Слонімскі музей працягвае рубрыку "Гісторыка-культурныя каштоўнасці Слонімшчыны". Будынак па вул. Камсамольская, 25. Пабудаваны ў першай палове XIX стагоддзя з цэглы (вядомы пад назвай «Ніжні замак»). Невялікі прамавугольны ўчастак гарадскога асабняка спланаваны па сядзібнай схеме: аднапавярховы дом з цэнтральным чатырохкалонным порцікам вынесены ў глыбіну ўчастка. Парадны курданёр флашдраваны двума прамавугольнымі ў плане флігелямі. Будынак усталяваны на высокім падмурку (выкарыстоўваўся пад службы) з крыжовымі скляпенямі перакрыццяў, накрыты вальмавым дахам. Цэнтральны ўваход выдзелены мансардавым порцікам, які мае ампірную трактоўку: здвоеныя канелюраваныя калоны. Яго буйныя чляненні і манументальная прастата адпавядаюць агульнай тэндэнцыі таго часу да ўзбуйнення архітэктурных форм. Дэкор экстэр'ера абмежаваны вуглавымі руставанымі лапаткамі і прафіляванымі карнізамі з сухарыкамі. Фасады расчлянёны рэгулярным рытмам прамавугольных аконных праёмаў. Уцалелыя часткі капітальных сцен сведчаць аб былой калідорнай планіроўцы дома. Флігелі вырашаны нейтральна, без ярка выяўленых архітэктурнай дэталізацыі. Асабняк з'яўляецца помнікам жывой грамадзянскай архітэктуры і ілюструе панаваўшы ў дойлідстве Беларусі першай паловы XIX стагоддзя, мастацкі метад позняга класіцызму.
Адна з старажытнейшых вуліц Слоніма. Вядома з XVII стагоддзя пад назвай Замкавая. Цяпер на ёй пераважаюць індывідуальныя сядзібныя жылыя пабудовы. З капітальных збудаванняў у панараму вулічнай забудовы ўпісаны будынак медыцынскага вучылішча (50-я гады XX ст.). Вуліца Камсамольская ўліваецца ў вуліцу імя Янкі Купалы і звязана з гістарычным цэнтрам Слоніма, злучае яго з паўночна-заходнім жылым раёнам, узнікшым у пасляваенныя гады.