#شقراء_بغداد

بارت_٥٠


ما بين العزم والتردد جنت اصعد درجات ويه الشيخ واستمد من ملامح وجه المطمنه ووجوده بظهري كسند الاصرار
لعبور هذا الدرج ومقابله الدكتوره ..

جان بمثابه جهاد نفسي الي ثبتني عليه هو كميه التعب الي غلبت على صبري واصرار الشيخ على ان اعيش حياه جديده بدون ماضي .....

رجعت اتمعن بتفاصيل عيادتها الهادئه
وبعدها خطيت خطوتين لداخل غرفتها وقابلت برود ملامحي بابتسامه ترحيب

جنت اشوف توتر الشيخ يشابه توتري
الفرق الي بينه اني متوتره من نفسي مااحب اواجهه وهو متوتر لانه يخاف
تعبي ....

بين افكاري جنت ادور وماحسيت الا على الشيخ يوكف ويحجيلي ...
- انا هين كاعدلك بره وانتي خذي راحتك بالحكي كل الوكت الك ماتخافي زين
- اي

مشى واني عيني تراقب خطواته ومن سد الباب وبقيت وحدي هنا حسيت هالمكان يضيق عليه واحتريت كلش وضليت بحيره مااعرف شلون ابدا بس الدكتوره
حجتلي ..
- ياشابه ياحلوه كلش فرحت بوجودك عندي اليوم واريد اول شي تخلي بالك
هو كل الي يدور بينا هنا يبقى محفوظ داخل هالغرفه .. سرنا راح يكون واحد
ومن اليوم احنا اخوات وصديقات وبأي موضوع ممكن تحتاجيني بي اكون معك
مانقتصر على جلسات علاج ياحلوه
- ماشي شكراً
- ههه العفو .. افضل لو تستلقي هين
وتاخذي راحتك بتصرفك وكلامك
- ماشي

عفت جنطتي على الطبله ورحت تمددت على كرسي يشبه الي يستخدموه اطباء الاسنان وهي كعدت على كرسي صغير
ورايه بحيث ماصرت اشوفها وكدام عيني لوحه اكثرها بياض ومشخطه بالوان ازرك وفيروزي واسود ورصاصي ....

ضلت هي ساكته واني ساكته وصافنه على هاللوحه وبعدها حجيتلها ..

- باول مرحله بالكليه تعرفت على شخص حنون وشهم حبيته وحبني وعيشني بعالم مابي غيره .. شغل تفكيري وسلب راحتي ببعده وخوفي عليه
جان يشتغل ضابط استخبارات ودائماً يكولي الوطن يطلبني لازم البيه .. واخذه واجب الوطن وضغوط الحياه واختفى رغم انه وعدني يرجع ومارجع ..
بأثناء هالحب والوعود اني جنت مخطوبه
لواحد من كرايبنا .. جان رايدني من جنت بعدني بالمدرسه ورفضته بكل مره حاول يتوددلي بيهه وعلنت هالرفض بين اهلي بس ابويه مارضى وخيرني بين
كلمته بين الناس وقراره او قراري واضطريت اختار كلمته ورغبته وهو جان اله رغبه قويه بهالارتباط حتى يقوي علاقتنه بيهم ...
بين هذا وهذاك ضاعت سنتين من عمري
الي احبه يرفض هالارتباط ويسعى دائماً حتى يخربه ويبعده عني والي صرت على ذمته يطالب دائماً ان اصير قريبه منه وابادله المشاعر .. وبالتالي انحسمت
هالسالفه بأن الي حبيته اختفى واني تزوجت ... واكتشف بعد كم يوم من زواجي ان الي حبيته وضليت على الوعد انتظره حتى نفسخ هالخطوبه بأي شكل من الاشكال طلع .. طلع متزوج ويدري بيه اني انتظره ويعرف حتى يايوم زواجي صار وضل بعيد وساكت والعذر جان .. مجبور اسوي هيج ...
المهم اني عذرته وبريته الذمه على كل شي وضل مابكلبي عليه غير الحب
قررت بساعتهه ان ادير بالي على زواجي واعيش لاجل هالرجال الي وفه الي سنين وضل يتأمل على عيشتنه سوه
وداريته وداريت اهله رغم فارق طبيعه الحياه بينه بس تأقلمت وماشكيت من شي
جان هو عسكري وبيتهم بمنطقه ريفيه
اهله فلح وولدهم كلهم عسكريين
هو بنالي بيت بمنطقه بعيده عنهم حوالي عشر دقايق وجان على اساس اني اكعد هناك ومايتغير شي من حياتي ..
بس هو اخذني بالمرحله الثالثه وصارت كعدتنا عشر ايام بين بيتنا وبيت اهله والباقي من الشهر اكضيه بيتنا بغداد حتى اداوم وهيج مشت حياه روتينيه مابينه اي تقرب او كلام ثانوي عدا الي معتاد عليه
رغم هو قبل الزواج ذايع بين الكل اني احبهه ومااخذ الا هي وصبر وتعب لاجلي بس من صرت يمه شي مختلف
ماشفت اي شي من مشاعره مجرد برود
وصرت حامل بس باول اربع شهور وكع الطفل وبعدها ماصار عندي حمل ثاني
ماجان اكو اي خلل بس هو هيج ..

