.
مدري شچنت احچي وبيك ذكروني
رأساً دمعت عيني
وخفت أرمش وتنزل دمعة عيوني
حسو تفارگنة ...
وغيرو الموضوع
وشگد حاولو وياي ماگدرو يضحكوني
اكثر شغلة اذتني💔
گدرت اتعيش ...
ولك اتمنى كارهني ولا متعود بدوني
.
.
.
.
#شعراء_وذاوقين_الشعر_الشعبي
#حسين_السعيدي
#نٌےـوُرَ

.
ما مشتاگلك ... مشتاگلك موت
و اكبر من صبر روحي اشتياقي
يمكن من غيابك گلبي خلصان
وحبك ما خلص بالروح باقي
تصور لو زعلت بيوم وياك
اكلك روح عني وبية الكاك
مدري الحب تغير هاي الايام
مدري يختلف حب العراقي
.
.
.
.
#شعراء_وذواقين_الشعر_الشعبي
#ضياء_الميالي
#ابو_تراب

.
ما عندي عزة نفس
خليتك ادخلت بسوالفي ولبسي
شتريد مني بعد ؟
من عيرتني كبل مو طورت نفسي !
من بعد ذاك التعب مو مال اضل وحدي
وهذا الحجي يفيدك
تذبحني من الكفه وتكلي ما اريدك
مو واصل لمرحلة
جفوفي احترمهن لان مرات اكض أيدك
انا ابو الراهي جنت والشوك كله ب ادي
لساني ابشط من السهم من جنت اريد احجي
وهسة اليغثني بقصد مارد علية بالمثل
كل الاكدرله ابچي
.
.
.
.
#شعراء_وذواقين_الشعر_الشعبي
#رضا_العبادي
#ابو_تراب

.
شحصلت منك مختنك
من يمتى ما ضاحك صدك
والله راح ابقى احترك
منا لحد ما اجرحك
حالف اسوي وياك وحدة بوحدة
حالف اوصلك مرحلة المطلوب دم تحسدة
بيمن اذكرك من غبت ؟
وخليتني بس التفت مثل اليطيح بشدة
خليتني ساعة رمل كل الاوقات اتبدة


.
.
.
.
#شعراء_وذاوقين_الشعر_الشعبي
#احمد_عاشور
#ابو_تراب

.
تدري البارحة شكد افتقدناك ؟
من كلنا انجمعنا وما لكيناك
مكانك خالي بس حاضر خيالك
وكمنا بلا وعي نحضنه ابدالك
و رد بارد حضنه وما حضناك
تدري البارحة شكد افتقدناك؟؟
تدري بيك نعرف يمتى موجود
من بالبيت نشتم ريحة ورود
عطر انفاسك نميزة بالانفاس
وفرق بس عطرك نشمه بلا احساس
وكل جرة نفس بيها ذكرناك
تدري البارحة شكد افتقدناك ؟؟
نحس روحك ترفرف يمنا بالبيت
ومن يمي فتت بيك انا حسيت
طبع بينا الحزن يبدي من الغروب
ومن نبجي عليك ندمع گلوب
وما ضل گلب عدنا من بچيناك
تدري البارحة شكد افتقدناك
.
.
.
.
#شعراء_وذواقين_الشعر_الشعبي
#جبار_المياحي
#ابو_تراب

• • .
سولف كول الك واهس تضل وياي
واذا ما الك واهس كول لا تخجل
ما اقبل احبك وانت ما مرتاح
وما ارتاح احبك وانت ما تقبل
فكر باليهمك المهم شتريد ؟
انا كل اليهمني المهم لا تزعل
بكيفك من اجيت وما جبرتك يوم
ما اجبرك بكيفك لو ردت ترحل
ما مليت منك اكدر ابقى وياك
بس المشكلة خاف انا راح انمل
.
.
.
.
#شعراء_وذاوقين_الشعر_الشعبي
#جبار_رشيد
#ابو_تراب

• .
بعد ما اعرف انسان اعلى انسان
ولا ادني الصديق اعلى الكرايب
المفاشل يصير وياي بعدين
واطيحن بيها والكاهم حبايب
.
.
.
.
#شعراء_وذاوقين_الشعر_الشعبي
#زيد_السومري
#ابو_تراب

