رتبتلك كلشي تحتاجه بالجنطه وحضرتلك كليجه وعصير بعلاكه وحد اكلهن بالطريق وعده الحلاقه هم حطيتهه الك
- تسلمي والله
- ادلل .. اذا عندك اوراق تريد تاخذهن كولي حتى احطهن الك لتنساهن
- اييه تذكرتهن بالسياره ضلن .. خليهن هنه كدام عيني مانساهن
- زين لعد بعد شمحتاج
- حضنك ودي اشبع منو هالليله

ضحكت وبوست خده وصار ينزع دشداشته واني واكفه يمه اخذتهه علكتهه
وطفيت الضوا وتمددت يمه ...
كالي...
- وش بنفسك من الشام حبيبتي
- اريدك سالم ياعمري
- لا والله احكيلي اطلبي اي شي بنفسك
لاتخليني حاير بهديتك
- اريد اختيارك حبيبي اي شي من ذوقك راح يعجبني وخليني اتفاجىء بي
- هههه تآمررين والله احلى ما تكع عليه عيني اجلبو لك
- تسلم حبيبي

حضنته وهو كل شويه يشتم بوجهي وشعري ويبوس اصابعي وبعدين نومته على ايدي يلا كدرت انام ....

والصبح وكلته بايدي وكل شويه اوصيه ينتبه على نفسه وطريقه وهو طمني من كالي اكو اثنين ولد وياه من المنطقه رايحين ....
وقبل مايطلع وصاني على نفسي وكالي ..

- ادعيلي اتوفق بشغلي الجديد انا اتفائل بدعائك يابنت العز
- عسى ربي يوفقك ويفتحلك اوسع ابواب رزقه ويكفيك شر بن ادم وييسرلك كل عسير بحق لا اله الا الله
- يعزك ربي

بوس راسي وطلع وضليت اباوعله من الباب لحد ماراحت سيارته ورجعت طبيت واني عيني تدمع مادريت هلكد فراقه صعب ...

البيت محلو بلياه مشت الايام واني بيت الشيخه مونستهه ومونستني بسوالفهه
اخلص الليل اقرا بهالكتاب بس ماجربت شي منه ... مجرد اقراه واتمعن بي وصرت افكر لكل تفصيل بي راح يحبه الشيخ لو لا ؟ شنو رده فعله لو سويت هيج ؟
ومن خلص الكتاب جان اكو كم كلمه بالنهايه مكتوبه بقلم جاف ...

السعاده في الحب تكمن في معرفتي مفاتيح شعور متعه محبوبي ..

بالاول حسيتها كلمات مبتذله بس بعدين تعمقت بيها وحسيتها مفيده ...

مشت ٨ ايام واني كل لحظه ادعي ربي رجعه بالسلامه ووفقه بشغله ...
وبليلتها ماحسينا الا صوته من الباب وهو يكول ...
- ياالله وينهم اهلنا يولو مشتاكين

ركضت لباب الربعه والضحكه شاكه الوجه وضليت لازمه ايده وعاصرتهه واباوعله وبنفسي احضنه بس الكل موجود وهو غمزلي وراح سلم على امه وبوسهه واخته والجهال ...

عفتهم ورحت حضرتله العشى وجبته اله
وهو ياكل ويسأل على اوضاع الديره
والشيخه تحجيله عنها ...
ومن كمل اكل وشرب الجاي .. دز جراح جابله جنطه ثانيه غير الي راح بيهه
وكعد فتحهه ويمه غاليه وجراح يباوعون وياه على الغراض ... وهو اول ماانطاهم هداياهم كل واحد بنطرون وبلوز وقبعه
وغاليه كيفت بيهن لان مثل جراح
وبعدهه هديه الشيخه وصفيه واني هديتي بقاهه بالجنطه وسدهه ودفعهه الي وكالي..
- اخذيها معك للبيت وحضريلي الحمام
- صار

ضحكت واخذتهه ووياي جراح ساعدني ورحنه للبيت .. كبل رحت حضرتله ملابسه بالحمام ورحت تعطرت وفتحت شعري وحطيت حمره بسرعه وسمعت صوته دخل .. رحتله وهويضحم وفاتح ايده .. ركضت وحضنته واني اكوله ...

- حبيبي حبيبيييي اشتاقيتلك والله والله اشتاقيتلك
- ياااهناااي وروحي انتي اشتكتلك يولوو والله ركضت فيهم ركض السباع واجيتك
الليل موحش بدون حضنك تين
- وحضني اشتاقلك .. يلا تعال اسبح حتى تشبع بي
- تسبحيني ؟
- هههه يدلل الشيخ

رحت وياه سبحته وهو بس مسترخي ويكولي
- ايييه هييين الدلال يابه هييين ول الي بلا مره بلا وطن والله

اني اضحك واغسله وهو يبوس بخدي
طلعت انتظره بالغرفه وبدلت ملابسي بين مااجه وكبل تمدد وفتح ايده .. اجيت نمت على ايده واشتميت ريحته وبوست جتفه
وكلتله ...
- هسه ردت روحي

ضل يمشي ايده على شعري ويباوع لعيني ويسولفلي على سفرته وشغله
لحد مانعس خليت راسه على ايدي وصرت العب بشعره لحد مانام ....

وثاني يوم عفته نايم مكعدته الصبح
بس رحت فتحت الجنطه وشفت علاكه جبيره باقيه وحدهه بيهه ..
اخذتهه وطلعت بالهول فتحتهه وشفت بيهه ...
ثوب اصفر فاتح كصير كلش
يطلع فوك الركبه بشبر ومدلع بي بس شيالات رفيعه وحفره بشكل قلب بالصدر
وساده كوله بس تطريز فراشتين على طارف الثوب ..
و تنوره كصيره هم فوك الركبه وهاي اكصر من الثوب بعد .. وكفت قستها
وصلت لفوك من نص الفخذ ... لونهه
ابيض ومنقشه بورد الوان .. ووياهه
بدي وردي ساده يصير بس على كد الصدر وينشد من الركبه ..
وسلسال خصر بنهايته جرسين صغار

ضليت لازمتهن واضحك وحتى عيني دمعت من فرحتي بيهن ...
من شفته شلون بنفسه يشوفني بهاللبس وياخذ راحته وياي اصريت اكثر على ان اتجاوز هالمخاوف القليله الي ضلت ...

وكت ما كعد بوسته وتشكرته عليهن وهو كالي ...
- وكت ما تجهزي البسيهن لان بغيرو مااضمنلك اضل هادي

ضحكت وضليت ساكته ماعرفت شنو ارد عليه ...

وثاني يوم رحنه للدكتوره ...
هم ذكرهه بعلبه بيهه خاتم فضه وحجره اخضر .. ضليت اتناقش وياهه على الي قريته ووضحتلي كم شغله بيهن ووصتني ابدا اكتشف اماكن اثارتي حسب مامشروح بالكتاب ...

وتناقشت وياهه على التشوهات الي لاحظتها وهي رادت تكشف عليهن وسمحتلها ...
من بعدها كالتلي .. تتعالج بجراحه عند طبيبه نسائيه بس كلتلي تكلفتهه شويه غاليه ... مااهمني اي سعر ممكن ينطلب عليها المهم اخلص من اكبر كابوس بعمري واصير حره ...

بقت بس شلون اوضحهه للشيخ !!!
ضليت يومين متحيره شلون احجيله وبالاخير كعدت وياه بالليل وكلته اله دفعه وحده بدون مقدمات ...

- حبيبي الدكتوره كالت اكو عمليه بسيطه عند دكتوره نسائيه ومحتاجه اسويهه
- ايمتى؟
- وكت ماانته توافق نحجز عدها
- زين عجل احجزو

تفاجأت من رد فعله .. جان عبالي يسالني ليش وشيصير بيهه ولشنو هالعمليه
بس هو خصمهه بحجايتين !!!!

صفنتلهه شويه وبعدين كلت يلا هو يهتم بس لراحتي مهما تطلب يوافق ...

واتفقت ويه الدكتوره ورحنه بنفس اليوم للمستشفى لان هناك هي الدكتوره النسائيه وفحصتني وكالت ..

صاير تهطل يحتاج عمليه شد وجراحه لترتيب الشفرين وبنفس الوكت تزيل تشوهات الناتجه من اثر التجريح بهالمكان ..

واتفقنا عكب باجر العمليه ... ماجنت متخوفه كد ما متحمسه لصحوتي بهاليوم الي الكى بي نهايه كل هذاك التعب ....

بليلتها جان يكولي ...
- ما متخوفه من بكرا حبيبتي
- لا بالعكس مرتاحه وانتظر يجي الصبح بسرعه
- انا احبك بكل شي فيكي لو حسيتي انك متردده اتركيها ما تلزم والله
- لا حبيبي اني اريدهه لنفسي اريد اطمئن هيج اني راح انجح صدكني هاي اكثر مره اني متحمسه بيهه لشي لا تخاف فدوه
- مااتحمل ادحكك متاذيه
- ما تاذي بسيطه وداعتك

صرت اني اطمنه واهدئه واشوفه متوتر واني لا ...
وكل شويه يتأفف ويستغفر وضال ضاغط على ايدي ويكولي لو خفتي او تاذيتي اتركيها .. واني لو اموت بيهه مااعوفهه
هاي خطوه نجاحي ....

دخلت العمليه بكل امل وقوه .. وجان البنج موضعي .. كل وقتها اني افكر شلون راح تكون النتيجه حلوه من اطيب
واكدر اعيش براحه بعد بدون قيود ويه رجلي واعوضه الصبر والتعب وياي ..

من طلعت من العمليه ضليت متمدده فتره لحد مابدا يفك البنج بدات الالام ..
انطوني ابره بالوريد مسكنه وضليت شويه حسيت بنفسي اكدر اكوم يلا طلعت
للشيخ صح مشيتي بطيئه وتنغزني بس تحملتها ورحتله وهو رأساً تلكاني وسندني وضل يطمن عليه واني ابينله ماكو شي حتى مااقلقه لحد ماوصلنا للبيت
كلتله عوفني انام منعسه كلش ..
وهو جان الوجع هايج عليه بس ضليت
كاتمه عليه لحد ماطلع .. صرت اتلوى
لحد مانمت ....

ومن كعدت لكيته يمي نايم ولازم ايدي
بشوفه وجه نسيت كل الوجع ...

عبالك يعرف ساعه الي اكعد واباوعله
يكعد رأساً دائماً يسويهه بيه ..

لكيته جايب دجاجه شوي ومغطيها وعايفهه على الكاونتر .. رتبتهه بالصينه ويه الزلاطه وهو اخذهه للهول وكعدنا
وحرت شلون اكعد اتاذه ومامنتبهه
وكل ماانغز اعصر برجله ...
اخر شي جريت المخاد وارتاجيت ومددت رجلي وهو خطيه بس يباوعلي لكمه وحده مااكل ...

ضحكت وكلتله ...
-اكل حبيبي اكل مابيه شي لتخاف
-والله ما كانت تلزم ليه اذيتي نفسك هالشكل
- احب ادلل نفسي هههههه اكل ياعيني

قرب الصينيه يمي واني صرت اسوي لفات واوكله واضحك وانسيه الموضوع

واخذت فتره تسع ايام وشلت الخيط وبهالايام جنت حذره بكل حركه لان كلها تاذي وهو رايح جاي يسالني شلونج متاذيه ؟ واكوله لا زينه ماكو شي ..

من تحسنت رجعت للدكتوره وفرحتها بفرحتي بتجاوز هالمرحله وهي حضنتني وكلتلي ...
- انتي كدرتي تحاربين نفسك انتي اشجع امرأه

زرعت الثقه من جديد بداخلي وعلمتني
الطريق الصحيح لبدايه علاقتي الزوجيه
وفهمتني بطريقه غير مباشره ان الشيخ
هم اخذ كفايته من التعلم بخصوص هالموضوع ...

ورجعت منها واني اعيد ترتيب افكاري
حسب ما تناسب سعادتي ويه رجلي
واخذتلي يومين بهالشي ..

وبليله اليوم الثالث جنت واكفه بره بعد مانام الشيخ طلعت للطرمه وضليت واكفه ومخليه راسي على الحايط وصافنه على الوردات ... وانتبهت عليه اجه وراي
وحضني وضل مخلي راسه على جتفي
ويكولي ...
- ليه حبيبتي سهرانه لحالها !!
- الجو حلو عجبني اشتم هوا شويه
- ما كعدتيني اشتم هوا معك
- غير نمت ياعيني شلون اكعدك
-انا اصلاً احس عليكي كاعده ما يلزم تكعديني
-هههه ايي اكيد هالشي

سكتنا شويه وبعدين درت وجهي عليه
وكلتله ...
- حبيبي طلب صغيروني ممكن !
- امري ياعيني
- نروح لكربلاء بنفسي ازورها وياك بهالجو الحلو
- ابشري ايمتى ودك
- كيفك حسب مجالك بس مو تاخرها يعني
-هههههه بكرا عجل بعد الظهر نمشي
حضرو نفسكم ونروح
- ااا اريد وحدنا يصير ؟
- اااه لاول مره تحكي وحدنا
- حبااب هسه هالمره وحدنا مابيهه شي
- ابشري وهاي زيارتنا وحدنا بعد امري
- تسسلم بس هذا كافي
-ههه طلباتك دومهه بسيطه تمنيتك تطلبي شي يسوا التعب فد يوم واتعبلك
- مو انته كل عمرك تعبتلي ياحبيبي بعد اتعبك اكثر !!
- ايييه اتعبيني اكثر اكثرررر احبو للاكثر انا

#شقراء_بغداد

بارت_٥٩


عصر يوم الاربعاء من شهر اذار توجهنا
لكربلاء .. وحدنا كضينا الطريق ضحك
واني مخليه راسي على زنده ولازمه ايده ونسولف على طول الطريق ..

