بداخلي شي فرح بمعرفه حياته شلون صارت وشلون اترقى بشغله وحصل هالمكانه والمال وكدر يأسس حياته مثل مايعجبه ..

سأله الشيخ ..
- الحين انته زوجتك وحده والثانيه هي ام اسامه زوجه المرحوم
- لا هي هم زوجتي .. من اول سنه عشنه سويه بعمان والدي طلب مني اتزوجهه
بس تطلع دوره السنه مال اخويه وانا مارضيت اتزوجهه بس امي فهمتني ان ابوي طلب هالزواج حتى يضمن المره تضل بينه لولدها وحفاظاً على ولد اخويه ورد دين حياته الي انتهت بسببي تزوجتهه وسجلتلهم الكاع الي بعمان وتكفلت بمصاريفهم كلها اسامه جان بنفسه يصير طيار ودخلته كليه الطيران
بعمان ومن تخرج اخذتله سياره
عنده اخت اسمهه هديل دخلتهه تحليلات
اهليه وام اسامه هي الهه جناح خاص بيهه و ولدهه .. انا محرمهه عليه مره اخويه ما فارك عيني لحظه راعيت عياله وزوجته وصرتلهم الاب ومدلل ولد اخويه اكثر من ولدي وصارلنه عمر
عايشين سوه ما واصل جناحهم ولا معتب بابه حافظ حك الاخوه بينه
- الله يحفظكم الهم ويجزيك حك تعبك عليهم
- الله يسلمك

سكتو شويه وبعدين رجع ايوب كال ..

- ضلت بالي عينج ليش هيج صارلهه

- هالعيون ومرضهم كانو ثمن عافيتي
انا تصوبت بعيني ايام ماكنا نحارب داعش على اسوار حديثه وهي داوت عيني بعينها اليسار والوكت اخذ منها نظر اليمين

- امي من يومها مضحيه وهذا يدل انك سعدتها واستحقيت هالتضحيه

- انا قدمتلها القليل بس هي كلشي مني تعتبر ثمنه مايتجازى بس هي ماتدري انا الي كل عمري مديون الها من سنه التسعين لهالسنه ماكدرت افك ديني لها
وكل ماافكر الحين جازيتها تطلعلي بدين اكبر من الكبلو وهاذي اخرها هالعين
تحيرت برد جميلها

- الله يكدرك وترجعلها على الاقل نظر عينها .. ليش ماتسافرون للهند خوش دكاتره هناك ويعالجون عيونها اثنينهن

-الله كريم

- احجزلكم هالشهر و نسافر سوه وانا اتكفل بكل تدابير السفر والعلاج وماعليكم بس تحضرون نفسكم

- لاا يابه تسلم

- رجاءاً شيخ خليني اقدم ولو هالشي البسيط واريح ضميري

- مستحيل هالشي يابه الحرمه حرمتي ومايصرف عليها غيري اكطع نفسك من هالسالفه

- زين عجل يابه نتقاسمها انا اتكفل بالسفر وعليكم العلاج احسبوني دافعلكم كروه كيه هسه هم ثكيله هاي ياابو جراح

-اييه يابه ماترهم والسفر غير وكت ان شاء الله الحين عندي شغل اتفرغ ويصير خير

- زين هسه مو حاجزين لعمليه بعد كم يوم
-اييه راس هالشهر
- اي زين خلي تخلص من المي الابيض بهالعين وترجع عافيتها وانته كمل شغلك هالايام حتى وراهه نطلع للهند او تريدون غير بلد كيفكم كلش انا حاضر
- يابه تسلم مايلزم تعب نفسك وانا مو لاهي عنها بس اضبط اموري وشغلي واخذها انته تريح ياخيي
- لااا والله ماعوفكم بعد احنه راح نصير كرايب ان شاء الله وهسه احنه اصحاب
وحك الصاحب على الصاحب ياابو جراح
- الله كريم يابه الله كريم
- امانه بركبتك شيخ امانه امانه يوم ماتحدد العمليه كولي امانه عليك يوم الي اخابرك واسال على العمليه لا تضمها عليه
- ان شاء الله يابه سهله ان شاء الله
- اترخص انا يابه واعذرونا على هالجيه المفاجئه واذا بدر مني كلام غث خاطرك ياامي انا اعتذر وان شاء الله ماشوفك الا بكل خير وعافيه
- ان شاء الله

طلع هو والشيخ واني ضليت على نفس كعدتي بعدهه الصدمه بيه حسيت على رجعه الشيخ واول مادخل الهول كال ..

- امشي كدامي فوك يلا

بلعت ريكي ومشيت وياه صعدنا كبل للغرفه واول مادخلت صاح عليه ...
- ابني هااااا ابنننننننك من ايمتى يولو
من ايمتتتتتى شيبتو براسوووو وتسميه ابني !!!!!
تيييين تضميهاااااا هالسالفه علي اناااا !!
كلشي تشاركناه ليش هذااا تضميه عني ووووول سنين احنا سوووووى بحديثه
ماحكيتيلي عرفتيها منووو
ما ذكرتي طاريه كداااامي ان كان هووو صديق وبس صديييييق مااا علمتيني بسيررررتوووو ووووول لييييش تيييييين لييييييييش يولوووو

جنت واكفه ومدنكه ولازمه المناظر بيدي اعصرهن بايدي كل مايعلي صوته بالصياح وبالاخير ضرب حيل على باب الكنتور وهو يصيح ...
- الفيييين مره سالتك وردت اتاكد ماااردت اخذ مكاااااان غيررررري تفهمييييينييييي انتي تفهميييييين مكاااانتو هااااذي ماردتها الي دغششششش
ردت ملكي مااا ملكو كلبي بشر لييييش تخليني عاااايش بكذبه كل هالعمرررر يوليييييي لييييش ماجبتي طاريوووو ماكنت احااسبك عليييييه ول تين مو كنا اصحاب مو سبع سنين احنه اصحاب وسرنا واحد ليش ماذكرتي طاريه كدامي ولا مره !!!! ليش يوووولي

ضل يهز بجتفي ولازم وجهي بايده عاصره ويعاتبني .. دفعت ايده وكلتله ..
- ليش تعاتبني عليه وتزعل مني هيج
الي صار كله قبل مااعرفك وقبل حتى مااتزوج
- عتبي على سرك الي ماشاركتيني بي
انااا ماضميت عنك حرف واحد لا بحياتي كبل اعرفك ولا بعدها بس يوم الي يخابرني الرجل ويقلي انا الي معرفه بزوجتك ورايد اتعذر منها على شي صارلو سنين واجي ادحك حرمتي تعرفو وبينهم اسرار وخبايا وانا مثل الاطرش بينهم هييييين الي كااااامل الحك بالعتب

لوووو انك حكيتيلي عنووو من كبل كان اليوم انااااااا الي قلتلك هذااا ايووب هيين
مااا صفن على نطقك اسمو بهالرجفه

نتر ايدي واني كلتله ..
- ماكدرت احجيلك هيج شي
-لييييش ماكدرتي ليييييش بكل شي اناااا وكفت حدرك لييييش هين ماكدرتي
هااا ليشششش
- مااادري مااادري
- لاااا تدرين كلش زين تدرين
تعرفين ليييش لانه كااان شخص خااص عندك ومكانتو خاصه لو انه عادي كنت ذكرتيه بحديث عابر حاله حال البقيه
لكن هذاااااا سالفتوو سالفه وخفتي تحكيها واغير نظرتي تجاهك
ردتي تدفنين السالفه وراكي وتمشين بحياه جديده حدري وتاخذيني على عمى عيني بحبك بس نسيتي ان الدنيا تدووور
وتكشف كل مستور

طلع من الغرفه واني ضليت كاعده بالكاع ابجي والطم على حظي الي فتح هالجروح هسه وزادها وجع..

