#هام
#توضيح
طلاب راسلوني گالو بعد يمكن ماتصور تكامل لان بديت ويه طلابك!!!
اول شي اوضح هاي النقطة
مستحيل اعوفكم بنص الطريق اكمله للعيد ان شاء الله لو اعرف اسهر الليل الكم والصبح لطلابي الي بديت وياهم
ومناسي مقاطع الهندسة بس اريد يخلص رمضان علمود اكدر اسويهن لان طاقة ماعدي والله 💔😥

طلابي طالباتي بزيونة
نظراً لما يمر به البلد من ظرف استثنائي

(( تؤجل محاضرات الغد))
#توضيح_وجهة_نظري

التأجيل سببه هو قلقي وخوفي ع سلامة طلابي وطالباتي
الطريق مفتوح حيكون يمكن صحيح
بس ما اضمن شنو الي حيكون بالشارع باجر بسبب غضب الشارع من اوضاع البلد واي شي حيصير ع الطالب او الطالبة لا سامح الله حيكون السبب هو الاستاذ واللوم علينه وهذا الشي صاير كلش سهل بالمجتمع انو تُتهم بشي انت ممسوي بشكل مباشر
( اني تقريباً بنفس المادة ويه خطة العام السابق مع تفاوت بسيط وراح يصير اضافي ينعلن عنه باجر ان شاء الله)
اني اكتب المنشور وبداخلي اريد اجي والزم قلمي واشرح ع سبورتي وبشكل منقطع النظير بس للضرورة احكام
طلابي الشطار ....طالباتي الشاطرات (الاحبكم❤️❤️)
ماريد منكم تضوجون لان ادري بيكم من تتأجل محاضرة تضوجون بس هاي حالة عامة وتتعالج بالاضافيات ان شاء الله.
طلابي التأجيل لضرورة ومصلحة عامة
#احبكم_كلكم ❤️❤️

#توضيح
للمرة الاخيرة احچي عن اسباب التأجيل
طلابي الاحبهم
قرار تأجيل المحاضرات قراري اني
قرار "مستقل" مو قرار "تابع"
من تجي تگلي انت ليش متوقف ونفس الطلاب يرحون يم استاذ فلان وفلان وفلان
انت هم ارجع
لا مو هيج المنطق والعقل
اني من اجلت علمود ما ادخل بإشكال اخلاقي وشرعي وما اكون سبب بأذيتك
اذا تريد تروح غير محاضرات هاي بقت يمك
بس ابقه اني مرتاح وضميري مرتاح لان مصرت سبب بالاذية ونقل العدوى والاهم من هذا ما خالفت القوانين المعمول بيهه
والله لو تصفنون شوية متسألون نفسكم ليش مأجل استاذ حيدر؟؟
لان راح تلگون عشرات الاجابات المقنعة والي اني طرحت جزء منها
#اخيراً وليس اخراً
اليوم بليل نبدي بالحلول الي وضعتهه لهاي الفترة تحديداً 🥰🥰

#توضيح:
اني ما انشر بقناتي مناشدات ومقترحات
السبب :
الاول:
لان الطالب من يشوف مرات مقترح عليه اعلام قوي ويتسلط الضوء على فد مقترح
ربما ويه نفسه يشك مجرد الشك انو ممكن هذا المقترح يتنفذ ويصبح قرار وهذا الشي يخلي ينشغل عن الدراسة ويصير عنده تراخي تجاه المراجعة
اريد قناتي تكون فقط للدراسة والفائدة بأكبر نسبة ممكنة علمود الطالب ما يتشتت ويغير بوصلة الجدول الي مسوي لنفسه وهذا السبب الرئيسي طبعاً
الثاني
بقية القنوات تقوم بدور جيد جداً والقنوات التعليمية الاخرى تشتغل بهذا الاتجاه مو بالضرورة كلنا ننشر نفس الشي
❤️❤️
هاي وجهة نظري ممكن تكون صح ممكن خطأ
بس اني توصلت لهاي القناعة
هذا جواب للطلاب الي راسلوني علمود مناشدات ومقترحات 🌸🌸

#توضيح:
طبعا ما جنت اشوف تعليقات بيهه غلط عليه هاي الفترة صارت تتكرر هواية
هذا مو اول تعليق
لا والله اني قابل اخلي عقلي ويه هيج نماذج
بس هاي التعليقات جديدة صايرة
ماريد اخوض بفكرة نظرية المؤامرة واگول هاي وراها شخص وكذا لان ما اميل لهذا التفكير
بس نزلتهه علمود اذا اكو نية لتكرار هاي الفقرة فالرد يكون فوري ❤️❤️
وشكراً مرة 2 🌸🌸