اشترينا جمار اول مادخلنا كربلاء وصرنا ناكله لحد ما وصلنه الكراج
لبست عبايتي ونزلت ..

وكت الي وصلنا دنيا ليل وهستوه خلص اذان العشى ...
دخلنا زرنا وصلينه بالامام الحسين عليه السلام وطلعنه زرنا الامام العباس عليه السلام وهو كل مانطلع لباب الخروج يوكف بصفي ويرفع ايده يدعي ...
- مولاي عافيتها تعافيني فيها ومرادي منكم

كل مايخلص دعاءه ابتسمله واشاوره احبك وهو يضحك ويكولي ..
-وحكهم انا احبك ليوم الدين

بعد ما طلعنه رحنه نتمشى على المحلات واخذنا انواع حلاوه وبعدهه تعشينه وطلعنه نتمشى يم الطيور .. سألته ..
- شكد صارت ساعه ؟
- بالتسعه ونص
- زين نبات هالليله هنا حبيبي
- براحتك ياعيني بنفسك نضل ماعندي اعتراض نضل ودك نعاود نعاود
- يابعد عمري تسلم .. بس حلو الجو هنا خلي نبقى نشبع زياره وهم نااخذ هالوكت وحدنا
- تدللي
- ما طلعنه طلعه خاصه هيج من زواجنا لليوم
-اييه بالله لهاني الشغل والله
- ايي بس هسه ماعدنا شي خلي نتونس
- تينتي كل مكان معك هو ونسه لي

ضحكت وضليت اباوع لوجهه خده مورد شويه بهالبروده الحلوه زايدته جمال ويه
نظره عينه الحاده الي تتوسطها اللمعه الي تخلي هالاخضر الي بيها شفاف يصير
وشفافه ورديه مجمله اكثر اليشمغ الي دائماً يبرز شكاره ويزيد جماله جمال

على صفنتي بي كالي ...
- ضلي هين شوي واعاود
-ماشي

عافني بنفس مكان كعدتي على الرصيف والمكان بي قليل ناس وكدامنا بالشارع الطيور تتمشى وتلكط بالحنطه ..

شويه ورجع وشايل بايده لفه حب وجيس شاميه ... ضحكت واخذتهن منه وتشكرته
وهو فتح لفه الحب وحطلي بايدي شويه
والباقي عنده وصرنا هيج نكرز حب وهو يجمعهن الكشور يمي بالعلاكه ...

صار يكولي...
- تين انا مانسيتو لمهرك ولو تاخرت فيه لكن لاجل العلاج
- اعرف حبيبي
- اييه لكن ما ضل شي لرمضان وبأذن الله لهذاك الوكت نكون تفرغنا واخذك انتي وامي ونعتمر ببيت الله ان شاء الله
- ان شاء الله .. زين الجهال وين نبقيهم
- ناخذهم معنا
- لا والله
-اييه وش عليه خلهم يزورو بيت الله معنا وش في احسن منها يولو
- زين وصفيه هم ناخذهه
- ايييه ناخذهه عجل تضل لحالهه
-هههه نقفل البيت ونمشي
-ههههه عمره جماعيه
- اييي يامحلاهه والله ..ان شاء الله هالعيد احنه بيت الله
- ان شاء الله متلهف عليه والله .. عيد وعند الكعبه ومعاي الحبيبه الله هيك راضي علي ربي لو تحككت
- اكيد تتحقق حبيبي وان شاء الله ندعي هناك سوه مثل مادعينا هنا
-ان شاء الله
- تاكل شاميه ؟

مديتله الجيس وهو ضحك واخذ منه وصار ياكل ويباوع للمكان واني اباوعله
ما اشوف اكو احلى منه كدامي وياخذ نظري غيره ..

عبرت ساعه عشره كلتله ..
- حبيبي خلي نرجع نزور هسه المكان فارغ
- يلا امشي

رحنا غسلنا ودخلنا زرنا مره ثانيه وبهالمره اني ضليت مخليه راسي على شباك الامام الحسين عليه السلام واخذت راحتي بالوكفه لان كم واحد هيج موجودين ...
ضليت مغمضه عيني واتلمس شباك ضريحه واكول ...

- الهي انته منصف وحكيم وبكل شيء رحيم . رحمتني ورجعتلي حقي بالحياه على ايدين الشيخ وعيشتني من جديد بحبه واهتمامه ..رزقتني ما تحلم بيه كل مره بهالدنيا وانعمت عليه بأشهم واحلى الرجال .. لك الحمد والشكر على هالنعم
اليوم من تحت قبه الحسين ياالهي اطلب
منك تحفظه الي وتقدرني على سعادته وتخليني اكون عون اله بالشده والمرض
وتطمن كلبي يارب .. ازرع بيه الطمأنينه وابعد عني الوساوس حتى اكدر اكمل زواجي وياه .. انته العليم والحكيم يارب
ياقادر يا مقتدر يسرها الي هالليله
يا من لا يخيب سائلهُ يالله ..

رجعت خطوتين وباوعت للضريح واحس بداخلي فراغ عجيب .. ابتسمت بامتنان كأنه يباوعلي وبعدها رحت يم الشيخ وصلينه الزياره سوه وبعد ماطلعنه
كالي ...
- لزوم نلاكي مكان ننام فيه

لزمت ايده ووكفته وهو باوعلي كلتله ..
- عادي نبات بالفندق ؟ ماحب انام هيج بين الناس
- هاا

صار يمسح بوجهه ويباوع للشارع واني
اضحك بسكوت واكول لو بس يدري
جان شسوه !!!

اخذني ورحنه نتمشى على الفنادق وهو يرفع راسه يباوع للعماره ويكول لا امشي
وضلينه هيج نمشي مسافه بعيده عن الامام يلا عجبه فندق ..
دخلنه وجان الصاله جبيره شويه ونظيف المكان ..
اخذنا المفتاح وصعدنا للغرفه ..
اول ما كعدنا على الجربايه كلتله ..

- خالد هنا يخلون حبوب وجع راس
راسي ديأذيني كولش
- اسم الله عليكي ياعيني وش جرالك الحين
- مادري هيج فجأه حباب اسألهم
- يلا الحين انزل اشوفلك مااتاخر تريحي انتي
- راح اتعبك حبيبي
- تعبك راحه انجضعي ارتاحي

بوس راسي وطلع واني ضحكت ورحت اخذت جنطتي ودخلت الحمام ...

نزعت ملابسي وغسلت جسمي بسرعه

ونشفت وكلبت شكو شي جايبته بالجنطه بنص المغسله وبسرعه خليت بوطره لجسمي ولبست الثوب الاصفر الي جابه الي اخر سفره ... وخليت حمره ورديه ومسكارا ورفعت شعري بقت بس كذلتي نازله صفح ، تعطرت وسمعت صوته بالغرفه يكولي ..
- ياعيني جبتو للدوا احدري اشربيه
- اي هسه اجي لحظه

ضليت اعدل بالثوب من الصدر وهو حفرته جبيره وبارزه الصدر مرفوع منهه والفتحه الي بالنص بارزه اكثر لانه بشكل قلب حفرته ومبين صغر خصري بي
ورجليه كلهه طالعه لان هو طوله فوك الركبه بشبر وشويه كلوش ...
متأكده راح يتفاجىء لانه ما شايف جسمي هيج ابد .. صح البس قصير بالبيت بس دائماً مستور من فوك وطوله جوه الركبه ومو هيج مخصر ولازك على الجسم دائماً لبس راهي ..

ضليت اباوع لنفسي بالمرايه واتاكد كلشي زين واريد اطلع وارجع اتردد واباوع مره ثانيه بالمرايه وهو يصيح تين يلا
واكوله اي وايدي ترجف واكمز واخذ نفس قوي واحاجي نفسي اهدي اهدي
وضليت حاطه ايدي على كلبي واخذ نفس وازفره براحه لحد ما تشجعت وفتحت الباب وطلعت ...

هو جان كاعد على الجربايه وحاط ايده على خده من شافني رأساً وخرهه وضل صافن بوجهي ورافع حاجبه وعيونه على وسعهه ...
نزل عينه على طول جسمي ورجع رفعهه باوعلي واجه يمي ..

وكف قريب مني وباطراف اصابعه تلمس ركبتي ونزل على جتفي لحد العكس وضل لازمني هيج ويكولي ..
- على اساس راسك يوجعك
- هههه صار زين
-هااا هيك من حالو

ضحكت ودنكت وهو رفع وجهي وباوع لعيني ورفع حاجبه باستفهام .. كلتله ...

- حبيبي
- يا عينو
- اسفه نزلتك هيج وتعبتك بس للضروره احكام هههههه
- احكيلي شو الي بالك

رفع ايدي وخلاهه وره ركبته وضليت هيج اباوعله وبعدين دنكت وضحكت وهو قرب وجهه لوجهي ويكولي ..
- انتي تدرين انك تغلبي على عقلي بهالطله ليه تتعمديها !
- لان هاي نيتي
- وش ناويه علي فهميني

خله ايده على حنجي ويباوع لعيني واني محتاره شلون اضحهه اله .. وهو ايده الثانيه تتلمس حواف خصري ..
زفرت النفس وغمضت عيني بقوه وفتحتها وكلتله ...

- حابه نعيد ليله عرسنا .. اليوم بالزياره تمننا المهر لان مذكور بالاحاديث المنقوله عن الائمه ان زياره كربلاء تعادل عمره
- يعني مخططه لكل هذا !!
-اي صار ايام افكرله .. حبيبي اني نفسيتي ارتاحت واتحسنت هواي وعبرت كل مخاوفي وتغيرت هواي على ايدك
ومااريد شي من هالدنيا بعد غير راحتك بقربي

صعد ايده على زندي وصار يمشي بس طرف اصابعه عليه ويكولي ..
- تيني انسي تفكريك براحتي انا ما ودي تستعجلي بشي خذي وكتك حبيبتي
- اخذت وكتي وكفايتي هم
- وكاد ؟
- اي

سحبني من خصري لجسمه وخله وجهه على وجهي وهو مغمض يكولي ..
- عندك وكت تتراجعي لو تحبي
لاني لحظه الي الامس شفتك ماخليكي تفلتي من يدي صدكيني لا انتي الي تكدري علي ولا انا الي الي اكدر اضبط نفسي عنك بعد

بلعت ريكي وبهمس كلتله ..
-لا
اول ما نطقتها شدني اكثر لجسمه واخذ شفتي بهدوء خلت رجفه خفيفه تمشي بكل جسمي .. ضل مدنك جسمه عليه وبكل هداوه يبوسني بكل رقه لدرجه خلاني اهدء وانسى توتري كله ... وبنفس الهدوء فتح شعري وصار يخلي اصابعه وره اذني بداخل شعري ويتلمسه ...

شويه ووخر واخذ نفس قوي وهو يضحك ووجهه احمر ويكولي ...
- قسم بالله احتييت

ضحكت وخليت راسي بصدره وهو صار يتلمس خدي ويكولي ...
- الحين فهمتي ليه انا مابيوم تكربت حدر شفتك
-هههه ايي
- ايييه لاني داري اضعف كل الضعف فيها .. حب الرمان هذا ياحبيبتي يشيل الشيخ ويشيل الاب والكبر والصبر ويجردني من كل شي يسلبني ارادتي على نفسي والله يسلبها

حجاها ودنك يشتم ركبتي ويمشي خشمه عليهه وبعدها اخذني للمرايه وضل حاضني من وره ويباوعلي هيج
ركز عينه على صدري ورفع ايده من خصري خلاهه عليه وصار يمشي اصراف اصابعه عليه وينزلهه بالفتحه
ويكولي ..
- دخيل النعومه دخيل صغرك دخيل هالعود الرفيع

ضحكت ودرت راسي بوست خده وهو كالي ..
- حلوه والله يازين الشباب الي فيكي نيالي انا الي حليان حدر حلاكِ
- ماكو بحلاك حبيبي
- انا حلاتي ما تبان الا حدرك هيك بهالوكفه انا احلى

رجعت بوست خده وركبته وهو حضني قوي وصوت نفسه على ..
تلمس ايدي لحد الجتف ورفع الشيالات
اثنينهن نزلهن سوه واني مدنكه وكلبي بدا يدك سريع بس محافظه على هدوئي كدامه ..
بعد ما نزلهن من ايدي فتح السحاب الصغير من وره ونزل الثوب كله
وبعدهه وخر مني ...

