يلااا لاتضيعي السالفه
- اي اي ماشي راح اضفره
- يوووووول انتي ماتسمعي
- شنوو شنوو شسوي بعد والله خبلتني
- تييييييينه بالله حكوم اصلخك راشدي
- اي اسفه اسفه
- امشي لميه هيك ارفعيه ماتعرفي
حكيتلك طولو لا تبيني تجي تضفري !
ماتفهمي انتي ولا انا احكي عجمي
- ماشي مااشي فهمت

رحت طلعت ماشات وصرت الف بي ورفعته وثبته بالماشات وحتى الطاك ذبيته وكعدت وهو كالي ..
- هااا كانك بوزتي
- اي
- ليييه يعني لاني خايف عليكي
- اااف مادري هيج ضجت
- هههههه امشي حطي هالطاك كاعد حلو مع هالرفعه
- والله حيرتني
- ماتحتاري سوي الي انا احكي وبس
- ماشي

كمت حطيته وباوعتله جان يكول..
- ايييه هيك زين يلا انزلي وسويلي درب خلي امشي بالعجل
- ماشي
- تينه
- نعم
- ما تزعلي من حرصي عليكي انا احكي
واتدخل بامرك
- اممم عادي ماصار شي .. بس فدوه بالليل وصيهم يحضرولك ملابس باجر حتى ليصير مثل اليوم ونتبهذل
- ههخخخخ ليه هالحين تبهذلنا بالعكس انا تونست معك
- ياااا متونس واني شبعت رزايل
-هههههه امشي يا يابه امشششي خلصينا

ضحكت ونزلت لكيتهه هوسه صايره وحتى ماسلمت كبل رحت لصفيه وكلتلهه
تره الشيخ يريد ينزل وصاير عصبي يكول ما توخرنهن من الطريق وهي كبل
جمعتهن بالربعه وسدت الباب واني صعدت ركض فتحتله الباب واشرله .
-يلا يلا بسرعه الطريق امن
- ههههه يلا نازل

نزل كبلي وهو يحمحم وعاكد حواجبه وطلع من باب الورانيه .. واني تنفست براحه خلصنا ... والله لو تدري ام جراح تسويني وصلتين وتشمرني بالشط

خلصنا يوم الحنه بونسه وضحكه والعرس صار بي الدموع وكلنه راح نفتقدها اني دمعت عيني من شفتها بيدلتها البيضه بهالحظه تذكرت اختي دعاء هم راح يجي يوم واحضر عرسهه وارتبهه بايدي ؟؟؟

زفوهه والبيت صار هدوء من بعد ماراحو العمات وبنات العم وضلت الشيخه ساده بابهه ومتريد احد يجي يمهه
وضلينه كم يوم يلا شويه تعودنا فراكهه
وكت السبعه الشيخ ماقبل احد يروح غير ام جراح والشيخه واثنين من عماته كبار
وكال هدايا تندز وياهن ...

ومشت الايام وصار رمضان وختمناه بالخير والنعمه وهالمره عيادينا زادت يكول الشيخ ضليتن وحدجن زادت فلوسجن .. واني جنت اجمع العيادي كل مره وكم فلس هم تجبرني اخذهن الشيخه
وكلت اري اشتري بيهن حجل لغلاتي
رجليهه مدبدبه وكل مااشوفهه اتخيل لو حجل برجلهه شلون حلو يكعد ويه بياضهه ...

وبعد العيد وصيت الشيخه وانطيتهه الفلوس وكلتلهه اريده يلوك لغلاتي
وبذوقج .. وهي راحت جابتلي حجل
صغيروني بي اجراس ناعمه وحطيته برجلهه وهي مكيفه بي وضلت اليوم كله تكمز وتباوعله ومن يجي جراح تكعد وتمدله رجلهه وتكله ..
ماعندك مثله انطيك .. وهو يضحك ويكللهه بس الج هذا .. وهي تجلبله
تريد يضل يخرخش بي لو تخلي يبوسه وتكله حلو وهو يكللهه اي حلو وترجع تكوم تفتر وترجع تتمدد وتحط رجلهه بحضنه وتكله حلو هيج وهو يكللهه خبلتيني بي حلو حلو ..وترجع ترفع رجلهه على جتفه وتكله تشوفه حلو !

لحد ماخلته يصيح عليه ويكولي ..
عمه شبليتنه بي راح اكطعه والله بس تحجي بي

واني اضحك عليهم وهي صدك خبلته بي تفر برجلهه على ظهره وعلى جتفه واذا تلعب وياه وتذكره تكله ..
اوكف اوكف خلي اشوفه خاف شعلع
هاي شعلع مجلبه بيهه تقصد بيهه انشلع او انكطع ...
وهو يصيرعصبي ويرجع يبوس بيهه ويشيلهه بس تبرطم ...

وبشهر العاشر كاعدين بالربعه ودخل الشيخ ضايج وكبل شمر عكاله بالكاع
وراح كعد يم الشيخه وكلنا صفنه عليه بس محد تجرأ يحجي وياه ...

شويه والشيخه سألته ..
- خيرك يابني وش فيك غادي نار
- يمممه خسررت كلشي راح من ايدي فلست

#شقراء_بغداد

بارت_٣٩

- خيرك يابني وش فيك غادي نار
- يمممه خسررت كلشي راح من ايدي فلست
- يااالطيف يارب يول احكي من الاول وش صاير
- استغفررر الله بعدين يمه بعدين

طلع الشيخ وراح لغرفته والشيخه ضلت تضرب على رجلها وتصيح عليه تريده يجي يحجيلهه .. هديناهه شويه وبعدين راحت ام جراح للشيخ وماكو شويه ونزل وطلع بره يدخن وصافن بالسمه
عفناه على راحته رجع وكعد يمنه وهو من وحده كال ...

- يمه الي جرى ماكاعد اعرف اخليلو حسبان ! مافهمت للحين كيف صار
- وش الصار ياولدي
- المعمل مفلس يمه مفللللس ورواتب هالشهر ما مدفوعه وعندي بعد كم يوم وجبه خشب جديده لزوم ادفع حكها وماعارف كيف صار هيك
- يا ساتر يارب ياااساتر يارحيم شلون صار هيك يابني عجل وين بالك عنو
- يمه انا من زمان شغل الحسابات مكلفو لصاحبي وهو كايم بالواجب فيه لكن هالمره حكالي ان ارباح هالشهر يادوب تكفي فواتير واجر كم عامل ..السوك بهالحصار يايمه انكسر واخشابنا ضاله
- وش الي تغير مالحصار صارلو ثلاث سنين ماكسر سووكم من وكتو ليه الحين؟
- مادري يايمه انا بشك ان في شي ناكص بالسالفه لكن ماعارف كيف ابينو وافهمو
الحين بالي على رواتبهم هالشهر كييييف

كسرت صفنته وكلتله ...
-شيخ تحب اساعدك بيهه ؟
- هاا !كيف تساعدي
- شنو نسيت اني اختصاصي كله حسابات وجنت اشتغل بيهن
-ايييييييه بالله راحت عن بالي ..بتكدري ياتينه تلكين الغلط وين !
- خلي نجرب ونشوف اذا ماكدرت شوف غير محاسب ماتخسر شي
- والله وجلاله الله لو كدرتي تحليهه لي وتخلصيني من هالشده الي تطلبي يتلبى
ولو اعبرلو بحور اجلبو الك
- تسلم شيخ ماريد شي بس كون يرجع شغلك زين
- لااااااه تينه لو هيك الحكي عجل خليكي لا تساعديني
- ليييش
- لانك ما راح تطلبي شي لاجل تعبك وهالشي ما يرضيني لو تحكيلي انك بتطلبي شي عليه او خليكي هين ماتعبك
- ديلا سهله هسه على الطلب ماشي اطلب من ننجح ان شاء الله
- ان شاء الله عجل بكرا من الصبح تحضري نمشي للمعمل
- صار

باوعتله اخذ نفس براحه وباس جتف امه
وهي صارت تدعيلنا نتوفق ...
جنت كولش متوتره هالليله بحيث ماعرفت اكعد ضليت افتر بالغرفه واذكر كلشي اعرفه بالمحاسبه واحاجي نفسي هيج اسوي وهيج ادقق وبعدين رحت
صليت الليل وختمتها بدعاء ان ربي يخليني اردله جميل وكفاته وياي بهالمره
وما يخجلني كدامهم ....

والصبح حضرت الريوك بعد الفجر
وصعدت بدلت لبست ثوب اسود طويل والحجاب ونزلت جان يكولي ..
- عباتك ياتينه
- اي هسه صار

صعدت جبتهه واجيت لبستهه وامنت غاليه عند الشيخه وطلعت صعدت بالصدر يمه وطلعنه جان يكولي ..
- هاا مستعده
- اي الحمدلله مستعده
- تينه انا واثق كل الثقه فيكي لاتخافي حتى لو فشلنا ماتزعلي زين
- لا على هالثقه ان شاء الله ننجح
-ان شااااء الله
-بس احجيلي شلون طبيعه شغلكم
- دحكي انا شغلي هنيك اشرافي يعني بشرف على الاثاث وغيرو وادقق على لمسات الاخيره منو .. اول تصميم كبل مايتنفذ انا ادحكو واخلي الي مناسب وبرفض الي مايعجب ..
التجاره وسفرها هاذي شغلي بعد
والحسابات هاذي مسؤوليه صاحبي حمزه حكيتلك انه كريب مني ومن الاعزاز
هذا احنه درسنا سوا ولحد الاعدادي هو كمل وتخرج وانا تركت الدراسه عند السادس بوكتها والدي ارسلني مع اعمامي لشغل بالاردن وراحت علي السنه .. اييه حكيتلك ان صاحبي هو ابو الحسابات ... وانا من يوم يومي معتمد عليه و ما دحكت منو تكصير
وعندك النقل هذا مستلمو صياح ولد عمي
هو عندو سيارات خاصه ومشغلها عندنا
والحمدلله هذا اجورو يكطعها كبل مايسلمني الباقي كل شهر هيك يجمعها وباخر الشهر ياخذ الي يخصو ويسلمني الي يضل منها

- هااا زييين وهالشهر سلمك الفلوس؟
- اييه سلمني
-وكاملات مثل كل شهر
-اييه نفس كل شهر يعني مانذكر انها بتزيد او تنكص كم دينار لكن بالحد نفسو
-اي المهم انها مو ناقصه هواي
-لاااا لاا زين
- لعد شلون ما ماشيه البضاعه اذا النقل فلوسه واصله ؟
- اهاااا عييين العكل يا يابه اناا هين هو بدا عندي الشك ان في حلكه ناكصه بالسالفه
- نلكاها ان شاء الله

وره شويه وصلنا المعمل وهو مخليني وراه ويأشر الهم يدورون وجههم ..
حسيته على اعصابه جايبني هنا من كد ما كل شويه استغفر الله ...