• .
عمري سفرة
والله لو بيدي ابد ما سافرتها
عمري سفرة
اغلى ناس بلا موادع ودعتها
روحي طلعت من جسدها وشيعوني
وانا ذاك الغالي عدهم ودعوني
ليلة وحدة بيتهم ما أخروني
فاركتهم رغم عني وفاركوني
بيتي كبري
والمخدة تراب راسي توسدتها
عمري سفرة
والله لو ب ايدي ابد ما سافرتها
.
.
.
.
#شعراء_وذواقين_الشعر_الشعبي
#ناظم_الحاشي
#ابو_تراب

.
البدوي اعلى بيت الشعر للبيع ما ينكتب
طبق الاصل حبي الك ما ابدلة بدنياي
واخر كلامي الك وي الحار حار انگلب وي البارد ابرد بعد
طبعي القديم انتهى قررت اصيرن ماي
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
ثاري الگلب مبيوك بوكه
والطابله مشلع عروكه
يا شدت الينكسر سوكه
من تخلي زايد حمل فوكه
جا غير كون يتوب ويچن
مصخم يا الابهر دومك تحن
حتى من انامن كمت اصفن
بلايا جدم وعيوني يمشن
ياخي وزه مدري شفاكه
هنا يمشي احس الولف ساكه
.
.
.
.
#شعراء_وذاوقين_الشعر_الشعبي
#علي_مالك_الموسوي
#ابو_تراب

.
تلاكَينه غربه وبس جزت
عينك لكَيتك غالي
من يومها ومن ماتجي
الكَاك جاي ببالي
وعيوني مو من الدمع
من الاحساس اتلالي
يسموني خالي
ومو جذب
بس ياهو اليحب من صدكَـ
غير أبو الكَلب الخالي
من باب أموت بغيبتك
ومن باب أموت بجيتك
ولليوم مدري شتنحسب
محبوبي لو چتالي
.
.
.
.
#شعراء_وذاوقين_الشعر_الشعبي
#رائد_ابو_فتيان
#نٌےـوُرَ

.
مجاعة شوگ بيه
وعطش ملگه وطف حنين
وتعب مگيود وسبي
گلي ياحوت شدعيت؟
شدعيت والله سد جوعك نبي
.
.
.
.
#شعراء_وذاوقين_الشعر_الشعبي
#حسين_علي_المطوري
#نٌےـوُرَ

.
انتهت قصتنا ماچانت سعيدة
وغيرك اخذ گلبي الماتريده
أذيتك ماگدرت احچيها للناس
بس مجبور اسولفها بقصيدة
اصعب لحظه من تفارگ چفوف
الروحك بيده
غيرك لازم ايده
.
.
.
.
#شعراء_وذاوقين_الشعر_الشعبي
#سيف_جواد
#نٌےـوُرَ

.
چنتي ع العشاگ اميرة
ورغم كبرچ لكن بعيني زغيرة
هسة راح الصبغ منچ
وبينت شيبات بأطراف الضفيرة
ولو مو طبعي البذائة
لكن اضطريت اوصفچ بالحقيرة
.
.
.
.
#شعراء_وذاوقين_الشعر_الشعبي
#كاظم_اسماعيل_الگاطع
#نٌےـوُرَ

.
هلي بية دروا كمت انا احبك
ودروا بس انت تلفتلي انتباهي
هلي يدرون من تتزاعل وياي
اضل اصرخ رحمتك يا الهي
هلي نشدوني عنك كلت بالروح
ونشدوني اعلى روحي وكلت ما هي

وانت هواي متغير هالايام
والبراسك قروا انا اعرفتهم
نفسهم هم اجوا واتقربولي
ودكوا باب گلبي واطردتهم
لان تقديرك انت فوك على الراس
واحطهم وين انا لو قدرتهم
.
.
.
.
#شعراء_وذواقين_الشعر_الشعبي
#عبدالحسين_الحلفي
#ابو_تراب

