- اني شسوي واجازيك على هالاهتمام والامان كله
- عيشي براحه هذا جزاي
- ماادري ليش دااحس الله عوضني بيك عن هواي اشياء وكلها وجعت كلبي بس انته دالكاك مثل بلسم الهن

صفنت عليها وهي تحكي وبعدها قالتلي..
- اني عندي اخوه اثنين بس بعمرهم ماكدرو ينطوني ربع احساس الامان الي حسيته بخوتك شيخ
- عجل الرجال وش لزومها لو ماكدرو يوفرو الامان لحريمهم
- من زينه الرجال انته شيخنا

تبسمت وهي تدحكلي ومن بعدها حكتلي
- اطفي الضوا لو تضوج ؟
-لاا اطفي اطفي

طفتو واجتي انجضعت وتغطت وضلينه ساكتين واخذتنا النومه للصبح كعدت على صوت حركتها بالغرفه ودحكتها واكفه وتمشط بشعرها دحكتلي وقالت..
- صباح الخير شيخنا
- صباح النور ..من ايمتى كعدتي
-من قبل نص ساعه تقريباً
- هاا عجل كم لساعه الحين
- سبعه وربع
- مااضل وكت والله وخذتنا النومه

كمت للحمام تسبحت وتوضيت طلعت صليت وتحضرنا ونزلنا طلعنه تريكنا وشربنا الجاي
المهيل بهالصباح وبعدها مشينا للعنوان وصرنا ننتظر دورنا .. لحين مادخلنه لعندهم
وتسالمنا وكعدنا كدام اللجنه الي كانت متكونه من ٣ رجال وحرمه كبيره بالعمر ..
واحد من الرجال حكالنا...
- عيني هنا بالملف التقصير من حضرتكم واضح جداً ومذكور ان اكو لجنه طالعه للبيت المذكور عنوانه هنا وماكو اي احد يرد عليهم
وهذا الشي متكرر ٣مرات يعني تسجلت ضدكم نقطه بخصوص هالوضع

دحكتلها متوتره ووجها مصفر وانا احاول اطمنها لكنها متخوفه كثير .. حكيتلو ...
- يااستاذ العنوان تغير والحين احنه ساكنين الانبار والظرف ماسمح لنا برجعه لبغداد الا هاليومين
- كلشي اله اصوله كان المفروض تدزون تبليغ بعذر او طلب اجازه لمده معينه او الابلاغ بالوضع الي تحتم عليكم بهالتاخير
المهم هسه نسمع من حضرتها شنو السبب وراء كل هالتقصير مع الدوله

دحكتلها واشرتلها تحكي وهي اخذت نفس وحكتلو ...
- تمرضت من فتره بسبب وفاه اهلي ومن بعدها صارتلي مشاكل جبيره خلتني انفصل عن زوجي وارجع اعيش ويه اخوتي
- يعني هسه انتي مطلقه
- لا ماكدرت اطلك لان حامل
- واخوتج بالانبار مو
-اي
- يعني بهالحال اني شراح احكم اذا انتي حامل !!!!!

تدخلت الحرمه وحكت ...
- بما انها امرأه وحامل وبعدها صغيره فتسقط عنها عقوبه الحبس الافضل ان ننتقل للبنود الاخرى

ضلو يدحكولنا ويتشاورون بينهم وبعدها
رجع الرجل حكالنا....
- بعد النظر بموضوع حضرتج ومراعاة
لوضعك الصحي قررت اللجنه اسقاط الاحكام الغير ملائمه لظرفك الحالي والاكتفاء بفرض
عقوبه تمنعك من مزاوله العمل بالدوائر الحكوميه لمده لاتقل عن سنتين

رادت تحكي وتعترض وانا وكفتها وهي دمعت عينها وانا اشرلها تسكت والرجل كمل حكيو ...
- احنه لازم نكتب بحقك قرار مانكدر نترك الموضوع بدون عقوبه هذا عليه تفتيش ومسائلات قانونيه وهالسنتين انتي تحتاجيها للتفرغ لطفلج اشكري ربج على هالحكم البسيط مقارنه بغيرج

وكفنا وحكيتلهم ..
- شكراً لتفهمكم وضعنا يابه وجزاكم الله خير

اخذتها وطلعنه وبعد مابعدنا من الناس حكيتلها...
- يوووولو انا شووصيتك ليه البكي ليييه مادحكتي الرجل وش يقلك ماعرفتي تبطلي بكي
- عوفني عوفني

راحت مشت بسرعه وانا استغفرت ربي وتبعتها ودحكتها كعدت بحديقه وحاطه راسها بين يدها وتبكي .. وكفت حدرها وقلتلها...

- دحكي بالله لو مابطلتي بكي لاكسرو لراسك يكفيك عاد تبكين على شو هاذي الحمدلله خلصنه ومابه شي مو زين حصل
- شنو مو زين شنوو .. هاي اني ضاع تعبي ودراستي واحلامي كلها .. ما تحس بيه لان ماشايف شكد تعبت وسهرت حتى انجح واصنع لنفسي حياه ومستقبل زين
- اييييه وش الي خربها لحياتك الحين وش فيه
- مايوظفىني بعد محد يقبل يوظفني من يقرون اني متعاقبه بفصل سنتين ... ماكدر بعد اشتغل اي شي ولا راح اكدر ارجع اعتمد على نفسي واسس حياتي من جديد
- انتي من كل عكلك كاعده الحين وتبكين على الشغل !!! يولو من حكالك انا برضى تشتغلي ! انتي مابحاجه الوظيفه كلهاااا
ماتلزمك يولي لا تصرعين راسي ببكيك
افهمي عاد
- افهمني انته ارجووك اني ماعرف اتكل على احد بعيشتي ومصرفي امووت ماكدر تفهم شنو ماااكدر ماتحمل انته تضل تصرف عليه كل العمر
- تحمليها وترضين غصب عنك عجل انا زلمه البيت ولا رجل كرسي بخليكي تمشي تشتغلي بين هالغرب ... امشي كدامي يلاا
وبطلي بكي ومناحه على هالوظيفه الي مابتجيب لكمه العشى بالله ان ماسكتي الحين ومشيتي لاطلع غضبي كلو عليكي امشي لاتتعبيني بعنادك هاي خلصنه من السالفه الحمدلله الحين انتي حره احمدي ربك وكبري عكلك

مسحت دمعها ومشت حدري وهي عافسه الوجه ... صعدنا بالسياره وهي ساكته وعاكده الحواجب ومتكتفه وبعدها قلتلي ...
- ماريد ارجع هسه
-ليه
- اريد اروح لبيت اهلي
.
⭐️⭐️⭐️

#شقراء_بغداد

بارت_٢٩


من يوم الي وعيت بي والهم ساكن صدري بسكات
ملامحي يعتليها البرود وبداخلي حرب تطحن بكل احشائي .. بكل ليله ينعاد شريط الذكريات كدام عيني
ويغيب سمعي عن من حولي واكتفي باصوات براسي تدور .. تغيب الشمس وتشرق من جديد واني عند نقطتين واكفه ماتحركت ..اتلفت على مكاني الجديد واسمع صدى لهجته واباوع بوجوه ناسه اشتم هوا ديرته وادوس تراب حديثته الي جان يتمنى شمته ...
كلشي مشى بسرعه ماستوعبتها .. العذاب الهروب الحمل والعقاب بالفصل كلها ثكلت على روحي هواي ..احسها
جرح مفتوح ويلجم بي الهوا ويزيد ناره الي تسعر بيه بكل ثانيه تمر بعمري الذبلان ...
هالثكل احتاجيتله ابن روحي احتاجيتله حماي ظهري وماسح دمعتي الي بشكوى وحده مني يفزع ويهب بمهب الريح ... احتاجيت احاجي واشكيله واشوفه شسوت بيه الدنيا من بعده .. تمنيت لو يرجع يلزم ايدي بحنيه وينطيني منه القوى ويبرد كلبي بصوته وياي
ينصحني ويدليني وين امشي ..يخلصني من التيه والدوامه الي اني بيهه .. احس اني طبيت بمطب ماكدر على طلعتي منه بعد ..
راح اعيش بغربه ويه طفل وبدون لا اخ ولا عم ولا اي اهل وخايفه من الدنيا تكسرني اكثر من هذا الكسر
خايفه من ظلام يترصدوني ويتوعدون ...
ماامن بشي بعد الصار ولا مستعده اضحي بالبقى مني
هالاشلاء الي ضلت اريد اجمعها واقويها حتى اعيش بيهه طفلي الي جاي ..اريد احمي واعيشه بمأمن وماخلي يشوف الخوف ولا يعرفله معنى ...
بس لكل هذا اني احتاجه .. هو قوتي واملي وصبري بالدنيا ،من عنده اريد الملم اشلائي واعيش ....

اصريت ان اروح لبيت اهلي رغم كل المخاطر بس احتياجي اله فاق كل شي احذر منه . .

نزلت من السياره واباوع لدربونتنه وعيني تدمع من اذكر طفولتي ودلالي وحريتي بيهه ... تمشيت بثكل واني اذكر صديقاتي وصوت بابا من يوكف ويرد السلام على الرايح والجاي ..
وصلت لباب بيتنه واباوع على السنادين الجبيره الي بجهتين الباب واتذكر الرسايل الي جان يخليهن الي هنا وهداياه ولهفتي من انزل اشوفه واخذهن بكل شغف وحب وامان ...
تذكرت يوم الي شفت سيارات اهله هنا وهو نزل بلبسه العربي وتوسل حتى يرضى ابويه وحجيه ومشيته وقهره
واكول ...
- ياريتك حاربت هالناس لاجلي بابه ياريتك ماخليته يطلع من هالباب وياخذ روحي وسعادتي وياه ياريتك حفظتني وماضيعتني من ماسمعته وقللت من قيمته هو الوحيد الصادق من بين كل العشت وياهم

مسحت دموعي ودكيت الباب بثكل واني ادري راح اشوف اول ظالم لعمري ... فتحت الباب واني كبل دفعتهه وطبيت وكلشي بيه يبجي بقهر على سنيني الكضت هنا بعز ودلال وهسه اني متيتمه ومتغربه
وبيتي موجود ... عفتهه تصيح وتسأل وراي وصرت اتمشى واباوع لكل ركن واشوف بيتنه على حطته باقي بس مابيه روح ...
وصلت ليم الدرج وسمعتهه تريد تخابر رحت مشيت لباب الهول وكلتلهه ....
- ما ضل عندي حيل واتعبه يكفيج اذيه لاتتصرفين وانتي ماتدرين هذا الي تخابرينه شيسوي

باوعتلي وهي صاكه سنونهه وكالت ..
- وين وليتييي وين ولج خزيتينا بين العشيره خزيتينا
عمامج وعماتج يركضون من جهه ورجلج من جهه موووو عيب مو خززي هيج ابوج رباااج هذا تالي تعبنه وربانه بيج تشردين وتخلينه علج بحلوك العالم
- انتي شكو حاركه دمج لو هاي تمثيليه جديده
- ولججج يامعزااايه
- ايييي كافي كافي على منو دتمثلين هالدور هااا على منو الي جنتي توهمينه راح وهاي اني صفيت وحدي كبالج اعرف طينتج وتعرفين طينتي فبلا هالحجي
- دووووولي عسااااج بالموت يطبج مررض فوك مرض
خلي يلزموج عمامج يطيحون حضج
-اجرج ويايه والي يصير عليه يصير عليج سمعتي
- وتهددد هالكح..تهدددد
- شوفي اني ماعندي شي اخسره واخاف عليه الي يجرى عليه اخلي ضعفين عليج انتي الي بديتي بهالحرب وانتي سبب دمارنا كلنه فلاتتوقعين اسكت واخليج كاعده متهنايه
جفي شرج عني احسن ماافضحج انتي وهذاك العار

عفتهه ومشيت صعدت واباوع للغرف ..اخوتي بعدهم بمدارسهم ..دمعت عيني ورجف كلبي اشتياق الهم
صرت اذكر لمتنه على الصينيه والضحك على الاكل واذكر اختي من جنت اظفرلهه نفس ظفيرتي واصبغلهه وكت مااصبغ .. واخويه علي طفولته كلهه كضاهه بحضني اداري بي واوكله واقري والبسه وامشي وياه خطوه بخطوه .. مصطفى الي هو روح روحي من اشوف طوله ابتسم هذا اخويه الجبير هذا الي راح يدير باله على ورث ابويه ويداري البيت ...
حرمتني منهم الي ربطتني وياهم بالدم ..

