..

احس دنيتي صارت شي ثاني وكت الي تزوجت وجربت شعور المحبه وصار بحياتي شي غير اخوتي هين راحه بنص الصدر تصير .. شي مثل ان هاي اللحظه هي الي انا مخلوقه حتى اسويها ..

هو كان يحكيلي عن رحلتو بس انا ماكنت اسمعو زين مادري بالي صفن بس ادحكلو
وهو حس عليه كرصني وحكالي ..
- احبج ولج
-ههههه وانا احبك اسوم
- صدقه لهالحلك من شوكت كاعده
-من الاربعه
- حيل ليش حبيبي جان ضليتي نايمه اني بكل الاحوال اجيج
- لاا ماكدرت اذا مو ادحكك تدخل وانتظارك شي حلو
- احبج والله يمكن هاي احلى رجعه للبيت صارتلي كل مره ارجع مطفي كبل بوجهي للغرفه اسبح وانام واهلي مايدرون بيه شوكت اجي شوكت اطلع
- ماكو بعد هالشي ياعيني خلص هذاك زمان
هسه كل شي بالتفصيل عندي
-ههههه حلو هالتفاصيل بيهه اهتمام يجنن
يلا خلي نصعد
- اغسلهن واصعد وراك
- لا انتظرج كمليهن بسرعه يلا

اخذتهن غسلت بالعجل ونشفت ايدي ورحنه صعدنا سوه لغرفتنا .. دخل يسبح وانا غيرت ملابسي لبست شورت وفانيله وفتحت شعري بعدو رطب ..
اول ماطلع يصوفر ويحكيلي ..
- مشتاااق يالله مشتاااق
ضحكت وحضنتو واشتميتو براحه يالله صارت راحتي بشمتو .. سبحان الي غير خوفي ومزاجيتي ولساني كلهن غيرهن لحب ورضا هالشكل حدرو ..

نمت بحضنو وضليت انتظرو يغفى هالتفاصيل صح هي صغيره بس تعنيلي شي كبير ... احس مالازم افوت دقيقه من اني ادحكلو ..

نمت بعد نومتو وماحسيت بعد الا على صوتو وهو يكعدني .. كعدت وبوستو صرت الم شعري وحكالي ..
- حبيبي شمسويه بدون متكوليلي
- شنو ماسويت شي
- لاا مسويه
- شنو !

دحكتلو وهو جر ايدي بوسها وحكالي ..
- اروح فدوا لمريتي والله من سمعت هالحجي فرحتي زادت اضعاف اضعاف فرحتي الصبح بشوفتج
- ياعساها ماتفاركك
- شكرا غاليه من صدك شكراً رجعتي لامي الشي الي حتى بفلوسي ماكدرت ارجعه
- هاا ههه لاا هذا واجبي
- والله ونعم من اختاريت اخت رجال والله اصيله فرحتي كلبي ورفعتي راسي
امي حجتلي قبل شويه نزلت اسلم عليهه وصارت تحجيلي شلون داريتيهه هالايام ومارضيتي الها تصرف عمتي
- اكيد ماارضى عجل شنو فرقها هي عنها انا اكره الي يحسبون نفسهم اسياد والقوم عدهم عبيد
- اي والله هالشي من زمان ردت اغيره ومتغير .. تعرفيني دائماً طالع ومادري شيصير ميصير هنا بس مرات هديل تراسلني تحجيلي اذا امي مغثوثه واضل احجي ويه امي بس هي كضتها اسمتو واسكتو عمكم وفضله وعيب وميصير .. صرت اشتغل واصرف على البيت حتى لا تضل امي تحس بهالشي بس هم مافاد عاد عفتهه بعد
بس وكفتج ريحت كلببببي هسه اني صدك صدك مرتاح ومطمن لو شكد مااغيب عن البيت عندي الي يداري اهلي بدون منيه
- اسامه حبيبي ضل متطمن عهد علي ماارضى الهم ذله ولو اعرف ازعل الكل اشتري رضاك
- فدوه لله شلون مره معدله

بوسني وهين حسيت باحلى انتصار بحياتي
نزلنه كعدنا ويه الاهل وهين دحكت عمتي متبسمه وكاعده حدر ابنها ..
حضرت الغدا والتمينا كلنه نتغدا وانا كاعده حدرو هو ياكل ويشاورني .. وانا اتبسم وادحك الكل عيونو علينه احكيلو بعدين
بس هو مستمر يشاورني ويضحك بهداوه ..

كضينا هاليومين سوا ومرتاحين خابرت امي
حتى افهم منها ايمتى العزيمه حكتلي ..
اعذريني بنتي بس وضع البيت مو مال عزايم اثنينه محروكات كلب وبالنه مشدوه على ولدنا بس تصفى الامور اسويلك احلى عزيمه

عذرتها وماحكيت هالشي لاسامه قلتلو مادام جراح مارجع مالي نفس ادخل البيت خلي اشبع من كعدتك هين لاحكين على الروحه ..

اخذني اسامه زياره للامام الكاظم عليه السلام
رحنه بعد صلاه المغرب وسهرنا بره لنص الليل يلا رجعنه محملين لكل واحد بالبيت شي من الكاظميه ..

ام سالم صارت ماتحكي ويه عمتي ولا وياي
وانا مشدده على عمتي انها ماتتحرك مثلها
وغيرت طبع هديل وروتينها ..
صار الطبخ مسؤوليتي انا الي احدد نوع الاكل اليوم واطبخو ونتقاسم التنظيف انا وهديل هي عليها الجوه وانا الفوك وطلبت من عمي يلغي جيه هالمره جيرانهم الي تنظف هين وهو ماحكالي غير صار انتهى موضوعها ..

بيت فيصل يحدرون علينه كل يومين يتعشون ويانه ويمشون بنص الليل لبيتهم .. طيبين ودحكتهم مثل اطباع هالبيت باردين ومالهم دخل بشي ... يمكن انا الوحيده الي يطلعلي صوت بالبيت ..

انا اطلعلهم مواضيع واخليهم يسولفون واشغل هديل وياي وماخليهه تضل بغرفتها طول النهار .. انوعلهم بالاكل الحلويات و غيرت نظامهم الي ماياكلون اذا مو على الميز حتى لو شرب الجاي .. صارو اذا كاعدين بالصاله
اخذلهم الحلى عندهم وشويه شويه تغير هالشي ..
اسامه اول ايام بارد وثكيل بتصرفو حدر اهلو
بس بعدين خليتو يكسر هالشي .. صرت احكيلو ..
البيت والاهل راحه مو حرج
وهو على سوالفي يسولف شويه ويضحك وطلع من جمود هذاك ويه اهلو ..

اما عمي فهو عالم وحدو صعب اصلو
كل يوميه الصبح اسمع من مكتبو احلى الاغاني .. اكثر اغنيه اسمعها يشغلها هي
' ماريده الي ميرابط يا بابا ماريده '

سألتو على اسمها مره لاني مالكيتها باليوتيوب حكالي اسمها ' شناشيل '

تدرين شكان ردو !
-شنو مارضى بي ؟
- يحكيلي من قلك العوز بس اكل وانته ظنك احنه الكبار هين ناسينهم وعايفيهم بجوع ؟ حتى ننتظر جناب جراح ياخذلهم مؤونه !

غاليه ردت اركع راسي بالحيط والله تعبت حتى جمعتهم فلس فلس ويستهين بيها !

تالي حكيتلو .. يابه وش الي يرضيك فهمني
انا طعتك وتعبتك وسويت كل هذا لاجلك شنو اليرضيك اكثر بعد احكيلي فهمني !

حكالي .. تضل للحين ماتوصل عشر من الي اريده منك .
قلتلو بس فهمني المطلوب شنو !
حكالي .. المطلوب تفكر باكثر من رضاي
قلتلو يابه انا ماعندي شي حتى اسوي اكثر من الي وصلتو للحين انا بطرك روحي
والفلس الي عندي ذبيتو عليهم وكعدت مصفر
حكالي .. اييه مثل ما جمعتهم اجمع غيرهم
قلتلو .. وين المفروض اوصل !
حكالي .. اعلى من الي تعلمت عليه
قلتلو .. ماعندي الي يساعدني على هالشي لو عندي ماكصر والله
حكالي .. كيفك ضل بره واسس حياتك وحدك وانسى هالبيت
قلتلو .. ماتنازل انا عن رضاك يابه وارجع لبيتي مرفوع الراس انطيني بعد صبر وان شاء الله اعجبك
حكالي .. مااظن راح ادبرها وحدك يمكن تاملت بيك ازيد من اللازم صدك من كال ايد وحده ماتصفك
قلتلو .. يابه انا مو بحاجه الايد الي تصفك
انا ايدي الوحده تربت وتداري والنه غير كعده واوعدك هي الاخيره

- اوووف ياخيي والله مافهمت ابوي شناوي

- انا بديت افهمو بس مطلبو صعب وانا مصفر الفلس يحتاجلي وكت اكثر

- حكيتلو على حسين فهمت شسالفتو هالمكرود؟

- ههه هذااا سالفته اتعس مني
اول ما فتح حلكو حسين ابوي سكتو وحكالو اذا يرجع جراح بسنه انته بسنتين ويجوز لو ادبرهه لو لا وامشي اطلع بره انا طلبت اتفاهم ويه جراح شدخلك انته
حكالو الك عشر دقايق تدحك امك وترجع من وين مااجيت

- اويلي عليك ياحسين من يومو مظلوم من ابوي وشابع رزايل .. هسه شناوي تسوي !؟

.
.
يتبع

كان بيها مقطع حلو هو يرددو ساعه مايرتب كتبو ..
' فدوه للشناشيلات تكعد بيهن الحلوات
تكثر بيهن الضحكات فدوه للشناشيلات '

كثر ماحاولت اكسر على برود حياتو ماكدرت
هو معتزل بمكتبو او حدر التلفزيون ..
ما ينام بغرفتو ويه ام سالم عندو بمكتبو قنفه تنفتح وتصير بيها مكان ينام بي براحه ..

مرات اسأل اسامه شعندو عمي معتزل بمكتبو؟ يحكيلي عندو جو خاص مايحب احد يكطعو عليه ..

خلصت العشر ايام وصارت رحله اسامه وهالمره يطول عشره ايام يلا يرجع ..
احس بروحتو تغيب نص فرحتي وياه

نفس الايام مشت وجراح وحسين على وضعهم يشتغلون ليل نهار .. جراح يشتغل بمحل ابوي العصر لحد الليل والنهار عماله
هو وحسين .. امي تمرضت على فراك حسين
معدتهه دايماً تاذيهه وتتقيء وروحهه ذبلانه
احكي ويه ابوي يردلي .. كثر دلالهه لحسين ومحبته نساهه تزرع بي القيم خلي كل واحد يتحمل نتجيه خطأو ...

عدا هالشهر واخوتي بعاد عن البيت
وشهر ثاني وهمه نفس الحال .. امي فجاه تحسن حالها بس ماعرفت شلون من سألتها
تحكيلي ... رضيت بقسمتنا ..

انا حللت وطلعت حامل اخذني عمي بوكتها للتحليل لان اسامه مسافر .. بيومها فرحه البيت بهالخبر خلتني ابكي والله بالاخص عمتي ام اسامه تهلهل وتحضن وتبوس
وعينها تلمع من الفرح ..

مانطيت خبر لاسامه كان بنفسي ادحك فرحتو حدري واحكيلو .. ووصيتهم ماينطوه خبر
ومن رجع بعد اربع ايام وتلكيتو من الصبح
مثل كل مره خليتو ياكل ويسبح وبعدين كبل مايكعد قلتلو ..
- حبيبي شتتمنى ؟
- تضلون بخير
- يعني ماتتمنى تصير اب
- ههه هذا حلم مو بس امنيه
- وليش تحسبو بعيد
- مادري بس ماتخيل نفسي اب
- زين واذا قلتلك راح تصير اب بعد سبع شهور
-ابوسج من راسج

دحكتلو وانا اضحك وهو كان ينشف بشعرو صفن شويه ودحكلي حكالي ..
-حامل ؟

هزيتلو براسي وهو شمر المنشفه وحدر كضب وجهي وفاك عينو ويحكيلي ..
- مو شقى ! الله عليج
- ههه والله حامل بشهرين
- جذابه ماصدك شوفيني وين تحليل شوكت شلون عرفتي
-عمي اخذني حللت لاني كنت شاكه بنفسي حامل وتاكدت قبل اربع ايام
-يعني صدك صدك حامل وراح ارجع بعد الكاج بطه تتمشين

ضحكت وهو هجم عليه يبوس ويضحك وبعدين عافني وطلع ركض راح لغرفه امو يحكيلها غاليه حامل وصوتو هرج البيت
ورجعلي يحكيلي طلعي التحليل ..
انطيته الورقه وضل يقراهه ويبوس بيه
ويرجع يبوسني يحكيلي ...
- لج انتي سبع سعادات انطيتي لحياتي
بيش اجازيج حبيبييي
- ضل حبني وانا اصير بطه مو ابطل مااعجبك
- هو غير ميت على شوفتج بهالبطن
من هسه اكلج اذا ولد اسمه ايهاب واذا بنيه كيفج انتي اختاري
- ان شاء الله

بيومها اسامه يغفى شويه ويكعد يتلمس ويضحك ويرجع يغمض وينام ..
ارسلت لاخوتي بالكروب ..
' عندي بشاره يا حنين يرد اول واحد ويحصلها '
بالعجل رد اسر ' اخيك هين بشري '
كتبتلو ' انته اصغر خال واحنهم '
ردلي ' منين اجاني الخال '
كبل مااكتب شي ارسل حر ' ها يولو حامل '
كتبتلهم ' ايييه ماتباركون '
ارسلولي بصمه اثنينهم يحكون بيها
' ياابه مبرووك والعز النا بهالولد اخيرا راح نصير خوال ول غاليه ابنك عندو سبع خوال منو كدو يابه '

رماح ارسلي .. ' تكومين بالسلامه يولي والله وكبرتي وسبقتيني بالولد '
قلتلو ' تزوج يلا حتى يحضر ابني عرسك '
ارسلي ' زواج الاكشر هذا مادحكين الصار '

ضلينه نسولف وبعد وين ارسلي جراح
' غلوي ول يابه فرحتلك والله ان شاء الله تجيبيلنه بنت ونشبعها دلال مثلك '
قلتلو ' ايييه والله انا بعد اتمناهه بنت وانته كون تسميها '

اختفى هين بعد ما رد بس اخوتي عوضو عنو
حسين بالاخر يلا ارسلي ' يولي بس اولدي واشمريه على امي خليها تتلهى بي وانا اربيه الك وياهه ماتحيرين ولاتعبين نفسك احنه هين معوزين حنان وجهال وهرج انتو خليكم لاتموعون ثلج بيتكم '

ضحكت من كلبي على حكيو وتمنيت ربي ينطيهم طول العمر ويدللون ولدي ..

