هوه يخفگ عله الشباچ
يفكلي الستاير ولحچي البي شوگ
هوه حار وجرح مفتوگ ..
وأنا مكابر وطيني عناد
وبگلبي نخل محروگ
هوه ماعرفه من ياباب !

#كريم_حاشوش

شسوّي اذا هبريح وسط اخوه عدوان
وتجلي وچتل مطلوب والخلفه نسوان

‏أدوسن فوگ جرحي والچم الملچوم
‏و أخلي الساكنات لربهن يشغرن
‏و ألتج للمكابر على أعناد الضيم
‏و الگاهن وياي يگومن يگعدن


‏#عطا_السعيدي

بس ساعدني اريدك تحچي وياي
ما اگدر ابادر تدري بيه
احچي وياي كلمة وعوفني وروح
احبك گلي والباقي علية ..

اني ضامنها جهنم من وراك
لأن ما يوم وطلب رديتلك
گتلي غنيلي بمحرم ما رضيت
گتلي ازعل .. للصبح غنيتلك

ليش من خنتيني گلتي بسرعه خنتك
عاد حني
عاد من اگعد واعاتب تطلع نصدگهه كلمة يلا صنتك
< والآن > .. جاي ادور وحدة نفس اسمچ واحبها
لان هم صارت قديمة على اسم اللي تحبها تسمي بنتك
حتى ما تغلط بإسم وحدة اجتّك من ردتها
< تزوجت التي تُشابه إسمكِ >
و ردت اقارن
جربت بالطول مالتها فقط شعرة بوسط شعرچ شفتها
< عدتُ الى ابياتي القديمة المُتناثرة
لم أرى أيّ قصور في كلماتي >
وشگد كتبت لعينچ المستحية
وكل الربع حسبالهم ميتلي اخو من گلتي احب اللحية
بس تعالي وشوفي بيتي اتمعني بحيطاني
كاتب بوجهي المقابل والقصايد لاهلي ما حاچيها
اخاف
ليش من شفتچ طلع ديواني !
واني بعد غياب وجهچ
وجهي ما اكدر اطيقه
چنت احبچ بالخيال وبالحقيقة
الدنيا لعبة وحيلي بعدچ مااتراهم ويّ فريقه
هسه راح امسحها كلها
خذت شور العقل مالي شبيها خليها لرجلها
بالجسم وبكثرة انتي .. نعوف دمي
< اصبحتُ اضحك كثيراً اكثر من سقف بيتنا الذي وعدنا بالسقوط
منذ ان مطرت على محصول يوزرسيف >
اتفاجئت عمتچ علية علية
واقصد امي
تشوفني اكتبلچ قصايد
تجي تگلي مالي ايديك
اليكتب لعينچ قصيده ينتظر مدح امرؤ القيس ويگله الله عليك

- ذوالفقار العتابي

اگلب الدنيا عليها وفوگها
اني اغارن من حجلها لطوگها
غيرتي تخليني اشك بالناس هاي
اتخيل الوياها يحچي يبوگها
ومن تگلي رايده للسوگ اروح
بودي اعزّل منطقتها وسوگها ♥️

- علي النورس

اريد افهم دفهمونه
خسرناكم خسرتونه ؟

ياهو البينه ضل مرتاح ياهوا النامت اعيونه
انتم احنه حاجونه ؟
ياهو البينه صب ادموع
ياهو الضحكت اسنونه ؟

#علي_البديري

حبنيّ واجبرني أعلة حُبك
الروح ما تعشگ لون ما تنجبر

#جبار_رشيد

مثل كل يوم ارد تعبان
واشمر روحي بـفراشي
ويلوليلي التعب واغفة
مثل كل يوم اگول الدنية ماتسوة
من طفو جگايرهم على گليبي ضحكتلهم
دنية تريد ناس اگبالهة يضحكون
يحوكون الجروح احروف ويغنون
يصبون الحزن بالكاس ويسكرون
اضحك حـــيل
اضحك حيل اخر هـ الطريج اتراااب
اخر هـ الركاض اتراااب
ياعابر سبيل اتراااب
يبنادم تراك ايام
والدنيا جسر ويعبرن يعبرن
يدنيا احنه بعدنة ازغار بس اهدومنة الكبرن
بس اهمومنه الكبرن
بعد بينة لعب وركاض مدري لوين
مدري لياحضن ياعين
دگ باب الله يبنادم
تدك ياباب