تمشيت للمخزن وصرت اشيل بالغراض وطلعت الكارتونه الي ضميته من وكت عرسي ... جريتهه
واني الشهكه مفاركتني حطيت راسي عليهه وبجيت
واني اكوله...
وينك يالعاهدتني بروحي تضل تحس ....

رفعت راسي منها وشلتهه بكل مابيه من حيل ورحت لغرفتي القديمه حطيتها بالكاع وصرت اباوع لفراشي هذا هسه تنام بي دعاوي .. رحت تمددت وكرفصت نفسي واني اتحسس دفو فراشي وريحه الخشب والبروده الي تجي من الشباك ... تذكرت كل ليالي الهادئه هنا ونومتي المرتاحه بلا تفكير وقلق ..

هنا جنت انام بامان وماكدرت الدنيا تاذيني واني بهذا فراشي .. من يوم عفته والعالم فتح ابواب جهنم بوجهي ...

رفعت جسمي بالكوه وكمت فتحت كنتورها وتلمست ملابسهه وباوعت غراضهه لعاباتهه .. اخذت صورتها من الإطار ورحت لغرفه اخواني ... دخلتهه واني احس كأني اسمع صوت معاركهم وضحكهم ولعبهم بالقطار
هنا .. وهاي بعدهه السكه مال القطار الدائريه منصوبه بالكاع والمقطورات متوزعه عليهه والجنود مطشرين بالجهه الثانيه .. ابتسمت واني اتخيلهم يلعبون بيهن
تمشيت لفراشهم تلمسته وشميت ريحتهم من مخادهم
اشتمهن واكول ..
- حبايب روحي حرموني منكم يانور عيوني انتو

نكعت دموعي مخادهم وكمت اتلمس غطاهم وشفت ملابسهم بعدهه على طرف الجربايه .. اخذتهن واشتمهن واني ابجي واحضن بيهن .. ريحتهم هاي ريحه حياتي الاوليه ....
اخذت بلوز كل واحد منهم وخليتهن بحضني ودنكت فتحت المجر وطلعت البوم صورنا وصرت اكلب بي
واخذت صوره النه جماعيه ويه بابا وصوره الهم وهمه بالملعب ورجعته ورحت لغرفه ابويه ..
جنت خايفه افتح الباب ومالكاله اثر بيهه .. لزمت يده الباب واني اشهك واتذكر فقدي اله واذكر مكانه وين هسه ابجي لاني اعرف ماراح الكاله شي هنا ..
وبالفعل دخلت ولكيت كلشي بيهه متغير .. ترتيب الاخشاب والريحه المتعوده عليهه هنا ماكو ولا الروب الستن الي معلك بالزاويه .. كل ركن بيهه ميت احسه بدونه ...
ذبيت كلشي من ايدي ورحت ادور بالكنتور على غرض اله ..ادور ووابجي مثل المخبله اريد الكاله شي احتفظ بي
لحد مالكيت بجامته الستن الي يلبسهه كل ليله .. اخذتهه
واني اشهك واكوله ..
-بابا حبيبي اريدك والله تعذبت بدونك والله
رجيت راسي ع الكنتور واني حاضنتهه وابجي
كمت شلتهن وطلعت فتحت الكارتونه وحطيتهن تلمستهن
واني اكول ...
- هنا اني جمعت كل احبابي ماريد بعد بس اعيش بذكراكم
شلت الكارتونه ونزلت واني اودع هالاركان واحفظهه بعيوني واتذكر نزلتي بلهفه على هالدرج وكت الي اسمع بيبي تجي وهسه شلون دااجر بقايا روحي بالكوه عليه

حطيتهه يم الدرج وكعدت على اول بايه وامسح بوجهي بعدهه كمت رحت للحب رفعت القبق وشربت من ميه البارد العذب ..
رجعت لمكاني ع الدرج وانتظر اخواني يجون لازم اودعهم كلبي ماينطيني امشي بدون شوفتهم ...

على كعدتي ضليت وامي تروح وتجي وادردم واني مااردلهه لحد ما سمعت هوستهم ودفعو الباب وطبو شافوني شمرو جنطهم واجوي ركض عليه
دعاء وعلي .. وكفت حضنتهم اثنينهم وابوس بيهم بلهفه وكعدنا ع الدرج وضليت حاضنتهم جان علي يكولي..
- وين رحتي ماما وعمه يكولون عليج سافرتي صدك
- جان عندي شغل وهسه اجيت اشوفكم
- وتبقين يمنه موو بعد متروحين
- لاا لازم اروح ماكدر ابقى
-اهووووو كله تروحين تروحين
دعاء- معليك انته غير عدها شغل
- انتي معليج
- انته متفهم هسه اني من اكبر هم اصير اشتغل واسافر مثلها ومااخذك
- مااجي وياج ماريدج اني اسافر وحدي
- كااافي حبيبي انته كافي مو حلو العرك بينكم
اني شموصيتج ويه اخوانج شلون تصرفين ليش تضوجي
- هو غبي
- لااااا عيب هالحجي عيب هذا احسن واذكى ولد وين اكو مثل اخويه علاوي وييين

حضنته وهو صار يضحك ويطلع لسانه يعيب عليهه واني ضليت اشتم براسه واعصر بي بحضني وهو مكيف لحد مادخل مصطفى صاير شاب ماشاء الله عليه جمال وطول وهادىء دخل سلم بهدوء وكمت حضنته وهو حاضني ويشتم بيه
بجيت بحضنه حيل محتاجته واريده وياي سند بس اخاف اورطه بمشاكلي وهو بعده بدايه عمره
رفع راسي بيده وباوع لعيني وكالي ...
- شنو الي بكلبج وهيج مورمه عينج من البجي عليه
- مشتاقتلكم

رجع حضني ويمسح بدموعي ومشى واخذني وياه للهول كعدنا وكالي ...
- شنو الصار وين جنتي ؟ محمد كل يوم وداك بابنه يسأل عليج
- ارجوك لاتجيب سيرته بروح ابويه عوفه
- شكو شمسويلج احجيلي خلي افتهم شصاير وياج
- مو هسه مصطفى بعدين احجيلك
- لااا لازم تحجيلي هسه حتى اساعدج اوكف وياج لعد تضمين على اخوج !!
- اخاف عليك والله مااريد ادخلك بمشاكلي عوفني اني اتصرف
- استغفر الله
- خيي حبيبي اريدك توعدني وعد
- شنو
- اريدك فطن على بيت ابونه وماله ولاتعبر عليك صغيره ولاجييره
- لشنو دتلمحين احجيلي
- الدنيا متتأمن ياعيني والله متتأمن ماتعرف بيهه صديقك من عدوك .. اني انبهك لاني اعرف شي انته ماتعرفه فاسمع مني وفتح عينك على كل شي
بيتنه اعرف اليطلع ويطب بي منو وليش
اخوتنه قربهم منك وصيرلهم صديق واحتويهم
وعينك على دعاء راح تكبر وحيده هنا واني ماعتمد ولا اثق بامي ولا بكد شعره وحده اريدك انته تربيهه وتعلمهه مثل ماربناه ابويه على مخافه الله وحسن الخُلق .. حبيبي البنيه من تكبر وحيده بلا اهتمام تضيع وتضيع نفسهه اريد عينك عليهه وصير وياهه وياهه احتويهه ولاتخوفهه منك حتى تضل تلتجىء الك كل عمرهه وماتسوي شي بدون علمك .. والبيت هذا عمره ماينباع تفهم ..

ابد ماينباع ولا تطلعون منه لو مهما يصير لا تقنعكم تبيع وتروحون لعند خوالنه او تشترون بيت اكبر وتقشمركم بهالحجي تره لو درتو ظهركم منا تخسرون كل ذكرى ابونه وحياتنه والفلوس تروح ماتضل وماتحصلون مثل هالبيت لو مهما وعدتكم
تخلف وعدهه ..ايااااك يامصطفى ايااااك بيوم من هالعمر تثق بيهه بوعد تنطي ايااااك .. اني مااكرهك بيهه لا هي امنا واجب احترامها ومداراتها وماريدكم تقصرون وياهه ارضوهه لان هذا رضا الله بس الشي الي انبهك عليه حتى لا توكعون مثل وكعتي من خوفي عليكم اني احجي
- خيتي بس فهميني انتي شنو الي بالج ليش دتسوين كل هذا وليش دتوصين كأنج مراح ترجعينله بعد
- مصطفى اني ماكدر اعيش وياكم هالشي صعب حيل صعب
- لييييش ليييييش الله الاكبر احجي ليييش
- وعد وروح ابويه وكت الي تتخرج من جامعتك اني اجي واحجيلك كل الي صار وافهمك شغله شغله بس هسه اعذرني ياخويه ماكدر هسه اني بين نارين لاتزيدهه عليه بروح الغالي اعذرني
ولا تكرهني بيوم ولا يجي بالك اني ممكن اسوي شي يغضب ابويه عليه بكبره ولا تصدك بحجي الناس لو مهما يحجون من شي عليه تره الحقيقه بس بيني وبين الله وابويه نعرفها
- يعني ابويه يدري ! من شوكت
- يدري اي كلشي يدري وكلشي صار كدامه وكلتلك وكت الي تتخرج وتصفى حياتك اني اجي واحجيلك ومتاكده راح تعذرني لكل الي اسوي
- ماشي ماشي مادام ابويه يدري وسكت اكيد شي مهم وصعب ينحجي هسه ..اني اثق بيج ثقه عميه
وماتصدكين بعد هالحجي افكر بيج بيوم بشي مو زين ... اني سمعت حجي هواي ..من عماتي ومن محمد وامي وعمامي هوسو لحد ماملو بس كلت اسمع منها بالاول يلا احكم لان اني اعرف تربيه ابويه الج شلونهه مامعقول تسوين شي يخل بسمعتج
- لا والله ويشهد عليه ربي لو اني زليت بيوم اني احاسب نفسي شلون ارضى الوث سمعه ابويه
واشكك بتربيته واضيع تعبه وياي بس الناس ياخويه الهه الظاهر وخليهم يحجون الي يريدوه
مايهمني لانهم مايعرفون شصار وياي بس الله يعرف وبالمرصاد لكل ظالم اني مسلمتهم بيد الله هو ابو الحق ياخذ حقي بيوم منهم

دمعت عينه وجرني حضني .. شميت ركبته واني احصنه بايه الكرسي وادعي ربي يوفقه ويعينه بكل خطوه بحياته ... وخرت منه ومسحت دموعي ولزمت ايده وضغطت عليهه وكلتله ...

