#شقراء_بغداد

بارت_٤٤

-هديتي !!!
- اييه هديتك الي كنت موصي عليها من زمان اليوم وصلت صارلي شهر ونص انتظر وصولها وماكدرت اصبر لو ماعطيها لك بنفس الليله

تبسمت وعطيتها العلاكه اخذتها من يدي وهي تدحكلي ومستغربه هالشي ..
كانت بوسط العلاكه علبه مغلفه بجلاد ورقي وعليه ختم دولتنا ودوله الاردن
فتحتو للجلاد وكانت العلبه خشبيه ولونها مايل للسواد وملمسها ناعم وسطحها يلمع
اخذتها لحضنها ودحكتلي وتبسمت وبعدها فتحتها وشهكت وخلت يدها على فمها ودحكتلي متعجبه ...

كانت الهديه هي طقم لؤلؤ قلاده وحلقين كل واحد منهم لؤلؤه مثبته ببيت على حجمها مصنوع من الفضه ومشبك عليه ... والقلاده كانت ملظومه باللؤلؤ تبدأ من الوسط لؤلؤه كبيره شوي وبعدها تتوزع الصغار على جانبيها وبين الكبيره والصغار من الجهتين مشبك فضه متركب على طرفي اللؤلؤه الوسط مخليها مثبته فيه وبارزه من وسطو ومتناسقه مع الحلق وقفلها كان مصنوع من الفضه الخالصه وموضوعه على بطانه بلون اسود بارزه بياضو ...

وكفت واجتي حدري وهي تضحك ومسكت يدي وتضغط عليها وتحكيلي ..

- لؤلؤ مو ؟
- اييه عجل اغشك انا يولو
- هههههههه يالله شيخ هواي هالهديه هوااي والله يعني ليش هيج كلفت نفسك اكيد غالي سعرها وهالوضع والشغل مو زين ليش كلفت نفسك هيج
- هههههه يولو مادفعت فيها ولا فلس
- شلون لعد !
- دفعت حكها ٦٣ ناكه
- عزاااا ٦٣ !!! يالله هوااي لعد شبقالك
- ماتخافي عندي للحين ٢٣٧ ناكه هاذي هيك اطكطك فيهن يتعوضو اخر هالسنه
- هههههههه ربي يرزقك ويعوضك عنهن الاف
- عوضني فيكي
- يعني لهالدرجه تعزني ودفعت حق طقم واحد ٦٣ وحده منهن ؟
- واكثر ياتينه معزتك اكثر من الي تحسبيه ويتخيلك .. يولو انتي فديتني بدمك مرتين .. مره خسرتك كليتك وعلعلت صحتك ومره تركت بيدك اثر جرح بيضل لطول العمر وكلو بتبادليني عنها بضحكه وتحكيلي فدا لعينك عجل هذا كلو ماهو بعزيز عندي !! انا لو ادفعلك حلالي كلو وامليكي هدايا منو بيضل كليل ومايوفي حك ربع من وكفتك معي
- ياعيني هسه هي على الدم وحاسبهه هيج جبيره اي جان تبرعتلي بطل دم ونخلص ههههه
- عجل مافكرت فيها لكن مارهمت حتى بدمك تعطي ماتاخذي .. دمك O
ما بياخذ الا من فصيلتو وانا دمي
A باخذ منك وماكدر اعطيكي
- هههههه احسن حتى اضل انطيك بدمي شوكت متحتاج ... شُكررراً شيخ شُكرااً
الهديه اعجز عن وصفها حلوه ومتكامله من كل شي دائماً تعجبني بذوقك
- تستاهليها والله حلال عليكي .. البسيها لادحكها كمل جمالها

تبسمت بخجل واخذت العلبه خلتها على ميز المراه وميلت شعرها لجنبها الايسر
وصارت تلبسو وانا واكف وراها وادحكها من المراه واتبسم ووكت كملت لبسو تلمست باطراف اصابعها حبات اللؤلؤ على ركبتها وهي تدحكلي بالمراه وتضحك واسنانها ناعمه وزايده بياض مع هالاالئ ...
كانت هاذي اول مره احس فيها اني متكامل هيك .. على طول وكفتي وراها وادحكها كدامي بالمراه وعيني بعينها تتبسم خلتني احس انها بالفعل الي الحرمه الي تكملني .. وحسيتها هين انها ملكي هالحرمه حك خالد بس حكو هو ..
انا الي رسمت ضحكتها وعاودت عافيتها وداريتها وتعبت لدحكتها هيك معي واكفه بهالحلا مايستحكها غيري ولا انها تستحك تكون غير معي انا شيخها وصاحبها ...

تكربت حدرها اكثر وصار فاصل بين جسمها وجسمي حوالي شبر .. على نظرتي بعينها بالمراه حكيتلها ...
- لو ادري هيك انك بتشعي نور فيها كنت دفعت سبع نوك الباكيه من السبعين وكملت هالطقم بخاتم

نزلت عينها وهي تتبسم بخجل وبعدها انا مسكت شعرها من جنبها ورجعتو لوره وفردتو على كتفها الايمن وهيك صارت احلى بالف مره من الاول ...
كان سواد شعرها وثخنو على داير مداير جسمها ووجها مخلي هالطقم يشع جمالو
حكيتلها ...
- بتعرفي ليه انا اخترت هالهديه بالذات؟
-ليش !
- لاني دايماً ادحك للبياض الي مخفي فيكي ... انا وحدي الي ادحكو ووصفتو لك بالتين وحكيتلك وكتها تغلفي على بياض كلبك بلبسك الاسود والحين اللؤلؤ هيك يشبهك بياضو مغلف بقواقع واصداف صلده ولكن داخلها انقى بياض الي ناس تضرب فيه الامثال اليوم انا اخترتو لك هديه شكر لوكفتك معي وخوفك علي و ودي فيها تضلي كل مادحكتيها تذكري ان في رجل يدحكك مثل هاللؤلؤ نقي ونادر وغالي ويعلى على الكل بسيطو وجمالو

دمعت عينها واندارت تدحك بعيني ومسحت دمعتها وحكتلي ...
- شيخ تسمحلي بشي .. بنفسي اسويه تسمحلي ؟
- مسموحلك الي ودك فيه

مسكت يدي اليمين ورفعتها وبوست راحه يدي ... شهكت نفس بقوه هيك من هالملامسه الخفيفه بشفاها ودفو نفسها هين ... بعدها نزلت يدي وكان ودها تفلت اصابعها وانا كضبتها ودحكت بعينها وهي صارت تحكيلي ...
- لولا هالايد الي تعبت وسهرت بمداراتي من اول ساعه دخلت بيها هالمكان ماجنت اكدر اعيش .. شيخ
اني حاسبتك عائلتي الوحيده بكل افرادها

الاب والاخ والعم والخال وحتى الاخت الي اتشارك وياهه تفاصيل يومي واسراري بيك اشوف حتى صديقاتي من منطقتي قبل الي كل كعده وياهن ماتقل راحه عن كعدتي وياك .. وهسه اني من بستهه لايدك تعبير شكر وامتنان لكل هالاهتمام والمداراه يعني اني حتى صايره اشوف نفسي بعينك غير عن الكل مايحتاج توضحه الي بأي تصرف ..
واعترفلك اني حسيت بالامان الي فاقدته من سنين وياك .. من لحظه الي تكون موجود اني اهدء هواي واطمئن احس هنا بعد عندي فرصه جديده للحياه بضلك
ولو ينعاد بيه العمر مرتين هم ارجع اجي هنا واحميك من ضربه غدر وكل خساره بصحتي هي تتحول عافيه بوجودك بخير بينا واني اضل ممنونه الك كل عمري لان لولاك ماكدرت ارجع لقوتي واعيش
ياريتني املك شي غير الدم واقدمه الك وابينلك بي كبر امتناني

كانت تحكيلي وهي تدحك بعيني شوي وتعاود تدحك ليدي الي متمسكه بطرف اصابعها وعاصرها بين اصابعي .. كان ودي احس فيها هيك وهي تحكي الي تفكرو فيي .. وبحينها غمرتني سعاده الدنيا من دريت اني لهالحد مهم عندها ومالها غنى عني وتعزني بهالكثر ..