دخلنا مكتبه وشفته شلون حلو وجبير
عنده مكتبه بلون اسود وماليهه ملفات
وكرسي جبير جلد جوزي والميز اسود واقلامه الذهبيه وصوره والده باطار ذهبي جبير معلكه وراه بحيث صايره بالوجه اول ما واحد يدخل وهو شكله ما يقل عن هيبه ابو جراح ..

كعدنا على الكراسي الي كدام الميز وهو انطاني ككو اكلته بين ماراح طلع يشوف كم شغله ..

وبعدين رجع وكالي ..
- يلا نمشي ندحك الحسابات

كمت ورحت وياه لغرفه جانت مقابيل غرفته .. دخلنا والولد سلم عليه وهو مدنك .. اشرلي اكعد ..وكعدنا ثلاثتنه
وهو كال ...
- اسمع ياخي هاذي اخيتي ام غاليه هي شغلها محاسبه وانا اليوم ودي نعيد نفتح حسابات هالسنه كلها وندحك سوا وين الغلط ونعالجو ..

انا مااشك بقدرتك عليها لكن الوضع حرج ياخوي ويراد نتعاون عليه
- سهله ياخوي .. حياها الله لاخيتك

كالها وراح فتح المكتبه وطلع دفاتر اثنين كبار وجابهن حطهن كدامي وكعد
اني تفاجأت وكلتله ..
- بس هذني ؟!
- ايه هاي لهالسنه عجل ودك الي كبلها اجيبو !؟
- لاا خلي اشوف هاي بالاول

فتحت اول دفتر وصرت اقرا واقارن بين جداول حسابات كل شهر وفتحت الدفتر الثاني هم نفسه ..
صفنت بيهن شويه وباوعت للولد وهو يهز برجله وباوعت لابو جراح الي مبين توتره على ملامحه ..
كلتله ..
- اكدر اشوف مال السنه الي فاتت
- ليش ؟ هذني مايكفن
- دادور على شغله اريد الكاهه وما موجوده هنا
- كوم ياخوي طلعلنا السنه الي فاتت
-ايه زين

راح يكلب بيهن واني شاورت ابو جراح
- اهدأ من نطلع احجيلك كل شي

هز براسه باي واجه الولد انطاني دفتر واحد .. تعمدت مااسأله وين الثاني مثل هالسنه ..
اخذته كلبت بي وضحكت ورأساً رجعته اله وكلتله ..
- مشكور تعبناك
- لا تامرون
- شيخ نمشي
- يلا

اخذني ورحنه لمكتبه سدينا الباب وكعدنا
كالي ..
- تينه بالتفصيل تحكيلي بالتفصيل فهمتي
-اي ادلل ... شيخ اسألك بالبدايه انته ادقق وراه ؟ حتى لو بنهايه السنه او كل كم شهر
- لاا لاني واثق فيه وما مدحك غلط صاير من كبل
- الغلط الاكبر هو انك مادققت وراه
- تييينه صاحبي خويي هذا لا تشككي فيه
- اني مو اشك بي ولا اكلك هو متعمد بس يجوز ماعنده الخبره الكافيه ،، او هو مامتبع نظام صحيح يفيدكم مو صح هالشي !
- اي جايز
- اي لهذا اكولك لو مدقق وراه جان شفت اكو هواي اخطاء واكو هواي نواقص
- انا وثقت فيه كونه دارس وهاذي شغلتو من زمان ولا تنسين هو صاحبي من الصغر
- ميخالف بس منا وهيج خلي ثقتك بعينك وبس
- الحين احكيلي شو دحكتي في
- اول شي نظامه غلط .. مسوي دفتر واحد وهالدفتر عبالك مال ابو دُكان مكتوب بي بس السلعه والمبلغ والتاريخ
لا اكو عنوان المشتري لا وصولات قبض لا اكو شي يثبت ان هو باع هيج شغله لهيج شخص ..
الكلفه الثابته الي هي على الكهرباء والمي وتصليحات المكاين وهالاشياء يعني مو المفروض مخصص الها مبلغ ثابت ؟
- ايه ؟
- هنا مبلغها متغير كل شهرين ٣ شكل
مره تزيد مره تنقص زين ليش زادت وليش نقصت ؟ انتو شكد ادفعون الهن!
- المي انا ادفع عليه شي قليل والكهرباء
ثابته كل شهر مادحكتها تغيرت ومن زمان ماحصل عطل كبير بالمعمل يحتاج زياده فلوس لتصليحو لان عمالنا بيعملو كل شهر صيانه للمكاين وتنظيف وتزييت
وهنه نادراً مايحصل لهن عطل كلهن صناعه المانيه
- اي لعد على هذا الحجي ليش هالتغيير بالمبلغ الي مفروض تبقى كلفه ثابته هاي مايتلاعب بيهه تربحون تخسرون هاي تندفع ماعليها نقاش
- اييه صح حكيك
- زين نجي لشغله ثانيه ... فلوس النقل كلتلي تستلمهه كامله كل شهر يعني المفروض تتسجل بحد معين مايتغير مو
- ايييه
- اي اني شفت الهن حقل واحد بنهايه الدفتر مكتوب بي تاريخ كل شهر والمبلغ متزايد باول شهرين هالسنه والباقي نقصان هواي يوصل للنص منه
- شلوووون هيييك يولو
- والله هذا الي شفته وبدفتر السنه الي فاتت هم نفس الشي المبلغ اقل من الي متسجل هالسنه !!
- يااالله ياالله
- شيخ هواي اغلاط لو اكعد اعددهن ميخلصن مادري هو شنو باله بس اكو شي غلط هنا ديصير لازم تنبهه عليه
يعني لو تكعد ترتب الحسابات من الاول وتجمعهن اني متاكده راح يطلع اكو هواي فلوس مختفيات مامسجل الهن اثر هنا
- يولووو خووويييي هذذذااا خويييي
وش تحككككي انتي
- اهدأ فدووه احنه دنبحث الغلط وين ماداكولك هو متعمد كلتلك من البدايه يجوز ماعنده الخبره الكافيه ومخربط بفد شي وجار الي بعده على نفس الغلط يمكن كلشي يصير لان بالحسابات غلط بتفصيل واحد يضل يجر لحد مالانهايه
- ايييه جايز يكون غلطان بواحد من الشهور وغافل عنها وماشيه هيك
- اي يجوز
- زين والحل !!
- الحححل .. ينقسم لشغلتين
- ايه
- اول شي تبدأ بالرواتب وتدفعهن من فلوسك الخاصه
- شلووون !
- شيخ الهوسه الي بحسابات معملك ماتطلع من ليله ويوم رادلهه شغل وتعب وتدقيق لكل رقم بيهه وانته شلون تضل معلك العمال هيج لحد ما تصفي حساباتك ! وحتى لو كعدت وسويتهن
قابل راح يرجعن الي خسرتهن ! منين ترجعهن مثلاً !
- عجل اضل خسررااان
- اي تخسر هالشهر وتعوض بالثاني
- استغفر الله
- شيخ صدكني هالقرار هو الانسب
اخسر شهر واني وياك اسويلك جرد لكل دينار دخل معملك و ازيدلك ربح بالشهر الجاي بس ثق بيه
- تينه انا من اول حكيتلك واثق فيكي
- لعد اخذ بهالحل .. اول شي راح تخلص من هم العمال ورواتبهم ومحد يحس بخلل صاير هنا .. وثاني شي حتى تتفرغ لدراسه المشكله وحلها .. وثالث شي
لازم نخلي الشهر الجاي يبدأ من الصفر على نظام جديد حتى نقارن بينه وبين الي قبله ونشوف شنو الي جان يصير وهيج وصل لهاي المواصيل ونتجنب الخطأ
صح راح تدفع هواي لرواتبهم منك بس راح تنقذ معملك وتكدر تعوضهن بمرور الشهور

صفن شويه وكالي ..

- ماشي راح ادفعهن لكن كل دينار تحسبيه كدامي وين كان ووين راح لان ودي ادحك وش الي كاعد يصير من وراي زييين تينه
- زين شيخ تدلل نكعد سوه بالبيت نحسبهن ولا يهمك
- ايييه عجل اليوم نبدا فيهن
- ماشي لعد خلي نروح نستأذن منه وناخذ الي يلزمنا
- يلا امشي

رجعنا لمكتب الولد حمزه واخذنا مال السنه الي فاتت والي قبلها واول دفتر لهاي السنه وطلعنا من المعمل وهو بالطريق طبك على مكتبه وجاب دفاتر واقلام ورجعنه للبيت ...

كالي ارتاحي وبالليل اخلص من الديوان ونكعد نشوفهن ...
رحت اخذت غلاتي اشم بيهه والاعبهه وبدلتلهه وخليتهه تنام يمي اشتاقلهه وهي لازكه بجراح وهو صار ميقبل ينام يمي يكولي صرت جبير بعد مانام يمج عيب
دائماً اشوفه يتطبع هواي بصفات ابوه

ولليل رجع الشيخ بالعشره واحنه بعدنا كاعدين .. كالي نومي بنتج وتعالي نشتغل
اخذت غاليه اريد انومهه وهي متقبل تريد تلعب وجراح منعس وهي تكمز فوكاه
اخر شي جرهه حضنهه وغطى راسهه
وكللهه بس تطلعين راسج تاكلج البزونه
وهي خنست ...

غاليه حيل تخاف من البزونه تتخبل بس تشوفهه تضل تصيح وتخبص الدنيا
رغم هي وكحه وجريئه تروح تطلع مرات للبستان ويه حسن وولد الفلاح وجراح وترجع شايله ارنب من اذانه تسحل بي ...
يصيده ابن الفلاح الجبير وهي تاخذه تضل مجلبه باذانه وتفر بي متخاف منه
لو البطات الصغار الي بيت حسن كل يوميه مهججتهن وجراح يركض يلم بيهن وهي بس ينجمعن تركض عليهن وتضل تصيح لحد متخليهن ينخبصن ويتراكضن
منا ومنا وكوم يا جراح لمهن ورجعهن لحسن ... بس هالبزونه تخاف منهه مدري ليش بس هي كدرت تخوفهه
وجراح مستغلهه بس يتعب منهه ويريد يخلص من عنادهه يخوفهه بيهه ..

عفتهه نايمه بحضنه وطفيت الضوا وطلعت للربعه والشيخ كالي اجيب الدفاتر و وياهن جاي ....

خليت الجاي على النار وصعدت جبتهن ونزلت صبيته ورحت كعدت يمه وصرت افتح بيهن واشوف شنو المختلف بكل واحد بيهن بين مايكمل الجاي ...

ام جراح مكابلتنه وكاعده والشيخه تسبح وتباوع للتلفزيون وصفيه هم ...

