#الجوزاء قل له : "أنت موهوب أو "أنت متكلم رائع !" معجب بحكمتك وجاذبيتك بالتواصل وتغيير الحديث !❤️

#الأسد قل له : "كم أنا معجب بأناقتك!" أو "أفتخر بك !". حاول تحفيز التفرد الذي يشعر به عن نفسه أو كرمه❤️

#العذراء قل له : " لديك ذوق جيمل في جودة ملابسك!" أو "أنا أحتاجك!" أثني عليه لأدائه في المنزل أو العمل أو احتضنه ❤️

#الميزان قل له : "لديك رأي مثالي !" أو " حاول ان تفكر بي!" أثني على مظهره أو اخرجه من الموقف الحرج الذي يمر به وأحمل عبء الموقف عنه.❤️

#العقرب قل له : "سأمنحك اهتمامي الكامل!" أو "أنت مثير جدا!". يستسلم العقرب عندما يتلقى انتباهك على جميع المستويات ويشعر أنه مهم جدا لك .❤️

#القوس قل له : "سأذهب معك ومع جنونك !" أو أعطه مفاتيح سيارتك للخروج !" يريد القوس من تلقاء نفسه أن تبدو أنك تحب جنونه وتفاؤله حتى عندما يكون في حالة غضب.❤️

#الدلو قل له : "لا اصدق كم أنت على علم بكل شيء!" أو "أنا أفهمك تمامًا!" فتح كمبيوترك المحمول ، انشر الصحف على الطاولة! أعطه الإثارة ...❤️

#الجدي قل له : "لديك أحترم كبير بقلبي ؟ أو "أنا أحترمك بشكل غير محدود!". أو خذه للبحر أو للطبيعة بشكل عام. ❤️

#الحوت قل له : "لقد تمكنت من ذلك بشكل رائع!" أو "كيف تشعر الآن !" أشعره بأنك تشعر به و أحطه بالأمان وأشعره بمدى جمال روحه وأحلم معه .❤️.

#شقراء_بغداد

بارت_٥٦


فتحت الباب وشفت ام جراح واكفه ولافه عبايتهه على نص وجهه .. خفت من جيتهه بهالوكت بالذات ووحدهه هم
كالتلي ...

- خليني ادخل ياعروووس زحمه وكفتي هين ياام الاصول
-اي العفو تفضلي تفضلي

سويتلهه مجال ودخلت وضلت واكفه بالطرمه ..كلتلهه...
- اا تفضلي نكعد جوه احسن
-لاااااه ماني جايه لاكعد ... دحكي انا
لا حبيتك ولا طكتك من يوم ما تربعتي ببيتي لكن انا ظلمتك والله اخذ بحكك مني
سلب من يدي كل الي كنت انعم فيه وخايفه لا يضل هالذنب بركبتي ويسودلي عيشتي كل العمر ... واليوم انا جايه حتى تبريني الذمه فيه
- على بختج داده هو شكو بينه صاير وهيج تحجين !!
- ما حكولك وش صار؟
- لاا والله لا ادري شصار ولا احد حجالي
- عجب ما ذاعو وصيتو بالسالفه
- منو تقصدين !!
- من غيرهم عاد لاتغشمي نفسك
دحكي الحين انا لزوم امشي لكن ابريني الذمه عن الي صار
-هووو شصار احجيلي خلي افتهم شنو
-اتعذر انا

كالتها وطلعت وراحت ركض لاخر الشارع ما رجعت لبيتهه .. سديت الباب وطبيت ضليت صافنه ..شنو الصاير؟
شبيهه هاي !!

رحت احضر الغدا واجوي غاليه وجراح
اخذتهه حضنتهه وضليت شايلتهه وابوس بيهه وهي تحجيلي شسوت البارحه
خليتهم كاعدين يمي بالمطبخ واني كملت تحضير الغدا ...

رجع الشيخ وجراح جان كاعد ويباوعلنه
اثنينه ارتبكنا وسلمت عليه عادي من بعيد وحطيت الاكل تغدينا سوه و وره ما شرب جاي راح للغرفه .. الجهال نامو
غطيتهم وعفتهم بالهول ورحتله ...

جان متمدد وصافن بالسكف .. شلت البطانيه واجيت بصفه وهو اندار باوعلي وابتسم .. جنت مدده رجلي بس سانده ظهري على المخده وهو متمدد قربت راسه يمي وهو اخذ ايدي خلاهه على ركبته وكالي ..
- مشتاكلك تين
- واني هم مشتاقتلك
- بكرا نمشي للجلسه الصبح
- والشغل ؟
- خلص دورك بالشغل
-شنووو
- ايييه انا خليت نجيب بدل عنك وعيني عليه بكل شي وهو بعد ماكصر وماشي على الاسس الي بديناهه ..انتي الحين حرمه الشيخ مايجوز لك تشتغلي بس تدللي
- ههههه خالد هذا شغلنه وتعبنا عليه ليش خليت غيري بي
- ياعيني ما يرضيني تشتغلي انا ودي اعاود البيت ادحكك متحضره لجيتي وراحتي مو اعاود معك وانتي تعبانه وتكضيهه ركضه بين هاذي وهذيك
خليكي شغلك هو راحتي ابدعي فيه
- صار تدلل هذا احلى شغل
-احاسبك لو كصرتي فيه لا ظنك اتساهل انا بالشغل
- حاسب عيني انته ابو الملك بعد منكدر نعترض
-هههه يولوووو
-هااا نسيت .. خالد اريد اسألك شي بس فدوه جاوبني
- اييه وش هو اسالي
- ليش متعارك ويه ام جراح ؟

وخر من حضني وضل يباوعلي وعاكد حواجبه وكالي ..
- وش جاب هالسالفه الحين !!
- لان هي اليوم اجتي عليه الصبح وره مطلعت
- هيييين !!!
- ايي هنا وكفت دقيقتين و راحت
- وش جابهاااا هين حكتلك شي ولا تمشكلتوو
-لااا لاا بس كالتلي شغله وراحت ماصار شي
- اييييه وش حكت
-كولي شسوت واحجيلك
-تييييينه ما تعاندي يولو احكي
- احجيلي حباب مو طلبت منك تحجيلي ليش ضامهه عليه
- حكي ما يسوه تسمعيه ما عليكي منو
- هي حاجيه عليه مو ؟
- وش حكتلك فهميني يلا بلا مجادل
- كالتلي ابريني الذمه اني اذنبت وغلطت بحقج والله سلب مني كلشي جنت انعم بي
واخاف لا هالذنب يضل يسودلي عيشتي
سالتهه شنو شصار محجتلي بس اعتذرت وراحت

