وعلي مشتاقلك وارد اعرف اخبارك
ردلي شچم دقيقة انوب نتعارك
باوع حالتي بيناتنه العباس
على دفني ١٢ دفان يتشارك 💔

- علي مجبل .

أنه الـ من طِحت گبل النعـمةَ شـآلك
و أنه الما مرّة غـنة وما بچالك ..

- ايهاب عيال .

لو يوگعونك هوى
بالشم أشيلك ♥️

بس آني مثل التَعَب،
ولو ضاع تعبَك تره ما تگدر تدَوره .

تذكر من گلتلي ادخيلك وفزيت
گلتلك بس تعال وترد بالجابك
واجيت ودم ابوي اعله الملابس چان
وگلت لاهلي عرگ حمال بثيابك 💔

- علي ابو نؤاس .

بعد ما بينه شوگ ولا محنه
ولا واحد وصلنه ولا تدنه
گبل قرآن چان يردنه للبيت
وهسه نرد سكاره لبيت اهلنه

- منتظر الشاووشي .

فزيت ولگيت الدم على ثيابي
گلت هذا منو المذبوح

شمدريني العطر بي روح !

- حيدر الطفيلي .

شأمل منك ؟
يَـ چنك سالفة شيّاب
يَـ چنك كل قصيدة غزل للنواب
يَـ ريحة رشّة الحيطان
يَـ بو عيون الفِشل تنعاب ♥️

و مو كل فرح بي صَفگ
العريس حنته بچي
الـ ما صاير لـ خلّه ..

- حسام الحمزاوي .

تلمست الجرح بالليل
واليم الضوه اتدنيت
ردت اعرف نتل لو شگ
سمعت الروح ونّت بيه
كاغد منتهي ملزّگ
وياهو ايصرف الملزّگ ؟!
تگاطيع وصبر مابيه
گبل ماجيسه يتشگگ
وانه گلبي شكر بالليل لاحه الماي
واعرف من اريد انطيه
لو ينطحن لو يندگ 💔

- محسن الخياط .

آنه متعلّم عليك هواي ، يا سولة سكتّي ♥️

عايفني يَـ المشتاگلك
وتهمني يَـ الماهمك
وين الله واحلم بالعطر
الـ تحطه حتى اشتمك ..

- مهند العزاوي .

ظلت عليك ؟ ازعل واذا ما تزعل
يومية جاي تعيد هذا المقتل
اصلاً گطعتك مثل گطع التدخين
يرجع الدم بوجهي لمّن ترحل ..
ربك انطاني چفوف بس للتوديع
ماعندي ادين تچلب وتتوسل ..

مهيمن الامين .

وانت تدري
وگعة المثلي چبيرة
سألوا فراگيش ؟ گلت فراگ ديرة
گالوا نشيلك ؟ گلت بس بهداوة
مثل اليشيلون جام
ابدوا بضلوعي الچبيرة
عيني شيلوها برسالة
چفوفي شيلوها بـ ظفيرة
والاحسن
تعوفوني واگع
الوگعة راي ، الوگفة حيرة .. 💔

بسبب هذا البرود البيك
علاقتنا نهيناها
مثل ما اني ناسي الصار
انت اتقوّه وانساها
ولتدزلي رسايل بيها حاچي هواي
ماعندي خلگ اگعد واقراها ..

نحبكم نبتلي
نفارگكم نموت
شنسوي وعلي حرنه بأمرنه
كرّهتونه بالحب واليحبون
شنو نتراضه لو نرجع لاهلنا ؟ 💔

اسهر مو غشيم ادري السهر مو زين
بس المشكلة شما تعتقد صعبه
اذا كسرة بفراشك ما تِعَرف تنام
شلون تنام عينه الكسرته بگلبه ! ..

ما تنحل ابد هالقصة عقده
وقبل لا نبتدي خلينه اصحاب
موضوع العشگ لازم نسده
يا بنت المُلك عوفي ابن الايجار
تره والله ما اعيشچ مِسعدة
ما متعود اعشگ بنت القصور
جديدة السالفة وتحتاج مُدة
اكبر من غرفتي عيونچ وساع
وانه انسان عافيته اعله گده
آنه بجيبي خردة تكفي باكيت
وابوچ الشده عنده حساب خردة
انتي مخدتچ متروسة احلام
واني دموع تارسها المخدة
انتي بغرفة وحدچ من تنامين
وآنه واهلي كلنه بغرفة وحدة
وحت شباچكم كله سنادين
وفوگ الجام هم تلاگي وردة
وانه شباچنه بـ گونية مرگوم
لحد الآن ما لامحله برده
فرق بالخده شايف بس الدموع
والخُده وخَدر بان اعله خده

گلبي وچف ابوي وحايط الدار
كلها امفطرة وفطورها كبار
ارجعي لـ جنتچ عوفيها للنار
وانهيها العلاقة بكل مودة 💔

- مصطفى النعيمي .

الناوي يروح لو تسجدله هم يروح
عوفه براحته " فدوة ابقى " لتگله
و الزم دمعتك وفّرها لليسوون
لا تصرف دمع للجاي يتسلّه
مو شرط الجريمة أثر دم وسلاح
اليلعب ع المشاعر بشر كاتلّه ..