- اهاا زين شنو من بين هذا كله كان هو المؤثر السلبي عندك

-هه علي .. ابن عم زوجي محمد هذا سبب دمار حياتي

- كمليلي ياحلوه شنو سوه علي

- علي ضابط ومتسبع جان على اهله
نسوانهم هناك مايحترموهن وهو جان
ماخذهم بهوسته وصوته العالي واضافه لضخامه جسمه وشكله المخيف واني صرت بينهم شاذه عن قاعده الكل تخاف من علي وتلاغيت وياه بأكثر من موقف
دافعت بيهن عن نسوانهم وبناتهم لانه جان واحد مستبد واني ماسكتت على ظلمه بحقهن وعلى اثرها كالي ..
بيني وبينج ثار والثار تاليته دم

- هاا الثار صار بس لان دافعتي عن حقهن او شي ثاني

- لاا اني بس حجيت وياه ورديتله كل كلمه وهو مخبل بكلشي ويجر سجينته
ويريد يذبح وهو لاني كدرت على كسر كلمته ووكفت بوجهه كدام كل النسوان
تخبل وسوه بينه ثار

- ونجح باخذ ثاره ؟

- اي مع الاسف اي نجح باخذه
توفو اهلي ابويه وبيبي بنفس السنه واني جنت منتقله لبغداد لان توظفت وهناك كعدنا ..

محمد من ساعتها تغير وصار مهمل كلش لبيته ودائماً يحملني ذنب بسبب انه ماصار اب لحد هسه واني جانت نفسيتي مدمره مو بس تعبانه لان وفاتهم جانت كسره عمري وهو ماتحمل حزني عليهم وقابله بالتهجم والصياح
ومن بعدها صار يسكر ليل نهار وتورط بديون اقمار ومعاشر بنات وسهر بره لوجه الفجر يرجع يدندن وينام مايدري شكو بالدنيه وبعدها صار علي عايش ويانه بنفس البيت واثنينهم يمشون بهالطريق ...

سكتت بعد عند هالنقطه ..تعبتني الصور الي تتوارد بالي وحده وره الثانيه وكمت بسرعه من مكاني وصرت امشي وامسح بدموعي الي ماكدر اوكفهه ...
رحت كعدت على الكرسي الي كدام مكتبها وصرت افرك راسي واخذ نفس
اريد اهدأ لازم اهدأ بس ماكدرت كلشي جان يغلبني وكلشي احسه حاضر بهاللحظه كدام عيني ...

بجيت بكل حركه تعبني هالتكرار رغم محاولتي بنسيانه بس ارجع الكه نفسي بنفس الدائره افتر ... حسيت على ايد لزمت جتفي رأساً صحت ...