- انته ابو البيت هسه عينك عليه وحافظ على ذكرى ابونه هنا لا تنساه بالثواب والزياره ولاتهمل اخوتنه مهما يصير ضل حاطهم بعيونك انته ربيهم وعلمهم الصح والغلط وازرع بينهم حب الاخوه مثل مازرعه بينه ابونه وفرحني بنجاحك وتفوقك
- بعون الله اكدر اصيرلهم نعم الاب وافرح ابويه وافرحج بهالامانه
- واثقه بيك يانور عيني انته واثقه بيك تكدر
وصل خبر لعمامي اني موجوده عند وحده من صديقاتي وكللهم لو يريدون يتبرون مني ويعتبروني ميته مايهمني كيفهم خلي يسون الي يريدو المهم انته مايضيق خاطرك بحجيهم لانك تعرف اختك شنو
- اني اعرفج مي صافي .. بس ليش توصلينه لهالمواصيل ليش متكعدين وتتفاهمين وياهم ولو على محمد حقج بالطلاك يصير منو يكدر يوكف ضدج
- ضعاف ياخويه كلهم ضعاف ومايوكفون وداعتك واني الي جرى عليه كرهني دمي المختلط بيهم اني عندي سبب واحد عايشه عليه بعد هالمصايب وماريد بعد لا اهل ولا رجل خليهم ويه ربهم يتجازون واني عوفني ارتب حياتي من جديد
- ولشوكت هالحجي يضل لشوووكت
- مادري العلم عند الله مادري شراح يصير بس همي كله هسه اكعد اداوي جروحي واصنعلي حياه من الصفر راح ابدا ادعيلي ياخويه ادعيلي ربي ينطني نظره رحمه من عنده
- والله كلبي محترك عليج ياخيتي شلون اخليج تمشين وحدج والله كاسره ظهري يشهد الله ماارتاحلي بال من يوم الي اختفيتي بي لهاليوم
- شسوي ياعيني الي بلايه اب بلايه خيمه يضل متهجول
- ضلي واني اشيلج بعيوني منو يكدر عليج وانتي بيت ابوج كاعده
- الي كاعده بيت ابويه هي اول من شعلت هالنار اني وياهه مانتصافى ياخويه ليوم الدين اني ماابريهه الذمه ولا هي الي تبطل حقدهه وياي
خليني اروح بعيده عن ظلامي مو تريد راحتي
اني راحتي بعيد عن هالناس
- ادري والله ادرررري بس شلووون تعيشين وحدج شلوووون خرب بي من زمن
- اعرف ادبر امري ياخويه مو صغيره وعندي فلوس ومكان اكعد بي ومو وحدي وياي ناس من اهل الله اعرفك عليهم بعدين ومتاكده راح تحبهم
- عدهم ولد
- بس واحد ومتزوج وعنده ولد ماعلينه بي
- خايف عليج ياخيتي خاااايف عليييييج كلبي ماينطيني اسلمج لهالشارع وحدج
- وعيونك ياغالي الي ماشيه الهم امان اكثر من هالبيت صدكني لو ادري بي اذيه الي مامشي اله بثقه .. ثق بيه اني موكله امري لله ومتاكده راح يحفظني من كل شر
- والنعم بالله
- لازم امشي هسه اخاف يجي احد وماريد اتواجه ويه اي واحد منهم

كمت رحت اخذت جنطتي واجيت اله وهو بعده كاعد وضاغط على ايده ويحارب ماتنزل دمعته
طلعت الفلوس الي عندي وحطيتهن بايده وهو رجعهن الي كلتله ...

- اخذهن انته تحتاجهن لدراستك اني ماعندي شي احتاجه الحمدلله بس انته ماريد ينقصك شي وادري الراتب يادوب يكفي البيت خليهن جوه ايدك يفيدنك ياخويه لا تردني فدوه رحتلك

اخذهن من ايدي وجرني لحضنه وضل يكولي
- ارجعيلي سالمه يا روح ابويه انتي ارجعيلي سالمه وعيشي لسعادتج وبس لاتفكرين باحد وراج
وشوكت ماتحتاجيني اني عندج والله لو ما كسره ظهري بابويه والبيت محتاجني لاخذج واهج من العراق كله بس هسه متربط بيهم
- اعرف والله ياخويه ادري جار علينه الزمان بس يجي يوم ونرجع نلتقي بحيل الله ولذاك الوكت انته اخوتنه يكبرون وتقل مسؤوليتهم وتتعين بوظيفه زينه ويهدأ الوضع ونرجع نلتم ومفتخرين بأن احنه تجاوزنا هالشده .. لا تيأس خويه نرجع نلتقي ان شاء الله وهالاختبار نتجاوزه
- ان شاااء الله ياارب يا عزيز قوينا يارب

بوسته وطلعت رحت شفت دعاء وعلي نايمين بوستهم وشفت امي واكفه متخوصره وتباوعلي بحقد درت وجهي عنها ورحت شلت الكارتونه ومصطفى طلع فتحلي الباب وهو يبوس براسي
وراد يمشي وياي ماخليته رجعته للبيت بالكوه
وطلعت امشي عبرت دربونتنه وشفت سياره الشيخ واكفه وهو يدخن و يتمشى يمهه من شافني ذب جكارته واجه عليه واني اباوعله وابجي ماكدرت اوكف هالدموع الوداع صعب وهاي اني اكثر من مره اودع احبابي ومايصيرلي وياهم بعد ملكى ... اخذ الكارتونه من ايدي وحطهه بالصندوك .. صعدت بالسياره وهو اجه شغل بسرعه وطلعنه عبرنا هالمنطقه جان يكولي ..
- تينه صار شي ليه توخرتي
- اسفه تعبتك بالانتظار بس لان تانيت اخواني يرجعون مانطاني كلبي امشي وماودعهم
- ماعليه شي دامك بردتي كلبك بشوفه اخوتك
وامك وش حالها معك
- عادي
- وش تكصدي
- شيخ اني بالاسم عندي ام لا تسأل عنهه بشي
- حتى هينه مالك حظ استغفر الله
- الحمدلله
- طيب واخوتك كيف عايشين معها
- لا همه ماعدهم شي وياهه وبعدهم صغار ماتدخل بيهم بشي بس اني وياهه متعادين من زمان
- اييييه هي الخسرتك يابه ماتهميلها
- لا عادي

احجيها ببرود بس هي والله مو عادي ابد مو عادي
هاي ام المفروض سند اليه من تطغى عليه الدنيا
جان هسه اني ملتجئه الها ومحتميه بيها وكاعده بيت ابويه وبين اخوتي بامان ويتهون عليه هالجرح بس هي خلتني اخاف الكاع الي تجمعني بيها لان ادري بيها تذبني بنص النار وهي تتشمت وتضحك ماتهتم المهم ماصير حجر عثره بطريق مخططاتها ....

غمضت ورجعت راسي بتعب وبعد مسافه سمعت الشيخ يكولي ...
- تينه ودك اجيبلك شي تشربي تاكلي احكيلي
- لا كلشي ماريد تسلم
- ماكلتي شي من الصبح والحين العصر طر علينا
- مالي نفس بشي
- عجل كيف هالحال مايجوز
- ماريد بس اوصل للفراش واتغطى وانام
- ودك تهربي ماهيك
- اي حتى لو لساعات
- وبتضلي العمر كلو هيك
- لحد مااكدر ارجع توازني
-خير ان شاء الله خير

رجعت غمضت وعلى بروده السياره نمت وكل شويه افز على صوت هورن وارجع اغفى لحد ماكعدني صوته ...
- اصحي ياخيه وصلنا حديثتك اصحي وكحلي عينك بشوفتها

صحصت وصرت اباوع للجسر العايم على الشط واشوف الناعور والخضار الي مزين مدخل منطقتهم .. تبسمت واني اذكر حجي ايوب وهو يوصفلي شكل الغروب بحديثه وهاي اني داشوفه على كعاها مثل ماوصفلي واحلى ...

اخذت نفس وباوعت للشيخ وكلتله ...
- شيخ لو افديك بروحي قليله بحقك وقليله لشكرك على وكفتك وتحملك الي هاليومين تركت بيهن اهلك وشغلك وحرت بيه والله لو اشكرك العمر كله مااكفي حق تعبك وياي
- لاااه ياخيتي لاااه انتي تآمرين وهذا واجب عليه وكفتي معك عجل ان انا ماوكفتلك من بيوكف معك
انتي امانه بركبتي ليوم الدين ماتحكي هيك وتحسبيها دين عليكي هذا كلو شي انا افتخر بعملو معك
- والله ان مامثلك رجال والله .. الله يحفظك ويرزقك من اوسع ابواب رزقه ويتمملك حياتك بالحسنى وهالدعوه من يتيمه ماتملك غير ايمانهه بربهه وثقتهه بيك ومااظنهه تنرد
- والله انك طمنتي بالي بدعوتك هاذي انا توكدت اني صنت الامانه وكفيت حكها لحد هاليوم والله يكدرني واكفيها ليوم الدين
- شيخ اني بس مجرد الكه نظره رضا منك عليه بيتك هاي تكفيني والله والله ماريد ولا اطلب شي غيرها تعرفني ماتهمني امور الدنيا
- وانا اوكدلك ان كل عمرك بيتي تحصليها تطمني انا اعرف وش لفيت ببيتي من حرمه .. بعيني انتي محترمه وكدرك كبير ماينزلو شي ياخيه
- يعزك الله ياشيخ

وصلنه بيتهم وهم لكينه الرجال تارسين الطريق ينتظروه وهالمره هو طبك السياره على الباب الوراني للبيت وكالي ..
- ادخلي البيت وانا ابعثلك اغراضك
- مشكور شيخ على كل شي
- بسك شكر ياتينه انزلي تريحي الحين خلني ادحك رجالي وش بلاهم
- يعينك الله عليهم هواي

ضحك واشرلي انزل ونزلت دخلت من هالباب الي يودي لكليدور وبعدين المطبخ .. من دخلته صارت بوجهي ام جراح رفعت حاجبهه وكالت ..
- وش عندك بعدك

ماعرف شجاوبها وضليت واكفه وجان اجتي مناسك ابتسمت من شافتني واجتي حضنتني وباستني وكالت ..
- هلا باخيتنه الصغيره هلا والله كيف حالك ياخيه
- الحمدلله

- تعالي حدري هان تريحي كأن دربكم كانت طويله ؟
- اي
- الحمدلله على سلامتكم خير ان شاء الله الامور طيبه
- اي الحمدلله
- زين احدري للربعه الشيخه تنتظرك

مشيت للشيخه وشفتها كاعده بهيبتها ووجهه الابيضاني المدور وعينها الكحيله .. رفعت ايدها واني اجيت حضنتها وهي تمسد على ظهري وتتحمدلي بالسلامه لرجعتي .. كعدت بصفها
وحضنت ايدها وخليت راسي على جتفها واني اتذكر كلام مصطفى ودمعته وافكر شوكت بعد راح نلتقي ؟؟؟ راسي صار كولش يوجعني وتعبان جسمي حيل ترخصت منها وكمت للغرفه ردت اطلع ملابسي بكنتورها استحيت امد ايدي وافتحه
رجعت الها ولكيت يمها مناسك كاعده تفرك برجلها كلتلها ...
- شيخه من بعد اذنج اريد اخذ ملابسي اسبح
عادي افتح خانه كنتورج
-ههه امشي يابنيتي سوي الي ودك فيه ماتترخصي هذا بيتك يابنيتي
- شكراً