باوعتله بالمرايه واشوفه حاط ايده بشعره وفاتح حلكه شويه وصافن على جسمي من وره .. رجعت شعري كله ليوره
وهو صاح ...
- ول شعرها شعرهااا يولو هذا يفتني ازيد على طول ظهرك هيك

ضحكت وهو رجع حضني من وره بس هالمره يتلمس جسمي من كدام ..
من رجلي وبطني وصدري ويباوعلي بالمرايه ويبتسم .. كالي ..
- لاكلك والله

بسرعه ضحك وشالني للجربايه مددني وضل واكف يشبع عينه على طولي
درت عيني منه وهو صار ينزع ملابسه وبعدين كالي ..
- ودك الضوا ولا اطفيه ؟
- كيفك

كعد بصفي وكالي ..
-خلييييه خلي اشبع عيني منك ..

دحكيلي حبيبتي دحكيلي ما ودي خجل بغلاتي عندك اتركي المستحى هالليله

باوعتله وهو قربني لحضنه وصار يكولي
- لا تخجلي مني انا حبيبك زوجك ودي
تكوني معي بكل شي كلي الك حلالك لا تخجلي وتضيعي لذه هالليله .. اتركي الخجل وخلينا نعيش هالليله بكل حب

نزل جسمه عليه وصار يحجيلي يم اذني
- خليني احس حبك بصوتك ..لمستك
رخاوتك معي
- احبك والله

رجع لنفس البوسه بنفس الهداوه لحد ماسيطر عليه بيهه صار يقويهه اكثر
وينفعل اكثر .....
تغير كلشي بي كأنه رجال ثاني
صوته طريقه كلامه الحب الي بكل لمسه يعبر عنه وبلحضه الي يزيد قوه بيهه يضل يبوس بوجهي ويتعذر ويكولي تحمليني ..
نقلني لعالمه الفاقد للشعور والوعي و
ماعرفت حتى نفسي بهاللحظه ..
شعور راحه غريب وحسيت اني تقربت منه اكثر .. فعلاً بهالمره شفت خالد الي يكولي ماتعرفيه بعدج ...

غيرني وياه باسلوبه وحركاته ونفسه
بعد عني كل خوف وكل كره .. فعلاً لكيت نفسي الي وجود بهالعلاقه واتاثر مثل ماهو يتاثر ..

حببني بيهه وخلاني اعيشهه وياه اكثر من مره بنفس الحب والشغف ..
رغم حذره وتمهله بالبدايه وياي لحد ماتجاوبت وياه الا انه قوي بكل شي
جسمه منين مالزمه متشنج العضل
مزيج من قوه وحنان يبرز شي بالفعل وشي بالصوت والنظره وباثنينهن سحرني وملكني واسعدني لاني ملكته نفسي ...

مرتجي على المخاد وحاضني بايد والثانيه يصب بيهه مي ..
شرب وبعدين شربني شويه وضل يتلمس بجتفي واني الفلف بشعر صدره .. سألني.

- ارتاحيتي معي ؟
- اي عمري
- ما كرهتي شي !
-لا حبيت كل شي صدكني كل شيي حلو
هاذي احلى ليله بعمري
- يا روحي انتي بالله انا اليوم اسعد رجل
انا دايماً سعيد معك لكن اليوم وكت الي دحكتك معي بكل شي ومرتاحه وباين حبك ورغبتك لكل شي مني انسعدت اكثر
- هههه ليييش قابل اني مامشوفتك حبي من قبل
- لاااا هين تختلف يابه
- هههه اييي حقك لعد
- دحكي راح احكيلك سالفه
- اي شنو هي
- تعرفي انا كيف صرت شيخ ؟ يعني ليه انا مو عمي ولا ابنو تعرفيها لو لا ؟
- لاا ماعرفها شنو احجييلي
- اسمعي ياعيني ... ابويه الله يرحمو وكت الي دخلت عمر ال ١٣ ارسلني عند اخوالي بالباديه بنص الصحرا كريب الحدود مع سوريا .. هنيك عرب خوالي
كبير وحلالهم كثير وهنيك الولد عندهم زلمه من اول ما تدك رجلو الكاع
سباع وفكرهم اكوى من يدهم ما يفوتهم حس الطير لو طار حدر خيمهم وانا وكت الي مشيت عندهم صغير ومدلل امي كل الي كنت اعرفو الكعده بالديوان لا عمري مدحك الخناجر ولا البارود ولا سامع صوت الذياب ولا ماشي بالحر مدلل على الاخر امي كانت لو كاعد اكل تهفيلي بمهفتها الخوص وحتى شعري هي تمشطه ومن صغري هي مسويتلي قاصه تجمعلي فيها الدراهم وتحكيلي هاذي الك وكت ما يعجبك شي اكسرها واخذ الي فيها اشتريه .. من عدا الي كانت تعطيهم لي زياده فوك الي اخذو من والدي
عايش عيشه الامراء والله وبليله وضحاها الاكي نفسي بعيد عن حضن امي ودلالها
والراحه والبروده ببيتي وادحك نفسي بنص صحرا جردا ما فيها غير التراب والشمس تصكع بالروس والخيل تتمشى حدري من كل صوب والولاد الي بعمري كلها تدحكلي متعجبه .. كان شعري كصير ومرتب ولبسي كلو بنطرون وقميص وهنيك كلهم ثياب البداوه عريضه والوانها غامقه وكلو اثواب
وانا ماطابلي المكان رحت كعدت حدر ابوي وهو كان كاعد بخيمه خالي الكبير
وحكالي ... من اليوم تضل هين عند اخوالك وتسمع كلمه خالك وماتعاود البيت الا وانته معاشر الصحرا
تركني وراح بسيارتو وضليت انا اتصفن بهالمكان لوحدي هين ماعرف احد منهم
مدحك خوالي مره وحده عندنا بالديوان
والحين لا بيتي ولا اهلي ولا ديرتي
ضليت مستاحش وكاعد بمكاني ما برحت منو وخالي جابلي ماعون تمر وطاسه لبن وكالي اكل وشيل الدلال من راسك الزلام ما تربيها الا صحاريها ...
ومن وكتها صرت امشي معو .. غير لبسي وحزمني وحطلي الخنجر فيه
وعرفني على ولاد اخوالي كلهم وعلى المشايخ بعد وصار يحكيلي عرفتك الاهل تعرف انته على العيشه ..
وصرت انا ادحكهم كيف يتصرفو واتعلم منهم .. اول ما تعلمتو هو ان صدت تغديت وان ما صدت تاكل التمر والخبز
وانا كضيتها خمس ليالي اكل تمر وخبز ولبن لاني ماعرف اصيد ولا اندل منين وكيف ولا شو الي اصيدو واكلو ..
وكل مااسالو لخالي يحكيلي لك عين وعكل يعينوك على مسألك ..
تالي صرت اتبع واحد من ولاد خالي
يكبرني بسنتين صرت اتبعو من الفجر
لحين الظهر انا امشي وراه وهو يدري اني وراه لكن ما يحكي معي ولا يسألني وش عندي اتبعو ! لكن تعلمت من صرت ادحكو كيف يبدي يومو بالصلاه وبعدها يرعى الاغنام ياخذهم يدك مشي فيهم بحوالي الساعه يمشي لمراح فيه خضار
تتغذى منو هالاغنام وهو يخليهم ويمشي يفتر هين وهين لحين ما يقنصلو مكان ويحضر خنجرو ويضل هادي ومركز على هدفو لحين ما يكضبو ..
- شيصيد يعني
- لو لاكى ارنب يتختلو ويكضبو بالهدى

والحيله ولو طير يضربو بالحنجر لكن ما يجرحو هيك مو هو بشكل نص هلال يضربو فيه على ركبتو لو جنحو وهيك يكع ويركض عليه يكضبو ويلفو بالحبل وياخذو ويعاود لاغنامو ..

- هااا ماشاء الله سبع

- اييه سباع والله هاذي خفايف عندهم يابه
اييه وبعدها يعاود بالاغنام لعند الخيام ويجمعها بمكانها وياخذ صيدو يعطيه لامو تطبخو له ولاخوتو .. تصدكي انا كنت معهم اكعد وكت الاكل همه ياكلو من صيدهم وانا من التمر لا انا الي طلبت غيرو ولا همه الي عطوني .. رغم انهم كريمين نفس لكن معلمين ان كلمن ياكل من تعبو ...

وهيك صرت اطلع وحدي امشي بالصحرا احاول اصيدلي شي واتفنن بالاساليب .. ياانصب شبك واضل اناطر لحين ماتكع عيني ومااستفاد منها اصير امشي وادورلي شي اضربو بالخنجر وييين الاكي طير وساعه الي اضربو ماتكع فيه ... ضليت هيك اتطبش بهالحال
لحين ما واحد من ولاد ولد خالي اخذني بالخفى علمني الصيد بالقوس والسهم
كان ياخذني لبعيييد ويحطلي احجار صغار واصير اصوب عليهم من بعيد بالسهم وهيك يلا تعلمت اصوب بالسهم وكدرت اصيدلي طير واخذتو فرحان فيه لعند خالي والهث من الركض واضحك وهو شجعني وحكالي الحين بديت بدربك
وبيومها حرمتو لخالي طبختو لي واكلتو لحالي والله ياتينه لو تضوكي كيف طعمو
بالله ماودك تاكلي غيرو من لحم وللحين انا اتسأل هو هيك لحم الطير طيب ولا لانو بتعبي اختلف عندي !
وماعرفت الجواب
- اكيد لان من تعبك تحسه مختلف
- اييه جايز. . وهيك من بعدها صرت مرافكو وهو بدا يعلمني ركب الخيل
وضبطتو وصرت اتسابك معو بالخيل
وعلمني ربط لجامها لكن طولي ماكان يسمحلي اجربها بحينها .. وبعدها صرت اعرف من وين يجلبو المي .. كان في غدير عين مي وحولها اشجار وخضار كثير لكن مساحتو كلها بتطلع كبر بيتنا
وهنيك الحريم يمشو الصبح يغسلو الثياب ويترسو مي ويعاودو وممنوع تحاكي حرمه واكفه حدر المي ولو كان ودك تسكي الخيل تنتظر لحين ما يمشو وبعدها تحدر للمي ..

- ايييي هالشغله حلووه

-هههههه مو بحلاكي والله

- اي حبيبي مرتاح كلبي كمل كمل

-ههه بعدها صرت اتعلم تخدير الكهوه
واصولها وتعلمت كيف اشعل النار مثلهم
وكيف ابارز بالسيف واقاتل .. كان يومي كلو عباره عن تدريب للمبارزه
تجرحت ونضربت بلكمات قويه من ولد اخوالي لكن اعاود اضربهم ويزيدو بضربهم لحين مااتعب يكفو واصير الليل كلو اسهر اضرب بتل رمال اضرب فيه واقوي لكمتي حتى ثاني يوم اردلو الضربه وكدرت اغلبو بمره بعد مره كدرت اغلب كم واحد منهم .. مره بالسيف مره بالخيل مره بالسهام مره بالملاواة وهيك تمكنت منهم وبهالحكي انا عبرت ال ١٤ وما مدحك اهلي واستحي اسأل عنهم ويعيبوني ...
بهالعمر عاد بديت اعاشر الصحرا

- كل هذا وبعدك ممعاشرها !!!

- لااا الحين بديت اعاشرها .. بديتها يا حبيبتي من وادي تركوني فيه مع ولدين بعمري وواحد يكبرنا بخمس سنين
ومعنا شويه تمر ومي وسلاحنا كلمن سيفو وقوسو والسهام على ظهرو والواد اجرد من كل شي وصوت الذياب من الاعالي ينسمع وكان مشروط علينا نعاود بعد ثلاث ليالي و بالليله الرابعه تحرم علينا دخله عربهم وكل هذا حتى وكت نعاود شيخ القبيله يسألنا كل واحد سؤال
لو جاوبناه نضل بالعرب ولو ماعرفناه نعاود لنفس المكان ..
والله ضلينا مخيمين وكاعدين نتصفن وبعدها كل واحد مشى لصوب ندحك
كل شبر بالمكان نحفظ جهه الشروق والغروب حتى الهوا من وين يهب
ندحك بالارض وش فيها من نوع حجر وحصى رمالها خشنه ولا ناعمه ..
كم تله محاوطتنا .. هين نلاكي غدير مي ولا لا هيك ضلينا نفتش بكل شي ونحفظو ماندري وش ننسأل .. والذياب كل ساعتين تهجم ونصير نضرب عليها بالسهام وبالليل نشعل اكثر من شعله نار
محاوطتنا تصير حتى نحتمي فيها منهن
وهالولد الي كان اكبرنا كان معو باروده
ومره بنص الليل فزينا على صوتها اثاريه ضارب واحد منهن عابر شعل النار وواصل حدر رجولنا ..
بالله بهالساعه نشف بعروكي الدم وانا ادحكو هالكبر كبرو ومكشر انيابو وكمز من فوكنا وشرد .. صرت اسمي باسم الله واردد فيه وماعولت تخلص هالثلاث ايام
دحكت الموت بعينو هنيك .. حتى حيايه كتلت وعكارب كل مااغفى شويه اسمع صوتها تطكطك حدر راسي اكعد اكتلها
واعاود انام .. ولحين ماعاودنا على الخيل يلا ارتاحلي بال ...
واول ما وصلنا وارتحنا دز علينا الشيخ
ورحنالو انا والولاد الي بعمري ...
سألني بوكتها ...
وش تعلمت من وادي الموت ؟
حكيتلو بالعجل ..
تعلمت كيف اعيش

ضحك وحكالي اكعد وسأل الثاني ..
وش تعلمت من سما الوادي ؟
حكالو .. تعلمت كيف استدل على ارضو منها
والثالث سألو ...
وش تعلمت من احياء الوادي؟
حكالو .. تعلمت الحذر من الغدر

هو بساعتها كافئنا كلنا على حسن اجاباتنا وخلالنا ذبيحه لوحدنا اكلناها ..
ومن وكتها بديت اتمعن بالصحرا كل شبر فيها صرت اميزو واعرف الغريب من الكريب وشاركت بكونات (عركات)
معهم وتجرحت اثرها

- يعني هاي الي بجسمك منها !

