#شقراء_بغداد

بارت_٥٢


- يا حركه كلبي عليك ياولدي لا اكل ولا نوم ولا راحه مثل هالعالم
- اسم الله شيخه ليش هالحجي خير شصاير؟
- عجل ماتدرين كيف حالو !
- لا والله هو اشوفه زين ليش احجيلي شبي شصايرله
- تارك البيت من وره حرمتو ام حنظله
سوس البلا الله لا يرضى عليها
- هاا متعاركين مثل كل مره
- لاااه هالمره غير .. ماسمعنا غير صوت صريخها من فوك وطلعنا دحكناه مكطع عليها العكال ومخليها تتلاهث بالنفس وهو بركاااان هايج الي يطخو ينفجر بوجهو
- الله يهدي باله ويريح كلبه .. وينه هسه لعد اذا عايف البيت
- كاعد بديوانو اكلو ونومو كلو هنيك
حتى ثيابو ياخذهن له جراح من السته الصبح اول مايصحى ياخذلو الثياب ويرجع الي نزعهم ومايرضى يعتب البيت توسلتو يابني برضاي عليك خلنا نتفاهم هاذي حرمتك لكن هو حكالي لو عتب خيالها كدامو يحركها بارضها
وكلو منهااا ااااخ يالبهيمه الي بلااايه عكل
سودتلو عيشتو
- خليها شيخه هي مو صغيره وواحد يعلمها شلون تتصرف .. واحنه هم تعبنه من كثر الحجي وياهه بس هي هاي ذبتهه
بعد شنسوي ... واني بعد احضرله الاكل للشيخ وادزه اله لا يضل بالج ياعيني
- ماتكصري يابنيتي لكن اناا ودي افهم وش سوت وهيك خلص صبرو معها !!
- شيخه هاي اسرار بيتهم محلوه نتدخل بيهه وتصيرلنه موضوع نقاش خليهم ان شاء الله يرجعون يتفاهمون

تريكنا وجان اليوم جمعه مانروح للشغل
وضليت ويه الشيخه كاعدين نسولف وهي كل شويه وتتحسر على وضع الشيخ
بعدين رحت للمطبخ ... وطلعت دجاجه قطعتهه وخليتهه تتحمض وكعدت سويت برياني مثل مايحبه الشيخ .. كثير بهارات وحار شويه ومكثر بي الدارسين والبتيته وبدون كشمش وقليل فستق ...
طبخته وكملته واخذت الدجاج صفيته وكليته وحضرت الزلاطه والطرشي وكاسات الروبه ورتبت كلشي ودزيت جراح يكوله
معزوم على الغدا يمي ومنتظرته ..

الشيخه كيفت لان راح تشوفه وتكعد تاكل وياه تكول من يوم الي طلع هي ماتشوفه بس بالليل تروحله شويه للديوان وترجع

مديت السفره وصبيت الاكل وانتظرناه لحد ما اجه .. دخل مبتسم وكال ..
- يديم الله هاللمه .. شلونكم يابه
- الحمدلله شيخ انته شلونك
- بخير والحمدلله
- تفضل دننتظرك

ضحك ونزع عباته واليشمغ وكف ردانه وكعد وباس راس الشيخه وتطمن عليهه وهي تبوس بي وتشمشم وتكوله ..
- لا تكطع بامك ياوحيد كلبهه
- ابشري ياتاج هالراس انتي واعذريني
بعيد ومكصر بحكك
- معذور ياوليدي لكن لاتحرمني هالصوت الشجي
- ابشرري ابشرري على هالخشم تآمرين

ضحكو وبدينا ناكل من بعد ماهو مد ايده واكل وبأول لكمتين كالي ..
- تسلم يدك والله اجه بوكتو
- الف عافيه

باوعلي وابتسم وكمل اكله وخلص كل ماعونه وقطع الدجاج الي عنده وهو مايحب احد يزيدله مره ثانيه بالاكل
جان يكول .. ان هذا ماعونه حكه لايزيد ولا ينقص .. يعني لا يرجع منه ولا يطلب فوكه ... فلذلك اني تعودت ان
الماعون الي اعرف يصير كدام كعدته
اخلي جبير وامليه اله ....

الجهال ساعدوني بلم السفره واخذتلهم الجاي وضليت كاعده يمهم لان ادري الشيخ يطلع مايطول وردت اسمع اخباره
وهو يسولف ويه الشيخه ويشرب جايه
ومن كمله وكف وكالي ..

- تينه طالبك بكلمتين
- اي شيخ صار

راح لغرفتي ورحت وراه وهو جان واكف ومخلي ايده وره ظهره وضل يباوعلي وبعدين كالي بصوت هادىء عكس الي جان عليه قبل شويه وياهم ..

- طمنيني عن حالك
- زينه لا يضل بالك
- بتاخذي ادويتك بوكتها ؟
- اي اخذها
- زين وحكي الطبيبه وش صار عليه !
- اي وحده منهن تقصد
- السواد يا يابه ما ودك تنزعيه ؟
- ممكن نأجلهه شويه
- لاااا
- بس شويه كم يوم مو اكثر وداعتك
- ليه وش يغيرو هالكم يوم !!
- اممم بالي شغلات اريد اسويهه يلا
- ماتحكيلي عنها ؟
- طبعاً احجيلك وهو اني اكدر اضم عليك
- اييييه كدرتي يولو هالحكي ما بصدكو
- لاا عفيه هذاك وحد
- كلو واحد ياتينه ماينفع هالحكي
- يعني بعدهه السالفه بالك ؟
- كلمه كلمه تدك بهالراس ياتين
- بس يعني انته مو فهمتها بعد شكو
- هه هو لاني فهمتها هييين اناا مصيبتي
الحين خلك من هالسالفه .. اييمتى تنزعيه للسواد ذبحتيني فيه
- كم يوم
-لااااا ماينفعو .. ماتنسي ان عندك اربع ايام ضاله للجلسه ولزوم تمشي وانتي مغيرتو ..شو نفع التاخير هين يولو !!
- لعد اذا هيج اني عندي حجي وياك
يعني يرادلنه كعده
-اييييه؟
- اي شوف وكت فراغك ونكعد نحجي
- ونخلص منو؟!
- اذا تفاهمنه اي
- زين عجل هالليله امرلك وان ماكدرت بكرا بحيل الله
-على راحتك شيخ اخذ وكتك
- زين .. ضلي حدر امي ماتتركيها تمشي من هين
-صار تدلل

تبسملي وبعدين طلع ... رحت كعدت ويه الشيخه وهي ضحكت وكالتلي ...
- والله يهالحريم لعبتن بولدي والله
وحده تصعدو للغيم وتربيلو جنحان ووحده تاخذو لدروب جهنم

-ههههههههههه
- بتضحكي يولو عجل ما تخفيها معو
-هههه شيخه هو اني هسه اريد احجي وياج بهالشي
-هااه اييه بالله شو عندك احكي

تربعت وتقربت يمهه ولزمت ايدهه ونزلت عيني وحجيتلهه بسرعه ...
- الشيخ طلبني للزواج
- يااهلساعه المبااااركه ايييه كيف هيك
- ههه مادري هو هيج كبل حجاهه الي وكالي اخذي وكتج ورديلي جواب
- وللحين ماردتيلو ؟
-لا بعدني
- وشتنتظري يولوووو بتعلي كلب ابني انتي الثانيه
- شيخه مادري خايفه
-لييه بعد خايفه!!!
- يعني ادري الشيخ رجال شهم وماكو مثله ومايقصر وياي بس ام جراح شلون!! اخاف حتى جراح يتغير بعد هالزواج ويصير يضوج منا .. اني مااجيت حتى اخرب بيته وعائلته بس المشاعر اخذت طريق ثاني واني ادري
لو شكد مااتجاهل هالموضوع هو يبقى
ماينسي .. محتاره شيخه عفيه دليني الصحيح
- دحكي يابنيتي .. انا من سنين تمنيتك
تصيري حرمتو لاني مادحكت ولدي
مرتاح بعيشتو مثل مادحكتو من يومك معو.. لكن هين ماعلينا بالامنيات علينا
برغبتك ... انتي اخذتي زواجك الاول مو بقناعه تامه وما ودي يصير الثاني مثل الاول .. دحكي كلبك وعكلك وش يختارو
وامشي عليه ... وماعليكي بحكي حد مننا
لانك لو ماتنسعدي بهالزواج ماراح تسعدي ولدي وانا هين ماارضاهه منك

صفنت بحجيها شويه وبعدين كلتلها...
- راح اخذ بحجايتج شيخه واشوف كلبي وعقلي شيقررو واخصم هالسالفه
-ايييه عيين العكل يايمه

هي راحت نامت واني ضليت على كعدتي وافكر بالسالفه ... وراجعت كل
ذكرياتي وياه وكلها جنت اقارنها بايوب
واكثر شي جنت اسأل نفسي لو رجع ايوب بحياتي راح يكدر يصيرلي مثل الشيخ ؟ راح يكدر يتحملني بتعبي هذا ومرضي ويتقبلني بي ؟؟؟
ياترى الوطن هالمره راح ينطيه وكت الي ويتفرغ لاهتمامه بيه خلال هالفتره لو على اي ساعه يكولي انتظريني عندي شغل الوطن يطلبني ولازم البي ؟؟؟
وراح يفضلني هيج على زوجته واولاده ويحارب كل اهله وتقاليده علمودي ؟

ماخلصت من التفكير وماعرفت اتخذ قرار واجه الليل وكملنا العشى ودزيت للشيخ صينيته وتعللنا وجراح راح لبيتهم لان باجر عنده دوام والشيخه هم جانت هناك تطمن عليهن وبعدين رجعت نامت يمي واني عيني مااخذت نوم ...
جنت اقارن بين كل تفصيل مر بحياتي قبل ماادخل حديثه وماعرفت اتخذ قرار

متمدده بفراشي وسمعت اندكت الباب
مال كليدور .. عرفته الشيخ اجه رحتله
وهو جان منطي ظهره للباب ..
اول مافتحته واندار باوعلي وابتسم وهو بعينه هذيج اللمعه نفسهه ...
هنا عرفت اني اتخذت القرار من كالي ..

- داري ان الوكت متأخر لكن ماهان علي اترك طلبك ومالبيه بنفس يومو

ضحكت وكلتله ...
- الوكت كله الك شيخنا ،،تفضل
- لاا خلنا نطلع نتمشى ..امنت الدرب لناحيه البستان عند كعدتنا ودي هنيك نكعد ونتسامر هالليله
- صار تدلل ..بس انتظرني دقيقه
- على راحتك

رحت لبست شالي والعبايه واخذت بعلاكه كليجه وطلعتله ..
مشيت بصفه وساكتين اثنينه وهو اخذني من وره بيتي وكبل كله مشينا وبعدين افترينا من وره بيت الفلاح ودخلنا البستان .. وجان الطريق فارغ ماينسمع بي بس صوت خطواتنا والحشرات ..

وصلنا وشفت المنقله مشتعل بيهه الجمر وعليهه الدلات وبالنص كدام الفراش محطوط خشب مكسر ومشتعله بيه النار
وهالمساند الحمر نفسهه بمكانهه موجوده

الريحه الدافيه وصوت طكطكه الخشب وهو يحترك وصوت الهوا الي يحرك بالاشجار من داير مدايرنا جان كفيل بأنه
ينطيني راحه وسكينه تخطي على كل تفكيري بهاليوم وتمحي كل وجع راسي

كعدنا وهو قرب المنقله كدامه وصار يشوف الكهوه وبعدين صب فنجانين
وانطاني واحد .. تبسمت وشكرته
وشربناهن بنفس اللحظه ورجع كررهن
وهم شربناهن وبعدين قدمتله كليجه
ضحك واخذله اثنين ورجع ظهره على المساند وصار ياكل ويباوع للنار
واني هم رجعت ارتاجيت وصرنا اثنينا نباوع للنار وساكتين ونسمع صوت طكطكه الخشب ..
كسرت هالسكوت وكلتله ...
- احب اجواءك الي ترتبهه بدقه وهدوء
- لاني احب وكت اكون حدرك هيك يكون الجو وكنت اتمنى تطلبي هالطلب
من زمان ..لاني مفكرلو بهيك جو وكت نحكيه
- وانته تعرف شنو اريد احجي ؟
- حاس فيه لكني حاب اسمعو منك
- هههه
- شو

ضحكت وهو باوعلي ورجع راسه وميله لناحيتي وصار يبتسم ويباوعلي ويكولي بهدوووء وصوت ناصي ..
- شو ودك تحكيلي
- اختاريتك شريك لعمري ياشيخ

تحولت ملامحه لصدمه وكالي ..
- بالله عليكي !!!
- والله
- عيديلي بعد خلي افهمو لمكصدك عدل
- اريدك شريك بعمري .. موافقه نتزوج
- يالله .. دخيل اسمك ..