- لتلمسنننننني وخررر لا اطخني لا اطخنننني

بعدها سمعت صوته يكولي...
- يولو اهدي يابه ليه البكي اهدي ياعيني

باوعتله وكلتله ..
- مااكدر والله مااكدر تعبت منهم والله ماتحمل ذكراهم بعد
- انتي كويه وشجاعه تكدرين تواجهين الي اكبر منهم ياعيني هاذي كلها اوهام هاذي ماضي الحين انتي بامان حدري
- اخذني للبيت عفيه تعبت اريد انام
-لااا لاتتهربي
- لااا ياشيخ خليها ترتاح اليوم يكفينا هذا
وبعد يومين انتظرها نكمل من وين ما وكفنا
- واليرحم اهلك يابه كيف هي بتضل بهالحال تعبه
- لااا هسه اكتبلها حبايتين راح يهدأنها ويخلنها تنام مرتاحه وتكعد مثل الغزال

عفتهم واخذت جنطتي ومشيت للباب واني احس نفسي بفراغ ماعرف منين بدا ووين راح ينتهي .. مشيت للدرج ولزمني الشيخ من عكسي ورأساً عتيت ايدي منه
وكلتله ...
- لا اطخنننني ارجووووك عوفننني
-زين يابه زين اتعذر انا ماتنعاد تامرين

عفته ونزلت واني احس راسي صار اكبر من فتحه الباب الي كدامي وعيني كانها تشوف ومتشوف ومادري شلون مشيت لحد السياره ... فتحت باب الصدر وصعدت وضليت مرجعه راسي ولازمته و بعدين اجه الشيخ كعد يمي وضل يكولي..
- تعوذي من الشيطان يا يابه كلشي حولك امان ماتخافي انا حدرك
- الخوف بننننص راسي مو حولي هنااا مداسيطرله افهمننني مو بيدي اني على ساعه يمكن افقد سيطرتي على نفسي ادري بهالشي ادرري ماكدر اتحكم بافكاري وادري الزمان هسه غير ذاك الزمان بس الي بداخل مخي مايرضى يفههههم هالشي ويخلصني .. تعبت منه والله تعبت
- يخلص ياعيني يخلص بس تشجعي وصيري اكوى منو كلهن كم يوم وتسيطري عليه وتنسيه وتنسي شرو
بأذن الله

مارديتله وضليت ساكته ومغمضه ولحد ماوصلنا البيت فتحت عيني ونزلت فتح هو باب البيت ودخلت وكبل للمغسله
استفرغت كلشي بمعدتي وغسلت وضليت كاعده بالكاع ....
الشيخ كعد كدامي وانطاني حبايه وكلاص مي وهو يباوعلي بقلق ..اخذتهن من ايده
وشربتهن وعفت الكلاص بالكاع وكمت
رحت لغرفتي تمددت بملابسي وهو اجه
يم راسي وكالي ..

- ما تكرهي لمستي تينتي انا مااتطمن لو ماداريتك بيدي
-ماكرها بس تعبانه روح ارتاح بيتك
اني اخاف بعد بحجايتين وياك وعقلي يشمر لغير مكان
-ههه خله مثل العسل عندي حكيك كيف مايكون
-لا من صدك عوفني لاتكعد يمي منا لباجر
- ليييه يولي لييه
-لان اكثر من هيج سيطره بعد ماكدر
روح رجاءاً وعوفني
- ماكدر اتركك وانتي بهالحال .. انا اضل حدرك ومااحكي شي وانتي نامي

عفته يحجي وماصرت اسمعه بس اشوفه لحد ما رفعت ايدي اريد اتلمس وجهه وصرت اشوف كدامي محمد واكف وجسمه ينكط دم ويباوعلي بحقد ووجه مدمى واسود .. تقربلي واني دفعته وضليت اصرخ عليه يروح ويعوفني ومادريت بعدها شصار ....

حسيت بس على ايد ناعمه على وجهي وتلعب بحواجبي وشفايفي عرفتها ايد بنيتي .. باوعتلهه وهي كاعده كدامي على الجربايه وصارت تكولي..
- مااما جناح جابلنه عشه ومايغبل ناكل الا تكعدين حدننا يلا نكوم يلاااا
- صار ياعين ماما انتي