اخذت نفس قوي وحكيتلها ..
- انا وانتي ياتينه اثنينا ممتنين لبعضنا
ومثل ماانتي محتاجه وجودي انا بعد محتاج وجودك معي .. لو ودك تعطيني شي وتفكري فيه ان يكون اغلى ماتكدري عليه فانا احكيلك انك ... تضلي حدري هين كدام عيني ضلي لحد مايشيب هالراس ماتفاركي عيني ... ما ودي غيرو لا والله مايعز عندي غيرو
- ههههه صار تؤمر
ضحكت وفلتت يدها وهي حكتلي ..
- شيخ منين كدرت تحصل هالطقم
- وصيتو من تاجر على الحدود الاردنيه هذا مختص بالنفايس ارسلتلو واحد وحكيتلو ودي اجمل طقم لؤلؤ تدحكو عينك وبعدها حكالي ان التاجر من سامع الي موصي شيخ طالب بدل الفلوس نوك
ومثمن حكها بعددهن وهيك اليوم انا استلمتو وهو بكرا من الصباح نوكو تصل لعندو ..
- ياعسى الله يعوضلك هالنوك باضعافهن
- تفائلت انا الحين وكاد بيتضاعفو
-هههههه بعدك تؤمن بدعائي بله طلع ماواصل
- ههههههه يوصل يا يابه يوصل تلاكي الحين يتلكوه من باب السما

ضحكت و اندارت تنزعو وترتبو بعلبتو
وانا ادحكلها واشبع عيني منها وبعدها مشيت لعند الباب وهي حكتلي ..
- شيخ لحظه
اندرت ودحكتلها وهي اجتي عطتني جكليت وقطعتين ككو صغار وحكتلي ..
- اليوم ماسويتلك حلى هذا تعويضك
- هههههه تسلمي
- انته الي تسلم عيوني
- ههه ماودي يدرى بيها غيرك
- اكييد لعد غير يصير ذبحنا عمل شعبي
ههههههههه
- هههههههههههههه والله ياانتي
تهون يابه تهون يجيلها يوم وتكضي
- والله ماظن هالشي بس يلا شعدنا متونسين هههههه
- يديملك هالضحكه يارب ... يلا تصبحي على خير
- وانته من اهله شيخ نوم الهنا

تبسمت بوجهها ومشيت سديت الباب وضليت واكف واتبسم مدري ليه وسمعتها تحكي مع حالها ..
- اوووووي فدوه فدوووه شلون شيييخ معدل يمممه فدوه يجنن

ضحكت من كلبي عليها عجل صارلها ساعه كاتمه هالفرحه بداخلها ومغطيتها بالخجل ...
نزلت ونمت بالربعه وانا اتذكر كل تفصيل معها واتبسم عليه ونمت براحه هالليله .....

وبالصباح ادحكلها واتبسم وهي تغطي على ضحكتها بانشغالها بشي ووكت مشينا للمعمل ماعرفت احكي معها كلمتين احس الخجل مغطيني لفوك راسي
وبس وصلنا كلمن مشى لمكتبو وانا صرت افتح بزرار الثوب وامسح عرك عن وجهي واضحك لوحدي مادري وش هالحال لكن يربك كثير يربك ...

ولكن هي كسرت عليه بجديتها بالحكي بالشغل والتهيت بعدها مع العمال ومادحكتها للظهر حين صار لزوم نمشي

ومشينا الايام هيك حكينا وضحكنا نفسو
وانا كثير صاير اسهى بعيونها واصير امثل دور الي ودو شي منها او احكيلها في شي بوجهها هيك وادحكلو وضال كاتم على حبها داخل هالضلوع ..

اخذها كل نهايه شهر تسوي تحاليل لوظائف الكلى ومتابع على علاجها مع طبيب اختصاص والخلطات مداوم عليها
معها ،، والطبيب وصفلها شراب فاتح شهيه لحتى تزيد باكلها وتعوض عن الي خسرتو وتسمن شوي هيك انا حكيتلو خصوصي ودي انها تسمن وزنها كان
٥٠ ضبط والضعف باين عليها ..
وامي تداري باكلها وانا موصيها ماتكوم من الاكل الا وانها ماكله عن نفرين وبالاول ياما تمشكلنا بهالخصوص
وانا احكيلها اكلي ليعاود حيلك وهي تحكيلي ماكدر هاي قابليتي واعاود احكيلها اجيبلك فاتح شهيه غيرو هذا ماينفع وهين تبدا المشكله تبدا تتزعل وانا اتزعل لانها ماترضى بحكيي ونعاود نتصالح حين ماترضى تمشي على كلمتي

انا وام جراح تراضينا وهي صارت تتجنب الحكي عنها كدامي ولكن تاخذلها يومين وتعاود تتزعل وبعدها تتعذر وهيك مشيناها هالايام ...

جراح صار وكت تسجيلو بالمدرسه كان لزوم اسجلو السنه الي فاتت لكن لانو بنهايه شهر ال ١٢ مواليدو حسبوه على السنه الجديده يعني تسجل ويه مواليد ٨٧ ...
وكانت غاليه اول الي مشى معو للمدرسه
وكت اخذتو بصباح اول يوم دراسي هي كانت معنا وماسكه يدو لحين مادخلنا المدرسه وحكينا مع المديره ودلتو صفو واخذناه هنيك وهي تدحك للساحه والطلاب وبعدها كبل مايدخل حكالها ..

