بما إنك عظيم وتگدر لكل شي
سبحانك بعد ما بي حيل امشي
‏
ما عايش ولا لحظة
منو غيرك يرد الراح
واليخسر منو يعوضه
‏
اجيت استغفرك وأدعيك وأتوضه
واصليلك لحد ماترضى يامولاي
اذا ماترضى .. ما ارضى

نسيتك والتهيت وركزت بالناس
واحد ذبني عالثاني
منو غيرك تلكاني

لوتلتم شياطين الانس والجان
بعد مايهتز ايماني

متندم لان عفتك
هو انه من اذكرك گلبي زين يصير
يعني شلون اذا شفتك

سبحانك يرب سبحان اليوصفك
اعرفك
لو قفلت الدنيا مايفتحها بس چفك

مامرتاح
بس همزين مامرتاح
لو مرتاح ماعرفك

#حسين_السلطاني

خَل يحترم نفسه
ويگُعـد العاگول
هوَّ احنه الورد
بالگوه نشتمه .

‏وَلو يمكُن كلامِي تشوف بي قسوة
‏دَقيقة مِن الدَقايق جنت مَا تسوة .

ولا چنك يگلبي بگلبك النار
ولا چنك ثلج من عاشرت نار
خلص عمر المواسم والنياشين
وظل بس الغنه الصامت والاسرار
نام وصبح الناعور مشلول
لا ماي النهر يصعد للشفاف
ولا بيه حيل يگدر حيل يندار
جان الفرح عدنا طير محبوس
ولگـــــه فرصه وتعلگ بالسما وطار
ولا چنك يگلبي فوگ الارماح
معلگ... خلصت عمرك بالاسفار
ومادامك يگلبي فوك الارماح
ولا عندك حبيبه ولا الك دار
شيفيدك لو تجر كل المواويل
شيفيدك لو تردد كل الاشعار
شيفيد تمر نهر بولايه مهجوره
شيفيد تمر محابس بيد مبتوره
شيفيدك ....؟؟
يا يول
يا كافي يا كَلبي
تظل مثل الارض يوميه إلك دوره
وشمتانيه الروح ...؟
وبعدها متانيه ...؟
واسنين تگضي من العمر
كل ثانيه
واحلام ياخذها الدمع كل مشوار
وبيوت ياخذها المطر كل مشوار
وانت ...؟ !
انت يگلبي تعيش للحين
ولا جنك ثلج ومعاشر النار
آنا وياك خلينا غريبين
سولتنا الجگاير... والصبر زين
وبليل الشته يصير الحزن حار
دافي ياحزن
للفارگ اثنين
صاحبته وشبابه انكتلوا ازغار
آنا وياك خلينا غريبين
نحلم بالحبيبه ... وعتبة الدار
وإذا شفتك يگلبي ... بيوم فرحان
هذا اول عتاب وآخر أنذار
.
#الگاطع

‏يـ الأول .. أجن بعدك أرقام هواي ..
لكن من أعدهن أبدي بـ الأول !
- جبار رشيد

اخذني يمـك بعـد ما ظل كل عـذر لا تعتـذر

#جبار_رشيد

چانت اتگلي ..

اخذ گلبي ينام بحضن گــلبك

#كاظم_خبط

مستغرب تغيرت ؟؟
چآ لو محآفظ علي ؟؟
مو وآصل لـ مرحله
( مآ عيش من دونك )
آنه الي عآرك هله وچلبت بـ متونك
آنه العليه قبل آهلك يحسدونك !!

چَنت اخاف تروح مني
‏والخفت من عندة صّار
‏اني تانيتك لحَد ما
‏زهگ مَني الإنتظار
‏اني قَررت الرحَيل
‏وانتَ لسة بلا قَرار
‏انتَ عَشت بكل خسارة
‏واني عَشت الانتصار
‏اني الك غار الرسَول
‏وانت للحَلوات غار
‏انتَ من شاماتي اسود
‏واني اضوه مَن النهار .

شمس طولك...تناغيلي
هواي شموع يم حسنك تلوليلي
صبرت اعليك حدما دار بيه الحول
حدما كبرن النجمات
والشامة اعله زندك ذيج توميلي

صاحبتي القديمة تزوجت مرتين
و انه البارحة يقنعون بية اخطب ..

من اتعب واحس نفسي ازدواجي
تخلص طاقتي ويبدي
احتياجي
لهدوئك ولحضنتك
ابدي احتاج
الگهوة وعينك يعدلن
مزاجي. ♥️

- عيد مبارك حبايب 🤍

امي لو شافت
غرفتي مخربطة
وحالتها حالة تضوج احسها
الله يعلم هسه لو شافت ضياعي وگلبي
شتسوي بنفسها .؟

يَ مدري شخله بيك الله وصرت تنشم
شفافك شي عظيم ورگبتك اعظم ♥️

السما بعينك شبچ
عوف الاوهام وطير

خلي ايدك بدي لو اموت ما حلك

#سمير_صبيح

البارحه تمنيتك وماجيتني
ومثل كل ليلة احترگ خليتني
وانا واصورك گعدنا بتالي ليل
وعاتبتهن لحد مابجيتني

هسه انت مارايد تجي
خليني اچذب ع خلگ
مو ياهو اليسئلك علي و تگله ماارجعله

الليله حزنچ شاط بيه
وجرني من سباح گلبي
بيه شعواط وحريجه ونار و ازود
الليله مامرتاح كلش
مدري شنهي بصدري
جاي يخرخش اسود
.
#محمد_لفته_العماري