مشت الايام ودخلت انا بالرابع وهين سمعت من جراح راح يتصل بابوي ..
ضليت ادعيلو يتوفق هالمره .. وانا اتراسل ويه حسين حتى اعرف ايمتى يخلصون حكي واتصل على جراح افهم شسوا ..

دقايق وارسلي حسين رايحين للمضيف ابوي طلبنه ...
وضليت على نار ماسكنت ولا هديت لحد ما عبرت ساعتين واتصل جراح ..
- ها خيي بشر
- والله ترزلنا خوش رزاله بس لان شويه
-ليش ترزلتو وشصار انته شسويت بهالسالفه ؟
- انا مو تدرين كنت اشتغل طول هالاربع شهور
-اييه
- اييه جمعت مبلغ زين وتراسل ويه رماح دليتو على مكان كنت جامع بي كم فلس بيتنه وجابلي ضفتهن على الي عندي وكدرت
اجهز مؤونه كامله لهالعوايل حملنه كيه كامله واخذناهه وزعناهه على كل بيت كبل الفجر
ماعرفو هذني منين بس حسين كان كاتب بورقه بداخل كل كارتونه ' شكر لدم اخونا '
والله وزعناهن وانا كنت مسوي قائمه باسمائهم والله تعبت من كثر ماسألت على كل بيت وشعندو من عيال ..
واليوم خلصنه ابوي من حكيتلو يابه صار لازم نتفاهم حكالي احدر هين ..
كعدت حدرو حكيتلو الي سويناه الهم

#شقراء_بغداد

الجزء_الثاني_بارت_٢٣


شهر التاسع من سنه ٢٠١٧ ...

كاعده بالحديقه على المرجوحه اهزها برجلي واني صافنه بالفراغ .. اتذكر شلون جان هالبيت مايهدأ ولا يسكن من صوت ولعب الجهال ... دلع غاليه وصوت ضحكتها العالي ويه اخوتها وركضها من غرفه لغرفه
عركاتهه ويه حسين ودمعاتهه الي تتحايل بيهه لجراح حتى يعاقب حسين لان زعلها

رماح الهادىء الصغيرون ربى على ايدي
جان يحب يحط راسه بحضني واضل افرك بشعره ويغفى ..

عباس وصكر صارولي اصدقاء رغم صغرهم بس جانو حنينين ويايه ومطيعين
يحبون يكعدون بالهول ينتظروني اجيبلهم سله المكعبات ونكعد نسوي قلعه وهمه يهندسوهه بكيفهم ..

صديقي الاول جراح .. ماشفت مثل حنيه كلبه ولا مثل رزانته .. طفولته كلهه كضاهه يشتري ونسوي عزومه لو ينتظر حلى اليوم شنو .. طبعه طبع ابوه ..
يحب يخصص اخر الليل لسوالف يومه
ويستشير ويفضفض وياكل بنفس الوكت ..
كبر وصار يستحي مني .. يراقبني بعيونه
ويبتسم لو تلاكت عيني بعينه ..

طلع الكل من هالبيت وبقى بس مليان بذكرياتهم ..

صار اربع شهور كلبي مفرفح على ابني لو سبب واحد اعرفه ليش جان ارتاح كلبي
جان على الاقل خابرته وعلمته شلون يحل مشكلته ويه ابوه ويرجعلي .. بس عيني بعين الله انتظر يهديله السبيل ..

مشى العمر وتغيرت الايام .. وبينت هسه وحده الكُبر .. صرت اني هسه مثل جارتي
الي جنت اخذلهه ماعون الحلاوه الجكليتيه
وكت العصريه واكول خطيه مره جبيره وكاعده وحدهه اروح اونسهه واكعد يمهه ..

دار الزمن وصرت اني المره الجبيره الكاعده وحدهه والي تفرح باليدك بابهه ...

بدأ صوت المآذن يعلى بالتجويد قبل الاذان
وهنا انفتحت الباب واشوف هذا حسين ابني
حفزت من مكاني وكلبي رفرف عليه
رحت حضنته ودموعي تجري وهو ساكت وحاط راسه بركبتي ..
- وليدي يمه ياروحي يارووحي
- يمه مشتاكلج والله والله مشتاكلج
- ياروح امك حبيبي حسوون رجعت بعد رجعت متروح مو
- لا يمه اروح ابوي طردني للمره الثانيه
- شنوو ليش حسين ليش انته شمسوي لابوك شمسوي ولك يمه فهمني مو كلبي شيب
- يمه وحك عينك وغلاتك عندي مامسوي شي وحك عافيتك ماغلطان بشي ولا ماشي بدوب مو زين ولا بادره مني العيبه مو تعرفيني انتي ياامي مو تعرفيني رباه ايدك انا
شتعرفين اغلط واحرك كلب ابوي !!!
- لا يابعد روحي لا والله اعرفك ماتسوي الموزين وكل خطوه ماتخطيها اذا مو برضانا بس شسوي يايمه من حركه كلبي اسال لعد ابوك مترهي عليك ويطردك !!
- ايييه مترهي مترهي
- لاا والله يحبك لك انته ابن عزيزه كلبه انته متعرف شنو من فرحه فرحها يوم ماعرف بيه حامل لك انته الولد الوحيد الي من دمي ودمه يعزك معزه خاصه لتشك بمحبته الك
- عجل يمه اليحب هالشكل يتعامل !
انا بس سلمت عليه قلتلو كواك الله يابه وهو يردلي شجابك هين !انا ردت احكي ويه جراح شدخلك انته هين امشي ارجع منين ماجيت
- سوده بوجهي يربي شلون بيه ولك يمه والله ماعرف شجاه الرجال هيج
- يمه هسه انا عندي عشر دقايق اشبع منك
بيهه وامشي
- لااا ياكلب امك شفت منك اني وين رايح
- شسوي حكم الشيخ بعد احسن مانطرد للمره الثالثه امشي بكرامتي
- حسين حبيبي راجع افعالك يمه تذكر خاف حاجيلك كلمه كدامه لو بظهره مايرضى عليهه .. تذكر ابني كلشي صار وياك هذيج الايام ارجع اتذكره زين وافهمه ..
ابوك مستحيل يسوي هالشي بدون سبب
لان جراح وفهمنا سالفته اكيد رايدله المشيخه وراه ويريد منه فعل يسوه يحصل تعب ابوه
بس انته شسالفتك ؟ هاي الحيرة عقلي
- ان شاء الله يمه
انا هم ناوي اصفن لسالفتو واتمنى الكى شي يسوه
- ان شاء الله تلكى حبيبي وتخلص من هالعقاب .. تعال خلي احطلك شي تاكله
-يمه مالحك
- تلحك تعال خلي اشبع بشوفه طولك وليدي
والله البيت اظلم بدونك .. كلبي مستاحش بدونكم والله فراك الولد صعب حسون
- والله حاس بنار كلبك ياامي وان شاء الله ماطول الغيبه

بوس ايدي ودخلنه للبيت وهو حاضني
رحت للمطبخ صبيتله ماعون تمن ومركه
وضل ياكل وهو واكف .. رحت لغرفتي
اخذت فلوس واجيت انطيه مقبل ياخذهن
كالي ..
- اشتغل انا يمه والله اشتغل واكفي مصرفي
- بس يفيدنك ياعيني اني مامحتاجتهن
- بالحرام ماخذهن خليهن عندك انا معتمد على نفسي كافي شبعتيني العمر كله بدلالك
- غير هالوحيد انته شلون مادللك
اجيبلك ملابس هسه راح يبرد الجو بعد بالليل
-اخاف ابوي مايرضى اخذهن ؟
- ملابسك هنه شنو مايرضى .. اكل انته يمه اكل طلع من ثلاجه شيعجبك واكل بين مالملك ملابس
- يمه فدوه خليلي حذائي الرياضي الابيض
وعطر على ذوقك
صعدت بسرعه لغرفته وضليت اطلع بالهدوم واسفط بالجنطه .. لميتله كم قطعه ملابس بيت وداخليات وبنطرونين للطلعه وبلوزات بهاريه وحذاءه وعطر ومشط وجواريب
ونزلتهن اله ...
اخذهن وكالي ..
- يمه مشتهي كيك من ايدك بلكي تسويلي وحده وادزلك حسن ياخذهه
- صار يمه من عيني باليل اسويلك
-لا خليهه بكرا الصبح ابوي اكيد يلكطها ويحرمها علي وتضل بنفسي

- والله زمن وصرنا نتختل .. باجر يمه اسويلك واخابر حسن ياخذهه
- انتظرهه يمه داريني بيهه زين
- زين حبيبي ادلل فدوه انتبه على نفسك وشتحتاج يمه كول لا تستحي انته شكد ماتكبر تضل ابني المدلل
- مااحتاج غير دعائك يالعافيه انتي

بوسته وشميته وضليت اتلمس بوجهه واكوله رتب لحيتك وخفف شعرك وهو عينه تلمع
ويبوس بايدي .. طلع وهالمره الوحيده الي حسيت بيها فعلا ابني حسين كبر ...

اليوم ليله ام جراح والشيخ يتعشى يمها
ماسويت عشى ولا الي نفس اكل وحدي
صار فتره احس بخمول وتعب ودائماً
لعبانه نفسي واتقيء .. اكلي قل هواي واكثر وكتي متمدده اكلب بالتلفون لو احجي ويه غاليه الي مافوتت يوم بدون ماتسألني شي عن الحمل ...

ساعه عشره صارت خابرت حسين اطمنت عليه وكمت اريد اقفل البوب حتى انام
جان تجيني رساله من الشيخ كاتبلي ..
' انتظريني '

كعدت بالحديقه انتظره وهو نص ساعه
ودخل بهيبه مشيته الي ملينهه بشاشه وجهه وابتسامته وهو يباوعلي ..

رحت يمه بوست خده وهو بوس راسي وكالي ...
- رجع الدم بوجهك يولي اثاري حسين اعز مني
-هههه حسين ابن هالكلب وانته الكلب كله
- ههههه تعرفين شلون تلوتين بالكلام من يكدر لسانك المعسول انتي
- انته تكدر
- تين ما بخاطرك شي من شيخك ؟
- لا ياعيني اطمن اني مسلمه امري الك واثقه ماتاذي كلبي بابني بس شده وتزول ان شاء الله
- هذا درس ياتين درس للي يخطىء بجهاله
درس حتى يوعى بعد يفتح كل خلايا عقلو
-بشنو خطىء ليش متحجيلي
-لان كلب الولده مايضم سالفه
-ههههههه
- دحكتي ! انا ساكت عنها لانك راح توضحيها لابنك وتضيعين تعبي عليه
-زين بس كولي يعني هو حاجي شي لو متصرف بشي مو زين مسوي شي بدون مندري يعني
- اهااا هو مشكلتو ان كل هذني ماسواهن
- شنوو!!! تره اول مره مافهمك
- تفهمين ويه الايام
اسمعيني تينتي بكرا الغدا جماعي بيتنا
انا ادري بصحتك مو تمام ماريد تحضري شي او تدخلي بشي ابد .. ام جراح تتكفل بكل شي .انتي ضلي هين كبل الغدا انا ارسلك واحد من الولد
- صار ياعيني بس والله لو ماهاللعبان نفس الزايد جان اني طبخت وياهه ماعندي شي بس كاعده
- ارتاحي ارتاحي وانا بكرا العصر بأذن الله امشي ادحك التحليل شصار عليه
لو ما كعدتي ويه الولد اليوم كان رحت اخذتو
- شصار بسالفتهم هسه شقررت
- شقررت !همه شسوو حتى اقرر!
مصفنين وهاي فرحانين بكم علاكه غذائيه موزعينها عجل انا ما منطي حصه لكل عايله منهم من حصاد اراضينا !!
- ميخالف ياعيني هسه همه مو زين منهم
اشتغلو ولموهن فلس فلس بهالحر بالعماله وسوو هالشي هم على كيفك وياهم
- زين منهم لو ماكان هالوضع نفسو الحين
بس دام فكرهم هالصغر وهاذي محدوديتهم
مايرضيني ولا ادحكو شي قيم
- انته وين تريد توصل ويه جراح
- اريد اخليه صاحب سيط بافعالو مو ابن الشيخ الكبير صاحب الميراث
وهذا هو يبنيه بايدو
- الله كريم .. جراح ذكي وصاحب اراده وعزم اكيد يكدر على الي بالك
- ان شاء الله يكدر لان لو ماكدر عليها راح يخسرني تعب العمر
- شلون يعني
- تخيلي كل الي انا ورثتو من ابوي وتعبت عليه سنين ومضيفي العامر هذا والاسم الي تعبت يلا رسختو بين اهلي كل هذا اسلمو لغير ابن بيتي والي ياخذو جايز بفعل واحد متسرع منو يخرب كل هالتعب والسيط
المشيخه امانه بهالاعناق ان انخانت الامانه مره بس مره تهدم تعب اجيال كلها تصير كلمه الشينه تلحكهم ولو كانو اصحاب جود وكرم .. تضل العيبه بالوجه ظاهره من فعايل فلان الي تسلم المشيخه بالاخر
- صح والله . بس انته بعدك بحيلك ماشاء الله ليش تعوف المشيخه من هسه !
- ياتين العمر هم اله حوبته
ان اليوم انا واكف على حيلي شامخ جايز بكرا ماكدر ارفع راسي من هالفراش لزوم اأمن على تعبي واربي ولدي على الي تعلمتو بسنيني بين المضايف غير هذا انا اموت ماادي الامانه
- لاا اسم الله على عمرك حبيبي اسم الله
- كلنه على درب واحد نمشي ياعيني
- ربي لا يفجع كلبي بيك بيوم بجاه حبيبه محمد

ابتسم وبوس راسي وكالي ..
- يعز علي اخليكي وحدك هين والله
- كلهن ساعات ويطلع الفجر واشوفك مثل كل يوم
- ماتمشين تنامين حدر امي
- لا خليني هنا مرتاحه ماعليه شي مثل كل يوم اقفل بابي وانام
- عجل نامي من الحين ياعيني لا تاخذك الافكار وتسهرين وحك عينك كلشي يرجع احسن من الاول بس اصبري كم يوم
- تلكاني صابره وراضيه ان شاء الله

بوس خدي وطلع .. اني اعوف باب الشارع ماقفلهه بس باب الكليدور والاستقبال اقفلهن
واروح لغرفتي انام ..