باستني وراحت تركض وتصيح لجراح ماما كعدت ..
رحت بدلت ملابسي وطلعت باوعت الساعه بالتسعه بالليل وشفت صينيه
مغطايه بالكاع وكاعده غاليه وجراح
كلتلهم ...
- بعدكم مااكلتو لحد هسه ؟؟
- اييه عمتي انتظرناكي تصحي ونتعشى سويه
- ياعيوني جان اكلتو اني مدري شلون اخذتني نومه لهيج وكت !! زين منو سوه الاكل ؟
- عمي ابو حسن وصاني اخذو من بيتو
- هااا زين

كعدنا ناكل واني احاول اتذكر اخر شي صار وياي بس ماكدرت وبين ماشلت الصينيه اغسلهه سمعت صوت الشيخ من باب الكليدور يصيح ..
- ياالله وييينك ياتينه
- حيااك الله شيخ تفضل
- يزيد فضلك .. كيف صرتي
- الحمدلله زينه .. تشرب جاي ؟
- اييه والله
- اكعد هنا وهسه اجيبه ادلل

رجعت للمطبخ وسويت الجاي واخذته وكعدت يمه وصرنا نشربه وبعدين باوعتله وكلتله بصوت ناصي مغطي عليه الخجل ...
- شيخ صار شي قبل هالنومه

صفن بوجهي وبعدين كالي ..
- لا ماصار

- اتذكر اخر شي عليت صوتي بوجهك بس مادري شحجيت اذا حجيت شي مو لائق فاعتذر عنه واي تصرف بدر مني مو زين مااقصده بحقك اعتذر عن الي ناسيته وصار
- مايسوه يابه هو ماصار شي جديد كله شويه بكي ونوم مايضل بالك
- الحمدلله اذا هيج
- بكرا خليكي هين ارتاحي ماعندنا شغل يسوه هنيك
- اي شكراً والله محتاجه انام هواي بعد احس نعسانه
- ايييه نامي وانا وصيتو لجراح يضل عهين عندك هالليله حتى ماتشيلي هم غاليه وترتاحي على كيفك
- تسلم والله
- ااا تينه ودي احكيلك شي
- اي شنو
- هووه

تردد بحجيه وبعدين قرب راسه من يم اذني وكالي ...
- والله احبك ياتينتي

شهكت وباوعتله وهو ضحك وكام وكالي
- تصبحي على خير

وطلع بسرعه حتى مالحكت اردله
وضلت هالحجايه تردد بالي واخذتلي بيهه صفنه طويله حتى استكانات الجاي ماعرفت اشيلهن واغسلهن ...
نفسه جان حار وحسيت هالكلمات من نص بلعومه ينطقها وتضرب كلمه وره كلمه بركبتي ولا عبالك هي حروف وصوت خفيف ... مدري اني من وساويسي واوهامي هيج صرت ادقق ازيد من اللازم ؟؟؟

دخلت غرفتي ولكيت على الميز باكيت دوا مكتوب عليه ليلاً واخذتلي وحده ورحت فرشتلهم يمي بالغرفه ونمت

وثاني يوم كعدت ولكيت البيت هدوء وماكو احد باوعت الساعه عشره الصبح
رحت سبحت وطلعت تريكت ولبست عباتي ورحت للشيخه كلت اشوف غاليه يمهم ....
وعرفت انها بيت ام حسن ويه بنتهم
جانت ام جراح ماتستلطف جيتي ودائماً تكولي ماعندج اخوه انتي ماتخلويهم يكعدون يمج بالبيت مو عيب ضاله بدون محرم ... واني اكللهه مرتاحه بعيشتي وماعليه شي واخوتي الهم حياتهم ماخربها الهم ...

وتضل تشمر بحجيهه كل شويه حجايه
لحد ماابزع واكوم ارجع لبيتي واضل اكلب بالتلفزيون واسمع الاغاني ومنها
جانت اغنيتي المفضله ...

جي مالي والي ليوسف عمر ... اضل اعزل بالبيت وادندن وياهه لحد ما تزرف كلبي كلماتهه اروح اسدهه واشغل نفسيي بالطبخ ... احضر الغدا واصير ادورلي فد طبخه اسويهه والتهي بيهه ... اشوف وين الي تطول اصير سويهه ..
احضر مكونات الكبه واضل الف بيهه واسوي منهه صياني ومن اكملهه اعزل
حصه لبيت الشيخ وحصه لبيت ام حسن
وحصه لبيت الفلاح .. وادزهن العصر بيد جراح يوديلهم ...