عدل كعدته وصار يكولي ..
- تينه انا ما ودي توافقي هيك بسبب حكي الطبيبه او جايز امي حكتلك شي ما مستعجل انا والله
- شيخ

اخذ نفس قوي وكالي ..
- يا عينو
- تسلملي هالعين .. اني حجيت ويه الشيخه صح .. بس هي كالتلي شوفي كلبج وعقلج شنو يكولج واختاري
- اييه. !
- واني اليوم كله افكر مابين عقلي وكلبي وتفصيل تفصيل فكرتله وماقررت بس بصراحه .. للحظه الي طلعت وفتحتلك الباب وشفتك هنا قررت
- يعني من الي منهم اختارني ؟!

- وعيونك اختارك عقلي وكلبي اثنينهم مطمئنين الك وما يفضلون غيرك

دنك وصار راسه بين ايديه وبعدين رفع راسه واخذ نفس وزفره قوي وصار يضحك ويباوعلي ويكولي ..

- يا راحه عمري وثمار سنيني اطلبي
اطلبي وش تريدي يجرالك لخاطر هالفرحه اطلبي البيكي والله البيكي بماي عيني بس اطلبي
- تسلملي عينك .. طلبي هو بس تصبر عليه ..ادري اني اتعبك وادري قراري ما يرضيك بس اريد تسمعني شويه
- احكي براحتك ياتينه شيخك ما يغثو حكيك لا والله
- يخليك الله الي ياشيخ ..

درت وجهي عنه وهو كالي ...
- كبل ماتحكيلي شي ودي اطلب منك
تنزعيها لعباتك هين .. ودي اكمل كعدتي معك بحريتك وبراحه هين وسط العلن
وماعليكي مايدحكك هين حتى الطير

ضحكت ونزعتهه هي والشال وفريت ظفيرتي على اليمنه وضليت مدنكه والعب باطرافها وهو رجع راسه مثل قبل شويه وضل يباوعلي وهادىء ..

كلتله واني اباوع للنار...
- انته تعرف اني بديت بطريق جديد وبعدني باول خطوتين بي .. اصارحك
بأني ماعندي هسه الشجاعه الكافيه حتى اكمله بس اني متأمله ان استمد شجاعتي منك بباقي الايام واكمله لذلك احجيلك اول
اصبر عليه شويه لان اكو فد نقاط صعبه عليه فوك ماتتصور هي صعبه

- احكيها وش هي

- يعني ماعرف هيج احجيها بس اكولك
اني راح اراعيك من كل ناحيه واشيلك بعيني بس بالعلاقه الزوجيه يعني هنا
ماكدر والله اسفه ادري يضوجك هالشي
وممجبور عليه بس اني داصارحك بكل
شي ..
لاني اريد اكون وياك مثل صلاتي
لا اخاف ولا اجذب بيهه ..

باوعتله وهو ابتسم واشرلي براسه ان اتقرب .. قربت راسي شويه كدامه وهو دنك وباس راسي من منبت شعري
بهاللحظه حسيت برجفه بنص ضلوعي صارت بلحظه ولحظه الثانيه خفتت
رفعت عيني باوعتله وهو يبتسم وكالي بكل هدوء ..

- وظنك انا مو داري هالشي !

رفعت حاجبي وباوعتله مستفهمه .. وهو كالي ..
- كنت ادري انك راح تطلبيه ولكن الي مادريت عنو وفاجئني وفرحني وعطاني الصبر والقوه لحتى امنحك اياها وكت تحتاجي لها هو تشبيهك لي بصلاتك
كبير هذا التشبيه ياتينتي كبيير
ما ينرد لا والله ولا بيوم تلاكيني غير
الامان الي تدخلينو بنطقك ل الله اكبر
هيك انا اصيرلك ما تهمي و لا تحسبيها
شي يزعجني بالعكس انا رايد اتعبلك
واحصل كل شي منك بصبر وتأني

- يشهد الله الامان الي احسه وياك يعادل امان الصلاه

- فخر هالشي لي والله انه فخر .. افخر بنفسي انا ساعه الي ادحكك حدري تأمني وتنامي

تبسمتله بخجل وهي اشرلي اتقرب بصفه
وكالي ...
- خليه لراسك هين على كتفي ودي احكيلك شي

جنت متردده بالاول بس هو ضل يأشرلي على جتفه ويكولي يلا لحد ماتقربت منه وخليت راسي على جتفه الايمن وهو شال ايدي وخلاهه على زنده ورجع راسه على راسي وصار يحجيلي ...

- دحكي كيف هالهدوء هين يريح النفس
وريحه الشجر والتراب المبلل مع دفو هالنار حدرنا هيك تخلي الصدر منشرح
والفكر هادي ومرتاح
-ايي ماكو احلى من هيج جو
- انا عندي ساعه الي ادحكك حدري
هالجو كلو يعيد نفسو ويملي ريتي من هواه وريحتو .. واسكن بهدوئي
وحك عينك ياتينه ماكدر على هالهدوء معي حد كبلك .. انا لا عشكت ولا راح اعشك حرمه غيرك .. انتي بديتي هالحب بهدوء وسلاسه وهيك انا ودي ابدأ زواجي معك ...

رفعت راسي وباوعتله وكلتله ...
- يجوز يطول تصبر عليه

ركز نظره بنص عيني وكالي ..
- ما ودي زواجنه تقليدي ياتينه .. ودي
اعيش معك زواج منفرد بكل تفاصيلو
صح انك عاشرتيني هالسنين لكن دحكتي
معك الشيخ بس مادحكتي خالد

ابتسمت وكلتله ...
- اذا الشيخ هيج اخذ عقلي خالد لعد شيسوي

ضحك واني كلتله ..
- يا بختي بيك

رجع بوس راسي وخلاه على جتفه وكالي..
- انا محتاجك ياتينتي جايز اكثر منك
- ليش ياعيني
- ثلاثين سنه عدت مادحكت منهم سنه لنفسي والعمر عزيز عند بن ادم ياتينه
- اعوضك عنها وعد .. دامك اختاريتني لنفسك وكلبك ماتلكى غير الي يسرك
واني افرح لو حققته الك هيج احس استاهل صبرك
- وانا واثق وداري ان سعادتي ماتكون الا بيدك وحدرك .. تينه انا ودي نبني حجر جديد ومختلف بأساس زواجنه
كل شي كل تفصيل منو ودي اياه مختلف عن كل هالناس .. انا الي علي اصبر معك لوين ماتحبي وعهد رجال ماتدحكي مني شي يخل بطلبك .. وانتي مثل ماعودتيني كل شي تفكريلو وتدبرينو
لي هالمره بعد فكري بكل تفصيل مختلف
واطلبي الي تحتاجي له ماتلكي غير يتلبى
- صار تدلل .. ان شاء الله ابني هالزواج على كل مايبهرك ويرضيك
-ان شاء الله واثق انك تكدري عليه
-بعد شنو بالك
- الي ضل هو شي صغير احكيه لك بيوم عرسنا

من ذكر كلمه عرسنا حسيت بكلبي دكاته سرعت وضليت مبتسمه بخجل وساكته
وهو قرب من حلكي قطعه كليجه ..
اخذت عضه منها وهو اكل الباقي وكالي ..
- اول ما مشى فيي هو حب طبخك ونفسك بالاكل وبعدها بدت رحمه الله
-ههههههههه
- وهاذي الثانيه كانت بدكه الحنك تطبعت هين صوت وصوره بهالبال
- ههههه والراء الثالثه

-لااااا هاذي كانت كبل الاكل ايييه نعتبرها صفر واحد اثنين هههه نحسبها باعداد طبيعيه
- هههههههه ينراد تعيد حساباتك شيخ
مانقبل الغلط احنه المحاسبين
- هههه زين عجل عيدي احكيلي ابو جراح

ضحكت ورفعت راسي وضليت اباوعله وكلتله ..
- ابو جراح

ضحك بعلو صوته وكالي..
-هاذي واحد

واخذ كليجه اكلها وكالي ..
-هاذي اثنين

واني ضحكت من كل كلبي على حركاته
وهو كالي..
-هااذي الثالثه هييك رضيت ياحضره المحاسب !
-ههههه اييي رضيت
- بس هو التعداد ماخلص لكن ياخذ وكت خليهه بعدين كل يوم من العمر اعددلك منو
- لعد راح احفظهن بعقلي حتى احسب شكد شغلات وكعنك بالحب هههههههه
- مابيخلصوووو يولوو بالله ماينعدو

ضحكت وهو كالي ..
- من رخصتك يابه اسمحيلنا
انا وكلبي ودنا ننام بدارنا

نزع عكاله واليشمغ وتمدد وخله راسه بحضني وضل مغمض واني صارت ايدي ترجف بس بشعور بي نوع من الفرح والمفاجأه والاستغراب ..
جان شعره متنثر على كصته ويتحرك شويه بالهوا لانه حييل ناعم ..
قربت منه ايدي الترجف ماكدرت اسيطرلهه بس ماقاومت رغبتي بملمسه
وتلمسته ورفعته ..
فتح عينه وباوعلي وابتسم وكالي ..
- ضلي هيك لحين مااغفى
-صار

ابتسم وضل مغمض واني امشي اصابعي بشعره وهو شعره ناعم ضليت اجيبه منا اوديه منا لحد ماغفى ...

مديت ايدي واخذت الفروه الي هو دائماً بالشته بالليل من يمشي شايلهه بايده
وهي لونهه جوزي وعريضه مثل العباه بس مبطنه وثخينه .. فتحتهه وغطيته بيهه
وضليت اتلمس شعره واباوع لمعاني وجهه ...

لاول مره ماينام وهو عاكد حواجبه وضاغط على فكه بقوه تبرز حدوده

جانت ملامحه مسترخيه وفاتح حلكه شويه وايده مخليهه على صدره براحه
مو متجتف مثل كل مره ..
كل شي بي جان يوضحلي شكد مرتاح بقربي .. واني بداخلي اطمئنان جبير
ان اختياري هالمره مااندم عليه .. مرتين اخطأت بالاختيار والثالثه احسهه هي الاصح ...

مااكدر اجزم اني حبيته وملكته كلبي بس اكدر اجزم على اني مرتاحه باكثر مره بعمري ...

ارتفع بعد فتره صوت المآذن بتلاوه القران الي تسبق صلاه الفجر ..
وبدت اصوات العصافير باعشاشهه فوك هالشجر تزقزق ... بس الجو بعده اظلم

تلمست راسه وصرت اكعده وهو اول مااخذ نفس عالي وبعدين سحبهه لايدي وخلاهه على كلبه وباوعلي وهو يبتسم
كلتله ...
- راح يطلع الفجر

عرضت ابتسامته وكالي ..
- نعقد اليوم ولا بكرا؟
- ههههههههههههههه بهالسرعه !!
- عجل وش نتاني ياعيني
- على الاقل خلي ننطي خبر للاهل
-امي و تدري من ضل غيرها!
-ام جراح
- هاذي عزلتها عن طاري الاهل ولا تسألي عن سبب
- ماشي زين اهلي يعني لازم على الاقل اكول لاخويه
- انتي حاكيتلو عني
- ايي حاجيتله كلشي عنك بس ماحجيتله الي صار قبل
- اييه زين عجل انا اليوم اتصل فيه واحكي معو واطلبك منو ولو ودو امشي لعندو من بكرا اخذ عمامي وامشيلو
- هههه بكيفك عيني اتفق وياه بالاول
ونقرر شوكت العقد
- على بركه الله

رفع راسه من حضني وكعد يعدل بدشداشته وهو يلبس عكاله كالي ..
- حكينا بكل شي عدا هالسواد ايمتى تنزعيه ؟
- هههه بيوم العقد شيخ
- ماعديه اكثر من يوم لا والله

ضحكت ولبست شالي وهو وكف ومدلي ايده لزمته وكومني وهو يضحك وكالي
- حكيتلك انا بحبك لو نسيتها ؟
- هههه لا ياعيوني ماسمعتها بس شفتها
- عجل بتكفي ولا اسمعها لك
- هههه لا تعودني على الطمع

انداريت واخذت عبايتي لبستهه وهو رافع ايده ويمدد بجسمه ويكولي ..