- الي بيدي هذا اثر خنجر لكن الي بخاصرتي هذا اثر الحرب والعسكريه

- هاا وشلون هيج انضربت بالخنجر

- كان في كونه بعربهم وصارت بالليل وكلهه فزعت الا انا وولاد خالي اثنين مارضى خالي نطلع من الخيمه وخلانا حدر حرمتو لان الكونه كانت كبيره وخاف علينا منهم كوننا صغار بعدنا
لكن انا عزت علي نفسي اضل حدر الحريم واهلي بره يتذبحو وجريت خنجري وطلعت وهجمت على الي كضبتو يدي ماكنت اذبحو لكن اجرحو لحتى يكع ودحكت ولد واحد من اخوالي تكاومو عليه اثنين ورحت فزعتلو وكتلتهم وخلصتو منهم لكن واحد راد ياخذني غدر وخالي فزعلي وبعدو مني وصارت ضربتو هين على يدي وتركت اثرها

- الحمدلله الي حماك بهذاك اليوم

-الحمدلله .. هاذي وحده من مئات
وعبرت عمر ١٥ بهالحال .. شعري طول لتحت كتافي وكلو ضفاير حاكيلك عنها

-هههه ايي

- اييه ولبسي كلو ثوب طويل ومحزم بالخنجر ولهجتي تغيرت وصوتي عالي بالحكي وسريع الحركه ونبه لكل مايخطف حدر عيني ووراي .. تعلمت استدل الدرب من النجوم واعرف الوكت من الظل والشمس وبيوم انا معاود من الصيد ودحكت سياره ابوي هين وركضت للخيمه ودحكتو هو وامي هين
وامي ركضت علي حضنتني وتبكي وابوي اخذني من حضنها وحكالها ..
يولي ابنك صار رجال ماتاخذيه باحضانك مثل الجهال ...

بهاللحظه انا كنت محتاج لحضن ابوي اكثر من امي كنت اتمنى ادحك فخرو فيي ودحكتو بعينو رغم انه ماحكى اكثر من هالكلمتين ولا سألني وش تعلمت كيف عشت وش صار معك .. على عكس امي الي ماوكفت اسأله ..

وضلو يوم والثاني ابوي كال نعاود وانا كل ظني اتحضر واعاود معهم لكن هو حكالي ...
الحين بعد ما تعلمت عيشه البدو ابدا تعلم كيف الرجوله تصير

بوكتها انا تعصبت واخذت بخاطري منو
كيف يحكيلي هالشكل .. يعني كل هذا الي اعرفو ويحكيلي تعلم الرجوله !!!!
ضلت تطحن بحشاي هالكلمه ليالي وليالي
ورحت سألت خالي عنها وحكالي ...

الرجوله كضبه فكر كبل كضبه الخنجر
و والدك يبغيك تعاود رجال مو سفاح تعرف الكتل بالاسلحه واليد

ومن هين بديت حياتي الجديده .. صرت بمرحله الشباب وعبرت الطفوله وبديت
اعاشر المجالس واستمع لكل كبيره فيه وصغيره وادخل باختبارات كثيره
منها مسائل كان يسئلها لي خالي وكت ماينطرح موضوع بالمجلس مع الرجال
ومنها حالات ضبط النفس .. تجي احيان
يرسلي خالي رجال يستفزوني بالحكي والافعال عمداً ويتكاونو معي بعد وانا بالاول اخذهم بالمصايح والمكاون والاكي خالي يرزلني على ضربي لهم وصرت افهم انه ودو اضبط نفسي عند هالحال
وتكررت الحاله بمختلف المواكف
وصرت اتهدا عندهم واخصم الامر بالكلمه الرزينه والحكمه على الخطأ والكرم والصفح مقابل الاذى والنصح
على شتات البال وهيك تغيرت شخصيتي
كنت عدائي بالاول من زود ماتعلمت وصحيت عليه بالاول صارت شخصيتي عدائيه خنجري كنت بكل ساعه ساحبو على شي وصوتي يرعد بالعرب وحتى مشيتي هوجه لكن من عمر ال ١٦ تغيرت وصرت هادىء واحكي وكت الي يلزم الحكي وابارز الي يستحك ابارزو
واعامل على حك الله واعطي الكثير مقابل القليل وامشي على ميزان ان
الدنيا دين ان سئت ولا اصلحت كلها دين يردلي بعدين ...

وبعمر ال ١٧ صرت اوعى على حاجتي الجنسيه وتسببلي ضيك بالنفس طول الوكت مخليتني اعصاب وكاره الهوا الي يمرني .. ما حكيت هالشي لاحد لكن خالي من حالو حكالي ...

كل رغباتنا الي تكلب موازين الحال ضبطها الفكر .. لو تهدا الفكر تهدا الحال

ومن حينها صرت اشغلو لفكري واتهدا
وتعلمت ضبط النفس عند الرغبه من كثر
كعدتي لحالي بوسط الصحرا وتفكيري
بكل شي عداها .. بالاول ماكنت اكدر عليها لكن بالايام كدرت وصارت تمرني عادي ولا كأنها شي يستوجب اهتم فيه .. وباوااخر هالسنه عاود ابوي وهالمره كنت انا بطولو .. اخذني معو هالمره
وعاودت لديرتي من بعد طول غياب
وابوي عرفني على رجالو وحكالهم على بطولاتي هنيك الي لليوم ماعرفت كيف يعرفها بهالتفصيل وهو مازارنا الا مرتين
ومن يوم الي دخلت فيه بيتنا هو يختبرني
مره بالاكل كان مخلي فيه براد حديد ناعم
بالمركه انا من اول ما عيني صارت على الماعون حكيتلهم ..شيلوها هاذي للزباله تنذب الحين ...
ومره نايم انا وحسيت على صوت مشي حدري خليتو لحد ما وصلني انا كنت بالهداوه اسحب الخنجر من تحت راسي وكمت خليتو على ركبتو وهو شال لثامو وحضني وضحك ..
ومره بارزني بالسيف وغلبتو كدام عمامي وبارزني عمي هم غلبتو وغلبتهم بالسهام وكعت لهم فيها حمامه من على البيت من غير الاحتبارات الي بداخل الديوان ولاول شهر من السنه الجديده
اخذني لكاع جردا وميته من الملوحه
وحكالي ...

الك ثلاث شهور تعاود الحياه لهالكاع وتعاود حينها لبيتك

تينه تفهمين وش عيني كاع ماكلها الملح احييها بثلاث شهور !!!

- يابعد عمري كل هاي حياتك بهالتعب
والمشقه جبتها

- عجل ظنك بالهين صرت شيخ !
انا لو لا هالكاع ما حصلت المشيخه

- كدرت عليها !

- ايييه كدرت .. اول ما بديت حرثتها
وتبين لي ان التربه الي تحتها خصبه وما لاحها الملح وصرت اشيل الفوك بالهداوه

وشبر شبر اتمعن فيه لحين مااتاكد ماضلت ولاذره ملح بتربتها يلا احول للثانيه وهيك اخذتلي شهر ونص انا بس اشيل واتمعن فيها وازيد من تربتها بتربه نظيفه من غير كاع واسكيها شبعتها مي
الكاع كانت مساحتها دونمين كنت مفرش هنيك انام واصحى واكل هنيك فيها
واشتغل فيها من طلعه الضوا لحين المغيب .. حتى اصحابي اكابلهم هنيك
وانا اشتغل فيها ..
عليم الله تعبت فيها تعب ماتعبتو بالصحرا
طول اربع سنين .. كنت اعتني فيها بكل هداوه واخذت الفلوس الي امي كانت تجمعهم لي بغيابي ورحت اشتريت لها
شتلات شجر رارنج ورمان وزرعتهم
فيها وزعتهم على طولها وبحسابات كل وحده بعد عن الثانيه متر وصرت اسكيهن واناطرهم كل يوم ليكبرو
واحسبلهن الايام ليثمرو ...
وابوي ساعه الي دحكها وكت ماخلصت الثلاث شهور باسني من راسي وحكالي

الحين انته شيخ ابن شيخ من اصل خال وعم شيخ تستاهل الحين تعب ابوك على الحاضر

ومن حينها ابوي اخذني للديوان وجمع كل كباريه الديره وكل عمامي وولدهم
وحكالهم ..

المشيخه انا بأمنها عند ولدي من الحين
اخاف الموت ياخذني بليله ومايطلع علي ضوا اريد اأمنها كبل ماامشي ..
وولدي هو امينها والي ودو يعترض ويدحك نفسو اولى منو فيها يحكي الحين ويكوم يوعدني انه لبعد خمس شهور يكدر على كل الي ولدي كدر عليه ويبارزو بكل ما عندو من قوه ونباهه
وان كدر عليه ياخذها للمشيخه حلال عليه

وحك عينك ياتينه كلها سكتت وانا عاودت حكيتلهم ...
مشتاك للمبارزه شغل الفلح مو ثوبي من يبارز ؟

كلها غيرت الموضوع وحكو بالمبارك عليه والله والنعم يستاهلها ..

ومن بعد هاليوم انا صرت رسمي الشيخ من بعد ابوي وابوي كأنو يعلم بموتو كريب بأول سنتين لي بالعسكريه وصلني خبر وفاتو .. توفى بعد صلاه الظهر بفرشتو من دون مرص ولا هم ولا حزن هيك قدر ربنا

- الله يرحمه ونعم الاب والله

- ويرحم اهلك ياعيني .. ايييه ضل من كل هذا شي واحد ياتين

- شنو ياعيني

- ضلت ثمار زرعي .. ناطرتها شهور
كل يوم امشيلها الصبح والعصر وانا ادري انها تطول لكن املي فيها ولهفتي لادحك ثمار تعبي كيف تكون وايمتى تكبر وكيييف تكبر وتصير ثمر هاذي
كانت تعبي باول الشباب والحين انتي باوسطو .. انتي ياتينتي مثل هالكاع
اخذتها تعبه لكن دحكت فيها نجاتي
وتعبت عليها واعتنيت بتفاصيلها لاجل هاليوم .. دحكتي ياحبيبتي كيف صبرتلك بالهداوه وعلى كيف كيفك خليتك بكل شي
انتي كنتي حره وانا واكف ادحكلك تتكربي حدري يوم بعد يوم ازيد واصبر لحتى تكربي ازيد من الي كربتيه هيك انا استلذ بتعبي فيكي ساعه الي يثمر بقناعتك
ورغبتك فيي

رفعت نفسي وحضنته حيل وضليت اكوله ..
- احبك والله اعشقك احبك بكل مااملك من احساس احبك لصبرك وتعبك وحبك وحنيتك وحكمتك واحبك اكثر لانك ثمر تعب السنين .. اني بيك اشوف شكد حلو من تعبت ونحرمت من اشياء قبل حتى احصلك بالاخر .. بيك حبيت كل سنيني المتعبه .. كل روحي انته بس لمعه عينك ماخذه من الحب مااعجز عن وصفه
وهسه صرت اسيره بريحتك وجسمك وكل حركه منك كلها ماتشبع عيني لو شكد مااباوعلها .. يالله خالد هالعشق جبييير جبيير كولش وحلاته وكبره مايوسع بهالكلب والله مايوسع

- ههههههه يااا هنااي انتي ربي يديمك لي ياعشكي ياحلالي ياثمار سنيني ياتينتي
والله ماحلو بهالعمر غير وجودك

ضليت حاضنته واشتم ركبته وبوسته منها وهو كالي...

-ههههه دحكي انا وش كثر لهيت نفسي عن رغبتي كل شبابي وماغلبني فيها شي
ابد والله ولا شي كدر يغلبني واعاودلها
الا حين الي تزوجتك غصب عني افكر
تفهمي وش يعني غصب يعني انا اتناسى
واهج بعيد عنك وانشغل بكل شي لكن
ريحتك بهالخشم ماتبارح مكانها ونعومتك
تحت هالثوب الراهي اتخايلها شبر شبر كيف تكون ؟ كيف المسها ؟ من وين ابتدي فيها؟

-هههههههههه واني عبالي ولا يمك السالفه طلعت ادقق بكل شي

- والله بتفاصيل تفاصيل التفاصيل انا مدقق ول انا حافظ حتى الوكت الي يبتدي فيه الشعر يطلع على وجهك واعاود ساعه الاخرى الاكيك شايلتو

-ههههههههههههههههه لااااا خااااالد
هسه عفت كلشي ادقق على هاااي

-ههههههههه وش اسوي ماكدر مادحك
عجل تعرفي انا ليه اصحى وكت تصحي وتدحكيلي !

