#شقراء_بغداد

الجزء_الثاني_بارت_١٠


رجعنه للبيت المغرب وتلكونه بذبيحه
ومن تعشينه وكعدنا نشرب جاي سألت غاليه ...
- جراح شلون صار هالانفجار وليه ابوي تاااذت عينووو بالذات كيف هالشكل ؟

باوعت لجراح وانتظر يحجيلنه شصار
لان اني من خبصتي بالشيخ نسيت اسأل واعرف شلون .. كال..

- ابوي وكتها واكف حدر الساتر الامامي ويحكي مع واحد من الحشد والثاني ضابط من الجيش هو طلبهم كبل يومين بسالفه وحدرو يتفاهمون وحدهم
صارت مواجهه خفيفه وابوي مشى حدرنا يدحك الوضع وبس عبر مكانو بدقيقه وكع هاون وهو انشمر على يمينو
الولد الي حدرو تصاوبو اكثر منو تصاوبو برجلهم بس ابوي وكت ما وكع صارت وكعتو حدر كوم الحطب الي احنه نشعل منو بالليل ونتدفى عليه والظاهر شي منو داخل بعينو

-الحمدلله على كل حال

الشيخ كال ...
- الله لطف لو انا ضال بمكاني كان تنثر لحمي
-لا اسم الله عليك
- جراح يابه ماعرفت اخبار هالرجال شصارلهم بعد هالحادثه
- اييه يابه عرفتهه .. الضابط رجلو متأذيه كلها بالشظايا وابن الحشد هم رجلو و ظهرو والاربعه من ولدنا تصاوبو ببطنهم وفخاذهم اسعفوهم بساعتهه وبعدهم للحين بالمستشفى بس وضعهم مستقر الحمدلله
-الحمدلله ما يستاهلون والله ابطال حرام يناخذون غدر

وراهه بساعه الولد اخذو الشيخ للغرفه
حتى ينام واني رحت وراه ..
هو ميقبل اروح من يمه لو دقيقه واذا رحت كبل صاح تين لو يدز عليه غاليه
فضليت وياه وياه ..ام جراح تسوي الاكل
وتكعد يمه هم تسولف بس هو مايطلب منهه شي لو راد يشرب مي يكولي الي اشربه حتى لو الكاعدين كلهم ولده مايطلب الا مني ...

افرش يمه واتمدد والشيخه صارت تاخذ فراشهه وتروح تنام بالهول يم الولد

اضل اني مرتجيه على المخاد ومخليه راسه يم صدري وامشي ايدي على شعره وهو يكولي ...
- يولو انا الحين ما دحك شي انعميت
- لااا حبيبي شده وتنكضي ان شاء الله ويرجعلك النظر
- ول الموت اهون من العمى
- اسم الله اسم الله عليك لا تكول هيج حبيبي هاي نفسك ويانه كافي واني اصيرلك العين لا تشيل هم ياروحي
- وش كثر تحبيني تين
- ماعندي حد لحبك لو اخليله حد يصير عيب بحقك
- تدرين انا الحين عايش بظلمه كل الي حدري غريب بس صوتك حدري أألفو
وامن بي
- يا روحي انته يمك اني ماعوفك والله
وماابقيك هيج تعاني صدكني اسوي المستحيل وارجعلك عافيتك
- الله كريم الحمدلله على كل حال
-الحمدلله

شلت النظارات وحطيتله قطرات وبوست راسه وبعدين بدلت دشداشتي وطفيت الضوا واجيت تمددت بفراشي وهو نايم على ظهره ولازم ايدي بديت اغفى شويه وحسيت على واحد يمي يبوس بيه ابتسمت اعرفه ابني حسين من ترافته
انداريت عليه وهو يشاورني يكولي..
- يمه انا هم الي حصه مو كله لابويه
- هههه يمه كل شي الك حبيبي شوكت رجعت
- هسه رجعت اليوم بادلت المناوبه ويه الولد حتى انام هين حدرك والله مشتاكلك
وكلشي مافهمت منك
- اي والله حقك صارت جيتنه ركض بركض .. جوعان اسويلك اكل؟
-لاا ماكل ماريد شي بس انام
- يلا لعد جيبلك فراش هنا يمي
- ماريد فراش هين بفراشك انام
-ههه ولك كبرت مايكفينا
- يكفي يكفي