ثاني يوم كعدت على صوت الاذان وبمرور هالعمر صرت اعرف ان كعدتي للصلاه بهالوكت قبل الاذان بدقايق هي نعمه من ربي لان صوت الاذان مو بهذاك العلو الي يكعد واحد من نومه ..
ابدأ يومي ب
' الحمدلله الذي هدانا لهذا وما كنا لنهتدي لو لا اذ هدانا الله '
اتوضى واصلي الفجر على نفس سجادتي من سنين رغم انها احتكت شويه بس احسها عزيزه وقيمه عندي ماحب ابدلها هالسجاده جبتها من مكه الها مكانه عندي ...

بنفس التوقيت على كعدتي وبأثناء مااني اسبح بالصلاه على النبي اسمع باب الشارع تنفتح
الم السجاده بفرحه وانزع احرام الصلاه
وامشي افتح باب الكليدور الكاه واكف ومتلفلف باليشمغ على وجهه يحضني وابوسه من وره اليشمغ على شفته يلا هو يفتحه ويرفعه عن وجهه ..

ندخل جوه نكعد متحاضنين وهو يعيدلي نفس الحجايه من سنين ...
- اليوم انعم الله علي بحضنك من هالصباح وكاد يومي حلو
- عسى الله يديم بينا هالنعمه

يبوس راسي ويكولي ..
- نتريك بعدين خلي نناملنه ساعه بهداوه وراحه بال

نروح للغرفه نتمدد وننام متحاضنين
هاي احلى جزء بيومنا .. قوتنا وراحتنه وهداوه بالنه كلهه بهالعاده الي بقينا عليهه ثابتين من سنين ..

ساعه سبعه يتريك ويطلع واني اتلهى انظف البيت الي مابيه شي بس تكضيه وكت
واخابر غاليه اكضي وياهه وكت بسوالفهه الحلوه .. بنتي بكل شي قويه ورداده لسان الا ويه رجلها دجاجه مصلحه لاتهش ولا تنش

يحاجيها تحاجيه يسكت تسكت يبوسها تبوسه
شيسوي هي تقلده .. واني عقلي كله ازقه الها زق كل يوميه اعلمهه شي وانصحهه وهي بس اي وافتهمت وتسده وره كم ساعه ترجع
اكلج يمه هذا هيج كلي اردله هيج لو اسكت ؟
تخليني اريد اشك الهدم الي عليه ..

اتفاجىء بيهه والله مااتوقعتهه هيج فاهيه وتنثول ويه رجلهه .. على الدلع والدلال الي جانت تمشيه على اخوتهه وابوهه كلت هذا اسامه اقل شي يمكن يكوم مايسد الخط وياهه
طلعت بس هنا سباعيتهه ..

حضرت الكيكه لحسين وسويتله اثنين وحده بالككو ووحده بالبرتقال وغلفتهه وخابرت حسن اجه اخذهه بسكوت ..

الظهر رحت لبيت الشيخه ويه عباس وكت الغدا سلمت وكعدت وياهم .. تغدينا وكملنه ورحت اصب الجاي واجيت قدمته جان يأشرلي الشيخ اكعد بصفه ..

كعدت وصرنا نشرب الجاي والولد عباس وصكر وحر واسر كاعدين هم ويانه
رماح عنده تطبيق وكاعد اقسام داخليه بغداد
ينتظر يبدا الدوام حتى يحول هنا ..

دك تلفون الشيخ وهو اول ماجاوب ساكت جان شويه ويصيح بعصبيه ..
- ول هذا انا ماقلتلك لا تشغلو وان كان ابني لا تشغلو وصيت انا ولا ما وصيييت
ايييه لا تحسبو غريب ولا كريب هالولد هذاااا تعثر دربو زييين
خلني اسمع مره الاخرى مدخلو عتبه بابك
اطردو اييييه اطرود انا طردتو ضلت عليك خله يتهجول بالشارع هو يحير بامرو انا مانكسر كلبي عليه انته ليش ينكسر كلبك !
ولااا حتى حسين اثنينهم نفس شي اثنينهم ماتشغلهم
يلا يلا مع سلامه

كلنه باوعنه عليه والكل ساكت .. كلتله الشيخه ..
- شجرالك على الولد انت يعني تريد تكسر ركابهم من كل صوب !
-ايييه انا ناويلهم شر ما مبين يعني !
-والله بعكلك ضميمه ولا انك ولدي الاعرفو

سكت ماردلها واني كلتله ..
- لو تتهدأ وياهم شويه خلي يعينون نفسهم خطيه مو ولدنا هذوله
-تين لا تدخلي ولا احد يتدخل ولدي وانا كيفي اتصرف بيهم

سكتت وباوعت للولد كلهم ساكتين ومدنكين بس عباس كال ..
- يايه هذا ظلم يصير مو عقاب ولا تربيه
ميصير نكطع الارزاق مو هذا الي متعلمين عليه !

باوعله الشيخ ورافع حاجبه وكال ...
- ايييه بعد كمل
- اييه يابه قرارك احنه نحترمو وعلى هالراس بس من تصل لكطع ارزاق اخوتي هين تعذرني يابه سكتي عليها ثكيله
عجل همه من يدورون الشغل غير حتى ينفذون الي تطلبو منهم شلون بهالحال يضيع وكتهم بالشارع يدورون على شغله وتالي مايلكون شلون يعيشون ! يكتلهم الجوع مو تعرفهم اكلهم كله من المطاعم منين يصرفون !!!
هم حك الله هذا لازم مانكطع دربهم خليهم بره بس لا توكف بدربهم خلي همه يدبرون حالهم لا كلش تخنكهم من كل جهه والله حرام يابه
هذول اعزازنا والكبار حرام يصير بحالهم هذا ونسكت

شرب اخر قطره جاي بالاستكان وحطه بالكاع وكال ..
- وانتو ياولد رأيكم؟

حر واسر كالو ..
- براحتك يابه انته ادرى

وصكر كال ..
- اني من راي عباس

فر سبحته مرتين وهو يباوعلهم برود رفع اصبعه واشر على حر واسر وكال ..
- اصعدو اخذو تلفون والشاحن والمحفظه واطلعو دورو اخوتكم وين اكعدو حدرهم

كلنه صفنه عليه والولد فكو حلكهم .. رجع اشر على صكر ..
- انته هم تلحك اخوتك
وعباس تطلع توصلهم وتبلغ سلامي لحسين تحكيلو ..ابوي دزلك الي يشبهك علمو وتعلم منو .. زين يابه بالحرف تنقلو وتبات حدرهم سوولكم خوش لمه تونسنو هالليله بالشارع

من صدمتنا ببرود اعصابه بطردهم كلنه ساكتين منعرف شنحجي .. جان يطك بالسبحه ويكول ..
- يول اشو تتصفن بوجهي وش حكينااااا
امشو اطلعو يلاا عجل انتم صمان ماتسمعو مو قلت تلحكون اخوتكم شمكعدكم هين !!!

لزمت ايده وكلتله ..
-شيخ على بختك مو كل ولدنا يطلعون كافي هذولاك الي حاركين كلوبنا لليوم لاتطردهم فدوه
-تين انا ما قلتلك لااااا تدخلي
-بس ميصير هيج والله ميصير
- كلمن ينطرد من هيييين هو من ايدو
ماطرد احد عبث انااا وهذول السبع ولد مايستاهلون دقيقه يكعدون بهالبيت
ولو هالرماح هين كان هم شردتو بالشارع حدرهم ..بالحرام مامنهم احد يرجع ولا يعتب شارع بيتنا واسمعن انتن يالحريم
فلس واحد لو عرفت واصل لايدهم

اخلي حتى بالاحلام ماتطولن خيالهم
والي تعلى كلمتو على هالكلام ينال جزاتو ويزيد عليها

سكتنا كلنه واباوع لام جراح تبجي وحاطه ايدهه على حلكهه رادت تكوم صاح بيهه وكعدهه والشيخه ماكالت غير ..
- هو العرك دساس عيناً ابوك ساعه الي يهيج يهيج

ما رد عليها بس ضل يفر بسبحته ويباوع للباب والولد نزلو واحد واحد مبدلين وماخذين بايدهم علاكه ملابس وكفو يباوعولنه وهو كاللهم ..
- ما سألتوني ايمتى ترجعون ؟

سكتو ودنكو راسهم وهو كللهم ..
- ايمتى مايفهم حسين غلطو ويفهمكم ساعتها ترجعون
تمشون تكعدون حدرو وترجعون تحسبون افعالكم وكلمن يحاسب نفسو ويدحك بشنو مكصر وما منكم احد يفكر ما مسوي شي ومالي دخل كلكم بنفس الغلط واكعين
تطلعون من هين ما مرضي عليكم لحين ما تفهمون الغلط وييييين وتصلحوه يلااا ينالكم رضاي ...
توكلو يلا

طلعو بدون كلام وضلينه احنه نتصفن بوجهه
جان يطك بسبحته وكال ..
- تين امشي نروح لبيتنه انا اناملي ساعه وانتي تلمين الغرض الي يعوزك وتكعدين هين بينا بعد .. دحكي اي غرفه من غرف الولد مناسبه الك ورتبيها

رحت وياه واني ساكته من دخلنه بيتنه
كلتله ..
- خالد امهم خطيه على الاقل برد كلبهه بكلمتين عنهم
- انتي كلبك بارد على ولدك ؟
- لا بس اهون شويه
- عجل انتي صبريها بمثل ماصبرتي نفسك
- ان شاء الله .. ليش تريدني اضل هناك مو هذا بيتي ومرتاحه بي
- البيتين فرغن وانا اريدك حدر عيني تضلين ماريد فكري يضل عندك
- زين شلون ياغرفه اكعد تناسبنا
- غرفه رماح كبيره رتبيها النه
- خاف يرجع هالايام
- مايرجع هين ماعندي ولد بعد يعتب الباب
وزين ذكرتيني بسالفتو
- شنو شتريد تسوي ؟

فتح تلفونه واتصل على عباس وكله ...
- اسمع يول هذا اخيك رماح ايمتى ماتسمعو يريد يرجع هين تحكيلو ابوي مايرحب بيك بالبيت وشلون مايريد يدبر حالو خله يدبرو
اييييه يضل كاعد حدركم حاله من حالكم
يريد يرجع لبغداد يريد يضل هين بالشارع وين مايولي خله يولي ماهمني انا المهم مادحكو هين مفهوووم

سد الخط وتمدد وكالي ..
- كعديني بالاربعه حتى اروح اخذ تحليل
- ماشي عيني

ضليت افكر بسالفه هالولد شنو الي غلطو بي كلهم ؟ وليش اليوم بالذات مو هذيج الشهور ؟

اخذت فرشات وملابسي وغراضي وانتقلت بيت الشيخه بغرفه رماح رتبت غراضي جانت غرفته هي غرفتي قبل هنا وجربايته ام نفرين غيرت فرشتهه ونظفته ونزلت كعدت ويه الشيخه ... تسألني اذا اعرف شي من الشيخ واحلفلهه ماعرف ..

كعدت احجي ويه ام جراح واصبرهه
اكوللها ..
- الشيخ اكيد مايكره ولده ولا يريد اذيتنه هو بس عنده فد غايه باله خلي نصبر لامره ونشوف تاليهه لانصعبهه عليه ويضل حاير بينه

جانت بس تهز براسها بدون مترد شي
على العشه رجع الشيخ ومن كملنه اكل وجاي كالي اروح لغرفه الشيخه .. رحت واجه ورايه طلع ورقه التحليل وكال ..
- تين يولو هالتحليل اخذتو لدكتور وحكالي نسبه الكرياتين عندك مرتفعه وهو السبب بكل هالاعراض ومن حكيتلو على كليتك طلب فحص ثاني الها ولزوم بكرا نمشي حتى تسوين هالفحص
- ضروري يعني
-اييه ضروري بكليتك تعرفين مانتهاون
- ماشي نروح

ثاني يوم رحنه للدكتور سويت سونار وتحاليل جديده وطلع ارتفاع باليوريا الكيرياتين
رجعت هالايام انتظم بالعلاج لان من فتره طويله تركته ...

عدا اسبوع على طلعه الولد والبيت كئيب
كل وحده منا كاعده وحاطه ايدهه على خدهه وتتصفن مالنه نفس بشي والشيخ على كد الاكل يجي وساكت ميحجي شي
غاليه تخبلت من سمعت كل اخوتهه بالشارع صفو وضلت تتوسل بالشيخ يرجعهم وهو ميقبل وكل مايسكتهه ترجع ثاني يوم تخابر وتعيد نفس الحجي ...

عزمتهه كلت عيب طولت عزيمتنا ومبين سالفتهم متنفض هالايام ردتهه تجي مقبلت
كالت حالي حال اخوتي مااكعد بيت مابي صوت اخوتي ولا اعتب بابه ..

حسين من اخابره واسأله على وضعهم يكولي عايشين الحمدلله .. مأجرين مشتمل صاير طابق ثاني وكاعدين وكلهم يشتغلون ويلمون فلوس الايجار والعيشه ..
يكول كل ليله نلتم ونضل صافنين نفكر ونحاسب نفسنا شنو الشي الي غضب ابويه هيج منا ومانعرف
وجراح عايفهم ورايح للرمادي ماقبل يكول شعنده رايح وضلو همه وحدهم ..

دخلنه شهر العاشر ودوام الولد راح يبدا
حاولنه ويه الشيخ بس يوضحلهم شي ينطيهم عقاب ثاني راح يضلون بره عايشين سنين اذا يعوفهم على عمى عينهم هيج وهو مقبل
كال كل اعمى يصنع لنفسه طريقه حتى يعيش
خلي يدبرون نفسهم بنفسهم ..

