#شقراء_بغداد

بارت_٦



طلعنه وضلت عيني ادور عليهن شفتهن كاعدات
ويمهن مكان فارغ وايوب واكف على اليمنه وهنه
يباوعن ويتمضحكن ...

روعه راحت كعدت على الجهه المقابيلهن واني رحت كعدت يمهن و باوعت على ايوب ....

اشرتله اجه وكف كدامي وهنه رفعن عينهن عليه ..
- هاا شعندج هين
- اممم عجبني اكعد اباوع عليك وانته يم اصدقائك

هو ضحك واشرلي بعينه على البنات الي بصفي
اني مهتميت ..

- ايووب بعد الدوام عادي نطلع لنفس المكان الي
اخذتني عليه نشرب كهوه

هو صافن ومحجه شي اني درت وجهي على اساس
ادور على روعه وينهه واكول هاي مدري وين راحت
واشوفه شلون وجهه صار احمر على اصفر وضاغطه
بايدهه على الجنطه ... رجعت باوعتله ....

- هاا موافق اكيد مو عيوني
- ايييه اييه ميخالف نطلع
- تسلملي ادري مترفضلي طلب
- شعندي غيرج انا كومي خلي نكعد بغير مكان
صارت هوسه هين
- اييي هنا صارت خنكه

باوعتلهن بطرف عيني واخذت جنطتي وكمت امشي بصفه وضحكتي بالكوه ضامتهه ...

اخذني بمكان فارغ بالحديقه ضلينه واكفين ...

- شعجب تردين نطلع اليوم كبل اتوسل بيج مترضين
- هههههههههههههههههه ايوووب
- شبيج يولو
- هههههههه هاي مغثه بس مو اكثر شيطلعني بره
الدوام اتاخر
- يعني جذبه !!
- اي اي جذبه هذني الاثنين المايستحن كاعدات يتغزلن بيك وبحلاتك ويباوعلك من بعيد
واني مادري
- هههههههه يااايابه يعني هاي كلهه تمثيليه
- اييي يعني مو كلهه بس ايي ... خلي يعرفون انك
مادير بال بس الي وهنه اكيد افتهمن اني سمعت حجيهن وعرفت بسوالفهن فبعد خاف بالهن شي
ينسن هسه
- والله عبالي فقيره طلع كل البله بيج
- ماكو فقيره بهالسوالف
- هاا تغارين علي يولي هاا
- هههه ايوب كافي
- تغارين موووو كوليهه كوليهه
- اي اي اغار ارتاحيت
- يولو تصيرين حلوه من عصبيه
ههههههه
- ههههه كاافي
- يعني بس اسألج بالله عليج كلشي بينه يدل على الحب ليمتى تكليلي احبك
- بعد مو هسه حبااب لاتحرجني هيج
- اووووف يابه مو طالت السالفه بس يلااا اصبر عليج
شعندي اناا

ضحكتله وضلينه واكفين .... هو ترك التدخين ومتعود كل يوم نستله فانطيته وحده اكل نصهه وانطاني نص رحنه بعدين للمحاضره الثانيه ومن طلعنه وكفنه شويه

- باجر انا مااداوم

- شنووو ليشش !

- عندي شغل وهسه اخذت اجازه لباجر

- فهمني شنو هالشغل الي طلعلك بنص الدوام
ميتاجل يعني

-يابه الرجال شغلهم مينحجي

- حباب كولي اني يضل بالي عليك ليش متفهمني

- لاتخافين مايصيرلي شي ثاني يوم تلكيني هين

- ايوب يعني شغلك هيج اهم مني !!!!

- ول يابه انتي بجفه والدنيا كلهه بجفه منو يكدر
يصير اهم منج ،،، دحجيلي لاتبوزين

- هاهيه روح لشغلك واسرارك ماعليه بيك

انداريت مشيت للباب دااطلع حط ايده على جنطتي
ورجعني جوه .... باوعت بعينه وهو يتلفت منا ومنا بعدين ركز بعيني ....

- لا تشلعين كلبي فوك ماهو مشلوع بيج

- ماشالعه كلبك انته دتخوفني عليك ومترضى تفهمني شديصير وياك

- زهراااء انا اخاف عليج حتى من حجيي لج
صدكيني شغلي مايصير تعرفي يابنت الناس
انا والله والله ماكدر على زعلج يولو ماعندي
فرحه بهالدنيا غيرج لاتحركين كلبي بيج

- اوووف ماشي لاتحجيلي

- ههههه ياروحي انتي لاتزعلين مني بغلاتي عليج
- وين اكدر ازعل منك اني ... بس حباب انتبه
على نفسك
- صااار
- واول متطلع لشغلك اقرا ايه الكرسي تحميك
وتوكل على رب العالمين

- صااار ادللي

- وشغله ثانيه اوصيك بيهه ... اذا شفت ظلم لاتسكت عنه بحكم شغلك لاتخلي شغلك يغيرك
ابقى ايوب الي عرفته رجال حقاني

- يجرالج يا بنت العز

- الله يخليك ويرجعك بسلامه

- ارجعلج وحك هالعيون السبتني من يومها
هسه روحي للبيت واطمئني ماشي

- ماشي انتبه على نفسك ماوصيك بعد

- اطمني ياامي اطمني
.
.
.
رجعت للبيت وبالي يمه كل الطريق افكر بي
اول مادخلت سلمت عليهم وامي كاعده مادرتلها
بال من يوم الاجتي بي اني اتعامل كأني مشايفتهه

مشن هذني اليومين عادي انتظرته اشوفه باليوم
الثالث وصارت ساعه ١١ وهو ماكو كملنه محاضرات .. طلعنه اني و روعه وشويه وكالت
تروح لولد تكله على شغله واني ضليت واكفه انتظرها ...

جانت كدامي سنادين ورد اصفر وبنفسجي واحمر
اني لزمت وحده من الوردات الصفر اتلمسهه
شكد ناعمه وطريه مثل ايد ايوب ...

باقيه اباوع عليهن وانتبهت على احد يمي رفعت
راسي انصدمت هذا ايوب ...

- ههه شبيج جفلتي هيج اخوف انا

- لاااا بس شجابك هنا توني دافكر بيك معقول هيج

- ايييه انا سمعتج تفكرين بيه واجيتج

- جذااب لعد مااجيت من الصبح مو كتلي تلكيني
كدامج الصبح ليش تاخرت

- هدي هدي يابه ... الطريق والله طويل واعذري
شغلي ماتدرين شكثر تعبت هاليومين وهاي من
النهضه جيتج كبل حتى بهدومي ضال ولا ماكل
ردت الحك عليج ومااخلف بكلمتي

- لااا يااعيوني حشى ماتخلف بكلمتك انته عرفك
تعال ارتاح وغسل شوف وجهك شلون عركان

راح هو غسل واجتي روعه سلمت عليه وكتلهه نكعد
شويه وياه ونطلع هي مارفضت وهم كعدت ......

- ايييه شلونكم شخذتو محاضرات

- والله صعباات كلش مواد متنفهم

- لا لا انا اقراهن واشرحلجن لاتخافن ننجح بعون الله

- ايوب امانه عليك كلي شصار وياك مبين تعبان
حيل ووجهك اصفر

- ماصار شي تعب الطريق هاذ

- زهراء اني راح اتمشى شويه وانتو اخذو راحتكم

- ماشي حبيبتي ماتاخر هسه شويه واجيج

- يلا احجيلي ايوب الله يخليك والله ممرتاحه لسالفتك بس كلي اي شي ريح كلبي

- زهرااااء كتلج الف مره شغلي مالج دخل بي
اعيدهه بعدددد سمعتيييي

- شبيك ايوب ليش تعيط عليه هيج

- ايييه افهمي حدج ويااااااااي كتلج شغل الرجااال
ما ينحجييي مكانج بكلبي واحبج وعلى راسي
بس هييييين تكفيييييييين فاااااهمه لاتضلين
كل يوم والثاني شعندك وشعندددك مااا اضل اكلج
وين اروح واجي انااااا وحجايه اللخ ماتلكين الي يسرج مني فهمتتتتي

ماحجيت شي بس باوعت بعينه ودمعه نزلت على خدي حاره مثل حجيه ..خفت
منه شلون تغير هيج وياي فجأه مو هو الي يحاجيني ويخاف زعلي مو هذا ايوب الي اعرفه

عفته وكمت هو نزل راسه حطه بين اديه وضل يتأفف رحت على روعه وطلعنه والطريق كله تسألني شبيج اخر شي حجيتلهه تفاجأت مثلي .. وضلينه ساكتات

كضيت اليوم كله بغرفتي لا اكلت ولا نزلت حجيت
ويه احد مالي واهس .... ثاني يوم مداومت رحت
لبيت بيبي كعدت يمهه .....

بقيت يم بيبي الخميس والجمعه والسبت العصر
رجعت للبيت ارتاحيت بكعدتي وياهه هي اغلى
شي عندي اغلى حتى من ابويه واخواني ....

رجعت وهي محملتني اشكال وانطتني فلوس
تفرح من اجيهه واني روحي تفرفح عليهه اذا مشفتهه اكثر من اسبوع ....

حضرت ملابسي للدوام ونمت ..... كعدت الصبح
بدلت وطلعت بدون ريوك بدون سلام بدون شي
بيتنه ممل وبارد مابي حياه مثل قبل ....

محد اله شغل بالثاني ابويه عازل نفسه عن الكل
واخواني لدراستهم ملتهين وامي هي من يومها
كأنها مو ويانه وعمرها معرفت تلم العائله وتخلينه
مرتاحين سوه دائما ضلينه عايشين بيت واحد
بس لكل واحد منا عالمه يعيش يموت بي محد يدري

وصلت الجامعه .....

كالعاده اتمشى بهدوء وبايدي الكتاب ودفتر صغير
للملاحظات ..... كعدت على جهه اقرا اجتني روعه سلمت ومشينه سوه للقاعه وكف كبالنا ايوب ....

- عوفي المحاضره خلي نحجي

- ماكو حجي مهم بعد المحاضره اهم

- كتلج خلي نرووح ماريد صوتي يطلع منا الطلاب امشي روعه وياانه يلااا

- مو على كيفك تريدني ومره الثانيه تطردني
اني كلت مااجي يعني مااجي وحتى دوام ماريد

عفتهم وطلعت امشي بسرعه ودمعتي بعيني مادري ليش اريد بس ابجي ماحب اشوفه هيج ويايه كأنه مثل الطفله الصغيره تشوف ابوهه عصبي وياهه تضل تبجي لاقل سالفه منه ....

ضليت امشي بسرعه اريد اطلع من الجامعه
عثرت بالدجه واصابيعي اتاذت من ضربه الحذاء
القويه بيهن وكفت على جهه اتوجع منهن ...

رحت كعدت على جهه بعيده عن الطلاب ونزعته شويه من رجلي .. احس النبض هيج يدك بطرف الاصبع ... نزعته شويه وضلت رجليه هيج
مدنكه وافرك باصبعي وشفته اجه ليمي ..

- شفتي عنادج وين وصلج يولو
- شجابك هنا
- عجل من صارلي ساعه امشي وراج شنوو
مو اصيحلج عليش متردين علي
- ماسمعت تصيحني
- اييييه عقلج طار بسرعتج هاذي ركضتيني وراج
يا مره والله وسويتي الماكدرو عليه ارجاال
- اني شعليه انته لحكتني مسويت شي اني
- هووو بحبج يولو ركضتيني وراج
- اييي حب اييي ،، شتريد اجيت عليه
- كايلج مايهون زعلج عندي والله الخميس الوب بس ارد اشوفج وانتي ضاربه الدوام بعرض الحايط
- عندي شغل لاتدخل باشغالي
- ههههههههه هااا تبسمرين حضرتج
- لاااا مو طبعي بس عندي شغل ورايحه هسه
من رخصتك
- زهراااااء اكفييي احاجيج
- شنوو شنحجي هاا،،، هسه اذكرت تريد تراضيني لو تريد تبررلي الصياح وطريقه كلامك وياي

- افهميني يابنت الناس

- ماكو شي افهمك بي اني ردتك تفهمني وردتك
تخليني اكون وياك مو ضدك بس انته بعدتني عنك
وبطريقه عمري ماتخيلتك هيج تحاجيني

- اكعدي اكعدي،،،، هيدي هيدي يابه نحلها نحلها

كعدت وهو واكف متجتف كدامي ويباوع يمنه ويسره ويتفحص كل شبر بالمكان .....

- اكوو شي ؟؟

- العالم ماتأمن صدكيني
اسمعيني راح اكعد
هين احاجيج وانتي شتسمعين تضحكين ولا يبين
على وجهج شي

- شبيك خوفتني ليش

- يووولي انا شحجيت سوي بعدين تفهمين
يلا اضحكي لاتبوزين

- ههههههه هاي ضحكت

- اييه كل شويه وهيج تبسمي ماشي
اسمعي يابنت الناس انا اشتغل بالاستخبارات

- هاااا

- يووول !!!!

