.
رديتلكم شايل فرحة بكد ما شايل هم من عدكم
ورديتلكم وادري بعمري تكسر مثل الجام بحبكم
رديت وشايل ضحكاتي ارد اوكف وابجيهن يمكم
يالعفتوني ولهسة هدومي من افركهن تطلع ريحتكم
صح ما عندي وياكم صورة بس مرات من اشتاكلكم
بس الزك گلبي على الحايط تطلع على الحايط صورتكم
هو انا شدلاني عليكم گلبي شوداه وشجابه الكم
بس الحب مهرة وشالتنه
من عثرت طحنه بعتبتكم
هاي سنين من توادعنا يمتى تردون مروتكم
مو صار تراب اعلى جروحي ومحد ينفضهن بس انتم
ودارت بينه ولمن دارت جابتنه الصدفة لشارعكم
.
.
.
.
#شعراء_وذاوقين_الشعر_الشعبي
#حمزة_حسين_مطر
#ابو_تراب

.
لا تطش الكاع يالمايك شحيح
اسأل مجرب اذا ما جربت
مدري ياهو الحاطها اباله يجيك
يريد حنطة وهو باذرها شعير
بليل طلعلي الشمس وانا اعتنيك
الماي روبه وعود البالك يصير
ليش تحرك دمك وتفرك ب أديك
شهالتكبر ؟ على كيفك يا الحرير
الماي يصعد للسما وتالي يطيح
الصوج بية واعترف اي قصرت
حلفوني بعيني ما كلت الصحيح
وحلفوني بعينك وما جذبت
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
تانيتك تجيني هناك بس ما صارت القسمة
وتانيتك تجيني شموع بس ما صارت القسمة
تانيتك تجيني دموع بس ما صارت القسمة
وتانيتك تجيني رماد هم ما صارت القسمة
تانيتك تعال شبيك عليك جروحي متعلمة
يجمرة توت انا اخرس دجويني بلكت تطلع الكلمة
يا غيمة بعتمه سنيني ولج ليوين منهزمة
تعاي وجودري بليلي ولو ما ضل ضوة بنجمة
.
.
.
.
#شعراء_وذاوقين_الشعر_الشعبي
#نائل_المظفر
#ابو_تراب

.
بعنا البيت ريت البيت مهجوم
وريت اكثر بعد من هالخساير
فراش الفاتحة لو شفته ملموم
بنص گلوبنا تلكى الجوادر
.
.
.
.
#شعراء_وذاوقين_الشعر_الشعبي
#الكاطع
#ابو_تراب

.
اخنك مشتهاتك حط ملح للرأي
المصخ طبعه بعد ميفيد لا تملحه
عكر رأي عمرك خاف يركض بيك
ب أيد ابليس بالك تنحسب سبحه
كاروك الوكت بالك تأمن بي
اذا مجبور نام عيونك مفتحه
.
.
.
.
#شعراء_وذاوقين_الشعر_الشعبي
#عبدالله_الشاوي
#ابو_تراب

.
عبالك نسيت البية سويته ؟
هذاك العفته خايب وانهجم بيته
واركضلك ركض بس انا حيل وياي
نقطة ضعفي جانت من تلكيته
اضم جفوف ادية بس الملاكة يريد
اذا واحد يحبك تكعد بريته
خرز واطشرت جا ليش اضل بالكاع
طايحلك خرز ما كمت لميته
نخلة تحولت ياهو اليهزني انطي
ما واحد صعدلي و خالي رديته
واسهر والنجم يحسدني جي ما انام
شينوم الخذوا من عنده عافيته
.
.
.
.
#شعراء_وذاوقين_الشعر_الشعبي
#علي_الجنوبي
#ابو_تراب