خط لاخ..

-هاااا اي يصير خير . اشوف ليش لا..

- حجيت وياه.. عمار..

-ها حبي

-مشتهيه ايسكريم..

-بارده الدنيا حبيبتي.. بلاعيمج تلتهب..

-ما عندي لوزتين شايلتهم من اني وصغيره..

-ادللي حبيبتي بعيوني.. هسه اشمر الخط واخذج للفقمه..

-هيه كامت تفور وتزفر.. انوب طلعت جكاير تشرب عزززا هاي ادخن اووي..

بس ابد ممهتمه او ضايجه لان عنده علاقه بيها.. جن صديق وعرفت بيه مكبل ابد مو جن زوجي..

بلله اني مشاعري معوقه وما عندي احساس لو اني ما احبه.. اذا اريد اختبر احساسي.. اقيس ابكر..

لو شفت بكر هيج يخابر وحده وعرفت بيه يقضي ليالي وياها.. شيصير بيه.. اتخيلت الموقف اختنكت..

يمه اموووت قهر غير.. اي لا الحمدلله طلع عندي احساس مو معوقه .. احجي وي روحي انوب ضحكت.

ياربي والله سوالفي بايخه.. بله اكو هيج وحده خاينها رجلها تفكر بهشكل.. لازم هسه اكلبها مناحه مثل باقي النسوان غير..

وصل البنات.. وطلع بينه للكراده.. نزللنه ايسكريم. . وعمار راح جاب طاسة لبلبي مدري منين واجه كابلني وياكل..

اباوعله.. وجه ما يوحي انه خائن اليشوفه يكول خوش ولد.. بس هوه ليش خان.. شنو شاف بنرمين.

كتله طيب.. اخذ بالخاشوكه.. ويكولي ضوكي.. كتله دا اكل موطه.. بس اشو تشهي اشووو.. اكلتها عجبتني الحموضه البيها..

كتله جيبلي مثلها.. كرصني من انفي ويكولي مو يدلل الحلو.. كلت هاي صدك لو كالو زوجج لو دللج هواي.. كولي وراه مصيبه ويريد يطمطمها..

راح جابلي وكعدت اكل.. كملت.. كال هاا نكوم.. كتله اي.. كمت اخذني من خصري ويمشي..

صحت ه

يييو منا ناس احنه بالعراق العضيم.. وخر ايدك.. كال مرتي شعليهم..وصلت السياره وركبت..

مشينه صار المغرب والدنيا كامت تقطر والجو مغيم وشوارع الكراده.. اوووف عشق بس ما كنت اباوع نعسيت حيل ونمت..

نايمه واسمع صوت بكر.. اوي فدوه شكد احب النوم لان اشوفه بيه.. يربي هاي حلم لو حقيقه صوته..

فتحت عيوني. لكيت عمار واكف وبكر واكف يمه.. وبكر يكله لا تكعدها شيلها.. وعمار يكله لا الاهل منا ششيلها..

بكر يكله تريد اشيلها اني.. بهلاثناء فتحت عيوني ثنينهم واكفين.. بكر شجابه.. كعدت انته شجابك..

-لتخافين سمسومه صرت جارج اي شي تحتاجيه دكيلي ويغمزلي ..

-اباوع هذا عود صدوك يحجي.. كتله يعني نضال جوه..

-اي..

-مشيت منهم.. صاح عمار وين.. كتله بس اسلم علبنيه واباركلها عيب. . صاح بكر على عمار تعال تفضل ..

دخلت هوسه البيت هستوهم منتقلين.. لكيت مصطفى بالكاع يبجي ونضال ماكو..

يروحي يروحي لتبجي اروح فدوه لهجمال.. اخذته وخليته على كلبي وشميته اوووف يريحته..

جرعه منشطه.. اجت نضال.. سلمت عليها.. كتلها ليش يبجي صوفي بالكاع مو حرام هيج ورده تبجي.

كالت بومه بس يبجي واني الشغل فوك راسي..

-لاااا ما اسمحلج تكولين عليه هشكل.. لج دباعي الحلك.. سبحان الله نفس حلك ابوه شفايف ناعمه وصغير..

حجيت هيج.. عمار صار كبالي.. وبكر مبتسم.. ذوله شوكت طبو.. مو عفتهم بالكراج.. عمار تضايق..

درت على بكر.. شايف الف خير علبيت..

-يبارك بيج عيوني بفضلج ..

-غلست منه... اااا ايجار لو ملك..

-لا اجرته ما شتريته..

-باوع ابنك كصته حلوه عليك. اتحسنت حالتك ويه عائلتك على جيته واستقريتو ابيت.

-فكر ابن فكر.

-ليش هشكل.. هاي شبيكم وياه.. ليش هيج وي صوووفي ليش.. انوب من اعبس بوجه واسوي روحي ابجي هوه هم يبجي..

كتلها نضال اخذه يمي.. كالت هااا يتعبج.. كتلها لو كل تعب هيج .. جان اني بخير.. كالت علوااا اخذيه اخلص منه..

