#شقراء_بغداد

الجزء_الثاني_بارت_١٦


وبنص شهر ال ١٢ رجعلنه جراح العصر ايدو مدمايه وينافخ نار ومارضى احد يكربلو واول ماصرخ عليه انا حكالي ..
- لاا تطلعييييين كدام وجهي وليييي من هين

مشيت وانا بعيني الدمعه عجل انا شسويتلو ويصارخ علي !!

ضليت كاعده بغرفه امي وافك بشعري للنص وارجع اظفرو لحين مادخلت امي
وكربت حضنتني قلتلها ...
- ملطشه انا هين عندهم كلمن يتعصب يذب حركتو بيه
- لااا حبيبتي انتي الكل بالكل واخوتج يحبوج قابل متدرين بيهم انتي
- ايييه مشيشين اعصاب اعرفهم
- ههههه اعذريه جراح متخبل شويه هالايام
- وشجاريلو كل هالاعصاب منصبه بي
ما يتهدا شعندو غركانه السفن لو مهدم بيتو !!
- غيرته ياعيني غيرته كاتلته
- من شنو يغار ؟
- يغار على اخيته

دحكتلهه ورافعه الحاجب وهي كعدت حدري وحكتلي .
- اسامه الظاهر ماكاعد يفك منه
واليوم رايحله للمحل وديحجون وهو جافص بحجايه وياه مخليه يشب نار
كاتله وراجع
- شنو الصار بينهم بالكلام تعرفين ؟
- ايي هسه اخوج صارله ساعه يشتم بي
ويصيح عليه يكولي انتو انطيتوه مجال وانطيتوه امل بهالزواج ولا ماكعد يحاول وياي .. واسامه اليوم كايله تره اختك لاخلت ليلي ليل ولا نهاري نهار زوجنياهه لغاليه عاد

ضربت على رجلي بحركه وامي كملت ..
- واخوج نازل عليه دك ضرب بالشارع لان جاب اسمج على لسانه يكول ماخلصوه مني الا الشياب بالشارع جايين مفاككين بينهم وجراح كايله بس اشوف خلقتك كدامي النوب اسكطك
- يمممه شراح يخلصني من جراح يمه هسه يذب حركتو كلها بيه والله انا مالي دخل بشي يمه والله هو الي لازكلي
- اعرف اعرف خليه زين ما سوى جراح لعد هاي حجايه حجايته
مايكول عيب هذا اخوهه الجبير شلون هيج احجي كدامه واجيب طاري البنيه
يستاهل الكتله خليه هسه بعد من هاي الضربه يدير وجهه ويروح
- صدك يمه هذا ظنك ؟ بعد تخلص سالفتو هين!؟
- ايي مااظن يرجع بعد وهو مبين عليه خشم يابس هسه اكيد يفكر بكرامته وشلون ارجع واخوهه هيج سوه
بعد راح يكطع نفسه وبالاخص جراح ماخلاله امل منين مايجيه يسدهه بوجهه
- يمه انا بعد ماانزل والله مالي عين ادحك بوجه اخوتي بعد
-ليش قابل انتي شسويتي هو المهيلك يركض وراهم ركض المخابيل
- حتى لو يمه استحي من اخوتي مانزل بعد حتى اكل مااريد خليني هين ماريد ادحك احد منهم والله يمه خجلانه عجل مادحكتي جراح لو بيدو يكطعني وصل
- اووف اووف دضلي هنا بين مااشوف شتاليهه ويه اخوج .. بله هسه هذا خلي يروح يولي زين غيره وغيره لو اجه هم يدكلنه طبول مثل هسه !!!
همزين ماعدنا خمس بنات جان شسوه شعمل بينه

نزلت امي وانا ضليت اغم بنفسي والومها كلو مني انا الثوله انطيتو مجال وخليتو يتامل ماكضبت نفسي عن متابعتو وخليتو يتأمل ..

بساعتهه اكلتني الملامه وتحيرت بهالحال واشتم باسامه عجل هو مايفهم عيب يذكر اسمي هالشكل كدام اخوي !!

ضليت لليل بالغرفه وحتى العشه امي صعدتلي الاكل وقلتلي ابوي ينام عند عمتي اليوم وضليت انا منجضعه بفراشها واكلب بالتلفون وبالعجل نفتح الباب ودخل جراح حكالي ..
- جيبي التلفون

مديتلو التلفون بالعجل وهو اخذو ونزل
ضليت اضرب على وجهي ياويلي شراح يصير بحالي اليوم !!!!
اخاف يروح يراسلو بصفتي او يدحكو بالبحث انا ماحذفتو !!!

كاعده على نار والخوف كاتلني وهو رجع دخل هايج علي وكضبني من ركبتي وحط راسي بنص التلفون وحكالي ..
- شعرررفك بحسابو !! هااا شدخلك عليه هييييين

تربط لساني بساعتهه وضليت امتمت
وهو دفعني على الفراش وضل يستغفر وحكالي وهو يصك على اسنانو ..

- بالحرف الواحد ياغاليه تحكين بالحرررف الواحد

عدلت كعدتي وانا كل جسمي يرجف وهو وجهو احمر ويضغط بيدو على التلفون ويدحكلي .. قلتلو ...

- هاذي مره هو ارسلي اضافه وانا دخلت دحكت حسابو وساعتها حكيت لامي من اول ما رجعو من ايران وقلتلها هذا ارسلي طلب وانا حذفتو وبس هذا الصار

- غااااليه

- ماصار غيرو ماصار انا وش ذنبي تحاسبني هالشكل ماسويت شي شدخلني بي انا
عجل الي يطلبني انا اتعاقب على جيتو !!
مو حك هذا والله مو حك

- لاااا تخبلينييي الولد حسابو مليان اشعار وصور لييش هالشكل يسوي ليييش!!!
لان هو يعرفك متابعتو لو مايعرف انك تدخلين حسابو مااينشر هالاشيااااء
كذبببي حكيي يلاااااا كذبيبيه

- وشعرفني اناا شلون يدري ادخل حسابو او لا حاسبو هو الي يلاحكني انا مالي دخل بيه ماحكيتلو احدر اخطبني

كضب فكي وهو يحكيلي ..
-لسااااانك اكضبييييييه
- جراح
- انعل سلفى سلفاااااه يولووووو انتي ثوووله ماتفهمين الي يغيضني هالشكل
هذاااا حاطك براسو شلوون ترضيني اسكت واتهداا وادحك غريب مخلي اخيتي براسو ويشعرلها ليل نهاااااار
مكرررن انااااااا مكرررن واسكت عليه
وووول العمر كلو هذا انا ماخليت احد يدحك خيالك ولا يعرف وصفو الحين هذا يحدر بكل برود يحكيلي اريد اخيتك غااااليه ومدحكك ويوصفك هيييين هييييين شلوووون اسكت عليييه وارضى باخطاااااءك هااااذي يوليييي

اناااا اجفص بطنو بالحكي وهو يطنش مو حبااً بيه لاااا حباً بمطلبو وغايتووو
وانتي ساعه الي تدحكين حسابو تطعنين بيه تخلين تعبي هذا كلو بالشط يروح
افهمي افهههههمي

ضل يضرب على راسي باصبعو وبعدها
كسر التلفون وحكالي ..
- انااا بعرضي ماتفاهم ياغاليه هين تلاكين الي ماتعرفيه من جراح
ماريد ادحك وجهك بعد تضلين هين ماتنزلين طول مااانا بالبيت وحرف من الي جرى بينه مايطلع عتبه الباب

نزل وانا كضيتهه بكي كرهت نفسي ساعتهه عرفت هالطيش والفضول الي جرفني لرجال غريب شلون عواقبو وخيمه ..

الخوف من غلطي هالمره خلاني اكذب اول مره على اخوي اول مره تصير غاليه ماتحكي بثقه وشجاعه حدر خويها
هالشي حرك كلبي وكرهني نفسي كرهت فعلي هذا وهالايام الي كنت اغافل اخوتي وادحك بيها على رجال غريب واتونس باشعارو ..

حدرت امي علي ودحكتني ابكي وانا حكيتلها كل الصار ماكدرت اسكت بعد خوفي من خسارتي لاخوي ماخلاني اسكت واضمها بكلبي .. اريد الي يعلمني شسوي بهالحال شلون اصلح هالغلط الصار بدون قصد مني ...

ضلت امي تهدي بيه ووعدتني هي تتصرف بهدوء بدون ماتخليه يدري بالحديث الصار بينا ..

ثاني يوم نزلت بعد طلعتو وضليت كل اليوم خامله للعصر ارتفعت حرارتي وضليت نايمه بالفراش وامسح بالدموع
واني رايحه جايه علي تطيب خاطري وتنطيني ادويه والكل يسأل
خيرك ياغاليه ؟؟
وامي ترد بدل عني باعذار كاذبه

ابوي كعدني وحكالي خويك هذا لزوم تتحمليه .. ما حكى غير هالكلمتين
حسيت اهلي تغيرت نظرتهم علي بعد الصار من اسامه ..

ساعتها تمنيت اكضبو واصلخ جلدو من عظمو على سوايتو هاذي ..

عرفت من امي ان ابوي مخابر على
ابو اسامه ومعاتبو على افعال ابنو
وهو متعذر بدل عنو وحاكيلو ان هو مايعرف ابنو هالشكل يسوي حتى يحصل البنت ولا يدري ان هالسالفه للحين براسو
ومتفاجىء من هالحكي وتوعد هو الي يتفاهم ويه اسامه ويخليه يكف من هالسالفه ...

عدت ٣ ايام انا مامدحكه جراح ومكضيتها بكي بحضن امي وهو غير مكان نومو .. كنا انا وياه وجدتي ننام بمكان واحد صار الحين ينام حدر اخوتي

سمعت صار عرس صاحبو ومعزوم عليه ومتكشخ وطالع وانا ما دحكتو
متت بقهري بيومها بكيت بعلو حسي وامي تسد بحلكي وتسكتني بس انا مخنووكه شلوون اخوي هالشكل يتجاهلني وانا معوده بكل شي لازم حدرو وانا اتخيرلو اللبس واصورو كبل مايطلع
واكل راسو بالحكي على التلفون وهو طالع حتى يرجع بسرعه ومايطول بسهر بره البيت واكابلو ونتعلل سوه ..
هسه راح كل هذا من ايدي بغفله خلاني اتهستر بيومها ما وكفت بكي ولا هديت
لا امي كدرت تهديني ولا جدتي ولا حتى اخوتي كلهه فوك راسي وانا ابكي متهستره لحد الليل ما هديت ولا سكنت
مكرفصه على نفسي بغرفه امي والوم بروحي على الي سويتو وحسيت على ايد
نمدت على وجهي ترفعو ..

دحكتو جراح بالعجل حضنتو ورجعت للبكي نفسو والمشاهك وهو يمسد على شعري وساكت .. صرت احكيلو ..

- والله ما تقصدت شي والله مالي دخل بي ولا انا خوانه والله ياخيي ما سويت شي يخذلك وينزل راسك والله ماخنت اهلي انا والله والله
حتى اسأل امي انا حكيتلها كل شي والله
ياخيي ما زليت وتعديت بشي ما يرضيك

- ادري ادري اسكتي عاد كافي

دحكتلو وانا امسح وجهي وقلتلو ..
- يعني مصدكني
-اييه عجل ليش مااصدكك انتي ترباة ايدي بنيتي مو بس اخيتي اعرفك ما تزلين وتخونين اخوتك
- عجل ليش ما تدحك بوجهي وصديت عني كل هالوكت
- حتى تفهمين وتتعلمين درس ان الحرف الي ينضم عن اهلك يخسرك شي ثمين
حتى تتعلمين ضبط النفس وتحسبين حساب للبعيد كبل مايجرفك الفضول وتاخذك المشاعر

دنكت راسي وهو حط ايدو على كتفي وحكالي ..
- انا افهمك غلوي واعرف نيتك صافيه
بس غيري يفسرها غير شي ولو انتي مو بقصدك بس الرجال عقلهم موجه جهه وحده ماتفهميها انتي
انا من اتشدد بهالناحيه حتى اضل محافظ عليكي ياخيتي انتي بعيني بعدك البنيه الصغيره الي تعرف تدلع وتتزعل وتتغنج بس حدري مادحكك تكبرين ابد والله
انتي بنيتي اريدلك الزين ومااسلمك الا بايد امينه تعرف تحافظ على هالورده الي زرعتها وداريتها بتعب .. غير الي ادحكو مثلي يعرف يفهمك ويتحملك مااوافق عليه ولا اسمحلو يخلي اسمك بالو اندمو عليه والله اندمو لو ذكر اسمك بالعلن

دحكتلو والدموع تنزل من عيني خجل منو على سوايتي وهو مسحهن وحكالي ..
- انسي هالسالفه عاد سديناهه يلا كافي دموع مدخله البيت انذار اليوم وكلهه متصفنه وتدحكلك عجل هالشكل انا معلمك يولو تفرجين البيت على مشاكلنه !؟!!!

حضنتو ومسحت وجهي وحكيتلو ...
- ماتحملت والله هين كابت على صدري القهر من بعدك ياخيي والله ماعرف اعيش بدونك انا اموت بحسرتي لو بعدتني عنك
- اسم الله على عمرك ول يابه تهدي تهدي
- جراااح
- رجعنه للغنج
-جرااح
- ياعينو
- شسويتو بالعرس ؟ ويامن رحت ؟
-هههههه هاااا يولو ماتسالين على احوالي كبل على العرس داكه بكلبك هالسالفه
- ههههه عجل تروح وترجع وانا ماعرف شصار ما صار
- يولو انتي ولي امري !!! انا الي اسال مو انتي

-ايييه انا نيتي اعرف الصار يعني فضول مو اكثر

عدل كعدته وصار يحكيلي ..
- صاحبي هذا اخوه الكبير اليوم عرسو ورحت
- بيا منطقه ؟ قريب من هين !
- اييييه بالدوره بس مو نفس الحي ابعد من هين
-زين تعشيت هناك
- لااا والله ماكلت
-ليش !!
- مسوين كص دجاج وتعرفيني انا الدجاج ما اكربو
- اييييه عجل اسويلك عشى ونتعشى سوه
- الله وايدك خويك طاكو الجوع
- يخسى الجوع الحين انزل واسويلك اطيب عشى بس بشرط
-خيييير بسم الله تونا بدينا
- ايييه ماطلبت شي انا بعدني
- تتشرطين ماتعرفين تسوين سالفه بدون مقابل
- تره طلبي صغير وانته ماسمعتو بعدك
- اعرفو هو لو امشي للمحل جيب هالشي
لو اكعد حدري وسولف الصار
-هههههههه خويي شاطر حافظهن حفظ لشروطي
- عجل ادكين بيهن فوك راسي صار سنين عليش ماحفظهن
- هسه ماتنزل ويه اخيتك الي راح تتعب وتسويلك عشى وتكعد وحدها بالمطبخ بهالليل
-اييه ايييه نازل يلا امشي

وكفت ومديتلو يدي كومتو وبعدين كرصت خدو وهو ضرب راسو براسي
ونزلنا نتمضحك وضلينه بالمطبخ انا اسوي الاكل واسألو كل شي صار ماعرفتو بهالكم يوم وهو يجاوبني عليهن
وضلينه يومها للفجر سهرانين ندحك فلم سوى .. فارشين حدر بعض وسماعه باذني والثانيه باذنو وندحك الفلم ومغطين راسنه بالبطانيه ونتمضحك على الساكت
حتى لا نكعد جدتي ...