حسين لازم يروح لبغداد يداوم اقسام داخليه
وضل حاير شلون يروح ويعوف بقيه اخوته هنا ! ..
رماح اصلاً مارجع ولا وصل من سمع هالحجي من الشيخ عليه ..

نص شهر العاشر حسين كال ..
- يمه راح نطلع كلنه ويه جراح للرمادي
مدبر شغل هناك ويريدنه نعاونه
-شكد تضلون هناك
- مادري بعد يم الله بس احنه من الصبح نقفل البيت ونطلع
-الله يحفظكم

راحو من الصبح للرمادي وعرفت بعدين ان
هناك اكو مشروع بناء وماخذهم جراح عماله
خمستهم ...

ضلو ٣ اسابيع ورجعو كلهم لحديثه وجراح ماخلاهم يرجعون للدوام ياخذهم من شغل لشغل وحسين يكول ..
مانصرف شي احنه بس العشه جراح يدبره
وكل يوميتنه عنده نلمهه ..
جراح صار مايكعد وياهم يتنقل بين منطقه ومنطقه وميكول شنو الي باله بس قبل ميطلع يكللهم رايح لهالمكان ويروح ..
الولد ضلو من شغله لشغله يتنقلون ومايصرفون بس على كد المسواك الباقي يجمعوه لجراح ...

ودخلنه شهر ١٢ اول اسبوع بي يوم جمعه بالليل دك تلفون الشيخ .. عرفناه عباس لان بس هو من الولد يجاوب على اتصاله
سده منه وكال ...
- الولد راح يصلو هين لا اريد بكي ولا صوت يطلع ولا وحده تكف وتسلم عليهم

فرحنه وصرنا ندعي ربي يعديها على خير هالمره ...

من وصلو وسمعنه صوتهم صرنا نريد نطير ونحضهم واحد واحد وحتى الشيخه تدمع عينها من شافتهم ... سلمو وردينا السلام بس على كعدتنا ...

اباوعلهم شلون مبين التعب بوجوهم
ولحاياهم طولانه شعرهم ثخين وممرتب مثل قبل ..يباوعون بالوجوه ونظرتهم تكسر الخاطر ...

الشيخ اشرلهم يضلون واكفين بمكانهم يم الباب وكال ..
- جراح احدر اكعد هين وانتم ضلو بمكانكم واكفين لان هي كلمتين ان عرفتوها تدخلون ماعرفتوها تديرون ظهركم وتمشون بلا نقاش

جان رماح وياهم وضلو ستتهم واكفين يم الباب وبس جراح كعد على يمين الشيخ
كال ..
- يابه طلبك كلو تنفذ وان امرت بغيرو هم يتنفذ مانريد غير رضاك
- شلون تنفذ اشرحلي شسويت من فعل يستاهل رضاي !
- اول شي يابه انا راح احكيلك على شغلي الي لنفسي صنعتو بعيد عن الي اريد بيه رضاك
- اسمعك
- مثل ماتعرف يابه انا يوم مشيت من هين اخر مره مابجيبي غير فلسين يكضن يومي
وانته طلبت مني اسوي شي اكبر من هذاك
بالاول انا ظنيتك تريد اعيل هالايتام والفقرا
بعدين فكرت ان هالمطلب غايتو شنو؟
وين ابوي ناوي يصل وياي بهالشي؟
فكرتلها كثير وتالي فهمت ..
انا المستفاد بكل هذا التعب فهمت انك تريد تعلي شأني بين اهل ديرتي بعمل خير انذكر بي طول العمر وهين راح يرافك اسم جراح صفه خيره تنذكر لو طرى اسمي ..
وهين لكيت الفكره الي توصلني لهالشي
درجت قائمه باسماء اشخاص معروفين بكبر شغلهم بكل الانبار ومشيتلهم واحد واحد التكيت بيهم بلسان وكلام طيب كسبت نصهم
سجلت كل واحد ومطلوب شغله من عمال ومن مواد او خدمات صعب يحصلها
هين قسمت شغلي لاثنين ..
الاول اجمع كل هالمحتاجين لاشغال من اهالي ديرتي والثاني اجمع كل الي يطلب شغيل عندو ونوع الخدمه المحتاجها

سويت صفحه بالفيس وشاركتها ويه جماعتي وجماعتي شاركوها ويه غيرهم وبدو ولد ديرتنا وغيرهم بعد من اهالي حديثه يراسلوني وتواصلت وياهم و ويه الجماعه هذولاك وكدرت اشغل ٣٧ ولد من اهالي الشاميه و٢٢ من الحقلانيه والبقيه الشغل الي ردتهم بي ما رضو عليه

- وعفتهم ؟

- ههه لاا شغلتهم هين بترميم محل طابقين
هالمحل انا اشتريتو من ولد بالتقسيط
وناوي افتحو الهم مطعم صغير للاكلات السريعه اخليه شبابي يمشي شغلو هالوكت

- ايييه وبعد

- للحين انا ماوكفت بشغلي بس هذا الي انجزتو لليوم وبعون الله اكدر ارتب هالمطعم و يضل لهالولد مصدر رزق وكل الي يطلع منو ينصرف على اهل ديرتي وهذا عهد علي امام الله اني بعد ماارجع حك اخوتي الي جمعتو منهم هالايام ، كل الي اكسبو من هالشغل ينصرف لتدبير حال بني ادم
وانا الله رازقني بالحيل والعقل وادبر امر عيشتي
يابه انا اشكرك انته وعيتني على نفسي يشهد الله بكل ما اتعب واسعى لشي شغله بهالشهور اترحملك بيها .. دحكتها نعمه من الله ودكت بابي هين انا اطلب رضاك حتى اتوفق بباقي دربي انا بدون رضاك يابه اضل متعثر

ابتسم الشيخ ورفع ايده اشرله يجيه وهو كبل راح حضنه ويبوس بي من جتفه وراسه ويدنك على ايده يبوسهه واحنه بس دموع
فرحانين ومتأثرين بموقفه ..

رجع كعد يمه والشيخ كال ..
- دحكت يوم الي فهمت الهدف وين عرفت ترسملك طريق وسعيت ووصلت
جراح يابه زمان كانو يقولو ..
الي يلبس التاج لزوم يحمل وزنو
احنه الرجال تاجنه عكلنا لزوم نعرف نثبت ونكف وكفه اسود شامخه ونتحمل كل الي يكع على هالعكال من بلاوي ومطالب
هين انا ردتك تتعلم الصبر وتتحمل الضياع بس بثقه .. وردتك تتعلم ان الانسان مايصنعوه اهلو هو يصنع نفسو
انا لو بعد كبل كم سنه مسلمك المشيخه
واحكيلك امشي ياجراح اكعد بمكاني وشيل امر هالديره على كتافك ماكنت راح تكدر تدبرها اسبوع واحد ماتتحمل ولو صبرت فتصبر بجزع مو برحابه صدر
لانك ماتعرف قيمه الي فوك راسك موضوع
وبعدك للحين ماتعرفو ولا واحد منكم يعرفو الا ساعه ما يكضبو ويدحك ثكل وزنو بدنياه واخرتو

ويوم الي سألتك على ديرتنا انا ماسألتها عبث
ردتك تدحك نفسك وشكثر انته جاهل بامر ديرتك وشكثر انته بعيد عن مسؤوليه ساعه الساعه تنحط بيدك وانته ماتعرف شبرين هالديره وشكثر ومن فيها سعيد ومن تعيس

مااظن يخفى على احد هين ان انا عيني عليك انته الشيخ من بعدي لان انا من صغرك ادحك بيك الي ماتعرفو انته عن نفسك ولو كنت فشلت بفهمي اليوم ارجعك بره واذيك اكثر واخليك تفهم ولو تطلب مني الامر ابعدك عن عيني عشر سنين بس مااسلمك هالمكان الا وانته كاشف قدره نفسك لنفسك ..

دنك جراح على ايد ابوه وبوسهه وتشكر منه
وكال ...
- يابه انا كل هذا افضل رضاك عليه ان منحتني رضاك تسعدني وترفعني بعين نفسي
وان مارضيت فاضل محرمو على نفسي هالمكان
- رضيت يابه رضيت عليك دام انك وصلت للي اريدك تفهمو رضيت
- الحمدلله الف الحمدلله

رفع راسه الشيخ وباوع للولد الي بعدهم على وكفتهم .. ضل يفر بسبحته وكال ..
- حسين
- نعم يابه
- فهمت غلطك وين ؟
- يابه انا عصرت مخي على هالغلط وماعرفتو كل ماافكر هذا هو غلطي ادحكو لا
رايد منك بس تحكيلي اي يوم انا غلطتو بس دليني هالمره يابه
- رماح يالدكتور عرفت انته ليش مامرحب بيك هين ؟
- والله يابه انا ماسويت شي يغضبك وظنيت طردي على واهس اخوتي يعني
- هاااا وانتو يا حر ويااسر فهمتو ؟
- يابه احنه عمرنا مافتحنه حلكنه بكلمه تغضبك وكل افعالنه انته تدري بيها مايوم تعدينا للي مايرضيك
- هااا زين زين وانته ياعباس ؟
- يابه ان كان على كلامي هذاك اليوم فانا حكيت الحك ومااعتبرو غلط وان حاسبتني عليه فهذا مو حك
- صكر اذكر قلتلي انا من راي اخوي ! الحين شنو صار رايك ؟
- مادري يابه انا متحير بامري كدامك لا ان سكتت ترضى ولا ان حكيت ترضى
- يعني ؟
- يعني كيفك يابه انا بكل الي تطلبو حاضر
- عجل مدامكم للحين ثولان تطلعون بره ومادحك خيال واحدكم يعدي حدري

الولد كلهم ضلو ينافخون وجراح رأساً لزم ايد الشيخ وكال ..
- لاا يابه اترجاك لا
اخوتي طايعين الك والله وتعبو هالشهور كلها ماضاكو طعم الراحه رايدين رضاك ويدورون عليه بس محد منا فهم مقصدك وين
- عجل وش الفايده منهم ان ماعندهم عكل يفهمهم
- يابه استحلفك بالله لا تطردهم بعد وحك عينك متبهذلين وسنه دراستهم راح تفوتهم
عليك بنور محمد يابه احلفك بنور نبينا
تفاهم وياهم اسمع منهم وفهمهم دليهم ولو على راس خيط الموضوع لا تردني يابه هاي اول مره انا اتوسلك واطلبك بشي

عدل كعدته الشيخ وكال للولد ..
- مثل ماشفع يوسف بيوم لاخوته
انتم شفعلكم جراح وهو عندي
بمعزه يوسف عند يعقوب
اكعدو اكعدو

كعدو الولد وكال ..
- تين مي لولدنا

كمت بسرعه جبتلهم المي وقدمتلهم ورجعت كعدت جان يكول ..
- انتم السته غلطتو نفس الغلط وظنكم هو ماكو غلط .. غلطكم هو سكتو عن الظلم ..

انا يوم ما طردت جراح على سؤالين صغار
مادحكت الخير منكم وكف بوجهي وحاججني وحكالي ليش يابه هذا اخوي ليش تطردو !
تريد الجواب انا اجاوب بدل عنو! تريد الشغل انا امشي اشتغل حدرو انا اعينو ونرضيك
احد منكم نطق هالشي ؟؟؟!!!
الكل خنست وسكتت ...
انطيتكم مجال يومين وثلاث وما منكم واحد سوه شي .. تالي حسين كدام عينه يدحكني
ارفض الكلام ويه اخوه واقسي عليه وياخذ تلفون ويدير ظهرو ويمشي ولا كأن السالفه تخص اخوه وابن ابوه ...
سكت عن حك اخوه وتخلى عنو بشدتو
والي ما يعرف حك الاخوه ماله مكان بينا
انا مااربي قليل نخوه انا رباتي للرجال الي ماتفوتهم صفه حسنه الا مايكون الهم منها نصيب ..

ويوم الي مشى حسين انعاد نفس الغلط من البقيه .. مادحكت رماح الي اكبر من حسين والي هو كبير البيت بعد جراح مادحكتو رفع حسو واعترض على طرد اخوه
مادحكت اقرانو عباس وصكر حزت بكلوبهم مشيه اخوهم وهو يصيح بلا سبب انطردت
وامهلتكم اربع شهور ... اربع شهور انتو
ما رف كلبكم على خويكم ... مادحكت منكم واحد الي اخذ لاخوه فراش او هدم يلبسو
مادحكت الي ذكر اخوه على الاكل وتعلكم ريكو لان خويه ينام وياكل بالشارع وهو هين مترف العيش !
مابيوم سمعت منكم واحد بس واحد يفكر ياخذ لاخوتو طبخه بيت ويمشي يدحكو شمحتاج
تعرفون خويكم يكد ويتعب ويشتغل من الصبح ويوفر بمصرفو وما اخذتو علاكه فواكه وانتو تمشون ادحكوه ولا علبه حلى
وانتم تصرفون الالاف كل يوم على نفسكم
تلبسون وتطلعون وتاكلون وناسين اثنين من خوانكم الي بينكم وبينهم نفس الدم
نايمين بالشارع والحر يصكع فوك روسهم طول النهار ..
اربع شهور انا كل يوم ادحكلكم بي اتأسف عليكم وادحكم بالعين الصغيره وحاسبكم حشرات هين اجر الصبر وياكم شهور
متأمل واحد منكم يتحنن كلبه وتطلع من لسانه كلمه حك
تالي يلا عباس نطق وقلت يلا خلي ادحك من الي يتشجع ويكف حدر اخوه ويسندو بكلمتو
وتالي هم رجعتو لنفس الغلط
صكر شمرها كلمتين مثل الشص ياتصيب ياتخيب وهو بالاصل مطنش الدنيا دافرهه برجلو وحر واسر انا غاسل الايد منهم
جهال حرام حتى اسميكم شباب
جهال مالكم لا راي ولا فكر ولا شجاعه اي صفه من صفات الرجال ماتحملون
ورماااااح اااخ يارماح حاير بشهاده الطب وناسي وراه اهل واخوه واكعين بشده
تمنيت لو بيكم رجال الي يحدر يحاججني
رجال الي يكف بوجهي ويعترض على طرد خويو وطولت بعادو عن البيت

غاليه وهي بنت وبعيده عنا ومن يوم ماسمعت بسالفه جراح لليوم وهي ماخلت شي ماسوتو حتى الين وياكم واتفاهم .. وهي حامل وروحها بخشمها صايره وبراسها بيت وعيال
ومافكت عن خويكم ساعه اذا مااتصلت وتطمنت وتكاطعت ويانه وماعتبت بيتنا لان اخوتها مو هين ومو راضيه على حكمي عليهم ..
دحكتو الفرق !
دحكتو غلطكم ويييين !!!!
الي يسكت عن الظلم هذاااا شيطان
وانا مالفي شياطين بيتي انااا بيتي لاهل الله والرجال والي بدمهم نخوه

انتم ماتفهمون كبر غلطكم كبر سكوتكم هذا
ماتفهموه .. جهله انتم عقلكم على كد يومكم بس مايفكر لبعيد ..