اجتني غاليه مفزوعه وتكولي ...
- يمه خيرك ياحبيبه خيرك شصار بينكم
- اطلعيييي انتي روحي منا
- يمه حبيبتي انا بنيتك اشيل همك والله لا تبعديني عنك
- بنتتتتي روووحي منا روووحي انزلي وسدي الباااب ماريد احد يمي رووحي داكلج رووحي
- يمه بغلاتي عندك لا تقهرين نفسك هالشكل مشاكلكم تنحل ان شاء الله مو زين عليكي كثر هالبكي ياامي
- رووووحي كلتلج روووحي انزلي

دفعتهه وهي طلعت وسدت الباب
ضليت مخليه راسي على الفراش وابجي

يوم الي جنت اتمنى شوفته براحه ماجنت اكدر اوصله ويوم مانسيته وبديت اعيش
يطلع بحياتي ويخليني اسد باب وينفتح عليه الف باب ...

بشنو غلطت وياك ياشيخ بشنو !!
ماحجيت بسيرته احتراماً الك ومكابر على نفسي بذكره .. لو جنت تعرف شكد جنت اتاذى بكل طاري يجي اله بي ذكرى وياه جان عذرتني على خوفي من ذكر اسمه وسالفته

هذا الي عشت شبابي كله انتظر جيته واسهر ابجي عليه .. حبه جان الاذى الاكبر بحياتي يوم ماتناسيته كدرت اعيش
شلون اكدر افهمك كل هذا هسه شلون اكدر احجيلك هيج !!!!

جنت احجي هالشي بنص البجي والحيره
واسال نفسي شلون اكدر افهمك ياشيخ هالشي شلون اكدر اشرحه الك وابري نفسي كدامك !!!

صار الليل واني على نفس كعدتي
اجتني غاليه وضلت لازمه ايدي وتكولي ..
- يمه زعلكم يهون بس عافيتك يايمه ماتهون عافيتك مهمه لا تأذي نفسك هالشكل يابعد عمري انزلي غسلي واكليلك لكمه صارت الساعه ١١ بعدج على الغدا والله مايصير هالشكل
انزلي يمه حسين يسأل عليكي وانا ماخليتو يصعدلك قلتلو امي تريد ترتاح
انزلي الحين دحكيه
- ابوج وين
- كاعد يدحك تلفزيون بس صافن ولا يسمعلنا حتى ماتعشى
- صيحيلي حسين وانطيني ملابس خلي ابدل
- يعني ماتنزلين
-لا مابيه حيل
- زين عحل اجيبلك الاكل هين
-لاا ماريد لا تجيبين شي
-يمه
- غاليه مو وكت عنادج مابيه حيل كلتلج
كومي جيبي ملابسي يلا
-زين يمه زين

جابتلي الملابس بدلت ونزلت هي وره شويه صعد حسين كبل اجه حضني ويبوس بيه .. ضليت لازمه وجهه وكلتله ..
- شلونك ياروحي
- يمه زين انا بخير بس انتي شسالفتك
خيرك يابعد عيني
- تعاركت اني وابوك شويه وضجت
— عجل ماقلتلك حبيني اناا ماازعلك ولا اغثك بكلام ماتسمعيني عاجبك ابوي قافله عليه دحكيه الحين كاعد ومامهتملك
-اشش ولك كم مره انبهك متحجي على ابوك
- ماحكينا شي يابه اكلتينا وشربتينا
- لاتغثني بحاجيه مو حلوه بحق ابوك مفهوم
- مفهوم يمه مفهومه من كبل ااا يمه صدك راح تزوجون غاليه
- لا بعد ما قررنا بس حجي صار
-اييه يعني مامستعجلين على زواجها
يعني خلوها براحتها
-هاا مو تريدها تتزوج وتخلص منها
-لااا يمه عجل انا ويامن اتكاون بعد
خليها متونس عليها والله
- الله يديم الصلح بينكم
امشي نام يلا مو وراك دراسه
- انام حدرك مبين اليوم ابوي مايحدر هين زعلان
- امشي جوه نام هذا مكان ابوك بس يدري بيك هنا يملص اذاناتك
-ايييي لااا من راضي مستفاد ولا من زعلان اريد افهم انتي امي لو مره ابوي
ماتفكرين بس برجلج
-حسييين
- نازل يمه يلاا تصبحين على خير

طلع وضليت اني متمدده واريح بالي
ومشى الوكت وطفو اضويه البيت
وضليت اني الوب مخنوكه ومحتاره
وكلبي يوجعني من هالصدمات ..

حاولت انام ماكدرت كمت عاد اتلمس
وامشي على حفظي للطريق ونزلت
للهول رحت كلت اشوفه هنا موجود
فتحت ضوا الدرج يلا فتحت باب الهول
وضليت اباوع نفس اماكن الولد بالكاع
وانتبهت على القنفه اكو احد عرفته هو
رحتله ورفعت الغطى من راسه وتلمست وجهه وصرت اكوله ..
- خالد اكعد عفيه كوم وياي خاالد

جنت احس بي كاعد من رمشه عينه بس مايحاجيني .. بجيت وكلتله ..
- كووم لا تستغل ضعفي هيج
- استغفر الله

كعد وكالي ..
- بسك يابه الولد كعدو امشي

لزم ايدي واخذني بره وسد باب الهول
كالي ..
-شنزلك بهالظلمه وحدك
-تلمست
- وشعندك نازله ماخليتي بنتك حدرك
- نزلت اريدك شلون تعوفني هيج وتروح يعني مو تعرفني ماكدر انام بعد الي صار
-هااا ماتنامي من كثر الصدمات لو من العتب
- خالد لتجرحني بهالكلاام انته اكثر واحد تعرف حياتي ومحبتي الك شلون صارت
هالحجي يكوله الغريب مو الي حاسبته نفسي

- استغفر الله تين انتي شككتيني برووحي ول انتي تفهمين انا وش الحارك كلبي لو ماتفهمين
- اي افهم بس اكو شغلات لازم تفهمها مني مو تاخذني بالصياح وتالي تعوفني وتروح يعني هيج تعودنا بمشاكلنا هيج تاليها تصير !
-لااااه الحين انتي ام الراهي وتعاتبين وزعلانه
- ماازعل منك اني بس اعاتبك
- انا الي عاتبتك بالاول
- اي واني هم اعاتب قابل خلص بعد ميصير يعني بس الك
- ههه ووول تين امشي فوك امشي
على هالسالفه نكعد النيام ومانخلص

مشيت كدامه ولزمت بالمحجر قوي وهو يكولي ..
-انطيني ايدك اساعدك
-ماريد تساعدني اني مثل مانزلت اصعد
- وول انتي الحين مكعدتني من نومي حتى تتزعلين وماتدحكين بوجهي واناا الزعلان ! ماصايره هاي يابه
- مو زعلانه هسه مو كلتلك ماكو زعل
- عجل هذا شنو يسموه
- يسموه واحد ضايج طاكه روحه ويحجي متنرفز
-الفظيها عدل بعدين تنفرزي
- صارلي خمسين سنه الفظها هيج مابيها شي
- عوجه كلمتك مكسره
- باوع لتغير مواضيع
-ول شغير من موضوع وانا ابو الراهي وابو الحك انتي لا تكسرين بكلامك حدري الحين وتخليني اتيه سالفتي

طبينه الغرفه واني ابتسمت شويه احسه هدء واكدر اتفاهم وياه هسه ..

لزمت ايده وبوستهه كلتله ..
- انته شلون تسمح لنفسك تشك بحبي الك
والله ازعل منك وماسامحك لو تفكر حبي الك دغش
- تين عجل مغطيه على سيرتو هالشكل ليش ؟!
-هذا وحد وانته وحد .. خالد اني فديتك بروحي انطيتك عمري كله فنيته بحبك ورضاك مااصدك انته متعرف اني مااشوف غيرك بهالدنيا لا من اهل ولا ولد ... تجي بعد كل هالعمر والتضحيات تشك بحبي !
- يولو انا ادري انك تحبيني وفضلك علي مااجازيه كل عمري بس هذااا شسالفتو !!
تين انا الحارك اهلي ومسود يومي هو ان احساااسي يوضحلي ان كلبك زايرو حب هالرجل .. وكضيت الليل كله اتذكر مواقفك كبل واقارنها والشك اكلو لكلبي اكل
- زين هسه اني محتاجه انام بحضنك والله تعبانه وراسي حيل ديوجعني
- وعيونك ورمت من البكي ليش هالشكل يولووو
- من وره اعصابك عيني
- حدري هين