- هههههه اييي كمل

- انتبهي يولو .... اييه هاي استخبارات حكومه
يعني اوامر الريس مو احزاب ... انا كل يوم
اروح بمهمه يجيني واحد ينطيني ورقه مكتوب بيهه المكان والزمان واروح اسوي المطلوب وارجع الاخبار وهالحجي من سنتين صارلي واهلي كلهم مايعرفو بي بس انا وربي واليوم انتي

- معقووول زين ليش هيج تشتغل مو خطر وانته

طالب بعدك وحتى عمرك صغير شلون هيج

- انا عمري اكبر منج بسنتين بس تركت ورجعت
للدراسه من جنت بلانبار وهالشغل مو انا اخترتو
همه اختاروني بي ...مااهجس الا يوم طالع من
الكهوه ويه الشباب وصاحني واحد تمشينه واخذني
كبل لمكان لليوم ماعرفتو وينو .....
وطلعو سائلين علي وعلى هلي وصحباني من الطفوله للاعداديه همه كل شي بحياتي يعرفوه
وانا ماكدر ارفض شغل كبل اعدام اروح

- ايوب ..

- لاتخلين يبين عليج شي يولو كتلج اضحكي
هين كلها جماعتي واحنا واحد يراقب الثاني
ان عرفو انا حاجي لج والله يشحطونا للسجون

- لا لا شبيك هاي مو داضحك ومامتوتره
كملي

- اييييه تدرين حتى حبي لج يعرفوه وسالوني
عنج اذا مقرر زواج او لا وكتلهم ايه زواج
عاد اخذولهم يومين جمعو شكو خبر عنكم وعن
عمامكم وكل شي يلا انطوني موافقه وسولي كتاب
رسمي بموافقه الزواج منج لان طلعت عائلتكم
نظيفه ماعدها اتباع ولا مساجين ولا انتماءات لحزب

- هههههههه هالمره صدك اضحك معقوول يعني مراقبيني واني مادري ويطلع الشخص الاثق
بي هو عميل مخابرات !!!!!!!!

- اييييه والله هذا الصار بعد هذاا نصيبج

- ههههههههه لاااااا مداصدك ابد مداصدك

- ههههههه وانااا مامصدك خالفت قوانين شغلي
وكاعد احجيلج يووول انا مازليت عن احكام شغلي
لو بشبر انا اذا اكلت يدرون بيه شاكل ...
اااااه انتي نقطه ضعفي والله مكدر عليج

- ايوب لعد ليش هيج سويت وياي ذاك اليوم
هيج هان عليك دمعتي كدامك وخوفي منك

- ول يااابه اناااا شحجاني غير دمعتج هاي
انااا جنت راجع من المهمه وكبل عليج وانا اعرف
انهم يراقبوني بكعدتي وياج وهيين بسترتي
اكو لاسلكي صغير هذاا يوصللهم كل حجيي
بالمهمه وانا ماجنت نازعو ....
واستغليتها حتى اثبتلهم اني ماحاجي شي لج
وان الوعد وعد عندي لان ماريد تضل عيونهم عليج اتكطططع من الغيره انااا عليج واخااف لا يوم يتعرضون لج ان صارلي شي
اناا اس..

- لااا لاا تكمل ماتعتذر تدري بيه مااحب تعتذرلي
يكفي تبريرك الي وخوفك عليه

- يااابعد رووووحي انتي يولو انتي الشي الوحييد
اخاف اخسرو ان خسرتو خسرت نفسي اناا بيج
الكه نفسي الي مااكدر اعيشها

- يعني ياشي تقصد

- الهدوء والبرائه العندج انا مفتقدهم بحياتي
من ادحج عليج تتمشين بكل هداوه احس انتي
والهوا واحد بالنعومه وضحكتج من بعيد هيج شفافه ومابيهه جذب وحقد لاا كلها برائه نقيه مثل الهوا هااذ ....
هالشي اناا ماحسو عندي لان كل حياتي جذبه
اخترعها حتى ارضي الدوله .... ماكدر حتى اني
اكعد اقرا الكتب مثل مانتي تكعدين بهداوتج هاي
على المصبطه وتنسين العالم وتندمجين بكتبج
انا ان ردت اختارلي كتاب انسأل عنو خاف بي
افكار سياسيه ضد النظام ....
الشعر اناا هااوي له ومكدر اكتبو اخاف يجي يوم
ويفتشون اغراضي ويقروه وانسأل عنو وماريد افسرو مشاعري هاي تخصني اريد شي خاص بحياتي ماااكو مالكيت كلها معروضه بالورق عندهم

- معقول هاي حياتك ايوب واني الي جنت استمد حب الحياه منك تطلع انته تاخذها مني

- ايييه يااا نظر عينو لايوب اناا اخذها منج واناا
معند وميبس راسي عليج اريد ارجع حياتي الماعشتهه بيج

- كل يوم تعلقني بيك اكثر

- بغلاتي عليج هالسالفه مايعرفها خيالج
ولاتحجيها لاحد ابدد تعرفين شنوو يعدموني ويعدموج والله هذول وحوش بره مكاتبهم لاعبالج يضحكون ودايرين بالهم على البلد ترا كلو بمكاتبهم يختلف صدكي حياه السجون والتعذيب لو تسمعين الصوت بس الصوت ماتنامين ليلج منو ،،،، كلهم جلاد وظلام
بس مانكدر نحجي حرف كدامهم كبل اعدام

- الله يحفظك ويخلصك منهم لاتخاف مااحجي لاحد
وعد هالسالفه مايعرفها غيرنا ... بس ارجوك ارجوك ضل طمني عليك لاتروح بمهمات خطره وماتكولي بس خلي اطمئن عليك صدكني لا اناقشك ولا امنعك

- من عيوني يالغاليه اكلج ادللي وانتي لاضلين بقلق وتخليني اندم لان حجيتلج ... خليج طبيعيه وماكو شي هو شغل حاله حال العسكر بس هذا بي فلوس اكثر

-هههههههههههههههههه والله ادري اخر همك هالفلوس

- اييييه شنسوي بيها دام هالضحكه عندنا
ول يابه انا عااااشك لوجهج ولحنجج عاااشك تفهمين
شنو عاااشك بجيب سترتي حاط صورتج كصيتها
وحطيتها وبالطريق ادحجلها واتلمس هالوجه وارجعها
بجيبي ... ماتفاركني بكل شغلي وكل مكان هي وياي
حتى من انام اخليها جوه المخده واكعد ابوسها وابدا
يومي

- ههههههههههه راح تتخبل على هالسالفه
زين كولي هالصوره اني حلوه بيهه لا اذا محلوه نغيرها حتى تباوع على شي يسوه هههههههه

- يولي انتي بكلشي حلوه هاي صورتنا انا وياج وروعه
بالحفله كصيت بس انتي وخليتها ... اناا امووت على الماروني بيج صدكي يفر عقلي فر والله ان شفتج لابستو بعد هين اشيلج وارجعج لبيتج وارد اشوف مره الي تعتب الباب بي

- هههههههههههههه لاااا والله مالبسه بعد صدكني
اخاف على عقلك عيني هههههههه

- هو ضل منو شي من وراج

- زين كولي شنو المهام التاخذهه بيهه قتل !!

- لا لا مرات يردون يعرفون المندسين من ايران بينه وهذول يكعدون بالكهاوي دائماً انروح نتبع جم واحد ونضل نراقبو يومين اسبوع مرات لحد مانعرفو شنو هو يلا نتركو ونرجع المعلومات للدوله بوكت ومكان معين
ومرات نتبع جم واحد يردون يجيبوهم لشغلتنه هم
او ضباط يشكون بيهم بسالفه المهم احنه نروح نطلع اصلو من فصلو ونجي

- هاااا مخبر سري يعني هيج ،،، ولشوكت تضل هيج تشتغل محلو هالشغل ايوب

- والله ادري محلو بس موبيدي انا ليمتى مايعفوني
من هالشغل انا اتركو

- الله كريم

- يولو هسه تصافينا موو

- ههههه اييي تصافينا

- عجل كومي نطلع محاضره وراحت علينه شنسوي ساعتين هينه كومي ناخذلنه فره

- هههههههه وين نروح يعني

- المتنبي ترحين ؟؟؟

- ااه صددك هسه !!

- ايييه بعد وكت انا اريد اروح اجيب مصدر كالولي عليه نروح ندورو سوه هااا شتكولين
نتوكل ؟؟؟

- مو اخاف نتاخر يعني مادري خايفه

- بحمايتي انتي يولو امشي وماعليج بالدنيا
اخذي غراضج ويلا انا قررت نروح يعني نروح

- ههههه مانعترض سيدي

- يولو السانج ااااخ شيخلصني بعد

- نسيت نسيت اتشاقه والله
.
.
طلعنا هالمره لوحدنا فرحانه ومرتبكه اخاف احد يشوفنا سوه من اهلي هو انتبه مرتبكه لزم ايدي
وشابكت اصابعنه واحنه كاعدين بالمنشأه ويهمسلي
اطمئني مدامج وياي الدنيا لاتهمج ....

وفعلاً خف توتري ونسيت كلشي وضليت بعالمي وياه وصلنا لشارع الرشيد وضلينه نمشي وهو يحجيلي على كل مكان من هذني وشنو تاريخه ومواقفه بيهن

والضحكه مافاركته طول طريقنه ... اني اكصر وانعم منه بهووواي فمن يصير ازدحام بالمكان الواكفين بي يحاوطني بايده اصير كلش قريبه منه وضايعه بجسمه

هو يضحكلي وعينه على الناس حتى لاحد يطخني
دخلنا شارع المتنبي وهو يمشيني كدامه ومثل الحارس وياي ... نوكف على كل واحد عنده كتب وهو يكلي اختاري الي على ذوقج ...

من طبعي احب اكلب بهواي انواع وبعدين يله اقرر وكل واحد افتحه اكله هذا هيج وهيج ... اكو هواي قاريتهن ومنهن سامعه عنهن فمااروحلهن اصلاً

اكو كتاب ماحب طريقتهم بالسرد فمااكلب اي كتاب الهم .... جنت سامعه بكتاب
"مائه عام من العزله "
ولكيته راساً شهكت وكتله ....

- ايوب لكيته لكيته
- شنو ياهوه
- هذا كتاب ماركيز اموووت على هالكاتب حباب
جيبلي هذاك مال مائه عام من العزله
- هااج خوفتيني عبالي شو شفتي ... شسوين
بالعزله يولو
- لاااا هذا كتاب اكتشاف قريه واحداثه حلوه
هذا ميه عام لعائله وحده مو عزله وكئابه .. رجاءاً
ويه ماركيز لتناقشني
- هاهيه ياابه شحجينه عليه هسه ... بعدين لاتكلين
ماركيز كول اسم الكتاب وبس
- لييش !!!
- يولو تجذبين العين بحرفج هاذ لاتخلين غيري يسمعو
- ههههههههههه اوووف منك .. شسوي يعني هو
هيج والله مااتصنعه
- ول يابه ادري والله ادري بس انا ماريد احد ينتبه
على شفايفج من تنطقي هو انا مصبر روحي كوه
عجل همه شلون
- شنو شتقصد يعني مفهمت يعني تضحك عليه
- اووف ربي امشي يابه امشي هسه لو اشرح للصبح مو يمج السالفه
- ههههههههه مفهمت بس ضحكتني بضوجتك هاي
ههههههههههههه
- نيااال كلبي على فطاريتج

كملنه مشي والافرع صغار وضيقات كلش والناس
واحد يصير بوجهه الثاني وهو شعرج ديري من هالجهه قميصج عدلي وان شاف واحد يباوع على
رجلي يجي يوكف بصفي ويغزره هذاك يفلت ...

- هالتنوره اشكهه عليج ان لبستيه النوب
انا صوجي مطلعج بهاللبس اكلتج العالم يولو
هاي شلون ترجعين كل يوم وحدج هيييج

- هسه بس اني لابسه هاي مو كل البنات هيج
يعني وين عدنا وحده لابسه طويل لاتحجي عليه
عفيه مابي شي لبسي

- ااااوووووف انا مو مفهمج السالفه مو باللبس
السالفه انتي صغيرونه وناعمه تجذبين العين

- ههههههه والله اذا تعرف فد طريقه تسمني حتى
ميباوعون عليه ياريت تكلي

- ههههههه يولو ههههه اااخ لو بس افهم اناا شلون
اكضيهه وياج والله احترك بدمي من بره طولج هاذ
انا ادري شيسمنج ومجايبو

- لاتعب نفسك قبلك بيبي حاولت ومالكت شي
اني هيج جسمي مايسمن عوفني هيج خفيفه بمشيي مو سمينه اختنك غير

- عجل هو انا شحارك شبابي غير خفيتج هاي
شعرج بعد ترفعيه ممنوع تضفري هيج

- شنوو السالفه هسه احنه ندور كتب لو نتعارك
بالشعر واللبس

- عوفي الكتب واللبس تعاي دحجي هالرمان الاحمر امشي ناكل منو

رحنا على ابو عربانه خشبيه بالركن وبيهه صينيه
عليهه تل رمان احمرر يلمع ويفتح النفس ...
حطلنه بكاسات وياه خاشوكه وضلينه ناكل واحنه
واكفين ... طعمه حلو وحامض ايوب اخذ ثانيه
واني بعدني بالاولى يكلي اكلي بسرعه واني صافنه بوجهه وضحكته واشوف الناس كلهه ملتهيه
باشغالهه واحنه سوه بينهم تمنيت هاليوم ميخلص
واضل بحريتي بين العالم وياه ......