- صيري هاديه بالبيت لحين اعاود زين وماتضربي رماح مثل ماوصيتك
- لاااا مااضربو وماما تزعل لو مااكلت لفتك والتفاحه
- اييه اكل اييه ماني صغير وتوصيني
- لااا اوصيك لزووم لزوم

ضحكت عليها وهي تأشر بيدها على بطنو وبعدها هو دخل وهي تدحكلو من الشباك وين يكعد وحكتلي ..
- بابا انيد اضل معو
- بعدين يابه تكبري وتسجلي معو
- ايمتى بعدين
- ثلاث سنين
- هوايه لو شويه
- شويه يابه شويه
- واضل هين مع جناح
-اييه تصيري تروحي وتجي معو

صارت تضحك وهي كاضبه يدي وتكمز بمشيتها وهي تدحك لكل شي حولها
ووكت عاودنا للبيت وصار لزوم نمشي انا وتينه للمعمل هي صار تبكي كيف انها تضل وحدها هين واخذناها معنا للمعمل
وهنيك صارت تينه تجيبها لعندي وكت تنشغل مع حد وانا اعاودها لعندها وكت انزل اتفكد الشغل وهي كانت تنثر بكيفها
وتسأل على الشغله الوحده ميه سؤال
حتى لو نعيد نفس الجواب تعيد تسأل عنو
وتاخذلها فرتين وتعاود تسأل ايمتى يرجع جراح ؟؟؟ ونحكيلها بعد هالكد وكت وتعاود تسأل شكد هالكد هوايه لو شويه
ومشينا هالنهار بس نجاوب على حضره اسئلتها ... ولحين ما صار لزوم نعاود
هي سبكتنا تركض للسياره ومن اول ماوصلنا البيت هي نزلت تركض وتصيح جناااح هرجتو للبيت لحين ماوصلت حدرو واستلمتو اسئله ... اكلت لفتك ؟
لعبت مع احد ؟ ضربك المعلم ؟ تعلمت تقرا ؟ انطوك كتب؟
وهو يجاوب على كل سؤال واخذ جنطتو فردشها كدامها وضل يحكيلها هذا كتاب شو وهي تدحك فيه وتضحك على الصور
وصارت تحكيلو وش سوت هنيك معنا
ولحين مانامو همه يحكون ماسكتو ولا هديو ....

وثاني يوم هم كان ودها تمشي معنا وتينه مارضت وصارت تحكيلها ...
- لازم تضلي هنا تنتظري جراح من يرجع تاخذين منه جنطته خطيه تعبان منهه وتجيبيله مي هو مو يداريج لازم ادارينه

وهيك يلا اقتنعت تضل لحتى تنتظرو وتحكيلنا ..جناح خطيه تعبان لاتضوجو
واذا بالليل احد رادو بره تركض كبلو وتحكيلو ماتدحك جناح يدرس ماتفهم انته مو جناح شاطر ...

وهيك هي تدافعلو وماتخليه يمشي لو مايدرس وتضل مكابلتو حين يحط كتبو وتدحك لكل شي معو وهي الي تقط قلمو وترتب كتبو بالجنطه وهو يصير ينقطلها بدفتر خاص فيها ويكضب يدها ويمشيها على النقاط حتى تكتب الحرف مثلو

وبيوم وكت صارت نتائج جراح واستلم اول نتيجه الو وكان ناجح والاول على صفو غاليه كانت موصيه امها على هديه الو واحنه مشينه اشترينا شاحنه كبيره ومعها شاحنات اثنين صغار وعلبتها كبيره ومرتبه والتينه عطتها لغاليه
وهي ضلت حاضنتهه وكاعده تنتظر جراح يصحى من نومو العصر لحتى تعطيه الهديه ...
وصارت تحوم فوك راسو وتالي خلتها حدر مخدتو وضلت كاعده وتتافف بعدها تدحست بظهرو ونامت ... وانا تركتهم هيك نايمين ووكت عاودت بالليل دحكتهم عاملين حلبه سباق وكل واحد ماسك شاحنه ويركض فيها ورماح معهم بالي يكدر عليه يسابقهم ...

وبهالليله تينه حكتلي ...
- دتمشي الايام بسرعه مو صح
- اييه بالله صح
- عديت اربع سنين بالصبر على وضع غاليه مادري بعد شكد مفروض اصبرلها هم .. خايفه يجي يوم مدرستها وماكدر اسجلها وتضل تسألني ليش !!
- ببالي هالشي والله كل يوم افكر فيه لكن الحل الي بالي انتي ماترضيه وش اسوي
- اذا طال الصبر لحد يوم مدرستها ارضى بي وبهذاك اليوم اخذها سجلها باسمكم
- الله كريم يتغير الحال مايضل هيك

ومشيت الايام وزاد ربحنا بالمعمل واستخدمنا كثير اساليب لزيادتو وتعبنا عليه وحصلنا اسم الو سيطو بين المحافظات وصار وكت سفرتي للشام
وهين وكلت صياح ان ياخذها للشغل كل يوم ويردها ويضل هنيك معها خاف تحتاج شي .. وهي امنتها على كل مافي بمعملي وحكتلي ...

- امانتك اصونها مثل ماصنتني

ودعتهم ومشيت للشام وهنيك دحكت الشغل كلو على اصولو وشريكي رجل
نشمي ونفسو سخيه ومكاسمني كلشي بالحك ... وكضيت عندو عشر ايام وعاودت للديره محمل بالهدايا للاهل والاصحاب ...

وعاودت للمعمل كلو لكيتو على حطه يدي وماصاير شي على غير عادتو ..

وهين تفرغت لحتى امشي للطبيب استفسر عن حال تينه ضال ببالي ما يوم نسيتو ..

وهنيك وكت دخلت لعندو العصر وحكيتلو حالها .. ان راسها ياذيها بالاول وبعدها تضل تبكي وترتفع حرارتها وثاني يوم تنسى كل الي صار معها
وضل هو يأكدلي على سالفه النسيان ان كانت متعمده انها تبين ناسيه او انها بالفعل تنسى ! وانا احكيلو انها بالفعل تنسى دحكتها باكثر من مره ماتدري وش يصير معها وحكيتلو على اكثر المواقف
وهو حكالي شغلتين ...

اما عندها مرض بالراس ياثر هيك على ذاكرتها او مرض نفسي ممكن يوصلها لهيك حال ... وطلب الاثنين افحصها عندهم ...
وعطاني اسماء اطباء ممكن يفيدوني
بهيك حال ...

وانا ضليت افكر كيف اقنعها تمشي للطبيب وكيف احكيلها هالوضع كلو وهي ماتدري ان عندها هيك شي يستوجب فحص ؟؟؟

اجلت الامر لحين الاكي فكره واتصرف على اساسها معها ...

بهالحين مناسك ولدت بنت وسموها ورود
واجاني مُلهم ضحكتو شاكه وجهو وبنتو بلفتها بيدو .. اخذتها ودحكتها مربربه

وهي عمرها مايتجاوز اسبوعين والها شبه لابوها بالحواجب ولون العين الاسود
وبياضها مثل امها ... فرحت فيها كثير
صرت خال على جيتها ...
وره فتره ارسلت لها بيد امي اسواره ذهب ووصيتها تلبسها بيدها ..

وبشهر السادس من سنه ٩٥ وصلني خبرعن النوك وصلت بعددها ٣٥٠
نص من الي ولدت حديث هالسنه ونص من الي انا اشتريهم كل موسم كنت مخصص الهن مبلغ من زمان متعود كل موسم اشتري وازيد عددهن والي متكفل فيهن خوالي هنيك بديرتهم يراعوهن

وادحك دايماً الخير من صوب ينزل علي ويزيد .. من الزرع وافر هالسنه والحلال يتكاثر ومبارك فيه وشغلي بالمعمل فيه البركه وارباحي من الشام تتزايد بجمعها بالبنك والحمدلله ربنا منعم علينه بخيرو
ودايماً كل ماادحك انرزكت بشي اتذكر
دعوه تينه لي وكت الي حكتلي هاذي دعوه يتيمه مظلومه ماتنرد ...
وفعلاً على اثرها الرزك يزيد ونحفظت من كل شر بعدها وحصلت كل مرادي من هالدنيا الا هي .. صاحبه هالدعوه
الي فتحت ابواب الدنيا بوجهي ماحصلتها
وما ملكتها للحين ...