-ايي احجيلي ليش

- هههه لاني احسو لنفسك كريب واول مااشتمو يفتر عكلي لبعيد ويصحيني بالعجل

-ههههههههه لعد اني عبالي تضوج واحد هيج يتقرب منك وبسرعه تكعد

-لااااه والله منك اتمناها انتي كل شي مسموحلك واحبو منك كيف مايكون

- يابعد عمري يابختي بحبببك شيخ

-هههههه فداكِ الشيخ وعشيرتو

- تاج راسي انته يالله شكد احبك

-هههههههه عجل يلا ضوكيني هالحب

ضحكت وهو قربني لوجهه .. خليت ايدي
على خده وصرت ابوسه بخفه بشفافه
ابوسه واضحك وهو يضحك ويعيدهه الي
وبعدها دابوسه نفسهه وهو غير واخذ شفتي وشويه وعافهه باوعت لعينه ذبلانه
وايده تتمشى على ظهري كالي..

- خمر شفتك خمر

ضحكت وتقربت اني بوسته وهو مسترخي حتى ايده من ظهري وخرهه

وبعدهه بشويه وخرت وردت انام على ايده كالي وهو ينومي على ظهري ...

- ما تشعلين ناري وتشردي يولو كمليها للاخر
-ههههههه شبيك بوسه بريئه
- ول تخدرت اعصابي ببرائتك هاذي عجل لو تتشيطني وش يصير بحااالي

ضحكت بعلو صوتي وهو بدأ يرجعلي البوسه البريئه واثارها هم للاخير ...

نمنا متشابكين واثنينا الضحكه على وجوهنا ...

وثاني يوم كعدتي صارت الظهر ولكيته كاعد ويلعب بخصله شعري يلفلف بيها بايده ..
ابتسمت وتلمست وجهه وهو دنك باسني
وكالي...
- مو هيك العدل تين
-شنو ياعين تين
- عجل تخلصي طاقتي وتتعبيني الليل كلو وتنامي النهار كلو وماتخليني اكل !
وضال جوعان وناطرك تصحي
-ههههههههههههههه ياااااا خالد شبيييك
-هههههه اييييه عجل كاذب انا !!
تضلي مجوعتني هيك حتى البوسه احرمك منها
- ييييمه منك .. هاي حبيبي كمت جان كعدتني لعد اذا هيج جوعان
- ما صخيت فيكي
- اووي يالحنين

ضحك واني رحت للحمام سبحت وطلعت
كلتله ...
- يلا خلي ننزل ناكل
- كل هالعجل للبوسه ماتركض يابه مااحرمك نتكشمر
- ههههههه شبييك عفيه
- ول يابه الي بيه بس الله يعلمو بالله لو ما الجوع طاك براسي الحين ولاا افوتك على هالريحه بس اعاودلك بعد الاكل
- ههههههههه حتى بالسبح هم
-عجل هذا اولهم يولي انا انشده ساعه الي ادحكك تطلعي من الحمام وهيك جسمك رطب وبارد
-هههههه خوش نقاط هاي استفاد منهه بعد
- ايييه دحكي انا اعطيكي مفاتيحي بلايه خجل وناطرك تحكيلي انتي بعد
- احم هنا شويه ها
-هاا ليييه مااستاهلها منك !
- لاا حبيبي تستاهل هالروح انته بس بعد بعد انته اعرفهه ههههههه
- ماتصيري خوالي يولو انا عندك مااتهدا بهالشي ماحكيتلك البارحه هي كل ساعه اعيد
- صبرا حبيبي صبرا
- بالله هالليله لو ماحكيتي ازعل عليكي والله ياتين وزعلي ثكيل تعرفيه
- لااا لااا عيني كلشي ولا زعلك ادلل كلشي احجي ادلل حبيبي
-ايييه يلا ننزل

ضحكت وعدلت حجابي ولبست عبايتي ونزلت وياه ...
رحنه تغدينا ورجعنه زرنا وهو كالي

- ما نعاود الليله خليني اشبع بحضنك هنيك الديره كلها تكف فوك راسي

- كيفك ياعمري

- اييه وش تلبسيلي اليوم

-ههههههههه ما محسبتله اسفه

- لاااه يلا ندور هين وش ورانا

وصرنا نفتر بالسوك بالاخير وهو من اول مايباوع للمحل من بره يكول لا امشي واني تعودت على طبعه هذا بحيث مااوكف واشوف شي الا هو يكول هنا
وصدك وكت الي وكفنا على محل ودخلت للبنيه شفته اكثره مال عرايس
ولكيت عدهه اشياء حلوه مادري شلون يحس هنا راح الكى الي يعجبه ويناسبني
يمكن هاي صفات البداوه الي تعلمها بيها هيج اشياء ...

اخذت ٣ قطع واحد ابيض كصير كلش
وواحد سمائي وواحد احمر ..
من طلعت كالي رأساً ..

- كم واحد ؟
-هههه ٣ حبيبي
- اييه زين

تمشينا بعد واخذنا العاب للجهال وسبح اله وللشيخه واخذتلها عطر هم ورجعنا للفندق ...

اول ما دخلنا كالي ...
- دخيلك اسبحي واحدري لي بمثل هذيك الريحه البارده تراها للحين بنفسي
- ههه من عيوني تدلل

خليت الغراض واخذت الابيض ودخلت للحمام هم سبحت ولبسته وطلعت واني بس انشف شعري شويه وهو لكيته متحضر كبل ضحكت واستغلها الفرصه حتى يشمشم ..

شبع من الشم بركبتي وشعري ووخر شويه باوع لجسمي كله بهالابيض وكالي ...
- الصغيرونه عروستي يازينها والله يازييينها

اخذ هالعصريه كلها بالاحضان والمغازل
واكل الحلويات بالفراش ولحد وكت العشى يلا نزلنا تعشينه وافترينا شويه
ورجعنه وبهالمره كالي .. نوميني ..
ونومته على ايدي وغفيت وياه وكعدت على حرشته بيه .. جان قبل يتحارش بالخشم يكرهني النومه بس هسه صاير
لغير اشياء ..

بحيث من افتح عيني واباوعله الكاه احمر ويضحك واكوله ..
- متكول خطيه نايمه
- لاااا كل شويه خطيه خلص حكك الصبح استخطيتك وخلصنا
- امممم شبعان نوم !
- ايييه شبعان نوم واكل لكن معوز احضان
-هههههههههه المفروض هاي تشبعهه اكثر منهن
- لااااا يابه هاذي الي راحت كلها تمهيد هيك كنت اعيش بحبك لكن الحين الوكت الحين
- لااااا فدوه كافي شنو والله تعبت اسبح
عوفني خلي نرجع اصدقاء شويه ونسولف
- خلي السوالف هنيك بحديثه الحين وكت الحضن
- ههههه لااااا
- يولو برضاكي احسن مااسطرك الحين واحول الغصب لطوع
- شلون يعني تسطرني ( تسطوني )
- ههههههههه ربك وكعك بالحررررف
خليني احكيلك وش ودي اسوي ساعه الي تحكيه
- ايي احجيلي الله عليك شنو يلا فدوه
كولي

ضحك وجرني لصدره ودنك باسني شويه وبعدهه عض لساني خلاني ادفعه واضرب بيه وهو مجلب وبدون مايوخر ولا يحجي شي رجع كمل بوسته ويعض الشفه الجوه بخفه ومن وخر كلتله ..

- هو هيج كالوهه
- اييييه ايييه هيك اناا كل ماتنطكيه يصير بودي اعضو للسانك ولهالشفه الي تتمركص ساعه تنطقو والبوسه هيك للدلال ههههههه
- ههههههه شكد خبيث هسه اني شعليه وتعضني هيج شوغت روحي قابل اني اتعمده هو يصير

رأساً باوعلي ورفع حاجبه ونظرته بخباثه

حطيت ايدي اثنينهن على حلكي وسديته وهو يضحك ويريد يتقرب واني نزلت من الجربايه انهزمت منه ويلحكني واني ساده حلكي حتى وهو لزمني ويريد يرجع يسويها مخليته وضليت ساده حلكي ويقنعني احجي ابد ولا حجيت ولا وخرتهه لايدي .. اخر شي بزع جان
يشلني وعضني من بطني وخرت ايدي واني اضحك واكوله

- نزلني وكافي عض
- اييييه تدللي
- مو تخبث
- لاااا ابد

اول مانزلني هجم ورجع العضه نفسهه ووخر يكولي ..
-هالمره بدون دلال لانك تعبتيني يلا حصلتها
- وشنو انته تعاقبني على الحرف
- لاااا ماعاقبك لكن احبو هيك اناا استلذ فيه يولوووو العضه بشفتك تساوي عندي الف ضحكه معك
-ههههههههه ياااااااااااا عجيب عجيب

ضل يضحك ويشمر بشعري واني اعدل وهو يشمر اخر شي كعدت وضليت حاطه ايدي على خدي وهو يشيله منا يشمره منا ويكولي ...
- هاااا ماالله يهديكي الحين شويه نكزكز هالحلى
-ههههه لاا بعد ما هداني اصبر شويه
- يلا اصبر وانا كضيتها معك صبر بصبر

ضحكت وصرت ارتب بشعري وهو يفتربالغرفه وتالي كالي بنبره حاده ..
- يعني انتي تعرفين اني ساعه اضوك شفتك اصير مخمور وتلعبي هيك على اعصابي الحين

رحت يمه ولزمت وجهه وهو عاكد حواجبه ويباوعلي بعصبيه .. كلتله ..

- ليش تضوج مني حبيبي شويه اتشاقى وياك ما قصدي اضوجك
- اييه فهمنا

وخر مني وراح تمدد وغطى عينه
رحت كعدت يمه وابوس بوجهه وهو ولا يمه ولا اهتم .. بوست جتفه وايده هم ولا عبرني ... وخرت ايده من عيونه وبوستهن وكلتله ...
- تزعل مني حبيبي !! شنو ماتدري يعني داتشاقه
- اييييه حكيتلك اييه وسدينا السالفه بعد
- لااا مو هيج ماريد كلب حبيبي يضل ضايج مني

دار عينه مني واني كعدت على بطنه وكلتله ..
-خااالد حبيبييي
- وش تريدي من خالد ول احركتي ساسو
-ههههههه احبك

كلتها وهو ضحك وتقربت بوسته وهو هنا استسلم وضل يكولي ..
- كل الي بالك سويه لا تخجلي ولا تأجلي شي .. راضيني يلا

راضيته حسب الاصول .. بحنيه وهدوء وبوسات كل وحده تغيره اكثر من قبلها
اكثر شي حبيته بيه يسلمني جسمه ويستسلم الي .. كأنه يكولي انتي اسعديني
ودلليني واشبعي رغبتي بطريقتج
ولكيت السعاده فعلاً باسعاد المحبوب ..
لاني كل مااشوفه بالاخير شلون مرتاح ويبوس بحب وامتنان وينام بهدوء واطمئنان بحضني احس بفرح ورضى على نفسي لاني كدرت اسعده واعوضه ايام قبل ..
حبيت نفسي لاني صرت اعنيله الراحه الوحيده بعد سنين عمره المضت ..

ثاني يوم الظهر طلعنا لحديثه وهناك اول ما وصلني لبيت الشيخه راح للديوان
واستلمتني الشيخه تحقيق وكلتلها ...
صار بينه سوء تفاهم قبل كم يوم وطلعنا تراضينا وغيرنا جو
خطيه فرحت كلش وضلت كل شويه تضحك وتضربني على رجلي وتكولي
عساه هالرضى يجيب الولد الصالح

واخذ الشيخ هاالليله هم بدلال وحب واليوم الثاني الجهال جانو يمنه كلهم
وهو يروح للغرفه يصيحني ياخذله حضنتنين وشكم بوسه بسرعه ويطلع
ولليل غاليه نايمه يمنه وهو ممرتاح
ونام رأساً بدون شي ولثاني يوم من الصبح طلع لشغله والظهر بالديوان بقى
رجعلي العصريه وجراح موجود وكاعده اقريه وهو بس شافني هيج رأساً طلع
ولليل هم غاليه يمنه وهو هنا تخبل
كالي ...

- لو انا لو هي بالغرفه
- هههههه حبيبي وين اوديها يعني
- دبري حالك تين تره طفشت روحي والله
- صار بس هالليله باجر ارتبههه

اندار ونام واني صرت اضحك على تغيره وين جان ووين صار ...

ثاني يوم العصر الجهال رادو يطلعون
واني وصيت جراح يصيحلي الشيخ
ورحت لبست التنوره الي جابهه وهذا الوردي شديته ورفعت شعري حتى يبين الظهر وضليت انتظره ...

