يااخي گتلك اريدك عمر مو جهك تديره ..

ماعندي عزة نفس
خليتك اتدخلت بسوالفي ولبسي
وشتريد مني بعد ؟
من عيرتني گبل مو طورّت نفسي ..

- رضا العبادي

شو خُملي اليحبونك
من عندي هم يحصل بشر ؟
اتلوچ بية واسئك
خوما متعب سنونك ..

حسين العجيلي ..

ما عاتبت خاف العتاب يقهرك
واسهرلك واني ادري غيري مسهرك ..

شعِفت بية وصرت منك ؟
أشو فَجأة وشكو أُغنية صَفت عَنك .

چانت غيبتك كلفه
وجع شلعة الأضفر من درت مگفاك
جرحك محد يوصفه
وانا خلافك گبر چتال
محد يگعد بصفه .

خليناك وحدك من اجه الليل
شردنه وعفنه طولك بيد دفان
بچينه وعيب گالوا تبچي الرجال
وبچينالك لحد ما صرنه نسوان ..

- رائد ابو فتيان

المهم رديت بس مغورگة عيوني
رجعت احضن حياطيني
رجعت وروحي توجعني
واحس بس غرفتي التگدر تواسيني ،
بچيت من المخده لآخر أحلامي
لحدما غوّشت عيني ..

إرجع وشوف الفرق
حتى إهتمامي اختلف ما اعرف شبية ..
هيچ وصرت مو مهم ؟
وعندك فراگي طلع ميكلّف اغنية ؟ ..
و شتريد مني بعد
غيرت كل الچنت ما حابهن بية ..

ردت تخلص مني ڪوة
وانـه متحمل عشرتك
رغم چـانت حيل مرة
درهمك لمن شمرته
ڪتـلي إذا (ڪتبه) أحبك ،
وهو اصلاً درهمك
" وجهين طرة "

- مجتبى التميمي .

كلشي بارد
حته ملگاكم
رسايلكم
حچيكم
ما چواني
و آنه شايلكم چنت مَاي بُصواني ..

شنهو الأغلى مني
وترس عينك هيچ ؟
وبهالسرعه تنساني
حواجب چنه آنه وياك
واحد يشبه الثاني !

الليله كل شوغات روحي
وكل بواچيها وحزنها
إلتمن بصدري وذكرتك
شلون اقنعهن خسرتك ؟!

عايفه ابنادم حنين لهسه حِلفانه " وغلاتچ " …

- زين كريم

تگله :
اتنسه اعله وجهك ارد اشوفك
تجي لو بالطفل تطلع حروفك ؟

- اياد عبدالله .

هاي الناس شلون تنام وتهوّد
وتسحب ايدها من انسان
عليها هواي متعود !

- علي مهدي

هو اني صح مختنگ
بس والله اشتمك
من عمت عيني وعلي چي ما نمت يمك ♥️

- اياد عبدالله .

ليش ضيَعت التريده ؟
شبيك تايه مدري وين
شبيك شارد من قصيدة وترجع تطيح بقصيدة ؟
وين سارح ؟ چنك مضيع عمر
كاعد انتَ وحزنك الما ينتهي
بگهوة بعيدة ..

- النواب ..