الشيخ نزع شماغه وكف ردانه وعدل كعدته وكالي ..
- يلا ابلشي
- ماشي .. هسه اول شي راح ارسملك مخطط شنو نريد نسوي بالجديد حتى شغلنا يكون بنظام ونعرف وين وجهتنه
- يلا توكلي

اخذت دفتر بحضني وصرت ارسمله مخطط واكتب بي كل شي بالمعمل
وهو يباوعله بعدين كلتله ...
- هسه اشرحه الك
- اييه
- اول شي عدنا بصوره عامه اربع ابواب رئيسيه ومنها نتفرع ..
الاصول
المصروفات والتكاليف
الخصوم والالتزامات
الايرادات
- زين
- بالاصول راح نقسمها الى اثنين
اصول ثابته ومتداوله ..
بالثابته تصير بيهه • المبنى .. الي يتفرع الى ( بنايه الاداره العامه ، المخزن ، مكان العمل ، المطبخ )
• وسائل النقل .. هاي راح نفرع بيهه انواع سيارات النقل الي يملكها ابو حسن وشكد تنصرف عليها
• الاثاث المكتبي والتجيهزات ..
هنا نكتب بيهه كلشي يحتاجه المعمل من غراض وحتى الاوراق للحسابات والمواد الغذائيه الي يحتاجها المطبخ .. كل وحده نخصص الهه جدول

- زين عاشت يدك كملي
- نجي على الاصول المتداوله هاي مهمه كولش بيهه ..
• نقديه .. الي تنقسم الى ( صندوق ، بنك)
بالصندوق راح نقسمه الى حسب الايرادات الي تحصلهه من كل شي تبيعه
وهم نقسمه بعدين
والبنك .. هذا يصير خاص لايرادات الخارج ...
- كصدك الي بالشام استلمو احولهن للبنك
- ايي بالضبط .. خلي فلوسهن مضمومه ومنسيه حتى يفيدنك بالمستقبل تطور بيهن شغلك والي تربحه منا استخدمه
- انا بالاصل كنت عازلهن لكن فكره البنك حلوه نتفرغلها ان شاء الله
- اي كولش زين . . هسه نرجع نكمل
- ايه كملي
- اي كلنا عدنا الاصول المتداوله بيهه
النقديه وعدنا • عملاء وزبائن وهذوله هم نقسهم ( عملاء محليون ، عملاء بالخارج) .. هاي حتى تضل على اطلاع متواصل بشنو يصير عندك بالشام
وعدنا • مخزون .. هم نقسمه لكل نوع متوفر بالمعمل ..
و • حسابات انتقاليه مدينه
• حسابات وسيطه
وهذني بعدين نجيهن بالتفصيل
- زين وبعد
- هسه نجي للباب الثاني .. المصروفات والتكاليف .. هنا راح يكون اكثر شغلنا الي يحل المشكله .. كولشي ندقق عليه بالحسابات بهذني الدفاتر راح نرجع نسجله بالترتيب بهذا الباب ...
راح اقسمه ..
• تكلفه النشاط مثل ( مبيعات المخزون من كل نوع ، مردود المبيعات ، خصم مسموح بي ممكن نسوي بعدين )
• مصروفات عموميه واداريه .. تتضمن ( المصاريف الاداريه .. الي تتضمن
[ الرواتب والاجور ، بدلات العمل ، الحوافز ،المكافأت ]
والمصاريف الاعلانيه .. واي مصاريف اخرى )
• مصروفات الكهرباء والمي
• مصروفات الهاتف

- زين نجي عليهن الحين الاعلانيه وش لزومها ؟
- لا تنسى عندك خساره حالياً لازم نعوضها واول طرق رفع المبيعات هو الاعلان
- اييه لكن كيف اعمل اعلان لاثاث !
- نفكرلها بعدين بيهه الف طريقه بس هالخطوه ضروريه حتى تصعد مبيعاتك
- زين والمكافأت وش لزومها ماانا اعطي حوافز
- مو عندك مصممين
- ايه

- هذوله نكدر نخلي بينهم منافسه على ان يقدمون تصاميم وافكار جديده حتى نروج بيهه وكت الاعلان ويكون نصيب الاحسن منهم مكافأه حتى تكسبهم بيها كل مره وتخليهم يزيدون ابداع بدون ملل وتعب
- والله وجبتيها ياتينه
- هههه هسه بديت تطمئن مو
- ايييه والله هديت اعصابي وتطمن كلبي لو ضال بتفكيري تلكيني الحين ناسم مستشفى
- لا اسم الله .. نحلهه ان شاء الله ونسيطر ونرجع الربح ضعفين بس خليك متفائل
- اي بالله متفائل اكثر من اي وكت بعمري
- كولش زين
- اييه كملي يابه كملي
- هسه بقى عدنا بابين * الخصوم والالتزامات .. هاي تحتاج تركيز شويه
- ايه شو فيها
- تنقسم الى خصوم ثابته ومتداوله
الثابته بيها • حقوق ملكيه .. تتضمن
( رأس مال .. يعني مصدر مالك من كل شي ، ارباح وخسائر ، احتياطات )
- ايه زين
- والمتداوله تتضمن ( دائنون ، ذمم دائنه متنوعه ، حسابات انتقاليه دائنه ، اوراق دفع ) هاي هم من يجي وكتها نرتبها لان كولش مهمه هالنقاط
- زين وبعد
- واخر شي عدنا * الايرادات
هنا هم مهمه لان راح نكتبها بالتفصيل الممل .. تنقسم الى • مبيعات الي تتضمن( تكلفه مبيعات المخزون من كل نوع متوفر مثل اثاث المكتب او غرف النوم المفرده او الزوجيه والتصاميم الخاصه وطراز الاثاث وغيره )
وعدنا بعد • نشاط تجاري او مردودات المشتريات
هذني هنه كل الابواب وتقسيماتها واني رتبتهن بهالمخطط حتى هسه نكعد نرتبهن بالدفاتر
- ايه عشتي تقسيمك مرتب ومنظم بكل تفصيل .. لكن الحين انا مااظن راح نلاكي كل الي نحتاجه لالهن هين بهالدفاتر القديمه
- هو صح ما راح نلكاهن كلهن بس نرتب الي موجود عدنا وباجر عود نجيب الباقي من عنده نشوف شلون هو مدونهن
- واذا طلع ما مدونهن
- نخلي يكعد يحجيلنا شلون تصرف بيهن وشكد يدفع الهن
- ادخلو استجواب بكرا والله
- هههه متحمس مبين
- كثييير والله
- لعد يلا خلي نكتب مدام عدنا حماس
- يلا يابه يلا

صرت اني اخطط بالدفتر وهو يردلي شكتب وبعدين فتحنا الدفاتر القديمه وصرنا نفرز بجهه ونجمع والي نحتاجه منهن صرنا نكتبه بالحقل الي خصصنا اله بالجديد ..

وهيج اخذنا الليل احنه بس نكتب ونحسب ومطشرين اوراق يمنه .. ام جراح صعدت والشيخه وصفيه راحو نامو
وضلينه بس احنه سهرانين بين هالحسابات لحد ما صارت ساعه ٣ اني قفلت عيوني وظهري تكسر باوعتله هو هم نفس الشي جان يجر المخده حطهه جوه راسه وتمدد وكالي ..
- امشي جيبي بطانيه انا نعست ع الاخر
- اني هم بعد طفيت

مارد عليه وصار يغفي واني كمت جبتله بطانيه وغطيته وصرت الم بالاوراق وصفطتهن على جهه ورحت صعدت كبل نمت ..

وكعدت على صوت دك الباب باوعت كمت فتحته وافرك بعيوني .. شفت الشيخ واكف ويضحك كالي ...
- ها يولو ما تريكينا اليوم
- هلا شيخ بيش ساعه هسه
- بالسته يلا ورانه شغل
- اي هسه اجي
- تييينه صحصحي ادري ماشابعه نوم بعدك لكن تحمليني هاليومين
- لا شيخ تدلل هسه انزل
- يلا عجل انا اسبح بين ماتجهزي الاكل
- ماشي

راح واني اخذت ملابسي ونزلت خليت البيض ينسلك ورحت للحمام سبحت بسرعه بس حتى اتنشط وطلعت كملت تحضير الريوك واخذت الصينيه للهول ولكيته كاعد ويه الشيخه ...
اكلنا وهو يستعجلني اصعد وابدل
كملت غسلهن وصعدت بدلت ونزلتله وطلعنا بالطريق كلتله ..
- شيخ اريد اطلب منك شي
- ايه آمري
- اريد اني بنفسي ادور النقص الي جايين عليه
- ليه يعني ؟
- ارجوك خليني اني ادورهن يجوز الكه هم شي يفيدنا واحنه غافلين عنه ومانطلبه منه ويضيع علينه
- تينه احكيلي وش الي بالك ! انتي عندك شك بحمزه ؟
- يعني نص ونص
- تييينه ماارضاها انااا خليتك تشتغلي بدالو لانك بتدققي ازيد منو لكن هذا مايعني صاحبي مو كفو
- شيخ لعد اكو واحد ينسى هالكد تفاصيل
- انتي حكيتيها كبل جايز ماعندو خبره كافيه مثلك لكن هذا صاحبي من الصغر وانا اعرف طينتو واثق فيه كثير ومن يوم مافتحت هالمعمل هو معي ولهاليوم ما بانت منو زله .. لا تزعليني منك هيك
- ماشي حقك تضوج من هالحجي بس شمدريني خطر بالي اكو شي مضموم
هسه ما تليلي هالطلب ! بس هالمره شيخ فدوه
- زين زيين لكن بطلي هالتفكير ماارضاه انا
- اي ميخالف بس اني اريد اشوف كولشي يجوز اكو شغلات اني هم ناسيتهه
وتصير كدامي اذكرها واستفاد منها مو صح
- ايه صح
- لعد خليني ادور براحتي بدون ماتكوله
- رديناااااا
- شبيك شيخ حتى لا يضوج وياخذ على خاطره
- استغفر الله زين زيين
- عفيه انته ليش بسرعه تصير عصبي
- هههه تيينه بالله عليكي اسكتي
- اي ادري سكتت

وصلنا المعمل ورحنا للمكتب مال حمزه وكعدنا سلمنا عليه والشيخ شويه واخذه وطلعو بره وكالي ..
- ام غاليه انتظرينا هين مانتاخر ان شاء الله

اشرلي ان انطلق وبس راحو اني كمت سديت الباب شويه وصرت ادور بمكتبه بالمجرات وباوراقه ورحت للمكتبه مالته هم دورت وكل شويه جنت الكه شغله
بس اخر ما صدمني هو دفتر صغير مضموم باخر رف بالمكتبه جان هالدفتر
بي ..

مجموع ارباح كل شهر واكو مبلغ مأشر عليه بدائره وبصفه عمليات طرح وكل ناتج مأشر عليه بمربع
الي فهمته ان كل مبلغ جبير جان يطرح منه نفس المبلغ كل مره مثل الي يستقطع من الكل جزء بسيط يعادل ربع المبلغ المطروح منه ..
وكلبت باكثر الاوراق نفس العمليات ونفس المبلغ المستقطع ..
جريت ورقه وكتبتهن ع السريع الارقام كلهه ورجعت الدفتر لمكانه ورحت كعدت واحسب بالمبالغ المستقطعه
وضلت بالي هالسالفه كلت لازم افهم وين دتروح هالفلوس !!!!!!