ابتسمتلهه واباوع صفيه صافنه عليه ورافعه حاجبهه عفتهم ورحت اخذت ملابسي وطبيت سبحت وطلعت بسرعه بس اريد انام رحت للغرفه بس نشفت شعري وعفته مفتوح مالي واهس امشطه .. ضليت كاعده وصافنه لحد ماسمعت
صوت مناسك تصيحني طلعت رحتلهه بالربعه
وكالتلي ....
- خيتي هاذي اغراضك طرشها ولد عمنا
- اي مشكوره

دنكت اريد اشيلهن جان يطب جراح يركض ويصيح ..
- جدتي الشيخه جدتي الشيخه
- ها يمه هين حدر وش فيك
- ابوي قلي احكيلك خلي عمه زهرا تتعشى ماتنام من غير اكل

تبسمت وكالت ..
- روح واحكيلو تم من هالعين

راح يركض بره واني اباوع الوجوه مصفنه عليه والشيخه اشرتلي اجي لعندها ..عفت الغراض ورحتلها كعدت بصفها وهي تلمست شعري على طوله وكالتلي ....
- كأنك ماكلتي شي هاليوم ماهيك
- لا تريكت
- وهيك بيجوز وانتي حبله يابنيتي وش بيتغذى هالطفل هيك بيصير ياخذ عافيتك وبتروح صحتك وماتكدري على رباتو يابنتي وجوب تعدلي اكلك وانا من اليوم عيني عليكي ولاخليكي تصيري بكبر الفيل

ضحكت وميلت راسي لجتفها وهي حضنتني وتكولي..
- انا داريه ان جرحك كبير وزمانك جار عليكي بهالصغر فاهمه وجعك لكن ان ماكمتي بنفسك نحنا مابنكدر نفيدك ولو تعبنالك لكن همتك وحدها الي تنقذك يايمه اسمعي مني والي مشيتي وخليتي وره ظهرك لا تخلي حدر عينك ارميه انسيه احركيه مثل ماحركك بهمو وتعبو وربك ارسلك هالطفل بحشاكِ يزين لك حياتك ويأنسك فيها ويكونلك رفيك بكبرتك عيني حالك وارسمي لمستقبلو معك
لا تحرميه مانحرمتي منو عطيه كل حنانك ونفسك وراح تلاكي سعادتك بسعادتو وهذاك الوكت بتعرفي حكيي وش يعني

رفعت راسي باوعت لوجهه المبتسم المحمر الخدود بستها من راسها وجتفها وكلتلها ..
- حجيج برد كلبي ياشيخه عسى ربي يريح بالج مثل ماريحتي بالي ان شاء الله انسى واعيش بس لابني
- بتكدري وكاد بتكدري انتي زهرا وكاد بعد ذبولك بفصل تزهري بالاخر لا تهمي يايمه لا تهمي

ابتسمت لحجيها وانزرع بيه امل لحياه جديده اعيشها ويه ابني اغني بكل مااملك واخلي مصدر قوتي واملي ... ميلت راسي لجتفها وهي وصت البنات يجيبون العشى ...
وره دقايق جابو الصينيه وكعدنا ناكل والبنات ال٣ عينهن عليه والشيخه تجيب وتحط كدامي حتى اكل
من ملاحظتي لاكلهم دائما يكثرون بي يعني ماينصب ماعون اذا مو متلتل واللحم لازم موجود باي شكل من الاشكال بس ماتخلى الصينيه منه

البنات طول وجسم مليان شايلاته بطولهن هنه بيض وعيونهن خضر مناسك وصفيه بس ام جراح عينها بنيه
مناسك وصفيه شعرهن مو كلش طويل يوصل لحد نص الظهر واشكر وام جراح دائماً رافعته مامبين طوله بس لونه بلون عيونها بني
مكياج عيونهن مطوخ هواي بالسواد كحلتهن على طول العين ومدمعها مرسوم بحده لايك عليهن
ثلاثتهن لابسات ذهب بحجم كبير .. المحبس
والكلاده والتراجي حيل كبار والاساور بكل ايد ٣ يطلعن صوت بكل حركه منهن ...
اثوابهن فخمه كلها تطريز وقماش ثكيل والوان غامقه ... اكلهن سريع بس برتابه واصواتهن حازمه وعاليه ...

وخرت عيني منهن واني اكمل تغسيل .. نشفت ايدي ورجعت للشيخه كعدت يمها وهي سألتني
- بنيتي وش الي جرى معكم هنيك
- شيخه فصلوني عن الوظيفه وجمدو ملفي ممنوع اقدم على اي وظيفه بدائره حكومه لمده سنتين
- العرض عند الله يايمه فدا لك هالوظيفه وش تبين فيها
- ضاعت سنين تعبي ودراستي ياشيخه هذا الحارك كلبي
- بيتعوض الو يومو يابنيتي بيفيدك هالعلم بدراسه ابنك الجاي باذن الله
- ان شاء الله اشوف تعبي بي يثمر
- ان شاء الله امشي الحين نامي وتريحي انا بنتظر كم حرمه بيزوروني الحين
- ماشي .. تصبحين على خير شيخه
— يلاكيك الخير يايمه

كمت رحت لغرفتها واخذت فراش من فوك البوفيه
وفرشته بصفها وطفيت الضوا وضليت مغطيه راسي واحوص منا ومنا وبالي على الكارتونه اريد افتحهه بس اكول لا ماريد اتعب نفسي بعد خلي انام
وضليت هيج لحد ماغفيت ...

وثاني يوم كعدت واني اسمع اصوات البنات بره وصوت الكنس بالبيت باوعت للساعه بالعشره الصبح .. كبل كمزت واني مستحيه منهم شلون هلكد نمت من بارحه بثمانيه لليوم بالعشره شلون ماحسيت عزا بعيني ...

ركض ركض لميت الفراش وصفطته ووكفت مشطت شعري وضفرته وطلعت اباوع الوجوه ثكيله وياي واني مستحيه
وامشي بثكل مادري شسوي .. رحت كبل للحمام
وطلعت غسلت ومفتفده فرشه اسناني ..
صبحت على ام جراح وصفيه ردن بثكل وراحن
صرت ادور الشيخه بالصاله والهول الي يسموه ربعه ومالكيتها طلعت بره بالطرمه وكفت اباوع للسمه شلون صافيه وحلوه وشمسها دافيه ووجان يجي يمي جراح وهو متردد يكولي ...
- انتي عندك ننا
-ههه شنو ننا

دنكت وكعدت بمستواه ولزمت ايده واباوع لشكار شعره ورموش عينه الطوال المعكوفه وعيونه الي بين الاخضر والرصاصي هيج تتراوح وهو مدبدب وكل شويه يدنك ويرجع يباوعلي وجان يأشرلي على بطني حط اصبعه وكال ...
- ننا
-ههه اي نونو هنا
- اخذه الي والعب وياه
- ايي
- ولد لو بنت
-انته شتريد يجي ولد لو بنيه شيعجبك
- بنيه اخذهه اشتريلهه مثل حسن
-منو حسن ؟
- ابن عمي حسن عنده اخت حلوووه ياخذهه يشتريلهه هوااي يوميه يوميه
- وانته تريد مثله
-ايه اريد بنيه
- هههه يلا ان شاء الله تجي بنيه وضل العب وياهه واشتريلهه بكيفك

صار يلعب باصابيعه ويمشي ويندار عليه يضحك
ويباوع خجلان واني ابتسم اله وبعدها ضليت واكفه اباوع للمكان .. الطرمه جبيره وكبالها حديقه اكبر منها وهو البيت كله محاوط بحديقه وشتلات ورد ملون كل خمس سنادين لون ونوع شكل وهالسنادين محاوطه حد الحديقه ويه الطرمه
وبنهايه الحديقه المضيف ... على وكفتي وشفت سياره الشيخ اجتي طبكت كدامي ونزل وهو يبتسم
وشايل عباته الجوزيه بيده ... وصل ليمي واني كلتله ...
-صباح الخير شيخ
- اصباحك عافيه ها كيف حالك اليوم
- الحمدلله احسن
- بعد بعد ودي تحسني ازيد من هيك
- ان شاء الله
- الا وين الشيخه عنك ماعودتها تتركك
- مادري كعدت قبل شويه ومالكيتها
- اهاا كلتيلي كعدتي هالحين
-ههه اي مادري اخذتني نومه
- هه هروبك بانو طويل .. عجل ماتريكتي للحين
- اا اي هو كلت اشوف الشيخه بالبدايه
- الاااا انتي تستحي تسوي شي بدونها امشي معاي
- شيخ مااشتهي عفيه
- تييييين امشي كدامي يلااا

دنكت ومشيت للبيت كدامه وهو صاح ..
- ام جراااح مناااسك حدرو هين

رأساً اجني وسلمن عليه وهو كاللهن ..
- دحكن انا بصعد الحين اغير ثيابي وانزل الاكي ريوكها حدرها زيييين

هنه مدنكات وهزن براسهن وهو راح صعد
صارت ام جراح تمشي وتتافف ومناسك اخذت بايدي وياهه للمطبخ وكعدتني يمهه على بساط وكالت ...
- ياخيه انا هين اطلبيني لو ودك شي ماتروحي للشيخ
- لا والله ماطلبت منه شي اسفه لو ضوجتكم
- ماتعذري ماتسوه ياعيني هالحين اجيبلك اكلك
- اساعدج
- لااه اكعدي ماعليكي

ضليت كاعده ومستحيه منهن شلون هنه يسون اكل ويحطنه كدامي والله ثكيله ..
جابتلي صينيه بيهه روبه وكيمر ومربى وخبزتين
تشكرتهه وصرت اكل ومارفعت عيني بعينهن
مستحيه منهن واللكمه بالكوه ابلعهه جان اسمع
صفيه اجتي تكول ...
- وش هذاا للحين بعدكم على الريوك مازهبتو الغدا

وكفت اللكمه بحلكي وماعرفت اكل بعد ولا ابلع استحيت كلش وام جراح ردتلهه ..
- ماهو بنحنا الي نتوخر عن غدانا هاذي عوايد بغداد ياخيتي هينه الاكل زهبتو
- ايه زين عجل امي الحين بترجع وعماتنه ماضل شي وبيوصلو خلنه نتعجل

من سمعت عماتهم راح يجن نشف دمي وبلكوه بلعت اللكمه .. اني بدون شي اخجل كدام البنات حتى من مشيتي النوب يجن عماتهم واكيد وياهن بناتهم و ولدهم وراح اصير موضع عينهن

كمت وشلت الصينيه حطيتها على السنك وردت اغسلها ومناسك ماخلتني تكولي ..
- تبين يذبحنا الشيخ الحين اكعدي واتركيها انا بغسلو
- مابيهه شي اني اغسلهن
- لااا حكيتلك بنتبهذل من الشيخ واليرحم اهلك اتركيها عنك

عفتهن وطلعت من المطبخ وكلشي بيه يدور الشيخ اريده بس هو اامن وياه .....