فرينا اثار المدرسه ورحنه على الرسامين ...
وللقشله ضلينه كاعدين هناك بالكاع لان المكان
ازدحاام وكلهه محتله اماكن الكعده ....

- مرتاحه ؟

- اكيييد مرتاحه واتمنى هاليوم مايخلص

- واناا مرتاح وفرحااان احس بحريتي وياج

انا وياج ادور سوالف اطفال مافكر بشغلات
الكبار ابد اريد اضل افتر واضحك واسوي سوالف
الصغار كلها وياج

- ترجع طفولتك بيه

- لااا انا اعيشهه بيج .. مشفت طفوله انا من يومي
محروم منها ،،، ابوي شسويلو مايرضى وعندو
الحزام هو المكافأه لكل شي

- ايوب انسى كلشي خليك عاايش هاللحضات وياي .. وشتريد طفوله شباب اي شي نعيشه سوه

- انا ليوم الدين ماتخلى عنج

- وانته ماياخذ مكانك احد

ضلينه كاعدين لحد ماصارت الساعه وحده ونص كمنا رجعنه وبالطريق شفنه دفاتر صغار اوراقهن صفر وغلافهن اسود ورصاصي مقفل ... اخذنا اثنين والكتب الخمسه الاخذناهن هم كلهن هو دفعهن ....

هو كلي اوصلج للبيت بعد متسوه ترجعين الكليه
وصدك ركبنا لمنطقتنه وكالعاده اني امشي بجهه
وهو بجهه ثانيه صدك مشيته وتصرفه محد ينتبه
عليه يلاحك واحد ... يمشي وكأنه مو شايفني
بس ادري بي ميغيب تفصيل عن باله ....

وبهيج انتهت ساعات الفرحه وياه وبقيت عايشه
بذكراهه باقي ايامي ....

مرت الايام وعلاقتنا تقوى اكثر وفرحتي وياه تزداد هو مالي عيني وكلبي مااشوف احد غيره ....
وثقته وتشجيعه الي يزيدني تعلق بي ....

بيوم من الايام رجعت من وكت للبيت اخواني مراجعين بعدهم واكيد الام الحنونه بالدوام بعدها
وابويه كالعاده يكمل معامله التقاعد ....

دخلت البيت هدوء صعدت وشفت غرفه ابويه مفتوحه كلت منو هنا دفعت الباب ولكيت امي واكفه وبيدها ضبه فلوس ومن شافتني راساً حطتها وراهه ...

- هااا اجيتي
- اييي

عفتها ورحت لغرفتي ماردت احاجيها بشي مالي
خلكها .....

بعد يومين بالليل اسمع ابويه يصيح نزلت راساً..

- اني حااااطهن هناااا مصارف منهن فلس شلووون طاااارن خمااا طارن .... اللللللله الاكبررررررر
ادرري بيتي انبااااااااك .... احجييييييييييييييييي
ياااحايييييط احجييييي

اباوع عليها ساكته ومدنكه وابويه نااار صاير يشمر بالفراش والمزهريات مكسرهن اني مكدرت اسكت بعد احترك كلبي عليه وهي ولا يمهه ....

- اهدء بابا كلمن يعرف نفسه شمسوي انته عليمن حارك اعصابك ...

- هووووو انيييي شمحصل من هالراتب غير باكييييت الجكاااير هذاااا مو كله الكم حاااطه هييييييج تقدرون تعبيييييي هيييييييج

- بابا اكعد دكعد ارتاح واني احلهه الك

- شتحلييين شتحليييييييين هووو اكو حرامي يكول اني بكت منين اطلعيهن اذااااااا هالحاااااايط المغضوب عليه
بيييييي لاااايسمع لايشوووووف ،،،،،. لج انتي طرطور حاطج بيتي ماتددددرررررررين فلوس رجلج وين ترووووووح لعددددد اللله المن انطااااج هالعقل شووووكت حتفتحين المخخخخخ هذاااااااا

كاام عليها ويضرب على راسهاا باصبعه ..... ابويه بطبعه لو شكد مايكون عصبي مايغلط ويسب يصيح ويكسر بس مايشتم كدامنه ......

- بابا بس كلي هنه شكد الفلوس
- لج ضبه كامله تعويضات تقاعد هاي حاااطهن
هناااا هنااااا بس ادير ظهري يطيرن
صيحي اخوتج كليلهم لاعبين بيهن شايفيهن امشييييي
- ماله داعي بابا ،،،، اني اكلك وينهن
لو انتي تكولين وينهن ؟؟؟؟

ابويه اندار عليه وعاقج حواجبه ووجهه صاير احمرر
هي كامت تبلعم واني واكفه كدامهه ...

- بابا اني قبل يومين شفتهه شايله ضبه فلوس بغرفتك وبس شافتني ضمتهن براهه

- جذاااابه ماكو هيج حجي

- لاااا اكووو عبالج اسكت همين واكول خطيه لااا ابد والله تحلمين ،،،، وبعدين شنو جذابه مو اني جنت راجعه من وكت وشفتج راسا ضميتيهن
بابا اني عبالي راتبهه بس هسه انتبهت ان يوم ٢٦ بعدله اسبوع وحتى لو خما تاخذ ضبه فلوس راتب؟؟؟؟ !!!

- لجججج حقيرررره تتهمين امج هاااا انتي شنو من بشر
- كولي لنفسج انتي شنو من بشر تجذبين عينك عينك

- هييييييي اسكتتتتتن كوووومي انتييييي كوووووووومي
باااوعيلييي لج سااااعه الج بسسسس سااااعه تحطيهن
كدامي هنااااا

- منين اجيبلك هو اني منيلي وانته شكوتصدك بالزعطوطه هاي وتجذبني

- بنتي اوعى منج بنتي ماتمد ايدهه بالحرام تربيتي وادري بيهاا متجذب اني كلت وقسماً بالله قسماً بالله
ساعه الج بس اذا مجبتيهن هناااا اسحللللللج سحل
لاهلج وخلي اخوتج وامج يفيدوج دشوف هم يكعدون بيتهم حراميه هاي اذا ميطلعون همه المستفادين

- لاااااتحجيييي على اهلييييي مااسمحلك وفلوس منين اجيب واني شعليه شعدهه دليل هييييه حتى تتهمني هااااا
جيبووو دليل وواحجو عليه

-شترجى من وحده كضت سنتين بالمحاكم ادور فلسين شعبالج بعد هم اصدك بيج هاااااااا هيج حاسبه نفسج عندج مكان بهالبيت جبتج تخدمين ولدي لاتحسبين نفسج عليه مره وادوريلي سوالف حق ودليل

- يعني اني خدامه هنااا مووو بس تردوني اكنس وامسح
واوكل هيج تاليتي

- ايييي هيج انتي هيج انتي جبتيهه لنفسج اذا نسيتي
فاني ماناسي .... يلاااااا رووووحي من وجهي واني كتلج ساعه لو تخلقيهن تعرفين شنو تخلقيهن اريدهن يمي ..... وانتي روحي لغرفتج بابا روحي

هي كامت تغلط عليه وتعلي بصوتهه بالصياح وهو عافهه وطلع وكللهه ساعه وارجعلج نتفاهم عدل

اني عفتهه وصعدت لغرفتي واكول تستاهل ...

احسهه مرت ابويه مو امي الجابتني ماحبهه ولاارتاحلهه وهي نفس الشي ادري بيهه نفس الشعور .....

اسمعهه تصعد تصيح وتغلط وتنزل نفس الشي .....
رجعو اخوتي ودعاء جانت بيت جيرانه متعلمه تباوع كارتون كليندايزر يمهم ويه جهالهم ومرات يلعبون بيت بيوت بينه وبينهم بيتين .... هم رجعت
كل واحد راح حضر جنطته ونامو .....

واني عيني على الساعه كل شويه وانتظر ابويه اشوف
شراح يصير ......

سمعت صوت باب المطبخ انفتحت كمت بسرعه وكفت يم الدرج اتصنت عليهم ....

- هااااا خاتون شسويتي بله سولفيلي

- هااك هاي الفلوس وسد السالفه عاد

- هاااا هسه يله طلعن قبل شويه منين اجيب واحجي واعيط وانتي صماً بكماً ..... لج بله انتي ماعندج حياء ماكو خوف الله بين عيونج شكو ثابرتنه بصلاه الليل
والقران اذا انتي حجايه صدك ماعندج

- هسه انته شعليك بيه اني مو خدامه هنا هاي فلوسك واخذتهن شتريد بعد اصلي مااصلي مو انته تحاسبني

- لسانج هواااي طولان اشوف ،،، هيج عبالج سباعيه هااا ماتردين ايييي اكيد هو شعندج انتي غير تذبين هالسم وتسكتين مايعجبج اجاوبين حضره جنابج شوفي لج اني مبقيج بهالبيت لخاطر الجهال غيرها مالج شي عندي وانتي هاي غصباً عليج تخدميهم واداريهم هذول ولدج مو جاي اظلمج اني سمعتييييي
وشغله الثانيه ....... الايد الي تنمد بالحرام تنكص
بدينا تعرفيها هالسالفه موووو
جاااااااااوبيييييي تعرفيهاااااااااا

- ااااي اعرف

- ايييييي لعد ليش تسويها شعبالج اني مادريت بيج
ربج يعوفج لوتكولين يله بعدين من يصير عندي احط بدالهن وهو يحجي يحجي ويسكت شمدري
وهيج ترضين ضميرج وعبالج ربج يرضى بتصرفج
لجججججج يابه افهمي هذااااا حرااااام حراااااااام
مره الي تاخذ بدون علم زوجها حراام وهاي لامره ولامرتين واعديها اكول محتاجه وتسحتي بس بعد ماعرفت شسالفتج ويه الفلوس لااااااااا لهنا وكافييييي
سمعتيييي كااااافييييي ....

- يعني هسه شراح تسوي اطلكني لو تشهرني كدام اهلي

- اني مادور الفضايح يامره ،،،،، ماحاسبج لان اكو الله مدامه كشفج كدامي ورجعلي حقي فهو كفى بعقابج لان ماشوف اكو اصعب من موقفج هذا كبالي لا الضربولا الاهانه ولا الطلاك كلهن مو بكد نزلتج من عيني هيج
فخليج انتي والله واني حتى لاااا اوصيج ولا اكلج بشي لان نفس الشي مايتغير انتي ماحسبتي حساب لربج تحسبين حساب لحجيي روحي شتسوين سوي
اني مأيس منج ماتنصلحين ...

هي ساكته ماترد بشي ولمحته يريد يصعد اني ركضت
لغرفتي وتمددت حتى بدون ماسد الباب رأساً تمددت
وغطت راسي هو فات لغرفته .... لان هي تنام مرات
جوه ومرات يم اخواني بس ابويه اله الغرفه ماتدخلها

بهالليله حيل انقهرت على ابويه شلون متورط وياهه وكلبه مكسور منهه ... وحتى ماعاش زواجه براحه كله شغل وتعب ومشاكل بالبيت .... وبقى يصبر علمودنه

وشكد هي نذله لدرجه بقت مستمره تاخذ الفلوس حتى بعد ماوفت ديونهه .... احسهه بلا عقل او انها متورطه بشي يجبرهه تتصرف بغباء لهدرجه مادري شنو سالفتهه و وين راح نوصل وياهه!!

نمت واني على تفكيري بيهم ....... كعدت على هوسه اخواني واحد يدور جواريبه وواحد يدور حذائه ...

كمت غسلت وصعدت بدلت ونزلت وهي واكفه تخزرني بعيونهه اني ماهتميت شربت مي وطلعت ......

مثل كل يوم طريقي اكثره مشي بس هالمره انتبهت على واحد طويل وضعيف وبايده جكاره وجريده ....

شفته واكف براس الفرع ويقرا بالجريده ومن مشيت هو نفس طريقي ونفس المكان الاصعد منه صعد ....

نزلت وهو بقى مانزل وراهه بشويه داامشي وانتبهت عليه كدامي يمشي وبعدين وكف عبور الشارع المواجهه للكليه وضل يدخن قبل ماادخل انتبهت اجه عليه واحد
وكفو يسلمون ويحجون وهذاك الي وياه يباوع على كليتي والاول عينه عليه ..... اني مشيت بسرعه خفت كلش منهم وبس اريد اشوف ايوب احجيله .....

شفته واكف ويه جماعه ماعرفهم واني نفسي سريع
وكفت على جهه انتظره يجي لشويه واجه والولد
واكفين وراه ....

