#شقراء_بغداد

الجزء_الثاني_بارت_٣٢ الاخير


بين ضحكه امي بصورتها الي تعكسها الي شاشه التلفون وهديتها الاخيره الي بين ايديه
اتلمسها .. تتنقل عيني بين نظره اشتياق للصوره ونظره تمعن بتفاصيل عقد اللؤلؤ الي بايدي ...

مسحت دمعتي ورجعت العقد بعلبته واخذت دفتر المذكرات .. هاذي اول مره المسو
من وكت الي اخذتهن من غرفه امي ورجعت انا وحسين ويه عمي مافتحتهن ولا لمستهن
حتى ، انتظرت افرغ من كل شي واكعد وحدي ادحكهن وافهم امي شنو كانت ضامه الي من سنين ..

هالليله انا تفرغت الهن ..
هالطقم انا ماكنت اتصور بيوم امي تهديني اياه .. اذكر اني وكت كنت ادحك صور عرسهم ادحكو بركبتها وهي حكتلي انه هديه ابوي الها من كبل العرس وانه لؤلؤ طبيعي
اشتراه ابوي الها هديه شكر وكنت اسألها شكر لشنو؟ تحكيلي مواقف بينا حلوه
عمرها ماقلتلي انها تعرضت لحادث وخسرت كليتها لانها حامت لابوي ...
ماعرفت هالشي الا وكت ما وكعت من مرضها ..

صار اليوم هالطقم ملكي بس ما فرحانه بي
مااحس انا استحقو من بعدها ..
هذا هديتها لانها تستحقو انا مستحيل البسو
و مااخلي غير لامي ..

هذا الي كان يتردد بالي وانا اقفل علبتو
وقررت ايمتى مااروح لحديثه ارجعو لغرفه امي ..

اخذت الدفتر وانجضعت وفتحت اول ورقه منه كان مكتوب ..
' اهداء الى ابنتي غاليه '

نزلت دمعتي لوسط اذني ومسحتها وكلبت الورقه الثانيه .. العنوان كان مكتوب ..
' حديثتي الشقراء '

دحكت التاريخ ..١/١/٢٠١٨

بدايه هالسطور كانت ...

بحمد الله و نعمته هذا صباح جديد في اول يوم من سنه اخرى في عمري الخمسيني ..
حولي احبائي بنعمه وخير وعافيه
امنيتي بهذا اليوم ان يحظى كل فرد منا بخيرٍ وحظ وفير في هذه السنه ..

كلبت الصفحه و دحكت العنوان نفسه وصرت اقرا تفاصيل يوم امي .. ضليت اكلب الصفحات واقرا لحد ما وصلت يوم ولادتي
يوم ١١/٢ ..
قريته بتمعن ..
' اليوم قد اثمر الشيب
اليوم قد رزقت بحفيدتي الاولى مزن
حين حملتها شعرت كأني حملت نفسي مصغره لا وجود لشبه في المعاني بيننا
لكن انها بضعه ممن هي مني
ابنتي الوحيده وحفيدتي الوحيده لليوم
قد احيينني ببضع لمسات مجدداً في منبع طفولتي ..
في كل نظره مني لابنتي اراني وفي كل لمسه لابنتها ارى جزئين مني وكلاهما بالقرب مني
يعود بي النظر لمن هو بجانبي فأرى جزئي الاول الذي اليوم اصبح مغزا ضياعه واضحاً
و يعود بي الفكر لجزئي الثاني باتصال
من ملك هذهِ المملكه .. فأجيب واصف له حفيده مملكته الاولى ...
لربما كان ضياع الازمان لسكينه وبهجه هذا الملتقى ..
ولاده جديده اظنها ستكون ولاده فصل جديد كما حصل لي من قبل والفرق هو الزمان فقط .

عدت قرائته اكثر من مره واركز باخر السطور ومافهمت منو شي .. سديت الدفتر
ورحت لبنتي كعدت .. ضليت حدرها انومها
وبعدها رجعت ادحك بالدفتر ..

وصلت لحادث حسين ...
كان بدايه هالصفحه مكتوب ..
' اليوم قد خَرقت الاقدار روحي

هذهِ الدنيا سلاحها واحد ضدي دوماً
هي تحاربني بولدي ..
في كل مره انجو لكن هذه هي الاخيره
لا اظن النجاه منها ..
انها في فصل خريفي وقت ما باتت اوراق شجرتي تنفذ .. منذ ايام وانا عروقي بدأت تتيبس ولا زلت بها شامخه لكن لبه قلبي
قد أنهكها الخوف ..
حسين به ابتدأت حياتي الاخرى وبه انتهي '

ماكدرت اكمل بعد هالحدث ..
حسيت بكل كلمات امي تجسد كبر تعبها
هي تعرف انها ماتعدي هالازمه
كانت تدري انها تكتب نهايتها وكتبتها بقليل الكلمات غالبه المعاني ..

نمت وانا افكر بيها وكعدت على صوت دكت الباب .. اعرفها دكه عمي ..
لبست الروب الطويل وفتحتلو ..
- صباح الخير عمي
- صباح النور بنتي يلا وينج نزليلي هالمزنه
خلي اتشمس اني وياهه
-صار عمي هسه ماتاخر
- اي واريدج تحضرين ريوك لحسين مرتب
اهم شي تخلين كلاص حليب وتحليه بالعسل
- صار عمي
هو كعد ؟
- لا بعده راح انزل اكعده بس انتي استعجلي
اريد اسكي الزرعات يلا نزليلي المزنه
- تآمر عمي نزاله وراك ماتاخر

ضليت انتظره وصل للدرج وانا رحت دخلت الحمام وبعدين طلعت وبدلت ملابسي واخذت بنيتي حطيتلها البوطره ورتبت شعراتها ولبستها ونزلت ..

عمي واكف حدر الدرج اول مانزلت اخذها مني وصار يهرج البيت بصوتو هو ويناغيلها
طلع بيها للحديقه .. متعود يشيلها بيد والثانيه يسكي بيهه الزرعات ..

صبحت على الحجيه وعمتي وام سالم
دخلت وراي المطبخ وقلتلي ..
- هذا حسين اخوج من امج مو
- اييه هذا اخوي الوحيد من امي
- وشعجب اخوتج رضو يبقى هنا ؟
- والله اخوتي ما يرفضولي طلب وانا ردت اخوي حدر عيني اداريه وقبلو
مضايقك اخيي بكعدتو هين ؟
- هو انتو كلكم مضايقيني ضلت عليه
خلي يكعد شسويله

طلعت وانا ضليت احضر الريوك وابكي
بهاليوم انا كل جروحي مفتحه
كل الاحبهم تركوني لا اهل ولا اخوه بس هالوحيد وياي ...

رتبت الاكل على الميز ورحت صحت لعمي
وبعدين دخلت لغرفه سالم الي كعد بيها حسين

دحكتو يعدل باللزكه على جرحو وانا عدلت ملابسه واخذت بايده وطلعنه ..

دحكنا عمي دخل وهو يتبسم ويقول ..
-يامحلى هالصباح شلونك ابني زين ان شاء الله

حسين بس هز براسو وكعد وانا اخذت مزنه
من عمي وراح هو غسل وكعد حدر حسين
عفتهم ياكلون ورحت خليت مزنه بحضن عمتي وانا متعوده اتريك وحدي
لان عمتي والحجيه يتريكون وحدهن وعمي توقيتو ثابت ومابيوم شاركتو بالاكل
يااما اتريك انا واسامه او وحدي بالمطبخ
وهاليوم مااكلت شي .. روحي معلعله وحتى ريكي مر .. كطعت الرضاعه لبنتي من يوم وفاه امي من بعدها ماهتميت لاكل بس بشغل البيت ...

على التوقيت الي حافظتو لعمي رحت حتى الم المواعين ودحكتو يلف بالصمونه ويكربها من حسين وهو مايرضى ياكل وعمي يقنع بي
وتالي اخذها اكلها ...
ضليت واكفه باب المطبخ وادحكلو شلون يجبر حسين يكمل كلاص الحليب وبعدها هو صاحني .. رحتلو وحكالي ..
- عاشت ايدج بنتي ولو انتعبج بس اخوج تعبان اكثر ويريد دلال
- هو انا هين حتى ادللو
- يحفظج الله ، جيبليه وحده من هاي المحارم الي يجيبهه اسامه ومره الثانيه انتبهي تكون حاضره هنا على الاكل يمه
- ماشي

اخذت المواعين ورحت للمطبخ عدنا هين علبه اسامه كل فتره يمليها بمحارم مبلله يوزعوها الهم وهو يخليهن هين ..
كانو قبل يخلونها حدر مواعينهم وكت مايرتبون الاكل بس انا دحكتو اتكيت زايد
وشلتها هي المغسله قريبه عليهم شدعوا هالسوالف !
عاد الحين رجعت بنفسي خليتهن حدرهم
لخاطر حسين ..

كلشي بالبيت مرتب ونظيف انا مااصعد لغرفتي بالليل الا وانا ملمعه كل شبر بي
اخاف لاعمي يدحكلو فد تفصيل الصبح واترزل عليه اول مااصبح بوجهو ..

رحت ادحك حسين ولكيت عمي واكف حدر البلازما بالغرفه ويربط بالبلي ستشين
وحسين كاضب الجاستيكه ويأشرلي عليه

انا بعز حزني ضحكت وقلتلو ..
- هاي شنو راح تلعبون كيم ؟
- اي لعد شلون اونس حسون
- ههه عمي تعرف تلعبها ؟!
- اطكطك شويه بس اخيج كال مضبوط بيها
- زيين عجل انا ارتبلكم شويه فواكه تزيدكم طاقه
- ديلا لعد استعجلي

رحت للمطبخ وشيفت فواكه واخذتلهم وضليت كاعده حدرهم وادحك لعمي يجبر حسين يختار نوع اللعبه وصارو يلعبون
وعمي يضحك ويشاقه ويه حسين واخيي بس يتبسم مايعلق على كلامه ..

ضلو للظهر يلعبون وبعد الغدا عمي صعد لمكتبو وضليت انا حدر حسين هو راد ينام وانا خليته وطلعت كعدت ويه بنتي
بس اكعد وحدي اتذكر كلهالاحزان ودموعي من وحدها تنزل ..

للعصر عمي طلع و نص ساعه رجع وياه مضمد صار يدحك جرح حسين وطمنه عليه وراح وعمي صاحلي حتى احضرلهم كعده بالحديقه ..