وخر الغطى وكام وصار يفتر بالغرفه ويفرك بوجهه واجه يمي وحجالي بتحذير ..
- لو سمعت منك او من غيرك مره الثانيه انها عتبت باب هالبيت ولا سمعت ان بينكم كلام ثقي بالله اهجمو للبيت على راسك
- شبيك عيني اهدء هسه هالاعصاب ليش
- مااا تجادلي بالامرر تين
- صار عيني صاار هاي مثل متريد يصير تدلل بس اهدء

جريت ايده وكعدته يمي وهو ضل يستغفر كلتله ..
- ليش هيج كارهه ! اذا سامع حجي عليه منهه فعادي سوالف نسوان تصير واني هم مسامحتهه لو حجت عادي لتكبر الامور
- تينه السالفه ما هي مثل فكرك هذا وانا مو صغير واكف على هرج الحريم هذا
انا بكل شي اتأنى واجر خلك لكن هين
انا ماكرهتها لاني حبيتك ولا تركتها لاني رغبتك لاااا والله انا اعرف حك الله وامشي عليه وهذا مو حك لكن الي دحكتو لو سكتت عنو فلزوم احلق هالشارب وانزع هالعكال واكعد حدر امي احسن
اظن هالحكي يكفي ان تسدي على السالفه وتسمعي كلمتي وما تحكي معها حرف واحد

جانت نبرته عصبيه ومنصي صوته بيهه
وعاكد حواجبه وميباوع لوجهي ..
عرفت هالموضوع اكبر من حجيهه بي
والشيخ متأذي من فعلهه ..

ميلت راسي على جتفه ولزمت اصابعه وكلتله ...
- تأمر امر بس لتضوج وهاي السالفه انسدت بعد مااحجي بيهه والله
- تينتي كل هذا يصير لمصلحه الكل
لزوم كل بشر يعرف كدرو ويلزم حدو
والي يشيخ على شيخو ينداس ومايضلو اثر
- شيخ الشيوخ انته وكلهه تروح فدوه لرزانتك وعقلك

باوعتله وضحكت وهو خفهه شويه وضحك وحضني .. كلتله ...
- تعال نام يلا
- ايييه بالله حضنك يجيبو للنوم كوه

ضحكت ورجعنا تمددنا وضل مخلي راسه بركبتي والعب بشعره لحد مانام

نزلت نفسي شويه وصرت بحده وخليت وجهي قريب وجهه وضليت صافنه بي

افكر شلون اسعده بالي اكدر عليه هالايام ؟ شنو اسوي واخليه يستمتع باول ايام اله وياي ؟

ضليت افكر واتمعن بتفاصيل وجهه
رموشه الشكر حفظت تصفيطتهن وشعره كل شويه ارفعه من كصته واباوع لخطوط شفته الي مبينه شويه منها سنونه
الناعمه وحبيت انتظام نفسه الدافي هيج قريب مني ماضجت منه مثل اول مره
صدك صرت احب قربه وماحسيت الا
عليه فتح عينه ويباوعلي ويبتسم ..
رأساً درت وجهي وغطيت راسي وضليت عاضه شفتي واغلط على نفسي
وهو مااحس منه بس جسمه يهتز ..
تقرب وخله راسه بركبتي ويكولي ...
- لا نمتي ولا خليتيني انام

انداريت عليه وكلتله ..
-ليش منمت !!!
- ماعرفت انام وانا احسك هيك قريبه وتدحكيلي
- ياااااا شمدريييك عزاا
- هههههههه يولو انا حتى لو مغمض هالعين مفتح هالعكل بعدك ما تعرفي انا كيف اتحسس لكل شي كريب ولا بعيد
- والله عيني خوفتني لعد بعد التوبه اذا اعيدهه انام قبلك احسن
-هههههههه يولو خليها هيك انا كنت مرتاح

تلمس اصابعي وشبك اصابعه بيهن ويكولي ..
- احب فكرك ونظرك كلو لي

ابتسمت ودنيت راسي عليه وهو كالي ..
- طمعان فيكي تينتي طمعان بكل تفصيل
- كُلي باسمك

ضل محاوطني بايده ومخلي راسه على راسي وشويه واندكت الباب واجانه صوت جراح يكول ..
- يابه ودنا نطلع لبيت حسن
- روحو يابه روحو وكفل الباب وراك
-ان شاء الله

راح واني كلتله ..
- لو طالع شايفهم مو احسن
- لااا ما عليهم شي

تقرب وصار نص جسمه فوكايه وعينه بعيني .. حسيت بارتباك بهيج قربه ونظرته .. كلتله ..
- خالد
- ياعينو

كالها وصار يمشي خشمه على كل وجهي
واني حسيت للحظه بعد مالي سيطره عليه وماعرف شسوي ابعده اخاف يضوج اخليه اخاف يزيد اكثر ضليت مبعده عيني عنه وهو جر نفس قوي
ووخر وكالي ...

- جوعان سويلي شي اكلو كبل مااطلع
- ماشي

رأساً طلعت ورحت للمطبخ اريد الزم شي ايدي ترجف بعدين ارتاجيت على السنك وضليت اهدء بنفسي وغسلت
ومن سمعته طلع من الغرفه سويت نفسي افتح بالطباخ حتى ماابينله هو مضوجني
بشي ...

سويتله اكل واخذتله صينيه واشوفه يباوعلي بقلق .. ابتسمتله وكعدت يمه
سويتله لفه صغيره ووكلته وهو بعده يباوعلي بشك بس اني طنشت الموضوع
ادري انه يحاول بكد مايكدر والشي صعب عليه ..

كلتله ..
- اخذني وياك للشيخه من تطلع
- زين
- ووكت العشه تعال تعشى وياي مو تاكل بالديوان عفيه
- لو كان عندي ضيوف مكدر اجي
- اي اذا ماكو تعال حباب
- ان شاء الله

شرب مي وكام .. رحت اخذت الصينيه للمطبخ فرغتهه بالسنك ولبست عبايتي وطلعت وياه .. اخذني للشيخه وراح للديوان ..

ضليت كاعده وياهه وهي كل شويه تسألني ..هاا ولدي دللتيه ؟ هنيتي بليلتو ؟
واني كلشي واكوللهه اي ...

للمغرب رجعت حضرت العشه وضليت انتظره وكاعده وحدي بالبيت وما رجع
ولل ١١ ونص رجع ووياه الجهال
واول مااجه عليه كالي...
- ول يابه ما دريت انك عاودتي هين وكاعده لوحدك ظنيت للحين مع امي
-لا رجعت من زمان

اخذت غاليه ورحت غسلتلهه وبدلتلهه واجيت عليه كلتله ...
- افرشلهم يمنه عادي لو تضوج ؟
- لاا افرشيلهم هين دافي المكان ماعليهم شي
- ماشي

اخذتلهم فراش وفرشتلهم بالهول ومراضيه على هالشي اضوج يبقون وحدهم بس مااحب اعارضه ..