- ايوب

يأشرلي بعيونه عليهم ويعض بشفته بمعنى اسكتي
وكلي ....
هااااا ياروحي هم متأخره وجايه تركضين عرفتج راح تجيني مكفوشه هيج ول يابه انا مو اوصيج تطلعين من وكت من بيتج هسه عليش هيج مكطوع نفسج من الركض

- مااادري اخذتني نومه واجيت اركض ... شكد بعد باقي للمحاضره

- نص ساعه بعد

- لعد خلي اكل شي طلعت بدون ريوك وهسه كلش جعت

- ايييه عجل هالركض هاذ مايرادلو اكل امشي يااابه تا ناكلنه شغله

مشيت كدامه ورحنه للكافتريا ... كيك وكهوه هذا ريوكنه دائماً هنا بس اني مكدرت احط لكمه بحلكي قبل مااحجيله

- ايوب عفيه امان هسه

- ايييه امان ادري كبل لاتحجيلي ادري شفتي ويلحكوج ادري بس لاتخافين هذول مايسولج شي عوفيهم لاديرين بال الهم

- زين ليش يلحكوني شيردون يعني

- يولو هاي اجراءات عاديه شغلنه كلو هيج حتى انا مراقبيني ... الدوله ماتريد احد يغفل عن عينها كل خطوه تسويها محسوبه ومدروسه

- وهاي يضلون هيج عفيه ارتبك من اشوفهم والله

- لا لا ياخذولهم يومين ويرحون كتلج مايسون شي
همه بس يردون يعرفون مشيتج تصرفاتج بالشارع
شلونهه بيا ناس مرتبطه خاف عارفه شي مني هيج
يردون بس يعرفوهن يمشون بعد ..

- هو اني ماعندي احد بس انته وروعه اصدقائي اووووف
عليه هذوله النوب ... زين والجماعه اليمك جانو

- هذوله جماعتي بالشغل جنه نتناقش وهمه ضلو ينتظرون جيتج تايشوفون حسيتي بيهم يلحكوج وتحجيلي لو مانتبهتي .... وهمزززين انتي فهمتي عليه بسرعه

- ايييي الحمدلله فهمتك بسرعه جان هسه اني رايحه بيهه

- لااا يولو حتى وهمه يلحكوج انا احميج وبعد كل يوم ارجعج لبيتج بايدي .... لحد مااطمئن مايلحكوج يلا اعوفج

- ياااريت لاني اليوم من هو وياي بنفس السياره اني ماضل بيه عقل اكلني الخوف

- لااا تخافين ياروحي انتي انا عندج ماخلي احد يمس شعره منج والله

- الله يحفظك الي ويكفيك شرهم
.
.
كملنه دوام وهو وصلني مثل كل مره لراس الفرع وهو بجهه واني بجهه .... من وصلت البيت صعدت اشرتله يروح وضحكتله سوه حركته المعتاده بشعره وحواجبه وضحكته السكران بيهه وراح واني ضليت اباوع عليه
لحد ما كام ميبين بعد ....

بدلت ونزلت اغسل واكفه على المغسله واجتي امي
متجتفه وواكفه يمي ...

- شكوو

- لا عبالج هاي هيج ربحتي ونفشتي ريشج علينه

- لاااا وداعتج ياااممممييي ماافكر هيج مثلج اني
بنت ابويه واخلاقي مثل اخلاقه الماوصلتيهه

- اي اي طلعي لسانج بعد طلعي شباقي بس ترفعين ايدج وتضربيني شكد حقوده شوفي النار شلون تتطاير من عيونج هي هاي الاخلاق التحجيلي بيهه

- لااااا لاااا شفتي شلون تضلين متفهمينه لانج لو تعرفين اخلاق ابويه شلونها وعزت نفسه جان عرفتي اني شنو
باختصار ياعيني انتي ماتهميني ومشايفتج اصلاً
بس من تغلطين بحق ابويه واخوتي لاااااا هنا نختلف

- دصبريلي بس اصبري يابنت بطني لاشوفج الدنيا شلون ادور عبالج انساهه الج بس اصبري وشوفي

- ايدج وماتنطيج
.
.
.
————-————

#شقراء_بغداد

بارت_٧


مشت الايام وايوب كل يوم يوصلني ويوصيني انتبه على نفسي .... وكل الطريق يحجيلي عن عائلته وعن حديثه بالذات خلاني اعيش بكل تفاصيلها واني مشايفتها ...

بعد اسبوع ماصار احد يلحكني من هذوله الجماعه
رجع روتينه طبيعي .... بالكليه كلها عرفت بارتباطنا وكلها تحبنا وتكول انتو متوالمين ..

ماصار يوم وزعلني بي ولا تعدا وياي بالكلام حتى
مايعلي صوته عليه ويشجعني على الكتابه ويجيبلي
كتب اتعلم منها شلون اكتب ....

بيوم من الايام جان هو رايح بمهمه لكربلاء ومناك راح زار الامام فمن اجه الصبح ماخلاني ادخل المحاضره ورحنا لمكانا المعتاد ....

- لو تدرين شلون كلبي مفرفرح عليج
احس روحي طفل ومضيع امه بالسوك والله هيج انا احتاجج واشتاقلج

- اني عندك ووياك بكل وقت لاتخاف

- دحكي شو اشتريتلك

طلع كلادتين بشكل مقود السفينه وحده لونها ابيض
والثانيه زيتوني ... وكلي اختاري .. اختاريت الي
لونها ابيض ...

- هاي. وحده عندج تضل ووحده عندي
مادامنا سوا ضلي لابستها

- اكييد راح تضل غاليه على كلبي

- البسها الج

- لا لا اني البسها

- هههههههه جبانه

- استحي شبيك

- وانا بحبو لمستحاكي

عرفت منه ان حجي اهل حديثه يكون مشابه
للسوري شويه وكالي بصريح العباره يسموها ام الدلع حديثه واغلب ناسها شُكر وعيونهم ملونه وحلوين ..

فدائما اطلب منه مايحجي بلهجه هاي الا كدامي ...
وهو مايعارض طلبي ويضل كل مانكعد سوه يحجيلي بهاي اللهجه ...

بعد اسبوع بدت امتحانات نصف السنه ... والمواد صعبه فابتعدنا شويه وصار كل وقتنا بالدراسه .....

كل يوم امتحان الصبح نوكف اني وياه ويراجعلي
ويشرحلي كم سؤال او فكره ماخذهه من ولد الاقسام الداخليه الي بالمرحله الثالثه ويفهمني عليهه هو واكف ويحط الورقه على الحايط ويشرح واني احاول اركز وياه بس قربي منه ولون خدوده وشفايفه تصير ورديه كلش بالبرد تشتت تفكيري ....

عدت الامتحانات بخير صح صعبه المواد بس تعبنه بدراستها ... هو باخر يوم يوصيني انتبه على نفسي ويحجيلي قصايد بدويه ماكدرت احفظهن لان صعبه عليه كلماتهن ... وهو من يكملهه يفهمني ليش وشلون نحجت هالقصيده وبيا موقف ....

اتفقنا على ان نصير نتواصل بالرسايل واتفقنا كل ٣ ايام نتبادل الرسايل ويكون المكان هو عند سندانه الورد الي بابنه ....

طوال الفتره هاي امي شاده وياي من دون الكل
اني مااشكيهه لابويه انقهر عليه لان ماعايزه مشاكل هو تعبان ومريض فاني اردهه واتعارك وياهه

اخويه مصطفى وعلي كل وقتهم بالطوبه ودعاء بيت جيرانه تكضي العصريه وتسهر مرات يمهم ... همه ناس كلش خلوقين ولدهم دُره مالهم شغل بالرايح والجاي ....
بناتهم بكصتهه وتضل يمهن تلعب ويشوفن كارتون سوه وابويه مايحجي شي لان يعرف بيهم ناس طيبين ..

اني عندي صديقه من الابتدائيه وياي بس اخوه بطلهه من خلصنه ثالث وضلت كاعده بالبيت تنتظر زواجهه حتى تخلص من محكوميه اخوها ....

كل فتره امر عليهه نكعد نسولف ونتغدا سوا هي بنفس منطقتنه فمره اني راجعه من بيتهم ودخلت بفرعنا .. احنه فرعنه صاير عريض شويه لان بالبدايه قريب الشارع ...

شفت سياره البيكم طابكه بابنه كملت طريقي وصلت يم الباب سمعت صوت ورايه انداريت لكيت محمد واكف وشايل بيده صندوك رمان ... اني جمدت بمكاني بس فاتحه حلكي وواكفه ...

- شلونج زهراء ماشاء الله كبرانه

- شششجاابك هنا

- هو هيج يسلمون شنو شجابني غير مرتي واجيت
اسلم عليها وياي اهلي لا تخافين ماجاي وحدي

هو كال هيج واني احس واحد وخنكني بلكوه صرت اتنفس يعني هذا بعده يريدني مرته لعد وبابا مو كلي انسي واني احل السالفه !!

فتحت الباب ووكفت على صفحه وهو دخل حط الصندوك وراح كعد يمهم بالهول ... اني ضليت
بنفس وكفتي اتنفس قوي اريد اهدء ... وبعدين كلت
اني ابويه وياي مايخذلني ويجبرني ان رفضت هو
مستحيل يجبرني ويزوجني الهم ....

قويت نفسي وكلت خلي اكرهم بيه ... اني بوقتها لابسه فستان قصير لحد الركبه لونه ماروني وجواه كالون اسود وشعري فاتحته بس شايله خصله صفح بماشه

رحت سلمت على امه وخالته السعلوه كل مره تجي
واخته صغيره وابوه ... شفتهن رجعن يبسبسن كلت والله اله اطلع حركتي بيجن دصبرلي وكمت رحت بدلت

لبست ستريج نيلي وبلوز على الحافه وردي عريض ومدنفش ورتبت شعري ورفعت الردانات شويه واخذت روايتي باقيلي بوقتهه خمسه وعشرين صفحه وتخلص

اخذتهه ونزلت اطكطك بشحاطتي ولا اهتميتلهم اخذت كرسي من المطبخ وحطيته بالطارمه الي صايره بنص البيت

وكعدت وحطيت رجل على رجل واقرا وكل شويه
اكلب بشعري منا ومنا وهو شلونه عيني يخبل واني فاتحته والعب باطرافه بايد والثانيه لازمه بيهه الكتاب

اجتي عليه امي كالت ...

- كومي حطينه الغدا خاتون

- شكرا سبقتكم تغديت يم صديقتي

- دكومي عيب العالم كاعدين وكل شويه سالين عليج

- ليش شعدهم ويايه اعرفهم يعرفوني شعندي كاعده يمكم انتو سوالفكم على كدكم اني مالي مكان بينكم

- انزول عليج من لسان

راحت وهي ادردم عليه وحدهه اني منطيتهم الاذن الطرشه وضاله اقرا ... اجتي اخته الصغيره اسمها
بنين وكفت يمي وتباوع بالكتاب ...

- ليش تقرين شنو عندج امتحان

- هههه لا لا هذا الكتاب مو مال امتحان هذا قصه
وكاعد اقراهه

- اني ماحب اقرا ماعرف اقرا زين

- لااا سهله القرايه وحلوه كلش انتي بيا صف

- اني بالثاني وانتي ياصف

- اني هم بالثاني بس كليه ان شاء هم فد يوم تكبرين وتصيرين بالكليه مثلي

- الله واصير حلوه مثلج بس ماريد اقرا قصه مثلج

- ههههههههههههه لااا لاا بكيفج ترا تقرين الكليه
مالهه دخل بالقصه هي هم مدرسه بس مال كبار

بهالاثناء بابا صاحني ودخلت عليهم وبايدي الكتاب
وبعدهه الضحكه بوجهي

- هاا بابا

- تعالي باباتي اكعدي هنا يم خالاتج شويه يسالون عليج

- اي بابا تدلل ..... كعدت يمهن وانداريت عليهن

- اييي شلونكم ان شاء الله مرتاحين بالكعده عدنا
كلتها ورفعت شعري ورجعته ليوره وانتبهت عين
محمد عليه كلت فرصه واجتي ليش اضيعهه اله
اليوم اخبلهم ....

الخاله : اكلج عيني هاي انتي منين جايبته للملزوك
هااذ
وتأشر على الستريج ..

- اخذتلياه بيبي عجبج الستريج !!

- شنييي

- اااه اعذريني شويه حرف الراء مايضبط عندي
اسمه سترريج

كلتها بمياعه وهذاك عينه عليه وابوه هم مركز عليه وبابا طلع من يمهم هو وامي مدري شيسولفون

فاني استغليتهه وصرت اتموع بحجيي واعلي صوتي
حتى يسمع محمد وابوه ... ادري بيهم يتخبلون من هيج بنات واني اريد اخبلهم .....

الام : اكول يمه محمد صيدتك معوجه حلك

- هههههههه هااي شنو خاله معقول محمد يصطاد شي معيوب

- يمه اني راضي بصيدتي

الام : اييي خلي نشوف نصيبك تاكلها لو لا

من سمعتها هيج كلت دصبريلي واخليج انتي الي تتوسلين بيه ابعد عن ابنج ....

كمت من مكاني وافتر بالهول بطولي الناعم الحليو
بالستريج وابوه يلعب بشواربو ويباوع وكفت يم
المعرض مالتنه وسويت نفسي ادور على شغله
هو جذب ماعندي شي بس اريد احرك كلبهن لان
هنه يحسبني وحده بنت شوارع من لبسي فكلت خلي يشوفن بنت الشوارع عدل ....

اجه باب جان صحت عليه واني بعدني فاتحه الباب
مال المعرض ...