كل ما ودي ابين لها مشاعري اتردد وافكر انها ماترضى وتخرب علاقتنا هيك
لكن وكت صار العيد وضافو في بيتنا الجيره والكرابه وهين كان في وحده منهم جايه خصوصي لتطلب تينه لولدها
والولد كان يشتغل معلم وعندو بنت بعدها بلفتها وامها ميته وودو يتزوج لاجلها
وامي صارت تحكيلي ...
- يابني انا افكر هالقسمه زينه خطي البنت رضيعه ووحيده وزهرا عين الله عليها تعافت وخلها تكمل حياتها دامها بشبابها الحين ليه نوكف بطريكها
- يممممه انتتتي مقتنعه بهالحكككي انااا ازوجها للتينه يايمه انااا !!!
- وليييه ماتخليها تتزوج !
- واليرحم اهلك سدي على السالفه وهالولد بكرا انا اخليه ينسى الدرب كيف لونو يصير
- ياااه وانته تضل شوكه بلهاه الي يحكي ! مو حال هاذي خلها تتزوج وش كعدتها هيك على الاقل تبني حياتها وتلتهي مع زوجها
- يممممممه ماتنطكييها ماتنطكيهاااا
ماعندنا حريييييم للزوااااااااج زييييين
- عجل دامك تحترك بدمك هيك عليها ماتتزوجها انت ! لا تاركها تمشي بقسمتها ولا انت الي متزوجها
- كييييف كيييف اتزوجها كيييف ماتدحكين حالنه انتي ماتدحكيها ..
استغفر الله استغفر الله
- عجل اتركها تمشي بقسمتها انته ما منك رجوى .. زوجتك موجوده وتشعل الارض بساعتها لو دريت وهي تدحكك اخو لها لهيك اكطع نفسك منها واتركها تتهنى بحياه جديده وانته بعد انساها

#شقراء_بغداد

بارت_٤٥

// الرابع والعشرين من ايلول لعامنا الرابع والتسعين ...
يوماً اخر يختتم بكثير من الود والشكر والاعجاب بصاحبي الذي يحمل الربيع في عينيه .. انه العام الرابع على التوالي
الذي يتتالى فيه ملىء مذكراتي بالكلام عنه ..اوشك على انهاء دفتراً اخر لايحمل سوى الفرح وكثير من الامتنان لهذه العائله ..
اليوم قد اهداني ملك هذهِ المملكه ما لم
تحلم به عين ولم يترائى لفكر .. لن اتكلم
عن مكنون هذه الهديه من اللؤلؤ لكن اتكلم عن ماهو فوقه ..
اليوم قد رأيت نفسي بعينه .. نعم قد حصل هذا الشي كيف ولما لا اعلم لكنه قد حصل .. كنت انظر لعينيه وقت ما كان يحدثني عن امتنانه لتضحياتي معه
وعند كل هذا الكلام استوقفتني لمعه عينه
كان هذا اللون الاخضر شفاف في عينه كأنه انعكاس الشجر عند بدء الربيع على ماء الفرات هكذا هو اخضر متدرج الى شفافيه اللون عند الوسط واللمعه تندرج بخط افقي أسهت عيني فيها .. هنا كنت ارى انعكاسي فيه .. شيء هكذا يتناغم مع عميق وصفه لي .. شيء اكبر من مخيلتي
تناغم تام كان قد حدث ليجعلني اشعر كأني في وسطي اتجول .. من كلماته ذات المعنى الموثوق ونبره صوته الساكنه بجديه رقيقه ونفسه الغير منتظم ودفء اصابعه الي تعتصر اصابعي عند كل كلمه كأنه يؤكد لي فيها عن تام مقصده
واستمر هكذا حتى عندما بادرت بالحديث
لم يزل يؤكد باعتصاره لاصابعي على مواضع كلامي ..قد استغنى بها عن مقاطعتي بالرد .. كنت حينها اعني شُكره من اعماق اعماقي ولم يكفني هذا .. شكرته دمعاً وقُبله احترام وابتسامه امتنان
ولم يزل له في مكنوني الكثير لاشكره بعده تعابير ... لم اندم يوماً على قطره دمٍ فقدتها لاجل عينيه وليتني اعيد تكرارها الفاً واراه لايزال يقف شامخاً وينير كالشمس عند كل صباح ...
دوماً هو يقول انكِ عزيزه عندي ولاغنى لي عنكِ وممتن لكِ ولكن انا اثق تمام الثقه ان السبب ليس يعود لدمي لكنه شي في اعماقهِ مركون وددتُ لو لي علم به
كي ارى اي شي انا قد نلت شرف كونه لملك هذه المملكه ؟
//

كملت الكتابه ورجعت الدفتر لمكانه ورحت نمت .. غاليه تنام يمي بس الظهر والليل يم جراح .. حتى حجيهه مثله شيستخدم من الفاظ تستخدم مثله كولش متأثره بي وهو صح بعمر صغير بس يعلمهه بأدب .. اذا تصيح يسكتهه ويرزلهه بهدوء ويخليهه تجي تعتذرله لان صيحت وسوت هوسه ووكت الصيف كل يوميه تجيني العصر تعالي سبحيني جراح ميقبل نطلع بره العصر اذا مااسبح ... واسبحهه وامشطلهه وتتكشخ بثوبها وحذائها والحجل وتطلع وياه
وبالشته هم لازم كل يوميه متكشخه وياه العصر وميقبل تطلع وياه بجامه البيت الا
لو ثوب لو تنوره كصيره وقميصها لو الاوفر الكابوي هيج لازم تتكشخ وتنسق القراصات ويه لون الحذاء وتطلع وياه
مايرجعون الا ويه صلاه المغرب وترجع مرتبه مثل ماراحت ومن اسألهه مالعبتو
تكولي لا لعبنه وركضنا واكوللهه عفيه صايره تحافظين على نظافتج بره هم تكولي جراح يغسلي اذا توسخت ويعدل شعري لما يهوس ..
كولش يفرحني وجود جراح وياهه واكول
بلكي يضل هيج اخ الها وسند لحد مايكبرون .. اني مأمنه على بنتي بينهم لو صارلي شي اعرف الشيخ موجود يداريهه وجراح مايتخلى عنهه ..عايفتهه بين ايد رجال ماتبدر منهم الزله ..

جانت مشكلتي الوحيده بهالبيت هي
ام جراح .. ما اسلم منها حتى لو جنت كاعده وحاطه ايدي على خدي لازم تشمرلهه حجايه تزرف الكلب وتمشي

من يوم الي اشتغلت بي ويه الشيخ هي بدت تزيد بكرهه الي ومرات اسمعهه تحجي ويه صفيه عليه وتتشكى من الشيخ كدامهه لانه يهتملي و مايرضى احد يحاجيني ودائماً تكول لو ما الشيخ محذرني منهه جان هسه مامبقيه على راسهه شعر ...
واني من اسمع هالحجي منها اروح اكعد يم الشيخه واكوللهه اريد ارجع لبغداد قنعي الشيخ وهي ماترضى تكولي ادري من ام حنظله تريدين تمشين وتخلينه ..
واعيد واكوللهه هيج احسن روحتي ليش تضلون ممرتاحين بوجودي وهي تكولي نفس حجايه الشيخ ..احنه مرتاحين وعين الله علينه والمايعجبه وممرتاح يلطخ راسه بالحايط .. تخليني اسكت بعد شحجي ...
بس من وره طلعتي من المستشفى الشيخه كلتلي بعد تحلمين تروحين منا وحتى لو الشيخ خلاج تروحين اني مااخليج وسألتهه ليش ؟ كالتلي دمج دينه بهالركبه جان اني هسه فاقده ابني ومكسور ظهري بدنيتي ...