#شقراء_بغداد

بارت_٣٠



عفتهن وطلعت من المطبخ وكلشي بيه يدور الشيخ اريده بس هو اامن وياه .. وكفت يم الدرج انتظره ينزل وضليت اهز برجلي وانتظر لحد ما نزل
عدلت وكفتي وهو تبسم واجه ليمي وكال ..
- وش فيها التينه احكيلي
- شيخ سمعت راح يجون عماتكم و
- ايه !!؟؟؟
- يعني ماكدر استحي عفيه شسوي
-هههه تييين
- والله من صدك احجي تره حيل استحي عادي ابقى فوك لحد مايروحون ؟
- يولو وليه المستحى هاذي عيلتك بعد ..لا تخافي ولا تختلي من عينهم اكعدي بزودك بينهم وهمه من فضولهم عليكي جايين ليتعرفو عليكي
- مااا عفيه زين الشيخه وين ماكعد وياهم وحدي والله ماكدر
- لا بتجي لعندك الشيخه ماتخافي هين عندها شغله تكضيها وبتجي هالحين .. دحكي يولو انا بمشي اكضي كضيه عليه واجبه ماتخلي بالي عندك
- لااا لايضل بالك اني بس هيج شويه توترت بعدني ممتعدوه وهيج يعني ..اسفه ماردت اشغل بالك وانته عندك شغل
- لااا انا ماقلتلك تعذري يولو لكن ديري بالك على حالك زين وتعرفي عليهم هذول اهلك بعد
- ماشي
- يلا انا بمشي محتاجه شي ناكصك شي احكيلي
- ااا بس شغله صغيرونه
- هههه وش هي امري
- فرشه اسنان
- ابشري هالحين بطرش ولدنا يجلبولك وغيرو
- تسلم بس هاي ممحتاجه غيرها
- عجل انا بمشي الحين اودعناكي
- الله وياك شيخ

راح واني ضليت اتافف ورجعت لغرفه الشيخه
طلعت ملابس ورحت سبحت ورجعت حتى امشط ودخلت الشيخه كمت سلمت عليها وهي جانت مخبوصه كبل طلعت للبنات للمطبخ واني كملت تمشيط وضفرت شعري صفح ورحت طلعت يم الشيخه بالمطبخ واكفه هي تشرف على الاكل
وجان يجي جراح ويصيح ..

- عمتي الصغيره عمتي الصغيره

ابتسمتله وهو جان شايل علاكه جبيره بطوله واجه مدهه الي وكالي ..
- هاذي الك عمتي
- شكراً حبيبي

هو ضحك وراح يركض بره .. ضلن البنات يباوعولي والشيخه كالتلي ..
- موصيه على شي من بره ؟
- اي وصيت فرشه اسنان بس شو اجتني علاكه مادري شبيهه
- دحكيها عجل

حطيتها على الميز وفتحتها وشفت بيهه فرشه الاسنان ومعجون وشامبو وصابونه ركي وليفه ناعمه ومحجاره ومشط وفرشه شعر ... ابتسمت ابتسامه عريضه وضليت واكفه واباوعلهن يعني
هالشيخ لو شما اسوي مااوفي حق اهتمامه بيه
اجني البنات باوعن للغراض وراحن وهنه رافعات الحاجب والشيخه حطت ايدهه على جتفي وكالت

- هاذ طبعو يعرف وش يلزم وبيجيبو من دون طلب تعودي عليه يابنيتي
- والله هواي هذا اني حتى مو بالي هالاشياء
- لكن هو بحسب حسابك بكل شي انتي امانتو مانك بهينه عندنا
- يخليه الله ونعم الاخ والله

اخذتهن ورحت وديتهن للغرفه وحطيتهن بالكنتور ويه ملابسي .. ورجعت للشيخه هستوني اريد اكوللها اساعدهم بشي وجان اسمع صوت السيارات طبكت وصوت الزلم يكولون ..
- يالله ياا حافظ يارب

كبل الشيخه طلعت لباب الربعه استقبلتهم واحنه ضلينه بالمطبخ وبعدها ام جراح اخذت المي وراحت تقدملهم وره شويه سمعت صوت الولد راحو والشيخه صاحت ..
- حدرن يابنيات سلمو على عماتكو هان يلا تعجلن

طلعت مناسك ريحه من مجر الكاونتر ورشت الها ولصفيه ورشتلي شويه ووخرت حسيتها كلش قويه وماحبها هيج وهي جرت ايدي واخذتني وياهن للنسوان ...

طبيت وسلمت ومشيت وره مناسك الي تبوسهه ابوسهه وهنه كلهن ماشاء الله طول بضخامه ببياض وخدود والعطر يسطر وكشخه الملابس
وباعمار متوسطه جانن ٥ نسوان كبار ووياهن
اربعه بعدهن يطلعن بال ،١٦ ،١٧ سنه ..
وكلهن عينهن على حركتي واني بس سلمت كعدت بصف الشيخه ولزكت بيهه ومدنكه خجلانه من نظرتهن يتفحصني شبر شبر ... جان الشيخه تكول

- هاذي بنيتنه زهرا عزيزه كلبنا

وحده من النسوان كالت ..
- يعزها الله .. صغيره بعدك ولابسه السواد ليه ؟
- على اهلها توفو من فتره كريبه
- اااه لهيك هي عندكن كيف ماتو اهلك وكيف جيتي لهان
- وش هالحكي ياخيتي اتركي سرها ببطنها مبلوع
الله يرضى عليكي
- ايييه وش حكينا هاذ حك واجب نعرف حالها
- الشيخ مايرضى حد يسأل عنها بشي ولو دري مابيرضاها علينا
- وهي ليه ماتحكي وش بالعه لسانها
- البنت خجله ياخيتي واليرضى عليكي بلا هالحكي ... يا ام جرااااح غداكي تعجلي فيه لضيوفنا

ارتبكت كلش من بعد حجيهم هذا وضليت اباوع للشيخه وهي تطمني بعيونهه وابتسامتهه المعتاده
وبعدها صارو يحجون بامور ثانيه لحد ما جابو البنات السفره ردت اكوم اساعدهم والشيخه جرت
ايدي وكعدتي ماخلتني اروح وهالعمات ضلن صافنات على حركتهه ووحده منهن كالت ...

- كومن يابنيات هبن مع بنات خالكم واخذنها معكو

كامن البنات ووحده منهن اجتي ليمي والشيخه رفعت عينهه الهه وكالت ..
- روحي انتي يمه البنت بتضل هان

راحت ويه بقيه البنات ونفس المره رجعت حجت
- وليه يعني ماتمشي معهن ملزكتها حدرك
- المره حبله وجسمها ضعيف وانا بخاف عليها ماودي انها تتعب ولو بشيله الابره هاذي امانه عندنا ولزوم نصونها
- حبببببله !!!! عجل زوجها وينو
- زوجها عطاكي عمرو ماانا قلتلك اهلها توفو كلهم
- ياويل حظك عجل ماكضبتي عدتك !

- الا كضبتها وخلصت كبل يوم جيتها لهين
- هالحين هي وش تكربكم من وين تعرفو اهلها
- ابوها بزمناتو كان صاحبو للشيخ وعزيز عندو
وهيك مشت السالفه
- وليه ماضلت عند عيالها عجل وينهم عنها
مالها عمام اخوال
- الشيخ كال انها امانتو من ابوها وانتهى غيرو مانعرف وش في

سكتت المره بس ملامحها توحي بعدم اقتناعها للحجي هذا .. رجعت الشيخه تسولف ويه بقيه النسوان لحد ماكملو ترتيب السفره والتمينه على الاكل .. والشيخه تداري اكلي كدامهن وكل شويه تطلب يصبولي كلاص لبن ثاني وبس كمت غسلت صاحت عليه الشيخه ورحتلها واشرتلي اكعد بصفها رغم اني جنت ناويه اساعدهم وهي امرت اني اكعد وكلشي مااسوي ..

وضليت الكعده كلها اني بصفها احجيلي كلمه او اثنين بس اذا سالو عن منطقتي او دراستي وعمري
وغيرها اضل ساكته والشيخه تجاوب بدالي ...

للساعه بال٣ كالتلي الشيخه ...
- كومي يابنيتي انجضعي وريحي ظهرك وناميلك ساعه انا وعماتك بنمشي نكضي كم شغله وعكبها نرد
- ماشي شيخه

ترخصت ورحت لغرفتها وتمددت بالكاع واني افكر شلون راح اعيش هنا ؟ اخذتلي غفوه طويله
ماحسيت بيها الا على صوت اذان المغرب
كمت متكسره من نومه الكاع ورحت للمرايه عدلت شعري وطلعت واني افكر هسه هم ينتقدوني لان مكضيتهه بس اكل ونوم واني مادري شبيه هلكد انعس وجسمي نحلان ...

رحت دورتها للشيخه وشفتها داتريد تدخل للبيت ويه هالنسوان ومن شافتني فتحتلي ايدها وابتسمت
رحت حضنتها وبست جتفها وهي كالتلي ...
- نوم العوافي يابنيتي عساكِ تريحتي
- اي الحمدلله بس ماعرف ليش هلكد دانام ماجنت هيج قبل
- كلو من الحمل يابنيتي
- هاا بس لا ضجتي مني على هالشي
- لااااه انا بيرتاح بالي وكت الي اشرفك نايمه ومرتاحه وماعليكي شي
- هههه ربي لايحرمني حنانج

ربتت على جتفي ومشينه جوه كعدنا وشويه وهنه كامن يتوضن واني هنا اتذكرت اني ممصليه اليوم كله مادري شبيه انسى هيج .. كمت ماعرف اصلي هسه لا !؟؟؟؟
كلت اصلي هذا الفرض وافرغ بعد العشى وكت اقضي بي الي فاتني .. ورحت صليت المغرب
ورحت للشيخه شاورتها ..
- من رخصتج شيخه خلي اروح اساعد البنات بالعشى احسهه زحمه اضل كاعده ومااوكف وياهن
- لااا ماعليكي هنه جيش بالمطبخ ماواكف عليكي اكعدي هان وخلهن يدبرن حالهن
- شيخه عفيه
- اكعدي شو حكيت ماتجادلي
- ماشي تامرين

كعدت واني متململه شسوي ضجت هيج وحتى السوالف ماتخصني ولا اعرف بشنو ديحجون
ضليت على هالكعده اتصفن بالوجوه لحد مادخل
الشيخ و وكفت سلمت عليه من بعد ماسلم على عماته وهو كعد يم عمته الجبيره والشيخه شاورتني
وكالتلي ....
- بنيتي امشي لعند مناسك واحكيلها ان الشيخ هان خلها تمد سفرتين وحده لنا والثانيه للبنيات معهن ياكلو هنيك
- ماشي
-وارجعي لهان ماتروحي معهن
- ليش غير لازم هم اصير وياهن
-لااا انتي غير عنهن امشي الحين وبعدها بنحكي

كمت رحت للمطبخ وشفتهن شلون واكفات يسولفن ويضحكن ويه بنات عماتهن من انتبهن عليه سكتن
واني كلت ..
- مناسك الشيخه تكول الشيخ اجه فخلي تسوي سفرتين للعشه البنات وحد عنهم
- ايه بتامر الشيخه

ردت اطلع جان وحده من البنات وكفتني وكالت
- انتي بغداديه
- اي
- شعرفك على الشيخ سمعنا كدرك عالي عندو
- الي سمعتي من الشيخه هو الي عرفني عليه
- لا لاا انا ودي تحكيلي كيف اجه لعندك وكيف صارت جيتك لهان
- عاديه مابيهه تفاصيل مهمه تنذكر
- همممم زين كيف مات زوجك ووين عيالك عنك زوجك كبير ولا صغير مثلك
- مهم يعني لازم تعرفين. ؟
- ايه عجل كيف
- بس اني ماحب احجي عن حياتي الخاصه حتى اشبع فضولك اعذريني

عفتها ومشيت حسيت اني تصرفت بتكبر وخليت حاجز بيني وبينهن بهالحجي بس لاني ماريد يتعمقن بحياتي الخاصه واخاف اجذب بشي وبعدين اوكع بجذبتي فحسيت هيج انسب تصرف ...