ضليت يمهم كاعده لحد مانامو مغطيتهم كل واحد بطانيه ثخينه ولحاف وغاليه يمهه لعابتهه ومجلبه ببلوز جراح

اطمنت عليهم ورحت للغرفه شفته باقي بفانيله ومتغطي لحد بطنه وحاط ايده وره راسه ويباوعلي ..
ماحجيت شي اخذت ملابس ورحت للحمام غسلت وبدلت ورجعت للغرفه
وكفت افتح ظفيرتي وهو كالي ...
- انا مو موصيكي تضلي فارده شعرك طول ماانا موجود
- اي بس انته ماموجود حتى افتحه
-ههههههه ول يابه التينه زعلانه
-لاااا
-ايييه ايييه مبين لاا

كملت فتح شعري ورحت للفراش تمددت وضليت مخليه ايدي على عيني وهو يضحك .. تقرب حضني وكالي..
- ياعيني مادريت انك وحدك بالله ظنيتك بيتنا بعدك
- بس اني كلتلك انتظرك
- وحكيتلك لو عندي ضيوف مكدر اجي
- عادي ماصار شي
- والله ؟

هو يغير صوته كلش من يكولي هيج
يخليني غصب عني اسكت واخضعله
وهو استغلهه وضل يشمشم بشعري ووجهي ويكولي ...
- انا اعذب نفسي بنفسي ادري لكن مكدر اتجنبك والله

جر نفس ووخر مني وطلع بره بدون ميحجي شي ..
ضجت كلش انقهرت محبيت هالوضع ادري بي ممرتاح وحتى اني ممرتاحه
مادري شديصير حتى حجيه احسه متقيد بي وياي هو كله يومين بس احسه ساعه الساعه راح ينفجر ..

متحملت اضل هنا رحت طلعت ادور عليه فريت البيت كله مالكيته .. ضجت اكثر ..يعني وين يروح بهالليل !!

ضليت كاعده بالطرمه واهز برجلي لحد ماا رجع .. وكفت وهو ضل يباوعلي متفاجىء ...
رحتله بسرعه حضنته وكلتله ...
- اسسسفه خالد اسفه
- ليييه الاسف ياعيني وش صاار
- ماريد اتعبك والله اسفه بس لتضل تروح هيج فدوه
-هههههه والله دامك تخافي وتنتظريني هيك اضل اطلع عجل
- لاااا شبييك

باسني بخدي وهو يضحك وكالي ..
- ما تخافي انا امشي لحتى ادخن بره عند الباب واعاود وانا مكاني بحضنك مالي غيرو

ضحكت ورجعت حضنته وبعدهه دخلنا للبيت وهو قفل الباب واخذني للغرفه
رجع نزع دشداشته وتمدد وخله راسه على ايدي .. ضليت العب بشعره وعجبني المس اذنه رأساً كلي ..
-لاااااا خليكي بشعري بس
- هههه ماشي تدلل

رجعت ايدي لشعره وهو مغمض واني بديت انعس ومدري شلون غفيت ...

كعدني الصبح وتريكنا واخذنا الجهال وطلعنه وديناهم لبيت الشيخه ورحنه للدكتوره ...

وهناك مثل كل مره يطمني بعيونه ويشجعني ويكولي باقي انتظرج هنا

سلمت على الدكتوره وهي كلتلي ..
- اليوم اريدك انتي الي تسأليني وانا اجاوبك
- اسالج بشنو
- بكل تفصيل يخطر بالك .. اي موضوع مو واضح عندك او ما فهمتيه لليوم اسأليني عنه ..يلا فكري واسألي اول ما يخطر بالك

ضليت صافنه وافكر شسألها .. وهي ضلت ساكته وتنتظر سؤالي .. تالي كلتلها..
- ليش جنت انسى وهسه لا؟

- اسمعي في علمنا ودراستنا اول ما علمونا عليه ان نخلي اساس ببالنا هو
انو عقلنا احنه الي نتحكم بي ومن نفس مركز تحكمه بينا

-شلون يعني؟

- يعني تخيلي هين عندنا تؤامين متماثلين
ولنفترض انهم ولدين وواكفين هين واحد مقابل الثاني وبينهم قطعه حلو واثنينهم
جواعى ويريدون هالقطعه وبدات المنافسه بينهم حتى يحصلوهه ..
دحكي همه اثنينهم نفس الشكل يعني كل واحد منهم يتخيل كانو يواجه نفسو
لكن الفرق هين بالعقل صح انهم يملكون نفس الجينات ونفس الدم ونفس العقل لكن
طريقه تحكمهم بي مختلفه .. هييين الاختلاف هو الي راح يحدد اي واحد منهم يكدر يحصل هالقطعه ..
لو قسانهه بالمؤهلات الجسديه والرغبه للحصول عليها نلاكيها متساويه لكن الفكر وليس العقل الفكر هو المختلف بينهم .. والفكر يحدد شق طريق المشاعر
بالانسان .. المقصد هين ... ان التؤامين
هنه احنا بكل واحد مننا اثنين يتراوحو بين الرفض والقبول وبين المقدره وعدمها وبكل مره احد منهم يغلب ...
وهذا الي قصدتو انو احنا الي نتحكم بعقلنا
من خلال الفكر نكدر نصنع فكر جديد منافي لاسس الفكر الاولي وهيك نتحكم بالجانب الثاني وندحض قدره تأثير الجانب الاول .. كل ما زاد وعينا بصالح فكرنا الجديد واهميتو قلت بالمقابل قدرات فكرنا الاول ويضل هيك يقل بالتدريج لحد ما ينسي

- هاا فهمتها ..يعني اذا هيج اني كدرت بتغيير فكري اني اغلب مخاوفي وبذلك تلاشى عندي النسيان

-بالضبببط ..انتي كنتي تتغاضي وتحاولي تتناسي ما واجهتي واعترفتي مع نفسك
انك تعاني من تعب سببو كذا وكذا
وهالشي لانك ما ردتي تذكريه وعيشتي عقلك بجو جديد خلقتيلو بيئه جديده حتى تتناسي بيها يضل يتراوح عليكي تأثير الماضي بين فتره وثانيه لانو موجود اثرو موجود عندك مانمحى ولا تواجه حتى ينتهي مثل ما تخيلتي بالاول انو انتهى
لااا كلشي مانسدو بايدنا يضل مفتوح و الماضي ضل يرجعلك لانك ما سديتو بابو انتي تجاهلتي وهذا مو النهايه
النهايه بدات من هسه من اصرارك الجديد ووعيك الزايد باهميه حياتك الهانئه هين ابتدينا بنهايه الدرب حتى نسد هالباب