جرني لحضنه واني ضليت مخليه راسي بصدره واكوله ..
- انته النور الوحيد بحياتي مو تحرمني منك
- ول يابه انا الي انعمي وتظلم حياتي لو بعدت .. راسك ياذيكي من هين

لزم وسط كصتي واني اكوله اي وبعدين تمددت بحضنه وهو يفرك كصتي
شويه وجريت ايده بوستهه وخليتهه على خدي وضليت اتلمس بيهه واكوله ..
- شتريد احجيلك
- لا تحكيلي تفاصيل مااتحمل اسمعها
اريد تجاوبيني على اسئلتي
- ماشي
- صحيح كنتو اصحاب ثلاثتكم؟
-اي
- تقدملك مره للزواج
-اي
- و وافقتي ؟
-اي لان بوكتهه جان اكو بدايه احتمال للزواج من خوالنه وماردتهم فوافقت عليه
- وشنو الي منع الزواج ؟
- ابويه ما وافق الا اتزوج من خواله لان هو جان منطيهم كلمه وكال استحي من خالي ارجع بكلمتي وياه
- زين وهو شكان رد فعلو؟
- حاول وياه اكثر من مره وبعدين زعل وطلع من البيت وهو بوكتهه يشتغل بالاستخبارات وبحرب ايران هو جان يدزوه بشغل صعب هناك ويضل ايام مختفي
- وشعرفك بهذا شغلو ؟
- من نلتقي كل كم شهر بالكليه جان يحجيلنه شنو صار بشغله وليش اختفى
بس اني وروعه نعرف بشغله
- ووكت الي تزوجتي هو شسوى؟
- ماسوى شي تزوج قبلي
-هااا والله
-اي والله تزوج قبلي وبعد زواجي بفتره يلا عرفت عبالي جان بمهمه بس طلع متزوج
- يعني ما تأذيتي بوكتها عليه ؟

تذكرت بلحظتها هذاك اليوم بيت روعه
وشلون حالي جان بعدين كلتله ..
- اني جنت متزوجه اصلاً شكو داتاذى عليه
- ما تمنيتيه بيوم ؟
- اي تمنيت لان جنت اعاني بزواجي وجنت احسبه منفذ مابيه اذيه
بس كلشي راح بوكته
- تين كلبك سكنو غيري ؟
- خالد شنو هالسؤال شبيك
-جاوبيني ونكف اسئله
- الكلب كله الك انته طردت كل الي بي
شاركك بي شويه حسين وغاليه بس هيج والله
- يعني ما راودتك ذكرى على الماضي من يوم الي تزوجنا لليوم ؟
-ابد ونور عينك ماراح فكري لاي ماضي واني وياك لا لايام الجامعه ولا لايام الخوال ولا لاي شي
اني احترمك خالد بكد مااحبك واحسبلك حساب كل شي ومستحيل افكر بيوم بشي بعيد عنك
انته اخذتني قطع متنثره وركبتني من جديد خليتلي اسم وحياه جديده مابيها بس انته وكل شي يسعدك واني هيج مشيت عمر جديد وياك ومالتفتت وراي ابد
لانك دائماً ماخذ عقلي واهتمامي
ومن ماحجيتلك بالموضوع هذا ولا مره
فالسبب لاني من عرفتك جنت متزوجه
عيب على المره تذكر اسم رجال غير زوجها كدام الناس حتى لو صديق او اخ عيب هالشي ثكيل وماينفهم صح ولا اني عندي هالجرأه واحجي هيج شي كدامك
واني بعدني غريبه بينكم مو صحيح عيب وصعب تنحجي ! ؟
- اييه صح
- فبعد لا تلومني ليش ماحجيت هو دفتر ومسدود قبل لا ينكتب بي شي وهو صح سمعته يكول امي وامي لان هو مابيوم صاحلي باسمي كله يصيح امي واكيد هسه يستحي يكول اسمي وصاحني هيج
- بس تين انا تاذيت من جيتو صح انا رحبت بي وسايرتو بالحكي وتصرفت بهدوء بس ما عجبتني جيتو ابد عطيتو حك الضيف مو اكثر ولا انا اول ما

خابرني ومشيت كابتلو وحكالي اريد ادحكها كضبتو من قميصو قلتلو
ول حرمتي هاااذي حرررمتي
كعد يترجاني ويحكيلي احسبني دخيل عندك ولاتردلي هالطلب
وللعلم انا ضربتو على فكو لان ذكر اسمك
- يااا عزاا
- اييييه ايييه ضربتو ماتحملت يذكر اسمك وهو غريب .. والحلو بالسالفه انا اضربو وهو يتعذر ويترجى واخر شي
اخذتو وحدرت للبيت قلت خلي ادحك رده فعلها وافهم لو كانت ضامه شي عني
- ياا خالد والله فاجئتني متعاركين وضاربه وجايين هنا تحجون كله تسلم والله يخليك ويحفظك وكانكم اصدقاء
- انا اجاملو وهو يجاملني واثنينا نفهم هالشي بس الاصول هالشكل تقتضي
- هسه يعني راح تكوله على العمليه
- اييه لزوم احكيلو عجل ماسمعتي خلاها امانه بركبتي يعرفني اطنشو واخليه يحلم
يعتب الباب بس هو كضبني بهالامانه
- حبيبي لا كلش تحط بالك وياه اعتبره شخص عادي من كرايبي وانتهى شتريد منه يعني هو رجال شكبره هسه وعنده عائلته ويجوز هسه عنده احفاد تكعد تغار منه !
- يخسى مااغار منو اناا يولو انا اغار عليكي افهمي فرق هيين فرق
- هههه مفهوم حبيبي مفهوم
هسه متصافين
- ليش احنه نكدر نتخارب !
- يابعد عمري والله اخسر الدنيا كلهه هينه بس انته لا .. خالد عمري بدا وينتهي يمك مو تخلصه بالزعل حباب
- هههه ول يابه نتدلل

ضحكت وتلمست وجهه بوسته وضليت اشاقيه بالكلام واتناسى وياه هالسالفه
وكدرت اخلي هالليله تعدي بسلامه
ومااخسر حب واحترام الشيخ ..

ثاني يوم نزلنه سوه ووجهنا مبين عليه الراحه وغاليه نبصت فوك راسي شكو شصار وشلون تصالحتو وشحجيتو
واني اسكت بيهه لحد مارزلتهه يلا سكتت

من استلم الشيخ فلوسه اخذني ثاني يوم للدكتور حددنا العمليه وسواهه الي نفس الدكتور الي سوه عمليه الشيخ
وايوب كل يومين يخابر يسلم على الشيخ ويسأل بس شوكت العمليه ويسده وبيوم الي سويت العمليه عرفت من الشيخ ان هو جاي مسلم عليه بالمستشفى وضال لحد ما طلعت يلا راجع ..

ثالث يوم الي على العمليه اجوي العصريه زارونا ايوب وعائلته
كدرت اشوفهم هالمره واتمعنت بشكل ايوب ...
متغيره ملامحه هواي .. سمنان وجفن عينه نازل ومصغر عيونه .. خطوط التجاعيد بارزه من يم عينه وبين حواجبه
مبين صابغ شواربه لاني اعرف لونهن اشكر فاتح مو بني طوخ مثل هسه
جان لابس دشداشه نيلي واليشمغ الانباري .. حسيت كأنه منتقيهن بعنايه
لان كشخه طالع بيهن ...

جنت لابسه مناظري بس اتمعن بشكل كل واحد منهم ..
شفت زوجته حلوه ومدبدبه ملامحهه حاده
ومعتنيه بنفسها لابسه جبه تركيه جوزيه وذهبها مكثرته بايدهه ...
وانتبهت لزوجته الثانيه ام اسامه
مره مبينه على كد حالها .. ماناقصنا شي من جمال او ترتيب بس مبينه اهدأ من ام سالم ..
واسامه يبادلني الابتسامه كل شويه
ومبين الخجل عليه ...
شاب طويل وصاحب جسم مرتب وانيق
كلشي بي يلمع حتى كصته وتحديد لحيته من بعيد مبين نظافته وعنايته بوجهه
ابيض بس مو بمثل بياض ايوب ماخذ من بياض امه على صفار مو احمراني
وعيونه عسليه مو زرك مثلهم ..