ورحت خليت الكراسي والطبله وسويتلهم كهوه وحدر عمي وهو كاضب ايد حسين
وكعدو وبعدين كعد شرب كهوتو وطلب اصعد لمكتبو واخذلو علبه الدومنه

صعدت بالعجل وانا اعرف مكانها اخذتها ونزلت خليتها كدامه وهو قالي..
- يلا بنتي جيبيلج كرسي واكعدي نلعب
- لا عمي تسلم مالي واهسها
- شوفو يابه اني ادري بعدكم بحزن ولا عبالكم اني ما همني خساره الوالد تره جان نعم الاخ والسند الي وحزين على فراكه
بس هالدنيا علمتني ادفن عزيز منا وامشي منا
لان راح يجيني يوم ماله داعي اموت نفسي وادفنها بايدي ،يومي مكتوب وبساعته ماتعب بشي كله يجيني حاضر
مهما وصل بينا الحزن احنه نبقى احياء
نكمل حياتنه والمطبات نعبرهه لان كل واحد بينا بركبته مسؤوليه مادام بيه نفس هو لازم يكون كدها

جر ايدي وكعدني على الثيل وصار يتلمس براسي قلتلو ..
- عمي احنه جرحنا بعد عمره مايطيب ردنا بابونا ننسى امنا تاليه حفر ذكراها بينا ازيد بوفاتو

دحكت لحسين وانا امسح دموعي وهو مدنك راسو وساكت .. عمي قال..
- كل جرح مصيره يطيب صح يضل تارك بينه اثر بس مايوجع بعد
مو بس انتو خسرتو اهلكم اني هم خسرت اهلي وبظروف اصعب من ظروفكم انتو اهلكم ماتو بفراشهم اني اهلي ماتو مذبوحين
خسرت اخوه و ولد عم واب وخسرت وطن
وخسرت حتى ابن وبعدني عايش واواسي غيري اخفف عليه حزنه باحزاني

دحكناله انا وحسين وقلتلو ..
- عمي اي ابن هذا خسرتو ؟
- جان عندي ولد وخطفوه وذبحوه من جنت بعمان محد يجيب طاريه هنا لان يفتح جروح لامه
- الله يرحمو
- ابني لو هسه باقي عايش جان هو بعمر حسين

ضل يبتسم ويدحك لحسين و اخيي سألو ..
- ليش كتلوه عمي ؟ هناك مو امان !
- ماكو امان بالشارع الامان بس بالبيت بين الاهل يابه
ابني هم راح ضحيه شغلي
هواااي ناس انسلبت ارواحهم من وره شغلي
بلا ذنب يذبحوهم .. ابني جان بعده خامس ابتدائي ويروح بالباص للمدرسه وهناك اول مانرل همه مترصديه وخطفوه ابتزوني بي
جانو هذوله الولد الهمج اذا شايفيهم يطلعون عليهم افلام وتقارير يسمون نفسهم قراصنه
هذوله يشتغلون على السفن ياخذون خزينتهم ويعوفون البضاعه اني جنت متابعهم سنه ونص وهمه واحدهم هالكده ضعيفون واسود كاتلهم الوصخ والجوع وعايشين على البوك ونص منهم عايشين بالتهريب

جنت اني بعدني جديد هناك بشغلي وهالقضيه لو كملتهه اثبت نفسي بدولتهم وجنت محتاج لهالشي وبالاخص الثقه بشغلي هي الربح
اهم من المنصب عندي فخليت كل عقلي وياهم خنكتهم من كل جهه ولزمتهم اول اسبوع الهم بالحبس وجماعتهم خطفو ابني
جان المقابل لابني مو طلعت هذولاك من السجن لان يعرفون ميفيدوهم بعد
ف رادو اسويلهم تعميم على السواحل ان هالجماعه اسمائهم تعبر شوكت مايعجبهم وبلا تفتيش رادو يدخلون ممنوعات براسي
كلتلهم تحلمون بهالشي حاولو ويايه مرتين
و دزولي بظرف صور لابني يضربوه ابر
ومزوركه ايده منهن جانن مخدرات ومغيرين حتى شكله وجهه مصخميه مثلهم وشعره مزينيه صفر وضلو يريدون امشيلهم هالشغله
واني مااقبل وجماعتي بالشغل كلها عرفت بهالشي ومن واحد لواحد عرفنا مكانهم
بس هالحجي بعد اسبوعين على خطفه
ومن وصلناهم جانو عايفيه مذبوح وشاردين

كنت ادحكلو وابكي وهو يدحك بالسمه ويحكيلنا عنو وبعد ماسكت ثواني رجع قال ..

- اخذته بايدي شلته وجان حتى دم وريده ناشف على جسمه بوجهي اخذته دفنته
ورجعت بعد يومين للبيت كلتلهم الولد مات من كد ماتعاطى مخدرات
مايعرفون لليوم هو جان مذبوح
صبرتهم و واسيتهم بان الموت احسن اله من عذاب العيشه وهو بدمه ادمان المخدرات
ويمكن اني هم صدكت الجذبه الي جذبتها
وقنعت نفسي بهالشي وعشت

كضبت ايده وقلتلو ..
- ياكبر صبرك

ابتسم وقالي ..
- هاي جانت الميه من بعد التسعه وتسعين
بس ما وكعتني ولا غيرتني لان الي قبلهه خلن هالكلب مبنج لحد هاليوم

حسين قال ..
- الله يرحمه مكانه الجنه ان شاء الله
بس عمي ماخذت بثارو ؟
- اخذت شلون مااخذت
هههه يابه انته متعرف عمك شلون جان
اني ما طلعت اليوم السابع على دفنته الا وماحيهم محي .. قهري على ابني حولته
دم .. حسبتهم ١٧ جثه تجطلو كدام عيني
بيومها و خليتهم يدفنوهم بحفره وحده
وضليت وره هالسالفه لحد ما الخليه كلها صفرتها .. اربع سنين اني الاحكهم واحد واحد افرغ عقله على الميز وبعدها الحكه بجماعته
اني ماعوف حكي بيوم ولو طال الزمن اخذه
ومحد عال وياي الا مااخذت الحك من نص عينه

- كفوووو والله عمي لازم نتعلم منك
مبين عندك ماخفي اعظم

- ههههه ولك يابه هاي حصاد سنين
حصاد مصايب لو احجيلك بعد اسبوع مانخلص
بس هسه خلو بالكم ان الزمن كفيل بكل شي
ولا تحسبون نفسكم بدون اب
اني اصيرلكم الاب اني من يومي ابو الايتام
عيشتي لهالشي وكلبي مايرتاح اذا مو يمهم
اسمعو كلمتي وضلو وياي واني اعبركم هالشده
يشهد الله معزتكم بكلبي مالها حدود ويمكن لو احجيلكم عنها تكولون عمنا يبالغ
اقلها اني مااضحك الا وياكم هاي اقل شي عندي بمعزتكم ومااريد اشوف هالعيون الحلوه ذبلانه اريدكم تشدون حيلكم الدنيا بعدهه ماوكفت
انتي يابه عندج بيتنا مسؤليتج ورجلج كم يوم ويرجع من دوامه يريد اهتمام وبنتج بعدهه باول عمرهه تريد رعايه مو كلشي تهملينه
تره اليعذرج يوم يومين مايعذر العمر كله

اخذت نفس وتذكرت كلام جراح نفسو بوفاه امي .. قلتلو ..
-ان شاء الله عمي ان شاء الله
- انتي خلي ايدج بايدي واني اعبرج هالحزن
اني اعرف الكلوب شلون تداوى

ابتسمتلو وهو مسد على شعري ودحك لحسين قلو ..
- وحسون خطيبته تنتظره لازم اول مايطيب جرحك تروحلها عيب الهجر هذا بحق البنيه
- عمي انا اريد افسخ الخطوبه

من سمعتو لطمت على صدري وقلتلو ..
- ياويلك من الله شذنبها البنيه !!!

عمي شرب مي وقلو ..
- ليش ؟
- ماكدر اتزوج بعد
- ليش متكدر ؟؟ البنيه سامع عنها شي مو زين !
-لاااا عمي لااا البنيه دره واخلاق واهلها زينين بس انا مالي نفس زواج بعد
امي مو هين شلون اتزوج ! منو الي تحضر لعرسي ! ؟ ابوي ينوبون عنه اخوتي وانته
بس امي ماينوب عنها احد
وانا حزني مطول ليش اعذبها وياي واخليها تنتظر خلي تمشي لحال سبيلها احسن
- حلو .. وجهه نظر سديده
بس يمكن انته محسب لحزنك وما محسب لرجولتك ، سمعه البنيه ، وكلبها بالاخص
- عمي شدخل رجولتي هين
انا كلبي مليان حزن على اهلي مو بحال زواج
- اي لا تتزوج هسه تكدر وره سنه او سنتين تتزوجها
- ماكدر كلبي ماينطيني اسوي عرس وامي ماتحضرو
- لو طولت عشرين سنه هم تاليتك تتزوج
بس هذاك الزواج راح يذكرك بهالبنيه
وتعيش كل عمرك متندم على خسارتهه
- عمي ماتفهمني بهالشي انا احكيلك اهلي وانته تحكيلي البنيه
- الأهل راحو بس البنيه باقيه بعدها بذمتك
هي المفروض تفكرلها
ماكو فد طقوس تسويها بنفسك وترجع الراحو
بس تكدر تعيش وتوفي حقهم عليك
ابني من وصايا الانبياء واهل البيت ان
الاهل حقهم على الولد بعد موتهم هو ذكرهم
بعد عندك حق لازم توفيه
همه بدار اخره يفرحون بالصدقه الي تشيل اسمهم من ايد ابنهم
يفرحون بذكرهم بعمل خير او حتى بنجاحك
انته اذا نجحت بحياتك واسست حياه حلوه متكامله واطبق بيهه تعاليم اهلك بتربيتك
راح يفرحون لان هاي ثمره تعبهم يشوفوهه بيك بنجاحك

لا تتوقع فد يوم اذا بجيت وكسرت وعتمت دنيتك بالحزن عليهم همه راح يرضون لهالتصرف او يكولون اي والله ابني مانساني عاش عمره حزين عليه !
ابد هالشي شيله من راسك

- ليش يعني ؟؟!

- لان الميت يعرف قيمه الحياه
ان جان مصيره جنه او نار هو يعرف قيمه الحياه شلونها ويمكن لو نسمعهم جان اول شي يحجوه النا عيشو يومكم بمايرضي الله
عيش ابني الموت لاحكين عليه

- عمي كلامك اعقلو بس مالي حيل عليه

- يصيرلك حيل يومين ويرجعلك الحيل
احنه مو عيب نحزن ونضعف بس لكل شي وكته ..
اخذ كفايتك بالحزن وارتاح شويه وبعدين ارجع اوكف على حيلك الطريق الي بديته لازم تكمله ، مانخلقت الرجال حتى تكعد بنص الطريق
لو كعدت هالكعده انته مو رجال قوي الكلب تنحسب بعدك ولد
ولاتنسى على ذمتك مره منين ماادير وجهك تتحاسب عليهه وانته حر تريد تطلع مقصر
تريد تصير كدهه

عمي كلامو كله بهداوه و ثقه ماتحرك الا حتى يشرب مي مره ثانيه ورجع قال ..