كعدت بمكاني يم الشيخه والشيخ ابتسم من شافني ورجع كمل حجيه ويه عمته لحد ماانصب العشى
وكعدنا ناكل وويانا ام جراح اما البقيه فاكلو وحدهم
ومن خلصنا جابت ام جراح صياني دتلم الاكل واني حطيت المواعين بيهه هي شالت وحده وراحت للمطبخ واني وكفت داشيل الثانيه جان
يصيح الشيخ ..
- اخيه اتركي عنك مالك لزوم فيه
- ماعليه شي خفيفه والله
- شو حكينا اتركي الله يرضى عليكي

عفتها ودخلت صفيه اشرلها الشيخ تشيلها وهي باوعتلي بنظره عصبيه وشالتها وراحت واني
رحت غسلت وطلعت من الباب الثانيه للحديقه
وكعدت بجهه البيت اليمنى وضليت صافنه بالسمه
واشتم ريحه الزرع المندي وجان يجي يمي جراح
ووياه ولد بكصته وكفو كدامي وجراح كالي ..
- عمتي ليه وحدك هينه
- ضجت جوه وطلعت
- ليه ماتكعدين مع عماتي هنيك وتحكي معهن
- مو اصدقاء احنه
- عجل انا وحسن نصير اصدقائك
- ايييه حنا نكعد معك مانخليكي وحدك
-ههههه يابعد كلبي انتو

كرصت خدودهم وهمه مارضو كالولي...
- مابيصير هيك عمتي نحنا رجال عيب هيك
- هااا لعد اعتذر اني اعتذر حقكم

ضحكت على حركاتهم وهمه ينفخون بنفسهم شكلهم كلش متاثرين بجو الشيوخ والدواوين

كعدو يمي كل واحد منهم على جهه وضلو يسولفولي على اصدقائهم ووين يروحون يلعبون
ويسالوني شوكت اجيبلهم البنيه حتى يلاعبوهه
وياخذوهه الهم واني اكللهم بعد الف يوم وهمه يصفنون ويكولون هوااي مانريدها لعد مانصبر
وضليت اضحك وياهم ونسولف وماحسيت بالوكت شكد ضليت لحد ماسمعت صوت الشيخ ورانا يكول ...
- هاا عجل انا احكي من وين هالبشبشه والضحك طلعتو عاملين لمه هين
- يابه يابه هين عمتي الصغيره وحدها ماعندها اصحاب وحنا صاحبناها
- ايييه يابه زين تسوي عجل اريدك تداريها دايماً زين
-ايه يابه زين
- ايه يالتين عجبك الكعده هين
- اي شيخ حلوه وهالرجال الصغار خلوها احلى بعد
-هههه تهني فيها
- الله يهنيك شيخ مشكور على غراض اليوم
تسلم هواي مكلف نفسك بيهن والله مايحتاج
- الااا يحتاج ونص عجل ماتبين تاخذين راحتك باشيائك الخاصه بالغسيل
-اي بس عادي موجود هواي
- كلمن الو غرضو هيك احسن
- مااحب اتعبك ولا اكلفك بشي بس شكراً لكل هالاهتمام ربي يقدرني واردلك اياه
- رديه براحتك بينا خليني احس اني صنت الامانه وماكصرت فيها
- تطمن امانتك باحسن مايكون
- وهذا مطلبي والحمدلله

ابتسمتله وهو كالي ...
- تينه انا ماودي حد يدحك طولك لهيك وكت تسمعي صوت ولاد عمنا بيجو لهين لا تطلعي
- معلوم شيخ ماتوصي
- يحفظك الله وهين اخذي راحتك المكان هذا مابيوصلو حد من رجالنا لكن عند الحديقه الكبيره
تحذري
- ماشي تأمر
-هه انا بمشي الحين للمضيف خذي راحتك

راح واني رجعت كعدت يم جراح وحسن وهمه يسولفون ماسكتو ابد ولهجتهم حلوه بلسانهم الطفولي بس شخصياتهم مبينه قويه وكلش متاثرين بشخصيات ابائهم ....

ثاني يوم وره الريوك راحن العمات وحسيت بالراحه شويه جنت كلش متقيده كدامهن واحس نفسي مراقبه بكل خطوه اخطيها ....

طلعت ويه الشيخه للحديقه الورانيه و احنه واكفين نباوع للزرع والورد كالتلي ...
- ليكون خاطرك ضايك بينا يابنيتي
- لاا ياشيخه الحمدلله مرتاحه بس اريد اطلب شي
-اي وش ودك اطلبي
- خليني اساعدهم بشغل البيت فدوه والله ماحلوه كعدتي وهنه يشتغلن وحدهن احس روحي ثكيله عليهن وماريد هالشي
- يابنتي انتي ليه تتعبي حالك انا اعرف حملك تاعبك وعودك ضعيف ماودي تتعبي نفسك بشغل البيت وتالي بيتاذى حملك
- لااا والله صحتي زينه هسه واني داضوج بس كاعده كلشي ماسوي على الاقل التهي بالشغل
وخلي عود الشغلات الخفيفه عليه
- الشيخ مابيرضى والله ليبهذل حالنا لو درى مشغليكي بالبيت
- حالي حالهن مو هو كال الي وعليه الي عليهن
بعد شكو
- تجنبيهه يايمه تجنبيهاا
- لا فدوه رحتلج والله اخجل اكعد وهنه يجيبن ويحطن كدامي والله ماارتاح هيج صدكيني شيخه
- ايييه ايه زين زين
-ها هسه تخليني اشتغل وياهن
-ايه لكن انا بقسمو للشغل بينكم
-اي بعد احسن هيج
- انتي شو بتعرفي تعملي
- كلشي تنظيف طبخ غسل بس خبز ماعرف ابد
- عجل امشي معاي لنشوف تاليها

دخلنه جوه لغرفتها وهي صاحت على البنات اجني ثلاثتهن وكالت ...
- دحكن ياعيني هاليوم انا ودي اقسمو للشغل بينكم انتي وياها وبنجربو لثلاث ايام وبعدها بنشوف يا بنضل عليه هيك يا بنغيرو
ام جراح - وش ودك تشغليها معنا ياشيخه ؟
- انا ودي اخليها تطبخ ودي اجرب اكلها وش طعمتو
ام جراح- ودك تجربي اكلات بغداد هيك قصدك
- ايه هيك بتمانعي حضرتك !
-لا السموحه
- ايه بنيتي يازهرا من اليوم بنجرب العشى من ايدك وام جراح عليها الغدا والريوك ومناسك وصفيه عليهن التنظيف بيتقسامو بينهن وحده عليها الصبح والثانيه العصر والملابس احنا معودين كلمن بيغسل هدمتو وهيك لنشوف كيف بتمشي معكون هالايام ان رضيت على اشغالكن بخليها هيك وان مارضيت بزيدها معلوووم هيك
- بلي شيخه معلوم

راحت كل وحده لشغلها واني ضليت كاعده ويه الشيخه جان تكولي ..
- دحكي يايمه هين نساوينا كويات عين انتي وش بيصير معك بتسمعي كلمه تغث خاطرك تعالي احكيلي وانا باخذلك حكك ضعفينو
- لا ان شاء الله مايكون بينه خلاف
- ان شاءالله .. الحين امشي معاي بعرفك على عيشتنا كيفها

ابتسمت ومشيت وياهه طلعنه من الباب الورانيه
وتمشينا بممر من النخل على الجانبين وشفت بيت صاير بنهايه هالممر جان تجي مريه متوسطه بالعمر ووياها بناتهه اثنين صغار اجوي ركض للشيخه باسو ايدهه وسلمو عليهه وهي كالتلهن ..

- ماعليكم مننا اكملو شغلكم انا ودي اعرف بنيتي على مكانا وش فيه
- حياها الله خذو راحتكم

راحت المريه هي وبناتها والشيخه كالتلي ..
- يابنيتي حنا عندنا بساتين كثيره تبتدي من بعد هالبيت وتمتد على طول النهر وقسم ثاني منها بمكان ابعد من هين وهالزرع الي فيها هالناس الي كاعدين هين قايمين بواجبو همه الي بيزرعو ويحصدو ورجالهم بيدارو الزرع وبيحرثو الارض وبنياتهم بيكدسو المحصول وبيفرزوه وولاد عم الشيخ بيوزعو بالاسواق وربحنا منو بالنص بينا وبينهم ... حنا ملاكي الارض وهمه بيعملو فيها وما بنفرك بينهم بشي وعزيزين علينا كثير
- الله يحفظهم
- ويحفظك يايمه ..

ايه وهين في عنا مراح حاطين فيو الحلال هذا حلبو بيكون من مسؤوليه ام جراح وهاذي الحرمه الي جتي لينا قبل شوي هنه بيتعاونو عليهن زمان كانو بيطلعو عليهن قبل الفجر لكن الشيخ بعدها منع يمشو الا بعد ماتطلع الشمس ولسبب هو يعلمو ماحكى عنو
- امممم
- وهين بعد مابيحلبو بياخذهن ابنو للفلاح الي هين
وبيخلي وحده عندنا بالبيت والي يضل بياخذو لبياع الحليب
- ما تسونه جبن
- مو بدايماً عند المشتهى
- اممم زين البنات يطلعن للبستان لو ممنوع
- لا مابيمشو لحالهن الا مع رجال معهن وبوكت ما يعاودو الفلح لبيوتهم .. هين حريم الشيخ مامدحك خيالهن حدا لا ولد عم ولا خال ولا من ديرتنا .. مابيطلعو الا مع الشيخ واذا ودهن شي من السوك انا بمشي وباجلبو لالهن او برسل حرمه ابن عم الشيخ صياح هاذي حرمتو طيبه وكلبها معنا وما بتسمعي منها الا تم على امرك
- هاا همه قريبين هنا
- ايه بيتهم حدرنا هين على اليسار
- ابنهم حسن صديق جراح لو غير واحد
- اييييه هو ذات نفسو ما دريتك تعرفيه
- ههه البارحه صرنا اصدقاء عرفني عليه جراح
- اييه دحكتيه كيف انو حليوه على اهلو
- اي عين الله عليه
- ايه وضل عندنا الديوان هذا مسؤليه مناسك هي كل ليله بعد مابيمشو الرجال ويعاود ابو جراح للبيت هي تمشي تنضفو وترتبو وتبخرو وتعاود
للبيت
- هاا زين شيخه وكت الي يصير الغدا منو يطبخلهم للرجال الي بالديوان يعني هم ام جراح
- ايييه ام جراح وصفيه بيتكفلو الطبخ لكن مو بمطبخنا هين لا في مطبخ خصوصي معمول بره حدر الديوان امشي اخذك لعندو لانو ما يبين من بعيد

مشينا وعبرنا من حديقه بيت الفلاح وطلعنا من وره البيت على الجهه اليمنه مشينا بنص ممر صاير على طوله سياج من الخوص ووره هالسياج من جهه الحديقه صاير اشجار نارنج وعرموط مغطيته وممبين من واحد يباوعله من بعيد
الممر جان طويل لحد ماوصلنا المطبخ .. صاير
غرفه جبيره وبيها بريمزات وجداري كبار وقناني غاز اربعه مسطرات بره بالباب وطشت جبير كلش يم بوري ناصي وصناديك خشب مسطره بيهه مواعين فافون كبار والمواد الغذائيه كلهه مسطره على جهه ... ضليت اباوعله والشيخه كالتلي ....

