.
حطيت ادية اعلى الجرح حسبالي دم تمطر لان
من عكسي ينكط دمي
رايد يفاركني الجنت من كثر ما راكض وراه
مفروكه اصابع جدمي
تكبرون احسكم بس علية انتوا وجروحي وهدمي
الواحد تعرفة من الحجي لاكيله يم غيرك وطن
لمن يسولف رسمي
شتريد ؟ مو عوزك بعد صبعين اوصلك ل امي
بس والله مت من الضحك من كتلي ضل لوحدك
هو انا ياهو اليمي ؟!!
.
.
.
.
#شعراء_وذاوقين_الشعر_الشعبي
#احمد_الصالحي
#ابو_تراب

.
حنيت وصورك شفتها
والضحكة ذيج تذكرتها
ومن شافتك عيني العفتها
طاحت على الصورة وشلتها
ما اكلك شكد طاحت دموع
كل اخ تطلع طولها اسبوع
مالت ابن ادم ظهرة مكطوع
ومدري شرفس من تحت الظلوع ؟!
واذكرت صوت الليل مسموع
منها وحجينا بغير موضوع
ضلت بگلبي الما كلتها
ديرة وجهكم مو وكتها
.
.
.
.
#شعراء_وذاوقين_الشعر_الشعبي
#نهاد_الخيكاني
#ابو_تراب

.
اخاف من المخدة بساعة الليل
احط راسي عليها وتبدي الهموم
انا حسباتي ثكيلة وتهدم الحيل
وبعد يا عين عندي تطاوع النوم
بجفوني دمع ما يقبل يسيل
والحسبات تكعد بية وتكوم
انا اتطشرت بس محد يشيل
ياهو الي يلمني يحطني بهدوم ؟
انا ابختك يا گلبي و عندك دخيل
اهي مزنت مطر ما ضنتي تدوم
حبلة غيوم عيني متانية اتسيل
واذا تطلك مطر شتذب الغيوم
.
.
.
.
#شعراء_وذاوقين_الشعر_الشعبي
#حمزة_الحلفي
#ابو_تراب

.
انا شكد جذبت على الناس اكلهم زين
اذا سألوا شلونك تزرك الشفه
قصة منتحر تعرفني كلها تريد
من يمي اليشبهك لو عبر صدفه
ام جندي بحرب موعد نزوله اليوم
واتأخر واجاها .... تخيل اللهفه
والله لو ترد هيج اطلع اتلكاك
انا المشتاكلك يا عيب يا عفه
صيف جفاك اجى ونشفن البيهن ماي
بس جفني المبلل جيتك تنشفه
.
.
.
.
#شعراء_وذاوقين_الشعر_الشعبي
#حسين_المرياني
#ابو_تراب

.
اذا لوليتلك لا تغفى يمي
ملش بالشعر والطم على الزنود
انا الذبيت شبجي بوسط دمي
طلعت بس المرارة وبقى العامود
وانا الي حفرولي ونسوا طمي
وعشت وسط الحفيرة بثوب مسرود
عكارب عاشرت مصتلي دمي
مو ربعج علية ملتمة بس دود
اكطع بالجسم وانخاج لمي
وسيوفج خشب تاخذ علية زود
يا دنيا ما نفع وياج غمي
تحسبين الصعد ع النخلة صاعود
يا دنيا للمناجل حيل شمي
مو ياهو اليكص الكصبة حاصود
.
.
.
.
#شعراء_وذواقين_الشعر_الشعبي
#خضير_هادي
#ابو_تراب

.
دليني عليك سنين تايه بيك
وامشي وياي ادورك خاطر اندلك
عرفني علشخصك رايد احجي وياك
بس كلمه وبعد ماغيرها نكلك
وحده من الثنين وحده راح اختار
لو كلك احبك لو احب كلك
اسأل ليش احبك حتى اكلك ليش
وليش شما تسوي وياي اقبلك
لحظه موت عمري سنيني كلهن خوف
بس وياك ائمن لمن اوصلك
وانته اخر نفس وشكد عزيز تصير
وبلحظه الموت تريدنا نملك
خيط علجرح بلحم صرت وياي
لو كل الجروح تطيب مافلك
تعرف كلشي بيه وماعرفت شبيك
لغز حلك لغز من يكدر يحلك
وشرد حتى اجيك ومدري ليش الخوف
خاف تخاف مني بسدك اختلك
مثل ظلك اظل والليل يكضي الليل
من تطلع شمس من طولك انزلك
.
.
.
.
#شعراء_وذواقين_الشعر_الشعبي
#جبار_رشيد
#ابو_تراب

.
سلس ما اصير وابقى بكيفك انكاد
وحطب ما اصير وانت بعازة النار
جنت زهرة شمس هسة انا صبير
ما ادير وي شمسك وين تندار
كاتلني العطش بس بالي مرتاح
اشرب بالرمل ما اذل للنهار
وي الكاع طولي ومن تجي الريح
اضل ثابت انا وتهتز الاشجار
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب

.
من يموت شاعر تحزن النجمات
والاشجار تبجي تكول شاعر مات
والانهار والازهار تمشي ارواحهن وي روحه مشيعات
حبات الرمل من اجله تچوي الكاع
وصكور الجزيرة لموته حزنانات
وطيور المراقد ذني علويات
يدعن كل حمام الكون يلتم وي روحه يبات
اذا كل هذا يحدث كول شاعر مات
عليك بكل سعادة تودع الحلوات
.
.
.
.
#شعراء_وذاوقين_الشعر_الشعبي
#جبار_الفرطوسي
#ابو_تراب

.
اي وحق من كعدك ب احساسي
انا من هاللحظة واحد ناسي
گلب ميت بس الك راح استعير
قاسي ...؟ لا بي رحمة خاف القاسي
وحتى لا تخطر ابالي الذكريات
راح احط صخرة بلال براسي

وخاف كالولك حجي عوفه ويجيك ؟!
البية سولف ما حچالك بالصحيح
العنده نية سوء اشم ديرة كفاه
يطيح من عيني قبل لا منه اطيح
انا مو ذاك اليچلب بالذيال
اليصير تراب اصير بوجهة ريح
.
.
.
.
#شعراء_وذاوقين_الشعر_الشعبي
#نهاد_الخيكاني
#ابو_تراب

.
قبل جان الولف يخبز وولفه يفوت
ويسمعها حجي بس تستحي وتدور
تخجل والحمار يلون الخدين
من حرورتك وحروره التنور
ويكللها الصبح باجر نروح نزور
واجيبلج علگ وانذر لحبنه انذور
وامر على المكبرة واحجز اثنين كبور
بالمكبرة تصيرين جيراني اريدج
بلكي الرمل ينزاح واتكمكش ايدج
.
.
.
.
#شعراء_وذاوقين_الشعر_الشعبي
#حسين_العميدي
#ابو_تراب

.
كل الليالي انكضت بس ليلگ شكبرة ؟
يا گلبي صار الدمع مرساة للعبرة
دورلي يمك صبر گلبي خلص صبرة
لو ماي اعبره ب بلم ... بس ليل شيعبرة ؟؟
.
.
.
.
#شعراء_وذاوقين_الشعر_الشعبي
#غني_محسن
#ابو_تراب

.
كالولي عنك كملت قصة حياتك بعدي
وكالولي حيل اتشابهن حلمك وخدك وردي
بجوني وانا الي جنت
ما اقبل اتمشى بمطر ويصير مي بخدي
كد ما شفت بعدك حزن
منا لحد يوم الدفن
راح ابقى عايش وحدي
لو عندي حظ جا ما رحت بس انا حظ ما عندي
.
.
.
.
#شعراء_وذاوقين_الشعر_الشعبي
#مهند_العزاوي
#ابو_تراب

.
توازت والله يستر من الموازة
كرهت الروح چن روحي طريق تگتلت بي ناس
وجنازة ورا جنازة
ولا عدنا غرض يسوى كضن سلعة ورا سلعة
بيعة ناس معتازة
تعال وشوف بالوكفة شتبيع الناس
مو بس الغراض اجساد معروضة اعلى الميازة
رادوا يا جسر من تنگلب على الماي
حايط والجروح بجسمك درازة
رادوا يا جسر من تعبر العشاك
ولا كرصة شمس بخدود خبازة
امس معزوم يم شاعر وجانت كهرباء ماكو
لا مي لا نفط لا غاز
وكع بطل الصبر وتكسر اكزازة
امس معزوم يم شاعر بتت وياه
ريكني جرح بايت وغداني جرح تازة
.
.
.
.
#شعراء_وذاوقين_الشعر_الشعبي
#الكاطع
#ابو_تراب

.
شكالولك علية وصار وجهك سيف ؟
وتعرفني التكتلك والحجي مصدكة
شجرة ومو ب أدية وتدري وكتك ريح
تحملني ذنب من طيحت ورگة
خلگ ساتر ولك سويت خلگي وياك
شكد موت وجثث ما ضيجت خلكة
مو من صالحك على الجرف تزرع عود
ما تدري اعلى ساعة يفيض ويغركة
ومن شفت الخناجر خذت دور السيف
كلت يا روحي صيري بهالوكت دركة
تسألني وتگلي شسوه وكتك بيك ؟
شسولفلك شكلك تكتل الحركة
ذبني ابير ب أيدة وكال اكلني الذيب
ورسم للذيب صورة وجثتي بحلكة
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب

.
من كتلك جرح ينرس حلكة قماش
ما شايف الدم شيسوي بالمطكوك
اجي محترمك وبؤبؤي بنص العين
وانت تهيني ب مباوع الطارف
فطن وتخمخم الكشه بنضر مصيوب
دورت بزعلنه دوارة العارف
بس تطيح تبرد فاتحة عريس !
جادر ما تضل طول العمر واكف
خسرنا المعركة والما نكض يعيش
غشيم الصاحي لمن يسند النازف
القفل يطرد الوادم لو وكف على الباب
وانت ولا هلا من حلكك تكاطف
.
.
.
.
#شعراء_وذواقين_الشعر_الشعبي
#رضا_العبادي
#ابو_تراب

.
شعجب عبرنك وما ركزت بيهن ؟
الظاهر ما يعجبن نفس راعيهن
بالعادة البشر يندم لشئ سواه
والله اتندمت على الما مسويهن

طعنتوني وكلت ممنون من هاي
الصور لو ما جرح بظهورها تطيح
واروحن واجي بدربي ومالي بالناس
بدرب واحد عشت مثل المراجيح
العنده اخوان من يوكع يصيح اخ
زين الماله اخو لو طاح شيصيح ؟!
.
.
.
.
#شعراء_وذواقين_الشعر_الشعبي
#مهيمن_الامين
#ابو_تراب

.
كالوا رجعلك كلت شي عنده
ما مشتاك بس المصلحة ترده
مبين من سلامة العنده شغلة وياك
ابو العشرة الكصيرة التنتهي بمده
انا بسبب ربعي شكد نمت زعلان
وشكد ما نمت وعيوني تتبده
ضموني وكلت هو الذهب مضموم
كطعوني وكلت خل انكطع ورده
شيل الطيبة مني الشيب كله يروح
رد الطيبة الية الشيب هم رده
مدري شضيعت واسأل بوجه الناس
شخبار الوفى هواي انا مفتقده
كمت انصدم من الكالي خوش انسان
وادم حتى الله بمصلحة تعبده
انا كلش صلب مرات بس مرات
محنة والدة وطيبة بزر كعده
انا من انعزل وابتعد مو مغرور
ابو نفس العزيزة بكل وكت وحده
.
.
.
.
#شعراء_وذواقين_الشعر_الشعبي
#زيد_السومري
#ابو_تراب
_

.
شلك علية يا زمن وشرايد ؟
انطيتك الي ردته مني وزايد
ضحيت ب اغلى احبابي
وخسرت كل اصحابي
وشتريد تاخذ بينت ومعاود
نيشان اكثر من جرح مو كافي
كضيت عمري وياك ما متصافي
الماي يمي والعطش بشفافي
شتريد تاخذ بينت ومعاود ؟
شلك علية يا زمن وشرايد !؟
.
.
.
.
#شعراء_وذواقين_الشعر_الشعبي
#الكاطع
#ابو_تراب

.
شط الديوانية يفرفح لو مرت من يمه صبيحه
ويكوم يصيح كل صوته خليلي من زلوفج ريحه
من ضحكتها الناس تبدل تنزع ثوب وتلبس ثوب
وكلوب الشارع من يطفى تطلع صبحه بمية كلوب
وفطور الصايم يتعطل تطلع صبحه يثور الطوب
وكل الديوانية تعيد هذا الصوب وذاك الصوب
ما اكللكم كلش حلوة بس يا الوادم مدري شبيها
لا كلش سمرة ولا بيضة مدري شلون الله مسويها
ومدري شلون البيت يلمها ومدري شلون امها تغطيها
ومدري شلون الشارع صابر لسا ما ماكل رجليها
لو حلت صبحه ضفايرها تحبل حتى العاكر منهن
اي والله والحبلة تجيب
تتناوب هي وشمس الله تطلع وحدة ووحدة تغيب
وساحات التدريب من تمر يبرد حت عرك التدريب
.
.
.
.
#شعراء_وذواقين_الشعر_الشعبي
ل #كاظم_خبط
#ابو_تراب

.
صار هواي ما باچي عليكم
وانا الما بطلت تفكير بيكم
ما اعرف شنو البعيوني مسدود
اشو كل الالوان تشوفهن سود
الجرعة الزايدة من الفركة تأذيك
وتبچي الطبيب الي يداويك
تأكدت الاغصان تشيل تابوت
من شفت الورود تموت بسكوت
معقولة الكلام يصير بي ماي ؟
اذبل ليش من يشح حجيكم ؟
وانا الما بطلت تفكير بيكم
الشعر من ينكتب من دم الاقلام
تسمع بي نبض لو مر الف عام
التحبه بلحظة الي تتصل بي
تفاجئ ب اتصال ومنه تلكي
خل نفرضها صدفه شلون تنعاد
المثل هاي الصدف تفسير ينراد
سبحانة الخلق منظومة احساس
ما تنشاف بس تثكل على الناس
انا من ابچي سمار اترسها الدموع
لذالك بچيي ما يشبه بچيكم
وانا الما بطلت تفكير بيكم
.
.
.
.
#شعراء_وذاوقين_الشعر_الشعبي
#ميثم_فالح
#ابو_تراب