- اي فعلاً اني جنت اتناسى .. اتناسى لاني اخاف اتذكر واخاف اعترف اني تأذيت بسببهم ..اخاف اشوف نفسي تغيرت بسبب همجيته وبسبب قراري بموافقتي عليه كلها جانت تخوفني واكثر بعد اكثر هواي شغلات دكتوره كلها تتجمع بلحظه وحده

- كلها بدت تنتهي يا حلوه ما تخافي
هسه وضحت الفكره

- اي وضحت وكلش ارتاحيت بفهمها

- هو الي يهمني راحتك .. هسه بعد اسأليني شي ثاني حتى اوضحلك فكرتو

- شلون اكدر اواجه اكثر ؟ يعني شلون اعرف اني داتحسن

- تعرفيها بشغلتين ... الاولى حب نفسك وعنايتك بشبابك واهتمامك الخاص باولوياتك .. والثانيه ... بتقبلك لزوجك
تقربك منو ، مبادرتك بشي جديد معو

- زين اني دالاحظ تغيير على نفسي
هواي ..يعني ممكن هنه شغلات بسيطه بس ماجانت موجوده

- كل صغير يأدي لكبير شنو هالتغيير احكييلي عنو؟

- يعني لبسي اهتمامي بشكلي بالاخص اذا موجود الشيخ لازم بكامل الاناقه وكل تفصيل احسبله حساب ..العطر تسريحه الشعر حتى اللبس النهار شكل والليل شكل والصباح الثاني شكل .. المكياج
احب اتمكيج بشي بسيط ووو اكو شغله هم صارت

- اييي فرحيني اكثر شنو هي

- مو قبل حجيتلج ان يضوجني نفسه وقربه ... هسه لااا يعني هي فتره قليله كلش بس تغير هالشي ماعرف شلون والله بس لكيت نفسي احب اتقرب من وجهه واشتمه واحس بقربه واضوج لو ابتعد
مادري شلون صار هيج بس بسرعه تغير

-هههههه ويتغير بعد الاكثر ان شاء الله
مدامك هيك محبه للتغير تتغيري وتعجبيه وتعجبي نفسك بعد

- ان شاء الله دكتوره ..اتمنى يصير هالشي باسرع وكت لان ديضوجني وضع الشيخ

- احكيلي عنو شلون تصرفو معك

- زين تصرفه .. يعني هو ما يضوجني بشي ابد .. وكلش حذر كلش .. حتى لو ماسألني ضوجتج بشي الكى هالسؤال بنظرته وقلقه من يراقب كل حركاتي

- زين وتقربو منك شنو وضعو ؟

- على كد ما يحضني وبالاول جان حذر بيهه بس من اطمئن اني مرتاحه يلا صار يكررهه

- ورغبتو شنو دحكتي منها ازيد من الحضن

- بس تغير نفسه .. يشم شعري وجهي ويبتعد ويكولي داعذب نفسي بنفسي بس ماكدر اتجاهلج وبعدين يطلع يدخن بره ويهدأ نفسه ويرجع يكولي ضلي العبي بشعري حتى انام وهاي كل الي صار بينه

- حكو والله هالشي ماهو بالهين عند الرجل

- دكتوره اخاف يجي يوم ويتغير هالشي يفقد السيطره او شي واني ماعرف شلون اتعامل وياه بهاللحظه بالذات مادري شسوي اخاف اتقبله واخاف ارفضه واجرحه بالرفض ومادري شسوي

- بنتي حكيتلك من الاول انه ما يعرض نفسو لموقف محرج معك لانو يدري بالاثنين راح ينحرج كدامك لذلك لو مهما وصل بي الحال ما يقترب اكثر من الي تقربو

- اتمنى يضل هيج لحد مااكدر اتقبله
مرات اكول استعجلت بهالزواج

- لااا لااااا هالزواج كان ضروري للعلاج ضروووري ما منو مجال للتاجيل
ودحكي التغيير الي صار بيومين معو ماكان راح يصير بسنتين بعيد عنو
انتي لو ضاله بدونو ماتعالجي نفسك لو يمر عليكي دهر بس اليوم انتي محتاجه وحاجه ملحه للعلاج حتى تسعدي زوجك ونفسك وتبني اسره مستقره معو هذا حااافز يابنتي حاافز يخليكي تكملي هالدرب

- ايي فعلاً اني داسوي كل هذا علموده
زين احجيلي شنو ابدا هسه بيمن !
شلون العلاج بعد راح يصير

- اول شي انتظمي بادويتك هنه حبايتين
وحده قبل نومك والثانيه بعد الريوك
ثانياً ... راح نأجل موضوع تقربك من زوجك لوكت ثاني ونركز على الاصوات

- الاصوات !

-اي الاصوات .. كل الي مسببلك هالمشاكل هو تكرار الصوت مو صح !

-اي صح

- اي هي الخطوه الاساسيه بنجاح العلاج
تجاوزها .. معالجتها .. محوها .. كلها
نجاح بنجاح لطريقنا ...
اول شي نتخلص من رهاب الاصوات
دحكي بنتي .. انتي واعيه ومثقفه وفاهمه
ان كل شي نكدر نسيطر عليه وكل الخوف من الاصوات او تذكر مواقف
صنعت هالصوت هو كله وهم وفكره تطرأ لمجرد دقيقه وتختفي لو سيطرنا عليهه ..لكن لو سمحنا الها وتجاوبنا وياها راح تتغلغل بينا اكثر وتتعب نفسيتنا
لذلك اي موقف تتعرضين بي لصوت عالي او صوت تكرهي من اي شي
اصبري عليه وواجهي

- ماااكدر دكتوره صعب صعب اني بس هسه اتذكرت هالسالفه احس جسمي يرجف مو عاد اضل بي لاا لاا ماكدر

- زين بسيطه بسيطه عندي غير حل
ساعه الي تواجهي هالصوت التجيء
لشي يريحك .. مثل تغييره بسماع اغنيه او قربك من زوجك وضحيله انك ممرتاحه بهالحظه خلي يغمرك بحنانه ويأمنك عندو واذا هو بعيد عنك ضلي
رددي ويه نفسك الاعداد من الميه للعشره تنازلياً وبصوت عالي بحد تسمعيه
بهالشي راح تهدأي وتعبري هالحاله
بأمان وشجاعه

- اي هيج اكدر عليهه . . ماشي اسويهن
وان شاء الله مايتكرر اي صوت واحتاجهن

- اي ان شاء الله ... بعد تحبي تسألي شي

- اي هو شوكت تاخذيني لدكتور الي حجيتيلي عليه مال جلديه

- ايي ذكرتيني .. السبت يناسبك. ؟

- ماشي السبت بس شلون ..اني ماحجيت للشيخ عنه .. لان اخاف يريد يشوف وماكدر اخلي يعرف هالشي او يشوفه

- اييي افهمك افهمك .. بس لازم نخلي على اطلاع بهالموضوع لان مانكدر نطلع بدون علمه مو صح

- اي صح بس شحجيله عفيه اني اخجل منه والله

- انا ادبرهه اطلعي واحكيلو يتفضل هين
حتى نتفاهم

رحت صحتله ودخلنه سوه كعد كدامي
وهي كالتله ...
- شيخ مهامك تكثر هاليومين تحملنا
- دامها لعينها تسهل
- ههههه .. اول شي ابشرك زوجتك راح تخصم هالعلاج بأقل الست شهور لو ضلت بهالشجاعه والاصرار ماشاء الله عليها عجبتني بكل تفاصيلها
- الله يبشرك بالخير يا يابه

باوعلي وضحك والدكتوره كلتله ..