- بابا عفيه ممكن تنطيني هذيج العلبه مداكدر الوحهه

- اي بابا ادللي .. وهاااي العلبه لبنيتي الكصيرونه

- حضنته وكتله بغنج ... بااابااا لاتكول عليه كصيرونه

هو ضحك ومسح على شعري وراح كعد يم ابوهم
وهنه صافنات عبالك ديشوفن فلم ومحمد وجهه احمررر

اجتي امي من بعد ماخلصت المواعين وكعدت يمنه
ودعاء اخذت بنين وصعدن يلعبن ...

الام : هاا ام زهراء وين رحتي فكدناج
- عيوني والله غسلت المواعين واجيتكم
- وليش ما البنوات يساعدنج كله عليج

باوعت عليه اني لعب باطراف شعري وكتلهه هاا

- ليش متغسلين المواعين بدل امج مو خطيه هي تشتغل وانتي كاعده تدلعين

- بابا مانعني من غسلهن واي شي يتعلق بالتايت
مايقبل اتقربله لان ايدي تتحسس منه وهو يخاف عليه

حجيته وابتسمتلهه ورجعت فتحت كتابي ومادرتلهه
بال وسمعت الخاله المصونه تكول ..

- لج ام محمد هاي مصيبه اذا اطببيهه بيتج اسمعي
مني ولاتناسبين هالعايله مشفتيهم شلون لامستحه
لاادب يتحاضنون بنصنه ويتمايعون هي وابوهه

-غير هالولد السباني بيهه دسكتي هسه بعدين نتفاهم

ضحكت بهدوء وعيني بكتابي بابا كلي سويلنه جاي
اني كمت رحت للمطبخ وكتابي بايدي ماذبيته ..

حطيت القوري على النار ودااحضر بالاستكاين
وفات عليه محمد وخالته ...

- هاا محتاجين شي

محمد - اريد احاجيج

- اي كول اسمعك ... احاجي واني اغسل بالاستكاين
بس اخضهم بالمي واحطهم ..

- عوفي الزفت الي بايدج واسمعيني

- اني كتلك اسمعك رجاءا بلا الفاظ سيئه احجي شتريد

الخاله : كررره عينك يامحمد هه

- خاااله اطلعي على جهه بله خلي اتفاهم وياهه

راحت هي باب المطبخ وكفت وتهز بايدهه معاجبهه
الوضع عيني ... وهذا واكف وصاك سنونه ويحجي

- انتي شهالصلافه العندج متكولين رياجيل كاعدين
تفرفرين وزرورج مبينه وضحكتج شعلوها

- ايي

- وبعدين انتييي شلوون تطلعين لوحدج بالشارع مدري وين تسيبين ولا عبالج سالفه الكليه ماداري بيهه لبسج هذا اذا متغيري اشككه عليج

- هههههههه لااا والله وبصفتك منووووو جاي تحاسبني هااا كلي انته ابويه لا اخويه هم لا منو انته رجلي اكيييد لااااا انته مجرد اقاربي ميخصك اذا اني البس اطلع احجي مااااعليييييك مفهوووم

- لججججججججج جااااا والفاتحه القريناهه هااااا هاااا مو سنييييين انيييي انتظر بيج هاااي مو بعييينج

- خلي نصحح الامور محمد انتو قريتو فاتحه قبل ٤ سنوات مااشي واني وبابا متفاهمين وهو يعرف اني رافضه الزواج هذا وشغله الانتظاار اني ماجبرتك

- هي هييي هييييييييي شنو رافضه شنوو بابا شبييج انتي شو طولان لسانج هاي الكليه هيج اطول السان

- والله عيني ماطولان لساني انته اسئت الفهم واني
وضحتلك وخلي يكون بعلمك مره الثانيه ان ادخلت بحياتي ولبسي واي شي يخصني كل كلمه حجيتها اروح احجيها لبابا وخلي هو يتفاهم وياك

- اصبريلي بس اصبريييلييي تهدددين مووو بسييطه اشوفج محمد منو

- وخر عن طريقي خلي اودي الجاي

عفته يفرك بوجهه وراح غسل وخالته واكفه وتضحك عليه وهو صاح عليهه ورجعو كعدو ...

اني قدمتلهم الجاي وصلت عنده ماراد عفته ورحت رجعت الصينيه بالمطبخ واخذت كتابي ورجعت يمهم وعيني بالكتاب اندمجت بي لان اني كلش احب هالروايه " مابين القصرين " لنجيب محفوظ وماباقي كم صفحه وتخلص فكلش مندمجه بيهه عفت امي وامه يحجون حتى ماصرت اسمعهن وبالي كله على الروايه كأني عايشه وياهم واضحكوحدي ويه الكلام واعبس وياهم بغير عالم رحت

ماحسيت الا على امي ادغني رفعت عيني عليهه
وشفتهن واكفات ولابسات عباياتهن ويباوعلي بنطره استحقار .. فرحت الصراحه هيج اريدهن يفكرن بيه

- ااه راح تروحون بعده الوقت مو متاخر

الام : لا حبيبه الوققققت مشىى وانتي ماتدرين

- اييي صحيح اني مادري على شي بعد من اقرا روايتي هاي كوولش احبهه يله المهم توصلون بسلامه

بوسته بالهوا وكلبي اكول دروحو مو خنكتوني
والخاله راحت كبل متريد تسلم بعد احسن خففت عليه حملهه ... ومحمد ماشفته اصلا شوكت طلع ....

راحو همه اني تمددت ورافعه رجليه على القنفه وبايدي الكتاب واجتي امي ادري بيهه تريد تنفجر وحان وقتهه

- يالمحنايه عيني كومي لمي الاستكاين

- اي مو مشكله هسه المهن .. كمت لميتهن وغسلتهن
ورجعت تمددت بنفس مكاني وهم رفعت رجلي

- انتي شنو من بنيه من تشوفين ناس كاعده اذب هالكتاب
واحاجيهم انتبه وياهم عيييب هيج عييييب هالكتب متعلمج الاصول لو بس تعلمج طول اللسان

- هسه اني مطوله لساني عليج

- اكصه الج عاايز والله

- لعد خلص من اطول لساني عليج عود احجي ورزليني هسه عوفيني خلي اقرا

- وانتي شكو هيج تحاجين الولد مو عيب ميكول عليج ممربايه وماعدهه اخلاق تلاسنين الرجال

-هااااا اشوف الاخبار بسرعه وصلتج هاي خالته السعلوه حجتلج مو

- يااا صخاام تكول عليهه سعلوه لج المره شسوتلج وكارهته فوك شينه كوه عينه

- والله عيني شوفي اكلج لا انتي ولا هي ولا ابنهم
تهموني لو بكد شعره شايفه شعره شنو هيج انتو متهموني وابنهم من يطاول وياي بالحجي اطاول عليه لو محترمني مااحاجيه ماااشي فلضلين تحجين وانتي مفاهمه شي

- وينه ابوج خلي يجي يشوف لسانج المترين هذا
وينننننه

راحت صاحت ابويه نزل وهو يافف دخل عليه اني
كعدت وكتله ...

- بابا عفيه كللهه خلي تعوفني يعني اني شمسويتلها
اطلع عصبيتها بيه يعني كاعده اقرا وممسويتلكم شي

- اييي تمسكني كدامه تمسكني وقبل شويه لسانج
شطوله شفت شلون اليوم ماحترمتهم وضلت مكابله
هالكتاب وممعبرتهم مو عيب شيكولون علينه

- انتي معليج بيهه بنتي حره تكعد وتسولف باليعجبها وبعدين هي ماتعرفهن شتسولف وياهن يعني واذا تقرا اني اشجعهه تقرا احسن ماتقضي وقتها بالسوالف مالها معنى بنتي تعرف قيمه وقتها

- اي بابا يعني هنه سوالفهن مو بعمري وبس ينتقدن بيه فاني كلت اتجنبهم حتى لا يضوجوني ولا اضوجهم وروايتي مابقالهه شي وتخلص وضليت منتبهه بيهه ماشوف اني ضريتهم مو صح ؟؟

- اي بنتي صح ماعليج بيهم كملي قرايتج اني اريد
انام ماريد صوت بعد

راح بابا صعد واني ابتسمتلهه بنصر وهي طلعت
من الهول بعصبيه رجعت تمددت على بطني واضحك
على السويته بيهم يستاهلون والله اكرهم ...

وبهاللحضه تذكرت ايوب واليوم المفروض نتراسل لان صار ٣ ايام من اخر مره شفته بيهه كمزت من مكاني وركضت حتى افتح الباب واجه اخويه مصطفى ورافع حواجبه بمعنى شعندج ...

- هاا اجيت من اللعبه

- ايي شعندج هنا

- ااااا هو دكو الباب واجيت اشوف منو بس هيج

- ماكو احد روحي حطيلي غدا جوعان

رحت للمطبخ وحميت الاكل وصبيتله ووديتله الصينيه ورحت لغرفتي وكل شويه اباوع من الشباك خاف يجي

صارت الساعه عشره بالليل كلها نامت واني بالي يمه بغرفتي كاعده وسمعت صوت على الشباك كمت من فراشي فتحت البرده وشفت ايوب واكف ويفرك بايده وينفخ بيهن من البرد .... باوعتله واشرتله

حط ايده بجيوبه وضل يضحك واشرلي انزل رحت فتحت الباب بهدوء ونزلت واني اتلفت خاف احد يشوفني .... وركضت وطلعت فتحت باب الشارع

وشفته وهو قريب يمي كلبي يريد يطلع من مكانه وضحكتي ماليه وجهي تقرب وحط الظرف بايدي
وضحكلي وراح ...

من كثر لهفتي عليه ماعرفت احجي شي سديت الباب ودخلت بالاستقبال فتحت الضوا وكعدت فتحت الظرف وقريت المكتوب ....

⭐️⭐️
حسناء يا ظل الربيع، مللت أشباح الشتاء سوداً تطل من النوافذ كلما عبس المساء
حسناء.. ما جدوى شبابي إن تقضى بالشقاء عيناك.. يا للكوكبين الحالمين بلا انتهاء لولاهما ما كنت أعلم أن أضواء الرجاء سوداء ساجية.. وأن النور من صنع النساء هي نظرة من مقلتيك وبسمة تعد اللقاء ويضيء يومي عن غدي، وتفر أشباح الشتاء

عيناك.. أم ليلًُ ينام على وسائد من ظلال ساج تلثم بالسكون فلا حفيف ولا انثيال إلا صدى واه يسيل على قياثر في الخيال إني أحس الذكريات تلفيها بالظلال .. في مقلتيك مَدى تذوب عليه أحلام طوال، وغفا الزمان.. فلا صباح ..ولا مساء ولا زوال! أني أضيع مع الضباب سوى بقايا من سؤال: عيناك.. أم ليلًُ ينام على وسائد من ظلال!
اشتقت لكِ يا وردتي .. سأذهب بمهمه لاربع ايام
في البصره .. وددتُ منك القبول لإكمال ديني معك ..
واخيراً اهتمي بنفسك جيداً .

حبيبك المخلص
ايوب ..

⭐️⭐️

قريتها بكل لهفه وفرح رحت صعدت طلعت اوراقي الي بلون بني مصفر وقلمي الاسود وضليت احرك بالقلم واني افكر ... ياترى هو يشعر بكل هاي الاضطرابات الي بيه ؟؟؟؟..

صار ذهني مشوش واعتلت رجفه بارجاء صدري
ومحيط مخيلتي ... رفعت راسي للسماء وكلت ..

ربي رحماك اغثني ربي رحماك قوي قلبي ...
فقلبي الضعيف يحتاج لقوه منك ...

رجعت اباوع للورقه والقلم وكتبت ....
⭐️⭐️
سيدي العزيز ايوب ..بعد التحيه ...

اريد ان اقول شي ربما تجهله او انك لم تفكر به
فانا بصفتي انثى مثل باقي النساء في بلاد الشرق
الفظ بعد ابي نعم نعم الفظها كالببغاء ...
وبصفتي بنت جميله حسناء لابد ان اكون داخل
قلبك ياقوتهً حمراء ... هذا هو قلبي نقياً صافياً
كالماء ... لابد ان اكون في عينيك الجميله نجمهً
في السماء .....

هل تراك سيدي داءاً لكل دواء !!
ام هل تراك رجل الوفاء !!
انا عنك لن اسئل كي ادع قلبي يتعرف
عليك فقلبي الصغير يعرف اشياء كبيره ...
رغم ان الحب اكبر .. واعرف ان ذات الله العظمى
تسكن قلوب العشاق ... والشمس ياسيدي تخرج
من ارواح العشاق في الشتاء تدفىء يدينا الباردتين .. عن قلبي فلا تسأل فأنت مالكه واعلم بمملوكك مني ..
واخيراً اود ياسيدي ان تكتب لي كثيرا ً...
فكلامك يزرع في قلبي الامان

كن بخير دوماً وعُد بسلامه لي ....
زهراء

⭐️⭐️

حطيتها بظرف وعطرتها ورحت حطيتها بالمكان
المتفقين عليه .. ورسالته ضميتها بكنتوري ...

مرت الايام وكل وقتي اقضي بالكتابه او اكمل قراءه كم كتاب عندي ... وبهالفتره امي صارت حبابه وياي

تغيرت جذرياً صارت تطلع تشتريلي ملابس واحذيه ومرات تجي تكعد تسولف وياي وتعتذر على اشياء قبل ..مااطمئنيت لهالتغيير بس كذبت ظنوني ..