من سلم عليه قدملي علبه سوده مربعه ومزينه بشرايط ذهبيه وامه قدمتلي علاكه كارتون وبداخلهه علبه وام سالم قدمتلي هم علاكه كارتون جبيره ..

تعرف عليهم هالمره رماح و حسين بس جراح من عرفهم يجون كبل طلع بدون اي كلام ..

قدملهم عباس الضيافه وضلو كاعدين يسولفون وايوب ماخله عينه عليه ابد
بس الشيخ اعرفه حذر وياه حتى بالحجي
ومن ديطلعون بقى ايوب شاور الشيخ
والشيخ انكلبت ملامحه ..

اخذ اسامه النسوان وطلعو واجاني الشيخ وايوب سألني ..
- ام غاليه هسه اريد منج جواب بخصوص زواج اسامه من بنتكم

باوعت للشيخ وهو رافع تك حاجب عاد اني كلتله ..
- لاا ما موافقه على زواجهم
وماانطي بنتي لاسامه
- شنوو !!!! ليش يالله ليش شنو السبب ليش ترفضونه
- مو لقصور باابنك بس احجيهه الك بكل صراحه .. اني ماانطي بنتي لواحد مرايدهه من كل كلبه
وهالزواج انته الي تريده مو ابنك وانته الي سعيت بي وتريد تحصله بس ابنك يجوز مقتنع بي مدامه راضيك مو رايده من كل كلبه وهالشي يخليه بعدين بمرور السنين يحسهه عاديه ويجوز يلكى الي يريده يم غيرهه
- ووول يابه انتي شتحجين اسامه هو الي حجالي عليهه يعني غير رايدهه ابني هاي اول مره يقرر يخطب بنيه
- ماشفت منه هالشي الي شفته ابن طايع اهله بخطوبه تقليديه وعادي السالفه
اني بنتي انطيهه للي يدفع عمره الهه
بنتي غاليه ياخذهه الي يتعب حتى يحصل ثمنهه
.
.
يتبع

#شقراء_بغداد


الجزء_الثاني_بارت_١٥


يوم جديد يبدا بأمان على علو صوت اهلي واخوتي الي كلها تصيح ..
ول غاااليييه راح يأذن الظهر اكعدي عاد ..

اكوم من الفراش واباوع الساعه توها ثمانيه ونص واعرفهم هسه مخلصين ريوك واشغلاهم وضالين يتصفنون ويريدوني حدرهم يصخروني هين وهين حتى يكضون يومهم ..

اول مااصبح بجدتي ابوسها وهي تعيدلي هالجمله نفسها من ١٥ سنه ...
صباحك عافيه يابنيتي ماشبعتي نوم
اكو بشر يضل نايم للحين واهلو من طلعه الفجر همه صاحين ! ماتحدري ادحكين امك وش تحتاج تساعديها بكرا تتزوجي ماتلاكين هالدلال ونوم الظهاري

وانا اجاوبها ...
الاكي جدتي انا مااتزوج حتى الاكيه يتحملني انام للظهاري

تكعد تصفطلي بالنصايح وترجع بالسنين لايام جدي الله يرحمو وتعبر على ايام ما زوجت ابوي وتقارن بالزمان والاجيال وانا امشي اصبح على امي وادحك وجهها المورد وبسمتها بدكه الحنج هاذي تسعدني بيها ..

امشي حتى احضر ريوك الي وتلاكيني عمتي ام جراح وتحكيلي ..
خوفنا من بنات هالوكت كلو اكل ونوم مادحكوني مازوجت ولدي للحين اخاف اجيبلي جنه اصير انا اخدمها

اطنش واطنش لانه معتاد هالحكي الا من امي تحكيلي ..
بنيتي احنه نضوج من انتي ماكو يمنه فنكعدج ولا احنه شعدنا هو طبخ وتنظيف واني وعمتج نسويه اكعدي انتي ارتاحي واكلي على راحتج حبيبتي

هي الوحيده تخليني اتبسم بهالصباح
واكل براحه واضل انا حدرها كل اليوم
الشغله الي تريد تسويها انا اسويها بدالها
من يوم ماامي تعبت عيونها وانا تعودت اخذ مكانها بالشغل واتعلم منها الطبخ
وصرت اضبط على حسين باكلاتي
واغيضو والهي نفسي بتحضير الحلى
مثل الي بالنت حتى اخذو لجراح اول مايعاود من شغلو وادحك رأيو ودايماً هو يشجعني ويحكيلي طيب وراح يصير اطيب بس تسوين كذا وكذا
اما حسين مابيوم حكالي هذا زين الا يطلع بي فد عيب ويضل يحكي بي ويقلي اكلو غصب عني الجوع ظالم ..

امي تكعد حدري بالمطبخ وتعلمني كل خطوه شلون لازم اسويهه واضبطها
وبهالشكل تعلمت الطبخ وصرت احبو
واتابع قنوات طبخ بكل برامجي

انا ماعندي شي يلهيني .. حياتي فارغه
عباره عن طلبات اخوتي وعنايه بنفسي
مليت من المنظره وترتيب الشعر واللبس
وكرهت لبس الاكسسوارت بكل انواعها
احس تشبعت بهالشي وصار ملل وروتين

انا من اول ما شبيت احب الغوى
البس الصبح شكل والعصر شكل ومن انام هم لبس شكل واتعطر كل مااصعد لغرفتي او ادخل غرفه امي وشعري احير شلون ارتبو .. الصبح اظفرو العصر افتحو وعندي اشكااال والوان القراصات والمشابك للشعر من الفضيات للذهبيات للملونات امي ماتخلي شي بالسوك اذا مو تخليه عندي ... وانا استخدمهن كلهن
وطوال اليوم انا متأنقه ..
عندي ذهب صندوك مربع كامل كنت
اغير الكلايد ويه نوع لبسي وش يرهم طويله او كصيره خناكي او سبحه
والاساور نفس الشي ادحك الي يرهم شنو والبسو والحجل ماتخلى رجلي منو
حتى من تخيطلي امي ثوب اوصيها طولو فوك الحجل بشبر حتى ابقي حجلي بارز ...

الحين من كبرت كرهت كل هذول صرت ادحكهم مالهم داعي ان لبست وتانقت وان كعدت بكفشتي وش الي يتغير !!! بكل الاحوال انا بعين اهلي حلوه ومحد يهمو هالاتكيت الزايد هذا ..

كنت ادحك البنات بالانستا هواي يطلعون ويه صاحباتهم او خواتهم او حتى يحضرون اعراس ويصورو هالحدث
وينشرو او يتذكروه بعدين .. انا حيل
انقهر هين .. مابيوم بعمري حضرت عرس عدا عرس خالتي الي حضرتو بصغري وماذكر منو شي غير حكي امي عنو .. ولا عندي صاحبه اكدر اطلع واتمشى براحتي وياهه ولا ندخل مطعم او سوك او اي شي خلصت شبابي وحدي

اجتي ايام توسلت بجراح يخليني ادخل دورات اتعلم لغه او اطور نفسي بالتصميم وهو ينهي الحكي بكلمتين
مايلزمك هالشي واخاف عليكي من العين
هذني اجوبتو لو لحيت عليه ..

صحيح تعودت البعد عن حياه الشباب بس تضل بصدري لهفه اجربو .. اهلي خوفهم ازيد من اللازم والعذر انتي وحيدتنا

الشي الوحيد الي مخفف هالوحده علي همه اخوتي مونسه نفسي بكربهم وهمه
يحبوني من كل كلبهم ومراعيني ما منهم احد يعاود للبيت بدون مايذكرني بشي
عدا حسين الي يشلع كلبي ويخليني انهار باعصابي عليه يلا يحدر يراضيني بالشغله الي جايبها معو ..

هالروتين والاطمئنان بمجرى حياتي كسر عليه طاري الزواج وسالفتو الي من يوم الي دخلو بيت ابو سالم بيتنا مانسدت
ولا خلصت الاراء عليه ..