- و اهم شي تخليه بالك هو انك من تعوف البنيه غيرك ياخذها
وبعد انته وكلبك .. يكدر يشوف الي جااانت مرته هسه تتمشى ويه غيره !
اصفنلها شويه حتى لاتندم بعدين وتاكلك نار الغيره والعتب

حسيت هين عمي ضرب على الوتر الحساس لحسين .. لانه ضل رافع حواجبو وصافن على عمي ..
عمي قال..
- غاليه صايره مو خوش هالايام
-ليش عمي
- لا حلاوه لا جاي عايفتني اتصفن حتى المي خلص
- حكك علي عمي الحين اسويلك اطيب جاي
- عفيه يلا استعجلي

رحت اسوي الجاي وضليت صافنه وافكر بكلامه .. عجيب شلون كدر كلبه يحمل كل هالمصايب ! اخوته وابنه وابوه وحلاله وكدر لليوم يضل شامخ !!!!
حسيت كلامه رجعني لوعيي وصرت افكر بعايلتي و وصايا امي وقررت اخلي ايدي بايد عمي واخليه يعيني على هالمصاب ..

اخذتلهم الجاي والكعك ولكيتهم يلعبون دومنه
وانا ضليت حدرهم كاعده احسب نقاط

لحد الليل احنه كعدتنا واكلنه سوا .. صرت ادحك شخصيه عمي لاول مره من يوم زواجي لهاليوم يلا كدرت اتقرب منو وادحك هالشخصيه الي من يومي وانا كاتلني الفضول عليها ...

ثاني يوم دحكت اخيي جراح هين وعرفت نيتو صلح بينا .. ياويل حالي بلياه احس اني كل يوم ينعاد عليه عزا اهلي وانا مفاركه اخوي جراح ..
صح اني كنت مدحكه الفيديو لموقفو بيوم الي طلعت منهم بس يوم الي دحكتو تعنى لخاطري رضيت اكثر ..
ساعه الي حضنتو رجعلي كل حيلي وحتى روحي احسها رجعت احتيت بعد ماكانت ذابله
بلياه ..
يوم ما امي ماتت ماطفت الدنيا بعيني لان جراح كان حدري متقويه بي بس وكت الي هو ابتعد عني انا هين حسيت الدنيا طفت بعيني وراحت كل روحي وياه ..
ماصبرني على فراكها غيره وما رجع همتي
بعد فراك ابوي غير عمي ...
تأثيره كان كبير علينه ..

من بدا حسين يتعافى جرحه صار ياخذو من الصبح يطلعون يتمشون رياضه واول مره ادحك عمي لابس لبس رياضي وراجع شباب
حتى اكلو زاد وصار على واهس حسين يتشهى اكلات وحلويات ياخذ حسين ويطلعو بسيارتو يتعنون لمناطق بعيده حتى يشترون كيلو منها ويرجعون ..

عمي كان كل عصريه ياخذ حسين ويطلع
وعشاهم برا يصير ومن يرجعون مشترين حب ونخلي مفرش بالحديقه ونكعد انا وياه وحسين ويصير هو يحكيلنا على شغلو بعهد صدام وبعدين يرجع لايامو بحديثه وحسين يناقشو بهالاشياء وانا بس استمعلهم
وبوحده من هالليالي عمي قالي ..
- غاليه يابه علاكتين اكو بالسياره بقن شوفيهن وانطينا رأيج

رحت اخذتهن ورجعت حدرهم كعدت وفتحتهن .. دحكت وحده بيها ثوب اسود
بس كشخه والثانيه ثوب ماروني وكصيف
قلتلهم ..
- هذني لمنو ؟
- الاسود الج والماروني لجنتنه الثانيه
- ياويل كلبي منو الثانيه !
-هههههه ولج مرت اخوج هو اختاره الها
حلو لا !
-ايييه عمي قول ورود وخلصنه
حلو بالعافيه تلبسو بالهنا والاسود ذوقك حسين؟
- لا ذوق عمي هو قال انا خبير باالاسود
-ههههههه والله عشت عمي شي كشخه
راح البسو وكت مايرجع اسامه ان شاء الله

ضل يدحكلي ويبتسم وبعدين قالي ..
- حتى يطلع احلى بعد ارفعي شعرج وياه
ولا تلبسين كلايد ولا اي شي عوفي هو بساطته حلو
- ماشاء الله عمنا ذوقو رفيييع

ضل يضحك وبعدين قالي..
- باجر رايحين لبيت ورود تجين ويانه ؟
- صدك والله !
-اي لعد اجذب عليج داكلج رايحين !
- بس لا تفسخون خطوبه !
- يعني انتي برايج واحد يشتري ثوب مثل هذا حتى يوديه ويكللها طالك !
-هههههه عمييي شدراني انا بافكاركم
عجل ماتخلوني اعرف بهالقرار من كبل
ليش ماقلتلي يول تريد ترجع لحرمتك !!!

حسين انجضع على الثيل ويكرز حب ويقولي ..
-اسرار يولو مايصير واحد عندو اسرار
- مو على اخيتك يول
- يلااا هسه عرفتي شتردين بعد
- اريد اعرف شلون غيرت رايك !!!!؟؟؟
- كييفي انا اغير رأيي ارجعها او اطلكها كيفي لا تصكعين راسي يولو خليني افكر بكلام بكرا شلون ارتبو
-هههههههه خيي حسب حسابك راح تطلع الفراك هذا من عيونك وتذكرني وكتها
-ليش يولي!
- هاااذي سوالفنا بعد وبكيفننناا

عمي ضحك وقلو...
- صح حجايتهه هسه بعد مهمتك ادللها

- ايييه انا من كبل مدللها شنو التغير؟
- مو هسه حتى ترجع الثقه والمحبه بينكم لازم تتعبلها شويه
- ولييييييييه مالي خلك هالسوااالف كلش مو وكت تمضيك
- ههههه عند عمك حلها لاتهتم
- حييييوو لعمنا لكل شي عندو حلول

دحكت نفسيه حسين تغيييرت للاحسن ويه عمي من صدك كان كد كلمتو وكدر يطيب كلبو ويتعامل وياه بهداوه وشاله من بير الحزن الي كان واكع بي حسين ...

ثاني يوم حسين متأنق لابس كلشي اسود بس مرتب لحيتو وشعرو وعمي نفس الشي تأنق وسلم السياره لحسين وراحو لبيتها ..
بس وكتها رجع عمي وحسين مو وياه
ومن سألتو قال .. عافهم يطلعون وحدهم يتفاهمون وهو رجع بتكسي ..

و بيومها استلمتو تحقيق لحسين وهو حكالي
رضت بالعجل وقلتلو انته امك امنتك عندي وانا اهلي ماعلموني اخون الامانه و كنت منتظره تهدا وترجعلي ..
ورايحين متمشين ومتغدين سوا و رجع حسين يومو كله على التلفون وياها ..

صار يريد يرجع وعمي ماخلاه رغم هو يحلفلو يمين صار زين وجراح كل ساعه يخابر ويسال ايمتى يرجع بس عمي مارضى حسين يروح وكان السبب هو انه تعود عليه
و بعدو ماشبع من كعدتو هين ..

كنت افكر دايماً بنزول سالم وتاخر هالمره مانزل وسألت اسامه عنو قلت خاف صايرلو شي الرجال وماندري عنو بس طلع عمي موصيه مايرجع هين الا وكت مايمشي حسين
وهو مايرضى حسين يروح ضال بس يحلف يمين لجراح انه يداريه ومايخليه يعتاز شي بس يبقى يومين واليومين تجر اسبوع
عاد انا قلتلو لجراح على سالفه ابنو الميت
وفهمتو عليها يلا قنع وخلاه براحتو ..

حسين كل يومين والثالث يطلع العصريه لبيت ورود وياخذها ويطلعون ومايرجع لليل
بس كلها مصاريف لاهلها حلويات من افخر الانواع ومعجنات حتى يكسبهم شويه ومايجادلوه بسالفه طلعتهم لان هو يستحي يضل كاعد بيتهم واخوتها موجودين ..
كان يصرف على اهلها اكثر من الي يصرفو عليها ..
وعمي هو متكفل باختيار الاماكن الي يطلعولها ويوصفها اله بالضبط ويحددلو هاليوم ينفع لهالمكان اخذ السياره وتوكل
واخيي روح عمرو الفرفره وحدرو حبيبتو
مااصير اسمع الا صوت السشوار وغاليييه امسحي الحذاء هذني الي حفظتهن منو ..

مارجعنا الا للعيد وبااربعين ابوي تلاكيت ويه اخوتي .. تصافت بينا النفوس ورجعنا اهل
وعايله وحده ..

بهاليوم انا تذكرت كلام امي عن غراض كانت ضامتها ويه حسين .. ورحت قلتلو عليها ضل صافن وبعدين مشى بالعجل للحديقه ضل يتلمس تربتها وقالي ..
- يولو هين انا من يوم ماطلعنا من حديثه وكت الدواعش دفنت هين كارتونه بيها غراض امي قالت اعزاز عليها
- عجل يلا احفر وطلعها

ساعدتو وشلنه السنادين وصار هو يحفر
لحد مادحكناها واثنينا تعاونو عليها وطلعناها
مسحت عنها التراب وشلت اللاصق وفتحتها

كنا كاعدين بعدنا حدر الحفره وصرنا نكلب بالغراض الي بيها ..
دحكت هين دفاتر وكل واحد افتحو بنفس الاهداء والعنوان الي بالدفتر هذاك
فرحت وقلتلو ..
- حسين هاذي دفاتر مذكرات امي من شبابها
- عجل ليش هي مخصصتها الك !
- ماعرف هي قلتلي اخر مره انها هديه الي ضامتها من اول مانولدت
- اخذيهن الك ماتدخل بهالاشياء انا
بس اذا مكتوب شي يخصني تحكيلي عنو
- ايي خيي اكيد احكيلك

عزلنه الدفاتر على جهه وصرنا ندحك الباقي
كانت علبه موسيقى قديمه من هاذي ام الابره
عجبتو لحسين وقالي خليها عندي
وكيس قماش صغير احمر مخروط بخيط
فتحتو وبداخلو دحكت كلاده بشكل مقود السفينه لونها فضي وزنجيلها عباره عن خيط اسود .. ومحبس فضه وبي شذره زركه
وسوار كان فالت من جهتو الثانيه بس مشكل بالقفل .. شكلو كان كف ايد ازرك وهو فضه مايله للسواد لانها قديمه بس عليه حفر بالجهتين ..

ودحكت هين البوم صور صرنا ندحكهن انا وحسين .. كانت صور امي بالجامعه وصورها ويه ابوها وجدتها و زملائها
تمنيت الكى صوره الها بزواجها الاول
بس مالكيت اي اثر اله ..

دحكت هين اخر شي كانت علاكه بيضه فتحتها وبداخلها كان يشمغ فلسطيني
حسين سألني ..
- تتوقعين المن هذا ؟
- ماعرف والله امي عمرها ماجابت طاريه
- ركزي بالمذكرات بلكت كاتبه شي عليه
- اييه بس هذا خليه عندي
- اخذ الصور الي
- اخذ كم وحده انا والباقي الك
- يلا اختاري بس مو اكثر من اربعه

اختاريت وحده هي واهلها و اثنين بالجامعه و وحده الها وحدها كاعده باب بيت و حدرها بنيه صغيره تضفرلها شعرها ..
هذني صارن حصتي من الصور
بقيت لحسين من بين كل هالغراض بس الالبوم وعلبه الموسيقى ..