#توضيح
اني ما اسمي طلابي بـ"جيش حيدر وليد"
ابدًا لأن احس اللفظة بعيدة عنكم
اكول دائماً جمهوري ❤️❤️ احس الكلمة هاي تدخل لِنفس الطالب بشكل اجمل
لفظ الجيش تحسسني بفوارق بيني وبينكم
بس لفظ "جمهور" احسهه اكثر مقبولية ويستسيغهه عقلي 🌸🌸
مرات يكتبولي بالخاص جيش حيدر وليد
رغم ابتعادي عن هذا المصطلح بشكل مطلق
واستبدل اللفظ ب"جمهور"
#احبكم ❤️❤️

#توضيح
يعني اذا متريد تمتحن دور اول ومتريد تمتحن 1-9 دور اول ، تمتحن ويه الدور الثاني وهو يعتبر دورك الاول
وطبعا هذا يخفف الزخم ع الدور الاول لان اكو طلاب يردون يأجلون فهاي تجي من جانبهم
ينتظر ويه الدور الثاني يمتحن.

#توضيح:
تم اعادة تصوير محاضرات الفصل الاول للسادس العلمي
بطرق جديدة واسلوب غير مطروق وحقيقة راح يكون فد شي مختلف بالاسلوب
اما الدورة الالكترونية تبقى محاضراتهم خاصة مالهه علاقة بمحاضرات اليوتيوب ! وبطرق كذلك مطورة بإستمرار وبشكل غير اعتيادي
وبداية من الصفر لأعلى مستوى

اما مسألة اذا اشرح يوتيوب واجدد محاضراتي محد يجي الكتروني خصوصي
الجواب :

اولاً : هاي ارزاق مقسمة من رب العالمين
اقرّ واسلّم بكل ما يخص رزقي وانساق
لقولهِ تعالى: ( وَفِي السَّمَاءِ رِزْقُكُمْ وَمَا تُوعَدُونَ) ايمانا مطلقا عقلاً وجوارحاً

ثانياً: اني عندي ثقة لو اشرح المنهج 5 مرات باليوتيوب هم الطلاب تجيني ! لان الدورة الالكترونية بيهه متابعة وامتحانات وتفاصيل اخرى !
ثالثاً : اني ماگدر اترك طلاب اليوتيوب والناس المحتاجتني! ماگدر هذا شي مستحيل
اكو ناس اذا مو يوتيوب متشوف النجاح
هاي شلون ينطيني گلبي اعوفهم؟

#اگللكم_شغلة غريبة والله
اكو ناس العام دخلت يمي الكتروني خصوصي
كالولي استاذ دخلنا عندك مجرد نريدك تستفاد مادياً لان انت تساعد الاخرين! ومقصرت ويه الكل فدخلنا يمك نضبط المادة بالامتحانات لان الامتحانات مهمة كلش!
تخيل بس تخيل ويايه؟ دخل يمي بس علمود يفيدني مادياً مع العلم اني الحمدلله ممحتاج
بس داخلين يمي مثل رد الجميل!!
اكو هيج ناس وتريدوني اشكك بأرزاق رب العالمين !
#احبكم ❤️

#توضيح:
الدورة الالكترونية من الفصل الثالث تسجيل موجود و مفتوح ، بس دورة شتوية جديدة ابدي بيهه من الفصل الاول ماعندي
الي يسجل من الثالث ويكمل المنهج ويريد الفصلين الاول والثاني نعيدهه الهم من اكمل المنهج بالاخير ❤️

#توضيح_هام

اليوم وتحديداً بمنطقة زيونة صار سوء فهم ويه طالبة (بغض النظر عن التفاصيل)

واهل الطالبة اجوي وصار الحل ودي واعتذار وكلشي تمام وبالمناسبة الاهل موجودين بالمعهد والطالبات يشهدون حضور الاهل

بعض المدرسين للاسف من سمعو الخبر من خلال الطالبات

مراسلين بعض القنوات لتأجيج المسألة
تحت عنوان ( استاذ حيدر يقوم بضرب طالبة داخل القاعة)

سبحان الله شمرت القلم
واني داخل القاعة
طلعت برة القاعة لكيتهه ضرب والشغلة واصلة مراحل

وراح نصور مقطع مرئي ويه الطالبة انشره ستوري وهي تحجي بنفسهه عادي جداً

بِئس الاشخاص الي ينتظر زلات الاخرين
علمود يأذوهم!
ماعرف شنو من بشر

خِبتُم وخاب سعيكم وممشاكم.

#توضيح

المدرسة الالكترونية هاي بديل الانتساب
يعني الطالب الي جان قبل يسوي انتساب لان مايكدر يداوم حضوري لاسباب مرضية مثلاً

راح ينضم لهاي المدرسة ، يعني انتساب مثل قبل ماكو.

#توضيح:

الدورة الالكترونية مال الدور الثاني
شرح للمنهج ، يعني ماله علاقة بمحاضرات الدورة الاصلية
اني اسويلك محاضرات على كد الفترة العندك
واضبطك بي المنهج
واذا مقاري اي شي هم تفيدك
لان ابدي من الصفر ❤️