جدتي تصيح تزوجي وعيشي حياتك خلي يصيرلك بيت وعيال التهي بيهم
عمتي تصيح تاليتك مثل عماتك كبرن وعيالهن يادوب هالطول
ابوي يصيح مدللـه انتي بكيفك تخيري
واخوتي كلهم لااا ماكو زواج حتى حسين معترض على الزواج
وامي تحكيلي بعد هالسالفه مانسدت
احكيلها ليش يمه انتو مو رفضتوهم
تحكيلي هسه بدا الصدك يابنتي ان رجعو ننطي وان مارجعو نسدها بذاك الوكت

مافهمتها ليش ترفضهم وكت الي يتوسلون بيها وتنتظرهم يرجعون بالتالي!؟

البيت كله يتمنى يصير عدنا حفيد

طفل يتونسون بي وهذا الي يصيح اريد اصير عم وذاك يصيح الخال ويطلع ثلثينو علي وجدتي تصيح مشتاكه لتعب الربى وابوي يصيح وينو الزلمه منكم الي يترس حضني بابنو واشم ريحتو بريحه ضناه ... وكلها تتمنى الحفيد ومحد مننا يرضى يتزوج كلمن يحكي للثاني انته تزوج بالاول ويطلع عذر لنفسو ..

العصريه من ساعه ٤ انا انجضع بغرفه امي واضل اكلب بالتلفون وبهاليوم وصلني اشعار اعجاب بمنشوري على الانستا ..

انا كنت ناشره فيديو على الاخو وكاتبه اسم جراح عليه .. وصلني عليه اعجاب من حساب اسامه ..

بالعجل كعدت وقلت احنه مابينه متابعه عجل شلون ؟
هذا يعني هو يتصفح بحسابي !!!
دخلت على حسابو ودحكت منزل صوره
بنت منقبه وكاتب ..
' قُل للمليحهِ بالخمار الاسودِ
ماذا فعلتِ بناســكٍ مُتعبدِ'

ضحكت من قريتها ودخلت على التعليقات قريت كم واحد كاتبلو ..
منو هذا المتعبد؟؟
والثاني راد عليه ..
عوف صاحبنا عاشك وضاربه عنده
وواحد غيرو معلق ..
ابتعد عن الدين رجاءاً اعشك بعيد من هنا

ضليت اضحك على تصنيفهم عليه
وقلت الظاهر هو والدين بعاد واصحابو متفاجئين ...

ضلت هالسالفه كل اليوم بالي وصابني الفضول ارجع ادحك نزل شي ثاني بحاسبو لو لا ؟

وتالي الليل هم دخلت على حسابو دحكتو منزل صورتو بالسياره وكاتب ..
' آدم لا تكملهُ الا حوا '

سديت التلفون وغمضت عيني وضلت بالي سالفتو تضحكني من دون قصد .

ضليت اتكلب وماجاني نوم فكرت انزل شي بحسابي وادحك راح هم يدخل عليه او لا ؟

ونزلت صوره على الوالدين وضليت اتصفح وادحك بالايكسبلور واجاني اشعار الاعجاب بهالصوره ..

ضحكت وعجبتني السالفه وحسيت بحماس عليها وضليت كل يوم انزل شي وادحكو ينعجب بي ويروح بعدها بدقايق
ينزل شي بحسابو ...

صار متابعه حسابو شغلي الشاغل كل يومي .. اكثر شي ينزل صورو ويكتب شي عليها ..

واول ايام العيد نزل صورتو بس بغير بلد
مبين الي حواليه كلهم اجانب وكاتب ..

' ياليل لندن لو خفت كل الانوار
وفز يتفاخر كل ساقط بفنه
وقتل هدؤك بالصخب صوت قيثار
ورقص النساء الطايشه والمسنه
واليا ترامت هالعشاشيق بالبار
حَن بدوي يطرب لهيله و بنه
قلبي مع الي له مواعيد واخبار
كل النساء العاريه ما غونه
البال بيته !! واكثر الناس زوار
ونفسي وحش لكن معه مطمئنه '

ضحكت هالقصيده انا اعرفها لاحمد الردعان طلع يسمعلو !!!!

بهاليوم ابوي عندو ضيوف والتهيت بالمطبخ لحد الليل يلا كضبت تلفوني
ودحكتو منطي اعجاب على منشورات قديمه بحسابي وانا صرت افهمها هالاشاره يعني ادخلي حسابي
رحت دخلت حسابه ودحكتو منزل صوره بالاسود كلها ومكتوب بالابيض

' تمنيت عيدي هالسنه بحلقه وهلاهل والف مبروك '

ماعرف شصارلي من قريتها حسيت ببروده نملت اطرافي وبالعجل سديت التلفون وما كضبتو بعد .. رحت اسبح وكل شويه اتصفن واتذكر هالكتابه
شلتو من بالي وقلت بعد ابطل هالسالفه
ومااكرب حسابو ..

وعديت اربع ايام وصرت ادحك يطلعلي بحساب عباس و رماح دائره حمره وادخل عليهه تطلعلي منشورات شألتهم
حكولي هذا ستوري وعلموني كيف يصير ..

عاد ضلت بالي ادخل حسابو ادحك منزل شي بيها ؟ او لا !

دخلت ولكيت منزل ..
' على ارض الوطن ' ومنزل صوره راس الطياره من داخل ..

ضليت كل كم ساعه ادخل ادحك شمنزل
وادحكو ينزل صوره الغدا او يدو ام الساعه وهو كاضب جنطه السفر الصغيره ..

و لاخر الاسبوع بالليل وصلتني منو رساله دخلت عليها ودحكتها بس فيديو
ولزوم افتحو ..
بالعجل مشيت لغرفه امي وكلبي يدك سريع وقفلت الباب وكعدت وفتحتو
طلع تصوير اله وهو كاعد بالسياره ويحكي ويه كل كلمه رفعه حاجب او يعيد ويأكد بالكلمه وكان كلامو بهالفيديو ..

كون المفارك حبيبه يرد عليه
ونبض كلبه يسولف الصار بجفاه

وكلمن يحب من طرف ولفه يجيه
وبوجهه يترس غيرته وتمطر سماه

حضنه العشاك مابيهه حرام
اليحب من محبوبته يفصل غطاه

كون والمسافر نفس ما يشتم غريب
متاع للغربه اليحب ياخذ هواه

اليحب من طرف واحد مايكفي ليل
رمشه بكل حلم يخطف يشده

ماعرفج وجني مفاركج عمرين
واسبك للهوا الي بي جدمج تعدا

العاشك يختنك لو طاري فركه يفوت
الهوا الي ما مر حبيبه بريته يخنكه

وين يضم فشلته اليحب من بعيد
الدمع عايف حجي وسوالف بخده

يبس حضني اريد اتلاكه ويه الغيم
البي حركه العاشك كلبه شيبرده !

بالعجل ذبيت التلفون من ايدي وضليت اتمشى بالغرفه وبعدين مسحت المحادثه
ونزلت رحت لغرفه جدتي فرشت ونمت وضليت اتذكر شكلو وصوتو وهالكلمات
صرت احس يأثر بيه بهالنبره مدري لاني اول مره ادحك رجال هالشكل واراقبو
بس ليش هو يرسلي هالشي مايخاف لا احد من. اهلي كاضب تلفوني ويدحكو بدالي !؟

اكلت الافكار راسي واخذت التلفون دخلت على حسابو ودحكت الستوري
منزل نفس الفيديو وبعدها منزل محادثه لصحابو يحكيلو ..
منين هاي صارلك ٣ اشهر ذبحتنا
بالاشعار عليهه
وهو يردلو ..
اريدهه تحس بيه
وصاحبو يحكيلو ..

اووول مره تصير مااصدكك ولك الا اشوفك وجه بوجه وتحجيلي خاف تضحك علينه وادور طشه
رجع هو يردلو ..
والله رايدها والله

لحد هين منزل وكاتب عليها
' صدق او لا تصدق اسامه واكع بالحب '

ضحكت وحسيت بخجل ..لفيت راسي بالغطى وضليت احاول انام ويرجع هالكلام بالي وافكر احضرو حتى مايضل فكري عليه وارجع اغير رأيي وضليت على هالحال كل يوميه ادحك حسابو
وهو ينزل بالستوري ..
' هي نظره وبيها وكفت سنيني '

ودائماً ينزل صوره البنت بالنقاب ويكتب
' عقلي عند ابو الثياب السود '
او يكتب على نفس الصوره ..
' امرأه لا يستهويها احمر شفاه او جفنين كأشاره مرور ملونه ولا اظافر ساطعه
مكتفيه بجمال العقل ورُقي السواد على ثيابها هي كل مااريد واهوى '

ضلت بالي سالفه ان هو شلون يتاكد انا ادحك كل شي يكتبو ؟

رحت سألت حسين قلتلو انا شلون اعرف منو يدحك ستوري الي انزلو ؟
حكالي من هين مبينه ..

