لم جرحك ابروحك والكسر هين
ابنادم موغميج السالفه تبين

أمـجـد الـدراجـي

حلم عمـيان ضميت الرسايـل شـوف
من شحت مكاتيبـك

عباس جثير

يُقال أن رسائل الليل صادقة ..
اتركوا هُنـا رسائل ضلَّت طريقها للمقصود🖤

ماسامـحك
معاتب الويـنك يغثني

ناصر البدري

انه الخواف يا دنيا..
وحال المبتلي
حالي..
اعبر ع النهر عطشان والمي مو على بالي

الكاطع

-لمن تشح كل المراسيل'
ومن تلگه وجه
( أصحابك) ثگيل..
ساعتها لم كل التواسيل؟
وإندار لا تلتفت مرة
موش أنتَ المرخص العشرة
أنتَ النفس گوة تجرة!
وضيمك بگلبك والحزن بير
والگلب خاينته (النواطير )
مو فرهدوك! وعاشو بخير.

هــاي الدنيا صفنة بوب ..
هنياله الـ لـگالـه چفوف

هنياله الـ شتل روحه ضريح
و حظى بـ ناس أطوف

جواد زغير

اول مرة اجيب عيوني للضيم
اول مرة اكسـر واهـس الغيـم

اول مرة اجـر بروحي لهناك !
مـو انا التگله "فلان يـسواك"

اول مرة اوصِّـل وجهي للگاع
و انت منين ما تندار .. تنباع !

اول مرة ابچي و اعبر الـ "عيب"
اول مرة يوصل دمعي للشيب

اول مرة روحي تغثها الـ "شبيچ"
اول مرة ابـوس ايـد الشبابيچ

اول مـرة اثگـل ع العـواذل
ثگل كلمة "اكرهك" بالرسايل

اول مرة اگود الطيف للراس
اول مرة اكسر خاطر الناس

اول مرة گلبي يكضني بـيده
القصيدة الماتجيبك مو قصيدة

اول مرة احط گلبي اعله متني
اول مرة احـس مـحد يحبني

اول مرة ارضى عيوني يبچن
اول مرة اتيّه گلبي عد مَن !

اول مرة انـدم لمـن اشـتاگ
اول مرة هيچ يذلني الفراگ

اول مرة احس تكرهني الگلوب
اول مرة احس بروحي مغلوب

اول مرة ياكـل گلبـي الِـعـناد
واشبع من تطيح دموعي ع الزاد