جنت كل شويه واكول هسه الشيخ يجي ويحجيلي صار وياه بالشغل اليوم وماكو مااجه ... خلص اليوم واجه الثاني واندكت الباب الصبح اني جنت مبدله
ومتحضره للشغل وطلعت لكيت صياح
كالي ..

- صباح الخير اخيه
- صباح النور خويه شلونك
- الحمدلله .. الشيخ وصاني اخذك للمعمل بدالو لانو طالع بشغله من البارحه
- اي ماشي تسلم داتعبك
- واجبنا يابه

قفلت البيت وطلعت للمعمل والتهيت بشغلي وللظهر هم هو رجعني وسألته شوكت يرجع الشيخ كالي مايدري

واخذ هالحال يومين والثالث بالليل سمعت صوته من باب الكليدور ..
- تينه كاعده هين ؟
- اي اي تفضل

كمت رحبت بيه وهو وجه تعبان وبيده جكارته ..دخل وكعد بهدوء واني رحت جبتله كلاص عصير انطيته ما قبل يشرب وشرب بس مي وضل صافن وساكت كلتله ...

- خير شيخ صاير وياك شي ؟

ما رد عليه كررت عليه السؤال ..
- احجيلي عيني شبيك
- تعبااااان
- اسم الله عليك شصاير فهمني

سكت وضل ياخذ نفس من جكارته بعدين نفخه وكالي ...

- تينه تتزوجيني ؟

يتبع

حبي مو اي ماسك تشوفي يتطبق هسه مثل هالماسك هم غلط مكوناته وهم استعماله غلط🤦‍♀💔

اول شي زيت زيتون ميستعمل للوجه والجسم بالماسكات غير بس بالتقشير فقط
يعني يستعمل بس كمقشر وي الشكر او وي الكهوة ..اما كماسك ميصير ابد

وطريقة استعمال هم غلط لانو كايلة نخلي ونتركه فهالشي هم ميصير

والفوط غير وقت مينلبس بس بوقت الدورة لانو اذا تلبسي بشكل يومي المنطقة رح تكون تصير ومخنوكه وهالشي يسبب عرق وتسمر بالزايد

فالماسكات بس اللي انشره طبقو لأن اني والبنات مجربينه وشفنا صار نتيجة🥰وامن فانزله وتستفادون اما غير ماسك شفتو بغير قناة لاتطبقو

وكريم جليسوليد هو مرطب يشبه كريم جليسرين وطبعا ميستعمل للوجه لأنو ثكيل
والفرق بينهم أنو
الجليسرين قوامه خفيف وبسرعه يمتصه الجسم
والجليسويد قوامه اثكل ويضل بالجسم لفترة اطول


#ملوكه

عادي عيوني بس كوليلي شسمه القصة او اسم الكاتبة حتى اشوف اذا زينة انزلها☺️🌸

#ملوكه

حبي لعلاج القشرة اكو اكثر من نوع والشي المجرب واللي مايأذي ولايسبب تساقط..الليمون
كلشش زين للقششرة يعني كل 3 ايام تغسلين الشعر..فقبل ماتغسلين تجيبين الليمون ودلكين عل فروة راس واشويه اشويه تعصري ..ضلي دلكي لمدة 10 دقايق
وتركي عل الشعر فد ربع ساعه وغسلي..بشامبو مخصص للقشرة
فضروري تاخذين المخصص

فاذا تستمرين منا لشهر..رح تشوفين فرق😻

#ملوكه

عيوني مرطب بيبانثين تكدرين تستعملين مرتين باليوم صبح وليل🌚🌺

واذا بشرتج جافة كلش ف3 مرات باليوم تخلين

#ملوكه

عمري هذيني تسريحات للشعر القصير
سوي كيرلي وثبتي بفد اكسسوار نازك او سوي ضفيرة صغيرة نفس هالصور👇🏻😻

والمكياج سموكي عنابي والحمرة وردي فاتح

#ملوكه

مشاهدة "مكياج سموكي عنابي للعيون الجاحظه | ليان ناصر" على YouTube
https://youtu.be/DHOHo7amCkc