- دحكي هين وكت مابتصير لمه رجال ولاد عمو للشيخ بيمشو يذبحو على حسب العدد وبيغسلوه وبيجيبو الذبيحه هان وبيمشو لعند اول شجره كريبه على باب البيت فيها معلكين جرس بيرنو عليه ساعتها بنعرف انو هنيك في ذبايح وبيمشو ليها لحتى يزهبو الاكل ووكت مايكملو الطبخ بيرجعو واولاد العم بيصيرو ياخذو الاكل على الديوان من هالباب بيودي للديوان من دون حاجه
انو يرجعو الدرب كلو ولليل بيصير وكت تنظيفو
الي هو من مسؤوليه مناسك مع اليدوان
- اممم شلون حلو .. بس اكيد تعب عليهن خطيه البيت والديوان ويطبخن بمكانين
- متعودات عليه ماتهمي
- لعد همزين قبلتي اساعدهن ولو انتي خليتي عليه بس العشى ههه بس ميخالف
- ههه لو عجبني طبخك بخليكي تطبخي للبيت وام جراح للضيوف وهيك بنكون عدلنا بينكون
- اييي هذا الحجي الحلوو والله ياشيخه اني ماحب اضل كاعده اتملل بسرعه احب الهي نفسي بالشغل
- بعد هاذ انتي وشطارتك لنشوف كيف نفسك بالاكل
- اعجبج شيخه
- بنحكم بعد ثلاث ليالي
- ماشي لعد ابدعلكم بهاليالي تدللو عيني
- هههه ياحلاه حكيك يازهرا

رجعنا للبيت وبعدنا على كعدتنا جان تدخل بنيه ضعيفه ومبوشه من وصلت للشيخه رفعت بوشيتها
وسلمت واجتي هم سلمت عليه والشيخه كلتلها ..
- ظنيتك توخري عننا
- لاا وشلون مالبي دعوتك ليه باسرع وكت ياشيخه
- زين ماسويتي .. دحكي يابنيتي هاذي بنتها لصاحبتي من الديره هين انا رسلت عليها لحتى تجهز غرفتك وانتي ومعها بتدحكو وش ينكص لها ونجيبو لانو للعصر بيجلبو الاخشاب لهين
ولزوم انها تكون جاهزه
- ان شاء الله .. لعد اروح اني وياها اساعدها
- على راحتك لكن انتبهي ماتنسي حملك
- ماشي

بوست راسها ورحت ويه البنيه جوه واجتي ويانه مناسك صعدت دلتنه على الغرفه ..
جانت غرفه الشيخ اول وحده من يم الدرج وبعدها غرفه البنات والثالثه غرفتي صارت ...
جان بيهه شويه غراض قديمه شلناهن واخذناهن للبيتونه وصرنا نسولف ونظف الجام ونمسح الحياطين والكاع وبعدها عفنا الشبابيك مفتوحه حتى تتهوى ونزلنا تغدينا وبعدها طبيت سبحت
وردت انام شويه وسمعت صوت الشيخ .. طلعت سلمت عليه وردلي السلام مستعجل وكال راح يدخلون الولد لحد تطلع وراح .. كعدنا كلنه بغرفه الشيخه لحد ما صعدو الاخشاب وشدوهه وطلعو يلا اجانه الشيخ فتح الباب وكال ..
- اخيه اطلعي لغرفتك طالعيها ان كانت عاجبتك او ودك تغيريها

كمت و وياي الشيخه رحنه ليم الشيخ وابتسمت وكلتله ...
- اثق باختيارك شيخ من قبل مااشوفهه متاكده راح تعجبني وشكراً لكل تعبك وياي ربي يقدرني وارده الك بالاحسن
- انا حاكيلك كيف بترديه
- اذاً اعتبره كل يوم ينرد

تبادلنا الابتسامه ورحنه اني والشيخه صعدنا للغرفه واول ماشفتها ابتسمت احساسي ماخاب بأن هو يعرف شنو اليعجبني ..

جانت الغرفه لون ابيض وجربايه نفرين التاج مالهه ابيض والنقش ذهبي وحتى ميز المرايه ابيض وحوافه ذهبيه ويه اليدات للمجر والباب
وزاويه صغيره بيضه والكنتور شكله كلش حلو الارجل مالته ذهبيه وبي ٣ بوب ومن فوك بي زخرفه صايره مو عدل .. حسيت الغرفه مال لعابات والشيخه كالت ..
- والله ان هالشيخ عم بيطلع ابداعو هالايام ماكان هيك لا والله
- هههههههه والله ذواق الغرفه تجنن عاشت ايد الي سواهه

انتبهت على البنات وراي يباوعن للغرفه وصفيه كالت ..
- يمه دام هيك عندن اخشاب جديده عجل انا ودي اغير غرفتي
- ايه وش عليه احكي لاخوكي يبدلها لك

نزلت هي وام جراح وضلت مناسك يمنه كالت ..
- يمه ضل الفرش متى يجلبوه
- محضرتو يمه ماناسيتو .. الحين ننزل نطلعو
- ماشاء الله مايفوتك شي
- عجل هالشي يتنسى !

نزلنا وطلعت من كنتورها الفرشات الي اشتريناهن والبرده وانطتني مخاد اثنين وبطانيتين وصعدناهن اني ومناسك رتبناهن ومسحنا الاخشاب ورجعت مسحت الكاع ونزلت كعدت ويه الشيخه كلتلها ..

- شيخه اني اريد اشكر الشيخ بطريقه تليق بي
شنو تنصحيني
- مايحتاج يايمه هو ماعمل الا واجبو الك
- لا شيخه لا خطيه هو صرف عليه هواي وبوكت الفلس صعب يتحصل وهم مفرغ وقته الي ويترك شغله وناسه وتكفلني بكل شي يعني اني شكد افكر شلون اشكره واردله هالجميل كله ومادري شلون
وهو صح يكولي انتي ترديه بس تكونين راضيه ببيتي ومرتاحه وتخليني احس صنت الامانه بس اني مايرضيني هيج ..شيخه اني ماعرف اخذ بدون ماانطي
-هههههه عرفتك والله
- اي وهسه شسوي ساعديني فدوه
- اسمعي لشور راسك وش فيه انتي ادرى وش يرضي نفسك
- اممم راح اضل افكر لان هو كلشي بعيني قليل كدام الي سواه
- الحين كومي اخذي اغراضك رتبيهن ودحكي وش ينكصك لحتى اوصي يجلبوه لك بكرا
- ماشي

كمت اخذت غراضي من كنتور الشيخه ورتبته قبل لااروح وبعدين صعدت رتبتهن بالكنتور واخر شي اخذت الكارتونه جنت لحد هاليوم اني مافاتحتهه
لان ادري بروحي احتاج وقت طويل يلا اتخلص من اثرها على روحي ...

حطيتهه يم الميز ونزلت باوعت للساعه صارت بالخمسه ونص وبدا الدنيا تغرب .. رحت للشيخه ترخصت منها حتى اخذ راحتي بالمطبخ وهي اذنت لي ورحت مالكيت وحده من البنات هناك
فصرت افتح بابواب الكاونتر واحفظ مكان الغراض وفتحت الثلاجه شفت شنو بيها وشفت اكو مخزن صغير للمواد الغذائيه صاير بنص المطبخ هم دخلت بي وشفت شنو موجود .. جان المكان
كلشي متوفر بي ومنه المستخدم ومنه الي بعده

بديت احضر حتى اسوي العشى وكلت ابد مااسوي تمن مثل كل مره .. سويت بتيته ولحم وضفت وياهه جزر واني من طبعي استخدم الكمون والزنجبيل باكثر اكلي وضفت عليهن وسويت كميه جبيره و حضرت وياهه لوبيه وشوربه حمره على صدر دجاج وبين ماخليتهه تثخن صرت ارتب مواعين الزلاطه وحضرت المحلبي وللساعه سبعه
جنت صابه كلشي ورحت اخذت السفره مديتها بالهول واجتي مناسك وياي نقلت الاكل ورتبنه السفره ورحت للشيخه لكيتهه تقرا القران انتظرتهه صدقت وكلتلهه العشه جاهز وهي ابتسمت وكامت
ودزت جراح حتى يصيح الشيخ .. كعدنا ننتظره لحد مااجه يلا اكلنا وجنت اراقب ملامحهم وصافنه عليهم ومااكل بس اريد اعرف رأيهم لحد ما الشيخه كالت ...
- تسلم يدك يابنيتي الله يديم هالنفس الطيبه
ان شاءالله

ابتسمتلهه والشيخ باوعلي وابتسم وكال ..
- وانا عم فكر وش الي تغير بهالاكل طلعتي انتي الي عاملتو
- هههه ايي
- تسلم يدك كلو بيعجب
- الف عافيه

ارتاح كلبي من عرفت عجبهم اكلي وكمت لميت السفره ويه صفيه واني غسلت المواعين وهي سوت الجاي .. طلعت من المطبخ واجاني جراح جرني من ايدي وهو مستعجل..كلتله ..
- ابني شبيك مستعجل على كيفك
- عمتي اسرعي اسرعي

واخذني لمكان البارحه .. لكيت حسن كاعد ومخلي وراه علاكه من اجيت وكعدت بيناتهم حسن فردش العلاكه على الحشيش وجان بيهه بسكت وحلقوم ونساتل وحب شمسي .. صارو يفتحون ويحطون بحضني ويكلولي اكلي يلا .. وصارو يسولفولي شمسوين اليوم ولحد ماكملنه الاكل كالو نعسنه وراحو طبو واني لميت الكواغد وطبيت لكيت البيت سنطه .. غسلت وصعدت صارت عيني على الكارتونه ...
كعدت بالكاع وفتحتهه وصرت اطلع كل غرض واذكر تفاصيل جيته الي ...
كلشي الرسائل والاقلام حتى الورد الي متيبس بداخل الظرف وعلبه الموسيقى والمحبس
وبقيه الهدايا كلهه اتلمسهه مبتسمه الا الشماغ
من اخذته تلمسته وشميته نزلت دمعتي ورجف كلشي بيه من ترست ريحته صدري .. عفت كلشي مفردش بالكاع واخذت الشماغ حضنته ونمت واني اتذكر حجيه ونبره صوته وكلشي بي ....