• .
شكد كبلك مشوا ما سلوا الروح
ولا بغيابهم كسروا ظهرنا
البعد نيران كبره يبخر الدموع
وبس يزود يتبخر بصرنا
منين نجيب مثلك حتى ننساك
ومنو المثلك يعوضك لو خسرنا
الشبه كل اربعين حجاية تنكال
واذا واحد يصح جان انتظرنا
تعال الجرح جن وما رضى يهيد
وحجينه ويا ما ينفع عذرنا
ويشك روحه اعلى طوله وينكت جروح
وكضينه خيوطنا وملت ابرنا
شوكت يندك علينه ويضحك الباب
ويترس بيتنا و صوتك يسرنا
وترد انت ويجن الرحن وياك
وتجيبه وياك يالماخذ عمرنا
.
.
.
#شعراء_وذواقين_الشعر_الشعبي
#جبار_رشيد
#ابو_تراب

.
ترضاها علية اتأذى من تبعد
زعلتك نعم بس ما جنت اقصد
محتاجك بكد ما قصرت وياك
واتمنى اذا شفت الرساله ترد
.
.
.
.
#شعراء_وذاوقين_الشعر_الشعبي
#حسين_السعيدي
#ابو_تراب

أطالع صورتك بالبيت
ذكرت ايامك و حنيت

أحاچي الصورة و ابجيلك
و اسولفلك و اغنيلك

وحگ فراكك انذليت ..

اخلص الليل بالكوة
ويلي فراكك شسوه

ذكرتك و انهدم حيلي
صفكت ايدي و صحت ويلي

اموت اليوم اذا ما جيت

وحگ فراكك انذليت ...
.
.
.
.
#شعراء_وذاوقين_الشعر_الشعبي
#لبيد_هاني
#نٌےـوُرَ

• .
هاي هية وداعتج لا تستحين
انتي مو اول حبيبة تشكك بسجينها هدوم السنين
انى وين وانتي وين
وليش اوچ واشتكيلج وانى اعرفنج تطفين الحريق بانزين
هو ذنبي لا سكنت ويا اللي جوني
ولا تبعت الراحلين
ولانه خالي و مختلي ومرتاح بالي
ولاني من العاشكين
ومدري ليلي شلون اخلصه
ولا سهرت ويا السهارى
ولاني من النايمين
ولاني عابد و ارتجي الجنة امن اموت
ولاني من الكافرين
اني قصتي وياچ قصة
انكتبت بورقة قديمة وخط حزين
ولو اكوا تأمين ع الحب جان اطالبهم يردولي ولو ربع السنين
.
.
.
.
#شعراء_وذواقين_الشعر_الشعبي
#للكاطع
#ابو_تراب

.
انتهينا
وانتهى
الما ينتهي وخلَّص حجينه
انتهينا
وبقت
كَطرات الوفه المذبوح تتناثر علينه
وبقت
للمجفين كوم اسرار عد روحي الامينه
وكون ندري
بالعتاب يفيد بيهم عاتبينا
وكون يسوون البچي
جا بثنعش ناظر بچينا
غافلونا
وباكَو
العشرة غفل من بين ادينه
وباكَو
من ايد العمر سنتين وبوجهم رضينه
تالي نزعوا شوكَنا من كَلوبهم
وكَالو عوض عنكم لكَينا
تالي سدوا
بابهم من شافوا على الباب اجينا
شكَكَوا مكتوبنا
وبلا خجل ذبوا علينا
تندمينا
جينا
بجنازة عشكَنه المات غفله وأيّسينا
وابتعدنا
بعيد لكن طيفهم ظل يعتنينا
ظلت حجاياتهم عالبال ما چلمة نسينا
ياما لسعتنا الشمس وبفي كَصايبهم غفينا
ياما فيَّضنه الوفه وحطّولنا المهجة سفينه
ياما ذبنه العطش يمهم وبجدح جفهم روينا
تالي نزعو شوكََنا من كَلوبهم
وكَالو عوض عنكم لكَينا
تندمينا
جينا
بجنازة عشكَنه المات غفله وأيّسينا
وابتعدنا
بعيد لكن طيفهم ظل يعتنينا
.
.
.
.
#شعراء_وذاوقين_الشعر_الشعبي
#كاظم_اسماعيل_الگاطع
#نٌےـوُرَ