رجعت الدنيا حلوه بعيني ساعه ما تصالحت ويه جراح ... انا لو ازعل كل اهلي ماايرفلي جفن الا هو هين اخرب من طولي عليه ماتحمل جفاه احس ان ابوي وامي واخىتي كلهم يزعلون علي لو هو زعل احس نفسي وحيده وذنبي مايغتفر لو اخوي صد عني وزعل

تعلمت من الي صار ان مهما يصير مااضم شي عن اهلي واتصرف من شور راسي وتغرني الاشياء ...

دخلنه سنه جديده سنه ٢٠١٧ وكلنه امنيتنا هالسنه نعاود لديرتنا وبيتنا

بصباح ١/١ صعدت كبل لغرفه امي
حتى ادحك ابوي شنو هدالها بهالسنه ؟

سألتهه وحكتلي بالكنتور بالملحق
بالعجل فتحتو ودحكت ثلاث علاليك هدايا نزلتهم وسألتهه ...
- يمه كل هذني ؟
-لااا شسالفه بس هاي الورديه

فتحتها ودحكت بيها علبه مقسمه مقشر وسبلاش ومرطب ماركه فيكتوريا سيكرت ...

غمزتلها وقلتلها ...
- ابووي الظاهر يريد يرجعك شباب
كلو ماركاااات وسبلاااشات
- اش ولج
-هههههه عجل هذني البقيه منين
- هاي جابوهن بيت ابو سالم وكت العمليه
-هاااا شنو بيهن
- حتى ناسيتهن مادري شوفي واخذيهن الج

فتحت اول علاكه الكبيره بيهه علبه مقسمه عطر ومعطر جسم ومخمريه شعر شميتهن والعطر يمووووت نااازك ودافي واخذ عقلي بالعجل قلتلها ...

- يمه هالعطر ابوي لو يشمو عليكي ينسطر والله مايضل براسو عقل
يهد الشغل والرجال ويضل مكابلك
-ههههههه غير يتخبل لو يدري مخليه منه
-ليييش !!!
- ما قبل استخدمهن
- ليش غير افهم ليش!!
- كيفه بعد نكدر ناقش
- انتي ام النقاش يمه تضميهه علي !
- ماكدرت هنا ماقبل شسوي اكعد اناقش على شي مايسوى ! عندي كومه عطور معتازتلهن قابل ! اخذيهن انتي استفادي منهن احسن ما مضمومات
- يمه انا المن اخلي ماريدهن

عفتهه على جهه واخذت العلاكه الثانيه دحكت بيهه ساعه وسوار فضه قلتلها ..
- هاذي هم ما تلبسيها ؟
- بناتيه اخذيهه الج حلوه تطلع على ايدج
- يمه هو انا لابسه الي عندي حتى اخذ الي عندك ! ماريدهم ضميهم ذكرى

رجعتهن مكانهن ودحكت امي صافنه وبالهه بعييييد .. سديت كنتور وردت انزل وهي على صفنتها.. عفتها ماكطعتها عليهه الظاهر شي مهم واخذ بالهه ..

اتفرفر بهالبيت بملل وحدي .. جراح ورماح بدهوك رايحين لمزرعه صاحبهم
وحسين نايم .. عباس وصكر طالعين
وحر واسر بالتلفون راسهم ماينشال منو..

جدتي ليل نهار تسبح وعمتي لو تخابر باهلها لو ملتهيه بشغل البيت ...

بهاذي كعدتي افكر شنو الشي الي يكدر يملي فراغي هذا ؟؟؟

طالت صفنتي بالتفكير وكطعها صوت الباب وهو يندك بالعجل طلع اسر يفتحو
ورجع شايل قفص بلبل وباقه ورد
رجف كلبي ساعه دحكت القفص الذهبي هذا نفسو مال اسامه بالعجل سألتو ..
- ول اسر هذا منين ؟
- ولد وصلو هديه لجراح

انعصر كلبي ساعتهه قلت ردينه لوجع الراس وراح يرد جراح متهستر باعصابو !!!!!

مشيت اخذت الورد ودحكت بي كارت قريتو ..
' عام سعيد خويي جراح
اعتذر على مابدر مني من سوء خُلق
اتمنى تقبل هالهديه مني وتعتني بيها
اكرر اعتذاري وانتظر ردك على اخر رسايلي '

ضليت ادحك للكتابه وافكر لو درى جراح شراح يكون ردو ؟؟؟!!
وليش هالولد مايرضى يبعد عننا ؟

اخذت الورد شميتو ريحتو بارده وخفيفه طيبه تدخل للنفس ..
البلبل كان يتحرك هين وهين ماثبت بمكان .. اخذتو للمطبخ خليتلو اكل
وضليت ادحكو ينكر وياكل ..

صرت اتسائل .. شسالفه اسامه ويه قفص البلبل هذا ؟؟؟ ليش كل مره يرسلو ؟!

صار سلوتي بيومي هالبلبل صوتو كسر ملل البيت وبرودو وانا خبصتهم بي
دحكوه طار دحكوه ياكل من هاذي
دحكو ريشو من هين ومااسكت عن سيرتو ..

لحين ماحدر جراح ودحكو كلب وجهو
و بالعجل طلع بالطرمه يخابر .. ضل يحكي بالتلفون ويتمشى ورجع حدرنا

معصب وصاح ..
-شيلي هذا من هين

دفر القفص برجلو وانا بالعجل اخذتو خليتو فوك حدر غرفه امي وضليت محتاره بي ..

رجعلي الخوف من دحكت رد فعل جراح هالشكل والظاهر اسامه مايستسلم وما يفك من اخوي الا ما ياخذ غايتو وغايتو هاذي عند جراح الموت الاسود ..
شلون راح تنتهي عاااد ؟؟؟؟

تحدد عرس حسن بعد اسبوعين وكلها تحضر للعرس الا انا مافكرت حتى اني احضرو ... رغم ان هالمه ويه بنات العم والعمه من اكبر امنياتي اتمنى ادحكهن وتصير بينه علاقه اخويه قويه وتصيرلي صاحبه منهن بس جراح عودهم وعودنا على البعد ولليوم مامسلمه عليهن ولا عندي ارقامهن حتى .. بس اخبارهن اسمعها من جدتي او عمتي ام جراح

حضرو العرس وكلها رجعت بيومها تحكي عن العرس وتفاصيلو الا انا طنشتهم وكمت رحت كعدت بغرفه جدتي واظفر بشعري .. ماريد اسمعهم يوصفون
حياه وحريه الناس الي ..كرهت هالشي ..

حدرت امي تسألني ..
- ها بنتي شو هنا وحدج
-عجل وين اروح
- شبيج
- مابيه شي يمه عادي كاعده

دحكت جراح دخل وهي مشت ..
صار ياخذ ملابسو ويدحكلي شويه ويشيل عينو بعدين حكالي..
- خيررها ياسمينتي مظلمه اليوم
-عادي
- منو مزعلك
- هو انا المن دحكت حتى يزعلني
راسي وراس هالحايط
- ههههه لااااا محمله كلبك كثير
-جراح
_ هاا اسمعك
- اريد انام وصيهم لحد يدخل هين كلساع

جريت فراشي مديتو وانجضعت وهو يدحكلي ويسالني ..
- غلوي شصاير ؟
- نعسانه ماصاير شي
-والله؟
-اييه

غطيت راسي وهو طفى الضوا وطلع
نمت لاني ماريد افكر بشي ولا اريد اسمع احد مالي خلك كلش ..

من يومها انا ماتعدل مزاجي ..
الوحده الي احسها بحياتي ماتنجرع
لا صاحبه ولا اخت ولا تلفون ولا طلعه ولا حتى مدحكه سما غير هالمربع الي كدامي ادحكو من باب المطبخ واذا وكفت بالطرمه بالعجل واحد من اخوتي يكف فوك راسي ويضل يفرفر بعينو لحد ماابزع واكوم ادخل ..
احس نفسي هم عليهم ضالين محتارين كيف يخفوني من الوجود ...

بطلت اكعد وياهم واطنشهم لو تحرشو بيه حتى يخلوني اتجارى وياهم بالحكي
مكابله هالقفص وكاعده الاعبو واحفظ حركاتو .. اوكلو واتلمس ريشو ..
خلف الله على زعلهم الي استفدت منو بهالبلبل يصيرلي ونيس بحياتي ..

جراح اكثر من مره يحاول وياي احكيلو شنو الي صايرلي واختم الحديث بالسكوت ... مره وحده جاوبتو ...
- ضايجه متكأبه شراح تسوي !؟

سكت وضل يدحكلي وانا درت وجهي عنو والتهيت بشعري .. من يومها بطل يسألني شي ...

صرت مرات افكر لو انا ماعندي هالجسم وهالجمال لو اني وحده عاديه مابيهه شي يفتن كان خلوني اعيش مثل هالبنات ؟!

بس اعرف الجواب لا .. لان اخوتي عندهم مدامني من الحريم اضل خلف الستار من يوم احيى ليوم اموت .

امي تحاول تلهيني بالطبخ .. تكوم مواد واكعدي لفي كليجه انتي وجدتك تلهو بيها
لو اليوم نريد من ايدك الغدا ..
حضري كيك لاخوتك وبدعي بترتيبو
وانا ارفض اسويه مالي خلك اسوي شي غير ادحك تلفزيون او انام ..

ابوي اشترالي تلفون مثل تلفون حسين بس لون ذهبي .. تشكرتو وكلبت بيه مرتين ونفس اليوم عفتو على ميز المرايه بغرفه جدتي وما كضبتو بعد ..

التلفون فارغ .. ماعندي اي حساب او اي احد اراسلو او اي شي يهمني بي
شمرتو هالشمره وماكضبتو بعد ..
ياخذوه اخوتي يضيفون ارقامهم وينزلون برامج وحسين ضافني بكروب بالفايبر مسويه وجامع كل اخوتي بي وما دخلتو ولا رسلت شي ..

جراح يرسلي صورو على الفايبر ويعاتبني ليش مادحكهن وانطيه رأيي
احكيلو انته دايماً حلو بكل صورك مامحتاج رأيي .. يضل يدحكلي ويسكت

اخر شي تلفون طفى شحنو وهو بمكانو
عفتو ماهتميت ...
اكضيها ادحك تلفزيون مسلسلات هندي
او اخبار مرات كارتون كونان والي يصخرني على شي اكوم اسويه وارجع اكابل تلفزيون ..
وكت تطفى كهرباء اتلهى بالبلبل وانام من ساعه ١١ ...

جراح ظنو انا ماكضب تلفون بسبب الصار بينا اخر مره وحدر يحكيلي انه ناسي كلشي ويثق بيه وكان شاحن تلفون ومشتريلي حافظه ويحكيلي لاتضلي هالشكل متكأبه اخذي تلفونك عجل ابوي المن اشتراه ؟
وانا احكيلو مالي نفس ملتهيه بمسلسلاتي ماعندي شي مهم اتابعو بالتلفون ..

وضل على حطتو محد مكلبو ..
وانا من كثر الاكل والنوم صرت هالكبرني .. ومن ادحك نفسي بالمراه
احكي حكهم يخفوني من العين هالكبرني اجذب التايه ...

وبيوم انا منجضعه حتى انام العصر
وسمعت صوت جراح رجع ويسأل
وينها غاليه .. جاوبتو جدتي ..
- نايمه هين

بالعجل صيح ..
- شنوو نااايمه كل مااجي نايمه ! شسالفتهه بنتك عمتي ماادحكيها انتي !!

