لاغايب واگولن باچر تعود

ولا مصيوب وارجى يطيب الـ صواب

ولا بيّه اعله بعدك وأگدر انساك

ولا بيك وتجيني اويه الهوى الهاب

ودّيلي بقميصك خيط بيه روح

مرّات الـ قميص يجيب غيّاب

مضيعك والسچچ والوادم تعيل

والـ مضيعك ذليل وبيش ينهاب

وحگ الـ غمضن من شافن الـموت

اخاف أحچي وتگول الـ ناس چذاب

انه بيوم شال النعش لـ اليوم

عين أبچيك بيها وعين عـ الباب

وانه ادري القدر لو صار مكتوب

ولـدنيا ولغزها اسباب واسباب

ليش الموت متغيّر هالايام

يضحك لـ الچبير وياخذ الشاب

بسّك ياقهر ياموت يا ليش

حلاتك ياذنب لو صاحبك تاب

وحلاتك يادمع للفاگد متاع

لو من مشتهاتك صار العتاب

چا هيّ الگبور گبور لو غَير
شـ نهي العطلاكم ها يالاحباب .. .

__ ضرغام لطيف

يجي يوم وترد تجمع شكو مكتوب شگيته
وترد تندم على كل ثوب عفته وما اشتميته
وتبچي ومحد يشوفك
وحتى چفوفك تعوفك
وترد ندمان .. بس بعديش؟
باب عيوني سديته .

وأنه گلبي
متاع لكل غريب مسافر لـ حلمه
وحزن للمشتهي يبچي
أنه گلبي من اشوغن ما يدگ يحچي