هو اخذهن لغرفتو وانا لميت الباقي بنفس الكارتونه ودخلتها للبيت ..
عفت حسين يعدل التراب وصرت اتمشى بغرفه امي ...

غرفتها لهاليوم مثل مااخر مره تركتها
كل ماانظفها ارجع كل شي مكانو

الفرشه الكريميه نفسها .. ثوب امي الابيض الي اخر مره لبستو وابوي غيرو الها كبل ماندخل ندحكها هين بعدو معلك بالزاويه
وحدرو دشداشه ابوي السوده الي نزعها بيوم مامرتو بالمنام ..

المشط على حطتو عفتو على الميز بس امسح عنو التراب واخليه نفس ماكان ..

تلفون امي مقفول ومحطوط على الميز بجهتهه من الفراش وتلفون ابوي نفس الشي على جهتو مقفول ونفس مكانو ..

ماعون التمر بالوسط على الفراش ما شلتو من هين بس اغير التمرات الي بيه وارجعو مكانو ..

البطانيه بس اشمسها وارجعها مسفطه مثل ماامي تحب ترتبها هين بالطول على الفرشه بالنص الاخير منها ..

كنتور امي بعدو نفسو بترتيبها مالمسنا منه شي .. بس ذهبها اخذتو جمعتو وخليته على الميز حتى انطيه لحسين وهو من دحكو
قالي رجعيه وين ماكان هذا ماتلبسو غير امي
قلتلو هي وصيتها هذا الك قالي لو اموت من الجوع ماابيع منو شي ولا مرتي تلمسو
وهو بنفسو اخذه ورجعه بالكنتور وقفل عليه
والفلوس الي خلاهن جراح هين هم مااخذ منهن شي بس هذني قال وكت مااعتاز اخذهن ... الا الذهب قفل عليه فد قفله

وانا خليت حدرو طقم اللؤلؤ هذاك هم
قلت ان مايستحقو غير امي ويضل شاهد على ذكراها ..

قفلنا الغرفه وعفناها نفس مااهلنا عافوهه
وكل بيتنه على حطه ايد امي ...

تفاهمت ويه حسين على هالبيت وقلتلو اكعد بي وكت تتزوج لاتخلي بيت اهلنا فارغ
و هو قالي هذا بيتك اخاف رجلك مايرضى
قلتلو بيتي وانا اريدو لاخوي ماله حك يتدخل
بس هو ماقتنع وقالي نتبادل اسلمك سند الكاع
وايمتى ماتحبين تبنيها انا ادفعلك فلوس البنيان واخذ البيت باسمي يصير وانا وافقت على هالشي .. و حكينا هالشي لجراح وهو مااعترض قال حلالكم وانتو احرار بي
وصار البيت لحسين والكاع الي
اسامه اصلا مادخلتو بهالشي لا من كبل ولا اليوم يعني مايدري انا كان ورثي بيت وبعدين تحول كاع الي عرفو بالاخير انا امي تاركتلي كاع هين حدر بيتنا ...

وكت رجعت لبيتي قررت اكمل قرايه مذكرات امي ...
الايام الي راحت انا تركتو لان التهيت بحسين
وشغل البيت ودلال اسامه وكت مايرجع نن سفرو يتدلل لحد ماانا ابزع واصير ادورلي زعله ...

رجعت فتحت دفتر امي الاخير الي بديت بيه
وهالمره كلبت لاخرو ودحكت مكتوب ..

''
العنوان / حديثتي الشقراء
التاريخ / ٢٩-٥-٢٠١٨

حياه مليئه بالنعم
هكذا سأختم سيرتي الذاتيه هنا على هذه السطور
كثيراً ما كنت افكر كيف ستكون نهايه ماابتدأت بهِ من تأريخ لحياتي ؟ لكن اليوم
اختصرتها باجمل ماحملت من معنى ..
انها النِــعَـم هي كل ماحصدت في كل يوم
كانت حياه مفعمه بالحب والقوه والكثير من المحن التي أتت وذهبت بفضل الله ورحمته
كانت ' حديثه ' هي موطني ومأمني وحبي الاول ، انا قد احببت الارض قبل الشخص
واليوم ككل صباح انا أُمعن النظر في صفاء سمائها واراقب مشرق الشمس على ارضها
في حديثتي سماء لم ولن تصفها كل ماكتبت من كلمات .. في حديثتي انا ارى نفسي من قبل ان اولد .. كل ما تمعنت في جوها الخلاب يراودني احساس بانني كنت هنا يوماً ما دون ان اعلم انها قدري وفي تربتها محطتي الاخيره .. قد عشقتها عشقًُ قدستهُ بالبر في اهليها .. لو ننظر للكم الغير محدود من النعم التي رُزقت بها فور مجيئي هنا سوف ينتابُنا شعور الذهول وبعض العظمه لها لكن
بعيداً عن كل هذا كان رزقي الابدي منها هو شعور الرضا بين تلك النسمات التي لم تنفك يوماً تداعب وجنتي بلطيف بردها
كأنني اتبادل ابتسامه من القلب معها
انا مُتيمه العشق بها .. عشقتها على الصيت
في ليالي بغداد كنت اراقب القمر وانا اتخيل صافي الفرات في ارضها يسري
واتخيل ذالك الجسر الذي يعوم على مائه
واتحسس النسمات برأتي وابادلها الابتسامه على ضوء القمر .. ابعث السلام لارض لم تكن يوماً لي مجهوله فقد كنت دائمه السؤال عنها حتى يوم اللقاء ....
قد احتوتني في أضعف وقتي ، لملمت حطامي وارجعتني في زهر الشباب
قد عالجتني ' عيون حجلان ' و اطعمتني اشجارها لذيذ الفاكهه و احبتني يوم اهدتني لشخص كان يصب فيي جُل حبه لها
و ستحتويني تربتها هذا اكثر مايفرح قلبي اليوم .. قد تحققت جميع امنياتي معها
لم يكن سيفرحني اكثر من كوني سأدفن فيها
بين ثنايا عشيقتي سانام براحه وهناء للأبد..

هنا سأختم هذه السنه بهذا اليوم
لا قدره لي على كتابه المزيد ساكتفي بكوني هنا احمل بعض القوى ..

من يقرأ هذا من بعدي فليكمل التأريخ ان احب

اودعتكم نفسي في ثنايا الصفحات
فرفقاً بما بين ايديكم .

''

بكيت هالمره بكي ماله صوت ولا حزن بس بكيت فرح .. انا ورثت كل سيره امي وحياتها
كلبي مايسع هالفرحه عبرتها بدموعي
ومن وكتها قررت انا اكمل كتابه الصفحات باحلى الكلام الي يليق بذكرى امي ..

بعد كم يوم سمعت من جراح ان بديرتنا ضيفه لبنانيه .. ماخليتو ينام الليل اذا مو انا عندي كل التفاصيل عليها .. وقلت خير يارب عساها فال خير علينا ..

وكم يوم وعرفت انها صارت دخيله بيتنا
وضيفه جراح وموصي عليها قلت يالله اخيي تلحلح شويه وصار يتمعشك ..
بس هالفرحه مادامت كان كل يوم يثبتلي اني بوادي وهو بوادي ثاني !

قلت لازم اروح ادحك البنيه .. ورحت دحكتها بنيه طويله وضعيفه بشرتها حنطيه جسمها رشيق صوتها ناعم وهادي وشعرها قصير
يوصل لنص ركبتها ولونه اسود ..

اصابعها رفاع واظافرها طوال مزيدتها نعومه .. كانت ماتحكي شي بس تسمعلنا
واذا صار وحكت فتسأل عن جراح وحياتو
وانا مااقصر امدحلها باخوي واحكيلها علتو الزواج مايرضى يتزوج وبعمرو ما مدحكلو حرمه ولا عندو صاحبه حياتو كلها شغل وكونات وسلاح والحين صارت مشيخه

دحكت البنت مصورتو بتلفونها وهو واكف بالحديقه ويه اخوتي وتقربها عليه وتضل ادحكلو بالليل .. حسيتها معجبه بي وتاكدت من هالشي وكت ماصارت هي تحضر ملابسو للدوام تكويها وتعلكها اول شي وعمتي الصبح تحدر تاخذهن بالعجل لان كاملات وكل ظنها انا مرتبتهن ..

كانت تغطي على هالسالفه بحجه انها فارغه ماعندها شي تتلهى بي وتحب تساعدني
وتاخذهن تكوي بدالي وانا امشيها ...
وشكثر قلتلو دحكلها اهتم بيها شويه البنت تحبك وهو كل رد يردو يشيط اعصابي
وبالاخص ساعه الي حضنتو ضليت اكفش بشعر راسي واقول هذا اخيي بي شي مو خالي ! مامعقول ماعندو ولا ذره احساس وهو شاب وبنيه مثل الورد تحضنو ويضل صافن عليها وينتظرها توخر وتالي يعوفها حتى ينام نعسان !!!!
وصلت بيه اقولو .. انته شاب لو حجاره؟!
يقولي شاب بعقل محجر لاتعبين نفسك

يكتلني ببروده بهالشي يذبحني .. صارت عندي امنيه يقولي راسلت بنيه . دحكت حساب بنيه وعجبتني حتى لو ممثله
هم افرح والله بس اريد احس اخوي رجال طبيعي ،، اخوتي البقيه كاضيها طلعات بكروبات و حفلات بجامعاتهم وكل واحد عندو درزن زميلات وهالجراح يقولي
شسويلها ؟ وراح ارجعها لبنان !!!

ضليت افكر بوكتها ان الحرمه الي تكدر تجذب عين اخوي وتكسر عقلو هاذي البسها شاره ذهبيه واوكف اهوسلها احلى الهوسات احتفل بدخلتها لحياتنا عساها كانت من المريخ
هم اركض احضنها وافرشلها الكاع ورد بس خلي تغيرو وتسعدو مثل هالشباب ...