اليوم انتم سكتم عن ظلم وهو ظلم لخويكم
خوفاً من ابوكم بكرا هم تسكتو عن ظلم غريب خوفاً من الاكبر منكم
جايز الي يظلم شرطي او ضابط او مدير او حتى دكتووووور اكبر من دكتوررنا هين
وهم تسكتو ليييييش لان هاذي صارتلكم سهله
تكفون ايدكم من الناااااس وحكها حتى تسلمون على مصالحكم كلمن يضل بامان ماتصيبه صايبه بسس انتوووو نسيتو هذااا كله حسااااب وكتاب عند ربنااا يوم الي ينعرض وتنسأل يا حسين ويا رماح يوم الي تنسأل ليش سكتت عن حك اخوك !
شتجاوووب هاااااا شتجاوب ربك
تحكيلو مادري لو ماعرفت لو ماتدخل ابوي هو يقرر!!!

وانته ياصكر يوم الي يسألك ربك لييييش ما عنت اخوك وسندتو بكلمتو يوم الي شهدك ابوك !!! تعرف ترد لو تحكي حرت ويه ابوي كيف ارضيه !!!!

وانتو يالجهااااااال ياحسافه طول اللحايه والشارب بوجه جاهل لانفع بفعل ولا بكلام
ول انته سميتك حر تفهم معنى اسمك انته يول لو ماتفهم !!! جااااااوب تفهموووو

كلهم جانت عيونهم تدمع ومدنكين الراس
وبصيحه الاخيره لحر يلا رفع راسه وكال ..
- اييه يابه افهم
- تفهم بس ماتحمل صفات اسمك
حر انته حر مايكضبك شي ولا يوكفك شي عن مرادك كان لزوم تحرك الدنيا وترجع خويك لبيتو وتدخل بعيني تحاجج بلا خوف

واسر هه ااااسر ول تخيرتلك هالاسم وتمنييييت اخر ولدي يصير اسر اسم على مسمى ... اثاريك طلعت خووووان عشره
وصاحب مصلحه حالك حال الي اكبر منك

ول حسافه والله الف الف حسافه على كل يوم اصحى بي وانا اتأمل ادحك سبع رجاااال حدري يكفون .. تخيرتلكم زينه الاسامي وانا اتأمل كل صفه بهالاسم تترسخ بروحكم
تاليكم طلعتو خنااااايث من موقف واحد تكشف عن داخلكم الهش وخلاني اتنددددم
ما كشفت عنو من زمان وعدت ترباتكم
كان لزوم اربي جهااال بلحايه هالسنين
ياحيف والله ياااااحييييف ولد ابو جراح هاذي سواتهم ياحيف

راح جراح كعد يم حر واسر وكال ..
- يابه هذول رجال والله رجاال و واحدهم كلبو اصفى من الغيم وعودهم كوي وصبرهم طويل تحملو كثير من الصعاب والمشقه حدري وسندوني انا لولا وكفتهم ماكنت اكدر اكسب رضاك

قبل مايحجي الشيخ شي حر واسر حضنو جراح ويبجون .. ودنك صكر على راسه بوسه وصارو يعتذرون منه وعباس هم دنك بوس راسه وجتفه واعتذر منه وهو ضل يهدي بيهم .. حسين راح على الشيخ دنك باس راسه وجتفه وكال ..
- يابه انا متعذر من جراح من زمان ويشهد الله ماعفت اخوي لحظه وان كان سكوتي هو سبب غضبك عليه انا اتعذر عنو يابه والله ماكان سكوت رضا بس طاعه الك بقرارك
- لا تطيعني على الظلم صير صاحب حك وخلي موقفك موقف شهامه ورجوله هي الرجال وكت الشدايد تبان
- حكك علي يابه حكك علي وحك اخوي
على راسي وانا تعلمت من هالغلط كثير
يابه والله توضحلتي الحياه اكثر من اي يوم بعمري العشرين .. سامحني يابه
يشهد الله اخوتي كلهم بمعزيه روحي وهمه يعرفون حسين يفديهم بدمو لو اعتازو
يابه احنه بينه خوه طيبه وان ماتبينتلك بس احنه واحدنه ماينام اذا مايتطمن على خويه
وان كان هالحد الي احنه بيه ما رضاك نوعدك نتغير ونخليك مرفوع الراس بينه

كعد رماح بصف حسين وكال ...
- يابه كلامك نبت سهام بكلوبنا ماعشنه ولا حيينا وانته متحسف علينه وخايب املك بينه
يابه احنه واحدنه يتعب ويكد طول يومو حتى يكف وكفه شرف حدرك ونسمع كلمه الفخر منك .. انا صح ماكنت حدر اخوتي هالفتره وضليت وياهم بس على التلفون بس انا بنفس الوكت ادرس وابني لنفسي اسم تفتخر انته بي كبلي انا صح تهاونت بهالموضوع بس لاني حسبتها لصالح المشيخه لجراح وانا اعرف هالشي وارد بعايلتنه فماتدخلت
لا تحسبنه رجال خوانه يابه
احنه ولدك رباه ايدك ما تربي هالايد الا رجال حميه ..
واتعذر انا يابه اتعذر منك ومن خويي جراح ومن حسين ومن كل اخوتي اتعذر منكم على تكصير وعلى بعدي وكت هالشده

بوس ايد الشيخ وراسه وبوس حسين واعتذر منه وراح بوس جراح وهم اعتذر وكعد بداله عباس وصكر ..
عباس كال ..
- يابه ليش مارضيتلي وكت الي اعترضت
- لانك متاخر يلا صحيت كان لازم تاخذ نصيبك من الغلط وبنفس الوكت حتى يتحمل اخوك توأمك ذنب رخاوتو بهالموقف
- اتعذر انا يابه على سكوتي هالايام كلها بس يشهد الله انا مارضيتلهم هالشي وسكتت احتراماً الك ولقرارك
- لا تسكت وكت الي يكون حدر عينك حك مسلوب لا تسكت
- ان شاء الله يابه ماتسمع عني الا كل طيب
وهالدرس بعمري مانساه

بوس ابوه وراح كعد يم جراح وتقرب صكر
يمسح بعيونه وكال ..
- يابه غلطان انا والله ادري الغلط الي بيه اكبرهم كلهم
- اييه انته جمره بكلبي ياصكر جمره قابض عليها بصدري وساكت تدري ليش !
لانك ما طلعت صكر جارح مثل ما ظنيتك
- سامحني يابه والله اوعدك اتغير
صحيت على عمري والله صحيت وعرفت كل اغلاطي و وعيت على نفسي واوعدك
ما تضل هالجمره بصدرك مني بس انطيني هالفرصه يابه وسامحني

جان يحجي ويبجي حتى مارفع راسه والكلمه تطلع منه بشهكه لدرجه ان الشيخ تقرب يمه وحضنه حتى يسكته .. بس هو زاد بجي بحضن ابوه خلانه كلنه نبجي وياه
الشيخه تمسح بفوطتهه كل شويه وام جراح لازمه ايدي وتبجي من فرحتها بولدهه

مسح على راسه الشيخ وهو وخر من حضنه وضل يمسح بوجهه وابوه كاله ..
- مسامح يا يابه بس كون ادحكك غير شكل بعد
- عند عيناك يابه تلكاني ان شاء الله
- ان شاء الله روح غسل روح

راح صكر يغسل والشيخ يباوع لحر واسر الي همه ايدهم بايد جراح ومدنكين الراس
كومهم جراح واخذهم بايده للشيخ وكال ..
- يابه هذول اعزاز عندي ولدي مو بس اخوتي ان رضيت عنهم معناهه رضيت عني

تقربو اثنينهم حضنو الشيخ وبوسوه ويتعذرون وهو كال ..
- جراح اكذب انا ان قلتلك رضيت عنهم بس ان تكفلتهم وتعهدت ترجعهم الي مثل الي محسبهم بالي ارضى عليهم وعليك وافتخر وانسعد بسعاده تزيدكم حسنات دنيا واخره

حضنهم جراح وكال ...
- انا اوعدك يابه هالسعاده تصيرلك على اسم حر واسر ان شاء الله
- ان شاء الله .... يول حسين
- نعم يابه
- احدر يابه احدر

كعد حسين يمه والشيخ جر راسه بوسه وحسين ضل مبتسم وفاك عينه على وسعهه
كاله الشيخ ...
- ان كان جراح بمعزه يوسف من يعقوب انته عندي بمعزه هارون من موسى بس لا تندك بالي انا وياك نعرفو خط احمر
- ههههههههههههه يابه تروحلك فدوه هالخطوط بس احضني احضني واوعدك شهر تكميل اخليك مرتاح مني

ضحك الشيخ وحضنه ومن وخر حسين يفرك بايده ويصيح ...
- ايييييييه نعنشنا نعنشناااا اليوم
- ههههه يحفظكم الله ... اسمعو يولد
بكرا بعون الله تذبحون وترتبولنه غدا معدل
وتعزمون غاليه وعيالها لزوووم يحضرون لزووم لان خبر راح يفرحها بكرا انا اعلنو
- شنو يابه غششنا
- هههه الخبر بعيد عن المشيخه بس يخصكم
هديه محضرها لولدي اريد انطيها بحضور اخيتكم
.
.
.
يتبع

#شقراء_بغداد

الجزء_الثاني_بارت_٢٤


صباح جديد يبدأ بلهفه من كل افراد البيت
اليوم ولدنا من الفجر كاعدين تسابقو على الصلاه الجماعيه ويه الشيخ ..
تريكنا بسفره وحده والكل تبتسم مرتاحه بعد طول هالغياب ...

ساعه ثمانيه الصبح الولد اخذو الذبيحه لمطبخ المضيف الي بره وكالو احنه نطبخ لحد تدخل

عفناهم بنشاطهم واني صرت احضر حلويات وام جراح تحضر الزلاطه والخبز ..
طبخت شويه برياني لغاليه لان متاكل اللحم
و رحت نظفت غرفتهه وهويتهه واني كل شويه اتصل بيهه حتى اعرف شوكت توصل
وساعه بال١١ وصلو ...

جنت بيت الشيخه هناك انتظرها وطبكت سيارتهم البيضه العاليه كدام الحديقه ..
نزل اسامه و راح فتح الباب الوره ونزلت غاليه وبطنها كدامها ... كبل دمعت عيني من شفتهه هيج ..

مانتبهت على احد بس عليهه .. اشوف مشيتهه وهي لازمه ايد اسامه وترفع النقاب من وجهه .. تباوعلي وتضحك وجهه متفح
والفرحه ماليه معانيهه ..

رحت حضنتها وهي تبوس بيه وبطنها اطخ بيه واضحك ... لزمت وجهه بوستهه وكلتلهه..
- كلها ايام وتجيني وابنج بايدج
- ان شاء الله يمه يجي هاليوم وتدللين ابني مثل ما دللتينا

دنك اسامه باس راسي وسلم ودخل ويه الولد
سلمت على ام اسامه والحجيه ورحبت بيهن
دخلنه وكعدو كلهم ..

هنا يلا انتبهت على ايوب .. لابس دشداشه بيضه واليشمغ وبيده سبحه سوده ..

جنت هنا نازعه المناظر تعلمت اتقبل شكلي ومااستحي منه .. هالعين البيضه هي وسام فخر الي وصار كل من يباوعهه يرجع يباوع لعين الشيخ ويسكت مايحجي شي ...

غاليه نزعت جبتهه والنقاب واجتي لابسه فستان سمائي مال حمل وهي سمنانه وجهه المقسم صاير هسه بي عبالك اربع خدود
مسويه شعرهه ضفيره هنديه صفح وكاعده هادئه تباوع لاخوتهه وتوزع ابتسامات
شاورتهه ..
- شبيج شو مو على طبيعتج
- يمه اسامه هييين
-ههههههه صدك تحجين !
- والله عجل ترديني استخف وهو هين كاعد
لاا عيني لاا انا بايعه ثكل ومدلعه زياده
- هااا هم زين بدرت منج هاي
- ايي بس هذا ابنك حسين احس راح يفشلني
يمه نظرتو مو راحه اعرفها واخاف مااكضب لساني عنو دحكي اذا زليت كرصيني سكتيني زين

ضليت اضحك واباوع لحسين وهو يأشرلهه اصبريلي ويمسح بلحيته ...
عفتهم ورحت اصب الاكل واساعد ام جراح
ولكيت هناك عباس يغسل الكلاصات
واخذ السفره وراح فرشهه بالصاله لان احنه كعدناهم بالاستقبال الصغير ..

هالولد خدوم بدون مااحد يكوله هو يعرف شمحتاجين ويسوي من وحده ..

دخلو حر واسر شايلين صياني الدليميه الي همه طبخوها باشراف جراح ورماح ..
واني اخذت الفواكه والخبز واكل غاليه
وسراحيات اللبن والمي يرتبهم عباس
رتبنه السفره ورماح صاحلهم حتى يجون يتغدون ...

التمينه على الغدا وجانت فرحتي بوجود ايوب بينه بصحه وعافيه والضحكه على وجهه
اكثر من فرحتي بغاليه ...
اليوم ايوب رجع لدياره وكاعد ويه ناسه اليحبهم وبين اهل حديثته ومن اكلهم ياكل
بعيد عن عائلته الي مااحسه فرح بيوم وياهم
واحس ميوله اكثر لعيال ايهاب يرتاحلهم اكثر من ولده ...