- اطمعي وتدللي وتدلعي كلو عطش مامروي لكلبي يولوو

ضحكت ووكفت كدامه ورفعت ايدي عدلت وسط اليشمغ من يم كصته وكلتله
- ارويه لكلبك وبعدين ابدي بيهن

اخذ نفس وكالي ...
- كأنها بدت تصعب يولو .. لاتحكيلي شي وتولعين جمري .. حضري نفسك للعقد ومن ليتلو ابدي حضري نفسك للعرس مااعديلو غير اسبوع المحكمه

ضحكت وكلتله ..
-صاار تدلل

طفى النار ومشينا للبيت ....

#شقراء_بغداد

بارت_٥٣


مشينا للبيت والشيخ دخل وياي ..
شفت الشيخه واكفه تغسل وتفاجأت بجيتنا هيج سوه بهالوكت وكالت ..
- عجل انتو تتسامرو بره وانا افكر وين مشت هالمره بنصاص الليالي !!
- هههه قابل وين اروح ياعيني
- يمه ماتخافي كل ماتدحكيها اختفت اعرفي انها معي
- ايييه وش عليه

كملت وضوئها واحنه واكفين وبس نبتسم وبعدين هو توضينا ورحنه يمهه نصلي
وكملت ورحت حضرت الريوك وكعدنا ناكل وهو على طول اكله يبتسم ومدنك
جان الشيخه تكول ..

- احكيها يابني احكيها وش الي وره ضحكتك هاذي بفرحتك
- هههههههه يمه ولدك عرسو ما بكالو غير اسبوع
- بصلاااااه محمد عليييك يابني !!!
- عجل الكلب وحصلتو وش باكي انتظر ياامي

اندارت عليه وضربتني على جتفي واني بس مدنكه واضحك وكالتلي...
- يولوو ماصبرتيلك يومين بساعتها ركضتيلو
- ههههههههههههه شييييخه عفيييه
- هاااا يمه خييير بتشيشها علي انتي !
ودك اتعلعل ازيد !!
- لااا يابني لكن هيك تفاجأت فيها
- ماتتفاجأي ماانا صارلي كثير طالبها والحييين يلا فكرت تردلي الجواب
- لعد غير واحد يفكر
- ايييه يابه الحين خلصنا ضل عدنا وكت التنفيذ
- يابني اسبوع ! بالعجل ليه ماتصبرلك لاخر الشهر نجهز لعرسكم بالراحه
- وش عندنا يمه فضوها بيومين
انتي الحين خلك من العرس حضري للعقد بكرا بأذن الله
- ووول انته بتجيب اجلي ول انا وش احضر من اليوم لبكررااااا
- بكراا يعني بكراا .. ماتعزمي غير العزاز مننا واحكي مع ام جراح على هالشي واحكيلها ماااودي صووت يطلع
- زييين يابني زيين .. عجل ماتمشين للشغل اليوم ضلي حتى ننزل السوك
- لااا يمه محتاجها هنيك بشغل مهم نكضيه ونعاود من وكت مااتاخر شغله ساعتين
- ايه خلها ببالك ورانه مشيه للسوك ونكضيه اليوم ركضه بركضه
- اييه واركضو هاليوم وش عليه استاهل انا تعبكم
- ههههههه تستاهلو ياعين امك

باوعتله وهو فتل شواربه وضحك وكالي
- امشي ناميلك ساعه وانا اكعدك لتحضري نفسك
- ماشي

اخذت الصينيه غسلتها ورحت لغرفتي وعفته كاعد ويه الشيخه ..
رأساً غفيت وبعدين كعدت على صوت الباب يندك .. رحت فتحته وهو كالي..
- ادري انك ماشبعتي نوم لكن ورانه شغل الساعه سته ونص الحين تعجلي البسي
-ايي ماشي

درت وجهي واني اتقاوب ورحت فتحت الكنتور وطلعت ملابسي وانداريت شفته بعده واكف يم الباب ويباوعلي ويضحك
جان يكولي ...
- اخر يوم لهالثياب هين لاحركهم والله بكرا

ضحكت وخرت عيني منه بخجل وهو سد الباب وراح ..
بدلت بسرعه وطلعت وياه للمعمل ..

اول ما وصلنا ودخلت المكتب كالي ...
- يلا ماتتصلي باخوكي الحين كبل مايمشي
- شراح تكوله ؟
- بتسمعي وكت احكي
- ماشي

شلت سماعه التلفون ودكيت عليه وضليت انتظره يجاوب ومن جاوب وسمعت صوته كبل مديتله السماعه وهو ضحك واخذهه مني ..
اني مدري شجاني حسيت احترييت وتوترت بمجرد ماسمعته يسلم عليه
كبل عفته وطلعت بالممر بعيد عن الغرفه
وضليت اهدء بنفسي ادري من الخجل هيج يصيرلي وصرت افتر بالممر لحد
ماطلع هو من باب المكتب وصاحني
رحتله وكالي ...

- ودو يحكي معك
-يممه عزا شصار
-هههه يولو احكي الحين

رحت شلت السماعه وحجيت ..
- ها حبيبي شلونك
- هلا عيييني هلاا والله
-ههه هلا بيك
- شنو هالاخباار من الصبح عمي ماعرفت هيج الامور مطوره
-ههه هاااي شبيك
- اكلج شيخكم هذا يكولي يريد يجيب عمامه ويجي هنا زين انتي غير تنطيني خبر من وكت داارتب اموري
- والله مادري هي بارحه هيج صارت واليوم حجالك
- وانتي موافقه برضاتج لو صار شي جبرج احجيلي بروح ابويه
-هههه شبيك اي هسه شكو دتحرجني هيج
- ههههه ولج غير افهم شعجب هسه يلا
- مادري صارت بعد هيج احسن واامن الي
- تدرين اني قبلت لان هو حجالي فد حجايه حلوه
-شنو
-كالي .. بيتي هي سنين بحمايتي ماعليهه كلام بس من طلعت وحدهه صار وصالي بيهه صعب واني رايدهه تضل هي وبنتهه باسمي وحمايتي .. والصراحه اني شفت حجيه منطقي وتدرين بيه من زمان ماعاجبتني سالفه الكعده وحدج وكلتله
حجايه وهو ضحك بيهه
- صدك شنو هي
- كلتله اوافق بس بشرط ماتشيخ على اختي تخليهه بعينك
-ههههههههه
- كالي ابشر ههه
- ههههه اووف ياعيوني شلون ارتاحيت بكلامك احلى اخ والله
- تستاهلين كل الخير والسعاده انتي ياخيتي وكليله خليهه بينكم هنا بس تطش السالفه تصير ملحمه للضالين
- زين لعد تعال خلي اشوفك
- شلون اجي ياعيني
- حباب مصطفى شبيك لعد تعوفني وحدي بهاليوم والله ماارضاهه منك
اني شعندي غيرك
- هسه خلي اروح لشغلي اليوم واشوف اذا كدرت اجيج باجر بس ماراح احجي لاحد هنا خليهه تكمل يلا
- بكيفك حبيبي شنو الي تشوفه زين سوي
وباجر انتظرك عفيه لتكسر بخاطري
- لا ان شاءالله اجي ادللي .. يلا لازم اطلع تاخرت
- الله وياك ياعيني

سديته وباوعتله وهو رافع تك حاجب كلتله ..
- يكول خلوهه بينتاكم هناك خاف تصير مشاكل ويمكن باجر يجي
- حياه الله
- اوووف مامصدكه باجر اخيراً اشوفه

شكد جنت اريد التقي بي بس هو مايقبل
وابد مايكولي على السبب
- من خوفه عليكي مايرضى
- اي يجوز

كعدت وصرت اشوف شعندي من شغل
وهو ضل على وكفته ويباوعلي بعدين زفر النفس وكال ..
- بعد ساعه امرلك ونعاود البيت
- اي ماشي

طلع وهو عاكد حواجبه وتغيرت نبرته مدري شجاه بسرعه يتغير مزاجه ..

رجعلي وره ساعه واخذني وطلعنه
وبالطريق كالي ..
- وش مفكره تلبسي ؟
- مادري خلي اشوف
- ودي ادحكك تزهري مثل ماتمنيتك دايماً
- ههه صار
- افتحي هالمحفظه وخذي الي يلزمك لبكرا
- لااا ميحتاج
- هااااا ياتينه مانبطلهااا لهالسالفه
- اي اي نسيت اسفه نسيت

شمر المحفظه بحضني واني فتحتها بس ماعرفت امد ايدي على فلس واحد
كلتله ..
- مادري شكد اخذ انته من نوصل انطيني بكيفك

هو ضحك واني سديتهه ورجعتهه بمكانهه يم الكير .. ومن وصلنا للبيت
وطبك بالباب .. اخذ محفظته وانطاني فلوس وكالي ..
- هاذي دبري فيها اليوم وذهبك انا اشتريه
- لااا شنسوي بالذهب
- ول يابه عجل العروس ماتلبس ذهب ماتاخذ مهر !!
- منو كالك اني مهري اريده ذهب
- ها عجل وش تريدي ؟
-ههههه كلشي ماريد
- لااا بالله احكيلي .. انا ما سألتك عنو لاني مفكر اخذلك طقم ذهب وانتي لو ودك فوكو بنسجلو بالمحكمه ويجرالك
- لا ياعيني تسلم لا رايده ذهب ولا فلوس
والله شيخ ماريدهن مهر
- زين عجل وش ودك احكيلي حيرتيني معك

ضحكت وكلتله ..
- اريد مهري عمره بنفسي تنكتبلي زياره لبيت الله وياك شيخ اذا هالشي سهل عليك

ابتسم وباوعلي وكال ...
- تآاااامرييين ياضي هالعين عجل حرمتي ودها كربي من الله وارفضو !
لا بالله ما ينكالو غير ابشري ..
اول ما نخلص العرس ارتبها واخذك بأذن الله
- تسلم ياعيني
- انتي الي تسلمي على هالنفس الطيبه
دايماً تجيني بغير المألوف .. الحين هذا احسبيه تم وغيرو ؟
- هاهيه بس هذا كلشيي ماريد غيره
- لااا يا يابه اطلبي شي الحين يتنفذ
- عندي كلشي الحمدلله واني طلبت منك مهر غالي وهذا يكفي .. لا رايده الذهب ولا الفلوس كلهن رخاص كدام الي حصلته

ضحك وضل يباوعلي وكال ...
- انا اليوم تأكدت ان ربي يحبني كثير وخلاكي بدربي .. عسى الله يكدرني على اسعادك وحمايتك
- واثقه بيك شيخ

ضل يبتسم بوجهي وبعدين كالي ..
- انزلي وصيحي الوالده وخلي اخذكم للسوك يلا
- ماشي عيني

نزلت وطبيت البيت ورحت كبل على غلاتي شلتهه حضنتهه وهي تجر بخشمي هاي متعلمه عليهه كل مااحضنهه تسوي هالسالفه وتضل تضحك ..

نزلتهه وطبيت حجيت ويه الشيخه وهي جانت متحضره بس لبست عباتهه واخذنه غاليه وطلعنا ...

وصلنا للسوك وراح وضلينه احنه نفتر
اول مااشتريت لبنيتي اخذتلهه فستان ماروني قديفه وبي حاشيه ذهبيه ومدنفش
واخذتلهه طباكات بلونه وهي شايله علاكتهه ومكيفه بيهه وكل مانوكف بمحل
تفتحهه وتضل تباوعلهه وتباوعلي وتضحك ...

واني الشيخه تدورلي وين البدله الي تلبس وياي ثنين وكل شويه اكللهه جبيره والله
وترجع تحجي عليه ماتاكلي ماتسمني ضاله كد زرزور ابني شياخذ منك عظم
وتخليني اخرب ضحك بنص السوك واضل اغطي بوجهي ..

تالي صفيت على فستان طوله ثلث ارباع وردانه تول مطرز منه وبي وهو ضيك من الصدر والحفر مالته بشكل مربع وكلوش من الخصر منفوش
كلت هذا احسن حل ميبيني كلش ضعيفه
وهو كشخه قماشه ملمع وجان بي لونين
سمائي و ازبري .. الشيخه اختارتلي الازبري واخذته ..

واخذتله حذاء كعب ابيض جان عادي كعب كلاسك رفيع وساده .. وكلتلهه للشيخه اريد اشتري مكياج ... اني ماعندي غير كحله ومسكارا واربع حمر جانن وكسرتهن غاليه وضلت عندي بس السحريه هاي مرات احط منهه شويه
واني جنت مقرره اني اخلي مكياجي لان اني وحدي اعرف شأريد ...
ورحت اخذت المكياج وماشات ام الورده الكرستاليه اخذت منهه اثنين وصبغ اظافر مااخذت لان بنيتي عدهه كل الالوان ...