وانا بساعتهه لطمت على وجهي وقلت هذا الحين يعرف انا اتابعو وادحك كل شي ينزلو ..

ضليت اليوم كلو انا اغم بنفسي والومها
صرت ماادخل على حسابو ابددد
واخذتلي خمس ايام مادحك شي منو وبالويل كاضبه روحي عنو اتحرمص على شوفه الستوري والمنشورات واكابر
تالي هو ارسلي منشور من صفحه مكتوب بي ..

' منشن لصاحب احلى عيون عسليه '

ضحكت من كل كلبي عليها وضليت كاعده وادحك للصوره وافكر اكتبلو شي او اطنش ؟؟؟

تالي بعد حوالي نص ساعه هو ارسلي ..
' غاليه '

حسيت بساعتها كلبي يدك بكل جسمي
ورجع كتب ..
' اتمنى انطق اسمج واسمعج تردين عليه
اني ادري لو اضل عمر اراسلج ماتردين ولا تهتمين بس اريد احاجيج تره داالوب عليج يابنت الناس '

انا من ادحك الكلام يصير بالحب والاحتياج بالعجل اتخوف واسد التلفون
اخاف اتورط بشي اكبر مني ونفس الوكت ماكدر اسيطر على نفسي واتجاهلو ..

مسحت المحادثه ولهيت نفسي حتى مافكر بي بس امي حسيتها بدت تنتبه على تغيري .. وصارت تحكيلي ..
- اشوفج هالايام كاضيتهه صفنه
- عادي يمه من الملل
- تريدين نطلع زياره تغيرين جو شويه
- كيفكم يمه دحكي اخوتي اذا يقبلو نروح
- زين بالليل يجي ابوج واحاجيه
وهو يخليهم يقبلون غصباً عليهم
- ايييه انتي مسيطره

ضحكت امي وقلتلي ..
- يجي يوم وتسيطرين مثلي

بالعجل راح تفكيري عليه وتخيلت لو ان علاقه امي وابوي اعيشها انا وياه واصير مثل امي الحب ينقرا من عيونها
بس بعدين تخوفت وشلت هالتفكير من راسي ..

ثاني يوم امي كعدتني بالسبعه الصبح
وقلتلي حضري نفسك راح نطلع نزور كربلا اليوم ....

بالعجل كمت سبحت ولبست وطلعنه انا وجدتي وعمتي وامي وابوي ..
كانت نفسي محتاجه هالزياره وبالاخص هين اتمشى براحتي حدر امي اخوتي مو هين واحسهم يحكومني بنظرتهم حتى لو ماشيه حدرهم هم احسهم راح ينفجرو بوجهي ساعه الساعه ..

زرت ودعيت ربي يهديلي راحه البال
ويحفظلي عايلتي واخذت صوره لابوي
بين الحرمين و صوره جماعيه الهم
و رحنه انا وجدتي نتمشى وحدنا بالسوك
ونتسوك براحتنه .. جدتي نفسها طيبه
تمشي وتذكر بكل واحد من اهلنا حتى بنات عماتي تذكرهم وتاخذلهم اشياء
واهم شي عندها جراح لزووم تاخذلو من كل شي وتخليه فايق على اخوتي بالهدايا
جدتي تعشكو لجراح تعشكو وهو ما ينام الا حدرها من وكت كنا بحديثه هو عندو غرفتو فوك مخليهه بس منظر ومنزل ثيابو بكنتور جدتي وفراشو حدرها ينام
وهين نفس الشي اخوتي كلهم ينامو بالربعه الا هو حدرها ينام ..

وهي بنص الليل تكعد تتفكدو متغطي لو صاحي لو بعدو مارجع ..

وعندها حر واسر هذول ملعبين ومايمشون او يكعدون الا سوه
يحدرون على جدتي يتمسكنون وياخذون فلوس ويطلعون .. وهي تجيب وتحط بيدهم بهالفلوس ولو يطلبو المليون تطلعو وتحطو بيدهم مادري شلون يقنعوها !!!

رجعنه من الزياره ونمت وارتاحيت لليل وكعدت اسولف لجراح على كل روحتنه
ماكدر اذا مااحكيلو كل شي بس صرت احس بشي يأنبني اني ماحكيتلو على اسامه .. احس حتى خجلانه منو ومتخوفه وتلفوني ساعه مايحدر جراح البيت اسويه صامت وادحسو بين الفراش ولو اخبصهم بالحكي حتى مايسأل عنو لو امشي اشغل نفسي بشي بالمطبخ ...

اخر شي ماتحملت هالخوف والضمضمه
وتجرأت حتى احكيلو ما يراسلني بعد
ضليت الليل كلو اجمع بالحكي براسي
واضبطو والصبح من طلعو اخوتي
صعدت بغرفه امي وكعدت قلت هالمره اكفل هالسالفه ماريد شي يخسرني اخوتي وثقتهم بيه ..

دخلت على حسابو وقبل ماادخل على المراسله دحكت صوره البنت المنقبه
من جديد منزلها وكاتب ..

' كالو ترس اذاني انساهه ماتهواك
لتسوي الصنم بايديك وتعبده
كلتلهم اضيع هيبته من اوكف على الشلال
واوصلج وكلشي بروحي يتبدا '

رجفت ايدي وحسيت النفس تسارع عندي
بس تجرأت وارسلتلو ..

- رجاءاً لا تراسل اخوتي ان عرفو ما يرحمو خليك بعيد عني

ضليت اهز برجلي وانتظر منو رد وماكو اي رد ولا دحكها وضليت اتمشى بالغرفه وادحك للتلفون وماكو وعبرت ساعه وهو ما مدحكها عاد نزلت وضليت اسويلي شغلتين وارجع ادحك التلفون وعلى هالحال لحد الظهر ساعه ١٢ وصلتني منو رساله ...
' اعتذر اولا على تاخيري بالرد
جنت راحع الفجر من الشغل ونايم '

ضليت ادحك على الرساله وهو رجع رسل ..
' هسه همزين حصلتج خلي افهمج شي قبل لا اكطع رسايلي
ولتضلين تشوفين ومتردين اكتبيلي حتى لو كلمه مو احاجي روحي اني '

ضحكت وضليت خايفه ومتردده شلون اراسلو اخاف احد من اخوتي يحدر هين ويدحك بتلفوني ..

رحت بغرفه امي وتمددت على فراشهه وهي كانت تصلي من كملت قلتلها ..
- يمه انا نعست اخذلي غفوه ساعه هين كبل مايرجع ابوي عادي
- عادي يمه نامي براحتج
ماتتغدين ؟
- لاا من اكعد اكل انا وجراح من يرجع
- زين بكيفج

نزلت هي وانا تغطيت وصرت ادحك للمحادثه وكتبتلو ..
- اي فهمني

بالعجل ارسلي ..
- والله ممصدك احاجيج
يابه اني رايدج بالحلال والله ليش كاعد اتصعبوهه عليه

كتبتلو ...
- اظن كلام اهلي واضح
- لاا مو واضح ماانطوني اهلج سبب مقنع يكولولي بنتنا ماتريد تتزوج
وهذا الي مخبلني ليش ماتريدين تتزوجيني انطيني انتي الجواب
اريد اعرف منج
اذا بالج شي كوليلي
عندج فد شرط على الزواج هم كولي
بس خلي دماغي يصفى تره تعبت شلون اوصلج واني والله حتى مراسله بهيج طريقه مااريد لان ادري انتي شنو واخاف احرجج واسببلج موقف محرج ويه اخوتج
بس مضطر والله شلون اوصلج وانتي
محاوطينج بسبعين سور

ضليت صافنه على المحادثه وبعدين هو كتب ..
- بس فهميني شنو الي تريديه ومعتب اذا مانفذته