انتبهت على غاليه تبسبس وحدهه كلتلهه .
- ها شدكولين
- يمه مادحكين اسامه ماياكل
- يا ليش !!
- مايعرف ياكل بيدو الا بالخاشوكه وانا اشرلو لا وهو مايرضى وضال ياكل بس زلاطه
- ههههه يبوووو منكم هسه خلي ياكل بخاشوكه مو اني وياج دناكل هيج
- يمه عيب من اخوتي هسه يحسبوهه بزر نستله ويضلون ينفخون بريشهم علي
وانا الف مره احكيلو جرب اكل بايدك يحكيلي اضوج ماحب
ولا هو حكو مايكدر اذا اهلو معلميه على الشوكه والسكين واتكيت وين يدبرها هين
- ههههه اكلي يمه دكلي هو يدبر نفسه مو صغير هسه واحد من اخوتج يفشله ويخليه غصب عنه ياكل

سكتت وضلت تباوعله والخاشوكه بيدهه
اباوع لايوب ناسي نفسه ويه حسين اثنينهم متاكبلين على صينيه وحده والشيخ معروف ماعون اله وحده ما ياكل بغيره ..

انتبهت على جراح قدم الاكل يم اسامه وضل يشاوره بعدين اسامه عاف الخاشوكه وصار ياكل بايده وكل شويه يباوع لبنطرونه وينفض بي ...
هنا يلا غاليه صارت تاكل ..
شاورتني غاليه ..
- يمه تدرين احس عمي مو هو نفسو الي اعرفو بيتنا هناك ... والله متعجبه عليه عجل هو ليش ما يطلع صوتو بالبيت ولا يضحك ولا يجامل لا ويه ولدو ولا ويانه احنه الحريم
- خلي هسه مرتاح شكو ادققين وراه
- خلي يصبرلي اذا ما دحكتو هالشكل بالبيت بعد الا افشلو واذكرو بهاليوم
- غاااليه معليج بعمج اني كم مره كايلتلج ابتعدي عنه عيب هذا رجال جبير واله اسلوب حياته لاتخربين عليه
- وشدعو هالاسلوب البارد هذا كأنو مايدحكنا والله انا طاك كلبي من الملل بهذاك البيت
خلف الله على اسامه الي يكعد وياي اسبوع
يونسني ويخفف وحدتي .. باردين يمه ماينحملون مادحكيني شلون صرت كله منهم
اخاف احكيلي كلمتين وينزعجون
- هههه كلمن وطبعه بنتي كلمن وطبعه

كملنه الاكل وصارو الولد يلمون السفره

واني وغاليه وام اسامه بالمطبخ واكفين نعزل المواعين وام جراح صبت الجاي ودزته بيد عباس وضلت يمنه ..
صرت اني اغسل وغاليه تنشف ونسولف ويه ام اسامه جان تكول ...
- اني رجلي ابو اسامه الله يرحمه جان مدرس عربي و النه بيت وحدنه بنينه بصف بيت الحجي الله يرحمه بيوتنا جانت رنانه شكبرهه
والله لو خيل اكو جان سرحت بيهه كل غرفه
نوم بكبر مطبخكم و الولد جانو الله يرحمهم
كل واحد عنده بغرفته نص تخم واخشاب كامله وجانو على باب زواج .. الكبار اثنينهم خاطبين من خوالهم بس صادف صفر وانتظرو يكمل يلا يعرسون وماصارلهم نصيب وافتهم المنيه بليله وضحاهه فاجعه صارت بهالبيت وضلينه مانسمع بس صوت البجي ومصايح الرجال
والله لو ضالين كاعدين شهر النوب جان كضو ولدنا كلهم على هالثار
- الحمدلله الي حفظكم وعوضكم عن الصار
- اي والله عوضنه باابو سالم الله ينطيه الخير والعافيه هو شال العايله من ساعه ماكعدنا بغداد لحد هاليوم .. جان ابو اسامه بوكتهه ماعنده شغل لان ماطلع نقل مالته لمدارس بغداد بسرعه وابو سالم هو الي جان يصرف على البيت مانعرفه شوكت يشتغل شوكت يدرس منين يجيب ماندري الا ساعه ما يدخل مسواك البيت متلتل بالباب
تالي عاد ابو اسامه صار يدرس باعداديه ولد و عاونه

جنت ساكته اسمعلهه واذكر كلامه وياي قبل عن تعبه من العيشه بعيد عن حديثه
صح جان فاتحلي كلبه بس مايطرق لوضعه الصعب بس يكول تعبان من حمل الوطن
هاي اكثر شي جان يكوله من يتعب ..

فضول مني زاد وخلاني اسألهه ..
- اكولج عيني ام اسامه هي ام سالم من كرايبكم لو غريبه اخذتوهه
- شوفي عم الحجي الله يرحمه جان كاعد بالرمادي هي تصير بنت ابنه الجبير خوش مره هي الله شاهد كلبهه وعينهه على بيتهه وولدهه وشالته لابو سالم بعينهه ياما وياما تحملت منه ضيم وضلايم وضلت صابره

سكتت اني ونشفت ايدي جان غاليه تحط جايهه بالكاع وكالت ..
- والله ياعمتي شكثر ماتحكين عنها زينه انا ادحكها العكس
- ليش ولج !
- شنو هو ليش مبينه هي طباعهه مو مثلك انتي المره الزينه هي لا شايله خشمهه وكارهه روحهه وكارهتنا
- هههههههه ولج هي من ضيم عمج هيج تلكيهه اعصاب بس هي والله طيبه كلب
- زين همه من ايمتى هالشكل مامتصافين ؟
- من يوم يومهم همه كل واحد بصفحه
ويجمع بيهم الحجي والحجيه خلف الله عليهم الي ضلو فوك روسهم وخلوهم يخلفو
ويستقرو
- ليش عمه هو عمي مااخذها برضاه ؟
- لاا الحجي هو اختارهه اله عمج جان رايدله وحده من الكليه وماصارت
- هىىىىىىىىئ عمي جان يتمعشك !
بروح الغالي كملي كملي خليني افهم عقدتو

لزمت ايد غاليه وكلتلهه ...
- كافي بنتي بعدين لاحكه على السوالف امشي شوفي رجلج خاف يحتاج شي
- يمه لو يريدني يتصل خلينه كاعدين ول هالسالفه انا اشمشمها صارلي سبع شهور وماحصلتها خليني بداعت ابوي خلي اسمعها
- غاليه كافي عيب لتلحين ويه المره عيب بنتي كافي اسرار رجال شكو تدخلين
- يمه انتي لاتسمعين كيفج بس انا اموت لو ماعرفها كملي عمتي بروح الغوالي خلينه اليوم كعدتنا براحه خلي نسمع الماضي وعمايلو بعمي

ضلت تضحك ام اسامه وام جراح هم طبكت وياهن تريد تكمل السالفه واني كلتلهه ..
-ام اسامه معليج منها هاي بنتي فضوليه اذا تضل وياج للصبح متخلصين من اسئلتهه
- لاا ياخيتي شعدنا احنه كاعدين خليهه بنتج سوالفهه حلوه
- ميخالف سولفو بس هالرجال عوفوه على جهه خاف مايرضى احد يحجي بسالفته
- ههههه هو كل الدنيا تدري بهاي سالفته
غير زلزله للبيت بهوسته وكت العرس
- ياويلي ياووويلي دحك الحماس يمه اذا تقاطيعنه هالمره البس عباتي واطلع والله ازعل منك خليني اسمع كلبي رفرف لهالسالفه
كملي عمه كمممملي اسمعك انا

ضليت متوتره احس الجو صار يخنك وهي تحجي واني كلشي يمر كدام عيني كأنه البارحه ...

- الحجي الله يرحمه جان يريد يزوج عمج
لان احنه طلعنه من البيت وكعدنا ايجار
بنفس المنطقه وضل البيت بي بس اخته وامه و اخته هواي اجوهه خطابه والحجيه تريد تنطيهه لان كبرت صار عمرها بال ٢٣ سنه
وهي حلوه وجان جايهه استاذ جامعي كاعد بنفس منطقتنه وشايفهه متخبل عليهه رادهه
وكل يوميه اهله داكين الباب والحجيه تكول انطيهه منو يضل بالبيت يطبخ ينظف ضلو يلحون على عمج يتزوج تالي كاللهم اريد اخطب بنيه وياي بالكليه واخذهم واهلهه مانطوهه كالو مخطوبه البنيه وابوهه مايرضى هنا الحجي صار يدورله مره سكتاوي وكل فتره يكوله على وحده وهو مايرضى واجتي فتره الحرب ويه ايران جانت وهو يشتغل مدري وين والله بس يطلع اسابيع يلا يرجع وتأجل زواج اخته سنه
ضلو بس خطوبه

- يعني اخذتو لهالاستاذ

- اي انخطبو وهو كال يريد يكمل بيته وياخذهه مايكعد ويه اهله لان همه عايله جبيره وبيتهم على كدهم

-ايييه رجعيلي لعمي كملي

- اي مو خلص البيت وصار لازم يتزوجون

هنا الحجي طلع متكتك ويه هذا عمه الي كلتلج كاعد بالرمادي ورايح خاطبله ومنطيهه مهر وفلوس جهاز و جابهه واجه وعمج مايدري كل هذا هو هاج مدري وين يغط يغط والعصريه نلكاه جاي تعودو عليه محد يسأل وين رحت واجيت وليش ما هاليوم رجع
والحجي كايله هالمره خطبتهه الك وقرينا فاتحتهه ويه عمك وبس تاخذهه وتكطعون مهر محكمه جان ماكو سيد بوكتهه بس محكمه وقرايه فاتحه يوافقون الاهل
ويصير الزواج كامل

- ايييه وعمي شسوه هين

- كولي شنو الي ماسوى يبووو هجم البيت هجم بحيث من خوفهه لام سالم وبجيهه طلعتهه الحجيه الله يرحمهه حجيتنا الجبيره
طلعتهه بعباتهه وكلتلي اخذيهه لبيتج وسكتيهه
واني اخذتهه وطلعت اركض وبيتي قريب نفس الشارع وبره واسمعلج الصياح تخبل بوكتهه لا خلى شي ماكسره لا احترام لابوه
ولا اخوته وطلع هج ضلت المره بيتي اسبوعين تبجي وتنحب على حظهه
وعمج مختفي تالي يلا رجع وكال للحجي
يابه رجعهه المره بعدهه حره مايربطنا بس قرايه فاتحه ومو بعلمي ما تصح
بس الحجي ماقبل كال ..
صارلهه المره اسبوعين كاعده تنتظر رجعتك وتالي هم عفتهه اسبوعين وتريد هسه ارجعهه مكسوره خاطر وذليله لابوهه تريد تكسر وجهي وكلمتي كدام عمي ..
وضل المصايح بينهم وابو اسامه اخذه لعمج وكعد يحجي وياه ويفهمه ميجوز هالشي عيب بعد المره دخلت بيتنه وجايه على اسمنا اهلهه مايسكتون لو يدرون بيك هيج مسوي وتخرب هالعلاقه الضاله بين عمامنه واحنه ماضللنه احد ومن هالحجي عاد يلا اقتنع وكال بقوهه
ودزني ابو اسامه اخذهه وارجعهه للبيت

- عاد هين تزوجهه عمممممي

- لااا وين دنطي صبر

- هاا عجل شصار مو اقتنع !

- اي كال رجعوهه لهذاك البيت بس مااخذهه عقد عليهه محكمه عافهه كاعده هيج ومدري وين راح هج .. وبالليل احنه نايمين ودك بابنه
اخوه هذا عم البنات هسه
فزينا من نومنه ونسأل خير شصاير
يكول ابويه وايوب تعاركو ونروح ركض لبيتهم لا ندري شكو ولا شوكت رجع ولا شصار ... ادخل بينهم ابو اسامه وفاككهم
والحجي خشمه يطك دم مرتفع ضغطه ويرجف رجف مابيه حيل يوكف بعد
اخذوه الولد لغرفته وعمج ضل كاعد بالسطح
ردنا نفتهم الصار والحجييه اسكتو واسكتو
والله فلا انسى هالليله كاعدين بانذار و سادين حلوكنه وللفجر على كعده الوحده لا الي فهمنه من الكاعدين ولا عمج النزل من السطح وحجاله كلمه التشفي الكلب
ولثاني يوم كعد الحجي للصلاه جان يكول
الي يريد شور راسه وخراب بيتي خلي يطلع برا ولا بارك الله بيه
والله وهو هستوه كمل صلاه جان ينزل عمج وبيده جنطه جامع غراضه وكال
عايفلك البيت وماشي بشور راسي
وطلع بعد ماعرفنه وين راح اخوته يريدون يتفاهمون ويه الحجي وهو يصيح اخوكم يريد يغضب الله ويمشينا بالحرام وضل اليوم كله هو يدعي على هاي حبيبته لعمج
والحجيه الله يرحمها هم تدعي عليها
طلع اثاري عمج يريد ياخذ الحجي ويروح لابو البنيه يقنعه بلكي يفصخ خطوبته ويزوجهه اله وكلهه تصيح هذا مخبل
وين صايره هاي اب يرضاهه ورايد بس الحجي يمشي وياه كايله اني عندي الحجي الي يجيبلياهه بس امشي وياي ماكدر اطب بيتهم وحدي وماقبل الحجي متعارك وياه لان البنيه محرمه عليه وهو حاط عينه عليهه
ونفسه بيهه وكايله انته واحد خوان عرض
الي تسوي هسه باجر يرجع يطلع باهلك عيب بطل هالسالفه هذا نصيبك يمك ونصيبهه يمهه
بس هو ماقتنع ومن طلع عمج هالطلعه بعد
ما رجع الا شهر تكميل واذكر اني بوكتهه جنت هستوني اعلك البردات الجدد لان بعد باجر تصير الحنه مال اخته وهو دخل كبل كال ..امشي انطي لابويه هالفلوس وصيحي اخيتي ... رحت ركض صحتهه وبس بوسهه وحط بايدهه تراجي ذهب وطلع من البيت ولا حضر عرسهه وتزوجت وخلصت سبعتهه
وهو ماوصل البيت .. ضل راسه من راس ابوه وتالي اسبوعين ورجع كال للحجي
امشي رجع البنيه لاهلها لتخاف ماخذ الي اريدهه بعد تزوجت وراحت لغير محافظه
رجع البنيه لا تكسر ركبتهه هيج خلي تمشي لحال سبيلهه بس الحجي ماقبل كال
من شوكت نسوانا تطلع من بيت زلمهن هيج
احنه عدنا المره من تعتب بيت رجلهه بعد ماتطلع الا بتابوت وتريد فوكاهه ترجعهه وهي بعدهه بنيه ! شيكولون علينه الناس صار شكم شهر مكعديهه بينا وحتى ماعاقد عليهه ولا داخل بيهه ! تريد تسود وجهنا كدام عمامنا ! وحصره لو ياخذهه مره اله لو يكتلهه خلاص لان اذا رجعت هيج لاهلهه يذبون بيهه العيبه ويكتلوهه همه ومايصدكون بحجينا عاد بعد مصايح ومعارك يلا اخذهه عقد عليهه ودخل بيهه يوم بنفس اليوم وثاني يوم طلع هج
وره ويين يلا رجع ..هاي اني ماعرف بي رجع الا من يروح العصريه ابو اسامه يم اهله يكول اخويه نار وساعه الساعه تكب بينه وبين ابويه خليني بينهم احسن
و هاي حاله ضل هيج يومين لو ثلاثه بالبيت وشهر بره مدري وين عايش وشيسوي

