يا نخل يا عاجر أحبل
ضوگ طعم الفاجعة بموتت فسيلة
الليلة كطرات العمر ناكوط حب سهران
يمة ادخيلج اترجاج ضميني بسواد الشيلة
الليلة كلبي ينام دافي
وتندفن ويا حرارة جيلة
الليلة اموت الليلة اخر ليلة

#كاظم_أسماعيل_الكاطع

هنا يبو طول المهفهف
المثل شطبة الريحان والطف
وجعود ماذيتك أمن السف
والزلف عكرب بيه يحتف
والحاجب مكنطر معطف
والعين عين الحر الاجنف
على صيدته وحول على الرف
والركبه شيشةورد وارهف
والصدر بية ايات مصحف
والخصر خصر النحل وارهف
واطباع حلوه الماتوصف

عبد الامير الفتلاوي

أضحك لليشبهك..
وأصفن شگد بي !
حتى البي شبه منك ولا ينمل !

حسين الحبتري

الحلوات يكشخن باجر
ويلبسن بهدوم العيد

متلهفات يشوفن وجهه
إي ذاك الجاي من بعيد

ماتغمض عين التنتظره
بس تركض بالساعة تريد

خجلانات يگعدن يمه
ويخافن ميلزمن أيد

إي والبال اليشرد منهن
إي ميركزن
كلما يحچي وصاحن عيد

وحدتهن احلى من الگيمر
ذاك الثوب الكلش لايگ
ذيچ گلادتهن ع الجيد

وخديدات الحلوة يخجلن
لمن گعد بصفها اولَيد

بس انتي الماعندج موعد
وتخبلين بدون أي عيد

منتظرج واني المتأخر
ويومية هلالچ ميقصر
يطلع يمي و حبي يزيد

ما محتاجة لهاي الگعدة
كل يوم انتي .. وانتي العيد

حيدر حمزة

ما احب الصدف بين المحبين
روحي من التعشگه اموآعَد اتريد
خآطر انشغل وين التقي ويآك
اعيش بـ قلق كون و عيني متهيد
و يم رآسي احط اهدومي بـ الليل
خلگ جآهل ينآطر جية العيد
اريد الرجفه تخلص من الآگيك
و كل شويه اسكتك خآطر اتعيد
.
.
جآسم الكعبي 🌸

چانت تعايدني گبل امي وابوي
عيدها وعيد الله كل واحد كتر

وچانت اتحضّر إذنها بكل هدوء
اتگلي بالعيد شإجه ابّالك شِعر ؟

وچنت أگللها الوطن لابد بديچ
وآنه أصابيعي شعب ما مستقر ♥️
.
.
بلال الصافي 🌸

ملل بعدك بـ روحي استوطن و عآش
احس بـ روحي چَن ظهرية العيد
.
.
علي محمد الغريب 🌸
.

ابلآيه وجهك شلي بـ العيد اليجيني ؟
شلي بـ العيدك امبآرك ؟
و انتَ المبآرِك بـ عيني ♥️
.
.
سلوآن عدنآن 🌸
.

كل عام وانتي العيد يمچ عيده
اقرب الي من روحي بس ابعيده
وچي ادري كلشي بسرعه يخلص ظليت
يحليوه احبچ حيل بس ابهيده

كل عيد گلبي مناطرچ ويحبچ
ماعندي كلشي وعندي كلشي بگربچ
اسود گلبها الناس بس انتي اشلون
مو گلبج ابيض ، حتى ابيض ذنبچ

العيد اجاني و شوفتچ عيديه
مناطر هلالچ وانتظر ليليه
رمضان عَده و لمَن شفتچ حسيت
اصل الهلال بضحكة الحوريه

گلبي يحبچ من گبل مو توه
من زمن ادم نشدي امج حوه
ماشفت بعيوني البنات الحلوات
و بس شفت ظلچ گال ذيج الحلوه

وكل عيد اناطر جيتچ يكحيله
تعبان حيلي و صوتچ يرد حيله
مجنون ما اعرف الـ اي من الـ لا
و مو قيس بس اشمالي احسچ ليله