جدتي علت صوتها عليه وانا اعرف نبرتها هاذي تنفجر بجراح بعد ماتسكت ..
- اييييه شخبصتنا نامت البنت عجل وين تولي ! هين يا تنام يا تاكل يا تتصفن بوجوهنا
- مو هالشكل جدتي صبح وليل وعصر هي نايمه ماتكعد تفهمنا شسسالفتها مريضه بيها شي ! احد منكم غاثها بكلمه فهموني شسالفتهه
- والله محد سواها هالشكل غيرك ومحد يكسر خاطرها ويدمر شبابها بهالغرفه غير انته وعنادك وراسك المحجر هذا

- ايييه جدتي لااا تفرين السالفه وترجعينا لمدري وين
- الااا افرها وارجعها وتسمعها غصب عنك ومو مره احكيها الفين مره احكي واعيد ماااا خرب البنت ونفسها غيركم
عجل بنت تعيش وحيده لا صاحبه لا اخت لا مدحكه جنس بنت حدرها لا شامه هوااا الله خانكيها خنك من كل صوب تطلعون فوك راسها حتى بنومها تنبشون شعدها تنام ووين نامت وامشو صحوها
شسالفتكم انتو لهالدرجه وصلت بيكم مواصيل تحرمها من كل لون من الحياه وهاذي كدرتكم جايبيلهه هالتيلفون
شتصخم بهالتيلفون ذاك وينو عاكطتو
عكطه العصى
- يعني شسويلهاااا شسويلهااا ترديني اخذها افرفرها بالشوارع هييييك اطلع زين وابن اودام !!!!
- مااااتلوص بكيفك انت يول مو بعد هالعمر الحين تتندر عليها
ياااماا كعدت وقلتلك يولد مو هيك تتصرف البنت روحهه ترفه وبشوشه
لين وياها خلي عدها صاحبه تمون عليها
ماااسمعت مني رااكب راسك وتلعلع مايدحك اخيتي بشر
هاااي اخيتك كاتلها الملل والوحده
روح داريها لو كدرت
تاليك تتزوج وتخليها تتصفن عليك وعلى عيالك
لو الحين عندها صاحبه كانت فضفضت الها وتونست حدرها وكسرت على وحدتها ... الوحده كتاله الروح يافهيم يامتعلم

ساعتها حسيت جدتي حكت كل الي بكلبي وفهمتهم الي ماكدرت انطقو بوجهم
بس ضلت بالي كلمتها ....
الحين تندرت ؟ وشيكدر يغير !!!
بساعتها دحكت اني بكابتي هاذي وعزلتي ماغير شي بس ازيدهم قلق
وهم علي ... هي هاذي حياتي وحيده بقفص من ذهب ولزوم اتقبلها ومااحملهم ازيد من طاقتهم لان اهلي مايتغيرون

كمت ولميت فراشي وعدلت كفشتي
وغيرت ملابسي وتعطرت واخذت تلفوني وفتحت السماعات وطلعت
رحت للمطبخ سويتلي كلاص جاي وبسكت وكعدت ادحك باليوتيوب واكل
لكيتلي مسلسل كوري اسمو ..
' اسطوره البحر الازرق '

وضليت ادحكو رحت كعدت بين اهلي
وادحك بالتلفون ... تعمدت اعلي صوت ضحكتي على مواقف بايخه بس حتى اجذب نظرهم اني تغيرت ...

واخذني الوكت على التلفون لحد ما صاح علي ابوي ويحكيلي وكت صلاه ذبي التلفون ... يلا شلت عيني منو ..

صليت ورحت اساعدهم بالعشى واسولفلهم على المسلسل والكطلي من هين وهين اكل على الواكف
ورحت خابرت على جراح وصيتو يجيبلي شاميه وحب شمسي من يرجع
على العشه ، ورجعت الامور مثل ماكانت ..

صار اغلب وكتي بالمسلسل ان سديت التلفون احكي عليها وان فتحتو ادحكها
مسحت برامج التواصل كلها وخليت بس اليوتيوب .. صكر يسألني ليش تمسحيهن
اجاوبو ... انا مشغوله بمسلسلتي وانتو تزعجوني بسوالف بايخه
احكولي انا هين حدركم واحكولي عنها الا ترسلو كل ساع ...

بنص شهر الثاني كنت الحين صاحيه من نومي العصر وبعدني مامستوعبه شويه
بعدني مطفيه وكعدت حدر امي بالربعه
وابوي كاعد وجدتي و رماح مفرش ملازمو ويدرس ...

حسين دخل وشايل قفص البلبل كان مطلعو يتشمس وخلاه حدري
ضليت ادحكلو واعدل تفاحه الي حاطتها الو حتى ياكلها براحه ودخل جراح
سلم و كعد حدر ابوي ..

ضل صافن على القفص كان يجهر صوتو ويحكي ...
- يابه تدري اليوم صاحب البلبل لاكاني
وسأل عليه

ابوي بالعجل اندار عليه وانصتلو ...
- ايييه
- اييه قلتلو هذا كأنو مغشوش مايغرد
مثل اول خانس هالايام
عاد حكالي .. البلبل هذا بري صداح وتلاكيه حزين او ما دايريلو بال وهالشكل خنس
عاد انت يابه شنو رأيك شلون نرجعو مثل اول ؟ شسالفتو!
- هي وحده من الاثنين لو نطلكو ونرجعو حر لو نزاوجو مالها ثالث
- اييه انا فكرت ازواجو شنو رايك غلوي نغير القفص لواحد اكبر ونحط وياه ثاني ونخليه هين بره بشباك المطبخ نعلكو

عدلت كعدتي وقلتلو ..
- وشنو الفايده من هالمزاوج راح تحبسون اثنين بدل الواحد تخلوهم معلكين وتتونسون على فرفحه ارواحهم للطير
اطلكوه خلوه حر احسن

رماح بالعجل ضحك وحكالهم ...
- جايين على غاليه النباتيه الي تنقهر على فخذ الدجاجه بالمركه ماتاكلو
- ايييه عجل مو وحشيه هاذي نذبح غيرنا حتى نشبع بطونا
- ايييه عجل ربنا ماحرمها دامها وحششيه منا نذبح الدجاجه وناكلها !
- مادري كلمن ونفسيتو بعد
- ايييه وانته جراح كاعد تسأل غاااليه ام كلب الرهيف على فخذ الدجاجه تطلعنا متوحشين تسألها بلبل ! شلون نسعده !!!
ول هي لو بيدها تصفك بدل جنحانو حتى اطيرو من هين
لا دحكوها تلاعبو ومكابلتو طول اليوم تراها صابره عليه لان هديه جراح لو ملكها ما تخليه يبات ليييله

ضحكت لان كلمتو صحيحه انا لو ملكي بالعجل افك اسرو ..
انا من طفولتي احب الحيوانات اطوخ وياهه باللعب واشردهم واركض وراهم بس ساعه ماادحكهم يذبحوهن للاكل هين اتخبل على اهلي وماارضى اكل مادام الاكل بي لحمهن .. لا الدجاج ولا اللحم وين ما يصيرو مااكلهن بس السمج هذا اكل منو بس المكسب اما اللحم الني بي مااصلو الا كلش متيبس ومكسب يلا اكلو
عاد مشت عليه تسميه النباتيه ..

رجع جراح سألني ...
- هسه شنو غلوي نطيره ؟
- اييه
- بس شلون خاف مايدبرها يعيش هين بالمدينه مو مثل بستان وياخذ راحته هين ساعه الساعه يكضبوه ويجوز مايعرف يدبر اكلو

- يتدبر رب الي علمو الطيران يعلمو شلون يدبر عيشتو
- زين زين اتفرغلو غير يوم

لليل خابرني جراح وحكالي اصعد بالسطح بدون مااحد يدرى ..

بالعجل رحت صعدت ودحكت الباب مفتوحه اول ماكضبتها هو اخذ ايدي وعبرت للسطح وسد الباب شويه
قلتلو ..
- عجب يابه اليوم هيين بالسطوح
- رايد مكان هادي نكعد بي ما دحكت احسن من هين وامان ماحد يكدر يدحكك هالساعه هين
- ايييه زين سويت الهوا طيب

تمشيت وانا فاتحه ايدي والهوا يضرب بوجهي وقلتلو ...
- ماا تحكي عاد شسالفه المهمه
- البارحه تكاونت ويه اسامه

تجمدت بمكاني بس سمعت اسمو وضليت فاكه عيني على وسعها .. وهو كمل ...
- انا وياه صارلنه بالست شهور نتكاون ونتضارب ويرجع هو بعد كم يوم ناسي كل شي بدر مني .. دايماً يحدر عليه مبتسم ومتأنق و مليان طاقه وهو يتعمد الحكي الي يخلي اعصابي تهيج عليه
انا جفصت بطنو لحد مابزعت تصرفت بغير اخلاقي وياه واذيتو بالكلام والافعال
بس دايماً كان يرجع مفرمت كلشي ويصيحلي خويي مشتاكلك مادحكتك هاليومين وانا اتمضحك عليه واحكيلو البارحه اضربك اليوم تسميني خويك!
يرد عليه مو مهم الصار فدوه الكم ..

كنت استمعلو بس ماافهم ليش يحكيلي هالشي ؟ وين رباط السالفه ؟
تمشى شويه ورفع راسو دحكلي ودار نظرو بعيد عني ورجع يحكيلي ..

- البارحه تغيرت السالفه
حدر هو وشكلو تعبان وبدون سلام بالعجل قلي ... جراح كافي من صدك كافي فضها عاد
قلتلو .. اكف عن شنو ؟ انته الي كف عني وعن اهلي ماعندي شي وياك انا
عاد صار يصرخ ويحكيلي ..
ما اجيتك متبطر وماتعبت هالشهور حتى ارجع فارغ الايد خلي كدام عينك السويته حط نفسك بمكاني وافهمني .. تكدر تتحمل مثلي ! تكدر تعيش اربع سنين تنسج احلام على خيال انسان ما شايفه !!

رديتلو .. ما مجبور على كل هذا
كان يردلي .. صح ما مجبور اختاريت هالطريق بكامل ارادتي ومااسمحلك انته تعترض طريقي وتوكفني عن غايتي

قلي .. انا انام احلم واصحى حتى احقق حلمي مااسمحلك انته تصير عثره بطريق احلامي وانا جريت خلك وتحملت منك كل شي بصدر رحب
احتراماً لكونك جزء من حلمي

وبعدين حكالي ... لا تنفخ ريشك عليه اليوم تره الايام تدور ويجيلك نصيب من وكفتي هاي .. هم توكف بيوم وتتوسل وادوس على كبريائك الف مره لان اكو شي اهم منه ..

قلي .. رحلتي بالليل للبنان من ارجع اريد جواب يشفي الكلب مااهدد واقلك اسوي هالشي وهالشي لو مانفذت بس فكر بيه مثل اخوك او صاحبك لو هو يكعد يحكيلك هالشكل معانتو ترضاهه ؟ وتخلي الحك عليه ! لو تسوي المستحيل حتى تريح بالو وتطيب خاطرو

قلي .. ان ماهميتك بشي فكر بيهه منو يكدر يسويلهه الي سويته ! منو يكدر
يتمسك ببنيه ماشايف منها غير سواد
و سامع عنها بس صيت اهلها ! ! !

وانا بصراحه تغير موقفي من بعد ما دحكتو منفعل ومنهار هالشكل ..
خليت نفسي بمكانو وحسيت وشكثر صعبه على الرجل يتوسل لاجل يتزوج

صح كلمتو ما يحدر رجال شاريكي مثلو
يمكن الي يدك بابنا بعدين من معارف ابوي ويطلب بالهدا ان عطينا خير وان ما عطينا باب وانسد ما يأثر عليه
لكن دحكت الرفض عند اسامه ظليمه مايسكت عنها وانا متاكد مايسكت
عاشرتو وعرفت طينتو ..

اخر فتره كان يحكيلي ..
خلصت طاقتي وياك بس ماعرف استسلم خليني بس كاعد وساكت حدرك المهم ماكعد بيتي واتصفن وانتظر رب اليحلها ..

دحكلي وتكتف وصار يقلي ..
- هسه انا رضيتو زوج الك انتي ترضيه ؟

ضليت بس فاكه عيوني واركز بالكلام
وتربط لساني ساعتهه .. عجل اخووي بذااات نفسو يحدر يحكيلي ترضين تتزوجين اسامه !!!!!

كطع صفنتي بي صوتو ..
- غلوي ما نطقت هالكلام الا وانا محسبها من كل زاويه وموزنك حدر افعالو يوم الي دحكتها ساوتك بالاصاله يلا اقتنعت
بزواجك .. دحكي انا عزلتك من كل شي
حتى اخليكي غاليه مثل ماامك سمتك
وتعهدت مااسلمك بيوم الا الي يقدر غلاتك مثلي ودحكت اسامه عندو هالشي
و هالرجل انا اقتنعت بي لان راح اضل كل العمر مسيطر عليه

- شلون تثق بي هالشكل ؟

- مدحك عيونو انا .. انتي حره غلوي القرار الك ان رفضتي ساعه يعاود من سفرو احكيلو هالمره انتي الي رفضتيه مو انا ويبتعد غصب عن خشمو وان رضيتي انطيه خبر حتى يجيب اهلو ونتفاهم

كضب كتفي وصار يدحكلي ويحكيلي ..
- غلوي انا مااحرمك من سعادتك انا بس ادورلك الزين الي يسعدك كل العمر

دنكت وهو ابتعد وبعدين حكالي ..
- فكري على راحتك ورديلي جواب
- ماشي

بالعجل نزلت وانجضعت بفراشي وتغطيت .. ضليت افكر بهالسالفه
عجل الحين اسامه كدر يكسب رضا جراح ويقنعو وصارت السالفه صدك!

زين انا مستعده ارتبط بي ؟ هو الشخص المناسب الي ؟

ماكدرت انام هالليله ضلت الافكار براسي
للصبح .. ومن صبحت على اهلي وكفينا الريوك اخذت امي وصعدنا وكعدت حكيتلها كل شي صار بينا البارحه
وهي تنصتلي واخر شي حكتلي ...

- شوري كلبج ان يهوى وافقي وان ما يهوى ارفضي .. كلنه نقيس من باب العقل بس المشاعر مهمه يا بنتي ومحد يكدر يحددها غيرج اخذي وكتج وانصتي لداخلج

صفنت شويه وقلتلها ...

..
- يمه اكدر ادحك صورتو يعني ماعرف
احس هالشكل اكدر اركز اكثر

ضحكت وقلتلي ...
- اي طبعاً يمه لعد تزوجين عمياوي شوفي صورته واخذي وكتج
- زين عجل انتي دبريها الي
- صار ادللي

تضحك امي والفرحه بوجهه وانا بين الحيره ضاله متصفنه ..
للمغرب امي انطتني جهازها وقلتلي بمحادثه جراح تلكين الصوره ..

اخذتو وضليت ادحك لصورتو ..
تمعنت بتفاصيلو .. وضليت اسأل نفسي
اريده لو لا ؟

يومين انا انام واصحى على هالسؤال
واتذكر كلشي يخصو .. تالي فكرت انا لو رفضتو هو اكيد راح يتزوج ثانيه
ويصير كل هذا الها !!!

هين هالفكره غيرت احواالي
وبالعجل مشيت لامي وحكيتلها
انا موافقه اتزوج اسامه

الغيره هي الي خلتني احط الحد الفاصل لهالموضوع .. يا انا املكو يا اخليه ملك غيري واخترت اني انا املكو ..

امي شاورت ابوي بهالسالفه وهو بعد ما سمع من جراح كل شي وافق عليه
وجراح رجع خبر لاسامه وتحددت هالجمعه قرايه الفاتحه ..