رحت يومين لبيت بيبي احلى اوقاتي هي من اكون
يمها احبها اكثر من اهلي ... هي اطير من الفرح
بجيتي يمها وتحير شتشريلي والاكل اله تخلي
بطني تنتفخ يله تعوفني ... والليل يكضي بقصصها
وسوالف عماتي مرات ...

احنه عائله بطبعها بسيطه بكل شي وبنفس الوقت عزيزين نفس ... حاله الماديه وسط بس الي يشوفنا
يكول اغنى الناس لان بيبي وعماتي وابويه طبعهم
كريم لدرجه ان الضيف مايطلع من البيت الا وياه
هدايا لكل عائلته نفر نفر الكبار والصغار ...

واحيان يجون اقارب بيبي يباتون اسبوع او اكثر
وبهالاسبوع بيبي تجيبلهم كل الي بالسوك وتاخذهم
زيارات ببغداد ... ومتنقص عليهم شي ..

فكل العشيره والجيران يحبوها ويحمدون بيها وبابويه بس عمي عنده نوع من البخل كلش حريص بفلوسه ويكلب الدنيا على الفلس عكس بابا ... الي هو يروح ينطي للناس والي يسمع بي مريض يجيبه بيتنه وياخذه بايده للدكتور ومايرجعه لبيته الا وهو زين وكل هذا من فلوسه ماياخذ شي منهم ....
وعمي الثاني الصغير هذا ماله دخل باحد كل همه عائلته وصيته يحب يبني عالمه الخاص .. ابد ميدوخ نفسه بمشاكل العائله وحجيهه عايش حياته وحده ..
اني واخواني طالعين على بيبي بالشكل والتصرفات والطيبه .. لان احنه ماشفنا امنا هواي كل وقتها بالدوام او زعلانه بيت اهلها هاي ذكرياتي منها ...

اولاد عمي عكسنا طالعين على امهم عناد وشويه
مرات يصيرون حبابين من مايسمعون
كلام امهم ....

اما عماتي فكلهن جمال وطيبه وسبعات كلش ماينغلبن عيبهن الوحيد مهووسات بالنظافه لدرجه ....

بابا انسان مثقف لدرجه معلمنه على الاحترام لنفسنا والاخرين واهم شي الكرامه .. هو بنه ثقتنا بنفسنا على حجر اساس هو ...

الله خلقك لسبب مو عبث فلازم تكون مسؤول حتى
تحقق سبب خلقك وتخلي وجودك نافع للارض
الي منها ترتزق ....

هذا كلامه خله بيه حلم وهو اني لازم الكه ذاتي واحقق شي يخلني اخلد بالدنيا بعد فنائي ....

بابا يكول من نتناقش بامورنا المستقبليه للدراسه ...

"شتريد اتصير صير بس صير آدمي "

بالبدايه كنت اضحك على هالحجايه ومن كبرت عرفت شكد معناها عميق .... صح لازم الانسان ماينغر بالدنيا ويتصرف بحيونه لاجل غايته .. مالازم تكون حياتنه غابه وصراع لاجل البقاء لازم تكون تعاون لاجل الرضى ....

بهذا اليوم بديت بكتاب اسمه ..
" تحف العقول لآل الرسول "

كان عباره عن اقوال تجذب العقل للتفكر والتفكير
من بينها قريت عن الامام علي عليه السلام ...

" يأتي زمان عليكم ترون مافي الشرق والغرب في
ايديكم... "

وكان اكو جدل عليها حتى اني انتابني الفضول شلون
يصير الشرق والغرب بايدي؟؟؟؟

بس ماشكيت بالقول لان الامام علي اكبر من ان ينشك بكلامه ... بس بقى بنفسي اشوف هالزمن الي ذكره شوكت يصير !!!

للمغرب واندكت الباب طلع بابا يشوف منو وصاحني
-ها بابا
- بنتي هاي البنيه تريدج تعالي شوفيهه

طلعت وشفتهه بنيه صغيرونه شعرها قصير ومسويه كرون وقمصلتها منفوخه مسمنتها ...

- هاا حبيبتي كولي
- دنكي دنكي

نزلت لمستواها وشاورتني ...

- هذا عمو ايوب كلي تروحين لزهراء تنطيها هاي العلاكه وتبوسيها

باستني وضحكت لها ورجعت بستها مرتين

- هههه هو وينه هسه ؟؟

- بالسياره هناااك هو وبابا

مديت راسي من الباب واشوف سياره طابكه براس الفرع ...
- يااا هذا تخبل اكيد شلون جاي هو وابوج
زين تعالي وياي جوه حتى انطيج رساله ترجعيهه اله ..

دخلنه للبيت وكعدتهه بالهول وانطيتهه كليجه وعصير كعدت تاكل واني فتحت العلاكه ...

لكيت بيها كتاب وسوار ناعم ذهبي وظرف فتحته ..
وقريت المكتوب .....
⭐️⭐️
الى مالكه قلبي واميره حياتي ...

بعد ان قرأت مكتوبك وتمعنت بافكارك المطروحه اقررت بإنك من كنت انتظر طيله اعوامي الماضيه زدتني شرفاً وعزاً باختياري لحبك المجنون ولاتخافي واطمئني انتِ ياقوتتي وابنتي وامي وامرأتي ... انا لوالدك طائع ولقرراه سامع ولكِ حامي ولعفتكِ وشرفكِ انا صائن
انا ياانستي ابن الغربيه لايوجد بتربيتي جزء
اهوج للتلاعب بالنساء فكيف
ان كانت اميره النساء !!!!
انتِ لي وطناً وملاذ آمن وانا لست محتل
كونِ لي حياه وامان فانا مغترب وانتِ
مسكني الوحيد بكِ انا ارى الحياه ولن اعدم
حياتي باذيتك ..اسكني بي وكونِ على
يقين بإن غير الموت لن افارقك ..
كونِ بخير دوماً وتذكريني وانتِ
تقرأي هذا الكتاب .. هذا السوار
جلبته لكِ من البصره احتفظي به
واعلمي بأنني مشتاق لكِ للحد
الذي لا يطاق.. احبكِ اكثر من كل كثير

حبيبك المخلص
ايوب
⭐️⭐️

بعد ماقريت المكتوب صعدت لغرفتي حتى اكتبله .. كالعاده اوراقي وقلمي الاسود ...

الي اختلف اني ماحبيت ابين كل هالشعور المكتظ
بداخلي بحبه دائماً متحفظه بمشاعري تجاهه رغم
انها معلنه بالحب بس مو بقول لساني ..

فكتبتله ...
⭐️⭐️
انيق المشاعر وكنزي الاوحد ايوب..
اعتليت فكري دوماً بعذب فكرك واخلاصك وكثره شهامتك .... شكراً لكل مافعلته لي ..شكراً لهداياك
المميزه دوما .. يسعدني انك بخير وان الراحه متجليه بحروفك مرهفه الاحساس ... اتمنى ان تكون قد اتممت مهمتك من دون ازعاج او تعب ... انتبه لِخُطاك وتذكر انك وديعتي عند الله فلا تجعل عملك يشوه حقيقه الملاك الذي استودعته الرحمن كن دوماً كما علمتني ان تكون عليه صادق ومثابر وامين ومحب رغم الاذى ... واخيراً وطنك يستأنس بمكاتيبك وبشوقك فداوم على اسعاده ..

ملاذك الامن دوماً
زهراء
⭐️⭐️
حطيتها بالظرف وعطرتها ونزلت ضامتهه بملابسي ومن وصلت للبنيه انطيتها الهه وضمتها بقمصلتهه واخذت ورده من السنادين الي عدنا وفهمتها تنطيها الهه

صار الليل وعقلي ماترك ثانيه بدون مايفكر بي ...
كمت طلعت الكتاب الي جابلياه وكعدت اقرا ...
حسيت على الساعه ١ بالليل اول مره اسهر هيج على كتاب يمكن حبيته اكثر لانه منه فمااحس بالوقت من يمشي ... نمت واني بداخلي فرحه وكأن كل خلاياي ترقص بانغام الحماس والرضا ....

مرت الايام وبقى على الدوام ٦ ايام بهالاثناء اني
طالعه يم صديقتي لانها جيرانه فشوكت مااضوج
اروح يمها ... اندكت الباب ورجعت صديقتي تكلي
اخوج بالباب يريدج ترجعين وياه ...

اني هم سلمت عليهم وطلعت شفت مصطفى واكف
يم العمود ينتظرني مشيت اله ...

- هااااا شعجب جاي عليه هالمره
-اجونه خطار وامي كالت تجي تساعدني
- منو اجه ؟؟
-اهل العرب
- هاااا

مشينه واني ادعي كون محمد وخالته مو وياهم ...
وصلت البيت ودخلنا سمعت صوت بيبي هنا
راساً دخلت للاستقبال ورحت سلمت عليهه وبعدين
سلمت على النسوان جانن اربعه ورجولتهن هم
ومحمد اكيد مايفوت الكعده هاي بس خالته ماكو
والبقيه ماعرفت غير امه وابوه منهم .....

جيت كعدت يم بيبي ...
- بيبي منو هذني ماعرفهن
- هاي مرت عمه جاسم ضويه ومرت عمه جبار سناء وهذيج خالته هديه وامه
- هااا وهو شكو جاي
- دسكتي لا يسمعنج يمعزايه
- اوووف هاهيه سكتت اني رايحه اشوف شيحتاجون بالمطبخ

رحت غسلت ورفعت شعري لان جنت فاتحته وماغيرت ملابسي عناد بيهم ... كعدت صبيت الاكل وحضرت زلاطه واخواني ينقلون للسفره ...

سوينه سفرتين للزلم والنسوان هيج طبعهم همه مياكلون سوه مادري من شنو يستحون وهمه خوال وعمام

كعدت اكل وبالي مو يمهن ابد يحاجني اجاوبهن
مايحجن اني ساكته واكل .... كملنا اكل لميت السفره وبالمطبخ دعاء اختي تغسل مواعين ...

اني رجعت رتبت الهول ورحت داعزل بالمطبخ
صاحتني امي ...

- تعالي ماما حبيبتي عوفي المطبخ اختج تكمله

رفعت حاجبي وباوعت على دعاء وفاتحه حلكي
هاي منو الي دتحجي لو اني سمعي كام يخربط !!!
خلي نشوف تالي هالمسرحيه .... رحت كعدت يمهم واتصنع ابتسامتي وياهن ...

خالته هديه مره جبيره كصتني كص بعيونهه واني
دااظفر شعري صفح وهي تباوعلي ...

- اكول يبنيتي انتي ياصف
- خاله اني كليه مرحله ثانيه
- هاااا زين زين هوجست من شفتج هالكداتج كلت
ماتنفع اتزوج
- ههههههههه اي خاله بعد وقت للزواج

اباوع لامه تلوف بحلكهه وتتمضحك من جوه لجوه
اني مااخذ وانطي وياهم بالحجي لان ماارتاحلهم
مو تكبر مني بالعكس كلش متواضعه اني بس هذوله مو مال ينطون عين
اجتي بيبي كعدت يمنه وكالت ...

- اكلج بيبي حبيبه هذني خالاتج وعماتج ورجولتهن جايين خطابه عليج

بهاللحظه اني صفنت بوجه بيبي وكلبي رجف رجفه موت ...

- والولد شاريج وصارله سنتين يبني بيت بالولايه
حتى ياخذج يكول ادري بيهه ماتكدر على العيشه
هناك وهسه عمامه حاجو ابوج وحاجوني واني
هذول خوالي واثق بيهم واعرف طينتهم والقريب
اولى من الغريب

- بيبي ارجوج ارجوووج لاتكملين

- يابيبي دسمعيني هسه انتي ليش هالشكل قافله
الولد صارله سنين ينتظر نكله هسه روح بنتنه متريدك

- بيبي الولد على راسي اصيل وشهم وصاحب كلمه والف من تتمناه بس اني لا مو رفضي هو رفضي الزواج هسه ماريد

ام محمد - ليش ييمه البكدج مو خلفن تردين تعنسين هنا بيت اهلج البنيه مصيرهه بيت رجلهه هيه خطار عد اهلهه

- خاله هو...

بيبي - هسه كومي شوفي ابوج وحاجي هو كال خلي تجيني للمطبخ وتفاهمي وياه

كمت وكلبي بعده بنفس هالرجفه .... رحت وشويه
واجه بابا وامي هم ...

- بنتي هسه والله حطوني بموقف صعب جايبين
حتى السند مال البيت ويكلولي صار سنتين ابنه
يبني بي لبنتك ... وخوالي هذوله حاير والله حاير
شردهم

- ابو زهراء عيني ليش تحير وين نلكه هيج ولد
شاري بنتنه من سنين وهو مشايف ظفرها غير يعني رايدها ويحبها وهاي كم مره جونا من الباب ومحملين اشكاال فشله نردهم وهمه مابيهم عيب

- وهي شلون اذا ماتريد قابل اجبرها المشكله همه
لازمين عليه اني انطيتهم كلمه ذيج السنين لان بوقتها احرجوني مثل هسه وكلت يكبرون ويصير الي بي خير بس الظاهر قراري خاطىء اتخذته

اباوعلهم واسمعهم وكأني مااسمع ...رغم كل الحجي والحجج الاكدر احجيهه هسه ضليت ساكته كأن لساني توقف عن النطق ... رجع بابا كال ...

