عايفه ابنادم حنين لهسه حِلفانه " وغلاتچ " …

- زين كريم

تگله :
اتنسه اعله وجهك ارد اشوفك
تجي لو بالطفل تطلع حروفك ؟

- اياد عبدالله .

هاي الناس شلون تنام وتهوّد
وتسحب ايدها من انسان
عليها هواي متعود !

- علي مهدي

هو اني صح مختنگ
بس والله اشتمك
من عمت عيني وعلي چي ما نمت يمك ♥️

- اياد عبدالله .

ليش ضيَعت التريده ؟
شبيك تايه مدري وين
شبيك شارد من قصيدة وترجع تطيح بقصيدة ؟
وين سارح ؟ چنك مضيع عمر
كاعد انتَ وحزنك الما ينتهي
بگهوة بعيدة ..

- النواب ..

يوم اصلي
وعشره اموتن عالطرب
ساعه اغني
وساعه بين عيوني رب
نوب تلگه بروحي راحه
نوب موسم للكرب
مره احب الدنيا وأعشگ
ومره احس يومي گَرب ..

انتَ لو تدري الهوى
مسمي بـ أسمك ما عفتني .
يـ الغشيم الوادم إمدورتني بـ الظلمه ولگتني .
وانه حارگ روحي إلك
خاطر تشوف
وما شفتني ..

- مرتضى الغرباوي .

اجيتك صاحي بس رديت تعبان
اعَمَه ولا بيدي عصّة ولا اكو بيبان
فرق ما بين جيتي وجيتك هواي
برغم مامش فرق بإنسان وانسان
گتلك وينه بيتك ؟ گتلي مبيوع
گتلك ذاك بيتك .. گتلي لا چان
ومن گتلي ارد امرك گتلك الله
هلة وميَّة هلا ما حاط بيبان
عاتبتك ولك لا تنطي مگفاك
واذا بية غلط چا گلي غلطان
واذا ندمان مخطي ومستحي تگول
عمي آنه بمچانك حيل ندمان
گتلك لا تحبني مثِّل الدور
مثّل من تشوف فلان وفلان

طيوفك ودّعن عيني ويفلان
وچفوفك يم شعر شامت ويفلان
حرام اعليك تتمشي ويه افلان
وتعوف فلان يتمضحك علية

- اياد عبدالله الاسدي .

بعد مااگول عبرت وصلت الحد
وبنيت ابيّن روحي وبينهم سد
واضح الاختلاف ابّين الگلوب
وگلبهم من بعيد مبيّن اسود
گضت وجروح گلبي احسبهن حساب
وعله گد الفعل من يرجع الرد
يحترگون وآنه الامنع الماي
واتفرج وجائز گلبي يبرد
الاخضر واليبس والزين والشين
ماحاسب حساب شلون واشگد
صداقة وبالسجن بس اعبر الباب
لا ارجع ولا اشتاق لأحد ..

- مهند العزاوي .

متفقين طلعوا بالعتب شلي
على اطراف اصابعهم من مشوا بهداي
شلون المحترگ لمّن دوه يخلي
اتحملت البرد مو حطب ما ويّاي
النار الـ بالحرب دخانها يدلّي
الأكبر مني حفرولي وطحت .. معذور
الشك عابرهم يخافون الي بحلّي
بس هو المعزّب من تعوفه النار
من بين الحصو يطلّعها ويهلّي
السهم من لاحني چان اليدنگ عيب
ولو مهتم بصحتي امدنگ احسنلي
العمر سلعة مزاد شما نجيب فلوس
يجي ملك الارواح گبالنه يعلّي
وتعرف ليش گتلك بالعتب شلّي ؟
غلب والما يدور مصلحة يجامل
سلع فرشوني والما يشتري يعامل
التكتلك من التضمهم بوكت الضيج
بطگتك يا جدمهم نگلة الحامل
ساكت من حچوا مو ضعف .. لا والله
دوم البي نقص يشتكي من الكامل
اجيهم شرف باكر زلغ ما مزلوغ
وارد منهم معقچ شطفة عد عامل
گالوا ظهرك نكسره ونهظت السان
تعبوا واللسن مامش عظم عدهن
بعد طاح الصلح لو بالحبال اعناد
العگدوا فالهن والفلّوا اعگدهن
الطوال الما تلوح لروسهن نيشان
وكت اطراگهن بصفاحهن طگهن ..

- رضا العبادي .

سمعونا شي على ذوقكم 👇🏻

وتاليها جابولي الخبر
گالوا يگول آني اعتذر مو هيه نصي الثاني ..

واستثگلت حرفي برگبتك
چا وذمتي ؟ ياهو يتحمل ذنبهه ؟
اسمي من ينجاب يمك گمت تنغث !
واني الاغنية السمعناها گبل سنتين
ما اگدر املهه
واعرفت قَلت معزتي من مشاكلنه طرف ثالث يحلهه
واني تعبان بعگد هاي الظفاير
ليش غيري الي يحلهه ؟
وأيست من صوتي ما فزز حنينك وآني باچي
ردت ألوذ بشعرك من الناس وحرورة شمسنه
الله لو صاير تراچي ..

- كرار حيدر

معقولة غيري گدر يهتم بـ التريده ؟
معقوله من تنجرح بيدك يجيك الصبح
صاير جرح بيده ؟!

- رضا العبادي .

عيشتني بكل سلام وكلمن ايحب الـ هله
كلها مو حلوة بعيوني وطيفك الميت حله ..

- عباس الغالبي .

یااول اعدک من اعد اعزاز
انت بیا مچان تحطني من تعد ؟؟

صادق الصافي

من گتلكَ عيونكَ غاليات هواي
تغمَضهن گمّت كلما تلاگيني ..!

يچذبني
و اچذّبه
و بالعشگ نحلف
و فنَّه الگال احبك دون ما يرجف