- بس عدنا فد شغله صغيره لو صارت راح تعجل بالعلاج وتطمن نفسيتهه لاعلى حد وباقي ناخذ موافقتك عليه

- لزوجتي وراحتهه تسألين عن موافقتي يا يابه ! امشي فيه واعتبريه تم وماتسألو عنو

- هههه عجل احنه بحاجه طبيب ثاني
في شغله صغيره محتاجه رأي طبيب ثاني عليها والطبيب هذا من معارفي وانا اتعامل معو من سنين مختص بالجلديه
واحتاج لنصيحتو بشي صغير ومهم بنفس الوكت

- وش هو هالشي ؟ تينه ليه ما تطلعيني عنو !!!

- انا طلبت منها ما تحكي عنو

- غير افهم وش هو الي محتاجلو طبيب جلد !
- اثر جرح قديم انا اريد امحي لها وهالطبيب يكدر ينصحنا وينطي العلاج المناسب عليه
- جرح ! وينو هالجرح ! ما مدحك عندها جرح !!
- حكينا قديم شيخ .. كأنك تراجعت !
- استغفر الله ... فهمت يابه فهمت ..
هاذي صار ايمتى نزورو هالطبيب
- السبت بعون الله
- اييه ان شاء الله السبت بمثل هالوكت عندك
- ان شاء الله

باوعتلي الدكتوره وكلتلي ...
- من رخصتك يا شابه دقيقتين خاصه مع الشيخ
- اي على راحتكم

طلعت وعفتهم بس ضل بالي يمهم بشنو يحجون ؟

وره شويه طلع الشيخ واخذني ونزلنا للسياره .. ماسألته شنو حجو لان لو يريدوني اعرفه جان بقيت وسمعته بس يجوز شي خاص بي او تنصحه شلون يتعامل بهالايام ويهدأ ...

من رجعني للبيت رأساً راح للديوان واني ضليت انظف واحضر الغدا ومن رجع
صبيت الاكل واكلنا بس اني وياه الجهال بيت حسن مايقبلون يرجعون ..

على طول الاكل ساكتين ولحد ما شرب الجاي يلا اني تقربتله وحاجيته ..
- كأنك محتار بشي ؟
- اييه والله محيرني سفر الشام
- مو بعد وكت عليه ؟
- الرجل ارسلي خبر ان عندو فكره لفتح فرع ثاني وهذا خاص بمحال البيع وبغير مدينه و ودو امشي لعندو حتى نتفاهم عنها وندحك المكان سوا ..لزوم امشي لعندو اول هالشهر ومادري كيف اتركك
هيك
- ياعيني روح شغلك اهم .. اني هنا شكو عليه وتخاف .. يمي اهلك كلهم واذا تريد ابقى بيت الشيخه لحد مترجع اذا تخاف ابقى وحدي كلهن كم يوم كمل شغلك وتعال
- لااا ما كدر امشي واترك علاجك معلك هيك واضيع الوكت بسفري ااخرك شهر عنو وهالشي ما يصير لا والله
- ما بيهه شي خالد ليش تكبر الموضوع
عود اني اروح وحدي او اخلي احد يوصلني شكو بيهه ياعيني سهله تدبر
- لاااااه وانا اخليكي تمشيلها وحدك
صار شي هنيك من يكون معك ! من يفهمك غيري ! عاودتي تعبانه ومحد حدرك كيف ترتاحي ! ودك ينأكل راسي بهالتفكير !!!
- هههه لعد مااروح ابقى انتظرك
- لااا لاااا خلي افكر بحل ثاني اكدر اجلها لهالسفره فيه
- ماشي فكر بعدين هسه تعال نام وارتاح
- ههه تنامي حدري لو تضلي تصفني
-ياااا عفيه هي مره
-هههه بالله وش كنتي تدحكي هيك
- هههههه كلشي صفنتله شلون مرتب خلقه بهالوجه الحلو

ضحكت ووكفت مديتله ايدي لزمها وكومته ورحنا للغرفه ..
اخذني هالمره بحضنه وكالي اريد هيج انام ... وضل مخلي راسي على صدره ويمشي ايده على شعري وبعدين خله حنجه على راسي ونام ...

والعصر كعدته وخليلته حلاوه اكل وطلع للديوان واني رحت لبيت ام حسن سلمت عليهه وشفت الجهال ناصبين بيت من فراش ام حسن كله ناكلينه ومحتارين بي
وهي تكولي .. خليهم يلعبون هنا احسن من الشارع ماندري وين يمشون ...

اباوع لغاليه مندمجه وياهم وتصرفاتها تشبهم كلش متطبعه باطباعهم ..

ضليت يمهه ساعتين ورحت مريت على الشيخه هم كعدت وياهه وصفيه من تشوفني تروح متكعد يمنا ...

الشيخه كامت تحجي وتكولي ليش مترجعين هنا تعيشين انتي ورجلج وبنتج
وهالبيت فارغ وهالكبره المن باقي
وضلت تقنع بيه بس اني كلتلهه ..
هذا بيت ام جراح واني مااخذ مكانهه بي
يجي يوم وترجع لبيتهه ...

سدت السالفه وهي تتحسب عليها
ماعرفت هي شمسويه وهيج كرهوها
بس من بعد حجي الشيخ ماكدر اسأل وادخل نفسي بهالسالفه ...

رجعت قبل الاذان لبيتي وحضرت للعشه
وتعشينه اني والجهال و للساعه ثمانيه
ماحسيت الا الشيخ دخل وشايل بيده
ابنه رماح ....