وتسوكنا وقبل مانطلع شفت محل ملابس رجاليه واذكرت الشيخ .. كلت اكيد صعبه على ام جراح ادزله ملابس لخطوبته وتخليه يتكشخ ..

فحجيت للشيخه نروح ناخذله وهي كالتلي عنده وهواي بس اني اصريت اخذله ومااخليه بموقف محرج وياهه ..

ورحت للمحل ضليت اباوع للدشاديش واذكر كل الوانه واتلمس قماشتهن
وتالي اخذتله وحده لون نيلي طوخ ودكمهه فاتح وقياسهه اخذته اضيك من الي متعود عليه حسيتهه راح تترتب اكثر
وضلت العبايه احتاريت مابين الرصاصي المايل للفضي لو الحليبي
والشيخه اختارت الرصاصي وجانت من النوع الثخين .. صار حسابهن غالي والشيخه كملت فوك فلوسي ..
اخذتهن ومتخوفه من اختيارهن لان هو باللبس حيل صعب ارضائه ...

اخذنه تكسي ورجعنه للبيت .. الشيخه ارتاحت شويه وكالت اروح لبيتي واعزم وارتب لباجر ...

سويت غدا خفيف الي ولبنيتي اكلنا ورحت نمت والعصر كعدت انظف البيت وارتبه واندكت الباب رحت فتحتهه جان تطلع ام حسن ..

كبل حضنتني وباركتلي وكلتلي .. اجيت اعاونج بكل شي وماامشي منا الا اخليج كامله مكمله ..

كبل ذبت عباتهه وصارت تنظف وياي
واني عندي تخم صغير بالاستقبال

حطيت عليه تول ابيض وثبته وجان كلشي بترتيب بسيط .. كملنا ورحت حضرت العشه بسرعه وتعشينه اني وياهه لان غاليه عيني هيج وكت ويه جراح ماتلفي بالبيت ...

ومن خلصنه العشه كعدت تحفلي .. اني متعلمه اخلي الخيط برجلي واحف لنفسي بس هي اصرت هي تحفلي وكل شويه تكولي ..
- يولو حبيبه الشيخ لازم تضوي باجر
وتحرك كلووب نسوان الديره كلهااا

واني بس اتبسم بخجل وهي تحفلي وبعدين كعدت سوتلي ايدي ومن شافت اثر الشخوط تعجبت بيهن برغم اني ماردتهه تشوفهن بس هي اصرت واكلتني اكل بالحجي .. اكتفيت وياهه
ب..
- اثر لجرح قديم لا تهتمين اله

سكتت وغيرت الموضوع بس اني توقفت عند هالنقطه ماكدرت اعبرهه واني افكر اني لو شكد ما ضليت خافيته عن الشيخ لابد يجي يوم ويشوفه وهم نظرته مثل نظرتهه تصير ..

جانت ايدهه خفيفه وبسرعه كملتلي
ايدي ورجلي اني مسويتهه قبل ..
تشكرتهه ومن رادت تطلع كلتلهه ..
- لا تكشفين لاحد عن الي شفتيه
- تطمني كأني مادريت عنو
- اذا شفتي جراح دزيه الي او حسن
- ان شاء الله

راحت واني ضليت كاعده بالحديقه واخذتني الافكار لبعيد ..ضليت احاول انساهه واغسل كل شويه واستغفر ربي بس شي يجذبني الهه وشي بمقاومتي يسحبني عنها وضليت هيج لحد ما دخل جراح كلتله ..
- جراح عمه حاجي الشيخ وكوله يمرلي محتاجته
- ايه عمتي تامرين

طلع يركض وركع الباب وراه واني فزيت من صوته وضلت ايدي ترجف واني اضغط بيهه على راسي واحاجي نفسي ..
ماكو شي انسيه تكدرين ماكو شي

بس الصوت نفسه يتكرر براسي
صوت البجي والصياح بصوت مبحوح
وايدي وهي تتشكك اتلمسهه كل شويه وابجي .. مادري شسوي ماعرف شلون اهدأ.. مادري شوكت وشلون اخلص من هالصوت ...

انفتحت الباب بسرعه ودخل الشيخ بس رفعت راسي باوعتله وهو بشبختين وصل يمي وكعد بمستوايه ولزم وجهي
وضل يباوعلي بقلق .. كلتله ...

- هي ذكرتني اني جنت ناسيه

ماحجه شي بس صوت نفسه السريع ينسمع .. مسح دموعي وكالي ...
- وش رايك تنامي على يدي وترتاحي وتهدأي ؟
-لاااا
-لييه ياعيني ..تخافي مني !
-لاا
-عجل شو
- ماكدر استحي
- ول انتي روحي ومن بكرا تصيري حرمتي هالمستحى مايلزم ياتينه .. امشي معي ولا تجادلي يلا انا ماودي حرمتي تمر ليلتها تعبانه

سحب ايدي وكومني واخذني للغرفه
جنت افقد السمع تدريجياً .. لحد ماتمددت كمت مااسمعه شيحجي بس اشوف شفافه تتحرك وماافهم والهوسه الي براسي
تزيد وماصرت اميز صوت عن صوت منها كلها احسها متداخله والنتيجه مثل وشوشه اصوات براسي وجفوني ثكلت

ضل هو مخلي راسي على ايده ويمسد على شعري لحد مانمت ...

كعدت لكيت يمي جراح وغاليه نايمين
والساعه شفتها بالاربعه الصبح ..
ضليت متمدده واتذكر الصار ..
بالاول مافرزنت شي عن شي بس بعدين تذكرتهن بالترتيب ..

كمت غسلت وتوضيت وصليت الفجر
وضليت كاعده اسبح لحد ما طلعت الشمس ..

رجعت لفراشي وضليت متلفلفه ونمتلي شويه واندكت الباب قوي ..
طلعت جان اشوف الشيخه جايه ..
صبحت عليهه وبعدين كلتلي ...
- كفي اكلك واكل الولاد من وكت واحدري عاوني صفيه ضاله لوحدها
ام جراح مشيت لاهلها
- اي صار

راحت الشيخه وطبيت حضرت الريوك
وكعدت الجهال اكلنا وجراح يباوعلي وبعيونه حجي .. وبعدين كالي ..
- عمتي ليه ابوي بيتزوجك ؟
- ااا هووو يعني
- امي كانت تحكي انه عشكان وش يعني عشكان ؟
- ههه يعني شي حلو
- كيف حلو ؟
- يعني هو عنده شخص خاص يرتاح وياه ويداريه
- والحين ابوي يتزوج لانه عشكان ؟
- انته ماتريده يتزوج؟
- لا انا ودي يتزوج لانه حكالي البارحه
انا وغاليه نصير اخوان بنفس الاب وتضل حدري كل العمر وتضل لي انا
ماتاخذيها مني بعد وتصير تسجل وياي بالمدرسه لانو لو ماصار ابوها مايسجلوها مو صح عمتي ؟
- اي ياعيني صح اذا ماصار ابوها متكدر تدرس
- لااا عجل انا موافك يتزوج حتى غاليه تدرس معي ونصير نروح ونعاود سوا
- ان شاء الله تضلون كل العمر سوه

كمل اكله وغاليه صارت تكوله ..
- ماما تصين عنوسه
- اييه عمتي بعدها صغيره تصير عروسه
- انا هم اصين عنوسه جنااااح اصين عنوسه
- من تكبري وتحكي عدل تصيني عنوسه

ضل يعيب عليهه وهي تعض بجتفه ويدفع بيهه جلبت الا اني جريتهه منه
ورزلتهه وهي راحت ختلت بظهره وتضحك بخباثه وهو فطير بسرعه نسالهه العضه وكعد يوكلهه ..

وقبل ما نطلع انطيته علاكه الملابس مال الشيخ وكلتله ..
- انطيهه للشيخ وكوله سلام من عمتي

اخذهه وركض للديوان واني اخذت غاليه وتمشيت للبيت ..
وصرت انظف وياهه وبعدين بدينا نحضر الغدا للمعازيم ورحنا طبخناه بالمطبخ الي يم الديوان لان الشيخه كالت الولد يتكفلون بالصب بس نطبخه الهم ..

وبسرعه بسرعه نشتغل وام حسن ويانه
ماعافتنه ابد .. وللساعه ١١ ونص
كلتلي روحي لحكي حضري نفسج

وطلعت ركض متلفلفه بالعبايه ورحت من وره بيت الفلاح لبيتي حتى ماامر منا واشوف احد من الكرايب الملتمه ..

طبيت سبحت وطلعت بديت امشط بشعري واعطره من هالزيت .. اني مااخلي الا قطرات على المشط وامشطه بي ...

وسمعت صوت حسن يصيح من باب الكليدور ..
-عمتتتي افتحيلي بالعجججل

ركضت فتحتله الباب وشفته شايل ماعون بي دليميه وعليه لالنكي انطاني اياه وكال
- امي ارستلو غدا لك

تشكرته وراح ركض طلع واني كبل اخذت خاشوكه وكعدت اكل .. واتذكر
كل مايسون دليميه واصير اكلهه بالخاشوكه الشيخه ترزلني وتكولي هاي اكله اصابع ماترهم الا هيك .. والشيخ يكللهه .. خليهه تاكل مثل مامتعوده كلو بيوصل للمعده ...

ضحكت واني اتذكرهم وكملت اكلي
ماخلصت نص الماعون وخليته على الطباخ وغطيته ..

رحت غسلت وفرشت اسناني وطبيت لغرفتي وصرت ابدل وبعدين كعدت اتمكيج ..
باودر خفيف خليت منه على الركبه والصدر وظلال خليت بس كريمي من بدايه العين والباقي كحل ممدود فوك الجفن وبداخل العين ومشيت شويه وردي لماعي على خط الرمش الجوه وحمره
وردي بدون لمعه واخذت شويه منهه ورت الخدود وضليت واكفه الح بالمسكارا ... وبعدين فتحت شعري جنت لافته ونزل عدل وسرح .. اخذت كذلتي الطولانه وكصيتهه شويه ورتبتهه وجبت الماشات وشكلتهن بخصلتين اخذتهن لولوتهن وخليتهن بالنص من وره خليت طباكه وبعدين ثبتنن فوكهن الماشات
وهيج خلصت خلال اقل الساعه ..

ضليت واكفه اباوع بالمرايه لشكلي وافكر راح يشوف فرق عليه بالالوان لو ماتغير شي ؟

جانت الحفره مال الفستان باديه من طارف الجتف ونازله عدله على الصدر بحيث مبينه منه بس شي كلش قليل يبين
مثل خط رفيع مرتفع بس هيج .. واني مالبست اي كلاده ولا تراجي .. اللؤلؤ ما ردت انسأل عنه هسه ...

اندكت باب الكليدور وسمعت صوت ام حسن رحت فتحتلهه وهي هلهلت وكالتلي ..
- يااااصلاااه النبي ياخيه كم عمرك بالله عليكي
- ٣٠ والله وراح اطب ٣١ بعد كم شهر
- ياااااماشاء الله كأنك بنت العشرين باولو
- هههه لا تغرج النعومه تره عجزت
- بعدك باول العمر ياااه . . عجل انا وش احكي على هالجسم كأني بنت الاربعين
- هههههه لاااا مو لهدرجه انتي مبينه بيج الثلاثينات
- اييه لكنك والله بتسطري .. هاللبس ذاك وينو يصيح بغداديه صاحبتو
- هههه لييييش
- لانو احنا مانلبسو ونجيبو هيك فيت قالبو ونعومتو بتلاكي الكرش نط بالنص والصدر وغف لفوك منو والشعر بنعملو كد الجبل لو كان هيك طولو يا ماشاء الله
- هههههههه كلمن على طبعه يضل وهي بعد تتبع الجسم همزين فادتني هالعظمات اليوم
- ههههههههههه والله بخفيه دمك لتلعبي على كليبو لعب

درت وجهي عنها وهي ضلت ترتب بشعري وتصلي على النبي وكالتلي ..
- وكت يدخلو الحريم انتي صلي على النبي بداخلك لتبعد النفس
- ما يصير شي ان شاء الله
- ان شاء الله محفوظين من كل عين

راحت لغرفتي بدلت وصاحتني مكيجتلهه وبعدني دارتب شعرهه وسمعت الباب تندك وطبن النسوان الكبار .. عماتهم ونسوان عمامهم .. واجتي وياهن غاليه جايبهه حسن ..
سلمت عليهن وترخصت ..
اخذت بنيتي بدلتلهه ومشطت شعرهه ورفعته الهه وخليتلهه طباكات المارونيه وهي ضلت مجلبه بيه ...