اول ما دخل للكليدور وشافني وكف وضحك .. حضنته وهو يكولي ..
- تطلعي جمالك هالوكت بولو والي بره شلون !!
- ينتظرو مثل مانتظرت اني .. تره اشتاقيتلك مشتاقيت لحضني
- ههههه ول ابويه انا الي مااشتاك !!!
انا على ساعه اكضبلي حد اذبحو من كثر ما راسي مصدع وكاره الدنيا بالاعصاب
- هههههه يلا خلي ابرد هالاعصاب
- ايييه راضيني يلا

اخذته للغرفه وهو يفر بالتنوره من امشي ويضحك ويكولي...
- لو تضلي هالشكل اضل مسحور فيكي بنفس اللهفه لو بعد ميه عام

اخذته دللته وراضيته عن هذيج الليلتين
ورجعت ضحكته ووكت سبح ووكفت اعدله اليشمغ قبل ما يطلع حضني وكالي

- تينتي ودي اعيش هالايام غير شكل معك خلينا نسافر
- نسافر !! وين
- ايييه نسافر لابعد مكان وين ما تحبي
اي بلد يخطر ببالك بس اشري عليه ونروح
- حبيبي والجهال شلون
- حدر امي وش عليهم .. تينتي انا ودي اعيش الشباب من اول عشرينو معك
العمر يمشي وانا وش دحكت منو !!!!
ماودي اكبر واتندم على ايامي الي ضاعت حدر الشغل والرجال وماعندي ذكرى تطيب خاطري لو تذكرتها معك
خلينا نسافر ونعيش كم يوم براحه نضل نذكرهم كل العمر
- هههه حقك والله ماشي حبيبي نسافر بس ماعندي جواز
- من بكرا اسويلك جواز ياعيني لا تهمي
- تسلم ياعمري زين لعد خلي هالاسبوع يعدي وبعدها ابدا بتحضير للسفر
- هاا ليه هالاسبوع وش عندنا

- اسبوع حبيبي هيج يعني شويه راحه وهيج
- هااااا فهمت فهمت ايييه يلا انتظر هالاسبوع ويجوز يطول بعد فوكو كم يوم لحين ماخلص الجواز حتى ترتاحي على الاخر ما ودي شي يعرض علينه هنيك تين ودي الراحه وفقط الراحه
- اكيد حبيبي لا تهتم الراحه اجيبها الك ادلل
- زين عجل من اليوم فكري بالمكان
وانا اطلع الحين

بوسته وطلع وضليت متمدده على الجربايه وافكر ...

وين نسافر ؟!؟؟؟؟

#شقراء_بغداد

بارت_٦٠


بعد مرور ٢٣ يوم ...
ابتدأت رحلتنا الى تونس الخضراء عبر الخطوط الجويه الاردنيه ...
اول ماسمعنا نداء الهبوط بمطار قرطاج الدولي الشيخ كالي...

- اييييه يالحبيبه وهاذي وصلنا والحلم صار واقع
- ما صار بدونك حبيبي
- لاشبعك بتونس الخضرا واطلعها من نفسك
-ههههه اهم شي نروح لمدينه نابل مثل الروايه
-على هالخشم امري
-يسلملي هالخشم

من وكت ماسألني الشيخ عن مكان السفر كلتله تونس لاني جنت قاريه روايه تحجي عن احداث بمدينه نابل وهواي وصف بيهه البيوت البيضه وريحه الليمون بالاركان والياسمين واطباع الناس الطيبه ... تخيلت لو اعيش هالاجواء وياه وهو مااعترض بس سألني شنو سبب اختياري وحجيتله السبب بالاول ضحك وبعدين كالي ماخليها بنفسج نروح تونس ... و اول ماكمل الجواز حجزنا ...

الملابس اخذت على كد قطعتين للطلعه وقطعتين للنوم الي واله لان هو راد نشتري جديد من هناك ونغير لبسنه
روحتنا صارت بجنطه صغيره وحده

بليله السفر عرفت انه ساحب فلوس من البنك ومبلغ جبير قبل مااحجي اي شي كالي ... الفلوس الي اتعب بيها واضل اجمعها تاليها تتحصل ورث خليني اتهنى بيها الحك اجمع غيرها مدامج وياي ...

دائماً يكولي من موجوده انتي الخير يدك بابي من كل جهه وأمن ربحي يزيد بدون تعب ... واني مرات احسهه مبالغه بسبب الحب بس من اطلعت على الحسابات الي هو اتعود كل نهايه شهر يطلعني عليها ويشاركني امور شغله وفعلاً اشوف الامور زينه واضل دائماً ادعيله ماارفع راسي من اخر ركعه بكل صلاه الا واني ادعيله بالرزق والعافيه ...

ختمت صفنتي بوجهه ب..
ربي اسعده اضعاف مايسعدني ..

ومن بعدها فتحنا الاحزمه ونزلنا واخذنا النفس من هوا تونس البارد ...

اشترينا الدليل السياحي وخريطه تونس بكل مناطقها وصاحب المحل نصحنا نروح ل.. قمرت .. او سيدي بو سعيد نبات هالليله .. والشيخ اختار قمرت لانها صايره فوك من سيدي بو سعيد وكال حتى نبدا ننزل منها لباقي المناطق بالتسلسل ...

ورأساً اخذنا تكسي لمنطقه قمرت وفعلاً
جانت تستاهل واحد يتعنالهه ..
المسافه ربع ساعه بينهه وبين العاصمه والهه اطلاله على البحر ...

فنادقها حلوه والغرفه تطل على حزام اخضر من الشجر وموازي وياه حزام ازرك من هالبحر الي على مد البصر يحد المناطق على طولها ..

بهالليله نمنا من تعب الطريق من وكت
وثاني يوم بدات جولتنا بتونس ...

من الصبح نزلنا نتمشى بشوارع قمرت
اول مابدينا بريوك بين هالخضار وبعدها
تمشينا لوسط المنطقه الشوارع عريضه ونظيفه والمكان كله عباره عن ثلاث الوان ... ابيض لون المباني كلها .. اخضر لون الاشجار الي موازيه الشارع على جهتيه .. وازرك لون البحر والسما

منظر يهدىء النفس ويريح العين ..
الشيخ يباوع للطريق ويرجع يباوعلي ويكولي حلوه خوش اختيار ..

نزلنا للسوك .. لمحلات الملابس الرجاليه بالاول ...
اني ضليت اباوع للقمصان اكثرها مشجره ومخططه وبعدين انتبهتله
يحاجيني .. يريد اختارله لون بنطرون
واختاريتله جينز فاتح وهو اختار تيشرت نيلي ساده ...

جانت بدايه موفقه بهالالوان .. بعدنا بالبدايه وبالي هواي افكار اله ...

بعدها اخذ حذاء صيفي .. واني اخذت
ثوب وردي طوله ثلث ارباع والردان هم
وبي دكم بيض اثنين وياخه عريضه محدده بابيض ...

هو مااعترض على نوع اللبس هنا وضحها الي بحجايه ... كالي...
- هين احنه احرار تصرفي بالترتاحلو نفسك معي

رجعنا للفندق وضلينه متمددين على الجربايه وهو بايده الخريطه واني بايدي الكتيب مال الدليل السياحي .. يكولي اسم المدينه واني اطلعهه بالكتيب واحجيله شمكتوب عنها ...

حددنا بالقلم وجهتنا الثانيه وهي ..
... سيدي بو سعيد ...

هالمنطقه عباره عن تحفه معماريه
كل البيوت ابيض ساطع والابواب والشبابيك لونها ازرك لامع وبيهه نقوش
و محدده بإطار بلون اصفر ...
الشوارع ضيقه بين هالبيوت ومبلطه بالحجر الي لونه رصاصي ...

دخلنا لمتحف دار العنابي ... هالمتحف مكان مثالي على طبيعه بيوت سيدي بو سعيد ... عرفنا من خلاله شنو داخل هالبيوت البيضه ...

بي طابع ريفي .. عباره عن مربع بالنص بلاطه رصاصي وابيض وبوسطه حوض مربع مغلف بسيراميك اصفر واسود وبي نقوش وعليه تحفيات نحاسيه اسطوانيه الشكل وشجره طويله مغطيه المكان كله
واطارات الابواب الي من اربع جهات صايره .. مصبوغه بالازرك ومحدده بنقش اسود ناعم والباقي ابيض ...
وحفر بالحايط بشكل نص دائره مصبوغ باطار كريمي وبالجوف مالته نقوش بالازرك والاسود ... ومدخنه هم مصبوغه بالكريمي وعلى رفهه حاطين التحفيات الملونه ...
قدمتلنا العائله المالكه .. جاي واخذنا نحجي وياهم على تراث هالمكان وهمه يسألونا عن العراق ...
لهجتهم حلوه ونفسهم طيبه ..صدرهم رحب ... يكولون ...

كل فرد يدخل تونس هو صار تونسي مثلنا ... ونقدمله الورده الحمره والبيضه تعبيراً عن حبنا ومودتنا لضيوفنا ...

وفعلاً اجتي بنيه صغيره لابسه الزي التونسي الابيض وعليه الكلايد الكبار
وانطتنا الورد ...
اخذت اني الحمره والشيخ البيضه ..
ودعناهم وطلعنه ونمشي ايد بايد ...

من بعدها افترينا على المطاعم الشعبيه وتعشينا هناك .. الاكل اكثره فلفل اخضر حار بس طيب حيل طيب ...
البوراك والمشاوي والسلطات كلها الها طعم وشكل ثاني هنا ..

رحنا دورنا على فندق نبات بي هالليله وهنا اسعارهم اغلى من قمرت ..
والفنادق محليه كأنها مجمع من نمط بيوتهم .. نفس التصميم المحلي والالوان

بهالليله نايمه على ايده وسألته ...
- شنو وجهتنا الثانيه حبيبي
- نكمل بو سعيد وبعدها نطلع على نابل
-اييييي اخيرااااً
-ههههه ول يابه تهدي
- هههه ماااكدر متلهفه الهه
- وانا مامتلهفه لي
- انته مو وياي حبيبي بعد شكو
- اييييه عجل انا ادلل واطلع واشتري واوكل وتاليهه بالليل تحكيلي تعبانه
-ههههه عمري غير من الفره واحد يتعب
-ايييه عجل مانفتر بكرا نضل هين حتى ترتاحي ومالك عذر بعد
-لااااا شنوووو جايين حتى نكعد بالفندق
-والله اناا اجيت لاخذ راحتي معك مو لافتر بالشوارع
-هههههههههههههه
-اييه اضحكي اضحكي تسوي نفسك ماتفهميها هيك جديده عليكي هالحكي
- خالد شبيك تره مناسيه بس شويه ادلل عليك
- بالنهار تدللي ياعيني مو الحين

ضحكت وبوسته وهو اخذها اشاره اله
وبدا بحركاته .. خالد يحب يبدا بهداوه ويطول بكل شي ومايحبني اسكت ابد
يحب اعبرله عن كل شي بصوت او كلمه
لازم ايدي على وجهه وعيني بعينه
واحضنه هواي وبقوه ... بكل مره يبدا يتلمس جسمي اول شي يسويه يتلمس
اثر العمليه ويبوسه ..

نمنه هالليله ومن الصبح كعدني يلعب بخشمي وشعري .. اني ضحكت على سوالفه وجريت راسه حضنته وردت اكمل نومتي بس هو كالي ...

- لا تقشمريني بهالسوالف ماتنفع بعد
- ههه بس شويه حباب
- انا ودي شويه منك حبابه
-شنوو
-شنو شنو ماتعرفي شنوو

رفع راسه ويضحك بخباثه وصار يكرص برجلي من جوه اللحاف واني اكوله لا ويكولي اي وتاليهه صارت اي

سبحنا سوه وطلعنا .. اباوعله بالبنطرون شكله غييير عن لبس الشيوخ ..
مرجعه اصغر بالعمر وحليان بي اكثر

نزلنه تريكنه وبعدها بدينا نفتر بالسوك الشعبي .. تقريباً كل بيت مفتوح منه محل
للاثريات والنحاسيات المزخرفه ..
وبعدها دخلنا بوسط السوك الجبير وهذا
محلات منفصله ومتسلسله والبضاعه عابره حدود المحل من كثرتها ..

اني اتمعن بالنقوش على الاشياء والشيخ
يدور بعينه منا ومنا على شي مافهمته
بعدين دنمشي وهو جر ايدي واخذني بسرعه لمحل على الجهه الثانيه
ومن هناك اخذ كاميرا وصار يتعامل ويه صاحب المحل عليهه ويتعلم تشغيلهه
واشترى وياهه فلم ثاني ..
وضل من يمشي يباوع من عدستهه للمكان ...
وكفته واخذنه شبقات .. مالتي جبيره ومن الخوص مصنوعه ولونه كريمي وبيهه شريط وردي ومالته اصغر وهم من الخوص ومابيهه شريط ...

لبسناهن وكملنه طريقنا .. دخلنا لقصر دار نجمه الزهراء ... حسب ما سمعنا منهم انه جان بيت لرسام وموسيقي فرنسي اسمه بارون ... وباقي بي اللوحات والالات الموسيقيه والاكثر جمال منهن هو تصميم هالقصر ..

القصر عباره عن فن معماري بحت
عباره عن درج صغير يوصل لمثل سطح مربع صغير مسيج وبي فتحه من اليمنه وثانيه من اليسره حتى تمشي منها وتصعد الدرج الثاني الي هم يأدي لنفس الشي .. والسياج صاير جواه كعده على طوله مفروش زوليه رفيعه باللون الخردلي ومقلمه بالازرك والاخضر
وبالوسط طبلات باللون الازرك مربعه صغيره والارضيه باللون الجوزي المحمر وعلى طول هالقصر اكو مظلات
عاليه من جوه لونها ابيض ومن فوك لونها ازرك متوزعه على اماكن محدده بكل طابق منه ... من وصلنه لاخر واحد منهن وباوعنا لليمنه .. شفنا هالمظلات صايره مثل سكف على القصر ومتدرج اللون الازرك على المدرجات ..
والبيوت بالقبه البيضه مبينه كلها منا والمرسى الي تمعنا بي وبهدوءه جان وجهتنا الثانيه .....