والله اذكر اول سنه مرت على زواجهم وهمه ماعدهم غرفه اخشاب هيج منطيهم غرفه فوك يفرشون وينامون واكثر الصيفيه عمج ينام بالسطح هاي اذا موجود بالبيت وضل هو والحجي ما يتحاجون على كد السلام وهو نافخ نفسه بينا حده الي يحجيله كلمه وياه ينفجر عليه كلهه متجنبته وساكته صارو ينتظرون طلعته من البيت ساعه ساعه
من كد ما يخليهم متوترين والوجوه مكلوبه
ولا يحضر بعيد ولا برمضان و ضل سنتين يلا اقتنع يخلف وصارت المره حامل و اربع شهور الاخيره من حملهه هو ماكو مختفي لا نعرف بي عدل ميت الا ما نولد سالم هالليله هو ثاني يوم الظهر رجع واخذ ابنه بايده بوسه وكللهم شسميتوه الحجي كال سالم
مارد عليه رجع الولد بحضن امه وحط فلوس يمهم وطلع وامه والحجيه يجيبن ويحجن عليه
يوميه مادخلتلهم مره اذا مو حاطاته بالسيره ويعتبن عليه
وضل كل شهر شهرين يجي مره ويتجنب الكل والكل تتجنبه وضع بينهم هادىء جان الا فد مره بيتي اني ودكو بابي الجيران الحكي
عمتج تصيح وتعيط بيتهه وطلعت اركض بطرك ثوبي ويمه من ادخللهم واسمع صوت التكسير فوك والمصايح عرفته هو وعمتي ادفع بي وتريدني اصعد اجر المره من ايده
هي تخاف منه وذبتهه براسي
واطبلهم واني اطكطك يمه جان شيطان مابراسه عقل لازم المره من ركبتهه رافعهه ويصيح بوجهه بيه مابيه اجرجر بيهه تالي ضربنه اثنينه وكال ارجع بالليل الكه الي اريده هنا بمكانه محطوط
وطلع والمره حال الضيم حالهه
يمه يوم اسود جان هاليوم ولا ينسي نتراجف هيج والله وحتى هو بره نتراجف من جيته شراح يسوي

- يمه هذا عمي الهادي يطلع منو كل هذا !
زين وشالسبب لهالمصايح

- مادري شماخذه من غراض البنيه هذيج
وهو مالاكيهن ومتخبل مكسر الكنتور وهاجمه هجم ناثره نثر والميز مجراته
مشمرات وهي مزوركه نفس ماتكدر تجر
كلنالهه شعندج تندكين بغراضه ماتعرفين طبع رجلج تكول معليجن لاتدخلن
ومن رجع بالليل كبل صعد وهي جانت جوه
نداويهه وضالات يمهه وايدنه على كلوبنه لا يرجع يهوس نوبه الثانيه بس هو سكت
وضل فوك مانزل جان تكول هاي حصل الي يريده وسكت وضلت تعاتب بعمتي تكوللهه ليش اخذتوني وانتو تدرون ابنكم نفسه بغيري
ليش جبرتوه عليه شذنبي اني اتحمل رجلي عايش بغير عالم كدام عيني وراحت للحجي هم عاتبته وكلتله رجعني لاهلي ماضل هنا بعد والولد اخذوه ماريده بس خلصوني
وهو عمج يخوف والله اذانه اذان فيل كبل نزل وكاللهه اصعدي لمي غراضج تصبحين انتي بيت اهلج

- يايمه عمي مايتفاهم وتالي

- اخذهه من الفجر طلع وداهه لاهلهه وضليت اني اربي سالم ويه اسامه
وعمج راح لاربيل ويه عمامه هناك عاش يمهم ويشتغل هناك وضل هالمكرود سالم وحده من ايد لايد
الحجي صيح وهوس لحد مانبح صوته وعمج كله كل مااسايرك تخرب حياتي عوفني اني اتصرف هو بعد راح لعمامه وانسدت هالسالفه
- ياويلي عمي حياته اكشن باكشن عجل شلون تصافو ورجعو !
- الحجي راح تعذر منهم ورجعهه بحجه الولد وحده ويريد امه وابوه مسافر وهيج رجعهه
- وهم رجع عمي وسواله هوسه مو !
- هههه لاا هالمره سكت لا كال ليش ولا شوكت بس فجعنا بسالفه ثانيه
- هم تكاونو بعد !!
- لاا هالمره رجع من اربيل شايش علينه
دخل صيح وهوس وكسر وحتى كفران كفر
وسب شكو واحد بينه وكل الصياح والهوسه بوجه الحجي يعاتب بي يكوله لو مطاوعني
بس مره وحده جان رحمت بحالي
وضل يكوله انته السبب وبركبتك البنيه وحالها وبركبتك كل صيحه بعمري صحتها

- شبيهه البنيه ! هم يتواصل وياهه !!

- مادري شبيهه بس هو هوس هالهوسه بخبال هوسهه جان هذا وجهه دم احمر واصبع ايده شويه ويطب بعين الحجي وابو اسامه يجر بي وهو ماينكدرله صوته سمع الفرع كله نص الجيراين بالباب تصيح خير وخير شصاير وشبيكم ولا هو الي يسكت ونفتهم منه بهداي
ولا الي يتعب ويكعد
ضل اليوم كله هو مشلوش يفتر بالبيت يصعد يصيح وينزل يصيح والحجي اتخربط واخذوه للمستشفى من وره ضغطه صاعد وهو ولا رف كلبه ولا هدا ولا راح شاف ابوه
ورجعوه الولد من المستشفى ونوموه بفراشه ومادخل وسلم عليه وكاله يابه شلونك
بس يفتر بالبيت ماندري شيريد حتى بيومهه عشه ماسوينه نخاف نطلع من الغرفه ونسويلنه فد شي وهو مايعجبه حتى اني عايفه بيتي وخاتله وياهن بغرفه الحجيه
ولليل والناس نامت وهو يطلع يتحسب ويرجع يتحسب ويعدد اسامي مانعرفهه
ضل اربع ايام هو مدري وين يطلع يغط النهار كله ويرجع بالليل يذب اعصابه بيهم
والله كلوطنه تكلوط لحد ماعقل وسكت

- اويلي يا يابه عمي سالفتو سالفه
ول ويني انا عن هالحكي وينننني
عمه اسامه يعرف بهالشي كلو

- ولج هو ياهو المايعرف كلهه تعرف وساكته

- عجل دام عمي هالشكل مبتعد عنكم شلون صار عنده بقيه ولده ايمتى تقبل مرتو ؟

- هو وره سنه الواحد وتسعين صار هادىء
مدري شلون هيج من وحده نزل عليه الهدوء
وصار عنده هند وبعدين فيصل وبعدين ليلى
جان يحب جهالهه بس ما يسميهم كل واحد يجي الحجي يسميه هو بس يداريهم شويه
يحب بناته اكثر من ولده بالاخص هند

يموت عليهه اذا هو بالبيت يضل مكعدهه بحضنه بس كولي هم بيوم لاعبهم ضحك وياهم هالابهات هذوله اشكال يسوون لجهالهم هو بس عنده بوسهم حط بايدهم فلوس وكعد يتصفن عليهم وهند بحضنه يلعب بكصيبتهه
هاي كل حياه عمج

- كسر كلبي والله عجل هالبرود والهداوه هاي كلها من وره حركان الاعصاب كبل !

- اييي خطيه ما عدل زمانه وياه فوكه فوكه مشاكل وقهر اذوه باخوته وبحلاله وبزواجه
والله يعلم شكو غيره بعد هم على كلبه

- بس والله يخوف عمي عجل انا محسبتو لا ابالي وبارد اعصاب طلع الي يندك بي مايرحمو

- والله كون يلكطج فد يوم مسويه شي مايعجبه ليبلعج لسانج

- يمممه الله لا يجيب هاليوم
صدك عمه هو شنو شغلو كبل ما تطلعو لعمان ؟

- والله وهذا يومنا ومانعرف شيشتغل
وبعمان لو ما زي الضباط الي جان يلبسه هم مانعرف شيشتغل لان هو سكوتي ميحجي والي يسأله يبتلي على عمره
ولا عمرنا ندري راتبه شكد شعنده ماعنده
ابد من يوم الصار لهاليوم محد يعرف شي عنه بس هالسالفه لان هو سمعهه للكل

- هاااا زين يعني ما تصافو بعدين هو وحرمتو ماحبها يعني ؟

- مادري والله بس هو ميتعارك وياهه الا نادراً والا هي مسويتلهه فد دكه جايده وياه يلا
يطلع صوته عليهه بس متصافين يعني عايشين مرتاحين والحمدلله

- يعني نساهه للسالفه مال الزواج

- مانعرف بعد هاي عنده

- زين عمه هو يا كليه داوم ؟

كطعت سالفتهه هنا وسكتتهه كلتلهه ..
- سولفنه هواي وخطيه الحجيات وحدهن ضالات خلي نمشي نكعد يمهن ماضجتو من كعده المطبخ خلي نروح على البروده نكعد

كومت غاليه ورحت اغسل وجهي احس بعد ماصرت اشوف كدامي ومخنوكه هالحجي
جان ثكيل هواي ثكيل سماعه رغم ان غاليه جانت تسال كل الي بالي اسأله كبل بس تمنيت لو ما مفتوح هالموضوع ولو ساكته وما سألت عنه ...

رحنه كعدنه بالاستقبال وجان بس الشيخه والحجيه كاعدات والبقيه كلهم طلعو يفترون بالبستان ...

ضليت صافنه واربط بالاحداث بالي ويه الي عرفته عنه هسه ...
ياخذني البال لهذيج الايام وشصار وياي بيهن واستغفر ربي من هالافكار وارجع احاجي غاليه وانسي نفسي ..

للعصر رجعو كلهم وايوب كال يلا نروح
بس الولد ماخلوهم يرجعون كللوهم ضيوفنا اليوم واخيتنه ما شفناهه وندري متعوفهه النه
عاد ضلو بس ايوب واسامه طلعو ويه الشيخ
وجراح ورماح وضلو بقيه الولد هنا ..
غاليه راحت وياهم جوه وضليت اني وام اسامه نسولف وبعدين اخذناهه هي والحجيه
وطلعنه شوفناهن البستان وبيت الفلاح
واخذته بعدين لبيتي هناك ضيفتهه وكعدنا بس اني وياهه نسولف وجان تكول ..
- والله ياام غاليه بنتج ذهب صافي
وعلى مينه اجتي
- اي والله غاليه طيبه كلب
- مو بس طيبه هي قويه وعاقله عرفت شلون تكسب رجلهه وغيرت اسامه جان هذا الهوا
مو الهوا هم رافع خشمه على الهوا حاله حال ابوه شلون بس يحط الفلس ويطلع هو نفس الشي بس هسه ماشااااء الله يمه عين البارده عليهم ابني تغير ياخيه والله صار حنين على اهله وهذيج السوالف الحلوه والشقى ويكعد بالبيت ويانه نشوفه قبل ماشوفه ساعه لو ساعتين ويطلع يفرفر بهالسياره
- ههههههههه الزواج يغير
هسه صار عنده مره يحبها غصبا عليه يضل بالبيت حتى يشبع منهه
الرجال ما ينكدر عليه بس من المره الي يحبهه
- اييي والله صدكتي
انتي شلونه وضعج زواجج
-اني الحمدلله مرتاحه
- دائما اسمع من غاليه تكول امي هي الكل بالكل اذا كالت هذا احمر بعد كلها لازم تكول احمر
-ههههههههههههه لااا مو لهالدرجه
- والله هاي سوالف بنتج
هديل دائما تسالهه ابوج يحب امج لو ام جراح اكثر تكلله ابويه مايحب غير امي
- ههههه اييي هاي صدك
- اخذتو عن حب انتو
- اي هو حبني واخذني جان بوكتهه عنده بس جراح ورماح
- شلون ام جراح رضت وتصافيتو
- ههههه سالفه طويله بس هو شيخ بعد والي يريده يسوي محد كدر يعترض واتزوجنه
واني ماحتك بام جراح حتى تصير بينه مشاكل معاملتهه بطيب وهي هم طيبه كلب
وعشنه مثل الخوات محد تعدت بيوم على حق الثانيه محترمتهه ومحترمتني فضلينه متصافين
- الحمدلله انتن اثنينجن طيبات كلب ومتسامحات كدرتن تعيشن سوه
-اي الحمدلله
اكولج عيني ام اسامه فدوه لكلبج بس طمنيني
ام سالم تعاملهه زين ويه غاليه لو تضوج منهه ؟ هي متجيب سيرتهه ابد وضل بالي
- والله يعني يوم زين يوم مو زين
تحب تتلاغى ويه غاليه بالحجي وبنتج ماتسكتلهه كل كلمه بعشره لحد مااني افاككهن يلا
- يبوووو والله كلبي حسني ليش ما تسكتيهه لغاليه وتمنعيهه من هالشي
- مو المشكله بنتج من تحجي تحجي حق شسكت منهه
- يعني شلون مفهمت على شنو يتعاركن ؟
- ام سالم تحب الي يخدمهه وما متعوده على احد يكسر كلامها وهي تجور شويه
وبنتج متسكتلهه اي شي يخصنه اني وهديل
هي اطلع لسانهه عليهه
بس هاي مشاكلهن علمودي
واني والله ماريدهه تدخل بهالشي بس هي مترضى
متعوده اني صار لا سنه ولا سنتين
راضيه وساكته هم خلف الله على المره متحملتني ضرتهه وكاعده وياهه نفس البيت

وجايتهه مرت حمى هم ووياي ولد تعلكو بركبه رجلهه وصار حاله وماله النه
مو كل بشر يتحملهه

- صح حجيج والله تضل تحز عدهه بس انتي ماشاء الله عليج معدله وشايلتهم بالصلوات
المفروض تكيف عليج

- هي هم مكيفه عليه بس بنتج مترضى بهالشي هههههههه

-هههههههه فدوه شلون كلبج فطير ياخيه
يشهد الله حبيتج ومرتاحه لهالقسمه مأمنه بنتي الوحيده بايدج

- بعيونه نخليهه خيه لا يضل بالج

رجعنه لبيت الشيخه وصرنا نحضر العشى
والولد طلعو يشوون دجاج بره وغاليه تصيح
- ناس ماتشبع من اللحم والذبح الله الاكبر عليكم تتغدون ذبيحه تتعشون ذبيحه نفس ماتشبع الا بالدم

شكد نحجي وياهه تغير هالنظره ابد متقتنع
تكول شلون تذبحون روح وتاكلوهه مااعقلهه
اني ولا اتقبلهه ..