كاعده يمهن وهي بصفي تلعب بسوارهه لحد مااجه جراح وكال الشيخ يريدهه واخذهه وياه ..
وبدأ البيت ينملي بالنسوان كبار وصغار
والشيخه بيدهه المبخره تبخر وتفتر وتصلي على النبي ..

صفيه ماسمعت منها كلمه وحده منعزله وحدهه ويه بنات عماتهه واشوفهه تباوعلي من بعيد وهي تسولف وياهن

كلشي جان شعوره حلو الا ساعه ماسمعت الشيوخ راح يجون هنا ردت ابجي .. حسيت روحي وحيده لاني من صدك تمنيت يمي اختي صديقاتي وحتى مصطفى مااجه وصار وياي ..

ضليت متصفنه مااعرف شسوي لحد مااجتي ام حسن لبستني العبايه واخذتني وكفتني وره باب الكليدور لان هو جام وجان بس شويه مفتوح واسمع صوت
السيد وهو يردد السؤال عليه بالموافقه
والشيخ يحمحم واني ساكته واضحك وام حسن تأشرلي خمسه خمسه .. وتالي كلتله موافقه وكبل على صوتهن بالهلاهل
ورجعت كعدت وهي ضاله حاضنتني وتهلهل وتهوس هي وباقي البنات
وراحت تركض توزعلهن العصير وعماتهم يطشن الجكليت ويدبجن ويهوسن .. وصوت الرمي بره انعلكت حرب وهنه ويه كل رمي يعلن صوت الهلاهل ...

ولحد ماكعدن ياكلن الكيك هدأ شويه الجو وخفت دكات كلبي الي جانت تتسارع بهالهوسه بفرح ...
اي فرحانه راح اضل بامان وياه واعيش من جديد على ايده ...

اجتني وره شويه ام حسن مخبوصه وتكولي..
- يولي وينو عطرك وينووو دليني
- بالمجر الاول

راحت ركض جابته واجتي ترشلي منه وتضحك وتكولي ..
- يولي الشييخ راح يحدر الحين هين

ابتسمت وبدا التوتر .. ضلت ترتب بشعري مره تخليه صفح مره ترجعه
اخر شي كالت ..
- خليه يدحك الجسم يولو شنسوي بالشعر

ضحكت وهي رجعته لوره وضلت واكفه بصفي ولابسه شالهه وعباتهه ..
وكومت كل البنات جوه وبقينا بس اني وياهه والشيخه والنسوان الكبار ..

ودخل هو بهيبته الي متغير بيهه هالمره بس زياده ضحكته ...
لابس الي اشتريتهن اله .. النيلي المخصر عليه محليه اكثر .. والرصاصي المذهب مخليه يضوي .. واليشمغ المرفوع من جهه وحده بارز نور وجهه وضحكته

وكفتله ودنكت وهو ضل واكف كدامي واني اباوع لصدره شلون يرتفع وينخفض
وهو لزم بايده اليمين راسي وقربه اله وباسه من منبت شعري والهلاهل وياهه علت ..
باوعتله وابتسمت وهو بعينه نفس اللمعه بمثل كل موقف بي قريب مني يصير ..

كعدنا والشيخه واكفه تهوس هي وعماته كدامنا وهو نظره عليه ونظره عليهن
واني من توتري كضيتهه بس ارفع بكذلتي لحد ما هو قرب راسه مني وشاورني ..
- خليها يا يابه وشحلاتها نازله بمستحى

ضحكت وباوعت لعيونه وهو يبتسم و وجهه احمر ..
طلع من جيبه علبه وقرب ايده يمي وفتحها .. جان بيهه حلقات .. ضحكت وهو كالي بهمس وهو يعدل بيشمغه ..

- البسها وان ما طلبتيها
- حلوه شكرا ً
- هههههه مايلزم الشكر يولووو لاتجننيني عليكي الحين اسكتي

ضحكت واني دايره وجهي عنه وهو اخذ الحلقه والشيخه صارت تهلهل ومديتله ايدي لزمها بحنيه تلمسها من جوه وابتسم وبعدين لبسني الحلقه .. جانت ذهب صب ثكيله .. واخذت حلقته الفضه هم صب ولبستها اله وهو شاورني وكالي ..
- يولي هاذي صدك لو كالو اصابع عروس
- ههههه شبيهن
- كل البلا ياعيني كل البلاااا

رفعت كذلتي من عيني وابتسمله وهو مرتجي ويباوعلي وبعدين عدل كعدته وشاورني ..
- تينتي اسحبيه لشعرك لليسار
- ليش
- هالحين اسحبيه ودي ادحك شي
- شنوو

كلتهه واني اسحبه واباوعله وهو عينه على ركبتي ويبتسم وبعدين كالي ..

- شامه الركبه اول ماخذا عيني شامه الركبه
-عزاا شلون حيااال
- احكيلك بعد ولا نخليهه للعرس

خزرته وهو ضحك ورجع ظهره على التخم وكال لامه ..
- ما تشربونا شي يمه ريكي ناشف
- تدلل ياعين امك

جان يباوعلي وضحكته صفح وبعدين من شرب العصير كالي ..
- تكربي

تقربت بصفه شويه وهو حط ايده على جتفي اليسار واني جسمي كله اقشعر
وباوعتله وهو قرب الكلاص من حلكي وشربني ويشاورني ..
- ودي نتكاسم هالحياه مثل هيك اثنينا
نضوك طعمها من نفس موضع الفم

وخر الكلاص وضل يباوعله وشرب من مكان حمرتي وخلصه كله وخلاه على الطبله من جهته .. وباوعلي وكال ..
- طيب هههه
- هههههههه
- ارجعي انثري شعرك على جهتينك
انا شويه واعاود لك
- وين تروح
- بعاود ياعيني

كام طلع واني رجعت شعري ونثرته منا ومنا وهو رجع دخل وصاح ..

- تفضل ياخويه تفضل

باوعت لمكان وكفته وشفته سوه مجال ودخل اخويه مصطفى .. كبل شهكت
وخليت ايدي على حلكي ..

اخويه حبيبي اجاني ما خلف بكلمته
وكفت واريد امشيله رجليه ماتعيني
اباوعله شلون كبران وطولان وشواربه ثخنانه ومتكشخ بسترته السوده وبنطرون اسود وقميص ابيض وكلهن زايداته اناقه

اجه يمي وهو عينه تدمع وعيني من ساعه ما شافته تدمع لزمته من ايده وتلمست وجهه وهو يبتسم ويمسد على شعري واخذني حضني قوي واني ضليت مجلبه بملابسه وابجي ...

ما وخرت لحد مالشيخ اجه وخله ايده على ظهري .. باوعلي وكال ..
- ول تصخم وجهك بالسواد وانا ماعودت اخلص منو
-ههههههه هسه امسحه

انطاني هو منديله واخذه مني مصطفى مسح وجهي بي وهو مخليه بطرف اصبعي ويكولي ...

- كحيله من يومج ما تغيرتي
- حبيبي وين جنت ليش لهسه يلا شفتك
- جنت ويه الشيخ اتعرف على العائله
وحاير ببنتج ام لسان
- ههههههه هاي راحت يمك يعني
- ايي جابهه الشيخ الثاني يكولي شتسوي بيهه هاي مالتي
- هههههه جراااح بعد وهاي حجايته ماتخلص
- اكوله ولك اني خالهه يكولي واذا
اني ماخلي احد يشيلهه حتى لو خالهه
باوعلهه منا وحاجيهه وهي عيني تزيد فوك حجيه وتتخوصر وتكولي .. موو عيب انته ماتعرف العيب
- يبووو ياغاليه وسالفه العيب مجلبه بيهه
- بنتج تنحط بلبه الكلب صدك غاليه

ضحكت وميلت راسي عليه وهو حضني ويكولي ..
- كد ما شفت الناس هنا شلون كلها فرحانه من عرفو اني خالها وكلها ترحب وتصيح والنعم من هالاصل عرفت شكد زارعه طيب بين اهلهم وشلون بقيتي رفعت راس ابويه
- ربي يرحمه تمنيته موجود وياي اليوم
بس شوفتك عوضت

وخرت من حضنه واباوع للشيخ عاكد حواجبه وصاك سنونه وكالي ..
- اكعدي واحنا نعاود بالليل بعد مايمشو الرجال
- ماشي عيني

عدلت ستره مصطفى وباوعت للشيخ وكلتله ..
-ديربالك على اخويه شيخ
- ان شاء الله

كرصني من خدي وطلع ويه الشيخ واني كعدت مرتاااحه واضحك من كل كلبي
وعماتهم صارو يسألوني عنه واكللهم اخويه الجبير ...

وام حسن كعدت يمي وتكولي ...
- اخيك حليوه يولي بعدو صغير كم عمرو
- ٢٧ سنه
- هاا وش دارس
- هو محامي
- يا ماشاء الله ربي يحفظو لشبابو

النسوان شويه شويه بدن يطلعن ويخف البيت وبعدين للمغرب ما بقى غير ام حسن وياي والبقيه كلهه تحولت لبيت الشيخ ...

رحت بدلت ولبست واحد من الاثواب الي جابهن الي من الشام .. واختاريت الي لونه وردي حتى يبقى ويه المكياج والصبغ اظافر...

وتعشينه اني وام حسن وهي تحجيلي ..
- يولي كلهن دحكن من الباب كيف الشيخ يشربك ويدحكلك ول طكن بغيضهن طكككن ويحكن وش عندها وميت عليها
حرمتو الاولى احلى منها هاذي بعدها جاهل
-هههههههههههههه

- وانا رديتهم لك شكل رد انخرسو هيييك فيه
- شكلتليهن
- حكيتلهن .. ول لو انتن احسن منها خلو ازواجكم يدحكو لعينكن مثلو واسلبو عكلو مثل ماسلبتو هي بفطاريتها وكرم نفسها
-هههههه عشتتي والله
- وكل شوي احكيلهن .. دحكن كيف يشبر شعرها بعينو .. من الله طول وجمال ... ومن صرتي تحضني اخيك
حكيتلهن .. دحكن اهل بغداد هين بينا منورين ببساطتهم ول دحكن كيف اخيها يداري دمعاتها ويرتب جمالها .. وحكيتلهن .. خيرتكم تعرف تدلع هيك بحضن اخيها وهو يضحكلها !!
-هههههه
- والله اخرسسسن خلاااص ومشن كعدن ماتحملن يدحكن لمتكم
- هههههههه والله ماكو منج ياام حسن

ضليت اضحك واني اتذكر حجيها
وبعدين هي كالت لازم اروح اشوف بيتي
والجهال .. وراحت ضليت وحدي متمدده
وانتظر جيتهم ...

وطولو بالجيه لحد التسعه بالليل ..
دخل مصطفى شايلها لغاليه وهي بيدها دب ابيض .. وجراح يمشي ويه ابوه وعاكد حواجبه نفس عكده حواجب ابوه
والشيخ يبتسم بس مو بمثل لهفته اول مره

رحبت بيهم وكعدو بالهول ومصطفى راد يغسل وراح للحمام .. ضليت ويه الشيخ
رحت كعدت يمه وهو باوعلي ورافع حاجبه ..كلتله ...
- خير شيخ شو ضايج ؟

فرك وجهه وكالي ..
- مااا تنامي الليله سمعتتتي
- اي
- اييه ضلي انتظريني بعد ما ينام اخيك
مفهووم
- اي عين صار مفهوم

#شقراء_بغداد

بارت_٥٤


- مااا تنامي الليله سمعتتتي
- اي
- اييه ضلي انتظريني بعد ما ينام اخيك
مفهووم
- اي عيني صار مفهوم