#شقراء_بغداد

بارت_٥٧


دخل الشيخ وشايل ابنه رماح ويباوعلي ويبتسم .. رحت يمه سلمت عليه وهو كالي ..
- تينه ولدي ودي يضل هين حدر اخوتو
ما يزعجك هالشي ؟
- لاااا ياعيني شلون يزعجني .. كل الهلا بي

اخذته من ايده وهو كبران ومدنفش
وكلش هادىء هالولد ما ينسمعله صوت
حضنته وكلت للشيخ ..
- منو جابه ؟
- انا ارسلت على خوالو هالصباح وهمه الحين يلا جلبوه لي كانت نفسي عندو وماتحملت ولدي يعيش بعيد عن عيني
- حقك والله .. هم خطيه هو فقير ماله حس وضال وحيده هههه هالزوج عالنين عليه الحرب
- لزوم يتغيرو معو احكيلهم هالشي وان ما فاد انا افهمهم عدددل
-لاا لاا يفهمو هسه شبيك عليهم ياعيني
تعال خلي نتعشى هسه
- لااا كلو انتو بالعافيه انا لزوم اعاود الديوان رجالي ينتظرو وعيب توخرت عنهم
- هاا زين لعد ارجع من وكت عفيه مو تتاخر
- ان شاء الله .. يلااا ديري بالك عليه
- تدلل

بوس خده وراح .. اخذته ورحت يم جراح وغاليه وهمه وكفو لعب وضلو يباوعولي .. ضلييت احاجيهم وافهمهم رماح يضل وياهم بعد ميعوفو وغاليه متقبل اخذتهه على جهه وكلتلهه ..
- كل ما تدارينه وتلعبينه وياج اكثر راح يسوولج بيت حلوو وجبير بالجنه وهسه جراح يلعب وياه اكثر وياخذ البيت وانتي كلشي متحصلين

رأساً صاحت لاااا وراحت ركضت على رماح وتحضن بي وجابتله مكعباتهه وضلو يمه وهو شينطوه ياخذ وشيكلوله يسوي هادىء وماله حس .. رغم عمره ٣ سنين بس ابد مو حرك ...

خليت الاكل واخذته بحضني اوكله قبل لا اكل وافكر بام جراح هسه شلون ضلت بدون ولدهه ؟ هي متعلقه برماح شلون دزته هيج ! خاف الشيخ مهددهم ؟
ضلت الافكار تاكل براسي وكل شويه اباوعلهم واكول شذنبهم خطيه بدون امهم ضلو وضاك صدري عليهم ...

ولحد ما رجع الشيخ واكل وسبح وارتاح
وضلينه وحدنه بالغرفه سألته ..
- خالد ضل بالي شي حباب تحجيلي عليه بدون متضوج
- اييه وش هو
- ام جراح شلون حتصبر بدون ولدهه ؟
- تصبر ماعليهه شي
- لاا خطيه والله هيج كلشي انحرمت منه
- من يدها مااعيل مع احد انا
- زين شناوي عليهه ؟ الى متى تضل هيج بعيده عن جهالها
- مادري للحين ما قررت بوضعها لكن بالاول خلها تعرف كيمه الي كان بيدها وخسرتو
- والجهال شلون
- تييينه الجهال ارسلهم لها لو ودهم امهم ماامنعهم انا لكن عيشتهم حدري ولدي ما يربو عند الخال وراسي يشم الهوا
لو مضايكك وجودهم هين احكي وارسلهم عند امي
- لااا والله مامضوجيني شبيك خالد يعني متعرف شكد احبهم ! شنو هسه قابل تغيرت عليهم !!! ماتعرف يعني بمعزه جراح عندي لو رماح الي من قبل اني اروح واجي عليه واذكره بكل شي
- عجل سدي هالسيره
- مسدوده هالسيره عيني بس انته شدعوه هيج عصبي اني سألت من خوفي عليهم
- تينه الي عليكي داري ولدي وبس
وغيرو انا اتكفل فيه زيييين

كالها ودار ظهره عليه وتغطى بعصبيه
ضحكت وتدنيت يمه وخليت ايدي على وجهه وكلتله ..
- وانته متريدني اداريك !
- مااا ودي شي انااا عوفيني انسي بس عينك عليهم
- ليش هالاعصاب ياعيني والله مقصدت اضوجك بس غير افتهم منك شيصير
-ههههه يولووو ابعدي هيك واحكي هالحرف لااا بنص اذني تخليني اهج الحين

طكيتهه بضحكه وهو اندار يباوعلي ويضحك وكالي ..
- عمري كلو اوصي فيكي ماتفهمي انتي
عجل احكيها بالقلم العريض يلا تجوزي عنو
- ههههه ماكدر شبيك
- يالله دحك هالحين انا من يحتركو اسلافي واتسرسح بالشوارع بهالليل احد يلومني !!!
-هههههههههه راح اسكت والله نام ماحجي شي بعد
- ما تعرفي انتي لو ماتحكيه وتخليه يدك براسي نامي لااا والله الحين اكضبو للسانك واعدلو بيدي .. ياويلك لو حكيتي هالحرف بعد
-صار
- هااااا يولو ماتجوزي انتي انااا عارف ماتجوزي
- نسييييت والله ههههه راح اسكت

جريت الغطى وتلفلفت وضليت اضحك جوه البطانيه وهو يدثرني بي ويكولي
-اسكتي يولو خلي هالشياطين مربطه
- ههههه ساكته والله والله ساكته
- راح انام لا تتكربي حدري ولا اسمعلك نفس
- ماشي تصبح على ...
-على شوو هااا
- عافيه عافيه
-ههههههههه وانتي من اهل العافيه
اااخ ربي شبليتنا بهالحرف شبليتنا

انطاني ظهره وتغطى واني ضليت احوص مداعرف انام .. رحت طلعت اشوف الجهال خاف مكشفين ..
تطمنت عليهم ورجعت اخذت حبايتي ونمت ..

ثاني يوم جمعه حضرت غدا من وكت واخذت الجداري ورحت لبيت الشيخه
هناك صبينا وسوينه سفره مرتبه وتغدينا كلنا سوه وبعد ماراح الشيخ اخذني جراح
وصعدنا لغرفه امه فوك حتى اطلع ملابسه مال الدوام واحضرهن اله لا باجر يبدأ دوامه ...

واني اطلع ملابسه اباوع للغرفه مرتبه بس كئيبه بيهه كل شي من احسنه بس ما بيهه روح .. اخذت غراضه ونزلنا ورجعت لبيتي كويتله ملابسه وحضرت جنطته وصرت افكر اخليهم ينامون يمنه بعد .. اضوج اشوفهم بالهول نايمين ..

وبالليل حجيت ويه الشيخ وقبل انومهم يمنه ...
بس الي اعترض هو جراح .. مقبل ينام يمنه بالغرفه وكالي اخذيهم يمج بس اني بعد انام يم الشيخه ..

وقبل مااحجي اي شي الشيخ شجعه على هالشي ودزه هناك ويكول البيت فارغ يضل عندهم احسن ...

صرت افرش لغاليه ورماح بالكاع واضل كل شويه اباوعلهم خاف تكشفو واكوم اغطيهم ..