وهنا تأكدت بعد مالي روحه من هالمكان لان تصرفات الشيخ وطلبه بأن بس اضل كدام عينه وماافكر بطلعه منا وتعلق الشيخه بيه وجراح بغاليه ثبت جذوري بهالمكان ....

سنه ٩٥ جانت تتمحور على مسؤوليه المعمل .. هواي جنت اطلع على كتب اتزود منها بمعلومات تعيني على حمل هالمسؤوليه بشكل صحيح ومثمر ..

نهاري بالمعمل يخلص بين الدفاتر والحسابات وبالبيت بين المطبخ والعنايه بالشيخه والليل يصير لغاليه ..

اكعد وياها تسولفلي شسوت بيومها وشنو مضوجها ومفرحها بهاليوم وشنو بنفسها اجيبلها باجر وهي تحب تحجي هواي وتصير تحجيلي عن كل شي وحتى اذا ماتريد شي جبير لازم توصيني لو على اصباغ او مكعبات مرات ينكسر عدها صبغ اظافر تريد غيره لو شغلات لجراح وهيج لازم كل يوم ماافوت البيت اذا مو بيدي علاكه الهه ... والشيخ مابيوم اعترض او تكاسل عن واحد من طلباتها كل مانطلع الصبح يسألني اليوم بنيتنا شتريد ؟ واكوله هيج وصتني ويكول على هالخشم تآمر هالغاليه ... ومن نطلع من المعمل نروح نجيبلهه الي تريده واني متفقه وياه بعد كومه عركات وزعل ومصالح ان فلوس هذني طلباتهه اني ادفعهن ... وهو صار
يعوضهن الي بمكافأه بنص الشهر يكولي المحاسب مالي يستاهل لان يتعب بشغله
وهيج متفاهمين بشغله الفلوس الي دائماً هي مصدر عركاتنه الوحيده ...

وضلينه متفاهمين لحد ثاني يوم العيد بالليل اني بالمطبخ انظف وسمعت صوت الشيخ يصيحني باسمي مو تينه مثل مامتعوده عليه .. رحت ركض لغرفه الشيخه جان هو كاعد يمهه ويهز برجله باعصاب وكفت يم الشيخه وكلتله ...

- خير شيخ
- اسألك وتجاوبيني ايه لو لا
- ماشي
- ودك تتزوجي !!!
- اتزوج !!!
- ودددك ولاااا لاااا جااااوبي
- شيخ انته موتدري لا بعد ليش تسألني عليه
- هاااااا يمه سمعتتتتي باذنك وش جوابها
لااااا يعنننني لاااا مني ومنهااا ولا زواج ولا غضب الله علينا الي نزل بهالليله
وسيره الي تنفتح مره ثانيه اطبكلك سكف هالبيت على كاعو

عافنه ومشى وهو وجه احمر وصوته من يحجي يزلزل بهالغرفه ... استغربت هالوضع وكعدت يم الشيخه وهي صارت تحجي عليه ...
- يتمشيخ على شيوخو هالولد والله وكبرلو راس ويعلي صوتو على امو تالي هالعمر
- شيخه عفيه لاتنقهرين منه هو عصبي اكيد مايقصد يقلل احترام
- عااامي عينو هالغضب الي وكع على راسو تالي هالسنين
- شنو شتقصدين ؟
- مااا عليكي مني هييك حكينا وانتهى
- زين هو ليش ديسألني على الزواج منو فاتحله هالسيره مافهمت ليش هيج صار عصبي
- انا حكيتلو ان في ناس طالبينك مني لابنهم وهو تصركع بكاعو
- شيخه مو حاجين بهالسيره اني وياج ياعيني مو تدرين بالزواج مو بالي
- وليييييه ما هو بالك عجل انتي وش دحكتي من عمرك وشبابك دافنتو بالسواد والماضي الاسود هذاك ماتعيشي عمرك الجاي سلاسل الماضي ايمتى بتكسريها من ركبتك !!
- افهم خوفج عليه وحجيج لمصلحتي بس
ماريد
- لييه فهميني بتخافي منو وماودك تكسري كلمتو !
- لاا لاا مو هيج والله
- عجل شوو
- شيخه يعني اني مابنفسي الزواج وما اعتقد اكو من يكدر يخليني بهالسعاده الي اكسر بيهه هالسلاسل ..اكيد هالرجال يجي غريب شمعرفه شبيه مابيه هو يريد خدمه لبيته واهله ويريد دلال ومداراه
يعني ياخذني اخدمه مو اعيش حياتي وياه مثل مااريد .. مستحيل تكدرين تزوجيني لواحد همه وغايته يسعدني مو فد حاجه اله محتاجها وجاي يريد يتزوج وحده مطلكه وعدهه بنيه
- هااا عجل هيك ودك زواجك الثاني يصير
- هو اني ماريد اتزوج بس اذا صار لازم هيج يصير
- زييييين عجل ازوجك لابو جراح

كالتهه وهي تضحك واني شهكت ولطمت على صدري وكلتلهه ...
- يمممه عزاااا ابو جراح !
- ايييه عجل هو الي عندو كل صفات الي حكيتيها وودك ايها وانتو متراهمين وزواجكم يكون من احسنو
- عزززااا لااااا شيخه دخيلج يازواج يا متراهمين !!! اني وين والشيخ وين اني كل حدي وياه اخوه صداقه هذني بس وين اخذتينا للزواج يايمممه حتى ام جراح تخليهم يشيعوني منا

ضلت الشيخه تضحك وتكولي ..
- لندحك تاليها لوين

عافتني وكامت وهي بعدهه تضحك واني رجعت اكمل شغلي بس بالي يجيب ويودي ... وتالي نومت غاليه جوه وصعدت لغرفتي واول ماطبيت جفلت
شفت الشيخ كاعد على جربايتي ويدخن
بلعت ريكي وطبيت وسديت الباب وضليت واكفه اباوعله وهو عينه للسكف وينفخ بالدخان جان يكولي ...

- كان نمتي تحت صارلي ساعتين ناطرك هين
- مادري انته هنا جان صحتني واجيك

ما رد عليه واخذ نفس قوي من الجكاره وبعدين نفخ هالدخان وهو حاط ايده الي بيهه الجكاره على كصته ...
رحت كعدت على طرف الجربايه واباوعله وهو ايده ترجف من يجر نفس من جكاره .. شفته ديحرك روحه بيهه كلتله ...
- ليش هيج شيخ شنو شصاير وياك وهيج تحرك باعصابك
- كنتي كاعده معهم البارحه
- منو همه
- الحريم الي ضافو عنا هين البارحه كعدتي معههههم
- اي كعدنا من قدمت الضيافه الهم كعدت
- كنتي لابسه الحجاب ولا نازعتو
- نازعته

شمر النفاضه من الميز على الكاع واني جفلت من عصبيته هيج وهو صار يباوعلي وعيونه حمره ويكولي ..
- باالاااااالف مره منبه عليكي مااااااتكعدي معهم وكت الاعياااد احكييييلييي ماااموصي انااااا احكككيييي
- اي اي موصي
- عجججججل هيييك تكسري كلمتتتي
ماتحسبي حساااب وكت انبهك من شي
من مشيتي وكعدتي ماتذكرتي حكييي
ولااا هيك بتضربي بعررررض الحايط وتمشي بمزاااجك وتحسبي مادري عنو

جنت ساكته ومدنكه وهو كام يفتر بالغرفه ويفرك براسه ووكف كدامي وكال ...