كالهه وراح طلع .. ضليت كاعده يم مصطفى واشمشم بي وكلتله ...
- شلون اندليت البيت
- والله من الصبح خابرني الشيخ وكالي من اوصل حديثه اول ماادخلها اكو بيكم بيهه رجال اثنين ينتظروني على يمين الطريق وصدك والله اول ماشفت مدخل حديثه نزلت وضليت اباوع لحد ما شفت السياره والرجال اول ماشافني اباوعلهم اجه ركض عليه وكالي ..ضيف الشيخ البغدادي انته ؟ كلتله اي اني ..كالي تفضل حياك الله واخذني كبل لهنا
- الحمدلله وصلت بسلامه .. والشيخ دائماً مرتب بفعله
- تدرين اني من حجيج عليه حسيت راح يجي هاليوم
-ههههههههه
- بس والله شيخ عصبي شلون متحملته
-ليش شبي
- عينه تجدح وبالديوان كلمه الثانيه يزمخ بالعالم وهمه منصين الراس وكله على امرك شيخ
-لاااا هو مو لهالدرجه عصبي اصلا كلش متحكم باعصابه وصبور
- يجوز بس كدامكم ..بالديوان صوته يزلزل وحتى من يصيح لواحد يصيحه
بنبره عصبيه ومخنزر يمكن شفته ضحك مرتين بس .. اول ماشافني وسلمت عليه
ومن طلع ديصيحني اجيج
-ههههههههه صدددك والله
-اي والله ولحد هسه هو مخنزر ولج اني من صوت نفسه اكول هسه راح ينفجر بوجه واحد منا خاف بعدين هم هيج يصير وياج ؟
-لاااا والله الشيخ حباب وكلش كلبه طيب
احنه صح نتعارك مرات بس والله ميصيح هيج عليه ..يرزلني اي بس بهداوه مو صياح
- هاااااا ومرته هذيج هم
- اي هم زين وياهه
- شلون قبلت هي وماسوت مشكله !لو عاديه عدهم هالسالفه
- لااا بس هو حجى كلمته بعد محد يكدر يسوي شي والصراحه لحد هسه ممتواجهه وياهه
- والله هو الشيخ مايتعوض بس خايف عليج من مرته
-لااا هم حبابه هي لتخاف كلهم هنا حبابين ومن اهل الله
-الله يسعدج بينهم .. اكولج هذا جراح وين اخذ غاليه شو ماصدك نزلتهه كبل اخذهه وشرد
-ههههه هذا يخاف عليهه وميحب احد يتقربلهه تلكاه هسه يريد ياكلك بسنونه
-هههههههه والله عمي كلمن حاجزله وحده من بنياتنه
-ههههههههه

رحت سويتله ماعون فواكه وكعدنا ناكل وهو كالي...
- دعاء جايهه خطابه
-هاا منوو
- ابن عمتنه الوسطاني فؤاد
-هاااا
- حاجتني عمتي عنهه كم مره بس اني رفضت .. ماعدنه احد بالبيت وتدرين باامي مريضه
- ماتتزوج لعد
- بعد مالاكي بنت الحلال
- ان شاء الله تلكى الي تريح بالك
- ان شاء الله
- دعاوي اذا الهه نفس بفؤاد انطيهه لان عماتنه خوش عمات نفسهن طيبه وتضل تحبهه من ريحه اخوهه
- ماعندي اعتراض عليهم بس لان ماعدنا غيرهه بالبيت واني كلتلهه لعمتي
لو عدنه جنه جان انطيتكم
- اي لعد دورلك على مره .. اني لو اعرف وحده هنا جان خطبتهه الك
بس ماكو غير اخت الشيخ وهي تكره اهل بغداد
- ليييش عيني شبينه وتكرهنا
- هيج نفسيتهه بعد . . هسه انته خلي سالفه الزواج بالك هم كبرت بعد شتنتظر
- اي الله كريم .. كومي افرشيلي خلي انام
- امشي بغرفتي نام
-لا يابه
- لااا والله هسه قابل شنو دكوم نام هناك اني اضل انتظر الخاتون شوكت تذكرني وتجي تنام يمي وهم اريد انظف البيت
- هههه ديلا لعد اني مطفي بصراحه
وراح انام بعد ماعليه بيج باجر اصحصح ونشبع حجي
- هههه براحتك حبيبي نوم الهنا

راح للغرفه وهو يتثاوب .. كمت لميت المواعين غسلتهن واتذكرت الشيخ راح يرجع وبعده عصبي .. كعدت اعصرله برتقال وشويه حامض ولكيت بالثلاجه قطعتين كيك هم حضرتله وحده ورحت الملم البيت ...

وصارت ساعه وحده ونص اندكت باب الكليدور واني كاعده بالهول رأساً كمت فتحتله ... كلتله ..
- هلاا شيخ شو تأخرت
- ظنيتك كاعده معو
- لاا خطيه نام من العشره
-اييه زين

دخل واني كلتله ..
- شيخ غاليه وين ؟ شو مااجابهه جراح بعد
- نومهه عندو
- يااا لييش
- ما يبغى خالها ياخذها منو ونامو من زمان
- هههههه والله ياسوالفك ياجراح هسه قابل راح ياكلهه

خوفني شكله هيج ساكت ويباوعلي ورافع تك حاجب وصاك سنونه .. كلتله ..
- شيخ بيك شي ؟

زفر نفس قوي وراح للاستقبال ... رحت وراه وهو شال عكال واليشمغ وشمرهم على التخم بعصبيه واندار يباوعلي وفاتح عينه على وسعها .. بلعت ريكي وهو كالي ...
- شعلتتتي اهلييي
- شسويت !!
- يوووولي بتتلزكي فيه ومكشفه الجسم
وبوسط هالحريييم !!! عججججل انااا
واكف حدرررك شوو فهميييني !!
بتدلعي عليه كداااام عيني هييييك ظنك سهله !! هااا
- شيخ اخويه هذا قابل شسويت
- وااااان كاااان مااابفهم هيييين انااااا تينه ماااابفهم ... عند حلالي يتكطعن الخيوط الي بهالراااس مااااافهم اخيك ولا ابيك
ولااا حتى ابنك مااااايلمسك غييرررررري تفهمممممي غيرري انا
محرم بعيني الي يلمسك من اهلك
ولااااا تحكيلي بسبسه قلتلك مااافهمها عكلي مايتحملها وانتي تزوديها بالددددلع
والحكي المعسووول وجسمك المكشف وهو يتلمسوووو وانااااا ولااا حسبتيييلي حسااااب ماااافكرتي ان الي هييين واكف

رجلي ادحكلو اخاف ماااايرضى اخفها كدامووو وكدام اهلوووو اخذتيه محاااضن بالعجججل واناااا انسييييت بعرض الحاااايط انضربت ولاااهمك غيرووو

بالاول خفت من عصبيته بس من فهمتها غيره هدأت وتقربت يمه وهو دار وجه عني وصار يفرك عيونه ويستغفر

خليت ايدي على وجهه ودرته عليه وهو مضيك عيونه ويباوعلي .. كلتله ..
- اني ماانساك شيخ ومادري هيج راح تنفعل وتنقهر من هالتصرف جان ما سويته .. بس اني متعوده على هالنوع من القرب منه وتدري اني صار شكد مشايفته

- مااا تبرري تينه .. هالحكي انااا اعرفو
لكن ما يوكل خبز عندي .. الي احترك هييين ما يطفيه اعذار

عافني وراح كعد .. ادري بي طبعه صعب وما يقنع بسهوله .. ضليت واكفه اباوعله وافكر شسوي واراضيه !!؟؟

تالي كعدت يمه واباوعله وهو يباوعلي
وحواجبه طابكهن وكصته بيهه خطوط متجمعه ونفسه عااالي عبالك جان يركض
وهسه وكف ...

تدنيت يمه اكثر ومديت اصابعي لبين حواجبه وفتحتهن وهو جر نفس ودار وجهه عني .. رجعت خليت ايدي على وجهه ودرته عليه وهم لكيته راجع طابك حواجبه هيج .. رجعت فتحتهن وكصته هم تلمست هالخطوط وكلتله ...

- راح تطلعلك تجاعيد من كد ماتطبك بحواجبك هيج
- ول اي خرابيط هااااذي وخرري عني
- والله شبيك .. اصلاً تصير محلو من تخنزر

باوعلي وهو مخنزر ازيد كلتله ..
- مثل هيج يعني .. محلو

خليت ايدي اثنينهن على كصته وسحبتهه من الجهتين ورجعتهه راخيه وكلتله ..
- كااافي تخنزر عفيه هسه شلون اضل كل شويه افك بيهن
- اترررركيهن هي هااذي الي هامتك
- شيييخ
- دحككككي حتى هييين تفضليه وتعامليه اززززيد مني حتى بالحكي هووو غييير
- شنوو هسه شحاجيه اني
- مااااحكيتي شييي خلصنا

وكف واخذ شماغه والعكال بيده وراد يطلع رحت وراه لزمته من ايده وكلتله..

- عيوني شبيك وين رايح
- امشششي الاكي شي يطفي ناري
- واكو شي احسن مني !

كلتهه وصرت كدامه وهو ضل مركز بعيني وهم مخنزر . . جان شعره نازل على كصته رفعت ايدي خليتهه على جتفه والثانيه صرت ارفع بشعره واكوله ..

- مااريد نار الغيره تأذيك ..انته عندي الكل بالكل .. اخويه يوم وانته رجلي دوم

خليت ايدي على كلبه وكلتله ..
- هدأ كلبك هدأه .. مايغلى عليه شي
يبقى كلب خالد هو الاولى بكل شي عندي

بدأ نفسه يهدأ واني رفعت اصبعي لحاجبه عدلت شعراته وهو رخاهن ..
تلمست خده وكلتله ..
- اسفه لتعبك كل اليوم مني ... اسفه لكل شي ما رضاك وخرب فرحتك بهاليوم

سحبني من خصري وضل مخلي عينه بعيني ويكولي..
- ما عاد تحركي كلبي
- لااا ماتصير بعد والله
- وما تحكي حبيبي لغيري ولا والي زرعك بكلبي ان سمعتها مره ثانيه اكسرلك فكك
- ههههه صااار تدلل
- ما تفردي شعرك كدام عين غير عيني
ما يدحكو جنس بشر غيري
- هم تدلل
- بكل مكان وزمان ابغى عينك تدحك لي اناا بس اناا والباقي مالهم غير نظره بس
- هي اصلاً ما تشوف غيرك
- ممنوع تكعدين حدر امي لحتى تظفرلك
انا بالويل كنت ادحكها وساكت لو تكررت من بعد الحين مااسكت لا والله وبهجم اليوم عليكي انتي وياهه
- ههههههه حتتتى هاااي
- اييييه ايييه ماتحملها ماتتعحبي كل تفصيل فيكي انا مالكو ما تحمل غيري يتهنى فيه حتى لو بنظره ... انا ساعه كنت ادحكها تغلغل اصابيعها بطولو
اتمناهه فرصتي وانا الي ادحك كيف ملمسو .. حتى هالطوارف الي ساعه تحكي معي بسالفه موترتك وتلعبي فيها باصابعك اتمنى انا الي اتلمسها ساعتها واخذها حتى من يدك

قرب وجهه على وجهي واخذ نفس وغمض وصار يكولي بكل هداوه ..
-هيييك انا فيكي مجنون ماعندي عكل وفهم بعشكك

نزل يشتم من خدي لحد ركبتي .. وخرت منه بهدوء وهو باوعلي بعين ذابله بعدين مسح وجهه واني كلتله ...

- اا هسه اجي

عفته ورحت للمطبخ واحس كلبي يدك براسي وايدي ترجف .. اخذت كلاص مي شربته كله ونكعت ايدي مسحت ركبتي ..
مااحب هالشي مااحبه ..

هدأت نفسي شويه واخذت الصينيه ورحتله لكيته كاعد وصافن ..
كعدت يمه وخليت الصينيه على الطبله
وهو صار يباوعلي واني درت نظري عنه وصرت اقطعله بالكيكه شويه
وهو كالي ...

- زعجك تصرفي !
-لاا لااا
- تينه بالله دحكي علي وفهميني سالفه
-اي شنو
- احكيلي حدي لوين بلمسك ؟

درت وجهي عنه وضجت حيل ضجت من هالسؤال .. رجع كالي...
- فهميني حتى مااتعدى الي يزعجك
لزوم اعرفو تينتي
- مادري والله
- وشو ماتدري؟
- مادري يا شي يضوجني ارجوك خلي نعوف السالفه
- زين ..انتي فكري فيها واحكيلي وكت مايعجبك ..انا ما ودي غير ان يصيرلي علم بمكان حدي معك لاني هيك برغبتي المسك احضنك ومتخوف منها احكيلي انتي شي واحد اكدر اسويه بدون ما يزعجك
- انطيني شويه وكت
-ايييه خذي وكتك بس كان ودي افهمك ان لزوم تبيني لي الحد المسموحلي فيه

ابتسمت شويه وهو اخذ العصير يشربه
وصار ياكل كيك واني اباوع لظهره عريض ومبين قوته .. وطريقه كعدته
الي ساند عكس ايده على رجله ومقدم ظهره شويه .. وملامحه العفويه وهو ياكل .. وعطره القوي ممزوج بدفو نفسه
كلها جانت تترافد ويه تفكيري بأن..

هذا رجلي بعد مو صديقي ..اكدر التجىء له بدون خجل وقيود ...

تدنيت يمه كلش وخليت راسي على زنده
وضليت لازمه اصابعه وهو ضحك وباسني من شعري .. كلتله ..