بس اجاني هالخبر منو مثل ضربه على الراس ... ساعه ماقالي ..
- يولو الحكي
- ها خيي خير ؟
- اخيك انطى وعد بالزواج
-بصلاه محمد عليك ايمتى !!؟
- بعد على مد العمر
-شلووون ولمنو وايمتى صار هالوعد

صار يحكيلي على لينا وشصار بينهم وانا بس شاكه الحلك بالضحكه وحتى ماكدرت اكعد
افتر مثل المهبوله بالبيت وانا اهوس واضحك
وهو قالي..
- يولي انا مدري شضرب على عقلي وانطيتها هالوعد
-ها خيي بسم الله بعدك الحين تندمت !
-اي والله تندمت عجل يابه انا وين وهي وين
- خيي ماقلتلك البنت بكل شي راضيه وعلى امرك تصير وتحبك
- سوالف جهال هاي انا ماتوكل عندي
غلطت والله غلطت غلطططت تسرعت
مادري شلون قلتلها هالكلام ياااالله شسويت اناا ياربي
-خيي سمي بالله شسالفتك هي كلها كلمتين
- يولي انا مو من الي يخلف بوعدو والحين شلووون بيه !!!
-اي ولا تخلفو هالمره شيصير يعني
-ول احكيلها انا ماريد اتزوجها لا احبها ولا مقتنع بيها بس مادري شجاني وانطيتها وعد
مادري يمكن غرتني شكل الحياه الصورتها الي بعدين مادري والله ماعرف شجاني و وعدت
- خيي ان تعيشلنا فاحنه كلمن يستقر بحياتو ويتهنى بشبابو وتضل انته لاعشت لنفسك ولا تهنيت مثل هالشباب فكر بنفسك مابيها شي
وعيش مثل تتمنى النه
- غلوي انا مهني نفسي بعيشتي
- لاااا والله ما مهنيها
خيي العيشه بالشغل والاصحاب شي و ويه المره والخصوصيه والمشاعر شي ثاني
ياخيي تتندم لو ماجربت هالشعور تتندم لو ماكانت الك عايلتك الخاصه
- مو وكتها غاليه مو وكتها هالسوالف بعيده عن افكاري هسه وابد ماتقربلها لان تخربلي الاول والتالي
- ايييه ما البنت قلتلك انتظرك
وانته ايمتى ماادحك صار الوكت مناسب
روحلها وعيش حياتك
- لاااا ماروحلها هاي غلطه غلطتها بالوعد
واخلفو للوعد بس مااروح
- اييييي جرااااح كبرتهاااا والله
- ماكدر غاليه ماكدر هاي مو من ثوبي
تعبني واذا فكرت بيها كزوجه ماتحمل ابقيها دقيقه وحده بلبنان لازم اجيبها هين والزواج مو وكتو الحين فخليني معتبرها غلطه وصارت وسبحان الي مايغلط
هاي غلطه الشاطر بعشره وهاي غلطتي انطيتها وعد وراح اخلف بي من هالساعه
- بس البنت راح تنتظرك
- على السنه الجايه اوصللها خبر بزواجي وانتهت السالفه
- حرام خيي البنت حبتك من كلبها والله تعيش وياهه احلى شعور حتى لو بعد عشر سنين
- لا عمره مايكبر هالحب ويصير عندي
انا مامستعد لهالاشياء وعقلي مامقتنع بيها
ايمممتى مايقتنع عقلي يلا افكر ارتبط وهالمره غلطت ويمكن غرني كلامها ولحظه الوداع هاذي بس هسه صحيت على نفسي
وعرفت كااان غلط كل شي صار غلط

ضل مصر على موقفو ويلوم بنفسو على كلمتو الها وانا خليتو براحتو قلت يمكن بيوم يغير رأيو ...

شهر الثاني من سنه ٢٠١٩ ..
صرت حامل والبيت كله فرح لهالخبر
اسامه قرر يرتب غرفه للاطفال ونعزل بيها اغراضهم حتى نخفف من غرفتنا
وانا الي على حملي شهرين واسامه مسافر
و بنتي مخلصه حليب وصيت عمي يشتريلها
و كنت بغرفتي مشغله التلفزيون الها على اغاني الاطفال وانا واكفه واجرب الف اليشمغ الفلسطيني على راسي مثل ماكانو اخوتي يلبسوه ...

رتبتو وخليت حمره طوخ وصرت اخذ صور بي وارسلتها الهم وصرنا نتراسل ونضحك

- يعني كان مكتوب عني بالدفاتر الي عندك !
-لا اني اعرفج بنت محمد من زمان
هالدفاتر ماجابتلي هالمعلومه عيوني هي الفهمتهه
- شلون عرفت هالشي بعيونك ! يعني لان فارق العمر بيني وبين حسين
- لا بس لون العيون هذا اني مانساه حتى بكبري اضل اتذكره
انطيني الدفاتر وبعدين نكمل حجي يلا بنتي

دحكت عندو كلام مهم لكل حياتي لازم اسمعو
وبسبب هالشي رحت واخذتلو الدفاتر
لسنه ٩١،٩٢،٩٣
قلتلو...
- هذني اظنهن كافيات حتى تلكى جوابك

اخذهن من ايدي وطلع بدون اي كلام
وانا ضليت سهرانه للصبح افكر بسالفتهم
و نزلت حضرت الريوك وهو كعد ياكل
ومابينه اي كلام ... كمل اكلو وصعد لمكتبو
وضل طول اليوم فوك مانزل حتى للغدا

نمت هالليله من تعب التفكير والسهر
واول ماصبحت اخذت بنتي خليتها حدر هديل
وكفيت الريوك وانتظرتو يصعد وبعدها شاورت عمتي وقلتلها عندي موضوع خاص ويه عمي راح اطول عندو لا تصيحوني
ورحت لمكتبو ..

دكيت الباب ودخلت دحكتو يشرب دواه
اشرلي اكعد وراح كعد وره مكتبو ..

قلتلو ..
- على وعدنا عمي !
- اسألي يلا اسمعج
- قبل كلشي احكيلي لكيت الجواب ؟
- اي لكيته
- زين
شلون صارت امي حبيبتك ! وشوصلها لحديثه وتزوجت الشيخ !! ؟
- هذا كل سؤال قصه بحاله
راح احجيلج من البدايه احسن بس بالمقابل
تحلفين يمين الله هالكلام مايعرفه لارجلج ولا اخوتج ولا احد من اهلنا حتى لو متت اني
ماتحجين لاحد
- لا والله مااخلي احد من اهلنا يعرفون بكلامنا مااشهر باامي انا كل عمري حافظه
لسرها
- زين يابه زين

ضليت ساكته وادحكلو وهو رجع راسو على الكرسي وضل يدحك للشباك وقالي ..
- اكيد وصلك خبر عن قصتي قبل ماتزوج ام سالم
- اييه بس الي عرفتو من بعد ما نجبرت بالزواج بس عن البدايه ماعرف شي
- حجولج شكد جنت مخبل عليهه
وشكد سىويت مشاكل ؟
- اييه كل هذا عرفتو
- عرفتي بهالمشاكل السويتهه ويه ابويه
بس اكيد متعرفين شنو الصارلي بوكتهه وليش تخبلت هيج عليهم
- عجل خليني اسمعهه منك بالتفصيل

فتح الكتاب واخذ كلاده امي ولفها على اصابعو وضلت عينو على الشباك وقالي ..

- جنت طالع من معركه خسرانه
اول مابديت اخسر بحياتي
كاعد بيت صغير وبي سبع نفرات وجهال
وخسران اخوتي ٣ وحلالي كله ديرتي طلعت منهه مكسور وانحرمت من ترابها
فقير جنت وبراسي مسؤوليه البيت وايهاب الله يرحمه جان فلوسه على كده معلم جان وماعنده وظيفه بغداد بعده وصار يشتغل بالسوك على كد الي يطلعهن يوميته يعيش بيهن هو وعياله واني متكفل بالبقيه
جنت اشتغل بالنجاره واخذوني ناس من الدوله بليله وضحاها صرت عميل عدهم
اشتغل بالمخابرات ، كدرت شويه اعين اهلي
ومن تحسن حالي قدمت على الكليه ودخلت علوم الرياضايات ماجنت احبهه بس هي صارت قسمتي بعد وجنت محتاج لاي شهاده جامعيه حتى استفاد منهه بشغلي
داومت اول اسبوعين عادي والثالث بيه عرفتها ...
جانت طفله هادئه ناعمه مالها حس حتى لو ضحكت ماينسمع صوت لضحكتهه بس تبين هالسنون وتضحك على كلمه يولو من احجيها
جانت ضعيفه بكم ماده واني اجمعهه ويه اثنين من صديقاتها واشرحلهن وانتظرها تطلع من الامتحان حتى اراجع وياها سؤال سؤال هي تجاوب بس صديقتنا الثانيه تكضيهه بجي كلشي متحل
صرنا نطلع سوه نشرب الكهوه واني احجيلهه على حديثه انطيتهه كل تفصيل بيهه
جانت تمنعني من التدخين وتنطيني بدل كل جكاره نستله صغيرونه اكلها واني فرحان
لانها تهتملي وبيهه نسيت كل تعبي كلشي بشغلي واحنه بوكت حرب نسيته يمهه
جانت ثكيله ورزنه الكلمه ماتحجيهه الا بمغزى وباقي الحديث بس تبتسم وتستمع
اكثر ماحبيته بيهه تستمعلي وتفهمني بكل تعبي وتعذرني حتى لو اني مقصر وغلطان
صرت اراسلهه بالعطله اكتبلهه بالورقه واحطهه يم باب بيتهم بالليل واشمر الحصو على شباكهه .. شايفته هذا شباك بيوت الشناشيل قبل من خشب واني اطكطك عليه بهالحصو واضل خاتل بالظلمه انتظرها تنزل وتفتح الباب واباوعلهه اشبع عيني منها واضل انتظر رد الرساله
مرات اخذه بنفس الليله ومرات لا اذا جنت كاتبلهه راح اطلع لفد مكان واتاخر متردلي الا من ارجع مره ثانيه
هنا بهالرسايل اعترفتلها بحبي مره ثانيه
جنت معترفلها مره قبل بالدوام وماقبلت
كالتلي ماكدر انطيك كلمه لان ابويه قاري فاتحتي لواحد من ولد خواله
مابعدني هالشي عنها ولا لحظه ضليت متعلق بيها وانتظرت هالفرصه واعترفتلها مره ثانيه
و وافقت صارت بينا هدايا ومكاتيب هواي
وانجنيت بحبها من كد ما تعلقت بيها جنت اسميها امي .. حبيتها بكل ذره شعور جانت بيه .. بس صارت بينا مواقف بسبب الشغل وغبت عنها فتره بسبب الحرب ومن رجعت لكيتها مخطوبه
جانت تبجي مراضيه بهالزواج وابوها جبرها عليه وامها جانت مو خوش هم الها ايد بالسالفه و صارت هالخطوبه
تاذيت وانهاريت بهالخبر خفت تضيع من ايدي راحتي الوحيده بهالدنيا
جنت وياها مرتاح ماجذب بشي على طبيعتي
وهالشي اني مفتقده بحياتي بسبب الشغل
ماردت اخسر المكان الوحيد الي يحتويني بدون ماخجل او احسب حساب لشي

- لاا زين ماسويت والله بردتلي كلبي
وارتاحيت لان بهالدنيا اكو الي اخذ حك امي
وماخلى ظلامها يتهنون
انا مايفرق عندي ذكر محمد يبقى ابوي الشيخ خالد وهذاك لا رحمه الله عليه عساه ماتهنى
- عوفج منهم يابه راحو بعد
لاتخليهم بالج .. امج لكت الي عوضها وعاشت باقي عمرها متهنيه وسعيده
- امي ما حبتك مثل حب ابوي
-مادري
- لاا انا متاكده من هالشي ماريد اقهرك بهالكلام بس هذا الي عاشتو امي بالحقيقه
- مادري يمكن
بس انتي لو سامعتهه من تكول ايوب
جان شكيتي بهالشي اليوم مثلي

على هاذي كلمتو خلاني اتصفن معقول
حبو اكبر من حب الشيخ حبيبها الي ضحتلو بعافيتها؟

قالي ..
- تاخر الوكت يلا خلي انام وسدي على هالمواضيع بعد لاتخليهن يعيشن وهنه بالاصل ميتات

طلعت وهو نزل وطفى الاضويه الجوه
رحت لغرفتي وضليت افكر باخر كلامو
واخر شي قررت اكتشف هالشي بنفسي من كلام امي ..