جدتي وامي كانو اكثر الفرحانين بهالزواج والي يفتح سيره التاجيل
بالعجل يسدن حلكو ويقنعن الي مامقتنع

على حسب عادتي اوصي امي هي تنزل للسوك تشتريلي الي احتاجو بس تفاجأت هالمره ابوي رفض وطلب انا امشي وياهه واختار بنفسي كل شي ..

الاربعاء اخذنه حسين وطلعنه العصر
وكنت محتاره شنو البس بمثل هاليوم
واخبصتها لامي وهي تحكيلي نلكى بس اصبري بس انا متوتره وبالاخص قياسي واصل ٤٢ خفت ماالكى الشي الزين بهالقياس ...
تالي كدرت اخذ كلبيه خليجيه بلون سمائي ومطرزه بفضي واخذت المحابس والتراجي فضيه حتى تكعد معها ..

و بيوم الخميس الكل متوتر واعصابو نار تطلع المشاكل من جوه الكاع وتخليهم يتصايحون ويوتروني ازيد ..

الجمعه من الصبح كعدنا نرتب البيت وحر واسر تكفلو ينظفون الشارع
وامي تكفلت بتحضير الحلويات من ايدها رادت تسويها ..
وحتى بيومها ماتغدينا انا وامي كضيناهه فوك بالغرفه انا اتمكيج وهي تسرح شعري وترتبو وتصبغ اظافري وتعطرني وكل شويه تصلي على النبي وتهديني وتنبهني على شي بمكياجي
وخلتني اسويه بسيط بالعين مااكثر سواد
والحمره طلبت انها تكون خمريه وشعري خلتو مفتوح على طولو بس خلتلي نواعم فضيه على البف ..

من جهزت انا صرت اجهزها
كانت لابسه كلبيه بنفسجي وانا سويت مكياجهه وضلينه واكفين نقرا ايه الكرسي
سوا بصوت عالي مثل ما هي طلبت
وبعدين نزلنه من عرفناهم اجوي هين

كنت كاضبه ايد امي وكلبي يدك براسي اهجسو .. هاذي اول مره ادخل اسلم على حريم ويدحكوني بدون نقاب او حجاب

دخلت عليهم بغرفه جدتي الي رتبناهه حتى تناسب هالكعده .. وامي هي تسلم قبلي وتحكيلي هاذي من واسلم انا وراهه

كضبتني جدتو وتلمست وجهي وحكتلي ..
- اليوم رجعت فرحه نكطعت من عدنا سنين وسنين

ابتسمتلها وكعدت حدرها وشعري امي تاشرلي ارجعو لوره وساعه ما رجعتو
جدتو كضبتو وتلمستو وضحكت حكتلي ..
- عين البارده عليه مبين تعبانه عليه

ابتسمت بخجل ودنكت وامو صارت تحكيلي ..
- خلي نسمع صوتج .. شكد عمرج ؟
- ٢٥
- اي زين مقارب لعمر اسامه مابينكم فرق بس اربع سنين

ابتسمت وضليت ادحك لامي وادحك كل العيون عليه ويقلولي ماشاء الله جمال وترتيب حكهم اهلك يضموكي من العين

كل هذا انا اطنشو اريد اتهدا واعرف الي يجري بداخل مجلس الرجال ..
اريد اعرف اخوتي شكاعد يحكون وياهم

الكلام يكثر وانا فكري عدهم لحين ماسمعنا صوت رماح يطلب امي وجدتي
ومن طلعن جدة اسامه شاورتني ..
- غاليه امج شسمها ؟
- زهراء
- ياااقادر يارب

ضلت متصفنه وتمجد الله وتدحكلي وانا صابني الفضول اعرف شبيها؟ سألتها..
-خير جده اكو شي
- لاا يمه لا ماكو شي ماكو شي

دخلت جدتي وهي تبتسم وقالت ..
- رجالنا قرو الفاتحه بالخير والبركه

علت الهلاهل بساعتهه وكلها حدرت تبوسني وامو تحضن بيه وتحكيلي تعب وليدي تعب وحصلك ..

ضلو حوالي ربع ساعه بس هلاهل ومبارك واني حدري ماهدت ايدي
وجدتو طلعت وراحت للرجال
واحنه رجعنه كعدنا وانا اشرب مي
سمعت عمتي ام جراح تحكي ..
- راح يحدر الولد هين هو وابوه البسي حجابك غاليه

بالعجل غصيت واختنكت وضلت امي تضرب على ظهري وانا بالويل جريت النفس والكل تصيح اسم الله اسم الله
دحكت لامي وقلتلها ..
- يمه شلون ما كطعنا مهر بعدنا
- يصير بنتي من حق الولد يشوف البنيه بالبدايه عادي هالشي

عافتني وصعدت تجيبلي الشال وانا ضليت امسح بالمي من حلكي وكلبي اسمعو يدك براااسي هين بنص كصتي
بالعجل حدرت امي لفتلي الشال
وسمحتلهم يدخلون ..

انا كنت واكفه ومدنكه راسي واعصر باصابعي وسمعت صوت السلام رديتو بهمس ومارفعت راسي لحد ما ابوه

صاح اسمي يلا رفعت راسي ودحكتلو
وهو حكالي ..
- عين الله تحرسك يا يابه والله ونعم النصيب نصيبنا

ابتسمت ودنكت ورجع ابوه حكالي ..
- شو دحكيلنا يابه

رفعت راسي ودحكتلو ودحكت لاسامه الي كان مخلي ايديه بجيبو ومرجع راسو شويه وفاك عينو وحاجبو مرفوع
انا هين حسيت راح اكع من طولي بالعجل دحكت للباب وصحت ..
- يمه حدري هين

واغطي وجهي بايدي وايدي ترجف
حدرت امي كضبتني وتحكيلي..
- شبيج بنتي خيرج
- ماتعوفيني يمه شسالفتك

ضحكت ودحكتلهم وبالعجل ابوه حكالي ..
- غاليه يابه احنا تفاهمنا ويه ابوج واخوتج بكل تفاصيل المهر بس هم لازم اسألج بالج شي تطلبيه اطلبي يجرالج
عندج فد شرط هم كولي هاي العادات يابنتي احجي كله تم ويجرى لاجل عينج

وانا كاضبه ايد امي ومدنكه قلتلو ..
- تسلم عمي اهلي اكيد طلبولي الزين وانا اكتفي بحكيهم
- زين عجل يابه جمعه الاخرى المهر
ام غاليه
-نعم
- مشكوره على الفرصه الثانيه
- هذا نصيب مو فعل ايدي

رفعت عيني خطف دحكت لاسامه الي
كان ميل راسو ويدحك لشعري من ورا
بالعجل خزرتو وهو ضحك وطلعو بعدها

كعدت واخذ نفس وامي وجدتي كعدن يتفاهمن بالتفاصيل ويه الحريم ..

بيومها ابوي حضني ويحكيلي كبرت غاليتنا وعلى باب زواج

الخجل الي بيه هاليوم ماينوصف بحيث الساني اخرس مارد لا على تنصيف اخوتي ولا مدح اهلي او مباركتهم بس ابتسم ..
جراح شاورني ..
- ربطته بمهر ١٠حاضر و٥٠ غايب
- عزاا شدعوااا
- حتى مايفكر يلعب بذيلو بيوم
-جراح عييب هالكثر والله
- يولو مو زين ما سويناهه عشرين ب خمسين ول لو تسمعين رماح يشمر ارقام بكيفو قبل مايدخلون بس ابوي كان خاصمها عشره بعشره واعترض ابو اسامه على الغايب راد نزيدو وانا بالعجل ختمتها خمسين
-هههه جرااح ينخاف منك عقلك ماينفهم
- الرجال تكضبهم المهور يولي ولو انا اكضبو من راسو اسحلو وكت الي يعيل بس هذا حتى يحسب حساب كبل يتراعن

ضحكت فرحتي باخوي جراح وهو متطمن وراضي على هالزواج اكثر من زواجي نفسو ..

ضلت نظرتو بالي كل هالاسبوع وانا احضر للمهر اتخيل كل تفصيل شلون راح يطلع يعجبو اولا ؟؟

من يوم الاحد اجاني جراح العصر وحط بايدي ظرف وحكالي هذا من اسامه ارسلو مصاريف المهر ..

فتحتو ودحكت بي خمس اوراق
اخذتهم لامي وهي مارضت على جراح شلون قبل ياخذ منو الفلوس وقلتلها صارت بايدنا بعد مانكدر نرجعها

نزلت الفيس والانستا وصرت اكلب بصفحات حسب توصيه امي حتى ادحك كوشه مهر وتوزيعات مرتبه
وحجزت عليهن وحجزت بصالون
بيوتي سنتر دحكت شغلهم حلو ومسوين عروض حلوه وضل اللبس كل يوميه
نطلع انا وامي وحسين ندور وبالتالي
اخذت فستان احمر طويل مخصر وعليه من الخصر قطعه ثانيه تتشكل وتصير منفوشه وذيلها طويل ...

اشتريتلو ساعه سعرها بسعر الفستان
بس الحلقه ماعرف قياسو قلت اوصي جراح عليها ..

ومن رجعنا وصيتو لجراح عليها وضل يعترض انا شدخلني بهالسوالف وشعرفني باصبعو خلي هو يشتريها
وتمشكلنا يومين عليها وبالتالي اتصل عليه وانا حدرو وبس سلم عليه حكالو ..
- ول يابه قياس حلقتك شكد

بس سمع جوابو سد الخط وحكالي
- خفيف الدم يقلي ما خاطب انا من كبل حتى اعلمك قياس حلقتي جرب بنفسك واتعبلي هالمره
ول يلعن ساعه العرفه جهرتو بيها

ضل يشتم بي وانا مشيت لامي حكيتلها
عاد هي حكتلي انا اتصرف ..
انا اعرف هالكلمه معناها ابوي راح يتدخل ويأمر وينهي كل شي ..

وبالفعل ثاني يوم الصبح كبل ما يطلع جراح ابوي حكالو ..
- تخابر اسامه وتطلع تشتري حلقه على قياسه اليوم ومن ترجع هي بايدك

بالعجل حط بايدو الفلوس ودار وجهو ومشى وخلى جراح يطلع وهو يدردم
بس انا اضحك عليه مجبور يتحملني

جدتي عزمت كل كرايبنا وانا احكي لامي شلون راح يدحكوني كلهم اخاف جراح يتمشكل معي ؟؟
وهي تحكيلي يسكت غصب عنه شنسويله

البيت كلو انثبر بالاخص بيتنا صغير هالمره ومحتارين بترتيبو وام الكوشه من الصبح حدرت تشتغلها وانا وامي مشينا للصالون وتركناهه ويه عماتي ..

كان يوم سريع بكل شي مادحك ايمتى اخلص من شغله الاكي نفسي بثانيه
من ايد لايد وبالعجل كملت ..

امي ابد ماترضى مكياج عيني يكثر سواد
خلتهم يسووه ذهبي وترابي وبس خط اللاينر بارز اسود والحمره حمره كعدت المكياج احلى وبرزتو .. انا اتطمن ساعه ماامي تدخل وتقرر عني بترتيبي

شعري تسريحتو كبيره مبرومه ونازله على طولو . طلعت راضيه عن شكلي
وخلصانه من خوف الصالون ..

اول ما وصلنا البيت دحكت جمهور متجمهر بيتنا بالربعه واسلم بس مااعرفهم الا هنه عرفني بنفسهن .. بنات عمنا وزوجاتهم وعماتنا وخالتي دعاء ومرت خالي مصطفى اخر الحاضرين كانو

من دخلو اهل اسامه انا مابطلت ضحك احكي لنفسي ول غاليه اثكلي اسكتي بس هي اسناني من وحدها تطلع بالبسمه
وصارت وكفتنا حدر باب الربعه الخارجي ساعه ما كطعنا مهر الشيخ

و من اول مارجعت كعدت .. حدرت خالتي دعاء حطت الكيكه وتكضب بايدي تحكيلي رجفتك هاي راح توكع العصير والكيك على العريس اهدي ، بس ياحيف
الهداوه ساعتهه تبخرت مني

وانا سمعت الهلاهل علت ودحكتو دخل لو ردت احفز من مكاني واشرد
واحكي لنفسي شجابني لهالخوف من عمت عيني على هالموافقه ..

ماعرفت اوكف او اضل كاعده اسلم اسكت اضحك مادري شسوي
ضليت بس مخليه عيني عليه وهو يعض شفتو ويدحكلي ..
كان لابس قاط رصاصي ومثل ماتسميه امي ينكط نظافه كل شي بي يلمع اكثر مني ..

قرب راسو حدري وانا كزبر جلدي
بس سمعت صوتو هالشكل قريب وينطق اسمي بالعجل ابتعدت وهو يضحك
امو قدمت علبه الذهب وكانت طقم كامل
وبس الحلقه مختلفه عنو ..

هو كضب الحلقه وضل يفر بيها باصبعو ويدحكلي .. تالي قرب راسو وحكالي ..
- تقبلين تتزوجين سايق الطياره ؟

ضحكت وغطيت وجهي بايدي وبعدين دحكتلو وهو حكالي ..
- ها ياغاليه الشيخ تقبلين بالسايق زوج الج ؟ اذا تقبلين حلقتج حاضره .

اشرتلو براسي بمعنى اي بس هو حكالي .
- اريد اسمع صوتج احجي
- اييه اقبل
- بمنو. ؟
- بااسامه ذاتو ما تهمني طيارتو
- هههههههههه يروحلج فدوه

من الخجل ادير وجهي على امي وادحكها تمسح بدموعها وتضحك وهو كضب ايدي فززني واخذت نفس ومديتها الو من جديد ولبسني الحلقه وباقي الذهب
ومن صار لازم البسو حلقتو انتبهت على ايدو ترجف ضحكت وبالعجل خليت الحلقه باصبعو وقلتلو ..
- الساعه اخذها وياك لا تنساها
- والله لو ادري مالبس ساعه
- تهنى بيهه بعدين
- شكرا حلوه

ابتسمتلو وحدرت عمتي تقطع الكيك وانطتني اوكلو .. ساعه ما صارت عيني بعينو حسيت هين بالهداوه .. هين حسيت قراري صح ..