من رجعو اني جنت صافنه والشيخ حتى يضيعهه صار يسأله على كم شغله ماموجوده بالدفتر ويطلب منه يحجيلنه عليهه وهو يحجي بس اني بنص تركيزي وياه ...

لحد ما رجعنا الشيخ سألني ..
- اييه ماحكيتيلي وش دحكتي
- لكيت الي جنه نريدهن مال النقل والمخازن
- ايه زين وبعد
- وهم كم شغله لكيت اكو وصولات قديمه مادري ليش كام بعد ميستخدم هالطريقه
- هاا من ايمتى اخر وصل
- من شهر الثاني العام
- هااا
- شنو صار عدكم شي من بعد هالتاريخ؟
- ايه ماتذكري سفري للشام اول مره كان هالوكت
- اييي صدك

باوعتله وهو عكد حواجبه ودار وجهه مني .. ماحجيت شي بعد كلت خلي هو بنفسه يحس بالي دااحس بي تجاه هالولد

وصلني للبيت وراح .. ضليت كاعده بغرفتي واباوع للارقام بهالورقه وافكر وين راحن ؟ ليش ضامهن وحد هيج ؟
وليش هالشهر بالذات توقف عن الوصولات؟ زين ليش ماطلعن النه من سألته عنهن ؟ ووين مسجلات البقيه القديمات ؟

كل هالاسئله ضلت بالي كل اليوم ولليل كعدت ويه الشيخ وكلتله ..
- شيخ بالي كم سؤال الك خلك تجاوبهن لو تعبان ؟
- لا احكي شو هنه
- اليوم شكد دورت مالكيت اي دفتر موثق بي اي شي عن الوصولات زين هنه مبين جان يستخدمهن من فتره طويله وين اختفن ! وليش ما موثقات !
- جايز عندو مكان ماتعرفيه
- اي هم صدك
- جايز عندو بالبيت لانهن قدامى مايلزمو يكونو عندو هين
- اي صح يجوز هو مسوي تصفيه ومبقي بس الضروري لهالسنه
- ايه وبكرا انا اسأل عنهن وادحك شو ردو
- ماشي على راحتك
- بعد وش ودك تسألي
- اريد اسأل عندكم فد شي تصرفوله مبلغ ٩٠،٠٠٠ دينار كل شهر ؟
- ٩٠ الف دينار!
- اي
- لا ماذكر هيك شي خاص نصرفلو هالمبلغ ..ليه هالسؤال!
- هيج اليوم جنت احسب كم شغله وشفت اكو نقص منها ٩٠ الف وماعرفت وين دتروح كلت اشوف خاف عدكم تبرعات او شي خاص بيهه
- لا ماعندنا هيك شي
- اي زين لعد اراجع حساباتي يجوز اكو شي غلطانه بي
- ايه راجعي راجعي

عفته صافن وكمت .. ردت اوصله بصوره غير مباشره ان اكو نقص ديصير وماله مصدر معين بلكي يفكر شويه بمثل الي افكره ...

هم رجعنا نكمل شغل بالليل وهو يردلي التواريخ والارقام واني اكتب..
وضلينه ننقل ونرتب بالحسابات لمده خمس ايام كل ليله نسهرلهن سوه
لحد الاسبوع الجديد اجاني الشيخ وكالي..

- تينه وش رايك تشتغلي معي بالمعمل ؟

صفنت عليه وكلتله ..
- صدك تحجي لو تتشاقه وياي
- اي بالله احجي الصدك
- ما توقعت ابد
-لييه ما تتوقعي ! عجل كيف بنخلص شغلنا ونمشي من جديد
- اي بس عبالي هيج يعني نشتغل بالبيت مثل كل يوميه
- لاا انا ودي تكوني معي هنيك واثنينا ندحك كلشي باصولو كيف بيتم وندقق فيه
- ماشي تدلل هاي اشتغل وياك صار
- اييه ومرتبك بيوصلك كبل الكل
- هههه صار عندي راتب اخيراً ههههه
- عجل اشغلك ببلاش يابه ! حكك هذا
- تسلم شيخ ماريد والله كافي اشوفك مرتاح وشغلك زين
- لاااااا مايجوز عجل انا من الاول حكيتلك تطلبي شي لو لكيتي حل وما طلبتي والحين بتشتغلي بدون راتب !
ماارضاهه والله
- شيخ احنه اتفقنه اذا نجحنا اطلب شي هسه بعدنا مانجحنا بعدنا بس دنرتب اصلا كولشي ممشتغلين لحد هسه
- ههههههه عجل بتاخذي مرتبك الحين والطلب وكت الاكي الربح زايد ورجع شغلنه احسن من اول
- اي ماشي هيج متفقين
- زين عجل من بكرا ماودي تأخير
-صار استاذ تدلل

ضحك وحجه للشيخه انو راح نشتغل سوه هي كيفت وكالتله قوم التعاونت ماذلت .. وام جراح رأساً من سمعت هالخبر انكلبت ملامحهه وضاجت
بس هو مااهتم وضل يأكدلي انام من وكت حتى نطلع بنشاط ..

وثاني يوم طلعنا من ساعه سبعه وخلاني بالمكتب ويه حمزه لان كالي مكتبه دائماً يجوه رياجيل وعمال بس هنا مايوصلون هواي ..

اني هم فرحت لان خلاني وياه حتى اكتشف براحتي كل شي ..

هو جان يشتغل على الدفاتر الي سويناهه الجديده واني اول يوم صرت بس اباوع لطريقه شغله ومنو يروح ويجي وشوكت يصير يدون الحسابات و وين يخلي المفاتيح وكل شي اباوعله .. وثاني يوم صرت اتناقش وياه بطريقه مااحسسه اني دادور وراه .. وهو كولش حذر بكل اجابه ويحجي من وره خشمه وياي ودائماً يتصرف كأني ماموجوده وياه ...

ابو جراح كل ساعه يجي يمي ويسألني شلونه الشغل شمحتاجه .. يدزلي جاي وكعك مرات .. مرات وكت الغدا يجي وياخذني لمكتبه ونكعد نتغدا سوه ويخليني اسولفله كلشي اشتغلناه ...

لاحظته صاير يسألني بدال حمزه رغم هو شغله الاساسي بس يحب يسمع مني بداله ..

صرنا نطلع مرات من المعمل ونروح لمكاتب جبيره ندور بيهه كتب اقتصاد ومحاسبه .. وهو اخذ كتب تطوير اعمال الاداره ..

وصار هالشهر بمثابه بناء اُسس جديد
وبدينا بالشهر الثاني على الاسس الي خليناها وهو مستمر يدقق بكل شي
وكل ليله نكعدلنه ساعتين نخطط بيهه
ونرتب شغلنا ونكرز حب .. وصرنا نكتب بدفتر ملاحظات .. الاخطاء الي جانت والي كدرنا نصلحهه والي بقت
وشنو بقالنه من خطوات حتى نحصل الربح الازيد ونعوض الخساره ...
وهالشي صرنا نتعب عليه هواي
كمنا نفتح حتى دفاتر قبل ٣سنين ونشوف شبيهه من اخطاء ..
بس الي تبين بهالدفاتر ان الشغل الي بيهه زين مقارنه باخر سنتين ..

صرنا نكعد بالليل وبايدنا الكتب الي اشتريناهه ونقرا بيهه وندون كل فقره تهمنه .. واني جانت مسؤوليتي كتب تخص الاعلان والترويج وزياده المبيعات
وهو كل شي يخص وظيفته كمدير ..

اني صرت استغل الفرصه لروحه حمزه من المكتب واصير ادور بدفتره الصغير
شنو ضايف بي واسجله عندي .. وبنهايه اليوم صرت اتحجج لابو جراح بأن اكو شغلات لازم اكتبهه حتى نتاخر واخلي حمزه يطلع واخذ شكو وصل موجود
استنسخه وارجعه بمكانه ...
وخليت عندي دفاتر جنت بغرفتي اسهر اكتب بيهه نفس الشي الي اكتبه بدفاتر المعمل بحيث صار عندي نسخه من كل شي عدنا هناك ..صح هواي تعبت بيهن ويه وجع راسي الي يرجع كل فتره بس
الشيخ يستاهل التعب ...

وبالشهر الثالث من شغلنه سوه .. بالليل
اجه ابو حسن يصيح ...
- الحك ياشييخ المعمل احترك

وطلع الشيخ يركض مفزوع واحنه ضلينه ندعي ما يتأذون ويرجعون بسلامه ..
وما رجع الشيخ الا وره صلاه الفجر

رجع تعبان وبس جاوبنا على كد كلمتين
- تلاحكنا للباكي

وراح صعد لغرفته واحنه هم رحنه نمنه لان كلنه ضلينه سهرانين وننتظر بي

ولحد الظهر اني جنت اسوي الغده وهو نزل كعد بالحديقه الوره .. رحتله وشفته يدخن ومهموم .. كلتله ...
- الله يساعدك شيخ
- هلا يابه
- اهم شي سلامتكم الراح من المعمل يتعوض ان شاء الله
- ايه ان شاء الله نعوضو لكن في شغلات ماترجع ياتينه
- ليش شيخ نكدر كل شي نرجعه
- تدرين وش الي احترك من المعمل
- اي شنو؟
- القاطع الي حدر مكتبك كلو من الطول للطول
- يلاا شيخ فدوا الك هو شبي هالقاطع غير المكتب والحمام وغرفه ومخزن صغير مو زين ما صار الحريق على مخازن الاثاث
- هو كان بادي ينزل لتحت وتلاحكنا عليه لكن ياتينه تعبنا كل هالشهور ضاع صار رماد

كعدت يمه وباوعتله وضحكت وكلتله
- ويروح نجيب الاحسن ايدي بايدك ونبني من الاول
- ما تكصرين لكن من وين نجيب الي مضى ياتينه من وييين
- اوعدك ارجعهن كلهن وبدون مساعده احد بسس ثق بيه وكافي تقهر بروحك عليهن والله مايسون
- تينه كيف مايسوو هاذي حسابات هاذي المعمل كلو من وين بتجيبها
- من عقلي كلهن مخزنات هناا لا تستهين بي شيخ كلتلك يرجعن
- وكاد تينه ؟
- وكاد والله وكاد ههه
- ههه ما ترهم على لسانك يولو لاتجربي
- هههههه شيخ فدوه هسه خلي بالك على المعمل ارجع رتبه واني عليه ارجعلك كل ورقه جانت بي بس ثق بيه وانتظر وتشوف

صفن بوجهي وكالي ..
- انا من يومي اثق فيكي وادري ماتخذليني
- لعد امشي وانته متطمن واحسب نفسك ما خسرت غير صبغ الحايط
- هههههه والله عليكي سوالف
-ايي هيج اضحك لعد لهدرجه بخيل تخاف على صبغ الحايط عيني كلهن بيومين يخلصن وميكلفن هواي قوطيه وحده تصبغ المكتب كله بيهه لاتخاف
- هههههههه يولووو اسكتي لا اصبغو لوجهك انتي بعد
- عمي راضين اصبغه بس لتضوج

ضحك وضل يباوعلي وبعدين كال ..
- يولو من يومك جيتك خير علينه لندحك هالمره وش خيرك بهالمصاب
- تشوف شلون اجيبلك ابو الخير ههههه
كوم هسه خلي نتغدا وعدل مزاجك وكلشي راح فدوا الك المهم سلامه مكتبك ههههه
- ههههه ايييه بس مكتبي سلم
- يرهب مال شيخ هذا حتى النار ما وصلته

ضحك واجه وياي جوه اني رحت صبيت الغدا وصفيه رتبت السفره وكعدنا تغدينا وهو زين مزاجه حتى الكل انتبهت عليه عبالهم راح يضل مقهور بس هو ضل يتشاقى ويه جراح وغاليه مكعدهم كل واحد من جهه وياكل لكمه والثانيه الهم
وشرب جاي وطلع ...

