#هذا_شاهدك ...*

هذا شاهدك يحسين موجود
بقه مجدك . ومجد اعداك زائل
المن گاصدينك هالملايين؟
والمن فارشه الگاع العوائل؟
نور بحضرتك يطلع بالغروب
شمس وانطت ضهرها للسنابل

ريحانة الزهره وعلي الكرار
داحي الباب حلال المشاكل
ابد والله ما ننسا حسيناه
هذا بكل زمن تحصيل حاصل
هاي الغانمه بكل الحسابات
يلما وصّخ ابهامك تنازل
من طاحت الرايه من ايد عباس
بحضرته اليوم تنشال بهلاهل

راسك من تعلّه فوگ الارماح
ظل راس الزمن لليوم نازل
بالطف استقام الدين يحسين
لولا الطف بقه الميزان مايل

العزّه مسجله بلاءات الطفوف
وعيالك سبايا اعله المحامل
العزّه بقافلة زينب الى الشام
والسجاد عالنوگ بسلاسل
العزّه بدم رضيع انكتل عطشان
وبچفين منك يا بو فاضل
العزّه غاليه وما تحصل اليوم
لأن يردونه بليه مقابل

زنجيل الاثم ملفوف عالگاع
اشتركنه بدمك افراد وقبائل
كل احنه اشتركنه بيوم عاشور
مو بس الشمر يحسين قاتل
صلينه وره مسلم صلاتين
والباقين ضلوا بالمنازل
وادا جتك رسايل منه يحسين
بعد يحسين لتصدگ الرسايل !!

اجه مظلوم للمظلوم ينخاه
ويشوفه السهم ليوين واصل
ليش تغيرت يا بو علي الناس
وعگال البخت عالراس مايل؟
ما واحد يعاين حالة الناس
والضيم بجرفها شلون ياكل؟
ما واحد يعاين حال الارهاب
وابو سياف هذا انسان باطل
خجلنه ومستحانه بهاي الايام
درب العوز عثرت بيه اصايل

هذا البلفرات نشوفه مو ماي
عرگ من گصة التاريخ نازل

وراسك من تعلّه فوگ الارماح
ظل راس الزمن لليوم نازل

كاظم اسماعيل الگاطع