اخوتي كانو منبهين اي تصوير ما يصير هين وعماتي كانو ملتزمات هالموضوع
بس تلفوني بايد خالتي هو الوحيد الي يصور .. عاد هو طلع تلفونو وحكالي ..
- مااثق بلقطات النسوان الكبار خلي ناخذ سلفي احسن
- ترسلها الي وتمسحها من جهازك
-ههههه دباوعي باوعي

دحكت لشاشه تلفونو وهو صار ياخذ اكثر من صوره ولقطه كاضب ايدي وكبل ما يمشي شاورني ..
- ريحتج شعرج ملامحج جسمج وبياضج كلشي مثل ماجنت اتمنى
هواي فرحان بيج يامريتي

دنكت بخجل اول مره اسمع هالشي وكلشي اهجسو غريب وعيب ينحكى
رجع حكالي ..
- اليوم ماانام اذا مااسمع صوتج
- بس ماعرفو
- شنو ماتعرفين!
- الرقم يعني ماعرفو
-هههه اكتبيلي رقمج هنا
- جراح يدري
- اني احجيله اكتبي يلا بعد صرتي حلالي محد يكدر يعترض

كتبت رقمي بجهازو وهو اخذو كتب عليه
' محبوبتي الغاليه '
وضحك وبعدها مشى ..

ادحك فرحتو بكل تفاصيلو وبوجوه كل اهلو واهلي ازيد منهم فرح ..

بعد ما مشت الناس وصار العشى انا صعدت اغير ملابسي بس تذكرت اخوتي ما دحكوني هالشكل .. عاد اخذت صور
وارسلتها الهم بالكروب وكلها دقايق والمسجات بدت توصل منهم
يرفعون من معنوياتي وكلهم يحكولي اختيار موفق هاللون بارز جمالك
ورماح يحكيلي انا نويت اوصي حرمتي تلبس نفس هالشي بمهرنا ان شاء الله
ضليت احكيلو ناوي تتزوج وهو كتب
عن قريب بس نرجع لحديثه

ردت ارسل بعد وافتهم منو بس اتصل رقم غريب وما رديت بالعجل وصلت رساله مكتوب ' اسامه '
ورجع اتصل رديت عليه ..
- محبوبتي الحلوووه
-هلاا اسامه
- هلااا ياكلبه ياعينه لج تجننين تعرفين لهسه مسطور بيج وكلشي ما ماكل
ضال بس اتصفن بصورتنا

كنت اضحك واتمشى بالغرفه وهو يحكيلي ..
- ما مصدك اخذتج غاليه ما مصدك والله والله والله مااامصدك
- ههه اي
- شنو اي !
- مادري يعني عادي ماعرف
- هههههههههه خجلانه
- اي
- هههههه اموت على اليخجل بدلتي لو بعدج
- بعدني
- هاا اا غاليه هذا ايجار الفستان لو اشتريته
- اشتريتو
- ايي كلش زين حتى تلبسيه بعدين ما شبعت بشوفته .. شبيج مرتبكه ودتخليني مرتبك وياج
- هههه
- تضحك ياربي تضحك رحتلج فدوه
ياام طول الحلو
-اسامه
- يا عين اسامه كولي
- عفيه خفف هالحكي الحين تره والله ماعرف ارد عليه ولا سهل عليه اسمعو
كثير يربكني ويخجلني
- صدقه لله شلون صوت شلون لهجه شلون كثير وحكي يجنن ياعيني صار ماحجي بعد
- هه ايي
- ياحلوه نزلي الواتساب حتى ادزلج فيديو
خليتهم يصوروه خصوصي الج
وهم ادزلج صورنا
- ماشي
- هسه بدلي وارتاحي واكلي ونتخابر
- ماشي

سديت الخط وكعدت وانا مخليه التلفون على وجهي واضحك واحكي ..
' واووو انااا اليوم انخطبت وصرت احكي ويه رجال بهالحريه !!! وبينا تلفونات وصور !! سبحان الي غير الاحوال '

نزلت سبحت وطلعت تعشيت حدر عماتي وبناتهم بحريتي هالمره مااختل بنفسي منهم ..
ودحكت الفيديو كان لاسامه وابوه يركصون وحدهم بنص الرجال وابوه يفر بالسبحه وييهز باكتافو ومخلي ايدو الثانيه وره ظهرو واسامه يركص من كل كلبو
ويصفر ويصفك ونازع الستره
بالعجل اخذت تلفون لامي وخليتها ادحكو وهي نزلت دموعها .. قلتلها ..
- يمممه عجل الحين هذول بنتك وتبكين عليهم !!
- فرحتهم جبيره بنتي واثرت بيه
عساها ادوم وتزيد

حضنتها وهي تمسح بدموعها وتطبطب على كتفي ..
دحكت صورنا حلوه وحفظتهم
بعدين هو اتصل صعدت بغرفه امي اجاوبو .. وبس حكيت خمس دقايق وسمعت صوت اخوتي بالعجل حكيتلو

اخوتي هين رجعو بكرا نحكي ماكدر استحي بعد اضل هين اخابر وهو ضحك وتفهمني وسد الخط ..

باركولي اخوتي وابوي وتعللنه ويه عماتنه هالليله ..

ثاني يوم خابرته الصبح من صارلي مجال وكل حكيي وياه اي واضحك او اجاوبو على شي يسألو ..

صرت اتراسل وياه طول اليوم ونتصل بوكت الصبح والعصر بس لان انا ماارضى وكت اخوتي موجودين اضل اخابر استحي منهم .. وبالليل نهائي مااتصل بس اراسلو ...

حسيت بتغيير عجيب بحياتي ملى فراغي
ورجعلي حيويتي وطول اليوم وجهي يضحك حتى اهلي لاحظو تغيري
وحسين يحكيلي لو ندري هالشكل تفرحين من زمان نزوجك ونخلص من وجهك المبوم ..

بس انا ماعندي مجال اتمشكل وياه
كاضيتها مراسله ...

وبعد اسبوع ضبط من خطوبتنا كنا نحكي العصر وهو حكالي ...
- غاليه اريد اعترفلج بشي
-شنو
- بس اسمعيني للاخير يلا تحجين ماشي
-ماشي
- اسمعي .. اني لان داشوفج شلون نقيه وياي واول شخص بحياتج اني وماتعرفين درب الجذب وياي ردت اصارحج بحياتي حسيت لازم احجيلج
ماعرف بس كلبي ماانطاني اضمهه عليج
- شنو اسامه فهمني
- اني جان عندي علاقات قبل مااعرفج
يعني مو علاقه تلفون وغراميات لا اني ما كايل لوحده احبج غيرج ابد والله بس علاقات
جنسيه عابره يعني
- شنووووووو اسامه انته شكاعد تحكيلي
- بس اهدي واسمعيني
هاي قديمات والله يعني قبل ست سنين او ثمن سنين مادري بالضبط لان هنه خمسه
متباعدات
يعني غاليه اني بوكتها ماجنت مسيطر
وصارن بلحظه ضعف .. وحده من الاردن اثنين اجنبيات واثنين عراقيات
ومتندم عليهن والله .. ادري انتي تفاجئتي بهالشي بس ردت ابدي وياج صفحه جديده مبنيه على الصراحه ومابيها اي جذب و
- بس كافي اسامه كافي
-غاليه افهميني
- قلتلك يكفي حكي راح اسد الخط باي

سديتو ونزلت ابكي لامي اخذتني لحضنها و صرت احكيلها ..
- يممه اسامه يحكيلي عندو خمس علاقات محرمه كبلي يمه مكربلهن بالحرااام
.

#شقراء_بغداد

الجزء_الثاني_بارت_١٧


نزلت ابكي لامي اخذتني لحضنها و صرت احكيلها ..
- يممه اسامه يحكيلي عندو خمس علاقات محرمه كبلي يمه مكربلهن بالحرااام
- اسكتي كافي لايسمعج احد امشي فوك نحجي

اخذتني فوك لغرفتها واول ما دخلت سمعت تلفوني يدك بالعجل اخذتو ودحكتو اسامه رديت عليه بالعجل ..
- خييير خييير شضل بعد ما حكيتو
- غاليه شبيج اهدي خلي نتفاهم
- مااتفاهم وياك وماعندي اعصاب حتى اتحملك بعد روح لا تخابرني

سديت الخط وقفلت التلفون وامي كعدتني حدرها وصرت احكيلها ..
- يمه كلام جراح صح والله صح
هذا شابع بنات وعلاقات وتالي عمرو يدور العفيفه الزينه .. يمه هو اعترفلي هسه عندو علاقات ويه بنات بالحرام خمسه يمه خمسسه
اجنبيات وعراقيات ومن الاردن
هذا واحد زاني خدعنا بلسانو وافعالو بس هو طينتو وسخه مشبعه بالحرااام

حضنت راسي ومسحت دموعي وبعدين حكتلي بكل هداوه ...
- هسه اخذي نفس وكافي بجي خلي نحجي يلا

اخذت كلينس مسحت خشميوجريت نفس وصرت ادحكلها وهي كضبت ايدي وحكتلي ..
- شوفي بنتي الانسان خطاء ولا هو المو زين ولا احنه الزينين كلنه عدنا جانب مظلم
- بس انا ماعندي يمه اناا ماعندي كل عمري ماشيه صح ومازليت ماتحمل هالشي انا ماتحملو تلعب نفسي من هالطاري
شلون اتقبلو !!! الحين هو ماسكت وضمهه عني ليش يحكيلي خليهه مستوره ليييش يصارحني بهالاشياء شظنو اخذو بالاحضان عليها واصفك لان صارحني بماضيه!!
يمممه ماردت اوكع برجال خسيس والحرام ماشي بدمو ردت رجال مثل اخوتي واخذت بكلمه جراح ووافقت عليه تاليه طلع

ماكدرت اكمل ورجعت ابكي وهي مسحت دموعي ورفعت راسي وصارت تحكيلي ..

- اذا تضلين بس تبجين راح تخسرين وتضيع عليج هالفرصه
- ياا فرصه يمه
- هاي فرصتج ان استغليتيها تربحين بهالزواج وان ضيعتيها تخسرين وتضلين تخسرين

عدلت كعدتي وصرت استمعلهه ..
- غاليه هسه انتي جبيره و واعيه مو مراهقه
حتى تجرفج الاعصاب وياخذج التسرع
والمشاعر .. بهالعمر انتي لازم تتصرفين بحكمه وعقل بالاخص هسه انتي ببدايه تأسيس حياتج الزوجيه هاي اهم مرحله لازم تكونين بيها رزنه الافعال
بنتي اريدج تسمعين كلامي بعيد عن الانفعال هذا تهدئين وتركزين وياي زين حبيبتي

- اي زين

- اول شي على موقف اسامه اني انطي تفسيرين .. ان هو بي بذره طيبه وان هو يريدج تساعديه يتخلص من هالذنب ..
هو يعرف انه واكع بالحرام ويعرف هالاعتراف جبير ومتخوف من رده فعلج هاي بس هو راد يصارحج بمشكله تواجهه اكثر من كون علاقه مخفيه عنج ..
الرجال من اختارج مايعرف منج شي
بس جان متأكد انتي بنت اصول محترمه ومتدينه نقيه واصيله .. ساعه ماحجى وياي كالي ردت المره الي تسند رجلهه
اذا انتي باول مطب تخليتي عنه وين صفاتج الرادهه وتعب عليهه ؟؟

دنكت راسي وهي كملت كلامها ...
- العيب هسه مو بالخطىء العيب بالي يستهزء وينفر من الخاطىء
لان هذاك يريد يتوب يريد يصحح خطأه بس الثاني يريد يتشمت ويتعالى عليه وهذا عيب بنتي عيب نشوف نفسنا اعلى من البقيه ومنزهين بمجرد ان همه غلطو واحنه لا
المفروض مدامنا زينين وماشين بطريق الحلال وكلوبنا ونفسنا طيبه نساعد الي يخطىء ونمدله ايدنا بكل رحابه صدر
ونشيله من كوم الذنوب الي غاطس بيهه
ونخليه يوكف على رجليه من جديد ونفسه شرحه .. كون من يمشي يحس بروحه خفيفه وينام وباله مرتاح مايعذبه ضميره على مضاميم بكلبه .. هنا راح يضل يتذكر صاحب الفضل عليه الي دلاه وكت ماكان دربه اظلم
دتفهميني بنتي .. اذا انتي وكفتي وياه واحتويتي رجلج بزينه وشينه راح يحبج اضعاف محبتج هسه وراح يصير يحترمج
يقدرج بكل شي وتكسبيه شنو احسن للزوجه من انها تكسب زوجهه وتخلي يلتجىء الهه وكت ما يخطىء او يحتار او يتعب
اذا انتي صرتيله الحل لكل هذني راح تربحين
كلتلج هاي فرصتج حتى تبنين علاقه قويه ويه رجلج وتخلين اساس بيتج منتقى من ارقى الافعال وارقى الكلام والوعود

غاليه الزواج ان تريديه يكون مزدهر دائماً ومحافظ على الحب والاحترام والثقه لازم تتصرفين بحكمه والتصرف الحكيم يجي وكت الشده ووكت الاعصاب هنا لازم يطلع جوهرج الي اختارج اسامه بي
رادج تصلحيه وهو يريد يبني حياه جديده وياج يقصد انتي الي تخلين اسس هالحياه
زينه بمثل مايباوعلج بهالصفات الحلوه الاصيله ، انتي خلي الاساس وهو يمشي عليه
هيج يريد المعنى مكمون بصدره بس يستصعب يحجيه بكونه رجال ويخاف تفكرين انه بلا شخصيه وانتي تتحكمين بي
بس هو يريدج تصلحيه وتبنين حياه متكامله اله بدون ما تجرحين رجولته او تسويهه عليه فضل دتفهميني !
- اي
- اي هو يصيرلج كلشي تريديه يبقيج اميره مدللـه وياه ويضل يعيشج ايام حلوه كل مايشوفج محتويته بحنيه ومخليه وجوده وياج امان .. اهم شي لازم تنتبهين عليه ان لاا بيوم تخليه يتخوف من رد فعلج لاي موضوع
هذا هو الي يجر المشاكل والخيانه وقله الثقه كلهااا تجي من رد الفعل الخاطىء

لازم تخلينه من يجي يحجيلج شي يخصه او يخص اهله اصدقائه ، مأمن انتي ماتغيرين نظرتج عليه تضلين تشوفين بي الجانب الزين وما تملين من تصليح الجانب المو زين
هيج يضل ممنون الج بداخله حتى ان ماحجاهه .. الرجل بطبعه مكابر على مشاعره بس هو اكثر من المره يحتاجها