اني هم خلصت شغلي وصعدت تأكدت من كل الي ضامتهن عندي وكعدت كملت كم شغله .. وانطيت فلوس لجراح حتى يروح يجيبلي مثل هذني السجلات الكبار
وهو وره ساعه رجع جايبلياهن ، وكعدت اخططهن وارتبهن للشهر الجديد حتى
من نرجع نشتغل كلشي موجود ومنتاخر بيهن ...

ولليل من رجع كالي بديت اصبغ الحايط ويضحك وتشاقينه شويه وصعد ينام

وثاني يوم المغربيه واكفه احضر العشه
وما سمعت الا صوته وهو يصيحني من باب الربعه ،، رحتله ركض وشفته عصبي ...وكبل كالي ...
- احدري دحكي مصيبتنه النوب
- يا ستار ياربي خير
- استغفر الله .. تينه هالحين واحد من الرجال بديواني جاي يطالب بفلوسو
ويحكي انه دافع من كبل وماوصلو طلبو ومن سمع بالحريك
جاي يطالب بفلوسو ترجعلو
- شنو هالحجي منين هذا
- يولي خلك منو هالحين صاير هيك شي عندك ماخذه من حد دفعه اولى وماخرين طلبو !!!

- اي ناخذ دفعه اولى بس مسلمين كل الطلبات بالاخص هذوله اهل دفع مسبق نسلمهم قبل الكل
- عجل هالحيييين كيف اقنعووو
استغفرك ياااارب وش هالمصااايب
- كول يالله شيخ سهله هاي .. خلي يجي يحاجيني وافهم منه
- ول ... استغفر الله استغفر الله

طلع وهو يضرب بالباب وراح يمشي باعصابه للديوان واني ركض لبست الشال والعبايه واجتي الشيخه يمي بالربعه وحجيتلهه الصاير وهي تدعي تفرج هالشده ... وبعدين دخل الشيخ ومن شافني لابسه ومنتظرته كبل دخل الرجال
وصار واكف كدامه واني بصفه والرجال مدنك راسه ويحجي .. الشيخ كاله ...
- احكي يابه وش كضيتك
- شيخ قلتلك انا دافع من فتره نص مبلغ وموصي على غرفتين نوم واربع كراسي
وعبر الموعد ومااستلمتهم وانتظرت فوكو اربع ايام وهم ماكو خبر

اشرت للشيخ ان يقبل احاجي وهو قبل وكلتله ..
- يااخي شوكت التاريخ بالمضبوط بلا زحمه
- هاا هيك كبل اسبوعين
- زين وين الوصل حتى اعرف يانوع حضرتك موصي عليه من الغرف
- هاا الوصل ماعندي ناسيه بالبيت
- وانته كيف تجي تطالب بفلوسك ومامعك وصل !! تضحك علي انت !
تزيد مصابي مصابين !!
- شيييخ انا ماكدب عليك لو ماعندي طلب يمكم شلون اجي واطالب بفلوسو !!!
انا انتظرتهم اسبوعين وهنه كلهن اربع كراسي وغرفتين ومادبروهن وشلون تدبروهن الحين بعد الحريك ! بتاكلون حكنا هيك على هالرماد الي صفى
- يوووول تتشمت انتتت
- اهدا شيخ اهدا .. هسه يااخي انته لا تخاف احنه ماناكل حق احد انتظرني دقيقتين واذا الك حق عدنا تاخذه ان شاء الله

باوعلي الشيخ وعاكد حواجبه واني استأذنته وصعدت لغرفتي اخذت الدفتر والوصولات مال هذا الشهر ونزلتله

من شافهن الشيخ بيدي كبل بينت على وجهه ملامح الصدمه وضل فاتح عينه على وسعها ... وكفت كدامه وكلتله ..
- اي كولي الوصل باسم منو اني عندي كل مبيعات هالشهر هسه نطلع اسمك وتاخذ حقك وزياده تعويض تاخيرنا
- باسم ابو حامد

دورت بالوصولات ورجعت دورت بالدفتر والشيخ عينه بنص الاوراق ومن شاف الي شفته رأساً باوعلي .. ابتسمت وكلتله ..
- ماالك شي عدنا انته حتى مامشتري منا ولا مره
- شلووون مامشتري تأكدي زين انا من معاميلكم
- مااكو ولا مره ماخذ منا شي
- لا تخبلوني يابه انا كبل شهر اخذت منكم اثاث وكبلها بشهرين اخذت قنفات
عجل هذا هم ماكو

باوعلي الشيخ وضحك واني كلتله ..
- شفت حبل الجذب شلون كصير يابو حامد .. هاي بنفسك اعترفت بالي لازم احنه نحجي الك ... هاي مدون هنا مستلم طلبك لهالشهر والي قبله وانته جاي تريد فلوس الطلب نفسه الي مستلمه هالشهر وهذا وصل وهذا قيد باسمك بعد منو اله حق عند منو ؟
- انا ماكصدي على هالطلب كصدي عندي ثاني كبل اسبوعين هيك حكينا يابه
- ماكو اي طلب معلق كله مسلمينه الي عدنا طلب بعده ما مدفوع اجره هذا الي باقي مامسلميه وانته تكول دافع نص المبلغ مقدماً والي دافعين احنه مسلميهم لان احنه نوصي بطلبهم يتم قبل الكل
واذا بعد عندك شك بهالكلام جيب الوصل الي عندك بالبيت وتعال نتفاهم

ضل الرجال صافن ووجه احمر واني توقعت من الشيخ راح يلزمه يكطعه ويطرده بس هو صاح على ولد عمه اجوي وكفو بالباب وهو كاللهم ..
- اخذوه يابه

اخذوه وراحو واني ذبيت العبايه بعصبيه وكلتله ..
- شيخ يعني تخلي هيج يروح بهالسهوله
مشفته شلون جذاب الله اعلم شنو وراه من سالفه

اباوعله هو بس متجتف ويباوعلي ويضحك والشيخه تضحك عادكلتله ..
- شيييخ عفيه مو وكت هالبرود والضحك
روح شوفه سويله شي هدده خلي يحجي منين جاي وشعنده منو دزه وخلاه هيج يحجي عفييييه شبيك وياي مو دااحاجيك ليش اطنشني

هو ضحك بصوت اعلى وكال ...
- يمه وش رايك بالي افكر فيه الحين
- اييييه يايمه عين العكل تستاهلو بنيتنا

تقرب مني واني اباوعله واكوله ..
- شكو مافهمت .. عفيه لتسوي شغلات مافهمها احجيلي شنو تره ماضل عندي اعصاب
تقرب مني اكثر وكالي ..
- يولو اسكتي ماتعرفي تسكتتتي
- اي مو انته

بعدني ما مكمله حجيي وهو ......

#شقراء_بغداد

بارت_٤٠

- يولو اسكتي ماتعرفي تسكتتتي
- اي مو انته

ما خليتها تكمل حكيها وتكربت منها وصرت ادحك بعيونها وهي خنست
نزعت العكال عطيتو لامي واخذت اليشمغ خليتو على راسها وكضبت طرفو لفيتو على كتفها وهي تدحكلي وفاكه عينها ورافعه الحواجب وانا اتبسم على شكلها وامي هلهلت وهي تدحكلها بنفس الشكل .. بعدت عنها وهي حكت بصوت هادي ..
- عفيه هاي شنو مافهمت
- تينه ماتفهمي وش يعني وجود يشمغي على راسك !
- لا مافهمت والله
- احكيلها يمه
- بنيتي هذا يعني انك رفعتي راسو للشيخ وصرتي كد ثقتو وعند حسن ظنو فيكي

شهكت و خلت يدها على حلكها وضحكت
وصارت تدحكلي وعينها تلمع وبعدها حكتلي وهي تتكرب مني ..
- يعني صدك صدك هسه اني رفعه راسك شيخ !
- اييه عجل في حد يكدر عليها غيرك !!
- اوووي عفيه فاجأتني

ضحكت وراحت حضنت امي وهي تحكيلها ..
- شيخه ابنج مدللني دائماً
-هههههه تستاهلي يابنيتي عجل كل هالزين منك مايستاهل دلال ؟
- ايييي مامصدكه هيج اني صرت رفعه راسه اوووي حلو حلووو
- ههههههه افرحي يابنيتي افرحي رفعه راسنا كلنا يايمه انتي

صارت تحضن بيهه اقوى وهي تدحكلي وتبتسم وباينه دكه حنجها الي تكسمو نصين وسنانها الناعمه .. بعدت عنها وحكتلي وهي كاضبه طرف اليشمغ
- شيخ هذا يبقى الي لو ارجعلك اياه ؟
- هههه الك يابه الك صار حلالك بعد
- اييي شكررراً شكرراً
- هههه يولووو
- رجعنا يولو رجعنا عفيه لا تكولي اسكتي ماكدر هسه اسكت
- ههههههههههه احكي بس لا شكراً
- هههه مااشي

ضلت تضحك وتعدل باليشمغ على كتافها وانا عيني عليها ادحكها كيف حليانه فيه وهو منسدل على وجهها وكتافها ..
كدرت على الي ماكدرو عليه رجال
هالصغيرونه كدرت تحول نار الي حركت معملي لثلج بعيني وكدرت تلصم حلك كل شامت وماخلت علي نقطه ضعف يستغلها عدوي ...

انا على صفنتي فيها دحكتها اجتي حدري وحكتلي ...
- شيخ هسه هذا ليش خليته يروح والله ضلت ادك بكلبي هالسالفه
- يولوو هذا كلو خلك مهتلف مدفوع انا يمتى ما ودي اجيبو واجيب عشيرتو والعن ساس الي خلفو مايهمني انا كل همي صار فرحتي وعجبي فيكي
- هههههه مو كلتلك ثق بيه ماخذلك
- ايييه بالله ماخذلتيني ولا انا وكت سمعتو يحكي بالديوان وكدام الرجال اني ماكل حكو وهيك ناسي طلبو اجيت ومافي عكل براسي صرت افكر هذا راح يجر الكل بعدو وكلها تجي تتشمت وتطالب بفلوسها الصادك والجذاب ماينعرفو بعد لكنك نقذتيني والله .. والله رفعتي راسي كدام هالديره كلها لان من بعد الي صار محد منهم يسترجي يجي لهين ويحكي مثل هالحكي ويستغل ضعفي بهالمصاب

- لا والله ماخلي كلمه تمسك من عدو او صديق .. كلشي موثق عندي ماناسيه ولا تفصيل

- كفو والله .. الله يرحم شيبات الي ربتك
اخت رجال والله والنعم .. عزوه بيتي انتي ياتينه

- ههه شكراً

- ههههههه انا بعاود الديوان الحين ولليل نحكي زين .. لا تنامي لزوووم نحكي

- صار شيخ تدلل

حكيت لصفيه تجلبلي يشمغ ثاني .. لبستو وتركتهم ومشيت لديواني بصدر منشرح وراس مرفوع .. بهاليوم حسيت ان بظهري من يكاسمني مصاب الدنيا وهو الممنون ...