- وششش اسوووي فيكي الحييين فهميييننننني وششششش اسوي !!!
يولووو انتي ماتفهمي الحين نااار شعلتي بطولي بهذيك كعدتك
- شيخ اسفه بس وين اروح وحدي اضل كاعده والله اضوج
- بتتحممممملي عججججل هيييك بترتاحي وكت يصير ابنها يتحلم بوصفك
بترتتااااحي هيييك !!! بتوريها طولك وشعرك فاردتو لعينها وبتمشي توصفك بالحرف الواحد وتزيد عليه لتحبب ابنها فيكييييي ..ماااااااتفهمممممي انتتتي ماتتتفهمي بضل انااا كل لمه اكعد اتكاووون معك ايمتتتى بتفهمي هالكصصصصد مني وتلزمي مكانك وماااتطلعي اييييمتى ياااافاهمه ياكبيررره ايييمتى تفهميها

جنت اباوعله وهو واكف يم ميز المرايه ويدك بايده عليه من يحجي .. جنت افرك ايد بايد كولش خفت من اعصابه هيج ماعرف شتصرف بهالموقف ولا جنت اتوقع هيج تفكيره بعيد ويضوج وحده تشوفني وتروح توصفني لابنها ابد متخيلته هيج صاير نار كبرى على هيج سبب ...
بلعت ريكي وكمت وكلت يالله ورحت يمه وهو يباوعلي بعيونه الحمر ونفسه ينسمع عالي وسريع .. كلتله ..
- شيخ سامحني عليها هالمره ومتنعاد ان شاء الله
- هاااا والحين عذرك وش يفيد ماالرجل تلاكيه يفكر بوصفك طول هالليل .. عذرك هذا بيمحيكي من بالووو
- شيخ عفيه يعني قابل لو ماكعدت هالمره محد يشوفني غير مره شلون شسوي
- مااااظنك غبييييه لهالحد وماتفهمي ان كعدات الحريم وكت الاعياد بتصير كلها تدحك حريم لولادهم ويتخيرو منهن
مادحكتي امي ماتخلي صفيه تكعد معهم
بالمجالس هاذي ..انتي ليه ماصرتي مثلها وضليتي بغرفتك ..عاجبك الحييين اعصابي هيك عليكي

انحرجت منه وحسيت نفسي بورطه
وضليت مدنكه راسي كدامه ودموعي تجري بهدوء .. جان يكولي ..
- ارفعي راسك دحكييييلييي شووو حكيييت يولووو

باوعتله بتوسل وهو غمض عينه بتعب ورجع يباوعلي كلتله ..
- ماقصدت الغلط والله .. اسفه بس اني مو مثل صفيه وابتعد من العين اني جبيره وعندي بنيه ماحسبت لهالموقف والله مو بالي

جنت اباوعله شلون ياخذ نفس ويهدأ بروحه ويه حجيي وبعدين كالي ..
- امسحي دموعك وما عاد تبكي يلا

ابتسمت ومسحت دموعي وكلتله ..
- متصالحين
- ايييه
-لعد لتضل هيج ضايج عفيه
- بيضل هالموضوع يحركني بنارو دامك محلله لفكرهم
- مااكعد بعد والله مااكعد
- البال ياتينه البال عندك يضل استغفر الله استغفر الله
- شيخ عفيه كافي اعصاب والله انقهر اشوفك هيج تعبان باعصابك كافي فدوه
- خلصنا يابه خلصنا زيين
- لااا بعدك ضايج شوف عيونك شلون حمر ماتوجعك ؟
- لااا
- دتعال اكعد ارتاح الله يلعن ابو هالزواج
شدعوه هسه هيج حارك اعصابك
- ريتك تحسي بنارو لتعذري اعصابي
- هسه لتضوج هي الشيخه من ترجعلهم خبر مموافقين يسدون السالفه وينسوهه قابل يضلون يفكرون بيه من حلاتي كُلي هالكدوتني وراح اعجز ههههه
- اييييه ينسو لكن انا ماانسى
-لاا انته هم انسى عفيه تره كبرت الموضوع هوااي كافي فدوه اذا الي خاطر يمك انساهه

ضحك ودار وجهه عني وكالي ..
- هاي يابه نسينا ارتاحي
- تسسسلم ياشيخنا تسسلم
- الله يسلمك يابه
- راح اجيبلك شي تاكله وتعدل مزاجك
- لاا ما ودي شي
-هاا ليش !
- خلك منها الحين انا ودي استأذنك بغرفتك هالليله اذا مايزعجك هالشي
- لاا لااا شيخ كدامك لا تستأذن ولا شي غرفتك هاي على راحتك
- تسلمي ..عجل انا راح انام الحين راسي مصدع
- سلامتك شيخ

تمدد هو واني طلعتله غطى حطيته يم رجله واخذت ملابس وطفيتله الضوا وطلعت جان الكى ام جراح واكفه كدام الباب ومتجتفه ...
واجتي رأساً جرتني من ايدي واخذتني لغرفتهه وسدت الباب وصارت تكولي..

- ووووش عندددك معوو انتي هاااا احكيلييي ماتجووووزي عنووو ليل نهار تحومي فوكووو
- شبيج شهالحجي قابل شعندي وياه
- ايييييييه جنابك بتكذذذبي مثلووو عليي
وظنك مصدكتتتك
- لااا اجذب ولا شي واظن انتي سمعتي كل الحجي مايحتاج اكولج شنو جنه نحجي
- اييييه عجل لو مالاعبه بفكروو هيك بيحترك على خطابينك مااااتتزوووجي انتي وتفكيناااا ولااا راسمه للبعيد
- ياااا شفكررر شبيكم وياي اليوم !!
- دحككككي يامره على زوووجي لو عينك حطت بفكسها لك واشرشحك تشرشح واكرهك يوم العتبتي بيه بابنا
- زووجج الج اني شكووو شكوو احط عيني عليه استغفر الله ام جراح كم مره حاجيتلج اني مابالي هالافكار شسوي وتصدكين عاد وتبطلين هالحجي
- ابعدي عنوو ابعدددي ..دحكي كربك منو وش سوووى !! خلاه ينام بغرفتك وكت ودو يرتاح ليييييه لانك عودتيه على هييك .. خلي خوتك مثل خوه صفيه معو ماتدحكيها كييييف هيك الخوه مو مثل ماجناااب معاليكو تعملوو
- عيني تريدين تتعاركين مو وياي رجلج موجود وتعاركي وياه اني شكو ..قابل كايلتله تعال ازوجني وهيج حركتي الدنيا عليه بهالليل
- يكطع عمرررك ان شاء الله على هالبليه الطبيتي بيها لبيتي
-اشكرج

طلعت ونزلت جوه وكعدت بالحديقه بره
ابجي وحدي بالختله ...
وحجي ام جراح يرن بأذني .. وشفته حقهه تحجي هيج اني لو بدالهه هم مااسكت واشوف رجلي هيج يسوي

وقررت ابتعد عنه من صدك حتى اتجنب هيج مواقف بعد ...