من كالت هيج طرت فرح.. اليوم نسخه من روحي.. بين اديه. اخذته وكتلها بس انطيني حاجياته وجنطته...

اخذتهم ورحت للبيت.. صح بكر انتقل يمي علمود يضايقني.. بس وجوده يمي ويبعد عني خطوات..

يشعرني بالراحه.. اخذت صوفي ورحت للبيت.. دخلت عمتي وشيماء كاعدات بالصاله كلعاده..

سلمت عليهم.. كالت شيما منو هذا .. كتلها ابن ابن عمتي.. كالت رحمه.. ددراري ولد رجلج وبعدين باوعي لابن ابن عمتج..

مهتميت.. اخذت مصطفى وصعدت.. غيرتله وبوطرته ولبسته.. وخليته ابين اديه.. واحاجيه..

يكولون المره ابداية حملها لو باوعت بوجه تحبه.. يطلع البطنها عليه.. صوفايتي اريد البداخلي يشبهك..

بلكت يعوضني عن ابوك. احاجيه وابوسه واشمه واركصه.. لحد متعب.. كام يبجي كمطته وسويتله ممه وكعدت ارضعه..

نزلت دموعي واني اباوعله.. شيصير لو انته مني.. تمنيت بس شي يربطني بأبوك وبعدها يروح..

علاقل اعيش على ريحته.. يا صوفي تعبت واني اتمناه .. وعجزت انساه.. بجاهك انته طفل ورضيع اريد الله يشيل حب بكر من كلبي..ويخليه بأبني البطني..

ما اريد اتعلق بغير ابني..خليت ايدي على بطني.. ماما اتمناك.. تطلع تشبه صوفي وارتاح بشوفتك يوميه..

دا احجي طب عمار شمر السويج علميز وتمدد علسرير.. عفته منتبهتله.. كملت الممه شربها كلها..

خليته على متني ادك على ضهره خفيف علمود يبتلع الحليب ويدخل معدته.. مثل ميكولون تريعيه..

نام.. خليته بين اديه وابوس بخده شكد ناعم.. شكد فرحت بيه.. شلته.. فرشتله بطانيه ودثرته وعزلته..

ونزلت.. سويت عشا وعشيت جهال عمار.. انوب كعدت اقري وليد.. كملت.. نضفت البيت

اندكت الباب.. فتحتها بكر.. يا رب اذا كل يوم افتح والكه وجهه هيج كبالي.. قابله شتسوي بيه سوي..

كتله هلا بكر.. كال هلا سمر.. اشوفج فرحانه. كتله الحمدلله.. انته هم اشوفك مرتاح..

-اي منو اليسوه نتعب علموده اجمع عائلتي وانسعد وياهم احسن من الدواره وره ناس متسوه..

-اشوف ذوله الميسوون.. مكدر كلبك يخليك بعيد عنهم وكابلتهم..

-كابلتهم حتى اسممهم بعيشتهم مثل ما سمموني.. اجه دورهم ..

-اخذت نفس وحجيت بداخلي.. يابكر حتى السم من ايدك عكلبي احلى من العسل بس ضل كابلني هيج كولشي ما اريد من الله..

بس اشوف وجهك ويرتاح كلبي بيك ويطمئن....

-الصفنه مو الج هناااااا

-هاااا.. اي شتريد..

-مصطفى

-اي هسه .. صعدت.. لكيته كاعد ويباوع بعيونه.. بوسته وحضنته حيل ونزلته.. بسته وانطيته اله..

بقى يشم بركبته ويبوس.. كتله الدنيا بارده لفه ليتمرض..

-لتصيرين لوكيه معليج..

-سكتت عنه... اخذه وراح للبيت.. كبال بيتنه بالضبط.. واني اباوعله شلون دخل بيته هوه وابنه..

اخذت نفس.. الله يسعده ويوفقه بجاه النبي..

-دخلت للبيت قفلت الباب وصعدت.. عمار نايم.. غطيته ونمت.. لثاني يوم نفس العاده من تنضيف و واهتمام بالبيت واروح للمدرسه الضهر..

دخلت المدرسه.. درست.. كملت.. جاي اطلع.. وكفتني نرمين.. سمر اوكفي..

-نعم..

-اريد اكولج شي

-اي تفضلي..

-اني حامل..

-اي بالعافيه.. شنو من شوكت تزوجتي

..

-متزوجه مسيار من عمار

-شنوووو ..من شوكت هذا الحجي

- من قبل الزواج.. وتركني لما قبلتي تتزوجيه ورجعلي قبل فتره وكام بجيني بين ليله وليله..

-والمطلوب مني شنوو

-تبتعدين عنه.. واطلبين الطلاق.. لان صراحه وجودج بحياته زايد.. وحتى بعد زواجج ديجيني عشنو مجلبه بيه انتي..

-بقيت صافنه بوجها.. ميشرفني ارد عليها.. تركتها بدون جواب ومشيت.. شفت سيارة عمار موجوده.