دحكت ان اهل هالرجل ماشين من هين
وانا تركتو لا ارسلت وراه ولا همني بعد دامو مشى متفشل من هين وتنكس راسو
هذا يكفي الحين مو وكت عشاير وكعدات
انا اريد اتفرغ لحتى اعاود معملي لاحسن من الاول ..

لليل فرغ الديوان وعاودت البيت دحكت تينه وامي كاعدات يخيطن وجراح وغاليه يلعبو بالحيوانات الصغار ...

كعدت حدرهم واخذت ابوسهم واشم فيهم
ورود كلبي هالاثنين معزتهم ماظن تجي مثلها بعد ...

التينه كامت جابتلي ماعون حلاوه وماعون فواكه وصرت اكل واحكيلها ..
- تينه ليه ماحكيتيلي عندك نسخ من كل شي
- الصراحه ردت اشوف شراح يصير من يعرفون ناسك ضاعت حسابات المعمل
- هههههه كصدك على حمزه انتي افهمك
- هههه شيخ كلبي مايرتاحله
- يولو خويي هذا لو انا مدحك منو الزله مااخليه بمعملي لحظه ..عجل انا هيك متهاون بحلالي !!
- على راحتك شيخ افهم هو صاحبك وعزيز عليك بس اني ما يطلع كدامي الا كل شي يخليني اشك بي
- وش الي هيك مخليكي واثقه بزلتو معي
- تجي وياي فوك اشوفك بعينك وانته احكم
- يلا امشي

مشيت معها وانا كلبي نغزني ماودي انها تطلع صادكه بحكيها ماودي اخسر صاحبي وكنت ادعي انها غلطانه بحكمها

دخلت غرفتها وكعدت على فراشها وهي صارت تطلع سجلات ودفتر صغير خلتو بايدي وحكتلي ...
- شوف شيخ هذني الدفاتر سويناهن بايدنا سوه ونعرف كل دينار بيهن منين اجه ووين راح مو
- اييه !
- زين انته شفت ارباح الشهر الثاني الي اشتغلنا بي سوه .. مو جانت اكثر من الي تحصلوه كل شهر ! رغم احنه بدينا من الصفر وعلى خساره هم
- ايه صح
- والشهر الثالث لو هسه نكعد نجمع كل الي حصلناه لحد قبل الحريق يطلعن بكد الي جنت تاخذهن كل شهر
- يعني تكصدي شو احكيلي من الاخر
- اقصد اكو فلوس جاي تنأخذ بدون متدري والي يتسجل بارقام اقل من الحقيقيه
- تيييينه هذا نكدر نسميه ظن لكن كيف نحكم بلايه دليل
- صح اني ماعندي دليل بس عندي شي فتح عيني على هالظن
- شو هو
- هالدفتر الي بايدك .. تلكه بي مبالغ ومنها مستقطع جزء هاي اني نقلتهن من دفتر صغير عنده جان حاطهن باخر رف بالمكتبه وكل يوميه ارجع اشوف شضايف بي ومالكاه ضايف شي من يوم جيتي بس الي قبل جان يكتبهن من صرت احسب حسب التاريخ الي مسجله
واطلع مجاميع الاشهر الكاهن نفس المبلغ الي ضال من الاستقطاع لذلك اني سألتك مره عدكم شي تدفعوله بشكل خاص ومتسجلوه ؟ وكلتلي لا ماعدنا .. بس جان موجود نفس هالارقام وعمليات الطرح بدفتر صغير عنده من اول مادورت بدون علمه اني لكيته وصرت اتفحصه كل يوم
شيخ ادري صعبه عليك تصدك هالشي بس اني مستحيل اجذب عليك بيوم .. تدري بيه انته عندي عزيز ومديونتلك بعمري ومالي غايه من اجذب عليك بهيج شي .. بس اخاف لو تضل غافل عن هالشي ويصير اكثر من الحريق الي صار

صفنت بحكيها وادحك بالدفتر واذكر الحسابات القديمه وكيف كل ما نتعمق ازيد نلاكي خلل فيها .. لكن هذا خويي
من صغرو معي وما خذلني بشي مجربو كثير واخاف لا احكم عليه هيك واتندم بحك خوتنه .. حكيتلها ...

- هالدفتر يضل معي وانا بفهم منو وين كانت تنصرف هالفلوس
- لا ما ينفع هيج
- ليييه !
- شيخ يعني قابل راح يكولك هيج وهيج بيهن اكيد راح تطلع بيهه جذبه
- تيييينه تعديتي حدك حكيتلك هذا خويي مايكذب علي ليه بتصري عليه كذاااب وخاين
- كل الي صار منو مسؤول بي !! الخساره والخربطه وضعف الحساب
متعمده شيخ والله متعمده .. ماكو واحد هاي شغلته من سنين يصير هيج يغل عنها ويخلي بشهر واحد مايرجعلك دينار من مبيعاتك هذا غش صدكني
- لااا لاااااا تينه مايجوز نحكم بدون ماندحك الحك وين وهذا مو غريب واحكم عليه هيك واطردو هذا خويي تفهمي انته وش معنى خويي انا وياه تكاسمنه الخبزه سوا مايغدر فيي هيك تينه افهم خوفك على مالي لكن مو من خويي لاتنسي لو كان له نيه شينه كان حصلها من سنين ليه هالحين يلا !!!!
- مادري شيخ بس مامرتاحه للي ديصير ابد .. انته بعد بكيفك اوزن الامور وشوف الخلل وين
- انا بدحك وش عندو وافهم منو انتي ريحي بالك وشيلي هالظنون .. وهالدفتر يضل معي .. تصبحي على خير
- تصبح على خير

طلعت من غرفتها وبالي الظنون تزيد واستغفر ربي واتعوذ من الشيطان
ونمت هالليله وانا افكر كيف اجزم الامر؟

اخذت هالاسبوع تصليح بالمعمل وترتيب المكتب من جديد وحمزه كان معاي خطوه بخطوه وكل ما نكعد سوا يحكيلي ..
- ضاعت الحسابات من يدنا رجعنا فلسنا ياخوي
وانا احكيلو..
- تهون ان شاء الله نعاود كل شي من جديد
- ماعرفت كيف صار هالحريك
- شراره كهربا شاعله ببدايه القاطع وماشيه على كلو
- الحمدلله مانزلت على المخازن كان رجنا فيها والله
- اي الحمدلله .. حمزه وش عندك مستندات بالبيت على شغلنا ؟ خارن شي هنيك؟
- لااا كلو هين ليه بخزن بالبيت
- عجل انته مو حكيتلي انك تصفي فيهون كل فتره وتاخذ القديم هنيك بالبيت وتخلي الجديد هين !
- اييييه كصدك على القديم اييه موجود موجود لكن هالسنتين انا ماخازن منو شي هنيك
- هاا يلاا نعوضها بترجعو انته وام غاليه وترتبوها من جديد
- بعد تشتغل معنا ! ظنيت جيتها وكتيه
- لااا تثبتت معنا بالشغل انا عجبني شغلها وحتى تتعاونو ونخلص بالعجل
- ايييه ان شاء الله

كل مااحكي معو مادحك شي يلفت انتباهي عليه ويخليني اغير ظني فيه
عاد تركت الامر وسلمتها بيد ربنا
لو في غدر بياخذ حكي الله ويكشفو ولو انا ظالمو بفكري بيغفرلي عنو ...

وعاودنا ترتيب المكتب باثاث وصبغ جديد وعاودت التينه للمكتب ... وباول يوم وكت جابت النسخ الي عندها ورتبتو بمكتبها دحكت حمزه تفاجىء وسألها ..
- من وين حصلتي هالسجلات !
- عندي نسخ عن كل شي ضامتهن للاحتياط
- من ياسجل ناسخه عندك
- القديم والجديد الي اشتغلناه كله
- والوصولات بعد !
- اي اكيد
- وليه انا مادري عنو بتغافليني وتنسخي !
- الشيخ منطيني صلاحيه
- وش فيها ياخوي بدل ما تفرح ان تعبكم رجع وماخرب منو شي !
- انا اكره الي يغافلني ويتصرف بدون علمي لاتنسى هذا كان شغلي انا وادحك منسوخ كلو عند غيري كيف ترضاهه
- هذا باعتبار مخزون عندي انا لانو في بيتي موجود لاتنسى ياخي ... والحين كفو شغلكم يلا

طلعت وتركتهم وكعدت افكر بالامر وبالتالي عذرتو لانو يعتبرها متطفله عليه ويكره هالشي ....

رجع شغلنا اعتيادي وكثفنا تعب وجهود فيه ودايماً الاكي التينه تحكيلي ..
- ما تجي تكعد يمي بالمكتب تره صرت اضوج وحدي وهذا صديقك يحسسني كاعده على كلبه
- هههههه يولو انتي الكل بالكل ماعليكي منه
- زين لعد ليش متجي يمي من ماكو يمك احد تعال
- ان شاء الله وكت الي افرغ فيه احدر لعندك

ودايماً يلهيني الشغل او رجال يكعدون معي او اضطر انزل للمخازن ادحك كم شغله ويكضي اليوم وانا مادحكها لحين مانعاود وتضل تتزعل وتحكي ليه مااجي لعندها ...