كتبتله ...
- قبل كل شي اريد اسألك
- اي اسألي احجي اي شي
- ليش تريدني ماارفض الزواج
- تدرين ليش
-اي
- لانج تفكرين هيج اني اريدج ماترفضين هالزواج
يعني لانج دائماً تبينيلي انتي غير عن الكل اني اريدج
ومو بس هاي
اني حبيتج والله بكل خطوه اخطيها احسج كبالي واسمج يتردد بالي
غاليه غاليه غاليه هاي اني اربع وعشرين ساعه يدك اسمج بالي
هوااي شغلات هوااي لو تنطيني مجال احجيهه تصفنين عليهه والله
هسه اني جاوبتج وحجيتلج هواي وانتي ماجاوبتيني
شنو الي تريديه حتى توافقين

ضليت افكر وافكر بعدين كتبتله ..
- موافقه اهلي
- ههههههههه ياايابه يابويه
اروح لاهلها يكلولي موافقه البنيه
اجي للبنيه تكولي موافقه اهلي
شلون بيكم انتو شلون

خربت من الضحك ساعتها وضليت ادحك للمحادثه وهو رجع رسل ..
- اهلج شلون بيهم
اجيهم باجر والله اجيب اهلي واجي
- لا لتعب نفسك لان اخوتي مايرضون اتزوج
وانا احكيلك هالشي حتى ماتضل بأمل
تره اخوتي مايرضون والله وهالموضوع عدنا منتهي
- منتهي عدكم مو عندي منو من اخوتج الي مايقبل ؟
-كل اهلي مايرضون رجاءاً اكطع هالسالفه وانساها
- هسه الحل والربط عند اخوتج مو
- اي
- زين
بعد مااراسلج وانتي امسحي المحادثه
و تسمعين اخباري ان شاء الله

مارديت عليه بعد ومسحت المحادثه وضليت اتصفن وافكر بسالفتو
بس ارتاح كلبي الحين مااضل خايفه منو

ورجعت حياتي هادئه مثل كبل بس ضل بالي واتذكرو لحين ما بيوم واكفه بالمطبخ احضر الجاي لابوي ودخل جراح من الباب صاح ..
-غاليه الجاي بالعجل

حضرتلو الاستكان واخذتلهم الصينيه وطلعت وسمعت ابوي يقلو ..
- مبين مو بهداوه كل يوم خيرك

انا سمعت بينهم سالفه بالعجل وكفت اتسنط بس اخوي ذيب ماتفوتو عوايدي هاذي بالعجل صاح ..
- غالييه سدي الباب يلا

برطمت بوجهو وسديت الباب ومشيت وضلت بالي سالفتو قلت خلي اتسنط من وره الباب .. رحت وخفت لا تبين رجولي وكفت حدر الباب واسمعو يقلو ..

- يابه ماارتاح لهالسالفه انا ماتنهضم عندي
- ول هي هاذي سنه الحياه تريد انته تحرفها !! انا كنت مثلك بس كنت اطول حتى اتخيرهلن الزين مااسد النصيب خير شر مثلك
- يابه اعرفو الولد زين وهو صارلو يومين يحوم فوك راسي بس انا ما ابلعها لسالفه زواجها
- دحكتو ؟
-اييه البارحه واليوم
-اييه وشحكيتو حدر وحدو لو هو وابوه
- لا وحدو دحكتو صاف سيارتو هين بالفرع وينتظر طلعتي من الصبح
واول مامشيت خطوتين هو نزل وسلم علي ورديتلو السلام حكالي خلي اوصلك ونحكي بالطريق ماريد اعطلك عن شغلك
وصعدت بسيارتو وصار يتشكر مني لان انطيتو مجال نتفاهم وحكالي
انا ماعرف شنو الي اريده من جيتي عليك بس هي نيتي وحده وحرت شلون اوصلها
و سمعت انته بيدك رباط السالفه ورايد اعرف الي تريده وسبب رفضك وحاضر بكل شي تطلبه

ضليت اعض بايدي واضرب على وجهي واحكي ياويلي انتهيت جراح اليوم يذبحني من وراه

اسمع ابوي يحكيلو ..
- وشقلتلو انته
- قلتلو مانطالب بشي احنه مالنه نيه بزواج بنتنا
رجع يحكيلي .. مايقنعني هالشي احكيلي شي اسويه حتى احصل نسبكم انطيني فعل اتعب عليه لاتصدني باول كلمتين
عاد قلتلو هذا الي عندي وضليت ساكت وهو يعددلي شنو الي يقدمه لاجل هالزواج وانا طنشتو لحين ماوصلت شغلي وسلمت عليه ونزلت

- هههههه هذااا امو داعيه عليه تدحكو مامحصل رضاهه ووكع بيدك
- يابه انا عايز دوخه راس البارحه احكيلو مالنه نصيب وتوفق بحياتك غيرنا يتمنوك ادحكو اليوم الظهر حادر على المحل وبيدو الغدا وكعد فرش الاكل وتسالم ويه العمال واحرجني كدامهم
حتى اكل وياه واحنه وناكل يحكيلي
بكرا انا مسافر وانطيك اربع ايام تفكر وارجعلك تنطيني شي اسويه وتوافق بالزواج تره اضل مكابلك وين ماتروح

ضحك ابوي بعلو صوته وجراح مترفز ويحكي بعلو صوته ..
- والله اخليه يحلم يعتب الباب ويدحك خيالها والله لااخليه يصيح الويل
عجل انااا يتشرط علي اناا وبمنو باخيتي ! يحلم بيها يحلم

شردت فوك عند امي وكعدت احكيلها الي سمعتو وهي بس صافنه عليه بعدين قلتلي ..
- سدي هالسالفه وتصرفي كأنج ماسمعتي شي مفهوم

تصرفت مثل ماوصتني ونزلت وكأن كلشي عادي بس بالي على هالشي
واحسبتهم اربع ايام ودحكت منشور منزلو صوره على طريق بري وكاتب
' ياحلو المملكه '

قلت اييي بعدو مسافر تطمنت هاليوم
وثاني يوم دحكت جراح راجع متعصب بالعجل عرفتو حدر عليه ..
رحت دخلت لحسابو تاكدت هو راجع من صورتو بالستوري منزلها ساعه ٣:٤٠
وكاتب كلشي ' يهون لاجل هذيج العيون '
ومبين الصوره بالمطار عرفتو راجع هالوكت وملحك على جراح

مااعرف افرح او اخاف من الي جاي
بس القلق مايفاركني وكاضبه كلبي بيدي مادري شنو السبب هو انا مامسويه شي وادري بيه مايحكيلو لجراح احنه تراسلنه
بس الخووف دمرني ..

واريد بس افهم شنو الصار بينهم
وماعرف شلون !!!!

اخذ شهر على هالحال ودخلنه التاسع
طلعت نتيجه حسين ناجح و معدلو ٨٣
امي ساعتها عينها دمعت من الفرح وطشت الجكليت عليه وحضرت الكيك بليلتها ووصت عباس اشترالنه الحلويات من بره وكضيناهه حلو بهالليله بمناسبه نجاحو ..

وره يومين العصر نزل حسين وبيدو تلفون ايفون 6 رصاصي جديد وحدر خلاه بنص وجهي ويحكيلي ...
- دحكي دحكككي هذا ايفوون ايفووون هديه يابعد عمررري هديه
- ايييه صرعتنا هو كلو تلفون
- عندك مثلو دحكيه بطول خشتك
- خشتي اصغر هذا بطول بوزك
- بوزي وخشتك نفس الطول يالطولك طول نخله وعقلك عقل صخله

عليت صوتي عليه وامي بالعجل حدرت وتحكيلي ..
-على كيفج ويه اخوج اكلتيه وشربتيه بلسانج شكو شجاج
- يمه انتي ماتسمعين يقلي صخله ! عجل انا اكبرو بالعمر مايحترم
-ايي يشاقه وياج شبيج متتحملين شقه
- لااا هو متكصد
- اييه يمه هي لان تدحك نفسها صخله ضاجت هو كلام الحك ينزعل منو
-هااااا سمعتي سمعتتتي

ضحكت امي ولوت اذانه وتحكيلو ..
-عيب ابني عيب هالحجي
- يلاا اختي عيب بعد ماعيدها عيب امي حكتلي عيب اسكت انا بعد ادورلك اسم غير صخله
-يمممممه ابنك يجلطني والله موتي على يدوو

تاخذو امي وهي تضحك وتخليني باعصابي اصيح وراهم وهو يأشرلي بالايفون ويحكيلي ...
-حكك الغيره حركتك مالومك ضلي صيحي ضلي

يخليني اختنك باعصابي اروح اطلع حركتي بالشغل وادردم وجدتي وياي ترفع وتكبس بالحكي ...