غاليه حاطه ماعون التمر وفوكاه راشي وتاكل واحنه نحضر العشى
ومن رتبنه السفره دزينه عليهم
ودخلو هالمره اشوف غاليه صافنه على ايوب
واعرف كاعده تفكر بحجي الظهر
كلتلهه ..
- بنتي انسي السمعتيه الرجال هسه جد وهالسوالف راحت من زمان لتخليهه بالج
- يمه عجل وشكثر حبها ؟
- غاليه شحجييييت
- مابالي غير شي واحد
شنو الي كانت عليه هالبنت وكدرت على عمي وضل وفي الها هالكثر ؟؟؟
- اكول لو تاكلين وتفكرين بالي بطنج احسن
- يمه فهمت هسه ليش هو يسمع
لشناشيل اثاريه على باله من ايام شبابو وعشكو
- غاااااليه

صحت بيهه بصوت عاليه وماحاسه على نفسي ،، صفنت بوجهي ودرت وجهي منهه
لكيت الكل صافنه علينه بس ايوب مدنك راسه
عفت الاكل وكمت رحت اريد ابجي
ما اريد اسمع عنه شلون متاذي من هالنصيب لان يرجع يذكرني بكلشي عشته واني سنين اداوي نفسي منه ..

ضليت افتر بالمطبخ واريد اهدي بنفسي
اجاني حسين وكالي ..
- خير يمه شصار
-ماكو شي
- ماترجعين تاكلين
- لا هسه اجي بس شويه لعبت نفسي
واجيت اغسل وارجع
- غاليه شسوت ؟ بشنو غثتك !
- شتغثني يمه شبيك !! هيج اني مادري شلون طلع صوتي عليهه والله مادري شصار
- اهدي يمه اهدي انسيها عادي اصلا بنتك تستاهل الصياح طولان لسانهه

غسلت ورجعت كعدت والشيخ يباوعلي ابتسمتله وصرت اكل واسمع حسين صار يحجي مواقف ويلطف الجو الي توتر بكعدتنا
واخوته وياه يحجون ويضحكون
بس غاليه خانسه ..
كملنه اكل ولمينه السفره ودنعزل المطبخ
جان غاليه تكولي ..
- يمه ليش يعني انا ما حكيت شي معيب
- ضوجتيني اليوم كله اكولج عوفي هالسالفه وانتي حطيتي عقلج بعقله عوفيه بنتي عيب
تدخلين بالناس
-زين يمه مادخل بعد صار بس اهدي شدعوا هالاعصاب
- مو عصبيه اني داحجي بهدوء
-ايييه واضح
- اكلج رجلج مالله هداه ويخليج تعرفين جنس الطفل شنو
- مادري
- شبييج
- يمه مادري لا تساليني شي
- شبيج ضجتي مني ؟
- لا بس بعدين نحكي اريد ارتاح شويه

عافتني وراحت ضليت اغسل مواعين وحدي بالمطبخ كملتهن بسرعه ورحت كعدت ويه ام اسامه ...
الشيخ جان طالع وياه ايوب وبس اسامه والولد كاعدين على تلفوناتهم واصواتهم عاليه
صارت ساعه تسعه جان يرجعون واول مادخلو كال الشيخ ...
- يولو غاليه وينها ؟
- راحت تتمدد شويه تعبت
- امشي صيحيلها وانتو كفو لعب عاد خلي نكعد بهدا

رحت لغرفه الشيخه جانت هي نايمه على جربايتهه .. كعدتهه وبوستهه كلتلهه ..
- اسفه ماماتي مو بقصدي والله
- لا يمه لا تتعذرين عادي ياما وياما شابعه رزايل منك هاذي صغيره عادي اصلا نسيتهه
- لعد دكومي يلا اكعدي ويانه وابوج هسه رجع ويريدج
- اييه انا والله بهالحمل صايره على غفله يأشر عندي النوم
-هههه كلنه هيج اسأليني اني من حملت بيج
شيبتهم
-هههههه دحكي يمه السفرجل الي طلبتيه من ابوي وتعبتيه عليه دحكي شلون جابلك بنت حلوه
- ربي يحفظهه من العين انتي هم اكلي حتى هم جهالج حلوين يطلعون
- مايحتاج اصلاً كل جيناتنه من العايلتين حلوين ابني انا يطلع كمره
- ان شاء الله ربي يفرح كلبج بي

طلعنه وكعدنا يمهم الشيخ على كعدته طلع
ورقه من جيبه مطبكهه وصاح ...
- ول يابه جراح احدر هين

اجه جراح كعد على يسرته والشيخ كال ..
- دحك انته طعتني ورضيتني ودرت بالك على خوتك وانا لاجل اني مرتاح البال من زين فعلك ردتك انته بعد ترتاح
اكضب هذا كتاب تعيينك هين على السدود

اخذه جراح من ايده وضل يقرا بيهه وبعدين باوع لاخوته ويضحك وغاليه كبل راحتله
وصاحت ..
- ول خوييي المهندس تعين

حضنته وتباركله وهو خجلان وخر منهه
وراح للشيخ بوس راسه وتشكر منه والولد كلهم باركوله ..
كلنه فرحنه لجراح لان هو صارله سنين متخرج وكاعد ومكضيهه شغل عند العالم وهو مهندس يتمنى يتعين ويفتخر بشغله
مبين على وجهه ممصدك بالخبر هيج فجأه راح يصير المهندس جراح !!

الشيخ كال .
- صار بعايلتنه مهندس موارد مائيه ودكتور اسنان ومصممه واعلامي واهل الاداره اثنين ماااااشاء الله من كل صنف مميز عدنا واحد
خلي اندحك اخر شي نختمها وين ؟ !

ضحكو وحر كال ...
- هم هندسه يابه ان شاء الله
- اثنينكم لو بس رأيك ؟
- اثنينا يابه احنه مانختلف برأي

اسامه كاللهم ..

- عوفو كل اقسام الهندسه وروحو لهندسه الطيران وتعيينكم عليه اغركم فلوس بيهه

همه حركتهم حر واسر من يعجبهم شي واحد يباوع للثاني ويحركون بحواجبهم يلا يحجون
كالوله ..
- شكد نحصل يعني
- على شطارتكم تحصلون بالطيران الفلوس على كد الشغل شكد ماتشتغل اكثر تحصل اكثر ولكم هو بس الاسم كافي مهندس طيران
منو يندك بيكم بعد عمي
- عليهه خيي سمعت يابه هاي غيرنا رأينا بعد نصيرلك مهندسين طيران

ضحك الشيخ وكاللهم ...
- مو بس حكي وتمني يابه هين دراسه وتعب تتحملوهه !
- رجالك يابه تتعبنه دراسه !
- عجل شدو حيلكم هالسنه وفرحونه بمعدل زين
- يأمر الشيخ
- ول يابه رماح
- ها يابه
- واعدتك انا بسياره مو صح
-اييه يابه صح
- وواعدتك بالزواج هم
- اييه واثنينهن تبخرن
- هههه اختار واحد منهن الحين وبكرا يصيرلك
يلا السياره لو الزواج !

صاحتله غاليه ..
-الزواج ياخيي

وحسين يصيحله هو وصكر ...
-السياره ياخوي السياره

هو ضل يضحك وبعدين دنك وكال ..
- الزواج يابه

غاليه ضحكت بعلو صوتهه وتصيحله
- فدييييت خويي المعرس انااا

والولد ضلو يصفكون ويضحكون وهو خجلان مدنك ويحك بشعره والشيخ يضحك
وايوب كال ...
- والنعم من هالاختيار مبين ياولد اخيكم واكع بالحِب ههههههههههههه

حسين كبل كاله ..
- عمي اخينا واكع ومتنكعه ريشاته ويصيح يمعودددين يااهل الغيره حسووو ومحد يحس

الشيخ كال ...
- هاااي يابه حسينه عجل ليش سألنه !
وبكرا نمشي نخطب عدل يابه لو مو عدل !
- عدل وابو العدل

رماح كال ..
- يابه يعني من صدك نخطب بالعجل !
-ايييه يابه عجل ماهو بيت عمك هذا حدر بيتنه نشرب الجايات عدهم العصر ونقرا الفاتحه يحتاجلها شي !!
-لا يابه زين بس يعني عبالي ننطيهم خبر
- انته مقتنع بالبنت لو غيرت رايك لغير بنيه !
-لااا يابه شسالفه نلعب احنه ! هي هاي مختارهه
- متاكد يا رماح مو بعدين تدورلك سالفه وتروح ادحكلك دكتوره وتفر عكلك
- يابه انا لو اريد دكتوره حدري كثير
بس انا مااخذ دكتوره لا اليوم ولا بعد ميه عام
- هااا زين زين يعني مقتنع
- اييه يابه مقتنع انا ادور زينه اخلاق مادور شهاده وبنت عمنا ونعرفها زين ماندحك احسن من اخلاقها وانتو اسألوهه بالاول اذا ترضى خير واذا ماترضى هم خير لا تحطونا بالامر الواقع
- ايييه يابه اكيد نسألها عجل نخطبها غصب عنها !.. ان شاء الله العصر نمشيلهم وان صار نصيب وقرينا الفاتحه .. شهر و اسويلك عرس رنان
- تسلم يابه تسلم
- والسياره على التخرج تطلبني اياهه
- لااااا يابه مدللنه هوااااي اليوم خجلتني والله
-ههههههه تدللو دام ابوكم حي تدللو

راح بوس ابوه واسامه كال ..
-شيخنا لعد وهالشباب الخمسه مالهم شي منا منا
- شيطلبون ؟ حتى ادللهم بمطلبهم
- اطلبو ولكم فرصتكم كل واحد يطكله جارجر يلا احجو

ضل يحاجيهم وهمه واحد يتصفن بوجه الثاني
حر واسر كالو ..
- يابه احنه منريد شي هسه على التخرج
نطلب براحتنه
- ابشرو يابه معدل الزين هديتو زينه

عباس وصكر كالو ..
- تلفونات جديده لان حالياً ميزانيتنه مصفره مابيهه شاحنه تلفون وداخلين سنه جديده بالجامعه وانته بكيفك بعد يابه
- هههههه ابشرو تلفون جديد ولدي يستاهلون دامهم يتعلمون

باوع الشيخ لحسين وهو ضحك وكبل كال ..
- يابه هنه اثنين بالي وادري بيهم مايصيرن
فخليني ساكت احسن
-ههههههه لااا اطلب اطلب حالك حال اخوتك اطلب هو جيب ويفلس ماضلت عليك
-هههههههه خليهه عجل غير مره لان ماظن الميزانيه تسمح
- ول يابه اطلب غيرها بعد مالبيك
هاي اول واخر مره ترا
- هاا عجل .. عجل
يابه عزيز كلبك انا وتعرفني ابداااااً مامتهور
والدراجه الي اريدهه اذا حصلتهه ابداااً
ماسوق سريع وابدااا مانزع الخوذه ابدااً يابه ابدااااً
-هههههههه واناااا ابدااااً مارضى بيهه
- هااا يابه عجل اطلب واطلب وتالي سديتهه بالوجه
- تخاطر انا ادري بسوالفك وتضل تفرفر بيهه ويه جماعتك تالي الليل
- عجل يابه انا ماخذهه للفرجه ! غير افرفر بيها
- استر علينه يابه استر علينه
تريد تطلب غيرها اطلب هالدراجه تشيلها من بالك
- اطلب عجل اطلع فارغ الايد وحدي !
اريد كاميرا لان انا شغلي بالتصوير واريد اتعلم بيهه
- ول يابه انته مو على الصحافه شدخل التصوير
-اييه يابه بس انا ناوي اتخصص بالتصوير والاخراج واحتاج كاميرا من هاي التعجب
يابعد عمري ياشيخ ياكريم انته
-ههههههه سهله على الكاميرا سهله ابشر بالكاميرا دحك سعرهه شكثر واحدر اخذ فلوسهه واشتريها
- اييييييه يسلم الشيخ تاج راسناا
-هههه بعد من يطلب ! يمه اطلبي الي يعجبك
- سلامتكم يمه ماريد غيرها
- الله يسلمك ،، غاليه يابه اطلبي
- اطلب يابه عجل ليش ماطلب
- اييه اطلبي يابه تامرين
- يابه انا اريد الطلب من جراح
-هااه ليش ؟
-هو مطلبي عنده

جراح كاللهه ...
- ول انتي بقيتي عليه شي شتطلبين بعد !
- اييي خيي ماريد منك فلس بعد عندي الي كافيني
-هاااا عجل خيرك تدورين جراح بمطلبك ؟
- ايييه مطلبي هو انك تتزوج