_بعد
چم " ليش " وأعتگ وأعبر بلوني

_وبعد
چم "كون " وأذبل وأشرب ضنوني

_ وبعد
چم " أخ " وأطفه ويعتلگ لليل خيط بطارف عيوني !

#ضرغام لطيف

خلني
راكِــد

عيشتي
وطيني اعله گدّي
وعايش اويَه الناس زايد ..


#ضرغام_لطيف

_ ليل
يگطفني
اعله ليل ومايجون

#ضرغام_لطيف

بيا ضريح
يعود لـ الله أنشغ واطلبك ؟!

#ضرغام_لطيف

ماتنگالي شلونك
مدري شلوني بدونك
.
#ضرغام_لطيف

شـلگو بيّه
ورضو عَني
نذر لذنوبهم كلّها
شـلگو بيّه
وخذوني متاع متعافين
زايد والدروب تريدني أندلها
شـلگو بيّه
وتمنّوني جنح لحمولهم كلها
وانه روحي عذر خطّار مدري شلون شايلها !
.
#ضرغام_لطيف

وأفز
مثل الـ يدور ثار
أجيكـ امن الحنين اركض!
يـ شوغاتي
شـ بعد وتفض
.
#ضرغام_لطيف

ورد
چذاب
مو وكتك
والـ بروحك
حچي مصفط

يَچذاب
اليگول الـ بيه
من أول سالفه ويفحط
يَه چذاب الحزن يشحط
يَه چذاب الهظم عيّال لو ملچوم تتحنط
.
#ضرغام_لطيف

_اخ كون اعرف شـسمهن
ذَني الـ بصدري غفن ؟!

واخ كون اعرف عيوني
شـ ناطرات وماعمن

يا ولچ يا ليش يا روحي
شـ بديه وماصرتلچ ؟!

يحترگ ينشال صاحب
يطفه ينداس الـ تتن
.
#ضرغام_لطيف

ليل يگطفني
اعله ليل ومايجون

#ضرغام_لطيف

كل هذا الزحام التارس عيونك
كل هذا الحچي المخنوگ بعيونك
كل هذا الحزن مضموم بعيونك
كل هذا الهظم والخوف والشوغات
وبعدهن ماطفن ويشوفن عيونك
يابو دموع الصدگ والأخ كترين
اعله هيچ عيون خيعونك
.
#ضرغام_لطيف

چنت
اطير وتبرگ عيوني
قصايد واخفگ ملاگي ال مطر
وچنت اجيس الدنيا كلها
وتارس جيوبي شواطي
وناس حلوه وليل و ولايه وگمر
وچنت أغني لكل حزن يكبر بروحي
لكل خريف يلوحني اتخوصر شجر !
وچنت
أگول اگدر وافارك واضحك اگبال الصور
وچنت اگول اگدر واسافر ..
وانته جيت
وچنت أگول اگدر واسافر ..
عرضَن عيونك واجيت
وچنت
اگول اگدر واسافر .. .
غربة عيونك خَذَتني
وشرّبتني اسم الغريب وما گدرت اعله السفر
اخ كون يشوف گلبي
ال غمّض گبالك نسه عيونه وعثر
.
#ضرغام_لطيف

ااخ وشـ بيدي اعله جفنـّي
شـَگد طبــُگ مالاح طيفـِك

#ضرغام_لطيف

هذا .. .
الـ مايلوحه الليل
يتباهى بكحل عينه

وهذا
الـ ماتجيسه الاخ مايحسب نِياشينه

ولا يدري الـ سهر لو بات تتخالف سچاچينه
.
#ضرغام_لطيف

.
كون أسمعهم
غِنه المكتول البصدري
وأشوفهم عِفه إبن أدم
كون أروايهم مچان الدم
كون أشگ صدري واراويهم
ثگل روحي
وشكابين الجثث
والناس
والشوغات
وگلبي المات
،
#ضرغام_لطيف

تدگ شـ تريد وشـ تلگه ؟؟!
.
#ضرغام_لطيف ☝☝

هذاك .. . انه
اي والله هذاك .. . انه

شو راجع ولاچنّي ولا مهتم

ولاچني رحت مكتول
وملطخ قميصي فتوگ مابيّه واگلهم دم

ولاچنّي
من اجه الجناز زاعلني الخشب واغتاض وتشيّم

ولاچنّي
طحت عدهم گبل وكتي گبل لاموت محّد گال لاتهتم

راجع چا .. نسيت
.
#ضرغام_لطيف
.

وانه .. .
منذور اعله شنهي
وليش اذب روحي ال غريج يريد يخلص من عذابه وتدني ذرعاني اعله مايه يلوحني .. . ونغرگ سوه

وليش
اكود عيوني گوه لسوگهم وارهن دمعتي لناس ماتدري عليمن چم نبي بروحي .. .انچوه

يا خطيتي
ال ماغفت مرّه ونستني
يا سچچ روحي ال جزتني
يا سفر شوفي وغربتي وياثگل صوتي من أغني
يا حزن ياليش فك ياخة عذابك

والله ودّي ارتاح منّي !

#ضرغام_لطيف

شگد
نوارس طايرة بطارف گذلتج ! .

شگد هوى .. .

شگد
ورد غافي وفراشات
وشواطي ، وليل ، ونجوم وگمر

شگد
ضوه ايمر اعله عيني .. .
وطولچ من اخر قصيدة يطيح شلال بنهر !

شگد
حزن بيّه و( احبچ )
وادري بسنيني جزتني وراحت وعمري عبر
.
#ضرغام_لطيف

هذوله إحنه
هذوله إحنه
للما عرفوا ملامحنه
ولانشدونه متغيرين تعبانين
لاميتين
صار سنين من متنه

#ضرغام_لطيف