الشيخ جان يصور كل شي ويصورني هم بلقطات ماانتبه عليه بيهن وبس اندار الكاه ياخذ الصوره ...

ركبنا بالعربانه الي تجرهه الاحصنه
وماينسمع بس صوت ضحكنا وحذوه الحصان وهي تطك بالارضيه الحجر والاجراس الي بركبته ...

من وصلنا للميناء الشيخ ماقبل ننزل الا
الولد ابو العربانه ينزل ياخذلنه صوره بهاي كعدتنا ...

والولد اخذ الكاميرا ونزل وراح من بعيد
اخذلنه الصوره يلا نزلنا وانطاه الشيخ فوك اجرته زياده ...

الحلو هنا احنه نمشي براحتنه .. يحضني او اشاقي شويه ..اميل راسي عليه الزم ايده كيفنا محد اله دخل بينه ..

نزلنا على الشط تمشينا وكل شويه موكفين واحد حتى ياخذلنه صوره بمكان
وكعدنا تغدينا سمج بحري على طريقتهم
ونكهاتهم التونسيه ...

وضلينا متمددين جوه المظلات على الكراسي البلاستيكيه البيض ...

وللعصر ركبنا بالسفينه جانت من بره خشبيه وبيهه فتحات بشكل اسطوانه نصعد منها لداخلهه وهناك شفنا ولد بلبس القراصنه ويسون مسرحيه راقصه
يتسلقون الشبك الي صاير بصف الشراع

ويكمزون منه ويبارزون بالسيف على انغام الموسيقى الي يعزفها اثنين كاعدين بركن السفينه ...

وبعدها صار الركص الجماعي رافعين علم تونس من الطرف كم واحد والبقيه يركصون جواه ..

عفناهم ورحنا نتمشى بالسفينه وناخذ صور ونباوع للبحر .. عصر ايدي وكالي ..
- بعمري ماانسى تونس على هالجمال الي دحكتو معك
- احلى ايام بالعمر صارت بيهه شلون نكدر ننساهه
- تين احفظي الاجواء هاذي زين وعيديها لي في بيتنا
-هههه شلون اعيدها
-مادري كيف ما تعيديها عيديها بعد انتي وشطارتك
- امممم زين زين لعد اذا هيج ناخذ شي مثل غراضهم
-اخذي الي يفيدك فيه اخذيه
-ماااشي لعد حضر فلوسك ههههه
-ههه فلوسي حاضره هو انا جبتها حتى تنصرف

وكت ما نزلنا من السفينه شربنا عصير ليمون ورجعنا اخذنا من السوك نفس مفارشهم بلون الازرك ومخطط بسمائي وابيض واصفر و شويه نحاسيات مزخرفه .. وطلعنه على محلات الملابس
بوسط المنطقه واخذنا لبستين نبادل بيهن
هو اخذ بنطرون ابيض وتشيرت سمائي وثاني زيتوني .. واني هم اخذت بنطرون
جينز فاتح وشويه عريض وتشيرت برتقالي فاتح وثاني ابيض وبي رسومات ملونه ...

رجعنه للفندق وكبل نمنه وما كعدنا لنص الليل ... هو طلع يجيبلنه عشه واني صرت اعزل بالغراض حتى نستعد لرحله باجر ...

كملتهن بسرعه ورحت لبست ثوب نوم احمر طويل وبي فتحه على طول الرجل
ومشبك من الصدر والبطن .. فتحت شعري ومكيجت شويه وصرت اكلب بالتلفزيون جان تطلعلي قناه معروض بيهه ولد وبنيه وبوضع مخجل راساً عطت وكلت ...
-يمه عزا هاي شطلعهم هنا

وبهاللحظه دخل الشيخ واني انخبصت ادير وميدير وهو اجاني ورافع حاجبه
رأساً كلتله ...
- اني معليه همه هيج طلعو شمدريني شنو قنواتهم هنا
-شو خلي ادحك

وخرني من الشاشه وضحك من شافهم وكبل طفاه واني شفتي ترجف ومستحيه منه .. وه يباوعلي ويضحك كلتله ...
- مادري والله همه هيج يطلعون
-لااااا انتي حلتلك السالفه
-يمه عزاا شحلتلي مادري بيهم والله وهو جلب ميدير القناه
- ههههه ايييه واضح
-ما مصدكني ! عزاا خاالد شبيك عفيه
- يولو ما دحكتك مصفنه عليهم .. هيك ماتحملتي النص ساعه الي عفتك بيهن
- لاااااا عفيييه

كعدت على الجربايه وضليت ابجي من فشلتي وهو يضحك بعلو صوته .. وبعدين
كعد وحضني ويكولي....
-يولي اتشاقه وش لزوم البكي
-عوفني
-هههه اعوفك وانتي بهالشكل تحلمي
-ماكو مانطيك شي وخر
-اييييه بعد انا خلصت منفعتي صار يعجبك درب القنوات كلو ع الاجانب هاا يولو
- خااااالد خااااالد شبيك والله مادري هيج يبثون بالصدفه طلعت والله
-ايييه عجل مدامو بالصدفه ماغيرتي القناه !بس هو عجبك بعد وضليتي مصفنه عليه
- لاااااا والله لااا لااااا

كمت افتر بالغرفه وامسح بدموعي وهو متمدد ويباوعلي وخربان ضحك .. رحتله وكلتله بعصبيه ...
-شنو تضحك على فشلتي يعني !! ساعه متصدكني وساعه تضحك عليه
-ههههههههههه يولوووو شكلك يجيب الضحك
-ليييش يعني ليييييش
- خهههههههه ماكدر افسرها النوب تمشي تشمري نفسك لهالبحر
- خااااالد كاااافي عفييييه كااافي
- هههههههه احدري ياعيني احدري

اخذني بحضنه وضل يكولي ..
- لو عاجبك نجرب مثل الاجانب ماعندي مشكله انا

ضربت على صدره وكمت وعفته يضحك وكلتله ...
- لااجنبي ولا عراقي بعد تحلم اعيشك بالحصار
-ههههههه انا علمودك يولي غير ادور راحتك
-مرتاحه كلشي ماريد
- اييييه واضح

ضل ياشرلي على لبسي واني رحت كبل للحمام بدلت ورفعت شعري ومسحت المكياج وطلعت كعدت على الميز وصرت افتح بالاكل وهو لازم وجهه وخربان ضحك .. كلتله....
- عوف الضحك تعال شبع بطنك احسن
- ودي اشبع بكل شي انا ماتكفيني البطن
- ماااكووو تحلم والله اليوم على هاي دكتك بيه كلشي ما تحصل
- هااا وانتي ما ودك شي يعني
-اي ماريد
- عجل ليه كنتي متحضره و
- التوووبه بعد اتحضرلك التوبه
- هههههه عند كلمتك
- اي
- زين

كعد كدامي ع الميز وصار ياكل ويضحك واني مدنكه واكل واسوي نفسي ممهتمتله بس بداخلي ميته من الفشله واسب بنفسي
شجاني وفتحت هالتلفزيون !!!!

وره ما كملنه اكل غسلت وتمددت ولفيت نفسي باللحاف وهو يضحك ويكولي ...
- يولي ما الحين كعدنا شسالفتك
- شسوي لعد وين اروح
- خليكي معي انا اونسك
- ماريد
- يولي الليل طويل بيمن نكضيه !!
- بالنووم بالنووم
- عجل نامي انتي انا اطلع اتمشى وادحك نصيبي وين بهالليل
- هاااااا وين رايح وحدك
- عجل اخذلي فزعه!
- اخذني وياك
- ناامي انتي نعسانه نامي شعندك معي
- لاا لعد تعوفني وحدي وتطلع تفتر
ابقى هنا لا تروح
- حرت معك اضل مطنشتني اطلع تلزكين فيي

ضحكت ورجعت تغطيت وضل هو يفتر ويوكف يم الشباك ويدندن اغاني وياكل عنب واني مطلعه تك عين من اللحاف واباوعله ...
تالي اجه يمي تمدد وصار يتحرش كلتله ..
- ماكو لتحاول
- حبيبتي تشاقينا وراحت
-لا حبيبي لا
- يعني تشردين هالليله والصباح كيف !!!
- هم اشرد هههه
- يلااا انا اخليكي براحتك لادحكك كيف تشردي مني الصبح

تغطى وانطاني ظهره ونمنه هالليله هيج كلمن منطي ظهره للثاني والصبح كعدت قبله ورحت بهدوء للحمام غسلت ولبست هدوم الطلعه وطلعت كعدته ..
فرك عينه وصفن بوجهي شويه وجان يكولي ...
- وين ماشيه !
- موعدنا اليوم ويه نابل عيني شنو نسيت
- ايييه
- يلاا كوم حتى ننزل نتريك
- ههه لاااااا بالله هيك بهالبساطه
-لعد شنو !
- شنوو شنوو تعرفي شنو
- ماكو اني مبدله ومتحضره للطلعه
- واناا ماتحرك من هالفراش الا اخذ تعويض الليل والصباح
- واللللله ماعليه
- ايييه عجل انتي روحي وحدك انا اضل هين اكمل نومتي
- يااا خالد شبيك هسه جايين حتى نام
- كيفك ودك نمشي لنابل تحدري وتعدلين مزاجي ودك نضل هين اكعدي واسكتي وخليني انام ..الحل عندك

كعدت على الكرسي كدام الجربايه واباوعله وهو يفر بشواربه ويبتسم
وشال الغطى من صدره وضل يمشي ايده عليه ويكولي ...
- ول مشتاكلك يا ام خشم

ضحكت ودرت وجهي عنه وهو كالي..
- هالحين ودك نضل هين ! انام يعني!؟

باوعتله وضحكت وكمت رحتله شفت هي مامنهه مهرب .. اول ما وكفت يمه اخذ ايدي وبوس الاصابع وكالي..
- ودك نابل نمشيها بر لو بحر
- ههههه بر
- تراها تكلفك
-ههههه شكد يعني
- البسي هذاك الاحمر واحكيلك على الكلفه
-ههههه تخفضلي شويه
- حسب وش ادحك من جمال
- امممم
-يلا لا تاخرينا يلااا

دفعني ورحت للحمام لبسته وطلعت لكيته واكف بالباب .. لزم ايدي وضل يباوع من فوك ليجوه وبعدين فرني وباوع من وره وكالي ...
- افتحي شعرك حتى اخفضلك كل شي

ضحكت وصرت افتحه وهو دخل للحمام
شويه وطلع وصار يتلمس الثوب على الجسم ويكولي...
- فاتتنا ليله الحين نعوضها بأثنين
-لييش اثنين
- اييه واحد الاصلي والثاني حك الزعل
-هههههههه
- وعندك الثالث حك الصبح ناخذو ضعف لانك اخرتيني عنو
- ههههههه عمرري هيج اليوم يروح هنا بالغرفه
- ويروح وش عدنا غير هالحلا يولووو
انا شيخ اخذ حكي مربع

اخذهن اضعاف واخذنا وراهه غفوه وللظهر يلا طلعنه .. تغدينا و رحنا بالباص لمدينه نابل ...

وصلنا المغرب لنابل وحجزنا بفندق وجانت غرفهم مثل الشي الاثري ... احس كأني بعالم الروايات القديمه ....

المكان كله ابيض والشبابيك والبوب ازرك .... الجربايه خشب فاتح لونهه والفرشه بيضه وعليهه كوشات بلون خردلي والزوليه الصغيره هم بلون خردلي ومطرزه بالرصاصي والزيتوني
والبلكون مستطيله وبيهه ميز دائري صغيرون ابيض وكراسي اثنين صغار ورفاع بيض وعليه منفضه كزاز دائريه
صغيره ....
وتطل على هدوووء تام بهالليل بس الهوا العذيبي على الوجه والكمر هنا كامل مبين لانه فوك البحر عاكس نوره على هالمي ... وهذا مو اي بحر هذا البحر الابيض المتوسط ... على مد العين وسعه وزايد ....

صرنا نتأمل هالمنظر والهدوء واحنه متحاضنين براحه هنا بدون مستحى من احد يجي او احد يشوف وهالشي جان الاكثر راحه النا ...

نابل تطل على شط رملي طويل والمزارع محاوطتها بكثره .. مثل بقيه مدن تونس مليانه بالالوان الابيض والازرك والاخضر ...

الصبح طلعنه نستكشف هالمدينه وبديناهه بالمتحف الاثري وهناك عرفنا من خلال حجيهم ان نابل صايره بمنطقه شبه جزيره يسموها " كاب بون " وهالجزيره من كثر جمالها يسموهه "حديقه تونس "
قررنا بعد ما نكمل جولتنا هنا نروح نشوفها ...

رحنا بعدها لسوك اسمه سوك الجمعه
وهناك شفنا المحلات مليانه بالاكل الطازج والشعبي واكلنا من كل واحد شويه .. واخذنا هدايا صغيره وناعمه مصنوعه من الفخار و الحياكه اليدويه

للعصر تمشينا على رمالها الناعمه البيضه .. وكفت وفتحت ايدي على وسعها وضحكت وهو صار ياخذلي صور من بعيد حتى يطلع البحر من وراي ... وكالعاده نجلب بواحد حتى ياخذلنه صور سويه ..