- راح اكللهم نردلهم خبر لاتخافين بنتي ولاتهتمين

- ابو زهراء عليمن المطاله اخصم السالفه هسه
شلون يضلون كل يوميه رايحين راجعين

- اي بابا كللهم ينطونا وقت نفكر بحل

عفتهم ورحت صعدت لغرفتي وقفلت الباب وارتاجيت على الكنتور واني محاوطه ايدي على رجليه ولامتهم لصدري والعبره خانكتني لاول مره احس بضعف

لاول مره اسمع صوت انكسار داخلي ...
شنو الاحجي ويه نفسي مادري .. شلون اتصرف
معقول اصير زوجته !!!!!

وايوب وحبه وين يصفى بي الدهر ؟؟؟؟؟

معقول اني اعرض ابويه لموقف حرج مثل هذا بعنادي وادري انه خجلان منهم ومالاكي حل يردهم بلطف واذا عاند مثلي رتح يخسر قرابتهم ...

والحل شلووون ؟؟؟؟؟؟؟

الهي اختر لي ولاتخيرني ... ضليت اردد هالدعاء
وجسمي كله يرجف خوف وقلق وضعف ....

حتى ايوباذا ردت اكله رادلي انتظر ٣ ايام
وشلون احجيله وهو حاط كل امله بيه واحلامي
وياه واماني معقول اضيعهن لاجلهم !!!!!

مر اليوم كله واني بغرفتي مطلعت لليل وصعدلي
بابا فتحت الباب وكعد بصفي ..

- خير بنتي شبيج

- بابا ماريد اخاف منهم

- لااا انتي بنتي السباعيه تخافين لا لا ممقبوله منج
ابد .. و ترا الولد طيب وخلوق واني بنفسي
كعدت وحجيت وياه كلتلهم اني ماريد شي اريد
اسمع منه هو وكعدت حاجيته على جهه والولد
فاهم وكلي مثل تبقى بهالدلال واني لو ما شاريهه
ماانتظر هالسنين كلهه جان هسه ابني يمشي لو مزوج بنتي اني ماجاي اقنعج اني بس اريد اوصلج الصار والقرار قرارج انتي واني وياج بكل شي تريدي فكري على راحتج كلتلهم اسبوع ونردلكم خبر

- ماشي بابا

حط ايده على جتفي وضغط عليه وطلع ... واني
ضليت بحيرتي تايهه ... بس اريد طريقه اوصلها
لايوب بلكي يلكالي حل ...

مر يومين على جيتهم واني بحيرتي باقيه وادعي
ان ربي يخليلي امل يخلصني من هالزواج المدبر

كتبت لايوب كلشي صار وحطيت الظرف بالمكان
المعتاد وضليت انتظر اليوم كله .. ومر العصر
والمغرب واجه الليل وايوب ماكو واني عيني على
الشباك اليوم كله ومابين ...

متمدده بفراشي وسمعت صوت سياره طبكت
فتحت الشباك بس الضوا قوي ماميزت شي
ضليت اباوع لحد ما شفت ايوب واكف وبيده
الرساله ... هنا كلبي ارتاح ورد بيه الدم بعد
ماايست بس ربي رحيم ماينسى عبده ...

شفته ضرب ايده بالحايط ورفع راسه يباوعلي
اني فتحت الشباك وصرت اباوعله ودموعي تجري ضل يفرك بلحيته وشعره ويروح ويجي اخر شي كتب على نفس الورقه وحطهه بمكانهه واشرلي انزل وهو راح صعد بالسياره ومشى ..

نزلت اركض اريد اعرف شراح يسوي ويخلصني
فتحت الباب بهدوء وجريت الرساله واخذتهه وصعدت فتحتهه وقريت. ...
⭐️⭐️
امي يانور دنياي ... طمئني قلبك وامسحي
دمعك ياغاليه انتي لي وانا لن ادع غيري يحظى
بكِ ..

انتظريني غدا آتي مع عائلتي لخطبتك
كونِ قويه من اجلي ...
⭐️⭐️
قريتهه ودموع الفرحه بجيته بللت الورقه ضليت
الليل كله اتكلب مغمضتلي عين بالي افكار ماتخلص ... وخوف وتوتر والفرحه بمجرد ان ايوب وعائلته يدخلون بيتنه هاي وحدهه كافيه تشغل فكري ....

ثاني يوم كعدت ونظفت وغسلت الطارمه ورشيت
السنادين بعدين رحت سبحت وضليت بغرفتي
كل شويه البس وانزع وشعري مره اظفره مره
ارفعه وارجع افتحه واضل مكفشه وارجع امشط

لحد ماصارت العصريه اني مبقيت شي مسويته
امي انتبهت عليه وضلت تحوم فوك راسي ...
واجتي لغرفتي وكفت وتخوصرت ...

- شعندج اليوم هاا شضامتلج من ضميمه
- شعندي يعني شايفتني مسويه شي غريب
- اييي هوستج هاي معاجبتني
- ايي وشنو يعني شتريدين توصلين
- عووذه شلون ترد دروحي شايفه نفسج مدري على شنو
- استغفر الله
راحت هيه وضليت افتر بالغرفه وعيني على الشباك شوكت يجون توترت اكثر من اي مره بحياتي

الباب اندكت واني كمزت من مكاني وركض للشباك وشفت سيارتين طابكات بابنه ... وايوب بهيبه شكله بالدشداشه والعكال والغتره شامره ليوره .. واكف يدك الباب وحواليه نسوان اثنين وزلم اربعه ... فتحلهم اخويه مصطفى ...

اني بقيت بغرفتي افتر مادري انزل لو ابقى محتاره
وماريدهم يعرفون ادري بي جاي ....

ضليت شويه لحد ماصاحتني امي نزلت متوتره والفرح مالي كلبي وادعي يتحقق الي اتمناه ....

الزلم كاعدين بالاستقبال والنسوان الاثنين بالهول ... دخلت سلمت وقدمتلهن عصير تمر هند ...

- ماشاء الله عليج يابنيتي وردايه مفتحه
- اي صدكتي يايمه عين الله عليهه

ماحجيت شي بس اتبسم ومدنكه وكلبي يريد يطلع من مكانه اريد اعرف شديحجون ....

المره الجبيره طلبت اكعد يمهه .. كمت كعدت بصفهه حضنتني وباستني واني هم بستهه شاورتني ...

- والله ماضنيت هالزلمه المشورب هالعرض عرضو يوكعو عود البان هاذ .. ابنا مكعدنا من امبارحا بنص هالليل ومخلينه انذار وكاد والدو واخو وعمامو لهين بالغصب

- اسفه اني ماردت اسببلكم مشاكل

- العشك يايمه مايعرف اب واخ فتصير المشاكل
موانتي السبب لاتهمي ... عسى ان والدج يرضى
والله عزيز علي وادري بمكابرو على نفسو ومادحكتو هالشكل الا امبارحا ... انا جدتو ام امو وربيتو على ايديا اعرف اطباعو وكلبو وان كان اختار مايستغنى .. ربنا يستر ان رفضو اهلج ..

- ربنا رحيم وراح مايخلينا باذى ... جده ممكن طلب

- اطلبي يابنيتي

- ان صار ورفضو فمن تشوفي كوليله اني فخوره بي وبوسي من راسه وشدي على اصبعه الخنصر واهتمي بي اكثر من كل وقت

- صاار يايمه عسى ربنا يجمعكم والله مايهدالو بال
ا ذا عندو اهلج ويسوي عيشتنه جحيم انا ادري بتركيبتو لهالولد

ضليت ساكته واباوع بالوجوه وامي عيونها تخزر بيه هاي شراح يخلصني من لسانها بس لاتسويلي مشكله هناك وسمعنا صوتهم على وعرفت هذا صوت ايوب

- عمي جيناك بالخير والطيب ليش تردنا هالرده هيج تجازي ضيفك

- ياابني داكلك البنيه مخطوبه الامر طالع من ايدي

- استغفر الله استغفر الله

- يابه ابو مصطفى من سالنا على المحروسه بنتكم
محد جاب طاري خطبتها تضحكون علينه انتم لو شنو

- لا يابه لاضاحك عليكم ولاشي البنيه كرابتنا رايديها من هي وصغيره وقارين الفاتحه واني منطي كلمه لخوالي هاي كل السالفه

- هذا هو فهمناك ابو مصطفى

- عمي رجيتك لاتكسر بختي هيج

- ايوووب يابه امشي خل نتوكل ورانه طريق

- عوفني يابه البنيه راح يزوجوها ياطريق

- اكلك انته شعندك ويه بنتي هااا حاجيني تعاااااال حاجيني شعندك وياهااا

- صلي على نبيك ابو مصطفى

- عليه الصلاه والسلام بس فهموني ابنكم شعنده ويه بنتي شجابك عليهه احججججججي

- عمي انا لا خايف ولا مستحي لاني مامسوي حرام انا البنت احبها وشاريها بدمي ولاتظن اني محاجيها لو مكربلها البنت تروح بطريقها وتجي بطريقها وانا احبها من بعيد لبعيد

- هااااا هاي مالكييت تحب غير بنتتتتتيييييي وجاي بكل عين صلفه وتكلي احبهااا وتتوسل

- ايييييه احبها وربي يشهد بصفاء نيتي الهه و الله والله وجلاله اسم الله ماشفت مثل ادبها ولا عرفت مثل اخلاقها والله حاسبها بنيتي واخاف عليهه والله والله روحي مثل الطير المذبوح تلوب من وكت العرفت راح تزوجوها

- سكتوووووووه لااجرم بي

- ياعمي انا ماظلمت ولا اجرمت ولاتعديت شرع الله وجايك على سنه الله ورسوله ... داخل عليك ياعمي لاتهدم حياتي بيهه انته بيدك تكدر تزوجها الي وعهد علي ارعاها وادللها مثل دلالك وازيد

- استغفرررر الله استغفر الله لك منين طلعتلي انتتته لك يابه افهم اني منطي كلمه للناس اني ماعندي مشكله وياك ولااكرهك ومناقصك شي بس السالفه طلعت من ايدي هسه ذاك الرجال صارله سنين ينتظرها وباني البيت ويجهز شكله روح غيرت رايي مانطي هاااا
فهموني ياخوان بالله عليكم ترضوهاا

- والله حقك يارجل موقفك صعب وكلمه الرجال صعبه وموقف ولدنا اصعب شلون تريده يوكف يتفرج عليهه من ياخذوها ليموت بكاعه

- ابو مصطفى هي االبنيه راضيه بهذاك ولدكم !!!

- هااا بعدها دتفكر بس ترضى ترضى

- لاااا مو ترضى كول تجبروها لو تخلوهه بالواقع
ماترضى من كيفها

- ايوووب يابه كف الله يرضى عليك

- هسه ابو مصطفى كلمتك الاخيره تانعرف دربنا

- اعذروني يابه غير جيتكم بوكت متاخر ماريد اتخاجل ويه خوالي وانته ايوب رغم هوستك واجفصك بالحجي بس كبرت بعيني رجولتك وصدقك شفعولك ولا جان سويناها دم على حجيك
- على راسي عمي انته ... بس خلي اكلك حجايتين
ضل اذكرهم كل هالعمر ....
الاولى بنتك ماتنسعد ان زوجتها لذاك وكل ماتجيك
ركز بعينها وشوف دمعتها وتذكرني بوكتها وخلي
خوالكم ينفعوكم كدام دمعتها
والثانيه انا هسه راح اطلع من عتبه بابكم ومادري
بيا ساعه اموت هاي روح وعند الله مكضبها بس
ما اسامحك ليوم الدين من نتكابل عند عرش ربنا
بذاك الوكت ان سالني ربي عنك اسامحك
والياخذها بذمته كل كسره كلبي وحركه روحي
يلا يابه مالنا بعد كعده هين ... حجييييه

- ايووب ياابني
- عمي انته حر ببنتك بس كلامي لاتنساه واحلفك
بمحمد نبينا لاتسمعها كلمه تغثها وتجرحها لان انا
حبيتها هي مالها ذنب بنتك الشرف والعفه يريدون
منها وانا وكلبي نتجازه .... يلاااا انا طالع كبلكم
.
.
سمعت الباب نفتحت وهو طلع وطبك باب الشارع
حييل .. اجتي امه وبيبيته بوسني واني بس دموع
تتجاره ماكدرت انطق بحرف ... واسمع صوت
الهورن خبص الدنيا بي ... ايوب محروك كلبه
ومابقى شي ماسواه ويه ابويه الله يعلم بحاله هسه

طلعو همه واني ركضت صعدت لغرفتي وقفلت
الباب وتمددت ابجي كلبي يوجعني راح كل الامل
صارت صدك والاحبه اختفى من حياتي يعني فرحه عمري انباكت مني بدقايق .....
.
.
✨ يتبع.