وبصباح الجمعه كنت معاود من المسجد
ودحكت سياره طابكه كدام الديوان مشيت وادحك مُلهم واكف ورابط الخروف بالشجره ويوكل فيه ... مشيت لعندو
- حيااااك الله يالنسيب
- اهلااااً ياشيخ والله انك على بالي دايماً واليوم جيتي خصوصي عليك
- كل الهلا والرحب ياخوي تفضل تفضل ليه واكف بره
- ضليت انتظرك واشم هوا بين ماترجع

دخلنا وبعد ماضيفناه الكهوه حكالي ..
- ياشيخ اليوم انا جيت اوفي نذر هين
- خير خير لكن نذر شو ؟
- شييخ انا حصير اب ولدي بالطريك ياشيخ
- ياهالساعه المباركه والله انك فرحتني

اجه لعندي وتحاضنا وهو عينو تلمع ويحكيلي ...
- انا كنت عازم النيه لو اصير اب ويكتبها ربي لي من حرمه تسر خاطري
اخذ ذبيحه لاهلها وهاي انا جبتها لك شتسوي بيها سوي تضيفها لحلالكم توزعها للفقرا تسووها غدا كييييفكم
- هههههههههه يول تهدا تهدا
- ااااااخ ياشيخ لو تدري بكلبي الي يرفرف شلون حاله تعذر خبصتي هاذي
وطلعتي من كبل الفجر متعني الك

ادحكلو واضحك وهو صار يتمشى بالديوان ويحكيلي ...
- انته بحسبه اخوي وصاحبي يشهد الله اعزك اكثر من اخواني .
- هههه لين عطيناك المره هيك عزيتنا
- ايييي شيخ يامره كول انطيتني باب من الجنه .. جمبده هاي جمبده مو حي الله مره
- هااا والنعم والله اخيتي كأنها حككت مرادك من هالزواج
- اي بالله سوته وسوت الي اكبر منه
خويه انا كل يوم اطلع لشغلي ومسلمها البيت والي بي .. ارجع الكه البيت ريحته تنعش الاكل من احسنه متحضر ملابسي محضره بالحمام غرفتي تسر العين
وامي ياشيخ امي الكاها تضحك وسابحه ومتغديه قبلنا كلنا وغرفتها نظيفه واختي الصغيره ماعليها بشي من يوم دخلت مناسك بيتنا هي همها بس دراستها
ومصاحبتها مثل اخيتها .. وكت الليل ما تنام كل شوي رايحه خاف تكشفت خاف صخنت خاف الصوبه خلصت نفط وهي بغرفتها وهاي انا اركض وياها على امي نتطمن عليها .. وتدري وره شهرين من زواجنا شنو صار ؟

- ايه ؟

- غيرت الفرش هي من كيفها بدون علمي .. كنت مناوب بالمستشفى اربع ايام ورجعت لكيت الفرش مال بيت كلو متغير وبعد يومين كالتلي اروح اجيب قنفات موصين عليه يجوز هسه يكملن
ومن سألتها شكد صرفت عليهن حتى انطيها ماقبلت تكلي .. تدفعلي فلوس فراش بيتي ! ... ومن اسألها منين جابت فلوسهن ؟ تكلي التدبير والتفكير ...
صفنتني عليها والله ... تخليني ماعرف شاحاجيها ... تخيل شيخ انا ارجع من الصيدليه العصر حتى ارتاح واطلع لمناوبه الليل الاكيها كاعده ويه امي وتمشطلها شعرها وامي تحجيلها على ايام كبل وهي تسمع باهتمام وتضحك لضحكها .. ماحسيتها متصنعه محبتها حسيتها من صدك حاسبتها امها مثل ما وصيتها ... وحتى اظافرها تقرضهن الها وتعجن لها الحنه بالليل تغافلني وتروح تحني رجليها ومن اروح ادحكها واسالها ليش تكلي خطيه رجولها بيهه فطور وتحركها ... تخيل لهالدرجه هي مهتمه بيها .. تدري انا كل يوم اصلي ركعتين شكر لاني لاكيتك وطلبت منك المره
اااخ شحجيلك عنها وعن حياتي بعدها شحجي ياشيخ شحجي

كان يحكي بالعجل وهو يضحك ويه كل سالفه وماهدا يروح ويجي بالديوان ويفرك بوجهو وهو يتبسم وتالي حكالي ..

- كلشي لكيت وياها الراحه والاهتمام والامان وحتى كلبي هم غيرته خلته عاشك رجعتني ابن العشرين بحبها مصفنتني ليل نهار مااشوف غيرها وتعيني عليها شتكول شتطلب حاضر يتلبى وهسه تجيبلي ولد او بنيه ويصير بهالعمر عندي جاهل اتونس وياه واربي على ايدي

صار شكلو كأنو حالم وبعدها اجه تمدد وحكالي وهو يبتسم ..
- اصير اب ياشيخ بعد هالصبر اصير اب وحصلت كل الحلمت بي ... يمكن يجيني ولد اسميه مؤيد واذا بنيه اسميها حبيبه
لا لا خاف تزعل متريد تصير حبيبه عندي غيرها اسميها ورده اييي ورده
ورده ملهم .. اااه خليني انام واحلم ياشيخ لا تكعدني

ضحكت من كل كلبي عليه وعفته ينام وطلعت بره اتمشى يالحديقه وادحك بالسما وسألت نفسي ..
- هالعشك هيك يجنن الرجل ! ويخليه يحلم وهو صاحي !
عجل انا ليه ماحصلت العشك بكل عمري ؟؟ صرت اب لولدين وبنت وما همت فيهم هيك وهذا بعدو ولدو نطفه وهيك طاير من كاعو !!
عجل انا محصل كل الي هو تمناه ببيتو وزوجتو لكن ما دحكو هيك يسر الكلب والخاطر ولا هو وصل للعشك الي هو عايشو الحين !! عجل وش سرو ؟؟

مشيت للبيت وسألت عن مناسك حكولي مانها هين يعني هذا المصكوع جاي لوحدو لحتى يجيب الذبيحه والله انه ماعندو عكل طالع من لفجريه وحدو لهين اول ماسامع انه بيصير اب !!!
حلال عليكي ياخيتي بهالعاشك ...

للظهر تغدا ومشى لاهلو وحكالي وكت يولد ابنو يجيبو ويجي لهين ...

وانا ضلت ببالي ضحكتو ولمعه عينو وهو يحكي عنها بهالحماس تمنيت لو الاكي هالشعور مره وحده في بيتي وارد ليه هيك متلهف مو متكسر من تعب اليوم وادور المخده حتى انام ...

ثاني يوم العصر ضافو في ديواني ولد عمي من بعيد وعندهم مشكله مع نسابتهم
واحد من ولدهم اسمو هلاهل هذا المكاون يمشي بدمو .. من كلمتين مع حرمتو ضاربها وضارب ولدو وطاردهم لبيت اهلها ومن مدحكيها اهلها هالشكل اخوانها متكاونين مع هلال وهو كاسر خشمو لواحد من اخوتها والثاني مفشخ راسو والحين صارت بينهم فصول وطلاك وهو يصيح حرمتي ماتركها ولزوم تعاود لبيتي واهلها يصيحون ولدنا مايهونون علينا والفصل لزوم يصير والحرمه ماتعاود بعد ... وهين كعدنا لحتى نتفاهم
وواحد من اعمامي حكالي انهم طالبين مبلغ فصل كبير و ودهم الفصل للولد ويردون الحرمه مع ولدها لهلال بشريطه يبني لها بيت والا يرفعو عليه دعوه بمحكمه على تهجمو على حرمتو واذاها واذى ولدو .. وودهم يسدوها بالخير ولزوم يوافقو على شروطهم وجايين لحتى اساعدهم يا بالبيت يا بالفصل

تلاغينا كثير وبالتالي صفت ان انطي من كاعي لهلال اذا ما كدرت على الفلوس لانهم فلاليح وماعندهم هالكثير الي يكدرون فيه على الاثنين ...

حكيتلهم بكرا بردلهم خبر ونتفاهم وعاودت البيت وراسي موجر نار
عجل انا المكاون ومصايب العالم تضل براسي للممات ....

ضليت كاعد بالحديقه وره البيت وادخن والدنيا طالعه من عيني مالي خلك شي
هالفتره تعب وضغط بالشغل وقلق على المعمل وكملها هالفصول الي مادري من وين تطلعلي وتعال لزوم اعطيه تعبي لحتى هو يرتاح ماهي بهينه ...

حسيت على يد جرت الجكاره من يدي
دحكتها تينه واكفهزحدري وعاكده الحواجب حكيتلها ...
- يولوو شجابك هين
- صارلي ساعه واكفه هنا ماحسيت عليه
-لاا وش هذا الي ساويتيه كيف تجريها من يدي !!!
- لعد اخليك تضل تحرك بنفسك بيهه هاي على كعده الوحده نفضت باكيت حتى ماتلحك تتنفس هالهوا كله دخان دخاان كافي راح تختنك
- يووولييي مالي خلك تراا لا تزنين براسي انا روحي ماطايكهه

كعدت حدري وخلت يدها تحت خدها وتدحكلي وانا ججريت جكاره ثانيه وردت اشعلها وهي حكتلي ...
- هسه ع الاقل خلي اروح ودخن ماحب ريحتهه تخنكني
- رووحي هالحين انا حاكيلك اكعدي وكابليني
- شبيك شيخ شو كلش اعصاب اليوم
- مالي خلك تينه لا تلحي معي
- لاااا لعد والله ماعوفك الا تحجيلي شبيك ليش هيج تعبان

صرت اطنشهه وادخن وهي تحكي ...
- باوعلي شيخ مو احاجيك عفيه شبيك
خويه شصاير وياك منو هيج مضوجك
صاير شي بالشغل ! عفيه حاجيني لاتخوفني عليك هيج

دحكتلها وهي حكتلي ...
- شاركني همك صاحبي يلا خلي افهم شبيك

صرت احكيلها المشكله الي عندي بالديوان وهي اخذتلها صفنه وتالي حكيتلها..
- دحكتي كيف انها بتحرك الكلب هالكاع تعبي وارثي كيف اعطيها لغريب !!! وانا الحين خسران كثير على المعمل ماودي ازيد خساره واصفر كل فلس عندي والي انا بعطيه بلا عكل يومين ويرد يتكاون مع غيرو هذا المكاون يمشي بدمو مايعرف يتهدا ويوزن عكلو مايستاهل هالفلس الي عندي لا والله

دحكتلي بهداوه وحكتلي ..
- واذا كلتلك تربح !
- اربح كيف ؟!
- سامع بشي اسمه بنك الخدمه !
- لا وش هذا
- هذا يعني انك تجمع رصيد للمستقبل بس مو فلوس لا مواقف واشخاص
مثلاً اليوم انته سويت عمل خير لفلان باجر تحتاج شي تكدر تستعين بي وهو يلبيك لانه مديون الك لفلان عمل وهيج بمرور الزمن انته تجمع بالمواقف رصيد ببنك الخدمه لوكت الشده .. تلاكيها من عم او خال صديق او غريب ماتعرف الدنيا شتخليك تعتاز وهذا رصيد امان بين ناسك .. لذلك من رأيي تنطي فلوس وتمشي وياهم لشيخهم وتهدي النفوس اكيد تدخلك راح يشيل واحد من الشروط
وهيج راح تكسب الطرفين واثنينهم يبقون مدينين الك ويحترموك طول العمر

تبسمت على فكرها وصفنت عليها وهي كملت حكيها ...
- اما لو شلت ايدك من السالفه راح تخسرهم وتخسر ثقه غير اشخاص لو يفكرون يلتجئون الك بشدتهم مثل هذوله
وهاي الخساره ماتجيبهه بعدين بالفلوس هاي ماتتصلح الثقه لو راحت والقرار الك