- يمه يعني هسه انساهه لهالسالفه !واسامحو

- هو ماغلط وياج حتى تسامحيه هذا شي قبلج شي صار وراح ماجنتي موجوده حتى تعتبريه غلط وياج .. كولي اتقبله وادارك الموضوع

- يمه هيين بكلبي تدك هالسالفه ماكدر

بهاللحظه اندكت الباب وامي فتحتو وطلع
عباس ..
- غاليه اسامه هين وابويه يريدك عمتي
- زين هسه نجي

سدت الباب امي وانا وكفت على حيلي وقلتلها ..
- يممه ماانزل ماانزل مامستعده اواجهو الحين
- شجاج تخبلتي لعد صار ساعه ويامن احجي
- يمه دخيلك مانزل انا يادوبني اكدر اكلمو بالتلفون اخجل والله والحين بينا مشكله ماعرف احكي شي ماكدر لاا ماكدر مانزل
- غاااليه
- يمممه
- اشش كافي سوالف العناد هاي بطليهه لعد رجلج عليمن جاي غير رايد خاطرج
انزلي يلا عيب هالتصرفات

ضليت اتأفف وامشي وكاضبه راسي افكر شسوي شتصرف وياه ماطلع وياي شي عاد سألت امي ..
- زين هسه انا شسوي وياه شنو ارد لو فتح هالسالفه
- اعتبريه طفل وغلطان ومتخوف من غلطته شلون راح تتعاملين وياه تعاملي هسه ويه اسامه
- بس هو مو طفل رجال هالكبرو
- كل الرجال اطفال بدلي وانزلي عاد يلا
- مابدل عايز اتأنقلو ويدحكني متأنقه لحضرتو ومابينه شي
- لعد تنزلين هيج بضفيرتج
- ايييه وشبيهه ضفيرتي و دشداشتي مرتبات
- هههه كيفج يلا بس انزلي

طلعنه وكبل مانزل على الدرج قلتلها ..
- بس احط شويه عطر

رجعت للغرفه ركض تعطرت ونزلت كذلتي رتبتها ونزلت ويه امي ..

كانو اخوتي متجمعين حدر جدتي بس عباس
واكف بالمطبخ ياخذ الجاي وانا ضليت حدر امي واكفه بالمطبخ وهي تحكيلي امشي ادخلي وياي واحكيلها لاا الا يطلع ابوي

تالي هي راحت دخلت تسلم وانا ضليت واكفه حدر الباب اتسنط وتالي يلا طلعت هي وابوي
واشرتلي ادخل ومن دخلت هي سدت الباب

خجلي هين اكبر من الزعل وكل شي نسيت كلشي بس بالي اخوتي بره وابوي وانا هين كاعده ويه اسامه وحدنا ! بالي جراح برا البيت خاف الحين يرجع ويدحكنا كاعدين

كلبي يتسارع بدكتو وبطني تلويني وحتى ما ركزت على شكلو بالعجل سلمت وكعدت بعيد عنو ... وافكر باخوتي ..

تالي هو كام من مكانو وانا دحكتلو وهو يمشي .. كعد حدري وصار يفرك كصتو
ويهز برجلو ويدير وجهو كل شويه لجهه
بهاللحظه تذكرت كلام امي ..
ودحكتو ينطبق عليه بالحرف .. ابتسمت
وهو دحكلي وبالعجل كضب ايدي وحكالي ..

- غاليه كل شي صار قديم والله ومتندم عليه
كلتلج اريد ابدا صفحه جديده وياج بس انتي مانطيتيني مجال افهمج واحجي وياج خليتيني اتندم على ساعه الحجيتلج ولج اني ماصدكت فرجت وانخطبنا تاليهه هيج تتخلين عني !
بهالسهوله !!! هيج يعني جزت نفسج مني !
ماتتقبليني بعد مو !

يدحكلي ويحكي بسرعه وانا ساكته استمع لكلامو .. قلتلو ..
- عفى الله عما سلف

بالعجل ضحك ورفع ايدي باسهه مرتين
وصار يحكيلي وهو مبتسم ..
- اروح فدوه لهالصوت .. غاليه من حجيتلج هيج لان ردت كدام صفحتج البيضه هم تصير صفحتي بيضه تفهميني
- افهمك افهمك
- لعد ليش خوفتيني عليج هيج
تغلقين تلفونج وتبجين خليتيني اجي ركض حتى طلعت بهدوم البيت شكد عيب من ابوج
كاعد كدامه بالتراكسود وحتى جواريب ملابس جاي بالشحاطه

ضحكت وصرت ادحك لرجليه بيض والاصابع والكعب احمر وهالملابس والله ظلم يستهزء بيهن .. بدله رياضيه مو بجامه بيت
تمعنت بوجهه وشعره كلشي مرتب
ينكط نظافه وانا المبهذله والله
حكيتلو ..
- كلشي مرتب بيك وحلو الله يحرسك من العين
- هه اشكرج
- اسامه
- عيونه كولي
- عندي طلب منك
- ادللي شنو طلبج
- تضل صريح وياي هالشكل دائماً وما تخاف انا مابيوم اكرهك او تتغير نظرتي عليك
بس اخذ على خاطري منك اذا خفيت شي عني
- اني اصلاً صريح واحب تصيرين كلشي الي اعرفج
- ايييه زين وبعد عندي طلب
- هم تدلليين شنو بعد
- بخصوص هالموضوع الصار بينا اليوم
-اي
- هذا اريد انا انهي على ايدي لا تسألني شلون بس اريدك تسمحلي بي
- مسموح الج كلشي
- تسلم .. نأجلو بعدين نتفاهم عليه
- ما ضل بالج شي ابد ! ما بينه زعل يعني !

هين تذكرت كلمه امي وابتسمت ورجعت كررت جوابها عليه ...
- انا مايحقلي ازعل عليك بهالشي
هذا شي صار كبلي وراح .. انا اتقبلك بزينك وشينك والي يتعبك ويتعبني من اخطاء نصححها ونتجاوزها ان شاء الله

اتسعت ابتسامته وراد يحضني بس انا وخرت
اخجل ومااكدر عليها بعدني يادوب كدرت اتقبل ايدو بايدي .. تدارك الوضوع هو ورجع رفع ايدي لصدرو وحكالي ..
- كلبي ما غلط من اختارج اصيله والله
كلامج هذا برد كلبي

ابتسمتله وهو عاف ايدي وحكالي ..
- تذكرت على طاري البروده جبتلك موطه

ههههه طلعت مستعجل وافكر شاخذلج يهدي نفسيتج ويبرد اعصابج وصار كبالي ابو المثلجات كبل نزلت جبتلج مشكل ماعرفت شتحبين يانوع جبتلج من كلشي شويه

يحكيلي وهو يفتح بالعلاكه وطلع العلبه والخواشيك .. فتحها وحكالي ..
- ياهي تعجبج تاكليهه
- الفستق
- ذواقه اطيبهن هي

اخذ منها شويه ووكلني قلتلو ..
- تسلم طيبه
- اكلي بعد جربيهن كلهن

اخذت خاشوكه وصرت اجربهن بالسره
وهو صافن عليه .. اخذت شويه من الفستق وقربتها اله فتح حلكه بابتسامه ووكلتو بالعجل حكالي ..
- هذا شعرج ممسرحته
-لا
- هذا وجهج محاطه بي شي لا كريم ولا بودره او اي شي
- ههه لا
- والله يعني طلعتيلي هيج كبل بدون متسوين شي
- هههه اييييه
- ما اصدك شو

حط اصبعو على خدي وضل يمسح بي ويدحك لاصبعو وانا اضحك ورجع حط اصبعو على شفتي هين درت وجهي عنو
وهو حكالي ...
-صدقه لله مكيجه من كاعج .. اني من شفت اهلج هيج حلوين كلت لعد هاي بنتهم شتطلع حتى هيج ضاميهه من العين !!!
-ههههههه
- فدوه لهالضحكه لوحه ربانيه
وجه تقاسيمه واضحه خدود خشم منحوت مثل امج والحلك يا يابه

عض شفتو وهو يدحكلي وانا اهجس الدنيا زادت حررر وماعرف وين اردي عيوني منو .. ضل يدحك لركبتي وايدي وحكالي ..
- بخيت اني عمي والله بخيت
هم بنت شيخ وهم من ديرتي وهم حلوه من مكاعهه .. تدرين اول ما شفتج بالكليه
جانت الشمس عاكسه بعينج ومبين عسلهن
هاي قبل ماتجين علينه من جنتي تخابرين
- هااا يعني مدحكني كبل عركتنا
-ههههه اييي هيج كدامي صرتي من اجينه نكعد بس يالله شكد حبيت كلامج شكد ضل يرن باذني وتعمدت اضل ساكت حتى اسمعج بعد شتحجين
- ههههههه كنت مغرور بنفسك ترا وصاحبك كرهتو من ساعتها مغرور اكثر منك
- ههههه متعود يتفاخر هيج هو
تدرين قبل مااسمع هذيج حجياتج القنبله
ام سايق الطياره
-ههههههههه
- والله من قبلها اني مو بس مغرور لاا ماشوف الناس هم بس حجيايتج هاي اجتني شلون ضربه على الراس طيرت سنين دراستي والميه ساعه الطايرهن والانكليزي الذبحت نفسي حتى تعلمته والملايين الصرفتهن كلهن طيرتيهن يا يابه بوكتهه حسيت نفسي فلسين مااسوى يا طيار يا بطيخ سايق صرت سايق من كابتن لسايق وباستهزاء هم وكدام البنات الاصغر مني !
تمنيت نفسي اطرش ولا سامعهه

ضليت اضحك من كل كلبي على كلامو
وهو يحكيلي ..
- والله ضليت اسبوع اني امشي واحاجي نفسي سايق يااسامه سايق ! هذا تالي حلمك ودراستك سايق ! خرب والله شلتي حتى واهسي بالشغل من يومها كل مااشغل اتذكر حجايتج واضحك
- ههههههههههههه تاليتي اناا الي تزوجت السايق
- ترا طيار اني طيار دفعت دم كلبي حتى صرت لا تسميني سايق تكرهيني روحي
- ههههههه بس شغلتك تسوق
- بس الالفاظ شويه ترفع المعنويات
- ههههههههه حاضر حضره الكابتن
- ههههه بعد ان شاء الله ادعيلي حتى اصير كابتن طيار
ولج والله شغلتي حلوه مو مال تساويني ويه سواق الكيه
لا وجماله محصل رزاله من اهلها و ماخذ نصيب من حجيها يعني لا وحده ولا اثنين
طيرتي الشهايد والفلوس والاملاك وييين جانو يعرفوني باابن العقيد كلهه تخنس
تجين حضره غاليه تنطيني درس بالاخلاق
وتسميني سايق
- ايييييه لو انك متصرف عدل وياي كان ماحصلت هالدرس والتسميات الحلوه
- اني جنت متونس عليج
- ياااه وتحكيها بوجهي !!!
- مو اتفقنه صريحين
- اييه وشكو متونس عليه هاي بدل ما تكضب هالكتب وتمدهم الي وتسكت هذا صاحبك
وتصير صاحب نخوه
- والله مادري مامتعود اخدم احد
- يااخدمه هاذي مساعده موقف حلو
- صح والله حقج مادري شنو صار بوكتهه بس عجبني اضل اتفرج عليج هههههه

رفعتلو حاجبي بعدم رضا وضليت اهز برجلي وهو حكالي ..
- لابسه حجل ؟
- اييه
- شو اشوفه
-لااااا
- شبيج شنو حرام اشوف!
- لاا بس يعني لا ماحب
- حتخبليني بس اشوف والله راح يضل بالي
- عيييب
- رجلج اني خبله خلي اشوف

ضحكت وهو استغلهه ومد ايدو على طرف
ثوبي وانا كضبتها ..
- بايدي احسن
- هههه يلاا بس شوفيني

وخر ايده ورجع ظهرو وصارت كعدتو عدله
وانا كنت مخليه رجل على الثانيه رفعت دشداشتي شويه على حد الحجل بس وهو ضحك وحكالي ..
- ما مبين هيج كومي اوكفي
-لا والله
- والله هسه اني شفتهمت بس اوكفي وارفعيهه خلي اشوفهن عدل
- ما يحتاج
- بداعتي حبيبي ضلت بنفسي

دحكتلو وهو يحكيلي بداعتي عاد وكفت كدامه
ورفعت لفوك حد الحجل وهو يمشي اصابعه بشعرو ويبتسم ويحكيلي ...
- احب هالنظافه والعنايه بالرجل عجبتني
سالفه الحجل
- انا من صغري البس الحجول وما تخلى رجلي منهن بيوم
- يعني من ياعمر
- حسب حكي امي من عمري ٤ سنوات او خمسه
- ماا شاء الله وهذيج الحجول من صغيره بعدهن عندج ؟
- ايييه كلهن مضمومات عندي ويه بقيه الذهب
- ههه يعني شكد عندج ذهب
- وليش تسأل
- فضول ماابيعه والله
- هههههه لااا يفداك هالذهب عندي خير من الله .. اكثرو احصلو هدايا من ابوي كل نهايه سنه
عدلت كعدتي حدرو وقلتلو ...

