اذا تزعل وما ودّوا على مراضاك
هنانه تقيس نفسك غالي .. مو غالي

- سعد شميّل

تجبرني اعيرك بالمضن
بس تطغي اعيرك بالمضن
ترچية بإذنك خلهه
الشامة الحدر هدمك شرط
من وره هدومك عندي قدرة اندلهه
العِشرة العگدناها بعمر
لازم اليوم نفلهه ..

- رضا العبادي

والله تعبني السهر خلوني انام
الشوارع فارغة وراسي ازدحام
احنه لو متخاربين احسنلي عاد
ولا علاقتنه تظل بس السلام
وصدفة نتلاگة غريبين ونروح
چَنه ما نعرف بعض والله حرام 💔

- زيد السومري .

گوة دبّرت الحلم
تگرصني ليش 💔

موضوع وخلص إلمن تعيده
مال نرد سوة كلش بعيده
خايف من فشلتك ؟
عادي والله
گلهم باس إيدي وما اريده
حِبلك غير واحد عندك هواي
واتصور شغلتك مو جديدة ..

شحصلت منك
مختنگ
من يمته ما ضاحك صدگ
والله راح ابقى احترگ منا لحد مااجرحك
حالف اسوي وياك وحدة بـ وحدة
حالف اوصلك مرحلة المطلوب دم تحسده
بيمن اذكرك ؟ من غبت
خليتني بس التفت مثل اليطيح بشدة
وخليتني ساعة رمل كل الاوكات اتبده

- احمد عاشور .

شناقصني واكسر خاطرك يمتى تعود
لو تدري جسمي شلون يهتز وينود
وداعت عيوني الراح ياكلهن .. لا
هنه بغيابك بعد يرغبهن دود ؟!

- حسين السلطاني .

امس ما رحت من بالي
امس ويّ كلشي گمت الگاك
بـ ضحكتي بـ دمعي بـ اخيالي
امس لو جايني كتال
اصيحن هلا بـ كتالي ..

- احمد المولى .

اي وعلي ..