نزع قمصله التراكسود وشال البطانيه ونام على ايدي وحضني وهو يكولي اووف يمه مشتاكلك واني احضنه وابوس بخدوده واكرصهن وهو يضحك جان الشيخ يكعد وكال ...
-تين هذا حسين هين
- اي عيني
- وش عندك هين بهاليل ماتمشي تنام
- يابه مشتاك لامي وحدرت عليها
- دحك امك الصبح الحين ودها تنام
-اي انا هم اريد انام وكلنا نام شنو المشكله
- لااا امشي نام حدر اخوتك ماتدحك امك نايمه حدري ماتستحي انته
- يابه استحي ليش امي هاي امي وانته ابوي وين المستحى بعد
- ايييه دامهه حدري تنام عيييب انته تحط نفسك بالنص كبرت مو جاهل واعلمك

ضل يتافف وكعد واني هم كعدت وهو يأشرلي احجي وياه واقنعه عاد كلتله ..
- خالد خليه ينام يمي اني هم مشتاقه لابني وماشبعت منه حتى شوف ماشوفه كله بالشغل خلي اشبع من ابني شبيك
- عندك الصبح واشبعي من ابنك ما طاير هو ولا انتي طايره وما يدحكك بعد
- ياعيني هسه شنو شبيهه لو بقى يمي
-تيييين
- يمه عجل امشي انتي وياي فوك نام وخلي عمتي تنزل هين تنام حدر ابوي
-لاا شبيك انته وين اروح اسكت اسكت
-ايييي لا هاي ولاا هاي دبري حل يلا
لو انا لو ابويه
- حسييين
- شنووو حسيين !! يعني عفت الشغل ورجعت هين حتى تخليني امشي ! عجل شكو رجعت !!! حتى انام وحدي !!!

ضليت مخليه ايدي على راسي واباوع مره للشيخ ومره لحسين وهمه اثنينهم ساكتين ينتظرون مني ادافع لواحد منهم
واني اريد حسين بس ادري لو رحت الشيخ يزعل وكلبي ماينطيني عليه
وهو مريض ..

ضليت ساكته عاد حسين كال ..
- هااا هسه شنو تمشين وياي لو تضلين هين حدر ابوي
- ابني باجر حبيبي
- ضلي ضلي ماريد شي بعد واني صوجي ورجعت عبالي كلبك مثل كلبي بس انتي ماتدحكين غير ابوي ماتتغيرين

اخذ قمصلته وطلع زعلان حتى الباب ماسدهه ..

#شقراء_بغداد

الجزء_الثاني_بارت_١١


اخر شي كلتله
.. اني اتبرعله بالقرنيه يصير ؟؟ ..
صفنو كلهم بوجهي وعلي كالي ..
- لااا عوفي هالسالفه نلكى حل اصبري
- مااصبر خويه انتو هيج دتكلولي يخسر عينه مو اصبري اني هيج افهمها
-مايرضى رجلج لو درى مايرضى اعرف بي
- مااخلي يدري
- استغفر الله
- لتحاول وياي تره ماضلت عندي اعصاب خلي نخلص من هالمصيبه عسى ماانطيه روحي بس خلي يرجع لعافيته

سكت وضل مخنزر عليه واني رجعت كلت للمترجم حتى يسأل الدكتور وهو كاله وبعدين حجالي ...
- يصير بس تخسرين نظرج بهالعين
- مو مشكله المهم يصير ترهم لعينه
- اي ترهم يسووهه بالليزر يحددون حوافها على حسب حجم عينه
- الحمدلله لعد كوله خلي يشوفلنه يوم ونسويهه وكون هالاسبوع لا يتاخر

جرني علي على جهه وصار يكولي..
- مخبله انتي شبيج دتنطين عينج صدك تحجين ! ولج بعدج صغيره تنعمين من هسه والله حرام
-خويه لتناقشني هنا اني ماعندي اهم من الشيخ
- اصبري كتلج نلكى حل بلكي يخلون اصطناعيه منا لما يجينه خبر من المراكز
- وليش اعوفه هيج متبهذل وهالصناعيه متشوف بس غطى
-اي غير وكت يرجع يشوف مانعوفه شبيج قابل احنه منخاف عليه بس انتي !!
-اني خوفي مو مثل خوفكم خويه اني هالايام عايشتهه جحيم اريده يصير زين حتى اني ارتاح صدكني اذا اضل هيج اموت متفهمون اني شبيه من ضيم عوفني الله يخليك لخاطر الله عوفني لتدخل بيه اني ماصدكت لكيت حل تريدني اتراجع!
- انتي ما يوكفج غير رجلج امشي للبيت وخليه هو يعدل عقلج
- ما تحجيله والله ياعلي اذا حجيتله بعد لساني ميطخ لسانك
- شبيج انتي شبيج من كل عقلج اعوفج
-اي عوفني اذا تريد راحتي عوفني

عفته ورجعت للمترجم وهو كالي باجر يجي ويأكد الحجز تفاهمو ويه الشيخ بالبدايه ..