- عندنا بحديثه معمل اخشاب هذا اب عن جد ورثو ابوي ومشغلو بصنع الاثاث كل نهايه سنه ابوي يهديلي قطعه ذهب ويحكيلي هذا نصيبك من رزقنا هالسنه
- ما شاء الله يعني حتى اخوتج هم لو بس انتي
- ههه بس انا اخوتي معتمدين على نفسهم
ابوي ما يتدخل بعيشتهم همه يدبروها
- يعني شلون ما ينطيهم شي ابد
- لا هو لحد عمر ال ١٧ ابوي يسحب يدو منهم ويخليهم يشتغلو ويوفرو عيشتهم بس يتكفل بمصاريف دراستهم غير هذا همه مسؤولين عنو .. يريد يعلمهم يعتمدون على نفسهم مو عليه
- هااا زين زين اني ابويه الله يرحمه ما حصلت منه شي بس ذكراه
- شنو ؟ ابوك متوفي !
- اي ما تعرفين يعني !
-لاا وعجل ابو سالم
-هذا عمي اخو ابويه . . ابويه انقتل على ايد الامريكان بزمن السقوط وعمي بوكتها جان بالاردن قتلوه لان رادو عمي جان ضابط بزمن صدام واله اسمه رادو يرجع من خطفو ابويه وجدي الله يرحمه ما قبل اذكره يكول
ماتحمل فقد اثنين خلي ايوب يطيب جرح ايهاب .. فصار من مات ابويه عمي تكفلنه
جنت بعدني صغير بوكتها بس اذكر شلون امي اجتي تحاجيني تكولي راح تتزوج عمي ايوب لان جدي طلب واني مارضيتلهه هالشي بس هي كلتلي من تكبر تفهم وكبرت وفهمت ان هالزواج حمايه الها والنه
ضلت امي لليوم هي تذكر ابويه ومحترمه عمي ما صارتله زوجه ابد
تدرين حلقتها بعدها نفسها مال زواجها الاول
هاي الصب الرفيعه معتزه بيهه وماغيرتهه
رغم شكد تشتري محابس ذهب بس الحلقه متوصللهه ابد ماتفكر تنزعهه
- ياعيني وعمك مااعترض !
- مايعترض لا هو مااله دخل بامي
بس شاهد الله عينه علينه اكثر من امنا نفسهه
هسه تجين وتشوفين بعينج
- ان شاء الله
- تحبين نطلع ؟
- لااا يا طلعه
-ها غير يوم تريدين
- لاا ولا يوم مااطلع استحي
- غاليه شسالفتج كلشي وكلتي استحي يعني خفيهه شويه وياي ميصير هيج
- اسامه انا استحي من اخوتي ماكدر افهمني انا اصلا متعجبه على نفسي شلون هاديه هالشكل وكاعده وياك وابوي واخوتي برا
- ههههه شكد لعد تهابينهم
- اكثر من الي تتخيلو
- زين اني تخافين مني ؟

حكاها بصوت هادي وهو مكرب وجهو حدري بهاللحظه سمعت صوت باب الشارع
بالعجل طفرت من مكاني وقلتلو ..
- جرااح رجع هذا وكتو والله اعرفو
- وشبيج انخبصتي هسه شكو بايكين !
- ول احكيلو اخووي هين والله مايرضى على كعدتي هاذي بدون علمو

مشيت بالعجل للشباك ودحكتو من فتحه البرده
دخل للمطبخ ورجعت وانا افرك بيدي واحكيلو ..
- اسامه الحين جراح يدري انته هين وكاعدين وحدنا يالله شلون ادحك بوجهو بعد
انا ابوي وماكل كلبي الخجل منو مو عاد جراح !!

وكف وتكرب لزم كتفي ويحكيلي ..
- شبيج حبيبي عادي غير خطيبج قابل جايج من الشارع ! كافي اهدي والله خبلتيني بخوفج هذا ومستحاج منهم
- افهمني هذوله ست اخوه كلهم عينهم عليه بكل حركه وكلهم رجال بطولي اخجل منهم والله
- ههههه تخبليني انتي شلون بيج ولج اهدي
- والله احسب للخمسه وهسه يدخل جراح
اعرفو انا اخوي واعرفو مايكعد
- خلي يجي مشتاقله احب سوالفه شبيج تره وترتيني اكعدي هسه شكو واكفه

جر ايدي كعدنا وانا تدنيت بعيد عنو وعيني على الباب وماكو دقايق واندك الباب ودخل جراح وانا ثلج جسمي من دحكتو هين واسامه حدري متت خجل حتى مارفعت عيني عليه
وبس كعد هو وصار ياخذ بالحكي ويه اسامه طلعت بدون كلام ومشيت للمطبخ بالعجل اشرب مي وامي حدرت تدحكني هالشكل وتضحك .. تحكيلي ....
- هااا خفتي
- يمه راح ينكطع نفسي لانعل ابو الزواج
خليني حدر اخوتي رجال مثلهم ولا تزوجوني
-هههههههههه انزول عليج

هديت شويه وكربت حضنتها وبوست راسهه
امي اكصر مني احضنها برهاوه .. قلتلها..
- يمه عسى الله لا يحرمني منك ومن عقلك هذا ابوس راسك ابوسووو على هالكلام
-هههه هااا استفاديتي منه
- والله دحكتو مصور تصوير كدامي مجسد باسامه ونظراتو والله من يحكيلي انا اتذكر بكلامك وابتسم
- عاد تفاهمتو
- اييييه عجل شلون مانتفاهم وانتي علمتيني شلون اتلافه الموضوع
-كلش زين ان شاء الله دومكم متفاهمين
- والله حكه ابوي يعشكك وما يدحك غيرك
اثاري انتي ماخذتو بالكلام المعسول والعقل المعدل هذا
- ههههه جبته بتعب ترا
- لااا انتي ويه الكل تتصرفين بشي مايخطر على البال طينتك اصيله يااامييييي
- الحمدلله عندي هالعقل حتى افيدج بي
- ااا يمه ابوي هم سألك عني
- اي سأل وكلتله متعاركين وبعدهم جدد سوالفهم صغيره متستاهل يحلوهه هسه
كلي بنتج الظاهر مطوخه زعل وخلت الرجال يجي ركض من بيته علميهه تتأنى
تدرين كالي علميهه تصير مثلج حتى اتطمن عليهه
- فديييتكم اناا فديتتتتكم يمه انا لو صرت مثلك ابوس نفسي والله

ضلت امي تضحك وبعدين سمعت صوت جراح يصيحني اصفر وجهي بالعجل
رحتلو ودحكت اسامه واكف يريد يمشي
سلم عليه وطلع وانا بالعجل ركضت صعدت لغرفه امي حتى ماادحك احد من اخوتي

تمددت وضليت صافنه على السكف وافكر
بالصار كيف هالشكل تحولت من كتله اعصاب ودموع الى صبر وتأني وهداوه
امي كدرت تخليني ادحك اكثر من الي حدر عيني بكلامها ..

وقررت بساعتها اضل اتعلم منها شلون اتصرف بزواجي بعد ..

بعد ساعتين واكفه بالمطبخ ويه عمتي ودك تلفوني بالعجل اخذتو وصعدت كان حسين بغرفه امي ردتو يطلع عاند ما يرضى
عاد مشيت لغرفه عمتي سديت باب وجاوبت
اسامه ..
- الوو
- ياعيني ما تردين بسرعه اله اضل اتصل يلا
- ايي هو كنت بالمطبخ ومشغوله
- ماشي بس حاولي لتتاخرين مره ثانيه
- ان شاء الله ، شلونك
- بخير اشتاقيتلج وكلت خلي اسمع صوتج قبل ما يصير العشى ويبدا الحظر عليه
- ههههه تحملني شويه
- اتحملج هي كم يوم ونتزوج
- امم ايمتى يعني بالك
- والله مفكر على شهر الرابع حلو الجو بي
واحنه ماعدنا شي يعجبج هالوكت ؟
-لا مايعجبني
- ها ! ليش
- لان انا ماتزوج الا نرجع لحديثه
- شنووو عيني !! مارجعتو لسنه !! شسوي اني اضل انتظر ؟
- اييه انتظر ما تخرب الدنيا
- غاليه اريدج يمي هي شنو انتظر لعد شكو خطبتج حتى ابقيج بيت اهلج !هاي اضل بس على التلفون !!!
- اسامه انا بنت شيخ والي صيتي بديرتي
تحدر تاخذني من ديوان ابوي وبيتي الي ربيت بي ما تاخذني من ديره غريبه علينه
حديثه اصلي ومن عدها تطلع زفتنا
- ادري افتهم بس شلون لو طولت رجعتكم اني شيصبرني !!!؟ انتي متعرفين بيه شفكر
لعرسنا .. اني محسب حساب من اعزمكم يمنه انطيج فلوس تجهزين نفسج ومن ارجع من رحلتي نطلع نختار غرفه جديده واذا كلش كلش نطول لنص الرابع احنه متزوجين
كلشي حاضر عدنا شكو هالتاخير ياعمري
- بس غراضي وكلشي املكو بيتنا هناك
-اي مو مشكله نتزوج وشوكت ميرجعون اهلج نروح نجيبهم
- لااا ما يرضيني زواجنا من هين الا من حديثه
- يصير خير احاجي ابوج واشوف رأيه لعد
- رأي ابوي بزواجي هو من رأيي وانته كيفك بعد تصرف باليعجبك
- زين زين روحي كملي شغلج
- ماشي باي

سد الخط وانا نزلت بس حسيت كأن صار على خاطره شي ! مدري انا اوهس ؟؟

لليل هو مختفي حتى ما راسلني وانا ما ارسلتلو شي ولثاني يوم الصبح كعدت
دحكتو منزل ستوري بالمطار ساعه ٥ الصبح
اتصلت عليه مغلق خطه عرفته سافر
ضلت بخاطري ليش هالمره يطلع وما ينطيني خبر ولا اعرف وين رحلتو ؟؟

للظهر يلا اتصل على الواتساب ..
- وينك اسامه ليش مانطيتي خبر برحلتك
- انتي الي ما سألتي لو سائله جان كلتلج
- افف مادري بارحه مزاجي خربان فد مره
اسفه
- مااحبج بعيده عني اخوتج وفهمت منكدر نخابر بسببهم زين ومراسله ! شنو ؟؟
- انتظرتك وانته مامتصل بالنت
- بس عندج رصيد وتكدرين ادزيلي رساله تشوفين ويني ليش ماعندي نت !! طالع نايم بيه شي هيج الي يريد يسأل
- زين اسفه انتبه بعد بلا هالاعصاب
- انتبهي فدوه لعينج تره لحد هسه اني متعجب على نفسي شلون هادي وياج متعرفين بعقلي من يقفل شلون صدكيني اصير ماانحمل لتوصليني بايدج لهالمرحله وياج خليج مهتمه بيه وقريبه مني لان اني ردتج وتمنيتج ماتعبت كل هالتعب حتى اديرين وجهج وتمشين اطنشيني
- حقك عليه . . اسفه ياعيني ما تقصدت اهملك وازعجك هالشكل لخاطري اهدا
- راح اعديها هالمره بس اريد اشوف تغيير تمام
-تمام ،، وينك هسه ؟
- اني هسه بمطار انقره عندي اربع ساعات وارجع لبغداد
- زين تغديت ؟
- لا بعدني راح انزل اتمشى واكل تريدين شي اجيبلج وياي
- اريدك ترجع بسلامه
- الله يسلمج .. بس صدك كوليلي شنو بنفسج اجيبلج راح اشتري كم قميص صيفي الي ولاخويه واجيب لجراح هم
- هههه تضبط معو كثير
- غير خوينا هذا ياعيني
- ان شاء الله ادوم خوتكم انا ما بنفسي شي والله تسلم روح اكل وانتبه على نفسك
- ماشي عيني

سديت الخط ورحت لامي كعدت حكيتلها
الي يشتكي منو اسامه وهي ضحكت وردتلي ..
- الغباء والغلط منج انتي مو منه
-يمممه تعذرتلو
- شيسوي بالاعتذار ! يريد افعال
- اييه هو انا اريد افهم منك شنو الافعال الي اسويها حتى ابين مهتمه بي وما يرجع يضبط عليه هالشكل والله لو ما رجلي وعيب لاطلع لساني عليه هالطول واخرسو
- هههههههه يفيد بيج انتي ! ابد ميفيد
اتعب نفسي بس هيج بالخالي بلاش
-لاا والله يمه اسمعك والله اريد استفيد منك احكيلي بداعتي
- اسمعي لعد ...
اول شي بطلي خشم عالي على رجلج لج والله زحمه الرجال يدللج ويتغزل بيج ويحجيلج الكلمه الحلوه وانتي رايي من رايي ابوي كيفك يعجبك

ضحكت بعلو صوتي على تقليد امي لصوتي من احكيلو هالكلام .. وهي كملت حكيها ..

- تعلمي تردين بكلام حلو ونبره هاديه مو جنج اخوج .. بنتي هي مو سباقي ياهو اليغلب
هي سياسه وحبيبي وعمري وتمشي العيشه
- يمه انا ما قلتلو حبيبي لليوم
- هههههه ايي شوكت ناويه تكوليهه
- مادري ابمتى وكت مناسب !؟
-ههههه ولج بنتي انتي ثوله لو تستثولين فهميني شسالفتج
- يمممه
- يمي تتنعوصين ويم المكرود جنج توثيه لاتهش ولا تنش
-هههههههههه يمه انتي تحبيه لو تحبيني
- اثنينكم احبكم واريد علاقتكم حلوه ومرتاحين بيهه ماريد بينكم برود ومشاكل من هسه
- يعني شسوي ؟؟

- يعني لا تطلعين لسانج وتلعلعين كدامه لان هو مو حسين مااشي خليهه هناا بعقلج طبعيهه هذا مو حسين ويكيفج على اعصابج ولا جراح الي ياخذج على كد عقلج
تره اسامه غييير عنهم ، يحبج يحترمج ويريد المثل فهمتي
- اييي يمه فهمت اسكت والله اسكت
- اي وشغله ثانيه دااحسج تحجين وياه بس شلونك وينك اكلت رحت اجيت
-اييه وهو اكو غيرهم
- بله هو شيكولج ؟
- يسألني نفس الشي ومن نسكت يخلص الحكي هو يروح بشغله او يحكيلي روحي سوي هالشي بعدين نحكي
-اي وانتي مثل الثوله الحبابه تسدين الخط وتمشين وتنتظرين لحد مايرجع يخابرج بعد
-ههههه اييه والله بالضبببط
اكو غلط هين مو ! مامرتاحه لنبرتك هاي ؟
- ههههه ولج انتي يراد اعلمج من ال
د . و . ا مثل الجهال
- يمه يعني انا اجي متعلمه من كاعي علميني علميني عجل مو بنتك انا
- مو حاطه راسج بهالمسلسلات ماتعلمتي منهن شي لو بس تضيعين وكت
- عزااا واطبقهن عليه !!! حتى ياخذ عليه نظره مو زينه والله
- لعد هيج راح يحسب نفسه متزوج امام مسجد
-هههه يمممه هالتركيين شغلاتهم كلها عيب اسويها
- غاليه هسه شيلي قوانينج ومعلوماتج كلهاااا ذبيهه على جهه وخلي حجيي بالج بس هوه
مفهووم
- يعني كلشي مافيد انا!
- تفيدين بغير مجال حبيبتي مو ويه رجلج هذني ميعبرنج وياه باب الغرفه
-ههههههههه
- هسه كولي وراي .. اسامه بس بصوت حلو يعني مثل ما تصيحين جراااح
- هههههههه يمه استحي
-اذا متحجين سدي سالفه وروحي دبري نفسج وحدج احسن ماتعبيني بدون فايده
-هههه لا لاا