وثاني يوم اني باقيه كاعده ماكدرت انام راسي يوجعني وخشمي مسدود من البجي ومزاجي كله ضارب .. حضرت الريوك ونزل الشيخ نفس الوكت وكالعاده بكامل اناقته وكعد يتريك واني ضليت اكل وساكته ونزلت ام جراح باوعتلي صفح وراحت .. هي دائماً تتريك هي وصفيه وحدهن .. وجراح وغاليه ورماح وحد

قبل مااشيل الصينيه الشيخ كالي ..
- فيكي شي !
- لا
- تينه راسك يأذيكي
- شويه لان منشوله
- هااا سلامتك يابه
- الله يسلمك

اخذت الصينيه ورحت للمطبخ غسلتهه ورحت تمددت يم غاليه شويه احاول انام بعدهه هستوهه بالسته الصبح بس احنه متعودين نكعد ويه الصلاه ونتريك قبل السته واذا عدنا شغل نتحضر ونطلع واذا ماكو كلمن يسوي الي يعجبه .. واني كلت انام شويه ارتاح حتى اكعد احضر الغده
خاف يجون ضيوف ساعه الساعه ..

ونمت وتالي كعدتني غاليه تلعب بشعري وتلفه على راسهه .. اخذتهه لحضني وهي تضحك وتكولي ماما كسولي
بوستهه وكمت غسلتلهه وبدلتلهه ملابسهه
لان حضره جراح مايقبل غاليه تكعد تاكل بملابس نومهه .. مدري منو الزارع باله هالقوانين وهو بعده بعمر ٨ سنين بس لازم نمشي عليهه شنسوي ..

حطيتلهم الريوك وعفتهم ياكلون ورحت احضر للغده والتهيت بالمطبخ لحد ماسمعت اجوي ضيوف حضرت الضيافه وكلت لام جراح تاخذهن وهي كبل كالتلي .
- والله زين كأنها رزاله البارحه فادت فيكي

اخذتهه وراحت واني متعوده على تجاهلهه هاي مو اول مره وياها القبلهه هواي .. بس بلكي تقل منا وهيج لو نفذت الي بالي ....

ومشى هاليوم لليل اني من وكت قبل رجعه الشيخ صعدت لغرفتي ونمت وثاني يوم صار لازم نرجع للشغل والصبح حطيت الريوك وهم ملتزمه السكوت واتجنب اباوعله .. ولحد ماطلعنه للمعمل اني هيج ساكته ودايره وجهي للجامه وهو يحاجيني ارد على كد حجايته .. ومشيت اليوم بالشغل هيج
والليل هم اصعد من وكت انام ومشيت الحال هيج خمس ايام واشوفه يلوب ويصيح كل شويه على الرايح والجاي
ودائماً يسألني شبيه واكوله مابيه شي
والجكاره ماتنزل من ايده وصار باخر يومين يبقى وره العشى كاعد يمنه ويباوعلي واني اترخص واصعد لغرفتي
صرت ادري ان الشيخ مشاعره عبرت حد الصداقه وياي ان جان يدري بهذا الشي او لا او يعرفه ويخفيه بس هو توضح عندي بهالايام هاي من اشوفه يروح ويجي ويسألني شبيج ليش هيج تتجنبيني واكوله مااتجنبك بس تعبانه
ويضل يسألني راسج يوجع ! ويأكد بهالسؤال عليه اكثر من مره واحلفله لا ومرات اكوله اي من مالكى طريقه للتهرب ... واشوفه يحرك باعصابه ويزيدهه بالتدخين .. كل هاي ويه سابقاتها اكدتلي الشيخ ما عاد ينظرلي كأخت وعبر الحد الي جان بينه موجود

جنت انقهر على وضعه هيج وادري جاي يتاذى بسببه بس لازم يصير هالشي
ماريده يضل يتأمل بشي مموجود ومرته
ماتخلي يتهنى بحياته لو بقى هيج وياي

باليوم السادس بالليل جنت باقيه سهرانه ويه غاليه عدها مغص بطنها وباقيه وياهه لحد مانامت اني رحت ارجع الادويه بالثلاجه وبس سديت باب الثلاجه شفته واكف ومرتجي على باب المطبخ
وعيونه مبين عليها التعب وسواد السهر طابع اثره جواهن ... كالي ...

- شعجب سهرانه
- غاليه بطنها توجعها وضليت يمهه
- وشلون صارت الحين
- احسن شويه ونامت هي هسه .. انته ليش سهران
- انا من ايام النوم مجافيني وانتي ماتدري عن حالي
- ماعندك الا العافيه

كلتها وغسلت ايدي واجيت اطلع وهو جرني من زندي بقوه وثبتني على الحايط
وصار يباوعلي بكل غضب ويكولي ..

- ويييين ودك تصلي بهالاسلوووب معي هاااا فهمينننني احكييييلي ووووش هوو مبتغااكِ
- ما عندي شي عفيه عوفني

وهنا شفت بالمرايه المعلكه يم السنك كدامي صايره .. شفت ام جراح اجتي تريد تفوت وبعدين تراجعت ووكفت تتصنت ..
رجع هو يضغط على زندي ويكولي
- بتكذذذذذبي انتتي تكذذبي تينه اناا اعرفك عييين المعرفه ماتمشي علي بهالحكي احكيييلي ليييه هيك تغيرتي
احكككي يولوووو
- عوووفني وخررر عفيه شيخ
- احككككيلي واتركك تمشششي ومالي دخل فيكي بعد لكن خليني افهم وش عندك
- مابيه شي بس هيج ضايجه اريد ارجع
- وووين ترجعي !!
- اريد ارجع لبغداد
- ليييه ترجعي يولووو شو حكينا من زماان وش الي تغيييير
- الي تغير اريد ارجع لمحمد ولازم ارجع لبغداد حتى اخلي احد يدخل بينه ونتصالح ونرجع نتزوج لخاطر غاليه

من بعد هالحجي هو جرني وشمرني على جهه الكاونتر وهو يصيح بعلو صوته وبعدها شال سراحيه كزاز شثكلهه شالهه وضربهه بالكاع حييل بحييث طشرهه تطشر ورجع عليه لزمني من ركبتي من وره وكالي ...
- دحكيييييهاااا زييين دحكيهااااا هيييك
انتتتتي الحين كسرررتي كل تعبي واملي فييييكيي ياااا حيييف والله يااااحيف

دفعني وراح طلع بره والشيخه اجتني مفزوعه وتسال شكو شصاير وحاضنتني واباوع ام جراح واكفه وتمسح على صدرهه براحه وتضحك وراحت صعدت
واني صرت ابجي بحركه وحاضنه الشيخه وهي اخذتني لغرفتهه نومتني على رجلهه وصارت تحجيلي ..