—————————

#شقراء_بغداد

بارت_٨


من بعد ماراحو عائله ايوب بقيت ابجي بغرفتي خوف وقهر لحلم تبخر بلحضه ...ضليت على هالحاله لليل محد وصل غرفتي ولاحتى على العشه نزلت.. صارت ساعه ١١ واندكت الباب فتحت ولكيت ابويه واكف وشايل وياه صينيه صغيره بيهه كلاص حليب وكعك ابو السمسم ابتسمتله واخذتهه منه وكعدنا على الجربايه

- شبيج باباتي ليش هيج تغيرت حالتج من العصر لهسه

- تعبانه شويه بابا

- شوفي هو سالفه هالولد مدتخش بعقلي فاحجيلي
السالفه من البدايه حتى اكون وياج مو ضدج ،، انتي بنتي الاثق بيهه واعتمد عليهه بكلشي احجيلي ولتخافين

- بابا هو الولد ويانه بالقسم بس ما عندي شي وياه
غير الحجي العادي مثل كل الزملاء البقيه بس هو
عنده نوع من الاهتمام الي غير عن بقيه الطلاب

- شلون هذا الاهتمام .. احجي بنتي غير افتهم اذا مو اني احل مشاكلج لعد منو يحلهه الج فهميني

- يعني هو مثلا يهتم بكل المحاضرات الي يشرح اذا فاتني موضوع ومرات يجي يوصينا انتبهو من فلان مجموعه اذا تاخرت على المحاضره هو يحاجي الاستاذ حتى يقبل يدخلني وينبه عليه ماتاخر بعد يعني هيج اشياء

- هاااا يعني مثل ولي امر صاير عليج هناك مووو

- اي هيج يعني

- زين وهذا حالج كله لان مقبلت بي تريدي يعني

- لاا مو علموده بس من سمعت حجيكم تبينلي ان زواجي من محمد شي ثابت مايغيره حتى قراري بالرفض واني ماريده محمد واهله ماحبهم وميناسبوني بابا

- بس يابنتي الولد كرابتنا واهله نعرفهم وناسهم خوش ناس اهل ضيافه ونخوه والولد صارله سنين ينتظر وهذا اولى من هذا

- بابا اني مداكلك اريد هذا اني ماريد محمد هو وكلشي يتعلق بي ماريده مو لسبب الولد الي اجه بس اني نفسي ماترغبه ولاترغب اهله وانته شفت بعينك شلون يحجون عليه وبيتنا لعد هناك شيسون بيه

- والله حيرتيني

- بابا هسه يعني ضروري اتزوج عوفهم واني ماريد الزواج لا منه ولا من غيره خليني هنا عندك اداريك واداري اخواني واكمل دراستي وان شاء الله احصل ماجستير شيفيدني الزواج شهادتي وياي تنفعني اكثر

- بنتي البنيه مصيرها تتزوج والشهاده تجي بس
البنيه لازملها بيت يحويها ورجال يسترعليهه ويحاميهه اني مو دايملج يا بابا اخوتج كل واحد باجر عكبه يتزوج ويكون حياته اني وامج كبرنا شلون تضلين وحدج انتي

- لعد فدوه بابا سوي اي شي بس لا تورطني بمحمد والله مااطيقه واخاف منه ارجوك ارجوك اذا تحبني وتريد مصلحتي لا تزوجني اله

- نشوف شلون تاليهه خليني افكر هسه اكلي انتي
وغسلي ونامي والصباح رباح

- ماشي تصبح على خير

راح وضليت اكل ارتاحت نفسيتي من فهمت ابويه
شنو رغبتي وخوفي واثقه مايخليني بحيره ولا يجبرني لان اني غاليه عنده ...

مرت ايام وصار وقت الرجعه للدوام واني حيل متخوفه من الدوام ماعرف شلون راح اشوف ايوب شلون احواله صارت وشنو سوه الايام هاي ماعرفت عنه خبر وبالي يمه كل ثانيه افكر بي .....

يوم الاحد ... كشخت وتعطرت وطلعت مستعجله اريد بس اوصل واشوفه بس اريد المح عيونه وذاك الامان وصلت وعيوني ادور عليه بكل مكان ...سلمت على البنات واحجي وياهم وكل فكري يمه وينه ليش ما شفته

صار وقت المحاضره رحنا دخلنا والاستاذ اخذ الحضور وهو ماكو خلصت المحاضره وماتحملت بعد لازم اسئل رحت على فرح وكتلهه تسال احمد بلكي سامع من الولد شي عنه ...

ضليت انتظرها بره ربع ساعه اجتني وتكول ..
ايوب مسافر للكويت صارله اربع ايام ومايعرفون شوكت يرجع .....

من صدمتي حتى مارديت شي عليهه عفتها ومشيت رحت كعدت وحدي بمكان هادىء والصدمه اثاراها بعدها عليه ....

يعني شلون يسافر وميكولي مو يعرف اني احسب
يوم يوم حتى اداوم واشوفه ونحجي ونلكه حل شلون هيج يروح وميودعني لو بكلمه .. هاي صارت اسمع من الغريب احواله !!!!

دمعت عيني بحسره وقله حيله حسيت صدري ينقبض ويفك كل مافكر انه هناك واني كاعده انتظره ....

بعدين هديت نفسي وكلت الغايب عذره وياه يجوز شغله خلاه يروح مستعجل ومالحك يودعني ....

مرت الايام وصارن اسبوعين وهو ماكو عنه اي خبر وكل يوم اني اروح للدوام بامل اشوفه راجع واعاتبه وارجع بخذلاني وحسرتي للبيت ....

محتاجته شوق ولهفه وضياع وهو مو داري عني شي كل ليله افتح البرده واضل واكفه انتظر على الشباك بلكي يمر ....

الانتظار صعب اخذ مني ضحكتي وصار كلشي رمادي بحياتي مايبهرني شي بس رجعته وشوفه طوله وعيونه

بالاسبوع الثالث .... طلعت من الدوام ساعه ١٢ ونص ودامشي وحاضنه كتبي وعيوني بالكاع وسمعت واحد يصيح باسمي رفعت راسي وانصدمت توقفت بمكاني

- محمد ؟؟؟؟
- شلونج
- زينه. شجابك هنا
- عندي شغله هنا وكلت امر اسلم عليج
- هاا وشدلاك بكليتي هم !!
- اكو رجال ميعرف بمرته وين تروح وتجي اكيد اندلهه بس مصارلي مجال اسير عليج من كبل
- هاا ،، زين من رخصتك وكفتي وياك هيج محلوه
كدام الطلاب اني لازم ارجع للبيت
- اي امشي اوصلج بسيارتي
- لا مشكور اني ارجع
- كتلج امشي اني جاي حتى اشوفج
- واني كتلك ماريد اني ارجع

درت وجهي عنه ومشيت اجه ورايه ماهتميتله رحت
بسرعه وصعدت بالمنشأه وهو ضل واكف ويفر براسه منا ومنا ....

شيخلصهه هاي حتى للكليه لحكني والله لو يشوفك ايوب يسويك وصلتين ويعلكلك باب الكليه ....

رجعت للبيت وحجيت لابويه على جيه محمد وكتله
هواي يضايقني كل مره الكاه بوجهي وهو كلي اني
اتفاهم وياه وبعد مايتعرضلج ....

امي خانسه هالفتره الحجايه الي تعجبهه او ماتعجبهه تسمعهه وتسكت ومادير بال لشي ...

مر يومين وبنفس الوقت طلعت من الكليه وهم لكيت محمد واكفلي درت وجهي عنه ومشيت اجه ورايه وكفت بكل هدوء ماريد تصير مشاكل وامن ...

- محمد شنو الي تريده مني مو عيب عليك لاحكني

- اذا انتي ماتنطين مجال افهمج شسوي يعني كتلج
امشي وياي نحجي

- اني ماريد احجي شي وياك لو يدري بيك ابويه هنا مايرحمك روح وعوفني

-زهرااااااء السانج احفظي ... جيت اريد احجيلج كلمتين وامشي لاتسويهه سالفه عليه

- امري لله امشي نحجي بغير مكان هنا ماريد تصير عليه سمعه محلوه

- امشي سيارتي عبور الشارع

- لاااا ماكتلك نروح بسيارتك كتلك نمشي كم خطوه يعني اني ماصعد ويه غريب

- هسه اني غريب صرت !!!

- كنت ولا زلت غريب القريب هو الي اني اريده قريب مو الي يربطني بي وثاق عائلي

- انتي ليش هيج كارهتني شمسويلج اني هاااا

- ماكرهك بس انته تزعجني بتصرفاتك

- لااا والله تكرهيني اني صوجي باقي هالسنين احب وحده ماتكلف نفسهه تكلي شلونك شجابك هالطريق خير بيك شي بس فالحه تطرد وتلاسن

- لا فهمتني غلط ماعندي شي وياك بس انته تحرجني يعني شنو توكفني كدام كليتي خلي نحجي لاا وتريد اصعد وياك بسيارتك اذا بابا عرف شيكول عليه هااا خليك بموقفي يعني اجي اخذ وانطي وياك بالحجي تريد

- لج بابه افهمي انتي مرتتتتتتي مرتتتي ابوج ليش ميرضى

- شنووووو مرتك من شوكت صرررت مرتك

- جاا والفاتحه القريناهه والبيت الابناه والفلوس الي بدم كلبي لميتهه لزواجنا هاي كلهه عندج بالرجلين تروح

- محمد انته ليش دتبني امال بشي فارغ تدري بيه ماوافق بهالزواج والفاتحه الي نقرت من اني وصغيره وهسه كبرت وكلشي تغير

- وانه شو ماتغيرت باقي على حبج وفي شو ماكلت كبرت وماكلت متريد ولا هتميت لحجي الوادم زهررراء انتي ليش متنطيني فرصه اشوفج حبي شلونه لج والله ماكو احد بهالكون يحبج مثلي اني تحملتج وصبرت وتعبت كله لاجل الكاج بيتي كليلي بشنو غلطت وياج ؟؟؟؟؟

- محمد ارجووك كافي

- لا لا فهميني اني جاي اليوم اريد افهم اني شمسويلج وهيج كارهتني !!!
فديوم غاثج مسمعج كلام محلو
حارمج من شي ؟؟ ضحكت عليج بشي ؟؟ اذيتج ؟؟
بكتج كتلتج ؟؟؟ فهميني شمسويلج اشو شايلج بالصلوات ترفضيني واجيج محمل اشكال للبيت واجبر اهلي يجون لخاطرج حتى اشوفج واحسبهن يوم يوم هالسنين تمشي حتى نتزوج ...... فهميني يبنت الناس انه بشنو غلطت وياج شنو لان حبيتج وردتج بالحلال !!!!!!
ليش ساكته فهميني ....

- انته ماسويتلي شي بس اني ماريد اتزوج الخطا مو بيك افهمني ارجوك اني خايفه واصرارك هذا يزيدني خوف

- تدرين ليش خايفه مني ورافضتني لان ماتعرفيني
ما منطيتني مجال اشوفج الحنيه الي بكلبي الج
يامره والله حبيتج وماذنبت ليش حاركه كلبي وملوعه روحي وسنيني ....كليلي شبقى ماسويته حتى ترضين وين شايفتلج رجال يتوسل بمره ترضى بحبه وتتزوجه
زهرااء اني صرت هيج مو لاني ماعندي كرامه بس انتي مامخليتلي طريق اجيج منه وكلبي ماجاي يرحمني كليلي شذنبي اني عايش على امل وانتي تهدمين بي

ضليت صافنه بحجيه صحيح هو شذنبه ؟؟؟؟
ليش هيج صرت انانيه وماشوف تعبه لاجلي ولا وفائه جاي ويتوسل واني اعامله بارذل المعامله صعبه هيج

- طيب انطيني مهله افكر

- زهراااء لاتضلين معلكتني هيج لا اني للسمه ولا للكاع

- شوف ماجذب عليك اني خايفه من هالزواج ومامقتنعه بي بس ماريد اظلمك فعوفني على راحتي هالفتره وخليني اعرف اتصرف بهدوء رجاءاً محمد

- زين اخليج على هواج وباقي انتظر ردج الج شهررجعيلي بي خبر

- ماشي

- زين اني اروح انتبهي على نفسج وفكري زين

- الله وياك

من بعد كلامي ويه محمد تخربطت افكاري وصرت بين نارين .. نار حبي بايوب ونار حب محمد الي ماترضى تطفى وتحرك كلشي حواليه حتى تحصلني ....

العقل يحجي شي والكلب يريد شي واني التايهه بين
الاثنين ... كل المنطق والعقل متوقف على رجعه
ايوب بلا شوفته ماكدر اتخذ قرار ولا اتحرك خطوه وحده .... اصلا احس حياتي وكفت على اليوم الي طلع بي من بيتنه وايامي تنتظر رجعته حتى تتغير

صرت اكضي الليل فاتحه الشبابيك ومطفيه الضوا
وعلى ضوا الكمر اسهر صافنه بي ...

صرت انتظر الليل حتى انفرد بغرفتي واكعد اكتب
هذا الشعور المكتوم .....
🎋
الثالثه صباحاً ....
في بدء ظلام يوم ربيعي اخر بهواءه البارد مصحوب بنفحه ترابيه رقيقه من عام ١٩٨٥...
هدوء وصرير اُذن هو كل مايحدث الان لكن دون
سلام داخلي فهذا الاخير قد اضاعه نظري ...
بكونهِ قد اُفتقد عند تمعني فيي فأراني كأني لست