عدلت كعدتي وصرت ادحك لامي والضحكه شاكه الوجه وانطق اسم اسامه بمياعه وهي تخليني اعيد لحد ما طكت ضحك يلا سكتت انا ... حكتلي ...
- هسه هاااي اول تغيير ، يجوز تشوفيه عادي بس متدرين هالنعوصه شلون الها تاثير عجيب وتشوفين بعينج بعدين
-ههههه ايييه يمه مدحكتها باخوتي
-لعد ماتسويهه وياه يحتاجلها تعلوم ؟
- يمممه استحي استحي بعدني ما ماخذه عليه
- تتعودين وبعد تصيرين متكدرين بلياه
هسه شغله الثانيه ..
من تبدين تحجين وياه لا كبل تسألين عن اخباره او شغله اكلت كعدت هذني اجليهن
-عجل شبقى ؟
- احجيله عنج بالبدايه وشويه غزل وهالسوالف ومن يخلصن يلا تسألين شسويت ووينك والحجي المعتاد
- يعني شلون شحكيلو عني !
- يعني مثل كوليله .. اليوم اني هواي مشتاقه لصوتك اول ماكعدت افكر بيك
-ههههه يممممه لاااااا
- ايي شنو لا هيج الحجي لازم يصير
اكمل لو تكومين
- كملي كملي
- اي كوليله مثلاً . . جنت اسوي فلان اكله
مثل كليله برياني او كيك او اي شي تحسين يحبه كوليله .. اجيت بالي كلت اخابرك اشوفك اذا تحبهه حتى اسويلك منها
راح يكيف بهالحجي وهسه تشوفين ينكلب مزاجه الف درجه وبالاخص اذا تكوليله
داتعلم على حلويات جديده وغريبه حتى اسويها الك بزواجنا وادللك بيهن
كوليله .. احب كل تفصيل وياك مميز يصير وكلشي هو عندي مهم واحب انوعلك بي خاصه اكلك
- هههههههههههههه يمه منين تجيبين هالكلااام
- لعد صارلي بالعشرين سنه متزوجه شنو ! شسوي ؟؟؟
- نيااال ابوي نيااااله حرمتو معدله
ول احنه دايخين ومطير عقلنا ابوي شلون هالشكل حدرك مثل المي ساكن اثاري انتي البلا كله
- ولج بلا شنو ! هذا دلال شمعرفج انتي بدلال الرجال شلون
- ههههههه ايييه اتعلمو منك ياامي بنيه فقيره انا شعرفني بهالدروب كلها
زين يمه مثلا انا حكيتلو هالكلام وانا مااطابخه شي ورادني اصورلو شسوي بوكتها ؟؟
-هههههههه مشكلتج بعد انتي هم لا تروحين زايد احجي على كد الحال واني كلتلج مثل هذا مثل مو تروحين تورطين روحج بشي اكبر منج
- يعني على كد الحال احكيلو
-اي ، وبعد شنو ؟؟؟؟
ها مثلا كوليله اذا هو ممخابرج صار كم ساعه .. كوليله كلش ضايجه احس يومي فارغ مامتعوده بدونك هيج ضلي كل شغله بيومج اربطيهه بي وحطيله نصيب منها يلا تصير حلوه فهمتي !
- هههه ايييي فهمت
- واذا يريد يسد الخط ويروح وهو ضايج من شي او خلص حجي بينكم لا تخلي يروح هيج بسرعه كوليله .. راح اضل منتظره اتصالك او لا تتاخر عليه اشتاقلك ، او مثلا كوليله
يومي صار حلو بصوتك لاتحرمني منه
هيج لواكه بنتي لواكه
-ههههههههههههه اليوم اكلب حالو لاسامه
- اي خطيه لعد هو ماخذله مره لو حجاره
كلمتين حلوه تعدله مزاجه يصيرلج دوا
- فديييت هالام المعدله
- وها لا تضلين اسامه اسامه غيري
كوليله حياتي حبيبي او حتى دلعي اسمه
وبصوت مايع حلو كلشي يصير حلو
ههههه اذكر ابوج قبل جنه بعدنه ما مزوجين
باول ايامي وياه هناك بحديثه .. هو يعاملني باحترام واخويه وبينه حدود بس خلي يسمعني احجي بغدادي كبل يتغير
- هههه يعني شلون يتغير ؟
- يضل يضحك لو يباوعلي بنظره يخليني اخجل والله احسه يريد يحجي وميكدر
بس يتغير مزاجه وبالاخص من بعد ما تزوجنا يتعمد يجيبني بالحجي حتى يسمعهن مني
- يمه شنو هنه ! انتي يعني دايما كلامك بغدادي شنو الي تقصديه ؟
- شوفي مو هسه كلام البغدادي يختلف عن اهل قبل .

احنه البغادده الاوليين عدنه لهجتنه الخاصه ما يكدر عليهه بس اهلها حتى هسه اذا تلاحظين اكو ناس يحجون بغدادي بس مبين مو كلامهم .. احنه لهجتنه البغداديه الاوليه بيهه مياعه هوااااي رجال او نسوان
نبرتهم هادئه وبنفس الوكت مرحه
بيهه روح عفويه و احترام ودلال ووقار للمقابل بشكل زايد ، عدنا بالاخص البنات نتنعوص هواي بالكلمه
- بغلاتي عندك يمه احكيلي شي منها مثل كبل امانه يمه اماانه
- هههه ماكدر هيج والله هي تطلع وحدهه بالموقف لا تصيرين مثل ابوج يجبرني احجيهه وتطلع محلوه عوفيهه عفويه
- ايي وايمتى تطلع هالعفويه
- شمدريني
- بس انتي بكل وكتك كلامك عسل انا لو مو جراح معلمني على ايدو من صغري كان طلعت مثلك بالحكي
- انتي بيج روح بغداد وحديثه تخبلين بكل شي
- هههه اسامه يحكيلي خشمك حلو مثل امك
-هههههه هم زين ورثتج خشمي وشعري بعد شتريدين
- احلى شي هذني يمه تسلمين

ضحكت امي وانا تصفنت شويه وقلتلها ..
- يمه زين اسامه احس مراضي على سالفه
الاتصال ماكو بالليل وبالغصب بالعها شسوي عليهه
- اصعدي خابري يمي
-لاااا انا ماعرف احكي الا وحدي
- زين لعد عوضيه بالرسايل بس كون رسايل من رسايل تسوه يسهر عليهه
- ههههههه يعني انجرف بمشاعري
- ايي لعد تضلين جامده هم لازم تلينين شويه
اسمعي غاليه .. اسامه هو رجلج هو حبيبج هو صديقج كلهن هذني هو لازم يصيرهن
بالاخص هو اول شخص خارج نطاق الاهل عرفتيه انطيه مجال يصيرلج كلشي ماحصلتي بحياتج
حلو الحب لو تعيشيه ويه رجلج بالاخص الحب الي يجي بالعشره اله نكهه خاصه
مو مثل حب الي يخطف على الكلب هذاك يأذي ويتعب بس حب الي يكبر بالعشره والمواقف هذا يدوم وكل ما يمشي العمر تحسينه صار اغلى وارقى وتلكين نفسج تحبين ازيد من الاول .. رجلج محب وفرايحي يحب الضحكه الشقى الروح الطفوليه ، وانتي هذني كلهن عندج لا تضميهه عليه بحجه بعدين بالزواج تره
هي الخطوبه هسه وكت الضحك والسوالف والغزل لازم تخلينه من يتذكرهه يضحك ويذكرج بيهه وهو مشتاق الهه
صيري مرحه وياه طفوليه شويه تره الرجال لو شمهما كبر حركات ودلع البنوتات يفرن عقله مثل نقطه ضعف اله
ماريد اضل اكولج سوي هيج واحجي هيج
اني هسه دليتج على الطريق انتي بعد بدعي بي بعفويتج ومشاعرج
غاليه ماريدج تصيرين نسخه مني
اريد تصيرين انتي بافضل شي بنفسج
انتي كلشي بيج حلو ، دمج محبوب
عندج الجمال والعقل والرزانه وعندج روح الطفوله والغنج كلهن هذني استفادي منهن
كلهن شغليهن ويه رجلج لا تهملين شي منهن
تره هو حباب يستاهل مره الي تريح كلبه
اوصليه بكل طريقه مدام مفتحلج ابوابه
وينتظرج توصليه لا تتعبين ابد ضلي حاولي وياه جربي كلشي وشوفي رجلج بشنو يتاثر
وركزي عليه ..
يحب الشقى والضحك لا تخلين يمر يوم بدون ما تضحكيه وتغيرين نفسيته
يحب الكلام المعسول شبعي منه بس بقي كلمه حبيبي نادره بالحجي حتى تخليهه لوكت الحاجه هناك استفادي منهه
واذا يحب الرومانسيه والاجواء اطلعي على هالمواضيع مو عيب ولا غلط حلوه هالثقافه الزوجيه اطلعي عليهن حتى تصيرلج افكار تكدرين بيهن دائماً تغيرين من روتين حياتكم
ويضل متلهف الج عمره ما يمل منج
كثري اسأله وياه على كلشي بشخصيته بس بشكل غير مباشر
يعني كوليله .. مثلاً اني احب هيج لون واكثر اشيائي بي انته تحبه ؟ اذا كلج اي كوليله وبعد شنو تحب يالون ، واذا كلج لا راح تلقائياً يكولج احب هيج لون
فهمتي يعني الشغله الي تريدين تعرفيهه منه احجيهه عن نفسج وبعدين جيبيهه عليه
مراح ينتبه هو انتي تريدين ادققين بكلشي وياه وبنفس الوكت راح يعرف شخصيتج هم

انصتت لامي بكل حرف تحكيه الي واتخيل اني اطبق هالشغلات وياه ورد فعلو وتحمست اجرب كل هذا وابدا اكتشف شخصيتو لاسامه

ضل عندي سؤال من بعد طول هالكلام قلتو لامي ..
- يمه هسه بعيد عن اسامه .. انتي هالاسلوب تتبعيه ويه ابوي من اول يوم لليوم او تغيرتي ؟
- ههه لاا والله مو من اول يوم بس يعني جنت اكسر واجبر اعوض بشي يصبره عن شي
-يعني هسه انا شفهمت !!!
- جان بالبدايه بينا شويه مواضيع حليناهه
وتأقلمت وياه وكمت ابدع بالدلال ولحد هاليوم ماحرمته من دلالي ولا غيرته وياه
لحد هسه مااعبر يوم بدون مااحضنه فد مرتين اقل شي وحتى مرات اكعد بحضنه واحاجيه على اي شي حتى لو عليكم
بس مجرد كعدتي هاي تفرق عنده
- ياااا شكد حلوين انتو ابوي مبين معلمك وياه بكامل حريتك تتصرفي
- هو رادهه بالبدايه كالي عليهه ..
اثنينه نعيش بدون قيود بدون خجل بكامل الثقه والتقبل .. هذا اساس حياتنا الي بقانا لهاليوم متفاهمين
- اممم بس يمه انتو عركاتكم تخوف
- ياا شبيهه تخوف
- والله تخوف احسكم ساعه الساعه يصيبكم شي .. ابوي يرتفع ضغطو ويكرهنا كلنا يحير شيسوي بينا حتى يفرغ اعصابو وانتي تكطعين نفسك بالمناحه والبكي تخوفون والله
مو مثل عمتي من تتعارك ويه ابوي هو يدير وجهو ويطنشها وهي تطلع حركتها بالمطبخ

- هههههههه مو احنه منتعارك اذا مو شي قوي يزرف الكلب مينحمل بس الباقيات اتلافاهن بكلمه منا حضنه منا خلصت السالفه
-هاااا يمه طلعت السوالف طلعت
- انزووول عليج فوك مااحجيلج اسراري واعلمج
- ههههههه لااا ان شاء الله تدحكين بنتك رفعت راسك
-ماريد ترفعين راسي اريد ادارين رجلج
- اداريه يمه اداريه عجل شعندي غيرو
- اييي هيج اريدج

صاحها ابوي وصعدو وانا على كعدتي بغرفه جدتي فتحت التلفون ودخلت على محادثتنا
كتبتلو ...
' اشتاقيتلك ما خلصت غدا '
دقيقتين وارسلي ..
' مااكلت بعدني ملتهي بالمحلات اشتري ملابس بس هسه انفتحت نفسيتي وراح اكل '

علت ابتسامتي ورجعت كتبتلو ..
' عمري اكل وخابرني قبل ماتطلع احب يطمني صوتك '
بالعجل ارسلي ..
' يدلل حبيبي '

سديت التلفون وانا اضحك .. من كلمتين تغير كلشي وصار احلى ...
حسيت بحماس رهيييب حتى اتعمق وياه بكل شي واكسب محبتو واكسب رضاه واخليه عندي الكل بالكل لاني ادري راح يقابلني بالاكثر والاحلى ...

ضليت على طول اليوم مراسلات ووكت الي صارت رحلتو خابرني كبلها ومن اول ماوصل بغداد ومن طلع برحله ثانيه بالليل
وانا اتبعت كل نصايح امي وادحكو طاير من فرحتو بالاخص من احكيلو بالاشتياق
والمحبه يصير يردلي باكثر من كلمه
ومن خلصت رحلاته ورجع لبيته ثاني يوم
الصبح خابرني وفاجأني بطلبو ..

حكالي معزومين عندهم على الغدا بكرا
والحين هو يسده مني يخابر على ابوي وجراح ..

انا هين بالعجل سديت تلفون ونزلت ركض لامي ... كضبتها من ايدها وحكيتلها ...
- معزومين بييت اسامه بكرا يمه نتغدا عدهم
شلون اروح يمه استحي من اهلو
وابوه موصيه كلنا نروح حتى كل اخوتي
.
.
يتبع