عافني كاعده على الرمل والعب بي وهو راح يحجي ويه كم واحد وره شويه رجع
وكعد يمي وكالي ....
- امشي نلحك بهالقارب يطلع لجزيره زمبره
- بعيده ؟
- لاا هي تابعه لنابل امشي يلا

وكف وكومني واخذت جنطتي ومشينا للقارب جان ويانه اثنين ولد واثنين بنات
لبنانين ... جانو حركين كلش ابد ما كعدو
يتمضحكون بعالي الصوت وواحد يضرب الثاني ويغنون ويصفكون ومسوين جو حلو بنص هدوء البحر ...

اخذنا فره بنص جزيره زمبره وبعدها للجزيره الكاتردائيه والجزيره الصغيره لانتورشو ...
اكثرها عباره عن صخور كبار صايره مثل جبل صغير بيهن الي مسويات مثل مضيق وبينهن المي صاااافي وشفاف وبيهن الي متباعدات ...

نزلنا من القارب على وحده من هذني الصخور و وكفنا على قمتها وصرنا نباوع لكل المكان واخذنا صور وجان اكو صخره بيهه بس نقش حروف رحنا احنه هم اخذنا السجين من ابو القارب وصرنا نحفر اسامينا ...
هو كتب ... خالد وتين /٩٦...

جانت احلى فقره هي كتابه اسامينا على صخره بوسط جزيره من جزر نابل

من بعدها رجعنا للقارب ورجعنا للميناء
بوكت الغروب والمنظر جان يسحر لدرجه ان الشيخ صار يتلمس ايدي على طولها ومخلي راسه على راسي وهو ما مسويها من قبل هيج كدام العالم ...

رفعت راسي وشاورته ...

- انته بجمال هالشمس حبيبي احبك
-هههه روح روحي انتي تين ياحلاه حبك ياحلاتووو من نعمه

ضليت متبسمه بوجهه وبعدين رجعت راسي على جتفه وضلينه نتمعن بالجو الحلو لحد ما وصلنا الميناء ...

رجعنا من بعدها للفندق ونمنا و كعدنا بالعشره بالليل لبسنه وطلعنه تعشينه
بمطعم صاير قريب على الشارع يعني احنه كاعدين على الميز وبصفنه الناس تتمشى بكل هدوء وهالشي من احلى مايميز تونس .. هداوه ناسها واحترامها وعفويتهم وصدرهم الرحب وروحهم المرحه ...

وثاني يوم طلعنا لجزيره كاب بون
ضلينه صافنين بجمالها ...
هالجزيره موقعها مميز .. صايره مثل ركن على اطراف البحر المتوسط
ماكو كدامها ولا بصفها اي شي غير البحر ....
والمي هنا شفاف باماكن وغامق الزراك باماكن ثانيه ....
على الحد ويه الرمال البيضه يتدرج لون المي من الفيروزي الى سمائي الى الازرك ويفصل بين لون ولون رغوه المي البيضه ...

مشينا على اطراف هالمي حفاي ونستشعر برودته الحلوه ويه نعومه الرمل ...
اخذني الشيخ ركض للطرف الثاني
وهناك من وكفنا جان اكو مجموعه غواصين والشيخ كالي ...
- تجربين الغوص ؟
-لاااا اخاف ماعرف اسبح
- انا معك يولو وهو غوص بامان انتي
- هاا خاف اغرك
-يولو غووص غووص تغركي بس بامان
-هههههه يلااا بس بمسؤليتك
- ايييه يولو اييه

راح يحجي ويه الغواصين واجتني بنيه لبستني البدله مال الغوص واني ارجف تجربه جريئه وتخوف بس ماحبيت يضل شي مااجربه هنا ... خلتلي الاوكسجين ورحت امشي بالكوه للشيخ وهو يضحك
واجه شاورني ....

- تضلي ماسكه يدي لو حسيتي بشي تعبك اضغطي عليها حيل واشريلي باصبعك لفوك حتى نطلع

اشرتله اي لاني ماكدر احجي ولابسه هالخوذه مدري شنو بالوجه وهو لبسهه وصعدنا بالقارب .. احنه والاثنين المدربين وويانه ولد هم ...

وصلنا لنص البحر ووكفو القارب وصارت دكات كلبي تنسمع ردت اتراجع بس هو جر ايدي وكمزنا لنص البحر
اني جنت مغمضه عيوني حيل ومن صرنا بنص المي فتحتها ....

واشوف دنيا ثانيه .. عالم من قصص الخيال ... الضوا الازرك على هالخضار الي جوه المي منطي انعكاس بديع والحجر والسمج الملون والصغار منه والكبار يسبحن كدام عيني ويطلعن من جوه ايدي ...

واني بس مجلبه بايده واحرك برجلي والمدربه وياي تعلمني شلون ارتفع وشلون اغوص اكثر والتاف للجهه الثانيه
تجربه ماتنسي ولا تنعاد ولا صارلها مثيل بالجمال ....

بعد فره بعمق البحر طلعنا وفتحنا الخوذ واخذنا نفس وضحكنا بعلو صوتنا كلنا
واني عيني بس لعينه واكول بيني وبين نفسي ....
شكد عظيمه عطاياك يارب ..

صعدنا للقارب ورجعنه لاطراف الجزيره
وتغدينا هناك السمج البحري ويه الخبز المشوي ... ما صدكتهم من كالو هذا خبز مشوي !
كلت شلون يصير ينشوي العجين ؟
بس طلع صدك هذا خبز مشوي شلون صار مادري بس هو خبز ...

بعد الاكل ضلينه بواحد من المنتجعات الصغيره ... ارتاحينه ونمنا بيهه واخر العصر رجعنا طلعنا نتمشى وشفنا جماعه يلعبون تنس راح الشيخ شارك وياهم
واني ضليت اصوره من مكان كعدتي
والحلو هنا الشيخ يفتر بالشورت ..
بعد اقناع وحيله وتعب يلا خليته يلبسه
ويطلع بي على البحر ..
جان شورت سمائي وتيشرت ابيض
مطلعه اجنبي ويه هالشكار والخدود الورديه ....

رجعلي بعد ماتعب من اللعب وانطيته منشفه مسح عركه وضل متمدد وراسه على رجلي ويكولي....
- هالمكان جنه والله
- اي والله واحلى مابي هادىء ومنعزل
-اييييه هو هذا الي كان ودي نسافرلو
واجتنا عدله ههههه حليانه يولو
-ههههههههه الجو الحلو وياك مبين تأثيره عليه
-ايييييه كثيييير اقلك تين سمعت هين في عيون مي حاره وكبريتيه مثل الي عندنا بحديثه
- صدددددك وين صايرات
- قالو هين كريبه
- يلا لعد خلي نروح قبل ما تظلم
- ههههه نخليها بكرا
-لاااا اليوم اليوم يلا حباب يلا

كومته ورحنه اخذنا واحد مرشد هنا للعيون الحاره ... من بعيد نشوف البخار يتصاعد من الكاع ياسبحان الله مامعروف شنو سبب حرارتها هيج ...

كعدنا على حجارات يمهه ومدينا رجلنا بميها وجانت داااافيه حيييل .. صرت اغسل رجلي على طولها منها وهو يغسل ايده ووجهه واني هم غسلت وجهي وركبتي كلش المي دافي وحلو هنا ...

وهالمكان بي هواي ناس متعنين علمود المي الحار هذا ..

رجعنه من بعدها للمنتجع وتعشينه مشاوي ويه مجموعه من الشباب جانو مسوين حفله شواء واندمجنا وياهم بالسوالف والضحك وهمه جانو نص تونسين ونص من المغرب وحجاياتهم حلوه وضلو يسألونا متزوجين شعدكم جهال وين عايشين والشيخ يجاوبهم على كل شي ....

صار الجو بارد بالليل فعفناهم ورجعنه لغرفتنا تحاضنا وتلفلفنا بالغطى وبدا وكت تعويضات الشيخ ... لان كل ما تعبر ١٢ ساعه بدون شي يعتبرها ضياع لحقه الشرعي ماعرف هالقوانين منين اصلها بس انفرضت عليه بعد ...
يكولي حقي مرتين باليوم واحسبهن ساعه ساعه متضيعين عليه الليل ...

بس هي المره تحتوي على مرات ومتنحسب المهم انها مره صبح ومره ليل شكد بيها تزيد تقل هاي مره انحسبت بعد

ثاني يوم كعدنا على اصوات الطيور
شكد حلو صوتها باول الصباح ويه صوت المي والهوا العالي ...
بحيث اني من جماليه الجو كضيتهه بس اضحك وابوس بي وهو متختخ ...

سبحنا وطلعنه تريكنا واخذنا غراضنا وودعنه هالجزيره ورحنا ...
.. لمدينه الحمامات ..

اول مابدينا بالمدينه القديمه نزلنا نباوع لبيوتها البيض واطارات ابوابها بالاصفر والازرك منظر يوحي بالراحه للعين
اختارينا فندق بمثل بساطه الاحياء الحلوه هاي وخلينه بي غراضنه وارتاحينه شويه وبعدين طلعنه نتغدا بمطاعهم الشعبيه وهنا جربنه اكله الكسكسي ...
عباره عن سميد خشن مطحون من الشعير ومطبوخ على البخار وياه لحم وفلفل اخضر وبصل وقرع وحمص وبتيته للزينه .. طعمه مالح وطيب كلش يموع بالحلك من كد ما مستوي على البخار ...

وبعدها جربنه طبق السفه .. نصحتنا بي ام المطعم للتحليه ... وصارت تحجيلنه عن مكوناته .. هم كسكسو بس منكع بالمي وضايفين اله زبد وشكر وقرفه
ومزيني بالتمر واللوز المبروش
خلصناه كله من كد ماطيب .. ومن طلعنه كالي ...
- حفظتي اسمه
- اي حفظته
- ايييه من ندخل غير مطعم هم نطلبو
-هههه ليش ما نجرب غيره
- ايييه نجرب لكن هذا بعد ناكلو مايشبع من ماعون واحد .. ولزوم ندور كتلب طبخ تونسي
-هااااا
-ايييه عجل ننحرم من هالاكل بعد ! مايصير لزوم نحافظ على لذتو ببيتنا
يابه
- ايي اييي وهم لازم اخلص الكتاب بشهر
- لاااا على راحتك مو كل يوم ناكل تونسي هين مااستعجلك انا
-هههههههه والله ياسوالفك
-مايعجبك!
-لااا على هالراس عيني

كملنا فرتنه واخذنه ملابس .. اني اخذت ثوب ابيض ساده من فوك وتنورته هم بيضه وبيهه دوائر سمائي وهو كلوش ووياه حذاء صيفي جوزي .. وهو اخذ قمصان نص ردان واحد رصاصي والثاني بيجي ...

بأثناء فرتنا انتبهنا على مناره عاليه بيضه مستطيله وبيهه زخرفه بلون اصفر ببدايتهه ... رحنا عليهه وقرينا هذا

مسجد سيدي عبد القادر ... دخلنا للمسجد وشفناه شلون واسع ومرتب واللون الابيض زايده جمال ..

اخذنه بيه صور وطلعنه وضلينه نباوع بالكتيب الي عدنا وقرينا اكو شي اسمه
" قصبه الحمامات " ...
اخذنا تكسي ورحنا عليهه ...
جانت عباره عن مكان اثري جبير كلش جبير وبي متحف .. عرفنا من خلاله ان هالمكان اثره يرجع للقرن ال ١٣ وبي
لوحات تحجي عن الاحتلال الاسباني
وهواي اشياء تاريخيه ...
ومن بعد ما طلعنا من غرف المتحف شفنا فناء بي اشجار جبيره تمشينا الهه وشفنا بالاخير اكو درج طويييل وقديم ..
رحنا ركض صعدنا عليه ولاخر ما وصلنا نسانه تعبنا المنظر الحلو الي يطل على ارتفاع للبحر .. ويشوفنا كل معالم الحمامات .... من كل جهه هو مسيطر
وكفت على الطرف ولزمت القبعه وصحتله ...
-صوره هنا صوره

ضحك ورأساً رفع الكاميرا واخذلي صوره وبعدها خليته هو يوكف واني اخذتله وماكدرنا ناخذ سوه لان ماكو احد هنا غيرنا ...

نزلنا وكعدنا ارتاحينه شويه وشربنا مي وبعدها رجعنه للفندق ونمنا نومه عميقه
لحد الليل يلا كعدنا ...

طلعنا بالليل نتمشى وناكل لفات واني كلتله ...
- خالد خلي نخابر نسأل على الجهال بالي يمهم والله
- هااا حنيتي
-ههههه ايييي .. دخابر عليهم حباب
- اييه يلا امشي ندحك وين هالتلفون

مشينا ودورنا محل عنده تلفون او بالشارع ولكينه بعد فره طويله مكان تلفون عمومي ....

خابر على بيت صياح وصار يحجي وياه ويضحك وهو محد يعرف احنه بتونس
كلهم عبالهم بشغل بالشام ...
وره شويه انكلبت ملامحه للشيخ وضل ساكت ويستمعله وبعدين ودعه وسد الخط

كلتله ....
- هااا خير الجهال بيهم شي
-لاا زينين
-لعد شبيك ؟ صاير شي بالشغل!
-لا لااا
-لعد شنوو ليش ضجت
- ااا هوو .. ام جراح عاودت البيت

يتبع..