رجعنه للبيت ودخل علي ضايج وعصبي كبل راح على جراح حجاله واني اشرله يسكت لا يسمع الشيخ ..
بدلت وكعدت يم الشيخ لازمه ايده واطمن عليه بعدين صاحني جراح ورحت للغرفه يمهم وصار بينه نقاش حاد علي يتحلف ويكولي اخابر مصطفى يجي ياخذج وماخليج تسويهه وجراح يكولي نلكى حل لا تستعجلين وحجايه منا ومنا اخر شي كلتلهم ..

- انتو من كل عقلكم اعز شي على الشيخ
شسوي بالعين وهو كدامي متلوع والهم كاتله شتريدوني اضل اباوعله بيهن شلون تعبان وممروده روحه !!! هيج استفاد !
والله الي يوكف بطريقي اتبرى منه هالقرار مابيه نقاش الرجل رجلي والعين عيني لتدخلون بشي

جاي اطلع وبعدين انداريت كلتلهم ..
- لا تحجون شي للشيخ هسه اني بنفسي احجيله بعدين انتو اسكتو ولا تجيبون طاري لاحد رجاءاً

علي وجهه احمر ومخنزر عليه وجراح رافع حاجبه ويباوعلي معاجبه الحجي
بس اني مهتميت لاحد هدفي كدامي واسوي المستحيل واوصله ..

ضليت هالليله نايمه بصف الشيخ ولازمه ايده وافكر بقراري واتخيله يرجع لصحته واوفي بوعدي للشيخه وارجعه بسلامه
تنرسم على وجهي البسمه بهالتخيلات
وتخليني اشوف كل خطوه سهله وبسيطه كدام راحته ووكفته بشموخ مره ثانيه

اول ما صبح الصبح رحت على جراح وكلتله ....
- خابر المترجم كوله خلي يأكد الحجز
- عمه ابوي مايرضى ماتعرفيه شكثر يخاف عليكي
-اعرف بس اني مارايحه اموت باقيه وياهو مايتغير شي
- دخيل الله عمتي اتركيها لهالسالفه اذا الي خاطر عندك
- على راسي انته وليدي بس بالشيخ لا تناقشني اني قررت وانتهى الي عليك بس تساعدني نكمل هالعمليه بهدوء ومايدري بيهه
- هااا على اساس انتي تحكيلو
- تعز عليه نفسه يبني عافيته على عافيتي اعرفه لذلك ماريد احجيله هسه خلي يصير زين وهو من وحده يعرف
- وبذاك الوكت ظنك يرحمك ويقنع بفعلك!
- يقنع يقنع وكت الي يحاجيني ويفهم اسبابي يقنع ويرضى عليه
- والله ياعمه حيرتيني بزماني
- لا تحير ولا تسويهه سالفه خابر هذا خلي يرتبلنه الاجراءات ونتوكل

هز براسه بمعنى اي واني رحت اسوي ريوك وكعدت اوكل الشيخ وحجيتله
العمليه قدمو موعدهه هالايام وزرعت بي الامل حتى يرجع نظره وهو تفائل
وضل يردد الحمدلله ..

اني كل مااشوفه يردد الحمدلله ابتسم
افرح لاني كدرت اسعده هيج ولو بشي بسيط بهالخبر ..

ثاني يوم خابرني مصطفى وكالي اكو جماعه جايين خطابه على غاليه ورايدين عنوان بيتنه حتى يجون يحجون ويانه
وهو كايللهم الاهل مسافرين هالفتره وماكدر انطيكم عنوانهم الا يرجعون واخذ اذنهم يلا .. سألته منين هذوله وشعرفهم بيت اهلي كالي سامعين عدكم بنيه اخلاق و مبوشه وسائلين علينه قبل مايجون والمنطقه مادحه بينه بس اني كلتلهم هالبنيه بنت اختنا وبيتهم مو هنا وهمه اصرو يتعرفون عليكم ويجون لبيتكم ويطلبوهه منكم ..
كلتله سد الموضوع مو وكت زواج
ووصيته اذا اجوي عليه بعد يكللهم اهلها ما يقبلون يزوجوهه هسه ويسد السالفه ..

ضلينه يومين كل شويه متعاركين اني وعلي وبالاخير زعلت منه ليش يصير اناني هيج وكلتلهم كلكم انانين تخافون على نفسكم وعليه بس متخافون على الشيخ مضحين بي ...