أحلم وطن بلون الناس
مابي ناس تموت إعله بعيرة جساس
ومابي واحد يهدم بيته ..
و يعمر بيت الترباس !

الحالم #عمادالمطاريحي

.
أمي
امي بسنين العجاف
نكتفي بريحة حضنهه
ومن نجوع
تثرد الجوع بلبنهه
ولو عطشنه
تعصر عيون العطش وتجيبه ماي
وتحلب الصيف وتشرّبنه ندة
وتطحن برحّة صبرهه
العوز وتسوي غدة
أمي اخذ لونه الفرح من لونهه
أمي اخذ لونه الحزن من لونهه
أمي كآس ايامي حنظل
شنّته بليمونهه
ترفع بجفهه لواء اسمة الحنان
وجربة العباس ماي عيونهه
مرة حزنت
حيل حزنت
لأن خاصمنه الرغيف
نزل قرص الشمس حافي
ومدد بماعونهه
ومن تسولف
تمطر الدنية دفو
ولو بجت
تترس اغطانه حمام
وتحط دمعتهه مخدة
فقرة ماعدنة سرير
من عصر تفرش جفنهه
وتضم دمعتهه ضوة بجيب الليالي
ولذلك من يمرنه الليل بخدودة وشم
ومن تلولي
تستحي منهه الحروب
الشجر ينزع ضحكته
ويلبس ثياب الغروب
والقذايف تعتنق دين الورد
والعراق يصيح غطوني برد
والنخيل يقدّم بصينيه عمرة
ومن تهز كاروكنه تنام المجرة
امي مدري من الوسن عجنوا جفنهه
مدري من جفن امي معجون الوسن
مدري من طين الوطن مخلوقة امي
مدري من طين امي مخلوق الوطن
امي جنة اليدخل بلاية حساب
وجنة الله تريد من عندك مهر
وامي كعبة تشيدت حب وحنان
وكعبة ابراهيم من طين وحجر
امي من تنعة وتردد ياوليدي
تردد وياهه المسلة
ويوكف بطولة الفرات
بروح ابوج يكلهه عيدي
امي لو صلّت منارة يصلي وياهه الشجر
امي لو تنسه الاذان يصير مذهبنه حجر
ومن نغيب
توكف اعله الباب صفصافة حزينة
وتظل تدعي ,, تظل تدعي
ربي يرجع بالسلام
ومرة رديت ولكيت امبيض بجفهه الحمام
امي خاف يمسنة سوء
تعوف قرآن العشك وجفوف اديهه
امي من اتروح يعني انموت جوع
ولهذا تعوف كل مرة ثديهه
ويوم ترحل ,, يرحل وياهه الرحيل
العصافير برجاهه
امي من تمشي النهر ينحب وراهه
وعافت ابباب الحنينة
معلك ويندب كلبهه
وخاف نحزن
خلت اعله الرف دمعهه
ومرة دورنه الغراض
الكينة دمعتهه وضلعهه

#عمادالمطاريحي