#سيد_سعيد_الشريفي

مو كلمن ضحكلك منه ترتاح
ترة ناب الضبع كل ضحكة ينحد
ولا تحقد على كلمن يبجيك
إذا دمعك طفح صدگني تبرد
البشر دلة ويفور بداخلة الضيم
إذا يطفح دمع نيرانه تخمد
لا تحزن على الصعدو بلا جناح
معروف الصگر لو جنحه ينشد
مو كلمن نزل يتسمى مذلول
ولا كلمن صعد يتسمى امجد
اكو صاعد رغم ماهو عالگاع
واكو نازل يضل لو قمة يصعد
راسك منتصب اعله من الايدين
بس من السهل تتناوش اليد
إذا عندك جبل خلهم يصعدون
فرق بين الصعد والراد يصعد
اكو يهدة الجبل لو هد الجفوف
واكو يهد الجبل لو جفة ينهد
وعلى المبرد كفر تنغر السيوف
لأن سيف على سيف بگلبي ينحد
وإذا عنهم رحل كلهم يخسرون
شنو نفع السيوف بلية مبرد
وما يرحل جذب مو خاف يعمون
ويضل السيف تالي بگصبة ينصد
إذا تعزف لحن ويذمك إنسان
لا تگطع كمانك صعبة ينشد
مرات اللحن ما يطرب الناس
ومرات البشر ذاناته تنسد
ومرات اللحن تطربله طرشان
بس طبع اليسمعك زور يشهد
على البلبل يگلك منكر الصوت
وإذا ينهك حمارة يگول غرد
إذا حجيك حكم وتخاطب الناس
كل راس على كدة وياك ينشد
لأن روس البشر عكس الفراغات
كلما تنترس تستوعب أزيد
وإذا تحجي ويرد صوتك كما كان
يعني اليستمع فارغ مجرد
صوتك ما يردة الراسة متروس
لان بس بالفراغ الصوت يرتد
وإذا ضيمك كبر لا تحجب العين
وتشوف الدنيا كلها بلون اسود
منو بهذا الوكت ما غيره الضيم
حتى بيوم الأحد ماكو احد

#نائل_المظفرب

تره أحساس الورد بس النده يقدره
أطيح أمن السمه ولاطيح من العين
أجبر أعظامي
بس تقديري شيجبره ؟ . .


#حسين_السيد_نور

إذكروك وجدح حزني
وشتعل بيدر سنابل حدر صدري

وصرخ بعيوني الضباب
وباب باب تخلخلن بيبان عمري

وكون تدري
الحچي الماعابر شفافي يگودني لــ حسنك رهينه

وكون تدري
شوغة متيهين روحي
وانته خصرك چان شطـيـن ومدينه

ومـاهي هينه
اَي وحگ ثنية گذلتك مـاهي هينه

ليـلك إيچمل الخساره عناد نثيه وخلگي طيف
لا عثرله بجفن يسوه ولا حضه بجرفين عينه

انه حسبالي شكو واحد ترف گلبه فطير
انه وين ادريبك أدور ضحكتك

رافگتني ،، وغربتني
ومثل ضيعة مالت الله ضيعتني

آآآخ يافشلة قسمتي الحالها حال السفن
شحصلت من ماي البحر
طول السفر يابس گلبها

ياوليد الندى بسك
لا تخيط جرحي بحبال الشمس

الضمه تناوش أيامي ومالي بالوادم مطر
كافي انخاك اعله گطره وشامتك فزعة نهر

كافي گلبي يمشي بدروبك ذليل
بارده اثياب اليالي
وچنها حضنك دوم ماضمت دخيل

من يمرني اسمك أضيع بين چويات الشوارع
وشكو ولاية اگبل عليها أبلا هلا تتلگه جدمي
.
#ناصر_البدري

اليمشي ويه اليحبه وايده بالجيب
مو بردان، بس ما شايل فلوس

- علي الشمري

هاي الليلة مُو تعبَان متشَضي
هاي الليلة إذا ما تگضي آنة أگضي ..

كـِٰارهّ بيتنهَ الـ ما تـِٰارسـهُ بطِولك ..
وخلصّو نـِٰاسي گِد ما فدوَّه راحِولك !

#علي_مهدي

احبهم سكته بس ما راح اگلهم
لان ما تنعرف ردة فعلهم
قبلهم جربت ولهسه مكسور
شنو اليثبتلي مو نفس القبلهم
واذا بس بالتجارب نعرف الناس
يعني شلون اجرب الناس كلهم ؟

- حسين السلطاني