ثاني يوم كعدت خايفه على حلم بس ماذكره شنو جان بس كعدت وكلبي يرجف .. نزلت تمشيت بالبيت وجان هستوه طالع الفجر .. صبحت على الشيخ وهو طلع مستعجل وبقيت ويه الشيخه
رتبنا شغل اليوم وللعصر اني كعدت اسوي حشو ولفيت كبه تمن وصرت احضر للعشى وبعدها فكرت اسوي قالب كيك وارتبه وانطي كهديه شُكر للشيخ .. عفت كلشي من ايدي ورحت ركض للشيخه كعدت حضنتهه وهي تضحك وتباوعلي

كالتلي ...
- وش وره هالضحك كلو
- شيخه لكيت طريقه
- ايه وش هي
- راح اسوي قالب كيك مرتب واسوي وياه عصير واقدمه اله بالليل شتكولين
- ههههه من ايدك وكاد بيطلع مافي منو
- ايييي بس منو يروح يجيبلي مواد
- اكتبيهم وانا برسل يجلبوه
- ماااشي لعد هسه اكتبهن واجي

كمت ركض صعدت طلعت قلم وكتبتهن على غلاف ظرف لان ماعندي اوراق ونزلت انطيته الهه ووياهن فلوس اخر شي جانن عندي انطيتهن
وهي ماقبلت تاخذهن ذبتهن عليه وكامت طلعت
دزتهم واجتي رجعت يمي وكالتلي ..
- ماتعطيه له الا وحدو
- يعني شوكت اخاف يصعد ينام ومالحك عليه
- لا ناطري هالليله هو بيطلع بعد العشى ومابيرجع لوكت متاخر
- اي لعد ماشي انتظره ماعندي شي

ضحكت وبستهه ورجعت كملت شغلي بالمطبخ
واجه شفته على العشى اكل وبالي يمه راح تعجبه لو لا واخاف ام جراح تجي والنوب تتعارك وياي اني كلش اخاف منهه واتجنبهه ..

وره ماكملت غسل المواعين ونظفت المطبخ
وكفت انتظر البنات صعدن لغرفهن واني رحت كومت الشيخه وخليتهه تكعد يمي وصرت اسولف وياهه واسوي بالكيكه .. خليت بالخليط شويه بُن
حسيت راح يعجبه ومن خليتهه بالفرن صرت ادور صينيه صغيره حلوه اقدمهه بيهه والشيخه دلتني وين الكه الكزاز شفاف ورحت طلعته وضليت اشوف شكو فواكه بالثلاجه طلعت موز وكيوي وبرتقال .. عصرت البرتقال وخليته بالثلاجه وقطعت الموزوالكيوي ورحت طلعت الكيكه انتظرتها تبرد شويه وكلبتهه وطلعت منفشه حلوه والشيخه تشجعني بكل شي واني اخذ رايهه كل شويه ... صفطت الموز والكيوي عليها من فوك وطلعت عسل خليته بخطوط فوكاهن والشيخه تكولي ...
- والله لو عندي ولد غيرو كنت زوجتك لالو وبخلي يشبع بدلالك
- هههههه خليني ادللج الج شنسوي بالرجال
- عجل لنشوف كيف بتدلليني
- باجر بالي شغلات بس الج خلي هسه اريح ضميري من ناحيه الشيخ وراهه كلشي يبقى الج شيختنه الحلوه
- ههههه والله ان دمك مثل العسل

ضحكت وحضنتهه ولاحظت اني الوحيده الي احضن بيهه بكيفي وابوس بيهه كل شويه البنات حتى ايدهه مايبوسنهه بس اني ماخذه راحتي وياهه
وهي ماتمانع بالعكس احسهه مرتاحه وياي ..

نظفت المطبخ ورحنه كعدنا بالغرفه رتبتلهه الفراش وكعدت افركلهه رجليهه ونسولف واراقب الساعه ... الشيخه نامت واني ضليت كاعده سهرانه اتصفن بالحياطين لحد ماصارت ساعه
١٢ كمت للمطبخ كعدت وكل شويه اتفحص الكيكه وامد راسي اباوع من الشباك واشوف ضوا الديوان بعده مشتغل ... جنت كاعده واهز برجلي وسمعت صوت الباب وتقفيلته كمت ركضت ليم الدرج وهو شافني ابتسم متفاجىء كلتله ..
- شلونك شيخ
- الحمدلله وش الي مصحيكي لهالوكت
- هههه انته

ابتسم وضيق عينه مستغرب كلامي .. ضحكت وكلتله ...
- ممكن تجي للمطبخ شويه مااخرك دقيقتين
- ايه وش عليه

مشى كدامي للمطبخ واني جنت حاطه الكيكه على الميز وكلاص العصير وهو شافهه ابتسم وباوعلي
كلتله ..
- هاي هديه شُكر لاهتمامك بيه ووكفتك وياي
صح اني ماعندي شي اقدمه الك ويليق بقدرك بس
حبيت ابادر ولو بشي بسيط مثل هذا المهم اني اشكُر تعبك الي

جنت اباوع لعيونه تلمع وهو مبتسم وصافن عليه
واني خجلانه من نظرته هيج بس استمريت بالكلام
وبعدها هو دار عينه لغير جهه وضحك ورجع باوعلي وكال ...
- يولو هالبسيط الي تحكين عنو بيساوي عندي كون باكملو ... انا مايهمني وش حضرتي اليهمني اصرارك على شكري وتقديري والله هاليوم انا الي حاير كيف اشكرك على هالمفاجأه هاذي يشهد الله سريتي خاطري فيها ومسحتي عني تعب اليوم كلو

من فرحتي ضميت ايدي كدام حلكي واني اضحك وكلتله ...
- الحمدلله عجبتك هههه يلا ماتحب تشوف طعمها
- من شكلها تفتح النفس عجل طعمها كيف
- شتتوقع طعمها شنو
- معاكي انا مابتوقع لاني بتفاجىء دايماً حطيلي ماضل فيني صبر
- ههههه من عيني ادلل

كصيتله قطعه جبيره وقدمتهه اله وكعدت بالكرسي الي مقابيله واباوعله وهو ياكل واراقب تعابير وجهه .. اني هذا بيه طبع من قبل اذا اسوي شي لازم اكعد اراقب تعابير الناس حتى اعرف زين لو لا ... وهو اكل لكمتين وكالي باستغراب ..
- كهوه ؟ ولا انا مشبه من كثر ماشربتها اليوم
-هههه لا صحيح حطيت بيها من هذا البن الي هنا
- ههههه بالله ماخطرت على بالي مااني قلتلك مابتوقع شي معاكي
- ااا عجبتك ؟
- انتي وش رايك ؟
- مادري اني ماضكتها حتى اعرف انته كولي
- عجل كلي معي وبتعرفيها عجبتني ولا لا
- قلقتني

كلتها وصرت اكص قطعه صغيره الي وهو جسمه يهتز من الضحك بدون صوت وصار وجهه احمر
واني كل شويه واكله شنو وشنو ... خفت لا غلطانه بفد مكون بيها واتفشل كدامه وبعدين اكلت ع السريع شويه منها وركزت بيهه وشفتهه طيبه
وصرت اكله شبيهه تره طيبه وارجع اكمل اكل وهو يضحك وحاط ايده على خده وبعدين كالي ..
- انا الحين صارت معي طيبه وبتعجب
- ليش يعني
- لاني ضحكت معك يولو
- ههههه والله ماسويت شي يضحك ليش تضحك
- انتي وكت الي تتبغددي عليي بضحك بلا وعي

خجلت وصرت بس اتبسم ماعرف شأرد عليه

يعني شلون يصنفها تتبغددي شيقصد يا شي منها؟

شال عينه عني وكمل اكل واشرلي احطله قطعه ثانيه وهم كصيتله وقدمتله ومن كملها كالي ...
- تعيشي وتفاجأيني هالشكل دايماً .. انا ارتحت لنفسك بالاكل وترتيبك وحبيت الحلى اكثرو كلو
- تدلل شيخ اسويلك كل يوم شكل
- اي والله كل ليله لو تكدري
- صار تأمر
- تسلمي يابنت العز .. ايه احكيلي كيف وضعك مرتاحه هين
- اي والله كولش مرتاحه الحمدلله .. بس ردت احجيلك شي واخاف ااخرك يعني
-لااه احكي وش عندي انا احكي
- تمام .. مو قبل كلتلي اريدج قريبه من الشيخه ومن تنجحين اكولج شنو السبب
-اييه؟
- اي يعني دااكولك اني وياهه كلش متفاهمين وقريبين ماراح تحجيلي شنو السبب
-هههه لااا بعدك ماوصلتي للي انا ودي اياه
- بس مابينه حواجز وقريبين كولش اسألها اذا تريد
- يولو تينه انا حكيتلك ودي تصيري لها خليله تعرفي وش خليله ؟
- يعني حبيبتهه وقريبه منها غير
-ايييه والخليل من اعلى مراتب الكرب للروح وانتي للحين ماوصلتيه وكت الي تصلي له راح تعرفي وش السبب
- واني شمعرفني اذا وصلت لو لا
- مابظن احساسك يخيب

صفنت شويه عليه وهو يتبسم بهالعين اللامعه وبعدين كمت شلت الكلاص والمواعين غسلتهن واني افكر بعدين نشفت ايدي واجيت قريب عليه وكلتله ...
- لااا اني قررت بعد ماريد
- وش تكصدي ماتريدي
- ماريد انفذ طلبك احس هالشي مو حلو قابل اني اكعد اتوددلهه واتقرب منهه لهالدرجه حتى اجيك وتحجيلي احسهه عيب بحقهه ماريد لااا هذا استغلال واني مو استغلاليه اني احبها براحتي مو لاجل طلبك فتعذرني شيخ

ضحك وعض طرف شفته وهو داير وجهه عني
وبعدين وكف واجه لناحيتي واني جنت واكفه من جهه الحايط وهو يتقرب عليه ويضحك ويكولي
-عجل طلبي ترفضيه ماتنفذيه
- اي تعذرني احسه طلب استغلالي ماحبيته
- وانا ودي استغل انتي ليه تمانعي
- شيخ رجاءاً اذا هيج غايتك دور غيري ينفذهه اني ماكدر
-هههه يولووو
- شنو يولو شنوو
- عجل بطلب طلب غيرو دامك فشلتي بهذا وجوب تعوضيني بثاني
- اي بس مو استغلالي مثل هذا
- شي انا ودياه من يوم حكيت معك

استغربت حجيه الهادىء وهو يتقرب عليه واني رجعت قريب الحايط وهو صار كدامي ويبتسم
وبينه مسافه قريبه وهو رفع ايده و.......

يتبع

حبي اذا تخلين ماسك تمن بالثلاجة ..بس ثاني يوم تكدرين تستعملينه
ثالث يوم يخرب..فكون تسوين مرة لوخ جديد

فيابنات أي ماسك سوون قليل عل كد يوم واحد لاتسوون كمية جبيرة وتحيرون بي😅💔

وتقويم الاسنان بالعكس مايأذي ويعدل من الاسنان والفك ويصير مرتبات
بالبدايه تحسي يضوج لان جديد عليج بس بعدين تتعودين

#ملوكه

يي عمري بيبانثين زين لبشرتج كمرطب ومعالج للبشرة
واذا تريدين غير مرطب ajanta هم زين للبشرة الجافه

ولشعرج الجاف عادي اي نوعية بس كون خاص للجاف
واستعملي همين بلسم
يعني بعد كملتي من الشامبو وغسلتي..بعده خلي البلسم من نص الشعر للأطراف

مو تخلين عل الفروة..لأنو يسوي تساقط...ابدي من نص الشعر للنهاية
فد دقيقتين وزعي وغسلي
رح يسوي نعومة 🤗💞ويقلل من نفشة الشعر

#ملوكه

عيوني لون مشمشي يرهم وياه شالات بألوان فاتحة مثل أبيض ؛ سكري ؛ رصاصي فاتح (سلفر) ؛ والبيج الفاتح ؛ والأسود.

والشوز والجنطه بأي لون فاتح منهن👆🏻🥰

#ملوكه