شعِفت بية وصرت منك ؟
أشو فَجأة وشكو أُغنية صَفت عَنك .

چانت غيبتك كلفه
وجع شلعة الأضفر من درت مگفاك
جرحك محد يوصفه
وانا خلافك گبر چتال
محد يگعد بصفه .

خليناك وحدك من اجه الليل
شردنه وعفنه طولك بيد دفان
بچينه وعيب گالوا تبچي الرجال
وبچينالك لحد ما صرنه نسوان ..

- رائد ابو فتيان

المهم رديت بس مغورگة عيوني
رجعت احضن حياطيني
رجعت وروحي توجعني
واحس بس غرفتي التگدر تواسيني ،
بچيت من المخده لآخر أحلامي
لحدما غوّشت عيني ..

إرجع وشوف الفرق
حتى إهتمامي اختلف ما اعرف شبية ..
هيچ وصرت مو مهم ؟
وعندك فراگي طلع ميكلّف اغنية ؟ ..
و شتريد مني بعد
غيرت كل الچنت ما حابهن بية ..

ردت تخلص مني ڪوة
وانـه متحمل عشرتك
رغم چـانت حيل مرة
درهمك لمن شمرته
ڪتـلي إذا (ڪتبه) أحبك ،
وهو اصلاً درهمك
" وجهين طرة "

- مجتبى التميمي .

كلشي بارد
حته ملگاكم
رسايلكم
حچيكم
ما چواني
و آنه شايلكم چنت مَاي بُصواني ..

شنهو الأغلى مني
وترس عينك هيچ ؟
وبهالسرعه تنساني
حواجب چنه آنه وياك
واحد يشبه الثاني !

الليله كل شوغات روحي
وكل بواچيها وحزنها
إلتمن بصدري وذكرتك
شلون اقنعهن خسرتك ؟!

عايفه ابنادم حنين لهسه حِلفانه " وغلاتچ " …

- زين كريم

تگله :
اتنسه اعله وجهك ارد اشوفك
تجي لو بالطفل تطلع حروفك ؟

- اياد عبدالله .

هاي الناس شلون تنام وتهوّد
وتسحب ايدها من انسان
عليها هواي متعود !

- علي مهدي

هو اني صح مختنگ
بس والله اشتمك
من عمت عيني وعلي چي ما نمت يمك ♥️

- اياد عبدالله .

ليش ضيَعت التريده ؟
شبيك تايه مدري وين
شبيك شارد من قصيدة وترجع تطيح بقصيدة ؟
وين سارح ؟ چنك مضيع عمر
كاعد انتَ وحزنك الما ينتهي
بگهوة بعيدة ..

- النواب ..

يوم اصلي
وعشره اموتن عالطرب
ساعه اغني
وساعه بين عيوني رب
نوب تلگه بروحي راحه
نوب موسم للكرب
مره احب الدنيا وأعشگ
ومره احس يومي گَرب ..

انتَ لو تدري الهوى
مسمي بـ أسمك ما عفتني .
يـ الغشيم الوادم إمدورتني بـ الظلمه ولگتني .
وانه حارگ روحي إلك
خاطر تشوف
وما شفتني ..

- مرتضى الغرباوي .

اجيتك صاحي بس رديت تعبان
اعَمَه ولا بيدي عصّة ولا اكو بيبان
فرق ما بين جيتي وجيتك هواي
برغم مامش فرق بإنسان وانسان
گتلك وينه بيتك ؟ گتلي مبيوع
گتلك ذاك بيتك .. گتلي لا چان
ومن گتلي ارد امرك گتلك الله
هلة وميَّة هلا ما حاط بيبان
عاتبتك ولك لا تنطي مگفاك
واذا بية غلط چا گلي غلطان
واذا ندمان مخطي ومستحي تگول
عمي آنه بمچانك حيل ندمان
گتلك لا تحبني مثِّل الدور
مثّل من تشوف فلان وفلان

طيوفك ودّعن عيني ويفلان
وچفوفك يم شعر شامت ويفلان
حرام اعليك تتمشي ويه افلان
وتعوف فلان يتمضحك علية

- اياد عبدالله الاسدي .

بعد مااگول عبرت وصلت الحد
وبنيت ابيّن روحي وبينهم سد
واضح الاختلاف ابّين الگلوب
وگلبهم من بعيد مبيّن اسود
گضت وجروح گلبي احسبهن حساب
وعله گد الفعل من يرجع الرد
يحترگون وآنه الامنع الماي
واتفرج وجائز گلبي يبرد
الاخضر واليبس والزين والشين
ماحاسب حساب شلون واشگد
صداقة وبالسجن بس اعبر الباب
لا ارجع ولا اشتاق لأحد ..

- مهند العزاوي .

متفقين طلعوا بالعتب شلي
على اطراف اصابعهم من مشوا بهداي
شلون المحترگ لمّن دوه يخلي
اتحملت البرد مو حطب ما ويّاي
النار الـ بالحرب دخانها يدلّي
الأكبر مني حفرولي وطحت .. معذور
الشك عابرهم يخافون الي بحلّي
بس هو المعزّب من تعوفه النار
من بين الحصو يطلّعها ويهلّي
السهم من لاحني چان اليدنگ عيب
ولو مهتم بصحتي امدنگ احسنلي
العمر سلعة مزاد شما نجيب فلوس
يجي ملك الارواح گبالنه يعلّي
وتعرف ليش گتلك بالعتب شلّي ؟
غلب والما يدور مصلحة يجامل
سلع فرشوني والما يشتري يعامل
التكتلك من التضمهم بوكت الضيج
بطگتك يا جدمهم نگلة الحامل
ساكت من حچوا مو ضعف .. لا والله
دوم البي نقص يشتكي من الكامل
اجيهم شرف باكر زلغ ما مزلوغ
وارد منهم معقچ شطفة عد عامل
گالوا ظهرك نكسره ونهظت السان
تعبوا واللسن مامش عظم عدهن
بعد طاح الصلح لو بالحبال اعناد
العگدوا فالهن والفلّوا اعگدهن
الطوال الما تلوح لروسهن نيشان
وكت اطراگهن بصفاحهن طگهن ..

- رضا العبادي .