وصرت اعيش كل يومي على هالدفاتر واقرا بدايه حب امي وابوي وبدايه زواجهم وطفولتنه ،زعلهم ورضاهم وكلام الغزل بينهم قريت لاخر كلمه انكتبت منها ومادحكت الها اي ذكر لعمي هين بأشتياق او محنه كلشي من بعد ذاك الزواج هو يخص
ملك هذه المملكه .. هالوصف هو لابوي
الشيخ وماتداخل بوصفو اي اطياف من الماضي ...
بس مره وحده ذكرت شي فهمتو يخصو
كانت كاتبه ..
' ا
رجعت ويه اخوي حسين لحديثه يوم الجمعه
ودخلت غرفه امي وسلمت عليها مثل كل مره من ادخللها ، سلمت على ابوي وبوست ثوبو
ومخدتو وامي نفس الشي ..

حاولت اخلي هالزواج يخرب وماكدرت
وضع الحرب بوكتها ماجان ينطيني مفكه حتى اشوف حل وياها وضال على الحدود وبين العدو رافع عيني للسمه وادعي يتاخر هالزواج بس اكمل هالمهمه وارجع يومين
ويدزوني لمهمه ثانيه وضاع الوكت بالشغل
وما كدرت احل شي
اخر شي رحت حاولت ويه ابويه لان جنت منطيها كلمه تنتظرني بس كم يوم واجي احاجي ابوهه وخلي الي يصير يصير
بس الله يسلمه ابويه ماقبل وكالي انته مو شريف و واحد دوني ماعندك غيره تحط عينك على عرض غيرك وتريد تورطنا بالحرام وماامشي وياك بهالشي
اكوله هاي مرتي اني حبيبتي الي وهمه الاخذوهه مني شلون اعيش وهي ياخذها غيري مافهمني ولا قبل وتعاركنا اني وياه
وضليت محتار شلون اواجهه بيا عين اروحلهه ! شاسوي وموعد عرسهم قرب ؟
ضليت متمرمر لحد ماعرفت يوم عقد المحكمه كلت اكتله وماخليه ياخذها مني
ورحت من الصبح مصمم اكتله والسلاح شايله وياي بس ربج ماقاسمله الموت على ايدي .. واحد صاحبي مراقبني ويعرف بسالفتي ولزمني ماخلاني اكتله
شفتهم يطلعون كدام عيني حتى يكطعون مهر
وهو مجلب بيه ويحلفني يمين الله اعوفهم ومو قسمتي وشرف البنيه وسمعتهه تروح لو تهورت ورحتلهم
خفت عليهه شلون اروح واخلي عليهه حجايه
وكفيت عنهم
وره يومين ابويه جابلي مره ويكولي هاي صارت الك على ذمتك بعد
يابه شلون على ذمتي وين شايفهه اني
وين اهلهه يكولي هاي اني اختاريتهه الك وطلبتهه من اهلهه واخذتهه بعباتهه هنا تكطعون مهر المحكمه وتتزوجون
ردت وياه يعوفهه ماتزوجهه مالي نفس بيهه
ماقبل عفتهه كاعده عدهم وهجيت وره عرسهم يلا رجعت
رجعت واجاني اتصال من صديقتنه جانت بينا مرسال .. ورحتلهه جان تنطيني الي صبرني على فراكها كل هالسنين

دنك وفتح المجر وطلع بوكس اسود ودفعه لجهتي .. اخذتو وخليتو بحضني وفتحتو
دحكت ورقه مطبكه صغيره اخذتها بايدي وقلتلو ..
-افتحها ؟
- اي افتحي واقريلي الي بيهه

فتحتهه ودحكت مامكتوب شي هين
الورقه فارغه !
كلبتها بالجهتين ومابيهه ولا حرف بس
نقطه بحبر اسود هاي كل الي بالورقه
قلتلو ..
- مامكتوب بيها شي !
- عوفيهه هسه شوفي الباقي

خليتهه حدري واخذت الثوب
كان اسود وبيه دكه بيضه بشكل ورد صغير
الثوب نص ردان ومابيه شي غير دكم صغار على طولو .. كان حجمو صغير قلتلو ..
- هذا ثوب امي !
- اي ثوبها جانت تلبسه بالجامعه واني مره وصيتهه ماتلبسه بعد لان ماجنت اتحمل اشوفهه بي تفتر بين الطلاب
جان هالثوب ميزهه بين كل الطالبات
تطلع بي ناعمه مثل الحرير
- يعني هالثوب محتفظ بي طول هالسنين !
- عشت بي جان حاضر وياي بكل زمان ومكان
- زين شنو الي قلتلي اقراه ! مادحكت شي
- هو هنا رباط السالفه
ان هالورقه مايكدر يقراهه ويفهمها غيرنه
دتشوفين اكو نقطه بس بكل الورقه
اني اعرف اقراهه لهاي النقطه بس انتي حسبتيهه ولا شي
- يعني شتقرا من نقطه !!! امي شتقصد بيها!
- تقصد بيها النهايه
شوفي هالثوب هي بعد مانفذت كل محاولاتهه بمواصلتي وكل الصبر والتعب ضاع
هي اختارته الي تذكار منهه
رغم اني خذلتهه ومااجيتها على الموعد ولا حتى اعتذرتلها بس جانت تفكر بيه واختارته الي حتى اهدء بي نفسي
شي من ريحتهه يضل وياي املكه كل العمر
اني ادري الكلام والعتب جان بصدرهه هواي
بس اختصرته كله بنقطه .
دتكولي معناهه هنا النهايه .. نهايتنا ..
وفهمتها وفهمت وجعها باخر ليالي بيت ابوهه
حسيت حتى ان هالثوب شايل دموعهه كلشي جنت افهمه منها
هالمره اني قاريها قرايه اعرفها حتى بغيابي شلون تتصرف وتعيش
وكل يوم اني اشيل بي الثوب اقرا بي النهايه
واكول بعدنا مانتهينا لابد بيوم الكاج

تلمست الثوب و تخيلتها لابستو .. قلتلو ..
-امي دايماً بليغه الكلام بس اليوم فاقت كل ظنوني بيها
ههه نقطه ! بلاغتها وصلت تودع بنقطه !
ماتخطر على بال بشر والله
- شفتي هاي المره البليغه هي حبيبتي
هاي الي كدرت تلين عودي
- زين امي شلون عاشت بذاك الزواج !
تعرف شي عنو ؟ هي عمرها ماذكرتلي شي يخصو

ضل يدحكلي وبعدين رجع لنفس كعدتو ويدحك للشباك وقالي ..
- ما توفقت وياهم واطلكو
- مااحسك صدكت بهالكلام
- بس ماجذبت همه اطلكو
- بدون ذكر تفاصيل ؟
- مااعرفها
- بس قريت كل الدفاتر الي بذاك الوكت
- من تقريها نحجي بالموضوع
- زين اخر سؤال وامشي
- اسألي
- ليش ضليت الها وفي كل هالسنين ؟!
- اذا تقصدين مادخلت علاقه بعدها فاني صارت عندي علاقات بعدها هواي
- واااالله !؟
- اي والله هواي صادقت بنات بس كلهن اسبوعين واعوفهن اكثر وحده طولت وياي شهر وعفتهه
- ليش يعني ! فهمني اكثر عمي فدوه
- شوفي اني جنت رافض فكره اني اعيش بدون حب هالشي اني جنت محتاجه واتأمل بيوم الكاه مره ثانيه
بس المشكله اني جنت ادورهه بكل وحده
كل مره اقابلهه ادور بيها شي منها شي يشبهه
ردت الكى نفس حبها نفس طريقتها بمحاورتي بس بغير انسانه ومالكيت عبث جنت احاول بهالشي وصارت تكضيه وكت
لا اكثر

تخيلي جنت البنيه الي اختارها لازم حنطاويه وعيونها سود وضعيفه اول ايام اضل استمعلها واقارن مرات اشوف شي مقارب الها واكمل وياهه بس اشرط عليهه تسويلي شعرهه اسود وبيهن مايقبلن كبل اكوللهه اودعناج واعوفهه تهوس وحدهه
وهاي الي طولت وياي شهر قبلت بكلشي كلتلهه عليه .. جانت تضفر شعرهه صفح
و ماتخلي من المكياج غير الكحله ومرطب شفه وعافت لبس البناطير والفساتين الكصيره والتزمت بذوقي وشروطي بتغييرها لمده شهر
وبعدين كالتلي ماكدر اضل هيج هذا مو ستايلي ولا شخصيتي تقبلني مثل مااني
كلتلهه ماتفيديني واودعناج
هاي علاقاتي كلهه هيج
تالي اقتنعت ان ماكو مره تشبهها وماتكدر وحده تصير مثلها بعيني حتى لو بايدي سويتها يبقى بيها نقص وعاد بطلت اصادق بنات

كنت ابتسم وادحكلو .. شي داخلي فرح ان امي ماتعوضها مره ، و مالها بديل ولا مثيل
قلتلو ..
- زين وعمتي ام سالم ما حبيتها ولا جربت تخليها تصير مثلها
- احترمها المره تحملتني وصبرت وياي كل هالعمر وهي ام ولدي معزتها ماتتعدى هالشي
وبعمري ماجربت اخليها تصير مثل الي بالي
مادري بس النفس وماتهوى

بهالحظه صاحتني عمتي وتحكيلي صار الغدا
وقطعنا حديثتا ونزلنا نتغدا وهين تذكرت انا
شلون ماسألتو ايمتى التقى بامي مره ثانيه وشلون ؟!

كملنه الغدا وقلت اروح اسألو بس هو دخل غرفتو عاد انا صعدت لغرفتي وضليت ادحك لنفسي بالمرايه .. اريد ادحك شي مني يشبها
بس انا افرق عن امي
الشي الوحيد بملامحي يشبهها هو تقسيم الوجه
خدود مرتفعه وخشم رفيع مثلها الباقي مو شبهها .. تمنيت لو اني اشبهها بكل شي
تمنيت لو اني ضعيفه وناعمه مثلها
لو ان شعري اسود مثل شعرها

انجضعت وضليت افكر بهالكلام وتعجبت منو
وانقهرت على امي شلون عاشت هذيك الايام
بلوعه كلبها ! وضل بالي سؤالين ..
شنو الصار بزواجها ؟
و هي مشاعرها لعمي شلون صارت بعد الفراك ؟

لليل رحت لعمي واخذت منه الدفاتر وبديت اقراهن ....