- حكيتلو ان دربو وعر مايكربو والله حكيتلو

- شيييخه عفيه شسوي ويااه شسووي والله احتاريت
- ليييه تحتاري يا يمه وش صاير
- ماتشوفين ام جراح شلونهه ويانه ووياه بالاخص ماتشوفيهه كل يومين متعاركه وياه بسببي وحتى الي حجتهه وياي وجه بوجه تكرهني وتتمنى موتي وخلاصهه مني تكرررهني شيخه تكرهنني
- وانتتتي لاجلها صركعتي الرجال هيييك
هالايااام
- اييي لعد شسوي شيخه اتجنبه حتى تكف مشاكلها وتريح ظنونها والله ماعندي شي ويااه واحجيلهه متصدكني
- يااابنتي مااينفع هالحكييي ماينفع ولدي
وكع بمصيده العشك من زمااان يايمه من زماان هو فيها وكاتمو بانفاسو
- صدددك شيخه
- ايي والله انا دحكتو يايمه بيوم هذيك الحادثه وكت اسعفك للمستشفى وانا مشيتلو وهنيك دحكتو كاعد ويبكي عليكي
يبكي والله مثل مالحين بكيتي بحضني
ويحكيلي نفسها هين بطولي يسري ماكدر اشيلها من بالي وليااالي هو ماينام الا بفرشتك ويمشيلك بنص الليل لحتى يدخل غرفتك ويكعد معك ساعه ويعاود يسهر للصباح يتامل صحوتك وانا احكيلو حاذر يابني ماتنسى عندك زوجه واولاد بالك عليهم وهو يحكيلي مابالي غير التينه وكت تعاود يعاود ولدك ... وانتي عاودتي لهين لكنه ماعاود مثل اول عاود لنا عاشك وعشكو فاضحو بعيونو حكها حرمتو تتخبل علينا وهرجها ليل نهار
لانها تدري فيه مايسكن كلبو غيرك ولا يدحك غيرك بهالبيت
- بسسس غللللط ياشيخه غلللط هالعشك مو وكته والله اذيه مو نفع وجوده
- هالحكي انا وانتي نفهمو لكن هو لا
يابنتي هذا بدوي عشكو يطحن بروحو طحن الرحى ويحركو فيه بكل ثانيه تمر
بياخذو لحم ويشمرو عظم لو مانال معشوكو .. ولدي واناا اعرفو مايحيل عن الي براسو تطبع لو يعيش العمر عمرين
وانتي دحكتيه كيف هالاسبوع كضاه متلوع على حكيتين معك ان كانك ماتحكيها لكن انا ادحكها وداريه فيها

بجيت اكثر من سمعت حجيها هذا وشفت شلون هو هسه مشى منا بقمه اذاه وقهره
واني مابيدي شي عليه ... ضليت افكر وكلتلهه ...

- شيخه لعد اني باجر اروح منا وخليه يرجع لحياته ينساني بالايام
- ياااه يولي ويين ماشيه بيحفر الارض ويطلعك والله .. ماتبلينا معو يايمه
- ماكدر اضل بعد الي صار .. شيخه اني حجيتله قبل شويه اريد ارجع لمحمد
- ياااااوييييل حظظظك ياخالد وش عزززيتي وصخمتتتي بولدي يااامره
- شييييخه عفييه خليننني ارووح والله ماردت اذي بشي والله انجبرت احجي هيج ام جراح جانت تتسمع علينه وهو منتهي باعصابه وياي خفت لا يحجي شي ويبين الي بداخله وتروح مرته تعلكهه علينه بنص هالليل واني اصلاً اريده يكطع الامل مني .. هالحب مو وكته
وماله مكان عندي ياشيخه ماله مكاااان
- اللله لا يرضى عليكن من حررريم ماجبتو غير وجع الكلب لولدددي

ضليت لازمه طرف دشداشتهه وابجي
وبعدين كالتلي ....

-اسسسمعي يولي طلعه من هييين تحلمي فيها بدون علموو لانو والله لو درى فيكي ماشيه من هين بالخفى بيطبكو لهالبيت
على روسنا ويحترك عمرو كدامو ماتكسري بولدي كسرررتين يولي ارحمييه عجل هو كفففر بهالعشك الله الاكبر عليكن

مارديت وضليت مستمره بالبجي وهي ساعه تسكتني وساعه تندب حظ ابنها
وبعدين عفتها وكمت صعدت لغرفتي
جريت شماغه الي حاطته باول مجر يم راسي ... اخذته واشتميته وكملت بجيتي بي واتعذر منه هنا كأنه يسمعني ..

ماردت يصير هيج ماردت الحب يكطع طريقنا الي بديناه .. اني بعدني ملجومه كلب وروح بعدني من كل شي عندي اثر وجع بجسمي وبروحي وكلبي بعدني ماتعافيت من ماضي كل ليله يطبع بصمته عندي .....

حضرت جنطتي وجنطه لغاليه ولميت بيهه بس الخفيف والضروري وحطيتهن يم الباب وضليت متمدده انتظر الفجر يطلع حتى اخذ غاليه وارجع وحدي مثل مااجيت ....

يتبع..

#طرق_زيادة_التوسع_للحوامل🤰🦋

1️⃣اسبحي بماء دافي دائما

2️⃣تفريغ المثانه من البول ( تكرمين) دائما

3️⃣تدليك الجسم بزيت الزيتون

4️⃣تدليك الحلمتين بزيت الزيتون وسحبها الى الخارج حتى تتجنبين التشققات اثناء الرضاعه

5️⃣تدليك منطقه بين المهبل والدبر بزيت الزيتون حتى ترتخي العضلات

6️⃣ممارسه الجماع بكثره

7️⃣اكل التمر والاناناس

8️⃣المشي بكثره

9️⃣الاسترخاء وعدم القلق

🔟جلوس القرفصاء اذا عندج بواسير لتسوين الجلسه

1️⃣1️⃣تناولي مشروب البابونج المغلي لأنه يفتح الرحم ويقوي الطلق

2️⃣1⃣تناولي العسل يساعد في استرخاء عضلات الجسم مما يساعد على تخفيف آلام أسفل الظهر وآلام الولادة

3️⃣1⃣تناولي مغلي الزعتر فهو يساعد على فتح الرحم ويسهل الولادة

#اعـاده_توجيـــہ_لتنسون
#ملوكه
@stylegrils

أي لون شعر عجبكم أكثر؟😻✨

1_🌚
2_🌝
3_🍂
4_🔥
5_⭐️
6_🌻

@stylegrils

لايمكنك اخفاء ماضيك عنهم اما ان تعترف به تحت تأثير كلامهم معك او سيكشفوه بطريقتهم الخاصة❤️😉


#‏الحوت #‏الميزان #‏العقرب

#‏العذراء #‏السرطان #‏الجوزاء

لا تجرح 3 ( برج الحوت ، الحمل ، القوس )

فأنهم أكثر الناس طيبه وأخلاص ومحبون للخير .❤️😍

لاتخسر 3 ( برج الثور ، الجدي ، السرطان )
...
فإنهم أكثر الناس صدقا ، وعندما يقعون بالحب فإنهم محبون بصدق .💞✨

لا تخدع 3 ( برج العذراء ، الميزان ، العقرب )

فإنهم يحتفظون بلأسرار ولا يمكنهم خداع الناس بدموع التماسيح .💛✨