درت وجهي وطلعت علشارع.. اجه وراي يركض .. اخذ ايدي .. ويين مو موكف السياره طرطور رايحه وعايفتني..

جريت ايدي منه حيل. وخزرت بوجها.. وكتله حسابك بالبيت استاذ عماار.. وخرت منه.. اخذت تكسي ورجعت للبيت..

لكيت بكر اباب بيته.. يرش ويغسل بابه.. صاح شبيج..

-ما بيه شي.. عفته ومشيت واني اكول حسافه والف وسفه بدلت هلذهب بهل تنك.. الله لا ينطيكم اهلي

من حرمتوني من حب حياتي وخليتوني اوافق على هذا.. دخلت وسديت الباب حيل.. صاحت عمتي هاا.

ما رديت ولا سلمت للغرفه كبل.. بقيت امشي بالغرفه بنرفزه.. نص ساعه يله دخل عمار..
صاح شبيج تخبلتي انتي شبيج..

-ضربته على صدره.. اي تخبلت تخبلت. .. حظرتك اذا مرايدني شكو تتزوج غيري..

-اني متزوج.. ممتزوج

-لك تجذب .. الساقطه مالتك حامل منك..

-جذابه هاي..

-يعني عرفت اقصد منووو وتكول جذابه.

-اي جذابه لان كل الزين اعرف نفسي ما ادنيتلها..

-ولك سمعتك بأذني تكلها اعتبريها نزوه..

-بس ماخذ احتياطي والله مو حامل جذابه..

-وشيفررررررق.. يعني متقربلها.. يعني متزوجها..

-قبل الزواج بيج اتزوجتها مو هسه.. واتزوجتها للونسه مو زواج محترم..

-لك انته شنو من بشر كولي.. تنكر انته ممتقربلها واني على ذمتك..

-اي متقربلها وشترديين .. مو زين واحد مثلي متحملج انتي شايفه روحج..

اكبر واحد ميتحملج.. لج من يوم الاخذتج .. تحضرتيلي فد يوم .. لبستي..

-لك ادوس على نفسي وما امنعك وتكولي تتحضريلي.. شوكت لحكت اتعود عليك والبسلك...

هذا انتضارك.. الي .. هذا تحملك.. لك انته شنو من بشر..

-من وراج صرت هيج.. اني رجال اريد حقي وانتي باااارده مثل الثلج.. شتردين اسويلج مثلا

-ههه انته رجال.. لك الرجال اليتحمل مرته بزينها وبشينها ويسندها ويساعدها تتخطى واقعها..

اما الذكر مثلك.. يسوي مثل ما سويت انته تماما.. حجيت هيج.. ضربني راشدي.. احس اذني صفرت..

باوعتله ودموعي.. تنزل.. تفلت بالكاع.. وكتله تحلم اباوع لشكولك بعد..

-دروووحي درب السد لا رد عسااه..

-التفتت عليه.. اباوعله بحركه ما يستاهل ارد.. اخذت جنطتي.. وطلعت ابجي بحركه .. طلعت البيت وضربت الباب

وامشي واركض بالفرع.. وامسح بدموعي.. صادفت بكر.. شايل علاليك.مسواك بيده...

حسافه خسرت واحد مثله.. على هيج حثاله.. شفته ودرت وجهي وامشي حيل وابجي واشهك..

شمر المسواك.. وركض وراي لحظه لحظه تعاااي.. شبيج...

امشي ما اريده يشوفني بهلحاله.. جر ايدي ودارني اله.. ابتعد وخر مني لخاطر الله ..

-هذا الراشدي هوه ضربج مووو

-عوفني اكولك عوف ايدييي

-االا اصلخ اهله ابن الكلب..

-ترك ايدي.. وراد يريد يركض بحركه.. لزمته من ملابسه.. لتوصخ ايدك بيه.. اتركه..

-دوخررري مني خل اشوفه الزلم شتجيب..

-بكر كاااافي لخاطر الله مناقصتك اني مناقصتك.. روح لعائلتك واتركتي.. عفته ودرت وجهي ابجي وامشي..

ركض وراي.. تعاااي بس فمهيني شسوه بيج ما اسكتله ومحمد.. زلمه هوه خل يتقوه علينه مو على نسوانه..

-ابتعددددد..

-لج لتبجييين بس تعااي ..

-اريد اروح لاهلي وخررر

-ترحين وحدج.. اكسر رجلج.. اني اخذج..

-بكر عوفني عوفني.. والله مناقصتك

-ما اعوف ما اعوووووف افتهمي عاااد..

-جر ايدي.. وكال تعاي السيارتي بس اجيب السويج..

- ما ادخل بيتك واني هيج حالتي.. ما اريد احد يتشمت بيه..

-منو يتشمت اكص السانه والله.. ديحجي وطلع عمار.. دارله بكر بحركه.. وكال ولك نار بكلبي الله جابك.. دتعااال ابن السكط تمد ايدك عليها..يتبع

🌺🌺🌺🌺🌺