- هاي احبهه

ضحك وسحب ايده وحاوطني بيهه وكالي
- وهااي انا احبهه لزوم تحبيهه بعد

ضحكت وهو قرب راسي لصدره وضل مخلي ايده على زندي واخذ نفس قوي وكالي ..
- ريت الوكت حدرك ياتينه ما يخلص مرتاحه هيك ؟
- اي مرتاحه
- يعني حضني ما يزعجك !
- لاا احب هيج هدوئك وياي بي
- عجل ما تفاركي حضني بكل لحظه انا معك هين

حضني باثنين ايديه وراد يقرب راسه يم ركبتي وبسرعه تراجع وضل يتلمس بشعري وفتح الكماشه ذبهه واخذه يفتحه بايده لحد مانثره كله على جسمي وضل يتلمسه من الطول للطول وهو يكول ..

- ياااسبحان الي سوااه وجمله بعيني
- ليش هيج تحبه ؟
- مادري لكن يجذب عيني ساعه الي يتمايل ولونو الاسود انا احبو اكثر من الاشكر .. هيك ادحك فيه القوه والنعومه بنفس الوكت وهالشي يعجب مفاهيمي
-ههه كُله كدامك
- تحضري بكرا نمشي نحلل حتى نتعجل بعقد المحكمه
- صاار بس اكو شغله

وخرت راسي من صدره وضليت اباوع بوجهه وضحكت وهو ضحك لضحكتي وكالي ..
- شو يانظر هالعين
- البس اسود عادي لان ماعندي غيره تعرف يعني
-هههههه ول عجل مااشتريتي البارحه
- نسيت جنت مستعجله
- عجل دامها هيك نأجلها لبعد بكرا وانزلي السوك بكرا اخذي الي يلزمك
- لاا عادي خلي نروح هي شغله ساعه
- ولاااا دكيكه بعد ينلبس ابد والله
- هههههه ماشي لعد مثل متريد
- على ذكر اللبس تشكري على هالهديه
عليم الله فرحت كلبي فيها
- عجبتك اهم شي !!!
- ايييه عجبتني عجل كيف ماتعجب ومن ذوق تينتي حبيتو للون
- اييي الحمدلله عجبتك
- تسلمي ياعيني
- تدلل اني حبيت كلشي يخصك بعد يكون على ايدي
- ياااحلاهااا والله
- خالد
- لبيكي خالد وعشيرتو
- يحفظك ربي .. تنام هنا اليوم ادري انك ماترجع للبيت وماارتاح لنومتك بالديوان
- وش تدري بعد
- بس هيج مادري غيرها
-هااا
- ادري بيك متريدني اعرف شي غيرها
لو ردت جان حجيتلي واني مادخلت بالاكثر
- زين تسوين خليكي بعيده من هالهرج
مايسوى تسمعيه
- ماشي .. هسه تبقى هنا
- اذاااا تنوميني مثل هذاك اليوم ايييه اضل هين غيرو امشي احسن
-ههههههه تدلل انته

رحت صعدت للبيتونه جبت فراش اني مصفطته على بوفيه هناك .. ونزلت
فرشتله بالاستقبال وحطيتله بطانيتين
وجبت الصوبه هم خليتها بنص الاستقبال
وهو نزع دشداشته واجه تمدد ..
طفيت الضوا واجيت كعدت يم راسه وهو شال المخده واجه خله راسه على رجلي وتلفلف بالبطانيه ...
ضليت العب بشعره لحد مانام ..
جريت المخده داخليهه جوه راسه واكوم وهو كعد جان يكولي ...
- ويين ماشيه !!!
- داروح انام
-لاا يابه هذا غش
- شبسرعه كعدت !
- انا هيك نومي خفيف .. حدري نامي هين
-لااااا شنو
- ايييه وش فيها عجل تغشيني تخليني انام وتمشي !
- هههه لعد شسوي
- انتي ضليتي معي لحين ما صحيت وهالمره بعد تضلي
- عيب خاف يكعد مصطفى
- نكعد على وكت الفجر كبلو يلاا لا تطوليهه

فتح البطانيه واشرلي اجي وهو يضحك
كمت وخليت المخده بمكاني وهو تدنى وفتح ايده .. اجيت تمددت وهو غطاني وكالي ...
- مرتاحه هيك. ؟
- اي

اخذ نفس قوي وراد يقربني لجسمه ما قبلت عافني براحتي .. وضل بس يباوع لعيوني وبعدين غمض واني ضليت صافنه شويه عليه ونمت .....

كعدني على صوت الاذان وهو بس يتلمس بطارف اصابعه خدي .. ابتسمت وكلتله ..
- صباح الخير
- صباحي انتي ياوجه الخير

ضحكت وهو كالي ...
- تدرين انا اليوم احبك اكثر من الي كبلو
- اممم ليش
- لانك شجاعه اليوم انا حسيت بشجاعتك كيف انها كبيره
- شلون مافهمت ؟
- هيك يجيلها يوم وتفهميها ... الحين خلينا نصلي سوا هالفجر

كمنا وهو اخذ الصوبه بره طفاها وترسها نفط ورجع شغلهه وعافهه بره يروح دخانهه ورجع يغسل ...
فرشت سجادات وهو طلع جابهه وخلاهه يمنه ووكف كدامي وكبر ...

خلصنا الصلاه وضلينا نسبح لطلوع الشمس وبعدها رحت احضر الريوك
وهو اجه يمي بالمطبخ ضل واكف ويكولي...
- حضريلي هويتك واخذي صور بدربك
اليوم حتى مانتعطل
- ماعدنا شي ليش مستعجلين
- يولو هو الي يدحك هالراحه يهلو يبعد!
-هههههه لااا حقك اذا هيج
-ايييه عجل ما تجيبي هالسيره بعد
واليوم ارسلك فلوس بيد امي حك جهازك
وانتي خذي هالاسبوع كلو حضري فيه
- ماشي عيني
- بكرا لزوم نمشي للجلسه تاخرتي عنها
- ايي صح اذا صار مجال نروح
-يصير عجل وش عندنا هو تحليل نخلصو بالعجل ونمشي لعندها لزوم نعزمها على العرس
-اييي هسه تفرح خطيه

اخذت الصينيه ورحت يم الصوبه كعدنه
نتريك ومن كمل اكل كالي...
- اخيك ايمتى يصحى !
- بالسبعه هيج
- زين عجل من يصحى احكيلو يحدر لعندي بالديوان
-ماشي
-واليوم لا تطبخي الغدا انا موصي ولدنا على ذبيحه لاجل عينو وما ودي تتعبو فيها هنه يطبخوها
- تسلم ياعيني
- الله يسلمك .. انا امشي الحين كبل مايروج الدرب بالناس

وكف ولبس شماغه وعكاله واني انطيته عباته اخذهه وابتسملي وطلع ...

اني رجعت تمددت بفراشه وضليت اتذكر هالليله .. شكد جان عصبي وشكد صار هادىء ورجع مرتاح ...
شنو من حنيه شايل وشنو من احترام وحذر بالتعامل !!!
كلهه جنت فرحانه بيهه لاني ملكت هيج رجل يملك هالصفات ويداريني بيها ...

كملت نومتي هنا وبعدين كعدني مصطفى
واول ما كالي ...
- لعد اني كل شويه افز واكول هسه تجي وانتي جنابج نايمه هنا ! ماكلتيلي لعد حتى اعوفلج الغرفه ليش نمتي هنا وحدج
- لاااا مووو
- شنووو
- هو اني ضليت انتظر غاليه ومااجتي فصليت ونمت هنا شويه على الدفو
- هااااا هاي متريكه ؟ ويامن !
- اااا ويه الشيخ تريك يمي وره الصلاه وسأل عليك
-هاا وشعنده شيخج من فجر الله يفتر
- هو متعود يكعد الفجر يتريك ويطلع ميبقى نايم
- ماشاء الله
- اليوم مسوي عزيمه الك وكال من يتريك خلي يجيني
- والله جني راح اشبع تشاريب اليوم
- هنا دليميه ماكو تشريب كله خبط شي فوك شي
-صددك يعني هوسه اني ماحب الاكل المخلوط
- لاا لاا راح يعجبك لتخاف
-اذا ماعجبني اجيج تسويلي غيره
-ادلل من عيوني
-هاي بنتج اخذهه هذاك الوليد موو
حبسهه يمه
-هههههه اييي منومهه يمه مقبل يجيبهه
- والله عمي من هسه شايخ عليكم شيسوي لو يكبر

ضحكت ورحت سويتله ريوك وخليته ياكل واجيت لميت لفراش ورحت عزلت الغرفه وجان تندك الباب ..
طلع مصطفى فتحهه وسلم على الشيخه
ودخلهه للهول ...
رحت سلمت عليهه وهي جانت شايله علاكه انطتهه لمصطفى وكلتله ...
- ياابني هالثياب ارسلهم الشيخ ويقلك
البسو واحدر لعندو الحين
- هاا مشكورين ..من رخصتكم

راح للغرفه واني ضليت وياهه جان تكولي..
- وانتي بعد تحضري حتى نمشي للسوك ونعاود كبل الظهر
- راح اتعبج هالايام شيخه
- لااااه فرحه ولدي تسوى التعب
يا زينك والله بليلتين خليتيني ادحك ولدي رجلينو ما تطخ الارض من فرحتو يمشي ووجهه مبسم
- ههههه الله يكدرني واسعده اكثر
- بالك عليه يايمه هذا وحيدي وشكى سنيني ما تتعبينو واحفظيه واحفظي بيتو
تراه يحبك واجد
- بعيني اخليه شيخه لتخافين
- ما تكصرين يابنيتي

طلع مصطفى وهو لابس الدشداشه ويعدل بالياخه ويكولي ..
- هااا شلوني
- حلوو ياعيني ناقصك بس اليشمغ
- اي هذا موجود بالعلاكه بس مادبرته ماحاطين عكال
-هاا تعال اني اسويه الك
- شمعرفج بي !
- اعرف اعرف تعال

اخذته وهو كعد ولفيته اله وثبته ليوره
وكام يباوع بالمرايه وكالي ..
- صايره انباريه معدله
- ههههه افتخر منهم صرت
- هذا يضل هيج ثابت مو
-اي ما عليه شي
- زين لعد راح اطلع
-واني هم راح اطلع ويه الشيخه للسوك
- يلا زين انتبهي على نفسج

راح طلع واني بدلت ورحت ويه الشيخه للسوك ..
اشتريت ملابس طلعه واخذت هدايا لعلي ودعاوي ورجعنه بسرعه ...

وضليت هاليوم بيت الشيخ وغاليه مجلبه بخالها وجراح كاعد وحده مطنكر ..
سمعت ام جراح ماتجي الا وره العرس
جان بنفسي اكعد احاجيهه ونتفاهم هسه راح تكبر المشاكل بينه اكثر ...

مصطفى العصر رجع للبيت وكال يجيني قبل يوم العرس .. انطيته هدايا اخواني ووصيته يبوسهم ويجيبهم بالعرس بس هو ما قبل يجيبهم كالي بس اني اضل ادري بي لحد ما يتم ..

ثاني يوم طلعنه الصبح اني والشيخ ورحنا
حتى نحلل ..
بالبدايه هو وما خلاني ادخل بقاني بالباب
وبعدين اجه اخذني كعدني واني مديتلهه ايدي وهو دار وجهي عليه لحد ماكملت
ردت اشيل الكطنه هو اخذهه ونزل رداني عليهه بدون ماالمح الدم ..
هالموقف زرع بيه الاصرار حتى اكمل طريق العلاج واعيش براحه وياه ..

من بعدها طلعنه للدكتوره واول ما دخلنه كامت رحبت بينه وهو كللهه ..
- يابه انا بالاول اتشكرك على باب الجنه الي كنت منتظرو ومفاتحو حصلتو من كلمتينك معها .. البارحه خطبنا ونتعذر لان ما عطيناكي خبر لكن العرس بالله مايصير لولا وجودك وسياره تجي لعند بابك تاخذك وترجعك واعذرينا تعجلنا فيها وما ضل لنا وكت لشي والله

باوعتلي الدكتوره وضحكت وكالتله ..
- الف الف مبروووك والله فرحتوني بهالخبر ومدام عروستنا مرتاحه وفرحانه هذا يكفي ويعوض عن كل شي

كعدنا وهو ترخص وكعد بره .. وهي كالتلي ...
- احكيلييي ياعيني شصااار وهالوجه ورد
- هههههههه حباااب دكتوره كلش حبااب
- ربي يسعدك فيه .. دحكتي اصراري عليكي كيف نتائجو حلوه
- اي والله تسلمي وعيتيني على شي عمري ما حلمت بي
- زين هسه ارتاحي بمكانك وخلي نحكي بهالسالفه اكثر

رحت على هذاك الكرسي وهي هالمره خلت كرسيها الصغير كدامي وكعدت
وصارت تسألني ...