- يولو انتي دارسه علم اجتماع او سياسه او هيك شي
- ههههه لاا والله غير الرياضيات كلشي مدرست
- عجل كيف عندك وسيله الاقناع هاذي والتفكير المحبوك هيك
- هههه من الله
- والله انك تصلحي اكعدك حدري بصدر الديوان وكت اتعب انتي تناوبي عني
- دائماً اني بظهرك شيخ وان شاء الله متحتاجني بشي انته تكدر على كلشي بس هسه لانك تعبان من ضغوط هالايام ونفسيتك ممرتاحه وعصبي فاستصعبت الموضوع ولا هو بسيط عندك لو بوكت هدوئك

دحكتلها وضحكت وهي حكتلي ..
- هسه شنو قررت ؟
- ادفع الفلوس عجل شعندي غيرها

همه مرجعهم لي من يكفلهم غيري
- طبعاً شعدهم غيرك شيخ ... زين هسه اني اريد منك شي
- ايه وش هو
- قلل تدخين .. والله جنت واكفه وراك واباوعلك تطفي وحده وتاخذ الثانيه هاي شيضل برئتك هيج حركتها حرك
- يولو انا وكت اعصب مايهديني غيرها هاذي صاحبتي من اول شبابي
- صاحبه سوء هاي تخرب صحتك وتخنكك
- عجل لو ما مدخنها الحين تلاكيني اعارك ذبان وجهي حتى انتي ماتسلمي مني
- ههههه عمي راضي والله بس لتضل تدخن هيج والله انقهر من اشوفك تحرك بنفسك بهالدخان اكول حرام هالهيبه والجمال والشخصيه كلها تنحرك بهالدخان المسموم
- هههه ما تحاولي ماكدر استغني عنها
- زين انطيك الها بديل !
- كيف ؟؟
- مو تصير عصبي وتريد شي يهديك
-ايه
- تعالي واني اخليك تهدأ بسالفه منا وضحكه منا واخليك تنسى حاجتك للجكاير

دحكتلها وصفنت مع نفسي اسأل ..
كدرت على الكثير هي معي تراها تكدر على ادماني للتدخين ؟

- هاا شنو رأيك جرب ماتخسر شي جربني مره وحده واذا ماكدرت عليها ارجع دخن براحتك
- زين اجرب لكن لو ماكدرتي ماتفتحي سيره التدخين بعد وتتحملين ادخن حدرك وماتحكي وتنطي كل شوي وتعوضيني بنوع حلى مامجربو من كبل
- هههه ماااشي كلهن سهلات تدلل
- زين عجل الحين روحي نامي ارتاحي لا يضل بالك معي
- وانته ماتنام ؟
- راسي مصدع وبيني وبينك مالي نفس اصعد لغرفتي لو نعست انام هين بالربعه
- لااا ليش هيج اجيبلك دوا
- لااا ما ودي انا عمري ماماخذلي حبايه دوا لا تعوديني يولو
- ياعيني الله يديملك هالصحه لعد اصعد نام بغرفتي اني اليوم اريد انام يم غاليه
ونزلت علمودها
- هاا شعجب
- اشتاقلها وهي متريدني مجلبه بجراح لا بالنهار اشوفهه وبالليل بس تلعب وياه وتاليهه متنام اذا مو بصفه كلت اجي انام يمهه اذا هي متجيني هههه
- ههههه والله وبعدها شبرين ومركضتك وراها عجل بكبرها وش تسوي فيكي
- الي يعجبها شعندي غيرها هاي الغاليه هاي تدلل من يومها ليوم مماتي
- الله يحفظك الها
- ويحفظك شيخ .. هسه اذا تريد اصعد نام فوك براحتك حتى محد يزعجك الصبح واني هنا رايحه انام
-زين زين
- تصبح على خير شيخ
- تلاكي الخير

راحت هي وانا اجيت اخذلي جكاره وتذكرت حكيها وقلت خليني اجرب عسى وان على يدها اتركها هي مضارها اكثر من نفعها ... خليت الباكيت بجيبي وصعدت لغرفتها ....

دخلتها هواها بارد مفتحه فيها الشبابيك
والبردات خفيفه تتمايل .. مشيت سديت الشباك والبردات ونزعت دشداشتي ودحكت صور بأطار على جانبين السرير
وحده كانت لاهلها اخوتها وابوها ودحكتها هي بنصهم تضحك وكصايبها على الجهتين ضحكت لشكلها .. والثانيه كانت صوره لها الحين مع غاليه كأنها ماخذتها وكت حنه مناسك عرفتها من لبسها ...

طفيت الضوا وتمددت بفراشها وشميت بمخدتها نفس الريحه الي اشمها من مشطها ومن وجودها حدري للحين ماعرفت وش تخلي بشعرها وهيك ريحتو هاديه ومالها مثيل ...
غفيت على هالهدوء والبروده وحتى وجع راسي نسيتو وما كعدت الا على صوتها حدري دحكتها بتك عين وهي تحكيلي ..
- شيخ ورانا شغل بالمعمل يلا كوم
- يا ساعه الحين
- سبعه
- فاتتني الصلاه

حفزت من الفراش وانا امد جسمي وحكيتلها ...
- يولو كيف نمت انا هيك ونسيت صلاتي وماصحيت على الاذان
- غير جنت تعبان ونمت نسيت كلشي
- غرفتك هاديه مثلك عجل انا غرفتي ليه مافيها هالهدوء هيك
- ههه تريد نتبادل
- لاااا خليها هيك وكت الحاجه استعيرها منك
- كدامك شيخ تدلل

لبست ونزلت للحمام غسلت وصرت اعدل اليشمغ وطلعنا للمعمل ومشينا هيك هالايام انا مسلمها باكيتي وامشي لعندها كل ساعه احكيلها يلا وكت التدخين عوضي وهي تصير تحكيلي من مدري وين سوالف تنسيني فيها وش اجيت اطلب
وبالليل هيك نكعد نفرش هالكتب ونخلي الحب بينه نكرز ونحكي وندرسو لهالكتاب ونسجل منو الي يفيدنا وصرنا نبحث بخطط اعلان ونكعد نفكرلها بالساعات وانا اضل اضحك على كل افكارها ومارضى بوحده منهم ..

انا اخذت على طبعها وصرت امون عليها ووكت احكي معها كانها واحد من صحباني هيك ادوس معهم بالحكي وهي تضحك وتزيد عليه بعد ....

وباخر اسبوع من شهر ال ١٢ الصبح كنا طالعين للمعمل وهي حكتلي ..
- شيخ عيني اليوم تفرغلي شويه من وكت اريد اطلع
- وييين تطلعي يابه
- اريد اشتري لغاليه لعابه جبيره هيج كون تطلع بطولها او اطول منها
- هههههه وين نلاكيها هاذي وش لزومها
- اريدها ترجع تنام يمي ضجت وحدي وهي ماترضى تصعد اله جراح متعوده تضل مجلبه بهدومه من تنام واني احس مسويه غرفه الشيخه هوسه من كد الفراش كل يوميه نفرش ونشيل وهي هم متاخذ راحتهه بالصلاه تضطر تطلع بره الغرفه خطيه مخربين راحتهه
- اي والله حك عجل انتي وبنتك تاركات غرفه الفوك ونايمات عند امي بهالغرفه الصغيره لا ولدي خلص منكن ولا امي
- هههههه هسه عيني اخلصهم بس خلي الكه هاللعابه بلكي من تشوفها تقتنع وتنام فوك
- يلااا زين لخاااطر ولدي انا بطلعك اليوم وندورها
- هااا ترا مانطيك غرفتي بعد واكطع عليك الحلويات
- اكطع عليكي الراتب

- هاي شلون سالفه هم شيخ وهم مدير شورطني اني

ضلينه نضحك ونحكي لحين ماوصلنا وكلمن مشى لشغلو ....

وانا بالعجل خلصت شغلي وبالي عليها ودي نلحك نطلع كبل مايصير الظهر وتعزل الاسواك ورحت لعند المكتب ودحكت حمزه واكف كدامها وظهرو للباب وكفت وصرت اسمعو يحكيلها ..
- كم مره نبهت عليكي اطلعي بالخير من هين انتي ماتفهمي الا احركك معو ومع هالخشب
- ماتخوفني انته .. وخر من طريقي اليوم مااسكت عليك بعد والي غفل عنه الشيخ اني واعيه عليه وماخليك تكمل بلعبتك
- اكعددددددي هييين والااا قسم بالله اذبحك واذبحو

دخلت عليه وكضبتو من ثوبو ودرتو علي وهو فك حلكو وانا مبل ضربتو على وجهو وصرت اضرب فيه بحقد لكنه غدرتي بضربه على ركبتي خلت توازني وفلتو من يدي وعاودت وكفت ضربني على فكي وبعدها انا ضربتو وهو دفعني برجلو وصارت رجعتي على مكتبها وظهري عليه جريت التلفون لحتى اطلب الحراس يصعدو لاننا وكفنا مكاون ومااسمع الا صرخه تينه وهي تحكي اسمي ...
- خااااالد

سمعتو ومن بعدها حسيت بجسمها على ظهري ويدها تعصر بثوبي من عند بطني
وشهكتها حسيتها سرت على كل جسمي من كثر ماهي ملزكه جسمها فيي ...
درت وجهي ودحكتو طلع يركض وانا اندرت وكضبتها ودحكت السكين بخاصرتها وهي تعصر بعينها بالم
رجلي بهاللحظه ماحملتني وكعدت على ركبي وهي بحضني ادحكلها وهي تبتسم
ماعرفت احكي حرف واحد وكلي ارجف على حالها هيك ... كان دمها ينزل على يدي وثوبي والارض تغركت فيه مديت يدي على جرحها وسحبت منو السكين
وهي شهكت نفس ثاني بنفس هذيك الشهكه .... بلحظتها انا حضنت راسها
وصرخت باسمها وصرت احكيلها ...
- ضليي صاحيه معي لا تغمضي عينك لا تضعفي تييينه خلك كويه الحين اخذك المستشفى

كنت امسح على وجهها واحاكيها وهي كضبت ركبتي بطرف اصابعها وحكتلي وهي تبتسم ..
- رديتلك ديني شيخ
- يووووول اييي ديييين هذااااا لا تخليني اخسسسرك تينه رجيييتك ضلي معي تحملي شوي تحملي

لفيت يدها على ركبتي وشلتها وطلعت اركض فيها واصيح على كل من كدامي يطلع يفتح السياره وهي سحبتني من ركبتي وخلتني انتبه عليها وحكتلي ..
- غاليه الك امانتك

صارت تغمض عينها وترجع تفتحها وانا اصيح عليها ان تضل صاحيه معي ولحين ماعبرت باب الرئيس هي وكعت يدها من ركبتي وغميت .......

يتبع..

حبي هو أكثر القصص الاسماء مستعارة
تحفظا للخصوصيه☺️🌸

#ملوكه

عيوني للاستخارة أنواع أكو بالقران؛ واكو قرعة واكو بالسبحة وبي همين غسل ودعاء
تابعي هالفيديو شرح مفهوم عنه 👇🏻🥰ومفصل

#ملوكه

غُسل الاستخارة و أقسام الاستخارة - السيد صباح شبر
https://youtu.be/IgRxTUV0JTE