عرفت ان امي موصيه ابوي على هديه لحسين وموصيتو خصوص موبايل جديد حديث يدخل بي الكليه وابوي مختارلو الايفون كان هالسنه نازل وبعدو غالي
وهو شايل خشمو علينه لان عندو ايفون

ابوي وجراح راحو لحديثه وضلينه مشغولين البال عليهم ودايمين الاتصال بيهم وهمه يطمنونه الوضع زين ومسيطر عليه ...

بفتره ما همه بحديثه راسلني اسامه
كتبلي ..
' غاليه اخوج يحب الازرق لو الاسود
جاوبي بسرعه '

تفاجأت بسؤالو وكتبتلو ..
- الاسود
- زين شكراً

راح وردت اسألو ليش دحكتو مامتصل وترددت قلت مافتح مواضيع احسن ..

اسبوع وعاودو من حديثه وجراح يطمنا على بدايه السنه ان شاء الله نعاود لحديثه

يوم والثاني من رجعتهم عاود جراح ومعو علبه سوده مستطيله وعليهه شريط رصاصي .. بالعجل انا سألتو ..
- شنو بداخلها ؟ منين جبتها؟
- اسرار مايصير يضل عندي سر
-لااا الاا عن غاليه ماكو اسرار
-هههه هاذي من ولد رايد صحبتي
-هااا

تبلعمت هين لاني عرفتو اسامه صاحبها
وضليت ادحك عليه وهو يفتحها وطلع بداخلها مجموعه عطور الشيخ زايد
اول ماشم وحده منهم قال اصليه
ضحك وحكالي ..
- ارجعي رتبيها بكرا ارجعها لصاحبها
-ليش
- اكره الهدايا

تركها عندي ومشى وانا بالعجل رتبتهه مثل الاول وضليت ادحك للغلاف اسود
اثاريه هذا الي كان يسألني عليه .!!

واخذها معو ثاني يوم بس رجع وهالمره شايل قفص ذهبي مدور وبي بلبل
شايلو بيد والثانيه علبه العطور

ضليت مكابله القفص وكاعده ادحك للبلبل
وابوي يسألو منين هذا يحكيلو ..
- هاي كل يوم ادحك بالمحل هديه باسمي
البارحه عطور واليوم بلبل

ابوي ضحك وحكالو ..
-انته حلها

وصاني جراح اعتني بالبلبل اليوم وبكرا ياخذو يرجعو ..
وماعرف شلون كدر يرجعهن لاسامه
وضنيت هين انتهينا بس ماخلص الاسبوع الا و سمعت جراح يحكي بالتلفون وسدو بالعجل وهو يشتم وتحول وجهو احمر سألتو خير جاوبني ..
-انتي بالذات اسكتي ولا تطلعين كدام وجهي

اخذت على خاطري من ردو هذا ومشيت وضليت اليوم كلو مامدحكتو ونمت بالليل كبل مايرجع وهو يكعدني ماارد عليه
لحد ماتعب مني ونام والصبح من كعدت دحكتو بعدو نايم حدري سألت جدتي
عجب ماطلع للشغل اليوم قلتلي متواعد ويه صاحبو ..

انا صايره كل مااسمع كلمه صاحب لجراح اتخيلو اسامه وراح يسويلو كارثه

وبالفعل ما خاب ظني للعصر وصلتني صوره من اسامه سيلفي مصور بي نص من وجهه وجراح وراه وكاضب بندقيه صيد وما منتبه على الصوره ..

لطمت على صدري وانا ادحكهم سوا
انا ادري جراح مايطيقو بس شلون كدر اسامه يقنعو يطلعو سوا هالشكل ؟؟؟!!

ماكتبت شي ولا هو رسل شي غير هالصوره وانا مسحتها بالعجل لان الخوف اكلني اكل من ورا سالفتو ..

من رجع جراح انا تعمدت اطنشو
قلت بلكي يحكيلي شي عن طلعتو
وبالفعل حكالي وهو يتعذر على اعصابو البارحه ..
- يولو والله انا مشلوش بالي هذا واحد اريعن لازك حدري ومامخليني اندل دربي
- ليش شعندو معك
- يريدنا نصير اصحاب واليوم بارزني بالصيد
- هاا ومن الي فاز
- اكيد خويك يولو عجل بيها سؤال هاذي
- ايييه مدام عندك صاحب يحبك ويريد كربك على شنو هالاعصاب ياخيي
- مالك دخل هين انا بكيفي مااهضمو وهو يحرجني الا امشي وياه
- عجل لاتمشي احكيها الو وجه بوجهه احكيلو مااطيقو
- حكيتلو وهو مايرضى يسمعها يطنشها
كل اربع ايام يلزكلي يومين اصير ادحكو حتى بكلاص الجاي الي اشربو لا اخلص منو بتلفون ولا حتى بالشغل
واحد فارغ ماعندو سالفه
يوم يحجز بسينما وتعال ندحك فلم سوا
ول انا صاحبتو ياخذني لسينما ويتذكرني هالشكل ! انا رجال ورراي اشغال مال سينما هي !!!!

ضل يدردم عليه وانا كاتمه الضحكه
وبس راح انا ضحكت من كل كلبي عليه
عجل هذا اسامه مايفك من اخوي ابد !!

حسين قدم على كليه الاعلام ماقنع بغيرها
يريد يصير مصور يحكي هذا حلمي
واريد احصلو ..
وامي تخبلت بساعتها تحكيلو ..
اختك شستفادت من الفنون حتى تستفيد انته من الاعلام

وضلو اسبوع يتناكرون هو يريد يسجل وامي ماترضى لحين ماخصمها ابوي وحكالو امشي قدم انته حر بمستقبلك
انته مسؤول عن تدبير عيشتك ..

وقدم حسين على الاعلام وخلصنه من سيره الكليه ...

وبنص شهر ال ١٢ رجعلنه جراح العصر ايدو مدمايه وينافخ نار ومارضى احد يكربلو واول ماصرخ عليه انا حكالي ..
- لاا تطلعييييين كدام وجهي وليييي من هين
.
.
يتبع

هههه..عمري جم وحده من البنات جربو الشيرة نفس مقادير هالفيديو فطلعت مضبوطة 👇🏻😻
فهي حطته عل قماش وصار اسهل بالازالة ..هسه اوجهلج

#ملوكه

مشاهدة "طريقة سهله لتحضير حلاوه الازالة الشعر في عشر دقائق" على YouTube
https://youtu.be/1Bwl0uww8_4

عيوني عندج جوز ودبس وراشي هذيني يسمن..وكل يوم اكلي تمن او ثريد😅💔 ..
ويوميا قبل لاتنامين سوي هالشراب..
جيبي حليب كامل دسم وموز وجوز واذا تحبين بعد مكسرات بكيفج..خليهن بالخلاط وخلطي واشربي واذا تحبين عسل هم ضيفي

فهذا شرابج يوميا بليل قبل نوم..منا للعيد عود بشرينا🙃



#ملوكه

حبي زيت الورد تكدرين تستعملي
بأي خلطة تسوين ضيفي وياه زيت الورد..من فوائده يرطب البشرة ويعقمها ويخفف من الحروق واكو يستعملو لتعطير مثل هالخلطة☺️👇🏻


#ملوكه

#لتفتيح_المنطقه_الحساسه وتعطيرها

🌸وصفة زيت الورد🌸

المكونات:

ملعقة من بودرة الأطفال – نصف ملعقة من زيت الورد – ملعقة من النشا – ملعقة من الفازلين.

★الطريقة :
امزجي المكونات و خلي الخليط في علبة صغيرة مغلقة وحطيها بالثلاجة فد 3ساعات علمود يبرد
وبعدها دهني المنطقة من الخارج و البسي ملابس قطنية.👍

#اعـاده_توجيـــہ_لتنسون
#ملوكه