- ايمتى العرس ان شاء الله
- هههه بس يخلص عقد المحكمه حوالي اسبوع من باجر يبدا
- مااشاء الله متعجل الشيخ
- ايي بس اني متخوفه من هوااي شغلات دكتوره
- اييه احكيلي عنها
- يعني اول شي واجهت صعوبه بي هو تعاملي وياه يعني صح اني احجي واضحك وياه وهم حضنته بس للحظه احس روحي تنفر ولحظه ثانيه احاول اسيطر وهيج باقيه بينهن

- اممم هالشي جداً طبيعي ياامي لان احنه بعدنا باول خطوه اكيد نواجه بيهه تشتت
بس هنا هو العلاج ياحلوه .. بالمواجهه مع الخوف
-يعني شسوي
- نحكي فيها بالاخر كمليلي بعد شنو الي ضجتي منه بقربه
- نفسه من يصير قريب على وجهي او ركبتي هو مره وحده تقرب بس شويه وما حبيتهه اببد حسيت لاازم اغسل هسه
مادري ليش بس توترت بساعتهه وهو حس عليه وهالشي يزعجني اكثر
مااحب احسسه ديضوجني بقربه
- اهاا وبعد كمليلي
- اففف متخوفه من يوم العرس دكتوره كلش يرهبني رغم اني تفاهمت وياه على ان ماتكون بينا علاقه وينطيني وكت وهو تقبل هالشي وكالي ادري راح تطلبيه ومايزعجني ووعدني انه مايتقربلي بس
اخاف يتغير بلحظه
- مااظن انه يكسر بكلمته معك .. هو رجل حدي الكلام وراح يبذل كل طاقته بالسيطره والبعد حتى يحفظ كلمته كدامك
صدكيني ماراح يعرض نفسه لموقف محرج معك من هالناحيه تطمني
- اتمنى يصير. هيج لان مااريد انفر منه
اريد اتقبله بهدوء
- دامك تريدي تصير
- ان شاء الله .. زين دكتوره اكو شغله
هو ميعرفها وهاي اكبر مخاوفي
- اييه احكيها
- جسمي بي اثار جروح مااحب يشوفها وادري انها ماتروح شسوي
- خليني ادحكها

ترددت وكلتلها ...
- شلوون لااا
- بنتي انا ادحكها لانها مهمه انا اعرف الاثر الي يتعالج من الي يضل دايم
يلااا يولوو

نزعت بلوزي وشوفتهه الاثر الي بزندي وهي تلمسته وباوعتهن من كل جهه وبعدين شوفتهه باقي جسمي كالتلي ...

- عندي طبيب مختص بهالاشياء انا اثق فيه ومراجعيني ارسلهم لعندو وكت الحاجه واخذك لعندو ان شاء الله
- يعني تروح هالاثاار دكتوره
- بأذن الله لكن تطول بالشهرين هيك
-اي ميخالف بس اهم شي يرجع جسمي طبيعي .. لو يضل هيج مستحيل اخليه يشوفه لو اضل ميه سنه وياه
-اييه فاهمتك يابنتي لكن ما تخافي
بعد العرس وهوستو تفرغي حتى نمشي لعندو وناخذ العلاج المناسب وانتو بعاد هالفتره ما يهم .. نرجع جسمك مثل اول واحلى بعد وخليه يتهنى فيه على الحاضر

ضحكت وكالتلي ..
- خلي نكتفي بهالحد اليوم لان ماريد اتعبك وراكي عرس وتحضيرات خلي بالك يضل مرتاح هيك ومتفائله وفرحانه
اليوم من دحكت ضحكتك حدرو زاد عندي الاصرار حتى اعالجك وارجعك باحسن حالاتك لتعيشو سوا وتنعمو بحبكم
- ان شاء الله دكتوره اني واثقه بيج والله
- مااخيب ثقتك فيي ياشابه

رجعنا كعدنا يم المكتب وصارت تباوع لدفترهه وبعدين كالتلي ...
- تعرفين متسلق المرتفعات كيف يكون صاحب حلم وعندو حب الاكتشاف والنشاط وكل القوه لكن باول تجربه الو
وكع من الاعالي وتكسر وصابتو رهبه المرتفعات والخوف من نفس الكدمات والالم .. واخذلو سنه سنتين هو بعيد عنها
لكن كل ما يدحك هالاماكن يرجع شغفو باكتشافها وتحقيق تجربتو الاولى واكمالها
ويضل بين خوفو من الي صار وبين حلمو الي ماتحقق وبعدو بكلبو راسخ
هين لو انتي بمكانو اي قرار تتخذي ؟

- اكمل حلمي وارجع احاول

- زين الولد هو بعد نفس قرارك اتخذ
ورجع حتى يحقق حلمو .. وصعد وعند نفس المكان بعد خطوتين من بدايه مشوارو توكف .. وصار يدحك لتحت
ويدحك لوره ويرجع يدحك لفوك
واتمالكو الخوف هين .. شنو يسوي وهو بنص الطريق متعلك ؟؟؟

- لازم يكمل

- زين ليش ما يرجع وهو بعدو كريب على الكاع ويتخلص من الخوف ؟

- لااا لو رجع راح يضل يحس بالفشل كل عمره ويغلب عليه الخوف اكثر هيج راح يخسر كل شي تعب عليه

ابتسمتلي وكالت ...
- وهو فكر نفس تفكيرك وكمل دربو
وكل ما كان يصعد خطوتين يرجع للخوف نفسو بس كااان يواااجه خوفو
هو صرخ وبكى وزاد خوف وارتباك لانو وحدو معلك بين السما والكاع
بس حلمو واصرارو على ان ما يفشل ويصنع بحياتو انجاز وهو تغلبو على نفسو ومخاوفها خلاه يوصل للقمه
وهنيك كعد وضحك وصاح بعالي الصوت ... نجحت اناا قوي كدرت انجح واحقق هدفين بدل الواحد ...
هذا ماكان راح يصير لو انه ماتحلى بالثقه بالحلم الي راسمو بالو .. وثقتو بذاتو انها تستحق الافضل ومارضى بالقليل راد القمه ولا شي عداها ..
وانتي طريقك نفسو ...
الخوف والخطر وراكي وزال لكن الرهبه منو هي سبب مشاكلك ...

- صحيح .. والحل شلون ؟

- تواجهي وتكملي للنهايه حتى تدحكي انه كلو وهم وسراب يختفي بمجرد وصولك عندو

- اني دااحاول بس الذكرى الي تجي بلحظه تغلب على كل قوتي الي اجمعها تجاهه

- اييه انا مااحكيلك تتجاهلي الموضوع وماتخافي منو ..لا انا ودي انك تخافي لكن تعيشي الخوف ما تهربي منو
عيشي للاخير خليه ينتهي وانتي واكفه صامده فيه وهو من مرتين ثلاثه يتلاشى
يعني مثل هسه مخاوفك حضنو ! نفسو !
اكربيها .. خليه يحضنك بالاول راح تخجلي ترتبكي تتوتري لكن من تتحسسي حبو وامانو راح تهدأي

- زين ونفسه اني بصراحه اضوج منه لان افكر راح يتقربلي اكثر مدامه هيج منفعل ونفسه عالي فبسرعه اوخر ماريد يصير هالشي

- لااا ما حكينا بهالنقطه .. وحكيتلك لو مهما انفعل يسيطر صدكيني .. هو خوفو على نفسو وصورتو كدامك اكثر من خوفو على تقبلك الها ..

ثقي فيه هو مايخلي نفسسسسو باحراااج يخل بمصداقيتو معك
- اذا هيج لعد راح احاول ومااتجنبها
- اييه حاولي فيها واتذكري انتي باول مره راح تحاولين حتى تزيدي ثقتك فيه
وبالثانيه حتى تتقبليها وبالثالثه حتى تأمني فيها وتصيري تحبي نفسو عندك
- مااشي دكتوره راح احاول

كلامها زرع حب المحاوله والاستكشاف بيه .. ردت اكتشف اول شي قدرتي على ضبط نفسي وبالثانيه ردت اكتشف قابليته لاي حد توصل بحفاظه على وعده الي ..

- عندك شي بكرا ؟
- لا
- زين انا عندي نزله للسوك وفكرت لو نطلع سوا حابه اشارك بجهاز عرسك
- ههههههه صددددك دكتوره
- اي والله .. انا مهمه عندي فرحتك وودي اختارلك اذا قبلتي يعني على ذوقي لبسك معو ادري انك محتاره مابين كثير اشياء وحابه ابعدك عن الحيره
- ياااالله دكتورره .. شكراااً والله فرحت كلش فرحت اكيف لو تجين وياي والله كلش افررح نطلع سوه
- ما حكيتلك اختك مو بس طبيبه الك

رحت حضنتهه وهي تضحك .. كلتلهه
- راح اطلع اكول للشيخ اكيد راح يفرح
- اييه يلا احكيلو

رحت ركض فتحت الباب وهو رفع عينه رأساً عليه .. واجه يمي واني اضحك كلتله ...
- شيخ راح نطلع اني والدكتوره سوه
- يوااشك يابه وييين تطلعين !!
- ههه قصدي نجهز للعرس سوه
هي كالتلي عدها روحه للسوك باجر
وتريدني اجي وياهه وتختارلي جهاز العرس على ذوقها
- هااا .. ايييه وش عليه دامو مفرحك هالكثر اطلعي معها
- شكررراً
- هههه ما تبلشي يولو

دخلنا يمهه وهي كالتله ..
- اييه شيخ عروستك خليها معي بكرا
اجيبها لك جاهزه مكمله
- هههه بالك عليها يا يابه
- بعيني ما تخاف
- تسلمي .. احكيلنا الامور طيبه ان شاء الله
- اييه الحمدلله .. لحد هسه احنه بعدنا على البر كلشي بخير وماردت اتعبهه ونطول لان اريدهه ترتاح عرسها قريب لازم تركز بس على نفسها وجمالها
والباقي عدنه وكت اله بعدين مامستعجلين
- زين يابه يصير خير ان شاء الله
- نلتقي بكرا الصبح ونطلع
- اي ان شاء الله

رجعنه للبيت وهو كالي ..
- دامك تطلعي معها تاخذي امي معك ولا لا؟
- اخذها طبعاً شلون اعوف الشيخه
- وان سألتك عنها ؟
- مادري شتكول انته !
- احكيلها صاحبتنا وحبت تشاركنا الفرح
- ماشي

وصلني للبيت وراح .. اني بدلت ورحت للشيخه واخذت غاليه من جراح بالكوه
ماتقبل تعوفه .. اريد احضنها اكعد وياهه وهي بس تتشرد مني ..
شويه وعفتهه راحت ركض تلعب وياه
هو مستغل عطله نص السنه ومكضيها لعب وياهه .. يحبون يبنون بالمكعبات
وجان رماح يخربهه عليهم دائماً وهسه ماكو هو ماخذين راحتهم باللعب ..

حجيت للشيخه عنها وهي مااعترضت
وكالت مدامها محبه الكم هلا بيها ...

ولليل رجعت لبيتي وياي جراح وغاليه
فرشتلهم يمي بالغرفه ونامو واني ضليت الملم كم شغله واتوقع الشيخ بأي لحظه يجي فما نمت ..

وللساعه ١١ سمعت باب الشارع انفتحت
عرفته هو .. وهالمره فتح باب الكليدور ودخل رأساً .. قبل جان اله يستأذن ويصيحني يلا .. بس هسه بعد كلشي صار بأسمه وملكه ...

رحت يمه ورحبت بي بابتسامه وهو صافن بوجهي ويبتسم .. نزل عينه لايدي واخذهه تلمسهه وكالي ..
- لو ما العيبه كنت حتى الاسبوع عجلتو
-ههههههه والمحكمه شلون
- نتفرغلها بعدين
- لااا خلي تصيرلنا فتره خطوبه على الاقل اسبوع
-ههههه هاذي صارتلك ارتاحي

اخذني وكعدنا بالاستقبال ..نزع اليشمغ والعباه وفتح ايده على التخم وكالي ..
- تكربي لهين تينتي

تقربت وهو خله راسي على جتفه وحاوطني بايده وصار مخلي راسه على شعري ويكولي ...
- مشتاكلك يولو
- واني هم اشتاقيتلك
- دخيل لهجتك انااا
-ههههه
- تينتي ودي اوصيكي بكم شغله نفسي فيها
- اي عيني كول