الشيخ ساعه عصبي وساعه يسكت ميحجي شي حتى لو الح وياه بالحجي يتجاهلني لو يختم كعدتنه بكلمتين ويطلع لو ينام ..
واذا اضل اسأله شبيك ليش هيج وياي يصيح مابيه شي مابيه شي ويطلع وره شويه يدزلي بيد جراح علاكه بيهه شويه حلويات لو يدز ورده بيد غاليه ..
يخليني اضحك وانسى عصبيته ومن يرجع كأن مصاير شي ...

مهتمه بكل تفاصيله .. كل يوم الصبح احضرله ريوك شكل واوكله بايدي والبسه الشماغ والعباه وحتى الحذاء
وهو يبوس راسي ويطلع .. والظهر
لازم ساعه ١٢ كلشي مخلصه .. التنظيف والغدا وسابحه ومتعطره ومرتبه شعري ولبسي واتلكاه بضحكه واحضنه واعوفه يروح للغرفه يبدل اني اكون محضرتله ملابسه على الجربايه بس يلبس ويطلع
يلكى الغدا ينتظره .. وباليوم الي الجهال يتغدون ويانه تكون بيني وبينه مسافه
بس من همه ماكو اكعد بصفه واضحك واشاقيه واضل حاضنته وكاعدين شويه وره الاكل وبعدين ينام على ايدي والليل كذلك كلشي محضر ومرتب اله ..
الحمام والحلويات وكلشي زين بيناتنه
ماعدا تقربنا باقي على حد حضن مو ازيد

رحت للدكتور وانطاني محلول امسحه على الاثر بالكطنه كالي هذا مقشر للجلد
ابقي ربع ساعه وافرك المكان يتقشر الجلد كله وبعدين اخليله عصاره ادهن الاثار بيهه مرتين باليوم بس التقشير
٣مرات بالاسبوع ...

شفت باول اسبوع فرق وجان دائماً الشيخ
يطلب مني اشوفه الجرح وين ومااقبل
ونتعارك على هالشي يصير عصبي يعوفني ويطلع ومن يرجع احاول وياه واصالحه بس يضل يكولي انتي بعدج بعيده عني رغم اني ماطلبت منج شي
واشوفه حتى حجيه ثكيل وياي ..
ما هان عليه يضل بخاطره شي رغم اني
اموت قهر لو شافهن بس تحملتهه وتعمدت هالموقف ....

بالليل هو كاعد يراجع لجراح بالهول واني رحت للغرفه لبست ثوب ربع ردان
وكصير ورفعت شعري وضليت فاتحه الباب شويه واباوعله انتظره شوكت يجي
وضليت انتظر وانتظر واتافف وهو مندمج ويه جراح ولحد ما كملو وراح جراح يلا طفى التلفزيون واجه باتجاه الغرفه واني بسرعه لزمت العصاره واخذت منهه شويه وخليتهه على الاثر الي بالزند وسويت نفسي منداره ومااشوفه ... وضليت ادهن بيهن وحسيت على ايده تلمست الاثر واني كلبي يرجف غمضت عيني بقوه وبعدين انداريت عليه وابتسمتله وهو عينه ضلت على ايدي
يتلمسهن وحده وحده واني عاصره طرف ملابسي بايدي ومبعده عيني منه ..
كالي ...
- بسيطات ليه رفضتي ادحكهن
- مادري بس ماردتك تضوج منهن
- ما يغيرنك عندي يولو

جر راسي لحضنه وكالي ..
- كيف صارت هالجروح ؟
- بالكزاز
- احبك انا والله
-ههه تعرف شلون تغير مواضيع
- ماتحبيني انتي يولو

رفع ايدي لوره ركبته وضليت هيج اباوعله وعيني بعينه واردد هالسؤال ببالي .. هاي المره الاولى اليي يسألني هيج ... اخذتني لمعه عينه وهدوءه ولكيت نفسي اكوله ...
- شلون مااحبك
- ايييه

جرني لحضنه اكثر وقرب وجهه مني ويكولي ..
- وبعد
- خالد
- لااا ما تنفع بعد هالموضوع ماينسد
-هههه
- احكيلي يلا

ضحكت وميلت راسي عنه وهو سحبني اكثر اله ويأشرلي بحواجبه .. كثر الخجل الي تشبع بيه بهاللحظه كثر ما احساسي برجفه الكلب والدكات المتسارعه يزداد
كل ما تقرب نفسه من وجهي وتلمس ظهري باطراف اصابعه بهداوه ..
رجع كالي بنبره صوته الهادئه ...
- تحرميني سماعها بعد !
- لااا
- عجل !!

ضل مخلي عينه بعيني ومبتسم ولمعه عينه بهالقرب كأنها غيرت كل موازيني
مالكيت نفسي غير اكوله ..
- احبك
-والله؟
- ههه والله احبك
- بعد ما شبعت سمعي
- هههه كافي

ردت اوخر وهو رجعني اله وضل مقرب وجه مني ويكولي ..
- اسكي هالعشك تينتي اسكيه بكثر حبك
لا تضلي بعيده عني وكريبه انا ما ودي جسمك ودي كلبك هذا الي اعاتبك فيه والله ماكصدت جسمك ولا اكربلك لو ماانتي تطلبي لكن كلبك ليه تحرميني منو!!
- مااحرمك منه بس ماعرف يعني كلشي صار بسرعه
- مايهمني الي راح تين .. انا ودي اعيش عمر جديد بحبك وللحين ماحسيت اني بديتو
- ليييش !!
- من الاول حكيتلك انا انتظر اليوم الي ادحك نفسي بعينك وهو صار ودحكتو لكن انتي بعيده عنو .. ودي احس روحي تلامس روحك تينتي ما ودي جسمك والله
- فهمتك اي
- لاا ما فهمتي .. انا من زمان منتظر هالوكت الي افهمك فيه انك لو فتحتيلي كلبك لحبي فهو ما يعني اني راح انكث بوعدي الك .. افهميني ياتينتي احس الحب حدرك كفيل انو يغنيني عن هالعلاقه لاخر العمر والله ماتهمني كثر ما يهمني ادحك اني الوحيد الي ملك كلبك
يهمني ادحك نفسي غير عندك .. حبك ياتينه حبك هذا الي انا صابر عليه مو جسمك وحك الحك

جان لازم ايدي ويحجي وعينه بعيني
كل كلامه توثق عليه نبره صوته ولمعه عينه .. بس ضل بالي سؤال وسألته ...
- وعصبيتك وياي ليش ؟
- لاني كل يوم اصحى وافكر هاليوم
راح يكون غير عن الي كبلو معها لكن ادحكك نفس الشي ..