قريت وصفها لحبها الاول وخذلانها منو
وطول سهرها وانتظارها وبدايه زواجها
يمكن هذا الجزء كان الاكثر فضول عندي
قريتو بهداوه بعد يومين من بدايتي بهالدفاتر
وفهمت منو ان عيشتها كانت بالجنوب
وتعبت بيها ...

لليل وصلت لموقف كان ويه ولد عمهم
وكلبت الصفحه ودحكت هين فارق بالتاريخ
بيوم واحد وكلبت بعدها حتى اتاكد ودحكت بالاخير هم فارق بتاريخ يومين !!!!

رجعت قريت الاحداث وضل بالي سؤال عن اخر موقف !؟
ثاني يوم بديت بدفتر جديد وهم دحكت بيه نقص .. بس استمريت اقرا لحد ماوصلت
انتقالهم للعيشه ببغداد من بعدها باقي بس ورقتين فارغه ! وينتهي الدفتر !
وامي كانت هين دامجه الكلام كله بسنه
٩١ من بعد ماولدتني كانت تكتب هالاحداث
ماخرتهم عن ذاك الدفتر .. وهين مالكيت التكمله !
فتحت دفتر ثاني وتاملت ادحك التكمله هين
ومالكيت غير بدايه لسنه جديده ويه ابوي
بالمعمل ...

هين بدا الشك عندي بعمي ورحتلو
هو يسهر بمكتبو دكيت الباب وانا شايله الدفتر الاخير .. من سمحلي ادخل بالعجل قلتلو ..
- وين الاوراق الباقيه !؟؟
ليش شلعتهم من الدفتر هي هاذي الامانه !

دحكلي ورافع حاجبو وقالي ..
- صوتج

كضبت راسي وقلتلو ..
- اسفه عمي عليت صوتي بوجهك بس افهمني انا كلبي محروك على هالاوراق
وينهم !؟ بيهن اهم شي لازم اعرفو
متاكده هنه عندك
- مايفيدنج بنتي
- لااا يفيدني اريد اعرف شصار وامي تطلكت ! ليش محمد عمري مادحكتو ولاسمعت عنو خبر ولا عن اهلو !
ليش امي ولدتني بحديثه مو بغداد !
ليش انا باسم الشيخ خالد مو باسم محمد !!
كلها جوابها هيييين واريد اعرفو

وكف حدري وتلمس وجهي مسح دموعي وقالي ..
- اني احجيلج عليهن
-لااا اريد اقراهن بنفسي
- غاليه اخاف عليج والله راح تضلين متعبه نفسج بيهن وهنه راحن انتهن
- لازم اعرفهن عمي هاذي اساااس حياتي لازم اعرفو
- اني اجاوبج على كلشي
-لاا اريد الاوراق اريد اقرا وادحك ااامي شلون كانت عايشه الي صار هي كتبتو الي
حتى انا اقراه واعذرها على ضياع نسبي ذاك
هي كل هالدفاتر كتبتهن وضمتهن الي حتى تجاوبني على الي ماكدرتلو بحياتها
اريد اعرفو منها مو منك عمي الله يخليك
انطيني الاوراق
- زين بس تقريهن يمي هنا مو وحدج
-ماشي بس انطيني خلي اقرا
-اكعدي ارتاحي

كعدت وهديت نفسي وهو طلعهن من بين كتبو وخلاهن بايدي ... وصرت اقرا من مواقفها ويه ابن عمهم وعيشتهم بغداد
وظيفتها وفاه اهلها وجعها وغربتها عتابها لاهلها وذكرها لعمي وبالاخر .. عذابها على ايدهم .

امي بنهايه هذا كله كانت كاتبه ..
' اليوم انا قد استجمعت قواي وذكرت لكِ ما كنت اتهرب من ذكراه كل مساء
لا علم لي ان كنت سأشفى من اثار هذهِ الايام لكن انا لن اطيق العيش بها كل يوم
ياخذني الخوف والهلع حيناً واخر اجملهُ بقدر ولادتك
رغم كثره وحدتي والمي المكبوت الا انني اتقوى بكِ ولاجلكِ '

هين عرفت انا شلون كانت بدايتي
وتخيلت منظر امي بهذاك العذاب منهم وكرهت نفسي وبكيت
انا صرتلها الذكرى على اذاها

وتالي نزعتو وخليته على طرف الفراش
وهين عمي دخل وانطاني العلاكه
تشكرتو عليها وهو كانت عينو على اليشمغ
اخذو بايده وتلمسو وقالي ...
- منين حصلتي لهاليشمغ !
- ورثتو من امي

كربو لوجهو وغمض عينو وبعدها بالعجل شمرو على الفراش وقالي اسف وطلع بالعجل

رجعت انا اخذتو ورتبتو وبالي على عمي
شنو الصار ؟
دحكت هين بالعلاكه علبه صغيره مال حبوب كهوه اخذتها ورحت لمكتبو كان بابو مفتوح
كبل دخلت وهو كاعد وكاضب راسو
ويعصر بي خفت من منظرو حسيتو عصبي
بهداوه خليت العلبه على الميز وقلتلو ..
- هاذي حبوب الكهوه عمي نسيتها

ما رد عليه وانا عفتها وطلعت .. ضلت بالي سالفتو والليل كله افكر بي .. تالي رحت طلعت دفاتر امي وردت ابدا اقراهن من البدايه ...

دحكت اول اربع دفاتر مابيها الاهداء ولا العنوان نفسو .. بديت اقرا يومياتها بالمدرسه الاعداديه وللساعه ٣ نعست وسديتهن ونمت

ثاني يوم بالمطبخ واكفه واحضر للغدا
انا خليت الشريعه بالدهن وكلبتها وتذكرت
مداليه عمي الزيتونيه ....

بالعجل طفيت الطباخ وقلت لعمتي تروح بدالي تكمل الغدا .. وصعدت لغرفتي
فتحت المجر واخذت الكيس وطشرتهن على الفراش واخذت الكلاده دحكتها نفسها
والله هاذي نفسها شلون مانتبهت عليها من الاول !!!!!

بالعجل مشيت لمكتب عمي وفتحت الباب ودخلت وهو كان مخلي كتاب ويقرا ولابس مناظرو ، من دحكني دخلت هالشكل ضل صافن بوجهي وانا خليت الكلاده على صفحه كتابو ..

كنت الهث بالنفس واعصابي فايره وبس اريد اسمعلي كلمه وحده تفهمني شي ..
ضل هو يدحكلها وبعدين تلمسها بطرف اصبعو وقالي ..

- زين بعدها بنفس الخيط الاسود

رفعها بايدو وصار يدحكلها من كل جهه
وانا قلتلو ..
- شنو الي يربطكم ! منين تعرفها لامي !!!!

خلاها بنص الكتاب وسدو عليها واشرلي اكعد .. كعدت وقلتلو ..
- عمي ماضلت بيه اعصاب اختصرها الي بكلمتين بروح اعزازك
- جانت حبيبتي

فكيت حلكي ودحكلتو قلتلو ..
-اااامي ! امي حبيبتك !
- هي كل شي بزمانها بقته الج !
-ايييه كل شي
- السوار والمحبس الفضي موجودات عندج ؟
- ايييه كلهن عندي هذني يخصنك يعني !!!
- اي هذني تذكاري عدها
اكو دفتر مذكرات وياهن لو مالكيتي ؟
- وتعرف بالدفاتر هم !!!
-ها صارت دفاتر ! موجودات عندج هنا ؟
-عممي لتعلب باعصابي انا الي سالتك بالاول
- هاي جاوبتج على المهم مو ردتي اختصر واختصرتلج بعد شكو عصبيه
- بس شلون انته وامي ! شلون مافهمت من ايمتى تعرفها !
- من الجامعه
هسه كوليلي كم دفتر عندج ومن ياسنه
- عندي هواي دفاتر
-موجود بيهن دفتر للثمانينات او بدايه التسعين
- ايييه موجود
- انطيني اقراهن
-لااااا هاذي خصوصيات امي شلون تقراهه
-ارجعهن الج بس افهم شغلتين منها
-عمي تجاوبني على كل سؤال وبعدين نتفاهم عليهن
-لاا انطينياهن واحجيلج كل الي بالج واكثر
-مانطيهن هالدفاتر بيها حياه امي كلها وزواجها شلون انته تقراهه !!!
- ما ريد بس اعرف شغلتين والله واي شي على زواجهم ماقراه ولا اريده بس انطيني دفتر سنه التسعين والثمانين

ضليت مدنكه راسي والم بشعري وهو وكف حدري وقالي ...
- غاليه هالدفتر بي جواب كضيت عمري اسأل عليه بس افهمه وانطيج الي تريدي
اطلبي على هالدفاتر اي شي بالج
فلوس سفر ملك اي شي اعتبريه صار

دحكت بنص عينو وقلتلو ..
- اريد تفهمني كل شي من اول يوم بينكم
و تحلف الحين بروح امي انك ما تضم عني حرف واحد
- مايحتاج الحلفان اني ماخلف بكلمتي
جيبيهن ونتفاهم بعدين
- زين بس دفتر التسعين
- لا والثمانيات هم لان هاي كلها تخصني
- زين بس على الوعد
- يومين انطيني اقراهن والثالث احجيلج كلشي
- ماشي

رحت لغرفتي وصرت افتح بالدفاتر بعصبيه
مابنفسي اسلمهن اله بس لازم اعرف شنو المضموم عني .. لازم اسمع منه شنو الصار

اخذتله دفتر سنه ٨٧،٨٨،٩٠،...
دفتر ال ٨٩ ماموجود بينهن ...
خليتهن حدرو وقلتلو ...
-دفتر لسنه ٨٩ ماموجود وهذني لحد التسعين
- مشكوره

عفته وطلعت نزلت جوه كعدت على الدرج
وانا اريد استوعب هالشي .. معقول امي كانت تحبو ! عجل وحبها لابوي ؟؟؟
شلون رضت تزوجني لابن حبيبها الاولي!