گلولها امحسبچ صبح بت عينه
وبس بيچ رايد يكتمل نص دينه
ادري البنات اتراب بس تختلفين
سبحانه ربي الخالقچ من طينه ،💙
.
.
حمادة ابراهيم 🌸

عايدت كل الاحبهم ، وانت وينك ؟
يمي كل الدنيا حلوه .. النقص عينك

و شلِّي بالمرجوحه اذا ابعد وارد
ومو بحضنك

خلي عيد الناس الهم ، واطني حزنك

انته مو تدري البشر من طين واحد ؟
وانه منك

انته مو تدري اعلمودك
رخصتها ثگال تعبي ؟! ليش ياثلثين روحي
كل سنه وانته حبيبك
غير گلبي

ليش كلمن ولفه يمه واني گعّدت الرسايل

عايدتهن وما اگلك بس قريت
لا وحقك مثل ما اشبگك بچيت وشابگتهن

والمكاتيب شكثر حنيه بيهن
شو ولاچن انته بيديك اكتبتهن !

عيوني التحبهن عليمن ذبلتهن ؟
وهسه خلصت القرايه وقبل ما اضمهن
بستهن 💔
.
.
عباس هابيل 🌸

نايم .. يا فرح ، يا خيط صبح الله
نايم .. وانطفه الشباچ البگلبي
وعلى عيونك بچه وصلّى
يمتى تفز شمس وجهك
واصابيع الضوه تمشط شبابيچي ؟

يمتى تحن على عيوني
وتقره بگلبي تسبيحك ؟

انا مالي عرف بالجنة والمحراب
اعرف بس تواشيحك

إلـٰه الحب قريت اسمك
وشامة خدك اعبدها
وبسملتي اعله خصرك شوگ
راهب گلبي رتلها

اجيتك شارد من الناس ياديني وصلاة الحُب
اجيت اتوسلك بالحُب
تخليني اعله محراب الخصر اسجد
عبد خمرة وتلاگة برب

واتصوف على شفافك
واعرج للسما بعطرك
البراق بحضنك تلمني
وعرشك ينقري بخصرك ♥️
.
.
يوسف الحلفي 🌸

لو يهل وجهك حبيبي
الا اوزع كل بواچيي على المحد بچاله
الا اصوغ السكته الك ساعي ورسالة
الا اطفيلك ايامي .. مراد جيتك
وانت تدري
كحلة البيبان چفك يا حبيبي 💔
.
.
فرح كريم 🌸

حِط صورتك يم صورتي و إرجع نآم
من تگعد اتشوف الصور تتحرك
أكسر اطآر الصوره و ادخل ويآك
و اقفل اطآرك و ارجع اغفه بـ صدرك
هوَ التخبل بيك شتريده يگول ؟
النسّيته اسمه شلون مآ يذكرك ؟♥️
.
.
عمر ريآض 🌸

 .
ولك يآ هيل لا تنغر
ابلا شوگي و لهفتي اعليك ما تنشم
و انه صوچي
ابن آدم مو عزيز يصير من يهتم
انه فآگد اعزآز هوآي ليش بـ هجرك اتلثم
و ليش و ليش بس بـ اسمك اتلعثم ؟! 💔
.
.
رسول الفتلآوي 🌸

يآ حيآتي لان أدري انتَ فرآشه
قررت أبقه غصن
و انتَ يـ الكلك ترآفه آني محتآجك حِضِن
وما اگلك آني أحبك خآف يتغير طعمهه
الشفه خآف اتبوگ من عدهه الترآفه
و لـ ذلك رآح اضمهه ♥️

.
عمآد المطآريحي 🌸
.

محزم احزام البدو رايد تشيل ؟
وين عايفني يبعد امي وهلي ؟

خذني حاجه وياك
احرسلك
دليل
ولا تخليني بحزن وحدي انولي

#علي_ننه

علـى كـل الگبـور انكتبـت المرحــوم

البخــور بألـــف للحمــال و التــاجــر

#حسين_ابو_عراق

يليّ جرّة سما بعينك خاف أفززها من أگلك
انه أحبك
انه احبك


مظفر النواب

هذاك آني ..

أوج واگف واطيح رماد .. عود بخور
يكتلني ال يطفيني

مؤيد الخالدي