بعيده رغم كربك وانا هالشي اكرهو ياتينه اكرهوو ياتكربي ياتبعدي لا تضلي بين بينين
هين انا ماتحملها لاني ماعرف كيف اتصرف معك بهالحال ..
لا انا الي ماخذ راحتي معك كحبيب ولا كزوج ولا الي ضالين اصحاب مادري هيك كلها شبكت واحترت انا اي واحد منهم عندك ؟؟

وخر مني وضل يزفر النفس بقوه
رفعت نفسي وتعلكت بركبته وكلتله ..
- كلهن اني اعيشهن وياك بس ماكو احلى من حبك

ميل راسه وباوعلي وعاكد حواجبه
خليت راسي على جتفه ودرت وجهي عنه وصرت احجيله ...
- مااجذب عليك واكولك ماتخوفت من افتح كلبي الك واصلاً قبل جنت شاكه اذا اكدر املكك كلبي ماتوقعتهه تصير والله
كل ظني اكدر اعيشك براحه ودلال واخليك بعيوني وماحرمك من شي بس
هنا لكيت نفسي سبقتهن كلهن من حسيت بدكه هالكلب
- ماكان ودك تحبيني بيوم !
- ماجنت اريد ادخل بالحب لاني اخاف اتاذى منه وانخذل خفت اصير ضعيفه لو فتحت كلبي لذلك اتجنبته وقفلت على هالسيره
- اييه؟!!!
- بس حسيت من ايام ان هالباب نفتح من جديد وبكل هدوء وبدون مااحس من ياموقف او يا كلمه لكيت نفسي تدريجياً
افتح هالباب كل مااباوع للمعه عينك وياي
كل ما اصفن على تفاصيلك من تنام على ايدي
- متندمه عليه ! تمنيتي لو انه ما صار؟
- لااا لاااااا اني مطمئنه بي مطمئنه لان كلبي بيد شيخ مايشوف بالدنيا غيري
اعرف بي ميأذي هالكلب ويسعده كل العمر .. اني واثقه بيك وبحبك وبشهامتك وبحكمتك اني من يوم عرفتك اشوف كلشي من نظرتك لو كلتلي هذا المي اسود مااناقش بي ادري بكلامك غايه واعترفلك جنت محتاره بهواي امور بالتعامل وياك
بس رتبتهه كلهه بحجيك وياي ومن فهمتني شتريد اطمنت لاني غايتي مثل غايتك
- اهاا يعني وش غايتك ! فهميني ؟
- غايتي يعمر بينه حب قوي بعيد عن الشهوات وساعه ماعرفت غايتنا وحده
انفتح هالكلب الك على وسعه

تلمست خده وباوعت لعينه وابتسمت
كلتله ..
- ازرع كلبك بي مثل ماتمنيت والله مايستاهل هالكلب غير خالد

ضحك وباس راسي وكالي ..
- اخلدك فيي والله

اخذ ايدي بوسهه وحضني قوي ويكولي ..
- الحيييين ارتاااحيت يالله كلامك كأنو مي الفرات ونزل على كلبي وروحي محى منها تعب السنين .. ويييين كنتي يولووو وييين كنتي بعيده عن كلبي وعيني
الحين ابتدا العمر والله بهاليوم ابتدا

- اعيشك احلى عمر وداعت ربيع عينك

ضحك وصار يفتر وحاضني ..
تمدد على الجربايه وجرني لحضنه
كلتله ...
- الجهال وحدهم بقو خلي اجيبهم انومهم
- ودي نحكي للصبح لاتنوميهم هين
- لاا شلون خليهم ينامون ونكعد بره نحجي خطيه اخاف عليهم
-زين زييين يلا نوميهم بالعجل
-صار

فرشتلهم ورحت للهول اخذت الدفاتر والاصباغ المطشره بينهم وخليتهن على جهه وشلت رماح واخذت غاليه تغسل وتفرش اسنونهه وبعدين اخذتهم نومتهم بفراشهم وضليت متمدده يم رماح لحد ماغفى يلا رحت للشيخ ...

فتحلي البطانيه واشرلي اجي يمه ..
تقربت ونمت على ايده وهو قربني اكثر
كلتله ..
- ماتريد نطلع نسولف
-لاا غيرت رايي ودي انام على ريحتك
-هههه اي احسن

خله وجهه بشعري واني راسي بركبته واحس اني املك امان الدنيا بقربه هذا
وصرت اطمع بي واريده بكل وكت
من بعد هالليله تغيرت حياتنا للاحسن
اني نفسيتي ارتاحت واطمئنت اكثر من خف عليه ضغط العلاقه جنت احس عصبيته ونفرزته دائماً بسببها واحس لازم استعجل بالعلاج واضغط على نفسي اخاف بيوم يتعب ويتغير وياي بعد واخسره .. بس هو ثبتلي ان هالظنون كلها خطأ وثبتلي انه كد كلمته من كالي
ماريد جسمج الي يهمني كلبج ..
فعلاً هو ساعه الي اطمئن من ملكه تغير جذرياً ...

صار يطول بالكعده وياي بالبيت ويتشاقى وحتى بالمطبخ يوكف وياي يااما يترس مي او يغسل خضورات او يكعد يسألني هاي شحطتي هنا وشسويتي لهالاكله وهيج طعمهه ودائماً يكولي وكليني اضوك بالاول يلا تصبين ..
وكل مااوكله ماينطي اضافات يكولي اي طيب يلا صبي ...

هو يشيل الصينيه ووصاني نتغدا سوه وحدنا بالاول وبعدين يطلع هو واصيح الجهال اغديهم ..
على الاكل يصير ياكل لكمتين ويجي يخلي بحلكي شويه يكولي هاي على كدج
ولازم وره الجاي حضنه طويله يسميهه
تصبيره الديوان ...

والعشى مو دائماً يمنه بس يعوضهه من يرجع حتى لو الجهال موجودين يحضن واني استحي من عين جراح بس هو يكولي خليهم يتعودو مااضل اتختل بحضنك ...

من نكعد يم الجهال لازم بصفه اكعد
ويطلع من جيبه ككو بشكل درهم مغلف بكاغد ذهبي يخلي اثنين بحضني والباقي ينطيهن للجهال ...

اني اخذ عضه منه والباقي اوكله اله
وارجع افتح الثانيه هم نفس الشي ..

وكت النوم الا العب بشعره لو اضل اهمس باذنه بالكلام بهدوء يلا ينام واذا ماصارن يضل ينتظرني لحد مااجي يمه واسويهن يلا تغمض عينه ...

مرتاحه وياه ومرتاحه بدلاله وحبه بس نظره عينه ساعه الي يشوفني تكفيني
عن اهلي والدنيا كلهه .. يشوفني بيهه
شكد مميزه عنده ويحسسني كأن ماكو غيري مره .. للحظه حسيت اني تغلبت على كلشي وعشت براحه ... حتى جلساتي ويه الدكتوره تمشي باريحيه