اكلتني هالاسئله بيومها وماكدرت ارتاح وانتظر تمشي الساعات بالعجل ...
وبالليل انا بغرفتي منجضعه وافكر بنفس هالسالفه واندكت الباب ..
رحت فتحت ودحكت عمي قالي...
- مالكيت بيهن الجواب
- متاكد ؟ هنه ثلاث دفاتر اقراهن زين
- خلصتهن وماكو الجواب الي اريده
انطيني بعد من سنه التسعين
- قريتهن صفحه صفحه !!
-يابه تفهمين انتي لو لا
- عمي بعد هالسنه ابوي موجود وماحب تقرا خصوصياتهم

ضل يكح ومبين عندو نوبه الربو انطيته مي وهو ضل ياخذ نفس وقالي..
- لاتعبيني الله يخليج
همه باي سنه تزوجو ؟

ردت اجاوبو بالعجل وبعدين تذكرت سالفتي وراح يعرف اني مو بنت الشيخ عاد قلتلو ..
- تزوجو بالتسعين
- جذابه

شرب مي ودحكلي وقالي ..
- حسين مواليده ٩٧ يعني زواجهم ب ٩٦
لحد هالسنه لاتنطيني اي دفتر بس القبلهه اريدهن

انخلقت انا بكره منها وتعب وماكنت الها فرحه كنت هم عليها
شالتني بحملها مهمومه وولدتني مهمومه

ماحسيت على نفسي الا بحضن عمي يهديني بس انا مذبوحه من كل هذا
احس كلبي يغلي من القهر على هالذكرى

كان يهمس باذني ..
- تحبج هي تحبج انتي روحها ولدتج بمحبه
ماكرهتج ولا صرتي هم على كلبها
-لااااا انا ذكراها الاليمه انا ضليت اذكرها بهذاك اليوم كل عمري
- امج مو هيج والله يا يابه مو هيج
- تحبني اعرفها تحبني بس تذكر بيه وجعها
- ماتذكر شي لاا لا تفكرين هيج
امج مره عاقله تعرف تفصل بين الاشياء
وهي خصصت الج المحبه والهم الكره
ماقريتي كاتبتلج اتقوى بيج والج انتي جنتي مصدر قوتها حتى تعيش
لو مو انتي بحياتها ومسؤوليتها جان ماتت
من زمان تضعف وتاذي نفسها بالتفكير والمرض ياخذها وتموت ضعيفه بس انتي
صرتيلها سبب حتى تنسى وتعيش من جديد
وتأسس حياه حلوه الج
ماقريتي شلون اشتغلت وبنتلج بيت ودللتج
وحاربت نفسها علمودج
امج وكت تحب ماتخلي بمحبوبها نقطه ضعف ولا كره انتي اول فرحتها وعينها الي فتحت للحياه من جديد لتفكرين هيج وتظلميها وتظلمين نفسج
اني اتصور انتو عشتو احلى ايام سوا وصرتو صديقات واخوات مو صح هالحجي

هزيتلو براسي اي ..وانا امسح دموعي
وهو قالي ..
- لو ما تحبج ماتحميج وتعيش بالغربه علمودج جان ذبتج على اهله وهمه يحيرون بيج بس هي رادتج وياهه سند ورفيقه بحياتها
وانتي بعد اعرف باامج وحنيتها عليج

هديت بكلامو وضليت صافنه وافكر بامي بهذاك الوكت شلون كانت عايشه؟
واتذكر طفولتي وياهه ودلالها ووكفتها معي بكل تفصيل بحياتي ورجعت تاكدت من محبتها الي وصدكت بكلام عمي عنها
صح امي لو ماتعزني كان خلتني عند اهلو لمحمد بس هي عاشت الي ..

قلتلو ...
- تعرف شي عنهم ؟ امي قالت محمد استشهد
صحيح هالشي ؟
- لاا طبعا مو صحيح
هيج نماذج ماتنال شرف الشهاده
تموت بالخزي والعار
- يعني شصار وياه ؟

رجع كعد كدام مكتبو وحط ايدو وره راسو
وقالي ...
- ماسألتي على ذاك الكديش الثاني
- ماضنيت يهمك امرو وتعرفو
-ههههه هذاااا ااااخ هذاا
هذا انتقامي منه انتقام
يمكن بكبره مايعذبوه مثل ما عذبته
- يعني الك ذكرى وياه !!
- نهايته جانت على ايدي
- انته قتلتو !
- اي بس جان نذل تعبني جان مستفز
يعرف معلم على التحقيق وشابع بجو التعذيب
ماتفرق عنده ومايحجي الي اريده منه
بس والله كسرته تكسير طلعت عن ديني وياه
بحيث ساعه ما موته هو جان منتهي مابي بس نفس
ماكو شبر تعرفين شنو شبر ! هذا الشبر بجسمه ماجان صاحي
يمكن لو احجيلج شسويتله تشردين مني

ضل يبتسم ويدحك للسكف قلتلو ..
- كسرتو ضرب لو شلون
- كلشي ضرب بالايد بالحدايد
اخذته لمكان مابي غير الله واحنه
عذبته عذاب بجهنم مايعذبوه مثله هناك يشمروه بالنار ويعوفوه بس اني كعدتله ركبه ونص عيشته الموووت كل دقيقه
جنت اسأله شسويتلها وشردت ويكولي ماكولك شسويت وشلون عذبتها يخليني انعمي باعصابي واصبها كلها عليه
محمد جان من كد الخوف هو يحجي بداله
بس هم ماشفى كلبي يمتمت بكلامه مافهمت شي كله جذب بجذب

- محمد هم عذبتو مثل هذاك ؟

- ايييي عذبته وخليته يحلف ويصيح الويل بكل كلمه باعترافه
جان يكولي مااذيتها بشي بس حبستها
هاي بالبدايه بعدين من شديت عليه وعفته يون يومين صار يكول شخطت جسمها بس هيج و شكد اذيته اكثر يكولي ماذكر بس هذني جنت سكران بس هيج اذكر
هذا رحمته شويه مو مثل ذاك طلعت عن ديني وياه ومادري بعد الله شلون راح يحاسبني عليه بس كلشي الجان فدوه الها
تستاهل ومقصر بحقها

- يعني مو انته قتلتو لمحمد. ؟

-لاا اني عذبته بس ما كتلته
جاان يوكفني عن كتله سبب واحد بس
خفت لا صدك تطلع حامل واصير اني قاتل ابو ابنهه ماردت اني اصير السبب بيتمه
بس هالسبب شفعله يمي وطلعته اعرج

- يعني كان عندو خبر بحمل امي وكتها؟

- اي هي جانت متصله بي باول شهر من روحتهه وكايلتله حامل وهو مجذبهه
يكول جذابه كم سنه يمي ماحبلت ليش من راحت يلا صارت حبلت
اخذله على كل حجايه ضربه نسته اسمه

- عجل منو قتلو ؟

- هو جان متورط بديون وخريط بالحرام
هذاك الكديش مورطه وضاله براسه فلوس
مادافعهن وكتلوه الجماعه

- تتذكرو زين ! اشبهو انا

- اذكره شلون ماذكره
هذا بالكبر وماانساه
حاقد عليه اكثر من حقد ابليس للبشر
عيونه جوزيه على حمار طابعات بالي
جنت اتلذذ بخوفه هذاك كل مااضربه اتذكر شلون اخذها وكطع مهرها وانهي بايدي
طلعت بي كل حركه كلبي من يوم ماعرفت بيها مخطوبه لهاليوم كله اذيته عليه
جنت اذا اكعد واتذكرلي سالفه عليها اروح اعذبه
جان يسالني شتريد مني شعندك وياي من ثار
واكوله اكرهك بس اكرهك

من كثر ماكنت مندمجه بتفاصيل كلامو وشكلو شلون تغيرت ملامحو بهالكلام
وكت الي عدل كعدتو جفلت وهو ضحك وقالي..
-هاا صرتي تخافين مني
-لاا
-ههههه تره اني اعتزلت الشغل بعد تقاعدت ماسوي شي لتخافين
-اييه
- شو جنج خفتي مني يولي
خاف كرهتيني على هالشي ؟

خليت هين جوه مخده امي الرساله الي كتبها عمي وماكدر يوصلها الها بذاك الزمن
وصاني اخليها جوه مخدتها وقتلي خليها تندفن بمكانها بعد مالها لازم تضل يمي ...

كانت هالرساله هي رساله اعتذار كاتبها يوم ما كان يسمع من صاحبتها انها متعذبه هين بزواجها بعد ماتوفى ابوها وكعدت بغداد
وصارت تشقى وتتعب حتى تدبر العيشه ومتاذيه من ابن عمهم ومذله محمد
كانت طالبه منها توصيه بلكت يكدر يبعدو عنها وهو متاخر يلا عرف هالشي من صاحبتها بسبب بعد الاتصال بينهم
ويوم الي سمع بيها مذلوله بينهم وهو بعيد
رد عليها بهالرساله ورايحه صاحبتها لبيتها حتى توصلها الها وما مدخليها للبيت بحجه انها مو هين وهي بالحقيقه محبوسه عدهم
الرساله كانت عباره عن قصيده مكتوب بيها ..
✨✨
كذبت عيني وعيني دمعها سكاب
يا حيف بنت الحسب ترخص نواصيها

خيول الضوامر تراها خلفها تنساب
يا وقعة الشوم صار النذل راعيها

يا مهيرتي كِفي الملام مثلك أنا منصاب
لا الدار داري ولا ديرة هلي فيها

الغربه مضيعة النسب والمشتكي منعاب
والحظ يا ما حمير بالعز كاسيها

✨✨

يقول استحرمت اكتبلها شي ثاني وردت بس انها تعذرني على الي فات وماصار نصيب تقراها ...

دحكت هين معلكه صور لامي وابوي مطبوعه على خشب وموزعه على طول الحايط الي وره الجربايه ...

حسين كان حدري واكف وقالي ..
- مالكيت احسن من التصوير اعيشهم بي من جديد

ضليت اتمعن بصورهم وبعدها طلعت وقفلت بابهم .. وقفلت هين على سؤال اي حب هو اكبر عند امي ؟
لان فهمت انا فكري اصغر من ان افهمها بكبر مشاعرها
رغم عيشتي وياهم وشهدت على حبهم بس عجزت افهم كثير من التفاصيل بي
ورغم وصف عمي لمحبتها ومشاعرها كبل
هم عجزت اتخيلها وافهمها
خليت مشاعر امي شي مبهم عندي لان مايعرف جوابو غيرها ...

وكت رجعت لبيتي انتظرت سفر اسامه ورحت لعمي حتى احكيلو قراري ..
دخلت لمكتبو ووكفت حدرو وقلتلو ..
- عمي ناويه اكمل كتابه سيره امي واحتاج منك تساعدني بهالشي انته تفهمها اكثر مني
- شلون ناويه تكتبيها ؟
- ماكدر على كتابتها بنفسي ناويه اسلمها لكاتب وفكرت بيك انته
- اني تعذريني بهالشي ماكدر اكتبها مرتين
بحزنها ولا اكدر اوصف راحتها ويه ابوج
- عجل اسلمها لكاتب ثاني بس ارويلي كل التفاصيل الي تعديتها
- راح احجيلج الي تريدي بس احاسبج اذا ماطلعت سيرتها بشكل راقي

ابتسمتلو وكعدت حدرو وصرنا نتناقش بكل تفصيل الها ...

حسين خلدهم بالتصوير وانا خلدتهم بالكتابه

................... النهايـــه .................

حبي مينفع لان خاص بالسن فاذا تستعملي عل البشرة ميتخدر كلش

فاخذي مخدر emla☺️🌸

#ملوكه

هذيني حبي البيجات👇🏻🙃 لملابس وأحذية رياضية ..
نادر ماتلكين محل متخصص بهالشي..فاذا تدورين بالسوك تلكين جم قطعه سبورتية بالمحلات

#ملوكه